੧੦. ਚੂਲ਼ਪਨ੍ਥਕਸੁਤ੍ਤਵਣ੍ਣਨਾ

੫੦. ਦਸਮੇ ਚੂਲ਼ਪਨ੍ਥਕੋਤਿ ਮਹਾਪਨ੍ਥਕਤ੍ਥੇਰਸ੍ਸ ਕਨਿਟ੍ਠਭਾਤਿਕਤ੍ਤਾ ਪਨ੍ਥੇ ਜਾਤਤ੍ਤਾ ਚ ਦਹਰਕਾਲੇ ਲਦ੍ਧਵੋਹਾਰੇਨ ਅਪਰਭਾਗੇਪਿ ਅਯਮਾਯਸ੍ਮਾ ‘‘ਚੂਲ਼ਪਨ੍ਥਕੋ’’ਤ੍ਵੇਵ ਪਞ੍ਞਾਯਿਤ੍ਥ. ਗੁਣਵਿਸੇਸੇਹਿ ਪਨ ਛਲ਼ਭਿਞ੍ਞੋ ਪਭਿਨ੍ਨਪਟਿਸਮ੍ਭਿਦੋ ‘‘ਏਤਦਗ੍ਗਂ, ਭਿਕ੍ਖਵੇ, ਮਮ ਸਾਵਕਾਨਂ ਭਿਕ੍ਖੂਨਂ ਮਨੋਮਯਂ ਕਾਯਂ ਅਭਿਨਿਮ੍ਮਿਨਨ੍ਤਾਨਂ ਯਦਿਦਂ ਚੂਲ਼ਪਨ੍ਥਕੋ, ਚੇਤੋਵਿਵਟ੍ਟਕੁਸਲਾਨਂ ਯਦਿਦਂ ਚੂਲ਼ਪਨ੍ਥਕੋ’’ਤਿ ਦ੍ਵੀਸੁ (ਅ. ਨਿ. ੧.੧੯੯) ਠਾਨੇਸੁ ਭਗਵਤਾ ਏਤਦਗ੍ਗੇ ਠਪਿਤੋ ਅਸੀਤਿਯਾ ਮਹਾਸਾਵਕੇਸੁ ਅਬ੍ਭਨ੍ਤਰੋ.

ਸੋ ਏਕਦਿਵਸਂ ਪਚ੍ਛਾਭਤ੍ਤਂ ਪਿਣ੍ਡਪਾਤਪ੍ਪਟਿਕ੍ਕਨ੍ਤੋ ਅਤ੍ਤਨੋ ਦਿਵਾਟ੍ਠਾਨੇ ਦਿਵਾਵਿਹਾਰਂ ਨਿਸਿਨ੍ਨੋ ਸਮਾਪਤ੍ਤੀਹਿ ਦਿਵਸਭਾਗਂ ਵੀਤਿਨਾਮੇਤ੍ਵਾ ਸਾਯਨ੍ਹਸਮਯਂ ਉਪਾਸਕੇਸੁ ਧਮ੍ਮਸ੍ਸਵਨਤ੍ਥਂ ਅਨਾਗਤੇਸੁ ਏਵ ਵਿਹਾਰਮਜ੍ਝਂ ਪਵਿਸਿਤ੍ਵਾ ਭਗਵਤਿ ਗਨ੍ਧਕੁਟਿਯਂ ਨਿਸਿਨ੍ਨੇ ‘‘ਅਕਾਲੋ ਤਾਵ ਭਗਵਤੋ ਉਪਟ੍ਠਾਨਂ ਉਪਸਙ੍ਕਮਿਤੁ’’ਨ੍ਤਿ ਗਨ੍ਧਕੁਟਿਪਮੁਖੇ ਏਕਮਨ੍ਤਂ ਨਿਸੀਦਿ ਪਲ੍ਲਙ੍ਕਂ ਆਭੁਜਿਤ੍ਵਾ. ਤੇਨ ਵੁਤ੍ਤਂ – ‘‘ਤੇਨ ਖੋ ਪਨ ਸਮਯੇਨ ਆਯਸ੍ਮਾ ਚੂਲ਼ਪਨ੍ਥਕੋ ਭਗਵਤੋ ਅਵਿਦੂਰੇ ਨਿਸਿਨ੍ਨੋ ਹੋਤਿ ਪਲ੍ਲਙ੍ਕਂ ਆਭੁਜਿਤ੍ਵਾ ਉਜੁਂ ਕਾਯਂ ਪਣਿਧਾਯ ਪਰਿਮੁਖਂ ਸਤਿਂ ਉਪਟ੍ਠਪੇਤ੍ਵਾ’’ਤਿ. ਸੋ ਹਿ ਤਦਾ ਕਾਲਪਰਿਚ੍ਛੇਦਂ ਕਤ੍ਵਾ ਸਮਾਪਤ੍ਤਿਂ ਸਮਾਪਜ੍ਜਿਤ੍ਵਾ ਨਿਸੀਦਿ.

ਏਤਮਤ੍ਥਂ ਵਿਦਿਤ੍ਵਾਤਿ ਏਤਂ ਆਯਸ੍ਮਤੋ ਚੂਲ਼ਪਨ੍ਥਕਸ੍ਸ ਕਾਯਚਿਤ੍ਤਾਨਂ ਸਮ੍ਮਾਪਣਿਹਿਤਭਾਵਸਙ੍ਖਾਤਂ ਅਤ੍ਥਂ ਜਾਨਿਤ੍ਵਾ. ਇਮਂ ਉਦਾਨਨ੍ਤਿ ਅਞ੍ਞੋਪਿ ਯੋ ਪਸ੍ਸਦ੍ਧਕਾਯੋ ਸਬ੍ਬਿਰਿਯਾਪਥੇਸੁ ਉਪਟ੍ਠਿਤਸ੍ਸਤਿ ਸਮਾਹਿਤੋ, ਤਸ੍ਸ ਭਿਕ੍ਖੁਨੋ ਅਨੁਪਾਦਾ ਪਰਿਨਿਬ੍ਬਾਨਪਰਿਯੋਸਾਨਸ੍ਸ ਵਿਸੇਸਾਧਿਗਮਸ੍ਸ ਤਤ੍ਥ ਪਾਤੁਭਾਵਵਿਭਾਵਨਂ ਇਮਂ ਉਦਾਨਂ ਉਦਾਨੇਸਿ.

ਤਤ੍ਥ ਠਿਤੇਨ ਕਾਯੇਨਾਤਿ ਕਾਯਦ੍ਵਾਰਿਕਸ੍ਸ ਅਸਂਵਰਸ੍ਸ ਪਹਾਨੇਨ ਅਕਰਣੇਨ ਸਮ੍ਮਾ ਠਪਿਤੇਨ ਚੋਪਨਕਾਯੇਨ, ਤਥਾ ਚਕ੍ਖਾਦੀਨਂ ਇਨ੍ਦ੍ਰਿਯਾਨਂ ਨਿਬ੍ਬਿਸੇਵਨਭਾਵਕਰਣੇਨ ਸੁਟ੍ਠੁ ਠਪਿਤੇਨ ਪਞ੍ਚਦ੍ਵਾਰਿਕਕਾਯੇਨ, ਸਂਯਤਹਤ੍ਥਪਾਦਤਾਯ ਹਤ੍ਥਕੁਕ੍ਕੁਚ੍ਚਾਦੀਨਂ ਅਭਾਵਤੋ ਅਪਰਿਫਨ੍ਦਨੇਨ ਠਿਤੇਨ ਕਰਜਕਾਯੇਨ ਚਾਤਿ ਸਙ੍ਖੇਪਤੋ ਸਬ੍ਬੇਨਪਿ ਕਾਯੇਨ ਨਿਬ੍ਬਿਕਾਰਤਾਸਙ੍ਖਾਤੇਨ ਨਿਚ੍ਚਲਭਾਵੇਨ ਠਿਤੇਨ. ਏਤੇਨਸ੍ਸ ਸੀਲਪਾਰਿਸੁਦ੍ਧਿ ਦਸ੍ਸਿਤਾ. ਇਤ੍ਥਮ੍ਭੂਤਲਕ੍ਖਣੇ ਚ ਇਦਂ ਕਰਣਵਚਨਂ. ਠਿਤੇਨ ਚੇਤਸਾਤਿ ਚਿਤ੍ਤਸ੍ਸ ਠਿਤਿਪਰਿਦੀਪਨੇਨ ਸਮਾਧਿਸਮ੍ਪਦਂ ਦਸ੍ਸੇਤਿ. ਸਮਾਧਿ ਹਿ ਚਿਤ੍ਤਸ੍ਸ ‘ਠਿਤੀ’ਤਿ ਵੁਚ੍ਚਤਿ. ਤਸ੍ਮਾ ਸਮਥਵਸੇਨ ਵਿਪਸ੍ਸਨਾਵਸੇਨੇਵ ਵਾ ਏਕਗ੍ਗਤਾਯ ਸਤਿ ਚਿਤ੍ਤਂ ਆਰਮ੍ਮਣੇ ਏਕੋਦਿਭਾਵੂਪਗਮਨੇਨ ਠਿਤਂ ਨਾਮ ਹੋਤਿ, ਨ ਅਞ੍ਞਥਾ. ਇਦਞ੍ਚ ਯਥਾਵੁਤ੍ਤਕਾਯਚਿਤ੍ਤਾਨਂ ਠਪਨਂ ਸਮਾਦਹਨਂ ਸਬ੍ਬਸ੍ਮਿਂ ਕਾਲੇ ਸਬ੍ਬੇਸੁ ਚ ਇਰਿਯਾਪਥੇਸੁ ਇਚ੍ਛਿਤਬ੍ਬਨ੍ਤਿ ਦਸ੍ਸੇਨ੍ਤੋ ਆਹ – ‘‘ਤਿਟ੍ਠਂ ਨਿਸਿਨ੍ਨੋ ਉਦ ਵਾ ਸਯਾਨੋ’’ਤਿ. ਤਤ੍ਥ ਵਾ-ਸਦ੍ਦੋ ਅਨਿਯਮਤ੍ਥੋ. ਤੇਨ ਤਿਟ੍ਠਨ੍ਤੋ ਵਾ ਨਿਸਿਨ੍ਨੋ ਵਾ ਸਯਾਨੋ ਵਾ ਤਦਞ੍ਞਿਰਿਯਾਪਥੋ ਵਾਤਿ ਅਯਮਤ੍ਥੋ ਦੀਪਿਤੋ ਹੋਤੀਤਿ ਚਙ੍ਕਮਨਸ੍ਸਾਪਿ ਇਧ ਸਙ੍ਗਹੋ ਵੇਦਿਤਬ੍ਬੋ.

ਏਤਂ ਸਤਿਂ ਭਿਕ੍ਖੁ ਅਧਿਟ੍ਠਹਾਨੋਤਿ ਯਾਯ ਪਗੇਵ ਪਰਿਸੁਦ੍ਧਸਮਾਚਾਰੋ ਕਾਯਚਿਤ੍ਤਦੁਟ੍ਠੁਲ੍ਲਭਾਵੂਪਸਮਨੇਨ ਕਾਯਂ ਚਿਤ੍ਤਞ੍ਚ ਅਸਾਰਦ੍ਧਂ ਕਤ੍ਵਾ ਪਟਿਲਦ੍ਧਾਯ ਅਨਵਜ੍ਜਸੁਖਾਧਿਟ੍ਠਾਯ ਕਾਯਚਿਤ੍ਤਪਸ੍ਸਦ੍ਧਿਵਸੇਨ ਚਿਤ੍ਤਂ ਲਹੁਂ ਮੁਦੁਂ ਕਮ੍ਮਞ੍ਞਞ੍ਚ ਕਤ੍ਵਾ ਸਮ੍ਮਾ ਠਪੇਨ੍ਤੋ ਸਮਾਦਹਨ੍ਤੋ ਕਮ੍ਮਟ੍ਠਾਨਂ ਪਰਿਬ੍ਰੂਹੇਤਿ ਮਤ੍ਥਕਞ੍ਚ ਪਾਪੇਤਿ, ਤਂ ਏਵ ਕਮ੍ਮਟ੍ਠਾਨਾਨੁਯੋਗਸ੍ਸ ਆਦਿਮਜ੍ਝਪਰਿਯੋਸਾਨੇਸੁ ਬਹੂਪਕਾਰਂ ਸਤਿਂ ਭਿਕ੍ਖੁ ਅਧਿਟ੍ਠਹਾਨੋ ਸੀਲਵਿਸੋਧਨਂ ਆਦਿਂ ਕਤ੍ਵਾ ਯਾਵ ਵਿਸੇਸਾਧਿਗਮਾ ਤਤ੍ਥ ਤਤ੍ਥ ਅਧਿਟ੍ਠਹਨ੍ਤੋਤਿ ਅਤ੍ਥੋ. ਲਭੇਥ ਪੁਬ੍ਬਾਪਰਿਯਂ ਵਿਸੇਸਨ੍ਤਿ ਸੋ ਏਵਂ ਸਤਿਆਰਕ੍ਖੇਨ ਚੇਤਸਾ ਕਮ੍ਮਟ੍ਠਾਨਂ ਉਪਰੂਪਰਿ ਵਡ੍ਢੇਨ੍ਤੋ ਬ੍ਰੂਹੇਨ੍ਤੋ ਫਾਤਿਂ ਕਰੋਨ੍ਤੋ ਪੁਬ੍ਬਾਪਰਿਯਂ ਪੁਬ੍ਬਾਪਰਿਯਵਨ੍ਤਂ ਪੁਬ੍ਬਾਪਰਭਾਗੇਨ ਪਵਤ੍ਤਂ ਉਲ਼ਾਰੁਲ਼ਾਰਤਰਾਦਿਭੇਦਵਿਸੇਸਂ ਲਭੇਯ੍ਯ.

ਤਤ੍ਥ ਦੁਵਿਧੋ ਪੁਬ੍ਬਾਪਰਿਯਵਿਸੇਸੋ ਸਮਥਵਸੇਨ ਵਿਪਸ੍ਸਨਾਵਸੇਨ ਚਾਤਿ. ਤੇਸੁ ਸਮਥਵਸੇਨ ਤਾਵ ਨਿਮਿਤ੍ਤੁਪ੍ਪਤ੍ਤਿਤੋ ਪਟ੍ਠਾਯ ਯਾਵ ਨੇਵਸਞ੍ਞਾਨਾਸਞ੍ਞਾਯਤਨਵਸੀਭਾਵੋ, ਤਾਵ ਪਵਤ੍ਤੋ ਭਾਵਨਾਵਿਸੇਸੋ ਪੁਬ੍ਬਾਪਰਿਯਵਿਸੇਸੋ. ਵਿਪਸ੍ਸਨਾਵਸੇਨ ਪਨ ਰੂਪਮੁਖੇਨ ਅਭਿਨਿਵਿਸਨ੍ਤਸ੍ਸ ਰੂਪਧਮ੍ਮਪਰਿਗ੍ਗਹਤੋ, ਇਤਰਸ੍ਸ ਨਾਮਧਮ੍ਮਪਰਿਗ੍ਗਹਤੋ ਪਟ੍ਠਾਯ ਯਾਵ ਅਰਹਤ੍ਤਾਧਿਗਮੋ, ਤਾਵ ਪਵਤ੍ਤੋ ਭਾਵਨਾਵਿਸੇਸੋ ਪੁਬ੍ਬਾਪਰਿਯਵਿਸੇਸੋ. ਅਯਮੇਵ ਚ ਇਧਾਧਿਪ੍ਪੇਤੋ.

ਲਦ੍ਧਾਨ ਪੁਬ੍ਬਾਪਰਿਯਂ ਵਿਸੇਸਨ੍ਤਿ ਪੁਬ੍ਬਾਪਰਿਯਵਿਸੇਸਂ ਉਕ੍ਕਂਸਪਾਰਮਿਪ੍ਪਤ੍ਤਂ ਅਰਹਤ੍ਤਂ ਲਭਿਤ੍ਵਾ. ਅਦਸ੍ਸਨਂ ਮਚ੍ਚੁਰਾਜਸ੍ਸ ਗਚ੍ਛੇਤਿ ਜੀਵਿਤੁਪਚ੍ਛੇਦਵਸੇਨ ਸਬ੍ਬੇਸਂ ਸਤ੍ਤਾਨਂ ਅਭਿਭਵਨਤੋ ਮਚ੍ਚੁਰਾਜਸਙ੍ਖਾਤਸ੍ਸ ਮਰਣਸ੍ਸ ਵਿਸਯਭੂਤਂ ਭਵਤ੍ਤਯਂ ਸਮਤਿਕ੍ਕਨ੍ਤਤ੍ਤਾ ਅਦਸ੍ਸਨਂ ਅਗੋਚਰਂ ਗਚ੍ਛੇਯ੍ਯ. ਇਮਸ੍ਮਿਂ ਵਗ੍ਗੇ ਯਂ ਅਵੁਤ੍ਤਂ, ਤਂ ਹੇਟ੍ਠਾ ਵੁਤ੍ਤਨਯਮੇਵਾਤਿ.

ਦਸਮਸੁਤ੍ਤਵਣ੍ਣਨਾ ਨਿਟ੍ਠਿਤਾ.

ਨਿਟ੍ਠਿਤਾ ਚ ਮਹਾਵਗ੍ਗਵਣ੍ਣਨਾ.