੬. ਜਚ੍ਚਨ੍ਧਵਗ੍ਗੋ

੧. ਆਯੁਸਙ੍ਖਾਰੋਸ੍ਸਜ੍ਜਨਸੁਤ੍ਤਵਣ੍ਣਨਾ

੫੧. ਜਚ੍ਚਨ੍ਧਵਗ੍ਗਸ੍ਸ ਪਠਮੇ ਵੇਸਾਲਿਯਨ੍ਤਿਆਦਿ ਹੇਟ੍ਠਾ ਵੁਤ੍ਤਤ੍ਥਮੇਵ. ਵੇਸਾਲਿਂ ਪਿਣ੍ਡਾਯ ਪਾਵਿਸੀਤਿ ਕਦਾ ਪਾਵਿਸਿ? ਉਕ੍ਕਾਚੇਲਤੋ ਨਿਕ੍ਖਮਿਤ੍ਵਾ ਵੇਸਾਲਿਂ ਗਤਕਾਲੇ. ਭਗਵਾ ਹਿ ਵੇਲ਼ੁਵਗਾਮਕੇ ਵਸ੍ਸਂ ਵਸਿਤ੍ਵਾ ਤਤੋ ਨਿਕ੍ਖਮਿਤ੍ਵਾ ਅਨੁਪੁਬ੍ਬੇਨ ਸਾਵਤ੍ਥਿਂ ਪਤ੍ਵਾ ਜੇਤਵਨੇ ਵਿਹਾਸਿ. ਤਸ੍ਮਿਂ ਕਾਲੇ ਧਮ੍ਮਸੇਨਾਪਤਿ ਅਤ੍ਤਨੋ ਆਯੁਸਙ੍ਖਾਰਂ ਓਲੋਕੇਤ੍ਵਾ ‘‘ਸਤ੍ਤਾਹਮੇਵ ਪਵਤ੍ਤਿਸ੍ਸਤੀ’’ਤਿ ਞਤ੍ਵਾ ਭਗਵਨ੍ਤਂ ਅਨੁਜਾਨਾਪੇਤ੍ਵਾ ਨਾਲ਼ਕਗਾਮਂ ਗਨ੍ਤ੍ਵਾ ਤਤ੍ਥ ਮਾਤਰਂ ਸੋਤਾਪਤ੍ਤਿਫਲੇ ਪਤਿਟ੍ਠਾਪੇਤ੍ਵਾ ਪਰਿਨਿਬ੍ਬਾਯਿ. ਸਤ੍ਥਾ ਚੁਨ੍ਦੇਨ ਆਭਤਾ ਤਸ੍ਸ ਧਾਤੁਯੋ ਗਹੇਤ੍ਵਾ ਧਾਤੁਚੇਤਿਯਂ ਕਾਰਾਪੇਤ੍ਵਾ ਮਹਾਭਿਕ੍ਖੁਸਙ੍ਘਪਰਿਵੁਤੋ ਰਾਜਗਹਂ ਅਗਮਾਸਿ. ਤਤ੍ਥ ਗਤਕਾਲੇ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਪਰਿਨਿਬ੍ਬਾਯਿ. ਭਗਵਾ ਤਸ੍ਸਪਿ ਧਾਤੁਯੋ ਗਹੇਤ੍ਵਾ ਚੇਤਿਯਂ ਕਾਰਾਪੇਤ੍ਵਾ ਰਾਜਗਹਤੋ ਨਿਕ੍ਖਮਿਤ੍ਵਾ ਅਨੁਪੁਬ੍ਬੇਨ ਉਕ੍ਕਾਚੇਲਂ ਅਗਮਾਸਿ. ਤਤ੍ਥ ਗਙ੍ਗਾਤੀਰੇ ਭਿਕ੍ਖੁਸਙ੍ਘਪਰਿਵੁਤੋ ਨਿਸੀਦਿਤ੍ਵਾ ਅਗ੍ਗਸਾਵਕਾਨਂ ਪਰਿਨਿਬ੍ਬਾਨਪ੍ਪਟਿਸਂਯੁਤ੍ਤਂ ਧਮ੍ਮਂ ਦੇਸੇਤ੍ਵਾ ਉਕ੍ਕਾਚੇਲਤੋ ਨਿਕ੍ਖਮਿਤ੍ਵਾ ਵੇਸਾਲਿਂ ਅਗਮਾਸਿ. ਏਵਂ ਗਤੋ ਭਗਵਾ ‘‘ਪੁਬ੍ਬਣ੍ਹਸਮਯਂ ਨਿਵਾਸੇਤ੍ਵਾ ਪਤ੍ਤਚੀਵਰਮਾਦਾਯ ਵੇਸਾਲਿਂ ਪਿਣ੍ਡਾਯ ਪਾਵਿਸੀ’’ਤਿ ਵੁਚ੍ਚਤਿ. ਤੇਨ ਵੁਤ੍ਤਂ – ‘‘ਉਕ੍ਕਾਚੇਲਤੋ ਨਿਕ੍ਖਮਿਤ੍ਵਾ ਵੇਸਾਲਿਂ ਗਤਕਾਲੇ’’ਤਿ.

ਨਿਸੀਦਨਨ੍ਤਿ ਇਧ ਚਮ੍ਮਕ੍ਖਣ੍ਡਂ ਅਧਿਪ੍ਪੇਤਂ. ਚਾਪਾਲਂ ਚੇਤਿਯਨ੍ਤਿ ਪੁਬ੍ਬੇ ਚਾਪਾਲਸ੍ਸ ਨਾਮ ਯਕ੍ਖਸ੍ਸ ਵਸਿਤਟ੍ਠਾਨਂ ‘‘ਚਾਪਾਲਚੇਤਿਯ’’ਨ੍ਤਿ ਪਞ੍ਞਾਯਿਤ੍ਥ. ਤਤ੍ਥ ਭਗਵਤੋ ਕਤਵਿਹਾਰੋਪਿ ਤਾਯ ਰੁਲ਼੍ਹਿਯਾ ‘‘ਚਾਪਾਲਚੇਤਿਯ’’ਨ੍ਤਿ ਵੁਚ੍ਚਤਿ. ਉਦੇਨਂ ਚੇਤਿਯਨ੍ਤਿ ਏਵਮਾਦੀਸੁਪਿ ਏਸੇਵ ਨਯੋ. ਸਤ੍ਤਮ੍ਬਨ੍ਤਿ ਕਿਕਿਸ੍ਸ ਕਿਰ ਕਾਸਿਰਞ੍ਞੋ ਧੀਤਰੋ ਸਤ੍ਤ ਕੁਮਾਰਿਯੋ ਸਂਵੇਗਜਾਤਾ ਰਾਜਗੇਹਤੋ ਨਿਕ੍ਖਮਿਤ੍ਵਾ ਯਤ੍ਥ ਪਧਾਨਂ ਪਦਹਿਂਸੁ, ਤਂ ਠਾਨਂ ‘‘ਸਤ੍ਤਮ੍ਬਂ ਚੇਤਿਯ’’ਨ੍ਤਿ ਵਦਨ੍ਤਿ. ਬਹੁਪੁਤ੍ਤਨ੍ਤਿ ਬਹੁਪਾਰੋਹੋ ਏਕੋ ਨਿਗ੍ਰੋਧਰੁਕ੍ਖੋ, ਤਸ੍ਮਿਂ ਅਧਿਵਤ੍ਥਂ ਦੇਵਤਂ ਬਹੂ ਮਨੁਸ੍ਸਾ ਪੁਤ੍ਤੇ ਪਤ੍ਥੇਨ੍ਤਿ, ਤਦੁਪਾਦਾਯ ਤਂ ਠਾਨਂ ‘‘ਬਹੁਪੁਤ੍ਤਂ ਚੇਤਿਯ’’ਨ੍ਤਿ ਪਞ੍ਞਾਯਿਤ੍ਥ. ਸਾਰਨ੍ਦਦਨ੍ਤਿ ਸਾਰਨ੍ਦਦਸ੍ਸ ਨਾਮ ਯਕ੍ਖਸ੍ਸ ਵਸਿਤਟ੍ਠਾਨਂ. ਇਤਿ ਸਬ੍ਬਾਨੇਵ ਤਾਨਿ ਬੁਦ੍ਧੁਪ੍ਪਾਦਤੋ ਪੁਬ੍ਬੇ ਦੇਵਤਾਪਰਿਗ੍ਗਹਿਤਤ੍ਤਾ ਚੇਤਿਯਵੋਹਾਰੇਨ ਵੋਹਰਿਤਾਨਿ, ਭਗਵਤੋ ਵਿਹਾਰੇ ਕਤੇਪਿ ਚ ਤਥੇਵ ਪਞ੍ਞਾਯਨ੍ਤਿ. ਰਮਣੀਯਾਤਿ ਏਤ੍ਥ ਵੇਸਾਲਿਯਾ ਤਾਵ ਭੂਮਿਭਾਗਸਮ੍ਪਤ੍ਤਿਯਾ ਪੁਗ੍ਗਲਸਮ੍ਪਤ੍ਤਿਯਾ ਸੁਲਭਪਚ੍ਚਯਤਾਯ ਚ ਰਮਣੀਯਭਾਵੋ ਵੇਦਿਤਬ੍ਬੋ. ਵਿਹਾਰਾਨਂ ਪਨ ਨਗਰਤੋ ਨਾਤਿਦੂਰਤਾਯ ਨਾਚ੍ਚਾਸਨ੍ਨਤਾਯ ਗਮਨਾਗਮਨਸਮ੍ਪਤ੍ਤਿਯਾ ਅਨਾਕਿਣ੍ਣਵਿਹਾਰਟ੍ਠਾਨਤਾਯ ਛਾਯੂਦਕਸਮ੍ਪਤ੍ਤਿਯਾ ਪਵਿਵੇਕਪਤਿਰੂਪਤਾਯ ਚ ਰਮਣੀਯਤਾ ਦਟ੍ਠਬ੍ਬਾ. ਚਤ੍ਤਾਰੋ ਇਦ੍ਧਿਪਾਦਾਤਿ ਏਤ੍ਥ ਇਦ੍ਧਿਪਾਦਪਦਸ੍ਸ ਅਤ੍ਥੋ ਹੇਟ੍ਠਾ ਵੁਤ੍ਤੋਯੇਵ. ਭਾਵਿਤਾਤਿ ਵਡ੍ਢਿਤਾ. ਬਹੁਲੀਕਤਾਤਿ ਪੁਨਪ੍ਪੁਨਂ ਕਤਾ. ਯਾਨੀਕਤਾਤਿ ਯੁਤ੍ਤਯਾਨਂ ਵਿਯ ਕਤਾ. ਵਤ੍ਥੁਕਤਾਤਿ ਪਤਿਟ੍ਠਟ੍ਠੇਨ ਵਤ੍ਥੁ ਵਿਯ ਕਤਾ. ਅਨੁਟ੍ਠਿਤਾਤਿ ਅਧਿਟ੍ਠਿਤਾ. ਪਰਿਚਿਤਾਤਿ ਸਮਨ੍ਤਤੋ ਚਿਤਾ ਸੁਵਡ੍ਢਿਤਾ. ਸੁਸਮਾਰਦ੍ਧਾਤਿ ਸੁਟ੍ਠੁ ਸਮਾਰਦ੍ਧਾ, ਅਤਿਵਿਯ ਸਮ੍ਮਾ ਨਿਪ੍ਫਾਦਿਤਾਤਿ.

ਏਵਂ ਅਨਿਯਮੇਨ ਕਥੇਤ੍ਵਾ ਪੁਨ ਨਿਯਮੇਤ੍ਵਾ ਦਸ੍ਸੇਤੁਂ, ‘‘ਤਥਾਗਤਸ੍ਸ ਖੋ’’ਤਿਆਦਿਮਾਹ. ਏਤ੍ਥ ਚ ਕਪ੍ਪਨ੍ਤਿ ਆਯੁਕਪ੍ਪਂ. ਤਿਟ੍ਠੇਯ੍ਯਾਤਿ ਤਸ੍ਮਿਂ ਤਸ੍ਮਿਂ ਕਾਲੇ ਯਂ ਮਨੁਸ੍ਸਾਨਂ ਆਯੁਪ੍ਪਮਾਣਂ, ਤਂ ਪਰਿਪੁਣ੍ਣਂ ਕਤ੍ਵਾ ਤਿਟ੍ਠੇਯ੍ਯ ਧਰੇਯ੍ਯ. ਕਪ੍ਪਾਵਸੇਸਂ ਵਾਤਿ ‘‘ਅਪ੍ਪਂ ਵਾ ਭਿਯ੍ਯੋ ਵਾ’’ਤਿ (ਦੀ. ਨਿ. ੨.੭; ਅ. ਨਿ. ੭.੭੪) ਵੁਤ੍ਤਂ ਵਸ੍ਸਸਤਤੋ ਅਤਿਰੇਕਂ ਵਾ. ਮਹਾਸੀਵਤ੍ਥੇਰੋ ਪਨਾਹ – ‘‘ਬੁਦ੍ਧਾਨਂ ਅਟ੍ਠਾਨੇ ਗਜ੍ਜਿਤਂ ਨਾਮ ਨਤ੍ਥਿ. ਯਥੇਵ ਹਿ ਵੇਲ਼ੁਵਗਾਮਕੇ ਉਪ੍ਪਨ੍ਨਂ ਮਾਰਣਨ੍ਤਿਕਂ ਵੇਦਨਂ ਦਸ ਮਾਸੇ ਵਿਕ੍ਖਮ੍ਭੇਸਿ, ਏਵਂ ਪੁਨਪ੍ਪੁਨਂ ਤਂ ਸਮਾਪਤ੍ਤਿਂ ਸਮਾਪਜ੍ਜਿਤ੍ਵਾ ਵਿਕ੍ਖਮ੍ਭੇਨ੍ਤੋ ਇਮਂ ਭਦ੍ਦਕਪ੍ਪਮੇਵ ਤਿਟ੍ਠੇਯ੍ਯਾ’’ਤਿ. ਕਸ੍ਮਾ ਪਨ ਨ ਠਿਤੋਤਿ? ਉਪਾਦਿਨ੍ਨਕਸਰੀਰਂ ਨਾਮ ਖਣ੍ਡਿਚ੍ਚਾਦੀਹਿ ਅਭਿਭੁਯ੍ਯਤਿ, ਬੁਦ੍ਧਾ ਚ ਪਨ ਖਣ੍ਡਿਚ੍ਚਾਦਿਭਾਵਂ ਅਪ੍ਪਤ੍ਵਾ ਪਞ੍ਚਮੇ ਆਯੁਕੋਟ੍ਠਾਸੇ ਬਹੁਜਨਸ੍ਸ ਪਿਯਮਨਾਪਕਾਲੇਯੇਵ ਪਰਿਨਿਬ੍ਬਾਯਨ੍ਤਿ. ਬੁਦ੍ਧਾਨੁਬੁਦ੍ਧੇਸੁ ਅਗ੍ਗਸਾਵਕਮਹਾਸਾਵਕੇਸੁ ਪਰਿਨਿਬ੍ਬੁਤੇਸੁ ਅਪਰਿਵਾਰੇਨ ਏਕਕੇਨੇਵ ਠਾਤਬ੍ਬਂ ਹੋਤਿ, ਦਹਰਸਾਮਣੇਰਪਰਿਵਾਰੇਨ ਵਾ. ਤਤੋ ‘‘ਅਹੋ ਬੁਦ੍ਧਾਨਂ ਪਰਿਸਾ’’ਤਿ ਹੀਲ਼ੇਤਬ੍ਬਤਂ ਆਪਜ੍ਜੇਯ੍ਯ, ਤਸ੍ਮਾ ਨ ਠਿਤੋਤਿ. ਏਵਂ ਵੁਤ੍ਤੇਪਿ ਸੋ ਪਨ ਨ ਰੁਚ੍ਚਤਿ, ‘‘ਆਯੁਕਪ੍ਪੋ’’ਤਿ ਇਦਮੇਵ ਅਟ੍ਠਕਥਾਯ ਨਿਯਮਿਤਂ.

ਓਲ਼ਾਰਿਕੇ ਨਿਮਿਤ੍ਤੇਤਿ ਥੂਲੇ ਸਞ੍ਞੁਪ੍ਪਾਦਨੇ. ਥੂਲਸਞ੍ਞੁਪ੍ਪਾਦਨਞ੍ਹੇਤਂ, ‘‘ਤਿਟ੍ਠਤੁ ਭਗਵਾ ਕਪ੍ਪ’’ਨ੍ਤਿ ਸਕਲਕਪ੍ਪਂ ਅਵਟ੍ਠਾਨਯਾਚਨਾਯ ਯਦਿਦਂ ‘‘ਯਸ੍ਸ ਕਸ੍ਸਚਿ, ਆਨਨ੍ਦ, ਚਤ੍ਤਾਰੋ ਇਦ੍ਧਿਪਾਦਾ ਭਾਵਿਤਾ’’ਤਿਆਦਿਨਾ ਅਞ੍ਞਾਪਦੇਸੇਨ ਅਤ੍ਤਨੋ ਚਤੁਰਿਦ੍ਧਿਪਾਦਭਾਵਨਾਨੁਭਾਵੇਨ ਕਪ੍ਪਂ ਅਵਟ੍ਠਾਨਸਮਤ੍ਥਤਾਵਿਭਾਵਨਂ. ਓਭਾਸੇਤਿ ਪਾਕਟਵਚਨੇ. ਪਾਕਟਞ੍ਚੇਤਂ ਵਚਨਂ ਪਰਿਯਾਯਂ ਮੁਞ੍ਚਿਤ੍ਵਾ ਉਜੁਕਮੇਵ ਅਤ੍ਤਨੋ ਅਧਿਪ੍ਪਾਯਵਿਭਾਵਨਂ.

ਬਹੁਜਨਹਿਤਾਯਾਤਿ ਮਹਾਜਨਸ੍ਸ ਹਿਤਤ੍ਥਾਯ. ਬਹੁਜਨਸੁਖਾਯਾਤਿ ਮਹਾਜਨਸ੍ਸ ਸੁਖਤ੍ਥਾਯ. ਲੋਕਾਨੁਕਮ੍ਪਾਯਾਤਿ ਸਤ੍ਤਲੋਕਸ੍ਸ ਅਨੁਕਮ੍ਪਂ ਪਟਿਚ੍ਚ. ਕਤਰਸ੍ਸ ਸਤ੍ਤਲੋਕਸ੍ਸ? ਯੋ ਭਗਵਤੋ ਧਮ੍ਮਦੇਸਨਂ ਸੁਤ੍ਵਾ ਪਟਿਵਿਜ੍ਝਤਿ, ਅਮਤਪਾਨਂ ਪਿਵਤਿ, ਤਸ੍ਸ. ਭਗਵਤੋ ਹਿ ਧਮ੍ਮਚਕ੍ਕਪ੍ਪਵਤ੍ਤਨਸੁਤ੍ਤਦੇਸਨਾਯ ਅਞ੍ਞਾਤਕੋਣ੍ਡਞ੍ਞਪ੍ਪਮੁਖਾ ਅਟ੍ਠਾਰਸ ਬ੍ਰਹ੍ਮਕੋਟਿਯੋ ਧਮ੍ਮਂ ਪਟਿਵਿਜ੍ਝਿਂਸੁ. ਏਵਂ ਯਾਵ ਸੁਭਦ੍ਦਪਰਿਬ੍ਬਾਜਕਵਿਨਯਨਾ ਧਮ੍ਮਪਟਿਵਿਦ੍ਧਸਤ੍ਤਾਨਂ ਗਣਨਾ ਨਤ੍ਥਿ, ਮਹਾਸਮਯਸੁਤ੍ਤਂ ਮਙ੍ਗਲਸੁਤ੍ਤਂ ਚੂਲ਼ਰਾਹੁਲੋਵਾਦਸੁਤ੍ਤਂ ਸਮਚਿਤ੍ਤਸੁਤ੍ਤਨ੍ਤਿ ਇਮੇਸਂ ਚਤੁਨ੍ਨਂ ਸੁਤ੍ਤਾਨਂ ਦੇਸਨਾਕਾਲੇ ਅਭਿਸਮਯਪ੍ਪਤ੍ਤਸਤ੍ਤਾਨਂ ਪਰਿਚ੍ਛੇਦੋ ਨਤ੍ਥਿ, ਏਤਸ੍ਸ ਅਪਰਿਮਾਣਸ੍ਸ ਸਤ੍ਤਲੋਕਸ੍ਸ ਅਨੁਕਮ੍ਪਾਯ ਭਗਵਤੋ ਠਾਨਂ ਜਾਤਂ. ਏਵਂ ਅਨਾਗਤੇਪਿ ਭਵਿਸ੍ਸਤੀਤਿ ਅਧਿਪ੍ਪਾਯੇਨ ਵਦਤਿ. ਦੇਵਮਨੁਸ੍ਸਾਨਨ੍ਤਿ ਨ ਕੇਵਲਂ ਦੇਵਮਨੁਸ੍ਸਾਨਂਯੇਵ, ਅਵਸੇਸਾਨਂ ਨਾਗਸੁਪਣ੍ਣਾਦੀਨਮ੍ਪਿ ਅਤ੍ਥਾਯ ਹਿਤਾਯ ਸੁਖਾਯ ਭਗਵਤੋ ਠਾਨਂ ਹੋਤਿ. ਸਹੇਤੁਕਪਟਿਸਨ੍ਧਿਕੇ ਪਨ ਮਗ੍ਗਫਲਸਚ੍ਛਿਕਿਰਿਯਾਯ ਭਬ੍ਬਪੁਗ੍ਗਲੇ ਦਸ੍ਸੇਤੁਂ ਏਵਂ ਵੁਤ੍ਤਂ, ਤਸ੍ਮਾ ਅਞ੍ਞੇਸਮ੍ਪਿ ਅਤ੍ਥਤ੍ਥਾਯ ਹਿਤਤ੍ਥਾਯ ਸੁਖਤ੍ਥਾਯ ਭਗਵਾ ਤਿਟ੍ਠਤੂਤਿ ਅਤ੍ਥੋ. ਤਤ੍ਥ ਅਤ੍ਥਾਯਾਤਿ ਇਧਲੋਕਸਮ੍ਪਤ੍ਤਿਅਤ੍ਥਾਯ. ਹਿਤਾਯਾਤਿ ਪਰਲੋਕਸਮ੍ਪਤ੍ਤਿਹੇਤੁਭੂਤਹਿਤਤ੍ਥਾਯ. ਸੁਖਾਯਾਤਿ ਨਿਬ੍ਬਾਨਧਾਤੁਸੁਖਤ੍ਥਾਯ. ਪੁਰਿਮਂ ਪਨ ਹਿਤਸੁਖਗ੍ਗਹਣਂ ਸਬ੍ਬਸਾਧਾਰਣਵਸੇਨ ਵੇਦਿਤਬ੍ਬਂ.

ਯਥਾ ਤਂ ਮਾਰੇਨ ਪਰਿਯੁਟ੍ਠਿਤਚਿਤ੍ਤੋਤਿ ਏਤ੍ਥ ਨ੍ਤਿ ਨਿਪਾਤਮਤ੍ਤਂ, ਯਥਾ ਮਾਰੇਨ ਪਰਿਯੁਟ੍ਠਿਤਚਿਤ੍ਤੋ ਅਜ੍ਝੋਤ੍ਥਟਚਿਤ੍ਤੋ ਅਞ੍ਞੋਪਿ ਕੋਚਿ ਪੁਥੁਜ੍ਜਨੋ ਪਟਿਵਿਜ੍ਝਿਤੁਂ ਨ ਸਕ੍ਕੁਣੇਯ੍ਯ, ਏਵਮੇਵ ਨਾਸਕ੍ਖਿ ਪਟਿਵਿਜ੍ਝਿਤੁਨ੍ਤਿ ਅਤ੍ਥੋ. ਮਾਰੋ ਹਿ ਯਸ੍ਸ ਕੇਚਿ ਵਿਪਲ੍ਲਾਸਾ ਅਪ੍ਪਹੀਨਾ, ਤਸ੍ਸ ਚਿਤ੍ਤਂ ਪਰਿਯੁਟ੍ਠਾਤਿ. ਯਸ੍ਸ ਪਨ ਸਬ੍ਬੇਨ ਸਬ੍ਬਂ ਦ੍ਵਾਦਸ ਵਿਪਲ੍ਲਾਸਾ ਅਪ੍ਪਹੀਨਾ, ਤਸ੍ਸ ਵਤ੍ਤਬ੍ਬਮੇਵ ਨਤ੍ਥਿ, ਥੇਰਸ੍ਸ ਚ ਚਤ੍ਤਾਰੋ ਵਿਪਲ੍ਲਾਸਾ ਅਪ੍ਪਹੀਨਾ, ਤੇਨਸ੍ਸ ਚਿਤ੍ਤਂ ਪਰਿਯੁਟ੍ਠਾਸਿ. ਸੋ ਪਨ ਚਿਤ੍ਤਪਰਿਯੁਟ੍ਠਾਨਂ ਕਰੋਨ੍ਤੋ ਕਿਂ ਕਰੋਤੀਤਿ? ਭੇਰਵਂ ਰੂਪਾਰਮ੍ਮਣਂ ਵਾ ਦਸ੍ਸੇਤਿ, ਸਦ੍ਦਾਰਮ੍ਮਣਂ ਵਾ ਸਾਵੇਤਿ, ਤਤੋ ਸਤ੍ਤਾ ਤਂ ਦਿਸ੍ਵਾ ਵਾ ਸੁਤ੍ਵਾ ਵਾ ਸਤਿਂ ਵਿਸ੍ਸਜ੍ਜੇਤ੍ਵਾ ਵਿਵਟਮੁਖਾ ਹੋਨ੍ਤਿ. ਤੇਸਂ ਮੁਖੇਨ ਹਤ੍ਥਂ ਪਵੇਸੇਤ੍ਵਾ ਹਦਯਂ ਮਦ੍ਦਤਿ, ਤਤੋ ਵਿਸਞ੍ਞਿਨੋ ਹੁਤ੍ਵਾ ਤਿਟ੍ਠਨ੍ਤਿ. ਥੇਰਸ੍ਸ ਪਨੇਸ ਮੁਖੇਨ ਹਤ੍ਥਂ ਪਵੇਸੇਤੁਂ ਕਿਂ ਸਕ੍ਖਿਸ੍ਸਤਿ, ਭੇਰਵਾਰਮ੍ਮਣਂ ਪਨ ਦਸ੍ਸੇਤਿ. ਤਂ ਦਿਸ੍ਵਾ ਥੇਰੋ ਨਿਮਿਤ੍ਤੋਭਾਸਂ ਨ ਪਟਿਵਿਜ੍ਝਿ. ਜਾਨਨ੍ਤੋਯੇਵ ਭਗਵਾ ਕਿਮਤ੍ਥਂ ਯਾਵਤਤਿਯਂ ਆਮਨ੍ਤੇਸਿ? ਪਰਤੋ ‘‘ਤਿਟ੍ਠਤੁ, ਭਨ੍ਤੇ ਭਗਵਾ’’ਤਿ ਯਾਚਿਤੇ ‘‘ਤੁਯ੍ਹੇਵੇਤਂ ਦੁਕ੍ਕਟਂ, ਤੁਯ੍ਹੇਵੇਤਂ ਅਪਰਦ੍ਧ’’ਨ੍ਤਿ ਦੋਸਾਰੋਪਨੇਨ ਸੋਕਤਨੁਕਰਣਤ੍ਥਂ. ਪਸ੍ਸਤਿ ਹਿ ਭਗਵਾ ‘‘ਅਯਂ ਮਯਿ ਅਤਿਵਿਯ ਸਿਨਿਦ੍ਧਹਦਯੋ, ਸੋ ਪਰਤੋ ਭੂਮਿਚਾਲਕਾਰਣਞ੍ਚ ਆਯੁਸਙ੍ਖਾਰੋਸ੍ਸਜ੍ਜਨਞ੍ਚ ਸੁਤ੍ਵਾ ਮਮ ਚਿਰਟ੍ਠਾਨਂ ਯਾਚਿਸ੍ਸਤਿ, ਅਥਾਹਂ ‘ਕਿਸ੍ਸ ਤ੍ਵਂ ਪੁਰੇਤਰਂ ਨ ਯਾਚਸੀ’ਤਿ ਤਸ੍ਸੇਵ ਸੀਸੇ ਦੋਸਂ ਪਾਤੇਸ੍ਸਾਮਿ, ਸਤ੍ਤਾ ਚ ਅਤ੍ਤਨੋ ਅਪਰਾਧੇਨ ਨ ਤਥਾ ਵਿਹਞ੍ਞਨ੍ਤਿ, ਤੇਨਸ੍ਸ ਸੋਕੋ ਤਨੁਕੋ ਭਵਿਸ੍ਸਤੀ’’ਤਿ.

ਗਚ੍ਛ ਤ੍ਵਂ, ਆਨਨ੍ਦਾਤਿ ਯਸ੍ਮਾ ਦਿਵਾਵਿਹਾਰਤ੍ਥਾਯ ਇਧਾਗਤੋ, ਤਸ੍ਮਾ, ਆਨਨ੍ਦ, ਗਚ੍ਛ ਤ੍ਵਂ ਯਥਾਰੁਚਿਤਂ ਠਾਨਂ ਦਿਵਾਵਿਹਾਰਾਯ. ਤੇਨੇਵਾਹ – ‘‘ਯਸ੍ਸ ਦਾਨਿ ਕਾਲਂ ਮਞ੍ਞਸੀ’’ਤਿ.

ਮਾਰੋ ਪਾਪਿਮਾਤਿ ਏਤ੍ਥ ਸਤ੍ਤੇ ਅਨਤ੍ਥੇ ਨਿਯੋਜੇਨ੍ਤੋ ਮਾਰੇਤੀਤਿ ਮਾਰੋ. ਪਾਪਿਮਾਤਿ ਤਸ੍ਸੇਵ ਵੇਵਚਨਂ. ਸੋ ਹਿ ਪਾਪਧਮ੍ਮੇਨ ਸਮਨ੍ਨਾਗਤਤ੍ਤਾ ‘ਪਾਪਿਮਾ’ਤਿ ਵੁਚ੍ਚਤਿ. ਭਾਸਿਤਾ ਖੋ ਪਨੇਸਾਤਿ ਅਯਞ੍ਹਿ ਭਗਵਤਿ ਬੋਧਿਮਣ੍ਡੇ ਸਤ੍ਤ ਸਤ੍ਤਾਹੇ ਅਤਿਕ੍ਕਮਿਤ੍ਵਾ ਅਜਪਾਲਨਿਗ੍ਰੋਧੇ ਵਿਹਰਨ੍ਤੇ ਅਤ੍ਤਨੋ ਧੀਤਾਸੁ ਆਗਨ੍ਤ੍ਵਾ ਇਚ੍ਛਾਵਿਘਾਤਂ ਪਤ੍ਵਾ ਗਤਾਸੁ ਅਯਂ ‘‘ਅਤ੍ਥੇਸੋ ਉਪਾਯੋ’’ਤਿ ਚਿਨ੍ਤੇਨ੍ਤੋ ਆਗਨ੍ਤ੍ਵਾ ‘‘ਭਗਵਾ ਯਦਤ੍ਥਂ ਤੁਮ੍ਹੇਹਿ ਪਾਰਮਿਯੋ ਪੂਰਿਤਾ, ਸੋ ਵੋ ਅਤ੍ਥੋ ਅਨੁਪ੍ਪਤ੍ਤੋ, ਪਟਿਵਿਦ੍ਧਂ ਸਬ੍ਬਞ੍ਞੁਤਞ੍ਞਾਣਂ, ਕਿਂ ਤੇ ਲੋਕਵਿਚਰਣੇਨਾ’’ਤਿ ਵਤ੍ਵਾ ਯਥਾ ਅਜ੍ਜ ਏਵਮੇਵ ‘‘ਪਰਿਨਿਬ੍ਬਾਤੁ ਦਾਨਿ, ਭਨ੍ਤੇ ਭਗਵਾ’’ਤਿ ਯਾਚਿ. ਭਗਵਾ ਚਸ੍ਸ ‘‘ਨ ਤਾਵਾਹ’’ਨ੍ਤਿਆਦੀਨਿ ਵਤ੍ਵਾ ਪਟਿਕ੍ਖਿਪਿ. ਤਂ ਸਨ੍ਧਾਯ ਇਦਾਨਿ ‘‘ਭਾਸਿਤਾ ਖੋ ਪਨੇਸਾ’’ਤਿਆਦਿਮਾਹ.

ਤਤ੍ਥ ਵਿਯਤ੍ਤਾਤਿ ਅਰਿਯਮਗ੍ਗਾਧਿਗਮਵਸੇਨ ਬ੍ਯਤ੍ਤਾ. ਵਿਨੀਤਾਤਿ ਤਥੇਵ ਕਿਲੇਸਵਿਨਯਨੇਨ ਵਿਨੀਤਾ. ਵਿਸਾਰਦਾਤਿ ਸਾਰਜ੍ਜਕਰਾਨਂ ਦਿਟ੍ਠਿਵਿਚਿਕਿਚ੍ਛਾਦੀਨਂ ਪਹਾਨੇਨ ਵਿਸਾਰਦਭਾਵਂ ਪਤ੍ਤਾ. ਬਹੁਸ੍ਸੁਤਾਤਿ ਤੇਪਿਟਕਵਸੇਨ ਬਹੁ ਸੁਤਮੇਤੇਸਨ੍ਤਿ ਬਹੁਸ੍ਸੁਤਾ. ਤਮੇਵ ਧਮ੍ਮਂ ਧਾਰੇਨ੍ਤੀਤਿ ਧਮ੍ਮਧਰਾ. ਅਥ ਵਾ ਬਹੁਸ੍ਸੁਤਾਤਿ ਪਰਿਯਤ੍ਤਿਬਹੁਸ੍ਸੁਤਾ ਚੇਵ ਪਟਿਵੇਧਬਹੁਸ੍ਸੁਤਾ ਚ. ਧਮ੍ਮਧਰਾਤਿ ਪਰਿਯਤ੍ਤਿਧਮ੍ਮਾਨਂ ਚੇਵ ਪਟਿਵੇਧਧਮ੍ਮਾਨਞ੍ਚ ਧਾਰਣਤੋ ਧਮ੍ਮਧਰਾਤਿ ਏਵਮ੍ਪੇਤ੍ਥ ਅਤ੍ਥੋ ਵੇਦਿਤਬ੍ਬੋ. ਧਮ੍ਮਾਨੁਧਮ੍ਮਪ੍ਪਟਿਪਨ੍ਨਾਤਿ ਅਰਿਯਧਮ੍ਮਸ੍ਸ ਅਨੁਧਮ੍ਮਭੂਤਂ ਵਿਪਸ੍ਸਨਾਧਮ੍ਮਂ ਪਟਿਪਨ੍ਨਾ. ਸਾਮੀਚਿਪ੍ਪਟਿਪਨ੍ਨਾਤਿ ਞਾਣਦਸ੍ਸਨਵਿਸੁਦ੍ਧਿਯਾ ਅਨੁਚ੍ਛਵਿਕਂ ਵਿਸੁਦ੍ਧਿਪਰਮ੍ਪਰਾਪਟਿਪਦਂ ਪਟਿਪਨ੍ਨਾ. ਅਨੁਧਮ੍ਮਚਾਰਿਨੋਤਿ ਸਲ੍ਲੇਖਿਕਂ ਤਸ੍ਸਾ ਪਟਿਪਦਾਯ ਅਨੁਰੂਪਂ ਅਪ੍ਪਿਚ੍ਛਤਾਦਿਧਮ੍ਮਂ ਚਰਣਸੀਲਾ. ਸਕਂ ਆਚਰਿਯਕਨ੍ਤਿ ਅਤ੍ਤਨੋ ਆਚਰਿਯਵਾਦਂ. ਆਚਿਕ੍ਖਿਸ੍ਸਨ੍ਤੀਤਿ ਆਦਿਤੋ ਕਥੇਸ੍ਸਨ੍ਤਿ, ਅਤ੍ਤਨਾ ਉਗ੍ਗਹਿਤਨਿਯਾਮੇਨ ਪਰੇ ਉਗ੍ਗਣ੍ਹਾਪੇਸ੍ਸਨ੍ਤੀਤਿ ਅਤ੍ਥੋ. ਦੇਸੇਸ੍ਸਨ੍ਤੀਤਿ ਵਾਚੇਸ੍ਸਨ੍ਤਿ, ਪਾਲ਼ਿਂ ਸਮ੍ਮਾ ਵਾਚੇਸ੍ਸਨ੍ਤੀਤਿ ਅਤ੍ਥੋ. ਪਞ੍ਞਪੇਸ੍ਸਨ੍ਤੀਤਿ ਪਜਾਨਾਪੇਸ੍ਸਨ੍ਤਿ, ਪਕਾਸੇਸ੍ਸਨ੍ਤੀਤਿ ਅਤ੍ਥੋ. ਪਟ੍ਠਪੇਸ੍ਸਨ੍ਤੀਤਿ ਪਕਾਰੇਨ ਠਪੇਸ੍ਸਨ੍ਤਿ. ਵਿਵਰਿਸ੍ਸਨ੍ਤੀਤਿ ਵਿਵਟਂ ਕਰਿਸ੍ਸਨ੍ਤਿ. ਵਿਭਜਿਸ੍ਸਨ੍ਤੀਤਿ ਵਿਭਤ੍ਤਂ ਕਰਿਸ੍ਸਨ੍ਤਿ. ਉਤ੍ਤਾਨੀਕਰਿਸ੍ਸਨ੍ਤੀਤਿ ਅਨੁਤ੍ਤਾਨਂ ਗਮ੍ਭੀਰਂ ਉਤ੍ਤਾਨਂ ਪਾਕਟਂ ਕਰਿਸ੍ਸਨ੍ਤਿ. ਸਹਧਮ੍ਮੇਨਾਤਿ ਸਹੇਤੁਕੇਨ ਸਕਾਰਣੇਨ ਵਚਨੇਨ. ਸਪ੍ਪਾਟਿਹਾਰਿਯਨ੍ਤਿ ਯਾਵਨਿਯ੍ਯਾਨਿਕਂ ਕਤ੍ਵਾ. ਧਮ੍ਮਂ ਦੇਸੇਸ੍ਸਨ੍ਤੀਤਿ ਨਵਵਿਧਲੋਕੁਤ੍ਤਰਧਮ੍ਮਂ ਪਬੋਧੇਸ੍ਸਨ੍ਤਿ, ਪਕਾਸੇਸ੍ਸਨ੍ਤੀਤਿ ਅਤ੍ਥੋ.

ਏਤ੍ਥ ਚ ‘‘ਪਞ੍ਞਪੇਸ੍ਸਨ੍ਤੀ’’ਤਿਆਦੀਹਿ ਛਹਿ ਪਦੇਹਿ ਛ ਅਤ੍ਥਪਦਾਨਿ ਦਸ੍ਸਿਤਾਨਿ, ਆਦਿਤੋ ਪਨ ਦ੍ਵੀਹਿ ਪਦੇਹਿ ਛ ਬ੍ਯਞ੍ਜਨਪਦਾਨੀਤਿ. ਏਤ੍ਤਾਵਤਾ ਤੇਪਿਟਕਂ ਬੁਦ੍ਧਵਚਨਂ ਸਂਵਣ੍ਣਨਾਨਯੇਨ ਸਙ੍ਗਹੇਤ੍ਵਾ ਦਸ੍ਸਿਤਂ ਹੋਤਿ. ਵੁਤ੍ਤਞ੍ਹੇਤਂ ਨੇਤ੍ਤਿਯਂ ‘‘ਦ੍ਵਾਦਸਪਦਾਨਿ ਸੁਤ੍ਤਂ, ਤਂ ਸਬ੍ਬਂ ਬ੍ਯਞ੍ਜਨਞ੍ਚ ਅਤ੍ਥੋ ਚਾ’’ਤਿ (ਨੇਤ੍ਤਿ. ਸਙ੍ਗਹਵਾਰ).

ਬ੍ਰਹ੍ਮਚਰਿਯਨ੍ਤਿ ਸਿਕ੍ਖਤ੍ਤਯਸਙ੍ਗਹਿਤਂ ਸਕਲਂ ਸਾਸਨਬ੍ਰਹ੍ਮਚਰਿਯਂ. ਇਦ੍ਧਨ੍ਤਿ ਸਮਿਦ੍ਧਂ ਝਾਨੁਪ੍ਪਾਦਵਸੇਨ. ਫੀਤਨ੍ਤਿ ਵੁਦ੍ਧਿਪ੍ਪਤ੍ਤਂ ਸਬ੍ਬਫਾਲਿਫੁਲ੍ਲਂ ਅਭਿਞ੍ਞਾਸਮ੍ਪਤ੍ਤਿਵਸੇਨ. ਵਿਤ੍ਥਾਰਿਕਨ੍ਤਿ ਵਿਤ੍ਥਤਂ ਤਸ੍ਮਿਂ ਤਸ੍ਮਿਂ ਦਿਸਾਭਾਗੇ ਪਤਿਟ੍ਠਹਨਵਸੇਨ. ਬਾਹੁਜਞ੍ਞਨ੍ਤਿ ਬਹੂਹਿ ਞਾਤਂ ਪਟਿਵਿਦ੍ਧਂ ਬਹੁਜਨਾਭਿਸਮਯਵਸੇਨ. ਪੁਥੁਭੂਤਨ੍ਤਿ ਸਬ੍ਬਾਕਾਰਵਸੇਨ ਪੁਥੁਲਭਾਵਪ੍ਪਤ੍ਤਂ. ਕਥਂ? ਯਾਵ ਦੇਵਮਨੁਸ੍ਸੇਹਿ ਸੁਪ੍ਪਕਾਸਿਤਨ੍ਤਿ ਯਤ੍ਤਕਾ ਵਿਞ੍ਞੁਜਾਤਿਕਾ ਦੇਵਾ ਮਨੁਸ੍ਸਾ ਚ ਅਤ੍ਥਿ, ਤੇਹਿ ਸਬ੍ਬੇਹਿ ਸੁਟ੍ਠੁ ਪਕਾਸਿਤਨ੍ਤਿ ਅਤ੍ਥੋ.

ਅਪ੍ਪੋਸ੍ਸੁਕ੍ਕੋਤਿ ਨਿਰੁਸ੍ਸੁਕ੍ਕੋ ਲੀਨਵੀਰਿਯੋ. ‘‘ਤ੍ਵਞ੍ਹਿ, ਪਾਪਿਮ, ਸਤ੍ਤਸਤ੍ਤਾਹਾਤਿਕ੍ਕਮਨਤੋ ਪਟ੍ਠਾਯ ‘ਪਰਿਨਿਬ੍ਬਾਤੁ ਦਾਨਿ, ਭਨ੍ਤੇ ਭਗਵਾ, ਪਰਿਨਿਬ੍ਬਾਤੁ ਸੁਗਤੋ’ਤਿ ਵਿਰਵਨ੍ਤੋ ਆਹਿਣ੍ਡਿਤ੍ਥ, ਅਜ੍ਜ ਦਾਨਿ ਪਟ੍ਠਾਯ ਵਿਗਤੁਸ੍ਸਾਹੋ ਹੋਹਿ, ਮਾ ਮਯ੍ਹਂ ਪਰਿਨਿਬ੍ਬਾਨਤ੍ਥਾਯ ਵਾਯਾਮਂ ਕਰੋਹੀ’’ਤਿ ਵਦਤਿ. ਸਤੋ ਸਮ੍ਪਜਾਨੋ ਆਯੁਸਙ੍ਖਾਰਂ ਓਸ੍ਸਜੀਤਿ ਸਤਿਂ ਸੂਪਟ੍ਠਿਤਂ ਕਤ੍ਵਾ ਞਾਣੇਨ ਪਰਿਚ੍ਛਿਨ੍ਦਿਤ੍ਵਾ ਆਯੁਸਙ੍ਖਾਰਂ ਵਿਸ੍ਸਜਿ ਪਜਹਿ. ਤਤ੍ਥ ਨ ਭਗਵਾ ਹਤ੍ਥੇਨ ਲੇਡ੍ਡੁਂ ਵਿਯ ਆਯੁਸਙ੍ਖਾਰਂ ਓਸ੍ਸਜਿ, ਤੇਮਾਸਮਤ੍ਤਮੇਵ ਪਨ ਸਮਾਪਤ੍ਤਿਂ ਸਮਾਪਜ੍ਜਿਤ੍ਵਾ ਤਤੋ ਪਰਂ ਨ ਸਮਾਪਜ੍ਜਿਸ੍ਸਾਮੀਤਿ ਚਿਤ੍ਤਂ ਉਪ੍ਪਾਦੇਸਿ. ਤਂ ਸਨ੍ਧਾਯ ਵੁਤ੍ਤਂ – ‘‘ਓਸ੍ਸਜੀ’’ਤਿ, ‘‘ਵੋਸ੍ਸਜ੍ਜੀ’’ਤਿਪਿ ਪਾਠੋ.

ਕਸ੍ਮਾ ਪਨ ਭਗਵਾ ਕਪ੍ਪਂ ਵਾ ਕਪ੍ਪਾਵਸੇਸਂ ਵਾ ਠਾਤੁਂ ਸਮਤ੍ਥੋ ਤਤ੍ਤਕਂ ਕਾਲਂ ਅਟ੍ਠਤ੍ਵਾ ਪਰਿਨਿਬ੍ਬਾਯਿਤੁਂ ਮਾਰਸ੍ਸ ਯਾਚਨਾਯ ਆਯੁਸਙ੍ਖਾਰਂ ਓਸ੍ਸਜਿ? ਨ ਭਗਵਾ ਮਾਰਸ੍ਸ ਯਾਚਨਾਯ ਆਯੁਸਙ੍ਖਾਰਂ ਓਸ੍ਸਜਿ, ਨਾਪਿ ਥੇਰਸ੍ਸ ਆਯਾਚਨਾਯ ਨ ਓਸ੍ਸਜਿਸ੍ਸਤਿ, ਤੇਮਾਸਤੋ ਪਨ ਪਰਂ ਬੁਦ੍ਧਵੇਨੇਯ੍ਯਾਨਂ ਅਭਾਵਤੋ ਆਯੁਸਙ੍ਖਾਰਂ ਓਸ੍ਸਜਿ. ਠਾਨਞ੍ਹਿ ਨਾਮ ਬੁਦ੍ਧਾਨਂ ਭਗਵਨ੍ਤਾਨਂ ਯਾਵਦੇਵ ਵੇਨੇਯ੍ਯਵਿਨਯਨਤ੍ਥਂ, ਤੇ ਅਸਤਿ ਵਿਨੇਯ੍ਯਜਨੇ ਕੇਨ ਨਾਮ ਕਾਰਣੇਨ ਠਸ੍ਸਨ੍ਤਿ. ਯਦਿ ਚ ਮਾਰਸ੍ਸ ਯਾਚਨਾਯ ਪਰਿਨਿਬ੍ਬਾਯੇਯ੍ਯ, ਪੁਰੇਤਰਂਯੇਵ ਪਰਿਨਿਬ੍ਬਾਯੇਯ੍ਯ. ਬੋਧਿਮਣ੍ਡੇਪਿ ਹਿ ਮਾਰੇਨ ਯਾਚਿਤਂ, ਨਿਮਿਤ੍ਤੋਭਾਸਕਰਣਮ੍ਪਿ ਥੇਰਸ੍ਸ ਸੋਕਤਨੁਕਰਣਤ੍ਥਨ੍ਤਿ ਵੁਤ੍ਤੋਵਾਯਮਤ੍ਥੋ. ਅਪਿਚ ਬੁਦ੍ਧਬਲਦੀਪਨਤ੍ਥਂ ਨਿਮਿਤ੍ਤੋਭਾਸਕਰਣਂ. ਏਵਂ ਮਹਾਨੁਭਾਵਾ ਬੁਦ੍ਧਾ ਭਗਵਨ੍ਤੋਯੇਵ ਤਿਟ੍ਠਨ੍ਤਾਪਿ ਅਤ੍ਤਨੋ ਰੁਚਿਯਾਵ ਤਿਟ੍ਠਨ੍ਤਿ, ਪਰਿਨਿਬ੍ਬਾਯਨ੍ਤਾਪਿ ਅਤ੍ਤਨੋ ਰੁਚਿਯਾਵ ਪਰਿਨਿਬ੍ਬਾਯਨ੍ਤੀਤਿ.

ਮਹਾਭੂਮਿਚਾਲੋਤਿ ਮਹਨ੍ਤੋ ਪਥਵੀਕਮ੍ਪੋ. ਤਦਾ ਕਿਰ ਦਸਸਹਸ੍ਸਿਲੋਕਧਾਤੁ ਅਕਮ੍ਪਿਤ੍ਥ. ਭਿਂਸਨਕੋਤਿ ਭਯਜਨਕੋ. ਦੇਵਦੁਨ੍ਦੁਭਿਯੋ ਚ ਫਲਿਂਸੂਤਿ ਦੇਵਭੇਰਿਯੋ ਨਦਿਂਸੁ, ਦੇਵੋ ਸੁਕ੍ਖਗਜ੍ਜਿਤਂ ਗਜ੍ਜਿ, ਅਕਾਲਵਿਜ੍ਜੁਲਤਾ ਨਿਚ੍ਛਰਿਂਸੁ, ਖਣਿਕਵਸ੍ਸਂ ਵਸ੍ਸੀਤਿ ਵੁਤ੍ਤਂ ਹੋਤਿ.

ਏਤਮਤ੍ਥਂ ਵਿਦਿਤ੍ਵਾਤਿ ਏਤਂ ਸਙ੍ਖਾਰਵਿਸਙ੍ਖਾਰਾਨਂ ਵਿਸੇਸਸਙ੍ਖਾਤਂ ਅਤ੍ਥਂ ਸਬ੍ਬਾਕਾਰਤੋ ਵਿਦਿਤ੍ਵਾ. ਇਮਂ ਉਦਾਨਨ੍ਤਿ ਅਨਵਸੇਸਸਙ੍ਖਾਰੇ ਵਿਸ੍ਸਜ੍ਜੇਤ੍ਵਾ ਅਤ੍ਤਨੋ ਵਿਸਙ੍ਖਾਰਗਮਨਦੀਪਕਂ ਉਦਾਨਂ ਉਦਾਨੇਸਿ. ਕਸ੍ਮਾ ਉਦਾਨੇਸਿ? ਕੋਚਿ ਨਾਮ ਵਦੇਯ੍ਯ ‘‘ਮਾਰੇਨ ਪਚ੍ਛਤੋ ਪਚ੍ਛਤੋ ਅਨੁਬਨ੍ਧਿਤ੍ਵਾ ‘ਪਰਿਨਿਬ੍ਬਾਤੁ, ਭਨ੍ਤੇ’ਤਿ ਉਪਦ੍ਦੁਤੋ ਭਯੇਨ ਭਗਵਾ ਆਯੁਸਙ੍ਖਾਰਂ ਓਸ੍ਸਜੀ’’ਤਿ. ‘‘ਤਸ੍ਸੋਕਾਸੋ ਮਾ ਹੋਤੁ, ਭੀਤਸ੍ਸ ਉਦਾਨਂ ਨਾਮ ਨਤ੍ਥੀ’’ਤਿ ਏਤਸ੍ਸ ਦੀਪਨਤ੍ਥਂ ਪੀਤਿਵੇਗਵਿਸ੍ਸਟ੍ਠਂ ਉਦਾਨਂ ਉਦਾਨੇਸੀਤਿ ਅਟ੍ਠਕਥਾਸੁ ਵੁਤ੍ਤਂ. ਤਤੋ ਤੇਮਾਸਮਤ੍ਤੇਨੇਵ ਚ ਪਨ ਬੁਦ੍ਧਕਿਚ੍ਚਸ੍ਸ ਨਿਪ੍ਫਜ੍ਜਨਤੋ ਏਵਂ ਦੀਘਰਤ੍ਤਂ ਮਯਾ ਪਰਿਹਟੋਯਂ ਦੁਕ੍ਖਭਾਰੋ ਨ ਚਿਰਸ੍ਸੇਵ ਨਿਕ੍ਖਿਪਿਯਤੀਤਿ ਪਸ੍ਸਤੋ ਪਰਿਨਿਬ੍ਬਾਨਗੁਣਪਚ੍ਚਵੇਕ੍ਖਣੇ ਤਸ੍ਸ ਉਲ਼ਾਰਂ ਪੀਤਿਸੋਮਨਸ੍ਸਂ ਉਪ੍ਪਜ੍ਜਿ, ਤੇਨ ਪੀਤਿਵੇਗੇਨ ਉਦਾਨੇਸੀਤਿ ਯੁਤ੍ਤਂ ਵਿਯ. ਏਕਨ੍ਤੇਨ ਹਿ ਵਿਸਙ੍ਖਾਰਨਿਨ੍ਨੋ ਨਿਬ੍ਬਾਨਜ੍ਝਾਸਯੋ ਸਤ੍ਥਾ ਮਹਾਕਰੁਣਾਯ ਬਲਕ੍ਕਾਰੇਨ ਵਿਯ ਸਤ੍ਤਹਿਤਤ੍ਥਂ ਲੋਕੇ ਸੁਚਿਰਂ ਠਿਤੋ. ਤਥਾ ਹਿ ਦੇਵਸਿਕਂ ਚਤੁਵੀਸਤਿਕੋਟਿਸਤਸਹਸ੍ਸਸਙ੍ਖਾ ਸਮਾਪਤ੍ਤਿਯੋ ਵਲ਼ਞ੍ਜੇਤਿ, ਸੋਦਾਨਿ ਮਹਾਕਰੁਣਾਧਿਕਾਰਸ੍ਸ ਨਿਪ੍ਫਨ੍ਨਤ੍ਤਾ ਨਿਬ੍ਬਾਨਾਭਿਮੁਖੋ ਅਨਪ੍ਪਕਂ ਪੀਤਿਸੋਮਨਸ੍ਸਂ ਪਟਿਸਂਵੇਦੇਸਿ. ਤੇਨੇਵ ਹਿ ਭਗਵਤੋ ਕਿਲੇਸਪਰਿਨਿਬ੍ਬਾਨਦਿਵਸੇ ਵਿਯ ਖਨ੍ਧਪਰਿਨਿਬ੍ਬਾਨਦਿਵਸੇਪਿ ਸਰੀਰਾਭਾ ਵਿਸੇਸਤੋ ਵਿਪ੍ਪਸਨ੍ਨਾ ਪਰਿਸੁਦ੍ਧਾ ਪਭਸ੍ਸਰਾ ਅਹੋਸੀਤਿ.

ਗਾਥਾਯ ਸੋਣਸਿਙ੍ਗਾਲਾਦੀਨਮ੍ਪਿ ਪਚ੍ਚਕ੍ਖਭਾਵਤੋ ਤੁਲਿਤਂ ਪਰਿਚ੍ਛਿਨ੍ਨਨ੍ਤਿ ਤੁਲਂ, ਕਾਮਾਵਚਰਕਮ੍ਮਂ. ਨ ਤੁਲਂ ਅਤੁਲਂ, ਤੁਲਂ ਵਾ ਸਦਿਸਮਸ੍ਸ ਅਞ੍ਞਂ ਲੋਕਿਯਕਮ੍ਮਂ ਨਤ੍ਥੀਤਿ ਅਤੁਲਂ, ਮਹਗ੍ਗਤਕਮ੍ਮਂ. ਕਾਮਾਵਚਰਂ ਰੂਪਾਵਚਰਂ ਵਾ ਤੁਲਂ, ਅਰੂਪਾਵਚਰਂ ਅਤੁਲਂ. ਅਪ੍ਪਵਿਪਾਕਂ ਵਾ ਤੁਲਂ, ਬਹੁਵਿਪਾਕਂ ਅਤੁਲਂ. ਸਮ੍ਭਵਨ੍ਤਿ ਸਮ੍ਭਵਸ੍ਸ ਹੇਤੁਭੂਤਂ, ਉਪਪਤ੍ਤਿਜਨਕਨ੍ਤਿ ਅਤ੍ਥੋ. ਭਵਸਙ੍ਖਾਰਨ੍ਤਿ ਪੁਨਬ੍ਭਵਸਙ੍ਖਾਰਣਕਂ. ਅਵਸ੍ਸਜੀਤਿ ਵਿਸ੍ਸਜ੍ਜੇਸਿ. ਮੁਨੀਤਿ ਬੁਦ੍ਧਮੁਨਿ. ਅਜ੍ਝਤ੍ਤਰਤੋਤਿ ਨਿਯਕਜ੍ਝਤ੍ਤਰਤੋ. ਸਮਾਹਿਤੋਤਿ ਉਪਚਾਰਪ੍ਪਨਾਸਮਾਧਿਵਸੇਨ ਸਮਾਹਿਤੋ. ਅਭਿਨ੍ਦਿ ਕਵਚਮਿਵਾਤਿ ਕਵਚਂ ਵਿਯ ਅਭਿਨ੍ਦਿ. ਅਤ੍ਤਸਮ੍ਭਵਨ੍ਤਿ ਅਤ੍ਤਨਿ ਸਞ੍ਜਾਤਂ ਕਿਲੇਸਂ. ਇਦਂ ਵੁਤ੍ਤਂ ਹੋਤਿ ‘‘ਸਵਿਪਾਕਟ੍ਠੇਨ ਸਮ੍ਭਵਂ, ਭਵਾਭਵਾਭਿਸਙ੍ਖਰਣਟ੍ਠੇਨ ਭਵਸਙ੍ਖਾਰਨ੍ਤਿ ਚ ਲਦ੍ਧਨਾਮਂ ਤੁਲਾਤੁਲਸਙ੍ਖਾਤਂ ਲੋਕਿਯਕਮ੍ਮਞ੍ਚ ਓਸ੍ਸਜਿ, ਸਙ੍ਗਾਮਸੀਸੇ ਮਹਾਯੋਧੋ ਕਵਚਂ ਵਿਯ ਅਤ੍ਤਸਮ੍ਭਵਂ ਕਿਲੇਸਞ੍ਚ ਅਜ੍ਝਤ੍ਤਰਤੋ ਸਮਾਹਿਤੋ ਹੁਤ੍ਵਾ ਅਭਿਨ੍ਦੀ’’ਤਿ.

ਅਥ ਵਾ ਤੁਲਨ੍ਤਿ ਤੁਲੇਨ੍ਤੋ ਤੀਰੇਨ੍ਤੋ. ਅਤੁਲਞ੍ਚ ਸਮ੍ਭਵਨ੍ਤਿ ਨਿਬ੍ਬਾਨਞ੍ਚੇਵ ਭਵਞ੍ਚ. ਭਵਸਙ੍ਖਾਰਨ੍ਤਿ ਭਵਗਾਮਿਕਂ ਕਮ੍ਮਂ. ਅਵਸ੍ਸਜਿ ਮੁਨੀਤਿ ‘‘ਪਞ੍ਚਕ੍ਖਨ੍ਧਾ ਅਨਿਚ੍ਚਾ, ਪਞ੍ਚਨ੍ਨਂ ਖਨ੍ਧਾਨਂ ਨਿਰੋਧੋ ਨਿਬ੍ਬਾਨਂ ਨਿਚ੍ਚ’’ਨ੍ਤਿਆਦਿਨਾ ਨਯੇਨ ਤੁਲੇਨ੍ਤੋ ਬੁਦ੍ਧਮੁਨਿ ਭਵੇ ਆਦੀਨਵਂ, ਨਿਬ੍ਬਾਨੇ ਚ ਆਨਿਸਂਸਂ ਦਿਸ੍ਵਾ ਤਂ ਖਨ੍ਧਾਨਂ ਮੂਲਭੂਤਂ ਭਵਸਙ੍ਖਾਰਕਮ੍ਮਂ ‘‘ਕਮ੍ਮਕ੍ਖਯਾਯ ਸਂਵਤ੍ਤਤੀ’’ਤਿ (ਮ. ਨਿ. ੨.੮੧; ਅ. ਨਿ. ੪.੨੩੩) ਏਵਂ ਵੁਤ੍ਤੇਨ ਕਮ੍ਮਕ੍ਖਯਕਰੇਨ ਅਰਿਯਮਗ੍ਗੇਨ ਅਵਸ੍ਸਜਿ. ਕਥਂ ਅਜ੍ਝਤ੍ਤਰਤੋ ਸਮਾਹਿਤੋ, ਅਭਿਨ੍ਦਿ ਕਵਚਮਿਵਤ੍ਤਸਮ੍ਭਵਂ. ਸੋ ਹਿ ਵਿਪਸ੍ਸਨਾਵਸੇਨ ਅਜ੍ਝਤ੍ਤਰਤੋ, ਸਮਥਵਸੇਨ ਸਮਾਹਿਤੋਤਿ ਏਵਂ ਪੁਬ੍ਬਭਾਗਤੋ ਪਟ੍ਠਾਯ ਸਮਥਵਿਪਸ੍ਸਨਾਬਲੇਨ ਕਵਚਂ ਵਿਯ ਅਤ੍ਤਭਾਵਂ ਪਰਿਯੋਨਨ੍ਧਿਤ੍ਵਾ ਠਿਤਂ, ਅਤ੍ਤਨਿ ਸਮ੍ਭਵਤ੍ਤਾ ‘‘ਅਤ੍ਤਸਮ੍ਭਵ’’ਨ੍ਤਿ ਲਦ੍ਧਨਾਮਂ ਸਬ੍ਬਂ ਕਿਲੇਸਜਾਲਂ ਅਭਿਨ੍ਦਿ, ਕਿਲੇਸਾਭਾਵੇਨੇਵ ਕਮ੍ਮਂ ਅਪ੍ਪਟਿਸਨ੍ਧਿਕਤ੍ਤਾ ਅਵਸ੍ਸਟ੍ਠਂ ਨਾਮ ਹੋਤੀਤਿ ਏਵਂ ਕਿਲੇਸਪ੍ਪਹਾਨੇਨ ਕਮ੍ਮਂ ਪਜਹਿ. ਇਤਿ ਬੋਧਿਮੂਲੇਯੇਵ ਅਵਸ੍ਸਟ੍ਠਭਵਸਙ੍ਖਾਰੋ ਭਗਵਾ ਵੇਖਮਿਸ੍ਸਕੇਨ ਵਿਯ ਜਰਸਕਟਂ ਸਮਾਪਤ੍ਤਿਵੇਖਮਿਸ੍ਸਕੇਨ ਅਤ੍ਤਭਾਵਂ ਯਾਪੇਨ੍ਤੋਪਿ ‘‘ਇਤੋ ਤੇਮਾਸਤੋ ਉਦ੍ਧਂ ਸਮਾਪਤ੍ਤਿਵੇਖਮਸ੍ਸ ਨ ਦਸ੍ਸਾਮੀ’’ਤਿ ਚਿਤ੍ਤੁਪ੍ਪਾਦਨੇਨ ਆਯੁਸਙ੍ਖਾਰਂ ਓਸ੍ਸਜੀਤਿ.

ਪਠਮਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੨. ਸਤ੍ਤਜਟਿਲਸੁਤ੍ਤਵਣ੍ਣਨਾ

੫੨. ਦੁਤਿਯੇ ਬਹਿਦ੍ਵਾਰਕੋਟ੍ਠਕੇਤਿ ਪਾਸਾਦਦ੍ਵਾਰਕੋਟ੍ਠਕਸ੍ਸ ਬਹਿ, ਨ ਵਿਹਾਰਦ੍ਵਾਰਕੋਟ੍ਠਕਸ੍ਸ. ਸੋ ਕਿਰ ਪਾਸਾਦੋ ਲੋਹਪਾਸਾਦੋ ਵਿਯ ਸਮਨ੍ਤਾ ਚਤੁਦ੍ਵਾਰਕੋਟ੍ਠਕਪਰਿਵੁਤੋ ਪਾਕਾਰਪਰਿਕ੍ਖਿਤ੍ਤੋ. ਤੇਸੁ ਪਾਚੀਨਦ੍ਵਾਰਕੋਟ੍ਠਕਸ੍ਸ ਬਹਿ ਪਾਸਾਦਚ੍ਛਾਯਾਯਂ ਪਾਚੀਨਲੋਕਧਾਤੁਂ ਓਲੋਕੇਨ੍ਤੋ ਪਞ੍ਞਤ੍ਤਵਰਬੁਦ੍ਧਾਸਨੇ ਨਿਸਿਨ੍ਨੋ ਹੋਤਿ. ਜਟਿਲਾਤਿ ਜਟਾਵਨ੍ਤੋ ਤਾਪਸਵੇਸਧਾਰਿਨੋ. ਨਿਗਣ੍ਠਾਤਿ ਸੇਤਪਟਨਿਗਣ੍ਠਰੂਪਧਾਰਿਨੋ. ਏਕਸਾਟਕਾਤਿ ਏਕਸਾਟਕਨਿਗਣ੍ਠਾ ਵਿਯ ਏਕਂ ਪਿਲੋਤਿਕਖਣ੍ਡਂ ਹਤ੍ਥੇ ਬਨ੍ਧਿਤ੍ਵਾ ਤੇਨਾਪਿ ਸਰੀਰਸ੍ਸ ਪੁਰਿਮਭਾਗਂ ਪਟਿਚ੍ਛਾਦੇਤ੍ਵਾ ਵਿਚਰਣਕਾ. ਪਰੂਲ਼੍ਹਕਚ੍ਛਨਖਲੋਮਾਤਿ ਪਰੂਲ਼੍ਹਕਚ੍ਛਲੋਮਾ ਪਰੂਲ਼੍ਹਨਖਾ ਪਰੂਲ਼੍ਹਅਵਸੇਸਲੋਮਾ ਚ, ਕਚ੍ਛਾਦੀਸੁ ਦੀਘਲੋਮਾ ਦੀਘਨਖਾ ਚਾਤਿ ਅਤ੍ਥੋ. ਖਾਰਿਵਿਵਿਧਮਾਦਾਯਾਤਿ ਵਿਵਿਧਂ ਖਾਰਾਦਿਨਾਨਪ੍ਪਕਾਰਂ ਪਬ੍ਬਜਿਤਪਰਿਕ੍ਖਾਰਭਣ੍ਡਿਕਂ ਗਹੇਤ੍ਵਾ. ਅਵਿਦੂਰੇ ਅਤਿਕ੍ਕਮਨ੍ਤੀਤਿ ਵਿਹਾਰਸ੍ਸ ਅਵਿਦੂਰਮਗ੍ਗੇਨ ਨਗਰਂ ਪਵਿਸਨ੍ਤਿ.

ਰਾਜਾਹਂ, ਭਨ੍ਤੇ, ਪਸੇਨਦਿ ਕੋਸਲੋਤਿ ਅਹਂ, ਭਨ੍ਤੇ, ਰਾਜਾ ਪਸੇਨਦਿ ਕੋਸਲੋ, ਮਯ੍ਹਂ ਨਾਮਂ ਤੁਮ੍ਹੇ ਜਾਨਾਥਾਤਿ. ਕਸ੍ਮਾ ਪਨ ਰਾਜਾ ਲੋਕੇ ਅਗ੍ਗਪੁਗ੍ਗਲਸ੍ਸ ਸਨ੍ਤਿਕੇ ਨਿਸਿਨ੍ਨੋ ਏਵਰੂਪਾਨਂ ਨਗ੍ਗਨਿਸ੍ਸਿਰੀਕਾਨਂ ਅਞ੍ਜਲਿਂ ਪਗ੍ਗਣ੍ਹਾਤੀਤਿ? ਸਙ੍ਗਣ੍ਹਨਤ੍ਥਾਯ. ਏਵਞ੍ਹਿਸ੍ਸ ਅਹੋਸਿ ‘‘ਸਚਾਹਂ ਏਤ੍ਤਕਮ੍ਪਿ ਏਤੇਸਂ ਨ ਕਰਿਸ੍ਸਾਮਿ, ਮਯਂ ਪੁਤ੍ਤਦਾਰਂ ਪਹਾਯ ਏਤਸ੍ਸਤ੍ਥਾਯ ਦੁਬ੍ਭੋਜਨਦੁਕ੍ਖਸੇਯ੍ਯਾਦੀਨਿ ਅਨੁਭੋਮ, ਅਯਂ ਅਮ੍ਹਾਕਂ ਨਿਪਚ੍ਚਕਾਰਮਤ੍ਤਮ੍ਪਿ ਨ ਕਰੋਤਿ. ਤਸ੍ਮਿਞ੍ਹਿ ਕਤੇ ਅਮ੍ਹੇ ‘ਓਚਰਕਾ’ਤਿ ਜਨੋ ਅਗ੍ਗਹੇਤ੍ਵਾ ‘ਪਬ੍ਬਜਿਤਾ’ਇਚ੍ਚੇਵ ਸਞ੍ਜਾਨਿਸ੍ਸਤਿ, ਕਿਂ ਇਮਸ੍ਸ ਭੂਤਤ੍ਥਕਥਨੇਨਾਤਿ ਅਤ੍ਤਨਾ ਦਿਟ੍ਠਂ ਸੁਤਂ ਪਟਿਚ੍ਛਾਦੇਤ੍ਵਾ ਨ ਕਥੇਯ੍ਯੁਂ, ਏਵਂ ਕਤੇ ਪਨ ਅਨਿਗੂਹਿਤ੍ਵਾ ਕਥੇਸ੍ਸਨ੍ਤੀ’’ਤਿ. ਅਪਿਚ ਸਤ੍ਥੁ ਅਜ੍ਝਾਸਯਜਾਨਨਤ੍ਥਮ੍ਪਿ ਏਵਮਕਾਸੀਤਿ. ਰਾਜਾ ਕਿਰ ਭਗਵਨ੍ਤਂ ਉਪਸਙ੍ਕਮਨ੍ਤੋਪਿ ਕਤਿਪਯਕਾਲਂ ਸਮ੍ਮਾਸਮ੍ਬੋਧਿਂ ਨ ਸਦ੍ਦਹਿ. ਤੇਨਸ੍ਸ ਏਵਂ ਅਹੋਸਿ ‘‘ਯਦਿ ਭਗਵਾ ਸਬ੍ਬਂ ਜਾਨਾਤਿ, ਮਯਾ ਇਮੇਸਂ ਨਿਪਚ੍ਚਕਾਰਂ ਕਤ੍ਵਾ ‘ਇਮੇ ਅਰਹਨ੍ਤੋ’ਤਿ ਵੁਤ੍ਤੇ ਨਾਨੁਜਾਨੇਯ੍ਯ, ਅਥ ਮਂ ਅਨੁਵਤ੍ਤਨ੍ਤੋ ਅਨੁਜਾਨੇਯ੍ਯ, ਕੁਤੋ ਤਸ੍ਸ ਸਬ੍ਬਞ੍ਞੁਤਾ’’ਤਿ. ਏਵਂ ਸੋ ਸਤ੍ਥੁ ਅਜ੍ਝਾਸਯਜਾਨਨਤ੍ਥਂ ਤਥਾ ਅਕਾਸਿ. ਭਗਵਾ ਪਨ ‘‘ਉਜੁਕਮੇਵ ‘ਨ ਇਮੇ ਸਮਣਾ ਓਚਰਕਾ’ਤਿ ਵੁਤ੍ਤੇ ਯਦਿਪਿ ਰਾਜਾ ਸਦ੍ਦਹਤਿ, ਮਹਾਜਨੋ ਪਨ ਤਮਤ੍ਥਂ ਅਜਾਨਨ੍ਤੋ ਨ ਸਦ੍ਦਹੇਯ੍ਯ, ਸਮਣੋ ਗੋਤਮੋ ‘ਰਾਜਾ ਅਤ੍ਤਨੋ ਕਥਂ ਸੁਣਾਤੀ’ਤਿ ਯਂ ਕਿਞ੍ਚਿ ਮੁਖਾਰੁਲ਼੍ਹਂ ਕਥੇਤੀ’ਤਿ ਵਦੇਯ੍ਯ, ਤਦਸ੍ਸ ਦੀਘਰਤ੍ਤਂ ਅਹਿਤਾਯ ਦੁਕ੍ਖਾਯ ਸਂਵਤ੍ਤੇਯ੍ਯ, ਅਞ੍ਞੋ ਚ ਗੁਲ਼੍ਹਕਮ੍ਮਂ ਵਿਵਟਂ ਕਤਂ ਭਵੇਯ੍ਯ, ਸਯਮੇਵ ਰਾਜਾ ਤੇਸਂ ਓਚਰਕਭਾਵਂ ਕਥੇਸ੍ਸਤੀ’’ਤਿ ਞਤ੍ਵਾ ‘‘ਦੁਜ੍ਜਾਨਂ ਖੋ ਏਤ’’ਨ੍ਤਿਆਦਿਮਾਹ.

ਤਤ੍ਥ ਕਾਮਭੋਗਿਨਾਤਿ ਇਮਿਨਾ ਪਨ ਰਾਗਾਭਿਭਵਂ, ਉਭਯੇਨਾਪਿ ਵਿਕ੍ਖਿਤ੍ਤਚਿਤ੍ਤਤਂ ਦਸ੍ਸੇਤਿ. ਪੁਤ੍ਤਸਮ੍ਬਾਧਸਯਨਨ੍ਤਿ ਪੁਤ੍ਤੇਹਿ ਸਮ੍ਬਾਧਸਯਨਂ. ਏਤ੍ਥ ਚ ਪੁਤ੍ਤਸੀਸੇਨ ਦਾਰਪਰਿਗ੍ਗਹਂ, ਪੁਤ੍ਤਦਾਰੇਸੁ ਉਪ੍ਪਿਲਾਵਿਤੇਨ ਤੇਸਂ ਘਰਾਵਾਸਾਦਿਹੇਤੁ ਸੋਕਾਭਿਭਵੇਨ ਚਿਤ੍ਤਸ੍ਸ ਸਂਕਿਲਿਟ੍ਠਤਂ ਦਸ੍ਸੇਤਿ. ਕਾਸਿਕਚਨ੍ਦਨਨ੍ਤਿ ਸਣ੍ਹਚਨ੍ਦਨਂ, ਕਾਸਿਕਵਤ੍ਥਞ੍ਚ ਚਨ੍ਦਨਞ੍ਚਾਤਿ ਵਾ ਅਤ੍ਥੋ. ਮਾਲਾਗਨ੍ਧਵਿਲੇਪਨਨ੍ਤਿ ਵਣ੍ਣਗਨ੍ਧਤ੍ਥਾਯ ਮਾਲਾ, ਸੁਗਨ੍ਧਭਾਵਤ੍ਥਾਯ ਗਨ੍ਧਂ, ਛਵਿਰਾਗਕਰਣਤ੍ਥਾਯ ਵਿਲੇਪਨਂ ਧਾਰੇਨ੍ਤੇਨ. ਜਾਤਰੂਪਰਜਤਨ੍ਤਿ ਸੁਵਣ੍ਣਞ੍ਚੇਵ ਅਵਸਿਟ੍ਠਧਨਞ੍ਚ. ਸਾਦਿਯਨ੍ਤੇਨਾਤਿ ਪਟਿਗ੍ਗਣ੍ਹਨ੍ਤੇਨ. ਸਬ੍ਬੇਨਪਿ ਕਾਮੇਸੁ ਅਭਿਗਿਦ੍ਧਭਾਵਮੇਵ ਪਕਾਸੇਤਿ.

ਸਂਵਾਸੇਨਾਤਿ ਸਹਵਾਸੇਨ. ਸੀਲਂ ਵੇਦਿਤਬ੍ਬਨ੍ਤਿ ‘‘ਅਯਂ ਪੇਸਲੋ ਵਾ ਦੁਸ੍ਸੀਲੋ ਵਾ’’ਤਿ ਸਂਵਸਨ੍ਤੇਨ ਏਕਸ੍ਮਿਂ ਠਾਨੇ ਸਹ ਵਸਨ੍ਤੇਨ ਜਾਨਿਤਬ੍ਬੋ. ਤਞ੍ਚ ਖੋ ਦੀਘੇਨ ਅਦ੍ਧੁਨਾ ਨ ਇਤ੍ਤਰਨ੍ਤਿ ਤਞ੍ਚ ਸੀਲਂ ਦੀਘੇਨ ਕਾਲੇਨ ਵੇਦਿਤਬ੍ਬਂ, ਨ ਇਤ੍ਤਰੇਨ. ਕਤਿਪਯਦਿਵਸੇ ਹਿ ਸਞ੍ਞਤਾਕਾਰੋ ਸਂਵੁਤਿਨ੍ਦ੍ਰਿਯਾਕਾਰੋ ਚ ਹੁਤ੍ਵਾ ਸਕ੍ਕਾ ਦਸ੍ਸੇਤੁਂ. ਮਨਸਿ ਕਰੋਤਾ ਨੋ ਅਮਨਸਿ ਕਰੋਤਾਤਿ ਤਮ੍ਪਿ ‘‘ਸੀਲਮਸ੍ਸ ਪਰਿਗ੍ਗਣ੍ਹਿਸ੍ਸਾਮੀ’’ਤਿ ਮਨਸਿ ਕਰੋਨ੍ਤੇਨ ਪਚ੍ਚਵੇਕ੍ਖਨ੍ਤੇਨ ਸਕ੍ਕਾ ਜਾਨਿਤੁਂ, ਨ ਇਤਰੇਨ. ਪਞ੍ਞਵਤਾਤਿ ਤਮ੍ਪਿ ਸਪ੍ਪਞ੍ਞੇਨੇਵ ਪਣ੍ਡਿਤੇਨ. ਬਾਲੋ ਹਿ ਮਨਸਿ ਕਰੋਨ੍ਤੋਪਿ ਜਾਨਿਤੁਂ ਨ ਸਕ੍ਕੋਤਿ. ਸਂਵੋਹਾਰੇਨਾਤਿ ਕਥਨੇਨ.

‘‘ਯੋ ਹਿ ਕੋਚਿ ਮਨੁਸ੍ਸੇਸੁ, ਵੋਹਾਰਂ ਉਪਜੀਵਤਿ;

ਏਵਂ ਵਾਸੇਟ੍ਠ ਜਾਨਾਹਿ, ਵਾਣਿਜੋ ਸੋ ਨ ਬ੍ਰਾਹ੍ਮਣੋ’’ਤਿ. (ਸੁ. ਨਿ. ੬੧੯) –

ਏਤ੍ਥ ਹਿ ਵਾਣਿਜ੍ਜਂ ਵੋਹਾਰੋ ਨਾਮ. ‘‘ਚਤ੍ਤਾਰੋ ਅਰਿਯਵੋਹਾਰਾ’’ਤਿ (ਦੀ. ਨਿ. ੩.੩੧੩) ਏਤ੍ਥ ਚੇਤਨਾ. ‘‘ਸਙ੍ਖਾ ਸਮਞ੍ਞਾ ਪਞ੍ਞਤ੍ਤਿ ਵੋਹਾਰੋ’’ਤਿ (ਧ. ਸ. ੧੩੧੩-੧੩੧੫) ਏਤ੍ਥ ਪਞ੍ਞਤ੍ਤਿ. ‘‘ਵੋਹਾਰਮਤ੍ਤੇਨ ਸੋ ਵੋਹਰੇਯ੍ਯਾ’’ਤਿ (ਸਂ. ਨਿ. ੧.੨੫) ਏਤ੍ਥ ਕਥਾ ਵੋਹਾਰੋ. ਇਧਾਪਿ ਸੋ ਏਵ ਅਧਿਪ੍ਪੇਤੋ. ਏਕਚ੍ਚਸ੍ਸ ਹਿ ਸਮ੍ਮੁਖਾਕਥਾ ਪਰਮ੍ਮੁਖਾਕਥਾਯ ਨ ਸਮੇਤਿ, ਪਰਮ੍ਮੁਖਾਕਥਾ ਸਮ੍ਮੁਖਾਕਥਾਯ, ਤਥਾ ਪੁਰਿਮਕਥਾ ਪਚ੍ਛਿਮਕਥਾਯ, ਪਚ੍ਛਿਮਕਥਾ ਚ ਪੁਰਿਮਕਥਾਯ. ਸੋ ਕਥੇਨ੍ਤੋਯੇਵ ਸਕ੍ਕਾ ਜਾਨਿਤੁਂ ‘‘ਅਸੁਚਿ ਏਸੋ ਪੁਗ੍ਗਲੋ’’ਤਿ. ਸੁਚਿਸੀਲਸ੍ਸ ਪਨ ਪੁਰਿਮਂ ਪਚ੍ਛਿਮੇਨ, ਪਚ੍ਛਿਮਞ੍ਚ ਪੁਰਿਮੇਨ, ਸਮ੍ਮੁਖਾ ਕਥਿਤਞ੍ਚ ਪਰਮ੍ਮੁਖਾ ਕਥਿਤੇਨ, ਪਰਮ੍ਮੁਖਾ ਕਥਿਤਞ੍ਚ ਸਮ੍ਮੁਖਾ ਕਥਿਤੇਨ ਸਮੇਤਿ, ਤਸ੍ਮਾ ਕਥੇਨ੍ਤੇਨ ਸਕ੍ਕਾ ਸੁਚਿਭਾਵੋ ਜਾਨਿਤੁਨ੍ਤਿ ਪਕਾਸੇਨ੍ਤੋ ਆਹ – ‘‘ਸਂਵੋਹਾਰੇਨ ਸੋਚੇਯ੍ਯਂ ਵੇਦਿਤਬ੍ਬ’’ਨ੍ਤਿ.

ਥਾਮੋਤਿ ਞਾਣਥਾਮੋ. ਯਸ੍ਸ ਹਿ ਞਾਣਥਾਮੋ ਨਤ੍ਥਿ, ਸੋ ਉਪ੍ਪਨ੍ਨੇਸੁ ਉਪਦ੍ਦਵੇਸੁ ਗਹੇਤਬ੍ਬਗਹਣਂ ਕਤ੍ਤਬ੍ਬਕਰਣਂ ਅਪਸ੍ਸਨ੍ਤੋ ਅਦ੍ਵਾਰਿਕਂ ਘਰਂ ਪਵਿਟ੍ਠੋ ਵਿਯ ਚਰਤਿ. ਤੇਨਾਹ – ‘‘ਆਪਦਾਸੁ ਖੋ, ਮਹਾਰਾਜ,ਥਾਮੋ ਵੇਦਿਤਬ੍ਬੋ’’ਤਿ. ਸਾਕਚ੍ਛਾਯਾਤਿ ਸਹਕਥਾਯ. ਦੁਪ੍ਪਞ੍ਞਸ੍ਸ ਹਿ ਕਥਾ ਉਦਕੇ ਗੇਣ੍ਡੁ ਵਿਯ ਉਪ੍ਲਵਤਿ, ਪਞ੍ਞਵਤੋ ਕਥੇਨ੍ਤਸ੍ਸ ਪਟਿਭਾਨਂ ਅਨਨ੍ਤਂ ਹੋਤਿ. ਉਦਕਵਿਪ੍ਫਨ੍ਦਨੇਨੇਵ ਹਿ ਮਚ੍ਛੋ ਖੁਦ੍ਦਕੋ ਮਹਨ੍ਤੋ ਵਾਤਿ ਪਞ੍ਞਾਯਤਿ.

ਇਤਿ ਭਗਵਾ ਰਞ੍ਞੋ ਉਜੁਕਮੇਵ ਤੇ ‘‘ਇਮੇ ਨਾਮਾ’’ਤਿ ਅਵਤ੍ਵਾ ਅਰਹਨ੍ਤਾਨਂ ਅਨਰਹਨ੍ਤਾਨਞ੍ਚ ਜਾਨਨੂਪਾਯਂ ਪਕਾਸੇਸਿ. ਰਾਜਾ ਤਂ ਸੁਤ੍ਵਾ ਭਗਵਤੋ ਸਬ੍ਬਞ੍ਞੁਤਾਯ ਦੇਸਨਾਵਿਲਾਸੇਨ ਚ ਅਭਿਪ੍ਪਸਨ੍ਨੋ ‘‘ਅਚ੍ਛਰਿਯਂ, ਭਨ੍ਤੇ’’ਤਿਆਦਿਨਾ ਅਤ੍ਤਨੋ ਪਸਾਦਂ ਪਕਾਸੇਤ੍ਵਾ ਇਦਾਨਿ ਤੇ ਯਾਥਾਵਤੋ ਭਗਵਤੋ ਆਰੋਚੇਨ੍ਤੋ ‘‘ਏਤੇ, ਭਨ੍ਤੇ, ਮਮ ਪੁਰਿਸਾ ਚਰਾ’’ਤਿਆਦਿਮਾਹ. ਤਤ੍ਥ ਚਰਾਤਿ ਅਪਬ੍ਬਜਿਤਾ ਏਵ ਪਬ੍ਬਜਿਤਰੂਪੇਨ ਰਟ੍ਠਪਿਣ੍ਡਂ ਭੁਞ੍ਜਨ੍ਤਾ ਪਟਿਚ੍ਛਨ੍ਨਕਮ੍ਮਨ੍ਤਤ੍ਤਾ. ਓਚਰਕਾਤਿ ਹੇਟ੍ਠਾ ਚਰਕਾ. ਚਰਾ ਹਿ ਪਬ੍ਬਤਮਤ੍ਥਕੇਨ ਚਰਨ੍ਤਾਪਿ ਹੇਟ੍ਠਾ ਚਰਕਾਵ ਨਿਹੀਨਕਮ੍ਮਤ੍ਤਾ. ਅਥ ਵਾ ਓਚਰਕਾਤਿ ਚਰਪੁਰਿਸਾ. ਓਚਰਿਤ੍ਵਾਤਿ ਅਵਚਰਿਤ੍ਵਾ ਵੀਮਂਸਿਤ੍ਵਾ, ਤਸ੍ਮਿਂ ਤਸ੍ਮਿਂ ਦੇਸੇ ਤਂ ਤਂ ਪਵਤ੍ਤਿਂ ਞਤ੍ਵਾਤਿ ਅਤ੍ਥੋ. ਓਸਾਰਿਸ੍ਸਾਮੀਤਿ ਪਟਿਪਜ੍ਜਿਸ੍ਸਾਮਿ, ਕਰਿਸ੍ਸਾਮੀਤਿ ਅਤ੍ਥੋ. ਰਜੋਜਲ੍ਲਨ੍ਤਿ ਰਜਞ੍ਚ ਮਲਞ੍ਚ. ਪਵਾਹੇਤ੍ਵਾਤਿ ਸੁਟ੍ਠੁ ਵਿਕ੍ਖਾਲਨਵਸੇਨ ਅਪਨੇਤ੍ਵਾ. ਕਪ੍ਪਿਤਕੇਸਮਸ੍ਸੂਤਿ ਅਲਙ੍ਕਾਰਸਤ੍ਥੇ ਵੁਤ੍ਤਵਿਧਿਨਾ ਕਪ੍ਪਕੇਹਿ ਛਿਨ੍ਨਕੇਸਮਸ੍ਸੂ. ਕਾਮਗੁਣੇਹੀਤਿ ਕਾਮਕੋਟ੍ਠਾਸੇਹਿ, ਕਾਮਬਨ੍ਧਨੇਹਿ ਵਾ ਸਮਪ੍ਪਿਤਾਤਿ ਸੁਟ੍ਠੁ ਅਪ੍ਪਿਤਾ ਅਲ੍ਲੀਨਾ. ਸਮਙ੍ਗਿਭੂਤਾਤਿ ਸਹਭੂਤਾ. ਪਰਿਚਾਰੇਸ੍ਸਨ੍ਤੀਤਿ ਇਨ੍ਦ੍ਰਿਯਾਨਿ ਸਮਨ੍ਤਤੋ ਚਾਰੇਸ੍ਸਨ੍ਤਿ ਕੀਲ਼ਾਪੇਸ੍ਸਨ੍ਤਿ ਵਾ.

ਏਤਮਤ੍ਥਂ ਵਿਦਿਤ੍ਵਾਤਿ ਏਤਂ ਤੇਸਂ ਰਾਜਪੁਰਿਸਾਨਂ ਅਤ੍ਤਨੋ ਉਦਰਸ੍ਸ ਕਾਰਣਾ ਪਬ੍ਬਜਿਤਵੇਸੇਨ ਲੋਕਵਞ੍ਚਨਸਙ੍ਖਾਤਂ ਅਤ੍ਥਂ ਵਿਦਿਤ੍ਵਾ. ਇਮਂ ਉਦਾਨਨ੍ਤਿ ਇਮਂ ਪਰਾਧੀਨਤਾਪਰਵਞ੍ਚਨਤਾਪਟਿਕ੍ਖੇਪਵਿਭਾਵਨਂ ਉਦਾਨਂ ਉਦਾਨੇਸਿ.

ਤਤ੍ਥ ਨ ਵਾਯਮੇਯ੍ਯ ਸਬ੍ਬਤ੍ਥਾਤਿ ਦੂਤੇਯ੍ਯਓਚਰਕਕਮ੍ਮਾਦਿਕੇ ਸਬ੍ਬਸ੍ਮਿਂ ਪਾਪਧਮ੍ਮੇ ਇਮੇ ਰਾਜਪੁਰਿਸਾ ਵਿਯ ਪਬ੍ਬਜਿਤੋ ਨ ਵਾਯਮੇਯ੍ਯ, ਵਾਯਾਮਂ ਉਸ੍ਸਾਹਂ ਨ ਕਰੇਯ੍ਯ, ਸਬ੍ਬਤ੍ਥ ਯਤ੍ਥ ਕਤ੍ਥਚਿ ਵਾਯਾਮਂ ਅਕਤ੍ਵਾ ਅਪ੍ਪਮਤ੍ਤਕੇਪਿ ਪੁਞ੍ਞਸ੍ਮਿਂਯੇਵ ਵਾਯਮੇਯ੍ਯਾਤਿ ਅਧਿਪ੍ਪਾਯੋ. ਨਾਞ੍ਞਸ੍ਸ ਪੁਰਿਸੋ ਸਿਯਾਤਿ ਪਬ੍ਬਜਿਤਰੂਪੇਨ ਅਞ੍ਞਸ੍ਸ ਪੁਗ੍ਗਲਸ੍ਸ ਸੇਵਕਪੁਰਿਸੋ ਨ ਸਿਯਾ. ਕਸ੍ਮਾ? ਏਵਰੂਪਸ੍ਸਪਿ ਓਚਰਕਾਦਿਪਾਪਕਮ੍ਮਸ੍ਸ ਕਤ੍ਤਬ੍ਬਤ੍ਤਾ. ਨਾਞ੍ਞਂ ਨਿਸ੍ਸਾਯ ਜੀਵੇਯ੍ਯਾਤਿ ਅਞ੍ਞਂ ਪਰਂ ਇਸ੍ਸਰਾਦਿਂ ਨਿਸ੍ਸਾਯ ‘‘ਤਪ੍ਪਟਿਬਦ੍ਧਂ ਮੇ ਸੁਖਦੁਕ੍ਖ’’ਨ੍ਤਿ ਏਵਂਚਿਤ੍ਤੋ ਹੁਤ੍ਵਾ ਨ ਜੀਵਿਕਂ ਪਵਤ੍ਤੇਯ੍ਯ, ਅਤ੍ਤਦੀਪੋ ਅਤ੍ਤਸਰਣੋ ਅਨਞ੍ਞਸਰਣੋ ਏਵ ਭਵੇਯ੍ਯ. ਅਥ ਵਾ ਅਨਤ੍ਥਾਵਹਤੋ ‘‘ਓਚਰਣ’’ਨ੍ਤਿ ਲਦ੍ਧਨਾਮਕਤ੍ਤਾ ਅਞ੍ਞਂ ਅਕੁਸਲਕਮ੍ਮਂ ਨਿਸ੍ਸਾਯ ਨ ਜੀਵੇਯ੍ਯ. ਧਮ੍ਮੇਨ ਨ ਵਣਿਂ ਚਰੇਤਿ ਧਨਾਦਿਅਤ੍ਥਾਯ ਧਮ੍ਮਂ ਨ ਕਥੇਯ੍ਯ. ਯੋ ਹਿ ਧਨਾਦਿਹੇਤੁ ਪਰੇਸਂ ਧਮ੍ਮਂ ਦੇਸੇਤਿ, ਸੋ ਧਮ੍ਮੇਨ ਵਾਣਿਜ੍ਜਂ ਕਰੋਤਿ ਨਾਮ, ਏਵਂ ਧਮ੍ਮੇਨ ਤਂ ਨ ਚਰੇਯ੍ਯ. ਅਥ ਵਾ ਧਨਾਦੀਨਂ ਅਤ੍ਥਾਯ ਕੋਸਲਰਞ੍ਞੋ ਪੁਰਿਸੋ ਵਿਯ ਓਚਰਕਾਦਿਕਮ੍ਮਂ ਕਰੋਨ੍ਤੋ ਪਰੇਹਿ ਅਨਾਸਙ੍ਕਨੀਯਤਾਯ ਪਬ੍ਬਜ੍ਜਾਲਿਙ੍ਗਸਮਾਦਾਨਾਦੀਨਿ ਅਨੁਤਿਟ੍ਠਨ੍ਤੋ ਧਮ੍ਮੇਨ ਵਾਣਿਜ੍ਜਂ ਕਰੋਤਿ ਨਾਮ. ਯੋਪਿ ਇਧ ਪਰਿਸੁਦ੍ਧਂ ਬ੍ਰਹ੍ਮਚਰਿਯਂ ਚਰਨ੍ਤੋਪਿ ਅਞ੍ਞਤਰਂ ਦੇਵਨਿਕਾਯਂ ਪਣਿਧਾਯ ਬ੍ਰਹ੍ਮਚਰਿਯਂ ਚਰਤਿ, ਸੋਪਿ ਧਮ੍ਮੇਨ ਵਾਣਿਜ੍ਜਂ ਕਰੋਤਿ ਨਾਮ, ਏਵਂ ਧਮ੍ਮੇਨ ਵਾਣਿਜ੍ਜਂ ਨ ਚਰੇ, ਨ ਕਰੇਯ੍ਯਾਤਿ ਅਤ੍ਥੋ.

ਦੁਤਿਯਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੩. ਪਚ੍ਚਵੇਕ੍ਖਣਸੁਤ੍ਤਵਣ੍ਣਨਾ

੫੩. ਤਤਿਯੇ ਅਤ੍ਤਨੋ ਅਨੇਕੇ ਪਾਪਕੇ ਅਕੁਸਲੇ ਧਮ੍ਮੇ ਪਹੀਨੇਤਿ ਲੋਭਦੋਸਮੋਹਵਿਪਰੀਤਮਨਸਿਕਾਰਅਹਿਰਿਕਾਨੋਤ੍ਤਪ੍ਪਕੋਧੂਪਨਾਹਮਕ੍ਖਪਲਾਸਇਸ੍ਸਾਮਚ੍ਛਰਿਯਮਾਯਾ- ਸਾਠੇਯ੍ਯਥਮ੍ਭਸਾਰਮ੍ਭਮਾਨਾਤਿਮਾਨਮਦਪਮਾਦਤਣ੍ਹਾਅਵਿਜ੍ਜਾਤਿਵਿਧਾਕੁਸਲਮੂਲਦੁਚ੍ਚਰਿਤਸਂਕਿਲੇਸਵਿਸਮ- ਸਞ੍ਞਾਵਿਤਕ੍ਕਪਪਞ੍ਚਚਤੁਬ੍ਬਿਧਵਿਪਲ੍ਲਾਸਆਸਵਓਘਯੋਗਗਨ੍ਥਾਗਤਿਗਮਨਤਣ੍ਹੁਪਾਦਾਨਪਞ੍ਚਵਿਧ- ਚੇਤੋਖਿਲਪਞ੍ਚਚੇਤੋਵਿਨਿਬਨ੍ਧਨੀਵਰਣਾਭਿਨਨ੍ਦਨਛਵਿਵਾਦ- ਮੂਲਤਣ੍ਹਾਕਾਯਸਤ੍ਤਾਨੁਸਯਅਟ੍ਠਮਿਚ੍ਛਤ੍ਤਨਵ- ਤਣ੍ਹਾਮੂਲਕਦਸਾਕੁਸਲਕਮ੍ਮਪਥਦ੍ਵਾਸਟ੍ਠਿਦਿਟ੍ਠਿਗਤਅਟ੍ਠਸਤਤਣ੍ਹਾਵਿਚਰਿਤਾਦਿਪ੍ਪਭੇਦੇ ਅਤ੍ਤਨੋ ਸਨ੍ਤਾਨੇ ਅਨਾਦਿਕਾਲਪਵਤ੍ਤੇ ਦਿਯਡ੍ਢਸਹਸ੍ਸਕਿਲੇਸੇ ਤਂਸਹਗਤੇ ਚਾਪਿ ਅਨੇਕੇ ਪਾਪਕੇ ਲਾਮਕੇ ਅਕੋਸਲ੍ਲਸਮ੍ਭੂਤਟ੍ਠੇਨ ਅਕੁਸਲੇ ਧਮ੍ਮੇ ਅਨਵਸੇਸਂ ਸਹ ਵਾਸਨਾਯ ਬੋਧਿਮੂਲੇਯੇਵ ਪਹੀਨੇ ਅਰਿਯਮਗ੍ਗੇਨ ਸਮੁਚ੍ਛਿਨ੍ਨੇ ਪਚ੍ਚਵੇਕ੍ਖਮਾਨੋ ‘‘ਅਯਮ੍ਪਿ ਮੇ ਕਿਲੇਸੋ ਪਹੀਨੋ, ਅਯਮ੍ਪਿ ਮੇ ਕਿਲੇਸੋ ਪਹੀਨੋ’’ਤਿ ਅਨੁਪਦਪਚ੍ਚਵੇਕ੍ਖਣਾਯ ਪਚ੍ਚਵੇਕ੍ਖਮਾਨੋ ਭਗਵਾ ਨਿਸਿਨ੍ਨੋ ਹੋਤਿ.

ਅਨੇਕੇ ਚ ਕੁਸਲੇ ਧਮ੍ਮੇਤਿ ਸੀਲਸਮਾਧਿਪਞ੍ਞਾਵਿਮੁਤ੍ਤਿਵਿਮੁਤ੍ਤਿਞਾਣਦਸ੍ਸਨਂ ਚਤ੍ਤਾਰੋ ਸਤਿਪਟ੍ਠਾਨਾ, ਚਤ੍ਤਾਰੋ ਸਮ੍ਮਪ੍ਪਧਾਨਾ, ਚਤ੍ਤਾਰੋ ਇਦ੍ਧਿਪਾਦਾ, ਚਤ੍ਤਾਰੋ ਅਰਿਯਮਗ੍ਗਾ, ਚਤ੍ਤਾਰਿ ਫਲਾਨਿ, ਚਤਸ੍ਸੋ ਪਟਿਸਮ੍ਭਿਦਾ, ਚਤੁਯੋਨਿਪਰਿਚ੍ਛੇਦਕਞਾਣਂ, ਚਤ੍ਤਾਰੋ ਅਰਿਯਵਂਸਾ, ਚਤ੍ਤਾਰਿ ਵੇਸਾਰਜ੍ਜਞਾਣਾਨਿ, ਪਞ੍ਚ ਪਧਾਨਿਯਙ੍ਗਾਨਿ, ਪਞ੍ਚਙ੍ਗਿਕੋ ਸਮ੍ਮਾਸਮਾਧਿ, ਪਞ੍ਚਞਾਣਿਕੋ ਸਮ੍ਮਾਸਮਾਧਿ, ਪਞ੍ਚਿਨ੍ਦ੍ਰਿਯਾਨਿ, ਪਞ੍ਚ ਬਲਾਨਿ, ਪਞ੍ਚ ਨਿਸ੍ਸਾਰਣੀਯਾ ਧਾਤੁਯੋ, ਪਞ੍ਚ ਵਿਮੁਤ੍ਤਾਯਤਨਞਾਣਾਨਿ, ਪਞ੍ਚ ਵਿਮੁਤ੍ਤਿਪਰਿਪਾਚਨੀਯਾ ਸਞ੍ਞਾ, ਛ ਅਨੁਸ੍ਸਤਿਟ੍ਠਾਨਾਨਿ, ਛ ਗਾਰਵਾ, ਛ ਨਿਸ੍ਸਾਰਣੀਯਾ ਧਾਤੁਯੋ, ਛ ਸਤਤਵਿਹਾਰਾ, ਛ ਅਨੁਤ੍ਤਰਿਯਾਨਿ, ਛ ਨਿਬ੍ਬੇਧਭਾਗਿਯਾ ਪਞ੍ਞਾ, ਛ ਅਭਿਞ੍ਞਾ, ਛ ਅਸਾਧਾਰਣਞਾਣਾਨਿ, ਸਤ੍ਤ ਅਪਰਿਹਾਨਿਯਾ ਧਮ੍ਮਾ, ਸਤ੍ਤ ਅਰਿਯਧਨਾਨਿ, ਸਤ੍ਤ ਬੋਜ੍ਝਙ੍ਗਾ, ਸਤ੍ਤ ਸਪ੍ਪੁਰਿਸਧਮ੍ਮਾ, ਸਤ੍ਤ ਨਿਜ੍ਜਰਵਤ੍ਥੂਨਿ, ਸਤ੍ਤ ਸਞ੍ਞਾ, ਸਤ੍ਤ ਦਕ੍ਖਿਣੇਯ੍ਯਪੁਗ੍ਗਲਦੇਸਨਾ, ਸਤ੍ਤ ਖੀਣਾਸਵਬਲਦੇਸਨਾ, ਅਟ੍ਠ ਪਞ੍ਞਾਪਟਿਲਾਭਹੇਤੁਦੇਸਨਾ, ਅਟ੍ਠ ਸਮ੍ਮਤ੍ਤਾਨਿ, ਅਟ੍ਠ ਲੋਕਧਮ੍ਮਾਤਿਕ੍ਕਮਾ, ਅਟ੍ਠ ਆਰਮ੍ਭਵਤ੍ਥੂਨਿ, ਅਟ੍ਠ ਅਕ੍ਖਣਦੇਸਨਾ, ਅਟ੍ਠ ਮਹਾਪੁਰਿਸਵਿਤਕ੍ਕਾ, ਅਟ੍ਠ ਅਭਿਭਾਯਤਨਦੇਸਨਾ, ਅਟ੍ਠ ਵਿਮੋਕ੍ਖਾ, ਨਵ ਯੋਨਿਸੋਮਨਸਿਕਾਰਮੂਲਕਾ ਧਮ੍ਮਾ, ਨਵ ਪਾਰਿਸੁਦ੍ਧਿਪਧਾਨਿਯਙ੍ਗਾਨਿ, ਨਵ ਸਤ੍ਤਾਵਾਸਦੇਸਨਾ, ਨਵ ਆਘਾਤਪ੍ਪਟਿਵਿਨਯਾ, ਨਵ ਸਞ੍ਞਾ, ਨਵ ਨਾਨਤ੍ਤਾਨਿ, ਨਵ ਅਨੁਪੁਬ੍ਬਵਿਹਾਰਾ, ਦਸ ਨਾਥਕਰਣਾ ਧਮ੍ਮਾ, ਦਸ ਕਸਿਣਾਯਤਨਾਨਿ, ਦਸ ਕੁਸਲਕਮ੍ਮਪਥਾ, ਦਸ ਸਮ੍ਮਤ੍ਤਾਨਿ, ਦਸ ਅਰਿਯਵਾਸਾ, ਦਸ ਅਸੇਕ੍ਖਾ ਧਮ੍ਮਾ, ਦਸ ਤਥਾਗਤਬਲਾਨਿ, ਏਕਾਦਸ ਮੇਤ੍ਤਾਨਿਸਂਸਾ, ਦ੍ਵਾਦਸ ਧਮ੍ਮਚਕ੍ਕਾਕਾਰਾ, ਤੇਰਸ ਧੁਤਙ੍ਗਗੁਣਾ, ਚੁਦ੍ਦਸ ਬੁਦ੍ਧਞਾਣਾਨਿ, ਪਨ੍ਨਰਸ ਵਿਮੁਤ੍ਤਿਪਰਿਪਾਚਨੀਯਾ ਧਮ੍ਮਾ, ਸੋਲ਼ਸਵਿਧਾ ਆਨਾਪਾਨਸ੍ਸਤਿ, ਸੋਲ਼ਸ ਅਪਰਨ੍ਤਪਨੀਯਾ ਧਮ੍ਮਾ, ਅਟ੍ਠਾਰਸ ਮਹਾਵਿਪਸ੍ਸਨਾ, ਅਟ੍ਠਾਰਸ ਬੁਦ੍ਧਧਮ੍ਮਾ, ਏਕੂਨਵੀਸਤਿ ਪਚ੍ਚਵੇਕ੍ਖਣਞਾਣਾਨਿ, ਚਤੁਚਤ੍ਤਾਲੀਸ ਞਾਣਵਤ੍ਥੂਨਿ, ਪਞ੍ਞਾਸ ਉਦਯਬ੍ਬਯਞਾਣਾਨਿ, ਪਰੋਪਞ੍ਞਾਸ ਕੁਸਲਾ ਧਮ੍ਮਾ, ਸਤ੍ਤਸਤ੍ਤਤਿ ਞਾਣਵਤ੍ਥੂਨਿ, ਚਤੁਵੀਸਤਿਕੋਟਿਸਤਸਹਸ੍ਸਸਮਾਪਤ੍ਤਿਸਞ੍ਚਾਰਿਮਹਾਵਜਿਰਞਾਣਂ, ਅਨਨ੍ਤਨਯਸਮਨ੍ਤਪਟ੍ਠਾਨਪਵਿਚਯਪਚ੍ਚਵੇਕ੍ਖਣਦੇਸਨਾਞਾਣਾਨਿ, ਤਥਾ ਅਨਨ੍ਤਾਸੁ ਲੋਕਧਾਤੂਸੁ ਅਨਨ੍ਤਾਨਂ ਸਤ੍ਤਾਨਂ ਆਸਯਾਦਿਵਿਭਾਵਨਞਾਣਾਨਿ ਚਾਤਿ ਏਵਮਾਦਿਕੇ ਅਨੇਕੇ ਅਤ੍ਤਨੋ ਕੁਸਲੇ ਅਨਵਜ੍ਜਧਮ੍ਮੇ ਅਨਨ੍ਤਕਾਲਂ ਪਾਰਮਿਪਰਿਭਾਵਨਾਯ ਮਗ੍ਗਭਾਵਨਾਯ ਚ ਪਾਰਿਪੂਰਿਂ ਵੁਦ੍ਧਿਂ ਗਤੇ ‘‘ਇਮੇਪਿ ਅਨਵਜ੍ਜਧਮ੍ਮਾ ਮਯਿ ਸਂਵਿਜ੍ਜਨ੍ਤਿ, ਇਮੇਪਿ ਅਨਵਜ੍ਜਧਮ੍ਮਾ ਮਯਿ ਸਂਵਿਜ੍ਜਨ੍ਤੀ’’ਤਿ ਰੁਚਿਵਸੇਨ ਮਨਸਿਕਾਰਾਭਿਮੁਖੇ ਬੁਦ੍ਧਗੁਣੇ ਵਗ੍ਗਵਗ੍ਗੇ ਪੁਞ੍ਜਪੁਞ੍ਜੇ ਕਤ੍ਵਾ ਪਚ੍ਚਵੇਕ੍ਖਮਾਨੋ ਨਿਸਿਨ੍ਨੋ ਹੋਤਿ. ਤੇ ਚ ਖੋ ਸਪਦੇਸਤੋ ਏਵ, ਨ ਨਿਪ੍ਪਦੇਸਤੋ. ਸਬ੍ਬੇ ਬੁਦ੍ਧਗੁਣੇ ਭਗਵਤਾਪਿ ਅਨੁਪਦਂ ਅਨਵਸੇਸਤੋ ਮਨਸਿ ਕਾਤੁਂ ਨ ਸਕ੍ਕਾ ਅਨਨ੍ਤਾਪਰਿਮੇਯ੍ਯਭਾਵਤੋ.

ਵੁਤ੍ਤਞ੍ਹੇਤਂ –

‘‘ਬੁਦ੍ਧੋਪਿ ਬੁਦ੍ਧਸ੍ਸ ਭਣੇਯ੍ਯ ਵਣ੍ਣਂ,

ਕਪ੍ਪਮ੍ਪਿ ਚੇ ਅਞ੍ਞਮਭਾਸਮਾਨੋ;

ਖੀਯੇਥ ਕਪ੍ਪੋ ਚਿਰਦੀਘਮਨ੍ਤਰੇ,

ਵਣ੍ਣੋ ਨ ਖੀਯੇਥ ਤਥਾਗਤਸ੍ਸਾ’’ਤਿ.

ਅਪਰਮ੍ਪਿ ਵੁਤ੍ਤਂ –

‘‘ਅਸਙ੍ਖ੍ਯੇਯ੍ਯਾਨਿ ਨਾਮਾਨਿ, ਸਗੁਣੇਨ ਮਹੇਸਿਨੋ;

ਗੁਣੇਨ ਨਾਮਮੁਦ੍ਧੇਯ੍ਯਂ, ਅਪਿ ਨਾਮ ਸਹਸ੍ਸਤੋ’’ਤਿ.

ਤਦਾ ਹਿ ਭਗਵਾ ਪਚ੍ਛਾਭਤ੍ਤਂ ਪਿਣ੍ਡਪਾਤਪ੍ਪਟਿਕ੍ਕਨ੍ਤੋ ਵਿਹਾਰਂ ਪਵਿਸਿਤ੍ਵਾ ਗਨ੍ਧਕੁਟਿਪ੍ਪਮੁਖੇ ਠਤ੍ਵਾ ਭਿਕ੍ਖੂਸੁ ਵਤ੍ਤਂ ਦਸ੍ਸੇਤ੍ਵਾ ਗਤੇਸੁ ਮਹਾਗਨ੍ਧਕੁਟਿਂ ਪਵਿਸਿਤ੍ਵਾ ਪਞ੍ਞਤ੍ਤਵਰਬੁਦ੍ਧਾਸਨੇ ਨਿਸਿਨ੍ਨੋ ਅਤ੍ਤਨੋ ਅਤੀਤਜਾਤਿਵਿਸਯਂ ਞਾਣਂ ਪੇਸੇਸਿ. ਅਥਸ੍ਸ ਤਾਨਿ ਨਿਰਨ੍ਤਰਂ ਪੋਙ੍ਖਾਨੁਪੋਙ੍ਖਂ ਅਨਨ੍ਤਾਪਰਿਮਾਣਪ੍ਪਭੇਦਾ ਉਪਟ੍ਠਹਿਂਸੁ. ਸੋ ‘‘ਏਵਂ ਮਹਨ੍ਤਸ੍ਸ ਨਾਮ ਦੁਕ੍ਖਕ੍ਖਨ੍ਧਸ੍ਸ ਮੂਲਭੂਤਾ ਇਮੇ ਕਿਲੇਸਾ’’ਤਿ ਕਿਲੇਸਵਿਸਯਂ ਞਾਣਾਚਾਰਂ ਪੇਸੇਤ੍ਵਾ ਤੇ ਪਹਾਨਮੁਖੇਨ ਅਨੁਪਦਂ ਪਚ੍ਚਵੇਕ੍ਖਿਤ੍ਵਾ ‘‘ਇਮੇ ਵਤ ਕਿਲੇਸਾ ਅਨਵਸੇਸਤੋ ਮਯ੍ਹਂ ਸੁਟ੍ਠੁ ਪਹੀਨਾ’’ਤਿ ਪੁਨ ਤੇਸਂ ਪਹਾਨਕਰਂ ਸਾਕਾਰਂ ਸਪਰਿਵਾਰਂ ਸਉਦ੍ਦੇਸਂ ਅਰਿਯਮਗ੍ਗਂ ਪਚ੍ਚਵੇਕ੍ਖਨ੍ਤੋ ਅਨਨ੍ਤਾਪਰਿਮਾਣਭੇਦੇ ਅਤ੍ਤਨੋ ਸੀਲਾਦਿਅਨਵਜ੍ਜਧਮ੍ਮੇ ਮਨਸਾਕਾਸਿ. ਤੇਨ ਵੁਤ੍ਤਂ –

‘‘ਤੇਨ ਖੋ ਪਨ ਸਮਯੇਨ ਭਗਵਾ ਅਤ੍ਤਨੋ ਅਨੇਕੇ ਪਾਪਕੇ ਅਕੁਸਲੇ ਧਮ੍ਮੇ ਪਹੀਨੇ ਪਚ੍ਚਵੇਕ੍ਖਮਾਨੋ ਨਿਸਿਨ੍ਨੋ ਹੋਤਿ, ਅਨੇਕੇ ਚ ਕੁਸਲੇ ਧਮ੍ਮੇ ਭਾਵਨਾਪਾਰਿਪੂਰਿਂ ਗਤੇ’’ਤਿ.

ਏਵਂ ਪਚ੍ਚਵੇਕ੍ਖਿਤ੍ਵਾ ਉਪ੍ਪਨ੍ਨਪੀਤਿਸੋਮਨਸ੍ਸੁਦ੍ਦੇਸਭੂਤਂ ਇਮਂ ਉਦਾਨਂ ਉਦਾਨੇਸਿ.

ਤਤ੍ਥ ਅਹੁ ਪੁਬ੍ਬੇਤਿ ਅਰਹਤ੍ਤਮਗ੍ਗਞਾਣੁਪ੍ਪਤ੍ਤਿਤੋ ਪੁਬ੍ਬੇ ਸਬ੍ਬੋਪਿ ਚਾਯਂ ਰਾਗਾਦਿਕੋ ਕਿਲੇਸਗਣੋ ਮਯ੍ਹਂ ਸਨ੍ਤਾਨੇ ਅਹੁ ਆਸਿ, ਨ ਇਮਸ੍ਮਿਂ ਕਿਲੇਸਗਣੇ ਕੋਚਿਪਿ ਕਿਲੇਸੋ ਨਾਹੋਸਿ. ਤਦਾ ਨਾਹੂਤਿ ਤਦਾ ਤਸ੍ਮਿਂ ਕਾਲੇ ਅਰਿਯਮਗ੍ਗਕ੍ਖਣੇ ਸੋ ਕਿਲੇਸਗਣੋ ਨ ਅਹੁ ਨ ਆਸਿ, ਤਤ੍ਥ ਅਣੁਮਤ੍ਤੋਪਿ ਕਿਲੇਸੋ ਅਗ੍ਗਮਗ੍ਗਕ੍ਖਣੇ ਅਪ੍ਪਹੀਨੋ ਨਾਮ ਨਤ੍ਥਿ. ‘‘ਤਤੋ ਨਾਹੂ’’ਤਿਪਿ ਪਠਨ੍ਤਿ, ਤਤੋ ਅਰਹਤ੍ਤਮਗ੍ਗਕ੍ਖਣਤੋ ਪਰਂ ਨਾਸੀਤਿ ਅਤ੍ਥੋ. ਨਾਹੁ ਪੁਬ੍ਬੇਤਿ ਯੋ ਚਾਯਂ ਮਮ ਅਪਰਿਮਾਣੋ ਅਨਵਜ੍ਜਧਮ੍ਮੋ ਏਤਰਹਿ ਭਾਵਨਾਪਾਰਿਪੂਰਿਂ ਗਤੋ ਉਪਲਬ੍ਭਤਿ, ਸੋਪਿ ਅਰਿਯਮਗ੍ਗਕ੍ਖਣਤੋ ਪੁਬ੍ਬੇ ਨ ਅਹੁ ਨ ਆਸਿ. ਤਦਾ ਅਹੂਤਿ ਯਦਾ ਪਨ ਮੇ ਅਗ੍ਗਮਗ੍ਗਞਾਣਂ ਉਪ੍ਪਨ੍ਨਂ, ਤਦਾ ਸਬ੍ਬੋਪਿ ਮੇ ਅਨਵਜ੍ਜਧਮ੍ਮੋ ਆਸਿ. ਅਗ੍ਗਮਗ੍ਗਾਧਿਗਮੇਨ ਹਿ ਸਦ੍ਧਿਂ ਸਬ੍ਬੇਪਿ ਸਬ੍ਬਞ੍ਞੁਗੁਣਾ ਬੁਦ੍ਧਾਨਂ ਹਤ੍ਥਗਤਾ ਏਵ ਹੋਨ੍ਤਿ.

ਨ ਚਾਹੁ ਨ ਚ ਭਵਿਸ੍ਸਤਿ, ਨ ਚੇਤਰਹਿ ਵਿਜ੍ਜਤੀਤਿ ਯੋ ਪਨ ਸੋ ਅਨਵਜ੍ਜਧਮ੍ਮੋ ਅਰਿਯਮਗ੍ਗੋ ਮਯ੍ਹਂ ਬੋਧਿਮਣ੍ਡੇ ਉਪ੍ਪਨ੍ਨੋ, ਯੇਨ ਸਬ੍ਬੋ ਕਿਲੇਸਗਣੋ ਅਨਵਸੇਸਂ ਪਹੀਨੋ, ਸੋ ਯਥਾ ਮਯ੍ਹਂ ਮਗ੍ਗਕ੍ਖਣਤੋ ਪੁਬ੍ਬੇ ਨ ਚਾਹੁ ਨ ਚ ਅਹੋਸਿ, ਏਵਂ ਅਤ੍ਤਨਾ ਪਹਾਤਬ੍ਬਕਿਲੇਸਾਭਾਵਤੋ ਤੇ ਕਿਲੇਸਾ ਵਿਯ ਅਯਮ੍ਪਿ ਨ ਚ ਭਵਿਸ੍ਸਤਿ ਅਨਾਗਤੇ ਨ ਉਪ੍ਪਜ੍ਜਿਸ੍ਸਤਿ, ਏਤਰਹਿ ਪਚ੍ਚੁਪ੍ਪਨ੍ਨਕਾਲੇਪਿ ਨ ਵਿਜ੍ਜਤਿ ਨ ਉਪਲਬ੍ਭਤਿ ਅਤ੍ਤਨਾ ਕਤ੍ਤਬ੍ਬਕਿਚ੍ਚਾਭਾਵਤੋ. ਨ ਹਿ ਅਰਿਯਮਗ੍ਗੋ ਅਨੇਕਵਾਰਂ ਪਵਤ੍ਤਤਿ. ਤੇਨੇਵਾਹ – ‘‘ਨ ਪਾਰਂ ਦਿਗੁਣਂ ਯਨ੍ਤੀ’’ਤਿ.

ਇਤਿ ਭਗਵਾ ਅਰਿਯਮਗ੍ਗੇਨ ਅਤ੍ਤਨੋ ਸਨ੍ਤਾਨੇ ਅਨਵਸੇਸਂ ਪਹੀਨੇ ਅਕੁਸਲੇ ਧਮ੍ਮੇ ਭਾਵਨਾਪਾਰਿਪੂਰਿਂ ਗਤੇ ਅਪਰਿਮਾਣੇ ਅਨਵਜ੍ਜਧਮ੍ਮੇ ਚ ਪਚ੍ਚਵੇਕ੍ਖਮਾਨੋ ਅਤ੍ਤੁਪਨਾਯਿਕਪੀਤਿਵੇਗਵਿਸ੍ਸਟ੍ਠਂ ਉਦਾਨਂ ਉਦਾਨੇਸਿ. ਪੁਰਿਮਾਯ ਕਥਾਯ ਪੁਰਿਮਵੇਸਾਰਜ੍ਜਦ੍ਵਯਮੇਵ ਕਥਿਤਂ, ਪਚ੍ਛਿਮਦ੍ਵਯਂ ਸਮ੍ਮਾਸਮ੍ਬੋਧਿਯਾ ਪਕਾਸਿਤਤ੍ਤਾ ਪਕਾਸਿਤਮੇਵ ਹੋਤੀਤਿ.

ਤਤਿਯਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੪. ਪਠਮਨਾਨਾਤਿਤ੍ਥਿਯਸੁਤ੍ਤਵਣ੍ਣਨਾ

੫੪. ਚਤੁਤ੍ਥੇ ਨਾਨਾਤਿਤ੍ਥਿਯਸਮਣਬ੍ਰਾਹ੍ਮਣਪਰਿਬ੍ਬਾਜਕਾਤਿ ਏਤ੍ਥ ਤਰਨ੍ਤਿ ਏਤੇਨ ਸਂਸਾਰੋਘਨ੍ਤਿ ਤਿਤ੍ਥਂ, ਨਿਬ੍ਬਾਨਮਗ੍ਗੋ. ਇਧ ਪਨ ਵਿਪਰੀਤਵਿਪਲ੍ਲਾਸਵਸੇਨ ਦਿਟ੍ਠਿਗਤਿਕੇਹਿ ਤਥਾ ਗਹਿਤਦਿਟ੍ਠਿਦਸ੍ਸਨਂ ‘‘ਤਿਤ੍ਥ’’ਨ੍ਤਿ ਅਧਿਪ੍ਪੇਤਂ. ਤਸ੍ਮਿਂ ਸਸ੍ਸਤਾਦਿਨਾਨਾਕਾਰੇ ਤਿਤ੍ਥੇ ਨਿਯੁਤ੍ਤਾਤਿ ਨਾਨਾਤਿਤ੍ਥਿਯਾ, ਨਗ੍ਗਨਿਗਣ੍ਠਾਦਿਸਮਣਾ ਚੇਵ ਕਠਕਲਾਪਾਦਿਬ੍ਰਾਹ੍ਮਣਾ ਚ ਪੋਕ੍ਖਰਸਾਤਾਦਿਪਰਿਬ੍ਬਾਜਕਾ ਚ ਸਮਣਬ੍ਰਾਹ੍ਮਣਪਰਿਬ੍ਬਾਜਕਾ. ਨਾਨਾਤਿਤ੍ਥਿਯਾ ਚ ਤੇ ਸਮਣਬ੍ਰਾਹ੍ਮਣਪਰਿਬ੍ਬਾਜਕਾ ਚਾਤਿ ਨਾਨਾਤਿਤ੍ਥਿਯਸਮਣਬ੍ਰਾਹ੍ਮਣਪਰਿਬ੍ਬਾਜਕਾ.

‘‘ਸਸ੍ਸਤੋ ਅਤ੍ਤਾ ਚ ਲੋਕੋ ਚਾ’’ਤਿਆਦਿਨਾ ਪਸ੍ਸਨ੍ਤਿ ਏਤਾਯ, ਸਯਂ ਵਾ ਪਸ੍ਸਤਿ, ਤਥਾ ਦਸ੍ਸਨਮਤ੍ਤਮੇਵ ਵਾਤਿ ਦਿਟ੍ਠਿ, ਮਿਚ੍ਛਾਭਿਨਿਵੇਸਸ੍ਸੇਤਂ ਅਧਿਵਚਨਂ. ਸਸ੍ਸਤਾਦਿਵਸੇਨ ਨਾਨਾ ਅਨੇਕਵਿਧਾ ਦਿਟ੍ਠਿਯੋ ਏਤੇਸਨ੍ਤਿ ਨਾਨਾਦਿਟ੍ਠਿਕਾ. ਸਸ੍ਸਤਾਦਿਵਸੇਨੇਵ ਖਮਨਂ ਖਨ੍ਤਿ, ਰੋਚਨਂ ਰੁਚਿ, ਅਤ੍ਥਤੋ ‘‘ਸਸ੍ਸਤੋ ਅਤ੍ਤਾ ਚ ਲੋਕੋ ਚਾ’’ਤਿਆਦਿਨਾ (ਉਦਾ. ੫੫) ਪਵਤ੍ਤੋ ਚਿਤ੍ਤਵਿਪਲ੍ਲਾਸੋ ਸਞ੍ਞਾਵਿਪਲ੍ਲਾਸੋ ਚ. ਤਥਾ ਨਾਨਾ ਖਨ੍ਤਿਯੋ ਏਤੇਸਨ੍ਤਿ ਨਾਨਾਖਨ੍ਤਿਕਾ, ਨਾਨਾ ਰੁਚਿਯੋ ਏਤੇਸਨ੍ਤਿ ਨਾਨਾਰੁਚਿਕਾ. ਦਿਟ੍ਠਿਗਤਿਕਾ ਹਿ ਪੁਬ੍ਬਭਾਗੇ ਤਥਾ ਤਥਾ ਚਿਤ੍ਤਂ ਰੋਚੇਤ੍ਵਾ ਖਮਾਪੇਤ੍ਵਾ ਚ ਪਚ੍ਛਾ ‘‘ਇਦਮੇਵ ਸਚ੍ਚਂ ਮੋਘਮਞ੍ਞ’’ਨ੍ਤਿ ਅਭਿਨਿਵਿਸਨ੍ਤਿ. ਅਥ ਵਾ ‘‘ਅਨਿਚ੍ਚਂ ਨਿਚ੍ਚ’’ਨ੍ਤਿਆਦਿਨਾ ਤਥਾ ਤਥਾ ਦਸ੍ਸਨਵਸੇਨ ਦਿਟ੍ਠਿ, ਖਮਨਵਸੇਨ ਖਨ੍ਤਿ, ਰੁਚ੍ਚਨਵਸੇਨ ਰੁਚੀਤਿ ਏਵਂ ਤੀਹਿਪਿ ਪਦੇਹਿ ਦਿਟ੍ਠਿ ਏਵ ਵੁਤ੍ਤਾਤਿ ਵੇਦਿਤਬ੍ਬਾ. ਨਾਨਾਦਿਟ੍ਠਿਨਿਸ੍ਸਯਨਿਸ੍ਸਿਤਾਤਿ ਸਸ੍ਸਤਾਦਿਪਰਿਕਪ੍ਪਵਸੇਨ ਨਾਨਾਵਿਧਂ ਦਿਟ੍ਠਿਯਾ ਨਿਸ੍ਸਯਂ ਵਤ੍ਥੁਂ ਕਾਰਣਂ, ਦਿਟ੍ਠਿਸਙ੍ਖਾਤਮੇਵ ਵਾ ਨਿਸ੍ਸਯਂ ਨਿਸ੍ਸਿਤਾ ਅਲ੍ਲੀਨਾ ਉਪਗਤਾ, ਤਂ ਅਨਿਸ੍ਸਜ੍ਜਿਤ੍ਵਾ ਠਿਤਾਤਿ ਅਤ੍ਥੋ. ਦਿਟ੍ਠਿਯੋਪਿ ਹਿ ਦਿਟ੍ਠਿਗਤਿਕਾਨਂ ਅਭਿਨਿਵੇਸਾਕਾਰਾਨਂ ਨਿਸ੍ਸਯਾ ਹੋਨ੍ਤਿ.

ਸਨ੍ਤੀਤਿ ਅਤ੍ਥਿ ਸਂਵਿਜ੍ਜਨ੍ਤਿ ਉਪਲਬ੍ਭਨ੍ਤਿ. ਏਕੇਤਿ ਏਕਚ੍ਚੇ. ਸਮਣਬ੍ਰਾਹ੍ਮਣਾਤਿ ਪਬ੍ਬਜ੍ਜੂਪਗਮੇਨ ਸਮਣਾ, ਜਾਤਿਯਾ ਬ੍ਰਾਹ੍ਮਣਾ, ਲੋਕੇਨ ਵਾ ਸਮਣਾਤਿ ਚ ਬ੍ਰਾਹ੍ਮਣਾਤਿ ਚ ਏਵਂ ਗਹਿਤਾ. ਏਵਂਵਾਦਿਨੋਤਿ ਏਵਂ ਇਦਾਨਿ ਵਤ੍ਤਬ੍ਬਾਕਾਰੇਨ ਵਦਨ੍ਤੀਤਿ ਏਵਂਵਾਦਿਨੋ. ਏਵਂ ਇਦਾਨਿ ਵਤ੍ਤਬ੍ਬਾਕਾਰੇਨ ਪਵਤ੍ਤਾ ਦਿਟ੍ਠਿ ਏਤੇਸਨ੍ਤਿ ਏਵਂਦਿਟ੍ਠਿਨੋ. ਤਤ੍ਥ ਦੁਤਿਯੇਨ ਦਿਟ੍ਠਿਗਤਿਕਾਨਂ ਮਿਚ੍ਛਾਭਿਨਿਵੇਸੋ ਦਸ੍ਸਿਤੋ, ਪਠਮੇਨ ਤੇਸਂ ਯਥਾਭਿਨਿਵੇਸਂ ਪਰੇਸਂ ਤਤ੍ਥ ਪਤਿਟ੍ਠਾਪਨਵਸੇਨ ਵੋਹਾਰੋ.

ਸਸ੍ਸਤੋ ਲੋਕੋ, ਇਦਮੇਵ ਸਚ੍ਚਂ ਮੋਘਮਞ੍ਞਨ੍ਤਿ ਏਤ੍ਥ ਲੋਕੋਤਿ ਅਤ੍ਤਾ. ਸੋ ਹਿ ਦਿਟ੍ਠਿਗਤਿਕੇਹਿ ਲੋਕਿਯਨ੍ਤਿ ਏਤ੍ਥ ਪੁਞ੍ਞਂ ਪਾਪਂ ਤਬ੍ਬਿਪਾਕਾ, ਸਯਂ ਵਾ ਕਾਰਕਾਦਿਭਾਵੇਨ ਅਭਿਯੁਤ੍ਤੇਹਿ ਲੋਕਿਯਤੀਤਿ ਲੋਕੋਤਿ ਅਧਿਪ੍ਪੇਤੋ. ਸ੍ਵਾਯਂ ਸਸ੍ਸਤੋ ਅਮਰੋ ਨਿਚ੍ਚੋ ਧੁਵੋਤਿ ਯਦਿਦਂ ਅਮ੍ਹਾਕਂ ਦਸ੍ਸਨਂ ਇਦਮੇਵ ਸਚ੍ਚਂ ਅਵਿਪਰੀਤਂ, ਅਞ੍ਞਂ ਪਨ ਅਸਸ੍ਸਤੋਤਿਆਦਿ ਪਰੇਸਂ ਦਸ੍ਸਨਂ ਮੋਘਂ ਮਿਚ੍ਛਾਤਿ ਅਤ੍ਥੋ. ਏਤੇਨ ਚਤ੍ਤਾਰੋਪਿ ਸਸ੍ਸਤਵਾਦਾ ਦਸ੍ਸਿਤਾ ਹੋਨ੍ਤਿ. ਅਸਸ੍ਸਤੋਤਿ ਨ ਸਸ੍ਸਤੋ, ਅਨਿਚ੍ਚੋ ਅਧੁਵੋ ਚਵਨਧਮ੍ਮੋਤਿ ਅਤ੍ਥੋ. ‘‘ਅਸਸ੍ਸਤੋ’’ਤਿ ਸਸ੍ਸਤਭਾਵਪ੍ਪਟਿਕ੍ਖੇਪੇਨੇਵ ਉਚ੍ਛੇਦੋ ਦੀਪਿਤੋਤਿ ਸਤ੍ਤਪਿ ਉਚ੍ਛੇਦਵਾਦਾ ਦੀਪਿਤਾ ਹੋਨ੍ਤਿ.

ਅਨ੍ਤਵਾਤਿ ਸਪਰਿਯਨ੍ਤੋ ਪਰਿਵਟੁਮੋ ਪਰਿਚ੍ਛਿਨ੍ਨਪ੍ਪਮਾਣੋ, ਨ ਸਬ੍ਬਗਤੋਤਿ ਅਤ੍ਥੋ. ਏਤੇਨ ਸਰੀਰਪਰਿਮਾਣੋ ਅਙ੍ਗੁਟ੍ਠਪਰਿਮਾਣੋ ਅਵਯਵਪਰਿਮਾਣੋ ਪਰਮਾਣੁਪਰਿਮਾਣੋ ਅਤ੍ਤਾਤਿ ਏਵਮਾਦਿਵਾਦਾ ਦਸ੍ਸਿਤਾ ਹੋਨ੍ਤਿ. ਅਨਨ੍ਤਵਾਤਿ ਅਪਰਿਯਨ੍ਤੋ, ਸਬ੍ਬਗਤੋਤਿ ਅਤ੍ਥੋ. ਏਤੇਨ ਕਪਿਲਕਣਾਦਾਦਿਵਾਦਾ ਦੀਪਿਤਾ ਹੋਨ੍ਤਿ.

ਤਂ ਜੀਵਂ ਤਂ ਸਰੀਰਨ੍ਤਿ ਯਂ ਸਰੀਰਂ, ਤਦੇਵ ਜੀਵਸਙ੍ਖਾਤਂ ਵਤ੍ਥੁ, ਯਞ੍ਚ ਜੀਵਸਙ੍ਖਾਤਂ ਵਤ੍ਥੁ, ਤਦੇਵ ਸਰੀਰਨ੍ਤਿ ਜੀਵਞ੍ਚ ਸਰੀਰਞ੍ਚ ਅਦ੍ਵਯਂ ਸਮਨੁਪਸ੍ਸਤਿ. ਏਤੇਨ ਆਜੀਵਕਾਨਂ ਵਿਯ ‘‘ਰੂਪੀ ਅਤ੍ਤਾ’’ਤਿ ਅਯਂ ਵਾਦੋ ਦਸ੍ਸਿਤੋ ਹੋਤਿ. ਅਞ੍ਞਂ ਜੀਵਂ ਅਞ੍ਞਂ ਸਰੀਰਨ੍ਤਿ ਇਮਿਨਾ ਪਨ ‘‘ਅਰੂਪੀ ਅਤ੍ਤਾ’’ਤਿ ਅਯਂ ਵਾਦੋ ਦਸ੍ਸਿਤੋ.

ਹੋਤਿ ਤਥਾਗਤੋ ਪਰਂ ਮਰਣਾਤਿ ਏਤ੍ਥ ਤਥਾਗਤੋਤਿ ਸਤ੍ਤੋ. ਤਞ੍ਹਿ ਦਿਟ੍ਠਿਗਤਿਕੋ ਕਾਰਕਵੇਦਕਾਦਿਸਙ੍ਖਾਤਂ, ਨਿਚ੍ਚਧੁਵਾਦਿਸਙ੍ਖਾਤਂ ਵਾ ਤਥਾਭਾਵਂ ਗਤੋਤਿ ਤਥਾਗਤੋਤਿ ਵੋਹਰਤਿ, ਸੋ ਮਰਣਤੋ ਇਧਕਾਯਸ੍ਸ ਭੇਦਤੋ ਪਰਂ ਉਦ੍ਧਂ ਹੋਤਿ, ਅਤ੍ਥਿ ਸਂਵਿਜ੍ਜਤੀਤਿ ਅਤ੍ਥੋ. ਏਤੇਨ ਸਸ੍ਸਤਗ੍ਗਾਹਮੁਖੇਨ ਸੋਲ਼ਸ ਸਞ੍ਞੀਵਾਦਾ ਅਟ੍ਠ ਅਸਞ੍ਞੀਵਾਦਾ ਅਟ੍ਠ ਚ ਨੇਵਸਞ੍ਞੀਨਾਸਞ੍ਞੀਵਾਦਾ ਦਸ੍ਸਿਤਾ ਹੋਨ੍ਤਿ. ਨ ਹੋਤੀਤਿ ਨਤ੍ਥਿ ਨ ਉਪਲਬ੍ਭਤਿ. ਏਤੇਨ ਉਚ੍ਛੇਦਵਾਦੋ ਦਸ੍ਸਿਤੋ. ਹੋਤਿ ਚ ਨ ਚ ਹੋਤੀਤਿ ਅਤ੍ਥਿ ਚ ਨਤ੍ਥਿ ਚਾਤਿ. ਏਤੇਨ ਏਕਚ੍ਚਸਸ੍ਸਤਵਾਦਾ ਸਤ੍ਤ ਸਞ੍ਞੀਵਾਦਾ ਚ ਦਸ੍ਸਿਤਾ. ਨੇਵ ਹੋਤਿ ਨ ਨ ਹੋਤੀਤਿ ਇਮਿਨਾ ਪਨ ਅਮਰਾਵਿਕ੍ਖੇਪਵਾਦੋ ਦਸ੍ਸਿਤੋਤਿ ਵੇਦਿਤਬ੍ਬਂ.

ਇਮੇ ਕਿਰ ਦਿਟ੍ਠਿਗਤਿਕਾ ਨਾਨਾਦੇਸਤੋ ਆਗਨ੍ਤ੍ਵਾ ਸਾਵਤ੍ਥਿਯਂ ਪਟਿਵਸਨ੍ਤਾ ਏਕਦਾ ਸਮਯਪ੍ਪਵਾਦਕੇ ਸਨ੍ਨਿਪਤਿਤ੍ਵਾ ਅਤ੍ਤਨੋ ਅਤ੍ਤਨੋ ਵਾਦਂ ਪਗ੍ਗਯ੍ਹ ਅਞ੍ਞਵਾਦੇ ਖੁਂਸੇਨ੍ਤਾ ਵਿਵਾਦਾਪਨ੍ਨਾ ਅਹੇਸੁਂ. ਤੇਨ ਵੁਤ੍ਤਂ ‘‘ਤੇ ਭਣ੍ਡਨਜਾਤਾ’’ਤਿਆਦਿ.

ਤਤ੍ਥ ਭਣ੍ਡਨਂ ਨਾਮ ਕਲਹਸ੍ਸ ਪੁਬ੍ਬਭਾਗੋ. ਭਣ੍ਡਨਜਾਤਾਤਿ ਜਾਤਭਣ੍ਡਨਾ. ਕਲਹੋਤਿ ਕਲਹੋ ਏਵ, ਕਲਸ੍ਸ ਵਾ ਹਨਨਤੋ ਕਲਹੋ ਦਟ੍ਠਬ੍ਬੋ. ਅਞ੍ਞਮਞ੍ਞਸ੍ਸ ਵਿਰੁਦ੍ਧਵਾਦਂ ਆਪਨ੍ਨਾਤਿ ਵਿਵਾਦਾਪਨ੍ਨਾ. ਮਮ੍ਮਘਟ੍ਟਨਤੋ ਮੁਖਮੇਵ ਸਤ੍ਤੀਤਿ ਮੁਖਸਤ੍ਤਿ, ਫਰੁਸਵਾਚਾ. ਫਲੂਪਚਾਰੇਨ ਵਿਯ ਹਿ ਕਾਰਣਂ ਕਾਰਣੂਪਚਾਰੇਨ ਫਲਮ੍ਪਿ ਵੋਹਰਿਯਤਿ ਯਥਾ ਤਂ ‘‘ਸੁਖੋ ਬੁਦ੍ਧੁਪ੍ਪਾਦੋ, ਪਾਪਕਮ੍ਮਂ ਪਚ੍ਚਨੁਭੋਤੀ’’ਤਿ ਚ. ਤਾਹਿ ਮੁਖਸਤ੍ਤੀਹਿ ਵਿਤੁਦਨ੍ਤਾ ਵਿਜ੍ਝਨ੍ਤਾ ਵਿਹਰਨ੍ਤਿ. ਏਦਿਸੋ ਧਮ੍ਮੋਤਿ ਧਮ੍ਮੋ ਅਵਿਪਰੀਤਸਭਾਵੋ ਏਦਿਸੋ ਏਵਰੂਪੋ, ਯਥਾ ਮਯਾ ਵੁਤ੍ਤਂ ‘‘ਸਸ੍ਸਤੋ ਲੋਕੋ’’ਤਿ. ਨੇਦਿਸੋ ਧਮ੍ਮੋਤਿ ਨ ਏਦਿਸੋ ਧਮ੍ਮੋ, ਯਥਾ ਤਯਾ ਵੁਤ੍ਤਂ ‘‘ਅਸਸ੍ਸਤੋ ਲੋਕੋ’’ਤਿ, ਏਵਂ ਸੇਸਪਦੇਹਿਪਿ ਯੋਜੇਤਬ੍ਬਂ. ਸੋ ਚ ਤਿਤ੍ਥਿਯਾਨਂ ਵਿਵਾਦੋ ਸਕਲਨਗਰੇ ਪਾਕਟੋ ਜਾਤੋ. ਅਥ ਭਿਕ੍ਖੂ ਸਾਵਤ੍ਥਿਂ ਪਿਣ੍ਡਾਯ ਪਵਿਟ੍ਠਾ ਤਂ ਸੁਤ੍ਵਾ ‘‘ਅਤ੍ਥਿ ਨੋ ਇਦਂ ਕਥਾਪਾਭਤਂ, ਯਂ ਨੂਨ ਮਯਂ ਇਮਂ ਪਵਤ੍ਤਿਂ ਭਗਵਤੋ ਆਰੋਚੇਯ੍ਯਾਮ, ਅਪ੍ਪੇਵ ਨਾਮ ਤਂ ਨਿਸ੍ਸਾਯ ਸਤ੍ਥੁ ਸਣ੍ਹਸੁਖੁਮਂ ਧਮ੍ਮਦੇਸਨਂ ਲਭੇਯ੍ਯਾਮਾ’’ਤਿ ਤੇ ਪਚ੍ਛਾਭਤ੍ਤਂ ਧਮ੍ਮਦੇਸਨਾਕਾਲੇ ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਤੇਨ ਵੁਤ੍ਤਂ – ‘‘ਅਥ ਖੋ ਸਮ੍ਬਹੁਲਾ ਭਿਕ੍ਖੂ’’ਤਿਆਦਿ.

ਤਂ ਸੁਤ੍ਵਾ ਭਗਵਾ ਅਞ੍ਞਤਿਤ੍ਥਿਯਾਨਂ ਧਮ੍ਮਸ੍ਸ ਅਯਥਾਭੂਤਪਜਾਨਨਂ ਪਕਾਸੇਨ੍ਤੋ ‘‘ਅਞ੍ਞਤਿਤ੍ਥਿਯਾ, ਭਿਕ੍ਖਵੇ’’ਤਿਆਦਿਮਾਹ. ਤਤ੍ਥ ਅਨ੍ਧਾਤਿ ਪਞ੍ਞਾਚਕ੍ਖੁਵਿਰਹੇਨ ਅਨ੍ਧਾ. ਤੇਨਾਹ ‘‘ਅਚਕ੍ਖੁਕਾ’’ਤਿ. ਪਞ੍ਞਾ ਹਿ ਇਧ ‘‘ਚਕ੍ਖੂ’’ਤਿ ਅਧਿਪ੍ਪੇਤਾ. ਤਥਾ ਹਿ ਵੁਤ੍ਤਂ ‘‘ਅਤ੍ਥਂ ਨ ਜਾਨਨ੍ਤੀ’’ਤਿਆਦਿ. ਤਤ੍ਥ ਅਤ੍ਥਂ ਨ ਜਾਨਨ੍ਤੀਤਿ ਇਧਲੋਕਤ੍ਥਂ ਪਰਲੋਕਤ੍ਥਂ ਨ ਜਾਨਨ੍ਤਿ, ਇਧਲੋਕਪਰਲੋਕੇਸੁ ਵੁਦ੍ਧਿਂ ਅਬ੍ਭੁਦਯਂ ਨਾਵਬੁਜ੍ਝਨ੍ਤਿ, ਪਰਮਤ੍ਥੇ ਪਨ ਨਿਬ੍ਬਾਨੇ ਕਥਾਵਕਾ. ਯੇ ਹਿ ਨਾਮ ਪਵਤ੍ਤਿਮਤ੍ਤੇਪਿ ਸਮ੍ਮੂਲ਼੍ਹਾ, ਤੇ ਕਥਂ ਨਿਵਤ੍ਤਿਂ ਜਾਨਿਸ੍ਸਨ੍ਤੀਤਿ. ਅਨਤ੍ਥਂ ਨ ਜਾਨਨ੍ਤੀਤਿ ਯਦਗ੍ਗੇਨ ਤੇ ਅਤ੍ਥਂ ਨ ਜਾਨਨ੍ਤਿ, ਤਦਗ੍ਗੇਨ ਅਨਤ੍ਥਮ੍ਪਿ ਨ ਜਾਨਨ੍ਤਿ. ਯਸ੍ਮਾ ਧਮ੍ਮਂ ਨ ਜਾਨਨ੍ਤਿ, ਤਸ੍ਮਾ ਅਧਮ੍ਮਮ੍ਪਿ ਨ ਜਾਨਨ੍ਤਿ. ਤੇ ਹਿ ਵਿਪਰਿਯੇਸਗ੍ਗਾਹਿਤਾਯ ਧਮ੍ਮਂ ਕੁਸਲਮ੍ਪਿ ਅਕੁਸਲਂ ਕਰੋਨ੍ਤਿ, ਅਧਮ੍ਮਮ੍ਪਿ ਅਕੁਸਲਂ ਕੁਸਲਂ ਕਰੋਨ੍ਤਿ. ਨ ਕੇਵਲਞ੍ਚ ਧਮ੍ਮਾਧਮ੍ਮੇਸੁ ਏਵ, ਅਥ ਖੋ ਤਸ੍ਸ ਵਿਪਾਕੇਸੁਪਿ ਸਮ੍ਮੂਲ਼੍ਹਾ. ਤਥਾ ਹਿ ਤੇ ਕਮ੍ਮਮ੍ਪਿ ਵਿਪਾਕਂ ਕਤ੍ਵਾ ਵੋਹਰਨ੍ਤਿ, ਵਿਪਾਕਮ੍ਪਿ ਕਮ੍ਮਂ ਕਤ੍ਵਾ. ਤਥਾ ਧਮ੍ਮਂ ਸਭਾਵਧਮ੍ਮਮ੍ਪਿ ਨ ਜਾਨਨ੍ਤਿ, ਅਧਮ੍ਮਂ ਅਸਭਾਵਧਮ੍ਮਮ੍ਪਿ ਨ ਜਾਨਨ੍ਤਿ. ਏਵਂਭੂਤਾ ਚ ਸਭਾਵਧਮ੍ਮਂ ਅਸਭਾਵਧਮ੍ਮਞ੍ਚ, ਅਸਭਾਵਧਮ੍ਮਂ ਸਭਾਵਧਮ੍ਮਞ੍ਚ ਕਤ੍ਵਾ ਪਵੇਦੇਨ੍ਤਿ.

ਇਤਿ ਭਗਵਾ ਤਿਤ੍ਥਿਯਾਨਂ ਮੋਹਦਿਟ੍ਠਿਪਟਿਲਾਭਭਾਵੇਨ ਪਞ੍ਞਾਚਕ੍ਖੁਵੇਕਲ੍ਲਤੋ ਅਨ੍ਧਭਾਵਂ ਦਸ੍ਸੇਤ੍ਵਾ ਇਦਾਨਿ ਤਮਤ੍ਥਂ ਜਚ੍ਚਨ੍ਧੂਪਮਾਯ ਪਕਾਸੇਤੁਂ ‘‘ਭੂਤਪੁਬ੍ਬਂ, ਭਿਕ੍ਖਵੇ’’ਤਿਆਦਿਮਾਹ. ਤਤ੍ਥ ਭੂਤਪੁਬ੍ਬਨ੍ਤਿ ਪੁਬ੍ਬੇ ਭੂਤਂ, ਅਤੀਤਕਾਲੇ ਨਿਬ੍ਬਤ੍ਤਂ. ਅਞ੍ਞਤਰੋ ਰਾਜਾ ਅਹੋਸੀਤਿ ਪੁਰਾਤਨੋ ਨਾਮਗੋਤ੍ਤੇਹਿ ਲੋਕੇ ਅਪਾਕਟੋ ਏਕੋ ਰਾਜਾ ਅਹੋਸਿ. ਸੋ ਰਾਜਾ ਅਞ੍ਞਤਰਂ ਪੁਰਿਸਂ ਆਮਨ੍ਤੇਸੀਤਿ ਤਸ੍ਸ ਕਿਰ ਰਞ੍ਞੋ ਸੋਭਗ੍ਗਪ੍ਪਤ੍ਤਂ ਸਬ੍ਬਙ੍ਗਸਮ੍ਪਨ੍ਨਂ ਅਤ੍ਤਨੋ ਓਪਵਯ੍ਹਂ ਹਤ੍ਥਿਂ ਉਪਟ੍ਠਾਨਂ ਆਗਤਂ ਦਿਸ੍ਵਾ ਏਤਦਹੋਸਿ – ‘‘ਭਦ੍ਦਕਂ ਵਤ, ਭੋ, ਹਤ੍ਥਿਯਾਨਂ ਦਸ੍ਸਨੀਯ’’ਨ੍ਤਿ. ਤੇਨ ਚ ਸਮਯੇਨ ਏਕੋ ਜਚ੍ਚਨ੍ਧੋ ਰਾਜਙ੍ਗਣੇਨ ਗਚ੍ਛਤਿ. ਤਂ ਦਿਸ੍ਵਾ ਰਾਜਾ ਚਿਨ੍ਤੇਸਿ – ‘‘ਮਹਾਜਾਨਿਯਾ ਖੋ ਇਮੇ ਅਨ੍ਧਾ ਯੇ ਏਵਰੂਪਂ ਦਸ੍ਸਨੀਯਂ ਨ ਲਭਨ੍ਤਿ ਦਟ੍ਠੁਂ. ਯਂਨੂਨਾਹਂ ਇਮਿਸ੍ਸਾ ਸਾਵਤ੍ਥਿਯਾ ਯਤ੍ਤਕਾ ਜਚ੍ਚਨ੍ਧਾ ਸਬ੍ਬੇ ਤੇ ਸਨ੍ਨਿਪਾਤਾਪੇਤ੍ਵਾ ਏਕਦੇਸਂ ਏਕਦੇਸਂ ਹਤ੍ਥੇਨ ਫੁਸਾਪੇਤ੍ਵਾ ਤੇਸਂ ਵਚਨਂ ਸੁਣੇਯ੍ਯ’’ਨ੍ਤਿ. ਕੇਲ਼ਿਸੀਲੋ ਰਾਜਾ ਏਕੇਨ ਪੁਰਿਸੇਨ ਸਾਵਤ੍ਥਿਯਾ ਸਬ੍ਬੇ ਜਚ੍ਚਨ੍ਧੇ ਸਨ੍ਨਿਪਾਤਾਪੇਤ੍ਵਾ ਤਸ੍ਸ ਪੁਰਿਸਸ੍ਸ ਸਞ੍ਞਂ ਅਦਾਸਿ ‘‘ਯਥਾ ਏਕੇਕੋ ਜਚ੍ਚਨ੍ਧੋ ਸੀਸਾਦਿਕਂ ਏਕੇਕਂਯੇਵ ਹਤ੍ਥਿਸ੍ਸ ਅਙ੍ਗਂ ਫੁਸਿਤ੍ਵਾ ‘ਹਤ੍ਥੀ ਮਯਾ ਦਿਟ੍ਠੋ’ਤਿ ਸਞ੍ਞਂ ਉਪ੍ਪਾਦੇਸਿ, ਤਥਾ ਕਰੋਹੀ’’ਤਿ. ਸੋ ਪੁਰਿਸੋ ਤਥਾ ਅਕਾਸਿ. ਅਥ ਰਾਜਾ ਤੇ ਜਚ੍ਚਨ੍ਧੇ ਪਚ੍ਚੇਕਂ ਪੁਚ੍ਛਿ ‘‘ਕੀਦਿਸੋ, ਭਣੇ, ਹਤ੍ਥੀ’’ਤਿ. ਤੇ ਅਤ੍ਤਨਾ ਦਿਟ੍ਠਦਿਟ੍ਠਾਵਯਵਮੇਵ ਹਤ੍ਥਿਂ ਕਤ੍ਵਾ ਵਦਨ੍ਤਾ ‘‘ਏਦਿਸੋ ਹਤ੍ਥੀ, ਨੇਦਿਸੋ ਹਤ੍ਥੀ’’ਤਿ ਅਞ੍ਞਮਞ੍ਞਂ ਕਲਹਂ ਕਰੋਨ੍ਤਾ ਹਤ੍ਥਾਦੀਹਿ ਉਪਕ੍ਕਮਿਤ੍ਵਾ ਰਾਜਙ੍ਗਣੇ ਮਹਨ੍ਤਂ ਕੋਲਾਹਲਂ ਅਕਂਸੁ. ਰਾਜਾ ਸਪਰਿਜਨੋ ਤੇਸਂ ਤਂ ਵਿਪ੍ਪਕਾਰਂ ਦਿਸ੍ਵਾ ਫਾਸੁਕੇਹਿ ਭਿਜ੍ਜਮਾਨੇਹਿ ਹਦਯੇਨ ਉਗ੍ਗਤੇਨ ਮਹਾਹਸਿਤਂ ਹਸਿ. ਤੇਨ ਵੁਤ੍ਤਂ – ‘‘ਅਥ ਖੋ, ਭਿਕ੍ਖਵੇ, ਸੋ ਰਾਜਾ…ਪੇ… ਅਤ੍ਤਮਨੋ ਅਹੋਸੀ’’ਤਿ.

ਤਤ੍ਥ ਅਮ੍ਭੋਤਿ ਆਲਪਨਂ. ਯਾਵਤਕਾਤਿ ਯਤ੍ਤਕਾ. ਜਚ੍ਚਨ੍ਧਾਤਿ ਜਾਤਿਯਾ ਅਨ੍ਧਾ, ਜਾਤਿਤੋ ਪਟ੍ਠਾਯ ਅਚਕ੍ਖੁਕਾ. ਏਕਜ੍ਝਨ੍ਤਿ ਏਕਤੋ. ਭਣੇਤਿ ਅਬਹੁਮਾਨਾਲਾਪੋ. ਹਤ੍ਥਿਂ ਦਸ੍ਸੇਹੀਤਿ ਯਥਾਵੁਤ੍ਤਂ ਹਤ੍ਥਿਂ ਸਯਾਪੇਤ੍ਵਾ ਦਸ੍ਸੇਹਿ. ਸੋ ਚ ਸੁਸਿਕ੍ਖਿਤਤ੍ਤਾ ਅਪਰਿਪ੍ਫਨ੍ਦਨ੍ਤੋ ਨਿਪਜ੍ਜਿ. ਦਿਟ੍ਠੋ ਨੋ ਹਤ੍ਥੀਤਿ ਹਤ੍ਥੇਨ ਪਰਾਮਸਨਂ ਦਸ੍ਸਨਂ ਕਤ੍ਵਾ ਆਹਂਸੁ. ਤੇਨ ਪੁਰਿਸੇਨ ਸੀਸਂ ਪਰਾਮਸਾਪੇਤ੍ਵਾ ‘‘ਏਦਿਸੋ ਹਤ੍ਥੀ’’ਤਿ ਸਞ੍ਞਾਪਿਤਤ੍ਤਾ ਤਾਦਿਸਂਯੇਵ ਨਂ ਹਤ੍ਥਿਂ ਸਞ੍ਜਾਨਨ੍ਤਾ ਜਚ੍ਚਨ੍ਧਾ ‘‘ਏਦਿਸੋ ਦੇਵ ਹਤ੍ਥੀ ਸੇਯ੍ਯਥਾਪਿ ਕੁਮ੍ਭੋ’’ਤਿ ਵਦਿਂਸੁ. ਕੁਮ੍ਭੋਤਿ ਚ ਘਟੋਤਿ ਅਤ੍ਥੋ. ਖੀਲੋਤਿ ਨਾਗਦਨ੍ਤਖੀਲੋ. ਸੋਣ੍ਡੋਤਿ ਹਤ੍ਥੋ. ਨਙ੍ਗਲੀਸਾਤਿ ਨਙ੍ਗਲਸ੍ਸ ਸਿਰਸ੍ਸ ਈਸਾ. ਕਾਯੋਤਿ ਸਰੀਰਂ. ਕੋਟ੍ਠੋਤਿ ਕੁਸੂਲੋ. ਪਾਦੋਤਿ ਜਙ੍ਘੋ. ਥੂਣੋਤਿ ਥਮ੍ਭੋ. ਨਙ੍ਗੁਟ੍ਠਨ੍ਤਿ ਵਾਲ਼ਸ੍ਸ ਉਰਿਮਪ੍ਪਦੇਸੋ. ਵਾਲਧੀਤਿ ਵਾਲਸ੍ਸ ਅਗ੍ਗਪ੍ਪਦੇਸੋ. ਮੁਟ੍ਠੀਹਿ ਸਂਸੁਮ੍ਭਿਂਸੂਤਿ ਮੁਟ੍ਠਿਯੋ ਬਨ੍ਧਿਤ੍ਵਾ ਪਹਰਿਂਸੁ, ਮੁਟ੍ਠਿਘਾਤਂ ਅਕਂਸੁ. ਅਤ੍ਤਮਨੋ ਅਹੋਸੀਤਿ ਕੇਲ਼ਿਸੀਲਤ੍ਤਾ ਸੋ ਰਾਜਾ ਤੇਨ ਜਚ੍ਚਨ੍ਧਾਨਂ ਕਲਹੇਨ ਅਤ੍ਤਮਨੋ ਪਹਾਸੇਨ ਗਹਿਤਮਨੋ ਅਹੋਸਿ.

ਏਵਮੇਵ ਖੋਤਿ ਉਪਮਾਸਂਸਨ੍ਦਨਂ. ਤਸ੍ਸਤ੍ਥੋ – ਭਿਕ੍ਖਵੇ, ਯਥਾ ਤੇ ਜਚ੍ਚਨ੍ਧਾ ਅਚਕ੍ਖੁਕਾ ਏਕਙ੍ਗਦਸ੍ਸਿਨੋ ਅਨਵਸੇਸਤੋ ਹਤ੍ਥਿਂ ਅਪਸ੍ਸਿਤ੍ਵਾ ਅਤ੍ਤਨਾ ਦਿਟ੍ਠਾਵਯਵਮਤ੍ਤਂ ਹਤ੍ਥਿਸਞ੍ਞਾਯ ਇਤਰੇਹਿ ਦਿਟ੍ਠਂ ਅਨਨੁਜਾਨਨ੍ਤਾ ਅਞ੍ਞਮਞ੍ਞਂ ਵਿਵਾਦਂ ਆਪਨ੍ਨਾ ਕਲਹਂ ਅਕਂਸੁ, ਏਵਮੇਵ ਇਮੇ ਅਞ੍ਞਤਿਤ੍ਥਿਯਾ ਸਕ੍ਕਾਯਸ੍ਸ ਏਕਦੇਸਂ ਰੂਪਵੇਦਨਾਦਿਂ ਅਤ੍ਤਨੋ ਦਿਟ੍ਠਿਦਸ੍ਸਨੇਨ ਯਥਾਦਿਟ੍ਠਂ ‘‘ਅਤ੍ਤਾ’’ਤਿ ਮਞ੍ਞਮਾਨਾ ਤਸ੍ਸ ਸਸ੍ਸਤਾਦਿਭਾਵਂ ਆਰੋਪੇਤ੍ਵਾ ‘‘ਇਦਮੇਵ ਸਚ੍ਚਂ ਮੋਘਮਞ੍ਞ’’ਨ੍ਤਿ ਅਭਿਨਿਵਿਸਿਤ੍ਵਾ ਅਞ੍ਞਮਞ੍ਞਂ ਵਿਵਦਨ੍ਤਿ, ਯਥਾਭੂਤਂ ਪਨ ਅਤ੍ਥਾਨਤ੍ਥਂ ਧਮ੍ਮਾਧਮ੍ਮਞ੍ਚ ਨ ਜਾਨਨ੍ਤਿ. ਤਸ੍ਮਾ ਅਨ੍ਧਾ ਅਚਕ੍ਖੁਕਾ ਜਚ੍ਚਨ੍ਧਪਟਿਭਾਗਾਤਿ.

ਏਤਮਤ੍ਥਂ ਵਿਦਿਤ੍ਵਾਤਿ ਏਤਂ ਤਿਤ੍ਥਿਯਾਨਂ ਧਮ੍ਮਸਭਾਵਂ ਯਥਾਭੂਤਂ ਅਜਾਨਨ੍ਤਾਨਂ ਅਪਸ੍ਸਨ੍ਤਾਨਂ ਜਚ੍ਚਨ੍ਧਾਨਂ ਵਿਯ ਹਤ੍ਥਿਮ੍ਹਿ ਯਥਾਦਸ੍ਸਨਂ ਮਿਚ੍ਛਾਭਿਨਿਵੇਸਂ, ਤਤ੍ਥ ਚ ਵਿਵਾਦਾਪਤ੍ਤਿਂ ਸਬ੍ਬਾਕਾਰਤੋ ਵਿਦਿਤ੍ਵਾ ਤਦਤ੍ਥਦੀਪਕਂ ਇਮਂ ਉਦਾਨਂ ਉਦਾਨੇਸਿ.

ਤਤ੍ਥ ਇਮੇਸੁ ਕਿਰ ਸਜ੍ਜਨ੍ਤਿ, ਏਕੇ ਸਮਣਬ੍ਰਾਹ੍ਮਣਾਤਿ ਇਧੇਕਚ੍ਚੇ ਪਬ੍ਬਜ੍ਜੂਪਗਮਨੇਨ ਸਮਣਾ, ਜਾਤਿਮਤ੍ਤੇਨ ਬ੍ਰਾਹ੍ਮਣਾ ‘‘ਸਸ੍ਸਤੋ ਲੋਕੋ’’ਤਿਆਦਿਨਯਪ੍ਪਵਤ੍ਤੇਸੁ ਇਮੇਸੁ ਏਵ ਅਸਾਰੇਸੁ ਦਿਟ੍ਠਿਗਤੇਸੁ ਦਿਟ੍ਠਾਭਿਨਨ੍ਦਨਵਸੇਨ, ਇਮੇਸੁ ਵਾ ਰੂਪਾਦੀਸੁ ਉਪਾਦਾਨਕ੍ਖਨ੍ਧੇਸੁ ਏਵਂ ਅਨਿਚ੍ਚੇਸੁ ਦੁਕ੍ਖੇਸੁ ਵਿਪਰਿਣਾਮਧਮ੍ਮੇਸੁ ਤਣ੍ਹਾਭਿਨਨ੍ਦਨਦਿਟ੍ਠਾਭਿਨਨ੍ਦਨਾਨਂ ਵਸੇਨ ‘‘ਏਤਂ ਮਮਾ’’ਤਿਆਦਿਨਾ ਸਜ੍ਜਨ੍ਤਿ ਕਿਰ. ਅਹੋ ਨੇਸਂ ਸਮ੍ਮੋਹੋਤਿ ਦਸ੍ਸੇਤਿ. ਕਿਰਸਦ੍ਦੋ ਚੇਤ੍ਥ ਅਰੁਚਿਸੂਚਨਤ੍ਥੋ. ਤੇਨ ਤਤ੍ਥ ਸਙ੍ਗਕਾਰਣਾਭਾਵਮੇਵ ਦੀਪੇਤਿ. ਨ ਕੇਵਲਂ ਸਜ੍ਜਨ੍ਤਿ ਏਵ, ਅਥ ਖੋ ਵਿਗ੍ਗਯ੍ਹ ਨਂ ਵਿਵਦਨ੍ਤਿ ‘‘ਨ ਤ੍ਵਂ ਇਮਂ ਧਮ੍ਮਵਿਨਯਂ ਆਜਾਨਾਸਿ, ਅਹਂ ਇਮਂ ਧਮ੍ਮਵਿਨਯਂ ਆਜਾਨਾਮੀ’’ਤਿਆਦਿਨਾ ਵਿਗ੍ਗਾਹਿਕਕਥਾਨੁਯੋਗਵਸੇਨ ਵਿਗ੍ਗਯ੍ਹ ਵਿਵਦਨ੍ਤਿ ਵਿਵਾਦਂ ਆਪਜ੍ਜਨ੍ਤਿ. ਨਨ੍ਤਿ ਚੇਤ੍ਥ ਨਿਪਾਤਮਤ੍ਤਂ. ਅਥ ਵਾ ਵਿਗ੍ਗਯ੍ਹ ਨਨ੍ਤਿ ਨਂ ਦਿਟ੍ਠਿਨਿਸ੍ਸਯਂ ਸਕ੍ਕਾਯਦਿਟ੍ਠਿਮੇਵ ਵਾ ਵਿਪਰੀਤਦਸ੍ਸਨਤ੍ਤਾ ਸਸ੍ਸਤਾਦਿਵਸੇਨ ਅਞ੍ਞਮਞ੍ਞਂ ਵਿਰੁਦ੍ਧਂ ਗਹੇਤ੍ਵਾ ਵਿਵਦਨ੍ਤਿ ਵਿਸੇਸਤੋ ਵਦਨ੍ਤਿ, ਅਤ੍ਤਨੋ ਏਵ ਵਾਦਂ ਵਿਸਿਟ੍ਠਂ ਅਵਿਪਰੀਤਂ ਕਤ੍ਵਾ ਅਭਿਨਿਵਿਸ੍ਸ ਵੋਹਰਨ੍ਤਿ. ਯਥਾ ਕਿਂ? ਜਨਾ ਏਕਙ੍ਗਦਸ੍ਸਿਨੋ ਯਥੇਵ ਜਚ੍ਚਨ੍ਧਜਨਾ ਹਤ੍ਥਿਸ੍ਸ ਏਕੇਕਙ੍ਗਦਸ੍ਸਿਨੋ ‘‘ਯਂ ਯਂ ਅਤ੍ਤਨਾ ਫੁਸਿਤ੍ਵਾ ਞਾਤਂ, ਤਂ ਤਦੇਵ ਹਤ੍ਥੀ’’ਤਿ ਗਹੇਤ੍ਵਾ ਅਞ੍ਞਮਞ੍ਞਂ ਵਿਗ੍ਗਯ੍ਹ ਵਿਵਦਿਂਸੁ, ਏਵਂਸਮ੍ਪਦਮਿਦਨ੍ਤਿ ਅਤ੍ਥੋ. ਇਵਸਦ੍ਦੋ ਚੇਤ੍ਥ ਲੁਤ੍ਤਨਿਦ੍ਦਿਟ੍ਠੋਤਿ ਵੇਦਿਤਬ੍ਬੋ.

ਚਤੁਤ੍ਥਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੫. ਦੁਤਿਯਨਾਨਾਤਿਤ੍ਥਿਯਸੁਤ੍ਤਵਣ੍ਣਨਾ

੫੫. ਪਞ੍ਚਮੇ ਸਸ੍ਸਤੋ ਅਤ੍ਤਾ ਚ ਲੋਕੋ ਚਾਤਿ ਰੂਪਾਦੀਸੁ ਅਞ੍ਞਤਰਂ ਅਤ੍ਤਾਤਿ ਚ ਲੋਕੋਤਿ ਚ ਗਹੇਤ੍ਵਾ ਤਂ ਸਸ੍ਸਤਂ ਨਿਚ੍ਚਨ੍ਤਿ ਅਞ੍ਞੇਪਿ ਚ ਤਥਾ ਗਾਹੇਨ੍ਤਾ ਵੋਹਰਨ੍ਤਿ. ਯਥਾਹ –

‘‘ਰੂਪਂ ਅਤ੍ਤਾ ਚੇਵ ਲੋਕੋ ਚ ਸਸ੍ਸਤੋ ਚਾਤਿ ਅਤ੍ਤਾਨਞ੍ਚ ਲੋਕਞ੍ਚ ਪਞ੍ਞਪੇਨ੍ਤਿ. ਵੇਦਨਂ… ਸਞ੍ਞਂ… ਸਙ੍ਖਾਰੇ… ਵਿਞ੍ਞਾਣਂ ਅਤ੍ਤਾ ਚ ਲੋਕੋ ਚ ਸਸ੍ਸਤੋ ਚਾਤਿ ਅਤ੍ਤਾਨਞ੍ਚ ਲੋਕਞ੍ਚ ਪਞ੍ਞਪੇਨ੍ਤੀ’’ਤਿ.

ਅਥ ਵਾ ਅਤ੍ਤਾਤਿ ਅਹਙ੍ਕਾਰਵਤ੍ਥੁ, ਲੋਕੋਤਿ ਮਮਙ੍ਕਾਰਵਤ੍ਥੁ, ਯਂ ‘‘ਅਤ੍ਤਨਿਯ’’ਨ੍ਤਿ ਵੁਚ੍ਚਤਿ. ਅਤ੍ਤਾਤਿ ਵਾ ਸਯਂ, ਲੋਕੋਤਿ ਪਰੋ. ਅਤ੍ਤਾਤਿ ਵਾ ਪਞ੍ਚਸੁ ਉਪਾਦਾਨਕ੍ਖਨ੍ਧੇਸੁ ਏਕੋ ਖਨ੍ਧੋ, ਇਤਰੋ ਲੋਕੋ. ਅਤ੍ਤਾਤਿ ਵਾ ਸਵਿਞ੍ਞਾਣਕੋ ਖਨ੍ਧਸਨ੍ਤਾਨੋ, ਅਵਿਞ੍ਞਾਣਕੋ ਲੋਕੋ. ਏਵਂ ਤਂ ਤਂ ਅਤ੍ਤਾਤਿ ਚ ਲੋਕੋਤਿ ਚ ਯਥਾਦਸ੍ਸਨਂ ਦ੍ਵਿਧਾ ਗਹੇਤ੍ਵਾ ਤਦੁਭਯਂ ‘‘ਨਿਚ੍ਚੋ ਧੁਵੋ ਸਸ੍ਸਤੋ’’ਤਿ ਅਭਿਨਿਵਿਸ੍ਸ ਵੋਹਰਨ੍ਤਿ. ਏਤੇਨ ਚਤ੍ਤਾਰੋ ਸਸ੍ਸਤਵਾਦਾ ਦਸ੍ਸਿਤਾ. ਅਸਸ੍ਸਤੋਤਿ ਸਤ੍ਤਪਿ ਉਚ੍ਛੇਦਵਾਦਾ ਦਸ੍ਸਿਤਾ. ਸਸ੍ਸਤੋ ਚ ਅਸਸ੍ਸਤੋ ਚਾਤਿ ਏਕਚ੍ਚੋ ਅਤ੍ਤਾ ਚ ਲੋਕੋ ਚ ਸਸ੍ਸਤੋ, ਏਕਚ੍ਚੋ ਅਸਸ੍ਸਤੋਤਿ ਏਵਂ ਸਸ੍ਸਤੋ ਚ ਅਸਸ੍ਸਤੋ ਚਾਤਿ ਅਤ੍ਥੋ. ਅਥ ਵਾ ਸ੍ਵੇਵ ਅਤ੍ਤਾ ਚ ਲੋਕੋ ਚ ਅਤ੍ਤਗਤਿਦਿਟ੍ਠਿਕਾਨਂ ਵਿਯ ਸਸ੍ਸਤੋ ਚ ਅਸਸ੍ਸਤੋ ਚ, ਸਿਯਾ ਸਸ੍ਸਤੋਤਿ ਏਵਮੇਤ੍ਥ ਅਤ੍ਥੋ ਵੇਦਿਤਬ੍ਬੋ. ਸਬ੍ਬਥਾਪਿ ਇਮਿਨਾ ਏਕਚ੍ਚਸਸ੍ਸਤਵਾਦੋ ਦਸ੍ਸਿਤੋ. ਨੇਵ ਸਸ੍ਸਤੋ ਨਾਸਸ੍ਸਤੋਤਿ ਇਮਿਨਾ ਅਮਰਾਵਿਕ੍ਖੇਪਵਾਦੋ ਦਸ੍ਸਿਤੋ. ਤੇ ਹਿ ਸਸ੍ਸਤਵਾਦੇ ਅਸਸ੍ਸਤਵਾਦੇ ਚ ਦੋਸਂ ਦਿਸ੍ਵਾ ‘‘ਨੇਵ ਸਸ੍ਸਤੋ ਨਾਸਸ੍ਸਤੋ ਅਤ੍ਤਾ ਚ ਲੋਕੋ ਚਾ’’ਤਿ ਵਿਕ੍ਖੇਪਂ ਕਰੋਨ੍ਤਾ ਵਿਵਦਨ੍ਤਿ.

ਸਯਂਕਤੋਤਿ ਅਤ੍ਤਨਾ ਕਤੋ. ਯਥਾ ਹਿ ਤੇਸਂ ਤੇਸਂ ਸਤ੍ਤਾਨਂ ਅਤ੍ਤਾ ਚ ਅਤ੍ਤਨੋ ਧਮ੍ਮਾਨੁਧਮ੍ਮਂ ਕਤ੍ਵਾ ਸੁਖਦੁਕ੍ਖਾਨਿ ਪਟਿਸਂਵੇਦੇਤਿ, ਏਵਂ ਅਤ੍ਤਾਵ ਅਤ੍ਤਾਨਂ ਤਸ੍ਸ ਚ ਉਪਭੋਗਭੂਤਂ ਕਿਞ੍ਚਨਂ ਪਲਿਬੋਧਸਙ੍ਖਾਤਂ ਲੋਕਞ੍ਚ ਕਰੋਤਿ, ਅਭਿਨਿਮ੍ਮਿਨਾਤੀਤਿ ਅਤ੍ਤਲਦ੍ਧਿ ਵਿਯ ਅਯਮ੍ਪਿ ਤੇਸਂ ਲਦ੍ਧਿ. ਪਰਂਕਤੋਤਿ ਪਰੇਨ ਕਤੋ, ਅਤ੍ਤਤੋ ਪਰੇਨ ਇਸ੍ਸਰੇਨ ਵਾ ਪੁਰਿਸੇਨ ਵਾ ਪਜਾਪਤਿਨਾ ਵਾ ਕਾਲੇਨ ਵਾ ਪਕਤਿਯਾ ਵਾ ਅਤ੍ਤਾ ਚ ਲੋਕੋ ਚ ਕਤੋ, ਨਿਮ੍ਮਿਤੋਤਿ ਅਤ੍ਥੋ. ਸਯਂਕਤੋ ਚ ਪਰਂਕਤੋ ਚਾਤਿ ਯਸ੍ਮਾ ਅਤ੍ਤਾਨਞ੍ਚ ਲੋਕਞ੍ਚ ਨਿਮ੍ਮਿਨਨ੍ਤਾ ਇਸ੍ਸਰਾਦਯੋ ਨ ਕੇਵਲਂ ਸਯਮੇਵ ਨਿਮ੍ਮਿਨਨ੍ਤਿ, ਅਥ ਖੋ ਤੇਸਂ ਤੇਸਂ ਸਤ੍ਤਾਨਂ ਧਮ੍ਮਾਧਮ੍ਮਾਨਂ ਸਹਕਾਰੀਕਾਰਣਂ ਲਭਿਤ੍ਵਾਵ, ਤਸ੍ਮਾ ਸਯਂਕਤੋ ਚ ਪਰਂਕਤੋ ਚ ਅਤ੍ਤਾ ਚ ਲੋਕੋ ਚਾਤਿ ਏਕਚ੍ਚਾਨਂ ਲਦ੍ਧਿ. ਅਸਯਂਕਾਰੋ ਅਪਰਂਕਾਰੋਤਿ ਨਤ੍ਥਿ ਏਤਸ੍ਸ ਸਯਂਕਾਰੋਤਿ ਅਸਯਂਕਾਰੋ, ਨਤ੍ਥਿ ਏਤਸ੍ਸ ਪਰਕਾਰੋਤਿ ਅਪਰਕਾਰੋ. ਅਨੁਨਾਸਿਕਾਗਮਂ ਕਤ੍ਵਾ ਵੁਤ੍ਤਂ ‘‘ਅਪਰਂਕਾਰੋ’’ਤਿ. ਅਯਂ ਉਭਯਤ੍ਥ ਦੋਸਂ ਦਿਸ੍ਵਾ ਉਭਯਂ ਪਟਿਕ੍ਖਿਪਤਿ. ਅਥ ਕਥਂ ਉਪ੍ਪਨ੍ਨੋਤਿ ਆਹ – ਅਧਿਚ੍ਚਸਮੁਪ੍ਪਨ੍ਨੋਤਿ ਯਦਿਚ੍ਛਾਯ ਸਮੁਪ੍ਪਨ੍ਨੋ ਕੇਨਚਿ ਕਾਰਣੇਨ ਵਿਨਾ ਉਪ੍ਪਨ੍ਨੋਤਿ ਅਧਿਚ੍ਚਸਮੁਪ੍ਪਨ੍ਨਵਾਦੋ ਦਸ੍ਸਿਤੋ. ਤੇਨ ਚ ਅਹੇਤੁਕਵਾਦੋਪਿ ਸਙ੍ਗਹਿਤੋ ਹੋਤਿ.

ਇਦਾਨਿ ਯੇ ਦਿਟ੍ਠਿਗਤਿਕਾ ਅਤ੍ਤਾਨਂ ਵਿਯ ਸੁਖਦੁਕ੍ਖਮ੍ਪਿ ਤਸ੍ਸ ਗੁਣਭੂਤਂ ਕਿਞ੍ਚਨਭੂਤਂ ਵਾ ਸਸ੍ਸਤਾਦਿਵਸੇਨ ਅਭਿਨਿਵਿਸ੍ਸ ਵੋਹਰਨ੍ਤਿ, ਤੇਸਂ ਤਂ ਵਾਦਂ ਦਸ੍ਸੇਤੁਂ ‘‘ਸਨ੍ਤੇਕੇ ਸਮਣਬ੍ਰਾਹ੍ਮਣਾ’’ਤਿਆਦਿ ਵੁਤ੍ਤਂ. ਤਂ ਵੁਤ੍ਤਨਯਮੇਵ.

ਏਤਮਤ੍ਥਂ ਵਿਦਿਤ੍ਵਾਤਿ ਏਤ੍ਥ ਪਨ ਇਧ ਜਚ੍ਚਨ੍ਧੂਪਮਾਯ ਅਨਾਗਤਤ੍ਤਾ ਤਂ ਹਿਤ੍ਵਾ ਹੇਟ੍ਠਾ ਵੁਤ੍ਤਨਯੇਨੇਵ ਅਤ੍ਥੋ ਯੋਜੇਤਬ੍ਬੋ, ਤਥਾ ਗਾਥਾਯ.

ਤਤ੍ਥ ਅਨ੍ਤਰਾਵ ਵਿਸੀਦਨ੍ਤਿ, ਅਪਤ੍ਵਾਵ ਤਮੋਗਧਨ੍ਤਿ ਅਯਂ ਵਿਸੇਸੋ. ਤਸ੍ਸਤ੍ਥੋ – ਏਵਂ ਦਿਟ੍ਠਿਗਤੇਸੁ ਦਿਟ੍ਠਿਨਿਸ੍ਸਯੇਸੁ ਆਸਜ੍ਜਮਾਨਾ ਦਿਟ੍ਠਿਗਤਿਕਾ ਕਾਮੋਘਾਦੀਨਂ ਚਤੁਨ੍ਨਂ ਓਘਾਨਂ, ਸਂਸਾਰਮਹੋਘਸ੍ਸੇਵ ਵਾ ਅਨ੍ਤਰਾਵ ਵੇਮਜ੍ਝੇ ਏਵ ਯਂ ਤੇਸਂ ਪਾਰਭਾਵੇਨ ਪਤਿਟ੍ਠਟ੍ਠੇਨ ਵਾ ਓਗਧਸਙ੍ਖਾਤਂ ਨਿਬ੍ਬਾਨਂ ਤਦਧਿਗਮੂਪਾਯੋ ਵਾ ਅਰਿਯਮਗ੍ਗੋ ਤਂ ਅਪ੍ਪਤ੍ਵਾਵ ਅਨਧਿਗਨ੍ਤ੍ਵਾਵ ਵਿਸੀਦਨ੍ਤਿ ਸਂਸੀਦਨ੍ਤਿ. ਓਗਾਧਨ੍ਤਿ ਪਤਿਟ੍ਠਹਨ੍ਤਿ ਏਤੇਨ, ਏਤ੍ਥ ਵਾਤਿ ਓਗਾਧੋ, ਅਰਿਯਮਗ੍ਗੋ ਨਿਬ੍ਬਾਨਞ੍ਚ. ਓਗਾਧਮੇਵੇਤ੍ਥ ਰਸ੍ਸਤ੍ਤਂ ਕਤ੍ਵਾ ਓਗਧਨ੍ਤਿ ਵੁਤ੍ਤਂ. ਤਂ ਓਗਧਂ ਤਮੋਗਧਨ੍ਤਿ ਪਦਵਿਭਾਗੋ.

ਪਞ੍ਚਮਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੬. ਤਤਿਯਨਾਨਾਤਿਤ੍ਥਿਯਸੁਤ੍ਤਵਣ੍ਣਨਾ

੫੬. ਛਟ੍ਠੇ ਸਬ੍ਬਂ ਹੇਟ੍ਠਾ ਵੁਤ੍ਤਨਯਮੇਵ. ਇਮਂ ਉਦਾਨਨ੍ਤਿ ਏਤ੍ਥ ਪਨ ਦਿਟ੍ਠਿਤਣ੍ਹਾਮਾਨੇਸੁ ਦੋਸਂ ਦਿਸ੍ਵਾ ਤੇ ਦੂਰਤੋ ਵਜ੍ਜੇਤ੍ਵਾ ਸਙ੍ਖਾਰੇ ਯਥਾਭੂਤਂ ਪਸ੍ਸਤੋ ਚ ਤਤ੍ਥ ਅਨਾਦੀਨਵਦਸ੍ਸਿਤਾਯ ਮਿਚ੍ਛਾਭਿਨਿਵਿਟ੍ਠਸ੍ਸ ਯਥਾਭੂਤਂ ਅਪਸ੍ਸਤੋ ਚ ਯਥਾਕ੍ਕਮਂ ਸਂਸਾਰਤੋ ਅਤਿਵਤ੍ਤਨਾਨਤਿਵਤ੍ਤਨਦੀਪਕਂ ਇਮਂ ਉਦਾਨਂ ਉਦਾਨੇਸੀਤਿ ਅਤ੍ਥੋ ਯੋਜੇਤਬ੍ਬੋ.

ਤਤ੍ਥ ਅਹਙ੍ਕਾਰਪਸੁਤਾਯਂ ਪਜਾਤਿ ‘‘ਸਯਂਕਤੋ ਅਤ੍ਤਾ ਚ ਲੋਕੋ ਚਾ’’ਤਿ ਏਵਂ ਵੁਤ੍ਤਸਯਂਕਾਰਸਙ੍ਖਾਤਂ ਅਹਙ੍ਕਾਰਂ ਤਥਾਪਵਤ੍ਤਂ ਦਿਟ੍ਠਿਂ ਪਸੁਤਾ ਅਨੁਯੁਤ੍ਤਾ ਅਯਂ ਪਜਾ ਮਿਚ੍ਛਾਭਿਨਿਵਿਟ੍ਠੋ ਸਤ੍ਤਕਾਯੋ. ਪਰਂਕਾਰੂਪਸਂਹਿਤਾਤਿ ਪਰੋ ਅਞ੍ਞੋ ਇਸ੍ਸਰਾਦਿਕੋ ਸਬ੍ਬਂ ਕਰੋਤੀਤਿ ਏਵਂ ਪਵਤ੍ਤਪਰਂਕਾਰਦਿਟ੍ਠਿਸਨ੍ਨਿਸ੍ਸਿਤਾ ਤਾਯ ਉਪਸਂਹਿਤਾਤਿ ਪਰਂਕਾਰੂਪਸਂਹਿਤਾ. ਏਤਦੇਕੇ ਨਾਬ੍ਭਞ੍ਞਂਸੂਤਿ ਏਤਂ ਦਿਟ੍ਠਿਦ੍ਵਯਂ ਏਕੇ ਸਮਣਬ੍ਰਾਹ੍ਮਣਾ ਤਤ੍ਥ ਦੋਸਦਸ੍ਸਿਨੋ ਹੁਤ੍ਵਾ ਨਾਨੁਜਾਨਿਂਸੁ. ਕਥਂ? ਸਤਿ ਹਿ ਸਯਂਕਾਰੇ ਕਾਮਕਾਰਤੋ ਸਤ੍ਤਾਨਂ ਇਟ੍ਠੇਨੇਵ ਭਵਿਤਬ੍ਬਂ, ਨ ਅਨਿਟ੍ਠੇਨ. ਨ ਹਿ ਕੋਚਿ ਅਤ੍ਤਨੋ ਦੁਕ੍ਖਂ ਇਚ੍ਛਤਿ, ਭਵਤਿ ਚ ਅਨਿਟ੍ਠਂ, ਤਸ੍ਮਾ ਨ ਸਯਂਕਾਰੋ. ਪਰਂਕਾਰੋਪਿ ਯਦਿ ਇਸ੍ਸਰਹੇਤੁਕੋ, ਸ੍ਵਾਯਂ ਇਸ੍ਸਰੋ ਅਤ੍ਤਤ੍ਥਂ ਵਾ ਕਰੇਯ੍ਯ ਪਰਤ੍ਥਂ ਵਾ. ਤਤ੍ਥ ਯਦਿ ਅਤ੍ਤਤ੍ਥਂ, ਅਤ੍ਤਨਾ ਅਕਤਕਿਚ੍ਚੋ ਸਿਯਾ ਅਸਿਦ੍ਧਸ੍ਸ ਸਾਧਨਤੋ. ਅਥ ਵਾ ਪਰਤ੍ਥਂ ਸਬ੍ਬੇਸਂ ਹਿਤਸੁਖਮੇਵ ਨਿਪ੍ਫਜ੍ਜੇਯ੍ਯ, ਨ ਅਹਿਤਂ ਦੁਕ੍ਖਂ ਨਿਪ੍ਫਜ੍ਜਤਿ, ਤਸ੍ਮਾ ਇਸ੍ਸਰਵਸੇਨ ਨ ਪਰਂਕਾਰੋ ਸਿਜ੍ਝਤਿ. ਯਦਿ ਚ ਇਸ੍ਸਰਸਙ੍ਖਾਤਂ ਅਞ੍ਞਨਿਰਪੇਕ੍ਖਂ ਨਿਚ੍ਚਮੇਕਕਾਰਣਂ ਪਵਤ੍ਤਿਯਾ ਸਿਯਾ, ਕਮ੍ਮੇਨ ਉਪ੍ਪਤ੍ਤਿ ਨ ਸਿਯਾ, ਸਬ੍ਬੇਹੇਵ ਏਕਜ੍ਝਂ ਉਪ੍ਪਜ੍ਜਿਤਬ੍ਬਂ ਕਾਰਣਸ੍ਸ ਸਨ੍ਨਿਹਿਤਤ੍ਤਾ. ਅਥਸ੍ਸ ਅਞ੍ਞਮ੍ਪਿ ਸਹਕਾਰੀਕਾਰਣਂ ਇਚ੍ਛਿਤਂ, ਤਞ੍ਞੇਵ ਹੇਤੁ, ਕਿਂ ਇਸ੍ਸਰੇਨ ਅਪਰਿਨਿਟ੍ਠਿਤਸਾਮਤ੍ਥਿਯੇਨ ਪਰਿਕਪ੍ਪਿਤੇਨ. ਯਥਾ ਚ ਇਸ੍ਸਰਹੇਤੁਕੋ ਪਰਂਕਾਰੋ ਨ ਸਿਜ੍ਝਤਿ, ਏਵਂ ਪਜਾਪਤਿਪੁਰਿਸਪਕਤਿਬ੍ਰਹ੍ਮਕਾਲਾਦਿਹੇਤੁਤੋਪਿ ਨ ਸਿਜ੍ਝਤੇਵ ਤੇਸਮ੍ਪਿ ਅਸਿਦ੍ਧਤ੍ਤਾ ਵੁਤ੍ਤਦੋਸਾਨਤਿਵਤ੍ਤਨਤੋ ਚ. ਤੇਨ ਵੁਤ੍ਤਂ ‘‘ਏਤਦੇਕੇ ਨਾਬ੍ਭਞ੍ਞਂਸੂ’’ਤਿ. ਯੇ ਪਨ ਯਥਾਵੁਤ੍ਤੇ ਸਯਂਕਾਰਪਰਂਕਾਰੇ ਨਾਨੁਜਾਨਨ੍ਤਾਪਿ ਅਧਿਚ੍ਚਸਮੁਪ੍ਪਨ੍ਨਂ ਅਤ੍ਤਾਨਞ੍ਚ ਲੋਕਞ੍ਚ ਪਞ੍ਞਪੇਨ੍ਤਿ, ਤੇਪਿ ਨ ਨਂ ਸਲ੍ਲਨ੍ਤਿ ਅਦ੍ਦਸੁਂ ਅਧਿਚ੍ਚਸਮੁਪ੍ਪਨ੍ਨਨ੍ਤਿਵਾਦਿਨੋਪਿ ਮਿਚ੍ਛਾਭਿਨਿਵੇਸਂ ਅਨਤਿਕ੍ਕਮਨਤੋ ਯਥਾਭੂਤਂ ਅਜਾਨਨ੍ਤਾਨਂ ਦਿਟ੍ਠਿਗਤਂ ਤਤ੍ਥ ਤਤ੍ਥ ਦੁਕ੍ਖੁਪ੍ਪਾਦਨਤੋ ਵਿਜ੍ਝਨਟ੍ਠੇਨ ‘‘ਸਲ੍ਲ’’ਨ੍ਤਿ ਨ ਪਸ੍ਸਿਂਸੁ.

ਏਤਞ੍ਚ ਸਲ੍ਲਂ ਪਟਿਕਚ੍ਚ ਪਸ੍ਸਤੋਤਿ ਯੋ ਪਨ ਆਰਦ੍ਧਵਿਪਸ੍ਸਕੋ ਪਞ੍ਚਪਿ ਉਪਾਦਾਨਕ੍ਖਨ੍ਧੇ ਅਨਿਚ੍ਚਤੋ ਦੁਕ੍ਖਤੋ ਅਨਤ੍ਤਤੋ ਸਮਨੁਪਸ੍ਸਤਿ, ਸੋ ਏਤਞ੍ਚ ਤਿਵਿਧਂ ਵਿਪਰੀਤਦਸ੍ਸਨਂ ਅਞ੍ਞਞ੍ਚ ਸਕਲਂ ਮਿਚ੍ਛਾਭਿਨਿਵੇਸਂ ਤੇਸਞ੍ਚ ਨਿਸ੍ਸਯਭੂਤੇ ਪਞ੍ਚੁਪਾਦਾਨਕ੍ਖਨ੍ਧੇਪਿ ਤੁਜ੍ਜਨਤੋ ਦੁਰੁਦ੍ਧਾਰਤੋ ਚ ‘‘ਸਲ੍ਲ’’ਨ੍ਤਿ ਪਟਿਕਚ੍ਚ ਪੁਬ੍ਬੇਯੇਵ ਵਿਪਸ੍ਸਨਾਪਞ੍ਞਾਯ ਪਸ੍ਸਤਿ. ਏਵਂ ਪਸ੍ਸਤੋ ਅਰਿਯਮਗ੍ਗਕ੍ਖਣੇ ਏਕਨ੍ਤੇਨੇਵ ਅਹਂ ਕਰੋਮੀਤਿ ਨ ਤਸ੍ਸ ਹੋਤਿ. ਯਥਾ ਚ ਅਤ੍ਤਨੋ ਕਾਰਕਭਾਵੋ ਤਸ੍ਸ ਨ ਉਪਟ੍ਠਾਤਿ, ਏਵਂ ਪਰੋ ਕਰੋਤੀਤਿ ਨ ਤਸ੍ਸ ਹੋਤਿ, ਕੇਵਲਂ ਪਨ ਅਨਿਚ੍ਚਸਙ੍ਖਾਤਂ ਪਟਿਚ੍ਚਸਮੁਪ੍ਪਨ੍ਨਧਮ੍ਮਮਤ੍ਤਮੇਵ ਹੋਤਿ. ਏਤ੍ਤਾਵਤਾ ਸਮ੍ਮਾਪਟਿਪਨ੍ਨਸ੍ਸ ਸਬ੍ਬਥਾਪਿ ਦਿਟ੍ਠਿਮਾਨਾਭਾਵੋਵ ਦਸ੍ਸਿਤੋ. ਤੇਨ ਚ ਅਰਹਤ੍ਤਪ੍ਪਤ੍ਤਿਯਾ ਸਂਸਾਰਸਮਤਿਕ੍ਕਮੋ ਪਕਾਸਿਤੋ ਹੋਤਿ.

ਇਦਾਨਿ ਯੋ ਦਿਟ੍ਠਿਗਤੇ ਅਲ੍ਲੀਨੋ, ਨ ਸੋ ਸਂਸਾਰਤੋ ਸੀਸਂ ਉਕ੍ਖਿਪਿਤੁਂ ਸਕ੍ਕੋਤਿ, ਤਂ ਦਸ੍ਸੇਤੁਂ ‘‘ਮਾਨੁਪੇਤਾ’’ਤਿ ਗਾਥਮਾਹ. ਤਤ੍ਥ ਮਾਨੁਪੇਤਾ ਅਯਂ ਪਜਾਤਿ ਅਯਂ ਸਬ੍ਬਾਪਿ ਦਿਟ੍ਠਿਗਤਿਕਸਙ੍ਖਾਤਾ ਪਜਾ ਸਤ੍ਤਕਾਯੋ ‘‘ਮਯ੍ਹਂ ਦਿਟ੍ਠਿ ਸੁਨ੍ਦਰਾ, ਮਯ੍ਹਂ ਆਦਾਨੋ ਸੁਨ੍ਦਰੋ’’ਤਿ ਅਤ੍ਤਨੋ ਗਾਹਸ੍ਸ ਸਂਪਗ੍ਗਹਲਕ੍ਖਣੇਨ ਮਾਨੇਨ ਉਪੇਤਾ ਸਮਨ੍ਨਾਗਤਾ. ਮਾਨਗਨ੍ਥਾ ਮਾਨਵਿਨਿਬਦ੍ਧਾਤਿ ਤਤੋ ਏਵ ਤੇਨ ਅਪਰਾਪਰਂ ਉਪ੍ਪਜ੍ਜਮਾਨੇਨ ਯਥਾ ਤਂ ਦਿਟ੍ਠਿਂ ਨ ਪਟਿਨਿਸ੍ਸਜ੍ਜਤਿ, ਏਵਂ ਅਤ੍ਤਨੋ ਸਨ੍ਤਾਨਸ੍ਸ ਗਨ੍ਥਿਤਤ੍ਤਾ ਵਿਨਿਬਦ੍ਧਤ੍ਤਾ ਚ ਮਾਨਗਨ੍ਥਾ ਮਾਨਵਿਨਿਬਦ੍ਧਾ. ਦਿਟ੍ਠੀਸੁ ਸਾਰਮ੍ਭਕਥਾ, ਸਂਸਾਰਂ ਨਾਤਿਵਤ੍ਤਤੀਤਿ ‘‘ਇਦਮੇਵ ਸਚ੍ਚਂ ਮੋਘਮਞ੍ਞ’’ਨ੍ਤਿ ਅਤ੍ਤੁਕ੍ਕਂਸਨਪਰਵਮ੍ਭਨਵਸੇਨ ਅਤ੍ਤਨੋ ਦਿਟ੍ਠਾਭਿਨਿਵੇਸੇਨ ਪਰੇਸਂ ਦਿਟ੍ਠੀਸੁ ਸਾਰਮ੍ਭਕਥਾ ਵਿਰੋਧਕਥਾ ਸਂਸਾਰਨਾਯਿਕਾਨਂ ਅਵਿਜ੍ਜਾਤਣ੍ਹਾਨਂ ਅਪ੍ਪਹਾਨਤੋ ਸਂਸਾਰਂ ਨਾਤਿਵਤ੍ਤਤਿ, ਨ ਅਤਿਕ੍ਕਮਤੀਤਿ ਅਤ੍ਥੋ.

ਛਟ੍ਠਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੭. ਸੁਭੂਤਿਸੁਤ੍ਤਵਣ੍ਣਨਾ

੫੭. ਸਤ੍ਤਮੇ ਸੁਭੂਤੀਤਿ ਤਸ੍ਸ ਥੇਰਸ੍ਸ ਨਾਮਂ. ਸੋ ਹਿ ਆਯਸ੍ਮਾ ਪਦੁਮੁਤ੍ਤਰਸ੍ਸ ਭਗਵਤੋ ਪਾਦਮੂਲੇ ਕਤਾਭਿਨੀਹਾਰੋ ਕਪ੍ਪਸਤਸਹਸ੍ਸਂ ਉਪਚਿਤਪੁਞ੍ਞਸਮ੍ਭਾਰੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਉਲ਼ਾਰਵਿਭਵੇ ਗਹਪਤਿਕੁਲੇ ਉਪ੍ਪਨ੍ਨੋ ਭਗਵਤੋ ਧਮ੍ਮਦੇਸਨਂ ਸੁਤ੍ਵਾ ਸਂਵੇਗਜਾਤੋ ਘਰਾ ਨਿਕ੍ਖਮ੍ਮ ਪਬ੍ਬਜਿਤ੍ਵਾ ਕਤਾਧਿਕਾਰਤ੍ਤਾ ਘਟੇਨ੍ਤੋ ਵਾਯਮਨ੍ਤੋ ਨ ਚਿਰਸ੍ਸੇਵ ਛਲ਼ਭਿਞ੍ਞੋ ਜਾਤੋ, ਬ੍ਰਹ੍ਮਵਿਹਾਰਭਾਵਨਾਯ ਪਨ ਉਕ੍ਕਂਸਪਾਰਮਿਪ੍ਪਤ੍ਤਿਯਾ ‘‘ਏਤਦਗ੍ਗਂ, ਭਿਕ੍ਖਵੇ, ਮਮ ਸਾਵਕਾਨਂ ਭਿਕ੍ਖੂਨਂ ਅਰਣਵਿਹਾਰੀਨਂ ਯਦਿਦਂ ਸੁਭੂਤੀ’’ਤਿ (ਅ. ਨਿ. ੧.੨੦੧) ਅਰਣਵਿਹਾਰੇ ਭਗਵਤਾ ਏਤਦਗ੍ਗੇ ਠਪਿਤੋ. ਸੋ ਏਕਦਿਵਸਂ ਸਾਯਨ੍ਹਸਮਯਂ ਦਿਵਾਟ੍ਠਾਨਤੋ ਵਿਹਾਰਙ੍ਗਣਂ ਓਤਿਣ੍ਣੋ ਚਤੁਪਰਿਸਮਜ੍ਝੇ ਭਗਵਨ੍ਤਂ ਧਮ੍ਮਂ ਦੇਸੇਨ੍ਤਂ ਦਿਸ੍ਵਾ ‘‘ਦੇਸਨਾਪਰਿਯੋਸਾਨੇ ਵੁਟ੍ਠਹਿਤ੍ਵਾ ਵਨ੍ਦਿਸ੍ਸਾਮੀ’’ਤਿ ਕਾਲਪਰਿਚ੍ਛੇਦਂ ਕਤ੍ਵਾ ਭਗਵਤੋ ਅਵਿਦੂਰੇ ਅਞ੍ਞਤਰਸ੍ਮਿਂ ਰੁਕ੍ਖਮੂਲੇ ਨਿਸਿਨ੍ਨੋ ਫਲਸਮਾਪਤ੍ਤਿਂ ਸਮਾਪਜ੍ਜਿ. ਤੇਨ ਵੁਤ੍ਤਂ – ‘‘ਤੇਨ ਖੋ ਪਨ ਸਮਯੇਨ ਆਯਸ੍ਮਾ ਸੁਭੂਤਿ…ਪੇ… ਸਮਾਪਜ੍ਜਿਤ੍ਵਾ’’ਤਿ.

ਤਤ੍ਥ ਦੁਤਿਯਜ੍ਝਾਨਤੋ ਪਟ੍ਠਾਯ ਰੂਪਾਵਚਰਸਮਾਧਿ ਸਬ੍ਬੋਪਿ ਅਰੂਪਾਵਚਰਸਮਾਧਿ ਅਵਿਤਕ੍ਕਸਮਾਧਿ ਏਵ. ਇਧ ਪਨ ਚਤੁਤ੍ਥਜ੍ਝਾਨਪਾਦਕੋ ਅਰਹਤ੍ਤਫਲਸਮਾਧਿ ‘‘ਅਵਿਤਕ੍ਕਸਮਾਧੀ’’ਤਿ ਅਧਿਪ੍ਪੇਤੋ. ਦੁਤਿਯਜ੍ਝਾਨਾਦੀਹਿ ਪਹੀਨਾ ਮਿਚ੍ਛਾਵਿਤਕ੍ਕਾ ਨ ਤਾਵ ਸੁਪ੍ਪਹੀਨਾ ਅਚ੍ਚਨ੍ਤਪਹਾਨਾਭਾਵਤੋ, ਅਰਿਯਮਗ੍ਗੇਨ ਪਨ ਪਹੀਨਾ ਏਵ ਪੁਨ ਪਹਾਨਕਿਚ੍ਚਾਭਾਵਤੋ. ਤਸ੍ਮਾ ਅਗ੍ਗਮਗ੍ਗਪਰਿਯੋਸਾਨਭੂਤੋ ਅਰਹਤ੍ਤਫਲਸਮਾਧਿ ਸਬ੍ਬੇਸਂ ਮਿਚ੍ਛਾਵਿਤਕ੍ਕਾਨਂ ਪਹਾਨਨ੍ਤੇ ਉਪ੍ਪਨ੍ਨਤ੍ਤਾ ਵਿਸੇਸਤੋ ‘‘ਅਵਿਤਕ੍ਕਸਮਾਧੀ’’ਤਿ ਵਤ੍ਤਬ੍ਬਤਂ ਅਰਹਤਿ, ਪਗੇਵ ਚਤੁਤ੍ਥਜ੍ਝਾਨਪਾਦਕੋ. ਤੇਨ ਵੁਤ੍ਤਂ – ‘‘ਇਧ ਪਨ ਚਤੁਤ੍ਥਜ੍ਝਾਨਪਾਦਕੋ ਅਰਹਤ੍ਤਫਲਸਮਾਧਿ ‘ਅਵਿਤਕ੍ਕਸਮਾਧੀ’ਤਿ ਅਧਿਪ੍ਪੇਤੋ’’ਤਿ.

ਏਤਮਤ੍ਥਂ ਵਿਦਿਤ੍ਵਾਤਿ ਏਤਂ ਆਯਸ੍ਮਤੋ ਸੁਭੂਤਿਸ੍ਸ ਸਬ੍ਬਮਿਚ੍ਛਾਵਿਤਕ੍ਕਸਬ੍ਬਸਂਕਿਲੇਸਪਹਾਨਸਙ੍ਖਾਤਂ ਅਤ੍ਥਂ ਸਬ੍ਬਾਕਾਰਤੋ ਜਾਨਿਤ੍ਵਾ ਤਦਤ੍ਥਦੀਪਕਂ ਇਮਂ ਉਦਾਨਂ ਉਦਾਨੇਸਿ.

ਤਤ੍ਥ ਯਸ੍ਸ ਵਿਤਕ੍ਕਾ ਵਿਧੂਪਿਤਾਤਿ ਯੇਨ ਅਰਿਯਪੁਗ੍ਗਲੇਨ, ਯਸ੍ਸ ਵਾ ਅਰਿਯਪੁਗ੍ਗਲਸ੍ਸ ਕਾਮਵਿਤਕ੍ਕਾਦਯੋ ਸਬ੍ਬੇਪਿ ਮਿਚ੍ਛਾਵਿਤਕ੍ਕਾ ਵਿਧੂਪਿਤਾ ਅਰਿਯਮਗ੍ਗਞਾਣੇਨ ਸਨ੍ਤਾਪਿਤਾ ਸਮੁਚ੍ਛਿਨ੍ਨਾ. ਅਜ੍ਝਤ੍ਤਂ ਸੁਵਿਕਪ੍ਪਿਤਾ ਅਸੇਸਾਤਿ ਨਿਯਕਜ੍ਝਤ੍ਤਸਙ੍ਖਾਤੇ ਅਤ੍ਤਨੋ ਸਨ੍ਤਾਨੇ ਉਪ੍ਪਜ੍ਜਨਾਰਹਾ ਸੁਵਿਕਪ੍ਪਿਤਾ ਸੁਟ੍ਠੁ ਵਿਕਪ੍ਪਿਤਾ ਅਸੇਸਤੋ, ਕਿਞ੍ਚਿਪਿ ਅਸੇਸੇਤ੍ਵਾ ਸੁਸਮੁਚ੍ਛਿਨ੍ਨਾਤਿ ਅਤ੍ਥੋ. ਤਂ ਸਙ੍ਗਮਤਿਚ੍ਚ ਅਰੂਪਸਞ੍ਞੀਤਿ ਏਤ੍ਥ ਨ੍ਤਿ ਨਿਪਾਤਮਤ੍ਤਂ. ਅਥ ਵਾ ਹੇਤੁਅਤ੍ਥੋ ਤਂਸਦ੍ਦੋ. ਯਸ੍ਮਾ ਅਨਵਸੇਸੇਨ ਮਿਚ੍ਛਾਵਿਤਕ੍ਕਾ ਸਮੁਚ੍ਛਿਨ੍ਨਾ, ਤਸ੍ਮਾ ਰਾਗਸਙ੍ਗਾਦਿਕਂ ਪਞ੍ਚਵਿਧਂ ਸਙ੍ਗਂ, ਸਬ੍ਬਮ੍ਪਿ ਵਾ ਕਿਲੇਸਸਙ੍ਗਂ ਅਤਿਚ੍ਚ ਅਤਿਕ੍ਕਮਿਤ੍ਵਾ ਅਤਿਕ੍ਕਮਨਹੇਤੁ ਰੂਪਸਭਾਵਾਭਾਵਤੋ ਰੁਪ੍ਪਨਸਙ੍ਖਾਤਸ੍ਸ ਚ ਵਿਕਾਰਸ੍ਸ ਤਤ੍ਥ ਅਭਾਵਤੋ ਨਿਬ੍ਬਿਕਾਰਹੇਤੁਭਾਵਤੋ ਵਾ ‘‘ਅਰੂਪ’’ਨ੍ਤਿ ਲਦ੍ਧਨਾਮਂ ਨਿਬ੍ਬਾਨਂ ਆਰਮ੍ਮਣਂ ਕਤ੍ਵਾ ਪਵਤ੍ਤਾਹਿ ਮਗ੍ਗਫਲਸਞ੍ਞਾਹਿ ਅਰੂਪਸਞ੍ਞੀ. ਚਤੁਯੋਗਾਤਿਗਤੋਤਿ ਕਾਮਯੋਗੋ ਭਵਯੋਗੋ ਦਿਟ੍ਠਿਯੋਗੋ ਅਵਿਜ੍ਜਾਯੋਗੋਤਿ ਚਤ੍ਤਾਰੋ ਯੋਗੇ ਯਥਾਰਹਂ ਚਤੂਹਿਪਿ ਮਗ੍ਗੇਹਿ ਅਤਿਕ੍ਕਮਿਤ੍ਵਾ ਗਤੋ. ਨ ਜਾਤੁ ਮੇਤੀਤਿ ਮਕਾਰੋ ਪਦਸਨ੍ਧਿਕਰੋ, ਜਾਤੁ ਏਕਂਸੇਨੇਵ ਪੁਨਬ੍ਭਵਾਯ ਨ ਏਤਿ, ਆਯਤਿਂ ਪੁਨਬ੍ਭਵਾਭਿਨਿਬ੍ਬਤ੍ਤਿ ਤਸ੍ਸ ਨਤ੍ਥੀਤਿ ਅਤ੍ਥੋ. ‘‘ਨ ਜਾਤਿ ਮੇਤੀ’’ਤਿਪਿ ਪਠਨ੍ਤਿ, ਸੋ ਏਵਤ੍ਥੋ. ਇਤਿ ਭਗਵਾ ਆਯਸ੍ਮਤੋ ਸੁਭੂਤਿਸ੍ਸ ਅਰਹਤ੍ਤਫਲਸਮਾਪਤ੍ਤਿਵਿਹਾਰਂ ਅਨੁਪਾਦਿਸੇਸਨਿਬ੍ਬਾਨਞ੍ਚ ਆਰਬ੍ਭ ਪੀਤਿਵੇਗਵਿਸ੍ਸਟ੍ਠਂ ਉਦਾਨਂ ਉਦਾਨੇਸਿ.

ਸਤ੍ਤਮਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੮. ਗਣਿਕਾਸੁਤ੍ਤਵਣ੍ਣਨਾ

੫੮. ਅਟ੍ਠਮੇ ਦ੍ਵੇ ਪੂਗਾਤਿ ਦ੍ਵੇ ਗਣਾ. ਅਞ੍ਞਤਰਿਸ੍ਸਾ ਗਣਿਕਾਯਾਤਿ ਅਞ੍ਞਤਰਾਯ ਨਗਰਸੋਭਿਨਿਯਾ. ਸਾਰਤ੍ਤਾਤਿ ਸੁਟ੍ਠੁ ਰਤ੍ਤਾ. ਪਟਿਬਦ੍ਧਚਿਤ੍ਤਾਤਿ ਕਿਲੇਸਵਸੇਨ ਬਦ੍ਧਚਿਤ੍ਤਾ. ਰਾਜਗਹੇ ਕਿਰ ਏਕਸ੍ਮਿਂ ਛਣਦਿਵਸੇ ਬਹੂ ਧੁਤ੍ਤਪੁਰਿਸਾ ਗਣਬਨ੍ਧਨੇਨ ਵਿਚਰਨ੍ਤਾ ਏਕਮੇਕਸ੍ਸ ਏਕਮੇਕਂ ਵੇਸਿਂ ਆਨੇਤ੍ਵਾ ਉਯ੍ਯਾਨਂ ਪਵਿਸਿਤ੍ਵਾ ਛਣਕੀਲ਼ਂ ਕੀਲ਼ਿਂਸੁ. ਤਤੋ ਪਰਮ੍ਪਿ ਦ੍ਵੇ ਤਯੋ ਛਣਦਿਵਸੇ ਤਂ ਤਂਯੇਵ ਵੇਸਿਂ ਆਨੇਤ੍ਵਾ ਛਣਕੀਲ਼ਂ ਕੀਲ਼ਿਂਸੁ. ਅਥਾਪਰਸ੍ਮਿਂ ਛਣਦਿਵਸੇ ਅਞ੍ਞੇਪਿ ਧੁਤ੍ਤਾ ਤਥੇਵ ਛਣਕੀਲ਼ਂ ਕੀਲ਼ਿਤੁਕਾਮਾ ਵੇਸਿਯੋ ਆਨੇਨ੍ਤਾ ਪੁਰਿਮਧੁਤ੍ਤੇਹਿ ਪੁਬ੍ਬੇ ਆਨੀਤਂ ਏਕਂ ਵੇਸਿਂ ਆਨੇਨ੍ਤਿ. ਇਤਰੇ ਤਂ ਦਿਸ੍ਵਾ ‘‘ਅਯਂ ਅਮ੍ਹਾਕਂ ਪਰਿਗ੍ਗਹੋ’’ਤਿ ਆਹਂਸੁ. ਤੇਪਿ ਤਥੇਵ ਆਹਂਸੁ. ‘‘ਏਵਂ ਅਮ੍ਹਾਕਂ ਪਰਿਗ੍ਗਹੋ, ਅਮ੍ਹਾਕਂ ਪਰਿਗ੍ਗਹੋ’’ਤਿ ਕਲਹਂ ਵਡ੍ਢੇਤ੍ਵਾ ਪਾਣਿਪ੍ਪਹਾਰਾਦੀਨਿ ਅਕਂਸੁ. ਤੇਨ ਵੁਤ੍ਤਂ – ‘‘ਤੇਨ ਖੋ ਪਨ ਸਮਯੇਨ ਰਾਜਗਹੇ ਦ੍ਵੇ ਪੂਗਾ’’ਤਿਆਦਿ. ਤਤ੍ਥ ਉਪਕ੍ਕਮਨ੍ਤੀਤਿ ਪਹਰਨ੍ਤਿ. ਮਰਣਮ੍ਪਿ ਨਿਗਚ੍ਛਨ੍ਤੀਤਿ ਬਲਵੂਪਕ੍ਕਮੇਹਿ ਮਰਣਂ ਉਪਗਚ੍ਛਨ੍ਤਿ, ਇਤਰੇਪਿ ਮਰਣਮਤ੍ਤਂ ਮਰਣਪ੍ਪਮਾਣਦੁਕ੍ਖਂ ਪਾਪੁਣਨ੍ਤਿ.

ਏਤਮਤ੍ਥਂ ਵਿਦਿਤ੍ਵਾਤਿ ਏਤਂ ਕਾਮੇਸੁ ਗੇਧਂ ਵਿਵਾਦਮੂਲਂ ਸਬ੍ਬਾਨਤ੍ਥਮੂਲਨ੍ਤਿ ਸਬ੍ਬਾਕਾਰਤੋ ਵਿਦਿਤ੍ਵਾ. ਇਮਂ ਉਦਾਨਨ੍ਤਿ ਅਨ੍ਤਦ੍ਵਯੇ ਚ ਮਜ੍ਝਿਮਾਯ ਪਟਿਪਤ੍ਤਿਯਾ ਆਦੀਨਵਾਨਿਸਂਸਵਿਭਾਵਨਂ ਇਮਂ ਉਦਾਨਂ ਉਦਾਨੇਸਿ.

ਤਤ੍ਥ ਯਞ੍ਚ ਪਤ੍ਤਨ੍ਤਿ ਯਂ ਰੂਪਾਦਿਪਞ੍ਚਕਾਮਗੁਣਜਾਤਂ ਪਤ੍ਤਂ ‘‘ਨਤ੍ਥਿ ਕਾਮੇਸੁ ਦੋਸੋ’’ਤਿ ਦਿਟ੍ਠਿਂ ਪੁਰਕ੍ਖਤ੍ਵਾ ਵਾ ਅਪੁਰਕ੍ਖਤ੍ਵਾ ਵਾ ਏਤਰਹਿ ਲਦ੍ਧਂ ਅਨੁਭੁਯ੍ਯਮਾਨਂ. ਯਞ੍ਚ ਪਤ੍ਤਬ੍ਬਨ੍ਤਿ ਯਞ੍ਚ ਕਾਮਗੁਣਜਾਤਮੇਵ ‘‘ਭੁਞ੍ਜਿਤਬ੍ਬਾ ਕਾਮਾ, ਪਰਿਭੁਞ੍ਜਿਤਬ੍ਬਾ ਕਾਮਾ, ਆਸੇਵਿਤਬ੍ਬਾ ਕਾਮਾ, ਪਟਿਸੇਵਿਤਬ੍ਬਾ ਕਾਮਾ, ਯੋ ਕਾਮੇ ਪਰਿਭੁਞ੍ਜਤਿ, ਸੋ ਲੋਕਂ ਵਡ੍ਢੇਤਿ, ਯੋ ਲੋਕਂ ਵਡ੍ਢੇਤਿ, ਸੋ ਬਹੁਂ ਪੁਞ੍ਞਂ ਪਸਵਤੀ’’ਤਿ ਦਿਟ੍ਠਿਂ ਉਪਨਿਸ੍ਸਾਯ ਤਂ ਅਨਿਸ੍ਸਜ੍ਜਿਤ੍ਵਾ ਕਤੇਨ ਕਮ੍ਮੁਨਾ ਅਨਾਗਤੇ ਪਤ੍ਤਬ੍ਬਂ ਅਨੁਭਵਿਤਬ੍ਬਞ੍ਚ. ਉਭਯਮੇਤਂ ਰਜਾਨੁਕਿਣ੍ਣਨ੍ਤਿ ਏਤਂ ਉਭਯਂ ਪਤ੍ਤਂ ਪਤ੍ਤਬ੍ਬਞ੍ਚ ਰਾਗਰਜਾਦੀਹਿ ਅਨੁਕਿਣ੍ਣਂ. ਸਮ੍ਪਤ੍ਤੇ ਹਿ ਵਤ੍ਥੁਕਾਮੇ ਅਨੁਭਵਨ੍ਤੋ ਰਾਗਰਜੇਨ ਵੋਕਿਣ੍ਣੋ ਹੋਤਿ, ਤਤ੍ਥ ਪਨ ਸਂਕਿਲਿਟ੍ਠਚਿਤ੍ਤਸ੍ਸ ਫਲੇ ਆਯਤਿਂ ਆਪਨ੍ਨੇ ਦੋਮਨਸ੍ਸੁਪ੍ਪਤ੍ਤਿਯਾ ਦੋਸਰਜੇਨ ਵੋਕਿਣ੍ਣੋ ਹੋਤਿ, ਉਭਯਤ੍ਥਾਪਿ ਮੋਹਰਜੇਨ ਵੋਕਿਣ੍ਣੋ ਹੋਤਿ. ਕਸ੍ਸ ਪਨੇਤਂ ਰਜਾਨੁਕਿਣ੍ਣਨ੍ਤਿ ਆਹ – ‘‘ਆਤੁਰਸ੍ਸਾਨੁਸਿਕ੍ਖਤੋ’’ਤਿ ਕਾਮਪਤ੍ਥਨਾਵਸੇਨ ਕਿਲੇਸਾਤੁਰਸ੍ਸ, ਤਸ੍ਸ ਚ ਫਲੇਨ ਦੁਕ੍ਖਾਤੁਰਸ੍ਸ ਚ ਉਭਯਤ੍ਥਾਪਿ ਪਟਿਕਾਰਾਭਿਲਾਸਾਯ ਕਿਲੇਸਫਲੇ ਅਨੁਸਿਕ੍ਖਤੋ.

ਤਥਾ ਯਞ੍ਚ ਪਤ੍ਤਨ੍ਤਿ ਯਂ ਅਚੇਲਕਵਤਾਦਿਵਸੇਨ ਪਤ੍ਤਂ ਅਤ੍ਤਪਰਿਤਾਪਨਂ. ਯਞ੍ਚ ਪਤ੍ਤਬ੍ਬਨ੍ਤਿ ਯਂ ਮਿਚ੍ਛਾਦਿਟ੍ਠਿਕਮ੍ਮਸਮਾਦਾਨਹੇਤੁ ਅਪਾਯੇਸੁ ਪਤ੍ਤਬ੍ਬਂ ਫਲਂ. ਉਭਯਮੇਤਂ ਰਜਾਨੁਕਿਣ੍ਣਨ੍ਤਿ ਤਦੁਭਯਂ ਦੁਕ੍ਖਰਜਾਨੁਕਿਣ੍ਣਂ. ਆਤੁਰਸ੍ਸਾਤਿ ਕਾਯਕਿਲਮਥੇਨ ਦੁਕ੍ਖਾਤੁਰਸ੍ਸ. ਅਨੁਸਿਕ੍ਖਤੋਤਿ ਮਿਚ੍ਛਾਦਿਟ੍ਠਿਂ, ਤਸ੍ਸਾ ਸਮਾਦਾਯਕੇ ਪੁਗ੍ਗਲੇ ਚ ਅਨੁਸਿਕ੍ਖਤੋ.

ਯੇ ਚ ਸਿਕ੍ਖਾਸਾਰਾਤਿ ਯੇਹਿ ਯਥਾਸਮਾਦਿਨ੍ਨਂ ਸੀਲਬ੍ਬਤਾਦਿਸਙ੍ਖਾਤਂ ਸਿਕ੍ਖਂ ਸਾਰਤੋ ਗਹੇਤ੍ਵਾ ‘‘ਇਮਿਨਾ ਸਂਸਾਰਸੁਦ੍ਧੀ’’ਤਿ ਕਥਿਤਾ. ਤੇਨਾਹ – ਸੀਲਬ੍ਬਤਂ ਜੀਵਿਤਂ ਬ੍ਰਹ੍ਮਚਰਿਯਂ ਉਪਟ੍ਠਾਨਸਾਰਾਤਿ. ਤਤ੍ਥ ਯਂ ‘‘ਨ ਕਰੋਮੀ’’ਤਿ ਓਰਮਤਿ, ਤਂ ਸੀਲਂ, ਵਿਸਭੋਜਨਕਿਚ੍ਛਾਚਰਣਾਦਿਕਂ ਵਤਂ, ਸਾਕਭਕ੍ਖਤਾਦਿਜੀਵਿਕਾ ਜੀਵਿਤਂ, ਮੇਥੁਨਵਿਰਤਿ ਬ੍ਰਹ੍ਮਚਰਿਯਂ, ਏਤੇਸਂ ਅਨੁਤਿਟ੍ਠਨਂ ਉਪਟ੍ਠਾਨਂ, ਭੂਤਪਿਣ੍ਡਕਪਰਿਭਣ੍ਡਾਦਿਵਸੇਨ ਖਨ੍ਧਦੇਵਸਿਵਾਦਿਪਰਿਚਰਣਂ ਵਾ ਉਪਟ੍ਠਾਨਂ, ਏਵਮੇਤੇਹਿ ਯਥਾਵੁਤ੍ਤੇਹਿ ਸੀਲਾਦੀਹਿ ਸਂਸਾਰਸੁਦ੍ਧਿ ਹੋਤੀਤਿ ਤਾਨਿ ਸਾਰਤੋ ਗਹੇਤ੍ਵਾ ਠਿਤਾ ਸਮਣਬ੍ਰਾਹ੍ਮਣਾ ਸਿਕ੍ਖਾਸਾਰਾ ਸੀਲਬ੍ਬਤਂ ਜੀਵਿਤਂ ਬ੍ਰਹ੍ਮਚਰਿਯਂ ‘‘ਉਪਟ੍ਠਾਨਸਾਰਾ’’ਤਿ ਵੇਦਿਤਬ੍ਬਾ. ਅਯਮੇਕੋ ਅਨ੍ਤੋਤਿ ਅਯਂ ਸੀਲਬ੍ਬਤਪਰਾਮਾਸਵਸੇਨ ਅਤ੍ਤਕਿਲਮਥਾਨੁਯੋਗਸਙ੍ਖਾਤੋ ਮਜ੍ਝਿਮਾਯ ਪਟਿਪਤ੍ਤਿਯਾ ਉਪ੍ਪਥਭੂਤੋ ਲਾਮਕਟ੍ਠੇਨ ਚ ਏਕੋ ਅਨ੍ਤੋ. ਅਯਂ ਦੁਤਿਯੋ ਅਨ੍ਤੋਤਿ ਅਯਂ ਕਾਮਸੁਖਲ੍ਲਿਕਾਨੁਯੋਗੋ ਕਾਮੇਸੁ ਪਾਤਬ੍ਯਤਾਪਤ੍ਤਿਸਙ੍ਖਾਤੋ ਦੁਤਿਯੋ ਵੁਤ੍ਤਨਯੇਨ ਅਨ੍ਤੋ.

ਇਚ੍ਚੇਤੇ ਉਭੋ ਅਨ੍ਤਾਤਿ ਕਾਮਸੁਖਲ੍ਲਿਕਾਨੁਯੋਗੋ ਅਤ੍ਤਕਿਲਮਥਾਨੁਯੋਗੋ ਚ ਇਤਿ ਏਤੇ ਉਭੋ ਅਨ੍ਤਾ. ਤੇ ਚ ਖੋ ਏਤਰਹਿ ਪਤ੍ਤੇ, ਆਯਤਿਂ ਪਤ੍ਤਬ੍ਬੇ ਚ ਕਿਲੇਸਦੁਕ੍ਖਰਜਾਨੁਕਿਣ੍ਣੇ ਕਾਮਗੁਣੇ ਅਤ੍ਤਪਰਿਤਾਪਨੇ ਚ ਅਲ੍ਲੀਨੇਹਿ ਕਿਲੇਸਦੁਕ੍ਖਾਤੁਰਾਨਂ ਅਨੁਸਿਕ੍ਖਨ੍ਤੇਹਿ, ਸਯਞ੍ਚ ਕਿਲੇਸਦੁਕ੍ਖਾਤੁਰੇਹਿ ਪਟਿਪਜ੍ਜਿਤਬ੍ਬਤ੍ਤਾ ਲਾਮਕਾ ਉਪ੍ਪਥਭੂਤਾ ਚਾਤਿ ਅਨ੍ਤਾ. ਕਟਸਿਵਡ੍ਢਨਾਤਿ ਅਨ੍ਧਪੁਥੁਜ੍ਜਨੇਹਿ ਅਭਿਕਙ੍ਖਿਤਬ੍ਬਟ੍ਠੇਨ ਕਟਸਿਸਙ੍ਖਾਤਾਨਂ ਤਣ੍ਹਾਅਵਿਜ੍ਜਾਨਂ ਅਭਿਵਡ੍ਢਨਾ. ਕਟਸਿਯੋ ਦਿਟ੍ਠਿਂ ਵਡ੍ਢੇਨ੍ਤੀਤਿ ਤਾ ਪਨ ਕਟਸਿਯੋ ਨਾਨਪ੍ਪਕਾਰਦਿਟ੍ਠਿਂ ਵਡ੍ਢੇਨ੍ਤਿ. ਵਤ੍ਥੁਕਾਮੇਸੁ ਅਸ੍ਸਾਦਾਨੁਪਸ੍ਸਿਨੋ ਹਿ ਤੇ ਪਜਹਿਤੁਂ ਅਸਕ੍ਕੋਨ੍ਤਸ੍ਸ ਤਣ੍ਹਾਅਵਿਜ੍ਜਾਸਹਕਾਰੀਕਾਰਣਂ ਲਭਿਤ੍ਵਾ ‘‘ਨਤ੍ਥਿ ਦਿਨ੍ਨ’’ਨ੍ਤਿਆਦਿਨਾ (ਧ. ਸ. ੧੨੨੧; ਵਿਭ. ੯੩੮) ਨਤ੍ਥਿਕਦਿਟ੍ਠਿਂ ਅਕਿਰਿਯਦਿਟ੍ਠਿਂ ਅਹੇਤੁਕਦਿਟ੍ਠਿਞ੍ਚ ਗਣ੍ਹਾਪੇਨ੍ਤਿ, ਅਤ੍ਤਪਰਿਤਾਪਨਂ ਅਨੁਯੁਤ੍ਤਸ੍ਸ ਪਨ ਅਵਿਜ੍ਜਾਤਣ੍ਹਾਸਹਕਾਰੀਕਾਰਣਂ ਲਭਿਤ੍ਵਾ ‘‘ਸੀਲੇਨ ਸੁਦ੍ਧਿ ਵਤੇਨ ਸੁਦ੍ਧੀ’’ਤਿਆਦਿਨਾ ਅਤ੍ਤਸੁਦ੍ਧਿਅਭਿਲਾਸੇਨ ਸੀਲਬ੍ਬਤਪਰਾਮਾਸਦਿਟ੍ਠਿਂ ਗਣ੍ਹਾਪੇਨ੍ਤਿ. ਸਕ੍ਕਾਯਦਿਟ੍ਠਿਯਾ ਪਨ ਤੇਸਂ ਪਚ੍ਚਯਭਾਵੋ ਪਾਕਟੋਯੇਵ. ਏਵਂ ਅਨ੍ਤਦ੍ਵਯੂਪਨਿਸ੍ਸਯੇਨ ਤਣ੍ਹਾਅਵਿਜ੍ਜਾਨਂ ਦਿਟ੍ਠਿਵਡ੍ਢਕਤਾ ਵੇਦਿਤਬ੍ਬਾ. ਕੇਚਿ ਪਨ ‘‘ਕਟਸੀਤਿ ਪਞ੍ਚਨ੍ਨਂ ਖਨ੍ਧਾਨਂ ਅਧਿਵਚਨ’’ਨ੍ਤਿ ਵਦਨ੍ਤਿ. ਤੇਸਂ ਯਦਗ੍ਗੇਨ ਤਤੋ ਅਨ੍ਤਦ੍ਵਯਤੋ ਸਂਸਾਰਸੁਦ੍ਧਿ ਨ ਹੋਤਿ, ਤਦਗ੍ਗੇਨ ਤੇ ਉਪਾਦਾਨਕ੍ਖਨ੍ਧੇ ਅਭਿਵਡ੍ਢੇਤੀਤਿ ਅਧਿਪ੍ਪਾਯੋ. ਅਪਰੇ ਪਨ ‘‘ਕਟਸਿਵਡ੍ਢਨਾ’’ਤਿ ਪਦਸ੍ਸ ‘‘ਅਪਰਾਪਰਂ ਜਰਾਮਰਣੇਹਿ ਸਿਵਥਿਕਵਡ੍ਢਨਾ’’ਤਿ ਅਤ੍ਥਂ ਵਦਨ੍ਤਿ. ਤੇਹਿਪਿ ਅਨ੍ਤਦ੍ਵਯਸ੍ਸ ਸਂਸਾਰਸੁਦ੍ਧਿਹੇਤੁਭਾਵਾਭਾਵੋਯੇਵ ਵੁਤ੍ਤੋ, ਕਟਸਿਯਾ ਪਨ ਦਿਟ੍ਠਿਵਡ੍ਢਨਕਾਰਣਭਾਵੋ ਵਤ੍ਤਬ੍ਬੋ.

ਏਤੇ ਤੇ ਉਭੋ ਅਨ੍ਤੇ ਅਨਭਿਞ੍ਞਾਯਾਤਿ ਤੇ ਏਤੇ ਯਥਾਵੁਤ੍ਤੇ ਉਭੋਪਿ ਅਨ੍ਤੇ ਅਜਾਨਿਤ੍ਵਾ ‘‘ਇਮੇ ਅਨ੍ਤਾ ਤੇ ਚ ਏਵਂਗਹਿਤਾ ਏਵਂਅਨੁਟ੍ਠਿਤਾ ਏਵਂਗਤਿਕਾ ਏਵਂਅਭਿਸਮ੍ਪਰਾਯਾ’’ਤਿ ਏਵਂ ਅਜਾਨਨਹੇਤੁ ਅਜਾਨਨਕਾਰਣਾ. ‘‘ਪਞ੍ਞਾਯ ਚਸ੍ਸ ਦਿਸ੍ਵਾ ਆਸਵਾ ਪਰਿਕ੍ਖੀਣਾ’’ਤਿਆਦੀਸੁ (ਪੁ. ਪ. ੨੦੮; ਅ. ਨਿ. ੯.੪੩) ਵਿਯਸ੍ਸ ਹੇਤੁਅਤ੍ਥਤਾ ਦਟ੍ਠਬ੍ਬਾ. ਓਲੀਯਨ੍ਤਿ ਏਕੇਤਿ ਏਕੇ ਕਾਮਸੁਖਾਨੁਯੋਗਵਸੇਨ ਸਙ੍ਕੋਚਂ ਆਪਜ੍ਜਨ੍ਤਿ. ਅਤਿਧਾਵਨ੍ਤਿ ਏਕੇਤਿ ਏਕੇ ਅਤ੍ਤਕਿਲਮਥਾਨੁਯੋਗਵਸੇਨ ਅਤਿਕ੍ਕਮਨ੍ਤਿ. ਕਾਮਸੁਖਮਨੁਯੁਤ੍ਤਾ ਹਿ ਵੀਰਿਯਸ੍ਸ ਅਕਰਣਤੋ ਕੋਸਜ੍ਜਵਸੇਨ ਸਮ੍ਮਾਪਟਿਪਤ੍ਤਿਤੋ ਸਙ੍ਕੋਚਮਾਪਨ੍ਨਤਾ ਓਲੀਯਨ੍ਤਿ ਨਾਮ, ਅਤ੍ਤਪਰਿਤਾਪਨਮਨੁਯੁਤ੍ਤਾ ਪਨ ਕੋਸਜ੍ਜਂ ਪਹਾਯ ਅਨੁਪਾਯੇਨ ਵੀਰਿਯਾਰਮ੍ਭਂ ਕਰੋਨ੍ਤਾ ਸਮ੍ਮਾਪਟਿਪਤ੍ਤਿਯਾ ਅਤਿਕ੍ਕਮਨਤੋ ਅਤਿਧਾਵਨ੍ਤਿ ਨਾਮ, ਤਦੁਭਯਂ ਪਨ ਤਤ੍ਥ ਆਦੀਨਵਾਦਸ੍ਸਨਤੋ. ਤੇਨ ਵੁਤ੍ਤਂ – ‘‘ਉਭੋ ਅਨ੍ਤੇ ਅਨਭਿਞ੍ਞਾਯ ਓਲੀਯਨ੍ਤਿ ਏਕੇ ਅਤਿਧਾਵਨ੍ਤਿ ਏਕੇ’’ਤਿ. ਤਤ੍ਥ ਤਣ੍ਹਾਭਿਨਨ੍ਦਨਵਸੇਨ ਓਲੀਯਨ੍ਤਿ, ਦਿਟ੍ਠਾਭਿਨਨ੍ਦਨਵਸੇਨ ਅਤਿਧਾਵਨ੍ਤੀਤਿ ਵੇਦਿਤਬ੍ਬਂ.

ਅਥ ਵਾ ਸਸ੍ਸਤਾਭਿਨਿਵੇਸਵਸੇਨ ਓਲੀਯਨ੍ਤਿ ਏਕੇ, ਉਚ੍ਛੇਦਾਭਿਨਿਵੇਸਵਸੇਨ ਅਤਿਧਾਵਨ੍ਤਿ ਏਕੇ. ਗੋਸੀਲਾਦਿਵਸੇਨ ਹਿ ਅਤ੍ਤਪਰਿਤਾਪਨਮਨੁਯੁਤ੍ਤਾ ਏਕਚ੍ਚੇ ‘‘ਇਮਿਨਾਹਂ ਸੀਲੇਨ ਵਾ ਵਤੇਨ ਵਾ ਤਪੇਨ ਵਾ ਬ੍ਰਹ੍ਮਚਰਿਯੇਨ ਵਾ ਦੇਵੋ ਵਾ ਭਵਿਸ੍ਸਾਮਿ ਦੇਵਞ੍ਞਤਰੋ ਵਾ, ਤਤ੍ਥ ਨਿਚ੍ਚੋ ਧੁਵੋ ਸਸ੍ਸਤੋ ਅਵਿਪਰਿਣਾਮਧਮ੍ਮੋ ਸਸ੍ਸਤਿਸਮਂ ਤਥੇਵ ਠਸ੍ਸਾਮੀ’’ਤਿ ਸਸ੍ਸਤਦਸ੍ਸਨਂ ਅਭਿਨਿਵਿਸਨ੍ਤਾ ਸਂਸਾਰੇ ਓਲੀਯਨ੍ਤਿ ਨਾਮ, ਕਾਮਸੁਖਮਨੁਯੁਤ੍ਤਾ ਪਨ ਏਕਚ੍ਚੇ ਯਂਕਿਞ੍ਚਿ ਕਤ੍ਵਾ ਇਨ੍ਦ੍ਰਿਯਾਨਿ ਸਨ੍ਤਪ੍ਪੇਤੁਕਾਮਾ ਲੋਕਾਯਤਿਕਾ ਵਿਯ ਤਦਨੁਗੁਣਂ ਉਚ੍ਛੇਦਦਸ੍ਸਨਂ ਅਭਿਨਿਵਿਸਨ੍ਤਾ ਅਨੁਪਾਯੇਨ ਵਟ੍ਟੁਪਚ੍ਛੇਦਸ੍ਸ ਪਰਿਯੇਸਨਤੋ ਅਤਿਧਾਵਨ੍ਤਿ ਨਾਮ. ਏਵਂ ਸਸ੍ਸਤੁਚ੍ਛੇਦਵਸੇਨਪਿ ਓਲੀਯਨਾਤਿਧਾਵਨਾਨਿ ਵੇਦਿਤਬ੍ਬਾਨਿ.

ਯੇ ਚ ਖੋ ਤੇ ਅਭਿਞ੍ਞਾਯਾਤਿ ਯੇ ਚ ਖੋ ਪਨ ਅਰਿਯਪੁਗ੍ਗਲਾ ਤੇ ਯਥਾਵੁਤ੍ਤੇ ਉਭੋ ਅਨ੍ਤੇ ‘‘ਇਮੇ ਅਨ੍ਤਾ ਏਵਂਗਹਿਤਾ ਏਵਂਅਨੁਟ੍ਠਿਤਾ ਏਵਂਗਤਿਕਾ ਏਵਂਅਭਿਸਮ੍ਪਰਾਯਾ’’ਤਿ ਅਭਿਵਿਸਿਟ੍ਠੇਨ ਞਾਣੇਨ ਵਿਪਸ੍ਸਨਾਸਹਿਤਾਯ ਮਗ੍ਗਪਞ੍ਞਾਯ ਜਾਨਿਤ੍ਵਾ ਮਜ੍ਝਿਮਪਟਿਪਦਂ ਸਮ੍ਮਾਪਟਿਪਨ੍ਨਾ, ਤਾਯ ਸਮ੍ਮਾਪਟਿਪਤ੍ਤਿਯਾ. ਤਤ੍ਰ ਚ ਨਾਹੇਸੁਨ੍ਤਿ ਤਤ੍ਰ ਤਸ੍ਮਿਂ ਅਨ੍ਤਦ੍ਵਯੇ ਪਤਿਤਾ ਨ ਅਹੇਸੁਂ, ਤਂ ਅਨ੍ਤਦ੍ਵਯਂ ਪਜਹਿਂਸੂਤਿ ਅਤ੍ਥੋ. ਤੇਨ ਚ ਨਾਮਞ੍ਞਿਂਸੂਤਿ ਤੇਨ ਅਨ੍ਤਦ੍ਵਯਪਹਾਨੇਨ ‘‘ਮਮ ਇਦਂ ਅਨ੍ਤਦ੍ਵਯਪਹਾਨਂ, ਅਹਂ ਅਨ੍ਤਦ੍ਵਯਂ ਪਹਾਸਿਂ, ਇਮਿਨਾ ਅਨ੍ਤਦ੍ਵਯਪਹਾਨੇਨ ਸੇਯ੍ਯੋ’’ਤਿਆਦਿਨਾ ਤਣ੍ਹਾਦਿਟ੍ਠਿਮਾਨਮਞ੍ਞਨਾਵਸੇਨ ਨ ਅਮਞ੍ਞਿਂਸੁ ਸਬ੍ਬਮਞ੍ਞਨਾਨਂ ਸਮ੍ਮਦੇਵ ਪਹੀਨਤ੍ਤਾ. ਏਤ੍ਥ ਚ ਅਗ੍ਗਫਲੇ ਠਿਤੇ ਅਰਿਯਪੁਗ੍ਗਲੇ ਸਨ੍ਧਾਯ ‘‘ਤਤ੍ਰ ਚ ਨਾਹੇਸੁਂ, ਤੇਨ ਚ ਨਾਮਞ੍ਞਿਂਸੂ’’ਤਿ ਅਤੀਤਕਾਲਵਸੇਨ ਅਯਂ ਦੇਸਨਾ ਪਵਤ੍ਤਾ, ਮਗ੍ਗਕ੍ਖਣੇ ਪਨ ਅਧਿਪ੍ਪੇਤੇ ਵਤ੍ਤਮਾਨਕਾਲਵਸੇਨੇਵ ਵਤ੍ਤਬ੍ਬਂ ਸਿਯਾ. ਵਟ੍ਟਂ ਤੇਸਂ ਨਤ੍ਥਿ ਪਞ੍ਞਾਪਨਾਯਾਤਿ ਯੇ ਏਵਂ ਪਹੀਨਸਬ੍ਬਮਞ੍ਞਨਾ ਉਤ੍ਤਮਪੁਰਿਸਾ, ਤੇਸਂ ਅਨੁਪਾਦਾਪਰਿਨਿਬ੍ਬੁਤਾਨਂ ਕਮ੍ਮਵਿਪਾਕਕਿਲੇਸਵਸੇਨ ਤਿਵਿਧਮ੍ਪਿ ਵਟ੍ਟਂ ਨਤ੍ਥਿ ਪਞ੍ਞਾਪਨਾਯ, ਵਤ੍ਤਮਾਨਕ੍ਖਨ੍ਧਭੇਦਤੋ ਉਦ੍ਧਂ ਅਨੁਪਾਦਾਨੋ ਵਿਯ ਜਾਤਵੇਦੋ ਅਪਞ੍ਞਤ੍ਤਿਕਭਾਵਮੇਵ ਗਚ੍ਛਤੀਤਿ ਅਤ੍ਥੋ.

ਅਟ੍ਠਮਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੯. ਉਪਾਤਿਧਾਵਨ੍ਤਿਸੁਤ੍ਤਵਣ੍ਣਨਾ

੫੯. ਨਵਮੇ ਰਤ੍ਤਨ੍ਧਕਾਰਤਿਮਿਸਾਯਨ੍ਤਿ ਰਤ੍ਤਿਯਂ ਅਨ੍ਧਕਾਰੇ ਮਹਾਤਿਮਿਸਾਯਂ. ਰਤ੍ਤੀਪਿ ਹਿ ਅਨ੍ਧਕਾਰਵਿਰਹਿਤਾ ਹੋਤਿ, ਯਾ ਪੁਣ੍ਣਮਾਯ ਰਤ੍ਤਿ ਜੁਣ੍ਹੋਭਾਸਿਤਾ. ਅਨ੍ਧਕਾਰੋਪਿ ‘‘ਤਿਮਿਸਾ’’ਤਿ ਨ ਵਤ੍ਤਬ੍ਬੋ ਹੋਤਿ ਅਬ੍ਭਮਹਿਕਾਦਿਉਪਕ੍ਕਿਲੇਸਵਿਰਹਿਤੇ ਦੇਵੇ. ਮਹਨ੍ਧਕਾਰੋ ਹਿ ‘‘ਤਿਮਿਸਾ’’ਤਿ ਵੁਚ੍ਚਤਿ. ਅਯਂ ਪਨ ਅਮਾਵਸੀ ਰਤ੍ਤਿ ਦੇਵੋ ਚ ਮੇਘਪਟਲਸਞ੍ਛਨ੍ਨੋ. ਤੇਨ ਵੁਤ੍ਤਂ – ‘‘ਰਤ੍ਤਨ੍ਧਕਾਰਤਿਮਿਸਾਯਨ੍ਤਿ ਰਤ੍ਤਿਯਾ ਅਨ੍ਧਕਾਰੇ ਮਹਾਤਿਮਿਸਾਯ’’ਨ੍ਤਿ. ਅਬ੍ਭੋਕਾਸੇਤਿ ਅਪ੍ਪਟਿਚ੍ਛਨ੍ਨੇ ਓਕਾਸੇ ਵਿਹਾਰਙ੍ਗਣੇ. ਤੇਲਪ੍ਪਦੀਪੇਸੁ ਝਾਯਮਾਨੇਸੂਤਿ ਤੇਲਪਜ੍ਜੋਤੇਸੁ ਜਲਮਾਨੇਸੁ.

ਨਨੁ ਚ ਭਗਵਤੋ ਬ੍ਯਾਮਪ੍ਪਭਾ ਪਕਤਿਯਾ ਬ੍ਯਾਮਮਤ੍ਤਪ੍ਪਦੇਸਂ ਅਭਿਬ੍ਯਾਪੇਤ੍ਵਾ ਚਨ੍ਦਿਮਸੂਰਿਯਾਲੋਕਂ ਅਭਿਭਵਿਤ੍ਵਾ ਘਨਬਹਲਂ ਬੁਦ੍ਧਾਲੋਕਂ ਵਿਸ੍ਸਜ੍ਜੇਨ੍ਤੀ ਅਨ੍ਧਕਾਰਂ ਵਿਧਮਿਤ੍ਵਾ ਤਿਟ੍ਠਤਿ, ਕਾਯਪ੍ਪਭਾਪਿ ਨੀਲਪੀਤਾਦਿਵਸੇਨ ਛਬ੍ਬਣ੍ਣਘਨਬੁਦ੍ਧਰਸ੍ਮਿਯੋ ਵਿਸ੍ਸਜ੍ਜੇਤ੍ਵਾ ਪਕਤਿਯਾਵ ਸਮਨ੍ਤਤੋ ਅਸੀਤਿਹਤ੍ਥਪ੍ਪਦੇਸਂ ਓਭਾਸੇਨ੍ਤੀ ਤਿਟ੍ਠਤਿ, ਏਵਂ ਬੁਦ੍ਧਾਲੋਕੇਨੇਵ ਏਕੋਭਾਸਭੂਤੇ ਭਗਵਤੋ ਨਿਸਿਨ੍ਨੋਕਾਸੇ ਪਦੀਪਕਰਣੇ ਕਿਚ੍ਚਂ ਨਤ੍ਥੀਤਿ? ਸਚ੍ਚਂ ਨਤ੍ਥਿ, ਤਥਾਪਿ ਪੁਞ੍ਞਤ੍ਥਿਕਾ ਉਪਾਸਕਾ ਭਗਵਤੋ ਭਿਕ੍ਖੁਸਙ੍ਘਸ੍ਸ ਚ ਪੂਜਾਕਰਣਤ੍ਥਂ ਦੇਵਸਿਕਂ ਤੇਲਪ੍ਪਦੀਪਂ ਉਪਟ੍ਠਪੇਨ੍ਤਿ. ਤਥਾ ਹਿ ਵੁਤ੍ਤਂ – ਸਾਮਞ੍ਞਫਲੇਪਿ ‘‘ਏਤੇ ਮਣ੍ਡਲਮਾਲੇ ਦੀਪਾ ਝਾਯਨ੍ਤੀ’’ਤਿ (ਦੀ. ਨਿ. ੧.੧੫੯). ‘‘ਰਤ੍ਤਨ੍ਧਕਾਰਤਿਮਿਸਾਯ’’ਨ੍ਤਿ ਇਦਮ੍ਪਿ ਤਸ੍ਸਾ ਰਤ੍ਤਿਯਾ ਸਭਾਵਕਿਤ੍ਤਨਤ੍ਥਂ ਵੁਤ੍ਤਂ, ਨ ਪਨ ਭਗਵਤੋ ਨਿਸਿਨ੍ਨੋਕਾਸਸ੍ਸ ਅਨ੍ਧਕਾਰਭਾਵਤੋ. ਪੂਜਾਕਰਣਤ੍ਥਮੇਵ ਹਿ ਤਦਾਪਿ ਉਪਾਸਕੇਹਿ ਪਦੀਪਾ ਕਾਰਿਤਾ.

ਤਸ੍ਮਿਞ੍ਹਿ ਦਿਵਸੇ ਸਾਵਤ੍ਥਿਵਾਸਿਨੋ ਬਹੂ ਉਪਾਸਕਾ ਪਾਤੋਵ ਸਰੀਰਪਟਿਜਗ੍ਗਨਂ ਕਤ੍ਵਾ ਵਿਹਾਰਂ ਗਨ੍ਤ੍ਵਾ ਉਪੋਸਥਙ੍ਗਾਨਿ ਸਮਾਦਿਯਿਤ੍ਵਾ ਬੁਦ੍ਧਪ੍ਪਮੁਖਂ ਭਿਕ੍ਖੁਸਙ੍ਘਂ ਨਿਮਨ੍ਤੇਤ੍ਵਾ ਨਗਰਂ ਪਵਿਸਿਤ੍ਵਾ ਮਹਾਦਾਨਾਨਿ ਪਵਤ੍ਤੇਤ੍ਵਾ ਭਗਵਨ੍ਤਂ ਭਿਕ੍ਖੁਸਙ੍ਘਞ੍ਚ ਅਨੁਗਨ੍ਤ੍ਵਾ ਨਿਵਤ੍ਤਿਤ੍ਵਾ ਅਤ੍ਤਨੋ ਅਤ੍ਤਨੋ ਗੇਹਾਨਿ ਗਨ੍ਤ੍ਵਾ ਸਯਮ੍ਪਿ ਪਰਿਭੁਞ੍ਜਿਤ੍ਵਾ ਸੁਦ੍ਧਵਤ੍ਥਨਿਵਤ੍ਥਾ ਸੁਦ੍ਧੁਤ੍ਤਰਾਸਙ੍ਗਾ ਗਨ੍ਧਮਾਲਾਦਿਹਤ੍ਥਾ ਵਿਹਾਰਂ ਗਨ੍ਤ੍ਵਾ ਭਗਵਨ੍ਤਂ ਪੂਜੇਤ੍ਵਾ ਕੇਚਿ ਮਨੋਭਾਵਨੀਯੇ ਭਿਕ੍ਖੂ ਪਯਿਰੁਪਾਸਨ੍ਤਾ ਕੇਚਿ ਯੋਨਿਸੋਮਨਸਿਕਰੋਨ੍ਤਾ ਦਿਵਸਭਾਗਂ ਵੀਤਿਨਾਮੇਸੁਂ. ਤੇ ਸਾਯਨ੍ਹਸਮਯੇ ਭਗਵਤੋ ਸਨ੍ਤਿਕੇ ਧਮ੍ਮਂ ਸੁਤ੍ਵਾ ਸਤ੍ਥਰਿ ਧਮ੍ਮਸਭਾਮਣ੍ਡਪਤੋ ਪਟ੍ਠਾਯ ਗਨ੍ਧਕੁਟਿਸਮੀਪੇ ਅਜ੍ਝੋਕਾਸੇ ਪਞ੍ਞਤ੍ਤਵਰਬੁਦ੍ਧਾਸਨੇ ਨਿਸਿਨ੍ਨੇ, ਭਿਕ੍ਖੁਸਙ੍ਘੇ ਚ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਪਯਿਰੁਪਾਸਨ੍ਤੇ ਉਪੋਸਥਵਿਸੋਧਨਤ੍ਥਞ੍ਚੇਵ ਯੋਨਿਸੋਮਨਸਿਕਾਰਪਰਿਬ੍ਰੂਹਨਤ੍ਥਞ੍ਚ ਨਗਰਂ ਅਗਨ੍ਤ੍ਵਾ ਵਿਹਾਰੇਯੇਵ ਵਸਿਤੁਕਾਮਾ ਓਹੀਯਿਂਸੁ. ਅਥ ਤੇ ਭਗਵਤੋ ਭਿਕ੍ਖੁਸਙ੍ਘਸ੍ਸ ਚ ਪੂਜਾਕਰਣਤ੍ਥਂ ਬਹੂ ਤੇਲਪ੍ਪਦੀਪੇ ਆਰੋਪੇਤ੍ਵਾ ਸਤ੍ਥਾਰਂ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ਭਿਕ੍ਖੁਸਙ੍ਘਸ੍ਸ ਚ ਅਞ੍ਜਲਿਂ ਕਤ੍ਵਾ ਭਿਕ੍ਖੂਨਂ ਪਰਿਯਨ੍ਤੇ ਨਿਸਿਨ੍ਨਾ ਕਥਂ ਸਮੁਟ੍ਠਾਪੇਸੁਂ, ‘‘ਭਨ੍ਤੇ, ਇਮੇ ਤਿਤ੍ਥਿਯਾ ਨਾਨਾਵਿਧਾਨਿ ਦਿਟ੍ਠਿਗਤਾਨਿ ਅਭਿਨਿਵਿਸ੍ਸ ਵੋਹਰਨ੍ਤਿ, ਤਥਾ ਵੋਹਰਨ੍ਤਾ ਚ ਕਦਾਚਿ ਸਸ੍ਸਤਂ, ਕਦਾਚਿ ਅਸਸ੍ਸਤਂ, ਉਚ੍ਛੇਦਾਦੀਸੁ ਅਞ੍ਞਤਰਨ੍ਤਿ ਏਕਸ੍ਮਿਂਯੇਵ ਅਟ੍ਠਤ੍ਵਾ ਨਵਨਵਾਨਿ ਦਿਟ੍ਠਿਗਤਾਨਿ ‘ਇਦਮੇਵ ਸਚ੍ਚਂ ਮੋਘਮਞ੍ਞ’ਨ੍ਤਿ ਪਗ੍ਗਯ੍ਹ ਤਿਟ੍ਠਨ੍ਤਿ ਉਮ੍ਮਤ੍ਤਕਸਦਿਸਾ, ਤੇਸਂ ਤਥਾ ਅਭਿਨਿਵਿਟ੍ਠਾਨਂ ਕਾ ਗਤਿ, ਕੋ ਅਭਿਸਮ੍ਪਰਾਯੋ’’ਤਿ. ਤੇਨ ਚ ਸਮਯੇਨ ਬਹੂ ਪਟਙ੍ਗਪਾਣਕਾ ਪਤਨ੍ਤਾ ਪਤਨ੍ਤਾ ਤੇਸੁ ਤੇਲਪ੍ਪਦੀਪੇਸੁ ਨਿਪਤਨ੍ਤਿ. ਤੇਨ ਵੁਤ੍ਤਂ – ‘‘ਤੇਨ ਖੋ ਪਨ ਸਮਯੇਨ ਸਮ੍ਬਹੁਲਾ ਅਧਿਪਾਤਕਾ’’ਤਿਆਦਿ.

ਤਤ੍ਥ ਅਧਿਪਾਤਕਾਤਿ ਪਟਙ੍ਗਪਾਣਕਾ, ਯੇ ‘‘ਸਲਭਾ’’ਤਿਪਿ ਵੁਚ੍ਚਨ੍ਤਿ. ਤੇ ਹਿ ਦੀਪਸਿਖਂ ਅਧਿਪਤਨਤੋ ‘‘ਅਧਿਪਾਤਕਾ’’ਤਿ ਅਧਿਪ੍ਪੇਤਾ. ਆਪਾਤਪਰਿਪਾਤਨ੍ਤਿ ਆਪਾਤਂ ਪਰਿਪਾਤਂ, ਆਪਤਿਤ੍ਵਾ ਆਪਤਿਤ੍ਵਾ ਪਰਿਪਤਿਤ੍ਵਾ ਪਰਿਪਤਿਤ੍ਵਾ, ਅਭਿਮੁਖਪਾਤਞ੍ਚੇਵ ਪਰਿਬ੍ਭਮਿਤ੍ਵਾ ਪਾਤਞ੍ਚ ਕਤ੍ਵਾਤਿ ਅਤ੍ਥੋ. ‘‘ਆਪਾਥੇ ਪਰਿਪਾਤ’’ਨ੍ਤਿ ਕੇਚਿ ਪਠਨ੍ਤਿ, ਆਪਾਥੇ ਪਦੀਪਸ੍ਸ ਅਤ੍ਤਨੋ ਆਪਾਥਗਮਨੇ ਸਤਿ ਪਰਿਪਤਿਤ੍ਵਾ ਪਰਿਪਤਿਤ੍ਵਾਤਿ ਅਤ੍ਥੋ. ਅਨਯਨ੍ਤਿ ਅਵਡ੍ਢਿਂ ਦੁਕ੍ਖਂ. ਬ੍ਯਸਨਨ੍ਤਿ ਵਿਨਾਸਂ. ਪੁਰਿਮਪਦੇਨ ਹਿ ਮਰਣਮਤ੍ਤਂ ਦੁਕ੍ਖਂ, ਪਚ੍ਛਿਮਪਦੇਨ ਮਰਣਂ ਤੇਸਂ ਦੀਪੇਤਿ. ਤਤ੍ਥ ਕੇਚਿ ਪਾਣਕਾ ਸਹ ਪਤਨੇਨ ਮਰਿਂਸੁ, ਕੇਚਿ ਮਰਣਮਤ੍ਤਂ ਦੁਕ੍ਖਂ ਆਪਜ੍ਜਿਂਸੁ.

ਏਤਮਤ੍ਥਂ ਵਿਦਿਤ੍ਵਾਤਿ ਏਤਂ ਅਧਿਪਾਤਕਪਾਣਕਾਨਂ ਅਤ੍ਤਹਿਤਂ ਅਜਾਨਨ੍ਤਾਨਂ ਅਤ੍ਤੁਪਕ੍ਕਮਵਸੇਨ ਨਿਰਤ੍ਥਕਬ੍ਯਸਨਾਪਤ੍ਤਿਂ ਵਿਦਿਤ੍ਵਾ ਤੇਸਂ ਵਿਯ ਦਿਟ੍ਠਿਗਤਿਕਾਨਂ ਦਿਟ੍ਠਾਭਿਨਿਵੇਸੇਨ ਅਨਯਬ੍ਯਸਨਾਪਤ੍ਤਿਦੀਪਕਂ ਇਮਂ ਉਦਾਨਂ ਉਦਾਨੇਸਿ.

ਤਤ੍ਥ ਉਪਾਤਿਧਾਵਨ੍ਤਿ ਨ ਸਾਰਮੇਨ੍ਤੀਤਿ ਸੀਲਸਮਾਧਿਪਞ੍ਞਾਵਿਮੁਤ੍ਤਿਆਦਿਭੇਦਂ ਸਾਰਂ ਨ ਏਨ੍ਤਿ, ਚਤੁਸਚ੍ਚਾਭਿਸਮਯਵਸੇਨ ਨ ਅਧਿਗਚ੍ਛਨ੍ਤਿ. ਤਸ੍ਮਿਂ ਪਨ ਸਉਪਾਯੇ ਸਾਰੇ ਤਿਟ੍ਠਨ੍ਤੇਯੇਵ ਵਿਮੁਤ੍ਤਾਭਿਲਾਸਾਯ ਤਂ ਉਪੇਨ੍ਤਾ ਵਿਯ ਹੁਤ੍ਵਾਪਿ ਦਿਟ੍ਠਿਵਿਪਲ੍ਲਾਸੇਨ ਅਤਿਧਾਵਨ੍ਤਿ ਅਤਿਕ੍ਕਮਿਤ੍ਵਾ ਗਚ੍ਛਨ੍ਤਿ, ਪਞ੍ਚੁਪਾਦਾਨਕ੍ਖਨ੍ਧੇ ‘‘ਨਿਚ੍ਚਂ ਸੁਭਂ ਸੁਖਂ ਅਤ੍ਤਾ’’ਤਿ ਅਭਿਨਿਵਿਸਿਤ੍ਵਾ ਗਣ੍ਹਨ੍ਤਾਤਿ ਅਤ੍ਥੋ. ਨਵਂ ਨਵਂ ਬਨ੍ਧਨਂ ਬ੍ਰੂਹਯਨ੍ਤੀਤਿ ਤਥਾ ਗਣ੍ਹਨ੍ਤਾ ਚ ਤਣ੍ਹਾਦਿਟ੍ਠਿਸਙ੍ਖਾਤਂ ਨਵਂ ਨਵਂ ਬਨ੍ਧਨਂ ਬ੍ਰੂਹਯਨ੍ਤਿ ਵਡ੍ਢਯਨ੍ਤਿ. ਪਤਨ੍ਤਿ ਪਜ੍ਜੋਤਮਿਵਾਧਿਪਾਤਕਾ, ਦਿਟ੍ਠੇ ਸੁਤੇ ਇਤਿਹੇਕੇ ਨਿਵਿਟ੍ਠਾਤਿ ਏਵਂ ਤਣ੍ਹਾਦਿਟ੍ਠਿਬਨ੍ਧਨੇਹਿ ਬਦ੍ਧਤ੍ਤਾ ਏਕੇ ਸਮਣਬ੍ਰਾਹ੍ਮਣਾ ਦਿਟ੍ਠੇ ਅਤ੍ਤਨਾ ਚਕ੍ਖੁਵਿਞ੍ਞਾਣੇਨ ਦਿਟ੍ਠਿਦਸ੍ਸਨੇਨੇਵ ਵਾ ਦਿਟ੍ਠੇ ਅਨੁਸ੍ਸਵੂਪਲਬ੍ਭਮਤ੍ਤੇਨੇਵ ਚ ਸੁਤੇ ‘‘ਇਤਿਹ ਏਕਨ੍ਤਤੋ ਏਵਮੇਤ’’ਨ੍ਤਿ ਨਿਵਿਟ੍ਠਾ ਦਿਟ੍ਠਾਭਿਨਿਵੇਸੇਨ ‘‘ਸਸ੍ਸਤ’’ਨ੍ਤਿਆਦਿਨਾ ਅਭਿਨਿਵਿਟ੍ਠਾ, ਏਕਨ੍ਤਹਿਤਂ ਵਾ ਨਿਸ੍ਸਰਣਂ ਅਜਾਨਨ੍ਤਾ ਰਾਗਾਦੀਹਿ ਏਕਾਦਸਹਿ ਅਗ੍ਗੀਹਿ ਆਦਿਤ੍ਤਂ ਭਵਤ੍ਤਯਸਙ੍ਖਾਤਂ ਅਙ੍ਗਾਰਕਾਸੁਂਯੇਵ ਇਮੇ ਵਿਯ ਅਧਿਪਾਤਕਾ ਇਮਂ ਪਜ੍ਜੋਤਂ ਪਤਨ੍ਤਿ, ਨ ਤਤੋ ਸੀਸਂ ਉਕ੍ਖਿਪਿਤੁਂ ਸਕ੍ਕੋਨ੍ਤੀਤਿ ਅਤ੍ਥੋ.

ਨਵਮਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੧੦. ਉਪ੍ਪਜ੍ਜਨ੍ਤਿਸੁਤ੍ਤਵਣ੍ਣਨਾ

੬੦. ਦਸਮੇ ਯਾਵਕੀਵਨ੍ਤਿ ਯਤ੍ਤਕਂ ਕਾਲਂ. ਯਤੋਤਿ ਯਦਾ, ਯਤੋ ਪਟ੍ਠਾਯ, ਯਸ੍ਮਿਂ ਕਾਲੇਤਿ ਵਾ ਅਤ੍ਥੋ. ਏਵਮੇਤਂ, ਆਨਨ੍ਦਾਤਿ, ਆਨਨ੍ਦ, ਤਥਾਗਤੇ ਉਪ੍ਪਨ੍ਨੇ ਤਥਾਗਤਸ੍ਸ ਤਥਾਗਤਸਾਵਕਾਨਂਯੇਵ ਚ ਲਾਭਸਕ੍ਕਾਰੋ ਅਭਿਵਡ੍ਢਤਿ, ਤਿਤ੍ਥਿਯਾ ਪਨ ਨਿਤ੍ਤੇਜਾ ਵਿਹਤਪ੍ਪਭਾ ਪਹੀਨਲਾਭਸਕ੍ਕਾਰਾ ਹੋਨ੍ਤੀਤਿ ਯਂ ਤਯਾ ਵੁਤ੍ਤਂ, ਏਤਂ ਏਵਂ, ਨ ਏਤਸ੍ਸ ਅਞ੍ਞਥਾਭਾਵੋ. ਚਕ੍ਕਵਤ੍ਤਿਨੋ ਹਿ ਚਕ੍ਕਰਤਨਸ੍ਸ ਪਾਤੁਭਾਵੇਨ ਲੋਕੋ ਚਕ੍ਕਰਤਨਂ ਮੁਞ੍ਚਿਤ੍ਵਾ ਅਞ੍ਞਤ੍ਥ ਪੂਜਾਸਕ੍ਕਾਰਸਮ੍ਮਾਨਂ ਨ ਪਵਤ੍ਤੇਤਿ, ਚਕ੍ਕਰਤਨਮੇਵ ਪਨ ਸਬ੍ਬੋ ਲੋਕੋ ਸਬ੍ਬਭਾਵੇਹਿ ਸਕ੍ਕਰੋਤਿ ਗਰੁਂ ਕਰੋਤਿ ਮਾਨੇਤਿ ਪੂਜੇਤਿ. ਇਤਿ ਵਟ੍ਟਾਨੁਸਾਰਿਪੁਞ੍ਞਮਤ੍ਤਨਿਸ੍ਸਨ੍ਦਸ੍ਸਪਿ ਤਾਵ ਮਹਨ੍ਤੋ ਆਨੁਭਾਵੋ, ਕਿਮਙ੍ਗਂ ਪਨ ਵਿਵਟ੍ਟਾਨੁਸਾਰਿਪੁਞ੍ਞਫਲੂਪਤ੍ਥਮ੍ਭਸ੍ਸ ਅਨਨ੍ਤਾਪਰਿਮੇਯ੍ਯਗੁਣਗਣਾਧਾਰਸ੍ਸ ਬੁਦ੍ਧਰਤਨਸ੍ਸ ਧਮ੍ਮਰਤਨਸ੍ਸ ਸਙ੍ਘਰਤਨਸ੍ਸ ਚਾਤਿ ਦਸ੍ਸੇਤਿ.

ਭਗਵਾ ਹਿ ਸਮ੍ਮਾਸਮ੍ਬੋਧਿਂ ਪਤ੍ਵਾ ਪਵਤ੍ਤਵਰਧਮ੍ਮਚਕ੍ਕੋ ਅਨੁਕ੍ਕਮੇਨ ਲੋਕੇ ਏਕਸਟ੍ਠਿਯਾ ਅਰਹਨ੍ਤੇਸੁ ਜਾਤੇਸੁ ਸਟ੍ਠਿ ਅਰਹਨ੍ਤੇ ਜਨਪਦਚਾਰਿਕਾਯ ਵਿਸ੍ਸਜ੍ਜੇਤ੍ਵਾ ਉਰੁਵੇਲਂ ਪਤ੍ਵਾ ਉਰੁਵੇਲਕਸ੍ਸਪਪ੍ਪਮੁਖੇ ਸਹਸ੍ਸਜਟਿਲੇ ਅਰਹਤ੍ਤੇ ਪਤਿਟ੍ਠਾਪੇਤ੍ਵਾ ਤੇਹਿ ਪਰਿਵੁਤੋ ਲਟ੍ਠਿਵਨੁਯ੍ਯਾਨੇ ਨਿਸੀਦਿਤ੍ਵਾ ਬਿਮ੍ਬਿਸਾਰਪ੍ਪਮੁਖਾਨਂ ਅਙ੍ਗਮਗਧਵਾਸੀਨਂ ਦ੍ਵਾਦਸ ਨਹੁਤਾਨਿ ਸਾਸਨੇ ਓਤਾਰੇਤ੍ਵਾ ਯਦਾ ਰਾਜਗਹੇ ਵਿਹਾਸਿ, ਤਤੋ ਪਟ੍ਠਾਯ ਭਗਵਤੋ ਭਿਕ੍ਖੁਸਙ੍ਘਸ੍ਸ ਚ ਯਥਾ ਯਥਾ ਉਪਰੂਪਰਿ ਉਲ਼ਾਰਲਾਭਸਕ੍ਕਾਰੋ ਅਭਿਵਡ੍ਢਤਿ, ਤਥਾ ਤਥਾ ਸਬ੍ਬਤਿਤ੍ਥਿਯਾਨਂ ਲਾਭਸਕ੍ਕਾਰੋ ਪਰਿਹਾਯਿ ਏਵ.

ਅਥੇਕਦਿਵਸਂ ਆਯਸ੍ਮਾ ਆਨਨ੍ਦੋ ਦਿਵਾਟ੍ਠਾਨੇ ਨਿਸਿਨ੍ਨੋ ਭਗਵਤੋ ਚ ਅਰਿਯਸਙ੍ਘਸ੍ਸ ਚ ਸਮ੍ਮਾਪਟਿਪਤ੍ਤਿਂ ਪਚ੍ਚਵੇਕ੍ਖਿਤ੍ਵਾ ਪੀਤਿਸੋਮਨਸ੍ਸਜਾਤੋ ‘‘ਕਥਂ ਨੁ ਖੋ ਤਿਤ੍ਥਿਯਾਨ’’ਨ੍ਤਿ ਤੇਸਂ ਪਟਿਪਤ੍ਤਿਂ ਆਵਜ੍ਜੇਸਿ. ਅਥਸ੍ਸ ਨੇਸਂ ਸਬ੍ਬਥਾਪਿ ਦੁਪ੍ਪਟਿਪਤ੍ਤਿਯੇਵ ਉਪਟ੍ਠਾਸਿ. ਸੋ ‘‘ਏਵਂਮਹਾਨੁਭਾਵੇ ਨਾਮ ਪੁਞ੍ਞੂਪਨਿਸ੍ਸਯਸ੍ਸ ਧਮ੍ਮਾਨੁਧਮ੍ਮਪ੍ਪਟਿਪਤ੍ਤਿਯਾ ਚ ਉਕ੍ਕਂਸਪਾਰਮਿਪ੍ਪਤ੍ਤੇ ਭਗਵਤਿ, ਅਰਿਯਸਙ੍ਘੇ ਚ ਧਰਨ੍ਤੇ ਕਥਂ ਇਮੇ ਅਞ੍ਞਤਿਤ੍ਥਿਯਾ ਏਵਂ ਦੁਪ੍ਪਟਿਪਨ੍ਨਾ ਅਕਤਪੁਞ੍ਞਾ ਵਰਾਕਾ ਲਾਭਿਨੋ ਸਕ੍ਕਤਾ ਭਵਿਸ੍ਸਨ੍ਤੀ’’ਤਿ ਤਿਤ੍ਥਿਯਾਨਂ ਲਾਭਸਕ੍ਕਾਰਹਾਨਿਂ ਨਿਸ੍ਸਾਯ ਕਾਰੁਞ੍ਞਂ ਉਪ੍ਪਾਦੇਤ੍ਵਾ ਅਥ ਅਤ੍ਤਨੋ ਪਰਿਵਿਤਕ੍ਕਂ ‘‘ਯਾਵਕੀਵਞ੍ਚ, ਭਨ੍ਤੇ’’ਤਿਆਦਿਨਾ ਭਗਵਤੋ ਆਰੋਚੇਸਿ. ਭਗਵਾ ਚ ਤਂ, ‘‘ਆਨਨ੍ਦ, ਤਯਾ ਮਿਚ੍ਛਾ ਪਰਿਵਿਤਕ੍ਕਿਤ’’ਨ੍ਤਿ ਅਵਤ੍ਵਾ ਸੁਵਣ੍ਣਾਲਿਙ੍ਗਸਦਿਸਂ ਗੀਵਂ ਉਨ੍ਨਾਮੇਤ੍ਵਾ ਸੁਪੁਪ੍ਫਿਤਸਤਪਤ੍ਤਸਸ੍ਸਿਰਿਕਂ ਮਹਾਮੁਖਂ ਅਭਿਪ੍ਪਸਨ੍ਨਤਰਂ ਕਤ੍ਵਾ ‘‘ਏਵਮੇਤਂ, ਆਨਨ੍ਦਾ’’ਤਿ ਸਮ੍ਪਹਂਸਿਤ੍ਵਾ ‘‘ਯਾਵਕੀਵਞ੍ਚਾ’’ਤਿਆਦਿਨਾ ਤਸ੍ਸ ਵਚਨਂ ਪਚ੍ਚਨੁਮੋਦਿ. ਤੇਨ ਵੁਤ੍ਤਂ – ‘‘ਅਥ ਖੋ ਆਯਸ੍ਮਾ ਆਨਨ੍ਦੋ…ਪੇ… ਭਿਕ੍ਖੁਸਙ੍ਘੋ ਚਾ’’ਤਿ. ਅਥ ਭਗਵਾ ਤਸ੍ਸਂ ਅਟ੍ਠੁਪ੍ਪਤ੍ਤਿਯਂ ਅਤੀਤੇਪਿ ਮਯਿ ਅਨੁਪ੍ਪਨ੍ਨੇ ਏਕਚ੍ਚੇ ਨੀਚਜਨਾ ਸਮ੍ਮਾਨਂ ਲਭਿਤ੍ਵਾ ਮਮ ਉਪ੍ਪਾਦਤੋ ਪਟ੍ਠਾਯ ਹਤਲਾਭਸਕ੍ਕਾਰਾ ਅਹੇਸੁਨ੍ਤਿ ਬਾਵੇਰੁਜਾਤਕਂ (ਜਾ. ੧.੪.੧੫੩ ਆਦਯੋ) ਕਥੇਸਿ.

ਏਤਮਤ੍ਥਂ ਵਿਦਿਤ੍ਵਾਤਿ ਦਿਟ੍ਠਿਗਤਿਕਾਨਂ ਤਾਵ ਸਕ੍ਕਾਰਸਮ੍ਮਾਨੋ ਯਾਵ ਨ ਸਮ੍ਮਾਸਮ੍ਬੁਦ੍ਧਾ ਲੋਕੇ ਉਪ੍ਪਜ੍ਜਨ੍ਤਿ, ਤੇਸਂ ਪਨ ਉਪ੍ਪਾਦਤੋ ਪਟ੍ਠਾਯ ਤੇ ਹਤਲਾਭਸਕ੍ਕਾਰਾ ਨਿਪ੍ਪਭਾ ਨਿਤ੍ਤੇਜਾਵ ਹੋਨ੍ਤਿ, ਦੁਪ੍ਪਟਿਪਤ੍ਤਿਯਾ ਦੁਕ੍ਖਤੋ ਚ ਨ ਮੁਚ੍ਚਨ੍ਤੀਤਿ ਏਤਮਤ੍ਥਂ ਸਬ੍ਬਾਕਾਰਤੋ ਵਿਦਿਤ੍ਵਾ ਤਦਤ੍ਥਦੀਪਨਂ ਇਮਂ ਉਦਾਨਂ ਉਦਾਨੇਸਿ.

ਤਤ੍ਥ ਓਭਾਸਤਿ ਤਾਵ ਸੋ ਕਿਮੀਤਿ ਸੋ ਖਜ੍ਜੂਪਨਕਕਿਮਿ ਤਾਵਦੇਵ ਓਭਾਸਤਿ ਜੋਤਤਿ ਦਿਬ੍ਬਤਿ. ਯਾਵ ਨ ਉਨ੍ਨਮਤੇ ਪਭਙ੍ਕਰੋਤਿ ਤੀਸੁਪਿ ਮਹਾਦੀਪੇਸੁ ਏਕਕ੍ਖਣੇ ਆਲੋਕਕਰਣੇਨ ‘‘ਪਭਙ੍ਕਰੋ’’ਤਿ ਲਦ੍ਧਨਾਮੋ ਸੂਰਿਯੋ ਯਾਵ ਨ ਉਗ੍ਗਮਤਿ ਨ ਉਦੇਤਿ. ਅਨੁਗ੍ਗਤੇ ਹਿ ਸੂਰਿਯੇ ਲਦ੍ਧੋਕਾਸਾ ਖਜ੍ਜੂਪਨਕਾ ਵਿਪਰਿਵਤ੍ਤਮਾਨਾਪਿ ਕਣ੍ਟਕਫਲਸਦਿਸਾ ਤਮਸਿ ਵਿਜ੍ਜੋਤਨ੍ਤਿ. ਸ ਵੇਰੋਚਨਮ੍ਹਿ ਉਗ੍ਗਤੇ, ਹਤਪ੍ਪਭੋ ਹੋਤਿ ਨ ਚਾਪਿ ਭਾਸਤੀਤਿ ਸਮਨ੍ਤਤੋ ਅਨ੍ਧਕਾਰਂ ਵਿਧਮਿਤ੍ਵਾ ਕਿਰਣਸਹਸ੍ਸੇਨ ਵਿਰੋਚਨਸਭਾਵਤਾਯ ਵੇਰੋਚਨਨਾਮਕੇ ਆਦਿਚ੍ਚੇ ਉਟ੍ਠਿਤੇ ਸੋ ਖਜ੍ਜੂਪਨਕੋ ਹਤਪ੍ਪਭੋ ਨਿਤ੍ਤੇਜੋ ਕਾਲ਼ਕੋ ਹੋਤਿ, ਰਤ੍ਤਨ੍ਧਕਾਰੇ ਵਿਯ ਨ ਭਾਸਤਿ ਨ ਦਿਬ੍ਬਤਿ.

ਏਵਂ ਓਭਾਸਿਤਮੇਵ ਤਕ੍ਕਿਕਾਨਨ੍ਤਿ ਯਥਾ ਤੇਨ ਖਜ੍ਜੂਪਨਕੇਨ ਸੂਰਿਯੁਗ੍ਗਮਨਤੋ ਪੁਰੇਯੇਵ ਓਭਾਸਿਤਂ ਹੋਤਿ, ਏਵਂ ਤਕ੍ਕੇਤ੍ਵਾ ਵਿਤਕ੍ਕੇਤ੍ਵਾ ਪਰਿਕਪ੍ਪਨਮਤ੍ਤੇਨ ਦਿਟ੍ਠੀਨਂ ਗਹਣਤੋ ‘‘ਤਕ੍ਕਿਕਾ’’ਤਿ ਲਦ੍ਧਨਾਮੇਹਿ ਤਿਤ੍ਥਿਯੇਹਿ ਓਭਾਸਿਤਂ ਅਤ੍ਤਨੋ ਸਮਯਤੇਜੇਨ ਦੀਪੇਤ੍ਵਾ ਅਧਿਟ੍ਠਿਤਂ ਤਾਵ, ਯਾਵ ਸਮ੍ਮਾਸਮ੍ਬੁਦ੍ਧਾ ਲੋਕੇ ਨੁਪ੍ਪਜ੍ਜਨ੍ਤਿ. ਨ ਤਕ੍ਕਿਕਾ ਸੁਜ੍ਝਨ੍ਤਿ ਨ ਚਾਪਿ ਸਾਵਕਾਤਿ ਯਦਾ ਪਨ ਸਮ੍ਮਾਸਮ੍ਬੁਦ੍ਧਾ ਲੋਕੇ ਉਪ੍ਪਜ੍ਜਨ੍ਤਿ, ਤਦਾ ਦਿਟ੍ਠਿਗਤਿਕਾ ਨ ਸੁਜ੍ਝਨ੍ਤਿ ਨ ਸੋਭਨ੍ਤਿ, ਨ ਚਾਪਿ ਤੇਸਂ ਸਾਵਕਾ ਸੋਭਨ੍ਤਿ, ਅਞ੍ਞਦਤ੍ਥੁ ਵਿਹਤਸੋਭਾ ਰਤ੍ਤਿਖਿਤ੍ਤਾ ਵਿਯ ਸਰਾ ਨ ਪਞ੍ਞਾਯਨ੍ਤੇਵ. ਅਥ ਵਾ ਯਾਵ ਸਮ੍ਮਾਸਮ੍ਬੁਦ੍ਧਾ ਲੋਕੇ ਨੁਪ੍ਪਜ੍ਜਨ੍ਤਿ, ਤਾਵਦੇਵ ਤਕ੍ਕਿਕਾਨਂ ਓਭਾਸਿਤਂ ਅਤ੍ਤਨੋ ਸਮਯੇਨ ਜੋਤਨਂ ਬਾਲਲਾਪਨਂ, ਨ ਤਤੋ ਪਰਂ. ਕਸ੍ਮਾ? ਯਸ੍ਮਾ ਨ ਤਕ੍ਕਿਕਾ ਸੁਜ੍ਝਨ੍ਤਿ, ਨ ਚਾਪਿ ਸਾਵਕਾ. ਤੇ ਹਿ ਦੁਰਕ੍ਖਾਤਧਮ੍ਮਵਿਨਯਾ ਸਮ੍ਮਾਪਟਿਪਤ੍ਤਿਰਹਿਤਾ ਨ ਸਂਸਾਰਤੋ ਸੁਜ੍ਝਨ੍ਤਿ ਅਨਿਯ੍ਯਾਨਿਕਸਾਸਨਤ੍ਤਾ. ਤੇਨਾਹ ‘‘ਦੁਦ੍ਦਿਟ੍ਠੀ ਨ ਦੁਕ੍ਖਾ ਪਮੁਚ੍ਚਰੇ’’ਤਿ. ਤਕ੍ਕਿਕਾ ਹਿ ਅਯਾਥਾਵਲਦ੍ਧਿਕਤਾਯ ਦੁਦ੍ਦਿਟ੍ਠਿਨੋ ਮਿਚ੍ਛਾਭਿਨਿਵਿਟ੍ਠਦਿਟ੍ਠਿਕਾ ਵਿਪਰੀਤਦਸ੍ਸਨਾ ਤਂ ਦਿਟ੍ਠਿਂ ਅਨਿਸ੍ਸਜ੍ਜਿਤ੍ਵਾ ਸਂਸਾਰਦੁਕ੍ਖਤੋ ਨ ਕਦਾਚਿਪਿ ਮੁਚ੍ਚਨ੍ਤੀਤਿ.

ਦਸਮਸੁਤ੍ਤਵਣ੍ਣਨਾ ਨਿਟ੍ਠਿਤਾ.

ਨਿਟ੍ਠਿਤਾ ਚ ਜਚ੍ਚਨ੍ਧਵਗ੍ਗਵਣ੍ਣਨਾ.