੪. ਸੁਜਾਤਾਥੇਰੀਗਾਥਾਵਣ੍ਣਨਾ
ਅਲਙ੍ਕਤਾ ਸੁਵਸਨਾਤਿਆਦਿਕਾ ਸੁਜਾਤਾਯ ਥੇਰਿਯਾ ਗਾਥਾ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰਾ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਂ ਕੁਸਲਂ ਉਪਚਿਨਨ੍ਤੀ ਅਨੁਕ੍ਕਮੇਨ ਸਮ੍ਭਤਵਿਮੋਕ੍ਖਸਮ੍ਭਾਰਾ ਹੁਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਸਾਕੇਤਨਗਰੇ ਸੇਟ੍ਠਿਕੁਲੇ ਨਿਬ੍ਬਤ੍ਤਿਤ੍ਵਾ ਵਯਪ੍ਪਤ੍ਤਾ ਮਾਤਾਪਿਤੂਹਿ ਸਮਾਨਜਾਤਿਕਸ੍ਸ ਸੇਟ੍ਠਿਪੁਤ੍ਤਸ੍ਸ ਦਿਨ੍ਨਾ ਹੁਤ੍ਵਾ ਪਤਿਕੁਲਂ ਗਤਾ. ਤਤ੍ਥ ਤੇਨ ਸਦ੍ਧਿਂ ਸੁਖਸਂਵਾਸਂ ਵਸਨ੍ਤੀ ਏਕਦਿਵਸਂ ਉਯ੍ਯਾਨਂ ਗਨ੍ਤ੍ਵਾ ਨਕ੍ਖਤ੍ਤਕੀਲ਼ਂ ਕੀਲ਼ਿਤ੍ਵਾ ਪਰਿਜਨੇਨ ਸਦ੍ਧਿਂ ਨਗਰਂ ਆਗਚ੍ਛਨ੍ਤੀ ਅਞ੍ਜਨਵਨੇ ਸਤ੍ਥਾਰਂ ਦਿਸ੍ਵਾ ਪਸਨ੍ਨਮਾਨਸਾ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸੀਦਿ. ਸਤ੍ਥਾ ਤਸ੍ਸਾ ਅਨੁਪੁਬ੍ਬਿਂ ਕਥਂ ਕਥੇਤ੍ਵਾ ਕਲ੍ਲਚਿਤ੍ਤਤਂ ਞਤ੍ਵਾ ਉਪਰਿ ਸਾਮੁਕ੍ਕਂਸਿਕਂ ਧਮ੍ਮਦੇਸਨਂ ਪਕਾਸੇਸਿ. ਸਾ ਦੇਸਨਾਵਸਾਨੇ ਅਤ੍ਤਨੋ ਕਤਾਧਿਕਾਰਤਾਯ ਞਾਣਸ੍ਸ ਪਰਿਪਾਕਂ ਗਤਤ੍ਤਾ ਚ, ਸਤ੍ਥੁ ਚ ਦੇਸਨਾਵਿਲਾਸੇਨ ਯਥਾਨਿਸਿਨ੍ਨਾਵ ਸਹ ਪਟਿਸਮ੍ਭਿਦਾਹਿ ਅਰਹਤ੍ਤਂ ਪਤ੍ਵਾ ਸਤ੍ਥਾਰਂ ਵਨ੍ਦਿਤ੍ਵਾ ਗੇਹਂ ਗਨ੍ਤ੍ਵਾ ਸਾਮਿਕਞ੍ਚ ਮਾਤਾਪਿਤਰੋ ਚ ਅਨੁਜਾਨਾਪੇਤ੍ਵਾ ਸਤ੍ਥੁਆਣਾਯ ਭਿਕ੍ਖੁਨੁਪਸ੍ਸਯਂ ਗਨ੍ਤ੍ਵਾ ਭਿਕ੍ਖੁਨੀਨਂ ਸਨ੍ਤਿਕੇ ਪਬ੍ਬਜਿ. ਪਬ੍ਬਜਿਤ੍ਵਾ ਚ ਅਤ੍ਤਨੋ ਪਟਿਪਤ੍ਤਿਂ ਪਚ੍ਚਵੇਕ੍ਖਿਤ੍ਵਾ ਉਦਾਨਵਸੇਨ –
੧੪੫. ‘‘ਅਲਙ੍ਕਤਾ ਸੁਵਸਨਾ, ਮਾਲਿਨੀ ਚਨ੍ਦਨੋਕ੍ਖਿਤਾ;
ਸਬ੍ਬਾਭਰਣਸਞ੍ਛਨ੍ਨਾ, ਦਾਸੀਗਣਪੁਰਕ੍ਖਤਾ.
੧੪੬. ‘‘ਅਨ੍ਨਂ ਪਾਨਞ੍ਚ ਆਦਾਯ, ਖਜ੍ਜਂ ਭੋਜ੍ਜਂ ਅਨਪ੍ਪਕਂ;
ਗੇਹਤੋ ਨਿਕ੍ਖਮਿਤ੍ਵਾਨ, ਉਯ੍ਯਾਨਮਭਿਹਾਰਯਿਂ.
੧੪੭. ‘‘ਤਤ੍ਥ ਰਮਿਤ੍ਵਾ ਕੀਲ਼ਿਤ੍ਵਾ, ਆਗਚ੍ਛਨ੍ਤੀ ਸਕਂ ਘਰਂ;
ਵਿਹਾਰਂ ਦਟ੍ਠੁਂ ਪਾਵਿਸਿਂ, ਸਾਕੇਤੇ ਅਞ੍ਜਨਂ ਵਨਂ.
੧੪੮. ‘‘ਦਿਸ੍ਵਾਨ ਲੋਕਪਜ੍ਜੋਤਂ, ਵਨ੍ਦਿਤ੍ਵਾਨ ਉਪਾਵਿਸਿਂ;
ਸੋ ਮੇ ਧਮ੍ਮਮਦੇਸੇਸਿ, ਅਨੁਕਮ੍ਪਾਯ ਚਕ੍ਖੁਮਾ.
੧੪੯. ‘‘ਸੁਤ੍ਵਾ ਚ ਖੋ ਮਹੇਸਿਸ੍ਸ, ਸਚ੍ਚਂ ਸਮ੍ਪਟਿਵਿਜ੍ਝਹਂ;
ਤਤ੍ਥੇਵ ਵਿਰਜਂ ਧਮ੍ਮਂ, ਫੁਸਯਿਂ ਅਮਤਂ ਪਦਂ.
੧੫੦. ‘‘ਤਤੋ ਵਿਞ੍ਞਾਤਸਦ੍ਧਮ੍ਮਾ, ਪਬ੍ਬਜਿਂ ਅਨਗਾਰਿਯਂ;
ਤਿਸ੍ਸੋ ਵਿਜ੍ਜਾ ਅਨੁਪ੍ਪਤ੍ਤਾ, ਅਮੋਘਂ ਬੁਦ੍ਧਸਾਸਨ’’ਨ੍ਤਿ. –
ਇਮਾ ਗਾਥਾ ਅਭਾਸਿ.
ਤਤ੍ਥ ਅਲਙ੍ਕਤਾਤਿ ਵਿਭੂਸਿਤਾ. ਤਂ ਪਨ ਅਲਙ੍ਕਤਾਕਾਰਂ ਦਸ੍ਸੇਤੁਂ ‘‘ਸੁਵਸਨਾ ਮਾਲਿਨੀ ਚਨ੍ਦਨੋਕ੍ਖਿਤਾ’’ਤਿ ਵੁਤ੍ਤਂ. ਤਤ੍ਥ ਮਾਲਿਨੀਤਿ ਮਾਲਾਧਾਰਿਨੀ. ਚਨ੍ਦਨੋਕ੍ਖਿਤਾਤਿ ਚਨ੍ਦਨਾਨੁਲਿਤ੍ਤਾ. ਸਬ੍ਬਾਭਰਣਸਞ੍ਛਨ੍ਨਾਤਿ ਹਤ੍ਥੂਪਗਾਦੀਹਿ ਸਬ੍ਬੇਹਿ ਆਭਰਣੇਹਿ ਅਲਙ੍ਕਾਰਵਸੇਨ ਸਞ੍ਛਾਦਿਤਸਰੀਰਾ.
ਅਨ੍ਨਂ ਪਾਨਞ੍ਚ ਆਦਾਯ, ਖਜ੍ਜਂ ਭੋਜ੍ਜਂ ਅਨਪ੍ਪਕਨ੍ਤਿ ਸਾਲਿਓਦਨਾਦਿਅਨ੍ਨਂ, ਅਮ੍ਬਪਾਨਾਦਿਪਾਨਂ, ਪਿਟ੍ਠਖਾਦਨੀਯਾਦਿਖਜ੍ਜਂ, ਅਵਸਿਟ੍ਠਂ ਆਹਾਰਸਙ੍ਖਾਤਂ ਭੋਜ੍ਜਞ੍ਚ ਪਹੂਤਂ ਗਹੇਤ੍ਵਾ. ਉਯ੍ਯਾਨਮਭਿਹਾਰਯਿਨ੍ਤਿ ਨਕ੍ਖਤ੍ਤਕੀਲ਼ਾਵਸੇਨ ਉਯ੍ਯਾਨਂ ਉਪਨੇਸਿਂ. ਅਨ੍ਨਪਾਨਾਦਿਂ ਤਤ੍ਥ ਆਨੇਤ੍ਵਾ ਸਹ ਪਰਿਜਨੇਨ ਕੀਲ਼ਨ੍ਤੀ ਰਮਨ੍ਤੀ ਪਰਿਚਾਰੇਸਿਨ੍ਤਿ ਅਧਿਪ੍ਪਾਯੋ.
ਸਾਕੇਤੇ ਅਞ੍ਜਨਂ ਵਨਨ੍ਤਿ ਸਾਕੇਤਸਮੀਪੇ ਅਞ੍ਜਨਵਨੇ ਵਿਹਾਰਂ ਪਾਵਿਸਿਂ.
ਲੋਕਪਜ੍ਜੋਤਨ੍ਤਿ ਞਾਣਪਜ੍ਜੋਤੇਨ ਲੋਕਸ੍ਸ ਪਜ੍ਜੋਤਭੂਤਂ.
ਫੁਸਯਿਨ੍ਤਿ ਫੁਸਿਂ, ਅਧਿਗਚ੍ਛਿਨ੍ਤਿ ਅਤ੍ਥੋ. ਸੇਸਂ ਵੁਤ੍ਤਨਯਮੇਵ.
ਸੁਜਾਤਾਥੇਰੀਗਾਥਾਵਣ੍ਣਨਾ ਨਿਟ੍ਠਿਤਾ.