੫. ਨਨ੍ਦੁਤ੍ਤਰਾਥੇਰੀਗਾਥਾਵਣ੍ਣਨਾ

ਅਗ੍ਗਿਂ ਚਨ੍ਦਞ੍ਚਾਤਿਆਦਿਕਾ ਨਨ੍ਦੁਤ੍ਤਰਾਯ ਥੇਰਿਯਾ ਗਾਥਾ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰਾ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਂ ਕੁਸਲਂ ਉਪਚਿਨਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਕੁਰੁਰਟ੍ਠੇ ਕਮ੍ਮਾਸਧਮ੍ਮਨਿਗਮੇ ਬ੍ਰਾਹ੍ਮਣਕੁਲੇ ਨਿਬ੍ਬਤ੍ਤਿਤ੍ਵਾ, ਏਕਚ੍ਚਾਨਿ ਵਿਜ੍ਜਾਟ੍ਠਾਨਾਨਿ ਸਿਪ੍ਪਾਯਤਨਾਨਿ ਚ ਉਗ੍ਗਹੇਤ੍ਵਾ ਨਿਗਣ੍ਠਪਬ੍ਬਜ੍ਜਂ ਉਪਗਨ੍ਤ੍ਵਾ, ਵਾਦਪ੍ਪਸੁਤਾ ਜਮ੍ਬੁਸਾਖਂ ਗਹੇਤ੍ਵਾ ਭਦ੍ਦਾਕੁਣ੍ਡਲਕੇਸਾ ਵਿਯ ਜਮ੍ਬੁਦੀਪਤਲੇ ਵਿਚਰਨ੍ਤੀ ਮਹਾਮੋਗ੍ਗਲ੍ਲਾਨਤ੍ਥੇਰਂ ਉਪਸਙ੍ਕਮਿਤ੍ਵਾ ਪਞ੍ਹਂ ਪੁਚ੍ਛਿਤ੍ਵਾ ਪਰਾਜਯਂ ਪਤ੍ਤਾ ਥੇਰਸ੍ਸ ਓਵਾਦੇ ਠਤ੍ਵਾ ਸਾਸਨੇ ਪਬ੍ਬਜਿਤ੍ਵਾ ਸਮਣਧਮ੍ਮਂ ਕਰੋਨ੍ਤੀ ਨ ਚਿਰਸ੍ਸੇਵ ਸਹ ਪਟਿਸਮ੍ਭਿਦਾਹਿ ਅਰਹਤ੍ਤਂ ਪਤ੍ਵਾ ਅਤ੍ਤਨੋ ਪਟਿਪਤ੍ਤਿਂ ਪਚ੍ਚਵੇਕ੍ਖਿਤ੍ਵਾ ਉਦਾਨਵਸੇਨ –

੮੭. ‘‘ਅਗ੍ਗਿਂ ਚਨ੍ਦਞ੍ਚ ਸੂਰਿਯਞ੍ਚ, ਦੇਵਤਾ ਚ ਨਮਸ੍ਸਿਹਂ;

ਨਦੀਤਿਤ੍ਥਾਨਿ ਗਨ੍ਤ੍ਵਾਨ, ਉਦਕਂ ਓਰੁਹਾਮਿਹਂ.

੮੮. ‘‘ਬਹੂਵਤਸਮਾਦਾਨਾ, ਅਡ੍ਢਂ ਸੀਸਸ੍ਸ ਓਲਿਖਿਂ;

ਛਮਾਯ ਸੇਯ੍ਯਂ ਕਪ੍ਪੇਮਿ, ਰਤ੍ਤਿਂ ਭਤ੍ਤਂ ਨ ਭੁਞ੍ਜਹਂ.

੮੯. ‘‘ਵਿਭੂਸਾਮਣ੍ਡਨਰਤਾ, ਨ੍ਹਾਪਨੁਚ੍ਛਾਦਨੇਹਿ ਚ;

ਉਪਕਾਸਿਂ ਇਮਂ ਕਾਯਂ, ਕਾਮਰਾਗੇਨ ਅਟ੍ਟਿਤਾ.

੯੦. ‘‘ਤਤੋ ਸਦ੍ਧਂ ਲਭਿਤ੍ਵਾਨ, ਪਬ੍ਬਜਿਂ ਅਨਗਾਰਿਯਂ;

ਦਿਸ੍ਵਾ ਕਾਯਂ ਯਥਾਭੂਤਂ, ਕਾਮਰਾਗੋ ਸਮੂਹਤੋ.

੯੧. ‘‘ਸਬ੍ਬੇ ਭਵਾ ਸਮੁਚ੍ਛਿਨ੍ਨਾ, ਇਚ੍ਛਾ ਚ ਪਤ੍ਥਨਾਪਿ ਚ;

ਸਬ੍ਬਯੋਗਵਿਸਂਯੁਤ੍ਤਾ, ਸਨ੍ਤਿਂ ਪਾਪੁਣਿ ਚੇਤਸੋ’’ਤਿ. –

ਇਮਾ ਪਞ੍ਚ ਗਾਥਾ ਅਭਾਸਿ.

ਤਤ੍ਥ ਅਗ੍ਗਿਂ ਚਨ੍ਦਞ੍ਚ ਸੂਰਿਯਞ੍ਚ, ਦੇਵਤਾ ਚ ਨਮਸ੍ਸਿਹਨ੍ਤਿ ਅਗ੍ਗਿਪ੍ਪਮੁਖਾ ਦੇਵਾਤਿ ਇਨ੍ਦਾਨਂ ਦੇਵਾਨਂ ਆਰਾਧਨਤ੍ਥਂ ਆਹੁਤਿਂ ਪਗ੍ਗਹੇਤ੍ਵਾ ਅਗ੍ਗਿਞ੍ਚ, ਮਾਸੇ ਮਾਸੇ ਸੁਕ੍ਕਪਕ੍ਖਸ੍ਸ ਦੁਤਿਯਾਯ ਚਨ੍ਦਞ੍ਚ, ਦਿਵਸੇ ਦਿਵਸੇ ਸਾਯਂ ਪਾਤਂ ਸੂਰਿਯਞ੍ਚ, ਅਞ੍ਞਾ ਚ ਬਾਹਿਰਾ ਹਿਰਞ੍ਞਗਬ੍ਭਾਦਯੋ ਦੇਵਤਾ ਚ, ਵਿਸੁਦ੍ਧਿਮਗ੍ਗਂ ਗਵੇਸਨ੍ਤੀ ਨਮਸ੍ਸਿਹਂ ਨਮਕ੍ਕਾਰਂ ਅਹਂ ਅਕਾਸਿਂ. ਨਦੀਤਿਤ੍ਥਾਨਿ ਗਨ੍ਤ੍ਵਾਨ, ਉਦਕਂ ਓਰੁਹਾਮਿਹਨ੍ਤਿ ਗਙ੍ਗਾਦੀਨਂ ਨਦੀਨਂ ਪੂਜਾਤਿਤ੍ਥਾਨਿ ਉਪਗਨ੍ਤ੍ਵਾ ਸਾਯਂ ਪਾਤਂ ਉਦਕਂ ਓਤਰਾਮਿ ਉਦਕੇ ਨਿਮੁਜ੍ਜਿਤ੍ਵਾ ਅਙ੍ਗਸਿਞ੍ਚਨਂ ਕਰੋਮਿ.

ਬਹੂਵਤਸਮਾਦਾਨਾਤਿ ਪਞ੍ਚਾਤਪਤਪ੍ਪਨਾਦਿ ਬਹੁਵਿਧਵਤਸਮਾਦਾਨਾ. ਗਾਥਾਸੁਖਤ੍ਥਂ ਬਹੂਤਿ ਦੀਘਕਰਣਂ. ਅਡ੍ਢਂ ਸੀਸਸ੍ਸ ਓਲਿਖਿਨ੍ਤਿ ਮਯ੍ਹਂ ਸੀਸਸ੍ਸ ਅਡ੍ਢਮੇਵ ਮੁਣ੍ਡੇਮਿ. ਕੇਚਿ ‘‘ਅਡ੍ਢਂ ਸੀਸਸ੍ਸ ਓਲਿਖਿਨ੍ਤਿ ਕੇਸਕਲਾਪਸ੍ਸ ਅਡ੍ਢਂ ਜਟਾਬਨ੍ਧਨਵਸੇਨ ਬਨ੍ਧਿਤ੍ਵਾ ਅਡ੍ਢਂ ਵਿਸ੍ਸਜ੍ਜੇਸਿ’’ਨ੍ਤਿ ਅਤ੍ਥਂ ਵਦਨ੍ਤਿ. ਛਮਾਯ ਸੇਯ੍ਯਂ ਕਪ੍ਪੇਮੀਤਿ ਥਣ੍ਡਿਲਸਾਯਿਨੀ ਹੁਤ੍ਵਾ ਅਨਨ੍ਤਰਹਿਤਾਯ ਭੂਮਿਯਾ ਸਯਾਮਿ. ਰਤ੍ਤਿਂ ਭਤ੍ਤਂ ਨ ਭੁਞ੍ਜਹਨ੍ਤਿ ਰਤ੍ਤੂਪਰਤਾ ਹੁਤ੍ਵਾ ਰਤ੍ਤਿਯਂ ਭੋਜਨਂ ਨ ਭੁਞ੍ਜਿਂ.

ਵਿਭੂਸਾਮਣ੍ਡਨਰਤਾਤਿ ਚਿਰਕਾਲਂ ਅਤ੍ਤਕਿਲਮਥਾਨੁਯੋਗੇਨ ਕਿਲਨ੍ਤਕਾਯਾ ‘‘ਏਵਂ ਸਰੀਰਸ੍ਸ ਕਿਲਮਨੇਨ ਨਤ੍ਥਿ ਪਞ੍ਞਾਸੁਦ੍ਧਿ. ਸਚੇ ਪਨ ਇਨ੍ਦ੍ਰਿਯਾਨਂ ਤੋਸਨਵਸੇਨ ਸਰੀਰਸ੍ਸ ਤਪ੍ਪਨੇਨ ਸੁਦ੍ਧਿ ਸਿਯਾ’’ਤਿ ਮਨ੍ਤ੍ਵਾ ਇਮਂ ਕਾਯਂ ਅਨੁਗ੍ਗਣ੍ਹਨ੍ਤੀ ਵਿਭੂਸਾਯਂ ਮਣ੍ਡਨੇ ਚ ਰਤਾ ਵਤ੍ਥਾਲਙ੍ਕਾਰੇਹਿ ਅਲਙ੍ਕਰਣੇ ਗਨ੍ਧਮਾਲਾਦੀਹਿ ਮਣ੍ਡਨੇ ਚ ਅਭਿਰਤਾ. ਨ੍ਹਾਪਨੁਚ੍ਛਾਦਨੇਹਿ ਚਾਤਿ ਸਮ੍ਬਾਹਨਾਦੀਨਿ ਕਾਰੇਤ੍ਵਾ ਨ੍ਹਾਪਨੇਨ ਉਚ੍ਛਾਦਨੇਨ ਚ. ਉਪਕਾਸਿਂ ਇਮਂ ਕਾਯਨ੍ਤਿ ਇਮਂ ਮਮ ਕਾਯਂ ਅਨੁਗ੍ਗਣ੍ਹਿਂ ਸਨ੍ਤਪ੍ਪੇਸਿਂ. ਕਾਮਰਾਗੇਨ ਅਟ੍ਟਿਤਾਤਿ ਏਵਂ ਕਾਯਦਲ਼੍ਹੀਬਹੁਲਾ ਹੁਤ੍ਵਾ ਅਯੋਨਿਸੋਮਨਸਿਕਾਰਪਚ੍ਚਯਾ ਪਰਿਯੁਟ੍ਠਿਤੇਨ ਕਾਮਰਾਗੇਨ ਅਟ੍ਟਿਤਾ ਅਭਿਣ੍ਹਂ ਉਪਦ੍ਦੁਤਾ ਅਹੋਸਿਂ.

ਤਤੋ ਸਦ੍ਧਂ ਲਭਿਤ੍ਵਾਨਾਤਿ ਏਵਂ ਸਮਾਦਿਨ੍ਨਵਤਾਨਿ ਭਿਨ੍ਦਿਤ੍ਵਾ ਕਾਯਦਲ਼੍ਹੀਬਹੁਲਾ ਵਾਦਪ੍ਪਸੁਤਾ ਹੁਤ੍ਵਾ ਤਤ੍ਥ ਤਤ੍ਥ ਵਿਚਰਨ੍ਤੀ ਤਤੋ ਪਚ੍ਛਾ ਅਪਰਭਾਗੇ ਮਹਾਮੋਗ੍ਗਲ੍ਲਾਨਤ੍ਥੇਰਸ੍ਸ ਸਨ੍ਤਿਕੇ ਲਦ੍ਧੋਵਾਦਾਨੁਸਾਸਨਾ ਸਦ੍ਧਂ ਪਟਿਲਭਿਤ੍ਵਾ. ਦਿਸ੍ਵਾ ਕਾਯਂ ਯਥਾਭੂਤਨ੍ਤਿ ਸਹ ਵਿਪਸ੍ਸਨਾਯ ਮਗ੍ਗਪਞ੍ਞਾਯ ਇਮਂ ਮਮ ਕਾਯਂ ਯਥਾਭੂਤਂ ਦਿਸ੍ਵਾ ਅਨਾਗਾਮਿਮਗ੍ਗੇਨ ਸਬ੍ਬਸੋ ਕਾਮਰਾਗੋ ਸਮੂਹਤੋ. ਤਤੋ ਪਰਂ ਅਗ੍ਗਮਗ੍ਗੇਨ ਸਬ੍ਬੇ ਭਵਾ ਸਮੁਚ੍ਛਿਨ੍ਨਾ, ਇਚ੍ਛਾ ਚ ਪਤ੍ਥਨਾਪਿ ਚਾਤਿ ਪਚ੍ਚੁਪ੍ਪਨ੍ਨਵਿਸਯਾਭਿਲਾਸਸਙ੍ਖਾਤਾ ਇਚ੍ਛਾ ਚ ਆਯਤਿਭਵਾਭਿਲਾਸਸਙ੍ਖਾਤਾ ਪਤ੍ਥਨਾਪਿ ਸਬ੍ਬੇ ਭਵਾਪਿ ਸਮੁਚ੍ਛਿਨ੍ਨਾਤਿ ਯੋਜਨਾ. ਸਨ੍ਤਿਂ ਪਾਪੁਣਿ ਚੇਤਸੋਤਿ ਅਚ੍ਚਨ੍ਤਂ ਸਨ੍ਤਿਂ ਅਰਹਤ੍ਤਫਲਂ ਪਾਪੁਣਿਂ ਅਧਿਗਚ੍ਛਿਨ੍ਤਿ ਅਤ੍ਥੋ.

ਨਨ੍ਦੁਤ੍ਤਰਾਥੇਰੀਗਾਥਾਵਣ੍ਣਨਾ ਨਿਟ੍ਠਿਤਾ.