੧੫. ਚਤ੍ਤਾਲੀਸਨਿਪਾਤੋ

੧. ਇਸਿਦਾਸੀਥੇਰੀਗਾਥਾਵਣ੍ਣਨਾ

ਚਤ੍ਤਾਲੀਸਨਿਪਾਤੇ ਨਗਰਮ੍ਹਿ ਕੁਸੁਮਨਾਮੇਤਿਆਦਿਕਾ ਇਸਿਦਾਸਿਯਾ ਥੇਰਿਯਾ ਗਾਥਾ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰਾ ਤਤ੍ਥ ਤਤ੍ਥ ਭਵੇ ਪੁਰਿਸਤ੍ਤਭਾਵੇ ਠਤ੍ਵਾ ਵਿਵਟ੍ਟੂਪਨਿਸ੍ਸਯਂ ਕੁਸਲਂ ਉਪਚਿਨਨ੍ਤੀ ਚਰਿਮਭਵਤੋ ਸਤ੍ਤਮੇ ਭਵੇ ਅਕਲ੍ਯਾਣਸਨ੍ਨਿਸ੍ਸਯੇਨ ਪਰਦਾਰਿਕਕਮ੍ਮਂ ਕਤ੍ਵਾ, ਕਾਯਸ੍ਸ ਭੇਦਾ ਨਿਰਯੇ ਨਿਬ੍ਬਤ੍ਤਿਤ੍ਵਾ ਤਤ੍ਥ ਬਹੂਨਿ ਵਸ੍ਸਸਤਾਨਿ ਨਿਰਯੇ ਪਚ੍ਚਿਤ੍ਵਾ, ਤਤੋ ਚੁਤਾ ਤੀਸੁ ਜਾਤੀਸੁ ਤਿਰਚ੍ਛਾਨਯੋਨਿਯਂ ਨਿਬ੍ਬਤ੍ਤਿਤ੍ਵਾ ਤਤੋ ਚੁਤਾ ਦਾਸਿਯਾ ਕੁਚ੍ਛਿਸ੍ਮਿਂ ਨਪੁਂਸਕੋ ਹੁਤ੍ਵਾ ਨਿਬ੍ਬਤ੍ਤਿ. ਤਤੋ ਪਨ ਚੁਤਾ ਏਕਸ੍ਸ ਦਲਿਦ੍ਦਸ੍ਸ ਸਾਕਟਿਕਸ੍ਸ ਧੀਤਾ ਹੁਤ੍ਵਾ ਨਿਬ੍ਬਤ੍ਤਿ. ਤਂ ਵਯਪ੍ਪਤ੍ਤਂ ਗਿਰਿਦਾਸੋ ਨਾਮ ਅਞ੍ਞਤਰਸ੍ਸ ਸਤ੍ਥਵਾਹਸ੍ਸ ਪੁਤ੍ਤੋ ਅਤ੍ਤਨੋ ਭਰਿਯਂ ਕਤ੍ਵਾ ਗੇਹਂ ਆਨੇਸਿ. ਤਸ੍ਸ ਚ ਭਰਿਯਾ ਅਤ੍ਥਿ ਸੀਲਵਤੀ ਕਲ੍ਯਾਣਧਮ੍ਮਾ. ਤਸ੍ਸਂ ਇਸ੍ਸਾਪਕਤਾ ਸਾਮਿਨੋ ਤਸ੍ਸਾ ਵਿਦ੍ਦੇਸਨਕਮ੍ਮਂ ਅਕਾਸਿ. ਸਾ ਤਤ੍ਥ ਯਾਵਜੀਵਂ ਠਤ੍ਵਾ ਕਾਯਸ੍ਸ ਭੇਦਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਉਜ੍ਜੇਨਿਯਂ ਕੁਲਪਦੇਸਸੀਲਾਚਾਰਾਦਿਗੁਣੇਹਿ ਅਭਿਸਮ੍ਮਤਸ੍ਸ ਵਿਭਵਸਮ੍ਪਨ੍ਨਸ੍ਸ ਸੇਟ੍ਠਿਸ੍ਸ ਧੀਤਾ ਹੁਤ੍ਵਾ ਨਿਬ੍ਬਤ੍ਤਿ, ਇਸਿਦਾਸੀਤਿਸ੍ਸਾ ਨਾਮਂ ਅਹੋਸਿ.

ਤਂ ਵਯਪ੍ਪਤ੍ਤਕਾਲੇ ਮਾਤਾਪਿਤਰੋ ਕੁਲਰੂਪਵਯਵਿਭਵਾਦਿਸਦਿਸਸ੍ਸ ਅਞ੍ਞਤਰਸ੍ਸ ਸੇਟ੍ਠਿਪੁਤ੍ਤਸ੍ਸ ਅਦਂਸੁ. ਸਾ ਤਸ੍ਸ ਗੇਹੇ ਪਤਿਦੇਵਤਾ ਹੁਤ੍ਵਾ ਮਾਸਮਤ੍ਤਂ ਵਸਿ. ਅਥਸ੍ਸਾ ਕਮ੍ਮਬਲੇਨ ਸਾਮਿਕੋ ਵਿਰਤ੍ਤਰੂਪੋ ਹੁਤ੍ਵਾ ਤਂ ਘਰਤੋ ਨੀਹਰਿ. ਤਂ ਸਬ੍ਬਂ ਪਾਲ਼ਿਤੋ ਏਵ ਵਿਞ੍ਞਾਯਤਿ. ਤੇਸਂ ਤੇਸਂ ਪਨ ਸਾਮਿਕਾਨਂ ਅਰੁਚ੍ਚਨੇਯ੍ਯਤਾਯ ਸਂਵੇਗਜਾਤਾ ਪਿਤਰਂ ਅਨੁਜਾਨਾਪੇਤ੍ਵਾ, ਜਿਨਦਤ੍ਤਾਯ ਥੇਰਿਯਾ ਸਨ੍ਤਿਕੇ ਪਬ੍ਬਜਿਤ੍ਵਾ ਵਿਪਸ੍ਸਨਾਯ ਕਮ੍ਮਂ ਕਰੋਨ੍ਤੀ ਨਚਿਰਸ੍ਸੇਵ ਸਹ ਪਟਿਸਮ੍ਭਿਦਾਹਿ ਅਰਹਤ੍ਤਂ ਪਤ੍ਵਾ, ਫਲਸੁਖੇਨ ਨਿਬ੍ਬਾਨਸੁਖੇਨ ਚ ਵੀਤਿਨਾਮੇਨ੍ਤੀ ਏਕਦਿਵਸਂ ਪਾਟਲਿਪੁਤ੍ਤਨਗਰੇ ਪਿਣ੍ਡਾਯ ਚਰਿਤ੍ਵਾ ਪਚ੍ਛਾਭਤ੍ਤਂ ਪਿਣ੍ਡਪਾਤਪਟਿਕ੍ਕਨ੍ਤਾ ਮਹਾਗਙ੍ਗਾਯਂ ਵਾਲੁਕਪੁਲਿਨੇ ਨਿਸੀਦਿਤ੍ਵਾ ਬੋਧਿਤ੍ਥੇਰਿਯਾ ਨਾਮ ਅਤ੍ਤਨੋ ਸਹਾਯਤ੍ਥੇਰਿਯਾ ਪੁਬ੍ਬਪਟਿਪਤ੍ਤਿਂ ਪੁਚ੍ਛਿਤਾ ਤਮਤ੍ਥਂ ਗਾਥਾਬਨ੍ਧਵਸੇਨ ਵਿਸ੍ਸਜ੍ਜੇਸਿ ‘‘ਉਜ੍ਜੇਨਿਯਾ ਪੁਰਵਰੇ’’ਤਿਆਦਿਨਾ. ਤੇਸਂ ਪਨ ਪੁਚ੍ਛਾਵਿਸ੍ਸਜ੍ਜਨਾਨਂ ਸਮ੍ਬਨ੍ਧਂ ਦਸ੍ਸੇਤੁਂ –

੪੦੨. ‘‘ਨਗਰਮ੍ਹਿ ਕੁਸੁਮਨਾਮੇ, ਪਾਟਲਿਪੁਤ੍ਤਮ੍ਹਿ ਪਥਵਿਯਾ ਮਣ੍ਡੇ;

ਸਕ੍ਯਕੁਲਕੁਲੀਨਾਯੋ, ਦ੍ਵੇ ਭਿਕ੍ਖੁਨਿਯੋ ਹਿ ਗੁਣਵਤਿਯੋ.

੪੦੩. ‘‘ਇਸਿਦਾਸੀ ਤਤ੍ਥ ਏਕਾ, ਦੁਤਿਯਾ ਬੋਧੀਤਿ ਸੀਲਸਮ੍ਪਨ੍ਨਾ ਚ;

ਝਾਨਜ੍ਝਾਯਨਰਤਾਯੋ, ਬਹੁਸ੍ਸੁਤਾਯੋ ਧੁਤਕਿਲੇਸਾਯੋ.

੪੦੪. ‘‘ਤਾ ਪਿਣ੍ਡਾਯ ਚਰਿਤ੍ਵਾ, ਭਤ੍ਤਤ੍ਥਂ ਕਰਿਯ ਧੋਤਪਤ੍ਤਾਯੋ;

ਰਹਿਤਮ੍ਹਿ ਸੁਖਨਿਸਿਨ੍ਨਾ, ਇਮਾ ਗਿਰਾ ਅਬ੍ਭੁਦੀਰੇਸੁ’’ਨ੍ਤਿ. –

ਇਮਾ ਤਿਸ੍ਸੋ ਗਾਥਾ ਸਙ੍ਗੀਤਿਕਾਰੇਹਿ ਠਪਿਤਾ.

੪੦੫. ‘‘ਪਾਸਾਦਿਕਾਸਿ ਅਯ੍ਯੇ, ਇਸਿਦਾਸਿ ਵਯੋਪਿ ਤੇ ਅਪਰਿਹੀਨੋ;

ਕਿਂ ਦਿਸ੍ਵਾਨ ਬ੍ਯਾਲਿਕਂ, ਅਥਾਸਿ ਨੇਕ੍ਖਮ੍ਮਮਨੁਯੁਤ੍ਤਾ.

੪੦੬. ‘‘ਏਵਮਨੁਯੁਞ੍ਜਿਯਮਾਨਾ ਸਾ, ਰਹਿਤੇ ਧਮ੍ਮਦੇਸਨਾਕੁਸਲਾ;

ਇਸਿਦਾਸੀ ਵਚਨਮਬ੍ਰਵਿ, ਸੁਣ ਬੋਧਿ ਯਥਾਮ੍ਹਿ ਪਬ੍ਬਜਿਤਾ.

ਇਤੋ ਪਰਂ ਵਿਸ੍ਸਜ੍ਜਨਗਾਥਾ.

੪੦੭. ‘‘ਉਜ੍ਜੇਨਿਯਾ ਪੁਰਵਰੇ, ਮਯ੍ਹਂ ਪਿਤਾ ਸੀਲਸਂਵੁਤੋ ਸੇਟ੍ਠਿ;

ਤਸ੍ਸਮ੍ਹਿ ਏਕਧੀਤਾ, ਪਿਯਾ ਮਨਾਪਾ ਚ ਦਯਿਤਾ ਚ.

੪੦੮. ‘‘ਅਥ ਮੇ ਸਾਕੇਤਤੋ ਵਰਕਾ, ਆਗਚ੍ਛੁਮੁਤ੍ਤਮਕੁਲੀਨਾ;

ਸੇਟ੍ਠੀ ਪਹੂਤਰਤਨੋ, ਤਸ੍ਸ ਮਮਂ ਸੁਣੁਮਦਾਸਿ ਤਾਤੋ.

੪੦੯. ‘‘ਸਸ੍ਸੁਯਾ ਸਸੁਰਸ੍ਸ ਚ, ਸਾਯਂ ਪਾਤਂ ਪਣਾਮਮੁਪਗਮ੍ਮ;

ਸਿਰਸਾ ਕਰੋਮਿ ਪਾਦੇ, ਵਨ੍ਦਾਮਿ ਯਥਾਮ੍ਹਿ ਅਨੁਸਿਟ੍ਠਾ.

੪੧੦. ‘‘ਯਾ ਮਯ੍ਹਂ ਸਾਮਿਕਸ੍ਸ, ਭਗਿਨਿਯੋ ਭਾਤੁਨੋ ਪਰਿਜਨੋ ਵਾ;

ਤਮੇਕਵਰਕਮ੍ਪਿ ਦਿਸ੍ਵਾ, ਉਬ੍ਬਿਗ੍ਗਾ ਆਸਨਂ ਦੇਮਿ.

੪੧੧. ‘‘ਅਨ੍ਨੇਨ ਚ ਪਾਨੇਨ ਚ, ਖਜ੍ਜੇਨ ਚ ਯਞ੍ਚ ਤਤ੍ਥ ਸਨ੍ਨਿਹਿਤਂ;

ਛਾਦੇਮਿ ਉਪਨਯਾਮਿ ਚ, ਦੇਮਿ ਚ ਯਂ ਯਸ੍ਸ ਪਤਿਰੂਪਂ.

੪੧੨. ‘‘ਕਾਲੇਨ ਉਪਟ੍ਠਹਿਤ੍ਵਾ, ਘਰਂ ਸਮੁਪਗਮਾਮਿ ਉਮ੍ਮਾਰੇ;

ਧੋਵਨ੍ਤੀ ਹਤ੍ਥਪਾਦੇ, ਪਞ੍ਜਲਿਕਾ ਸਾਮਿਕਮੁਪੇਮਿ.

੪੧੩. ‘‘ਕੋਚ੍ਛਂ ਪਸਾਦਂ ਅਞ੍ਜਨਿਞ੍ਚ, ਆਦਾਸਕਞ੍ਚ ਗਣ੍ਹਿਤ੍ਵਾ;

ਪਰਿਕਮ੍ਮਕਾਰਿਕਾ ਵਿਯ, ਸਯਮੇਵ ਪਤਿਂ ਵਿਭੂਸੇਮਿ.

੪੧੪. ‘‘ਸਯਮੇਵ ਓਦਨਂ ਸਾਧਯਾਮਿ, ਸਯਮੇਵ ਭਾਜਨਂ ਧੋਵਨ੍ਤੀ;

ਮਾਤਾਵ ਏਕਪੁਤ੍ਤਕਂ, ਤਥਾ ਭਤ੍ਤਾਰਂ ਪਰਿਚਰਾਮਿ.

੪੧੫. ‘‘ਏਵਂ ਮਂ ਭਤ੍ਤਿਕਤਂ, ਅਨੁਰਤ੍ਤਂ ਕਾਰਿਕਂ ਨਿਹਤਮਾਨਂ;

ਉਟ੍ਠਾਯਿਕਂ ਅਨਲਸਂ, ਸੀਲਵਤਿਂ ਦੁਸ੍ਸਤੇ ਭਤ੍ਤਾ.

੪੧੬. ‘‘ਸੋ ਮਾਤਰਞ੍ਚ ਪਿਤਰਞ੍ਚ, ਭਣਤਿ ਆਪੁਚ੍ਛਹਂ ਗਮਿਸ੍ਸਾਮਿ;

ਇਸਿਦਾਸਿਯਾ ਨ ਸਹ ਵਚ੍ਛਂ, ਏਕਾਗਾਰੇਹਂ ਸਹ ਵਤ੍ਥੁਂ.

੪੧੭. ‘‘ਮਾ ਏਵਂ ਪੁਤ੍ਤ ਅਵਚ, ਇਸਿਦਾਸੀ ਪਣ੍ਡਿਤਾ ਪਰਿਬ੍ਯਤ੍ਤਾ;

ਉਟ੍ਠਾਯਿਕਾ ਅਨਲਸਾ, ਕਿਂ ਤੁਯ੍ਹਂ ਨ ਰੋਚਤੇ ਪੁਤ੍ਤ.

੪੧੮. ‘‘ਨ ਚ ਮੇ ਹਿਂਸਤਿ ਕਿਞ੍ਚਿ, ਨ ਚਹਂ ਇਸਿਦਾਸਿਯਾ ਸਹ ਵਚ੍ਛਂ;

ਦੇਸ੍ਸਾਵ ਮੇ ਅਲਂ ਮੇ, ਅਪੁਚ੍ਛਾਹਂ ਗਮਿਸ੍ਸਾਮਿ.

੪੧੯. ‘‘ਤਸ੍ਸ ਵਚਨਂ ਸੁਣਿਤ੍ਵਾ, ਸਸ੍ਸੁ ਸਸੁਰੋ ਚ ਮਂ ਅਪੁਚ੍ਛਿਂਸੁ;

ਕਿਸ੍ਸ ਤਯਾ ਅਪਰਦ੍ਧਂ, ਭਣ ਵਿਸ੍ਸਟ੍ਠਾ ਯਥਾਭੂਤਂ.

੪੨੦. ‘‘ਨਪਿਹਂ ਅਪਰਜ੍ਝਂ ਕਿਞ੍ਚਿ, ਨਪਿ ਹਿਂਸੇਮਿ ਨ ਭਣਾਮਿ ਦੁਬ੍ਬਚਨਂ;

ਕਿਂ ਸਕ੍ਕਾ ਕਾਤੁਯ੍ਯੇ, ਯਂ ਮਂ ਵਿਦ੍ਦੇਸ੍ਸਤੇ ਭਤ੍ਤਾ.

੪੨੧. ‘‘ਤੇ ਮਂ ਪਿਤੁਘਰਂ ਪਟਿਨਯਿਂਸੁ, ਵਿਮਨਾ ਦੁਖੇਨ ਅਧਿਭੂਤਾ;

ਪੁਤ੍ਤਮਨੁਰਕ੍ਖਮਾਨਾ, ਜਿਤਾਮ੍ਹਸੇ ਰੂਪਿਨਿਂ ਲਕ੍ਖਿਂ.

੪੨੨. ‘‘ਅਥ ਮਂ ਅਦਾਸਿ ਤਾਤੋ, ਅਡ੍ਢਸ੍ਸ ਘਰਮ੍ਹਿ ਦੁਤਿਯਕੁਲਿਕਸ੍ਸ;

ਤਤੋ ਉਪਡ੍ਢਸੁਙ੍ਕੇਨ, ਯੇਨ ਮਂ ਵਿਨ੍ਦਥ ਸੇਟ੍ਠਿ.

੪੨੩. ‘‘ਤਸ੍ਸਪਿ ਘਰਮ੍ਹਿ ਮਾਸਂ, ਅਵਸਿਂ ਅਥ ਸੋਪਿ ਮਂ ਪਟਿਚ੍ਛਰਯਿ;

ਦਾਸੀਵ ਉਪਟ੍ਠਹਨ੍ਤਿਂ, ਅਦੂਸਿਕਂ ਸੀਲਸਮ੍ਪਨ੍ਨਂ.

੪੨੪. ‘‘ਭਿਕ੍ਖਾਯ ਚ ਵਿਚਰਨ੍ਤਂ, ਦਮਕਂ ਦਨ੍ਤਂ ਮੇ ਪਿਤਾ ਭਣਤਿ;

ਹੋਹਿਸਿ ਮੇ ਜਾਮਾਤਾ, ਨਿਕ੍ਖਿਪ ਪੋਟ੍ਠਿਞ੍ਚ ਘਟਿਕਞ੍ਚ.

੪੨੫. ‘‘ਸੋਪਿ ਵਸਿਤ੍ਵਾ ਪਕ੍ਖਂ, ਅਥ ਤਾਤਂ ਭਣਤਿ ‘ਦੇਹਿ ਮੇ ਪੋਟ੍ਠਿਂ;

ਘਟਿਕਞ੍ਚ ਮਲ੍ਲਕਞ੍ਚ, ਪੁਨਪਿ ਭਿਕ੍ਖਂ ਚਰਿਸ੍ਸਾਮਿ’.

੪੨੬. ‘‘ਅਥ ਨਂ ਭਣਤੀ ਤਾਤੋ, ਅਮ੍ਮਾ ਸਬ੍ਬੋ ਚ ਮੇ ਞਾਤਿਗਣਵਗ੍ਗੋ;

ਕਿਂ ਤੇ ਨ ਕੀਰਤਿ ਇਧ, ਭਣ ਖਿਪ੍ਪਂ ਤਂ ਤੇ ਕਰਿਹਿਤਿ.

੪੨੭. ‘‘ਏਵਂ ਭਣਿਤੋ ਭਣਤਿ, ਯਦਿ ਮੇ ਅਤ੍ਤਾ ਸਕ੍ਕੋਤਿ ਅਲਂ ਮਯ੍ਹਂ;

ਇਸਿਦਾਸਿਯਾ ਨ ਸਹ ਵਚ੍ਛਂ, ਏਕਘਰੇਹਂ ਸਹ ਵਤ੍ਥੁਂ.

੪੨੮. ‘‘ਵਿਸ੍ਸਜ੍ਜਿਤੋ ਗਤੋ ਸੋ, ਅਹਮ੍ਪਿ ਏਕਾਕਿਨੀ ਵਿਚਿਨ੍ਤੇਮਿ;

ਆਪੁਚ੍ਛਿਤੂਨ ਗਚ੍ਛਂ, ਮਰਿਤੁਯੇ ਵਾ ਪਬ੍ਬਜਿਸ੍ਸਂ ਵਾ.

੪੨੯. ‘‘ਅਥ ਅਯ੍ਯਾ ਜਿਨਦਤ੍ਤਾ, ਆਗਚ੍ਛੀ ਗੋਚਰਾਯ ਚਰਮਾਨਾ;

ਤਾਤ ਕੁਲਂ ਵਿਨਯਧਰੀ, ਬਹੁਸ੍ਸੁਤਾ ਸੀਲਸਮ੍ਪਨ੍ਨਾ.

੪੩੦. ‘‘ਤਂ ਦਿਸ੍ਵਾਨ ਅਮ੍ਹਾਕਂ, ਉਟ੍ਠਾਯਾਸਨਂ ਤਸ੍ਸਾ ਪਞ੍ਞਾਪਯਿਂ;

ਨਿਸਿਨ੍ਨਾਯ ਚ ਪਾਦੇ, ਵਨ੍ਦਿਤ੍ਵਾ ਭੋਜਨਮਦਾਸਿਂ.

੪੩੧. ‘‘ਅਨ੍ਨੇਨ ਚ ਪਾਨੇਨ ਚ, ਖਜ੍ਜੇਨ ਚ ਯਞ੍ਚ ਤਤ੍ਥ ਸਨ੍ਨਿਹਿਤਂ;

ਸਨ੍ਤਪ੍ਪਯਿਤ੍ਵਾ ਅਵਚਂ, ਅਯ੍ਯੇ ਇਚ੍ਛਾਮਿ ਪਬ੍ਬਜਿਤੁਂ.

੪੩੨. ‘‘ਅਥ ਮਂ ਭਣਤੀ ਤਾਤੋ, ਇਧੇਵ ਪੁਤ੍ਤਕ ਚਰਾਹਿ ਤ੍ਵਂ ਧਮ੍ਮਂ;

ਅਨ੍ਨੇਨ ਚ ਪਾਨੇਨ ਚ, ਤਪ੍ਪਯ ਸਮਣੇ ਦ੍ਵਿਜਾਤੀ ਚ.

੪੩੩. ‘‘ਅਥਹਂ ਭਣਾਮਿ ਤਾਤਂ, ਰੋਦਨ੍ਤੀ ਅਞ੍ਜਲਿਂ ਪਣਾਮੇਤ੍ਵਾ;

ਪਾਪਞ੍ਹਿ ਮਯਾ ਪਕਤਂ, ਕਮ੍ਮਂ ਤਂ ਨਿਜ੍ਜਰੇਸ੍ਸਾਮਿ.

੪੩੪. ‘‘ਅਥ ਮਂ ਭਣਤੀ ਤਾਤੋ, ਪਾਪੁਣ ਬੋਧਿਞ੍ਚ ਅਗ੍ਗਧਮ੍ਮਞ੍ਚ;

ਨਿਬ੍ਬਾਨਞ੍ਚ ਲਭਸ੍ਸੁ, ਯਂ ਸਚ੍ਛਿਕਰੀ ਦ੍ਵਿਪਦਸੇਟ੍ਠੋ.

੪੩੫. ‘‘ਮਾਤਾਪਿਤੂ ਅਭਿਵਾਦ, ਯਿਤ੍ਵਾ ਸਬ੍ਬਞ੍ਚ ਞਾਤਿਗਣਵਗ੍ਗਂ;

ਸਤ੍ਤਾਹਂ ਪਬ੍ਬਜਿਤਾ, ਤਿਸ੍ਸੋ ਵਿਜ੍ਜਾ ਅਫਸ੍ਸਯਿਂ.

੪੩੬. ‘‘ਜਾਨਾਮਿ ਅਤ੍ਤਨੋ ਸਤ੍ਤ, ਜਾਤਿਯੋ ਯਸ੍ਸਯਂ ਫਲਵਿਪਾਕੋ;

ਤਂ ਤਵ ਆਚਿਕ੍ਖਿਸ੍ਸਂ, ਤਂ ਏਕਮਨਾ ਨਿਸਾਮੇਹਿ.

੪੩੭. ‘‘ਨਗਰਮ੍ਹਿ ਏਰਕਚ੍ਛੇ, ਸੁਵਣ੍ਣਕਾਰੋ ਅਹਂ ਪਹੂਤਧਨੋ;

ਯੋਬ੍ਬਨਮਦੇਨ ਮਤ੍ਤੋ, ਸੋ ਪਰਦਾਰਂ ਅਸੇਵਿਹਂ.

੪੩੮. ‘‘ਸੋਹਂ ਤਤੋ ਚਵਿਤ੍ਵਾ, ਨਿਰਯਮ੍ਹਿ ਅਪਚ੍ਚਿਸਂ ਚਿਰਂ;

ਪਕ੍ਕੋ ਤਤੋ ਚ ਉਟ੍ਠਹਿਤ੍ਵਾ, ਮਕ੍ਕਟਿਯਾ ਕੁਚ੍ਛਿਮੋਕ੍ਕਮਿਂ.

੪੩੯. ‘‘ਸਤ੍ਤਾਹਜਾਤਕਂ ਮਂ, ਮਹਾਕਪਿ ਯੂਥਪੋ ਨਿਲ੍ਲਚ੍ਛੇਸਿ;

ਤਸ੍ਸੇਤਂ ਕਮ੍ਮਫਲਂ, ਯਥਾਪਿ ਗਨ੍ਤ੍ਵਾਨ ਪਰਦਾਰਂ.

੪੪੦. ‘‘ਸੋਹਂ ਤਤੋ ਚਵਿਤ੍ਵਾ, ਕਾਲਂ ਕਰਿਤ੍ਵਾ ਸਿਨ੍ਧਵਾਰਞ੍ਞੇ;

ਕਾਣਾਯ ਚ ਖਞ੍ਜਾਯ ਚ, ਏਲ਼ਕਿਯਾ ਕੁਚ੍ਛਿਮੋਕ੍ਕਮਿਂ.

੪੪੧. ‘‘ਦ੍ਵਾਦਸ ਵਸ੍ਸਾਨਿ ਅਹਂ, ਨਿਲ੍ਲਚ੍ਛਿਤੋ ਦਾਰਕੇ ਪਰਿਵਹਿਤ੍ਵਾ;

ਕਿਮਿਨਾਵਟ੍ਟੋ ਅਕਲ੍ਲੋ, ਯਥਾਪਿ ਗਨ੍ਤ੍ਵਾਨ ਪਰਦਾਰਂ.

੪੪੨. ‘‘ਸੋਹਂ ਤਤੋ ਚਵਿਤ੍ਵਾ, ਗੋਵਾਣਿਜਕਸ੍ਸ ਗਾਵਿਯਾ ਜਾਤੋ;

ਵਚ੍ਛੋ ਲਾਖਾਤਮ੍ਬੋ, ਨਿਲ੍ਲਚ੍ਛਿਤੋ ਦ੍ਵਾਦਸੇ ਮਾਸੇ.

੪੪੩. ‘‘ਵੋਢੂਨ ਨਙ੍ਗਲਮਹਂ, ਸਕਟਞ੍ਚ ਧਾਰਯਾਮਿ;

ਅਨ੍ਧੋਵਟ੍ਟੋ ਅਕਲ੍ਲੋ, ਯਥਾਪਿ ਗਨ੍ਤ੍ਵਾਨ ਪਰਦਾਰਂ.

੪੪੪. ‘‘ਸੋਹਂ ਤਤੋ ਚਵਿਤ੍ਵਾ, ਵੀਥਿਯਾ ਦਾਸਿਯਾ ਘਰੇ ਜਾਤੋ;

ਨੇਵ ਮਹਿਲਾ ਨ ਪੁਰਿਸੋ, ਯਥਾਪਿ ਗਨ੍ਤ੍ਵਾਨ ਪਰਦਾਰਂ.

੪੪੫. ‘‘ਤਿਂਸਤਿਵਸ੍ਸਮ੍ਹਿ ਮਤੋ, ਸਾਕਟਿਕਕੁਲਮ੍ਹਿ ਦਾਰਿਕਾ ਜਾਤਾ;

ਕਪਣਮ੍ਹਿ ਅਪ੍ਪਭੋਗੇ, ਧਨਿਕਪੁਰਿਸਪਾਤਬਹੁਲਮ੍ਹਿ.

੪੪੬. ‘‘ਤਂ ਮਂ ਤਤੋ ਸਤ੍ਥਵਾਹੋ, ਉਸ੍ਸਨ੍ਨਾਯ ਵਿਪੁਲਾਯ ਵਡ੍ਢਿਯਾ;

ਓਕਡ੍ਢਤਿ ਵਿਲਪਨ੍ਤਿਂ, ਅਚ੍ਛਿਨ੍ਦਿਤ੍ਵਾ ਕੁਲਘਰਸ੍ਮਾ.

੪੪੭. ‘‘ਅਥ ਸੋਲ਼ਸਮੇ ਵਸ੍ਸੇ, ਦਿਸ੍ਵਾ ਮਂ ਪਤ੍ਤਯੋਬ੍ਬਨਂ ਕਞ੍ਞਂ;

ਓਰੁਨ੍ਧਤਸ੍ਸ ਪੁਤ੍ਤੋ, ਗਿਰਿਦਾਸੋ ਨਾਮ ਨਾਮੇਨ.

੪੪੮. ‘‘ਤਸ੍ਸਪਿ ਅਞ੍ਞਾ ਭਰਿਯਾ, ਸੀਲਵਤੀ ਗੁਣਵਤੀ ਯਸਵਤੀ ਚ;

ਅਨੁਰਤ੍ਤਾ ਭਤ੍ਤਾਰਂ, ਤਸ੍ਸਾਹਂ ਵਿਦ੍ਦੇਸਨਮਕਾਸਿਂ.

੪੪੯. ‘‘ਤਸ੍ਸੇਤਂ ਕਮ੍ਮਫਲਂ, ਯਂ ਮਂ ਅਪਕੀਰਿਤੂਨ ਗਚ੍ਛਨ੍ਤਿ;

ਦਾਸੀਵ ਉਪਟ੍ਠਹਨ੍ਤਿਂ, ਤਸ੍ਸਪਿ ਅਨ੍ਤੋ ਕਤੋ ਮਯਾ’’ਤਿ.

ਤਤ੍ਥ ਨਗਰਮ੍ਹਿ ਕੁਸੁਮਨਾਮੇਤਿ ‘‘ਕੁਸੁਮਪੁਰ’’ਨ੍ਤਿ ਏਵਂ ਕੁਸੁਮਸਦ੍ਦੇਨ ਗਹਿਤਨਾਮਕੇ ਨਗਰੇ, ਇਦਾਨਿ ਤਂ ਨਗਰਂ ਪਾਟਲਿਪੁਤ੍ਤਮ੍ਹੀਤਿ ਸਰੂਪਤੋ ਦਸ੍ਸੇਤਿ. ਪਥਵਿਯਾ ਮਣ੍ਡੇਤਿ ਸਕਲਾਯ ਪਥਵਿਯਾ ਮਣ੍ਡਭੂਤੇ. ਸਕ੍ਯਕੁਲਕੁਲੀਨਾਯੋਤਿ ਸਕ੍ਯਕੁਲੇ ਕੁਲਧੀਤਰੋ, ਸਕ੍ਯਪੁਤ੍ਤਸ੍ਸ ਭਗਵਤੋ ਸਾਸਨੇ ਪਬ੍ਬਜਿਤਤਾਯ ਏਵਂ ਵੁਤ੍ਤਂ.

ਤਤ੍ਥਾਤਿ ਤਾਸੁ ਦ੍ਵੀਸੁ ਭਿਕ੍ਖੁਨੀਸੁ. ਬੋਧੀਤਿ ਏਵਂਨਾਮਿਕਾ ਥੇਰੀ. ਝਾਨਜ੍ਝਾਯਨਰਤਾਯੋਤਿ ਲੋਕਿਯਲੋਕੁਤ੍ਤਰਸ੍ਸ ਝਾਨਸ੍ਸ ਝਾਯਨੇ ਅਭਿਰਤਾ. ਬਹੁਸ੍ਸੁਤਾਯੋਤਿ ਪਰਿਯਤ੍ਤਿਬਾਹੁਸਚ੍ਚੇਨ ਬਹੁਸ੍ਸੁਤਾ. ਧੁਤਕਿਲੇਸਾਯੋਤਿ ਅਗ੍ਗਮਗ੍ਗੇਨ ਸਬ੍ਬਸੋ ਸਮੁਗ੍ਘਾਤਿਤਕਿਲੇਸਾ. ਭਤ੍ਤਤ੍ਥਂ ਕਰਿਯਾਤਿ ਭਤ੍ਤਕਿਚ੍ਚਂ ਨਿਟ੍ਠਾਪੇਤ੍ਵਾ. ਰਹਿਤਮ੍ਹੀਤਿ ਜਨਰਹਿਤਮ੍ਹਿ ਵਿਵਿਤ੍ਤਟ੍ਠਾਨੇ. ਸੁਖਨਿਸਿਨ੍ਨਾਤਿ ਪਬ੍ਬਜ੍ਜਾਸੁਖੇਨ ਵਿਵੇਕਸੁਖੇਨ ਚ ਸੁਖਨਿਸਿਨ੍ਨਾ. ਇਮਾ ਗਿਰਾਤਿ ਇਦਾਨਿ ਵੁਚ੍ਚਮਾਨਾ ਸੁਖਾ ਲਾਪਨਾ. ਅਬ੍ਭੁਦੀਰੇਸੁਨ੍ਤਿ ਪੁਚ੍ਛਾਵਿਸ੍ਸਜ੍ਜਨਵਸੇਨ ਕਥਯਿਂਸੁ.

‘‘ਪਾਸਾਦਿਕਾਸੀ’’ਤਿ ਗਾਥਾ ਬੋਧਿਤ੍ਥੇਰਿਯਾ ਪੁਚ੍ਛਾਵਸੇਨ ਵੁਤ੍ਤਾ. ‘‘ਏਵਮਨੁਯੁਞ੍ਜਿਯਮਾਨਾ’’ਤਿ ਗਾਥਾ ਸਙ੍ਗੀਤਿਕਾਰੇਹੇਵ ਵੁਤ੍ਤਾ. ‘‘ਉਜ੍ਜੇਨਿਯਾ’’ਤਿਆਦਿਕਾ ਹਿ ਸਬ੍ਬਾਪਿ ਇਸਿਦਾਸਿਯਾਵ ਵੁਤ੍ਤਾ. ਤਤ੍ਥ ਪਾਸਾਦਿਕਾਸੀਤਿ ਰੂਪਸਮ੍ਪਤ੍ਤਿਯਾ ਪਸ੍ਸਨ੍ਤਾਨਂ ਪਸਾਦਾਵਹਾ ਅਸਿ. ਵਯੋਪਿ ਤੇ ਅਪਰਿਹੀਨੋਤਿ ਤੁਯ੍ਹਂ ਵਯੋਪਿ ਨ ਪਰਿਹੀਨੋ, ਪਠਮਵਯੇ ਠਿਤਾਸੀਤਿ ਅਤ੍ਥੋ. ਕਿਂ ਦਿਸ੍ਵਾਨ ਬ੍ਯਾਲਿਕਨ੍ਤਿ ਕੀਦਿਸਂ ਬ੍ਯਾਲਿਕਂ ਦੋਸਂ ਘਰਾਵਾਸੇ ਆਦੀਨਵਂ ਦਿਸ੍ਵਾ. ਅਥਾਸਿ ਨੇਕ੍ਖਮ੍ਮਮਨੁਯੁਤ੍ਤਾਤਿ ਅਥਾਤਿ ਨਿਪਾਤਮਤ੍ਤਂ, ਨੇਕ੍ਖਮ੍ਮਂ ਪਬ੍ਬਜ੍ਜਂ ਅਨੁਯੁਤ੍ਤਾ ਅਸਿ.

ਅਨੁਯੁਞ੍ਜਿਯਮਾਨਾਤਿ ਪੁਚ੍ਛਿਯਮਾਨਾ, ਸਾ ਇਸਿਦਾਸੀਤਿ ਯੋਜਨਾ. ਰਹਿਤੇਤਿ ਸੁਞ੍ਞਟ੍ਠਾਨੇ. ਸੁਣ ਬੋਧਿ ਯਥਾਮ੍ਹਿ ਪਬ੍ਬਜਿਤਾਤਿ ਬੋਧਿਤ੍ਥੇਰਿ ਅਹਂ ਯਥਾ ਪਬ੍ਬਜਿਤਾ ਅਮ੍ਹਿ, ਤਂ ਤਂ ਪੁਰਾਣਂ ਸੁਣ ਸੁਣਾਹਿ.

ਉਜ੍ਜੇਨਿਯਾ ਪੁਰਵਰੇਤਿ ਉਜ੍ਜੇਨੀਨਾਮਕੇ ਅਵਨ੍ਤਿਰਟ੍ਠੇ ਉਤ੍ਤਮਨਗਰੇ. ਪਿਯਾਤਿ ਏਕਧੀਤੁਭਾਵੇਨ ਪਿਯਾਯਿਤਬ੍ਬਾ. ਮਨਾਪਾਤਿ ਸੀਲਾਚਾਰਗੁਣੇਨ ਮਨਵਡ੍ਢਨਕਾ. ਦਯਿਤਾਤਿ ਅਨੁਕਮ੍ਪਿਤਬ੍ਬਾ.

ਅਥਾਤਿ ਪਚ੍ਛਾ ਮਮ ਵਯਪ੍ਪਤ੍ਤਕਾਲੇ. ਮੇ ਸਾਕੇਤਤੋ ਵਰਕਾਤਿ ਸਾਕੇਤਨਗਰਤੋ ਮਮ ਵਰਕਾ ਮਂ ਵਾਰੇਨ੍ਤਾ ਆਗਚ੍ਛੁਂ. ਉਤ੍ਤਮਕੁਲੀਨਾਤਿ ਤਸ੍ਮਿਂ ਨਗਰੇ ਅਗ੍ਗਕੁਲਿਕਾ, ਯੇਨ ਤੇ ਪੇਸਿਤਾ, ਸੋ ਸੇਟ੍ਠਿ ਪਹੂਤਰਤਨੋ. ਤਸ੍ਸ ਮਮਂ ਸੁਣ੍ਹਮਦਾਸਿ ਤਾਤੋਤਿ ਤਸ੍ਸ ਸਾਕੇਤਸੇਟ੍ਠਿਨੋ ਸੁਣਿਸਂ ਪੁਤ੍ਤਸ੍ਸ ਭਰਿਯਂ ਕਤ੍ਵਾ ਮਯ੍ਹਂ ਪਿਤਾ ਮਂ ਅਦਾਸਿ.

ਸਾਯਂ ਪਾਤਨ੍ਤਿ ਸਾਯਨ੍ਹੇ ਪੁਬ੍ਬਣ੍ਹੇ ਚ. ਪਣਾਮਮੁਪਗਮ੍ਮ ਸਿਰਸਾ ਕਰੋਮੀਤਿ ਸਸ੍ਸੁਯਾ ਸਸੁਰਸ੍ਸ ਚ ਸਨ੍ਤਿਕਂ ਉਪਗਨ੍ਤ੍ਵਾ ਸਿਰਸਾ ਪਣਾਮਂ ਕਰੋਮਿ, ਤੇਸਂ ਪਾਦੇ ਵਨ੍ਦਾਮਿ. ਯਥਾਮ੍ਹਿ ਅਨੁਸਿਟ੍ਠਾਤਿ ਤੇਹਿ ਯਥਾ ਅਨੁਸਿਟ੍ਠਾ ਅਮ੍ਹਿ, ਤਥਾ ਕਰੋਮਿ, ਤੇਸਂ ਅਨੁਸਿਟ੍ਠਿਂ ਨ ਅਤਿਕ੍ਕਮਾਮਿ.

ਤਮੇਕਵਰਕਮ੍ਪੀਤਿ ਏਕਵਲ੍ਲਭਮ੍ਪਿ. ਉਬ੍ਬਿਗ੍ਗਾਤਿ ਤਸਨ੍ਤਾ. ਆਸਨਂ ਦੇਮੀਤਿ ਯਸ੍ਸ ਪੁਗ੍ਗਲਸ੍ਸ ਯਂ ਅਨੁਚ੍ਛਵਿਕਂ, ਤਂ ਤਸ੍ਸ ਦੇਮਿ.

ਤਤ੍ਥਾਤਿ ਪਰਿਵੇਸਨਟ੍ਠਾਨੇ. ਸਨ੍ਨਿਹਿਤਨ੍ਤਿ ਸਜ੍ਜਿਤਂ ਹੁਤ੍ਵਾ ਵਿਜ੍ਜਮਾਨਂ. ਛਾਦੇਮੀਤਿ ਉਪਚ੍ਛਾਦੇਮਿ, ਉਪਚ੍ਛਾਦੇਤ੍ਵਾ ਉਪਨਯਾਮਿ ਚ, ਉਪਨੇਤ੍ਵਾ ਦੇਮਿ, ਦੇਨ੍ਤੀਪਿ ਯਂ ਯਸ੍ਸ ਪਤਿਰੂਪਂ, ਤਦੇਵ ਦੇਮੀਤਿ ਅਤ੍ਥੋ.

ਉਮ੍ਮਾਰੇਤਿ ਦ੍ਵਾਰੇ. ਧੋਵਨ੍ਤੀ ਹਤ੍ਥਪਾਦੇਤਿ ਹਤ੍ਥਪਾਦੇ ਧੋਵਿਨੀ ਆਸਿਂ, ਧੋਵਿਤ੍ਵਾ ਘਰਂ ਸਮੁਪਗਮਾਮੀਤਿ ਯੋਜਨਾ.

ਕੋਚ੍ਛਨ੍ਤਿ ਮਸ੍ਸੂਨਂ ਕੇਸਾਨਞ੍ਚ ਉਲ੍ਲਿਖਨਕੋਚ੍ਛਂ. ਪਸਾਦਨ੍ਤਿ ਗਨ੍ਧਚੁਣ੍ਣਾਦਿਮੁਖਵਿਲੇਪਨਂ. ‘‘ਪਸਾਧਨ’’ਨ੍ਤਿਪਿ ਪਾਠੋ, ਪਸਾਧਨਭਣ੍ਡਂ. ਅਞ੍ਜਨਿਨ੍ਤਿ ਅਞ੍ਜਨਨਾਲ਼ਿਂ. ਪਰਿਕਮ੍ਮਕਾਰਿਕਾ ਵਿਯਾਤਿ ਅਗ੍ਗਕੁਲਿਕਾ ਵਿਭਵਸਮ੍ਪਨ੍ਨਾਪਿ ਪਤਿਪਰਿਚਾਰਿਕਾ ਚੇਟਿਕਾ ਵਿਯ.

ਸਾਧਯਾਮੀਤਿ ਪਚਾਮਿ. ਭਾਜਨਨ੍ਤਿ ਲੋਹਭਾਜਨਞ੍ਚ. ਧੋਵਨ੍ਤੀ ਪਰਿਚਰਾਮੀਤਿ ਯੋਜਨਾ.

ਭਤ੍ਤਿਕਤਨ੍ਤਿ ਕਤਸਾਮਿਭਤਿਕਂ. ਅਨੁਰਤ੍ਤਨ੍ਤਿ ਅਨੁਰਤ੍ਤਵਨ੍ਤਿਂ. ਕਾਰਿਕਨ੍ਤਿ ਤਸ੍ਸ ਤਸ੍ਸੇਵ ਇਤਿ ਕਤ੍ਤਬ੍ਬਸ੍ਸ ਕਾਰਿਕਂ. ਨਿਹਤਮਾਨਨ੍ਤਿ ਅਪਨੀਤਮਾਨਂ. ਉਟ੍ਠਾਯਿਕਨ੍ਤਿ ਉਟ੍ਠਾਨਵੀਰਿਯਸਮ੍ਪਨ੍ਨਂ. ਅਨਲਸਨ੍ਤਿ ਤਤੋ ਏਵ ਅਕੁਸੀਤਂ. ਸੀਲਵਤਿਨ੍ਤਿ ਸੀਲਾਚਾਰਸਮ੍ਪਨ੍ਨਂ. ਦੁਸ੍ਸਤੇਤਿ ਦੁਸ੍ਸਤਿ, ਕੁਜ੍ਝਿਤ੍ਵਾ ਭਣਤਿ.

ਭਣਤਿ ਆਪੁਚ੍ਛਹਂ ਗਮਿਸ੍ਸਾਮੀਤਿ ‘‘ਅਹਂ ਤੁਮ੍ਹੇ ਆਪੁਚ੍ਛਿਤ੍ਵਾ ਯਤ੍ਥ ਕਤ੍ਥਚਿ ਗਮਿਸ੍ਸਾਮੀ’’ਤਿ ਸੋ ਮਮ ਸਾਮਿਕੋ ਅਤ੍ਤਨੋ ਮਾਤਰਞ੍ਚ ਪਿਤਰਞ੍ਚ ਭਣਤਿ. ਕਿਂ ਭਣਤੀਤਿ ਚੇ ਆਹ – ‘‘ਇਸਿਦਾਸਿਯਾ ਨ ਸਹ ਵਚ੍ਛਂ, ਏਕਾਗਾਰੇਹਂ ਸਹ ਵਤ੍ਥੁ’’ਨ੍ਤਿ. ਤਤ੍ਥ ਵਚ੍ਛਨ੍ਤਿ ਵਸਿਸ੍ਸਂ.

ਦੇਸ੍ਸਾਤਿ ਅਪ੍ਪਿਯਾ. ਅਲਂ ਮੇਤਿ ਪਯੋਜਨਂ ਮੇ ਤਾਯ ਇਤ੍ਥੀਤਿ ਅਤ੍ਥੋ. ਅਪੁਚ੍ਛਾਹਂ ਗਮਿਸ੍ਸਾਮੀਤਿ ਯਦਿ ਮੇ ਤੁਮ੍ਹੇ ਤਾਯ ਸਦ੍ਧਿਂ ਸਂਵਾਸਂ ਇਚ੍ਛਥ, ਅਹਂ ਤੁਮ੍ਹੇ ਅਪੁਚ੍ਛਿਤ੍ਵਾ ਵਿਦੇਸਂ ਪਕ੍ਕਮਿਸ੍ਸਾਮਿ.

ਤਸ੍ਸਾਤਿ ਮਮ ਭਤ੍ਤੁਨੋ. ਕਿਸ੍ਸਾਤਿ ਕਿਂ ਅਸ੍ਸ ਤਵ ਸਾਮਿਕਸ੍ਸ. ਤਯਾ ਅਪਰਦ੍ਧਂ ਬ੍ਯਾਲਿਕਂ ਕਤਂ.

ਨਪਿਹਂ ਅਪਰਜ੍ਝਨ੍ਤਿ ਨਪਿ ਅਹਂ ਤਸ੍ਸ ਕਿਞ੍ਚਿ ਅਪਰਜ੍ਝਿਂ. ਅਯਮੇਵ ਵਾ ਪਾਠੋ. ਨਪਿ ਹਿਂਸੇਮੀਤਿ ਨਪਿ ਬਾਧੇਮਿ. ਦੁਬ੍ਬਚਨਨ੍ਤਿ ਦੁਰੁਤ੍ਤਵਚਨਂ. ਕਿਂ ਸਕ੍ਕਾ ਕਾਤੁਯ੍ਯੇਤਿ ਕਿਂ ਮਯਾ ਕਾਤੁਂ ਅਯ੍ਯੇ ਸਕ੍ਕਾ. ਯਂ ਮਂ ਵਿਦ੍ਦੇਸ੍ਸਤੇ ਭਤ੍ਤਾਤਿ ਯਸ੍ਮਾ ਅਕਾਰਣੇਨੇਵ ਭਤ੍ਤਾ ਮਯ੍ਹਂ ਵਿਦ੍ਦੇਸ੍ਸਤੇ ਵਿਦ੍ਦੇਸ੍ਸਂ ਚਿਤ੍ਤਪ੍ਪਕੋਪਂ ਕਰੋਤਿ.

ਵਿਮਨਾਤਿ ਦੋਮਨਸ੍ਸਿਕਾ. ਪੁਤ੍ਤਮਨੁਰਕ੍ਖਮਾਨਾਤਿ ਅਤ੍ਤਨੋ ਪੁਤ੍ਤਂ ਮਯ੍ਹਂ ਸਾਮਿਕਂ ਚਿਤ੍ਤਮਨੁਰਕ੍ਖਣੇਨ ਅਨੁਰਕ੍ਖਨ੍ਤਾ. ਜਿਤਾਮ੍ਹਸੇ ਰੂਪਿਨਿਂ ਲਕ੍ਖਿਨ੍ਤਿ ਜਿਤਾ ਅਮ੍ਹਸੇ ਜਿਤਾ ਵਤਾਮ੍ਹ ਰੂਪਵਤਿਂ ਸਿਰਿਂ, ਮਨੁਸ੍ਸਵੇਸੇਨ ਚਰਨ੍ਤਿਯਾ ਸਿਰਿਦੇਵਤਾਯ ਪਰਿਹੀਨਾ ਵਤਾਤਿ ਅਤ੍ਥੋ.

ਅਡ੍ਢਸ੍ਸ ਘਰਮ੍ਹਿ ਦੁਤਿਯਕੁਲਿਕਸ੍ਸਾਤਿ ਪਠਮਸਾਮਿਕਂ ਉਪਾਦਾਯ ਦੁਤਿਯਸ੍ਸ ਅਡ੍ਢਸ੍ਸ ਕੁਲਪੁਤ੍ਤਸ੍ਸ ਘਰਮ੍ਹਿ ਮਂ ਅਦਾਸਿ, ਦੇਨ੍ਤੋ ਚ ਤਤੋ ਪਠਮਸੁਙ੍ਕਤੋ ਉਪਡ੍ਢਸੁਙ੍ਕੇਨ ਅਦਾਸਿ. ਯੇਨ ਮਂ ਵਿਨ੍ਦਥ ਸੇਟ੍ਠੀਤਿ ਯੇਨ ਸੁਙ੍ਕੇਨ ਮਂ ਪਠਮਂ ਸੇਟ੍ਠਿ ਵਿਨ੍ਦਥ ਪਟਿਲਭਿ, ਤਤੋ ਉਪਡ੍ਢਸੁਙ੍ਕੇਨਾਤਿ ਯੋਜਨਾ.

ਸੋਪੀਤਿ ਦੁਤਿਯਸਾਮਿਕੋਪਿ. ਮਂ ਪਟਿਚ੍ਛਰਯੀਤਿ ਮਂ ਨੀਹਰਿ, ਸੋ ਮਂ ਗੇਹਤੋ ਨਿਕ੍ਕਡ੍ਢਿ. ਉਪਟ੍ਠਹਨ੍ਤਿਨ੍ਤਿ ਦਾਸੀ ਵਿਯ ਉਪਟ੍ਠਹਨ੍ਤਿਂ ਉਪਟ੍ਠਾਨਂ ਕਰੋਨ੍ਤਿਂ. ਅਦੂਸਿਕਨ੍ਤਿ ਅਦੁਬ੍ਭਨਕਂ.

ਦਮਕਨ੍ਤਿ ਕਾਰੁਞ੍ਞਾਧਿਟ੍ਠਾਨਤਾਯ ਪਰੇਸਂ ਚਿਤ੍ਤਸ੍ਸ ਦਮਕਂ. ਯਥਾ ਪਰੇ ਕਿਞ੍ਚਿ ਦਸ੍ਸਨ੍ਤਿ, ਏਵਂ ਅਤ੍ਤਨੋ ਕਾਯਂ ਵਾਚਞ੍ਚ ਦਨ੍ਤਂ ਵੂਪਸਨ੍ਤਂ ਕਤ੍ਵਾ ਪਰਦਤ੍ਤਭਿਕ੍ਖਾਯ ਵਿਚਰਣਕਂ. ਜਾਮਾਤਾਤਿ ਦੁਹਿਤੁਪਤਿ. ਨਿਕ੍ਖਿਪ ਪੋਟ੍ਠਿਞ੍ਚ ਘਟਿਕਞ੍ਚਾਤਿ ਤਯਾ ਪਰਿਦਹਿਤਂ ਪਿਲੋਤਿਕਾਖਣ੍ਡਞ੍ਚ ਭਿਕ੍ਖਾਕਪਾਲਞ੍ਚ ਛਡ੍ਡੇਹਿ.

ਸੋਪਿ ਵਸਿਤ੍ਵਾ ਪਕ੍ਖਨ੍ਤਿ ਸੋਪਿ ਭਿਕ੍ਖਕੋ ਪੁਰਿਸੋ ਮਯਾ ਸਦ੍ਧਿਂ ਅਦ੍ਧਮਾਸਮਤ੍ਤਂ ਵਸਿਤ੍ਵਾ ਪਕ੍ਕਾਮਿ.

ਅਥ ਨਂ ਭਣਤੀ ਤਾਤੋਤਿ ਤਂ ਭਿਕ੍ਖਕਂ ਮਮ ਪਿਤਾ ਮਾਤਾ ਸਬ੍ਬੋ ਚ ਮੇ ਞਾਤਿਗਣੋ ਵਗ੍ਗਵਗ੍ਗੋ ਹੁਤ੍ਵਾ ਭਣਤਿ. ਕਥਂ? ਕਿਂ ਤੇ ਨ ਕੀਰਤਿ ਇਧ ਤੁਯ੍ਹਂ ਕਿਂ ਨਾਮ ਨ ਕਿਰਤਿ ਨ ਸਾਧਿਯਤਿ, ਭਣ ਖਿਪ੍ਪਂ. ਤਂ ਤੇ ਕਰਿਹਿਤੀਤਿ ਤਂ ਤੁਯ੍ਹਂ ਕਰਿਸ੍ਸਤਿ.

ਯਦਿ ਮੇ ਅਤ੍ਤਾ ਸਕ੍ਕੋਤੀਤਿ ਯਦਿ ਮਯ੍ਹਂ ਅਤ੍ਤਾ ਅਤ੍ਤਾਧੀਨੋ ਭੁਜਿਸ੍ਸੋ ਚ ਹੋਤਿ, ਅਲਂ ਮਯ੍ਹਂ ਇਸਿਦਾਸਿਯਾ ਤਾਯ ਪਯੋਜਨਂ ਨਤ੍ਥਿ, ਤਸ੍ਮਾ ਨ ਸਹ ਵਚ੍ਛਂ ਨ ਸਹ ਵਸਿਸ੍ਸਂ, ਏਕਘਰੇ ਅਹਂ ਤਾਯ ਸਹ ਵਤ੍ਥੁਨ੍ਤਿ ਯੋਜਨਾ.

ਵਿਸ੍ਸਜ੍ਜਿਤੋ ਗਤੋ ਸੋਤਿ ਸੋ ਭਿਕ੍ਖਕੋ ਪਿਤਰਾ ਵਿਸ੍ਸਜ੍ਜਿਤੋ ਯਥਾਰੁਚਿ ਗਤੋ. ਏਕਾਕਿਨੀਤਿ ਏਕਿਕਾਵ. ਆਪੁਚ੍ਛਿਤੂਨ ਗਚ੍ਛਨ੍ਤਿ ਮਯ੍ਹਂ ਪਿਤਰਂ ਵਿਸ੍ਸਜ੍ਜੇਤ੍ਵਾ ਗਚ੍ਛਾਮਿ. ਮਰਿਤੁਯੇਤਿ ਮਰਿਤੁਂ. ਵਾਤਿ ਵਿਕਪ੍ਪਤ੍ਥੇ ਨਿਪਾਤੋ.

ਗੋਚਰਾਯਾਤਿ ਭਿਕ੍ਖਾਯ, ਤਾਤ-ਕੁਲਂ ਆਗਚ੍ਛੀਤਿ ਯੋਜਨਾ.

ਤਨ੍ਤਿ ਤਂ ਜਿਨਦਤ੍ਤਤ੍ਥੇਰਿਂ. ਉਟ੍ਠਾਯਾਸਨਂ ਤਸ੍ਸਾ ਪਞ੍ਞਾਪਯਿਨ੍ਤਿ ਉਟ੍ਠਹਿਤ੍ਵਾ ਆਸਨਂ ਤਸ੍ਸਾ ਥੇਰਿਯਾ ਪਞ੍ਞਾਪੇਸਿਂ.

ਇਧੇਵਾਤਿ ਇਮਸ੍ਮਿਂ ਏਵ ਗੇਹੇ ਠਿਤਾ. ਪੁਤ੍ਤਕਾਤਿ ਸਾਮਞ੍ਞਵੋਹਾਰੇਨ ਧੀਤਰਂ ਅਨੁਕਮ੍ਪੇਨ੍ਤੋ ਆਲਪਤਿ. ਚਰਾਹਿ ਤ੍ਵਂ ਧਮ੍ਮਨ੍ਤਿ ਤ੍ਵਂ ਪਬ੍ਬਜਿਤ੍ਵਾ ਚਰਿਤਬ੍ਬਂ ਬ੍ਰਹ੍ਮਚਰਿਯਾਦਿਧਮ੍ਮਂ ਚਰ. ਦ੍ਵਿਜਾਤੀਤਿ ਬ੍ਰਾਹ੍ਮਣਜਾਤੀ.

ਨਿਜ੍ਜਰੇਸ੍ਸਾਮੀਤਿ ਜੀਰਾਪੇਸ੍ਸਾਮਿ ਵਿਨਾਸੇਸ੍ਸਾਮਿ.

ਬੋਧਿਨ੍ਤਿ ਸਚ੍ਚਾਭਿਸਮ੍ਬੋਧਿਂ, ਮਗ੍ਗਞਾਣਨ੍ਤਿ ਅਤ੍ਥੋ. ਅਗ੍ਗਧਮ੍ਮਨ੍ਤਿ ਫਲਧਮ੍ਮਂ, ਅਰਹਤ੍ਤਂ. ਯਂ ਸਚ੍ਛਿਕਰੀ ਦ੍ਵਿਪਦਸੇਟ੍ਠੋਤਿ ਯਂ ਮਗ੍ਗਫਲਨਿਬ੍ਬਾਨਸਞ੍ਞਿਤਂ ਲੋਕੁਤ੍ਤਰਧਮ੍ਮਂ ਦ੍ਵਿਪਦਾਨਂ ਸੇਟ੍ਠੋ ਸਮ੍ਮਾਸਮ੍ਬੁਦ੍ਧੋ ਸਚ੍ਛਿ ਅਕਾਸਿ, ਤਂ ਲਭਸ੍ਸੂਤਿ ਯੋਜਨਾ.

ਸਤ੍ਤਾਹਂ ਪਬ੍ਬਜਿਤਾਤਿ ਪਬ੍ਬਜਿਤਾ ਹੁਤ੍ਵਾ ਸਤ੍ਤਾਹੇਨ. ਅਫਸ੍ਸਯਿਨ੍ਤਿ ਫੁਸਿਂ ਸਚ੍ਛਾਕਾਸਿਂ.

ਯਸ੍ਸਯਂ ਫਲਵਿਪਾਕੋਤਿ ਯਸ੍ਸ ਪਾਪਕਮ੍ਮਸ੍ਸ, ਅਯਂ ਸਾਮਿਕਸ੍ਸ ਅਮਨਾਪਭਾਵਸਙ੍ਖਾਤੋ ਨਿਸ੍ਸਨ੍ਦਫਲਭੂਤੋ ਵਿਪਾਕੋ. ਤਂ ਤਵ ਆਚਿਕ੍ਖਿਸ੍ਸਨ੍ਤਿ ਤਂ ਕਮ੍ਮਂ ਤਵ ਕਥੇਸ੍ਸਾਮਿ. ਤਨ੍ਤਿ ਆਚਿਕ੍ਖਿਯਮਾਨਂ ਤਮੇਵ ਕਮ੍ਮਂ, ਤਂ ਵਾ ਮਮ ਵਚਨਂ. ਏਕਮਨਾਤਿ ਏਕਗ੍ਗਮਨਾ. ਅਯਮੇਵ ਵਾ ਪਾਠੋ.

ਨਗਰਮ੍ਹਿ ਏਰਕਚ੍ਛੇਤਿ ਏਵਂਨਾਮਕੇ ਨਗਰੇ. ਸੋ ਪਰਦਾਰਂ ਅਸੇਵਿਹਨ੍ਤਿ ਸੋ ਅਹਂ ਪਰਸ੍ਸ ਦਾਰਂ ਅਸੇਵਿਂ.

ਚਿਰਂ ਪਕ੍ਕੋਤਿ ਬਹੂਨਿ ਵਸ੍ਸਸਤਸਹਸ੍ਸਾਨਿ ਨਿਰਯਗ੍ਗਿਨਾ ਦਡ੍ਢੋ. ਤਤੋ ਚ ਉਟ੍ਠਹਿਤ੍ਵਾਤਿ ਤਤੋ ਨਿਰਯਤੋ ਵੁਟ੍ਠਿਤੋ ਚੁਤੋ. ਮਕ੍ਕਟਿਯਾ ਕੁਚ੍ਛਿਮੋਕ੍ਕਮਿਨ੍ਤਿ ਵਾਨਰਿਯਾ ਕੁਚ੍ਛਿਮ੍ਹਿ ਪਟਿਸਨ੍ਧਿਂ ਗਣ੍ਹਿਂ.

ਯੂਥਪੋਤਿ ਯੂਥਪਤਿ. ਨਿਲ੍ਲਚ੍ਛੇਸੀਤਿ ਪੁਰਿਸਭਾਵਸ੍ਸ ਲਕ੍ਖਣਭੂਤਾਨਿ ਬੀਜਕਾਨਿ ਨਿਲ੍ਲਚ੍ਛੇਸਿ ਨੀਹਰਿ. ਤਸ੍ਸੇਤਂ ਕਮ੍ਮਫਲਨ੍ਤਿ ਤਸ੍ਸ ਮਯ੍ਹਂ ਏਤਂ ਅਤੀਤੇ ਕਤਸ੍ਸ ਕਮ੍ਮਸ੍ਸ ਫਲਂ. ਯਥਾਪਿ ਗਨ੍ਤ੍ਵਾਨ ਪਰਦਾਰਨ੍ਤਿ ਯਥਾ ਤਂ ਪਰਦਾਰਂ ਅਤਿਕ੍ਕਮਿਤ੍ਵਾ.

ਤਤੋਤਿ ਮਕ੍ਕਟਯੋਨਿਤੋ. ਸਿਨ੍ਧਵਾਰਞ੍ਞੇਤਿ ਸਿਨ੍ਧਵਰਟ੍ਠੇ ਅਰਞ੍ਞਟ੍ਠਾਨੇ. ਏਲ਼ਕਿਯਾਤਿ ਅਜਿਯਾ.

ਦਾਰਕੇ ਪਰਿਵਹਿਤ੍ਵਾਤਿ ਪਿਟ੍ਠਿਂ ਆਰੁਯ੍ਹ ਕੁਮਾਰਕੇ ਵਹਿਤ੍ਵਾ. ਕਿਮਿਨਾਵਟ੍ਟੋਤਿ ਅਭਿਜਾਤਟ੍ਠਾਨੇ ਕਿਮਿਪਰਿਗਤੋਵ ਹੁਤ੍ਵਾ ਅਟ੍ਟੋ ਅਟ੍ਟਿਤੋ. ਅਕਲ੍ਲੋਤਿ ਗਿਲਾਨੋ, ਅਹੋਸੀਤਿ ਵਚਨਸੇਸੋ.

ਗੋਵਾਣਿਜਕਸ੍ਸਾਤਿ ਗਾਵਿਯੋ ਵਿਕ੍ਕਿਣਿਤ੍ਵਾ ਜੀਵਕਸ੍ਸ. ਲਾਖਾਤਮ੍ਬੋਤਿ ਲਾਖਾਰਸਰਤ੍ਤੇਹਿ ਵਿਯ ਤਮ੍ਬੇਹਿ ਲੋਮੇਹਿ ਸਮਨ੍ਨਾਗਤੋ.

ਵੋਢੂਨਾਤਿ ਵਹਿਤ੍ਵਾ. ਨਙ੍ਗਲਨ੍ਤਿ ਸੀਰਂ, ਸਕਟਞ੍ਚ ਧਾਰਯਾਮੀਤਿ ਅਤ੍ਥੋ. ਅਨ੍ਧੋਵਟ੍ਟੋਤਿ ਕਾਣੋਵ ਹੁਤ੍ਵਾ ਅਟ੍ਟੋ ਪੀਲ਼ਿਤੋ.

ਵੀਥਿਯਾਤਿ ਨਗਰਵੀਥਿਯਂ. ਦਾਸਿਯਾ ਘਰੇ ਜਾਤੋਤਿ ਘਰਦਾਸਿਯਾ ਕੁਚ੍ਛਿਮ੍ਹਿ ਜਾਤੋ. ‘‘ਵਣ੍ਣਦਾਸਿਯਾ’’ਤਿਪਿ ਵਦਨ੍ਤਿ. ਨੇਵ ਮਹਿਲਾ ਨ ਪੁਰਿਸੋਤਿ ਇਤ੍ਥੀਪਿ ਪੁਰਿਸੋਪਿ ਨ ਹੋਮਿ, ਜਾਤਿਨਪੁਂਸਕੋਤਿ ਅਤ੍ਥੋ.

ਤਿਂਸਤਿਵਸ੍ਸਮ੍ਹਿ ਮਤੋਤਿ ਨਪੁਂਸਕੋ ਹੁਤ੍ਵਾ ਤਿਂਸਵਸ੍ਸਕਾਲੇ ਮਤੋ. ਸਾਕਟਿਕਕੁਲਮ੍ਹੀਤਿ ਸੂਤਕਕੁਲੇ. ਧਨਿਕਪੁਰਿਸਪਾਤਬਹੁਲਮ੍ਹੀਤਿ ਇਣਾਯਿਕਾਨਂ ਪੁਰਿਸਾਨਂ ਅਧਿਪਤਨਬਹੁਲੇ ਬਹੂਹਿ ਇਣਾਯਿਕੇਹਿ ਅਭਿਭਵਿਤਬ੍ਬੇ.

ਉਸ੍ਸਨ੍ਨਾਯਾਤਿ ਉਪਚਿਤਾਯ. ਵਿਪੁਲਾਯਾਤਿ ਮਹਤਿਯਾ. ਵਡ੍ਢਿਯਾਤਿ ਇਣਵਡ੍ਢਿਯਾ. ਓਕਡ੍ਢਤੀਤਿ ਅਵਕਡ੍ਢਤਿ. ਕੁਲਘਰਸ੍ਮਾਤਿ ਮਮ ਜਾਤਕੁਲਗੇਹਤੋ.

ਓਰੁਨ੍ਧਤਸ੍ਸ ਪੁਤ੍ਤੋਤਿ ਅਸ੍ਸ ਸਤ੍ਥਵਾਹਸ੍ਸ ਪੁਤ੍ਤੋ, ਮਯਿ ਪਟਿਬਦ੍ਧਚਿਤ੍ਤੋ ਨਾਮੇਨ ਗਿਰਿਦਾਸੋ ਨਾਮ ਅਵਰੁਨ੍ਧਤਿ ਅਤ੍ਤਨੋ ਪਰਿਗ੍ਗਹਭਾਵੇਨ ਗੇਹੇ ਕਰੋਤਿ.

ਅਨੁਰਤ੍ਤਾ ਭਤ੍ਤਾਰਨ੍ਤਿ ਭਤ੍ਤਾਰਂ ਅਨੁਵਤ੍ਤਿਕਾ. ਤਸ੍ਸਾਹਂ ਵਿਦ੍ਦੇਸਨਮਕਾਸਿਨ੍ਤਿ ਤਸ੍ਸ ਭਤ੍ਤੁਨੋ ਤਂ ਭਰਿਯਂ ਸਪਤ੍ਤਿਂ ਵਿਦ੍ਦੇਸਨਕਮ੍ਮਂ ਅਕਾਸਿਂ. ਯਥਾ ਤਂ ਸੋ ਕੁਜ੍ਝਤਿ, ਏਵਂ ਪਟਿਪਜ੍ਜਿਂ.

ਯਂ ਮਂ ਅਪਕੀਰਿਤੂਨ ਗਚ੍ਛਨ੍ਤੀਤਿ ਯਂ ਦਾਸੀ ਵਿਯ ਸਕ੍ਕਚ੍ਚਂ ਉਪਟ੍ਠਹਨ੍ਤਿਂ ਮਂ ਤਤ੍ਥ ਤਤ੍ਥ ਪਤਿਨੋ ਅਪਕਿਰਿਤ੍ਵਾ ਛਡ੍ਡੇਤ੍ਵਾ ਅਨਪੇਕ੍ਖਾ ਅਪਗਚ੍ਛਨ੍ਤਿ. ਏਤਂ ਤਸ੍ਸਾ ਮਯ੍ਹਂ ਤਦਾ ਕਤਸ੍ਸ ਪਰਦਾਰਿਕਕਮ੍ਮਸ੍ਸ ਸਪਤ੍ਤਿਂ ਵਿਦ੍ਦੇਸਨਕਮ੍ਮਸ੍ਸ ਚ ਨਿਸ੍ਸਨ੍ਦਫਲਂ. ਤਸ੍ਸਪਿ ਅਨ੍ਤੋ ਕਤੋ ਮਯਾਤਿ ਤਸ੍ਸਪਿ ਤਥਾ ਅਨੁਨਯਪਾਪਕਕਮ੍ਮਸ੍ਸ ਦਾਰੁਣਸ੍ਸ ਪਰਿਯਨ੍ਤੋ ਇਦਾਨਿ ਮਯਾ ਅਗ੍ਗਮਗ੍ਗਂ ਅਧਿਗਚ੍ਛਨ੍ਤਿਯਾ ਕਤੋ, ਇਤੋ ਪਰਂ ਕਿਞ੍ਚਿ ਦੁਕ੍ਖਂ ਨਤ੍ਥੀਤਿ. ਯਂ ਪਨੇਤ੍ਥ ਅਨ੍ਤਰਨ੍ਤਰਾ ਨ ਵਿਭਤ੍ਤਂ, ਤਂ ਵੁਤ੍ਤਨਯਤ੍ਤਾ ਉਤ੍ਤਾਨਤ੍ਥਮੇਵ.

ਇਸਿਦਾਸੀਥੇਰੀਗਾਥਾਵਣ੍ਣਨਾ ਨਿਟ੍ਠਿਤਾ.

ਚਤ੍ਤਾਲੀਸਨਿਪਾਤਵਣ੍ਣਨਾ ਨਿਟ੍ਠਿਤਾ.