੧੪. ਤਿਂਸਨਿਪਾਤੋ

੧. ਸੁਭਾਜੀਵਕਮ੍ਬਵਨਿਕਾਥੇਰੀਗਾਥਾਵਣ੍ਣਨਾ

ਤਿਂਸਨਿਪਾਤੇ ਜੀਵਕਮ੍ਬਵਨਂ ਰਮ੍ਮਨ੍ਤਿਆਦਿਕਾ ਸੁਭਾਯ ਜੀਵਕਮ੍ਬਵਨਿਕਾਯ ਥੇਰਿਯਾ ਗਾਥਾ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰਾ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਂ ਕੁਸਲਂ ਉਪਚਿਨਨ੍ਤੀ, ਸਮ੍ਭਾਵਿਤਕੁਸਲਮੂਲਾ ਅਨੁਕ੍ਕਮੇਨ ਪਰਿਬ੍ਰੂਹਿਤਵਿਮੋਕ੍ਖਸਮ੍ਭਾਰਾ ਪਰਿਪਕ੍ਕਞਾਣਾ ਹੁਤ੍ਵਾ, ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਰਾਜਗਹੇ ਬ੍ਰਾਹ੍ਮਣਮਹਾਸਾਲਕੁਲੇ ਨਿਬ੍ਬਤ੍ਤਿ, ਸੁਭਾਤਿਸ੍ਸਾ ਨਾਮਮਹੋਸਿ. ਤਸ੍ਸਾ ਕਿਰ ਸਰੀਰਾਵਯਵਾ ਸੋਭਨਵਣ੍ਣਯੁਤ੍ਤਾ ਅਹੇਸੁਂ, ਤਸ੍ਮਾ ਸੁਭਾਤਿ ਅਨ੍ਵਤ੍ਥਮੇਵ ਨਾਮਂ ਜਾਤਂ. ਸਾ ਸਤ੍ਥੁ ਰਾਜਗਹਪ੍ਪਵੇਸਨੇ ਪਟਿਲਦ੍ਧਸਦ੍ਧਾ ਉਪਾਸਿਕਾ ਹੁਤ੍ਵਾ ਅਪਰਭਾਗੇ ਸਂਸਾਰੇ ਜਾਤਸਂਵੇਗਾ ਕਾਮੇਸੁ ਆਦੀਨਵਂ ਦਿਸ੍ਵਾ ਨੇਕ੍ਖਮ੍ਮਞ੍ਚ ਖੇਮਤੋ ਸਲ੍ਲਕ੍ਖਨ੍ਤੀ ਮਹਾਪਜਾਪਤਿਯਾ ਗੋਤਮਿਯਾ ਸਨ੍ਤਿਕੇ ਪਬ੍ਬਜਿਤ੍ਵਾ ਵਿਪਸ੍ਸਨਾਯ ਕਮ੍ਮਂ ਕਰੋਨ੍ਤੀ ਕਤਿਪਾਹੇਨੇਵ ਅਨਾਗਾਮਿਫਲੇ ਪਤਿਟ੍ਠਾਸਿ.

ਅਥ ਨਂ ਏਕਦਿਵਸਂ ਅਞ੍ਞਤਰੋ ਰਾਜਗਹਵਾਸੀ ਧੁਤ੍ਤਪੁਰਿਸੋ ਤਰੁਣੋ ਪਠਮਯੋਬ੍ਬਨੇ ਠਿਤੋ ਜੀਵਕਮ੍ਬਵਨੇ ਦਿਵਾਵਿਹਾਰਾਯ ਗਚ੍ਛਨ੍ਤਿਂ ਦਿਸ੍ਵਾ ਪਟਿਬਦ੍ਧਚਿਤ੍ਤੋ ਹੁਤ੍ਵਾ ਮਗ੍ਗਂ ਓਵਰਨ੍ਤੋ ਕਾਮੇਹਿ ਨਿਮਨ੍ਤੇਸਿ. ਸਾ ਤਸ੍ਸ ਨਾਨਪ੍ਪਕਾਰੇਹਿ ਕਾਮਾਨਂ ਆਦੀਨਵਂ ਅਤ੍ਤਨੋ ਚ ਨੇਕ੍ਖਮ੍ਮਜ੍ਝਾਸਯਂ ਪਵੇਦੇਨ੍ਤੀ ਧਮ੍ਮਂ ਕਥੇਸਿ. ਸੋ ਧਮ੍ਮਕਥਂ ਸੁਤ੍ਵਾਪਿ ਨ ਪਟਿਕ੍ਕਮਤਿ, ਨਿਬਨ੍ਧਤਿਯੇਵ. ਥੇਰੀ ਨਂ ਅਤ੍ਤਨੋ ਵਚਨੇ ਅਤਿਟ੍ਠਨ੍ਤਂ ਅਕ੍ਖਿਮ੍ਹਿ ਚ ਅਭਿਰਤ੍ਤਂ ਦਿਸ੍ਵਾ, ‘‘ਹਨ੍ਦ, ਤਯਾ ਸਮ੍ਭਾਵਿਤਂ ਅਕ੍ਖਿ’’ਨ੍ਤਿ ਅਤ੍ਤਨੋ ਏਕਂ ਅਕ੍ਖਿਂ ਉਪ੍ਪਾਟੇਤ੍ਵਾ ਤਸ੍ਸ ਉਪਨੇਸਿ. ਤਤੋ ਸੋ ਪੁਰਿਸੋ ਸਨ੍ਤਾਸੋ ਸਂਵੇਗਜਾਤੋ ਤਤ੍ਥ ਵਿਗਤਰਾਗੋਵ ਹੁਤ੍ਵਾ ਥੇਰਿਂ ਖਮਾਪੇਤ੍ਵਾ ਗਤੋ. ਥੇਰੀ ਸਤ੍ਥੁ ਸਨ੍ਤਿਕਂ ਅਗਮਾਸਿ. ਸਤ੍ਥੁਨੋ ਸਹ ਦਸ੍ਸਨੇਨੇਵਸ੍ਸਾ ਅਕ੍ਖਿ ਪਟਿਪਾਕਤਿਕਂ ਅਹੋਸਿ. ਤਤੋ ਸਾ ਬੁਦ੍ਧਗਤਾਯ ਪੀਤਿਯਾ ਨਿਰਨ੍ਤਰਂ ਫੁਟਾ ਹੁਤ੍ਵਾ ਅਟ੍ਠਾਸਿ. ਸਤ੍ਥਾ ਤਸ੍ਸਾ ਚਿਤ੍ਤਾਚਾਰਂ ਞਤ੍ਵਾ ਧਮ੍ਮਂ ਦੇਸੇਤ੍ਵਾ ਅਗ੍ਗਮਗ੍ਗਤ੍ਥਾਯ ਕਮ੍ਮਟ੍ਠਾਨਂ ਆਚਿਕ੍ਖਿ. ਸਾ ਪੀਤਿਂ ਵਿਕ੍ਖਮ੍ਭੇਤ੍ਵਾ ਤਾਵਦੇਵ ਵਿਪਸ੍ਸਨਂ ਵਡ੍ਢੇਤ੍ਵਾ ਸਹ ਪਟਿਸਮ੍ਭਿਦਾਹਿ ਅਰਹਤ੍ਤਂ ਪਾਪੁਣਿ. ਅਰਹਤ੍ਤਂ ਪਨ ਪਤ੍ਵਾ ਫਲਸੁਖੇਨ ਨਿਬ੍ਬਾਨਸੁਖੇਨ ਵਿਹਰਨ੍ਤੀ ਅਤ੍ਤਨੋ ਪਟਿਪਤ੍ਤਿਂ ਪਚ੍ਚਵੇਕ੍ਖਿਤ੍ਵਾ ਅਤ੍ਤਨਾ ਤੇਨ ਚ ਧੁਤ੍ਤਪੁਰਿਸੇਨ ਵੁਤ੍ਤਗਾਥਾ ਉਦਾਨਵਸੇਨ –

੩੬੮. ‘‘ਜੀਵਕਮ੍ਬਵਨਂ ਰਮ੍ਮਂ, ਗਚ੍ਛਨ੍ਤਿਂ ਭਿਕ੍ਖੁਨਿਂ ਸੁਭਂ;

ਧੁਤ੍ਤਕੋ ਸਨ੍ਨਿਵਾਰੇਸਿ, ਤਮੇਨਂ ਅਬ੍ਰਵੀ ਸੁਭਾ.

੩੬੯. ‘‘ਕਿਂ ਤੇ ਅਪਰਾਧਿਤਂ ਮਯਾ, ਯਂ ਮਂ ਓਵਰਿਯਾਨ ਤਿਟ੍ਠਸਿ;

ਨ ਹਿ ਪਬ੍ਬਜਿਤਾਯ ਆਵੁਸੋ, ਪੁਰਿਸੋ ਸਮ੍ਫੁਸਨਾਯ ਕਪ੍ਪਤਿ.

੩੭੦. ‘‘ਗਰੁਕੇ ਮਮ ਸਤ੍ਥੁਸਾਸਨੇ, ਯਾ ਸਿਕ੍ਖਾ ਸੁਗਤੇਨ ਦੇਸਿਤਾ;

ਪਰਿਸੁਦ੍ਧਪਦਂ ਅਨਙ੍ਗਣਂ, ਕਿਂ ਮਂ ਓਵਰਿਯਾਨ ਤਿਟ੍ਠਸਿ.

੩੭੧. ‘‘ਆਵਿਲਚਿਤ੍ਤੋ ਅਨਾਵਿਲਂ, ਸਰਜੋ ਵੀਤਰਜਂ ਅਨਙ੍ਗਣਂ;

ਸਬ੍ਬਤ੍ਥ ਵਿਮੁਤ੍ਤਮਾਨਸਂ, ਕਿਂ ਮਂ ਓਵਰਿਯਾਨ ਤਿਟ੍ਠਸਿ.

੩੭੨. ‘‘ਦਹਰਾ ਚ ਅਪਾਪਿਕਾ ਚਸਿ, ਕਿਂ ਤੇ ਪਬ੍ਬਜ੍ਜਾ ਕਰਿਸ੍ਸਤਿ;

ਨਿਕ੍ਖਿਪ ਕਾਸਾਯਚੀਵਰਂ, ਏਹਿ ਰਮਾਮ ਸੁਪੁਪ੍ਫਿਤੇ ਵਨੇ.

੩੭੩. ‘‘ਮਧੁਰਞ੍ਚ ਪਵਨ੍ਤਿ ਸਬ੍ਬਸੋ, ਕੁਸੁਮਰਜੇਨ ਸਮੁਟ੍ਠਿਤਾ ਦੁਮਾ;

ਪਠਮਵਸਨ੍ਤੋ ਸੁਖੋ ਉਤੁ, ਏਹਿ ਰਮਾਮ ਸੁਪੁਪ੍ਫਿਤੇ ਵਨੇ.

੩੭੪. ‘‘ਕੁਸੁਮਿਤਸਿਖਰਾ ਚ ਪਾਦਪਾ, ਅਭਿਗਜ੍ਜਨ੍ਤਿਵ ਮਾਲੁਤੇਰਿਤਾ;

ਕਾ ਤੁਯ੍ਹਂ ਰਤਿ ਭਵਿਸ੍ਸਤਿ, ਯਦਿ ਏਕਾ ਵਨਮੋਗਹਿਸ੍ਸਸਿ.

੩੭੫. ‘‘ਵਾਲ਼ਮਿਗਸਙ੍ਘਸੇਵਿਤਂ, ਕੁਞ੍ਜਰਮਤ੍ਤਕਰੇਣੁਲੋਲ਼ਿਤਂ;

ਅਸਹਾਯਿਕਾ ਗਨ੍ਤੁਮਿਚ੍ਛਸਿ, ਰਹਿਤਂ ਭਿਂਸਨਕਂ ਮਹਾਵਨਂ.

੩੭੬. ‘‘ਤਪਨੀਯਕਤਾਵ ਧੀਤਿਕਾ, ਵਿਚਰਸਿ ਚਿਤ੍ਤਲਤੇਵ ਅਚ੍ਛਰਾ;

ਕਾਸਿਕਸੁਖੁਮੇਹਿ ਵਗ੍ਗੁਭਿ, ਸੋਭਸੀ ਸੁਵਸਨੇਹਿ ਨੂਪਮੇ.

੩੭੭. ‘‘ਅਹਂ ਤਵ ਵਸਾਨੁਗੋ ਸਿਯਂ, ਯਦਿ ਵਿਹਰੇਮਸੇ ਕਾਨਨਨ੍ਤਰੇ;

ਨ ਹਿ ਮਤ੍ਥਿ ਤਯਾ ਪਿਯਤ੍ਤਰੋ, ਪਾਣੋ ਕਿਨ੍ਨਰਿਮਨ੍ਦਲੋਚਨੇ.

੩੭੮. ‘‘ਯਦਿ ਮੇ ਵਚਨਂ ਕਰਿਸ੍ਸਸਿ, ਸੁਖਿਤਾ ਏਹਿ ਅਗਾਰਮਾਵਸ;

ਪਾਸਾਦਨਿਵਾਤਵਾਸਿਨੀ, ਪਰਿਕਮ੍ਮਂ ਤੇ ਕਰੋਨ੍ਤੁ ਨਾਰਿਯੋ.

੩੭੯. ‘‘ਕਾਸਿਕਸੁਖੁਮਾਨਿ ਧਾਰਯ, ਅਭਿਰੋਪੇਹਿ ਚ ਮਾਲਵਣ੍ਣਕਂ;

ਕਞ੍ਚਨਮਣਿਮੁਤ੍ਤਕਂ ਬਹੁਂ, ਵਿਵਿਧਂ ਆਭਰਣਂ ਕਰੋਮਿ ਤੇ.

੩੮੦. ‘‘ਸੁਧੋਤਰਜਪਚ੍ਛਦਂ ਸੁਭਂ, ਗੋਨਕਤੂਲਿਕਸਨ੍ਥਤਂ ਨਵਂ;

ਅਭਿਰੁਹ ਸਯਨਂ ਮਹਾਰਹਂ, ਚਨ੍ਦਨਮਣ੍ਡਿਤਸਾਰਗਨ੍ਧਿਕਂ.

੩੮੧. ‘‘ਉਪ੍ਪਲਂ ਚੁਦਕਾ ਸਮੁਗ੍ਗਤਂ, ਯਥਾ ਤਂ ਅਮਨੁਸ੍ਸਸੇਵਿਤਂ;

ਏਵਂ ਤ੍ਵਂ ਬ੍ਰਹ੍ਮਚਾਰਿਨੀ, ਸਕੇਸਙ੍ਗੇਸੁ ਜਰਂ ਗਮਿਸ੍ਸਸਿ.

੩੮੨. ‘‘ਕਿਂ ਤੇ ਇਧ ਸਾਰਸਮ੍ਮਤਂ, ਕੁਣਪਪੂਰਮ੍ਹਿ ਸੁਸਾਨਵਡ੍ਢਨੇ;

ਭੇਦਨਧਮ੍ਮੇ ਕਲ਼ੇਵਰੇ, ਯਂ ਦਿਸ੍ਵਾ ਵਿਮਨੋ ਉਦਿਕ੍ਖਸਿ.

੩੮੩. ‘‘ਅਕ੍ਖੀਨਿ ਚ ਤੂਰਿਯਾਰਿਵ, ਕਿਨ੍ਨਰਿਯਾਰਿਵ ਪਬ੍ਬਤਨ੍ਤਰੇ;

ਤਵ ਮੇ ਨਯਨਾਨਿ ਦਕ੍ਖਿਯ, ਭਿਯ੍ਯੋ ਕਾਮਰਤੀ ਪਵਡ੍ਢਤਿ.

੩੮੪. ‘‘ਉਪ੍ਪਲਸਿਖਰੋਪਮਾਨਿ ਤੇ, ਵਿਮਲੇ ਹਾਟਕਸਨ੍ਨਿਭੇ ਮੁਖੇ;

ਤਵ ਮੇ ਨਯਨਾਨਿ ਦਕ੍ਖਿਯ, ਭਿਯ੍ਯੋ ਕਾਮਗੁਣੋ ਪਵਡ੍ਢਤਿ.

੩੮੫. ‘‘ਅਪਿ ਦੂਰਗਤਾ ਸਰਮ੍ਹਸੇ, ਆਯਤਪਮ੍ਹੇ ਵਿਸੁਦ੍ਧਦਸ੍ਸਨੇ;

ਨ ਹਿ ਮਤ੍ਥਿ ਤਯਾ ਪਿਯਤ੍ਤਰੋ, ਨਯਨਾ ਕਿਨ੍ਨਰਿਮਨ੍ਦਲੋਚਨੇ.

੩੮੬. ‘‘ਅਪਥੇਨ ਪਯਾਤੁਮਿਚ੍ਛਸਿ, ਚਨ੍ਦਂ ਕੀਲ਼ਨਕਂ ਗਵੇਸਸਿ;

ਮੇਰੁਂ ਲਙ੍ਘੇਤੁਮਿਚ੍ਛਸਿ, ਯੋ ਤ੍ਵਂ ਬੁਦ੍ਧਸੁਤਂ ਮਗ੍ਗਯਸਿ.

੩੮੭. ‘‘ਨਤ੍ਥਿ ਹਿ ਲੋਕੇ ਸਦੇਵਕੇ, ਰਾਗੋ ਯਤ੍ਥਪਿ ਦਾਨਿ ਮੇ ਸਿਯਾ;

ਨਪਿ ਨਂ ਜਾਨਾਮਿ ਕੀਰਿਸੋ, ਅਥ ਮਗ੍ਗੇਨ ਹਤੋ ਸਮੂਲਕੋ.

੩੮੮. ‘‘ਇਙ੍ਗਾਲਕੁਯਾਵ ਉਜ੍ਝਿਤੋ, ਵਿਸਪਤ੍ਤੋਰਿਵ ਅਗ੍ਗਿਤੋ ਕਤੋ;

ਨਪਿ ਨਂ ਪਸ੍ਸਾਮਿ ਕੀਰਿਸੋ, ਅਥ ਮਗ੍ਗੇਨ ਹਤੋ ਸਮੂਲਕੋ.

੩੮੯. ‘‘ਯਸ੍ਸਾ ਸਿਯਾ ਅਪਚ੍ਚਵੇਕ੍ਖਿਤਂ, ਸਤ੍ਥਾ ਵਾ ਅਨੁਪਾਸਿਤੋ ਸਿਯਾ;

ਤ੍ਵਂ ਤਾਦਿਸਿਕਂ ਪਲੋਭਯ, ਜਾਨਨ੍ਤਿਂ ਸੋ ਇਮਂ ਵਿਹਞ੍ਞਸਿ.

੩੯੦. ‘‘ਮਯ੍ਹਞ੍ਹਿ ਅਕ੍ਕੁਟ੍ਠਵਨ੍ਦਿਤੇ, ਸੁਖਦੁਕ੍ਖੇ ਚ ਸਤੀ ਉਪਟ੍ਠਿਤਾ;

ਸਙ੍ਖਤਮਸੁਭਨ੍ਤਿ ਜਾਨਿਯ, ਸਬ੍ਬਤ੍ਥੇਵ ਮਨੋ ਨ ਲਿਮ੍ਪਤਿ.

੩੯੧. ‘‘ਸਾਹਂ ਸੁਗਤਸ੍ਸ ਸਾਵਿਕਾ, ਮਗ੍ਗਟ੍ਠਙ੍ਗਿਕਯਾਨਯਾਯਿਨੀ;

ਉਦ੍ਧਟਸਲ੍ਲਾ ਅਨਾਸਵਾ, ਸੁਞ੍ਞਾਗਾਰਗਤਾ ਰਮਾਮਹਂ.

੩੯੨. ‘‘ਦਿਟ੍ਠਾ ਹਿ ਮਯਾ ਸੁਚਿਤ੍ਤਿਤਾ, ਸੋਮ੍ਭਾ ਦਾਰੁਕਪਿਲ੍ਲਕਾਨਿ ਵਾ;

ਤਨ੍ਤੀਹਿ ਚ ਖੀਲਕੇਹਿ ਚ, ਵਿਨਿਬਦ੍ਧਾ ਵਿਵਿਧਂ ਪਨਚ੍ਚਕਾ.

੩੯੩. ‘‘ਤਮ੍ਹੁਦ੍ਧਟੇ ਤਨ੍ਤਿਖੀਲਕੇ, ਵਿਸ੍ਸਟ੍ਠੇ ਵਿਕਲੇ ਪਰਿਕ੍ਰਿਤੇ;

ਨ ਵਿਨ੍ਦੇਯ੍ਯ ਖਣ੍ਡਸੋ ਕਤੇ, ਕਿਮ੍ਹਿ ਤਤ੍ਥ ਮਨਂ ਨਿਵੇਸਯੇ.

੩੯੪. ‘‘ਤਥੂਪਮਾ ਦੇਹਕਾਨਿ ਮਂ, ਤੇਹਿ ਧਮ੍ਮੇਹਿ ਵਿਨਾ ਨ ਵਤ੍ਤਨ੍ਤਿ;

ਧਮ੍ਮੇਹਿ ਵਿਨਾ ਨ ਵਤ੍ਤਤਿ, ਕਿਮ੍ਹਿ ਤਤ੍ਥ ਮਨਂ ਨਿਵੇਸਯੇ.

੩੯੫. ‘‘ਯਥਾ ਹਰਿਤਾਲੇਨ ਮਕ੍ਖਿਤਂ, ਅਦ੍ਦਸ ਚਿਤ੍ਤਿਕਂ ਭਿਤ੍ਤਿਯਾ ਕਤਂ;

ਤਮ੍ਹਿ ਤੇ ਵਿਪਰੀਤਦਸ੍ਸਨਂ, ਸਞ੍ਞਾ ਮਾਨੁਸਿਕਾ ਨਿਰਤ੍ਥਿਕਾ.

੩੯੬. ‘‘ਮਾਯਂ ਵਿਯ ਅਗ੍ਗਤੋ ਕਤਂ, ਸੁਪਿਨਨ੍ਤੇਵ ਸੁਵਣ੍ਣਪਾਦਪਂ;

ਉਪਗਚ੍ਛਸਿ ਅਨ੍ਧ ਰਿਤ੍ਤਕਂ, ਜਨਮਜ੍ਝੇਰਿਵ ਰੁਪ੍ਪਰੂਪਕਂ.

੩੯੭. ‘‘ਵਟ੍ਟਨਿਰਿਵ ਕੋਟਰੋਹਿਤਾ, ਮਜ੍ਝੇ ਪੁਬ੍ਬੁਲ਼ਕਾ ਸਅਸ੍ਸੁਕਾ;

ਪੀਲ਼ਕੋਲ਼ਿਕਾ ਚੇਤ੍ਥ ਜਾਯਤਿ, ਵਿਵਿਧਾ ਚਕ੍ਖੁਵਿਧਾ ਚ ਪਿਣ੍ਡਿਤਾ.

੩੯੮. ‘‘ਉਪ੍ਪਾਟਿਯ ਚਾਰੁਦਸ੍ਸਨਾ, ਨ ਚ ਪਜ੍ਜਿਤ੍ਥ ਅਸਙ੍ਗਮਾਨਸਾ;

ਹਨ੍ਦ ਤੇ ਚਕ੍ਖੁਂ ਹਰਸ੍ਸੁ ਤਂ, ਤਸ੍ਸ ਨਰਸ੍ਸ ਅਦਾਸਿ ਤਾਵਦੇ.

੩੯੯. ‘‘ਤਸ੍ਸ ਚ ਵਿਰਮਾਸਿ ਤਾਵਦੇ, ਰਾਗੋ ਤਤ੍ਥ ਖਮਾਪਯੀ ਚ ਨਂ;

ਸੋਤ੍ਥਿ ਸਿਯਾ ਬ੍ਰਹ੍ਮਚਾਰਿਨੀ, ਨ ਪੁਨੋ ਏਦਿਸਕਂ ਭਵਿਸ੍ਸਤਿ.

੪੦੦. ‘‘ਆਸਾਦਿਯ ਏਦਿਸਂ ਜਨਂ, ਅਗ੍ਗਿਂ ਪਜ੍ਜਲਿਤਂਵ ਲਿਙ੍ਗਿਯ;

ਗਣ੍ਹਿਯ ਆਸੀਵਿਸਂ ਵਿਯ, ਅਪਿ ਨੁ ਸੋਤ੍ਥਿ ਸਿਯਾ ਖਮੇਹਿ ਨੋ.

੪੦੧. ‘‘ਮੁਤ੍ਤਾ ਚ ਤਤੋ ਸਾ ਭਿਕ੍ਖੁਨੀ, ਅਗਮੀ ਬੁਦ੍ਧਵਰਸ੍ਸ ਸਨ੍ਤਿਕਂ;

ਪਸ੍ਸਿਯ ਵਰਪੁਞ੍ਞਲਕ੍ਖਣਂ, ਚਕ੍ਖੁ ਆਸਿ ਯਥਾ ਪੁਰਾਣਕ’’ਨ੍ਤਿ. –

ਇਮਾ ਗਾਥਾ ਪਚ੍ਚੁਦਾਹਾਸਿ.

ਤਤ੍ਥ ਜੀਵਕਮ੍ਬਵਨਨ੍ਤਿ ਜੀਵਕਸ੍ਸ ਕੋਮਾਰਭਚ੍ਚਸ੍ਸ ਅਮ੍ਬਵਨਂ. ਰਮ੍ਮਨ੍ਤਿ ਰਮਣੀਯਂ. ਤਂ ਕਿਰ ਭੂਮਿਭਾਗਸਮ੍ਪਤ੍ਤਿਯਾ ਛਾਯੂਦਕਸਮ੍ਪਤ੍ਤਿਯਾ ਚ ਰੁਕ੍ਖਾਨਂ ਰੋਪਿਤਾਕਾਰੇਨ ਅਤਿਵਿਯ ਮਨੁਞ੍ਞਂ ਮਨੋਰਮਂ. ਗਚ੍ਛਨ੍ਤਿਨ੍ਤਿ ਅਮ੍ਬਵਨਂ ਉਦ੍ਦਿਸ੍ਸ ਗਤਂ, ਦਿਵਾਵਿਹਾਰਾਯ ਉਪਗਚ੍ਛਨ੍ਤਿਂ. ਸੁਭਨ੍ਤਿ ਏਵਂਨਾਮਿਕਂ. ਧੁਤ੍ਤਕੋਤਿ ਇਤ੍ਥਿਧੁਤ੍ਤੋ. ਰਾਜਗਹਵਾਸੀ ਕਿਰੇਕੋ ਮਹਾਵਿਭਵਸ੍ਸ ਸੁਵਣ੍ਣਕਾਰਸ੍ਸ ਪੁਤ੍ਤੋ ਯੁਵਾ ਅਭਿਰੂਪੋ ਇਤ੍ਥਿਧੁਤ੍ਤੋ ਪੁਰਿਸੋ ਮਤ੍ਤੋ ਵਿਚਰਤਿ. ਸੋ ਤਂ ਪਟਿਪਥੇ ਦਿਸ੍ਵਾ ਪਟਿਬਦ੍ਧਚਿਤ੍ਤੋ ਮਗ੍ਗਂ ਉਪਰੁਨ੍ਧਿਤ੍ਵਾ ਅਟ੍ਠਾਸਿ. ਤੇਨ ਵੁਤ੍ਤਂ – ‘‘ਧੁਤ੍ਤਕੋ ਸਨ੍ਨਿਵਾਰੇਸੀ’’ਤਿ, ਮਮ ਗਮਨਂ ਨਿਸੇਧੇਸੀਤਿ ਅਤ੍ਥੋ. ਤਮੇਨਂ ਅਬ੍ਰਵੀ ਸੁਭਾਤਿ ਤਮੇਨਂ ਨਿਵਾਰੇਤ੍ਵਾ ਠਿਤਂ ਧੁਤ੍ਤਂ ਸੁਭਾ ਭਿਕ੍ਖੁਨੀ ਕਥੇਸਿ. ਏਤ੍ਥ ਚ ‘‘ਗਚ੍ਛਨ੍ਤਿਂ ਭਿਕ੍ਖੁਨਿਂ ਸੁਭਂ, ਅਬ੍ਰਵਿ ਸੁਭਾ’’ਤਿ ਚ ਅਤ੍ਤਾਨਮੇਵ ਥੇਰੀ ਅਞ੍ਞਂ ਵਿਯ ਕਤ੍ਵਾ ਵਦਤਿ. ਥੇਰਿਯਾ ਵੁਤ੍ਤਗਾਥਾਨਂ ਸਮ੍ਬਨ੍ਧਦਸ੍ਸਨਵਸੇਨ ਸਙ੍ਗੀਤਿਕਾਰੇਹਿ ਅਯਂ ਗਾਥਾ ਵੁਤ੍ਤਾ.

‘‘ਅਬ੍ਰਵੀ ਸੁਭਾ’’ਤਿ ਵਤ੍ਵਾ ਤਸ੍ਸਾ ਵੁਤ੍ਤਾਕਾਰਦਸ੍ਸਨਤ੍ਥਂ ਆਹ ‘‘ਕਿਂ ਤੇ ਅਪਰਾਧਿਤ’’ਨ੍ਤਿਆਦਿ. ਤਤ੍ਥ ਕਿਂ ਤੇ ਅਪਰਾਧਿਤਂ ਮਯਾਤਿ ਕਿਂ ਤੁਯ੍ਹਂ, ਆਵੁਸੋ, ਮਯਾ ਅਪਰਦ੍ਧਂ. ਯਂ ਮਂ ਓਵਰਿਯਾਨ ਤਿਟ੍ਠਸੀਤਿ ਯੇਨ ਅਪਰਾਧੇਨ ਮਂ ਗਚ੍ਛਨ੍ਤਿਂ ਓਵਰਿਤ੍ਵਾ ਗਮਨਂ ਨਿਸੇਧੇਤ੍ਵਾ ਤਿਟ੍ਠਸਿ, ਸੋ ਨਤ੍ਥੇਵਾਤਿ ਅਧਿਪ੍ਪਾਯੋ. ਅਥ ਇਤ੍ਥੀਤਿਸਞ੍ਞਾਯ ਏਵਂ ਪਟਿਪਜ੍ਜਸਿ, ਏਵਮ੍ਪਿ ਨ ਯੁਤ੍ਤਨ੍ਤਿ ਦਸ੍ਸੇਨ੍ਤੀ ਆਹ – ‘‘ਨ ਹਿ ਪਬ੍ਬਜਿਤਾਯ, ਆਵੁਸੋ, ਪੁਰਿਸੋ ਸਮ੍ਫੁਸਨਾਯ ਕਪ੍ਪਤੀ’’ਤਿ, ਆਵੁਸੋ ਸੁਵਣ੍ਣਕਾਰਪੁਤ੍ਤ, ਲੋਕਿਯਚਾਰਿਤ੍ਤੇਨਪਿ ਪੁਰਿਸਸ੍ਸ ਪਬ੍ਬਜਿਤਾਨਂ ਸਮ੍ਫੁਸਨਾਯ ਨ ਕਪ੍ਪਤਿ, ਪਬ੍ਬਜਿਤਾਯ ਪਨ ਪੁਰਿਸੋ ਤਿਰਚ੍ਛਾਨਗਤੋਪਿ ਸਮ੍ਫੁਸਨਾਯ ਨ ਕਪ੍ਪਤਿ, ਤਿਟ੍ਠਤੁ ਤਾਵ ਪੁਰਿਸਫੁਸਨਾ, ਰਾਗਵਸੇਨਸ੍ਸਾ ਨਿਸ੍ਸਗ੍ਗਿਯੇਨ ਪੁਰਿਸਸ੍ਸ ਨਿਸ੍ਸਗ੍ਗਿਯਸ੍ਸਾਪਿ ਫੁਸਨਾ ਨ ਕਪ੍ਪਤੇਵ.

ਤੇਨਾਹ ‘‘ਗਰੁਕੇ ਮਮ ਸਤ੍ਥੁਸਾਸਨੇ’’ਤਿਆਦਿ. ਤਸ੍ਸਤ੍ਥੋ – ਗਰੁਕੇ ਪਾਸਾਣਚ੍ਛਤ੍ਤਂ ਵਿਯ ਗਰੁਕਾਤਬ੍ਬੇ ਮਯ੍ਹਂ ਸਤ੍ਥੁ ਸਾਸਨੇ ਯਾ ਸਿਕ੍ਖਾ ਭਿਕ੍ਖੁਨਿਯੋ ਉਦ੍ਦਿਸ੍ਸ ਸੁਗਤੇਨ ਸਮ੍ਮਾਸਮ੍ਬੁਦ੍ਧੇਨ ਦੇਸਿਤਾ ਪਞ੍ਞਤ੍ਤਾ. ਤਾਹਿ ਪਰਿਸੁਦ੍ਧਪਦਂ ਪਰਿਸੁਦ੍ਧਕੁਸਲਕੋਟ੍ਠਾਸਂ, ਰਾਗਾਦਿਅਙ੍ਗਣਾਨਂ ਸਬ੍ਬਸੋ ਅਭਾਵੇਨ ਅਨਙ੍ਗਣਂ, ਏਵਂਭੂਤਂ ਮਂ ਗਚ੍ਛਨ੍ਤਿਂ ਕੇਨ ਕਾਰਣੇਨ ਆਵਰਿਤ੍ਵਾ ਤਿਟ੍ਠਸੀਤਿ.

ਆਵਿਲਚਿਤ੍ਤੋਤਿ ਚਿਤ੍ਤਸ੍ਸ ਆਵਿਲਭਾਵਕਰਾਨਂ ਕਾਮਵਿਤਕ੍ਕਾਦੀਨਂ ਵਸੇਨ ਆਵਿਲਚਿਤ੍ਤੋ, ਤ੍ਵਂ ਤਦਭਾਵਤੋ ਅਨਾਵਿਲਂ, ਰਾਗਰਜਾਦੀਨਂ ਵਸੇਨ ਸਰਜੋ, ਸਾਙ੍ਗਣੋ ਤਦਭਾਵਤੋ ਵੀਤਰਜਂ ਅਨਙ੍ਗਣਂ ਸਬ੍ਬਤ੍ਥ ਖਨ੍ਧਪਞ੍ਚਕੇ ਸਮੁਚ੍ਛੇਦਵਿਮੁਤ੍ਤਿਯਾ ਵਿਮੁਤ੍ਤਮਾਨਸਂ, ਮਂ ਕਸ੍ਮਾ ਓਵਰਿਤ੍ਵਾ ਤਿਟ੍ਠਸੀਤਿ?

ਏਵਂ ਥੇਰਿਯਾ ਵੁਤ੍ਤੇ ਧੁਤ੍ਤਕੋ ਅਤ੍ਤਨੋ ਅਧਿਪ੍ਪਾਯਂ ਵਿਭਾਵੇਨ੍ਤੋ ‘‘ਦਹਰਾ ਚਾ’’ਤਿਆਦਿਨਾ ਦਸ ਗਾਥਾ ਅਭਾਸਿ. ਤਤ੍ਥ ਦਹਰਾਤਿ ਤਰੁਣੀ ਪਠਮੇ ਯੋਬ੍ਬਨੇ ਠਿਤਾ. ਅਪਾਪਿਕਾ ਚਸੀਤਿ ਰੂਪੇਨ ਅਲਾਮਿਕਾ ਚ ਅਸਿ, ਉਤ੍ਤਮਰੂਪਧਰਾ ਚਾਹੋਸੀਤਿ ਅਧਿਪ੍ਪਾਯੋ. ਕਿਂ ਤੇ ਪਬ੍ਬਜ੍ਜਾ ਕਰਿਸ੍ਸਤੀਤਿ ਤੁਯ੍ਹਂ ਏਵਂ ਪਠਮਵਯੇ ਠਿਤਾਯ ਰੂਪਸਮ੍ਪਨ੍ਨਾਯ ਪਬ੍ਬਜ੍ਜਾ ਕਿਂ ਕਰਿਸ੍ਸਤਿ, ਵੁਡ੍ਢਾਯ ਬੀਭਚ੍ਛਰੂਪਾਯ ਵਾ ਪਬ੍ਬਜਿਤਬ੍ਬਨ੍ਤਿ ਅਧਿਪ੍ਪਾਯੇਨ ਵਦਤਿ. ਨਿਕ੍ਖਿਪਾਤਿ ਛਡ੍ਡੇਹਿ. ‘‘ਉਕ੍ਖਿਪਾ’’ਤਿ ਵਾ ਪਾਠੋ, ਅਪਨੇਹੀਤਿ ਅਤ੍ਥੋ.

ਮਧੁਰਨ੍ਤਿ ਸੁਭਂ, ਸੁਗਨ੍ਧਨ੍ਤਿ ਅਤ੍ਥੋ. ਪਵਨ੍ਤੀਤਿ ਵਾਯਨ੍ਤਿ. ਸਬ੍ਬਸੋਤਿ ਸਮਨ੍ਤਤੋ. ਕੁਸੁਮਰਜੇਨ ਸਮੁਟ੍ਠਿਤਾ ਦੁਮਾਤਿ ਇਮੇ ਰੁਕ੍ਖਾ ਮਨ੍ਦਵਾਤੇਨ ਸਮੁਟ੍ਠਹਮਾਨਕੁਸੁਮਰੇਣੁਜਾਤੇਨ ਅਤ੍ਤਨੋ ਕੁਸੁਮਰਜੇਨ ਸਯਂ ਸਮੁਟ੍ਠਿਤਾ ਵਿਯ ਹੁਤ੍ਵਾ ਸਮਨ੍ਤਤੋ ਸੁਰਭੀ ਵਾਯਨ੍ਤਿ. ਪਠਮਵਸਨ੍ਤੋ ਸੁਖੋ ਉਤੂਤਿ ਅਯਂ ਪਠਮੋ ਵਸਨ੍ਤਮਾਸੋ ਸੁਖਸਮ੍ਫਸ੍ਸੋ ਚ ਉਤੁ ਵਤ੍ਤਤੀਤਿ ਅਤ੍ਥੋ.

ਕੁਸੁਮਿਤਸਿਖਰਾਤਿ ਸੁਪੁਪ੍ਫਿਤਗ੍ਗਾ. ਅਭਿਗਜ੍ਜਨ੍ਤਿਵ ਮਾਲੁਤੇਰਿਤਾਤਿ ਵਾਤੇਨ ਸਞ੍ਚਲਿਤਾ ਅਭਿਗਜ੍ਜਨ੍ਤਿਵ ਅਭਿਤ੍ਥਨਿਤਾ ਵਿਯ ਤਿਟ੍ਠਨ੍ਤਿ. ਯਦਿ ਏਕਾ ਵਨਮੋਗਹਿਸ੍ਸਸੀਤਿ ਸਚੇ ਤ੍ਵਂ ਏਕਿਕਾ ਵਨਮੋਗਾਹਿਸ੍ਸਸਿ, ਕਾ ਨਾਮ ਤੇ ਤਤ੍ਥ ਰਤਿ ਭਵਿਸ੍ਸਤੀਤਿ ਅਤ੍ਤਨਾ ਬਦ੍ਧਸੁਖਾਭਿਰਤ੍ਤਤ੍ਤਾ ਏਵਮਾਹ.

ਵਾਲ਼ਮਿਗਸਙ੍ਘਸੇਵਿਤਨ੍ਤਿ ਸੀਹਬ੍ਯਗ੍ਘਾਦਿਵਾਲ਼ਮਿਗਸਮੂਹੇਹਿ ਤਤ੍ਥ ਤਤ੍ਥ ਉਪਸੇਵਿਤਂ. ਕੁਞ੍ਜਰਮਤ੍ਤਕਰੇਣੁਲੋਲ਼ਿਤਨ੍ਤਿ ਮਤ੍ਤਕੁਞ੍ਜਰੇਹਿ ਹਤ੍ਥਿਨੀਹਿ ਚ ਮਿਗਾਨਂ ਚਿਤ੍ਤਤਾਪਨੇਨ ਰੁਕ੍ਖਗਚ੍ਛਾਦੀਨਂ ਸਾਖਾਭਞ੍ਜਨੇਨ ਚ ਆਲੋਲ਼ਿਤਪਦੇਸਂ. ਕਿਞ੍ਚਾਪਿ ਤਸ੍ਮਿਂ ਵਨੇ ਈਦਿਸਂ ਤਦਾ ਨਤ੍ਥਿ, ਵਨਂ ਨਾਮ ਏਵਰੂਪਨ੍ਤਿ ਤਂ ਭਿਂਸਾਪੇਤੁਕਾਮੋ ਏਵਮਾਹ. ਰਹਿਤਨ੍ਤਿ ਜਨਰਹਿਤਂ ਵਿਜਨਂ. ਭਿਂਸਨਕਨ੍ਤਿ ਭਯਜਨਕਂ.

ਤਪਨੀਯਕਤਾਵ ਧੀਤਿਕਾਤਿ ਰਤ੍ਤਸੁਵਣ੍ਣੇਨ ਵਿਚਰਿਤਾ ਧੀਤਲਿਕਾ ਵਿਯ ਸੁਕੁਸਲੇਨ ਯਨ੍ਤਾਚਰਿਯੇਨ ਯਨ੍ਤਯੋਗਵਸੇਨ ਸਜ੍ਜਿਤਾ ਸੁਵਣ੍ਣਪਟਿਮਾ ਵਿਯ ਵਿਚਰਸਿ, ਇਦਾਨੇਵ ਇਤੋ ਚਿਤੋ ਚ ਸਞ੍ਚਰਸਿ. ਚਿਤ੍ਤਲਤੇਵ ਅਚ੍ਛਰਾਤਿ ਚਿਤ੍ਤਲਤਾਨਾਮਕੇ ਉਯ੍ਯਾਨੇ ਦੇਵਚ੍ਛਰਾ ਵਿਯ. ਕਾਸਿਕਸੁਖੁਮੇਹੀਤਿ ਕਾਸਿਰਟ੍ਠੇ ਉਪ੍ਪਨ੍ਨੇਹਿ ਅਤਿਵਿਯ ਸੁਖੁਮੇਹਿ. ਵਗ੍ਗੁਭੀਤਿ ਸਿਨਿਦ੍ਧਮਟ੍ਠੇਹਿ. ਸੋਭਸੀ ਸੁਵਸਨੇਹਿ ਨੂਪਮੇਤਿ ਨਿਵਾਸਨਪਾਰੁਪਨਵਤ੍ਥੇਹਿ ਅਨੁਪਮੇ ਉਪਮਾਰਹਿਤੇ ਤ੍ਵਂ ਇਦਾਨਿ ਮੇ ਵਸਾਨੁਗੋ ਸੋਭਸੀਤਿ ਭਾਵਿਨਂ ਅਤ੍ਤਨੋ ਅਧਿਪ੍ਪਾਯਵਸੇਨ ਏਕਨ੍ਤਿਕਂ ਵਤ੍ਤਮਾਨਂ ਵਿਯ ਕਤ੍ਵਾ ਵਦਤਿ.

ਅਹਂ ਤਵ ਵਸਾਨੁਗੋ ਸਿਯਨ੍ਤਿ ਅਹਮ੍ਪਿ ਤੁਯ੍ਹਂ ਵਸਾਨੁਗੋ ਕਿਂਕਾਰਪਟਿਸ੍ਸਾਵੀ ਭਵੇਯ੍ਯਂ. ਯਦਿ ਵਿਹਰੇਮਸੇ ਕਾਨਨਨ੍ਤਰੇਤਿ ਯਦਿ ਮਯਂ ਉਭੋਪਿ ਵਨਨ੍ਤਰੇ ਸਹ ਵਸਾਮ ਰਮਾਮ. ਨ ਹਿ ਮਤ੍ਥਿ ਤਯਾ ਪਿਯਤ੍ਤਰੋਤਿ ਵਸਾਨੁਗਭਾਵਸ੍ਸ ਕਾਰਣਮਾਹ. ਪਾਣੋਤਿ ਸਤ੍ਤੋ, ਅਞ੍ਞੋ ਕੋਚਿਪਿ ਸਤ੍ਤੋ ਤਯਾ ਪਿਯਤਰੋ ਮਯ੍ਹਂ ਨ ਹਿ ਅਤ੍ਥੀਤਿ ਅਤ੍ਥੋ. ਅਥ ਵਾ ਪਾਣੋਤਿ ਅਤ੍ਤਨੋ ਜੀਵਿਤਂ ਸਨ੍ਧਾਯ ਵਦਤਿ, ਮਯ੍ਹਂ ਜੀਵਿਤਂ ਤਯਾ ਪਿਯਤਰਂ ਨ ਹਿ ਅਤ੍ਥੀਤਿ ਅਤ੍ਥੋ. ਕਿਨ੍ਨਰਿਮਨ੍ਦਲੋਚਨੇਤਿ ਕਿਨ੍ਨਰਿਯਾ ਵਿਯ ਮਨ੍ਦਪੁਥੁਵਿਲੋਚਨੇ.

ਯਦਿ ਮੇ ਵਚਨਂ ਕਰਿਸ੍ਸਸਿ, ਸੁਖਿਤਾ ਏਹਿ ਅਗਾਰਮਾਵਸਾਤਿ ਸਚੇ ਤ੍ਵਂ ਮਮ ਵਚਨਂ ਕਰਿਸ੍ਸਸਿ, ਏਕਾਸਨਂ ਏਕਸੇਯ੍ਯਂ ਬ੍ਰਹ੍ਮਚਰਿਯਦੁਕ੍ਖਂ ਪਹਾਯ ਏਹਿ ਕਾਮਭੋਗੇਹਿ ਸੁਖਿਤਾ ਹੁਤ੍ਵਾ ਅਗਾਰਂ ਅਜ੍ਝਾਵਸ. ‘‘ਸੁਖਿਤਾ ਹੇਤਿ ਅਗਾਰਮਾਵਸਨ੍ਤੀ’’ਤਿ ਕੇਚਿ ਪਠਨ੍ਤਿ, ਤੇਸਂ ਸੁਖਿਤਾ ਭਵਿਸ੍ਸਤਿ, ਅਗਾਰਂ ਅਜ੍ਝਾਵਸਨ੍ਤੀਤਿ ਅਤ੍ਥੋ. ਪਾਸਾਦਨਿਵਾਤਵਾਸਿਨੀਤਿ ਨਿਵਾਤੇਸੁ ਪਾਸਾਦੇਸੁ ਵਾਸਿਨੀ. ‘‘ਪਾਸਾਦਵਿਮਾਨਵਾਸਿਨੀ’’ਤਿ ਚ ਪਾਠੋ, ਵਿਮਾਨਸਦਿਸੇਸੁ ਪਾਸਾਦੇਸੁ ਵਾਸਿਨੀਤਿ ਅਤ੍ਥੋ. ਪਰਿਕਮ੍ਮਨ੍ਤਿ ਵੇਯ੍ਯਾਵਚ੍ਚਂ.

ਧਾਰਯਾਤਿ ਪਰਿਦਹ, ਨਿਵਾਸੇਹਿ ਚੇਵ ਉਤ੍ਤਰਿਯਞ੍ਚ ਕਰੋਹਿ. ਅਭਿਰੋਪੇਹੀਤਿ ਮਣ੍ਡਨਵਿਭੂਸਨਵਸੇਨ ਵਾ ਸਰੀਰਂ ਆਰੋਪਯ, ਅਲਙ੍ਕਰੋਹੀਤਿ ਅਤ੍ਥੋ. ਮਾਲਵਣ੍ਣਕਨ੍ਤਿ ਮਾਲਞ੍ਚੇਵ ਗਨ੍ਧਵਿਲੇਪਨਞ੍ਚ. ਕਞ੍ਚਨਮਣਿਮੁਤ੍ਤਕਨ੍ਤਿ ਕਞ੍ਚਨੇਨ ਮਣਿਮੁਤ੍ਤਾਹਿ ਚ ਯੁਤ੍ਤਂ, ਸੁਵਣ੍ਣਮਯਮਣਿਮੁਤ੍ਤਾਹਿ ਖਚਿਤਨ੍ਤਿ ਅਤ੍ਥੋ. ਬਹੁਨ੍ਤਿ ਹਤ੍ਥੂਪਗਾਦਿਭੇਦਤੋ ਬਹੁਪ੍ਪਕਾਰਂ. ਵਿਵਿਧਨ੍ਤਿ ਕਰਣਵਿਕਤਿਯਾ ਨਾਨਾਵਿਧਂ.

ਸੁਧੋਤਰਜਪਚ੍ਛਦਨ੍ਤਿ ਸੁਧੋਤਤਾਯ ਪਵਾਹਿਤਰਜਂ ਉਤ੍ਤਰਚ੍ਛਦਂ. ਸੁਭਨ੍ਤਿ ਸੋਭਨਂ. ਗੋਨਕਤੂਲਿਕਸਨ੍ਥਤਨ੍ਤਿ ਦੀਘਲੋਮਕਾਲ਼ਕੋਜਵੇਨ ਚੇਵ ਹਂਸਲੋਮਾਦਿਪੁਣ੍ਣਾਯ ਤੂਲਿਕਾਯ ਚ ਸਨ੍ਥਤਂ. ਨਵਨ੍ਤਿ ਅਭਿਨਵਂ. ਮਹਾਰਹਨ੍ਤਿ ਮਹਗ੍ਘਂ. ਚਨ੍ਦਨਮਣ੍ਡਿਤਸਾਰਗਨ੍ਧਿਕਨ੍ਤਿ ਗੋਸੀਸਕਾਦਿਸਾਰਚਨ੍ਦਨੇਨ ਮਣ੍ਡਿਤਤਾਯ ਸੁਰਭਿਗਨ੍ਧਿਕਂ, ਏਵਰੂਪਂ ਸਯਨਮਾਰੁਹ, ਤਂ ਆਰੁਹਿਤ੍ਵਾ ਯਥਾਸੁਖਂ ਸਯਾਹਿ ਚੇਵ ਨਿਸੀਦ ਚਾਤਿ ਅਤ੍ਥੋ.

ਉਪ੍ਪਲਂ ਚੁਦਕਾ ਸਮੁਗ੍ਗਤਨ੍ਤਿ ਚ-ਕਾਰੋ ਨਿਪਾਤਮਤ੍ਤਂ, ਉਦਕਤੋ ਉਗ੍ਗਤਂ ਉਟ੍ਠਿਤਂ ਅਚ੍ਚੁਗ੍ਗਮ੍ਮ ਠਿਤਂ ਸੁਫੁਲ੍ਲਮੁਪ੍ਪਲਂ. ਯਥਾ ਤਂ ਅਮਨੁਸ੍ਸਸੇਵਿਤਨ੍ਤਿ ਤਞ੍ਚ ਰਕ੍ਖਸਪਰਿਗ੍ਗਹਿਤਾਯ ਪੋਕ੍ਖਰਣਿਯਾ ਜਾਤਤ੍ਤਾ ਨਿਮ੍ਮਨੁਸ੍ਸੇਹਿ ਸੇਵਿਤਂ ਕੇਨਚਿ ਅਪਰਿਭੁਤ੍ਤਮੇਵ ਭਵੇਯ੍ਯ. ਏਵਂ ਤ੍ਵਂ ਬ੍ਰਹ੍ਮਚਾਰਿਨੀਤਿ ਏਵਮੇਵ ਤਂ ਸੁਟ੍ਠੁ ਫੁਲ੍ਲਮੁਪ੍ਪਲਂ ਵਿਯ ਤੁਵਂ ਬ੍ਰਹ੍ਮਚਾਰਿਨੀ. ਸਕੇਸਙ੍ਗੇਸੁ ਅਤ੍ਤਨੋ ਸਰੀਰਾਵਯਵੇਸੁ ਕੇਨਚਿ ਅਪਰਿਭੁਤ੍ਤੇਸੁਯੇਵ ਜਰਂ ਗਮਿਸ੍ਸਸਿ, ਮੁਧਾਯੇਵ ਜਰਾਜਿਣ੍ਣਾ ਭਵਿਸ੍ਸਸਿ.

ਏਵਂ ਧੁਤ੍ਤਕੇਨ ਅਤ੍ਤਨੋ ਅਧਿਪ੍ਪਾਯੇ ਪਕਾਸਿਤੇ ਥੇਰੀ ਸਰੀਰਸਭਾਵਵਿਭਾਵਨੇਨ ਤਂ ਤਤ੍ਥ ਵਿਚ੍ਛਿਨ੍ਦੇਨ੍ਤੀ ‘‘ਕਿਂ ਤੇ ਇਧਾ’’ਤਿ ਗਾਥਮਾਹ. ਤਸ੍ਸਤ੍ਥੋ – ਆਵੁਸੋ ਸੁਵਣ੍ਣਕਾਰਪੁਤ੍ਤ, ਕੇਸਾਦਿਕੁਣਪਪੂਰੇ ਏਕਨ੍ਤੇਨ ਭੇਦਨਧਮ੍ਮੇ ਸੁਸਾਨਵਡ੍ਢਨੇ, ਇਧ ਇਮਸ੍ਮਿਂ ਕਾਯਸਞ੍ਞਿਤੇ ਅਸੁਚਿਕਲ਼ੇਵਰੇ ਕਿਂ ਨਾਮ ਤਵ ਸਾਰਨ੍ਤਿ ਸਮ੍ਮਤਂ ਸਮ੍ਭਾਵਿਤਂ, ਯਂ ਦਿਸ੍ਵਾ ਵਿਮਨੋ ਅਞ੍ਞਤਰਸ੍ਮਿਂ ਆਰਮ੍ਮਣੇ ਵਿਗਤਮਨਸਙ੍ਕਪ੍ਪੋ, ਏਤ੍ਥੇਵ ਵਾ ਅਵਿਮਨੋ ਸੋਮਨਸ੍ਸਿਕੋ ਹੁਤ੍ਵਾ ਉਦਿਕ੍ਖਸਿ, ਤਂ ਮਯ੍ਹਂ ਕਥੇਹੀਤਿ.

ਤਂ ਸੁਤ੍ਵਾ ਧੁਤ੍ਤਕੋ ਕਿਞ੍ਚਾਪਿ ਤਸ੍ਸਾ ਰੂਪਂ ਚਾਤੁਰਿਯਸੋਭਿਤਂ, ਪਠਮਦਸ੍ਸਨਤੋ ਪਨ ਪਟ੍ਠਾਯ ਯਸ੍ਮਿਂ ਦਿਟ੍ਠਿਪਾਤੇ ਪਟਿਬਦ੍ਧਚਿਤ੍ਤੋ, ਤਮੇਵ ਅਪਦਿਸਨ੍ਤੋ ‘‘ਅਕ੍ਖੀਨਿ ਚ ਤੂਰਿਯਾਰਿਵਾ’’ਤਿਆਦਿਮਾਹ. ਕਾਮਞ੍ਚਾਯਂ ਥੇਰੀ ਸੁਟ੍ਠੁ ਸਂਯਤਤਾਯ ਸਨ੍ਤਿਨ੍ਦ੍ਰਿਯਾ, ਤਾਯ ਥਿਰਵਿਪ੍ਪਸਨ੍ਨਸੋਮ੍ਮਸਨ੍ਤਨਯਨਨਿਪਾਤੇਸੁ ਕਮ੍ਮਾਨੁਭਾਵਨਿਪ੍ਫਨ੍ਨੇਸੁ ਪਸਨ੍ਨਪਞ੍ਚਪ੍ਪਸਾਦਪਟਿਮਣ੍ਡਿਤੇਸੁ ਨਯਨੇਸੁ ਲਬ੍ਭਮਾਨੇ ਪਭਾਵਿਸਿਟ੍ਠਚਾਤੁਰਿਯੇ ਦਿਟ੍ਠਿਪਾਤੇ, ਯਸ੍ਮਾ ਸਯਂ ਚਰਿਤਹਾਵਭਾਵਵਿਲਾਸਾਦਿਪਰਿਕਪ੍ਪਵਞ੍ਚਿਤੋ ਸੋ ਧੁਤ੍ਤੋ ਜਾਤੋ, ਤਸ੍ਮਾਸ੍ਸ ਦਿਟ੍ਠਿਰਾਗੋ ਸਵਿਸੇਸਂ ਵੇਪੁਲ੍ਲਂ ਅਗਮਾਸਿ. ਤਤ੍ਥ ਅਕ੍ਖੀਨਿ ਚ ਤੂਰਿਯਾਰਿਵਾਤਿ ਤੂਰਿ ਵੁਚ੍ਚਤਿ ਮਿਗੀ, ਚ-ਸਦ੍ਦੋ ਨਿਪਾਤਮਤ੍ਤਂ, ਮਿਗਚ੍ਛਾਪਾਯ ਵਿਯ ਤੇ ਅਕ੍ਖੀਨੀਤਿ ਅਤ੍ਥੋ. ‘‘ਕੋਰਿਯਾਰਿਵਾ’’ਤਿ ਵਾ ਪਾਲ਼ਿ, ਕੁਞ੍ਚਕਾਰਕੁਕ੍ਕੁਟਿਯਾਤਿ ਵੁਤ੍ਤਂ ਹੋਤਿ. ਕਿਨ੍ਨਰਿਯਾਰਿਵ ਪਬ੍ਬਤਨ੍ਤਰੇਤਿ ਪਬ੍ਬਤਕੁਚ੍ਛਿਯਂ ਵਿਚਰਮਾਨਾਯ ਕਿਨ੍ਨਰਿਵਨਿਤਾਯ ਵਿਯ ਚ ਤੇ ਅਕ੍ਖੀਨੀਤਿ ਅਤ੍ਥੋ. ਤਵ ਮੇ ਨਯਨਾਨਿ ਦਕ੍ਖਿਯਾਤਿ ਤਵ ਵੁਤ੍ਤਗੁਣਵਿਸੇਸਾਨਿ ਨਯਨਾਨਿ ਦਿਸ੍ਵਾ, ਭਿਯ੍ਯੋ ਉਪਰੂਪਰਿ ਮੇ ਕਾਮਾਭਿਰਤਿ ਪਵਡ੍ਢਤਿ.

ਉਪ੍ਪਲਸਿਖਰੋਪਮਾਨਿ ਤੇਤਿ ਰਤ੍ਤੁਪ੍ਪਲਅਗ੍ਗਸਦਿਸਾਨਿ ਪਮ੍ਹਾਨਿ ਤਵ. ਵਿਮਲੇਤਿ ਨਿਮ੍ਮਲੇ. ਹਾਟਕਸਨ੍ਨਿਭੇਤਿ ਕਞ੍ਚਨਰੂਪਕਸ੍ਸ ਮੁਖਸਦਿਸੇ ਤੇ ਮੁਖੇ, ਨਯਨਾਨਿ ਦਕ੍ਖਿਯਾਤਿ ਯੋਜਨਾ.

ਅਪਿ ਦੂਰਗਤਾਤਿ ਦੂਰਂ ਠਾਨਂ ਗਤਾਪਿ. ਸਰਮ੍ਹਸੇਤਿ ਅਞ੍ਞਂ ਕਿਞ੍ਚਿ ਅਚਿਨ੍ਤੇਤ੍ਵਾ ਤਵ ਨਯਨਾਨਿ ਏਵ ਅਨੁਸ੍ਸਰਾਮਿ. ਆਯਤਪਮ੍ਹੇਤਿ ਦੀਘਪਖੁਮੇ. ਵਿਸੁਦ੍ਧਦਸ੍ਸਨੇਤਿ ਨਿਮ੍ਮਲਲੋਚਨੇ. ਨ ਹਿ ਮਤ੍ਥਿ ਤਯਾ ਪਿਯਤ੍ਤਰੋ ਨਯਨਾਤਿ ਤਵ ਨਯਨਤੋ ਅਞ੍ਞੋ ਕੋਚਿ ਮਯ੍ਹਂ ਪਿਯਤਰੋ ਨਤ੍ਥਿ. ਤਯਾਤਿ ਹਿ ਸਾਮਿਅਤ੍ਥੇ ਏਵ ਕਰਣਵਚਨਂ.

ਏਵਂ ਚਕ੍ਖੁਸਮ੍ਪਤ੍ਤਿਯਾ ਉਮ੍ਮਾਦਿਤਸ੍ਸ ਵਿਯ ਤਂ ਤਂ ਵਿਪ੍ਪਲਪਤੋ ਤਸ੍ਸ ਪੁਰਿਸਸ੍ਸ ਮਨੋਰਥਂ ਵਿਪਰਿਵਤ੍ਤੇਨ੍ਤੀ ਥੇਰੀ ‘‘ਅਪਥੇਨਾ’’ਤਿਆਦਿਨਾ ਦ੍ਵਾਦਸ ਗਾਥਾ ਅਭਾਸਿ. ਤਤ੍ਥ ਅਪਥੇਨ ਪਯਾਤੁਮਿਚ੍ਛਸੀਤਿ, ਆਵੁਸੋ ਸੁਵਣ੍ਣਕਾਰਪੁਤ੍ਤ, ਸਨ੍ਤੇ ਅਞ੍ਞਸ੍ਮਿਂ ਇਤ੍ਥਿਜਨੇ ਯੋ ਤ੍ਵਂ ਬੁਦ੍ਧਸੁਤਂ ਬੁਦ੍ਧਸ੍ਸ ਭਗਵਤੋ ਓਰਸਧੀਤਰਂ ਮਂ ਮਗ੍ਗਯਸਿ ਪਤ੍ਥੇਸਿ, ਸੋ ਤ੍ਵਂ ਸਨ੍ਤੇ ਖੇਮੇ ਉਜੁਮਗ੍ਗੇ ਅਪਥੇਨ ਕਣ੍ਟਕਨਿਵੁਤੇਨ ਸਭਯੇਨ ਕੁਮ੍ਮਗ੍ਗੇਨ ਪਯਾਤੁਮਿਚ੍ਛਸਿ ਪਟਿਪਜ੍ਜਿਤੁਕਾਮੋਸਿ, ਚਨ੍ਦਂ ਕੀਲ਼ਨਕਂ ਗਵੇਸਸਿ ਚਨ੍ਦਮਣ੍ਡਲਂ ਕੀਲ਼ਾਗੋਲ਼ਕਂ ਕਾਤੁਕਾਮੋਸਿ, ਮੇਰੁਂ ਲਙ੍ਘੇਤੁਮਿਚ੍ਛਸਿ ਚਤੁਰਾਸੀਤਿਯੋਜਨਸਹਸ੍ਸੁਬ੍ਬੇਧਂ ਸਿਨੇਰੁਪਬ੍ਬਤਰਾਜਂ ਲਙ੍ਘਯਿਤ੍ਵਾ ਅਪਰਭਾਗੇ ਠਾਤੁਕਾਮੋਸਿ, ਸੋ ਤ੍ਵਂ ਮਂ ਬੁਦ੍ਧਸੁਤਂ ਮਗ੍ਗਯਸੀਤਿ ਯੋਜਨਾ.

ਇਦਾਨਿ ਤਸ੍ਸ ਅਤ੍ਤਨੋ ਅਵਿਸਯਭਾਵਂ ਪਤ੍ਥਨਾਯ ਚ ਵਿਘਾਤਾਵਹਤਂ ਦਸ੍ਸੇਤੁਂ ‘‘ਨਤ੍ਥੀ’’ਤਿਆਦਿ ਵੁਤ੍ਤਂ. ਤਤ੍ਥ ਰਾਗੋ ਯਤ੍ਥਪਿ ਦਾਨਿ ਮੇ ਸਿਯਾਤਿ ਯਤ੍ਥ ਇਦਾਨਿ ਮੇ ਰਾਗੋ ਸਿਯਾ ਭਵੇਯ੍ਯ, ਤਂ ਆਰਮ੍ਮਣਂ ਸਦੇਵਕੇ ਲੋਕੇ ਨਤ੍ਥਿ ਏਵ. ਨਪਿ ਨਂ ਜਾਨਾਮਿ ਕੀਰਿਸੋਤਿ ਨਂ ਰਾਗਂ ਕੀਰਿਸੋਤਿਪਿ ਨ ਜਾਨਾਮਿ. ਅਥ ਮਗ੍ਗੇਨ ਹਤੋ ਸਮੂਲਕੋਤਿ ਅਥਾਤਿ ਨਿਪਾਤਮਤ੍ਤਂ. ਅਯੋਨਿਸੋਮਨਸਿਕਾਰਸਙ੍ਖਾਤੇਨ ਮੂਲੇਨ ਸਮੂਲਕੋ ਰਾਗੋ ਅਰਿਯਮਗ੍ਗੇਨ ਹਤੋ ਸਮੁਗ੍ਘਾਤਿਤੋ.

ਇਙ੍ਗਾਲਕੁਯਾਤਿ ਅਙ੍ਗਾਰਕਾਸੁਯਾ. ਉਜ੍ਝਿਤੋਤਿ ਵਾਤੁਕ੍ਖਿਤ੍ਤੋ ਵਿਯ ਯੋ ਕੋਚਿ, ਦਹਨਿਯਾ ਇਨ੍ਧਨਂ ਵਿਯਾਤਿ ਅਤ੍ਥੋ. ਵਿਸਪਤ੍ਤੋਰਿਵਾਤਿ ਵਿਸਗਤਭਾਜਨਂ ਵਿਯ. ਅਗ੍ਗਿਤੋ ਕਤੋਤਿ ਅਗ੍ਗਿਤੋ ਅਙ੍ਗਾਰਤੋ ਅਪਗਤੋ ਕਤੋ, ਵਿਸਸ੍ਸ ਲੇਸਮ੍ਪਿ ਅਸੇਸੇਤ੍ਵਾ ਅਪਨੀਤੋ ਵਿਨਾਸਿਤੋਤਿ ਅਤ੍ਥੋ.

ਯਸ੍ਸਾ ਸਿਯਾ ਅਪਚ੍ਚਵੇਕ੍ਖਿਤਨ੍ਤਿ ਯਸ੍ਸਾ ਇਤ੍ਥਿਯਾ ਇਦਂ ਖਨ੍ਧਪਞ੍ਚਕਂ ਞਾਣੇਨ ਅਪ੍ਪਟਿਵੇਕ੍ਖਿਤਂ ਅਪਰਿਞ੍ਞਾਤਂ ਸਿਯਾ. ਸਤ੍ਤਾ ਵਾ ਅਨੁਸਾਸਿਤੋ ਸਿਯਾਤਿ ਸਤ੍ਤਾ ਵਾ ਧਮ੍ਮਸਰੀਰਸ੍ਸ ਅਦਸ੍ਸਨੇਨ ਯਸ੍ਸਾ ਇਤ੍ਥਿਯਾ ਅਨਨੁਸਾਸਿਤੋ ਸਿਯਾ. ਤ੍ਵਂ ਤਾਦਿਸਿਕਂ ਪਲੋਭਯਾਤਿ, ਆਵੁਸੋ, ਤ੍ਵਂ ਤਥਾਰੂਪਂ ਅਪਰਿਮਦ੍ਦਿਤਸਙ੍ਖਾਰਂ ਅਪਚ੍ਚਵੇਕ੍ਖਿਤਲੋਕੁਤ੍ਤਰਧਮ੍ਮਂ ਕਾਮੇਹਿ ਪਲੋਭਯ ਉਪਗਚ੍ਛ. ਜਾਨਨ੍ਤਿਂ ਸੋ ਇਮਂ ਵਿਹਞ੍ਞਸੀਤਿ ਸੋ ਤ੍ਵਂ ਪਵਤ੍ਤਿਂ ਨਿਵਤ੍ਤਿਞ੍ਚ ਯਾਥਾਵਤੋ ਜਾਨਨ੍ਤਿਂ ਪਟਿਵਿਦ੍ਧਸਚ੍ਚਂ ਇਮਂ ਸੁਭਂ ਭਿਕ੍ਖੁਨਿਂ ਆਗਮ੍ਮ ਵਿਹਞ੍ਞਸਿ, ਸਮ੍ਪਤਿ ਆਯਤਿਞ੍ਚ ਵਿਘਾਤਂ ਦੁਕ੍ਖਂ ਆਪਜ੍ਜਸਿ.

ਇਦਾਨਿਸ੍ਸ ਵਿਘਾਤਾਪਤ੍ਤਿਤਂ ਕਾਰਣਵਿਭਾਵਨੇਨ ਦਸ੍ਸੇਨ੍ਤੀ ‘‘ਮਯ੍ਹਂ ਹੀ’’ਤਿਆਦਿਮਾਹ. ਤਤ੍ਥ ਹੀਤਿ ਹੇਤੁਅਤ੍ਥੇ ਨਿਪਾਤੋ. ਅਕ੍ਕੁਟ੍ਠਵਨ੍ਦਿਤੇਤਿ ਅਕ੍ਕੋਸੇ ਵਨ੍ਦਨਾਯ ਚ. ਸੁਖਦੁਕ੍ਖੇਤਿ ਸੁਖੇ ਚ ਦੁਕ੍ਖੇ ਚ, ਇਟ੍ਠਾਨਿਟ੍ਠਵਿਸਯਸਮਾਯੋਗੇ ਵਾ. ਸਤੀ ਉਪਟ੍ਠਿਤਾਤਿ ਪਚ੍ਚਵੇਕ੍ਖਣਯੁਤ੍ਤਾ ਸਤਿ ਸਬ੍ਬਕਾਲਂ ਉਪਟ੍ਠਿਤਾ. ਸਙ੍ਖਤਮਸੁਭਨ੍ਤਿ ਜਾਨਿਯਾਤਿ ਤੇਭੂਮਕਂ ਸਙ੍ਖਾਰਗਤਂ ਕਿਲੇਸਾਸੁਚਿਪਗ੍ਘਰਣੇਨ ਅਸੁਭਨ੍ਤਿ ਞਤ੍ਵਾ. ਸਬ੍ਬਤ੍ਥੇਵਾਤਿ ਸਬ੍ਬਸ੍ਮਿਂਯੇਵ ਭਵਤ੍ਤਯੇ ਮਯ੍ਹਂ ਮਨੋ ਤਣ੍ਹਾਲੇਪਾਦਿਨਾ ਨ ਉਪਲਿਮ੍ਪਤਿ.

ਮਗ੍ਗਟ੍ਠਙ੍ਗਿਕਯਾਨਯਾਯਿਨੀਤਿ ਅਟ੍ਠਙ੍ਗਿਕਮਗ੍ਗਸਙ੍ਖਾਤੇਨ ਅਰਿਯਯਾਨੇਨ ਨਿਬ੍ਬਾਨਪੁਰਂ ਯਾਯਿਨੀ ਉਪਗਤਾ. ਉਦ੍ਧਟਸਲ੍ਲਾਤਿ ਅਤ੍ਤਨੋ ਸਨ੍ਤਾਨਤੋ ਸਮੁਦ੍ਧਟਰਾਗਾਦਿਸਲ੍ਲਾ.

ਸੁਚਿਤ੍ਤਿਤਾਤਿ ਹਤ੍ਥਪਾਦਮੁਖਾਦਿਆਕਾਰੇਨ ਸੁਟ੍ਠੁ ਚਿਤ੍ਤਿਤਾ ਵਿਰਚਿਤਾ. ਸੋਮ੍ਭਾਤਿ ਸੁਮ੍ਭਕਾ. ਦਾਰੁਕਪਿਲ੍ਲਕਾਨਿ ਵਾਤਿ ਦਾਰੁਦਣ੍ਡਾਦੀਹਿ ਉਪਰਚਿਤਰੂਪਕਾਨਿ. ਤਨ੍ਤੀਹੀਤਿ ਨ੍ਹਾਰੁਸੁਤ੍ਤਕੇਹਿ. ਖੀਲਕੇਹੀਤਿ ਹਤ੍ਥਪਾਦਪਿਟ੍ਠਿਕਣ੍ਣਾਦਿਅਤ੍ਥਾਯ ਠਪਿਤਦਣ੍ਡੇਹਿ. ਵਿਨਿਬਦ੍ਧਾਤਿ ਵਿਵਿਧੇਨਾਕਾਰੇਨ ਬਦ੍ਧਾ. ਵਿਵਿਧਂ ਪਨਚ੍ਚਕਾਤਿ ਯਨ੍ਤਸੁਤ੍ਤਾਦੀਨਂ ਅਞ੍ਛਨਵਿਸ੍ਸਜ੍ਜਨਾਦਿਨਾ ਪਟ੍ਠਪਿਤਨਚ੍ਚਕਾ, ਪਨਚ੍ਚਨ੍ਤਾ ਵਿਯ ਦਿਟ੍ਠਾਤਿ ਯੋਜਨਾ.

ਤਮ੍ਹੁਦ੍ਧਟੇ ਤਨ੍ਤਿਖੀਲਕੇਤਿ ਸਨ੍ਨਿਵੇਸਵਿਸਿਟ੍ਠਰਚਨਾਵਿਸੇਸਯੁਤ੍ਤਂ ਉਪਾਦਾਯ ਰੂਪਕਸਮਞ੍ਞਾ ਤਮ੍ਹਿ ਤਨ੍ਤਿਮ੍ਹਿ ਖੀਲਕੇ ਚ ਠਾਨਤੋ ਉਦ੍ਧਟੇ ਬਨ੍ਧਨ੍ਤੋ ਵਿਸ੍ਸਟ੍ਠੇ, ਵਿਸੁਂ ਕਰਣੇਨ ਅਞ੍ਞਮਞ੍ਞਂ ਵਿਕਲੇ, ਤਹਿਂ ਤਹਿਂ ਖਿਪਨੇਨ ਪਰਿਕ੍ਰਿਤੇ ਵਿਕਿਰਿਤੇ. ਨ ਵਿਨ੍ਦੇਯ੍ਯ ਖਣ੍ਡਸੋ ਕਤੇਤਿ ਪੋਤ੍ਥਕਰੂਪਸ੍ਸ ਅਵਯਵੇ ਖਣ੍ਡਾਖਣ੍ਡਿਤੇ ਕਤੇ ਪੋਤ੍ਥਕਰੂਪਂ ਨ ਵਿਨ੍ਦੇਯ੍ਯ, ਨ ਉਪਲਭੇਯ੍ਯ. ਏਵਂ ਸਨ੍ਤੇ ਕਿਮ੍ਹਿ ਤਤ੍ਥ ਮਨਂ ਨਿਵੇਸਯੇ ਤਸ੍ਮਿਂ ਪੋਤ੍ਥਕਰੂਪਾਵਯਵੇ ਕਿਮ੍ਹਿ ਕਿਂ ਖਾਣੁਕੇ, ਉਦਾਹੁ ਰਜ੍ਜੁਕੇ, ਮਤ੍ਤਿਕਾਪਿਣ੍ਡਾਦਿਕੇ ਵਾ ਮਨਂ ਮਨਸਞ੍ਞਂ ਨਿਵੇਸੇਯ੍ਯ, ਵਿਸਙ੍ਖਾਰੇ ਅਵਯਵੇ ਸਾ ਸਞ੍ਞਾ ਕਦਾਚਿਪਿ ਨਪਤੇਯ੍ਯਾਤਿ ਅਤ੍ਥੋ.

ਤਥੂਪਮਾਤਿ ਤਂਸਦਿਸਾ ਤੇਨ ਪੋਤ੍ਥਕਰੂਪੇਨ ਸਦਿਸਾ. ਕਿਨ੍ਤਿ ਚੇ ਆਹ ‘‘ਦੇਹਕਾਨੀ’’ਤਿਆਦਿ. ਤਤ੍ਥ ਦੇਹਕਾਨੀਤਿ ਹਤ੍ਥਪਾਦਮੁਖਾਦਿਦੇਹਾਵਯਵਾ. ਮਨ੍ਤਿ ਮੇ ਪਟਿਬਦ੍ਧਾ ਉਪਟ੍ਠਹਨ੍ਤਿ. ਤੇਹਿ ਧਮ੍ਮੇਹੀਤਿ ਤੇਹਿ ਪਥਵਿਆਦੀਹਿ ਚ ਚਕ੍ਖਾਦੀਹਿ ਚ ਧਮ੍ਮੇਹਿ. ਵਿਨਾ ਨ ਵਤ੍ਤਨ੍ਤੀਤਿ ਨ ਹਿ ਤਥਾ ਤਥਾ ਸਨ੍ਨਿਵਿਟ੍ਠੇ ਪਥਵਿਆਦਿਧਮ੍ਮੇ ਮੁਞ੍ਚਿਤ੍ਵਾ ਦੇਹਾ ਨਾਮ ਸਨ੍ਤਿ. ਧਮ੍ਮੇਹਿ ਵਿਨਾ ਨ ਵਤ੍ਤਤੀਤਿ ਦੇਹੋ ਅਵਯਵੇਹਿ ਅਵਯਵਧਮ੍ਮੇਹਿ ਵਿਨਾ ਨ ਵਤ੍ਤਤਿ ਨ ਉਪਲਬ੍ਭਤਿ. ਏਵਂ ਸਨ੍ਤੇ ਕਿਮ੍ਹਿ ਤਤ੍ਥ ਮਨਂ ਨਿਵੇਸਯੇਤਿ ਕਿਮ੍ਹਿ ਕਿਂ ਪਥਵਿਯਂ, ਉਦਾਹੁ ਆਪਾਦਿਕੇ ਦੇਹੋਤਿ ਵਾ ਹਤ੍ਥਪਾਦਾਦੀਨੀਤਿ ਵਾ ਮਨਂ ਮਨਸਞ੍ਞਂ ਨਿਵੇਸੇਯ੍ਯ. ਯਸ੍ਮਾ ਪਥਵਿਆਦਿਪਸਾਦਧਮ੍ਮਮਤ੍ਤੇ ਏਸਾ ਸਮਞ੍ਞਾ, ਯਦਿਦਂ ਦੇਹੋਤਿ ਵਾ ਹਤ੍ਥਪਾਦਾਦੀਨੀਤਿ ਵਾ ਸਤ੍ਤੋਤਿ ਵਾ ਇਤ੍ਥੀਤਿ ਵਾ ਪੁਰਿਸੋਤਿ ਵਾ, ਤਸ੍ਮਾ ਨ ਏਤ੍ਥ ਜਾਨਤੋ ਕੋਚਿ ਅਭਿਨਿਵੇਸੋ ਹੋਤੀਤਿ.

ਯਥਾ ਹਰਿਤਾਲੇਨ ਮਕ੍ਖਿਤਂ, ਅਦ੍ਦਸ ਚਿਤ੍ਤਿਕਂ ਭਿਤ੍ਤਿਯਾ ਕਤਨ੍ਤਿ ਯਥਾ ਕੁਸਲੇਨ ਚਿਤ੍ਤਕਾਰੇਨ ਭਿਤ੍ਤਿਯਂ ਹਰਿਤਾਲੇਨ ਮਕ੍ਖਿਤਂ ਲਿਤ੍ਤਂ ਤੇਨ ਲੇਪਂ ਦਤ੍ਵਾ ਕਤਂ ਆਲਿਖਿਤਂ ਚਿਤ੍ਤਿਕਂ ਇਤ੍ਥਿਰੂਪਂ ਅਦ੍ਦਸ ਪਸ੍ਸੇਯ੍ਯ. ਤਤ੍ਥ ਯਾ ਉਪਥਮ੍ਭਨਖੇਪਨਾਦਿਕਿਰਿਯਾਸਮ੍ਪਤ੍ਤਿਯਾ ਮਾਨੁਸਿਕਾ ਨੁ ਖੋ ਅਯਂ ਭਿਤ੍ਤਿ ਅਪਸ੍ਸਾਯ ਠਿਤਾਤਿ ਸਞ੍ਞਾ, ਸਾ ਨਿਰਤ੍ਥਕਾ ਮਨੁਸ੍ਸਭਾਵਸਙ੍ਖਾਤਸ੍ਸ ਅਤ੍ਥਸ੍ਸ ਤਤ੍ਥ ਅਭਾਵਤੋ, ਮਾਨੁਸੀਤਿ ਪਨ ਕੇਵਲਂ ਤਹਿਂ ਤਸ੍ਸ ਚ ਵਿਪਰੀਤਦਸ੍ਸਨਂ, ਯਾਥਾਵਤੋ ਗਹਣਂ ਨ ਹੋਤਿ, ਧਮ੍ਮਪੁਞ੍ਜਮਤ੍ਤੇ ਇਤ੍ਥਿਪੁਰਿਸਾਦਿਗਹਣਮ੍ਪਿ ਏਵਂ ਸਮ੍ਪਦਮਿਦਂ ਦਟ੍ਠਬ੍ਬਨ੍ਤਿ ਅਧਿਪ੍ਪਾਯੋ.

ਮਾਯਂ ਵਿਯ ਅਗ੍ਗਤੋ ਕਤਨ੍ਤਿ ਮਾਯਾਕਾਰੇਨ ਪੁਰਤੋ ਉਪਟ੍ਠਾਪਿਤਂ ਮਾਯਾਸਦਿਸਂ. ਸੁਪਿਨਨ੍ਤੇਵ ਸੁਵਣ੍ਣਪਾਦਪਨ੍ਤਿ ਸੁਪਿਨਮੇਵ ਸੁਪਿਨਨ੍ਤਂ, ਤਤ੍ਥ ਉਪਟ੍ਠਿਤਸੁਵਣ੍ਣਮਯਰੁਕ੍ਖਂ ਵਿਯ. ਉਪਗਚ੍ਛਸਿ ਅਨ੍ਧ ਰਿਤ੍ਤਕਨ੍ਤਿ ਅਨ੍ਧਬਾਲ ਰਿਤ੍ਤਕਂ ਤੁਚ੍ਛਕਂ ਅਨ੍ਤੋਸਾਰਰਹਿਤਂ ਇਮਂ ਅਤ੍ਤਭਾਵਂ ‘‘ਏਤਂ ਮਮਾ’’ਤਿ ਸਾਰਵਨ੍ਤਂ ਵਿਯ ਉਪਗਚ੍ਛਸਿ ਅਭਿਨਿਵਿਸਸਿ. ਜਨਮਜ੍ਝੇਰਿਵ ਰੁਪ੍ਪਰੂਪਕਨ੍ਤਿ ਮਾਯਾਕਾਰੇਨ ਮਹਾਜਨਮਜ੍ਝੇ ਦਸ੍ਸਿਤਂ ਰੂਪਿਯਰੂਪਸਦਿਸਂ ਸਾਰਂ ਵਿਯ ਉਪਟ੍ਠਹਨ੍ਤਂ, ਅਸਾਰਨ੍ਤਿ ਅਤ੍ਥੋ.

ਵਟ੍ਟਨਿਰਿਵਾਤਿ ਲਾਖਾਯ ਗੁਲ਼ਿਕਾ ਵਿਯ. ਕੋਟਰੋਹਿਤਾਤਿ ਕੋਟਰੇ ਰੁਕ੍ਖਸੁਸਿਰੇ ਠਪਿਤਾ. ਮਜ੍ਝੇ ਪੁਬ੍ਬੁਲ਼ਕਾਤਿ ਅਕ੍ਖਿਦਲਮਜ੍ਝੇ ਠਿਤਜਲਪੁਬ੍ਬੁਲ਼ਸਦਿਸਾ. ਸਅਸ੍ਸੁਕਾਤਿ ਅਸ੍ਸੁਜਲਸਹਿਤਾ. ਪੀਲ਼ਕੋਲ਼ਿਕਾਤਿ ਅਕ੍ਖਿਗੂਥਕੋ. ਏਤ੍ਥ ਜਾਯਤੀਤਿ ਏਤਸ੍ਮਿਂ ਅਕ੍ਖਿਮਣ੍ਡਲੇ ਉਭੋਸੁ ਕੋਟੀਸੁ ਵਿਸਗਨ੍ਧਂ ਵਾਯਨ੍ਤੋ ਨਿਬ੍ਬਤ੍ਤਤਿ. ਪੀਲ਼ਕੋਲ਼ਿਕਾਤਿ ਵਾ ਅਕ੍ਖਿਦਲੇਸੁ ਨਿਬ੍ਬਤ੍ਤਨਕਾ ਪੀਲ਼ਕਾ ਵੁਚ੍ਚਤਿ. ਵਿਵਿਧਾਤਿ ਸੇਤਨੀਲਮਣ੍ਡਲਾਨਞ੍ਚੇਵ ਰਤ੍ਤਪੀਤਾਦੀਨਂ ਸਤ੍ਤਨ੍ਨਂ ਪਟਲਾਨਞ੍ਚ ਵਸੇਨ ਅਨੇਕਵਿਧਾ. ਚਕ੍ਖੁਵਿਧਾਤਿ ਚਕ੍ਖੁਭਾਗਾ ਚਕ੍ਖੁਪ੍ਪਕਾਰਾ ਵਾ ਤਸ੍ਸ ਅਨੇਕਕਲਾਪਗਤਭਾਵਤੋ. ਪਿਣ੍ਡਿਤਾਤਿ ਸਮੁਦਿਤਾ.

ਏਵਂ ਚਕ੍ਖੁਸ੍ਮਿਂ ਸਾਰਜ੍ਜਨ੍ਤਸ੍ਸ ਚਕ੍ਖੁਨੋ ਅਸੁਭਤਂ ਅਨਵਟ੍ਠਿਤਤਾਯ ਅਨਿਚ੍ਚਤਞ੍ਚ ਵਿਭਾਵੇਸਿ. ਵਿਭਾਵੇਤ੍ਵਾ ਚ ਯਥਾ ਨਾਮ ਕੋਚਿ ਲੋਭਨੀਯਂ ਭਣ੍ਡਂ ਗਹੇਤ੍ਵਾ ਚੋਰਕਨ੍ਤਾਰਂ ਪਟਿਪਜ੍ਜਨ੍ਤੋ ਚੋਰੇਹਿ ਪਲਿਬੁਦ੍ਧੋ ਤਂ ਲੋਭਨੀਯਭਣ੍ਡਂ ਦਤ੍ਵਾ ਗਚ੍ਛਤਿ, ਏਵਮੇਵ ਚਕ੍ਖੁਮ੍ਹਿ ਸਾਰਤ੍ਤੇਨ ਤੇਨ ਪੁਰਿਸੇਨ ਪਲਿਬੁਦ੍ਧਾ ਥੇਰੀ ਅਤ੍ਤਨੋ ਚਕ੍ਖੁਂ ਉਪ੍ਪਾਟੇਤ੍ਵਾ ਤਸ੍ਸ ਅਦਾਸਿ. ਤੇਨ ਵੁਤ੍ਤਂ ‘‘ਉਪ੍ਪਾਟਿਯ ਚਾਰੁਦਸ੍ਸਨਾ’’ਤਿਆਦਿ. ਤਤ੍ਥ ਉਪ੍ਪਾਟਿਯਾਤਿ ਉਪ੍ਪਾਟੇਤ੍ਵਾ ਚਕ੍ਖੁਕੂਪਤੋ ਨੀਹਰਿਤ੍ਵਾ. ਚਾਰੁਦਸ੍ਸਨਾਤਿ ਪਿਯਦਸ੍ਸਨਾ ਮਨੋਹਰਦਸ੍ਸਨਾ. ਨ ਚ ਪਜ੍ਜਿਤ੍ਥਾਤਿ ਤਸ੍ਮਿਂ ਚਕ੍ਖੁਸ੍ਮਿਂ ਸਙ੍ਗਂ ਨਾਪਜ੍ਜਿ. ਅਸਙ੍ਗਮਾਨਸਾਤਿ ਕਤ੍ਥਚਿਪਿ ਆਰਮ੍ਮਣੇ ਅਨਾਸਤ੍ਤਚਿਤ੍ਤਾ. ਹਨ੍ਦ ਤੇ ਚਕ੍ਖੁਨ੍ਤਿ ਤਯਾ ਕਾਮਿਤਂ ਤਤੋ ਏਵ ਮਯਾ ਦਿਨ੍ਨਤ੍ਤਾ ਤੇ ਚਕ੍ਖੁਸਞ੍ਞਿਤਂ ਅਸੁਚਿਪਿਣ੍ਡਂ ਗਣ੍ਹ, ਗਹੇਤ੍ਵਾ ਹਰਸ੍ਸੁ ਪਸਾਦਯੁਤ੍ਤਂ ਇਚ੍ਛਿਤਂ ਠਾਨਂ ਨੇਹਿ.

ਤਸ੍ਸ ਚ ਵਿਰਮਾਸਿ ਤਾਵਦੇਤਿ ਤਸ੍ਸ ਧੁਤ੍ਤਪੁਰਿਸਸ੍ਸ ਤਾਵਦੇਵ ਅਕ੍ਖਿਮ੍ਹਿ ਉਪ੍ਪਾਟਿਤਕ੍ਖਣੇ ਏਵ ਰਾਗੋ ਵਿਗਚ੍ਛਿ. ਤਤ੍ਥਾਤਿ ਅਕ੍ਖਿਮ੍ਹਿ, ਤਸ੍ਸਂ ਵਾ ਥੇਰਿਯਂ. ਅਥ ਵਾ ਤਤ੍ਥਾਤਿ ਤਸ੍ਮਿਂਯੇਵ ਠਾਨੇ. ਖਮਾਪਯੀਤਿ ਖਮਾਪੇਸਿ. ਸੋਤ੍ਥਿ ਸਿਯਾ ਬ੍ਰਹ੍ਮਚਾਰਿਨੀਤਿ ਸੇਟ੍ਠਚਾਰਿਨਿ ਮਹੇਸਿਕੇ ਤੁਯ੍ਹਂ ਆਰੋਗ੍ਯਮੇਵ ਭਵੇਯ੍ਯ. ਨ ਪੁਨੋ ਏਦਿਸਕਂ ਭਵਿਸ੍ਸਤੀਤਿ ਇਤੋ ਪਰਂ ਏਵਰੂਪਂ ਅਨਾਚਾਰਚਰਣਂ ਨ ਭਵਿਸ੍ਸਤਿ, ਨ ਕਰਿਸ੍ਸਾਮੀਤਿ ਅਤ੍ਥੋ.

ਆਸਾਦਿਯਾਤਿ ਘਟ੍ਟੇਤ੍ਵਾ. ਏਦਿਸਨ੍ਤਿ ਏਵਰੂਪਂ ਸਬ੍ਬਤ੍ਥ ਵੀਤਰਾਗਂ. ਅਗ੍ਗਿਂ ਪਜ੍ਜਲਿਤਂਵ ਲਿਙ੍ਗਿਯਾਤਿ ਪਜ੍ਜਲਿਤਂ ਅਗ੍ਗਿਂ ਆਲਿਙ੍ਗੇਤ੍ਵਾ ਵਿਯ.

ਤਤੋਤਿ ਤਸ੍ਮਾ ਧੁਤ੍ਤਪੁਰਿਸਾ. ਸਾ ਭਿਕ੍ਖੁਨੀਤਿ ਸਾ ਸੁਭਾ ਭਿਕ੍ਖੁਨੀ. ਅਗਮੀ ਬੁਦ੍ਧਵਰਸ੍ਸ ਸਨ੍ਤਿਕਨ੍ਤਿ ਸਮ੍ਮਾਸਮ੍ਬੁਦ੍ਧਸ੍ਸ ਸਨ੍ਤਿਕਂ ਉਪਗਚ੍ਛਿ ਉਪਸਙ੍ਕਮਿ. ਪਸ੍ਸਿਯ ਵਰਪੁਞ੍ਞਲਕ੍ਖਣਨ੍ਤਿ ਉਤ੍ਤਮੇਹਿ ਪੁਞ੍ਞਸਮ੍ਭਾਰੇਹਿ ਨਿਬ੍ਬਤ੍ਤਮਹਾਪੁਰਿਸਲਕ੍ਖਣਂ ਦਿਸ੍ਵਾ. ਯਥਾ ਪੁਰਾਣਕਨ੍ਤਿ ਪੋਰਾਣਂ ਵਿਯ ਉਪ੍ਪਾਟਨਤੋ ਪੁਬ੍ਬੇ ਵਿਯ ਚਕ੍ਖੁ ਪਟਿਪਾਕਤਿਕਂ ਅਹੋਸਿ. ਯਮੇਤ੍ਥ ਅਨ੍ਤਰਨ੍ਤਰਾ ਨ ਵੁਤ੍ਤਂ, ਤਂ ਵੁਤ੍ਤਨਯਤ੍ਤਾ ਸੁਵਿਞ੍ਞੇਯ੍ਯਮੇਵ.

ਸੁਭਾਜੀਵਕਮ੍ਬਵਨਿਕਾਥੇਰੀਗਾਥਾਵਣ੍ਣਨਾ ਨਿਟ੍ਠਿਤਾ.

ਤਿਂਸਨਿਪਾਤਵਣ੍ਣਨਾ ਨਿਟ੍ਠਿਤਾ.