੫. ਸੁਭਾਕਮ੍ਮਾਰਧੀਤੁਥੇਰੀਗਾਥਾਵਣ੍ਣਨਾ

ਦਹਰਾਹਨ੍ਤਿਆਦਿਕਾ ਸੁਭਾਯ ਕਮ੍ਮਾਰਧੀਤਾਯ ਥੇਰਿਯਾ ਗਾਥਾ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰਾ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਂ ਕੁਸਲਂ ਉਪਚਿਨਨ੍ਤੀ ਅਨੁਕ੍ਕਮੇਨ ਸਮ੍ਭਾਵਿਤਕੁਸਲਮੂਲਾ ਉਪਚਿਤਵਿਮੋਕ੍ਖਸਮ੍ਭਾਰਾ ਸੁਗਤੀਸੁਯੇਵ ਸਂਸਰਨ੍ਤੀ ਪਰਿਪਕ੍ਕਞਾਣਾ ਹੁਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਰਾਜਗਹੇ ਅਞ੍ਞਤਰਸ੍ਸ ਸੁਵਣ੍ਣਕਾਰਸ੍ਸ ਧੀਤਾ ਹੁਤ੍ਵਾ ਨਿਬ੍ਬਤ੍ਤਿ, ਰੂਪਸਮ੍ਪਤ੍ਤਿਸੋਭਾਯ ਸੁਭਾਤਿ ਤਸ੍ਸਾ ਨਾਮਂ ਅਹੋਸਿ. ਸਾ ਅਨੁਕ੍ਕਮੇਨ ਵਿਞ੍ਞੁਤਂ ਪਤ੍ਵਾ, ਸਤ੍ਥੁ ਰਾਜਗਹਪ੍ਪਵੇਸਨੇ ਸਤ੍ਥਰਿ ਸਞ੍ਜਾਤਪ੍ਪਸਾਦਾ ਏਕਦਿਵਸਂ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸੀਦਿ. ਸਤ੍ਥਾ ਤਸ੍ਸਾ ਇਨ੍ਦ੍ਰਿਯਪਰਿਪਾਕਂ ਦਿਸ੍ਵਾ ਅਜ੍ਝਾਸਯਾਨੁਰੂਪਂ ਚਤੁਸਚ੍ਚਗਬ੍ਭਧਮ੍ਮਂ ਦੇਸੇਸਿ. ਸਾ ਤਾਵਦੇਵ ਸਹਸ੍ਸਨਯਪਟਿਮਣ੍ਡਿਤੇ ਸੋਤਾਪਤ੍ਤਿਫਲੇ ਪਤਿਟ੍ਠਾਸਿ. ਸਾ ਅਪਰਭਾਗੇ ਘਰਾਵਾਸੇ ਦੋਸਂ ਦਿਸ੍ਵਾ ਮਹਾਪਜਾਪਤਿਯਾ ਗੋਤਮਿਯਾ ਸਨ੍ਤਿਕੇ ਪਬ੍ਬਜਿਤ੍ਵਾ ਭਿਕ੍ਖੁਨਿਸੀਲੇ ਪਤਿਟ੍ਠਿਤਾ ਉਪਰਿਮਗ੍ਗਤ੍ਥਾਯ ਭਾਵਨਮਨੁਯੁਞ੍ਜਿ. ਤਂ ਞਾਤਕਾ ਕਾਲੇਨ ਕਾਲਂ ਉਪਸਙ੍ਕਮਿਤ੍ਵਾ ਕਾਮੇਹਿ ਨਿਮਨ੍ਤੇਨ੍ਤਾ ਪਹੂਤਧਨਂ ਵਿਭਵਜਾਤਞ੍ਚ ਦਸ੍ਸੇਤ੍ਵਾ ਪਲੋਭੇਨ੍ਤਿ. ਸਾ ਏਕਦਿਵਸਂ ਅਤ੍ਤਨੋ ਸਨ੍ਤਿਕਂ ਉਪਗਤਾਨਂ ਘਰਾਵਾਸੇਸੁ ਕਾਮੇਸੁ ਚ ਆਦੀਨਵਂ ਪਕਾਸੇਨ੍ਤੀ ‘‘ਦਹਰਾਹ’’ਨ੍ਤਿਆਦੀਹਿ ਚਤੁਵੀਸਤਿਯਾ ਗਾਥਾਹਿ ਧਮ੍ਮਂ ਕਥੇਤ੍ਵਾ ਤੇ ਨਿਰਾਸੇ ਕਤ੍ਵਾ ਵਿਸ੍ਸਜ੍ਜੇਤ੍ਵਾ ਵਿਪਸ੍ਸਨਾਯ ਕਮ੍ਮਂ ਕਰੋਨ੍ਤੀ ਇਨ੍ਦ੍ਰਿਯਾਨਿ ਪਰਿਯੋਦਪੇਨ੍ਤੀ ਭਾਵਨਂ ਉਸ੍ਸੁਕ੍ਕਾਪੇਤ੍ਵਾ ਨ ਚਿਰਸ੍ਸੇਵ ਸਹ ਪਟਿਸਮ੍ਭਿਦਾਹਿ ਅਰਹਤ੍ਤਂ ਪਾਪੁਣਿ. ਅਰਹਤ੍ਤਂ ਪਨ ਪਤ੍ਵਾ –

੩੩੯. ‘‘ਦਹਰਾਹਂ ਸੁਦ੍ਧਵਸਨਾ, ਯਂ ਪੁਰੇ ਧਮ੍ਮਮਸ੍ਸੁਣਿਂ;

ਤਸ੍ਸਾ ਮੇ ਅਪ੍ਪਮਤ੍ਤਾਯ, ਸਚ੍ਚਾਭਿਸਮਯੋ ਅਹੁ.

੩੪੦. ‘‘ਤਤੋਹਂ ਸਬ੍ਬਕਾਮੇਸੁ, ਭੁਸਂ ਅਰਤਿਮਜ੍ਝਗਂ;

ਸਕ੍ਕਾਯਸ੍ਮਿਂ ਭਯਂ ਦਿਸ੍ਵਾ, ਨੇਕ੍ਖਮ੍ਮਮੇਵ ਪੀਹਯੇ.

੩੪੧. ‘‘ਹਿਤ੍ਵਾਨਹਂ ਞਾਤਿਗਣਂ, ਦਾਸਕਮ੍ਮਕਰਾਨਿ ਚ;

ਗਾਮਖੇਤ੍ਤਾਨਿ ਫੀਤਾਨਿ, ਰਮਣੀਯੇ ਪਮੋਦਿਤੇ.

੩੪੨. ‘‘ਪਹਾਯਹਂ ਪਬ੍ਬਜਿਤਾ, ਸਾਪਤੇਯ੍ਯਮਨਪ੍ਪਕਂ;

ਏਵਂ ਸਦ੍ਧਾਯ ਨਿਕ੍ਖਮ੍ਮ, ਸਦ੍ਧਮ੍ਮੇ ਸੁਪ੍ਪਵੇਦਿਤੇ.

੩੪੩. ‘‘ਨੇਤਂ ਅਸ੍ਸ ਪਤਿਰੂਪਂ, ਆਕਿਞ੍ਚਞ੍ਞਞ੍ਹਿ ਪਤ੍ਥਯੇ;

ਯੋ ਜਾਤਰੂਪਂ ਰਜਤਂ, ਛਡ੍ਡੇਤ੍ਵਾ ਪੁਨਰਾਗਮੇ.

੩੪੪. ‘‘ਰਜਤਂ ਜਾਤਰੂਪਂ ਵਾ, ਨ ਬੋਧਾਯ ਨ ਸਨ੍ਤਿਯਾ;

ਨੇਤਂ ਸਮਣਸਾਰੁਪ੍ਪਂ, ਨ ਏਤਂ ਅਰਿਯਦ੍ਧਨਂ.

੩੪੫. ‘‘ਲੋਭਨਂ ਮਦਨਞ੍ਚੇਤਂ, ਮੋਹਨਂ ਰਜਵਡ੍ਢਨਂ;

ਸਾਸਙ੍ਕਂ ਬਹੁਆਯਾਸਂ, ਨਤ੍ਥਿ ਚੇਤ੍ਥ ਧੁਵਂ ਠਿਤਿ.

੩੪੬. ‘‘ਏਤ੍ਥ ਰਤ੍ਤਾ ਪਮਤ੍ਤਾ ਚ, ਸਂਕਿਲਿਟ੍ਠਮਨਾ ਨਰਾ;

ਅਞ੍ਞਮਞ੍ਞੇਨ ਬ੍ਯਾਰੁਦ੍ਧਾ, ਪੁਥੂ ਕੁਬ੍ਬਨ੍ਤਿ ਮੇਧਗਂ.

੩੪੭. ‘‘ਵਧੋ ਬਨ੍ਧੋ ਪਰਿਕ੍ਲੇਸੋ, ਜਾਨਿ ਸੋਕਪਰਿਦ੍ਦਵੋ;

ਕਾਮੇਸੁ ਅਧਿਪਨ੍ਨਾਨਂ, ਦਿਸ੍ਸਤੇ ਬ੍ਯਸਨਂ ਬਹੁਂ.

੩੪੮. ‘‘ਤਂ ਮਂ ਞਾਤੀ ਅਮਿਤ੍ਤਾਵ, ਕਿਂ ਵੋ ਕਾਮੇਸੁ ਯੁਞ੍ਜਥ;

ਜਾਨਾਥ ਮਂ ਪਬ੍ਬਜਿਤਂ, ਕਾਮੇਸੁ ਭਯਦਸ੍ਸਿਨਿਂ.

੩੪੯. ‘‘ਨ ਹਿਰਞ੍ਞਸੁਵਣ੍ਣੇਨ, ਪਰਿਕ੍ਖੀਯਨ੍ਤਿ ਆਸਵਾ;

ਅਮਿਤ੍ਤਾ ਵਧਕਾ ਕਾਮਾ, ਸਪਤ੍ਤਾ ਸਲ੍ਲਬਨ੍ਧਨਾ.

੩੫੦. ‘‘ਤਂ ਮਂ ਞਾਤੀ ਅਮਿਤ੍ਤਾਵ, ਕਿਂ ਵੋ ਕਾਮੇਸੁ ਯੁਞ੍ਜਥ;

ਜਾਨਾਥ ਮਂ ਪਬ੍ਬਜਿਤਂ, ਮੁਣ੍ਡਂ ਸਙ੍ਘਾਟਿਪਾਰੁਤਂ.

੩੫੧. ‘‘ਉਤ੍ਤਿਟ੍ਠਪਿਣ੍ਡੋ ਉਞ੍ਛੋ ਚ, ਪਂਸੁਕੂਲਞ੍ਚ ਚੀਵਰਂ;

ਏਤਂ ਖੋ ਮਮ ਸਾਰੁਪ੍ਪਂ, ਅਨਗਾਰੂਪਨਿਸ੍ਸਯੋ.

੩੫੨. ‘‘ਵਨ੍ਤਾ ਮਹੇਸੀਹਿ ਕਾਮਾ, ਯੇ ਦਿਬ੍ਬਾ ਯੇ ਚ ਮਾਨੁਸਾ;

ਖੇਮਟ੍ਠਾਨੇ ਵਿਮੁਤ੍ਤਾ ਤੇ, ਪਤ੍ਤਾ ਤੇ ਅਚਲਂ ਸੁਖਂ.

੩੫੩. ‘‘ਮਾਹਂ ਕਾਮੇਹਿ ਸਂਗਚ੍ਛਿਂ, ਯੇਸੁ ਤਾਣਂ ਨ ਵਿਜ੍ਜਤਿ;

ਅਮਿਤ੍ਤਾ ਵਧਕਾ ਕਾਮਾ, ਅਗ੍ਗਿਕ੍ਖਨ੍ਧੂਪਮਾ ਦੁਖਾ.

੩੫੪. ‘‘ਪਰਿਪਨ੍ਥੋ ਏਸ ਭਯੋ, ਸਵਿਘਾਤੋ ਸਕਣ੍ਟਕੋ;

ਗੇਧੋ ਸੁਵਿਸਮੋ ਚੇਸੋ, ਮਹਨ੍ਤੋ ਮੋਹਨਾਮੁਖੋ.

੩੫੫. ‘‘ਉਪਸਗ੍ਗੋ ਭੀਮਰੂਪੋ, ਕਾਮਾ ਸਪ੍ਪਸਿਰੂਪਮਾ;

ਯੇ ਬਾਲਾ ਅਭਿਨਨ੍ਦਨ੍ਤਿ, ਅਨ੍ਧਭੂਤਾ ਪੁਥੁਜ੍ਜਨਾ.

੩੫੬. ‘‘ਕਾਮਪਙ੍ਕੇਨ ਸਤ੍ਤਾ ਹਿ, ਬਹੂ ਲੋਕੇ ਅਵਿਦ੍ਦਸੂ;

ਪਰਿਯਨ੍ਤਂ ਨ ਜਾਨਨ੍ਤਿ, ਜਾਤਿਯਾ ਮਰਣਸ੍ਸ ਚ.

੩੫੭. ‘‘ਦੁਗ੍ਗਤਿਗਮਨਂ ਮਗ੍ਗਂ, ਮਨੁਸ੍ਸਾ ਕਾਮਹੇਤੁਕਂ;

ਬਹੁਂ ਵੇ ਪਟਿਪਜ੍ਜਨ੍ਤਿ, ਅਤ੍ਤਨੋ ਰੋਗਮਾਵਹਂ.

੩੫੮. ‘‘ਏਵਂ ਅਮਿਤ੍ਤਜਨਨਾ, ਤਾਪਨਾ ਸਂਕਿਲੇਸਿਕਾ;

ਲੋਕਾਮਿਸਾ ਬਨ੍ਧਨੀਯਾ, ਕਾਮਾ ਮਰਣਬਨ੍ਧਨਾ.

੩੫੯. ‘‘ਉਮ੍ਮਾਦਨਾ ਉਲ੍ਲਪਨਾ, ਕਾਮਾ ਚਿਤ੍ਤਪ੍ਪਮਾਥਿਨੋ;

ਸਤ੍ਤਾਨਂ ਸਂਕਿਲੇਸਾਯ, ਖਿਪ੍ਪਂ ਮਾਰੇਨ ਓਡ੍ਡਿਤਂ.

੩੬੦. ‘‘ਅਨਨ੍ਤਾਦੀਨਵਾ ਕਾਮਾ, ਬਹੁਦੁਕ੍ਖਾ ਮਹਾਵਿਸਾ;

ਅਪ੍ਪਸ੍ਸਾਦਾ ਰਣਕਰਾ, ਸੁਕ੍ਕਪਕ੍ਖਵਿਸੋਸਨਾ.

੩੬੧. ‘‘ਸਾਹਂ ਏਤਾਦਿਸਂ ਕਤ੍ਵਾ, ਬ੍ਯਸਨਂ ਕਾਮਹੇਤੁਕਂ;

ਨ ਤਂ ਪਚ੍ਚਾਗਮਿਸ੍ਸਾਮਿ, ਨਿਬ੍ਬਾਨਾਭਿਰਤਾ ਸਦਾ.

੩੬੨. ‘‘ਰਣਂ ਤਰਿਤ੍ਵਾ ਕਾਮਾਨਂ, ਸੀਤਿਭਾਵਾਭਿਕਙ੍ਖਿਨੀ;

ਅਪ੍ਪਮਤ੍ਤਾ ਵਿਹਸ੍ਸਾਮਿ, ਸਬ੍ਬਸਂਯੋਜਨਕ੍ਖਯੇ.

੩੬੩. ‘‘ਅਸੋਕਂ ਵਿਰਜਂ ਖੇਮਂ, ਅਰਿਯਟ੍ਠਙ੍ਗਿਕਂ ਉਜੁਂ;

ਤਂ ਮਗ੍ਗਂ ਅਨੁਗਚ੍ਛਾਮਿ, ਯੇਨ ਤਿਣ੍ਣਾ ਮਹੇਸਿਨੋ.

੩੬੪. ‘‘ਇਮਂ ਪਸ੍ਸਥ ਧਮ੍ਮਟ੍ਠਂ, ਸੁਭਂ ਕਮ੍ਮਾਰਧੀਤਰਂ;

ਅਨੇਜਂ ਉਪਸਮ੍ਪਜ੍ਜ, ਰੁਕ੍ਖਮੂਲਮ੍ਹਿ ਝਾਯਤਿ.

੩੬੫. ‘‘ਅਜ੍ਜਟ੍ਠਮੀ ਪਬ੍ਬਜਿਤਾ, ਸਦ੍ਧਾ ਸਦ੍ਧਮ੍ਮਸੋਭਨਾ;

ਵਿਨੀਤੁਪ੍ਪਲਵਣ੍ਣਾਯ, ਤੇਵਿਜ੍ਜਾ ਮਚ੍ਚੁਹਾਯਿਨੀ.

੩੬੬. ‘‘ਸਾਯਂ ਭੁਜਿਸ੍ਸਾ ਅਣਣਾ, ਭਿਕ੍ਖੁਨੀ ਭਾਵਿਤਿਨ੍ਦ੍ਰਿਯਾ;

ਸਬ੍ਬਯੋਗਵਿਸਂਯੁਤ੍ਤਾ, ਕਤਕਿਚ੍ਚਾ ਅਨਾਸਵਾ.

੩੬੭. ‘‘ਤਂ ਸਕ੍ਕੋ ਦੇਵਸਙ੍ਘੇਨ, ਉਪਸਙ੍ਕਮ੍ਮ ਇਦ੍ਧਿਯਾ;

ਨਮਸ੍ਸਤਿ ਭੂਤਪਤਿ, ਸੁਭਂ ਕਮ੍ਮਾਰਧੀਤਰ’’ਨ੍ਤਿ. – ਇਮਾ ਗਾਥਾ ਅਭਾਸਿ;

ਤਤ੍ਥ ਦਹਰਾਹਂ ਸੁਦ੍ਧਵਸਨਾ, ਯਂ ਪੁਰੇ ਧਮ੍ਮਮਸ੍ਸੁਣਿਨ੍ਤਿ ਯਸ੍ਮਾ ਅਹਂ ਪੁਬ੍ਬੇ ਦਹਰਾ ਤਰੁਣੀ ਏਵ ਸੁਦ੍ਧਵਸਨਾ ਸੁਦ੍ਧਵਤ੍ਥਨਿਵਤ੍ਥਾ ਅਲਙ੍ਕਤਪ੍ਪਟਿਯਤ੍ਤਾ ਸਤ੍ਥੁ ਸਨ੍ਤਿਕੇ ਧਮ੍ਮਂ ਅਸ੍ਸੋਸਿਂ. ਤਸ੍ਸਾ ਮੇ ਅਪ੍ਪਮਤ੍ਤਾਯ, ਸਚ੍ਚਾਭਿਸਮਯੋ ਅਹੂਤਿ ਯਸ੍ਮਾ ਚ ਤਸ੍ਸਾ ਮੇ ਮਯ੍ਹਂ ਯਥਾਸੁਤਂ ਧਮ੍ਮਂ ਪਚ੍ਚਵੇਕ੍ਖਿਤ੍ਵਾ ਅਪ੍ਪਮਤ੍ਤਾਯ ਉਪਟ੍ਠਿਤਸ੍ਸਤਿਯਾ ਸੀਲਂ ਅਧਿਟ੍ਠਹਿਤ੍ਵਾ ਭਾਵਨਂ ਅਨੁਯੁਞ੍ਜਨ੍ਤਿਯਾਵ ਚਤੁਨ੍ਨਂ ਅਰਿਯਸਚ੍ਚਾਨਂ ਅਭਿਸਮਯੋ ‘‘ਇਦਂ ਦੁਕ੍ਖ’’ਨ੍ਤਿਆਦਿਨਾ (ਪਟਿ. ਮ. ੧.੩੨) ਪਟਿਵੇਧੋ ਅਹੋਸਿ.

ਤਤੋਹਂ ਸਬ੍ਬਕਾਮੇਸੁ, ਭੁਸਂ ਅਰਤਿਮਜ੍ਝਗਨ੍ਤਿ ਤਤੋ ਤੇਨ ਕਾਰਣੇਨ ਸਤ੍ਥੁ ਸਨ੍ਤਿਕੇ ਧਮ੍ਮਸ੍ਸ ਸੁਤਤ੍ਤਾ ਸਚ੍ਚਾਨਞ੍ਚ ਅਭਿਸਮਿਤਤ੍ਤਾ ਮਨੁਸ੍ਸੇਸੁ ਦਿਬ੍ਬੇਸੁ ਚਾਤਿ ਸਬ੍ਬੇਸੁਪਿ ਕਾਮੇਸੁ ਭੁਸਂ ਅਤਿਵਿਯ ਅਰਤਿਂ ਉਕ੍ਕਣ੍ਠਿਂ ਅਧਿਗਚ੍ਛਿਂ. ਸਕ੍ਕਾਯਸ੍ਮਿਂ ਉਪਾਦਾਨਕ੍ਖਨ੍ਧਪਞ੍ਚਕੇ, ਭਯਂ ਸਪ੍ਪਟਿਭਯਭਾਵਂ ਞਾਣਚਕ੍ਖੁਨਾ ਦਿਸ੍ਵਾ, ਨੇਕ੍ਖਮ੍ਮਮੇਵ ਪਬ੍ਬਜ੍ਜਂ ਨਿਬ੍ਬਾਨਮੇਵ, ਪੀਹਯੇ ਪਿਹਯਾਮਿ ਪਤ੍ਥਯਾਮਿ.

ਦਾਸਕਮ੍ਮਕਰਾਨਿ ਚਾਤਿ ਦਾਸੇ ਚ ਕਮ੍ਮਕਾਰੇ ਚ, ਲਿਙ੍ਗਵਿਪਲ੍ਲਾਸੇਨ ਹੇਤਂ ਵੁਤ੍ਤਂ. ਗਾਮਖੇਤ੍ਤਾਨੀਤਿ ਗਾਮੇ ਚ ਪੁਬ੍ਬਣ੍ਣਾਪਰਣ੍ਣਵਿਰੁਹਨਕ੍ਖੇਤ੍ਤਾਨਿ ਚ, ਗਾਮਪਰਿਯਾਪਨ੍ਨਾਨਿ ਵਾ ਖੇਤ੍ਤਾਨਿ. ਫੀਤਾਨੀਤਿ ਸਮਿਦ੍ਧਾਨਿ. ਰਮਣੀਯੇਤਿ ਮਨੁਞ੍ਞੇ. ਪਮੋਦਿਤੇਤਿ ਪਮੁਦਿਤੇ, ਭੋਗਕ੍ਖਨ੍ਧੇ ਹਿਤ੍ਵਾਤਿ ਸਮ੍ਬਨ੍ਧੋ. ਸਾਪਤੇਯ੍ਯਨ੍ਤਿ ਸਨ੍ਤਕਂ ਧਨਂ, ਮਣਿਕਨਕਰਜਤਾਦਿਪਰਿਗ੍ਗਹਵਤ੍ਥੁਂ. ਅਨਪ੍ਪਕਨ੍ਤਿ ਮਹਨ੍ਤਂ, ਪਹਾਯਾਤਿ ਯੋਜਨਾ. ਏਵਂ ਸਦ੍ਧਾਯ ਨਿਕ੍ਖਮ੍ਮਾਤਿ ‘‘ਹਿਤ੍ਵਾਨਹਂ ਞਾਤਿਗਣ’’ਨ੍ਤਿਆਦਿਨਾ ਵੁਤ੍ਤਪ੍ਪਕਾਰੇਨ ਮਹਨ੍ਤਂ ਞਾਤਿਪਰਿਵਟ੍ਟਂ ਮਹਨ੍ਤਞ੍ਚ ਭੋਗਕ੍ਖਨ੍ਧਂ ਪਹਾਯ ਕਮ੍ਮਕਮ੍ਮਫਲਾਨਿ ਰਤਨਤ੍ਤਯਞ੍ਚਾਤਿ ਸਦ੍ਧੇਯ੍ਯਵਤ੍ਥੁਂ ਸਦ੍ਧਾਯ ਸਦ੍ਦਹਿਤ੍ਵਾ ਘਰਤੋ ਨਿਕ੍ਖਮ੍ਮ, ਸਦ੍ਧਮ੍ਮੇ ਸੁਪ੍ਪਵੇਦਿਤੇ ਸਮ੍ਮਾਸਮ੍ਬੁਦ੍ਧੇਨ ਸੁਟ੍ਠੁ ਪਵੇਦਿਤੇ ਅਰਿਯਵਿਨਯੇ ਅਹਂ ਪਬ੍ਬਜਿਤਾ.

ਏਵਂ ਪਬ੍ਬਜਿਤਾਯ ਪਨ ਨੇਤਂ ਅਸ੍ਸ ਪਤਿਰੂਪਂ, ਯਦਿਦਂ ਛਡ੍ਡਿਤਾਨਂ ਕਾਮਾਨਂ ਪਚ੍ਚਾਗਮਨਂ. ਆਕਿਞ੍ਚਞ੍ਞਞ੍ਹਿ ਪਤ੍ਥਯੇਤਿ ਅਹਂ ਅਕਿਞ੍ਚਨਭਾਵਂ ਅਪਰਿਗ੍ਗਹਭਾਵਮੇਵ ਪਤ੍ਥਯਾਮਿ. ਯੋ ਜਾਤਰੂਪਰਜਤਂ, ਛਡ੍ਡੇਤ੍ਵਾ ਪੁਨਰਾਗਮੇਤਿ ਯੋ ਪੁਗ੍ਗਲੋ ਸੁਵਣ੍ਣਂ ਰਜਤਂ ਅਞ੍ਞਮ੍ਪਿ ਵਾ ਕਿਞ੍ਚਿ ਧਨਜਾਤਂ ਛਡ੍ਡੇਤ੍ਵਾ ਪੁਨ ਤਂ ਗਣ੍ਹੇਯ੍ਯ, ਸੋ ਪਣ੍ਡਿਤਾਨਂ ਅਨ੍ਤਰੇ ਕਥਂ ਸੀਸਂ ਉਕ੍ਖਿਪੇਯ੍ਯ?

ਯਸ੍ਮਾ ਰਜਤਂ ਜਾਤਰੂਪਂ ਵਾ, ਨ ਬੋਧਾਯ ਨ ਸਨ੍ਤਿਯਾ ਨ ਮਗ੍ਗਞਾਣਾਯ ਨ ਨਿਬ੍ਬਾਨਾਯ ਹੋਤੀਤਿ ਅਤ੍ਥੋ. ਨੇਤਂ ਸਮਣਸਾਰੁਪ੍ਪਨ੍ਤਿ ਏਤਂ ਜਾਤਰੂਪਰਜਤਾਦਿਪਰਿਗ੍ਗਹਵਤ੍ਥੁ, ਤਸ੍ਸ ਵਾ ਪਰਿਗ੍ਗਣ੍ਹਨਂ ਸਮਣਾਨਂ ਸਾਰੁਪ੍ਪਂ ਨ ਹੋਤਿ. ਤਥਾ ਹਿ ਵੁਤ੍ਤਂ ‘‘ਨ ਕਪ੍ਪਤਿ ਸਮਣਾਨਂ ਸਕ੍ਯਪੁਤ੍ਤਿਯਾਨਂ ਜਾਤਰੂਪਰਜਤ’’ਨ੍ਤਿਆਦਿ (ਚੂਲ਼ਵ. ੪੪੬). ਨ ਏਤਂ ਅਰਿਯਦ੍ਧਨਨ੍ਤਿ ਏਤਂ ਯਥਾਵੁਤ੍ਤਪਰਿਗ੍ਗਹਵਤ੍ਥੁ ਸਦ੍ਧਾਦਿਧਨਂ ਵਿਯ ਅਰਿਯਧਮ੍ਮਮਯਮ੍ਪਿ ਧਨਂ ਨ ਹੋਤਿ, ਨ ਅਰਿਯਭਾਵਾਵਹਤੋ. ਤੇਨਾਹ ‘‘ਲੋਭਨ’’ਨ੍ਤਿਆਦਿ.

ਤਤ੍ਥ ਲੋਭਨਨ੍ਤਿ ਲੋਭੁਪ੍ਪਾਦਨਂ. ਮਦਨਨ੍ਤਿ ਮਦਾਵਹਂ. ਮੋਹਨਨ੍ਤਿ ਸਮ੍ਮੋਹਜਨਨਂ. ਰਜਵਡ੍ਢਨਨ੍ਤਿ ਰਾਗਰਜਾਦਿਸਂਵਡ੍ਢਨਂ. ਯੇਨ ਪਰਿਗ੍ਗਹਿਤਂ, ਤਸ੍ਸ ਆਸਙ੍ਕਾਵਹਤ੍ਤਾ ਸਹ ਆਸਙ੍ਕਾਯ ਵਤ੍ਤਤੀਤਿ ਸਾਸਙ੍ਕਂ, ਯੇਨ ਪਰਿਗ੍ਗਹਿਤਂ, ਤਸ੍ਸ ਯਤੋ ਕੁਤੋ ਆਸਙ੍ਕਾਵਹਨ੍ਤਿ ਅਤ੍ਥੋ. ਬਹੁਆਯਾਸਨ੍ਤਿ ਸਜ੍ਜਨਰਕ੍ਖਣਾਦਿਵਸੇਨ ਬਹੁਪਰਿਸ੍ਸਮਂ. ਨਤ੍ਥਿ ਚੇਤ੍ਥ ਧੁਵਂ ਠਿਤੀਤਿ ਏਤਸ੍ਮਿਂ ਧਨੇ ਧੁਵਭਾਵੋ ਚ ਠਿਤਿਭਾਵੋ ਚ ਨਤ੍ਥਿ, ਚਞ੍ਚਲਮਨਵਟ੍ਠਿਤਮੇਵਾਤਿ ਅਤ੍ਥੋ.

ਏਤ੍ਥ ਰਤ੍ਤਾ ਪਮਤ੍ਤਾ ਚਾਤਿ ਏਤਸ੍ਮਿਂ ਧਨੇ ਰਤ੍ਤਾ ਸਞ੍ਜਾਤਰਾਗਾ ਦਸਕੁਸਲਧਮ੍ਮੇਸੁ ਸਤਿਯਾ ਵਿਪ੍ਪਵਾਸੇਨ ਪਮਤ੍ਤਾ. ਸਂਕਿਲਿਟ੍ਠਮਨਾ ਲੋਭਾਦਿਸਂਕਿਲੇਸੇਨ ਸਂਕਿਲਿਟ੍ਠਚਿਤ੍ਤਾਵ ਨਾਮ ਹੋਨ੍ਤਿ. ਤਤੋ ਚ ਅਞ੍ਞਮਞ੍ਞਮ੍ਹਿ ਬ੍ਯਾਰੁਦ੍ਧਾ, ਪੁਥੂ ਕੁਬ੍ਬਨ੍ਤਿ ਮੇਧਗਂ ਅਨ੍ਤਮਸੋ ਮਾਤਾਪਿ ਪੁਤ੍ਤੇਨ, ਪੁਤ੍ਤੋਪਿ ਮਾਤਰਾਤਿ ਏਵਂ ਅਞ੍ਞਮਞ੍ਞਂ ਪਟਿਰੁਦ੍ਧਾ ਹੁਤ੍ਵਾ ਪੁਥੂ ਸਤ੍ਤਾ ਮੇਧਗਂ ਕਲਹਂ ਕਰੋਨ੍ਤਿ. ਤੇਨਾਹ ਭਗਵਾ – ‘‘ਪੁਨ ਚਪਰਂ, ਭਿਕ੍ਖਵੇ, ਕਾਮਹੇਤੁ ਕਾਮਨਿਦਾਨਂ ਕਾਮਾਧਿਕਰਣਂ…ਪੇ… ਮਾਤਾਪਿ ਪੁਤ੍ਤੇਨ ਵਿਵਦਤਿ ਪੁਤ੍ਤੋਪਿ ਮਾਤਰਾ ਵਿਵਦਤੀ’’ਤਿਆਦਿ (ਮ. ਨਿ. ੧.੧੬੮, ੧੭੮).

ਵਧੋਤਿ ਮਰਣਂ. ਬਨ੍ਧੋਤਿ ਅਦ੍ਦੁਬਨ੍ਧਨਾਦਿਬਨ੍ਧਨਂ. ਪਰਿਕ੍ਲੇਸੋਤਿ ਹਤ੍ਥਚ੍ਛੇਦਾਦਿਪਰਿਕਿਲੇਸਾਪਤ੍ਤਿ. ਜਾਨੀਤਿ ਧਨਜਾਨਿ ਚੇਵ ਪਰਿਵਾਰਜਾਨਿ ਚ. ਸੋਕਪਰਿਦ੍ਦਵੋਤਿ ਸੋਕੋ ਚ ਪਰਿਦੇਵੋ ਚ. ਅਧਿਪਨ੍ਨਾਨਨ੍ਤਿ ਅਜ੍ਝੋਸਿਤਾਨਂ. ਦਿਸ੍ਸਤੇ ਬ੍ਯਸਨਂ ਬਹੁਨ੍ਤਿ ਯਥਾਵੁਤ੍ਤਵਧਬਨ੍ਧਨਾਦਿਭੇਦਂ ਅਵੁਤ੍ਤਞ੍ਚ ਦੋਮਨਸ੍ਸੁਪਾਯਾਸਾਦਿਂ ਦਿਟ੍ਠਧਮ੍ਮਿਕਂ ਸਮ੍ਪਰਾਯਿਕਞ੍ਚ ਬਹੁਂ ਬਹੁਵਿਧਂ ਬ੍ਯਸਨਂ ਅਨਤ੍ਥੋ ਕਾਮੇਸੁ ਦਿਸ੍ਸਤੇਵ.

ਤਂ ਮਂ ਞਾਤੀ ਅਮਿਤ੍ਤਾਵ, ਕਿਂ ਵੋ ਕਾਮੇਸੁ ਯੁਞ੍ਜਥਾਤਿ ਤਾਦਿਸਂ ਮਂ ਯਥਾ ਕਾਮੇਸੁ ਵਿਰਤ੍ਤਂ ਤੁਮ੍ਹੇ ਞਾਤੀ ਞਾਤਕਾ ਸਮਾਨਾ ਅਨਤ੍ਥਕਾਮਾ ਅਮਿਤ੍ਤਾ ਵਿਯ ਕਿਂ ਕੇਨ ਕਾਰਣੇਨ ਕਾਮੇਸੁ ਯੁਞ੍ਜਥ ਨਿਯੋਜੇਥ. ਜਾਨਾਥ ਮਂ ਪਬ੍ਬਜਿਤਂ, ਕਾਮੇਸੁ ਭਯਦਸ੍ਸਿਨਿਨ੍ਤਿ ਕਾਮੇ ਭਯਤੋ ਪਸ੍ਸਨ੍ਤਿਂ ਪਬ੍ਬਜਿਤਂ ਮਂ ਆਜਾਨਾਥ, ਕਿਂ ਏਤ੍ਤਕਂ ਤੁਮ੍ਹੇਹਿ ਅਨਞ੍ਞਾਤਨ੍ਤਿ ਅਧਿਪ੍ਪਾਯੋ.

ਨ ਹਿਰਞ੍ਞਸੁਵਣ੍ਣੇਨ, ਪਰਿਕ੍ਖੀਯਨ੍ਤਿ ਆਸਵਾਤਿ ਕਾਮਾਸਵਾਦਯੋ ਹਿਰਞ੍ਞਸੁਵਣ੍ਣੇਨ ਨ ਕਦਾਚਿ ਪਰਿਕ੍ਖਯਂ ਗਚ੍ਛਨ੍ਤਿ, ਅਥ ਖੋ ਤੇਹਿ ਏਵ ਪਰਿਵਡ੍ਢਨ੍ਤੇਵ. ਤੇਨਾਹ – ‘‘ਅਮਿਤ੍ਤਾ ਵਧਕਾ ਕਾਮਾ, ਸਪਤ੍ਤਾ ਸਲ੍ਲਬਨ੍ਧਨਾ’’ਤਿ. ਕਾਮਾ ਹਿ ਅਹਿਤਾਵਹਤ੍ਤਾ ਮੇਤ੍ਤਿਯਾ ਅਭਾਵੇਨ ਅਮਿਤ੍ਤਾ, ਮਰਣਹੇਤੁਤਾਯ ਉਕ੍ਖਿਤ੍ਤਾਸਿਕਵਧਕਸਦਿਸਤ੍ਤਾ ਵਧਕਾ, ਅਨੁਬਨ੍ਧਿਤ੍ਵਾਪਿ ਅਨਤ੍ਥਾਵਹਨਤਾਯ ਵੇਰਾਨੁਬਨ੍ਧਸਪਤ੍ਤਸਦਿਸਤ੍ਤਾ ਸਪਤ੍ਤਾ, ਰਾਗਾਦੀਨਂ ਸਲ੍ਲਾਨਂ ਬਨ੍ਧਨਤੋ ਸਲ੍ਲਬਨ੍ਧਨਾ.

ਮੁਣ੍ਡਨ੍ਤਿ ਮੁਣ੍ਡਿਤਕੇਸਂ. ਤਤ੍ਥ ਤਤ੍ਥ ਨਨ੍ਤਕਾਨਿ ਗਹੇਤ੍ਵਾ ਸਙ੍ਘਾਟਿਚੀਵਰਪਾਰੁਪਨੇਨ ਸਙ੍ਘਾਟਿਪਾਰੁਤਂ.

ਉਤ੍ਤਿਟ੍ਠਪਿਣ੍ਡੋਤਿ ਵਿਵਟਦ੍ਵਾਰੇ ਘਰੇ ਘਰੇ ਪਤਿਟ੍ਠਿਤ੍ਵਾ ਲਭਨਕਪਿਣ੍ਡੋ. ਉਞ੍ਛੋਤਿ ਤਦਤ੍ਥਂ ਉਞ੍ਛਾਚਰਿਯਾ. ਅਨਗਾਰੂਪਨਿਸ੍ਸਯੋਤਿ ਅਨਗਾਰਾਨਂ ਪਬ੍ਬਜਿਤਾਨਂ ਉਪਗਨ੍ਤ੍ਵਾ ਨਿਸ੍ਸਿਤਬ੍ਬਤੋ ਉਪਨਿਸ੍ਸਯਭੂਤੋ ਜੀਵਿਤਪਰਿਕ੍ਖਾਰੋ. ਤਞ੍ਹਿ ਨਿਸ੍ਸਾਯ ਪਬ੍ਬਜਿਤਾ ਜੀਵਨ੍ਤਿ.

ਵਨ੍ਤਾਤਿ ਛਡ੍ਡਿਤਾ. ਮਹੇਸੀਹੀਤਿ ਬੁਦ੍ਧਾਦੀਹਿ ਮਹੇਸੀਹਿ. ਖੇਮਟ੍ਠਾਨੇਤਿ ਕਾਮਯੋਗਾਦੀਹਿ ਅਨੁਪਦ੍ਦਵਟ੍ਠਾਨਭੂਤੇ ਨਿਬ੍ਬਾਨੇ. ਤੇਤਿ ਮਹੇਸਯੋ. ਅਚਲਂ ਸੁਖਨ੍ਤਿ ਨਿਬ੍ਬਾਨਸੁਖਂ ਪਤ੍ਤਾ. ਤਸ੍ਮਾ ਤਂ ਪਤ੍ਥੇਨ੍ਤੇਨ ਕਾਮਾ ਪਰਿਚ੍ਚਜਿਤਬ੍ਬਾਤਿ ਅਧਿਪ੍ਪਾਯੋ.

ਮਾਹਂ ਕਾਮੇਹਿ ਸਂਗਚ੍ਛਿਨ੍ਤਿ ਅਹਂ ਕਦਾਚਿਪਿ ਕਾਮੇਹਿ ਨ ਸਮਾਗਚ੍ਛੇਯ੍ਯਂ. ਕਸ੍ਮਾਤਿ ਚੇ ਆਹ – ‘‘ਯੇਸੁ ਤਾਣਂ ਨ ਵਿਜ੍ਜਤੀ’’ਤਿਆਦਿ, ਯੇਸੁ ਕਾਮੇਸੁ ਉਪਪਰਿਕ੍ਖਿਯਮਾਨੇਸੁ ਏਕਸ੍ਮਿਮ੍ਪਿ ਅਨਤ੍ਥਪਰਿਤ੍ਤਾਣਂ ਨਾਮ ਨਤ੍ਥਿ. ਅਗ੍ਗਿਕ੍ਖਨ੍ਧੂਪਮਾ ਮਹਾਭਿਤਾਪਟ੍ਠੇਨ. ਦੁਖਾ ਦੁਕ੍ਖਮਟ੍ਠੇਨ.

ਪਰਿਪਨ੍ਥੋ ਏਸ ਭਯੋ ਯਦਿਦਂ ਕਾਮਾ ਨਾਮ ਅਵਿਦਿਤਵਿਪੁਲਾਨਤ੍ਥਾਵਹਤ੍ਤਾ. ਸਵਿਘਾਤੋ ਚਿਤ੍ਤਵਿਘਾਤਕਰਤ੍ਤਾ. ਸਕਣ੍ਟਕੋ ਵਿਨਿਵਿਜ੍ਝਨਤ੍ਤਾ. ਗੇਧੋ ਸੁਵਿਸਮੋ ਚੇਸੋਤਿ ਗਿਦ੍ਧਿਹੇਤੁਤਾਯ ਗੇਧੋ. ਸੁਟ੍ਠੁ ਵਿਸਮੋ ਮਹਾਪਲਿਬੋਧੋ ਸੋ. ਦੁਰਤਿਕ੍ਕਮਨਟ੍ਠੇਨ ਮਹਨ੍ਤੋ. ਮੋਹਨਾਮੁਖੋ ਮੁਚ੍ਛਾਪਤ੍ਤਿਹੇਤੁਤੋ.

ਉਪਸਗ੍ਗੋ ਭੀਮਰੂਪੋਤਿ ਅਤਿਭਿਂਸਨਕਸਭਾਵੋ, ਮਹਨ੍ਤੋ ਦੇਵਤੂਪਸਗ੍ਗੋ ਵਿਯ ਅਨਤ੍ਥਕਾਦਿਦੁਕ੍ਖਾਵਹਨਤੋ. ਸਪ੍ਪਸਿਰੂਪਮਾ ਕਾਮਾ ਸਪ੍ਪਟਿਭਯਟ੍ਠੇਨ.

ਕਾਮਪਙ੍ਕੇਨ ਸਤ੍ਤਾਤਿ ਕਾਮਸਙ੍ਖਾਤੇਨ ਪਙ੍ਕੇਨ ਸਤ੍ਤਾ ਲਗ੍ਗਾ.

ਦੁਗ੍ਗਤਿਗਮਨਂ ਮਗ੍ਗਨ੍ਤਿ ਨਿਰਯਾਦਿਅਪਾਯਗਾਮਿਨਂ ਮਗ੍ਗਂ. ਕਾਮਹੇਤੁਕਨ੍ਤਿ ਕਾਮੋਪਭੋਗਹੇਤੁਕਂ. ਬਹੁਨ੍ਤਿ ਪਾਣਾਤਿਪਾਤਾਦਿਭੇਦੇਨ ਬਹੁਵਿਧਂ. ਰੋਗਮਾਵਹਨ੍ਤਿ ਰੁਜ੍ਜਨਟ੍ਠੇਨ ਰੋਗਸਙ੍ਖਾਤਸ੍ਸ ਦਿਟ੍ਠਧਮ੍ਮਿਕਾਦਿਭੇਦਸ੍ਸ ਦੁਕ੍ਖਸ੍ਸ ਆਵਹਨਕਂ.

ਏਵਨ੍ਤਿ ‘‘ਅਮਿਤ੍ਤਾ ਵਧਕਾ’’ਤਿਆਦਿਨਾ ਵੁਤ੍ਤਪ੍ਪਕਾਰੇਨ. ਅਮਿਤ੍ਤਜਨਨਾਤਿ ਅਮਿਤ੍ਤਭਾਵਸ੍ਸ ਨਿਬ੍ਬਤ੍ਤਨਕਾ. ਤਾਪਨਾਤਿ ਸਨ੍ਤਾਪਨਕਾ, ਤਪਨੀਯਾਤਿ ਅਤ੍ਥੋ. ਸਂਕਿਲੇਸਿਕਾਤਿ ਸਂਕਿਲੇਸਾਵਹਾ. ਲੋਕਾਮਿਸਾਤਿ ਲੋਕੇ ਆਮਿਸਭੂਤਾ. ਬਨ੍ਧਨਿਯਾਤਿ ਬਨ੍ਧਭੂਤੇਹਿ ਸਂਯੋਜਨੇਹਿ ਵਡ੍ਢਿਤਬ੍ਬਾ, ਸਂਯੋਜਨਿਯਾਤਿ ਅਤ੍ਥੋ. ਮਰਣਬਨ੍ਧਨਾਤਿ ਭਵਾਦੀਸੁ ਨਿਬ੍ਬਤ੍ਤਿਨਿਮਿਤ੍ਤਤਾਯ ਪਵਤ੍ਤਕਾਰਣਤੋ ਚ ਮਰਣਵਿਬਨ੍ਧਨਾ.

ਉਮ੍ਮਾਦਨਾਤਿ ਵਿਪਰਿਣਾਮਧਮ੍ਮਾਨਂ ਵਿਯੋਗਵਸੇਨ ਸੋਕੁਮ੍ਮਾਦਕਰਾ, ਵਡ੍ਢਿਯਾ ਵਾ ਉਪਰੂਪਰਿਮਦਾਵਹਾ. ਉਲ੍ਲਪਨਾਤਿ ‘‘ਅਹੋ ਸੁਖਂ ਅਹੋ ਸੁਖ’’ਨ੍ਤਿ ਉਦ੍ਧਂ ਉਦ੍ਧਂ ਲਪਾਪਨਕਾ. ‘‘ਉਲ੍ਲੋਲਨਾ’’ਤਿਪਿ ਪਾਠੋ, ਭਤ੍ਤਪਿਣ੍ਡਨਿਮਿਤ੍ਤਂ ਨਙ੍ਗੁਟ੍ਠਂ ਉਲ੍ਲੋਲੇਨ੍ਤੋ ਸੁਨਖੋ ਵਿਯ ਆਮਿਸਹੇਤੁ ਸਤ੍ਤੇ ਉਪਰੂਪਰਿਲਾਲਨਾ, ਪਰਾਭਵਾਵਞ੍ਞਾਤਪਾਪਨਕਾਤਿ ਅਤ੍ਥੋ. ਚਿਤ੍ਤਪ੍ਪਮਾਥਿਨੋਤਿ ਪਰਿਲ਼ਾਹੁਪ੍ਪਾਦਨਾਦਿਨਾ ਸਮ੍ਪਤਿ ਆਯਤਿਞ੍ਚ ਚਿਤ੍ਤਸ੍ਸ ਪਮਥਨਸੀਲਾ. ‘‘ਚਿਤ੍ਤਪ੍ਪਮਦ੍ਦਿਨੋ’’ਤਿ ਵਾ ਪਾਠੋ, ਸੋ ਏਵਤ੍ਥੋ. ਯੇ ਪਨ ‘‘ਚਿਤ੍ਤਪ੍ਪਮਾਦਿਨੋ’’ਤਿ ਵਦਨ੍ਤਿ, ਤੇਸਂ ਚਿਤ੍ਤਸ੍ਸ ਪਮਾਦਾਵਹਾਤਿ ਅਤ੍ਥੋ. ਸਂਕਿਲੇਸਾਯਾਤਿ ਵਿਬਾਧਨਾਯ ਉਪਤਾਪਨਾਯ ਵਾ. ਖਿਪ੍ਪਂ ਮਾਰੇਨ ਓਡ੍ਡਿਤਨ੍ਤਿ ਕਾਮਾ ਨਾਮੇਤੇ ਮਾਰੇਨ ਓਡ੍ਡਿਤਂ ਕੁਮਿਨਨ੍ਤਿ ਦਟ੍ਠਬ੍ਬਾ ਸਤ੍ਤਾਨਂ ਅਨਤ੍ਥਾਵਹਨਤੋ.

ਅਨਨ੍ਤਾਦੀਨਵਾਤਿ ‘‘ਲੋਭਨਂ ਮਦਨਞ੍ਚੇਤ’’ਨ੍ਤਿਆਦਿਨਾ, ‘‘ਇਧ ਸੀਤਸ੍ਸ ਪੁਰਕ੍ਖਤੋ ਉਣ੍ਹਸ੍ਸ ਪੁਰਕ੍ਖਤੋ’’ਤਿਆਦਿਨਾ (ਮ. ਨਿ. ੧.੧੬੭) ਚ ਦੁਕ੍ਖਕ੍ਖਨ੍ਧਸੁਤ੍ਤਾਦੀਸੁ ਵੁਤ੍ਤਨਯੇਨ ਅਪਰਿਯਨ੍ਤਾਦੀਨਵਾ ਬਹੁਦੋਸਾ. ਬਹੁਦੁਕ੍ਖਾਤਿ ਆਪਾਯਿਕਾਦਿਬਹੁਵਿਧਦੁਕ੍ਖਾਨੁਬਨ੍ਧਾ. ਮਹਾਵਿਸਾਤਿ ਕਟੁਕਾਸਯ੍ਹਫਲਤਾਯ ਹਲਾਹਲਾਦਿਮਹਾਵਿਸਸਦਿਸਾ. ਅਪ੍ਪਸ੍ਸਾਦਾਤਿ ਸਤ੍ਥਧਾਰਾਗਤਮਧੁਬਿਨ੍ਦੁ ਵਿਯ ਪਰਿਤ੍ਤਸ੍ਸਾਦਾ. ਰਣਕਰਾਤਿ ਸਾਰਾਗਾਦਿਸਂਵਡ੍ਢਕਾ. ਸੁਕ੍ਕਪਕ੍ਖਵਿਸੋਸਨਾਤਿ ਸਤ੍ਤਾਨਂ ਅਨਵਜ੍ਜਕੋਟ੍ਠਾਸਸ੍ਸ ਵਿਨਾਸਕਾ.

ਸਾਹਨ੍ਤਿ ਸਾ ਅਹਂ, ਹੇਟ੍ਠਾ ਵੁਤ੍ਤਨਯੇਨੇਵ ਸਤ੍ਥੁ ਸਨ੍ਤਿਕੇ ਧਮ੍ਮਂ ਸੁਤ੍ਵਾ ਪਟਿਲਦ੍ਧਸਦ੍ਧਾ ਕਾਮੇ ਪਹਾਯ ਪਬ੍ਬਜਿਤ੍ਵਾ ਠਿਤਾਤਿ ਅਤ੍ਥੋ. ਏਤਾਦਿਸਨ੍ਤਿ ਏਵਰੂਪਂ ਵੁਤ੍ਤਪ੍ਪਕਾਰਂ. ਕਤ੍ਵਾਤਿ ਇਤਿ ਕਤ੍ਵਾ, ਯਥਾਵੁਤ੍ਤਕਾਰਣੇਨਾਤਿ ਅਤ੍ਥੋ. ਨ ਤਂ ਪਚ੍ਚਾਗਮਿਸ੍ਸਾਮੀਤਿ ਤਂ ਮਯਾ ਪੁਬ੍ਬੇ ਵਨ੍ਤਕਾਮੇ ਪੁਨ ਨ ਪਰਿਭੁਞ੍ਜਿਸ੍ਸਾਮਿ. ਨਿਬ੍ਬਾਨਾਭਿਰਤਾ ਸਦਾਤਿ ਯਸ੍ਮਾ ਪਬ੍ਬਜਿਤਕਾਲਤੋ ਪਟ੍ਠਾਯ ਸਬ੍ਬਕਾਲਂ ਨਿਬ੍ਬਾਨਾਭਿਰਤਾ, ਤਸ੍ਮਾ ਨ ਤਂ ਪਚ੍ਚਾਗਮਿਸ੍ਸਾਮੀਤਿ ਯੋਜਨਾ.

ਰਣਂ ਤਰਿਤ੍ਵਾ ਕਾਮਾਨਨ੍ਤਿ ਕਾਮਾਨਂ ਰਣਂ ਤਰਿਤ੍ਵਾ, ਤਞ੍ਚ ਮਯਾ ਕਾਤਬ੍ਬਂ ਅਰਿਯਮਗ੍ਗਸਂਪਹਾਰਂ ਕਤ੍ਵਾ. ਸੀਤਿਭਾਵਾਭਿਕਙ੍ਖਿਨੀਤਿ ਸਬ੍ਬਕਿਲੇਸਦਰਥਪਰਿਲ਼ਾਹਵੂਪਸਮੇਨ ਸੀਤਿਭਾਵਸਙ੍ਖਾਤਂ ਅਰਹਤ੍ਤਂ ਅਭਿਕਙ੍ਖਨ੍ਤੀ. ਸਬ੍ਬਸਂਯੋਜਨਕ੍ਖਯੇਤਿ ਸਬ੍ਬੇਸਂ ਸਂਯੋਜਨਾਨਂ ਖਯਭੂਤੇ ਨਿਬ੍ਬਾਨੇ ਅਭਿਰਤਾ.

ਯੇਨ ਤਿਣ੍ਣਾ ਮਹੇਸਿਨੋਤਿ ਯੇਨ ਅਰਿਯਮਗ੍ਗੇਨ ਬੁਦ੍ਧਾਦਯੋ ਮਹੇਸਿਨੋ ਸਂਸਾਰਮਹੋਘਂ ਤਿਣ੍ਣਾ, ਅਹਮ੍ਪਿ ਤੇਹਿ ਗਤਮਗ੍ਗਂ ਅਨੁਗਚ੍ਛਾਮਿ, ਸੀਲਾਦਿਪਟਿਪਤ੍ਤਿਯਾ ਅਨੁਪਾਪੁਣਾਮੀਤਿ ਅਤ੍ਥੋ.

ਧਮ੍ਮਟ੍ਠਨ੍ਤਿ ਅਰਿਯਫਲਧਮ੍ਮੇ ਠਿਤਂ. ਅਨੇਜਨ੍ਤਿ ਪਟਿਪ੍ਪਸ੍ਸਦ੍ਧ ਏਜਤਾਯ ਅਨੇਜਨ੍ਤਿ ਲਦ੍ਧਨਾਮਂ ਅਗ੍ਗਫਲਂ. ਉਪਸਮ੍ਪਜ੍ਜਾਤਿ ਸਮ੍ਪਾਦੇਤ੍ਵਾ ਅਗ੍ਗਮਗ੍ਗਾਧਿਗਮੇਨ ਅਧਿਗਨ੍ਤ੍ਵਾ. ਝਾਯਤੀਤਿ ਤਮੇਵ ਫਲਜ੍ਝਾਨਂ ਉਪਨਿਜ੍ਝਾਯਤਿ.

ਅਜ੍ਜਟ੍ਠਮੀ ਪਬ੍ਬਜਿਤਾਤਿ ਪਬ੍ਬਜਿਤਾ ਹੁਤ੍ਵਾ ਪਬ੍ਬਜਿਤਤੋ ਪਟ੍ਠਾਯ ਅਜ੍ਜ ਅਟ੍ਠਮਦਿਵਸੋ, ਇਤੋ ਅਤੀਤੇ ਅਟ੍ਠਮਿਯਂ ਪਬ੍ਬਜਿਤਾਤਿ ਅਤ੍ਥੋ. ਸਦ੍ਧਾਤਿ ਸਦ੍ਧਾਸਮ੍ਪਨ੍ਨਾ. ਸਦ੍ਧਮ੍ਮਸੋਭਨਾਤਿ ਸਦ੍ਧਮ੍ਮਾਧਿਗਮੇਨ ਸੋਭਨਾ.

ਭੁਜਿਸ੍ਸਾਤਿ ਦਾਸਭਾਵਸਦਿਸਾਨਂ ਕਿਲੇਸਾਨਂ ਪਹਾਨੇਨ ਭੁਜਿਸ੍ਸਾ. ਕਾਮਚ੍ਛਨ੍ਦਾਦਿਇਣਾਪਗਮੇਨ ਅਣਣਾ.

ਇਮਾ ਕਿਰ ਤਿਸ੍ਸੋ ਗਾਥਾ ਪਬ੍ਬਜਿਤ੍ਵਾ ਅਟ੍ਠਮੇ ਦਿਵਸੇ ਅਰਹਤ੍ਤਂ ਪਤ੍ਵਾ ਅਞ੍ਞਤਰਸ੍ਮਿਂ ਰੁਕ੍ਖਮੂਲੇ ਫਲਸਮਾਪਤ੍ਤਿਂ ਸਮਾਪਜ੍ਜਿਤ੍ਵਾ ਨਿਸਿਨ੍ਨਂ ਥੇਰਿਂ ਭਿਕ੍ਖੂਨਂ ਦਸ੍ਸੇਤ੍ਵਾ ਪਸਂਸਨ੍ਤੇਨ ਭਗਵਤਾ ਵੁਤ੍ਤਾ.

ਅਥ ਸਕ੍ਕੋ ਦੇਵਾਨਮਿਨ੍ਦੋ ਤਂ ਪਵਤ੍ਤਿਂ ਦਿਬ੍ਬੇਨ ਚਕ੍ਖੁਨਾ ਦਿਸ੍ਵਾ ‘‘ਏਵਂ ਸਤ੍ਥਾਰਾ ਪਸਂਸੀਯਮਾਨਾ ਅਯਂ ਥੇਰੀ ਯਸ੍ਮਾ ਦੇਵੇਹਿ ਚ ਪਯਿਰੁਪਾਸਿਤਬ੍ਬਾ’’ਤਿ ਤਾਵਦੇਵ ਤਾਵਤਿਂਸੇਹਿ ਦੇਵੇਹਿ ਸਦ੍ਧਿਂ ਉਪਸਙ੍ਕਮਿਤ੍ਵਾ ਅਭਿਵਾਦੇਤ੍ਵਾ ਅਞ੍ਜਲਿਂ ਪਗ੍ਗਯ੍ਹ ਅਟ੍ਠਾਸਿ. ਤਂ ਸਨ੍ਧਾਯ ਸਙ੍ਗੀਤਿਕਾਰੇਹਿ ਵੁਤ੍ਤਂ –

‘‘ਤਂ ਸਕ੍ਕੋ ਦੇਵਸਙ੍ਘੇਨ, ਉਪਸਙ੍ਕਮ੍ਮ ਇਦ੍ਧਿਯਾ;

ਨਮਸ੍ਸਤਿ ਭੂਤਪਤਿ, ਸੁਭਂ ਕਮ੍ਮਾਰਧੀਤਰ’’ਨ੍ਤਿ.

ਤਤ੍ਥ ਤੀਸੁ ਕਾਮਭਵੇਸੁ ਭੂਤਾਨਂ ਸਤ੍ਤਾਨਂ ਪਤਿ ਇਸ੍ਸਰੋਤਿ ਕਤ੍ਵਾ ਭੂਤਪਤੀਤਿ ਲਦ੍ਧਨਾਮੋ ਸਕ੍ਕੋ ਦੇਵਰਾਜਾ ਦੇਵਸਙ੍ਘੇਨ ਸਦ੍ਧਿਂ ਤਂ ਸੁਭਂ ਕਮ੍ਮਾਰਧੀਤਰਂ ਅਤ੍ਤਨੋ ਦੇਵਿਦ੍ਧਿਯਾ ਉਪਸਙ੍ਕਮ੍ਮ ਨਮਸ੍ਸਤਿ, ਪਞ੍ਚਪਤਿਟ੍ਠਿਤੇਨ ਵਨ੍ਦਤੀਤਿ ਅਤ੍ਥੋ.

ਸੁਭਾਕਮ੍ਮਾਰਧੀਤੁਥੇਰੀਗਾਥਾਵਣ੍ਣਨਾ ਨਿਟ੍ਠਿਤਾ.

ਵੀਸਤਿਨਿਪਾਤਵਣ੍ਣਨਾ ਨਿਟ੍ਠਿਤਾ.