੪. ਸੁਨ੍ਦਰੀਥੇਰੀਗਾਥਾਵਣ੍ਣਨਾ

ਪੇਤਾਨਿ ਭੋਤਿ ਪੁਤ੍ਤਾਨੀਤਿਆਦਿਕਾ ਸੁਨ੍ਦਰਿਯਾ ਥੇਰਿਯਾ ਗਾਥਾ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰਾ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਂ ਕੁਸਲਂ ਉਪਚਿਨਨ੍ਤੀ ਇਤੋ ਏਕਤਿਂਸਕਪ੍ਪੇ ਵੇਸ੍ਸਭੁਸ੍ਸ ਭਗਵਤੋ ਕਾਲੇ ਕੁਲਗੇਹੇ ਨਿਬ੍ਬਤ੍ਤਿਤ੍ਵਾ ਵਿਞ੍ਞੁਤਂ ਪਤ੍ਵਾ ਏਕਦਿਵਸਂ ਸਤ੍ਥਾਰਂ ਪਿਣ੍ਡਾਯ ਚਰਨ੍ਤਂ ਦਿਸ੍ਵਾ ਪਸਨ੍ਨਮਾਨਸਾ ਭਿਕ੍ਖਂ ਦਤ੍ਵਾ ਪਞ੍ਚਪਤਿਟ੍ਠਿਤੇਨ ਵਨ੍ਦਿ. ਸਤ੍ਥਾ ਤਸ੍ਸਾ ਚਿਤ੍ਤਪ੍ਪਸਾਦਂ ਞਤ੍ਵਾ ਅਨੁਮੋਦਨਂ ਕਤ੍ਵਾ ਪਕ੍ਕਾਮਿ. ਸਾ ਤੇਨ ਪੁਞ੍ਞਕਮ੍ਮੇਨ ਤਾਵਤਿਂਸੇਸੁ ਨਿਬ੍ਬਤ੍ਤਿਤ੍ਵਾ ਤਤ੍ਥ ਯਾਵਤਾਯੁਕਂ ਠਤ੍ਵਾ ਦਿਬ੍ਬਸਮ੍ਪਤ੍ਤਿਂ ਅਨੁਭਵਿਤ੍ਵਾ ਤਤੋ ਚੁਤਾ ਅਪਰਾਪਰਂ ਸੁਗਤੀਸੁਯੇਵ ਸਂਸਰਨ੍ਤੀ ਪਰਿਪਕ੍ਕਞਾਣਾ ਹੁਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਬਾਰਾਣਸਿਯਂ ਸੁਜਾਤਸ੍ਸ ਨਾਮ ਬ੍ਰਾਹ੍ਮਣਸ੍ਸ ਧੀਤਾ ਹੁਤ੍ਵਾ ਨਿਬ੍ਬਤ੍ਤਿ. ਤਸ੍ਸਾ ਰੂਪਸਮ੍ਪਤ੍ਤਿਯਾ ਸੁਨ੍ਦਰੀਤਿ ਨਾਮਂ ਅਹੋਸਿ. ਵਯਪ੍ਪਤ੍ਤਕਾਲੇ ਚਸ੍ਸਾ ਕਨਿਟ੍ਠਭਾਤਾ ਕਾਲਮਕਾਸਿ. ਅਥਸ੍ਸਾ ਪਿਤਾ ਪੁਤ੍ਤਸੋਕੇਨ ਅਭਿਭੂਤੋ ਤਤ੍ਥ ਤਤ੍ਥ ਵਿਚਰਨ੍ਤੋ ਵਾਸਿਟ੍ਠਿਤ੍ਥੇਰਿਯਾ ਸਮਾਗਨ੍ਤ੍ਵਾ ਤਂ ਸੋਕਵਿਨੋਦਨਕਾਰਣਂ ਪੁਚ੍ਛਨ੍ਤੋ ‘‘ਪੇਤਾਨਿ ਭੋਤਿ ਪੁਤ੍ਤਾਨੀ’’ਤਿਆਦਿਕਾ ਦ੍ਵੇ ਗਾਥਾ ਅਭਾਸਿ. ਥੇਰੀ ਤਂ ਸੋਕਾਭਿਭੂਤਂ ਞਤ੍ਵਾ ਸੋਕਂ ਵਿਨੋਦੇਤੁਕਾਮਾ ‘‘ਬਹੂਨਿ ਪੁਤ੍ਤਸਤਾਨੀ’’ਤਿਆਦਿਕਾ ਦ੍ਵੇ ਗਾਥਾ ਵਤ੍ਵਾ ਅਤ੍ਤਨੋ ਅਸੋਕਭਾਵਂ ਕਥੇਸਿ. ਤਂ ਸੁਤ੍ਵਾ ਬ੍ਰਾਹ੍ਮਣੋ ‘‘ਕਥਂ ਤ੍ਵਂ, ਅਯ੍ਯੇ, ਏਵਂ ਅਸੋਕਾ ਜਾਤਾ’’ਤਿ ਆਹ. ਤਸ੍ਸ ਥੇਰੀ ਰਤਨਤ੍ਤਯਗੁਣਂ ਕਥੇਸਿ.

ਅਥ ਬ੍ਰਾਹ੍ਮਣੋ ‘‘ਕੁਹਿਂ ਸਤ੍ਥਾ’’ਤਿ ਪੁਚ੍ਛਿਤ੍ਵਾ ‘‘ਇਦਾਨਿ ਮਿਥਿਲਾਯਂ ਵਿਹਰਤੀ’’ਤਿ ਤਂ ਸੁਤ੍ਵਾ ਤਾਵਦੇਵ ਰਥਂ ਯੋਜੇਤ੍ਵਾ ਰਥੇਨ ਮਿਥਿਲਂ ਗਨ੍ਤ੍ਵਾ ਸਤ੍ਥਾਰਂ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ਸਮ੍ਮੋਦਨੀਯਂ ਕਥਂ ਕਤ੍ਵਾ ਏਕਮਨ੍ਤਂ ਨਿਸੀਦਿ. ਤਸ੍ਸ ਸਤ੍ਥਾ ਧਮ੍ਮਂ ਦੇਸੇਸਿ. ਸੋ ਧਮ੍ਮਂ ਸੁਤ੍ਵਾ ਪਟਿਲਦ੍ਧਸਦ੍ਧੋ ਪਬ੍ਬਜਿਤ੍ਵਾ ਵਿਪਸ੍ਸਨਂ ਪਟ੍ਠਪੇਤ੍ਵਾ ਘਟੇਨ੍ਤੋ ਵਾਯਮਨ੍ਤੋ ਤਤਿਯੇ ਦਿਵਸੇ ਅਰਹਤ੍ਤਂ ਪਾਪੁਣਿ. ਅਥ ਸਾਰਥਿ ਰਥਂ ਆਦਾਯ ਬਾਰਾਣਸਿਂ ਗਨ੍ਤ੍ਵਾ ਬ੍ਰਾਹ੍ਮਣਿਯਾ ਤਂ ਪਵਤ੍ਤਿਂ ਆਰੋਚੇਸਿ. ਸੁਨ੍ਦਰੀ ਅਤ੍ਤਨੋ ਪਿਤੁ ਪਬ੍ਬਜਿਤਭਾਵਂ ਸੁਤ੍ਵਾ, ‘‘ਅਮ੍ਮ, ਅਹਮ੍ਪਿ ਪਬ੍ਬਜਿਸ੍ਸਾਮੀ’’ਤਿ ਮਾਤਰਂ ਆਪੁਚ੍ਛਿ. ਮਾਤਾ ‘‘ਯਂ ਇਮਸ੍ਮਿਂ ਗੇਹੇ ਭੋਗਜਾਤਂ, ਸਬ੍ਬਂ ਤਂ ਤੁਯ੍ਹਂ ਸਨ੍ਤਕਂ, ਤ੍ਵਂ ਇਮਸ੍ਸ ਕੁਲਸ੍ਸ ਦਾਯਾਦਿਕਾ ਪਟਿਪਜ੍ਜ, ਇਮਂ ਸਬ੍ਬਭੋਗਂ ਪਰਿਭੁਞ੍ਜ, ਮਾ ਪਬ੍ਬਜੀ’’ਤਿ ਆਹ. ਸਾ ‘‘ਨ ਮਯ੍ਹਂ ਭੋਗੇਹਿ ਅਤ੍ਥੋ, ਪਬ੍ਬਜਿਸ੍ਸਾਮੇਵਾਹਂ, ਅਮ੍ਮਾ’’ਤਿ ਮਾਤਰਂ ਅਨੁਜਾਨਾਪੇਤ੍ਵਾ ਮਹਤਿਂ ਸਮ੍ਪਤ੍ਤਿਂ ਖੇਲ਼ਪਿਣ੍ਡਂ ਵਿਯ ਛਡ੍ਡੇਤ੍ਵਾ ਪਬ੍ਬਜਿ. ਪਬ੍ਬਜਿਤ੍ਵਾ ਚ ਸਿਕ੍ਖਮਾਨਾਯੇਵ ਹੁਤ੍ਵਾ ਵਿਪਸ੍ਸਨਂ ਵਡ੍ਢੇਤ੍ਵਾ ਘਟੇਨ੍ਤੀ ਵਾਯਮਨ੍ਤੀ ਹੇਤੁਸਮ੍ਪਨ੍ਨਤਾਯ ਞਾਣਸ੍ਸ ਪਰਿਪਾਕਂ ਗਤਤ੍ਤਾ ਸਹ ਪਟਿਸਮ੍ਭਿਦਾਹਿ ਅਰਹਤ੍ਤਂ ਪਾਪੁਣਿ. ਤੇਨ ਵੁਤ੍ਤਂ ਅਪਦਾਨੇ –

‘‘ਪਿਣ੍ਡਪਾਤਂ ਚਰਨ੍ਤਸ੍ਸ, ਵੇਸ੍ਸਭੁਸ੍ਸ ਮਹੇਸਿਨੋ;

ਕਟਚ੍ਛੁਭਿਕ੍ਖਮੁਗ੍ਗਯ੍ਹ, ਬੁਦ੍ਧਸੇਟ੍ਠਸ੍ਸਦਾਸਹਂ.

‘‘ਪਟਿਗ੍ਗਹੇਤ੍ਵਾ ਸਮ੍ਬੁਦ੍ਧੋ, ਵੇਸ੍ਸਭੂ ਲੋਕਨਾਯਕੋ;

ਵੀਥਿਯਾ ਸਣ੍ਠਿਤੋ ਸਤ੍ਥਾ, ਅਕਾ ਮੇ ਅਨੁਮੋਦਨਂ.

‘‘ਕਟਚ੍ਛੁਭਿਕ੍ਖਂ ਦਤ੍ਵਾਨ, ਤਾਵਤਿਂਸਂ ਗਮਿਸ੍ਸਸਿ;

ਛਤ੍ਤਿਂਸਦੇਵਰਾਜੂਨਂ, ਮਹੇਸਿਤ੍ਤਂ ਕਰਿਸ੍ਸਸਿ.

‘‘ਪਞ੍ਞਾਸਂ ਚਕ੍ਕਵਤ੍ਤੀਨਂ, ਮਹੇਸਿਤ੍ਤਂ ਕਰਿਸ੍ਸਸਿ;

ਮਨਸਾ ਪਤ੍ਥਿਤਂ ਸਬ੍ਬਂ, ਪਟਿਲਚ੍ਛਸਿ ਸਬ੍ਬਦਾ.

‘‘ਸਮ੍ਪਤ੍ਤਿਂ ਅਨੁਭੋਤ੍ਵਾਨ, ਪਬ੍ਬਜਿਸ੍ਸਸਿ ਕਿਞ੍ਚਨਾ;

ਸਬ੍ਬਾਸਵੇ ਪਰਿਞ੍ਞਾਯ, ਨਿਬ੍ਬਾਯਿਸ੍ਸਸਿਨਾਸਵਾ.

‘‘ਇਦਂ ਵਤ੍ਵਾਨ ਸਮ੍ਬੁਦ੍ਧੋ, ਵੇਸ੍ਸਭੂ ਲੋਕਨਾਯਕੋ;

ਨਭਂ ਅਬ੍ਭੁਗ੍ਗਮੀ ਵੀਰੋ, ਹਂਸਰਾਜਾਵ ਅਮ੍ਬਰੇ.

‘‘ਸੁਦਿਨ੍ਨਂ ਮੇ ਦਾਨਵਰਂ, ਸੁਯਿਟ੍ਠਾ ਯਾਗਸਮ੍ਪਦਾ;

ਕਟਚ੍ਛੁਭਿਕ੍ਖਂ ਦਤ੍ਵਾਨ, ਪਤ੍ਤਾਹਂ ਅਚਲਂ ਪਦਂ.

‘‘ਏਕਤਿਂਸੇ ਇਤੋ ਕਪ੍ਪੇ, ਯਂ ਦਾਨਮਦਦਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਭਿਕ੍ਖਾਦਾਨਸ੍ਸਿਦਂ ਫਲਂ.

‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਕਤਂ ਬੁਦ੍ਧਸ੍ਸ ਸਾਸਨ’’ਨ੍ਤਿ.

ਅਰਹਤ੍ਤਂ ਪਨ ਪਤ੍ਵਾ ਫਲਸੁਖੇਨ ਨਿਬ੍ਬਾਨਸੁਖੇਨ ਚ ਵਿਹਰਨ੍ਤੀ ਅਪਰਭਾਗੇ ‘‘ਸਤ੍ਥੁ ਪੁਰਤੋ ਸੀਹਨਾਦਂ ਨਦਿਸ੍ਸਾਮੀ’’ਤਿ ਉਪਜ੍ਝਾਯਂ ਆਪੁਚ੍ਛਿਤ੍ਵਾ ਬਾਰਾਣਸਿਤੋ ਨਿਕ੍ਖਮਿਤ੍ਵਾ ਸਮ੍ਬਹੁਲਾਹਿ ਭਿਕ੍ਖੁਨੀਹਿ ਸਦ੍ਧਿਂ ਅਨੁਕ੍ਕਮੇਨ ਸਾਵਤ੍ਥਿਂ ਗਨ੍ਤ੍ਵਾ ਸਤ੍ਥੁ ਸਨ੍ਤਿਕਂ ਉਪਸਙ੍ਕਮਿਤ੍ਵਾ ਸਤ੍ਥਾਰਂ ਵਨ੍ਦਿਤ੍ਵਾ ਏਕਮਨ੍ਤਂ ਠਿਤਾ ਸਤ੍ਥਾਰਾ ਕਤਪਟਿਸਨ੍ਥਾਰਾ ਸਤ੍ਥੁ ਓਰਸਧੀਤੁਭਾਵਾਦਿਵਿਭਾਵਨੇਨ ਅਞ੍ਞਂ ਬ੍ਯਾਕਾਸਿ. ਅਥਸ੍ਸਾ ਮਾਤਰਂ ਆਦਿਂ ਕਤ੍ਵਾ ਸਬ੍ਬੋ ਞਾਤਿਗਣੋ ਪਰਿਜਨੋ ਚ ਪਬ੍ਬਜਿ. ਸਾ ਅਪਰਭਾਗੇ ਅਤ੍ਤਨੋ ਪਟਿਪਤ੍ਤਿਂ ਪਚ੍ਚਵੇਕ੍ਖਿਤ੍ਵਾ ਪਿਤਰਾ ਵੁਤ੍ਤਗਾਥਂ ਆਦਿਂ ਕਤ੍ਵਾ ਉਦਾਨਵਸੇਨ –

੩੧੩. ‘‘ਪੇਤਾਨਿ ਭੋਤਿ ਪੁਤ੍ਤਾਨਿ, ਖਾਦਮਾਨਾ ਤੁਵਂ ਪੁਰੇ;

ਤੁਵਂ ਦਿਵਾ ਚ ਰਤ੍ਤੋ ਚ, ਅਤੀਵ ਪਰਿਤਪ੍ਪਸਿ.

੩੧੪. ‘‘ਸਾਜ੍ਜ ਸਬ੍ਬਾਨਿ ਖਾਦਿਤ੍ਵਾ, ਸਤਪੁਤ੍ਤਾਨਿ ਬ੍ਰਾਹ੍ਮਣੀ;

ਵਾਸੇਟ੍ਠਿ ਕੇਨ ਵਣ੍ਣੇਨ, ਨ ਬਾਲ਼੍ਹਂ ਪਰਿਤਪ੍ਪਸਿ.

੩੧੫. ‘‘ਬਹੂਨਿ ਪੁਤ੍ਤਸਤਾਨਿ, ਞਾਤਿਸਙ੍ਘਸਤਾਨਿ ਚ;

ਖਾਦਿਤਾਨਿ ਅਤੀਤਂਸੇ, ਮਮ ਤੁਞ੍ਹਞ੍ਚ ਬ੍ਰਾਹ੍ਮਣ.

੩੧੬. ‘‘ਸਾਹਂ ਨਿਸ੍ਸਰਣਂ ਞਤ੍ਵਾ, ਜਾਤਿਯਾ ਮਰਣਸ੍ਸ ਚ;

ਨ ਸੋਚਾਮਿ ਨ ਰੋਦਾਮਿ, ਨ ਚਾਪਿ ਪਰਿਤਪ੍ਪਯਿਂ.

੩੧੭. ‘‘ਅਬ੍ਭੁਤਂ ਵਤ ਵਾਸੇਟ੍ਠਿ, ਵਾਚਂ ਭਾਸਸਿ ਏਦਿਸਿਂ;

ਕਸ੍ਸ ਤ੍ਵਂ ਧਮ੍ਮਮਞ੍ਞਾਯ, ਗਿਰਂ ਭਾਸਸਿ ਏਦਿਸਿਂ.

੩੧੮. ‘‘ਏਸ ਬ੍ਰਾਹ੍ਮਣ ਸਮ੍ਬੁਦ੍ਧੋ, ਨਗਰਂ ਮਿਥਿਲਂ ਪਤਿ;

ਸਬ੍ਬਦੁਕ੍ਖਪ੍ਪਹਾਨਾਯ, ਧਮ੍ਮਂ ਦੇਸੇਸਿ ਪਾਣਿਨਂ.

੩੧੯. ‘‘ਤਸ੍ਸ ਬ੍ਰਹ੍ਮੇ ਅਰਹਤੋ, ਧਮ੍ਮਂ ਸੁਤ੍ਵਾ ਨਿਰੂਪਧਿਂ;

ਤਤ੍ਥ ਵਿਞ੍ਞਾਤਸਦ੍ਧਮ੍ਮਾ, ਪੁਤ੍ਤਸੋਕਂ ਬ੍ਯਪਾਨੁਦਿਂ.

੩੨੦. ‘‘ਸੋ ਅਹਮ੍ਪਿ ਗਮਿਸ੍ਸਾਮਿ, ਨਗਰਂ ਮਿਥਿਲਂ ਪਤਿ;

ਅਪ੍ਪੇਵ ਮਂ ਸੋ ਭਗਵਾ, ਸਬ੍ਬਦੁਕ੍ਖਾ ਪਮੋਚਯੇ.

੩੨੧. ‘‘ਅਦ੍ਦਸ ਬ੍ਰਾਹ੍ਮਣੋ ਬੁਦ੍ਧਂ, ਵਿਪ੍ਪਮੁਤ੍ਤਂ ਨਿਰੂਪਧਿਂ;

ਸ੍ਵਸ੍ਸ ਧਮ੍ਮਮਦੇਸੇਸਿ, ਮੁਨਿ ਦੁਕ੍ਖਸ੍ਸ ਪਾਰਗੂ.

੩੨੨. ‘‘ਦੁਕ੍ਖਂ ਦੁਕ੍ਖਸਮੁਪ੍ਪਾਦਂ, ਦੁਕ੍ਖਸ੍ਸ ਚ ਅਤਿਕ੍ਕਮਂ;

ਅਰਿਯਂ ਚਟ੍ਠਙ੍ਗਿਕਂ ਮਗ੍ਗਂ, ਦੁਕ੍ਖੂਪਸਮਗਾਮਿਨਂ.

੩੨੩. ‘‘ਤਤ੍ਥ ਵਿਞ੍ਞਾਤਸਦ੍ਧਮ੍ਮੋ, ਪਬ੍ਬਜ੍ਜਂ ਸਮਰੋਚਯਿ;

ਸੁਜਾਤੋ ਤੀਹਿ ਰਤ੍ਤੀਹਿ, ਤਿਸ੍ਸੋ ਵਿਜ੍ਜਾ ਅਫਸ੍ਸਯਿ.

੩੨੪. ‘‘ਏਹਿ ਸਾਰਥਿ ਗਚ੍ਛਾਹਿ, ਰਥਂ ਨਿਯ੍ਯਾਦਯਾਹਿਮਂ;

ਆਰੋਗ੍ਯਂ ਬ੍ਰਾਹ੍ਮਣਿਂ ਵਜ੍ਜ, ਪਬ੍ਬਜਿ ਦਾਨਿ ਬ੍ਰਾਹ੍ਮਣੋ;

ਸੁਜਾਤੋ ਤੀਹਿ ਰਤ੍ਤੀਹਿ, ਤਿਸ੍ਸੋ ਵਿਜ੍ਜਾ ਅਫਸ੍ਸਯਿ.

੩੨੫. ‘‘ਤਤੋ ਚ ਰਥਮਾਦਾਯ, ਸਹਸ੍ਸਞ੍ਚਾਪਿ ਸਾਰਥਿ;

ਆਰੋਗ੍ਯਂ ਬ੍ਰਾਹ੍ਮਣਿਂਵੋਚ, ‘ਪਬ੍ਬਜਿ ਦਾਨਿ ਬ੍ਰਾਹ੍ਮਣੋ;

ਸੁਜਾਤੋ ਤੀਹਿ ਰਤ੍ਤੀਹਿ, ਤਿਸ੍ਸੋ ਵਿਜ੍ਜਾ ਅਫਸ੍ਸਯਿ.

੩੨੬. ‘‘ਏਤਞ੍ਚਾਹਂ ਅਸ੍ਸਰਥਂ, ਸਹਸ੍ਸਞ੍ਚਾਪਿ ਸਾਰਥਿ;

ਤੇਵਿਜ੍ਜਂ ਬ੍ਰਾਹ੍ਮਣਂ ਸੁਤ੍ਵਾ, ਪੁਣ੍ਣਪਤ੍ਤਂ ਦਦਾਮਿ ਤੇ.

੩੨੭. ‘‘ਤੁਯ੍ਹੇਵ ਹੋਤ੍ਵਸ੍ਸਰਥੋ, ਸਹਸ੍ਸਞ੍ਚਾਪਿ ਬ੍ਰਾਹ੍ਮਣਿ;

ਅਹਮ੍ਪਿ ਪਬ੍ਬਜਿਸ੍ਸਾਮਿ, ਵਰਪਞ੍ਞਸ੍ਸ ਸਨ੍ਤਿਕੇ.

੩੨੮. ‘‘ਹਤ੍ਥੀ ਗਵਸ੍ਸਂ ਮਣਿਕੁਣ੍ਡਲਞ੍ਚ, ਫੀਤਞ੍ਚਿਮਂ ਗਹਵਿਭਵਂ ਪਹਾਯ;

ਪਿਤਾ ਪਬ੍ਬਜਿਤੋ ਤੁਯ੍ਹਂ, ਭੁਞ੍ਜ ਭੋਗਾਨਿ ਸੁਨ੍ਦਰੀ;

ਤੁਵਂ ਦਾਯਾਦਿਕਾ ਕੁਲੇ.

੩੨੯. ‘‘ਹਤ੍ਥੀ ਗਵਸ੍ਸਂ ਮਣਿਕੁਣ੍ਡਲਞ੍ਚ, ਰਮ੍ਮਂ ਚਿਮਂ ਗਹਵਿਭਵਂ ਪਹਾਯ;

ਪਿਤਾ ਪਬ੍ਬਜਿਤੋ ਮਯ੍ਹਂ, ਪੁਤ੍ਤਸੋਕੇਨ ਅਟ੍ਟਿਤੋ;

ਅਹਮ੍ਪਿ ਪਬ੍ਬਜਿਸ੍ਸਾਮਿ, ਭਾਤੁਸੋਕੇਨ ਅਟ੍ਟਿਤਾ.

੩੩੦. ‘‘ਸੋ ਤੇ ਇਜ੍ਝਤੁ ਸਙ੍ਕਪ੍ਪੋ, ਯਂ ਤ੍ਵਂ ਪਤ੍ਥੇਸਿ ਸੁਨ੍ਦਰੀ;

ਉਤ੍ਤਿਟ੍ਠਪਿਣ੍ਡੋ ਉਞ੍ਛੋ ਚ, ਪਂਸੁਕੂਲਞ੍ਚ ਚੀਵਰਂ;

ਏਤਾਨਿ ਅਭਿਸਮ੍ਭੋਨ੍ਤੀ, ਪਰਲੋਕੇ ਅਨਾਸਵਾ.

੩੩੧. ‘‘ਸਿਕ੍ਖਮਾਨਾਯ ਮੇ ਅਯ੍ਯੇ, ਦਿਬ੍ਬਚਕ੍ਖੁ ਵਿਸੋਧਿਤਂ;

ਪੁਬ੍ਬੇਨਿਵਾਸਂ ਜਾਨਾਮਿ, ਯਤ੍ਥ ਮੇ ਵੁਸਿਤਂ ਪੁਰੇ.

੩੩੨. ‘‘ਤੁਵਂ ਨਿਸ੍ਸਾਯ ਕਲ੍ਯਾਣਿ, ਥੇਰਿ ਸਙ੍ਘਸ੍ਸ ਸੋਭਨੇ;

ਤਿਸ੍ਸੋ ਵਿਜ੍ਜਾ ਅਨੁਪ੍ਪਤ੍ਤਾ, ਕਤਂ ਬੁਦ੍ਧਸ੍ਸ ਸਾਸਨਂ.

੩੩੩. ‘‘ਅਨੁਜਾਨਾਹਿ ਮੇ ਅਯ੍ਯੇ, ਇਚ੍ਛੇ ਸਾਵਤ੍ਥਿ ਗਨ੍ਤਵੇ;

ਸੀਹਨਾਦਂ ਨਦਿਸ੍ਸਾਮਿ, ਬੁਦ੍ਧਸੇਟ੍ਠਸ੍ਸ ਸਨ੍ਤਿਕੇ.

੩੩੪. ‘‘ਪਸ੍ਸ ਸੁਨ੍ਦਰਿ ਸਤ੍ਥਾਰਂ, ਹੇਮਵਣ੍ਣਂ ਹਰਿਤ੍ਤਚਂ;

ਅਦਨ੍ਤਾਨਂ ਦਮੇਤਾਰਂ, ਸਮ੍ਬੁਦ੍ਧਮਕੁਤੋਭਯਂ.

੩੩੫. ‘‘ਪਸ੍ਸ ਸੁਨ੍ਦਰਿਮਾਯਨ੍ਤਿਂ, ਵਿਪ੍ਪਮੁਤ੍ਤਂ ਨਿਰੂਪਧਿਂ;

ਵੀਤਰਾਗਂ ਵਿਸਂਯੁਤ੍ਤਂ, ਕਤਕਿਚ੍ਚਮਨਾਸਵਂ.

੩੩੬. ‘‘ਬਾਰਾਣਸਿਤੋ ਨਿਕ੍ਖਮ੍ਮ, ਤਵ ਸਨ੍ਤਿਕਮਾਗਤਾ;

ਸਾਵਿਕਾ ਤੇ ਮਹਾਵੀਰ, ਪਾਦੇ ਵਨ੍ਦਤਿ ਸੁਨ੍ਦਰੀ.

੩੩੭. ‘‘ਤੁਵਂ ਬੁਦ੍ਧੋ ਤੁਵਂ ਸਤ੍ਥਾ, ਤੁਯ੍ਹਂ ਧੀਤਾਮ੍ਹਿ ਬ੍ਰਾਹ੍ਮਣ;

ਓਰਸਾ ਮੁਖਤੋ ਜਾਤਾ, ਕਤਕਿਚ੍ਚਾ ਅਨਾਸਵਾ.

੩੩੮. ‘‘ਤਸ੍ਸਾ ਤੇ ਸ੍ਵਾਗਤਂ ਭਦ੍ਦੇ, ਤਤੋ ਤੇ ਅਦੁਰਾਗਤਂ;

ਏਵਞ੍ਹਿ ਦਨ੍ਤਾ ਆਯਨ੍ਤਿ, ਸਤ੍ਥੁ ਪਾਦਾਨਿ ਵਨ੍ਦਿਕਾ;

ਵੀਤਰਾਗਾ ਵਿਸਂਯੁਤ੍ਤਾ, ਕਤਕਿਚ੍ਚਾ ਅਨਾਸਵਾ’’ਤਿ. –

ਇਮਾ ਗਾਥਾ ਪਚ੍ਚੁਦਾਹਾਸਿ.

ਤਤ੍ਥ ਪੇਤਾਨੀਤਿ ਮਤਾਨਿ. ਭੋਤੀਤਿ ਤਂ ਆਲਪਤਿ. ਪੁਤ੍ਤਾਨੀਤਿ ਲਿਙ੍ਗਵਿਪਲ੍ਲਾਸੇਨ ਵੁਤ੍ਤਂ, ਪੇਤੇ ਪੁਤ੍ਤੇਤਿ ਅਤ੍ਥੋ. ਏਕੋ ਏਵ ਚ ਤਸ੍ਸਾ ਪੁਤ੍ਤੋ ਮਤੋ, ਬ੍ਰਾਹ੍ਮਣੋ ਪਨ ‘‘ਚਿਰਕਾਲਂ ਅਯਂ ਸੋਕੇਨ ਅਟ੍ਟਾ ਹੁਤ੍ਵਾ ਵਿਚਰਿ, ਬਹੂ ਮਞ੍ਞੇ ਇਮਿਸ੍ਸਾ ਪੁਤ੍ਤਾ ਮਤਾ’’ਤਿ ਏਵਂਸਞ੍ਞੀ ਹੁਤ੍ਵਾ ਬਹੁਵਚਨੇਨਾਹ. ਤਥਾ ਚ ‘‘ਸਾਜ੍ਜ ਸਬ੍ਬਾਨਿ ਖਾਦਿਤ੍ਵਾ ਸਤਪੁਤ੍ਤਾਨੀ’’ਤਿ. ਖਾਦਮਾਨਾਤਿ ਲੋਕਵੋਹਾਰਵਸੇਨ ਖੁਂਸਨਵਚਨਮੇਤਂ. ਲੋਕੇ ਹਿ ਯਸ੍ਸਾ ਇਤ੍ਥਿਯਾ ਜਾਤਜਾਤਾ ਪੁਤ੍ਤਾ ਮਰਨ੍ਤਿ, ਤਂ ਗਰਹਨ੍ਤਾ ‘‘ਪੁਤ੍ਤਖਾਦਿਨੀ’’ਤਿਆਦਿਂ ਵਦਨ੍ਤਿ. ਅਤੀਵਾਤਿ ਅਤਿਵਿਯ ਭੁਸਂ. ਪਰਿਤਪ੍ਪਸੀਤਿ ਸਨ੍ਤਪ੍ਪਸਿ, ਪੁਰੇਤਿ ਯੋਜਨਾ. ਅਯਞ੍ਹੇਤ੍ਥ ਸਙ੍ਖੇਪਤ੍ਥੋ – ਭੋਤਿ ਵਾਸੇਟ੍ਠਿ, ਪੁਬ੍ਬੇ ਤ੍ਵਂ ਮਤਪੁਤ੍ਤਾ ਹੁਤ੍ਵਾ ਸੋਚਨ੍ਤੀ ਪਰਿਦੇਵਨ੍ਤੀ ਅਤਿਵਿਯ ਸੋਕਾਯ ਸਮਪ੍ਪਿਤਾ ਗਾਮਨਿਗਮਰਾਜਧਾਨਿਯੋ ਆਹਿਣ੍ਡਸਿ.

ਸਾਜ੍ਜਾਤਿ ਸਾ ਅਜ੍ਜ, ਸਾ ਤ੍ਵਂ ਏਤਰਹੀਤਿ ਅਤ੍ਥੋ. ‘‘ਸਜ੍ਜਾ’’ਤਿ ਵਾ ਪਾਠੋ. ਕੇਨ ਵਣ੍ਣੇਨਾਤਿ ਕੇਨ ਕਾਰਣੇਨ.

ਖਾਦਿਤਾਨੀਤਿ ਥੇਰੀਪਿ ਬ੍ਰਾਹ੍ਮਣੇਨ ਵੁਤ੍ਤਪਰਿਯਾਯੇਨੇਵ ਵਦਤਿ. ਖਾਦਿਤਾਨਿ ਵਾ ਬ੍ਯਗ੍ਘਦੀਪਿਬਿਲ਼ਾਰਾਦਿਜਾਤਿਯੋ ਸਨ੍ਧਾਯੇਵਮਾਹ. ਅਤੀਤਂਸੇਤਿ ਅਤੀਤਕੋਟ੍ਠਾਸੇ, ਅਤਿਕ੍ਕਨ੍ਤਭਵੇਸੂਤਿ ਅਤ੍ਥੋ. ਮਮ ਤੁਯ੍ਹਞ੍ਚਾਤਿ ਮਯਾ ਚ ਤਯਾ ਚ.

ਨਿਸ੍ਸਰਣਂ ਞਤ੍ਵਾ ਜਾਤਿਯਾ ਮਰਣਸ੍ਸ ਚਾਤਿ ਜਾਤਿਜਰਾਮਰਣਾਨਂ ਨਿਸ੍ਸਰਣਭੂਤਂ ਨਿਬ੍ਬਾਨਂ ਮਗ੍ਗਞਾਣੇਨ ਪਟਿਵਿਜ੍ਝਿਤ੍ਵਾ. ਨ ਚਾਪਿ ਪਰਿਤਪ੍ਪਯਿਨ੍ਤਿ ਨ ਚਾਪਿ ਉਪਾਯਾਸਾਸਿਂ, ਅਹਂ ਉਪਾਯਾਸਂ ਨ ਆਪਜ੍ਜਿਨ੍ਤਿ ਅਤ੍ਥੋ.

ਅਬ੍ਭੁਤਂ ਵਤਾਤਿ ਅਚ੍ਛਰਿਯਂ ਵਤ. ਤਞ੍ਹਿ ਅਬ੍ਭੁਤਂ ਪੁਬ੍ਬੇ ਅਭੂਤਂ ਅਬ੍ਭੁਤਨ੍ਤਿ ਵੁਚ੍ਚਤਿ. ਏਦਿਸਿਨ੍ਤਿ ਏਵਰੂਪਿਂ, ‘‘ਨ ਸੋਚਾਮਿ ਨ ਰੋਦਾਮਿ, ਨ ਚਾਪਿ ਪਰਿਤਪ੍ਪਯਿ’’ਨ੍ਤਿ ਏਵਂ ਸੋਚਨਾਦੀਨਂ ਅਭਾਵਦੀਪਨਿਂ ਵਾਚਂ. ਕਸ੍ਸ ਤ੍ਵਂ ਧਮ੍ਮਮਞ੍ਞਾਯਾਤਿ ਕੇਵਲਂ ਯਥਾ ਏਦਿਸੋ ਧਮ੍ਮੋ ਲਦ੍ਧੁਂ ਨ ਸਕ੍ਕਾ, ਤਸ੍ਮਾ ਕਸ੍ਸ ਨਾਮ ਸਤ੍ਥੁਨੋ ਧਮ੍ਮਮਞ੍ਞਾਯ ਗਿਰਂ ਭਾਸਸਿ ਏਦਿਸਨ੍ਤਿ ਸਤ੍ਥਾਰਂ ਸਾਸਨਞ੍ਚ ਪੁਚ੍ਛਤਿ.

ਨਿਰੂਪਧਿਨ੍ਤਿ ਨਿਦ੍ਦੁਕ੍ਖਂ. ਵਿਞ੍ਞਾਤਸਦ੍ਧਮ੍ਮਾਤਿ ਪਟਿਵਿਦ੍ਧਅਰਿਯਸਚ੍ਚਧਮ੍ਮਾ. ਬ੍ਯਪਾਨੁਦਿਨ੍ਤਿ ਨੀਹਰਿਂ ਪਜਹਿਂ.

ਵਿਪ੍ਪਮੁਤ੍ਤਨ੍ਤਿ ਸਬ੍ਬਸੋ ਵਿਮੁਤ੍ਤਂ, ਸਬ੍ਬਕਿਲੇਸੇਹਿ ਸਬ੍ਬਭਵੇਹਿ ਚ ਵਿਸਂਯੁਤ੍ਤਂ. ਸ੍ਵਸ੍ਸਾਤਿ ਸੋ ਸਮ੍ਮਾਸਮ੍ਬੁਦ੍ਧੋ ਅਸ੍ਸ ਬ੍ਰਾਹ੍ਮਣਸ੍ਸ.

ਤਤ੍ਥਾਤਿ ਤਸ੍ਸਂ ਚਤੁਸਚ੍ਚਧਮ੍ਮਦੇਸਨਾਯਂ.

ਰਥਂ ਨਿਯ੍ਯਾਦਯਾਹਿਮਨ੍ਤਿ ਇਮਂ ਰਥਂ ਬ੍ਰਾਹ੍ਮਣਿਯਾ ਨਿਯ੍ਯਾਦੇਹਿ.

ਸਹਸ੍ਸਞ੍ਚਾਪੀਤਿ ਮਗ੍ਗਪਰਿਬ੍ਬਯਤ੍ਥਂ ਨੀਤਂ ਕਹਾਪਣਸਹਸ੍ਸਞ੍ਚਾਪਿ ਆਦਾਯ ਨਿਯ੍ਯਾਦੇਹੀਤਿ ਯੋਜਨਾ.

ਅਸ੍ਸਰਥਨ੍ਤਿ ਅਸ੍ਸਯੁਤ੍ਤਰਥਂ. ਪੁਣ੍ਣਪਤ੍ਤਨ੍ਤਿ ਤੁਟ੍ਠਿਦਾਨਂ.

ਏਵਂ ਬ੍ਰਾਹ੍ਮਣਿਯਾ ਤੁਟ੍ਠਿਦਾਨੇ ਦਿਯ੍ਯਮਾਨੇ ਤਂ ਅਸਮ੍ਪਟਿਚ੍ਛਨ੍ਤੋ ਸਾਰਥਿ ‘‘ਤੁਯ੍ਹੇਵ ਹੋਤੂ’’ਤਿ ਗਾਥਂ ਵਤ੍ਵਾ ਸਤ੍ਥੁ ਸਨ੍ਤਿਕਮੇਵ ਗਨ੍ਤ੍ਵਾ ਪਬ੍ਬਜਿ. ਪਬ੍ਬਜਿਤੇ ਪਨ ਸਾਰਥਿਮ੍ਹਿ ਬ੍ਰਾਹ੍ਮਣੀ ਅਤ੍ਤਨੋ ਧੀਤਰਂ ਸੁਨ੍ਦਰਿਂ ਆਮਨ੍ਤੇਤ੍ਵਾ ਘਰਾਵਾਸੇ ਨਿਯੋਜੇਨ੍ਤੀ ‘‘ਹਤ੍ਥੀ ਗਵਸ੍ਸ’’ਨ੍ਤਿ ਗਾਥਮਾਹ. ਤਤ੍ਥ ਹਤ੍ਥੀਤਿ ਹਤ੍ਥਿਨੋ. ਗਵਸ੍ਸਨ੍ਤਿ ਗਾਵੋ ਚ ਅਸ੍ਸਾ ਚ. ਮਣਿਕੁਣ੍ਡਲਞ੍ਚਾਤਿ ਮਣਿ ਚ ਕੁਣ੍ਡਲਾਨਿ ਚ. ਫੀਤਞ੍ਚਿਮਂ ਗਹਵਿਭਵਂ ਪਹਾਯਾਤਿ ਇਮਂ ਹਤ੍ਥਿਆਦਿਪ੍ਪਭੇਦਂ ਯਥਾਵੁਤ੍ਤਂ ਅਵੁਤ੍ਤਞ੍ਚ ਖੇਤ੍ਤਵਤ੍ਥੁਹਿਰਞ੍ਞਸੁਵਣ੍ਣਾਦਿਭੇਦਂ ਫੀਤਂ ਪਹੂਤਞ੍ਚ ਗਹਵਿਭਵਂ ਗੇਹੂਪਕਰਣਂ ਅਞ੍ਞਞ੍ਚ ਦਾਸਿਦਾਸਾਦਿਕਂ ਸਬ੍ਬਂ ਪਹਾਯ ਤਵ ਪਿਤਾ ਪਬ੍ਬਜਿਤੋ. ਭੁਞ੍ਜ ਭੋਗਾਨਿ ਸੁਨ੍ਦਰੀਤਿ ਸੁਨ੍ਦਰਿ, ਤ੍ਵਂ ਇਮੇ ਭੋਗੇ ਭੁਞ੍ਜਸ੍ਸੁ. ਤੁਵਂ ਦਾਯਾਦਿਕਾ ਕੁਲੇਤਿ ਤੁਵਞ੍ਹਿ ਇਮਸ੍ਮਿਂ ਕੁਲੇ ਦਾਯਜ੍ਜਾਰਹਾਤਿ.

ਤਂ ਸੁਤ੍ਵਾ ਸੁਨ੍ਦਰੀ ਅਤ੍ਤਨੋ ਨੇਕ੍ਖਮ੍ਮਜ੍ਝਾਸਯਂ ਪਕਾਸੇਨ੍ਤੀ ‘‘ਹਤ੍ਥੀਗਵਸ੍ਸ’’ਨ੍ਤਿਆਦਿਮਾਹ.

ਅਥ ਨਂ ਮਾਤਾ ਨੇਕ੍ਖਮ੍ਮੇਯੇਵ ਨਿਯੋਜੇਨ੍ਤੀ ‘‘ਸੋ ਤੇ ਇਜ੍ਝਤੂ’’ਤਿਆਦਿਨਾ ਦਿਯਡ੍ਢਗਾਥਮਾਹ. ਤਤ੍ਥ ਯਂ ਤ੍ਵਂ ਪਤ੍ਥੇਸਿ ਸੁਨ੍ਦਰੀਤਿ ਸੁਨ੍ਦਰਿ ਤ੍ਵਂ ਇਦਾਨਿ ਯਂ ਪਤ੍ਥੇਸਿ ਆਕਙ੍ਖਸਿ. ਸੋ ਤਵ ਪਬ੍ਬਜ੍ਜਾਯ ਸਙ੍ਕਪ੍ਪੋ ਪਬ੍ਬਜ੍ਜਾਯ ਛਨ੍ਦੋ ਇਜ੍ਝਤੁ ਅਨਨ੍ਤਰਾਯੇਨ ਸਿਜ੍ਝਤੁ. ਉਤ੍ਤਿਟ੍ਠਪਿਣ੍ਡੋਤਿ ਘਰੇ ਘਰੇ ਪਤਿਟ੍ਠਿਤ੍ਵਾ ਲਦ੍ਧਬ੍ਬਭਿਕ੍ਖਾਪਿਣ੍ਡੋ. ਉਞ੍ਛੋਤਿ ਤਦਤ੍ਥਂ ਘਰਪਟਿਪਾਟਿਯਾ ਆਹਿਣ੍ਡਨਂ ਉਦ੍ਦਿਸ੍ਸ ਠਾਨਞ੍ਚ. ਏਤਾਨੀਤਿ ਉਤ੍ਤਿਟ੍ਠਪਿਣ੍ਡਾਦੀਨਿ. ਅਭਿਸਮ੍ਭੋਨ੍ਤੀਤਿ ਅਨਿਬ੍ਬਿਨ੍ਨਰੂਪਾ ਜਙ੍ਘਬਲਂ ਨਿਸ੍ਸਾਯ ਅਭਿਸਮ੍ਭਵਨ੍ਤੀ, ਸਾਧੇਨ੍ਤੀਤਿ ਅਤ੍ਥੋ.

ਅਥ ਸੁਨ੍ਦਰੀ ‘‘ਸਾਧੁ, ਅਮ੍ਮਾ’’ਤਿ ਮਾਤੁਯਾ ਪਟਿਸ੍ਸੁਣਿਤ੍ਵਾ ਨਿਕ੍ਖਮਿਤ੍ਵਾ ਭਿਕ੍ਖੁਨੁਪਸ੍ਸਯਂ ਗਨ੍ਤ੍ਵਾ ਸਿਕ੍ਖਮਾਨਾਯੇਵ ਸਮਾਨਾ ਤਿਸ੍ਸੋ ਵਿਜ੍ਜਾ ਸਚ੍ਛਿਕਤ੍ਵਾ ‘‘ਸਤ੍ਥੁ ਸਨ੍ਤਿਕਂ ਗਮਿਸ੍ਸਾਮੀ’’ਤਿ ਉਪਜ੍ਝਾਯਂ ਆਰੋਚੇਤ੍ਵਾ ਭਿਕ੍ਖੁਨੀਹਿ ਸਦ੍ਧਿਂ ਸਾਵਤ੍ਥਿਂ ਅਗਮਾਸਿ. ਤੇਨ ਵੁਤ੍ਤਂ ‘‘ਸਿਕ੍ਖਮਾਨਾਯ ਮੇ, ਅਯ੍ਯੇ’’ਤਿਆਦਿ. ਤਤ੍ਥ ਸਿਕ੍ਖਮਾਨਾਯ ਮੇਤਿ ਸਿਕ੍ਖਮਾਨਾਯ ਸਮਾਨਾਯ ਮਯਾ. ਅਯ੍ਯੇਤਿ ਅਤ੍ਤਨੋ ਉਪਜ੍ਝਾਯਂ ਆਲਪਤਿ.

ਤੁਵਂ ਨਿਸ੍ਸਾਯ ਕਲ੍ਯਾਣਿ, ਥੇਰਿ ਸਙ੍ਘਸ੍ਸ ਸੋਭਨੇਤਿ ਭਿਕ੍ਖੁਨਿਸਙ੍ਘੇ ਵੁਦ੍ਧਤਰਭਾਵੇਨ ਥਿਰਗੁਣਯੋਗੇਨ ਚ ਸਙ੍ਘਤ੍ਥੇਰਿ ਸੋਭਨੇਹਿ ਸੀਲਾਦੀਹਿ ਸਮਨ੍ਨਾਗਤਤ੍ਤਾ ਸੋਭਨੇ ਕਲ੍ਯਾਣਿ ਕਲ੍ਯਾਣਮਿਤ੍ਤੇ, ਅਯ੍ਯੇ, ਤਂ ਨਿਸ੍ਸਾਯ ਮਯਾ ਤਿਸ੍ਸੋ ਵਿਜ੍ਜਾ ਅਨੁਪ੍ਪਤ੍ਤਾ ਕਤਂ ਬੁਦ੍ਧਸ੍ਸ ਸਾਸਨਨ੍ਤਿ ਯੋਜਨਾ.

ਇਚ੍ਛੇਤਿ ਇਚ੍ਛਾਮਿ. ਸਾਵਤ੍ਥਿ ਗਨ੍ਤਵੇਤਿ ਸਾਵਤ੍ਥਿਂ ਗਨ੍ਤੁਂ. ਸੀਹਨਾਦਂ ਨਦਿਸ੍ਸਾਮੀਤਿ ਅਞ੍ਞਾਬ੍ਯਾਕਰਣਮੇਵ ਸਨ੍ਧਾਯਾਹ.

ਅਥ ਸੁਨ੍ਦਰੀ ਅਨੁਕ੍ਕਮੇਨ ਸਾਵਤ੍ਥਿਂ ਗਨ੍ਤ੍ਵਾ ਵਿਹਾਰਂ ਪਵਿਸਿਤ੍ਵਾ ਸਤ੍ਥਾਰਂ ਧਮ੍ਮਾਸਨੇ ਨਿਸਿਨ੍ਨਂ ਦਿਸ੍ਵਾ ਉਲ਼ਾਰਂ ਪੀਤਿਸੋਮਨਸ੍ਸਂ ਪਟਿਸਂਵੇਦਯਮਾਨਾ ਅਤ੍ਤਾਨਮੇਵ ਆਲਪਨ੍ਤੀ ਆਹ ‘‘ਪਸ੍ਸ ਸੁਨ੍ਦਰੀ’’ਤਿ. ਹੇਮਵਣ੍ਣਨ੍ਤਿ ਸੁਵਣ੍ਣਵਣ੍ਣਂ. ਹਰਿਤ੍ਤਚਨ੍ਤਿ ਕਞ੍ਚਨਸਨ੍ਨਿਭਤ੍ਤਚਂ. ਏਤ੍ਥ ਚ ਭਗਵਾ ਪੀਤਵਣ੍ਣੇਨ ‘‘ਸੁਵਣ੍ਣਵਣ੍ਣੋ’’ਤਿ ਵੁਚ੍ਚਤਿ. ਅਥ ਖੋ ਸਮ੍ਮਦੇਵ ਘਂਸਿਤ੍ਵਾ ਜਾਤਿਹਿਙ੍ਗੁਲਕੇਨ ਅਨੁਲਿਮ੍ਪਿਤ੍ਵਾ ਸੁਪਰਿਮਜ੍ਜਿਤਕਞ੍ਚਨਾਦਾਸਸਨ੍ਨਿਭੋਤਿ ਦਸ੍ਸੇਤੁਂ ‘‘ਹੇਮਵਣ੍ਣ’’ਨ੍ਤਿ ਵਤ੍ਵਾ ‘‘ਹਰਿਤ੍ਤਚ’’ਨ੍ਤਿ ਵੁਤ੍ਤਂ.

ਪਸ੍ਸ ਸੁਨ੍ਦਰਿਮਾਯਨ੍ਤਿਨ੍ਤਿ ਤਂ ਸੁਨ੍ਦਰਿਨਾਮਿਕਂ ਮਂ ਭਗਵਾ ਆਗਚ੍ਛਨ੍ਤਿ ਪਸ੍ਸ. ‘‘ਵਿਪ੍ਪਮੁਤ੍ਤ’’ਨ੍ਤਿਆਦਿਨਾ ਅਞ੍ਞਂ ਬ੍ਯਾਕਰੋਨ੍ਤੀ ਪੀਤਿਵਿਪ੍ਫਾਰਵਸੇਨ ਵਦਤਿ.

ਕੁਤੋ ਪਨ ਆਗਤਾ, ਕਤ੍ਥ ਚ ਆਗਤਾ, ਕੀਦਿਸਾ ਚਾਯਂ ਸੁਨ੍ਦਰੀਤਿ ਆਸਙ੍ਕਨ੍ਤਾਨਂ ਆਸਙ੍ਕਂ ਨਿਵਤ੍ਤੇਤੁਂ ‘‘ਬਾਰਾਣਸਿਤੋ’’ਤਿ ਗਾਥਂ ਵਤ੍ਵਾ ਤਤ੍ਥ ‘‘ਸਾਵਿਕਾ ਚਾ’’ਤਿ ਵੁਤ੍ਤਮਤ੍ਥਂ ਪਾਕਟਤਰਂ ਕਾਤੁਂ ‘‘ਤੁਵਂ ਬੁਦ੍ਧੋ’’ਤਿ ਗਾਥਮਾਹ. ਤਸ੍ਸਤ੍ਥੋ – ਇਮਸ੍ਮਿਂ ਸਦੇਵਕੇ ਲੋਕੇ ਤੁਵਮੇਵੇਕੋ ਸਬ੍ਬਞ੍ਞੁਬੁਦ੍ਧੋ, ਦਿਟ੍ਠਧਮ੍ਮਿਕਸਮ੍ਪਰਾਯਿਕਪਰਮਤ੍ਥੇਹਿ ਯਥਾਰਹਂ ਅਨੁਸਾਸਨਤੋ ਤੁਵਂ ਮੇ ਸਤ੍ਥਾ, ਅਹਞ੍ਚ ਖੀਣਾਸਵਬ੍ਰਾਹ੍ਮਣੀ ਭਗਵਾ ਤੁਯ੍ਹਂ ਉਰੇ ਵਾਯਾਮ ਜਨਿਤਾਭਿਜਾਤਿਤਾਯ ਓਰਸਾ, ਮੁਖਤੋ ਪਵਤ੍ਤਧਮ੍ਮਘੋਸੇਨ ਸਾਸਨਸ੍ਸ ਚ ਮੁਖਭੂਤੇਨ ਅਰਿਯਮਗ੍ਗੇਨ ਜਾਤਤ੍ਤਾ ਮੁਖਤੋ ਜਾਤਾ, ਨਿਟ੍ਠਿਤਪਰਿਞ੍ਞਾਤਾਦਿਕਰਣੀਯਤਾਯ ਕਤਕਿਚ੍ਚਾ, ਸਬ੍ਬਸੋ ਆਸਵਾਨਂ ਖੇਪਿਤਤ੍ਤਾ ਅਨਾਸਵਾਤਿ.

ਅਥਸ੍ਸਾ ਸਤ੍ਥਾ ਆਗਮਨਂ ਅਭਿਨਨ੍ਦਨ੍ਤੋ ‘‘ਤਸ੍ਸਾ ਤੇ ਸ੍ਵਾਗਤ’’ਨ੍ਤਿ ਗਾਥਮਾਹ. ਤਸ੍ਸਤ੍ਥੋ – ਯਾ ਤ੍ਵਂ ਮਯਾ ਅਧਿਗਤਂ ਧਮ੍ਮਂ ਯਾਥਾਵਤੋ ਅਧਿਗਚ੍ਛਿ. ਤਸ੍ਸਾ ਤੇ, ਭਦ੍ਦੇ ਸੁਨ੍ਦਰਿ, ਇਧ ਮਮ ਸਨ੍ਤਿਕੇ ਆਗਤਂ ਆਗਮਨਂ ਸੁਆਗਤਂ. ਤਤੋ ਏਵ ਤਂ ਅਦੁਰਾਗਤਂ ਨ ਦੁਰਾਗਤਂ ਹੋਤਿ. ਕਸ੍ਮਾ? ਯਸ੍ਮਾ ਏਵਞ੍ਹਿ ਦਨ੍ਤਾ ਆਯਨ੍ਤੀਤਿ, ਯਥਾ ਤ੍ਵਂ ਸੁਨ੍ਦਰਿ, ਏਵਞ੍ਹਿ ਉਤ੍ਤਮੇਨ ਅਰਿਯਮਗ੍ਗਦਮਥੇਨ ਦਨ੍ਤਾ ਤਤੋ ਏਵ ਸਬ੍ਬਧਿ ਵੀਤਰਾਗਾ, ਸਬ੍ਬੇਸਂ ਸਂਯੋਜਨਾਨਂ ਸਮੁਚ੍ਛਿਨ੍ਨਤ੍ਤਾ ਵਿਸਂਯੁਤ੍ਤਾ ਕਤਕਿਚ੍ਚਾ ਅਨਾਸਵਾ ਸਤ੍ਥੁ ਪਾਦਾਨਂ ਵਨ੍ਦਿਕਾ ਆਗਚ੍ਛਨ੍ਤਿ, ਤਸ੍ਮਾ ਤਸ੍ਸਾ ਤੇ ਸ੍ਵਾਗਤਂ ਅਦੁਰਾਗਤਨ੍ਤਿ ਯੋਜਨਾ.

ਸੁਨ੍ਦਰੀਥੇਰੀਗਾਥਾਵਣ੍ਣਨਾ ਨਿਟ੍ਠਿਤਾ.