੨. ਰੋਹਿਨੀਥੇਰੀਗਾਥਾਵਣ੍ਣਨਾ

ਸਮਣਾਤਿ ਭੋਤਿ ਸੁਪੀਤਿਆਦਿਕਾ ਰੋਹਿਨਿਯਾ ਥੇਰਿਯਾ ਗਾਥਾ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰਾ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਂ ਕੁਸਲਂ ਉਪਚਿਨਨ੍ਤੀ ਇਤੋ ਏਕਨਵੁਤਿਕਪ੍ਪੇ ਵਿਪਸ੍ਸਿਸ੍ਸ ਭਗਵਤੋ ਕਾਲੇ ਕੁਲਗੇਹੇ ਨਿਬ੍ਬਤ੍ਤਿਤ੍ਵਾ ਵਿਞ੍ਞੁਤਂ ਪਤ੍ਵਾ, ਏਕਦਿਵਸਂ ਬਨ੍ਧੁਮਤੀਨਗਰੇ ਭਗਵਨ੍ਤਂ ਪਿਣ੍ਡਾਯ ਚਰਨ੍ਤਂ ਦਿਸ੍ਵਾ ਪਤ੍ਤਂ ਗਹੇਤ੍ਵਾ ਪੂਵਸ੍ਸ ਪੂਰੇਤ੍ਵਾ ਭਗਵਤੋ ਦਤ੍ਵਾ ਪੀਤਿਸੋਮਨਸ੍ਸਜਾਤਾ ਪਞ੍ਚਪਤਿਟ੍ਠਿਤੇਨ ਵਨ੍ਦਿ. ਸਾ ਤੇਨ ਪੁਞ੍ਞਕਮ੍ਮੇਨ ਦੇਵਮਨੁਸ੍ਸੇਸੁ ਸਂਸਰਨ੍ਤੀ ਅਨੁਕ੍ਕਮੇਨ ਉਪਚਿਤਵਿਮੋਕ੍ਖਸਮ੍ਭਾਰਾ ਹੁਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਵੇਸਾਲਿਯਂ ਮਹਾਵਿਭਵਸ੍ਸ ਬ੍ਰਾਹ੍ਮਣਸ੍ਸ ਗੇਹੇ ਨਿਬ੍ਬਤ੍ਤਿਤ੍ਵਾ ਰੋਹਿਨੀਤਿ ਲਦ੍ਧਨਾਮਾ ਵਿਞ੍ਞੁਤਂ ਪਤ੍ਵਾ, ਸਤ੍ਥਰਿ ਵੇਸਾਲਿਯਂ ਵਿਹਰਨ੍ਤੇ ਵਿਹਾਰਂ ਗਨ੍ਤਵਾ ਧਮ੍ਮਂ ਸੁਤ੍ਵਾ ਸੋਤਾਪਨ੍ਨਾ ਹੁਤ੍ਵਾ ਮਾਤਾਪਿਤੂਨਂ ਧਮ੍ਮਂ ਦੇਸੇਤ੍ਵਾ ਸਾਸਨੇ ਪਸਾਦਂ ਉਪ੍ਪਾਦੇਤ੍ਵਾ ਤੇ ਅਨੁਜਾਨਾਪੇਤ੍ਵਾ ਸਯਂ ਪਬ੍ਬਜਿਤ੍ਵਾ ਵਿਪਸ੍ਸਨਾਯ ਕਮ੍ਮਂ ਕਰੋਨ੍ਤੀ ਨ ਚਿਰਸ੍ਸੇਵ ਸਹ ਪਟਿਸਮ੍ਭਿਦਾਹਿ ਅਰਹਤ੍ਤਂ ਪਾਪੁਣਿ. ਤੇਨ ਵੁਤ੍ਤਂ –

‘‘ਨਗਰੇ ਬਨ੍ਧੁਮਤਿਯਾ, ਵਿਪਸ੍ਸਿਸ੍ਸ ਮਹੇਸਿਨੋ;

ਪਿਣ੍ਡਾਯ ਵਿਚਰਨ੍ਤਸ੍ਸ, ਪੂਵੇਦਾਸਿਮਹਂ ਤਦਾ.

‘‘ਤੇਨ ਕਮ੍ਮੇਨ ਸੁਕਤੇਨ, ਚੇਤਨਾਪਣਿਧੀਹਿ ਚ;

ਤਤ੍ਥ ਚਿਤ੍ਤਂ ਪਸਾਦੇਤ੍ਵਾ, ਤਾਵਤਿਂਸਮਗਚ੍ਛਹਂ.

‘‘ਛਤ੍ਤਿਂਸਦੇਵਰਾਜੂਨਂ, ਮਹੇਸਿਤ੍ਤਮਕਾਰਯਿਂ;

ਪਞ੍ਞਾਸਚਕ੍ਕਵਤ੍ਤੀਨਂ, ਮਹੇਸਿਤ੍ਤਮਕਾਰਯਿਂ.

‘‘ਮਨਸਾ ਪਤ੍ਥਿਤਾ ਨਾਮ, ਸਬ੍ਬਾ ਮਯ੍ਹਂ ਸਮਿਜ੍ਝਥ;

ਸਮ੍ਪਤ੍ਤਿਂ ਅਨੁਭੋਤ੍ਵਾਨ, ਦੇਵੇਸੁ ਮਨੁਜੇਸੁ ਚ.

‘‘ਪਚ੍ਛਿਮੇ ਭਵਸਮ੍ਪਤ੍ਤੇ, ਜਾਤੋ ਵਿਪ੍ਪਕੁਲੇ ਅਹਂ;

ਰੋਹਿਨੀ ਨਾਮ ਨਾਮੇਨ, ਞਾਤਕੇਹਿ ਪਿਯਾਯਿਤਾ.

‘‘ਭਿਕ੍ਖੂਨਂ ਸਨ੍ਤਿਕਂ ਗਨ੍ਤ੍ਵਾ, ਧਮ੍ਮਂ ਸੁਤ੍ਵਾ ਯਥਾਤਥਂ;

ਸਂਵਿਗ੍ਗਮਾਨਸਾ ਹੁਤ੍ਵਾ, ਪਬ੍ਬਜਿਂ ਅਨਗਾਰਿਯਂ.

‘‘ਯੋਨਿਸੋ ਪਦਹਨ੍ਤੀਨਂ, ਅਰਹਤ੍ਤਮਪਾਪੁਣਿਂ;

ਏਕਨਵੁਤਿਤੋ ਕਪ੍ਪੇ, ਯਂ ਦਾਨਮਦਦਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਪੂਵਦਾਨਸ੍ਸਿਦਂ ਫਲਂ.

‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਕਤਂ ਬੁਦ੍ਧਸ੍ਸ ਸਾਸਨ’’ਨ੍ਤਿ.

ਅਰਹਤ੍ਤਂ ਪਨ ਪਤ੍ਵਾ ਅਤ੍ਤਨੋ ਪਟਿਪਤ੍ਤਿਂ ਪਚ੍ਚਵੇਕ੍ਖਿਤ੍ਵਾ ਪੁਬ੍ਬੇ ਸੋਤਾਪਨ੍ਨਕਾਲੇ ਪਿਤਰਾ ਅਤ੍ਤਨਾ ਚ ਵਚਨਪਟਿਵਚਨਵਸੇਨ ਵੁਤ੍ਤਗਾਥਾ ਉਦਾਨਵਸੇਨ ਭਾਸਨ੍ਤੀ –

੨੭੧. ‘‘ਸਮਣਾਤਿ ਭੋਤਿ ਸੁਪਿ, ਸਮਣਾਤਿ ਪਬੁਜ੍ਝਸਿ;

ਸਮਣਾਨੇਵ ਕਿਤ੍ਤੇਸਿ, ਸਮਣੀ ਨੂਨ ਭਵਿਸ੍ਸਸਿ.

੨੭੨. ‘‘ਵਿਪੁਲਂ ਅਨ੍ਨਞ੍ਚ ਪਾਨਞ੍ਚ, ਸਮਣਾਨਂ ਪਵੇਚ੍ਛਸਿ;

ਰੋਹਿਨੀ ਦਾਨਿ ਪੁਚ੍ਛਾਮਿ, ਕੇਨ ਤੇ ਸਮਣਾ ਪਿਯਾ.

੨੭੩. ‘‘ਅਕਮ੍ਮਕਾਮਾ ਅਲਸਾ, ਪਰਦਤ੍ਤੂਪਜੀਵਿਨੋ;

ਆਸਂਸੁਕਾ ਸਾਦੁਕਾਮਾ, ਕੇਨ ਤੇ ਸਮਣਾ ਪਿਯਾ.

੨੭੪. ‘‘ਚਿਰਸ੍ਸਂ ਵਤ ਮਂ ਤਾਤ, ਸਮਣਾਨਂ ਪਰਿਪੁਚ੍ਛਸਿ;

ਤੇਸਂ ਤੇ ਕਿਤ੍ਤਯਿਸ੍ਸਾਮਿ, ਪਞ੍ਞਾਸੀਲਪਰਕ੍ਕਮਂ.

੨੭੫. ‘‘ਕਮ੍ਮਕਾਮਾ ਅਨਲਸਾ, ਕਮ੍ਮਸੇਟ੍ਠਸ੍ਸ ਕਾਰਕਾ;

ਰਾਗਂ ਦੋਸਂ ਪਜਹਨ੍ਤਿ, ਤੇਨ ਮੇ ਸਮਣਾ ਪਿਯਾ.

੨੭੬. ‘‘ਤੀਣਿ ਪਾਪਸ੍ਸ ਮੂਲਾਨਿ, ਧੁਨਨ੍ਤਿ ਸੁਚਿਕਾਰਿਨੋ;

ਸਬ੍ਬਂ ਪਾਪਂ ਪਹੀਨੇਸਂ, ਤੇਨ ਮੇ ਸਮਣਾ ਪਿਯਾ.

੨੭੭. ‘‘ਕਾਯਕਮ੍ਮਂ ਸੁਚਿ ਨੇਸਂ, ਵਚੀਕਮ੍ਮਞ੍ਚ ਤਾਦਿਸਂ;

ਮਨੋਕਮ੍ਮਂ ਸੁਚਿ ਨੇਸਂ, ਤੇਨ ਮੇ ਸਮਣਾ ਪਿਯਾ.

੨੭੮. ‘‘ਵਿਮਲਾ ਸਙ੍ਖਮੁਤ੍ਤਾਵ, ਸੁਦ੍ਧਾ ਸਨ੍ਤਰਬਾਹਿਰਾ;

ਪੁਣ੍ਣਾ ਸੁਕ੍ਕਾਨ ਧਮ੍ਮਾਨਂ, ਤੇਨ ਮੇ ਸਮਣਾ ਪਿਯਾ.

੨੭੯. ‘‘ਬਹੁਸ੍ਸੁਤਾ ਧਮ੍ਮਧਰਾ, ਅਰਿਯਾ ਧਮ੍ਮਜੀਵਿਨੋ;

ਅਤ੍ਥਂ ਧਮ੍ਮਞ੍ਚ ਦੇਸੇਨ੍ਤਿ, ਤੇਨ ਮੇ ਸਮਣਾ ਪਿਯਾ.

੨੮੦. ‘‘ਬਹੁਸ੍ਸੁਤਾ ਧਮ੍ਮਧਰਾ, ਅਰਿਯਾ ਧਮ੍ਮਜੀਵਿਨੋ;

ਏਕਗ੍ਗਚਿਤ੍ਤਾ ਸਤਿਮਨ੍ਤੋ, ਤੇਨ ਮੇ ਸਮਣਾ ਪਿਯਾ.

੨੮੧. ‘‘ਦੂਰਙ੍ਗਮਾ ਸਤਿਮਨ੍ਤੋ, ਮਨ੍ਤਭਾਣੀ ਅਨੁਦ੍ਧਤਾ;

ਦੁਕ੍ਖਸ੍ਸਨ੍ਤਂ ਪਜਾਨਨ੍ਤਿ, ਤੇਨ ਮੇ ਸਮਣਾ ਪਿਯਾ.

੨੮੨. ‘‘ਯਸ੍ਮਾ ਗਾਮਾ ਪਕ੍ਕਮਨ੍ਤਿ, ਨ ਵਿਲੋਕੇਨ੍ਤਿ ਕਿਞ੍ਚਨਂ;

ਅਨਪੇਕ੍ਖਾਵ ਗਚ੍ਛਨ੍ਤਿ, ਤੇਨ ਮੇ ਸਮਣਾ ਪਿਯਾ.

੨੮੩. ‘‘ਨ ਤੇ ਸਂ ਕੋਟ੍ਠੇ ਓਪੇਨ੍ਤਿ, ਨ ਕੁਮ੍ਭਿਂ ਨ ਖਲ਼ੋਪਿਯਂ;

ਪਰਿਨਿਟ੍ਠਿਤਮੇਸਾਨਾ, ਤੇਨ ਮੇ ਸਮਣਾ ਪਿਯਾ.

੨੮੪. ‘‘ਨ ਤੇ ਹਿਰਞ੍ਞਂ ਗਣ੍ਹਨ੍ਤਿ, ਨ ਸੁਵਣ੍ਣਂ ਨ ਰੂਪਿਯਂ;

ਪਚ੍ਚੁਪ੍ਪਨ੍ਨੇਨ ਯਾਪੇਨ੍ਤਿ, ਤੇਨ ਮੇ ਸਮਣਾ ਪਿਯਾ.

੨੮੫. ‘‘ਨਾਨਾਕੁਲਾ ਪਬ੍ਬਜਿਤਾ, ਨਾਨਾਜਨਪਦੇਹਿ ਚ;

ਅਞ੍ਞਮਞ੍ਞਂ ਪਿਹਯਨ੍ਤਿ, ਤੇਨ ਮੇ ਸਮਣਾ ਪਿਯਾ.

੨੮੬. ‘‘ਅਤ੍ਥਾਯ ਵਤ ਨੋ ਭੋਤਿ, ਕੁਲੇ ਜਾਤਾਸਿ ਰੋਹਿਨੀ;

ਸਦ੍ਧਾ ਬੁਦ੍ਧੇ ਚ ਧਮ੍ਮੇ ਚ, ਸਙ੍ਘੇ ਚ ਤਿਬ੍ਬਗਾਰਵਾ.

੨੮੭. ‘‘ਤੁਵਞ੍ਹੇਤਂ ਪਜਾਨਾਸਿ, ਪੁਞ੍ਞਕ੍ਖੇਤ੍ਤਂ ਅਨੁਤ੍ਤਰਂ;

ਅਮ੍ਹਮ੍ਪਿ ਏਤੇ ਸਮਣਾ, ਪਟਿਗ੍ਗਣ੍ਹਨ੍ਤਿ ਦਕ੍ਖਿਣਂ.

੨੮੮. ‘‘ਪਤਿਟ੍ਠਿਤੋ ਹੇਤ੍ਥ ਯਞ੍ਞੋ, ਵਿਪੁਲੋ ਨੋ ਭਵਿਸ੍ਸਤਿ;

ਸਚੇ ਭਾਯਸਿ ਦੁਕ੍ਖਸ੍ਸ, ਸਚੇ ਤੇ ਦੁਕ੍ਖਮਪ੍ਪਿਯਂ.

੨੮੯. ‘‘ਉਪੇਹਿ ਸਰਣਂ ਬੁਦ੍ਧਂ, ਧਮ੍ਮਂ ਸਙ੍ਘਞ੍ਚ ਤਾਦਿਨਂ;

ਸਮਾਦਿਯਾਹਿ ਸੀਲਾਨਿ, ਤਂ ਤੇ ਅਤ੍ਥਾਯ ਹੇਹਿਤਿ.

੨੯੦. ‘‘ਉਪੇਮਿ ਸਰਣਂ ਬੁਦ੍ਧਂ, ਧਮ੍ਮਂ ਸਙ੍ਘਞ੍ਚ ਤਾਦਿਨਂ;

ਸਮਾਦਿਯਾਮਿ ਸੀਲਾਨਿ, ਤਂ ਮੇ ਅਤ੍ਥਾਯ ਹੇਹਿਤਿ.

੨੯੧. ‘‘ਬ੍ਰਹ੍ਮਬਨ੍ਧੁ ਪੁਰੇ ਆਸਿਂ, ਸੋ ਇਦਾਨਿਮ੍ਹਿ ਬ੍ਰਾਹ੍ਮਣੋ;

ਤੇਵਿਜ੍ਜੋ ਸੋਤ੍ਤਿਯੋ ਚਮ੍ਹਿ, ਵੇਦਗੂ ਚਮ੍ਹਿ ਨ੍ਹਾਤਕੋ’’ਤਿ. –

ਇਮਾ ਗਾਥਾ ਪਚ੍ਚੁਦਾਹਾਸਿ.

ਤਤ੍ਥ ਆਦਿਤੋ ਤਿਸ੍ਸੋ ਗਾਥਾ ਅਤ੍ਤਨੋ ਧੀਤੁ ਭਿਕ੍ਖੂਸੁ ਸਮ੍ਮੁਤਿਂ ਅਨਿਚ੍ਛਨ੍ਤੇਨ ਵੁਤ੍ਤਾ. ਤਤ੍ਥ ਸਮਣਾਤਿ ਭੋਤਿ ਸੁਪੀਤਿ ਭੋਤਿ ਤ੍ਵਂ ਸੁਪਨਕਾਲੇਪਿ ‘‘ਸਮਣਾ ਸਮਣਾ’’ਤਿ ਕਿਤ੍ਤੇਨ੍ਤੀ ਸਮਣਪਟਿਬਦ੍ਧਂਯੇਵ ਕਥਂ ਕਥੇਨ੍ਤੀ ਸੁਪਸਿ. ਸਮਣਾਤਿ ਪਬੁਜ੍ਝਸੀਤਿ ਸੁਪਨਤੋ ਉਟ੍ਠਹਨ੍ਤੀਪਿ ‘‘ਸਮਣਾ’’ਇਚ੍ਚੇਵਂ ਵਤ੍ਵਾ ਪਬੁਜ੍ਝਸਿ ਨਿਦ੍ਦਾਯ ਵੁਟ੍ਠਾਸਿ. ਸਮਣਾਨੇਵ ਕਿਤ੍ਤੇਸੀਤਿ ਸਬ੍ਬਕਾਲਮ੍ਪਿ ਸਮਣੇ ਏਵ ਸਮਣਾਨਮੇਵ ਵਾ ਗੁਣੇ ਕਿਤ੍ਤੇਸਿ ਅਭਿਤ੍ਥਵਸਿ. ਸਮਣੀ ਨੂਨ ਭਵਿਸ੍ਸਸੀਤਿ ਗਿਹਿਰੂਪੇਨ ਠਿਤਾਪਿ ਚਿਤ੍ਤੇਨ ਸਮਣੀ ਏਵ ਮਞ੍ਞੇ ਭਵਿਸ੍ਸਸਿ. ਅਥ ਵਾ ਸਮਣੀ ਨੂਨ ਭਵਿਸ੍ਸਸੀਤਿ ਇਦਾਨਿ ਗਿਹਿਰੂਪੇਨ ਠਿਤਾਪਿ ਨ ਚਿਰੇਨੇਵ ਸਮਣੀ ਏਵ ਮਞ੍ਞੇ ਭਵਿਸ੍ਸਸਿ ਸਮਣੇਸੁ ਏਵ ਨਿਨ੍ਨਪੋਣਭਾਵਤੋ.

ਪਵੇਚ੍ਛਸੀਤਿ ਦੇਸਿ. ਰੋਹਿਨੀ ਦਾਨਿ ਪੁਚ੍ਛਾਮੀਤਿ, ਅਮ੍ਮ ਰੋਹਿਨਿ, ਤਂ ਅਹਂ ਇਦਾਨਿ ਪੁਚ੍ਛਾਮੀਤਿ ਬ੍ਰਾਹ੍ਮਣੋ ਅਤ੍ਤਨੋ ਧੀਤਰਂ ਪੁਚ੍ਛਨ੍ਤੋ ਆਹ. ਕੇਨ ਤੇ ਸਮਣਾ ਪਿਯਾਤਿ, ਅਮ੍ਮ ਰੋਹਿਨਿ, ਤ੍ਵਂ ਸਯਨ੍ਤੀਪਿ ਪਬੁਜ੍ਝਨ੍ਤੀਪਿ ਅਞ੍ਞਦਾਪਿ ਸਮਣਾਨਮੇਵ ਗੁਣੇ ਕਿਤ੍ਤਯਸਿ, ਕੇਨ ਨਾਮ ਕਾਰਣੇਨ ਤੁਯ੍ਹਂ ਸਮਣਾ ਪਿਯਾਯਿਤਬ੍ਬਾ ਜਾਤਾਤਿ ਅਤ੍ਥੋ.

ਇਦਾਨਿ ਬ੍ਰਾਹ੍ਮਣੋ ਸਮਣੇਸੁ ਦੋਸਂ ਧੀਤੁ ਆਚਿਕ੍ਖਨ੍ਤੋ ‘‘ਅਕਮ੍ਮਕਾਮਾ’’ਤਿ ਗਾਥਮਾਹ. ਤਤ੍ਥ ਅਕਮ੍ਮਕਾਮਾਤਿ ਨ ਕਮ੍ਮਕਾਮਾ, ਅਤ੍ਤਨੋ ਪਰੇਸਞ੍ਚ ਅਤ੍ਥਾਵਹਂ ਕਿਞ੍ਚਿ ਕਮ੍ਮਂ ਨ ਕਾਤੁਕਾਮਾ. ਅਲਸਾਤਿ ਕੁਸੀਤਾ. ਪਰਦਤ੍ਤੂਪਜੀਵਿਨੋਤਿ ਪਰੇਹਿ ਦਿਨ੍ਨੇਨੇਵ ਉਪਜੀਵਨਸੀਲਾ. ਆਸਂਸੁਕਾਤਿ ਤਤੋ ਏਵ ਘਾਸਚ੍ਛਾਦਨਾਦੀਨਂ ਆਸੀਸਨਕਾ. ਸਾਦੁਕਾਮਾਤਿ ਸਾਦੁਂ ਮਧੁਰਮੇਵ ਆਹਾਰਂ ਇਚ੍ਛਨਕਾ. ਸਬ੍ਬਮੇਤਂ ਬ੍ਰਾਹ੍ਮਣੋ ਸਮਣਾਨਂ ਗੁਣੇ ਅਜਾਨਨ੍ਤੋ ਅਤ੍ਤਨਾਵ ਪਰਿਕਪ੍ਪਿਤਂ ਦੋਸਮਾਹ.

ਤਂ ਸੁਤ੍ਵਾ ਰੋਹਿਨੀ ‘‘ਲਦ੍ਧੋ ਦਾਨਿ ਮੇ ਓਕਾਸੋ ਅਯ੍ਯਾਨਂ ਗੁਣੇ ਕਥੇਤੁ’’ਨ੍ਤਿ ਤੁਟ੍ਠਮਾਨਸਾ ਭਿਕ੍ਖੂਨਂ ਗੁਣੇ ਕਿਤ੍ਤੇਤੁਕਾਮਾ ਪਠਮਂ ਤਾਵ ਤੇਸਂ ਕਿਤ੍ਤਨੇ ਸੋਮਨਸ੍ਸਂ ਪਵੇਦੇਨ੍ਤੀ ‘‘ਚੀਰਸ੍ਸਂ ਵਤ ਮਂ, ਤਾਤਾ’’ਤਿ ਗਾਥਮਾਹ. ਤਤ੍ਥ ਚਿਰਸ੍ਸਂ ਵਤਾਤਿ ਚਿਰੇਨ ਵਤ. ਤਾਤਾਤਿ ਪਿਤਰਂ ਆਲਪਤਿ. ਸਮਣਾਨਨ੍ਤਿ ਸਮਣੇ ਸਮਣਾਨਂ ਵਾ ਮਯ੍ਹਂ ਪਿਯਾਯਿਤਬ੍ਬਂ ਪਰਿਪੁਚ੍ਛਸਿ. ਤੇਸਨ੍ਤਿ ਸਮਣਾਨਂ. ਪਞ੍ਞਾਸੀਲਪਰਕ੍ਕਮਨ੍ਤਿ ਪਞ੍ਞਞ੍ਚ ਸੀਲਞ੍ਚ ਉਸ੍ਸਾਹਞ੍ਚ.

ਕਿਤ੍ਤਯਿਸ੍ਸਾਮੀਤਿ ਕਥਯਿਸ੍ਸਾਮਿ. ਪਟਿਜਾਨੇਤ੍ਵਾ ਤੇ ਕਿਤ੍ਤੇਨ੍ਤੀ ‘‘ਅਕਮ੍ਮਕਾਮਾ ਅਲਸਾ’’ਤਿ ਤੇਨ ਵੁਤ੍ਤਂ ਦੋਸਂ ਤਾਵ ਨਿਬ੍ਬੇਠੇਤ੍ਵਾ ਤਪ੍ਪਟਿਪਕ੍ਖਭੂਤਂ ਗੁਣਂ ਦਸ੍ਸੇਤੁਂ ‘‘ਕਮ੍ਮਕਾਮਾ’’ਤਿਆਦਿਮਾਹ. ਤਤ੍ਥ ਕਮ੍ਮਕਾਮਾਤਿ ਵਤ੍ਤਪਟਿਵਤ੍ਤਾਦਿਭੇਦਂ ਕਮ੍ਮਂ ਸਮਣਕਿਚ੍ਚਂ ਪਰਿਪੂਰਣਵਸੇਨ ਕਾਮੇਨ੍ਤਿ ਇਚ੍ਛਨ੍ਤੀਤਿ ਕਮ੍ਮਕਾਮਾ. ਤਤ੍ਥ ਯੁਤ੍ਤਪ੍ਪਯੁਤ੍ਤਾ ਹੁਤ੍ਵਾ ਉਟ੍ਠਾਯ ਸਮੁਟ੍ਠਾਯ ਵਾਯਮਨਤੋ ਨ ਅਲਸਾਤਿ ਅਨਲਸਾ. ਤਂ ਪਨ ਕਮ੍ਮਂ ਸੇਟ੍ਠਂ ਉਤ੍ਤਮਂ ਨਿਬ੍ਬਾਨਾਵਹਮੇਵ ਕਰੋਨ੍ਤੀਤਿ ਕਮ੍ਮਸੇਟ੍ਠਸ੍ਸ ਕਾਰਕਾ. ਕਰੋਨ੍ਤਾ ਪਨ ਤਂ ਪਟਿਪਤ੍ਤਿਯਾ ਅਨਵਜ੍ਜਭਾਵਤੋ ਰਾਗਂ ਦੋਸਂ ਪਜਹਨ੍ਤਿ, ਯਥਾ ਰਾਗਦੋਸਾ ਪਹੀਯਨ੍ਤਿ, ਏਵਂ ਸਮਣਾ ਕਮ੍ਮਂ ਕਰੋਨ੍ਤਿ. ਤੇਨ ਮੇ ਸਮਣਾ ਪਿਯਾਤਿ ਤੇਨ ਯਥਾਵੁਤ੍ਤੇਨ ਸਮ੍ਮਾਪਟਿਪਜ੍ਜਨੇਨ ਮਯ੍ਹਂ ਸਮਣਾ ਪਿਯਾਯਿਤਬ੍ਬਾਤਿ ਅਤ੍ਥੋ.

ਤੀਣਿ ਪਾਪਸ੍ਸ ਮੂਲਾਨੀਤਿ ਲੋਭਦੋਸਮੋਹਸਙ੍ਖਾਤਾਨਿ ਅਕੁਸਲਸ੍ਸ ਤੀਣਿ ਮੂਲਾਨਿ. ਧੁਨਨ੍ਤੀਤਿ ਨਿਗ੍ਘਾਤੇਨ੍ਤਿ, ਪਜਹਨ੍ਤੀਤਿ ਅਤ੍ਥੋ. ਸੁਚਿਕਾਰਿਨੋਤਿ ਅਨਵਜ੍ਜਕਮ੍ਮਕਾਰਿਨੋ. ਸਬ੍ਬਂ ਪਾਪਂ ਪਹੀਨੇਸਨ੍ਤਿ ਅਗ੍ਗਮਗ੍ਗਾਧਿਗਮੇਨ ਏਸਂ ਸਬ੍ਬਮ੍ਪਿ ਪਾਪਂ ਪਹੀਨਂ.

ਏਵਂ ‘‘ਸਮਣਾ ਸੁਚਿਕਾਰਿਨੋ’’ਤਿ ਸਙ੍ਖੇਪਤੋ ਵੁਤ੍ਤਮਤ੍ਥਂ ਵਿਭਜਿਤ੍ਵਾ ਦਸ੍ਸੇਤੁਂ ‘‘ਕਾਯਕਮ੍ਮ’’ਨ੍ਤਿ ਗਾਥਮਾਹ. ਤਂ ਸੁਵਿਞ੍ਞੇਯ੍ਯਮੇਵ.

ਵਿਮਲਾ ਸਙ੍ਖਮੁਤ੍ਤਾਵਾਤਿ ਸੁਧੋਤਸਙ੍ਖਾ ਵਿਯ ਮੁਤ੍ਤਾ ਵਿਯ ਚ ਵਿਗਤਮਲਾ ਰਾਗਾਦਿਮਲਰਹਿਤਾ. ਸੁਦ੍ਧਾ ਸਨ੍ਤਰਬਾਹਿਰਾਤਿ ਸਨ੍ਤਰਞ੍ਚ ਬਾਹਿਰਞ੍ਚ ਸਨ੍ਤਰਬਾਹਿਰਂ. ਤਤੋ ਸਨ੍ਤਰਬਾਹਿਰਤੋ ਸੁਦ੍ਧਾ, ਸੁਦ੍ਧਾਸਯਪਯੋਗਾਤਿ ਅਤ੍ਥੋ. ਪੁਣ੍ਣਾ ਸੁਕ੍ਕਾਨ ਧਮ੍ਮਾਨਨ੍ਤਿ ਏਕਨ੍ਤਸੁਕ੍ਕੇਹਿ ਅਨਵਜ੍ਜਧਮ੍ਮੇਹਿ ਪਰਿਪੁਣ੍ਣਾ, ਅਸੇਖੇਹਿ ਸੀਲਕ੍ਖਨ੍ਧਾਦੀਹਿ ਸਮਨ੍ਨਾਗਤਾਤਿ ਅਤ੍ਥੋ.

ਸੁਤ੍ਤਗੇਯ੍ਯਾਦਿਬਹੁਂ ਸੁਤਂ ਏਤੇਸਂ, ਸੁਤੇਨ ਵਾ ਉਪ੍ਪਨ੍ਨਾਤਿ ਬਹੁਸ੍ਸੁਤਾ, ਪਰਿਯਤ੍ਤਿਬਾਹੁਸਚ੍ਚੇਨ ਪਟਿਵੇਧਬਾਹੁਸਚ੍ਚੇਨ ਚ ਸਮਨ੍ਨਾਗਤਾਤਿ ਅਤ੍ਥੋ. ਤਮੇਵ ਦੁਵਿਧਮ੍ਪਿ ਧਮ੍ਮਂ ਧਾਰੇਨ੍ਤੀਤਿ ਧਮ੍ਮਧਰਾ. ਸਤ੍ਤਾਨਂ ਆਚਾਰਸਮਾਚਾਰਸਿਕ੍ਖਾਪਦੇਨ ਅਰੀਯਨ੍ਤੀਤਿ ਅਰਿਯਾ. ਧਮ੍ਮੇਨ ਞਾਯੇਨ ਜੀਵਨ੍ਤੀਤਿ ਧਮ੍ਮਜੀਵਿਨੋ. ਅਤ੍ਥਂ ਧਮ੍ਮਞ੍ਚ ਦੇਸੇਨ੍ਤੀਤਿ ਭਾਸਿਤਤ੍ਥਞ੍ਚ ਦੇਸਨਾਧਮ੍ਮਞ੍ਚ ਕਥੇਨ੍ਤਿ ਪਕਾਸੇਨ੍ਤਿ. ਅਥ ਵਾ ਅਤ੍ਥਤੋ ਅਨਪੇਤਂ ਧਮ੍ਮਤੋ ਅਨਪੇਤਞ੍ਚ ਦੇਸੇਨ੍ਤਿ ਆਚਿਕ੍ਖਨ੍ਤਿ.

ਏਕਗ੍ਗਚਿਤ੍ਤਾਤਿ ਸਮਾਹਿਤਚਿਤ੍ਤਾ. ਸਤਿਮਨ੍ਤੋਤਿ ਉਪਟ੍ਠਿਤਸਤਿਨੋ.

ਦੂਰਙ੍ਗਮਾਤਿ ਅਰਞ੍ਞਗਤਾ, ਮਨੁਸ੍ਸੂਪਚਾਰਂ ਮੁਞ੍ਚਿਤ੍ਵਾ ਦੂਰਂ ਗਚ੍ਛਨ੍ਤਾ, ਇਦ੍ਧਾਨੁਭਾਵੇਨ ਵਾ ਯਥਾਰੁਚਿਤਂ ਦੂਰਂ ਠਾਨਂ ਗਚ੍ਛਨ੍ਤੀਤਿ ਦੂਰਙ੍ਗਮਾ. ਮਨ੍ਤਾ ਵੁਚ੍ਚਤਿ ਪਞ੍ਞਾ, ਤਾਯ ਭਣਨਸੀਲਤਾਯ ਮਨ੍ਤਭਾਣੀ. ਨ ਉਦ੍ਧਤਾਤਿ ਅਨੁਦ੍ਧਤਾ, ਉਦ੍ਧਚ੍ਚਰਹਿਤਾ ਵੂਪਸਨ੍ਤਚਿਤ੍ਤਾ. ਦੁਕ੍ਖਸ੍ਸਨ੍ਤਂ ਪਜਾਨਨ੍ਤੀਤਿ ਵਟ੍ਟਦੁਕ੍ਖਸ੍ਸ ਪਰਿਯਨ੍ਤਭੂਤਂ ਨਿਬ੍ਬਾਨਂ ਪਟਿਵਿਜ੍ਝਨ੍ਤਿ.

ਨ ਵਿਲੋਕੇਨ੍ਤਿ ਕਿਞ੍ਚਨਨ੍ਤਿ ਯਤੋ ਗਾਮਤੋ ਪਕ੍ਕਮਨ੍ਤਿ, ਤਸ੍ਮਿਂ ਗਾਮੇ ਕਞ੍ਚਿ ਸਤ੍ਤਂ ਵਾ ਸਙ੍ਖਾਰਂ ਵਾ ਅਪੇਕ੍ਖਾਵਸੇਨ ਨ ਓਲੋਕੇਨ੍ਤਿ, ਅਥ ਖੋ ਪਨ ਅਨਪੇਕ੍ਖਾਵ ਗਚ੍ਛਨ੍ਤਿ ਪਕ੍ਕਮਨ੍ਤਿ.

ਨ ਤੇ ਸਂ ਕੋਟ੍ਠੇ ਓਪੇਨ੍ਤੀਤਿ ਤੇ ਸਮਣਾ ਸਂ ਅਤ੍ਤਨੋ ਸਨ੍ਤਕਂ ਸਾਪਤੇਯ੍ਯਂ ਕੋਟ੍ਠੇ ਨ ਓਪੇਨ੍ਤਿ ਨ ਪਟਿਸਾਮੇਤ੍ਵਾ ਠਪੇਨ੍ਤਿ ਤਾਦਿਸਸ੍ਸ ਪਰਿਗ੍ਗਹਸ੍ਸ ਅਭਾਵਤੋ. ਕੁਮ੍ਭਿਨ੍ਤਿ ਕੁਮ੍ਭਿਯਂ. ਖਲ਼ੋਪਿਯਨ੍ਤਿ ਪਚ੍ਛਿਯਂ. ਪਰਿਨਿਟ੍ਠਿਤਮੇਸਾਨਾਤਿ ਪਰਕੁਲੇਸੁ ਪਰੇਸਂ ਅਤ੍ਥਾਯ ਸਿਦ੍ਧਮੇਵ ਘਾਸਂ ਪਰਿਯੇਸਨ੍ਤਾ.

ਹਿਰਞ੍ਞਨ੍ਤਿ ਕਹਾਪਣਂ. ਰੂਪਿਯਨ੍ਤਿ ਰਜਤਂ. ਪਚ੍ਚੁਪ੍ਪਨ੍ਨੇਨ ਯਾਪੇਨ੍ਤੀਤਿ ਅਤੀਤਂ ਅਨਨੁਸੋਚਨ੍ਤਾ ਅਨਾਗਤਞ੍ਚ ਅਪਚ੍ਚਾਸੀਸਨ੍ਤਾ ਪਚ੍ਚੁਪ੍ਪਨ੍ਨੇਨ ਯਾਪੇਨ੍ਤਿ ਅਤ੍ਤਭਾਵਂ ਪਵਤ੍ਤੇਨ੍ਤਿ.

ਅਞ੍ਞਮਞ੍ਞਂ ਪਿਹਯਨ੍ਤੀਤਿ ਅਞ੍ਞਮਞ੍ਞਸ੍ਮਿਂ ਮੇਤ੍ਤਿਂ ਕਰੋਨ੍ਤਿ. ‘‘ਪਿਹਾਯਨ੍ਤਿ’’ਪਿ ਪਾਠੋ, ਸੋ ਏਵ ਅਤ੍ਥੋ.

ਏਵਂ ਸੋ ਬ੍ਰਾਹ੍ਮਣੋ ਧੀਤੁਯਾ ਸਨ੍ਤਿਕੇ ਭਿਕ੍ਖੂਨਂ ਗੁਣੇ ਸੁਤ੍ਵਾ ਪਸਨ੍ਨਮਾਨਸੋ ਧੀਤਰਂ ਪਸਂਸਨ੍ਤੋ ‘‘ਅਤ੍ਥਾਯ ਵਤਾ’’ਤਿਆਦਿਮਾਹ.

ਅਮ੍ਹਮ੍ਪੀਤਿ ਅਮ੍ਹਾਕਮ੍ਪਿ. ਦਕ੍ਖਿਣਨ੍ਤਿ ਦੇਯ੍ਯਧਮ੍ਮਂ.

ਏਤ੍ਥਾਤਿ ਏਤੇਸੁ ਸਮਣੇਸੁ. ਯਞ੍ਞੋਤਿ ਦਾਨਧਮ੍ਮੋ. ਵਿਪੁਲੋਤਿ ਵਿਪੁਲਫਲੋ. ਸੇਸਂ ਵੁਤ੍ਤਨਯਮੇਵ.

ਏਵਂ ਬ੍ਰਾਹ੍ਮਣੋ ਸਰਣੇਸੁ ਸੀਲੇਸੁ ਚ ਪਤਿਟ੍ਠਿਤੋ ਅਪਰਭਾਗੇ ਸਞ੍ਜਾਤਸਂਵੇਗੋ ਪਬ੍ਬਜਿਤ੍ਵਾ ਵਿਪਸ੍ਸਨਂ ਵਡ੍ਢੇਤ੍ਵਾ ਅਰਹਤ੍ਤੇ ਪਤਿਟ੍ਠਾਯ ਅਤ੍ਤਨੋ ਪਟਿਪਤ੍ਤਿਂ ਪਚ੍ਚਵੇਕ੍ਖਿਤ੍ਵਾ ਉਦਾਨੇਨ੍ਤੋ ‘‘ਬ੍ਰਹ੍ਮਬਨ੍ਧੂ’’ਤਿ ਗਾਥਮਾਹ. ਤਸ੍ਸਤ੍ਥੋ ਹੇਟ੍ਠਾ ਵੁਤ੍ਤੋਯੇਵ.

ਰੋਹਿਨੀਥੇਰੀਗਾਥਾਵਣ੍ਣਨਾ ਨਿਟ੍ਠਿਤਾ.