੧. ਅਮ੍ਬਪਾਲੀਥੇਰੀਗਾਥਾਵਣ੍ਣਨਾ

ਵੀਸਤਿਨਿਪਾਤੇ ਕਾਲ਼ਕਾ ਭਮਰਵਣ੍ਣਸਾਦਿਸਾਤਿਆਦਿਕਾ ਅਮ੍ਬਪਾਲਿਯਾ ਥੇਰਿਯਾ ਗਾਥਾ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰਾ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਂ ਕੁਸਲਂ ਉਪਚਿਨਨ੍ਤੀ ਸਿਖਿਸ੍ਸ ਭਗਵਤੋ ਸਾਸਨੇ ਪਬ੍ਬਜਿਤ੍ਵਾ ਉਪਸਮ੍ਪਨ੍ਨਾ ਹੁਤ੍ਵਾ ਭਿਕ੍ਖੁਨਿਸਿਕ੍ਖਾਪਦਂ ਸਮਾਦਾਯ ਵਿਹਰਨ੍ਤੀ, ਏਕਦਿਵਸਂ ਸਮ੍ਬਹੁਲਾਹਿ ਭਿਕ੍ਖੁਨੀਹਿ ਸਦ੍ਧਿਂ ਚੇਤਿਯਂ ਵਨ੍ਦਿਤ੍ਵਾ ਪਦਕ੍ਖਿਣਂ ਕਰੋਨ੍ਤੀ ਪੁਰੇਤਰਂ ਗਚ੍ਛਨ੍ਤਿਯਾ ਖੀਣਾਸਵਤ੍ਥੇਰਿਯਾ ਖਿਪਨ੍ਤਿਯਾ ਸਹਸਾ ਖੇਲ਼ਪਿਣ੍ਡਂ ਚੇਤਿਯਙ੍ਗਣੇ ਪਤਿਤਂ, ਖੀਣਾਸਵਤ੍ਥੇਰਿਯਾ ਅਪਸ੍ਸਿਤ੍ਵਾ ਗਤਾਯ ਅਯਂ ਪਚ੍ਛਤੋ ਗਚ੍ਛਨ੍ਤੀ ਤਂ ਖੇਲ਼ਪਿਣ੍ਡਂ ਦਿਸ੍ਵਾ ‘‘ਕਾ ਨਾਮ ਗਣਿਕਾ ਇਮਸ੍ਮਿਂ ਠਾਨੇ ਖੇਲ਼ਪਿਣ੍ਡਂ ਪਾਤੇਸੀ’’ਤਿ ਅਕ੍ਕੋਸਿ. ਸਾ ਭਿਕ੍ਖੁਨਿਕਾਲੇ ਸੀਲਂ ਰਕ੍ਖਨ੍ਤੀ ਗਬ੍ਭਵਾਸਂ ਜਿਗੁਚ੍ਛਿਤ੍ਵਾ ਓਪਪਾਤਿਕਤ੍ਤਭਾਵੇ ਚਿਤ੍ਤਂ ਠਪੇਸਿ. ਤੇਨ ਚਰਿਮਤ੍ਤਭਾਵੇ ਵੇਸਾਲਿਯਂ ਰਾਜੁਯ੍ਯਾਨੇ ਅਮ੍ਬਰੁਕ੍ਖਮੂਲੇ ਓਪਪਾਤਿਕਾ ਹੁਤ੍ਵਾ ਨਿਬ੍ਬਤ੍ਤਿ. ਤਂ ਦਿਸ੍ਵਾ ਉਯ੍ਯਾਨਪਾਲੋ ਨਗਰਂ ਉਪਨੇਸਿ. ਅਮ੍ਬਰੁਕ੍ਖਮੂਲੇ ਨਿਬ੍ਬਤ੍ਤਤਾਯ ਸਾ ਅਮ੍ਬਪਾਲੀਤ੍ਵੇਵ ਵੋਹਰੀਯਿਤ੍ਥ. ਅਥ ਨਂ ਅਭਿਰੂਪਂ ਦਸ੍ਸਨੀਯਂ ਪਾਸਾਦਿਕਂ ਵਿਲਾਸਕਨ੍ਤਤਾਦਿਗੁਣਵਿਸੇਸਸਮੁਦਿਤਂ ਦਿਸ੍ਵਾ ਸਮ੍ਬਹੁਲਾ ਰਾਜਕੁਮਾਰਾ ਅਤ੍ਤਨੋ ਅਤ੍ਤਨੋ ਪਰਿਗ੍ਗਹਂ ਕਾਤੁਕਾਮਾ ਅਞ੍ਞਮਞ੍ਞਂ ਕਲਹਂ ਅਕਂਸੁ. ਤੇਸਂ ਕਲਹਵੂਪਸਮਤ੍ਥਂ ਤਸ੍ਸਾ ਕਮ੍ਮਸਞ੍ਚੋਦਿਤਾ ਵੋਹਾਰਿਕਾ ‘‘ਸਬ੍ਬੇਸਂ ਹੋਤੂ’’ਤਿ ਗਣਿਕਾਟ੍ਠਾਨੇ ਠਪੇਸੁਂ. ਸਾ ਸਤ੍ਥਰਿ ਪਟਿਲਦ੍ਧਸਦ੍ਧਾ ਅਤ੍ਤਨੋ ਉਯ੍ਯਾਨੇ ਵਿਹਾਰਂ ਕਤ੍ਵਾ ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਨਿਯ੍ਯਾਦੇਤ੍ਵਾ ਪਚ੍ਛਾ ਅਤ੍ਤਨੋ ਪੁਤ੍ਤਸ੍ਸ ਵਿਮਲਕੋਣ੍ਡਞ੍ਞਤ੍ਥੇਰਸ੍ਸ ਸਨ੍ਤਿਕੇ ਧਮ੍ਮਂ ਸੁਤ੍ਵਾ ਪਬ੍ਬਜਿਤ੍ਵਾ ਵਿਪਸ੍ਸਨਾਯ ਕਮ੍ਮਂ ਕਰੋਨ੍ਤੀ ਅਤ੍ਤਨੋ ਸਰੀਰਸ੍ਸ ਜਰਾਜਿਣ੍ਣਭਾਵਂ ਨਿਸ੍ਸਾਯ ਸਂਵੇਗਜਾਤਾ ਸਙ੍ਖਾਰਾਨਂ ਅਨਿਚ੍ਚਤਂ ਵਿਭਾਵੇਨ੍ਤੀ –

੨੫੨. ‘‘ਕਾਲ਼ਕਾ ਭਮਰਵਣ੍ਣਸਾਦਿਸਾ, ਵੇਲ੍ਲਿਤਗ੍ਗਾ ਮਮ ਮੁਦ੍ਧਜਾ ਅਹੁਂ;

ਤੇ ਜਰਾਯ ਸਾਣਵਾਕਸਾਦਿਸਾ, ਸਚ੍ਚਵਾਦਿਵਚਨਂ ਅਨਞ੍ਞਥਾ.

੨੫੩. ‘‘ਵਾਸਿਤੋਵ ਸੁਰਭੀ ਕਰਣ੍ਡਕੋ, ਪੁਪ੍ਫਪੂਰ ਮਮ ਉਤ੍ਤਮਙ੍ਗਜੋ;

ਤਂ ਜਰਾਯਥ ਸਲੋਮਗਨ੍ਧਿਕਂ, ਸਚ੍ਚਵਾਦਿਵਚਨਂ ਅਨਞ੍ਞਥਾ.

੨੫੪. ‘‘ਕਾਨਨਂਵ ਸਹਿਤਂ ਸੁਰੋਪਿਤਂ, ਕੋਚ੍ਛਸੂਚਿਵਿਚਿਤਗ੍ਗਸੋਭਿਤਂ;

ਤਂ ਜਰਾਯ ਵਿਰਲਂ ਤਹਿਂ ਤਹਿਂ, ਸਚ੍ਚਵਾਦਿਵਚਨਂ ਅਨਞ੍ਞਥਾ.

੨੫੫. ‘‘ਕਣ੍ਹਖਨ੍ਧਕਸੁਵਣ੍ਣਮਣ੍ਡਿਤਂ, ਸੋਭਤੇ ਸੁਵੇਣੀਹਿਲਙ੍ਕਤਂ;

ਤਂ ਜਰਾਯ ਖਲਿਤਂ ਸਿਰਂ ਕਤਂ, ਸਚ੍ਚਵਾਦਿਵਚਨਂ ਅਨਞ੍ਞਥਾ.

੨੫੬. ‘‘ਚਿਤ੍ਤਕਾਰਸੁਕਤਾਵ ਲੇਖਿਕਾ, ਸੋਭਰੇ ਸੁ ਭਮੁਕਾ ਪੁਰੇ ਮਮ;

ਤਾ ਜਰਾਯ ਵਲਿਭਿਪ੍ਪਲਮ੍ਬਿਤਾ, ਸਚ੍ਚਵਾਦਿਵਚਨਂ ਅਨਞ੍ਞਥਾ.

੨੫੭. ‘‘ਭਸ੍ਸਰਾ ਸੁਰੁਚਿਰਾ ਯਥਾ ਮਣੀ, ਨੇਤ੍ਤਹੇਸੁਮਭਿਨੀਲਮਾਯਤਾ;

ਤੇ ਜਰਾਯਭਿਹਤਾ ਨ ਸੋਭਰੇ, ਸਚ੍ਚਵਾਦਿਵਚਨਂ ਅਨਞ੍ਞਥਾ.

੨੫੮. ‘‘ਸਣ੍ਹਤੁਙ੍ਗਸਦਿਸੀ ਚ ਨਾਸਿਕਾ, ਸੋਭਤੇ ਸੁ ਅਭਿਯੋਬ੍ਬਨਂ ਪਤਿ;

ਸਾ ਜਰਾਯ ਉਪਕੂਲਿਤਾ ਵਿਯ, ਸਚ੍ਚਵਾਦਿਵਚਨਂ ਅਨਞ੍ਞਥਾ.

੨੫੯. ‘‘ਕਙ੍ਕਣਂਵ ਸੁਕਤਂ ਸੁਨਿਟ੍ਠਿਤਂ, ਸੋਭਰੇ ਸੁ ਮਮ ਕਣ੍ਣਪਾਲ਼ਿਯੋ;

ਤਾ ਜਰਾਯ ਵਲਿਭਿਪ੍ਪਲਮ੍ਬਿਤਾ, ਸਚ੍ਚਵਾਦਿਵਚਨਂ ਅਨਞ੍ਞਥਾ.

੨੬੦. ‘‘ਪਤ੍ਤਲੀਮਕੁਲਵਣ੍ਣਸਾਦਿਸਾ, ਸੋਭਰੇ ਸੁ ਦਨ੍ਤਾ ਪੁਰੇ ਮਮ;

ਤੇ ਜਰਾਯ ਖਣ੍ਡਿਤਾ ਚਾਸਿਤਾ, ਸਚ੍ਚਵਾਦਿਵਚਨਂ ਅਨਞ੍ਞਥਾ.

੨੬੧. ‘‘ਕਾਨਨਮ੍ਹਿ ਵਨਸਣ੍ਡਚਾਰਿਨੀ, ਕੋਕਿਲਾਵ ਮਧੁਰਂ ਨਿਕੂਜਿਹਂ;

ਤਂ ਜਰਾਯ ਖਲਿਤਂ ਤਹਿਂ ਤਹਿਂ, ਸਚ੍ਚਵਾਦਿਵਚਨਂ ਅਨਞ੍ਞਥਾ.

੨੬੨. ‘‘ਸਣ੍ਹਕਮ੍ਬੁਰਿਵ ਸੁਪ੍ਪਮਜ੍ਜਿਤਾ, ਸੋਭਤੇ ਸੁ ਗੀਵਾ ਪੁਰੇ ਮਮ;

ਸਾ ਜਰਾਯ ਭਗ੍ਗਾ ਵਿਨਾਮਿਤਾ, ਸਚ੍ਚਵਾਦਿਵਚਨਂ ਅਨਞ੍ਞਥਾ.

੨੬੩. ‘‘ਵਟ੍ਟਪਲਿਘਸਦਿਸੋਪਮਾ ਉਭੋ, ਸੋਭਰੇ ਸੁ ਬਾਹਾ ਪੁਰੇ ਮਮ;

ਤਾ ਜਰਾਯ ਯਥਾ ਪਾਟਲਿਬ੍ਬਲਿਤਾ, ਸਚ੍ਚਵਾਦਿਵਚਨਂ ਅਨਞ੍ਞਥਾ.

੨੬੪. ‘‘ਸਣ੍ਹਮੁਦ੍ਦਿਕਸੁਵਣ੍ਣਮਣ੍ਡਿਤਾ, ਸੋਭਰੇ ਸੁ ਹਤ੍ਥਾ ਪੁਰੇ ਮਮ;

ਤੇ ਜਰਾਯ ਯਥਾ ਮੂਲਮੂਲਿਕਾ, ਸਚ੍ਚਵਾਦਿਵਚਨਂ ਅਨਞ੍ਞਥਾ.

੨੬੫. ‘‘ਪੀਨਵਟ੍ਟਸਹਿਭੁਗ੍ਗਤਾ ਉਭੋ, ਸੋਭਰੇ ਸੁ ਥਨਕਾ ਪੁਰੇ ਮਮ;

ਥੇਵਿਕੀਵ ਲਮ੍ਬਨ੍ਤਿ ਨੋਦਕਾ, ਸਚ੍ਚਵਾਦਿਵਚਨਂ ਅਨਞ੍ਞਥਾ.

੨੬੬. ‘‘ਕਞ੍ਚਨਸ੍ਸ ਫਲਕਂਵ ਸਮ੍ਮਟ੍ਠਂ, ਸੋਭਤੇ ਸੁ ਕਾਯੋ ਪੁਰੇ ਮਮ;

ਸੋ ਵਲੀਹਿ ਸੁਖੁਮਾਹਿ ਓਤਤੋ, ਸਚ੍ਚਵਾਦਿਵਚਨਂ ਅਨਞ੍ਞਥਾ.

੨੬੭. ‘‘ਨਾਗਭੋਗਸਦਿਸੋਪਮਾ ਉਭੋ, ਸੋਭਰੇ ਸੁ ਊਰੂ ਪੁਰੇ ਮਮ;

ਤੇ ਜਰਾਯ ਯਥਾ ਵੇਲ਼ੁਨਾਲ਼ਿਯੋ, ਸਚ੍ਚਵਾਦਿਵਚਨਂ ਅਨਞ੍ਞਥਾ.

੨੬੮. ‘‘ਸਣ੍ਹਨੂਪੁਰਸੁਵਣ੍ਣਮਣ੍ਡਿਤਾ, ਸੋਭਰੇ ਸੁ ਜਙ੍ਘਾ ਪੁਰੇ ਮਮ;

ਤਾ ਜਰਾਯ ਤਿਲਦਣ੍ਡਕਾਰਿਵ, ਸਚ੍ਚਵਾਦਿਵਚਨਂ ਅਨਞ੍ਞਥਾ.

੨੬੯. ‘‘ਤੂਲਪੁਣ੍ਣਸਦਿਸੋਪਮਾ ਉਭੋ, ਸੋਭਰੇ ਸੁ ਪਾਦਾ ਪੁਰੇ ਮਮ;

ਤੇ ਜਰਾਯ ਫੁਟਿਤਾ ਵਲੀਮਤਾ, ਸਚ੍ਚਵਾਦਿਵਚਨਂ ਅਨਞ੍ਞਥਾ.

੨੭੦. ‘‘ਏਦਿਸੋ ਅਹੁ ਅਯਂ ਸਮੁਸ੍ਸਯੋ, ਜਜ੍ਜਰੋ ਬਹੁਦੁਖਾਨਮਾਲਯੋ;

ਸੋਪਲੇਪਪਤਿਤੋ ਜਰਾਘਰੋ, ਸਚ੍ਚਵਾਦਿਵਚਨਂ ਅਨਞ੍ਞਥਾ’’ਤਿ. –

ਇਮਾ ਗਾਥਾਯੋ ਅਭਾਸਿ.

ਤਤ੍ਥ ਕਾਲ਼ਕਾਤਿ ਕਾਲ਼ਕਵਣ੍ਣਾ. ਭਮਰਵਣ੍ਣਸਾਦਿਸਾਤਿ ਕਾਲ਼ਕਾ ਹੋਨ੍ਤਾਪਿ ਭਮਰਸਦਿਸਵਣ੍ਣਾ, ਸਿਨਿਦ੍ਧਨੀਲਾਤਿ ਅਤ੍ਥੋ. ਵੇਲ੍ਲਿਤਗ੍ਗਾਤਿ ਕੁਞ੍ਚਿਤਗ੍ਗਾ, ਮੂਲਤੋ ਪਟ੍ਠਾਯ ਯਾਵ ਅਗ੍ਗਾ ਕੁਞ੍ਚਿਤਾ ਵੇਲ੍ਲਿਤਾਤਿ ਅਤ੍ਥੋ. ਮੁਦ੍ਧਜਾਤਿ ਕੇਸਾ. ਜਰਾਯਾਤਿ ਜਰਾਹੇਤੁ ਜਰਾਯ ਉਪਹਤਸੋਭਾ. ਸਾਣਵਾਕਸਾਦਿਸਾਤਿ ਸਾਣਸਦਿਸਾ ਵਾਕਸਦਿਸਾ ਚ, ਸਾਣਵਾਕਸਦਿਸਾ ਚੇਵ ਮਕਚਿਵਾਕਸਦਿਸਾ ਚਾਤਿਪਿ ਅਤ੍ਥੋ. ਸਚ੍ਚਵਾਦਿਵਚਨਂ ਅਨਞ੍ਞਥਾਤਿ ਸਚ੍ਚਵਾਦਿਨੋ ਅਵਿਤਥਵਾਦਿਨੋ ਸਮ੍ਮਾਸਮ੍ਬੁਦ੍ਧਸ੍ਸ ‘‘ਸਬ੍ਬਂ ਰੂਪਂ ਅਨਿਚ੍ਚਂ ਜਰਾਭਿਭੂਤ’’ਨ੍ਤਿਆਦਿਵਚਨਂ ਅਨਞ੍ਞਥਾ ਯਥਾਭੂਤਮੇਵ, ਨ ਤਤ੍ਥ ਵਿਤਥਂ ਅਤ੍ਥੀਤਿ.

ਵਾਸਿਤੋਵ ਸੁਰਭੀ ਕਰਣ੍ਡਕੋਤਿ ਪੁਪ੍ਫਗਨ੍ਧਵਾਸਚੁਣ੍ਣਾਦੀਹਿ ਵਾਸਿਤੋ ਵਾਸਂ ਗਾਹਾਪਿਤੋ ਪਸਾਧਨਸਮੁਗ੍ਗੋ ਵਿਯ ਸੁਗਨ੍ਧਿ. ਪੁਪ੍ਫਪੂਰ ਮਮ ਉਤ੍ਤਮਙ੍ਗਜੋਤਿ ਚਮ੍ਪਕਸੁਮਨਮਲ੍ਲਿਕਾਦੀਹਿ ਪੁਪ੍ਫੇਹਿ ਪੂਰਿਤੋ ਪੁਬ੍ਬੇ ਮਮ ਕੇਸਕਲਾਪੋ ਨਿਮ੍ਮਲੋਤਿ ਅਤ੍ਥੋ. ਤਨ੍ਤਿ ਉਤ੍ਤਮਙ੍ਗਜਂ. ਅਥ ਪਚ੍ਛਾ ਏਤਰਹਿ ਸਲੋਮਗਨ੍ਧਿਕਂ ਪਾਕਤਿਕਲੋਮਗਨ੍ਧਮੇਵ ਜਾਤਂ. ਅਥ ਵਾ ਸਲੋਮਗਨ੍ਧਿਕਨ੍ਤਿ ਮੇਣ੍ਡਕਲੋਮੇਹਿ ਸਮਾਨਗਨ੍ਧਂ. ‘‘ਏਲ਼ਕਲੋਮਗਨ੍ਧ’’ਨ੍ਤਿਪਿ ਵਦਨ੍ਤਿ.

ਕਾਨਨਂਵ ਸਹਿਤਂ ਸੁਰੋਪਿਤਨ੍ਤਿ ਸੁਟ੍ਠੁ ਰੋਪਿਤਂ ਸਹਿਤਂ ਘਨਸਨ੍ਨਿਵੇਸਂ ਉਦ੍ਧਮੇਵ ਉਟ੍ਠਿਤਂ ਉਜੁਕਦੀਘਸਾਖਂ ਉਪਵਨਂ ਵਿਯ. ਕੋਚ੍ਛਸੂਚਿਵਿਚਿਤਗ੍ਗਸੋਭਿਤਨ੍ਤਿ ਪੁਬ੍ਬੇ ਕੋਚ੍ਛੇਨ ਸੁਵਣ੍ਣਸੂਚਿਯਾ ਚ ਕੇਸਜਟਾਵਿਜਟਨੇਨ ਵਿਚਿਤਗ੍ਗਂ ਹੁਤ੍ਵਾ ਸੋਭਿਤਂ, ਘਨਭਾਵੇਨ ਵਾ ਕੋਚ੍ਛਸਦਿਸਂ ਹੁਤ੍ਵਾ ਪਣਦਨ੍ਤਸੂਚੀਹਿ ਵਿਚਿਤਗ੍ਗਤਾਯ ਸੋਭਿਤਂ. ਤਨ੍ਤਿ ਉਤ੍ਤਮਙ੍ਗਜਂ. ਵਿਰਲਂ ਤਹਿਂ ਤਹਿਨ੍ਤਿ ਤਤ੍ਥ ਤਤ੍ਥ ਵਿਰਲਂ ਵਿਲੂਨਕੇਸਂ.

ਕਣ੍ਹਖਨ੍ਧਕਸੁਵਣ੍ਣਮਣ੍ਡਿਤਨ੍ਤਿ ਸੁਵਣ੍ਣਵਜਿਰਾਦੀਹਿ ਵਿਭੂਸਿਤਂ ਕਣ੍ਹਕੇਸਪੁਞ੍ਜਕਂ. ਯੇ ਪਨ ‘‘ਸਣ੍ਹਕਣ੍ਡਕਸੁਵਣ੍ਣਮਣ੍ਡਿਤ’’ਨ੍ਤਿ ਪਠਨ੍ਤਿ, ਤੇਸਂ ਸਣ੍ਹਾਹਿ ਸੁਵਣ੍ਣਸੂਚੀਹਿ ਜਟਾਵਿਜਟਨੇਨ ਮਣ੍ਡਿਤਨ੍ਤਿ ਅਤ੍ਥੋ. ਸੋਭਤੇ ਸੁਵੇਣੀਹਿਲਙ੍ਕਤਨ੍ਤਿ ਸੁਨ੍ਦਰੇਹਿ ਰਾਜਰੁਕ੍ਖਮਾਲਾ ਸਦਿਸੇਹਿ ਕੇਸਵੇਣੀਹਿ ਅਲਙ੍ਕਤਂ ਹੁਤ੍ਵਾ ਪੁਬ੍ਬੇ ਵਿਰਾਜਤੇ. ਤਂ ਜਰਾਯ ਖਲਿਤਂ ਸਿਰਂ ਕਤਨ੍ਤਿ ਤਂ ਤਥਾ ਸੋਭਿਤਂ ਸਿਰਂ ਇਦਾਨਿ ਜਰਾਯ ਖਲਿਤਂ ਖਣ੍ਡਿਤਾਖਣ੍ਡਿਤਂ ਵਿਲੂਨਕੇਸਂ ਕਤਂ.

ਚਿਤ੍ਤਕਾਰਸੁਕਤਾਵ ਲੇਖਿਕਾਤਿ ਚਿਤ੍ਤਕਾਰੇਨ ਸਿਪ੍ਪਿਨਾ ਨੀਲਾਯ ਵਣ੍ਣਧਾਤੁਯਾ ਸੁਟ੍ਠੁ ਕਤਾ ਲੇਖਾ ਵਿਯ ਸੋਭਤੇ. ਸੁ ਭਮੁਕਾ ਪੁਰੇ ਮਮਾਤਿ ਸੁਨ੍ਦਰਾ ਭਮੁਕਾ ਪੁਬ੍ਬੇ ਮਮ ਸੋਭਨਂ ਗਤਾ. ਵਲਿਭਿਪ੍ਪਲਮ੍ਬਿਤਾਤਿ ਨਲਾਟਨ੍ਤੇ ਉਪ੍ਪਨ੍ਨਾਹਿ ਵਲੀਹਿ ਪਲਮ੍ਬਨ੍ਤਾ ਠਿਤਾ.

ਭਸ੍ਸਰਾਤਿ ਭਾਸੁਰਾ. ਸੁਰੁਚਿਰਾਤਿ ਸੁਟ੍ਠੁ ਰੁਚਿਰਾ. ਯਥਾ ਮਣੀਤਿ ਮਣਿਮੁਦ੍ਦਿਕਾ ਵਿਯ. ਨੇਤ੍ਤਹੇਸੁਨ੍ਤਿ ਸੁਨੇਤ੍ਤਾ ਅਹੇਸੁਂ. ਅਭਿਨੀਲਮਾਯਤਾਤਿ ਅਭਿਨੀਲਾ ਹੁਤ੍ਵਾ ਆਯਤਾ. ਤੇਤਿ ਨੇਤ੍ਤਾ. ਜਰਾਯਭਿਹਤਾਤਿ ਜਰਾਯ ਅਭਿਹਤਾ.

ਸਣ੍ਹਤੁਙ੍ਗਸਦਿਸੀ ਚਾਤਿ ਸਣ੍ਹਾ ਤੁਙ੍ਗਾ ਸੇਸਮੁਖਾਵਯਵਾਨਂ ਅਨੁਰੂਪਾ ਚ. ਸੋਭਤੇਤਿ ਵਟ੍ਟੇਤ੍ਵਾ ਠਪਿਤਹਰਿਤਾਲਵਟ੍ਟਿ ਵਿਯ ਮਮ ਨਾਸਿਕਾ ਸੋਭਤੇ. ਸੁ ਅਭਿਯੋਬ੍ਬਨਂ ਪਤੀਤਿ ਸੁਨ੍ਦਰੇ ਅਭਿਨਵਯੋਬ੍ਬਨਕਾਲੇ ਸਾ ਨਾਸਿਕਾ ਇਦਾਨਿ ਜਰਾਯ ਨਿਵਾਰਿਤਸੋਭਤਾਯ ਪਰਿਸੇਦਿਤਾ ਵਿਯ ਵਰਤ੍ਤਾ ਵਿਯ ਚ ਜਾਤਾ.

ਕਙ੍ਕਣਂਵ ਸੁਕਤਂ ਸੁਨਿਟ੍ਠਿਤਨ੍ਤਿ ਸੁਪਰਿਕਮ੍ਮਕਤਂ ਸੁਵਣ੍ਣਕਙ੍ਕਣਂ ਵਿਯ ਵਟ੍ਟੁਲਭਾਵਂ ਸਨ੍ਧਾਯ ਵਦਤਿ. ਸੋਭਰੇਤਿ ਸੋਭਨ੍ਤੇ. ‘‘ਸੋਭਨ੍ਤੇ’’ਤਿ ਵਾ ਪਾਠੋ. ਸੁਇਤਿ ਨਿਪਾਤਮਤ੍ਤਂ. ਕਣ੍ਣਪਾਲ਼ਿਯੋਤਿ ਕਣ੍ਣਗਨ੍ਧਾ. ਵਲਿਭਿਪ੍ਪਲਮ੍ਬਿਤਾਤਿ ਤਹਿਂ ਤਹਿਂ ਉਪ੍ਪਨ੍ਨਵਲੀਹਿ ਵਲਿਤਾ ਹੁਤ੍ਵਾ ਵਟ੍ਟਨਿਯਾ ਪਣਾਮਿਤਵਤ੍ਥਖਨ੍ਧਾ ਵਿਯ ਭਸ੍ਸਨ੍ਤਾ ਓਲਮ੍ਬਨ੍ਤਿ.

ਪਤ੍ਤਲੀਮਕੁਲਵਣ੍ਣਸਾਦਿਸਾਤਿ ਕਦਲਿਮਕੁਲਸਦਿਸਵਣ੍ਣਸਣ੍ਠਾਨਾ. ਖਣ੍ਡਿਤਾਤਿ ਭੇਦਨਪਤਨੇਹਿ ਖਣ੍ਡਿਤਾ ਖਣ੍ਡਭਾਵਂ ਗਤਾ. ਅਸਿਤਾਤਿ ਵਣ੍ਣਭੇਦੇਨ ਅਸਿਤਭਾਵਂ ਗਤਾ.

ਕਾਨਨਮ੍ਹਿ ਵਨਸਣ੍ਡਚਾਰਿਨੀ, ਕੋਕਿਲਾਵ ਮਧੁਰਂ ਨਿਕੂਜਿਹਨ੍ਤਿ ਵਨਸਣ੍ਡੇ ਗੋਚਰਚਰਣੇਨ ਵਨਸਣ੍ਡਚਾਰਿਨੀ ਕਾਨਨੇ ਅਨੁਸਂਗੀਤਨਿਵਾਸਿਨੀ ਕੋਕਿਲਾ ਵਿਯ ਮਧੁਰਾਲਾਪਂ ਨਿਕੂਜਿਹਂ. ਤਨ੍ਤਿ ਨਿਕੂਜਿਤਂ ਆਲਾਪਂ. ਖਲਿਤਂ ਤਹਿਂ ਤਹਿਨ੍ਤਿ ਖਣ੍ਡਦਨ੍ਤਾਦਿਭਾਵੇਨ ਤਤ੍ਥ ਤਤ੍ਥ ਪਕ੍ਖਲਿਤਂ ਜਾਤਂ.

ਸਣ੍ਹਕਮ੍ਬੁਰਿਵ ਸੁਪ੍ਪਮਜ੍ਜਿਤਾਤਿ ਸੁਟ੍ਠੁ ਪਮਜ੍ਜਿਤਾ ਸਣ੍ਹਾ ਸੁਵਣ੍ਣਸਙ੍ਖਾ ਵਿਯ. ਭਗ੍ਗਾ ਵਿਨਾਮਿਤਾਤਿ ਮਂਸਪਰਿਕ੍ਖਯੇਨ ਵਿਭੂਤਸਿਰਾਜਾਲਤਾਯ ਭਗ੍ਗਾ ਹੁਤ੍ਵਾ ਵਿਨਤਾ.

ਵਟ੍ਟਪਲਿਘਸਦਿਸੋਪਮਾਤਿ ਵਟ੍ਟੇਨ ਪਲਿਘਦਣ੍ਡੇਨ ਸਮਸਮਾ. ਤਾਤਿ ਤਾ ਉਭੋਪਿ ਬਾਹਾਯੋ. ਯਥਾ ਪਾਟਲਿਬ੍ਬਲਿਤਾਤਿ ਜਜ੍ਜਰਭਾਵੇਨ ਪਲਿਤਪਾਟਲਿਸਾਖਾਸਦਿਸਾ.

ਸਣ੍ਹਮੁਦ੍ਦਿਕਸੁਵਣ੍ਣਮਣ੍ਡਿਤਾਤਿ ਸੁਵਣ੍ਣਮਯਾਹਿ ਮਟ੍ਠਭਾਸੁਰਾਹਿ ਮੁਦ੍ਦਿਕਾਹਿ ਵਿਭੂਸਿਤਾ. ਯਥਾ ਮੂਲਮੂਲਿਕਾਤਿ ਮੂਲਕਕਣ੍ਡਸਦਿਸਾ.

ਪੀਨਵਟ੍ਟਸਹਿਤੁਗ੍ਗਤਾਤਿ ਪੀਨਾ ਵਟ੍ਟਾ ਅਞ੍ਞਮਞ੍ਞਂ ਸਹਿਤਾਵ ਹੁਤ੍ਵਾ ਉਗ੍ਗਤਾ ਉਦ੍ਧਮੁਖਾ. ਸੋਭਤੇ ਸੁ ਥਨਕਾ ਪੁਰੇ ਮਮਾਤਿ ਮਮ ਉਭੋਪਿ ਥਨਾ ਯਥਾਵੁਤ੍ਤਰੂਪਾ ਹੁਤ੍ਵਾ ਸੁਵਣ੍ਣਕਲਸਿਯੋ ਵਿਯ ਸੋਭਿਂਸੁ. ਪੁਥੁਤ੍ਤੇ ਹਿ ਇਦਂ ਏਕਵਚਨਂ, ਅਤੀਤਤ੍ਥੇ ਚ ਵਤ੍ਤਮਾਨਵਚਨਂ. ਥੇਵਿਕੀਵ ਲਮ੍ਬਨ੍ਤਿ ਨੋਦਕਾਤਿ ਤੇ ਉਭੋਪਿ ਮੇ ਥਨਾ ਨੋਦਕਾ ਗਲਿਤਜਲਾ ਵੇਣੁਦਣ੍ਡਕੇ ਠਪਿਤਉਦਕਭਸ੍ਮਾ ਵਿਯ ਲਮ੍ਬਨ੍ਤਿ.

ਕਞ੍ਚਨਫਲਕਂਵ ਸਮ੍ਮਟ੍ਠਨ੍ਤਿ ਜਾਤਿਹਿਙ੍ਗੁਲਕੇਨ ਮਕ੍ਖਿਤ੍ਵਾ ਚਿਰਪਰਿਮਜ੍ਜਿਤਸੋਵਣ੍ਣਫਲਕਂ ਵਿਯ ਸੋਭਤੇ. ਸੋ ਵਲੀਹਿ ਸੁਖੁਮਾਹਿ ਓਤਤੋਤਿ ਸੋ ਮਮ ਕਾਯੋ ਇਦਾਨਿ ਸੁਖੁਮਾਹਿ ਵਲੀਹਿ ਤਹਿਂ ਤਹਿਂ ਵਿਤਤੋ ਵਲਿਤ੍ਤਚਤਂ ਆਪਨ੍ਨੋ.

ਨਾਗਭੋਗਸਦਿਸੋਪਮਾਤਿ ਹਤ੍ਥਿਨਾਗਸ੍ਸ ਹਤ੍ਥੇਨ ਸਮਸਮਾ. ਹਤ੍ਥੋ ਹਿ ਇਧ ਭੁਞ੍ਜਤਿ ਏਤੇਨਾਤਿ ਭੋਗੋਤਿ ਵੁਤ੍ਤੋ. ਤੇਤਿ ਊਰੁਯੋ. ਯਥਾ ਵੇਲ਼ੁਨਾਲ਼ਿਯੋਤਿ ਇਦਾਨਿ ਵੇਲ਼ੁਪਬ੍ਬਸਦਿਸਾ ਅਹੇਸੁਂ.

ਸਣ੍ਹਨੂਪੁਰਸੁਵਣ੍ਣਮਣ੍ਡਿਤਾਤਿ ਸਿਨਿਦ੍ਧਮਟ੍ਠੇਹਿ ਸੁਵਣ੍ਣਨੂਪੁਰੇਹਿ ਵਿਭੂਸਿਤਾ. ਜਙ੍ਘਾਤਿ ਅਟ੍ਠਿਜਙ੍ਘਾਯੋ. ਤਾਤਿ ਤਾ ਜਙ੍ਘਾਯੋ. ਤਿਲਦਣ੍ਡਕਾਰਿਵਾਤਿ ਅਪ੍ਪਮਂਸਲੋਹਿਤਤ੍ਤਾ ਕਿਸਭਾਵੇਨ ਲੂਨਾਵਸਿਟ੍ਠਵਿਸੁਕ੍ਖਤਿਲਦਣ੍ਡਕਾ ਵਿਯ ਅਹੇਸੁਂ. ਰ-ਕਾਰੋ ਪਦਸਨ੍ਧਿਕਰੋ.

ਤੂਲਪੁਣ੍ਣਸਦਿਸੋਪਮਾਤਿ ਮੁਦੁਸਿਨਿਦ੍ਧਭਾਵੇਨ ਸਿਮ੍ਬਲਿਤੂਲਪੁਣ੍ਣਪਲਿਗੁਣ੍ਠਿਤਉਪਾਹਨਸਦਿਸਾ. ਤੇ ਮਮ ਪਾਦਾ ਇਦਾਨਿ ਫੁਟਿਤਾ ਫਲਿਤਾ, ਵਲੀਮਤਾ ਵਲਿਮਨ੍ਤੋ ਜਾਤਾ.

ਏਦਿਸੋਤਿ ਏਵਰੂਪੋ. ਅਹੁ ਅਹੋਸਿ ਯਥਾਵੁਤ੍ਤਪ੍ਪਕਾਰੋ. ਅਯਂ ਸਮੁਸ੍ਸਯੋਤਿ ਅਯਂ ਮਮ ਕਾਯੋ. ਜਜ੍ਜਰੋਤਿ ਸਿਥਿਲਾਬਨ੍ਧੋ. ਬਹੁਦੁਖਾਨਮਾਲਯੋਤਿ ਜਰਾਦਿਹੇਤੁਕਾਨਂ ਬਹੂਨਂ ਦੁਕ੍ਖਾਨਂ ਆਲਯਭੂਤੋ. ਸੋਪਲੇਪਪਤਿਤੋਤਿ ਸੋ ਅਯਂ ਸਮੁਸ੍ਸਯੋ ਅਪਲੇਪਪਤਿਤੋ ਅਭਿਸਙ੍ਖਾਰਾਲੇਪਪਰਿਕ੍ਖਯੇਨ ਪਤਿਤੋ ਪਾਤਾਭਿਮੁਖੋਤਿ ਅਤ੍ਥੋ. ਸੋਪਿ ਅਲੇਪਪਤਿਤੋਤਿ ਵਾ ਪਦਵਿਭਾਗੋ, ਸੋ ਏਵਤ੍ਥੋ. ਜਰਾਘਰੋਤਿ ਜਿਣ੍ਣਘਰਸਦਿਸੋ. ਜਰਾਯ ਵਾ ਘਰਭੂਤੋ ਅਹੋਸਿ. ਤਸ੍ਮਾ ਸਚ੍ਚਵਾਦਿਨੋ ਧਮ੍ਮਾਨਂ ਯਥਾਭੂਤਂ ਸਭਾਵਂ ਸਮ੍ਮਦੇਵ ਞਤ੍ਵਾ ਕਥਨਤੋ ਅਵਿਤਥਵਾਦਿਨੋ ਸਮ੍ਮਾਸਮ੍ਬੁਦ੍ਧਸ੍ਸ ਮਮ ਸਤ੍ਥੁਵਚਨਂ ਅਨਞ੍ਞਥਾ.

ਏਵਂ ਅਯਂ ਥੇਰੀ ਅਤ੍ਤਨੋ ਅਤ੍ਤਭਾਵੇ ਅਨਿਚ੍ਚਤਾਯ ਸਲ੍ਲਕ੍ਖਣਮੁਖੇਨ ਸਬ੍ਬੇਸੁਪਿ ਤੇਭੂਮਕਧਮ੍ਮੇਸੁ ਅਨਿਚ੍ਚਤਂ ਉਪਧਾਰੇਤ੍ਵਾ ਤਦਨੁਸਾਰੇਨ ਤਤ੍ਥ ਦੁਕ੍ਖਲਕ੍ਖਣਂ ਅਨਤ੍ਤਲਕ੍ਖਣਞ੍ਚ ਆਰੋਪੇਤ੍ਵਾ ਵਿਪਸ੍ਸਨਂ ਉਸ੍ਸੁਕ੍ਕਾਪੇਨ੍ਤੀ ਮਗ੍ਗਪਟਿਪਾਟਿਯਾ ਅਰਹਤ੍ਤਂ ਪਾਪੁਣਿ. ਤੇਨ ਵੁਤ੍ਤਂ ਅਪਦਾਨੇ (ਅਪ. ਥੇਰੀ ੨.੪.੨੦੪-੨੧੯) –

‘‘ਯੋ ਰਂਸਿਫੁਸਿਤਾਵੇਲ਼ੋ, ਫੁਸ੍ਸੋ ਨਾਮ ਮਹਾਮੁਨਿ;

ਤਸ੍ਸਾਹਂ ਭਗਿਨੀ ਆਸਿਂ, ਅਜਾਯਿਂ ਖਤ੍ਤਿਯੇ ਕੁਲੇ.

‘‘ਤਸ੍ਸ ਧਮ੍ਮਂ ਸੁਣਿਤ੍ਵਾਹਂ, ਵਿਪ੍ਪਸਨ੍ਨੇਨ ਚੇਤਸਾ;

ਮਹਾਦਾਨਂ ਦਦਿਤ੍ਵਾਨ, ਪਤ੍ਥਯਿਂ ਰੂਪਸਮ੍ਪਦਂ.

‘‘ਏਕਤਿਂਸੇ ਇਤੋ ਕਪ੍ਪੇ, ਸਿਖੀ ਲੋਕਗ੍ਗਨਾਯਕੋ;

ਉਪ੍ਪਨ੍ਨੋ ਲੋਕਪਜ੍ਜੋਤੋ, ਤਿਲੋਕਸਰਣੋ ਜਿਨੋ.

‘‘ਤਦਾਰੁਣਪੁਰੇ ਰਮ੍ਮੇ, ਬ੍ਰਹ੍ਮਞ੍ਞਕੁਲਸਮ੍ਭਵਾ;

ਵਿਮੁਤ੍ਤਚਿਤ੍ਤਂ ਕੁਪਿਤਾ, ਭਿਕ੍ਖੁਨਿਂ ਅਭਿਸਾਪਯਿਂ.

‘‘ਵੇਸਿਕਾਵ ਅਨਾਚਾਰਾ, ਜਿਨਸਾਸਨਦੂਸਿਕਾ;

ਏਵਂ ਅਕ੍ਕੋਸਯਿਤ੍ਵਾਨ, ਤੇਨ ਪਾਪੇਨ ਕਮ੍ਮੁਨਾ.

‘‘ਦਾਰੁਣਂ ਨਿਰਯਂ ਗਨ੍ਤ੍ਵਾ, ਮਹਾਦੁਕ੍ਖਸਮਪ੍ਪਿਤਾ;

ਤਤੋ ਚੁਤਾ ਮਨੁਸ੍ਸੇਸੁ, ਉਪਪਨ੍ਨਾ ਤਪਸ੍ਸਿਨੀ.

‘‘ਦਸਜਾਤਿਸਹਸ੍ਸਾਨਿ, ਗਣਿਕਤ੍ਤਮਕਾਰਯਿਂ;

ਤਮ੍ਹਾ ਪਾਪਾ ਨ ਮੁਚ੍ਚਿਸ੍ਸਂ, ਭੁਤ੍ਵਾ ਦੁਟ੍ਠਵਿਸਂ ਯਥਾ.

‘‘ਬ੍ਰਹ੍ਮਚਰਿਯਮਸੇਵਿਸ੍ਸਂ, ਕਸ੍ਸਪੇ ਜਿਨਸਾਸਨੇ;

ਤੇਨ ਕਮ੍ਮਵਿਪਾਕੇਨ, ਅਜਾਯਿਂ ਤਿਦਸੇ ਪੁਰੇ.

‘‘ਪਚ੍ਛਿਮੇ ਭਵੇ ਸਮ੍ਪਤ੍ਤੇ, ਅਹੋਸਿਂ ਓਪਪਾਤਿਕਾ;

ਅਮ੍ਬਸਾਖਨ੍ਤਰੇ ਜਾਤਾ, ਅਮ੍ਬਪਾਲੀਤਿ ਤੇਨਹਂ.

‘‘ਪਰਿਵੁਤਾ ਪਾਣਕੋਟੀਹਿ, ਪਬ੍ਬਜਿਂ ਜਿਨਸਾਸਨੇ;

ਪਤ੍ਤਾਹਂ ਅਚਲਂ ਠਾਨਂ, ਧੀਤਾ ਬੁਦ੍ਧਸ੍ਸ ਓਰਸਾ.

‘‘ਇਦ੍ਧੀਸੁ ਚ ਵਸੀ ਹੋਮਿ, ਸੋਤਧਾਤੁਵਿਸੁਦ੍ਧਿਯਾ;

ਚੇਤੋਪਰਿਯਞਾਣਸ੍ਸ, ਵਸੀ ਹੋਮਿ ਮਹਾਮੁਨਿ.

‘‘ਪੁਬ੍ਬੇਨਿਵਾਸਂ ਜਾਨਾਮਿ, ਦਿਬ੍ਬਚਕ੍ਖੁ ਵਿਸੋਧਿਤਂ;

ਸਬ੍ਬਾਸਵਪਰਿਕ੍ਖੀਣਾ, ਨਤ੍ਥਿ ਦਾਨਿ ਪੁਨਬ੍ਭਵੋ.

‘‘ਅਤ੍ਥਧਮ੍ਮਨਿਰੁਤ੍ਤੀਸੁ, ਪਟਿਭਾਨੇ ਤਥੇਵ ਚ;

ਞਾਣਂ ਮੇ ਵਿਮਲਂ ਸੁਦ੍ਧਂ, ਬੁਦ੍ਧਸੇਟ੍ਠਸ੍ਸ ਵਾਹਸਾ.

‘‘ਕਿਲੇਸਾ ਝਾਪਿਤਾ ਮਯ੍ਹਂ, ਭਵਾ ਸਬ੍ਬੇ ਸਮੂਹਤਾ;

ਨਾਗੀਵ ਬਨ੍ਧਨਂ ਛੇਤ੍ਵਾ, ਵਿਹਰਾਮਿ ਅਨਾਸਵਾ.

‘‘ਸ੍ਵਾਗਤਂ ਵਤ ਮੇ ਆਸਿ, ਬੁਦ੍ਧਸੇਟ੍ਠਸ੍ਸ ਸਨ੍ਤਿਕੇ;

ਤਿਸ੍ਸੋ ਵਿਜ੍ਜਾ ਅਨੁਪ੍ਪਤ੍ਤਾ, ਕਤਂ ਬੁਦ੍ਧਸ੍ਸ ਸਾਸਨਂ.

‘‘ਪਟਿਸਮ੍ਭਿਦਾ ਚਤਸ੍ਸੋ, ਵਿਮੋਕ੍ਖਾਪਿ ਚ ਅਟ੍ਠਿਮੇ;

ਛਲ਼ਭਿਞ੍ਞਾ ਸਚ੍ਛਿਕਤਾ, ਕਤਂ ਬੁਦ੍ਧਸ੍ਸ ਸਾਸਨ’’ਨ੍ਤਿ.

ਅਰਹਤ੍ਤਂ ਪਨ ਪਤ੍ਵਾ ਅਤ੍ਤਨੋ ਪਟਿਪਤ੍ਤਿਂ ਪਚ੍ਚਵੇਕ੍ਖਿਤ੍ਵਾ ਉਦਾਨਵਸੇਨ ਤਾ ਏਵ ਗਾਥਾ ਪਚ੍ਚੁਦਾਹਾਸੀਤਿ.

ਅਮ੍ਬਪਾਲੀਥੇਰੀਗਾਥਾਵਣ੍ਣਨਾ ਨਿਟ੍ਠਿਤਾ.