੧੫. ਉਤ੍ਤਰਾਥੇਰੀਗਾਥਾਵਣ੍ਣਨਾ

ਕਾਯੇਨ ਸਂਵੁਤਾ ਆਸਿਨ੍ਤਿ ਉਤ੍ਤਰਾਯ ਥੇਰਿਯਾ ਗਾਥਾ. ਤਸ੍ਸਾਪਿ ਵਤ੍ਥੁ ਤਿਸ੍ਸਾਥੇਰਿਯਾ ਵਤ੍ਥੁਸਦਿਸਂ. ਸਾਪਿ ਹਿ ਸਕ੍ਯਕੁਲਪ੍ਪਸੁਤਾ ਬੋਧਿਸਤ੍ਤਸ੍ਸ ਓਰੋਧਭੂਤਾ ਮਹਾਪਜਾਪਤਿਗੋਤਮਿਯਾ ਸਦ੍ਧਿਂ ਨਿਕ੍ਖਨ੍ਤਾ ਓਭਾਸਗਾਥਾਯ ਅਰਹਤ੍ਤਂ ਪਤ੍ਵਾ ਪਨ –

੧੫. ‘‘ਕਾਯੇਨ ਸਂਵੁਤਾ ਆਸਿਂ, ਵਾਚਾਯ ਉਦ ਚੇਤਸਾ;

ਸਮੂਲਂ ਤਣ੍ਹਮਬ੍ਬੁਯ੍ਹ, ਸੀਤਿਭੂਤਾਮ੍ਹਿ ਨਿਬ੍ਬੁਤਾ’’ਤਿ. –

ਉਦਾਨਵਸੇਨ ਤਮੇਵ ਗਾਥਂ ਅਭਾਸਿ.

ਤਤ੍ਥ ਕਾਯੇਨ ਸਂਵੁਤਾ ਆਸਿਨ੍ਤਿ ਕਾਯਿਕੇਨ ਸਂਵਰੇਨ ਸਂਵੁਤਾ ਅਹੋਸਿਂ. ਵਾਚਾਯਾਤਿ ਵਾਚਸਿਕੇਨ ਸਂਵਰੇਨ ਸਂਵੁਤਾ ਆਸਿਨ੍ਤਿ ਯੋਜਨਾ, ਪਦਦ੍ਵਯੇਨਾਪਿ ਸੀਲਸਂਵਰਮਾਹ. ਉਦਾਤਿ ਅਥ. ਚੇਤਸਾਤਿ ਸਮਾਧਿਚਿਤ੍ਤੇਨ, ਏਤੇਨ ਵਿਪਸ੍ਸਨਾਭਾਵਨਮਾਹ. ਸਮੂਲਂ ਤਣ੍ਹਮਬ੍ਬੁਯ੍ਹਾਤਿ ਸਾਨੁਸਯਂ, ਸਹ ਵਾ ਅਵਿਜ੍ਜਾਯ ਤਣ੍ਹਂ ਉਦ੍ਧਰਿਤ੍ਵਾ. ਅਵਿਜ੍ਜਾਯ ਹਿ ਪਟਿਚ੍ਛਾਦਿਤਾਦੀਨਵੇ ਭਵਤ੍ਤਯੇ ਤਣ੍ਹਾ ਉਪ੍ਪਜ੍ਜਤਿ.

ਅਪਰੋ ਨਯੋ – ਕਾਯੇਨ ਸਂਵੁਤਾਤਿ ਸਮ੍ਮਾਕਮ੍ਮਨ੍ਤੇਨ ਸਬ੍ਬਸੋ ਮਿਚ੍ਛਾਕਮ੍ਮਨ੍ਤਸ੍ਸ ਪਹਾਨਾ ਮਗ੍ਗਸਂਵਰੇਨੇਵ ਕਾਯੇਨ ਸਂਵੁਤਾ ਆਸਿਂ. ਵਾਚਾਯਾਤਿ ਸਮ੍ਮਾਵਾਚਾਯ ਸਬ੍ਬਸੋ ਮਿਚ੍ਛਾਵਾਚਾਯ ਪਹਾਨਾ ਮਗ੍ਗਸਂਵਰੇਨੇਵ ਵਾਚਾਯ ਸਂਵੁਤਾ ਆਸਿਨ੍ਤਿ ਅਤ੍ਥੋ. ਚੇਤਸਾਤਿ ਸਮਾਧਿਨਾ. ਚੇਤੋਸੀਸੇਨ ਹੇਤ੍ਥ ਸਮ੍ਮਾਸਮਾਧਿ ਵੁਤ੍ਤੋ, ਸਮ੍ਮਾਸਮਾਧਿਗ੍ਗਹਣੇਨੇਵ ਮਗ੍ਗਲਕ੍ਖਣੇਨ ਏਕਲਕ੍ਖਣਾ ਸਮ੍ਮਾਦਿਟ੍ਠਿਆਦਯੋ ਮਗ੍ਗਧਮ੍ਮਾ ਗਹਿਤਾਵ ਹੋਨ੍ਤੀਤਿ, ਮਗ੍ਗਸਂਵਰੇਨ ਅਭਿਜ੍ਝਾਦਿਕਸ੍ਸ ਅਸਂਵਰਸ੍ਸ ਅਨਵਸੇਸਤੋ ਪਹਾਨਂ ਦਸ੍ਸਿਤਂ ਹੋਤਿ. ਤੇਨੇਵਾਹ ‘‘ਸਮੂਲਂ ਤਣ੍ਹਮਬ੍ਬੁਯ੍ਹਾ’’ਤਿ. ਸੀਤਿਭੂਤਾਮ੍ਹਿ ਨਿਬ੍ਬੁਤਾਤਿ ਸਬ੍ਬਸੋ ਕਿਲੇਸਪਰਿਲ਼ਾਹਾਭਾਵੇਨ ਸੀਤਿਭਾਵਪ੍ਪਤ੍ਤਾ ਅਨੁਪਾਦਿਸੇਸਾਯ ਨਿਬ੍ਬਾਨਧਾਤੁਯਾ ਨਿਬ੍ਬੁਤਾ ਅਮ੍ਹੀਤਿ.

ਉਤ੍ਤਰਾਥੇਰੀਗਾਥਾਵਣ੍ਣਨਾ ਨਿਟ੍ਠਿਤਾ.