੧੪. ਸੁਮਨਾਥੇਰੀਗਾਥਾਵਣ੍ਣਨਾ

ਧਾਤੁਯੋ ਦੁਕ੍ਖਤੋ ਦਿਸ੍ਵਾਤਿ ਸੁਮਨਾਯ ਥੇਰਿਯਾ ਗਾਥਾ. ਤਸ੍ਸਾ ਵਤ੍ਥੁ ਤਿਸ੍ਸਾਥੇਰਿਯਾ ਵਤ੍ਥੁਸਦਿਸਂ. ਇਮਿਸ੍ਸਾਪਿ ਹਿ ਸਤ੍ਥਾ ਓਭਾਸਂ ਵਿਸ੍ਸਜ੍ਜੇਤ੍ਵਾ ਪੁਰਤੋ ਨਿਸਿਨ੍ਨੋ ਵਿਯ ਅਤ੍ਤਾਨਂ ਦਸ੍ਸੇਤ੍ਵਾ –

੧੪. ‘‘ਧਾਤੁਯੋ ਦੁਕ੍ਖਤੋ ਦਿਸ੍ਵਾ, ਮਾ ਜਾਤਿਂ ਪੁਨਰਾਗਮਿ;

ਭਵੇ ਛਨ੍ਦਂ ਵਿਰਾਜੇਤ੍ਵਾ, ਉਪਸਨ੍ਤਾ ਚਰਿਸ੍ਸਸੀ’’ਤਿ. –

ਇਮਂ ਗਾਥਮਾਹ. ਸਾ ਗਾਥਾਪਰਿਯੋਸਾਨੇ ਅਰਹਤ੍ਤਂ ਪਾਪੁਣਿ.

ਤਤ੍ਥ ਧਾਤੁਯੋ ਦੁਕ੍ਖਤੋ ਦਿਸ੍ਵਾਤਿ ਸਸਨ੍ਤਤਿਪਰਿਯਾਪਨ੍ਨਾ ਚਕ੍ਖਾਦਿਧਾਤੁਯੋ ਇਤਰਾਪਿ ਚ ਉਦਯਬ੍ਬਯਪਟਿਪੀਲ਼ਨਾਦਿਨਾ ‘‘ਦੁਕ੍ਖਾ’’ਤਿ ਞਾਣਚਕ੍ਖੁਨਾ ਦਿਸ੍ਵਾ. ਮਾ ਜਾਤਿਂ ਪੁਨਰਾਗਮੀਤਿ ਪੁਨ ਜਾਤਿਂ ਆਯਤਿਂ ਪੁਨਬ੍ਭਵਂ ਮਾ ਉਪਗਚ੍ਛਿ. ਭਵੇ ਛਨ੍ਦਂ ਵਿਰਾਜੇਤ੍ਵਾਤਿ ਕਾਮਭਵਾਦਿਕੇ ਸਬ੍ਬਸ੍ਮਿਂ ਭਵੇ ਤਣ੍ਹਾਛਨ੍ਦਂ ਵਿਰਾਗਸਙ੍ਖਾਤੇਨ ਮਗ੍ਗੇਨ ਪਜਹਿਤ੍ਵਾ. ਉਪਸਨ੍ਤਾ ਚਰਿਸ੍ਸਸੀਤਿ ਸਬ੍ਬਸੋ ਪਹੀਨਕਿਲੇਸਤਾਯ ਨਿਬ੍ਬੁਤਾ ਵਿਹਰਿਸ੍ਸਸਿ.

ਏਤ੍ਥ ਚ ‘‘ਧਾਤੁਯੋ ਦੁਕ੍ਖਤੋ ਦਿਸ੍ਵਾ’’ਤਿ ਇਮਿਨਾ ਦੁਕ੍ਖਾਨੁਪਸ੍ਸਨਾਮੁਖੇਨ ਵਿਪਸ੍ਸਨਾ ਦਸ੍ਸਿਤਾ. ‘‘ਭਵੇ ਛਨ੍ਦਂ ਵਿਰਾਜੇਤ੍ਵਾ’’ਤਿ ਇਮਿਨਾ ਮਗ੍ਗੋ, ‘‘ਉਪਸਨ੍ਤਾ ਚਰਿਸ੍ਸਸੀ’’ਤਿ ਇਮਿਨਾ ਸਉਪਾਦਿਸੇਸਾ ਨਿਬ੍ਬਾਨਧਾਤੁ, ‘‘ਮਾ ਜਾਤਿਂ ਪੁਨਰਾਗਮੀ’’ਤਿ ਇਮਿਨਾ ਅਨੁਪਾਦਿਸੇਸਾ ਨਿਬ੍ਬਾਨਧਾਤੁ ਦਸ੍ਸਿਤਾਤਿ ਦਟ੍ਠਬ੍ਬਂ.

ਸੁਮਨਾਥੇਰੀਗਾਥਾਵਣ੍ਣਨਾ ਨਿਟ੍ਠਿਤਾ.