੭. ਕਾਤਿਯਾਨਤ੍ਥੇਰਗਾਥਾਵਣ੍ਣਨਾ

ਉਟ੍ਠੇਹੀਤਿਆਦਿਕਾ ਆਯਸ੍ਮਤੋ ਕਾਤਿਯਾਨਤ੍ਥੇਰਸ੍ਸ ਗਾਥਾ. ਕਾ ਉਪ੍ਪਤ੍ਤਿ? ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਪੁਞ੍ਞਾਨਿ ਉਪਚਿਨਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਸਾਵਤ੍ਥਿਯਂ ਅਞ੍ਞਤਰਸ੍ਸ ਕੋਸਿਯਗੋਤ੍ਤਸ੍ਸ ਬ੍ਰਾਹ੍ਮਣਸ੍ਸ ਪੁਤ੍ਤੋ ਹੁਤ੍ਵਾ ਨਿਬ੍ਬਤ੍ਤੋ, ਮਾਤੁਗੋਤ੍ਤਵਸੇਨ ਪਨ ਕਾਤਿਯਾਨੋਤਿ ਲਦ੍ਧਨਾਮੋ ਵਯਪ੍ਪਤ੍ਤੋ ਸਾਮਞ੍ਞਕਾਨਿਤ੍ਥੇਰਸ੍ਸ ਗਿਹਿਸਹਾਯੋ ਥੇਰਂ ਦਿਸ੍ਵਾ ਪਬ੍ਬਜਿਤੋ ਸਮਣਧਮ੍ਮਂ ਕਰੋਨ੍ਤੋ ਰਤ੍ਤਿਂ ‘‘ਨਿਦ੍ਦਾਭਿਭਵਂ ਵਿਨੋਦੇਸ੍ਸਾਮੀ’’ਤਿ ਚਙ੍ਕਮਂ ਆਰੁਹਿ. ਸੋ ਚਙ੍ਕਮਨ੍ਤੋ ਨਿਦ੍ਦਾਯ ਅਭਿਭੂਤੋ ਪਚਲਾਯਮਾਨੋ ਪਰਿਪਤਿਤ੍ਵਾ ਤਤ੍ਥੇਵ ਅਨਨ੍ਤਰਹਿਤਾਯ ਭੂਮਿਯਾ ਨਿਪਜ੍ਜਿ, ਸਤ੍ਥਾ ਤਸ੍ਸ ਤਂ ਪਵਤ੍ਤਿਂ ਦਿਸ੍ਵਾ ਸਯਂ ਤਤ੍ਥ ਗਨ੍ਤ੍ਵਾ ਆਕਾਸੇ ਠਤ੍ਵਾ ‘‘ਕਾਤਿਯਾਨਾ’’ਤਿ ਸਞ੍ਞਂ ਅਦਾਸਿ. ਸੋ ਸਤ੍ਥਾਰਂ ਦਿਸ੍ਵਾ ਉਟ੍ਠਹਿਤ੍ਵਾ ਵਨ੍ਦਿਤ੍ਵਾ ਸਂਵੇਗਜਾਤੋ ਅਟ੍ਠਾਸਿ. ਅਥਸ੍ਸ ਸਤ੍ਥਾ ਧਮ੍ਮਂ ਦੇਸੇਨ੍ਤੋ –

੪੧੧. ‘‘ਉਟ੍ਠੇਹਿ ਨਿਸੀਦ ਕਾਤਿਯਾਨ, ਮਾ ਨਿਦ੍ਦਾਬਹੁਲੋ ਅਹੁ ਜਾਗਰਸ੍ਸੁ;

ਮਾ ਤਂ ਅਲਸਂ ਪਮਤ੍ਤਬਨ੍ਧੁ, ਕੂਟੇਨੇਵ ਜਿਨਾਤੁ ਮਚ੍ਚੁਰਾਜਾ.

੪੧੨. ‘‘ਸੇਯ੍ਯਥਾਪਿ ਮਹਾਸਮੁਦ੍ਦਵੇਗੋ, ਏਵਂ ਜਾਤਿਜਰਾਤਿ ਵਤ੍ਤਤੇ ਤਂ;

ਸੋ ਕਰੋਹਿ ਸੁਦੀਪਮਤ੍ਤਨੋ ਤ੍ਵਂ, ਨ ਹਿ ਤਾਣਂ ਤਵ ਵਿਜ੍ਜਤੇਵ ਅਞ੍ਞਂ.

੪੧੩. ‘‘ਸਤ੍ਥਾ ਹਿ ਵਿਜੇਸਿ ਮਗ੍ਗਮੇਤਂ, ਸਙ੍ਗਾ ਜਾਤਿਜਰਾਭਯਾ ਅਤੀਤਂ;

ਪੁਬ੍ਬਾਪਰਰਤ੍ਤਮਪ੍ਪਮਤ੍ਤੋ, ਅਨੁਯੁਞ੍ਜਸ੍ਸੁ ਦਲ਼੍ਹਂ ਕਰੋਹਿ ਯੋਗਂ.

੪੧੪. ‘‘ਪੁਰਿਮਾਨਿ ਪਮੁਞ੍ਚ ਬਨ੍ਧਨਾਨਿ, ਸਙ੍ਘਾਟਿਖੁਰਮੁਣ੍ਡਭਿਕ੍ਖਭੋਜੀ;

ਮਾ ਖਿਡ੍ਡਾਰਤਿਞ੍ਚ ਮਾ ਨਿਦ੍ਦਂ, ਅਨੁਯੁਞ੍ਜਿਤ੍ਥ ਝਾਯ ਕਾਤਿਯਾਨ.

੪੧੫. ‘‘ਝਾਯਾਹਿ ਜਿਨਾਹਿ ਕਾਤਿਯਾਨ, ਯੋਗਕ੍ਖੇਮਪਥੇਸੁ ਕੋਵਿਦੋਸਿ;

ਪਪ੍ਪੁਯ੍ਯ ਅਨੁਤ੍ਤਰਂ ਵਿਸੁਦ੍ਧਿਂ, ਪਰਿਨਿਬ੍ਬਾਹਿਸਿ ਵਾਰਿਨਾਵ ਜੋਤਿ.

੪੧੬. ‘‘ਪਜ੍ਜੋਤਕਰੋ ਪਰਿਤ੍ਤਰਂਸੋ, ਵਾਤੇਨ ਵਿਨਮ੍ਯਤੇ ਲਤਾਵ;

ਏਵਮ੍ਪਿ ਤੁਵਂ ਅਨਾਦਿਯਾਨੋ, ਮਾਰਂ ਇਨ੍ਦਸਗੋਤ੍ਤ ਨਿਦ੍ਧੁਨਾਹਿ;

ਸੋ ਵੇਦਯਿਤਾਸੁ ਵੀਤਰਾਗੋ, ਕਾਲਂ ਕਙ੍ਖ ਇਧੇਵ ਸੀਤਿਭੂਤੋ’’ਤਿ. –

ਇਮਾ ਗਾਥਾ ਅਭਾਸਿ.

ਤਤ੍ਥ ਉਟ੍ਠੇਹੀਤਿ ਨਿਦ੍ਦੂਪਗਮਨਤੋ ਉਟ੍ਠਹਨ੍ਤੋ ਉਟ੍ਠਾਨਵੀਰਿਯਂ ਕਰੋਹਿ. ਯਸ੍ਮਾ ਨਿਪਜ੍ਜਾ ਨਾਮ ਕੋਸਜ੍ਜਪਕ੍ਖਿਯਾ, ਤਸ੍ਮਾ ਮਾ ਸਯਿ. ਨਿਸੀਦਾਤਿ ਪਲ੍ਲਙ੍ਕਂ ਆਭੁਜਿਤ੍ਵਾ ਉਜੁਂ ਕਾਯਂ ਪਣਿਧਾਯ ਪਰਿਮੁਖਂ ਸਤਿਂ ਉਪਟ੍ਠਪੇਤ੍ਵਾ ਨਿਸੀਦ. ਕਾਤਿਯਾਨਾਤਿ ਤਂ ਨਾਮੇਨ ਆਲਪਤਿ. ਮਾ ਨਿਦ੍ਦਾਬਹੁਲੋ ਅਹੂਤਿ ਨਿਦ੍ਦਾਬਹੁਲੋ ਨਿਦ੍ਦਾਭਿਭੂਤੋ ਮਾ ਅਹੁ. ਜਾਗਰਸ੍ਸੂਤਿ ਜਾਗਰ, ਜਾਗਰਿਯਮਨੁਯੁਤ੍ਤੋ ਹੋਹਿ. ਮਾ ਤਂ ਅਲਸਨ੍ਤਿ ਜਾਗਰਿਯਂ ਅਨਨੁਯੁਞ੍ਜਨ੍ਤਂ ਤਂ ਅਲਸਂ ਕੁਸੀਤਂ ਪਮਤ੍ਤਬਨ੍ਧੁ ਮਚ੍ਚੁਰਾਜਾ ਕੂਟੇਨੇਵ ਅਦ੍ਦੁਹਨੇਨ ਵਿਯ ਨੇਸਾਦੋ ਮਿਗਂ ਵਾ ਪਕ੍ਖਿਂ ਵਾ ਜਰਾਰੋਗੇਹਿ ਮਾ ਜਿਨਾਤੁ ਮਾ ਅਭਿਭਵਤੁ, ਮਾ ਅਜ੍ਝੋਤ੍ਥਰਤੂਤਿ ਅਤ੍ਥੋ.

ਸੇਯ੍ਯਥਾਪੀਤਿ ਸੇਯ੍ਯਥਾ ਅਪਿ. ਮਹਾਸਮੁਦ੍ਦਵੇਗੋਤਿ ਮਹਾਸਮੁਦ੍ਦਸ੍ਸ ਊਮਿਵੇਗੋ. ਏਵਨ੍ਤਿ ਯਥਾ ਨਾਮ ਮਹਾਸਮੁਦ੍ਦਊਮਿਵੇਗੋ ਉਪਰੂਪਰਿ ਉਟ੍ਠਹਨ੍ਤੋ ਤਂ ਅਭਿਕ੍ਕਮਿਤੁਂ ਅਸਕ੍ਕੋਨ੍ਤਂ ਪੁਰਿਸਂ ਅਭਿਭਵਤਿ, ਏਵਂ ਜਾਤਿ ਜਰਾ ਚ ਕੋਸਜ੍ਜਾਭਿਭੂਤਂ ਤਂ ਅਤਿਵਤ੍ਤਤੇ ਉਪਰੂਪਰਿ ਅਜ੍ਝੋਤ੍ਥਰਤਿ. ਸੋ ਕਰੋਹੀਤਿ ਸੋ ਤ੍ਵਂ, ਕਾਤਿਯਾਨ, ਚਤੂਹਿ ਓਘੇਹਿ ਅਨਜ੍ਝੋਤ੍ਥਰਣੀਯਂ ਅਰਹਤ੍ਤਫਲਸਙ੍ਖਾਤਂ ਸੁਦੀਪਂ ਅਤ੍ਤਨੋ ਕਰੋਹਿ ਅਤ੍ਤਨੋ ਸਨ੍ਤਾਨੇ ਉਪ੍ਪਾਦੇਹਿ. ਨ ਹਿ ਤਾਣਂ ਤਵ ਵਿਜ੍ਜਤੇਵ ਅਞ੍ਞਨ੍ਤਿ ਹੀਤਿ ਹੇਤੁਅਤ੍ਥੇ ਨਿਪਾਤੋ. ਯਸ੍ਮਾ ਤਤੋ ਅਗ੍ਗਫਲਤੋ ਅਞ੍ਞਂ ਤਵ ਤਾਣਂ ਨਾਮ ਇਧ ਵਾ ਹੁਰਂ ਵਾ ਨ ਉਪਲਬ੍ਭਤਿ, ਤਸ੍ਮਾ ਤਂ ਅਰਹਤ੍ਤਸਙ੍ਖਾਤਂ ਸੁਦੀਪਂ ਕਰੋਹੀਤਿ.

ਸਤ੍ਥਾ ਹਿ ਵਿਜੇਸਿ ਮਗ੍ਗਮੇਤਨ੍ਤਿ ਯਂ ਸਾਧੇਤੁਂ ਅਵਿਸਹਨ੍ਤਾ ਯਤੋ ਪਰਾਜਿਤਾ ਪੁਥੂ ਅਞ੍ਞਤਿਤ੍ਥਿਯਾ, ਤਦੇਤਂ ਤਸ੍ਸ ਸੁਦੀਪਸ੍ਸ ਕਾਰਣਭੂਤਂ ਪਞ੍ਚਵਿਧਸਙ੍ਗਤੋ ਜਾਤਿਆਦਿਭਯਤੋ ਚ ਅਤੀਤਂ ਅਰਿਯਮਗ੍ਗਂ ਦੇਵਪੁਤ੍ਤਮਾਰਾਦਿਕੇ ਅਭਿਭਵਿਤ੍ਵਾ ਤੁਯ੍ਹਂ ਸਤ੍ਥਾ ਵਿਜੇਸਿ ਸਾਧੇਸਿ. ਯਸ੍ਮਾ ਸਤ੍ਥੁ ਸਨ੍ਤਕਂ ਨਾਮ ਸਾਵਕੇਨ ਅਧਿਗਨ੍ਤਬ੍ਬਂ ਨ ਵਿਸ੍ਸਜ੍ਜੇਤਬ੍ਬਂ, ਤਸ੍ਮਾ ਤਸ੍ਸ ਅਧਿਗਮਾਯ ਪੁਬ੍ਬਰਤ੍ਤਾਪਰਰਤ੍ਤਂ ਪੁਰਿਮਯਾਮਂ ਪਚ੍ਛਿਮਯਾਮਞ੍ਚ, ਅਪ੍ਪਮਤ੍ਤੋ ਸਤੋ ਸਮ੍ਪਜਾਨੋ ਹੁਤ੍ਵਾ ਅਨੁਯੁਞ੍ਜ ਯੋਗਂ ਭਾਵਨਂ ਦਲ਼੍ਹਞ੍ਚ ਕਰੋਹਿ.

ਪੁਰਿਮਾਨਿ ਪਮੁਞ੍ਚ ਬਨ੍ਧਨਾਨੀਤਿ ਪੁਰਿਮਕਾਨਿ ਗਿਹਿਕਾਲੇ ਆਬਦ੍ਧਾਨਿ ਗਿਹਿਬਨ੍ਧਨਾਨਿ ਕਾਮਗੁਣਬਨ੍ਧਨਾਨਿ ਪਮੁਞ੍ਚ ਵਿਸ੍ਸਜ੍ਜੇਹਿ, ਤਤ੍ਥ ਅਨਪੇਕ੍ਖੋ ਹੋਹਿ. ਸਙ੍ਘਾਟਿਖੁਰਮੁਣ੍ਡਭਿਕ੍ਖਭੋਜੀਤਿ ਸਙ੍ਘਾਟਿਧਾਰੀ ਖੁਰੇਨ ਕਤਸਿਰਮੁਣ੍ਡੋ ਭਿਕ੍ਖਾਹਾਰਭੋਜੀ, ਤਿਵਿਧਮ੍ਪੇਤਂ ਪੁਰਿਮਬਨ੍ਧਨਪਮੋਕ੍ਖਸ੍ਸ ਖਿਡ੍ਡਾਰਤਿਨਿਦ੍ਦਾਨਨੁਯੋਗਸ੍ਸ ਚ ਕਾਰਣਵਚਨਂ. ਯਸ੍ਮਾ ਤ੍ਵਂ ਸਙ੍ਘਾਟਿਪਾਰੁਤੋ ਮੁਣ੍ਡੋ ਭਿਕ੍ਖਾਹਾਰੋ ਜੀਵਤਿ, ਤਸ੍ਮਾ ਤੇ ਕਾਮਸੁਖਾਨੁਯੋਗੋ ਖਿਡ੍ਡਾਰਤਿਨਿਦ੍ਦਾਨੁਯੋਗੋ ਚ ਨ ਯੁਤ੍ਤੋਤਿ ਤਤੋ ਪੁਰਿਮਾਨਿ ਪਮੁਞ੍ਚ ਬਨ੍ਧਨਾਨਿ ਖਿਡ੍ਡਾਰਤਿਂ ਨਿਦ੍ਦਞ੍ਚ ਮਾਨੁਯੁਞ੍ਜਿਤ੍ਥਾਤਿ ਯੋਜਨਾ. ਝਾਯਾਤਿ ਝਾਯਸ੍ਸੁ ਆਰਮ੍ਮਣੂਪਨਿਜ੍ਝਾਨਂ ਅਨੁਯੁਞ੍ਜ.

ਤਂ ਪਨ ਅਨੁਯੁਞ੍ਜਨ੍ਤੋ ਯੇਨ ਝਾਨੇਨ ਝਾਯਤੋ ਕਿਲੇਸਾ ਸਬ੍ਬਸੋ ਜਿਤਾ ਹੋਨ੍ਤਿ, ਤਂ ਲਕ੍ਖਣੂਪਨਿਜ੍ਝਾਨਂ ਅਨੁਯੁਞ੍ਜਾਤਿ ਦਸ੍ਸੇਨ੍ਤੋ ‘‘ਝਾਯਾਹਿ ਜਿਨਾਹੀ’’ਤਿ ਆਹ. ਯੋਗਕ੍ਖੇਮਪਥੇਸੁ ਕੋਵਿਦੋਸੀਤਿ ਚਤੂਹਿ ਯੋਗੇਹਿ ਖੇਮਸ੍ਸ ਨਿਬ੍ਬਾਨਸ੍ਸ ਪਥਭੂਤੇਸੁ ਬੋਧਿਪਕ੍ਖਿਯਧਮ੍ਮੇਸੁ ਕੁਸਲੋ ਛੇਕੋ ਅਸਿ, ਤਸ੍ਮਾ ਭਾਵਨਂ ਉਸ੍ਸੁਕ੍ਕਾਪੇਨ੍ਤੋ ਅਨੁਤ੍ਤਰਂ ਉਤ੍ਤਰਰਹਿਤਂ, ਵਿਸੁਦ੍ਧਿਂ ਨਿਬ੍ਬਾਨਂ ਅਰਹਤ੍ਤਞ੍ਚ ਪਪ੍ਪੁਯ੍ਯ ਪਾਪੁਣਿਤ੍ਵਾ ਪਨ ਤ੍ਵਂ ਪਰਿਨਿਬ੍ਬਾਹਿਸਿ. ਵਾਰਿਨਾਵ ਜੋਤੀਤਿ ਮਹਤਾ ਸਲਿਲਵੁਟ੍ਠਿਨਿਪਾਤੇਨ ਅਗ੍ਗਿਖਨ੍ਧੋ ਵਿਯ ਅਰਿਯਮਗ੍ਗਵੁਟ੍ਠਿਨਿਪਾਤੇਨ ਪਰਿਨਿਬ੍ਬਾਯਿਸ੍ਸਤਿ.

ਪਜ੍ਜੋਤਕਰੋਤਿ ਪਜ੍ਜੋਤਿਂ ਕਰੋ ਪਦੀਪੋ. ਪਰਿਤ੍ਤਰਂਸੋਤਿ ਖੁਦ੍ਦਕਚ੍ਚਿਕੋ. ਵਿਨਮ੍ਯਤੇਤਿ ਵਿਨਮੀਯਤਿ ਅਪਨਿਯ੍ਯਤਿ. ਲਤਾਵਾਤਿ ਵਲ੍ਲਿ ਵਿਯ. ਇਦਂ ਵੁਤ੍ਤਂ ਹੋਤਿ – ਯਥਾ ਵਟ੍ਟਿਆਦਿਪਚ੍ਚਯਵੇਕਲ੍ਲੇਨ ਪਰਿਤ੍ਤਰਂਸੋ ਮਨ੍ਦਪਭੋ ਪਦੀਪੋ ਅਪ੍ਪਿਕਾ ਲਤਾ ਵਾ ਵਾਤੇਨ ਵਿਧਮਿਯ੍ਯਤਿ ਵਿਦ੍ਧਂਸਿਯ੍ਯਤਿ, ਏਵਂ ਤੁਵਮ੍ਪਿ. ਕੋਸਿਯਗੋਤ੍ਤਤਾਯ, ਇਨ੍ਦਸਗੋਤ੍ਤ, ਇਨ੍ਦਸਮਾਨਗੋਤ੍ਤਂ. ਮਾਰਂ ਤਸ੍ਸ ਵਸੇ ਅਨਾਵਤ੍ਤਨਾ ਅਨੁਪਾਦਾਨਤੋ ਚ ਅਨਾਦਿਯਾਨੋ, ਨਿਦ੍ਧੁਨਾਹਿ ਵਿਧਮੇਹਿ ਵਿਦ੍ਧਂਸੇਹਿ. ਏਵਂ ਪਨ ਵਿਦ੍ਧਂਸਮਾਨੋ ਸੋ ਤ੍ਵਂ ਵੇਦਯਿਤਾਸੁ ਸਬ੍ਬਾਸੁ ਵੇਦਨਾਸੁ ਵਿਗਤਚ੍ਛਨ੍ਦਰਾਗੋ ਇਧੇਵ ਇਮਸ੍ਮਿਂਯੇਵ ਅਤ੍ਤਭਾਵੇ ਸਬ੍ਬਕਿਲੇਸਦਰਥਪਰਿਲ਼ਾਹਾਭਾਵੇਨ ਸੀਤਿਭੂਤੋ ਨਿਬ੍ਬੁਤੋ ਅਤ੍ਤਨੋ ਪਰਿਨਿਬ੍ਬਾਨਕਾਲਂ ਕਙ੍ਖ ਆਗਮੇਹੀਤਿ. ਏਵਂ ਸਤ੍ਥਾਰਾ ਅਨੁਪਾਦਿਸੇਸਂ ਨਿਬ੍ਬਾਨਂ ਪਾਪੇਤ੍ਵਾ ਦੇਸਨਾਯ ਕਤਾਯ ਥੇਰੋ ਦੇਸਨਾਵਸਾਨੇ ਵਿਪਸ੍ਸਨਂ ਵਡ੍ਢੇਤ੍ਵਾ ਅਰਹਤ੍ਤਂ ਪਾਪੁਣਿ. ਅਰਹਤ੍ਤਂ ਪਨ ਪਤ੍ਵਾ ਸਤ੍ਥਾਰਾ ਦੇਸਿਤਨਿਯਾਮੇਨੇਵ ਇਮਾ ਗਾਥਾ ਅਭਾਸਿ. ਤਾ ਏਵ ਇਮਾ ਗਾਥਾ ਥੇਰਸ੍ਸ ਅਞ੍ਞਾਬ੍ਯਾਕਰਣਞ੍ਚ ਜਾਤਾ.

ਕਾਤਿਯਾਨਤ੍ਥੇਰਗਾਥਾਵਣ੍ਣਨਾ ਨਿਟ੍ਠਿਤਾ.