੩. ਮਹਾਨਾਗਤ੍ਥੇਰਗਾਥਾਵਣ੍ਣਨਾ

ਯਸ੍ਸ ਸਬ੍ਰਹ੍ਮਚਾਰੀਸੂਤਿਆਦਿਕਾ ਆਯਸ੍ਮਤੋ ਮਹਾਨਾਗਤ੍ਥੇਰਸ੍ਸ ਗਾਥਾ. ਕਾ ਉਪ੍ਪਤ੍ਤਿ? ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਂ ਕੁਸਲਂ ਉਪਚਿਨਨ੍ਤੋ ਕਕੁਸਨ੍ਧਸ੍ਸ ਭਗਵਤੋ ਕਾਲੇ ਕੁਲਗੇਹੇ ਨਿਬ੍ਬਤ੍ਤਿਤ੍ਵਾ ਵਿਞ੍ਞੁਤਂ ਪਤ੍ਤੋ ਏਕਦਿਵਸਂ ਕਕੁਸਨ੍ਧਂ ਭਗਵਨ੍ਤਂ ਅਰਞ੍ਞਂ ਅਜ੍ਝੋਗਾਹੇਤ੍ਵਾ ਅਞ੍ਞਤਰਸ੍ਮਿਂ ਰੁਕ੍ਖਮੂਲੇ ਝਾਨਸੁਖੇਨ ਨਿਸਿਨ੍ਨਂ ਦਿਸ੍ਵਾ ਪਸਨ੍ਨਮਾਨਸੋ ਤਸ੍ਸ ਦਾਲ਼ਿਮਫਲਂ ਅਦਾਸਿ. ਸੋ ਤੇਨ ਪੁਞ੍ਞਕਮ੍ਮੇਨ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਸਾਕੇਤੇ ਮਧੁਵਾਸੇਟ੍ਠਸ੍ਸ ਨਾਮ ਬ੍ਰਾਹ੍ਮਣਸ੍ਸ ਪੁਤ੍ਤੋ ਹੁਤ੍ਵਾ ਨਿਬ੍ਬਤ੍ਤਿ, ਮਹਾਨਾਗੋਤਿਸ੍ਸ ਨਾਮਂ ਅਹੋਸਿ. ਸੋ ਵਿਞ੍ਞੁਤਂ ਪਤ੍ਤੋ ਭਗਵਤਿ ਸਾਕੇਤੇ ਅਞ੍ਜਨਵਨੇ ਵਿਹਰਨ੍ਤੇ ਆਯਸ੍ਮਤੋ ਗਵਮ੍ਪਤਿਤ੍ਥੇਰਸ੍ਸ ਪਾਟਿਹਾਰਿਯਂ ਦਿਸ੍ਵਾ ਪਟਿਲਦ੍ਧਸਦ੍ਧੋ ਥੇਰਸ੍ਸੇਵ ਸਨ੍ਤਿਕੇ ਪਬ੍ਬਜਿਤ੍ਵਾ ਤਸ੍ਸੋਵਾਦੇ ਠਤ੍ਵਾ ਅਰਹਤ੍ਤਂ ਪਾਪੁਣਿ. ਤੇਨ ਵੁਤ੍ਤਂ ਅਪਦਾਨੇ (ਅਪ. ਥੇਰ ੨.੪੫.੧-੭) –

‘‘ਕਕੁਸਨ੍ਧੋ ਮਹਾਵੀਰੋ, ਸਬ੍ਬਧਮ੍ਮਾਨ ਪਾਰਗੂ;

ਗਣਮ੍ਹਾ ਵੂਪਕਟ੍ਠੋ ਸੋ, ਅਗਮਾਸਿ ਵਨਨ੍ਤਰਂ.

‘‘ਬੀਜਮਿਞ੍ਜਂ ਗਹੇਤ੍ਵਾਨ, ਲਤਾਯ ਆਵੁਣਿਂ ਅਹਂ;

ਭਗਵਾ ਤਮ੍ਹਿ ਸਮਯੇ, ਝਾਯਤੇ ਪਬ੍ਬਤਨ੍ਤਰੇ.

‘‘ਦਿਸ੍ਵਾਨਹਂ ਦੇਵਦੇਵਂ, ਵਿਪ੍ਪਸਨ੍ਨੇਨ ਚੇਤਸਾ;

ਦਕ੍ਖਿਣੇਯ੍ਯਸ੍ਸ ਵੀਰਸ੍ਸ, ਬੀਜਮਿਞ੍ਜਮਦਾਸਹਂ.

‘‘ਇਮਸ੍ਮਿਂਯੇਵ ਕਪ੍ਪਮ੍ਹਿ, ਯਂ ਮਿਞ੍ਜਮਦਦਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਬੀਜਮਿਞ੍ਜਸ੍ਸਿਦਂ ਫਲਂ.

‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਕਤਂ ਬੁਦ੍ਧਸ੍ਸ ਸਾਸਨ’’ਨ੍ਤਿ.

ਅਰਹਤ੍ਤਂ ਪਨ ਪਤ੍ਵਾ ਵਿਮੁਤ੍ਤਿਸੁਖੇਨ ਵਿਹਰਨ੍ਤੋ ਥੇਰੋ ਛਬ੍ਬਗ੍ਗਿਯੇ ਭਿਕ੍ਖੂ ਸਬ੍ਰਹ੍ਮਚਾਰੀਸੁ ਗਾਰਵਂ ਅਕਤ੍ਵਾ ਵਿਹਰਨ੍ਤੇ ਦਿਸ੍ਵਾ ਤੇਸਂ ਓਵਾਦਦਾਨਵਸੇਨ –

੩੮੭. ‘‘ਯਸ੍ਸ ਸਬ੍ਰਹ੍ਮਚਾਰੀਸੁ, ਗਾਰਵੋ ਨੂਪਲਬ੍ਭਤਿ;

ਪਰਿਹਾਯਤਿ ਸਦ੍ਧਮ੍ਮਾ, ਮਚ੍ਛੋ ਅਪ੍ਪੋਦਕੇ ਯਥਾ.

੩੮੮. ‘‘ਯਸ੍ਸ ਸਬ੍ਰਹ੍ਮਚਾਰੀਸੁ, ਗਾਰਵੋ ਨੂਪਲਬ੍ਭਤਿ;

ਨ ਵਿਰੂਹਤਿ ਸਦ੍ਧਮ੍ਮੇ, ਖੇਤ੍ਤੇ ਬੀਜਂਵ ਪੂਤਿਕਂ.

੩੮੯. ‘‘ਯਸ੍ਸ ਸਬ੍ਰਹ੍ਮਚਾਰੀਸੁ, ਗਾਰਵੋ ਨੂਪਲਬ੍ਭਤਿ;

ਆਰਕਾ ਹੋਤਿ ਨਿਬ੍ਬਾਨਾ, ਧਮ੍ਮਰਾਜਸ੍ਸ ਸਾਸਨੇ.

੩੯੦. ‘‘ਯਸ੍ਸ ਸਬ੍ਰਹ੍ਮਚਾਰੀਸੁ, ਗਾਰਵੋ ਉਪਲਬ੍ਭਤਿ;

ਨ ਵਿਹਾਯਤਿ ਸਦ੍ਧਮ੍ਮਾ, ਮਚ੍ਛੋ ਬਵ੍ਹੋਦਕੇ ਯਥਾ.

੩੯੧. ‘‘ਯਸ੍ਸ ਸਬ੍ਰਹ੍ਮਚਾਰੀਸੁ, ਗਾਰਵੋ ਉਪਲਬ੍ਭਤਿ;

ਸੋ ਵਿਰੂਹਤਿ ਸਦ੍ਧਮ੍ਮੇ, ਖੇਤ੍ਤੇ ਬੀਜਂਵ ਭਦ੍ਦਕਂ.

੩੯੨. ‘‘ਯਸ੍ਸ ਸਬ੍ਰਹ੍ਮਚਾਰੀਸੁ, ਗਾਰਵੋ ਉਪਲਬ੍ਭਤਿ;

ਸਨ੍ਤਿਕੇ ਹੋਤਿ ਨਿਬ੍ਬਾਨਂ, ਧਮ੍ਮਰਾਜਸ੍ਸ ਸਾਸਨੇ’’ਤਿ. –

ਇਮਾ ਛ ਗਾਥਾ ਅਭਾਸਿ.

ਤਤ੍ਥ ਸਬ੍ਰਹ੍ਮਚਾਰੀਸੂਤਿ ਸਮਾਨਂ ਬ੍ਰਹ੍ਮਂ ਸੀਲਾਦਿਧਮ੍ਮਂ ਚਰਨ੍ਤੀਤਿ ਸਬ੍ਰਹ੍ਮਚਾਰਿਨੋ, ਸੀਲਦਿਟ੍ਠਿਸਾਮਞ੍ਞਗਤਾ ਸਹਧਮ੍ਮਿਕਾ, ਤੇਸੁ. ਗਾਰਵੋਤਿ ਗਰੁਭਾਵੋ ਸੀਲਾਦਿਗੁਣਨਿਮਿਤ੍ਤਂ ਗਰੁਕਰਣਂ. ਨੂਪਲਬ੍ਭਤੀਤਿ ਨ ਵਿਜ੍ਜਤਿ ਨ ਪਵਤ੍ਤਤਿ, ਨ ਉਪਤਿਟ੍ਠਤੀਤਿ ਅਤ੍ਥੋ. ਨਿਬ੍ਬਾਨਾਤਿ ਕਿਲੇਸਾਨਂ ਨਿਬ੍ਬਾਪਨਤੋ ਕਿਲੇਸਕ੍ਖਯਾਤਿ ਅਤ੍ਥੋ. ਧਮ੍ਮਰਾਜਸ੍ਸਾਤਿ ਸਤ੍ਥੁਨੋ. ਸਤ੍ਥਾ ਹਿ ਸਦੇਵਕਂ ਲੋਕਂ ਯਥਾਰਹਂ ਲੋਕਿਯਲੋਕੁਤ੍ਤਰੇਨ ਧਮ੍ਮੇਨ ਰਞ੍ਜੇਤਿ ਤੋਸੇਤੀਤਿ ਧਮ੍ਮਰਾਜਾ. ਏਤ੍ਥ ਚ ‘‘ਧਮ੍ਮਰਾਜਸ੍ਸ ਸਾਸਨੇ’’ਤਿ ਇਮਿਨਾ ਨਿਬ੍ਬਾਨਂ ਨਾਮ ਧਮ੍ਮਰਾਜਸ੍ਸੇਵ ਸਾਸਨੇ, ਨ ਅਞ੍ਞਤ੍ਥ. ਤਤ੍ਥ ਯੋ ਸਬ੍ਰਹ੍ਮਚਾਰੀਸੁ ਗਾਰਵਰਹਿਤੋ, ਸੋ ਯਥਾ ਨਿਬ੍ਬਾਨਾ ਆਰਕਾ ਹੋਤਿ, ਤਥਾ ਧਮ੍ਮਰਾਜਸ੍ਸ ਸਾਸਨਤੋਪਿ ਆਰਕਾ ਹੋਤੀਤਿ ਦਸ੍ਸੇਤਿ. ਬਵ੍ਹੋਦਕੇਤਿ ਬਹੁਉਦਕੇ. ਸਨ੍ਤਿਕੇ ਹੋਤਿ ਨਿਬ੍ਬਾਨਨ੍ਤਿ ਨਿਬ੍ਬਾਨਂ ਤਸ੍ਸ ਸਨ੍ਤਿਕੇ ਸਮੀਪੇ ਏਵ ਹੋਤਿ. ਸੇਸਂ ਵੁਤ੍ਤਨਯਮੇਵ. ਇਮਾ ਏਵ ਚ ਥੇਰਸ੍ਸ ਅਞ੍ਞਾਬ੍ਯਾਕਰਣਗਾਥਾ ਅਹੇਸੁਂ.

ਮਹਾਨਾਗਤ੍ਥੇਰਗਾਥਾਵਣ੍ਣਨਾ ਨਿਟ੍ਠਿਤਾ.