੧੧. ਨ੍ਹਾਤਕਮੁਨਿਤ੍ਥੇਰਗਾਥਾਵਣ੍ਣਨਾ

ਵਾਤਰੋਗਾਭਿਨੀਤੋਤਿਆਦਿਕਾ ਆਯਸ੍ਮਤੋ ਨ੍ਹਾਤਕਮੁਨਿਸ੍ਸ ਗਾਥਾ. ਕਾ ਉਪ੍ਪਤ੍ਤਿ? ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਪੁਞ੍ਞਾਨਿ ਉਪਚਿਨਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਰਾਜਗਹੇ ਬ੍ਰਾਹ੍ਮਣਕੁਲੇ ਨਿਬ੍ਬਤ੍ਤਿਤ੍ਵਾ ਵਯਪ੍ਪਤ੍ਤੋ ਵਿਜ੍ਜਾਟ੍ਠਾਨਾਦੀਸੁ ਨਿਪ੍ਫਤ੍ਤਿਂ ਗਤੋ ਨ੍ਹਾਤਕਲਕ੍ਖਣਯੋਗੇਨ ਨ੍ਹਾਤਕੋਤਿ ਪਞ੍ਞਾਯਿਤ੍ਥ. ਸੋ ਤਾਪਸਪਬ੍ਬਜ੍ਜਂ ਪਬ੍ਬਜਿਤ੍ਵਾ ਰਾਜਗਹਸ੍ਸ ਤਿਯੋਜਨਪ੍ਪਮਾਣੇ ਠਾਨੇ ਅਰਞ੍ਞਾਯਤਨੇ ਨੀਵਾਰੇਹਿ ਯਾਪੇਨ੍ਤੋ ਅਗ੍ਗਿਂ ਪਰਿਚਾਰਯਮਾਨੋ ਵਸਤਿ. ਤਸ੍ਸ ਸਤ੍ਥਾ ਘਟੇ ਵਿਯ ਪਦੀਪਂ ਹਦਯਬ੍ਭਨ੍ਤਰੇ ਪਜ੍ਜਲਨ੍ਤਂ ਅਰਹਤ੍ਤੂਪਨਿਸ੍ਸਯਂ ਦਿਸ੍ਵਾ ਅਸ੍ਸਮਪਦਂ ਅਗਮਾਸਿ. ਸੋ ਭਗਵਨ੍ਤਂ ਦਿਸ੍ਵਾ ਹਟ੍ਠਤੁਟ੍ਠੋ ਅਤ੍ਤਨੋ ਉਪਕਪ੍ਪਨਨਿਯਾਮੇਨ ਆਹਾਰਂ ਉਪਨੇਸਿ. ਤਂ ਭਗਵਾ ਪਰਿਭੁਞ੍ਜਿ. ਏਵਂ ਤਯੋ ਦਿਵਸੇ ਦਤ੍ਵਾ ਚਤੁਤ੍ਥਦਿਵਸੇ ‘‘ਭਗਵਾ ਤੁਮ੍ਹੇ ਪਰਮਸੁਖੁਮਾਲਾ, ਕਥਂ ਇਮਿਨਾ ਆਹਾਰੇਨ ਯਾਪੇਥਾ’’ਤਿ ਆਹ. ਤਸ੍ਸ ਸਤ੍ਥਾ ਅਰਿਯਸਨ੍ਤੋਸਗੁਣਂ ਪਕਾਸੇਨ੍ਤੋ ਧਮ੍ਮਂ ਦੇਸੇਸਿ. ਤਾਪਸੋ ਤਂ ਸੁਤ੍ਵਾ ਸੋਤਾਪਨ੍ਨੋ ਹੁਤ੍ਵਾ ਪਬ੍ਬਜਿਤ੍ਵਾ ਅਰਹਤ੍ਤਂ ਪਾਪੁਣਿ. ਭਗਵਾ ਤਂ ਅਰਹਤ੍ਤੇ ਪਤਿਟ੍ਠਪੇਤ੍ਵਾ ਗਤੋ. ਸੋ ਪਨ ਤਤ੍ਥੇਵ ਵਿਹਰਨ੍ਤੋ ਅਪਰਭਾਗੇ ਵਾਤਾਬਾਧੇਨ ਉਪਦ੍ਦੁਤੋ ਅਹੋਸਿ. ਸਤ੍ਥਾ ਤਤ੍ਥ ਗਨ੍ਤ੍ਵਾ ਪਟਿਸਨ੍ਥਾਰਮੁਖੇਨ ਤਸ੍ਸ ਵਿਹਾਰਂ ਪੁਚ੍ਛਨ੍ਤੋ –

੪੩੫. ‘‘ਵਾਤਰੋਗਾਭਿਨੀਤੋ ਤ੍ਵਂ, ਵਿਹਰਂ ਕਾਨਨੇ ਵਨੇ;

ਪਵਿਦ੍ਧਗੋਚਰੇ ਲੂਖੇ, ਕਥਂ ਭਿਕ੍ਖੁ ਕਰਿਸ੍ਸਸੀ’’ਤਿ. – ਗਾਥਮਾਹ; ਅਥ ਥੇਰੋ –

੪੩੬. ‘‘ਪੀਤਿਸੁਖੇਨ ਵਿਪੁਲੇਨ, ਫਰਿਤ੍ਵਾਨ ਸਮੁਸ੍ਸਯਂ;

ਲੂਖਮ੍ਪਿ ਅਭਿਸਮ੍ਭੋਨ੍ਤੋ, ਵਿਹਰਿਸ੍ਸਾਮਿ ਕਾਨਨੇ.

੪੩੭. ‘‘ਭਾਵੇਨ੍ਤੋ ਸਤ੍ਤ ਬੋਜ੍ਝਙ੍ਗੇ, ਇਨ੍ਦ੍ਰਿਯਾਨਿ ਬਲਾਨਿ ਚ;

ਝਾਨਸੋਖੁਮ੍ਮਸਮ੍ਪਨ੍ਨੋ, ਵਿਹਰਿਸ੍ਸਂ ਅਨਾਸਵੋ.

੪੩੮. ‘‘ਵਿਪ੍ਪਮੁਤ੍ਤਂ ਕਿਲੇਸੇਹਿ, ਸੁਦ੍ਧਚਿਤ੍ਤਂ ਅਨਾਵਿਲਂ;

ਅਭਿਣ੍ਹਂ ਪਚ੍ਚਵੇਕ੍ਖਨ੍ਤੋ, ਵਿਹਰਿਸ੍ਸਂ ਅਨਾਸਵੋ.

੪੩੯. ‘‘ਅਜ੍ਝਤ੍ਤਞ੍ਚ ਬਹਿਦ੍ਧਾ ਚ, ਯੇ ਮੇ ਵਿਜ੍ਜਿਂਸੁ ਆਸਵਾ;

ਸਬ੍ਬੇ ਅਸੇਸਾ ਉਚ੍ਛਿਨ੍ਨਾ, ਨ ਚ ਉਪ੍ਪਜ੍ਜਰੇ ਪੁਨ.

੪੪੦. ‘‘ਪਞ੍ਚਕ੍ਖਨ੍ਧਾ ਪਰਿਞ੍ਞਾਤਾ, ਤਿਟ੍ਠਨ੍ਤਿ ਛਿਨ੍ਨਮੂਲਕਾ;

ਦੁਕ੍ਖਕ੍ਖਯੋ ਅਨੁਪ੍ਪਤ੍ਤੋ, ਨਤ੍ਥਿ ਦਾਨਿ ਪੁਨਬ੍ਭਵੋ’’ਤਿ. –

ਇਮਾਹਿ ਸੇਸਗਾਥਾਹਿ ਅਤ੍ਤਨੋ ਵਿਹਾਰਂ ਸਤ੍ਥੁ ਪਵੇਦੇਸਿ.

ਤਤ੍ਥ ਝਾਨਸੋਖੁਮ੍ਮਸਮ੍ਪਨ੍ਨੋਤਿ ਝਾਨਸੁਖੁਮਭਾਵੇਨ ਸਮਨ੍ਨਾਗਤੋ. ਝਾਨਸੁਖੁਮਂ ਨਾਮ ਅਰੂਪਜ੍ਝਾਨਂ, ਤਸ੍ਮਾ ਅਟ੍ਠਸਮਾਪਤ੍ਤਿਲਾਭਿਮ੍ਹੀਤਿ ਵੁਤ੍ਤਂ ਹੋਤਿ. ਤੇਨ ਅਤ੍ਤਨੋ ਉਭਤੋਭਾਗਵਿਮੁਤ੍ਤਿਤਂ ਦਸ੍ਸੇਤਿ. ਅਪਰੇ ਪਨਾਹੁ – ‘‘ਸੋਖੁਮ੍ਮਨ੍ਤਿ ਅਗ੍ਗਮਗ੍ਗਫਲੇਸੁ ਅਧਿਪਞ੍ਞਾਸਿਕ੍ਖਾ ਅਧਿਪ੍ਪੇਤਾ, ਤਤੋ ਝਾਨਗ੍ਗਹਣੇਨ ਅਤ੍ਤਨੋ ਉਭਤੋਭਾਗਵਿਮੁਤ੍ਤਿਤਂ ਵਿਭਾਵੇਤੀ’’ਤਿ. ਵਿਪ੍ਪਮੁਤ੍ਤਂ ਕਿਲੇਸੇਹੀਤਿ ਪਟਿਪ੍ਪਸ੍ਸਦ੍ਧਿਵਿਮੁਤ੍ਤਿਯਾ ਸਬ੍ਬਕਿਲੇਸੇਹਿ ਵਿਮੁਤ੍ਤਂ, ਤਤੋ ਏਵ ਸੁਦ੍ਧਚਿਤ੍ਤਂ, ਅਨਾਵਿਲਸਙ੍ਕਪ੍ਪਤਾਯ ਅਨਾਵਿਲਂ, ਤੀਹਿਪਿ ਪਦੇਹਿ ਅਰਹਤ੍ਤਫਲਚਿਤ੍ਤਮੇਵ ਵਦਤਿ. ਸੇਸਂ ਹੇਟ੍ਠਾ ਵੁਤ੍ਤਨਯਮੇਵ. ਇਮਮੇਵ ਚ ਥੇਰਸ੍ਸ ਅਞ੍ਞਾਬ੍ਯਾਕਰਣਂ ਅਹੋਸੀਤਿ.

ਨ੍ਹਾਤਕਮੁਨਿਤ੍ਥੇਰਗਾਥਾਵਣ੍ਣਨਾ ਨਿਟ੍ਠਿਤਾ.