੧੦. ਸੁਮਨਤ੍ਥੇਰਗਾਥਾਵਣ੍ਣਨਾ
ਯਦਾ ਨਵੋ ਪਬ੍ਬਜਿਤੋਤਿਆਦਿਕਾ ਆਯਸ੍ਮਤੋ ਸੁਮਨਤ੍ਥੇਰਸ੍ਸ ਗਾਥਾ. ਕਾ ਉਪ੍ਪਤ੍ਤਿ? ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਪੁਞ੍ਞਾਨਿ ਉਪਚਿਨਨ੍ਤੋ ਸਿਖਿਸ੍ਸ ਭਗਵਤੋ ਕਾਲੇ ਮਾਲਾਕਾਰਕੁਲੇ ਨਿਬ੍ਬਤ੍ਤਿਤ੍ਵਾ ਵਿਞ੍ਞੁਤਂ ਪਤ੍ਤੋ ਏਕਦਿਵਸਂ ਸਿਖਿਂ ਭਗਵਨ੍ਤਂ ਪਸ੍ਸਿਤ੍ਵਾ ਪਸਨ੍ਨਮਾਨਸੋ ਸੁਮਨਪੁਪ੍ਫੇਹਿ ਪੂਜਂ ਅਕਾਸਿ. ਸੋ ਤੇਨ ਪੁਞ੍ਞਕਮ੍ਮੇਨ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਅਞ੍ਞਤਰਸ੍ਸ ਉਪਾਸਕਸ੍ਸ ਗੇਹੇ ਪਟਿਸਨ੍ਧਿਂ ਗਣ੍ਹਿ. ਸੋ ਚ ਉਪਾਸਕੋ ਆਯਸ੍ਮਤੋ ਅਨੁਰੁਦ੍ਧਤ੍ਥੇਰਸ੍ਸ ਉਪਟ੍ਠਾਕੋ ਅਹੋਸਿ. ਤਸ੍ਸ ਚ ਤਤੋ ਪੁਬ੍ਬੇ ਜਾਤਾਜਾਤਾ ਦਾਰਕਾ ਮਰਿਂਸੁ. ਤੇਨ ਸੋ ‘‘ਸਚਾਹਂ ਇਦਾਨਿ ਏਕਂ ਪੁਤ੍ਤਂ ਲਭਿਸ੍ਸਾਮਿ, ਅਯ੍ਯਸ੍ਸ ਅਨੁਰੁਦ੍ਧਤ੍ਥੇਰਸ੍ਸ ਸਨ੍ਤਿਕੇ ਪਬ੍ਬਾਜੇਸ੍ਸਾਮੀ’’ਤਿ ਚਿਤ੍ਤਂ ਉਪ੍ਪਾਦੇਸਿ. ਸੋ ਚ ਦਸਮਾਸਚ੍ਚਯੇਨ ਜਾਤੋ ਅਰੋਗੋਯੇਵ ਹੁਤ੍ਵਾ ਅਨੁਕ੍ਕਮੇਨ ਵਡ੍ਢੇਨ੍ਤੋ ਸਤ੍ਤਵਸ੍ਸਿਕੋ ਅਹੋਸਿ, ਤਂ ਪਿਤਾ ਥੇਰਸ੍ਸ ਸਨ੍ਤਿਕੇ ਪਬ੍ਬਾਜੇਸਿ. ਸੋ ਪਬ੍ਬਜਿਤ੍ਵਾ ਤਤੋ ਪਰਿਪਕ੍ਕਞਾਣਤ੍ਤਾ ਵਿਪਸ੍ਸਨਾਯ ਕਮ੍ਮਂ ਕਰੋਨ੍ਤੋ ਨਚਿਰਸ੍ਸੇਵ ਛਲ਼ਭਿਞ੍ਞੋ ਹੁਤ੍ਵਾ ਥੇਰਂ ਉਪਟ੍ਠਹਨ੍ਤੋ ‘‘ਪਾਨੀਯਂ ਆਹਰਿਸ੍ਸਾਮੀ’’ਤਿ ਘਟਂ ਆਦਾਯ ਇਦ੍ਧਿਯਾ ਅਨੋਤਤ੍ਤਦਹਂ ਅਗਮਾਸਿ. ਅਥੇਕੋ ਮਿਚ੍ਛਾਦਿਟ੍ਠਿਕੋ ਨਾਗਰਾਜਾ ਅਨੋਤਤ੍ਤਦਹਂ ਪਟਿਚ੍ਛਾਦੇਨ੍ਤੋ ਸਤ੍ਤਕ੍ਖਤ੍ਤੁਂ ਭੋਗੇਨ ਪਰਿਕ੍ਖਿਪਿਤ੍ਵਾ ਉਪਰਿ ਮਹਨ੍ਤਂ ਫਣਂ ਕਤ੍ਵਾ ਸੁਮਨਸ੍ਸ ਪਾਨੀਯਂ ਗਹੇਤੁਂ ਓਕਾਸਂ ਨ ਦੇਤਿ. ਸੁਮਨੋ ਗਰੁਲ਼ਰੂਪਂ ਗਹੇਤ੍ਵਾ ਤਂ ਨਾਗਰਾਜਂ ਅਭਿਭਵਿਤ੍ਵਾ ਪਾਨੀਯਂ ਗਹੇਤ੍ਵਾ ਥੇਰਸ੍ਸ ਵਸਨਟ੍ਠਾਨਂ ਉਦ੍ਦਿਸ੍ਸ ਆਕਾਸੇਨ ਗਚ੍ਛਤਿ. ਤਂ ਸਤ੍ਥਾ ਜੇਤਵਨੇ ਨਿਸਿਨ੍ਨੋ ਤਥਾ ਗਚ੍ਛਨ੍ਤਂ ਦਿਸ੍ਵਾ ਧਮ੍ਮਸੇਨਾਪਤਿਂ ਆਮਨ੍ਤੇਤ੍ਵਾ, ‘‘ਸਾਰਿਪੁਤ੍ਤ, ਇਮਂ ਪਸ੍ਸਾ’’ਤਿਆਦਿਨਾ ਚਤੂਹਿ ਗਾਥਾਹਿ ਤਸ੍ਸ ਗੁਣੇ ਅਭਾਸਿ. ਅਥ ਸੁਮਨਤ੍ਥੇਰੋ –
੪੨੯. ‘‘ਯਦਾ ਨਵੋ ਪਬ੍ਬਜਿਤੋ, ਜਾਤਿਯਾ ਸਤ੍ਤਵਸ੍ਸਿਕੋ;
ਇਦ੍ਧਿਯਾ ਅਭਿਭੋਤ੍ਵਾਨ, ਪਨ੍ਨਗਿਨ੍ਦਂ ਮਹਿਦ੍ਧਿਕਂ.
੪੩੦. ‘‘ਉਪਜ੍ਝਾਯਸ੍ਸ ਉਦਕਂ, ਅਨੋਤਤ੍ਤਾ ਮਹਾਸਰਾ;
ਆਹਰਾਮਿ ਤਤੋ ਦਿਸ੍ਵਾ, ਮਂ ਸਤ੍ਥਾ ਏਤਦਬ੍ਰਵਿ.
੪੩੧. ‘‘ਸਾਰਿਪੁਤ੍ਤ ਇਮਂ ਪਸ੍ਸ, ਆਗਚ੍ਛਨ੍ਤਂ ਕੁਮਾਰਕਂ;
ਉਦਕਕੁਮ੍ਭਮਾਦਾਯ, ਅਜ੍ਝਤ੍ਤਂ ਸੁਸਮਾਹਿਤਂ.
੪੩੨. ‘‘ਪਾਸਾਦਿਕੇਨ ਵਤ੍ਤੇਨ, ਕਲ੍ਯਾਣਇਰਿਯਾਪਥੋ;
ਸਾਮਣੇਰੋਨੁਰੁਦ੍ਧਸ੍ਸ, ਇਦ੍ਧਿਯਾ ਚ ਵਿਸਾਰਦੋ.
੪੩੩. ‘‘ਆਜਾਨੀਯੇਨ ਆਜਞ੍ਞੋ, ਸਾਧੁਨਾ ਸਾਧੁਕਾਰਿਤੋ;
ਵਿਨੀਤੋ ਅਨੁਰੁਦ੍ਧੇਨ, ਕਤਕਿਚ੍ਚੇਨ ਸਿਕ੍ਖਿਤੋ.
੪੩੪. ‘‘ਸੋ ਪਤ੍ਵਾ ਪਰਮਂ ਸਨ੍ਤਿਂ, ਸਚ੍ਛਿਕਤ੍ਵਾ ਅਕੁਪ੍ਪਤਂ;
ਸਾਮਣੇਰੋ ਸ ਸੁਮਨੋ, ਮਾ ਮਂ ਜਞ੍ਞਾਤਿ ਇਚ੍ਛਤੀ’’ਤਿ. –
ਅਞ੍ਞਾਬ੍ਯਾਕਰਣਵਸੇਨ ਛ ਗਾਥਾ ਅਭਾਸਿ.
ਤਤ੍ਥ ਆਦਿਤੋ ਦ੍ਵੇ ਗਾਥਾ ਸੁਮਨਤ੍ਥੇਰੇਨੇਵ ਭਾਸਿਤਾ, ਇਤਰਾ ਚਤਸ੍ਸੋ ਤਂ ਪਸਂਸਨ੍ਤੇਨ ਸਤ੍ਥਾਰਾ ਭਾਸਿਤਾ. ਤਾ ਸਬ੍ਬਾ ਏਕਜ੍ਝਂ ਕਤ੍ਵਾ ਸੁਮਨਤ੍ਥੇਰੋ ਪਚ੍ਛਾ ਅਞ੍ਞਾਬ੍ਯਾਕਰਣਵਸੇਨ ਅਭਾਸਿ. ਤਤ੍ਥ ਪਨ੍ਨਗਿਨ੍ਦਨ੍ਤਿ ਨਾਗਰਾਜਂ. ਤਤੋਤਿ ਤਤ੍ਥ, ਯਦਾ ਨਵੋ ਪਬ੍ਬਜਿਤੋ ਜਾਤਿਯਾ ਸਤ੍ਤਵਸ੍ਸਿਕੋ ਇਦ੍ਧਿਬਲੇਨ ਮਹਿਦ੍ਧਿਕਂ ਨਾਗਰਾਜਂ ਅਭਿਭਵਿਤ੍ਵਾ ਅਨੋਤਤ੍ਤਦਹਤੋ ਉਪਜ੍ਝਾਯਸ੍ਸ ਪਾਨੀਯਂ ਆਹਰਾਮਿ, ਤਸ੍ਮਿਂ ਕਾਲੇਤਿ ਅਤ੍ਥੋ.
ਮਂ ਉਦ੍ਦਿਸ੍ਸ ਮਯ੍ਹਂ ਸਤ੍ਥਾ ਏਤਦਬ੍ਰਵਿ, ਤਂ ਦਸ੍ਸੇਨ੍ਤੋ, ‘‘ਸਾਰਿਪੁਤ੍ਤ, ਇਮਂ ਪਸ੍ਸਾ’’ਤਿਆਦਿਮਾਹ. ਅਜ੍ਝਤ੍ਤਂ ਸੁਸਮਾਹਿਤਨ੍ਤਿ ਵਿਸਯਜ੍ਝਤ੍ਤਭੂਤੇਨ ਅਗ੍ਗਫਲਸਮਾਧਿਨਾ ਸੁਟ੍ਠੁ ਸਮਾਹਿਤਂ.
ਪਾਸਾਦਿਕੇਨ ਵਤ੍ਤੇਨਾਤਿ ਪਸ੍ਸਨ੍ਤਾਨਂ ਪਸਾਦਾਵਹੇਨ ਆਚਾਰਵਤ੍ਤੇਨ, ਕਰਣਤ੍ਥੇ ਇਦਂ ਕਰਣਵਚਨਂ. ਕਲ੍ਯਾਣਇਰਿਯਾਪਥੋਤਿ ਸਮ੍ਪਨ੍ਨਿਰਿਯਾਪਥੋ. ਪਾਸਾਦਿਕੇਨ ਵਤ੍ਤੇਨਾਤਿ ਵਾ ਇਤ੍ਥਮ੍ਭੂਤਲਕ੍ਖਣੇ ਕਰਣਵਚਨਂ. ਸਮਣਸ੍ਸ ਭਾਵੋ ਸਾਮਣ੍ਯਂ, ਸਾਮਞ੍ਞਨ੍ਤਿ ਅਤ੍ਥੋ. ਤਦਤ੍ਥਂ ਈਰਤਿ ਪਵਤ੍ਤਤੀਤਿ ਸਾਮਣੇਰੋ, ਸਮਣੁਦ੍ਦੇਸੋ. ਇਦ੍ਧਿਯਾ ਚ ਵਿਸਾਰਦੋਤਿ ਇਦ੍ਧਿਯਮ੍ਪਿ ਬ੍ਯਤ੍ਤੋ ਸੁਕੁਸਲੋ. ਆਜਾਨੀਯੇਨਾਤਿ ਪੁਰਿਸਾਜਾਨੀਯੇਨ. ਅਤ੍ਤਹਿਤਪਰਹਿਤਾਨਂ ਸਾਧਨਤੋ ਸਾਧੁਨਾ ਕਤਕਿਚ੍ਚੇਨ ਅਨੁਰੁਦ੍ਧੇਨ ਸਾਧੁ ਉਭਯਹਿਤਸਾਧਕੋ, ਸੁਟ੍ਠੁ ਵਾ ਆਜਞ੍ਞੋ ਕਾਰਿਤੋ ਦਮਿਤੋ. ਅਗ੍ਗਵਿਜ੍ਜਾਯ ਵਿਨੀਤੋ ਅਸੇਕ੍ਖਭਾਵਾਪਾਦਨੇਨ ਸਿਕ੍ਖਿਤੋ ਸਿਕ੍ਖਾਪਿਤੋਤਿ ਅਤ੍ਥੋ.
ਸੋ ਸਾਮਣੇਰੋ ਸੁਮਨੋ ਪਰਮਂ ਸਨ੍ਤਿਂ ਨਿਬ੍ਬਾਨਂ ਪਤ੍ਵਾ ਅਗ੍ਗਮਗ੍ਗਾਧਿਗਮੇਨ ਅਧਿਗਨ੍ਤ੍ਵਾ ਸਚ੍ਛਿਕਤ੍ਵਾ ਅਤ੍ਤਪਚ੍ਚਕ੍ਖਂ ਕਤ੍ਵਾ ਅਕੁਪ੍ਪਤਂ ਅਰਹਤ੍ਤਫਲਂ ਅਪ੍ਪਿਚ੍ਛਭਾਵਸ੍ਸ ਪਰਮੁਕ੍ਕਂਸਗਤਤ੍ਤਾ ਮਾ ਮਂ ਜਞ੍ਞਾਤਿ ਮਂ ‘‘ਅਯਂ ਖੀਣਾਸਵੋ’’ਤਿ ਵਾ ‘‘ਛਲ਼ਭਿਞ੍ਞੋ’’ਤਿ ਵਾ ਕੋਚਿਪਿ ਮਾ ਜਾਨੇਯ੍ਯਾਤਿ ਇਚ੍ਛਤਿ ਅਭਿਕਙ੍ਖਤੀਤਿ.
ਸੁਮਨਤ੍ਥੇਰਗਾਥਾਵਣ੍ਣਨਾ ਨਿਟ੍ਠਿਤਾ.