੧੦. ਸਾਟਿਮਤ੍ਤਿਯਤ੍ਥੇਰਗਾਥਾਵਣ੍ਣਨਾ

ਅਹੁ ਤੁਯ੍ਹਂ ਪੁਰੇ ਸਦ੍ਧਾਤਿ ਆਯਸ੍ਮਤੋ ਸਾਟਿਮਤ੍ਤਿਯਤ੍ਥੇਰਸ੍ਸ ਗਾਥਾ. ਕਾ ਉਪ੍ਪਤ੍ਤਿ? ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਪੁਞ੍ਞਾਨਿ ਉਪਚਿਨਨ੍ਤੋ ਸਿਦ੍ਧਤ੍ਥਸ੍ਸ ਭਗਵਤੋ ਕਾਲੇ ਕੁਲਗੇਹੇ ਨਿਬ੍ਬਤ੍ਤਿਤ੍ਵਾ ਵਿਞ੍ਞੁਤਂ ਪਤ੍ਤੋ ਏਕਦਿਵਸਂ ਸਤ੍ਥਾਰਂ ਦਿਸ੍ਵਾ ਪਸਨ੍ਨਮਾਨਸੋ ਤਾਲਵਣ੍ਟਂ ਅਦਾਸਿ. ਸੋ ਤੇਨ ਪੁਞ੍ਞਕਮ੍ਮੇਨ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਮਗਧਰਟ੍ਠੇ ਬ੍ਰਾਹ੍ਮਣਕੁਲੇ ਨਿਬ੍ਬਤ੍ਤਿਤ੍ਵਾ ਸਾਟਿਮਤ੍ਤਿਯੋਤਿ ਲਦ੍ਧਨਾਮੋ ਵਯਪ੍ਪਤ੍ਤੋ ਹੇਤੁਸਮ੍ਪਨ੍ਨਤਾਯ ਆਰਞ੍ਞਕਭਿਕ੍ਖੂਨਂ ਸਨ੍ਤਿਕੇ ਪਬ੍ਬਜਿਤ੍ਵਾ ਵਿਪਸ੍ਸਨਾਯ ਕਮ੍ਮਂ ਕਰੋਨ੍ਤੋ ਛਲ਼ਭਿਞ੍ਞੋ ਅਹੋਸਿ. ਤੇਨ ਵੁਤ੍ਤਂ ਅਪਦਾਨੇ (ਅਪ. ਥੇਰ ੧.੩੮.੪੩-੪੭) –

‘‘ਸਿਦ੍ਧਤ੍ਥਸ੍ਸ ਭਗਵਤੋ, ਤਾਲਵਣ੍ਟਮਦਾਸਹਂ;

ਸੁਮਨੇਹਿ ਪਟਿਚ੍ਛਨ੍ਨਂ, ਧਾਰਯਾਮਿ ਮਹਾਰਹਂ.

‘‘ਚਤੁਨ੍ਨਵੁਤਿਤੋ ਕਪ੍ਪੇ, ਤਾਲਵਣ੍ਟਮਦਾਸਹਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਤਾਲਵਣ੍ਟਸ੍ਸਿਦਂ ਫਲਂ.

‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਕਤਂ ਬੁਦ੍ਧਸ੍ਸ ਸਾਸਨ’’ਨ੍ਤਿ.

ਛਲ਼ਭਿਞ੍ਞੋ ਪਨ ਹੁਤ੍ਵਾ ਭਿਕ੍ਖੂ ਓਵਦਤਿ ਅਨੁਸਾਸਤਿ ਬਹੂ ਚ ਸਤ੍ਤੇ ਧਮ੍ਮਂ ਕਥੇਤ੍ਵਾ ਸਰਣੇਸੁ ਚ ਸੀਲੇਸੁ ਚ ਪਤਿਟ੍ਠਾਪੇਸਿ. ਅਞ੍ਞਤਰਞ੍ਚ ਕੁਲਂ ਅਸ੍ਸਦ੍ਧਂ ਅਪ੍ਪਸਨ੍ਨਂ ਸਦ੍ਧਂ ਪਸਨ੍ਨਂ ਅਕਾਸਿ. ਤੇਨ ਤਸ੍ਮਿਂ ਕੁਲੇ ਮਨੁਸ੍ਸਾ ਥੇਰੇ ਅਭਿਪ੍ਪਸਨ੍ਨਾ ਅਹੇਸੁਂ. ਤਤ੍ਥੇਕਾ ਦਾਰਿਕਾ ਅਭਿਰੂਪਾ ਦਸ੍ਸਨੀਯਾ ਥੇਰਂ ਪਿਣ੍ਡਾਯ ਪਵਿਟ੍ਠਂ ਸਕ੍ਕਚ੍ਚਂ ਭੋਜਨੇਨ ਪਰਿਵਿਸਤਿ. ਅਥੇਕਦਿਵਸਂ ਮਾਰੋ ‘‘ਏਵਂ ਇਮਸ੍ਸ ਅਯਸੋ ਵਡ੍ਢਿਸ੍ਸਤਿ, ਅਪ੍ਪਤਿਟ੍ਠੋ ਭਵਿਸ੍ਸਤੀ’’ਤਿ ਚਿਨ੍ਤੇਤ੍ਵਾ ਥੇਰਸ੍ਸ ਰੂਪੇਨ ਗਨ੍ਤ੍ਵਾ ਤਂ ਦਾਰਿਕਂ ਹਤ੍ਥੇ ਅਗ੍ਗਹੇਸਿ. ਦਾਰਿਕਾ ‘‘ਨਾਯਂ ਮਨੁਸ੍ਸਸਮ੍ਫਸ੍ਸੋ’’ਤਿ ਚ ਅਞ੍ਞਾਸਿ, ਹਤ੍ਥਞ੍ਚ ਮੁਞ੍ਚਾਪੇਸਿ. ਤਂ ਦਿਸ੍ਵਾ ਘਰਜਨੋ ਥੇਰੇ ਅਪ੍ਪਸਾਦਂ ਜਨੇਸਿ. ਪੁਨਦਿਵਸੇ ਥੇਰੋ ਤਂ ਕਾਰਣਂ ਅਨਾਵਜ੍ਜੇਨ੍ਤੋ ਤਂ ਘਰਂ ਅਗਮਾਸਿ. ਤਤ੍ਥ ਮਨੁਸ੍ਸਾ ਅਨਾਦਰਂ ਅਕਂਸੁ. ਥੇਰੋ ਤਂ ਕਾਰਣਂ ਆਵਜ੍ਜੇਨ੍ਤੋ ਮਾਰਸ੍ਸ ਕਿਰਿਯਂ ਦਿਸ੍ਵਾ ‘‘ਤਸ੍ਸ ਗੀਵਾਯਂ ਕੁਕ੍ਕੁਰਕੁਣਪਂ ਪਟਿਮੁਞ੍ਚਤੂ’’ਤਿ ਅਧਿਟ੍ਠਹਿਤ੍ਵਾ ਤਸ੍ਸ ਮੋਚਨਤ੍ਥਂ ਉਪਗਤੇਨ ਮਾਰੇਨ ਅਤੀਤਦਿਵਸੇ ਕਤਕਿਰਿਯਂ ਕਥਾਪੇਤ੍ਵਾ ਤਂ ਤਜ੍ਜੇਤ੍ਵਾ ਵਿਸ੍ਸਜ੍ਜੇਸਿ. ਤਂ ਦਿਸ੍ਵਾ ਘਰਸਾਮਿਕੋ ‘‘ਖਮਥ, ਭਨ੍ਤੇ, ਅਚ੍ਚਯ’’ਨ੍ਤਿ ਖਮਾਪੇਤ੍ਵਾ ‘‘ਅਜ੍ਜਤਗ੍ਗੇ ਅਹਮੇਵ, ਭਨ੍ਤੇ, ਤੁਮ੍ਹੇ ਉਪਟ੍ਠਹਾਮੀ’’ਤਿ ਆਹ. ਥੇਰੋ ਤਸ੍ਸ ਧਮ੍ਮਂ ਕਥੇਨ੍ਤੋ –

੨੪੬. ‘‘ਅਹੁ ਤੁਯ੍ਹਂ ਪੁਰੇ ਸਦ੍ਧਾ, ਸਾ ਤੇ ਅਜ੍ਜ ਨ ਵਿਜ੍ਜਤਿ;

ਯਂ ਤੁਯ੍ਹਂ ਤੁਯ੍ਹਮੇਵੇਤਂ, ਨਤ੍ਥਿ ਦੁਚ੍ਚਰਿਤਂ ਮਮ.

੨੪੭. ‘‘ਅਨਿਚ੍ਚਾ ਹਿ ਚਲਾ ਸਦ੍ਧਾ, ਏਵਂ ਦਿਟ੍ਠਾ ਹਿ ਸਾ ਮਯਾ;

ਰਜ੍ਜਨ੍ਤਿਪਿ ਵਿਰਜ੍ਜਨ੍ਤਿ, ਤਤ੍ਥ ਕਿਂ ਜਿਯ੍ਯਤੇ ਮੁਨਿ.

੨੪੮. ‘‘ਪਚ੍ਚਤਿ ਮੁਨਿਨੋ ਭਤ੍ਤਂ, ਥੋਕਂ ਥੋਕਂ ਕੁਲੇ ਕੁਲੇ;

ਪਿਣ੍ਡਿਕਾਯ ਚਰਿਸ੍ਸਾਮਿ, ਅਤ੍ਥਿ ਜਙ੍ਘਬਲਂ ਮਮਾ’’ਤਿ. –

ਤਿਸ੍ਸੋ ਗਾਥਾ ਅਭਾਸਿ.

ਤਤ੍ਥ ਅਹੁ ਤੁਯ੍ਹਂ ਪੁਰੇ ਸਦ੍ਧਾ, ਸਾ ਤੇ ਅਜ੍ਜ ਨ ਵਿਜ੍ਜਤੀਤਿ, ਉਪਾਸਕ, ਇਤੋ ਪੁਬ੍ਬੇ ਤਵ ਮਯਿ ‘‘ਅਯ੍ਯੋ ਧਮ੍ਮਚਾਰੀ ਸਮਚਾਰੀ’’ਤਿਆਦਿਨਾ ਸਦ੍ਧਾ ਅਹੋਸਿ, ਸਾ ਸਦ੍ਧਾ ਤੇ ਤਵ ਅਜ੍ਜ ਇਦਾਨਿ ਨ ਉਪਲਬ੍ਭਤਿ. ਤਸ੍ਮਾ ਯਂ ਤੁਯ੍ਹਂ ਤੁਯ੍ਹਮੇਵੇਤਨ੍ਤਿ ਚਤੁਪਚ੍ਚਯਦਾਨਂ, ਤੁਯ੍ਹਮੇਵ ਏਤਂ ਹੋਤੁ, ਨ ਤੇਨ ਮਯ੍ਹਂ ਅਤ੍ਥੋ, ਸਮ੍ਮਾ ਪਸਨ੍ਨਚਿਤ੍ਤੇਨ ਹਿ ਦਾਨਂ ਨਾਮ ਦਾਤਬ੍ਬਨ੍ਤਿ ਅਧਿਪ੍ਪਾਯੋ. ਅਥ ਵਾ ਯਂ ਤੁਯ੍ਹਂ ਤੁਯ੍ਹਮੇਵੇਤਨ੍ਤਿ ਯਂ ਤਵ ਮਯਿ ਅਜ੍ਜ ਅਗਾਰਵਂ ਪਵਤ੍ਤਂ, ਤਂ ਤੁਯ੍ਹਮੇਵ, ਤਸ੍ਸ ਫਲਂ ਤਯਾ ਏਵ ਪਚ੍ਚਨੁਭਵਿਤਬ੍ਬਂ, ਨ ਮਯਾਤਿ ਅਤ੍ਥੋ. ਨਤ੍ਥਿ ਦੁਚ੍ਚਰਿਤਂ ਮਮਾਤਿ ਮਮ ਪਨ ਦੁਚ੍ਚਰਿਤਂ ਨਾਮ ਨਤ੍ਥਿ ਮਗ੍ਗੇਨੇਵ ਦੁਚ੍ਚਰਿਤਹੇਤੂਨਂ ਕਿਲੇਸਾਨਂ ਸਮੁਚ੍ਛਿਨ੍ਨਤ੍ਤਾ.

ਅਨਿਚ੍ਚਾ ਹਿ ਚਲਾ ਸਦ੍ਧਾਤਿ ਯਸ੍ਮਾ ਪੋਥੁਜ੍ਜਨਿਕਾ ਸਦ੍ਧਾ ਅਨਿਚ੍ਚਾ ਏਕਨ੍ਤਿਕਾ ਨ ਹੋਤਿ, ਤਤੋ ਏਵ ਚਲਾ ਅਸ੍ਸਪਿਟ੍ਠੇ ਠਪਿਤਕੁਮ੍ਭਣ੍ਡਂ ਵਿਯ, ਥੁਸਰਾਸਿਮ੍ਹਿ ਨਿਖਾਤਖਾਣੁਕਂ ਵਿਯ ਚ ਅਨਵਟ੍ਠਿਤਾ. ਏਵਂ ਦਿਟ੍ਠਾ ਹਿ ਸਾ ਮਯਾਤਿ ਏਵਂ ਭੂਤਾ ਚ ਸਾ ਸਦ੍ਧਾ ਮਯਾ ਤਯਿ ਦਿਟ੍ਠਾ ਪਚ੍ਚਕ੍ਖਤੋ ਵਿਦਿਤਾ. ਰਜ੍ਜਨ੍ਤਿਪਿ ਵਿਰਜ੍ਜਨ੍ਤੀਤਿ ਏਵਂ ਤਸ੍ਸਾ ਅਨਵਟ੍ਠਿਤਤ੍ਤਾ ਏਵ ਇਮੇ ਸਤ੍ਤਾ ਕਦਾਚਿ ਕਤ੍ਥਚਿ ਮਿਤ੍ਤਸਨ੍ਥਵਵਸੇਨ ਰਜ੍ਜਨ੍ਤਿ ਸਿਨੇਹਮ੍ਪਿ ਕਰੋਨ੍ਤਿ, ਕਦਾਚਿ ਵਿਰਜ੍ਜਨ੍ਤਿ ਵਿਰਤ੍ਤਚਿਤ੍ਤਾ ਹੋਨ੍ਤਿ. ਤਤ੍ਥ ਕਿਂ ਜਿਯ੍ਯਤੇ ਮੁਨੀਤਿ ਤਸ੍ਮਿਂ ਪੁਥੁਜ੍ਜਨਾਨਂ ਰਜ੍ਜਨੇ ਵਿਰਜ੍ਜਨੇ ਚ ਮੁਨਿ ਪਬ੍ਬਜਿਤੋ ਕਿਂ ਜਿਯ੍ਯਤਿ, ਕਾ ਤਸ੍ਸ ਹਾਨੀਤਿ ਅਤ੍ਥੋ.

‘‘ਸਚੇ ਮਮ ਪਚ੍ਚਯੇ ਨ ਗਣ੍ਹਥ, ਕਥਂ ਤੁਮ੍ਹੇ ਯਾਪੇਥਾ’’ਤਿ ਏਵਂ ਮਾ ਚਿਨ੍ਤਯੀਤਿ ਦਸ੍ਸੇਨ੍ਤੋ ‘‘ਪਚ੍ਚਤੀ’’ਤਿ ਗਾਥਮਾਹ. ਤਸ੍ਸਤ੍ਥੋ ਮੁਨਿਨੋ ਪਬ੍ਬਜਿਤਸ੍ਸ ਭਤ੍ਤਂ ਨਾਮ ਕੁਲੇ ਕੁਲੇ ਅਨੁਘਰਂ ਦਿਵਸੇ ਦਿਵਸੇ ਥੋਕਂ ਥੋਕਂ ਪਚ੍ਚਤੇ, ਨ ਚ ਤੁਯ੍ਹਂ ਏਵ ਗੇਹੇ. ਪਿਣ੍ਡਿਕਾਯ ਚਰਿਸ੍ਸਾਮਿ, ਅਤ੍ਥਿ ਜਙ੍ਘਬਲਂ ਮਮਾਤਿ ਅਤ੍ਥਿ ਮੇ ਜਙ੍ਘਬਲਂ, ਨਾਹਂ ਓਭਗ੍ਗਜਙ੍ਘੋ ਨ ਖਞ੍ਜੋ ਨ ਚ ਪਾਦਰੋਗੀ, ਤਸ੍ਮਾ ਪਿਣ੍ਡਿਕਾਯ ਮਿਸ੍ਸਕਭਿਕ੍ਖਾਯ ਚਰਿਸ੍ਸਾਮਿ, ‘‘ਯਥਾਪਿ ਭਮਰੋ ਪੁਪ੍ਫ’’ਨ੍ਤਿਆਦਿਨਾ (ਧ. ਪ. ੪੯; ਨੇਤ੍ਤਿ. ੧੨੩) ਸਤ੍ਥਾਰਾ ਵੁਤ੍ਤਨਯੇਨ ਪਿਣ੍ਡਾਯ ਚਰਿਤ੍ਵਾ ਯਾਪੇਸ੍ਸਾਮੀਤਿ ਦਸ੍ਸੇਤਿ.

ਸਾਟਿਮਤ੍ਤਿਯਤ੍ਥੇਰਗਾਥਾਵਣ੍ਣਨਾ ਨਿਟ੍ਠਿਤਾ.