੬. ਮੇਲ਼ਜਿਨਤ੍ਥੇਰਗਾਥਾਵਣ੍ਣਨਾ

ਯਦਾਹਂ ਧਮ੍ਮਮਸ੍ਸੋਸਿਨ੍ਤਿਆਦਿਕਾ ਆਯਸ੍ਮਤੋ ਮੇਲ਼ਜਿਨਤ੍ਥੇਰਸ੍ਸ ਗਾਥਾ. ਕਾ ਉਪ੍ਪਤ੍ਤਿ? ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਪੁਞ੍ਞਾਨਿ ਉਪਚਿਨਨ੍ਤੋ ਸੁਮੇਧਸ੍ਸ ਭਗਵਤੋ ਕਾਲੇ ਕੁਲਗੇਹੇ ਨਿਬ੍ਬਤ੍ਤਿਤ੍ਵਾ ਵਿਞ੍ਞੁਤਂ ਪਤ੍ਤੋ ਏਕਦਿਵਸਂ ਭਗਵਨ੍ਤਂ ਪਿਣ੍ਡਾਯ ਗਚ੍ਛਨ੍ਤਂ ਦਿਸ੍ਵਾ ਪਸਨ੍ਨਮਾਨਸੋ ਮਧੁਰਂ ਆਮੋਦਫਲਂ ਅਦਾਸਿ. ਸੋ ਤੇਨ ਪੁਞ੍ਞਕਮ੍ਮੇਨ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਬਾਰਾਣਸਿਯਂ ਖਤ੍ਤਿਯਕੁਲੇ ਨਿਬ੍ਬਤ੍ਤਿਤ੍ਵਾ ਮੇਲ਼ਜਿਨੋਤਿ ਲਦ੍ਧਨਾਮੋ ਵਿਜ੍ਜਾਸਿਪ੍ਪੇਸੁ ਨਿਪ੍ਫਤ੍ਤਿਂ ਗਤੋ ਪਣ੍ਡਿਤੋ ਬ੍ਯਤ੍ਤੋ ਦਿਸਾਸੁ ਪਾਕਟੋ ਅਹੋਸਿ. ਸੋ ਭਗਵਤਿ ਬਾਰਾਣਸਿਯਂ ਇਸਿਪਤਨੇ ਵਿਹਰਨ੍ਤੇ ਵਿਹਾਰਂ ਗਨ੍ਤ੍ਵਾ ਸਤ੍ਥਾਰਂ ਉਪਸਙ੍ਕਮਿਤ੍ਵਾ ਧਮ੍ਮਂ ਸੁਤ੍ਵਾ ਪਟਿਲਦ੍ਧਸਦ੍ਧੋ ਪਬ੍ਬਜਿਤ੍ਵਾ ਵਿਪਸ੍ਸਨਂ ਪਟ੍ਠਪੇਤ੍ਵਾ ਤਦਹੇਵ ਅਰਹਤ੍ਤਂ ਪਾਪੁਣਿ. ਤੇਨ ਵੁਤ੍ਤਂ ਅਪਦਾਨੇ (ਅਪ. ਥੇਰ ੨.੫੧.੫੭-੬੨) –

‘‘ਸਹਸ੍ਸਰਂਸੀ ਭਗਵਾ, ਸਯਮ੍ਭੂ ਅਪਰਾਜਿਤੋ;

ਵਿਵੇਕਾ ਵੁਟ੍ਠਹਿਤ੍ਵਾਨ, ਗੋਚਰਾਯਾਭਿਨਿਕ੍ਖਮਿ.

‘‘ਫਲਹਤ੍ਥੋ ਅਹਂ ਦਿਸ੍ਵਾ, ਉਪਗਚ੍ਛਿਂ ਨਰਾਸਭਂ;

ਪਸਨ੍ਨਚਿਤ੍ਤੋ ਸੁਮਨੋ, ਅਵਟਂ ਅਦਦਿਂ ਫਲਂ.

‘‘ਚਤੁਨ੍ਨਵੁਤਿਤੋ ਕਪ੍ਪੇ, ਯਂ ਫਲਂ ਅਦਦਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਫਲਦਾਨਸ੍ਸਿਦਂ ਫਲਂ.

‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਕਤਂ ਬੁਦ੍ਧਸ੍ਸ ਸਾਸਨ’’ਨ੍ਤਿ.

ਅਰਹਤ੍ਤਂ ਪਨ ਪਤ੍ਵਾ ਅਪਰਭਾਗੇ ਭਿਕ੍ਖੂਹਿ, ‘‘ਆਵੁਸੋ, ਕਿਂ ਤਯਾ ਉਤ੍ਤਰਿਮਨੁਸ੍ਸਧਮ੍ਮੋ ਅਧਿਗਤੋ’’ਤਿ ਪੁਟ੍ਠੋ ਸੀਹਨਾਦਂ ਨਦਨ੍ਤੋ –

੧੩੧. ‘‘ਯਦਾਹਂ ਧਮ੍ਮਮਸ੍ਸੋਸਿਂ, ਭਾਸਮਾਨਸ੍ਸ ਸਤ੍ਥੁਨੋ;

ਨ ਕਙ੍ਖਮਭਿਜਾਨਾਮਿ, ਸਬ੍ਬਞ੍ਞੂ ਅਪਰਾਜਿਤੇ.

੧੩੨. ‘‘ਸਤ੍ਥਵਾਹੇ ਮਹਾਵੀਰੇ, ਸਾਰਥੀਨਂ ਵਰੁਤ੍ਤਮੇ;

ਮਗ੍ਗੇ ਪਟਿਪਦਾਯਂ ਵਾ, ਕਙ੍ਖਾ ਮਯ੍ਹਂ ਨ ਵਿਜ੍ਜਤੀ’’ਤਿ. – ਗਾਥਾਦ੍ਵਯਂ ਅਭਾਸਿ;

ਤਤ੍ਥ ਯਦਾਤਿ ਯਸ੍ਮਿਂ ਕਾਲੇ. ਅਹਨ੍ਤਿ ਅਤ੍ਤਾਨਂ ਨਿਦ੍ਦਿਸਤਿ. ਧਮ੍ਮਨ੍ਤਿ ਚਤੁਸਚ੍ਚਧਮ੍ਮਂ. ਅਸ੍ਸੋਸਿਨ੍ਤਿ ਸੁਣਿਂ. ਸਤ੍ਥੁਨੋਤਿ ਦਿਟ੍ਠਧਮ੍ਮਿਕਾਦਿਅਤ੍ਥੇਹਿ ਵੇਨੇਯ੍ਯਾਨਂ ਸਾਸਨਟ੍ਠੇਨ ਸਤ੍ਥੁਨੋ. ਕਙ੍ਖਨ੍ਤਿ ਸਂਸਯਂ. ਸਙ੍ਖਤਮਸਙ੍ਖਤਞ੍ਚ ਅਨਵਸੇਸਤੋ ਜਾਨਨਟ੍ਠੇਨ ਸਬ੍ਬਞ੍ਞੂ. ਕੁਤੋਚਿਪਿ ਪਰਾਜਿਤਾ ਭਾਵੇਨ ਅਪਰਾਜਿਤੇ. ਵੇਨੇਯ੍ਯਸਤ੍ਤਾਨਂ ਸਂਸਾਰਕਨ੍ਤਾਰਤੋ ਨਿਬ੍ਬਾਨਂ ਪਟਿਵਾਹਨਟ੍ਠੇਨ ਸਤ੍ਥਵਾਹੇ. ਇਦਂ ਵੁਤ੍ਤਂ ਹੋਤਿ – ਯਤੋ ਪਭੁਤਿ ਅਹਂ ਸਤ੍ਥੁਨੋ ਧਮ੍ਮਂ ਦੇਸੇਨ੍ਤਸ੍ਸ ਚਤੁਸਚ੍ਚਧਮ੍ਮਂ ਅਸ੍ਸੋਸਿਂ ਸੋਤਦ੍ਵਾਰਾਨੁਸਾਰੇਨ ਉਪਧਾਰੇਸਿਂ ਉਪਲਭਿਂ, ਤਤੋ ਪਟ੍ਠਾਯ ਅਨਵਸੇਸਸਙ੍ਖਤਾਸਙ੍ਖਤਸਮ੍ਮੁਤਿਧਮ੍ਮਾਨਂ ਸਯਮ੍ਭੂਞਾਣੇਨ ਜਾਨਨਤੋ ਸਬ੍ਬਞ੍ਞੂ ਅਨਾਵਰਣਦਸ੍ਸਾਵਿਮ੍ਹਿ, ਪਞ੍ਚਨ੍ਨਮ੍ਪਿ ਮਾਰਾਨਂ ਅਭਿਭਵਨਤੋ ਤੇਹਿ ਅਪਰਾਜਿਤਤ੍ਤਾ ਸਦੇਵਕੇ ਲੋਕੇ ਅਪ੍ਪਟਿਹਤਧਮ੍ਮਚਕ੍ਕਤ੍ਤਾ ਚ ਅਪਰਾਜਿਤੇ, ਵੇਨੇਯ੍ਯਸਤ੍ਤਾਨਂ ਲੋਭਕਨ੍ਤਾਰਾਦਿਤੋ ਵਾਹਨਟ੍ਠੇਨ ਸਤ੍ਥਵਾਹੇ, ਮਹਾਵਿਕ੍ਕਨ੍ਤਤਾਯ ਮਹਾਵੀਰੇ, ਅਞ੍ਞੇਹਿ ਦੁਦ੍ਦਮਾਨਂ ਪੁਰਿਸਦਮ੍ਮਾਨਂ ਸਰਣਤੋ ਅਚ੍ਚਨ੍ਤਿਕੇਨ ਦਮਥੇਨ ਦਮਨਤੋ ਸਾਰਥੀਨਂ ਪਵਰਭੂਤੇ ਉਤ੍ਤਮੇ ਸਮ੍ਮਾਸਮ੍ਬੁਦ੍ਧੇ, ‘‘ਬੁਦ੍ਧੋ ਨੁ ਖੋ ਨੋ ਨੁ ਖੋ’’ਤਿ ਕਙ੍ਖਂ ਨਾਭਿਜਾਨਾਮਿ ਅਪਰਪ੍ਪਚ੍ਚਯਭਾਵਤੋ. ਤਥਾਰੂਪੇ ਦੇਸਿਤੇ ਅਰਿਯਮਗ੍ਗੇ ਤਦੁਪਾਦਾਯਭੂਤਾਯ ਚ ਸੀਲਾਦਿਪਟਿਪਦਾਯ ‘‘ਨਿਯ੍ਯਾਨਿਕੋ ਨੁ ਖੋ ਨ ਨੁ ਖੋ’’ਤਿ ਕਙ੍ਖਾ ਵਿਚਿਕਿਚ੍ਛਾ ਨ ਵਿਜ੍ਜਤਿ ਨਤ੍ਥੀਤਿ. ਏਤ੍ਥ ਚ ਅਰਿਯਧਮ੍ਮੇ ਸਂਸਯਾਭਾਵਕਥਨੇਨ ਅਰਿਯਸਙ੍ਘੇਪਿ ਸਂਸਯਾਭਾਵੋ ਕਥਿਤੋਯੇਵਾਤਿ ਦਟ੍ਠਬ੍ਬਂ ਤਤ੍ਥ ਪਤਿਟ੍ਠਿਤਸ੍ਸ ਅਨਞ੍ਞਥਾਭਾਵਤੋਤਿ.

ਮੇਲ਼ਜਿਨਤ੍ਥੇਰਗਾਥਾਵਣ੍ਣਨਾ ਨਿਟ੍ਠਿਤਾ.