੧. ਸੋਣਕੋਲ਼ਿਵਿਸਤ੍ਥੇਰਗਾਥਾਵਣ੍ਣਨਾ

ਤੇਰਸਨਿਪਾਤੇ ਯਾਹੁ ਰਟ੍ਠੇਤਿਆਦਿਕਾ ਆਯਸ੍ਮਤੋ ਸੋਣਸ੍ਸ ਕੋਲ਼ਿਵਿਸਸ੍ਸ ਗਾਥਾ. ਕਾ ਉਪ੍ਪਤ੍ਤਿ? ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਪੁਞ੍ਞਾਨਿ ਉਪਚਿਨਿ. ਅਯਂ ਕਿਰ ਅਨੋਮਦਸ੍ਸਿਸ੍ਸ ਭਗਵਤੋ ਕਾਲੇ ਮਹਾਵਿਭਵੋ ਸੇਟ੍ਠਿ ਹੁਤ੍ਵਾ ਉਪਾਸਕੇਹਿ ਸਦ੍ਧਿਂ ਵਿਹਾਰਂ ਗਨ੍ਤ੍ਵਾ ਸਤ੍ਥੁ ਸਨ੍ਤਿਕੇ ਧਮ੍ਮਂ ਸੁਤ੍ਵਾ ਪਸਨ੍ਨਮਾਨਸੋ ਸਤ੍ਥੁ ਚਙ੍ਕਮਨਟ੍ਠਾਨੇ ਸੁਧਾਯ ਪਰਿਕਮ੍ਮਂ ਕਾਰੇਤ੍ਵਾ ਨਾਨਾਵਣ੍ਣੇਹਿ ਪੁਪ੍ਫੇਹਿ ਸਨ੍ਥਰਿਤ੍ਵਾ ਉਪਰਿ ਨਾਨਾਵਿਰਾਗਵਤ੍ਥੇਹਿ ਵਿਤਾਨਂ ਬਨ੍ਧਾਪੇਸਿ, ਤਥਾ ਸਤ੍ਥੁ ਭਿਕ੍ਖੁਸਙ੍ਘਸ੍ਸ ਚ ਦੀਘਸਾਲਂ ਕਾਰੇਤ੍ਵਾ ਨਿਯ੍ਯਾਦੇਸਿ. ਸੋ ਤੇਨ ਪੁਞ੍ਞਕਮ੍ਮੇਨ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਪਦੁਮੁਤ੍ਤਰਸ੍ਸ ਭਗਵਤੋ ਕਾਲੇ ਹਂਸਵਤੀਨਗਰੇ ਸੇਟ੍ਠਿਕੁਲੇ ਨਿਬ੍ਬਤ੍ਤਿ, ਸਿਰਿਵਡ੍ਢੋਤਿਸ੍ਸ ਨਾਮਂ ਅਹੋਸਿ. ਸੋ ਵਯਪ੍ਪਤ੍ਤੋ ਵਿਹਾਰਂ ਗਨ੍ਤ੍ਵਾ ਸਤ੍ਥੁ ਸਨ੍ਤਿਕੇ ਧਮ੍ਮਂ ਸੁਣਨ੍ਤੋ ਸਤ੍ਥਾਰਂ ਏਕਂ ਭਿਕ੍ਖੁਂ ਆਰਦ੍ਧਵੀਰਿਯਾਨਂ ਅਗ੍ਗਟ੍ਠਾਨੇ ਠਪੇਨ੍ਤਂ ਦਿਸ੍ਵਾ, ਸਯਮ੍ਪਿ ਤਂ ਠਾਨਨ੍ਤਰਂ ਪਤ੍ਥੇਨ੍ਤੋ ਸਤ੍ਤਾਹਂ ਮਹਾਦਾਨਂ ਪਵਤ੍ਤੇਤ੍ਵਾ ਪਣਿਧਾਨਮਕਾਸਿ. ਸਤ੍ਥਾਪਿ ਤਸ੍ਸ ਪਤ੍ਥਨਾਯ ਸਮਿਜ੍ਝਨਭਾਵਂ ਦਿਸ੍ਵਾ ਬ੍ਯਾਕਰਿਤ੍ਵਾ ਪਕ੍ਕਾਮਿ.

ਸੋਪਿ ਯਾਵਜੀਵਂ ਕੁਸਲਂ ਕਤ੍ਵਾ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਪਰਿਨਿਬ੍ਬੁਤੇ ਕਸ੍ਸਪਦਸਬਲੇ ਅਨੁਪ੍ਪਨ੍ਨੇ ਅਮ੍ਹਾਕਂ ਭਗਵਤਿ ਬਾਰਾਣਸਿਯਂ ਕੁਲਗੇਹੇ ਨਿਬ੍ਬਤ੍ਤਿਤ੍ਵਾ ਵਿਞ੍ਞੁਤਂ ਪਤ੍ਤੋ ਗਙ੍ਗਾਤੀਰੇ ਪਣ੍ਣਸਾਲਂ ਕਰਿਤ੍ਵਾ ਏਕਂ ਪਚ੍ਚੇਕਬੁਦ੍ਧਂ ਤੇਮਾਸਂ ਚਤੂਹਿ ਪਚ੍ਚਯੇਹਿ ਸਕ੍ਕਚ੍ਚਂ ਉਪਟ੍ਠਹਿ. ਪਚ੍ਚੇਕਬੁਦ੍ਧੋ ਵੁਟ੍ਠਵਸ੍ਸੋ ਪਰਿਪੁਣ੍ਣਪਰਿਕ੍ਖਾਰੋ ਗਨ੍ਧਮਾਦਨਮੇਵ ਗਤੋ. ਸੋਪਿ ਕੁਲਪੁਤ੍ਤੋ ਯਾਵਜੀਵਂ ਤਤ੍ਥ ਪੁਞ੍ਞਾਨਿ ਕਤ੍ਵਾ ਤਤੋ ਚਵਿਤ੍ਵਾ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਅਮ੍ਹਾਕਂ ਭਗਵਤੋ ਕਾਲੇ ਚਮ੍ਪਾਨਗਰੇ ਉਸਭਸੇਟ੍ਠਿਸ੍ਸ ਗੇਹੇ ਪਟਿਸਨ੍ਧਿਂ ਗਣ੍ਹਿ. ਤਸ੍ਸ ਪਟਿਸਨ੍ਧਿਗ੍ਗਹਣਤੋ ਪਟ੍ਠਾਯ ਸੇਟ੍ਠਿਸ੍ਸ ਮਹਾਭੋਗਕ੍ਖਨ੍ਧੋ ਅਭਿਵਡ੍ਢਿ. ਤਸ੍ਸ ਜਾਤਦਿਵਸੇ ਸਕਲਨਗਰੇ ਮਹਾਸਕ੍ਕਾਰਸਮ੍ਪਨ੍ਨੋ ਅਹੋਸਿ, ਤਸ੍ਸ ਪੁਬ੍ਬੇ ਪਚ੍ਚੇਕਬੁਦ੍ਧਸ੍ਸ ਸਤਸਹਸ੍ਸਗ੍ਘਨਿਕਰਤ੍ਤਕਮ੍ਬਲਪਰਿਚ੍ਚਾਗੇਨ ਸੁਵਣ੍ਣਵਣ੍ਣੋ ਸੁਖੁਮਾਲਤਰੋ ਚ ਅਤ੍ਤਭਾਵੋ ਅਹੋਸਿ, ਤੇਨਸ੍ਸ ਸੋਣੋਤਿ ਨਾਮਂ ਅਕਂਸੁ. ਮਹਤਾ ਪਰਿਵਾਰੇਨ ਵਡ੍ਢਤਿ, ਤਸ੍ਸ ਹਤ੍ਥਪਾਦਤਲਾਨਿ ਬਨ੍ਧੁਜੀਵਕਪੁਪ੍ਫਵਣ੍ਣਾਨਿ ਅਹੇਸੁਂ, ਸਤਵਿਹਤਕਪ੍ਪਾਸਸ੍ਸ ਵਿਯ ਸਮ੍ਫਸ੍ਸੋ ਪਾਦਤਲੇਸੁ ਮਣਿਕੁਣ੍ਡਲਾਵਟ੍ਟਵਣ੍ਣਾਨਿ ਲੋਮਾਨਿ ਜਾਯਿਂਸੁ. ਵਯਪ੍ਪਤ੍ਤਸ੍ਸ ਤਸ੍ਸ ਤਿਣ੍ਣਂ ਉਤੂਨਂ ਅਨੁਚ੍ਛਵਿਕੇ ਤਯੋ ਪਾਸਾਦੇ ਕਾਰੇਤ੍ਵਾ ਨਾਟਕਾਨਿ ਉਪਟ੍ਠਾਪੇਸੁਂ. ਸੋ ਤਤ੍ਥ ਮਹਤਿਂ ਸਮ੍ਪਤ੍ਤਿਂ ਅਨੁਭਵਨ੍ਤੋ ਦੇਵਕੁਮਾਰੋ ਵਿਯ ਪਟਿਵਸਤਿ.

ਅਥ ਅਮ੍ਹਾਕਂ ਸਤ੍ਥਰਿ ਸਬ੍ਬਞ੍ਞੁਤਂ ਪਤ੍ਵਾ ਪਵਤ੍ਤਿਤਵਰਧਮ੍ਮਚਕ੍ਕੇ ਰਾਜਗਹਂ ਉਪਨਿਸ੍ਸਾਯ ਵਿਹਰਨ੍ਤੇ ਬਿਮ੍ਬਿਸਾਰਰਞ੍ਞਾ ਪਕ੍ਕੋਸਾਪਿਤੋ ਅਸੀਤਿਯਾ ਗਾਮਿਕਸਹਸ੍ਸੇਹਿ ਸਦ੍ਧਿਂ ਰਾਜਗਹਂ ਆਗਤੋ, ਸਤ੍ਥੁ ਸਨ੍ਤਿਕਂ ਗਨ੍ਤ੍ਵਾ ਧਮ੍ਮਂ ਸੁਤ੍ਵਾ ਪਟਿਲਦ੍ਧਸਦ੍ਧੋ ਮਾਤਾਪਿਤਰੋ ਅਨੁਜਾਨਾਪੇਤ੍ਵਾ ਸਾਸਨੇ ਪਬ੍ਬਜਿਤ੍ਵਾ ਲਦ੍ਧੂਪਸਮ੍ਪਦੋ ਸਤ੍ਥੁ ਸਨ੍ਤਿਕੇ ਕਮ੍ਮਟ੍ਠਾਨਂ ਗਹੇਤ੍ਵਾ, ਜਨਸਂਸਗ੍ਗਪਰਿਹਰਣਤ੍ਥਂ ਸੀਤਵਨੇ ਵਸਨ੍ਤੋ ‘‘ਮਮ ਸਰੀਰਂ ਸੁਖੁਮਾਲਂ, ਨ ਚ ਸਕ੍ਕਾ ਸੁਖੇਨੇਵ ਸੁਖਂ ਅਧਿਗਨ੍ਤੁਂ, ਕਾਯਂ ਕਿਲਮੇਤ੍ਵਾ ਸਮਣਧਮ੍ਮਂ ਕਾਤੁਂ ਵਟ੍ਟਤੀ’’ਤਿ ਠਾਨਚਙ੍ਕਮਮੇਵ ਅਧਿਟ੍ਠਾਯ, ਪਧਾਨਮਨੁਯੁਞ੍ਜਨ੍ਤੋ ਪਾਦਤਲੇਸੁ ਫੋਟੇਸੁ ਉਟ੍ਠਹਿਤੇਸੁਪਿ ਵੇਦਨਂ ਅਜ੍ਝੁਪੇਕ੍ਖਿਤ੍ਵਾ ਦਲ਼੍ਹਂ ਵੀਰਿਯਂ ਕਰੋਨ੍ਤੋ ਅਚ੍ਚਾਰਦ੍ਧਵੀਰਿਯਤਾਯ ਵਿਸੇਸਂ ਨਿਬ੍ਬਤ੍ਤੇਤੁਂ ਅਸਕ੍ਕੋਨ੍ਤੋ, ‘‘ਏਵਂ ਵਾਯਮਨ੍ਤੋਪਿ ਅਹਂ ਮਗ੍ਗਂ ਵਾ ਫਲਂ ਵਾ ਨਿਬ੍ਬਤ੍ਤੇਤੁਂ ਨ ਸਕ੍ਕੋਮਿ, ਕਿਂ ਮੇ ਪਬ੍ਬਜ੍ਜਾਯ, ਹੀਨਾਯਾਵਤ੍ਤਿਤ੍ਵਾ ਭੋਗੇ ਚ ਭੁਞ੍ਜਿਸ੍ਸਾਮਿ, ਪੁਞ੍ਞਾਨਿ ਚ ਕਰਿਸ੍ਸਾਮੀ’’ਤਿ ਚਿਨ੍ਤੇਸਿ. ਸਤ੍ਥਾ ਤਸ੍ਸ ਚਿਤ੍ਤਾਚਾਰਂ ਞਤ੍ਵਾ ਤਤ੍ਥ ਗਨ੍ਤ੍ਵਾ ਵੀਣੂਪਮੋਵਾਦੇਨ ਓਵਦਿਤ੍ਵਾ ਵੀਰਿਯਸਮਤਾਯੋਜਨਵਿਧਿਂ ਦਸ੍ਸੇਨ੍ਤੋ ਕਮ੍ਮਟ੍ਠਾਨਂ ਸੋਧੇਤ੍ਵਾ ਗਿਜ੍ਝਕੂਟਂ ਗਤੋ. ਸੋਣਤ੍ਥੇਰੋਪਿ ਸਤ੍ਥੁ ਸਮ੍ਮੁਖਾ ਓਵਾਦਂ ਲਭਿਤ੍ਵਾ ਵੀਰਿਯਸਮਤਂ ਯੋਜੇਤ੍ਵਾ ਵਿਪਸ੍ਸਨਂ ਉਸ੍ਸੁਕ੍ਕਾਪੇਤ੍ਵਾ ਅਰਹਤ੍ਤੇ ਪਤਿਟ੍ਠਾਸਿ. ਤੇਨ ਵੁਤ੍ਤਂ ਅਪਦਾਨੇ (ਅਪ. ਥੇਰ ੧.੫.੨੫-੫੩) –

‘‘ਅਨੋਮਦਸ੍ਸਿਸ੍ਸ ਮੁਨਿਨੋ, ਲੋਕਜੇਟ੍ਠਸ੍ਸ ਤਾਦਿਨੋ;

ਸੁਧਾਯ ਲੇਪਨਂ ਕਤ੍ਵਾ, ਚਙ੍ਕਮਂ ਕਾਰਯਿਂ ਅਹਂ.

‘‘ਨਾਨਾਵਣ੍ਣੇਹਿ ਪੁਪ੍ਫੇਹਿ, ਚਙ੍ਕਮਂ ਸਨ੍ਥਰਿਂ ਅਹਂ;

ਆਕਾਸੇ ਵਿਤਾਨਂ ਕਤ੍ਵਾ, ਭੋਜਯਿਂ ਬੁਦ੍ਧਮੁਤ੍ਤਮਂ.

‘‘ਅਞ੍ਜਲਿਂ ਪਗ੍ਗਹੇਤ੍ਵਾਨ, ਅਭਿਵਾਦੇਤ੍ਵਾਨ ਸੁਬ੍ਬਤਂ;

ਦੀਘਸਾਲਂ ਭਗਵਤੋ, ਨਿਯ੍ਯਾਦੇਸਿਮਹਂ ਤਦਾ.

‘‘ਮਮ ਸਙ੍ਕਪ੍ਪਮਞ੍ਞਾਯ, ਸਤ੍ਥਾ ਲੋਕੇ ਅਨੁਤ੍ਤਰੋ;

ਪਟਿਗ੍ਗਹੇਸਿ ਭਗਵਾ, ਅਨੁਕਮ੍ਪਾਯ ਚਕ੍ਖੁਮਾ.

‘‘ਪਟਿਗ੍ਗਹੇਤ੍ਵਾਨ ਸਮ੍ਬੁਦ੍ਧੋ, ਦਕ੍ਖਿਣੇਯ੍ਯੋ ਸਦੇਵਕੇ;

ਭਿਕ੍ਖੁਸਙ੍ਘੇ ਨਿਸੀਦਿਤ੍ਵਾ, ਇਮਾ ਗਾਥਾ ਅਭਾਸਥ.

‘‘ਯੋ ਸੋ ਹਟ੍ਠੇਨ ਚਿਤ੍ਤੇਨ, ਦੀਘਸਾਲਂ ਅਦਾਸਿ ਮੇ;

ਤਮਹਂ ਕਿਤ੍ਤਯਿਸ੍ਸਾਮਿ, ਸੁਣਾਥ ਮਮ ਭਾਸਤੋ.

‘‘ਇਮਸ੍ਸ ਮਚ੍ਚੁਕਾਲਮ੍ਹਿ, ਪੁਞ੍ਞਕਮ੍ਮਸਮਙ੍ਗਿਨੋ;

ਸਹਸ੍ਸਯੁਤ੍ਤਸ੍ਸਰਥੋ, ਉਪਟ੍ਠਿਸ੍ਸਤਿ ਤਾਵਦੇ.

‘‘ਤੇਨ ਯਾਨੇਨਯਂ ਪੋਸੋ, ਦੇਵਲੋਕਂ ਗਮਿਸ੍ਸਤਿ;

ਅਨੁਮੋਦਿਸ੍ਸਰੇ ਦੇਵਾ, ਸਮ੍ਪਤ੍ਤੇ ਕੁਲਸਮ੍ਭਵੇ.

‘‘ਮਹਾਰਹਂ ਬ੍ਯਮ੍ਹਂ ਸੇਟ੍ਠਂ, ਰਤਨਮਤ੍ਤਿਕਲੇਪਨਂ;

ਕੂਟਾਗਾਰਵਰੂਪੇਤਂ, ਬ੍ਯਮ੍ਹਂ ਅਜ੍ਝਾਵਸਿਸ੍ਸਤਿ.

‘‘ਤਿਂਸਕਪ੍ਪਸਹਸ੍ਸਾਨਿ, ਦੇਵਲੋਕੇ ਰਮਿਸ੍ਸਤਿ;

ਪਞ੍ਚਵੀਸਤਿ ਕਪ੍ਪਾਨਿ, ਦੇਵਰਾਜਾ ਭਵਿਸ੍ਸਤਿ.

‘‘ਸਤ੍ਤਸਤ੍ਤਤਿਕ੍ਖਤ੍ਤੁਞ੍ਚ, ਚਕ੍ਕਵਤ੍ਤੀ ਭਵਿਸ੍ਸਤਿ;

ਯਸੋਧਰਸਨਾਮਾ ਤੇ, ਸਬ੍ਬੇਪਿ ਏਕਨਾਮਕਾ.

‘‘ਦ੍ਵੇ ਸਮ੍ਪਤ੍ਤੀ ਅਨੁਭੋਤ੍ਵਾ, ਵਡ੍ਢੇਤ੍ਵਾ ਪੁਞ੍ਞਸਞ੍ਚਯਂ;

ਅਟ੍ਠਵੀਸਤਿਕਪ੍ਪਮ੍ਹਿ, ਚਕ੍ਕਵਤ੍ਤੀ ਭਵਿਸ੍ਸਤਿ.

‘‘ਤਤ੍ਰਾਪਿ ਬ੍ਯਮ੍ਹਂ ਪਵਰਂ, ਵਿਸ੍ਸਕਮ੍ਮੇਨ ਮਾਪਿਤਂ;

ਦਸਸਦ੍ਦਾਵਿਵਿਤ੍ਤਂ ਤਂ, ਪੁਰਮਜ੍ਝਾਵਸਿਸ੍ਸਤਿ.

‘‘ਅਪਰਿਮੇਯ੍ਯੇ ਇਤੋ ਕਪ੍ਪੇ, ਭੂਮਿਪਾਲੋ ਮਹਿਦ੍ਧਿਕੋ;

ਓਕ੍ਕਾਕੋ ਨਾਮ ਨਾਮੇਨ, ਰਾਜਾ ਰਟ੍ਠੇ ਭਵਿਸ੍ਸਤਿ.

‘‘ਸੋਲ਼ਸਿਤ੍ਥਿਸਹਸ੍ਸਾਨਂ, ਸਬ੍ਬਾਸਂ ਪਵਰਾ ਚ ਸਾ;

ਅਭਿਜਾਤਾ ਖਤ੍ਤਿਯਾਨੀ, ਨਵ ਪੁਤ੍ਤੇ ਜਨੇਸ੍ਸਤਿ.

‘‘ਨਵ ਪੁਤ੍ਤੇ ਜਨੇਤ੍ਵਾਨ, ਖਤ੍ਤਿਯਾਨੀ ਮਰਿਸ੍ਸਤਿ;

ਤਰੁਣੀ ਚ ਪਿਯਾ ਕਞ੍ਞਾ, ਮਹੇਸਿਤ੍ਤਂ ਕਰਿਸ੍ਸਤਿ.

‘‘ਓਕ੍ਕਾਕਂ ਤੋਸਯਿਤ੍ਵਾਨ, ਵਰਂ ਕਞ੍ਞਾ ਲਭਿਸ੍ਸਤਿ;

ਵਰਂ ਲਦ੍ਧਾਨ ਸਾ ਕਞ੍ਞਾ, ਪੁਤ੍ਤੇ ਪਬ੍ਬਾਜਯਿਸ੍ਸਤਿ.

‘‘ਪਬ੍ਬਾਜਿਤਾ ਚ ਤੇ ਸਬ੍ਬੇ, ਗਮਿਸ੍ਸਨ੍ਤਿ ਨਗੁਤ੍ਤਮਂ;

ਜਾਤਿਭੇਦਭਯਾ ਸਬ੍ਬੇ, ਭਗਿਨੀਹਿ ਵਸਿਸ੍ਸਰੇ.

‘‘ਏਕਾ ਚ ਕਞ੍ਞਾ ਬ੍ਯਾਧੀਹਿ, ਭਵਿਸ੍ਸਤਿ ਪਰਿਕ੍ਖਤਾ;

ਮਾ ਨੋ ਜਾਤਿ ਪਭਿਜ੍ਜੀਤਿ, ਨਿਖਣਿਸ੍ਸਨ੍ਤਿ ਖਤ੍ਤਿਯਾ.

‘‘ਖਤ੍ਤਿਯੋ ਨੀਹਰਿਤ੍ਵਾਨ, ਤਾਯ ਸਦ੍ਧਿਂ ਵਸਿਸ੍ਸਤਿ;

ਭਵਿਸ੍ਸਤਿ ਤਦਾ ਭੇਦੋ, ਓਕ੍ਕਾਕਕੁਲਸਮ੍ਭਵੋ.

‘‘ਤੇਸਂ ਪਜਾ ਭਵਿਸ੍ਸਨ੍ਤਿ, ਕੋਲ਼ਿਯਾ ਨਾਮ ਜਾਤਿਯਾ;

ਤਤ੍ਥ ਮਾਨੁਸਕਂ ਭੋਗਂ, ਅਨੁਭੋਸ੍ਸਤਿਨਪ੍ਪਕਂ.

‘‘ਤਮ੍ਹਾ ਕਾਯਾ ਚਵਿਤ੍ਵਾਨ, ਦੇਵਲੋਕਂ ਗਮਿਸ੍ਸਤਿ;

ਤਤ੍ਰਾਪਿ ਪਵਰਂ ਬ੍ਯਮ੍ਹਂ, ਲਭਿਸ੍ਸਤਿ ਮਨੋਰਮਂ.

‘‘ਦੇਵਲੋਕਾ ਚਵਿਤ੍ਵਾਨ, ਸੁਕ੍ਕਮੂਲੇਨ ਚੋਦਿਤੋ;

ਆਗਨ੍ਤ੍ਵਾਨ ਮਨੁਸ੍ਸਤ੍ਤਂ, ਸੋਣੋ ਨਾਮ ਭਵਿਸ੍ਸਤਿ.

‘‘ਆਰਦ੍ਧਵੀਰਿਯੋ ਪਹਿਤਤ੍ਤੋ, ਪਦਹਂ ਸਤ੍ਥੁ ਸਾਸਨੇ;

ਸਬ੍ਬਾਸਵੇ ਪਰਿਞ੍ਞਾਯ, ਨਿਬ੍ਬਾਯਿਸ੍ਸਤਿਨਾਸਵੋ.

‘‘ਅਨਨ੍ਤਦਸ੍ਸੀ ਭਗਵਾ, ਗੋਤਮੋ ਸਕ੍ਯਪੁਙ੍ਗਵੋ;

ਵਿਸੇਸਞ੍ਞੂ ਮਹਾਵੀਰੋ, ਅਗ੍ਗਟ੍ਠਾਨੇ ਠਪੇਸ੍ਸਤਿ.

‘‘ਵੁਟ੍ਠਮ੍ਹਿ ਦੇਵੇ ਚਤੁਰਙ੍ਗੁਲਮ੍ਹਿ, ਤਿਣੇ ਅਨਿਲੇਰਿਤਅਙ੍ਗਣਮ੍ਹਿ;

ਠਤ੍ਵਾਨ ਯੋਗਸ੍ਸ ਪਯੁਤ੍ਤਤਾਦਿਨੋ, ਤਤੋਤ੍ਤਰਿਂ ਪਾਰਮਤਾ ਨ ਵਿਜ੍ਜਤਿ.

‘‘ਉਤ੍ਤਮੇ ਦਮਥੇ ਦਨ੍ਤੋ, ਚਿਤ੍ਤਂ ਮੇ ਸੁਪਣੀਹਿਤਂ;

ਭਾਰੋ ਮੇ ਓਹਿਤੋ ਸਬ੍ਬੋ, ਨਿਬ੍ਬੁਤੋਮ੍ਹਿ ਅਨਾਸਵੋ.

‘‘ਅਙ੍ਗੀਰਸੋ ਮਹਾਨਾਗੋ, ਅਭਿਜਾਤੋਵ ਕੇਸਰੀ;

ਭਿਕ੍ਖੁਸਙ੍ਘੇ ਨਿਸੀਦਿਤ੍ਵਾ, ਏਤਦਗ੍ਗੇ ਠਪੇਸਿ ਮਂ.

‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨ’’ਨ੍ਤਿ.

ਅਰਹਤ੍ਤਂ ਪਨ ਪਤ੍ਵਾ ਅਤ੍ਤਨੋ ਪਟਿਪਤ੍ਤਿਂ ਪਚ੍ਚਵੇਕ੍ਖਿਤ੍ਵਾ ਉਦਾਨਵਸੇਨ ਅਞ੍ਞਾਬ੍ਯਾਕਰਣਵਸੇਨ ਚ –

੬੩੨. ‘‘ਯਾਹੁ ਰਟ੍ਠੇ ਸਮੁਕ੍ਕਟ੍ਠੋ, ਰਞ੍ਞੋ ਅਙ੍ਗਸ੍ਸ ਪਦ੍ਧਗੂ;

ਸ੍ਵਾਜ੍ਜ ਧਮ੍ਮੇਸੁ ਉਕ੍ਕਟ੍ਠੋ, ਸੋਣੋ ਦੁਕ੍ਖਸ੍ਸ ਪਾਰਗੂ.

੬੩੩. ‘‘ਪਞ੍ਚ ਛਿਨ੍ਦੇ ਪਞ੍ਚ ਜਹੇ, ਪਞ੍ਚ ਚੁਤ੍ਤਰਿ ਭਾਵਯੇ;

ਪਞ੍ਚਸਙ੍ਗਾਤਿਗੋ ਭਿਕ੍ਖੁ, ਓਘਤਿਣ੍ਣੋਤਿ ਵੁਚ੍ਚਤਿ.

੬੩੪. ‘‘ਉਨ੍ਨਲ਼ਸ੍ਸ ਪਮਤ੍ਤਸ੍ਸ, ਬਾਹਿਰਾਸਸ੍ਸ ਭਿਕ੍ਖੁਨੋ;

ਸੀਲਂ ਸਮਾਧਿ ਪਞ੍ਞਾ ਚ, ਪਾਰਿਪੂਰਿਂ ਨ ਗਚ੍ਛਤਿ.

੬੩੫. ‘‘ਯਞ੍ਹਿ ਕਿਚ੍ਚਂ ਅਪਵਿਦ੍ਧਂ, ਅਕਿਚ੍ਚਂ ਪਨ ਕਰੀਯਤਿ;

ਉਨ੍ਨਲ਼ਾਨਂ ਪਮਤ੍ਤਾਨਂ, ਤੇਸਂ ਵਡ੍ਢਨ੍ਤਿ ਆਸਵਾ.

੬੩੬. ‘‘ਯੇਸਞ੍ਚ ਸੁਸਮਾਰਦ੍ਧਾ, ਨਿਚ੍ਚਂ ਕਾਯਗਤਾ ਸਤਿ;

ਅਕਿਚ੍ਚਂ ਤੇ ਨ ਸੇਵਨ੍ਤਿ, ਕਿਚ੍ਚੇ ਸਾਤਚ੍ਚਕਾਰਿਨੋ;

ਸਤਾਨਂ ਸਮ੍ਪਜਾਨਾਨਂ, ਅਤ੍ਥਂ ਗਚ੍ਛਨ੍ਤਿ ਆਸਵਾ.

੬੩੭. ‘‘ਉਜੁਮਗ੍ਗਮ੍ਹਿ ਅਕ੍ਖਾਤੇ, ਗਚ੍ਛਥ ਮਾ ਨਿਵਤ੍ਤਥ;

ਅਤ੍ਤਨਾ ਚੋਦਯਤ੍ਤਾਨਂ, ਨਿਬ੍ਬਾਨਮਭਿਹਾਰਯੇ.

੬੩੮. ‘‘ਅਚ੍ਚਾਰਦ੍ਧਮ੍ਹਿ ਵੀਰਿਯਮ੍ਹਿ, ਸਤ੍ਥਾ ਲੋਕੇ ਅਨੁਤ੍ਤਰੋ;

ਵੀਣੋਪਮਂ ਕਰਿਤ੍ਵਾ ਮੇ, ਧਮ੍ਮਂ ਦੇਸੇਤਿ ਚਕ੍ਖੁਮਾ;

ਤਸ੍ਸਾਹਂ ਵਚਨਂ ਸੁਤ੍ਵਾ, ਵਿਹਾਸਿਂ ਸਾਸਨੇ ਰਤੋ.

੬੩੯. ‘‘ਸਮਥਂ ਪਟਿਪਾਦੇਸਿਂ, ਉਤ੍ਤਮਤ੍ਥਸ੍ਸ ਪਤ੍ਤਿਯਾ;

ਤਿਸ੍ਸੋ ਵਿਜ੍ਜਾ ਅਨੁਪ੍ਪਤ੍ਤਾ, ਕਤਂ ਬੁਦ੍ਧਸ੍ਸ ਸਾਸਨਂ.

੬੪੦. ‘‘ਨੇਕ੍ਖਮ੍ਮੇ ਅਧਿਮੁਤ੍ਤਸ੍ਸ, ਪਵਿਵੇਕਞ੍ਚ ਚੇਤਸੋ;

ਅਬ੍ਯਾਬਜ੍ਝਾਧਿਮੁਤ੍ਤਸ੍ਸ, ਉਪਾਦਾਨਕ੍ਖਯਸ੍ਸ ਚ.

੬੪੧. ‘‘ਤਣ੍ਹਕ੍ਖਯਾਧਿਮੁਤ੍ਤਸ੍ਸ, ਅਸਮ੍ਮੋਹਞ੍ਚ ਚੇਤਸੋ;

ਦਿਸ੍ਵਾ ਆਯਤਨੁਪ੍ਪਾਦਂ, ਸਮ੍ਮਾ ਚਿਤ੍ਤਂ ਵਿਮੁਚ੍ਚਤਿ.

੬੪੨. ‘‘ਤਸ੍ਸ ਸਮ੍ਮਾ ਵਿਮੁਤ੍ਤਸ੍ਸ, ਸਨ੍ਤਚਿਤ੍ਤਸ੍ਸ ਭਿਕ੍ਖੁਨੋ;

ਕਤਸ੍ਸ ਪਤਿਚਯੋ ਨਤ੍ਥਿ, ਕਰਣੀਯਂ ਨ ਵਿਜ੍ਜਤਿ.

੬੪੩. ‘‘ਸੇਲੋ ਯਥਾ ਏਕਘਨੋ, ਵਾਤੇਨ ਨ ਸਮੀਰਤਿ;

ਏਵਂ ਰੂਪਾ ਰਸਾ ਸਦ੍ਦਾ, ਗਨ੍ਧਾ ਫਸ੍ਸਾ ਚ ਕੇਵਲਾ.

੬੪੪. ‘‘ਇਟ੍ਠਾ ਧਮ੍ਮਾ ਅਨਿਟ੍ਠਾ ਚ, ਨਪ੍ਪਵੇਧੇਨ੍ਤਿ ਤਾਦਿਨੋ;

ਠਿਤਂ ਚਿਤ੍ਤਂ ਵਿਸਞ੍ਞੁਤ੍ਤਂ, ਵਯਞ੍ਚਸ੍ਸਾਨੁਪਸ੍ਸਤੀ’’ਤਿ. – ਇਮਾ ਗਾਥਾ ਅਭਾਸਿ;

ਤਤ੍ਥ ਯਾਹੁ ਰਟ੍ਠੇ ਸਮੁਕ੍ਕਟ੍ਠੋਤਿ ਯੋ ਅਹੁ ਅਹੋਸਿ ਅਙ੍ਗਰਟ੍ਠੇ ਅਸੀਤਿਯਾ ਗਾਮਿਕਸਹਸ੍ਸੇਹਿ ਭੋਗਸਮ੍ਪਤ੍ਤਿਯਾ ਇਸ੍ਸਰਿਯਸਮ੍ਪਤ੍ਤਿਯਾ ਚ ਸਮ੍ਮਾ ਅਤਿਵਿਯ ਉਕ੍ਕਟ੍ਠੋ ਸੇਟ੍ਠੋ. ਰਞ੍ਞੋ ਅਙ੍ਗਸ੍ਸ ਪਦ੍ਧਗੂਤਿ ਚਤੂਹਿ ਸਙ੍ਗਹਵਤ੍ਥੂਹਿ ਪਰਿਸਾਯ ਰਞ੍ਜਨਟ੍ਠੇਨ ਰਞ੍ਞੋ ਅਙ੍ਗਾਧਿਪਤਿਨੋ ਬਿਮ੍ਬਿਸਾਰਸ੍ਸ ਪਰਿਵਾਰਭੂਤੋ ਗਹਪਤਿਵਿਸੇਸੋ ਤਸ੍ਸ ਰਟ੍ਠੇ ਕੁਟੁਮ੍ਬਿਕੋ ਅਹੂਤਿ ਯੋਜੇਤਬ੍ਬਂ. ਸ੍ਵਾਜ੍ਜ ਧਮ੍ਮੇਸੁ ਉਕ੍ਕਟ੍ਠੋਤਿ ਸੋ ਸੋਣੋ ਅਜ੍ਜੇਤਰਹਿ ਲੋਕੁਤ੍ਤਰਧਮ੍ਮੇਸੁ ਉਕ੍ਕਟ੍ਠੋ ਜਾਤੋ, ਗਿਹਿਕਾਲੇਪਿ ਕੇਹਿਚਿ ਉਕ੍ਕਟ੍ਠੋਯੇਵ ਹੁਤ੍ਵਾ ਇਦਾਨਿ ਪਬ੍ਬਜਿਤਕਾਲੇਪਿ ਉਕ੍ਕਟ੍ਠੋਯੇਵ ਹੋਤੀਤਿ ਅਤ੍ਤਾਨਮੇਵ ਪਰਂ ਵਿਯ ਦਸ੍ਸੇਤਿ. ਦੁਕ੍ਖਸ੍ਸ ਪਾਰਗੂਤਿ ਸਕਲਸ੍ਸ ਵਟ੍ਟਦੁਕ੍ਖਸ੍ਸ ਪਾਰਂ ਪਰਿਯਨ੍ਤਂ ਗਤੋ, ਏਤੇਨ ਧਮ੍ਮੇਸੁ ਉਕ੍ਕਟ੍ਠੋਤਿ ਅਵਿਸੇਸੇਨ ਵੁਤ੍ਤਂ ਉਕ੍ਕਟ੍ਠਭਾਵਂ ਵਿਸੇਸੇਤਿ ਅਰਹਤ੍ਤਾਧਿਗਮਦੀਪਨਤੋ.

ਇਦਾਨਿ ਯਾਯ ਪਟਿਪਤ੍ਤਿਯਾ ਦੁਕ੍ਖਪਾਰਗੂ ਜਾਤੋ, ਅਞ੍ਞਾਪਦੇਸੇਨ ਤਂ ਦਸ੍ਸੇਨ੍ਤੋ ‘‘ਪਞ੍ਚ ਛਿਨ੍ਦੇ’’ਤਿ ਗਾਥਮਾਹ. ਤਸ੍ਸਤ੍ਥੋ – ਅਪਾਯਕਾਮਸੁਗਤਿਸਮ੍ਪਾਪਕਾਨਿ ਪਞ੍ਚੋਰਮ੍ਭਾਗਿਯਾਨਿ ਸਂਯੋਜਨਾਨਿ ਪੁਰਿਸੋ ਸਤ੍ਥੇਨ ਪਾਦੇ ਬਦ੍ਧਰਜ੍ਜੁਕਂ ਵਿਯ ਹੇਟ੍ਠਿਮੇਨ ਮਗ੍ਗਤ੍ਤਯੇਨ ਛਿਨ੍ਦੇਯ੍ਯ, ਰੂਪਾਰੂਪਭਵਸਮ੍ਪਾਪਕਾਨਿ ਪਞ੍ਚ ਉਦ੍ਧਮ੍ਭਾਗਿਯਾਨਿ ਸਂਯੋਜਨਾਨਿ ਪੁਰਿਸੋ ਗੀਵਾਯ ਬਦ੍ਧਰਜ੍ਜੁਕਂ ਵਿਯ ਅਗ੍ਗਮਗ੍ਗੇਨ ਜਹੇਯ੍ਯ, ਛਿਨ੍ਦੇਯ੍ਯ, ਤੇਸਂ ਪਨ ਉਦ੍ਧਮ੍ਭਾਗਿਯਸਂਯੋਜਨਾਨਂ ਪਹਾਨਾਯ ਪਞ੍ਚ ਸਦ੍ਧਾਦੀਨਿ ਇਨ੍ਦ੍ਰਿਯਾਨਿ ਉਤ੍ਤਰਿ ਭਾਵਯੇ ਭਾਵੇਯ੍ਯ. ਏਵਂਭੂਤੋ ਪਨ ਭਿਕ੍ਖੁ ਰਾਗਸਙ੍ਗੋ ਦੋਸਮੋਹਮਾਨਦਿਟ੍ਠਿਸਙ੍ਗੋਤਿ ਪਞ੍ਚਨ੍ਨਂ ਸਙ੍ਗਾਨਂ ਅਤਿਕ੍ਕਮਨੇਨ ਪਞ੍ਚਸਙ੍ਗਾਤਿਗੋ ਹੁਤ੍ਵਾ, ਕਾਮੋਘੋ, ਭਵੋਘੋ, ਦਿਟ੍ਠੋਘੋ, ਅਵਿਜ੍ਜੋਘੋਤਿ ਚਤੁਨ੍ਨਂ ਓਘਾਨਂ ਤਿਣ੍ਣਤ੍ਤਾ ਓਘਤਿਣ੍ਣੋਤਿ ਵੁਚ੍ਚਤਿ.

ਅਯਞ੍ਚ ਓਘਤਰਣਪਟਿਪਤ੍ਤਿਸੀਲਾਦੀਨਂ ਪਾਰਿਪੂਰਿਯਾਵ ਹੋਤਿ, ਸੀਲਾਦਯੋ ਚ ਮਾਨਾਦਿਪ੍ਪਹਾਨੇਨ ਪਾਰਿਪੂਰਿਂ ਗਚ੍ਛਨ੍ਤਿ, ਨ ਅਞ੍ਞਥਾਤਿ ਦਸ੍ਸੇਨ੍ਤੋ ‘‘ਉਨ੍ਨਲ਼ਸ੍ਸਾ’’ਤਿ ਗਾਥਮਾਹ. ਤਤ੍ਥ ਉਨ੍ਨਲ਼ਸ੍ਸਾਤਿ ਉਗ੍ਗਤਤੁਚ੍ਛਮਾਨਸ੍ਸ. ਮਾਨੋ ਹਿ ਉਨ੍ਨਮਨਾਕਾਰਵੁਤ੍ਤਿਯਾ ਤੁਚ੍ਛਭਾਵੇਨ ਨਲ਼ੋ ਵਿਯਾਤਿ ‘‘ਨਲ਼ੋ’’ਤਿ ਵੁਚ੍ਚਤਿ. ਪਮਤ੍ਤਸ੍ਸਾਤਿ ਸਤਿਵੋਸ੍ਸਗ੍ਗੇਨ ਪਮਾਦਂ ਆਪਨ੍ਨਸ੍ਸ. ਬਾਹਿਰਾਸਸ੍ਸਾਤਿ ਬਾਹਿਰੇਸੁ ਆਯਤਨੇਸੁ ਆਸਾਵਤੋ, ਕਾਮੇਸੁ ਅਵੀਤਰਾਗਸ੍ਸਾਤਿ ਅਤ੍ਥੋ. ਸੀਲਂ ਸਮਾਧਿ ਪਞ੍ਞਾ ਚ, ਪਾਰਿਪੂਰਿਂ ਨ ਗਚ੍ਛਤੀਤਿ ਤਸ੍ਸ ਸੀਲਾਦੀਨਂ ਪਟਿਪਕ੍ਖਸੇਵਿਨੋ ਲੋਕਿਯੋਪਿ ਤਾਵ ਸੀਲਾਦਿਗੁਣੋ ਪਾਰਿਪੂਰਿਂ ਨ ਗਚ੍ਛਤਿ, ਪਗੇਵ ਲੋਕੁਤ੍ਤਰੋ.

ਤਤ੍ਥ ਕਾਰਣਮਾਹ ‘‘ਯਞ੍ਹਿ ਕਿਚ੍ਚ’’ਨ੍ਤਿਆਦਿਨਾ. ਭਿਕ੍ਖੁਨੋ ਹਿ ਪਬ੍ਬਜਿਤਕਾਲਤੋ ਪਟ੍ਠਾਯ ਅਪਰਿਮਾਣਸੀਲਕ੍ਖਨ੍ਧਗੋਪਨਂ ਅਰਞ੍ਞਵਾਸੋ ਧੁਤਙ੍ਗਪਰਿਹਰਣਂ ਭਾਵਨਾਰਾਮਤਾਤਿ ਏਵਮਾਦਿ ਕਿਚ੍ਚਂ ਨਾਮ. ਯੇਹਿ ਪਨ ਇਦਂ ਯਥਾਵੁਤ੍ਤਂ ਅਤ੍ਤਨੋ ਕਿਚ੍ਚਂ, ਤਂ ਅਪਵਿਦ੍ਧਂ ਅਕਰਣੇਨ ਛਡ੍ਡਿਤਂ. ਅਕਿਚ੍ਚਨ੍ਤਿ ਪਤ੍ਤਮਣ੍ਡਨਂ ਚੀਵਰਕਾਯਬਨ੍ਧਨਅਂਸਬਦ੍ਧਛਤ੍ਤੁਪਾਹਨਤਾਲਵਣ੍ਟਧਮ੍ਮਕਰਣਮਣ੍ਡਨਨ੍ਤਿ ਏਵਮਾਦਿ ਪਰਿਕ੍ਖਾਰਮਣ੍ਡਨਂ ਪਚ੍ਚਯਬਾਹੁਲਿਯਨ੍ਤਿ ਏਵਮਾਦਿ ਭਿਕ੍ਖੁਨੋ ਅਕਿਚ੍ਚਂ ਨਾਮ, ਤਂ ਕਯਿਰਤਿ, ਤੇਸਂ ਮਾਨਨਲ਼ਂ ਉਕ੍ਖਿਪਿਤ੍ਵਾ ਚਰਣੇਨ ਉਨ੍ਨਲ਼ਾਨਂ ਸਤਿਵੋਸ੍ਸਗ੍ਗੇਨ ਪਮਤ੍ਤਾਨਂ ਚਤ੍ਤਾਰੋਪਿ ਆਸਵਾ ਵਡ੍ਢਨ੍ਤਿ.

ਯੇਸਂ ਪਨ ਪਞ੍ਞਾਦਿਗੁਣੋ ਵਡ੍ਢਤਿ, ਤੇ ਦਸ੍ਸੇਤੁਂ ‘‘ਯੇਸ’’ਨ੍ਤਿਆਦਿ ਵੁਤ੍ਤਂ. ਤਤ੍ਥ ਸੁਸਮਾਰਦ੍ਧਾਤਿ ਸੁਟ੍ਠੁ ਪਗ੍ਗਹਿਤਾ. ਕਾਯਗਤਾ ਸਤੀਤਿ, ਕਾਯਾਨੁਪਸ੍ਸਨਾਭਾਵਨਾ. ਅਕਿਚ੍ਚਂ ਤੇਤਿ ਤੇ ਏਤਂ ਪਤ੍ਤਮਣ੍ਡਨਾਦਿਅਕਿਚ੍ਚਂ. ਨ ਸੇਵਨ੍ਤੀਤਿ ਨ ਕਰੋਨ੍ਤਿ. ਕਿਚ੍ਚੇਤਿ, ਪਬ੍ਬਜਿਤਕਾਲਤੋ ਪਟ੍ਠਾਯ ਕਤ੍ਤਬ੍ਬੇ ਅਪਰਿਮਾਣਸੀਲਕ੍ਖਨ੍ਧਗੋਪਨਾਦਿਕੇ. ਸਾਤਚ੍ਚਕਾਰਿਨੋਤਿ ਸਤਤਕਾਰਿਨੋ ਤੇਸਂ ਸਤਿਯਾ ਅਵਿਪ੍ਪਵਾਸੇਨ ਸਤਾਨਂ ਸਾਤ੍ਥਕਸਮ੍ਪਜਞ੍ਞਂ, ਸਪ੍ਪਾਯਸਮ੍ਪਜਞ੍ਞਂ, ਗੋਚਰਸਮ੍ਪਜਞ੍ਞਂ, ਅਸਮ੍ਮੋਹਸਮ੍ਪਜਞ੍ਞਨ੍ਤਿ ਚਤੂਹਿ ਸਮ੍ਪਜਞ੍ਞੇਹਿ ਸਮ੍ਪਜਾਨਾਨਂ, ਚਤ੍ਤਾਰੋਪਿ ਆਸਵਾ ਅਤ੍ਥਂ ਗਚ੍ਛਨ੍ਤਿ ਪਰਿਕ੍ਖਯਂ ਅਭਾਵਂ ਗਚ੍ਛਨ੍ਤੀਤਿ ਅਤ੍ਥੋ.

ਇਦਾਨਿ ਅਤ੍ਤਨੋ ਸਨ੍ਤਿਕੇ ਠਿਤਭਿਕ੍ਖੂਨਂ ਓਵਾਦਂ ਦੇਨ੍ਤੋ ‘‘ਉਜੁਮਗ੍ਗਮ੍ਹੀ’’ਤਿ ਗਾਥਮਾਹ. ਤਤ੍ਥ ਉਜੁਮਗ੍ਗਮ੍ਹਿ ਅਕ੍ਖਾਤੇਤਿ ਅਨ੍ਤਦ੍ਵਯਪਰਿਵਜ੍ਜਨੇਨ ਕਾਯਵਙ੍ਕਾਦਿਪ੍ਪਹਾਨੇਨ ਚ ਉਜੁਕੇ ਮਜ੍ਝਿਮਪਟਿਪਦਾਭੂਤੇ ਅਰਿਯਮਗ੍ਗੇ ਸਤ੍ਥਾਰਾ ਭਾਸਿਤੇ. ਗਚ੍ਛਥਾਤਿ ਪਟਿਪਜ੍ਜਥ. ਮਾ ਨਿਵਤ੍ਤਥਾਤਿ ਅਨ੍ਤਰਾ ਵੋਸਾਨਂ ਮਾਪਜ੍ਜਥ. ਅਤ੍ਤਨਾ ਚੋਦਯਤ੍ਤਾਨਨ੍ਤਿ ਇਧ ਅਤ੍ਥਕਾਮੋ ਕੁਲਪੁਤ੍ਤੋ ਅਪਾਯਭਯਪਚ੍ਚਵੇਕ੍ਖਣਾਦਿਨਾ ਅਤ੍ਤਨਾਵ ਅਤ੍ਤਾਨਂ ਚੋਦੇਨ੍ਤੋ. ਨਿਬ੍ਬਾਨਮਭਿਹਾਰਯੇਤਿ, ਅਤ੍ਤਾਨਂ ਨਿਬ੍ਬਾਨਂ ਅਭਿਹਰੇਯ੍ਯ ਉਪਨੇਯ੍ਯ, ਯਥਾ ਨਂ ਸਚ੍ਛਿਕਰੋਤਿ, ਤਥਾ ਪਟਿਪਜ੍ਜੇਯ੍ਯਾਤਿ ਅਤ੍ਥੋ.

ਇਦਾਨਿ ਮਯਾਪਿ ਏਵਮੇਵ ਪਟਿਪਨ੍ਨਨ੍ਤਿ, ਅਤ੍ਤਨੋ ਪਟਿਪਤ੍ਤਿਂ ਦਸ੍ਸੇਤੁਂ ‘‘ਅਚ੍ਚਾਰਦ੍ਧਮ੍ਹੀ’’ਤਿਆਦਿ ਵੁਤ੍ਤਂ. ਅਚ੍ਚਾਰਦ੍ਧਮ੍ਹਿ ਵੀਰਿਯਮ੍ਹੀਤਿ ਵਿਪਸ੍ਸਨਂ ਭਾਵੇਨ੍ਤੇਨ ਮਯਾ ਸਮਾਧਿਨਾ ਵੀਰਿਯਂ ਸਮਰਸਂ ਅਕਤ੍ਵਾ ਅਤਿਵਿਯ ਵੀਰਿਯੇ ਪਗ੍ਗਹਿਤੇ. ਅਚ੍ਚਾਰਦ੍ਧਵੀਰਿਯਤਾ ਚਸ੍ਸ ਹੇਟ੍ਠਾ ਵੁਤ੍ਤਾਯੇਵ. ਵੀਣੋਪਮਂ ਕਰਿਤ੍ਵਾ ਮੇਤਿ ਆਯਸ੍ਮਤੋ ਸੋਣਸ੍ਸ ‘‘ਯੇ ਖੋ ਕੇਚਿ ਭਗਵਤੋ ਸਾਵਕਾ ਆਰਦ੍ਧਵੀਰਿਯਾ ਵਿਹਰਨ੍ਤਿ. ਅਹਂ ਤੇਸਂ ਅਞ੍ਞਤਰੋ, ਅਥ ਚ ਪਨ ਮੇ ਨਾਨੁਪਾਦਾਯ ਆਸਵੇਹਿ ਚਿਤ੍ਤਂ ਵਿਮੁਚ੍ਚਤਿ, ਤਸ੍ਮਾਹਂ ਵਿਬ੍ਭਮਿਸ੍ਸਾਮੀ’’ਤਿ ਚਿਤ੍ਤੇ ਉਪ੍ਪਨ੍ਨੇ ਸਤ੍ਥਾ ਇਦ੍ਧਿਯਾ ਤਸ੍ਸ ਸਮ੍ਮੁਖੇ ਅਤ੍ਤਾਨਂ ਦਸ੍ਸੇਤ੍ਵਾ ‘‘ਕਸ੍ਮਾ ਤ੍ਵਂ, ਸੋਣ, ‘ਵਿਬ੍ਭਮਿਸ੍ਸਾਮੀ’ਤਿ ਚਿਤ੍ਤਂ ਉਪ੍ਪਾਦੇਸਿ, ਕੁਸਲੋ ਤ੍ਵਂ ਪੁਬ੍ਬੇ ਅਗਾਰਿਯਭੂਤੋ ਵੀਣਾਯ ਤਨ੍ਤਿਸ੍ਸਰੇ’’ਤਿ ਪੁਚ੍ਛਿਤ੍ਵਾ ਤੇਨ ‘‘ਏਵਂ, ਭਨ੍ਤੇ’’ਤਿ ਵੁਤ੍ਤੇ ‘‘ਤਂ ਕਿਂ ਮਞ੍ਞਸਿ, ਸੋਣ? ਯਦਾ ਤੇ ਵੀਣਾਯ ਤਨ੍ਤਿਯੋ ਅਚ੍ਚਾਯਤਾ ਹੋਨ੍ਤਿ, ਅਪਿ ਨੁ ਤੇ ਵੀਣਾ ਤਸ੍ਮਿਂ ਸਮਯੇ ਸਰਵਤੀ ਵਾ ਹੋਤਿ ਕਮ੍ਮਞ੍ਞਾ ਵਾਤਿ? ਨੋ ਹੇਤਂ, ਭਨ੍ਤੇ! ਤਂ ਕਿਂ ਮਞ੍ਞਸਿ, ਸੋਣ, ਯਦਾ ਤੇ ਵੀਣਾਯ ਤਨ੍ਤਿਯੋ ਅਤਿਸਿਥਿਲਾ ਹੋਨ੍ਤਿ, ਅਪਿ ਨੁ ਤੇ ਵੀਣਾ ਤਸ੍ਮਿਂ ਸਮਯੇ ਸਰਵਤੀ ਵਾ ਹੋਤਿ ਕਮ੍ਮਞ੍ਞਾ ਵਾਤਿ? ਨੋ ਹੇਤਂ, ਭਨ੍ਤੇ. ਤਂ ਕਿਂ ਮਞ੍ਞਸਿ, ਸੋਣ, ਯਦਾ ਪਨ ਤੇ ਵੀਣਾਯ ਤਨ੍ਤਿਯੋ ਨੇਵ ਅਚ੍ਚਾਯਤਾ ਹੋਨ੍ਤਿ, ਨਾਤਿਸਿਥਿਲਾ ਸਮੇ ਗੁਣੇ ਪਤਿਟ੍ਠਿਤਾ, ਅਪਿ ਨੁ ਤੇ ਵੀਣਾ ਤਸ੍ਮਿਂ ਸਮਯੇ ਸਰਵਤੀ ਵਾ ਹੋਤਿ ਕਮ੍ਮਞ੍ਞਾ ਵਾਤਿ? ਏਵਂ, ਭਨ੍ਤੇ. ਏਵਮੇਵ ਖੋ, ਸੋਣ, ਅਚ੍ਚਾਰਦ੍ਧਵੀਰਿਯਂ ਉਦ੍ਧਚ੍ਚਾਯ ਸਂਵਤ੍ਤਤਿ, ਅਤਿਲੀਨਵੀਰਿਯਂ ਕੋਸਜ੍ਜਾਯ ਸਂਵਤ੍ਤਤਿ, ਤਸ੍ਮਾਤਿਹ ਤ੍ਵਂ, ਸੋਣ, ਵੀਰਿਯਸਮਤਂ ਅਧਿਟ੍ਠਹ, ਇਨ੍ਦ੍ਰਿਯਾਨਞ੍ਚ ਸਮਤਂ ਪਟਿਵਿਜ੍ਝਾ’’ਤਿ ਏਵਂ ਵੀਣਂ ਉਪਮਂ ਕਤ੍ਵਾ ਪਵਤ੍ਤਿਤੇਨ ਵੀਣੋਪਮੋਵਾਦੇਨ ਮਯ੍ਹਂ ਧਮ੍ਮਂ ਦੇਸੇਸਿ. ਤਸ੍ਸਾਹਂ ਵਚਨਂ ਸੁਤ੍ਵਾਤਿ ਤਸ੍ਸ ਭਗਵਤੋ ਵਚਨਂ ਵੀਣੋਪਮੋਵਾਦਂ ਸੁਤ੍ਵਾ ਅਨ੍ਤਰਾ ਉਪ੍ਪਨ੍ਨਂ ਵਿਬ੍ਭਮਿਤੁਕਾਮਤਂ ਪਹਾਯ ਸਤ੍ਥੁ ਸਾਸਨੇ ਰਤੋ ਅਭਿਰਤੋ ਵਿਹਰਿਂ.

ਵਿਹਰਨ੍ਤੋ ਚ ਸਮਥਂ ਪਟਿਪਾਦੇਸਿਂ ਵੀਰਿਯਸਮਤਂ ਯੋਜੇਨ੍ਤੋ ਸਦ੍ਧਾਪਞ੍ਞਾਨਂ ਵਿਯ ਸਮਾਧਿਵੀਰਿਯਾਨਂ ਸਮਰਸਤਂ ਉਪ੍ਪਾਦੇਨ੍ਤੋ ਝਾਨਾਧਿਟ੍ਠਾਨਂ ਵਿਪਸ੍ਸਨਾਸਮਾਧਿਂ ਸਮ੍ਪਾਦੇਸਿਂ ਵਿਪਸ੍ਸਨਂ ਉਸ੍ਸੁਕ੍ਕਾਪੇਸਿਂ. ਤਤ੍ਥ ਪਯੋਜਨਂ ਆਹ ‘‘ਉਤ੍ਤਮਤ੍ਥਸ੍ਸ ਪਤ੍ਤਿਯਾ’’ਤਿ. ਉਤ੍ਤਮਤ੍ਥਸ੍ਸ ਪਤ੍ਤਿਯਾਤਿ ਅਰਹਤ੍ਤਾਧਿਗਮਾਯਾਤਿ ਅਤ੍ਥੋ.

ਇਦਾਨਿ ਯਥਾ ਪਟਿਪਨ੍ਨਸ੍ਸ ਸਮਥਵਿਪਸ੍ਸਨਾ ਸਮ੍ਪਜ੍ਜਿਂਸੁ, ਤਂ ਅਞ੍ਞਾਪਦੇਸੇਨ ਦਸ੍ਸੇਨ੍ਤੋ ‘‘ਨੇਕ੍ਖਮ੍ਮੇ’’ਤਿਆਦਿਮਾਹ. ਤਤ੍ਥ ਨੇਕ੍ਖਮ੍ਮੇਤਿ ਪਬ੍ਬਜ੍ਜਾਦਿਕੇ ਕਾਮਨਿਸ੍ਸਰਣੇ. ਅਧਿਮੁਤ੍ਤਸ੍ਸਾਤਿ ਤਤ੍ਥ ਨਿਨ੍ਨਪੋਣਪਬ੍ਭਾਰਭਾਵੇਨ ਯੁਤ੍ਤਪ੍ਪਯੁਤ੍ਤਸ੍ਸ, ਪਠਮਂ ਤਾਵ ਪਬ੍ਬਜ੍ਜਾਭਿਮੁਖੋ ਹੁਤ੍ਵਾ ਕਾਮੇ ਪਹਾਯ ਪਬ੍ਬਜਿਤ੍ਵਾ ਚ ਸੀਲਵਿਸੋਧਨਂ ਅਰਞ੍ਞਵਾਸੋ ਧੁਤਙ੍ਗਪਰਿਹਰਣਂ ਭਾਵਨਾਭਿਯੋਗੋਤਿ ਏਵਮਾਦੀਸੁ ਅਨਵਜ੍ਜਧਮ੍ਮੇਸੁ ਯੁਤ੍ਤਪ੍ਪਯੁਤ੍ਤਸ੍ਸਾਤਿ ਅਤ੍ਥੋ. ਪਵਿਵੇਕਞ੍ਚ ਚੇਤਸੋਤਿ ਚੇਤਸੋ ਪਵਿਵੇਕਞ੍ਚ ਅਧਿਮੁਤ੍ਤਸ੍ਸ ਏਵਂ ਨੇਕ੍ਖਮ੍ਮਾਧਿਮੁਤ੍ਤਸ੍ਸ ਸਤੋ ਚਤੁਕ੍ਕਪਞ੍ਚਕਜ੍ਝਾਨਾਨਂ ਨਿਬ੍ਬਤ੍ਤਨੇਨ ਵਿਵੇਕੇ ਯੁਤ੍ਤਸ੍ਸ ਪਯੁਤ੍ਤਸ੍ਸ. ਅਬ੍ਯਾਬਜ੍ਝਾਧਿਮੁਤ੍ਤਸ੍ਸਾਤਿ ਅਬ੍ਯਾਬਜ੍ਝੇ ਨਿਦੁਕ੍ਖਤਾਯ ਅਧਿਮੁਤ੍ਤਸ੍ਸ ਝਾਨਸਮਾਪਤ੍ਤਿਯੋ ਨਿਬ੍ਬਤ੍ਤੇਤ੍ਵਾ ਸਮਥਸੁਖੇ ਯੁਤ੍ਤਪ੍ਪਯੁਤ੍ਤਸ੍ਸ. ਉਪਾਦਾਨਕ੍ਖਯਸ੍ਸ ਚਾਤਿ ਚਤੁਨ੍ਨਮ੍ਪਿ ਉਪਾਦਾਨਾਨਂ ਖਯਨ੍ਤੇ ਅਰਹਤ੍ਤੇ ਅਧਿਮੁਤ੍ਤਸ੍ਸ. ਭੁਮ੍ਮਤ੍ਥੇ ਹਿ ਏਤਂ ਸਾਮਿਵਚਨਂ. ਤਂ ਯਥਾਧਿਗਤਂ ਝਾਨਂ ਪਾਦਕਂ ਕਤ੍ਵਾ ਅਰਹਤ੍ਤਾਧਿਗਮਾਯ ਵਿਪਸ੍ਸਨਂ ਅਨੁਯੁਞ੍ਜਨ੍ਤਸ੍ਸਾਤਿ ਅਤ੍ਥੋ.

ਤਣ੍ਹਕ੍ਖਯਾਧਿਮੁਤ੍ਤਸ੍ਸਾਤਿ ਤਣ੍ਹਾ ਖੀਯਤਿ ਏਤ੍ਥਾਤਿ ਤਣ੍ਹਕ੍ਖਯੋ, ਨਿਬ੍ਬਾਨਂ, ਤਸ੍ਮਿਂ ਅਧਿਮੁਤ੍ਤਸ੍ਸ ਉਪਾਦਿਂ ਭਯਤੋ, ਅਨੁਪਾਦਿਞ੍ਚ ਖੇਮਤੋ ਦਸ੍ਸਨੇਨ ਨਿਰੋਧੇ ਨਿਨ੍ਨਪੋਣਪਬ੍ਭਾਰਸ੍ਸ. ਅਸਮ੍ਮੋਹਞ੍ਚ ਚੇਤਸੋਤਿ ਅਸਮ੍ਮੋਹਸਮ੍ਪਜਞ੍ਞਵਸੇਨ ਚਿਤ੍ਤਸ੍ਸ ਅਸਮ੍ਮੋਹਪਵਤ੍ਤਿਂ ਸਮ੍ਮੋਹਸਮੁਚ੍ਛਿਨ੍ਦਨੇਨ ਵਾ ਚਿਤ੍ਤਸ੍ਸ ਅਸਮ੍ਮੋਹਭੂਤਂ ਅਰਿਯਮਗ੍ਗਂ ਅਧਿਮੁਤ੍ਤਸ੍ਸ. ਦਿਸ੍ਵਾ ਆਯਤਨੁਪ੍ਪਾਦਨ੍ਤਿ ਚਕ੍ਖਾਦੀਨਂ ਆਯਤਨਾਨਂ ਯਥਾਸਕਪਚ੍ਚਯੇਹਿ ਖਣੇ ਖਣੇ ਉਪ੍ਪਾਦਂ, ਤਪ੍ਪਟਿਪਕ੍ਖਤੋ ਨਿਰੋਧਞ੍ਚ ਵਿਪਸ੍ਸਨਾਪਞ੍ਞਾਸਹਿਤਾਯ ਮਗ੍ਗਪਞ੍ਞਾਯ ਦਿਸ੍ਵਾ ਦਸ੍ਸਨਹੇਤੁ ਸਮ੍ਮਾ ਚਿਤ੍ਤਂ ਵਿਮੁਚ੍ਚਤੀਤਿ ਸਮ੍ਮਾ ਹੇਤੁਨਾ ਞਾਯੇਨ ਮਗ੍ਗਪਟਿਪਾਟਿਯਾ ਸਬ੍ਬਾਸਵਤੋ ਚਿਤ੍ਤਂ ਵਿਮੁਚ੍ਚਤਿ.

‘‘ਤਸ੍ਸ ਸਮ੍ਮਾ ਵਿਮੁਤ੍ਤਸ੍ਸਾ’’ਤਿਆਦੀਸੁ ਅਯਂ ਸਙ੍ਖੇਪਤ੍ਥੋ – ਤਸ੍ਸ ਵੁਤ੍ਤਨਯੇਨ ਸਮ੍ਮਦੇਵ ਸਬ੍ਬਸਂਕਿਲੇਸਤੋ ਵਿਮੁਤ੍ਤਸ੍ਸ, ਤਤੋ ਏਵ ਅਚ੍ਚਨ੍ਤੁਪਸਮੇਨ ਸਨ੍ਤਚਿਤ੍ਤਸ੍ਸ ਖੀਣਾਸਵਭਿਕ੍ਖੁਨੋ ਕਤਸ੍ਸ ਕੁਸਲਸ੍ਸ ਅਕੁਸਲਸ੍ਸ ਵਾ ਉਪਚਯੋ ਨਤ੍ਥਿ ਮਗ੍ਗੇਨੇਵ ਸਮੁਗ੍ਘਾਤਿਤਤ੍ਤਾ, ਪਰਿਞ੍ਞਾਦਿਭੇਦਂ ਕਰਣੀਯਂ ਨ ਵਿਜ੍ਜਤਿ ਕਤਕਿਚ੍ਚਤ੍ਤਾ. ਏਵਂ ਭੂਤਸ੍ਸ ਯਥਾ ਏਕਘਨੋ ਸੇਲੋ ਪਬ੍ਬਤੋ ਪਕਤਿਵਾਤੇਨ ਨ ਸਮੀਰਤਿ ਨ ਸਂਕਮ੍ਪਤਿ, ਏਵਂ ਇਟ੍ਠਾ ਚ ਅਨਿਟ੍ਠਾ ਚ ਰੂਪਾਦਯੋ ਆਰਮ੍ਮਣਧਮ੍ਮਾ ਤਾਦਿਨੋ ਤਾਦਿਭਾਵਪ੍ਪਤ੍ਤਸ੍ਸ ਠਿਤਂ ਅਨੇਜਂ ਪਹੀਨਸਬ੍ਬਸੋਕਤਾਯ ਵਿਸਂਯੁਤ੍ਤਂ ਚਿਤ੍ਤਂ ਨਪ੍ਪਵੇਧਨ੍ਤਿ ਨ ਚਾਲੇਨ੍ਤਿ. ਅਸ੍ਸ ਚ ਆਰਮ੍ਮਣਧਮ੍ਮਸ੍ਸ ਕਾਲੇਨ ਕਾਲਂ ਫਲਸਮਾਪਤ੍ਤਿਂ ਸਮਾਪਜ੍ਜਿਤ੍ਵਾ ਵਿਪਸ੍ਸਨ੍ਤੋ ਵਯਂ ਨਿਰੋਧਂ ਖਣੇ ਖਣੇ ਭਿਜ੍ਜਨਸਭਾਵਂ ਅਨੁਪਸ੍ਸਤੀਤਿ ਅਞ੍ਞਂ ਬ੍ਯਾਕਾਸਿ.

ਸੋਣਕੋਲ਼ਿਵਿਸਤ੍ਥੇਰਗਾਥਾਵਣ੍ਣਨਾ ਨਿਟ੍ਠਿਤਾ.

ਤੇਰਸਨਿਪਾਤਵਣ੍ਣਨਾ ਨਿਟ੍ਠਿਤਾ.