੧. ਸਂਕਿਚ੍ਚਤ੍ਥੇਰਗਾਥਾਵਣ੍ਣਨਾ

ਏਕਾਦਸਨਿਪਾਤੇ ਕਿਂ ਤਵਤ੍ਥੋ ਵਨੇ ਤਾਤਾਤਿਆਦਿਕਾ ਆਯਸ੍ਮਤੋ ਸਂਕਿਚ੍ਚਤ੍ਥੇਰਸ੍ਸ ਗਾਥਾ. ਕਾ ਉਪ੍ਪਤ੍ਤਿ? ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਂ ਕੁਸਲਂ ਉਪਚਿਨਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਸਾਵਤ੍ਥਿਯਂ ਬ੍ਰਾਹ੍ਮਣਮਹਾਸਾਲਕੁਲੇ ਪਟਿਸਨ੍ਧਿਂ ਗਣ੍ਹਿ. ਤਸ੍ਮਿਂ ਕੁਚ੍ਛਿਗਤੇਯੇਵ ਮਾਤਾ ਬ੍ਯਾਧਿਤਾ ਹੁਤ੍ਵਾ ਕਾਲਮਕਾਸਿ. ਤਸ੍ਸਾ ਸੁਸਾਨਂ ਨੇਤ੍ਵਾ ਝਾਪਿਯਮਾਨਾਯ ਗਬ੍ਭਾਸਯੋ ਨ ਝਾਯਿ. ਮਨੁਸ੍ਸਾ ਸੂਲੇਹਿ ਕੁਚ੍ਛਿਂ ਵਿਜ੍ਝਨ੍ਤਾ ਦਾਰਕਸ੍ਸ ਅਕ੍ਖਿਕੋਟਿਂ ਪਹਰਿਂਸੁ. ਤੇ ਤਂ ਵਿਜ੍ਝਿਤ੍ਵਾ ਅਙ੍ਗਾਰੇਹਿ ਪਟਿਚ੍ਛਾਦੇਤ੍ਵਾ ਪਕ੍ਕਮਿਂਸੁ. ਕੁਚ੍ਛਿਪਦੇਸੋਪਿ ਝਾਯਿ, ਅਙ੍ਗਾਰਮਤ੍ਥਕੇ ਪਨ ਸੁਵਣ੍ਣਬਿਮ੍ਬਸਦਿਸੋ ਦਾਰਕੋ ਪਦੁਮਗਬ੍ਭੇ ਨਿਪਨ੍ਨੋ ਵਿਯ ਅਹੋਸਿ. ਪਚ੍ਛਿਮਭਵਿਕਸਤ੍ਤਸ੍ਸ ਹਿ ਸਿਨੇਰੁਨਾ ਓਤ੍ਥਰਿਯਮਾਨਸ੍ਸਪਿ ਅਰਹਤ੍ਤਂ ਅਪ੍ਪਤ੍ਵਾ ਜੀਵਿਤਕ੍ਖਯੋ ਨਾਮ ਨਤ੍ਥਿ.

ਪੁਨਦਿਵਸੇ ਆਲ਼ਾਹਨਟ੍ਠਾਨਂ ਗਤਾ ਮਨੁਸ੍ਸਾ ਤਥਾਨਿਪਨ੍ਨਂ ਦਾਰਕਂ ਦਿਸ੍ਵਾ ਅਚ੍ਛਰਿਯਬ੍ਭੁਤਚਿਤ੍ਤਜਾਤਾ ਦਾਰਕਂ ਆਦਾਯ ਗਾਮਂ ਪਵਿਸਿਤ੍ਵਾ ਨੇਮਿਤ੍ਤਕੇ ਪੁਚ੍ਛਿਂਸੁ. ਨੇਮਿਤ੍ਤਕਾ ‘‘ਸਚੇ ਅਯਂ ਦਾਰਕੋ ਅਗਾਰਂ ਅਜ੍ਝਾਵਸਿਸ੍ਸਤਿ, ਯਾਵ ਸਤ੍ਤਮਾ ਕੁਲਪਰਿਵਟ੍ਟਾ ਦੁਗ੍ਗਤਾ ਭਵਿਸ੍ਸਨ੍ਤਿ. ਸਚੇ ਪਬ੍ਬਜਿਸ੍ਸਤਿ, ਪਞ੍ਚਹਿ ਸਮਣਸਤੇਹਿ ਪਰਿਵੁਤੋ ਵਿਚਰਿਸ੍ਸਤੀ’’ਤਿ ਆਹਂਸੁ. ਞਾਤਕਾ ‘‘ਹੋਤੁ, ਵਡ੍ਢਿਤਕਾਲੇ ਅਮ੍ਹਾਕਂ ਅਯ੍ਯਸ੍ਸ ਸਾਰਿਪੁਤ੍ਤਤ੍ਥੇਰਸ੍ਸ ਸਨ੍ਤਿਕੇ ਤਂ ਪਬ੍ਬਾਜੇਸ੍ਸਾਮਾ’’ਤਿ ਵਤ੍ਵਾ ਸਙ੍ਕੁਨਾ ਛਿਨ੍ਨਕ੍ਖਿਕੋਟਿਤਾਯ ਸਂਕਿਚ੍ਚੋਤਿ ਵਦਨ੍ਤਾ ਅਪਰਭਾਗੇ ਸਂਕਿਚ੍ਚੋਤਿ ਵੋਹਰਿਂਸੁ. ਸੋ ਸਤ੍ਤਵਸ੍ਸਿਕਕਾਲੇ ਅਤ੍ਤਨੋ ਗਬ੍ਭਗਤਸ੍ਸੇਵ ਮਾਤੁ ਮਰਣਂ, ਗਬ੍ਭੇ ਚ ਅਤ੍ਤਨੋ ਪਵਤ੍ਤਿਂ ਸੁਤ੍ਵਾ ਸਂਵੇਗਜਾਤੋ ‘‘ਪਬ੍ਬਜਿਸ੍ਸਾਮੀ’’ਤਿ ਆਹ. ਞਾਤਕਾ ‘‘ਸਾਧੁ, ਤਾਤਾ’’ਤਿ ਧਮ੍ਮਸੇਨਾਪਤਿਸ੍ਸ ਸਨ੍ਤਿਕਂ ਨੇਤ੍ਵਾ, ‘‘ਭਨ੍ਤੇ, ਇਮਂ ਪਬ੍ਬਾਜੇਥਾ’’ਤਿ ਅਦਂਸੁ. ਥੇਰੋ ਤਂ ਤਚਪਞ੍ਚਕਕਮ੍ਮਟ੍ਠਾਨਂ ਦਤ੍ਵਾ ਪਬ੍ਬਾਜੇਸਿ. ਸੋ ਖੁਰਗ੍ਗੇਯੇਵ ਸਹ ਪਟਿਸਮ੍ਭਿਦਾਹਿ ਅਰਹਤ੍ਤਂ ਪਤ੍ਵਾ ਤਿਂਸਮਤ੍ਤੇਹਿ ਭਿਕ੍ਖੂਹਿ ਸਦ੍ਧਿਂ ਅਰਞ੍ਞੇ ਵਿਹਰਨ੍ਤੋ ਚੇ ਚੋਰਹਤ੍ਥਤੋ ਮੋਚੇਤ੍ਵਾ ਸਯਮ੍ਪਿ ਤੇ ਚੋਰੇ ਦਮੇਤ੍ਵਾ ਪਬ੍ਬਾਜੇਤ੍ਵਾ ਅਞ੍ਞਤਰਸ੍ਮਿਂ ਵਿਹਾਰੇ ਬਹੂਹਿ ਭਿਕ੍ਖੂਹਿ ਸਦ੍ਧਿਂ ਵਿਹਰਨ੍ਤੋ ਤੇ ਵਿਵਾਦਪਸੁਤੇ ਦਿਸ੍ਵਾ ‘‘ਅਞ੍ਞਤ੍ਥ ਗਚ੍ਛਾਮੀ’’ਤਿ ਭਿਕ੍ਖੂ ਆਪੁਚ੍ਛਿ. ਅਯਮੇਤ੍ਥ ਸਙ੍ਖੇਪੋ, ਵਿਤ੍ਥਾਰੋ ਪਨ ਧਮ੍ਮਪਦਵਤ੍ਥੁਮ੍ਹਿ (ਧ. ਪ. ਅਟ੍ਠ. ੧.ਸਙ੍ਕਿਚ੍ਚਸਾਮਣੇਰਵਤ੍ਥੁ) ਆਗਤਨਯੇਨੇਵ ਵੇਦਿਤਬ੍ਬੋ. ਅਥ ਨਂ ਅਞ੍ਞਤਰੋ ਉਪਾਸਕੋ ਉਪਟ੍ਠਾਤੁਕਾਮੋ ਆਸਨ੍ਨਟ੍ਠਾਨੇ ਵਾਸਂ ਯਾਚਨ੍ਤੋ –

੫੯੭. ‘‘ਕਿਂ ਤਵਤ੍ਥੋ ਵਨੇ ਤਾਤ, ਉਜ੍ਜੁਹਾਨੋਵ ਪਾਵੁਸੇ;

ਵੇਰਮ੍ਭਾ ਰਮਣੀਯਾ ਤੇ, ਪਵਿਵੇਕੋ ਹਿ ਝਾਯਿਨ’’ਨ੍ਤਿ. –

ਪਠਮਂ ਗਾਥਮਾਹ. ਤਂ ਸੁਤ੍ਵਾ ਥੇਰੋ –

੫੯੮. ‘‘ਯਥਾ ਅਬ੍ਭਾਨਿ ਵੇਰਮ੍ਭੋ, ਵਾਤੋ ਨੁਦਤਿ ਪਾਵੁਸੇ;

ਸਞ੍ਞਾ ਮੇ ਅਭਿਕਿਰਨ੍ਤਿ, ਵਿਵੇਕਪਟਿਸਞ੍ਞੁਤਾ.

੫੯੯. ‘‘ਅਪਣ੍ਡਰੋ ਅਣ੍ਡਸਮ੍ਭਵੋ, ਸੀਵਥਿਕਾਯ ਨਿਕੇਤਚਾਰਿਕੋ;

ਉਪ੍ਪਾਦਯਤੇਵ ਮੇ ਸਤਿਂ, ਸਨ੍ਦੇਹਸ੍ਮਿਂ ਵਿਰਾਗਨਿਸ੍ਸਿਤਂ.

੬੦੦. ‘‘ਯਞ੍ਚ ਅਞ੍ਞੇ ਨ ਰਕ੍ਖਨ੍ਤਿ, ਯੋ ਚ ਅਞ੍ਞੇ ਨ ਰਕ੍ਖਤਿ;

ਸ ਵੇ ਭਿਕ੍ਖੁ ਸੁਖਂ ਸੇਤਿ, ਕਾਮੇਸੁ ਅਨਪੇਕ੍ਖਵਾ.

੬੦੧. ‘‘ਅਚ੍ਛੋਦਿਕਾ ਪੁਥੁਸਿਲਾ, ਗੋਨਙ੍ਗਲਮਿਗਾਯੁਤਾ;

ਅਮ੍ਬੁਸੇਵਾਲਸਞ੍ਛਨ੍ਨਾ, ਤੇ ਸੇਲਾ ਰਮਯਨ੍ਤਿ ਮਂ.

੬੦੨. ‘‘ਵਸਿਤਂ ਮੇ ਅਰਞ੍ਞੇਸੁ, ਕਨ੍ਦਰਾਸੁ ਗੁਹਾਸੁ ਚ;

ਸੇਨਾਸਨੇਸੁ ਪਨ੍ਤੇਸੁ, ਵਾਲ਼ਮਿਗਨਿਸੇਵਿਤੇ.

੬੦੩. ‘‘‘ਇਮੇ ਹਞ੍ਞਨ੍ਤੁ ਵਜ੍ਝਨ੍ਤੁ, ਦੁਕ੍ਖਂ ਪਪ੍ਪੋਨ੍ਤੁ ਪਾਣਿਨੋ’;

ਸਙ੍ਕਪ੍ਪਂ ਨਾਭਿਜਾਨਾਮਿ, ਅਨਰਿਯਂ ਦੋਸਸਂਹਿਤਂ.

੬੦੪. ‘‘ਪਰਿਚਿਣ੍ਣੋ ਮਯਾ ਸਤ੍ਥਾ, ਕਤਂ ਬੁਦ੍ਧਸ੍ਸ ਸਾਸਨਂ;

ਓਹਿਤੋ ਗਰੁਕੋ ਭਾਰੋ, ਭਵਨੇਤ੍ਤਿ ਸਮੂਹਤਾ.

੬੦੫. ‘‘ਯਸ੍ਸ ਚਤ੍ਥਾਯ ਪਬ੍ਬਜਿਤੋ, ਅਗਾਰਸ੍ਮਾਨਗਾਰਿਯਂ;

ਸੋ ਮੇ ਅਤ੍ਥੋ ਅਨੁਪ੍ਪਤ੍ਤੋ, ਸਬ੍ਬਸਂਯੋਜਨਕ੍ਖਯੋ.

੬੦੬. ‘‘ਨਾਭਿਨਨ੍ਦਾਮਿ ਮਰਣਂ, ਨਾਭਿਨਨ੍ਦਾਮਿ ਜੀਵਿਤਂ;

ਕਾਲਞ੍ਚ ਪਟਿਕਙ੍ਖਾਮਿ, ਨਿਬ੍ਬਿਸਂ ਭਤਕੋ ਯਥਾ.

੬੦੭. ‘‘ਨਾਭਿਨਨ੍ਦਾਮਿ ਮਰਣਂ, ਨਾਭਿਨਨ੍ਦਾਮਿ ਜੀਵਿਤਂ.

ਕਾਲਞ੍ਚ ਪਟਿਕਙ੍ਖਾਮਿ, ਸਮ੍ਪਜਾਨੋ ਪਤਿਸ੍ਸਤੋ’’ਤਿ. – ਇਮਾ ਗਾਥਾ ਅਭਾਸਿ;

ਤਤ੍ਥ ਕਿਂ ਤਵਤ੍ਥੋ ਵਨੇਤਿ ਕਿਨ੍ਤਿ ਲਿਙ੍ਗਵਿਪਲ੍ਲਾਸੇਨ ਵੁਤ੍ਤਂ. ਵਨੇ ਕੋ ਤਵਤ੍ਥੋ, ਕਿਂ ਪਯੋਜਨਨ੍ਤਿ ਅਤ੍ਥੋ. ਤਾਤਾਤਿ ਦਹਰਸਾਮਣੇਰਤਾਯ ਨਂ ਅਤ੍ਤਨੋ ਪੁਤ੍ਤਟ੍ਠਾਨੇ ਠਪੇਤ੍ਵਾ ਆਲਪਤਿ. ਉਜ੍ਜੁਹਾਨੋਵ ਪਾਵੁਸੇਤਿ ਉਜ੍ਜੁਹਾਨੋ ਕਿਰ ਨਾਮ ਏਕੋ ਪਬ੍ਬਤੋ, ਸੋ ਪਨ ਗਹਨਸਞ੍ਛਨ੍ਨੋ ਬਹੁਸੋਣ੍ਡਿਕਨ੍ਦਰੋ, ਤਹਂ ਤਹਂ ਸਨ੍ਦਮਾਨਸਲਿਲੋ, ਵਸ੍ਸਕਾਲੇ ਅਸਪ੍ਪਾਯੋ, ਤਸ੍ਮਾ ਉਜ੍ਜੁਹਾਨੋ ਵਾ ਪਬ੍ਬਤੋ ਏਤਰਹਿ ਪਾਵੁਸਕਾਲੇ ਤਵ ਕਿਮਤ੍ਥਿਯੋਤਿ ਅਤ੍ਥੋ. ਕੇਚਿ ਪਨੇਤ੍ਥ ‘‘ਉਜ੍ਜੁਹਾਨੋ ਨਾਮ ਏਕੋ ਸਕੁਣੋ ਸੀਤਂ ਨ ਸਹਤਿ, ਵਸ੍ਸਕਾਲੇ ਵਨਗੁਮ੍ਬੇ ਨਿਲੀਨੋ ਅਚ੍ਛਤੀ’’ਤਿ ਵਦਨ੍ਤਿ. ਤੇਸਂ ਮਤੇਨ ਉਜ੍ਜੁਹਾਨਸ੍ਸ ਵਿਯ ਸਕੁਣਸ੍ਸ ਪਾਵੁਸਕਾਲੇ ਕੋ ਤਵ ਅਤ੍ਥੋ ਵਨੇਤਿ? ਵੇਰਮ੍ਭਾ ਰਮਣੀਯਾ ਤੇਤਿ ਵੇਰਮ੍ਭਵਾਤਾ ਵਾਯਨ੍ਤਾ ਕਿਂ ਤੇ ਰਮਣੀਯਾਤਿ ਯੋਜਨਾ. ਕੇਚਿ ‘‘ਵੇਰਮ੍ਭਾ ਨਾਮ ਏਕਾ ਪਬ੍ਬਤਗੁਹਾ, ਪਬ੍ਭਾਰੋ’’ਤਿ ਚ ਵਦਨ੍ਤਿ. ਤਞ੍ਚ ਠਾਨਂ ਗਮਨਾਗਮਨਯੁਤ੍ਤਂ ਜਨਸਮ੍ਬਾਧਰਹਿਤਂ ਛਾਯੂਦਕਸਮ੍ਪਨ੍ਨਞ੍ਚ, ਤਸ੍ਮਾ ਵੇਰਮ੍ਭਾ ਰਮਣੀਯਾ, ਵਨੇ ਵਸਿਤੁਂ ਯੁਤ੍ਤਰੂਪਾ. ਕਸ੍ਮਾ? ਪਵਿਵੇਕੋ ਹਿ ਝਾਯਿਨਂ ਯਸ੍ਮਾ ਤਾਦਿਸਾਨਂ ਝਾਯੀਨਂ ਯਤ੍ਥ ਕਤ੍ਥਚਿ ਪਵਿਵੇਕੋਯੇਵ ਇਚ੍ਛਿਤਬ੍ਬੋ, ਤਸ੍ਮਾ ‘‘ਦੂਰਂ ਅਰਞ੍ਞਟ੍ਠਾਨਂ ਅਗਨ੍ਤ੍ਵਾ ਵੇਰਮ੍ਭਾਯਂ ਵਸ, ਤਾਤਾ’’ਤਿ ਵਦਤਿ. ਅਯਞ੍ਹੇਤ੍ਥ ਅਧਿਪ੍ਪਾਯੋ – ਯਸ੍ਮਾ ਝਾਯੀਨਂ ਪਵਿਵੇਕਕ੍ਖਮੇ ਨਿਵਾਸਫਾਸੁਕੇ ਸੇਨਾਸਨੇ ਲਦ੍ਧੇਯੇਵ ਝਾਨਾਦਯੋ ਸਮ੍ਪਜ੍ਜਨ੍ਤਿ, ਨ ਅਲਦ੍ਧੇ, ਤਸ੍ਮਾ ਨ ਏਵਰੂਪੇ ਸੀਤਕਾਲੇ ਯਤ੍ਥ ਕਤ੍ਥਚਿ ਵਨੇ ਵਸਿਤੁਂ ਸਕ੍ਕਾ, ਗੁਹਾਪਬ੍ਭਾਰਾਦੀਸੁ ਪਨ ਸਕ੍ਕਾਤਿ.

ਏਵਂ ਉਪਾਸਕੇਨ ਵੁਤ੍ਤੇ ਥੇਰੋ ਵਨਾਦਯੋ ਏਵ ਮਂ ਰਮੇਨ੍ਤੀਤਿ ਦਸ੍ਸੇਨ੍ਤੋ ‘‘ਯਥਾ ਅਬ੍ਭਾਨੀ’’ਤਿਆਦਿਮਾਹ. ਤਸ੍ਸਤ੍ਥੋ – ਯਥਾ ਪਾਵੁਸੇ ਕਾਲੇ ਅਬ੍ਭਾਨਿ ਵਲਾਹਕਾਨਿ ਵੇਰਮ੍ਭਵਾਤੋ ਨੁਦਤਿ ਖਿਪਤਿ ਨੀਹਰਤਿ, ਏਵਮੇਵ ਮੇ ਚਿਤ੍ਤਂ ਵਿਵੇਕਪਟਿਸਞ੍ਞੁਤਾ ਸਞ੍ਞਾ ਅਭਿਕਿਰਨ੍ਤਿ ਵਿਵੇਕਟ੍ਠਾਨਂਯੇਵ ਆਕਡ੍ਢਨ੍ਤਿ.

ਕਿਞ੍ਚ? ਅਪਣ੍ਡਰੋ ਕਾਲ਼ਵਣ੍ਣੋ, ਅਣ੍ਡਸਮ੍ਭਵੋ ਅਣ੍ਡਜੋ ਕਾਕੋ, ਸੀਵਥਿਕਾਯ ਸੁਸਾਨਟ੍ਠਾਨੇ, ਨਿਕੇਤਚਾਰਿਕੋ ਤਮੇਵ ਨਿਵਾਸਨਟ੍ਠਾਨਂ ਕਤ੍ਵਾ ਵਿਚਰਣਕੋ ਉਪ੍ਪਾਦਯਤੇਵ ਮੇ ਸਤਿਂ, ਸਨ੍ਦੇਹਸ੍ਮਿਂ ਵਿਰਾਗਨਿਸ੍ਸਿਤਨ੍ਤਿ, ਕਾਯਸ੍ਮਿਂ ਵਿਰਾਗੂਪਸਂਹਿਤਂ ਕਾਯਗਤਾਸਤਿਕਮ੍ਮਟ੍ਠਾਨਂ ਮਯ੍ਹਂ ਉਪ੍ਪਾਦਯਤਿਯੇਵ. ਏਕਦਿਵਸਂ ਕਿਰ ਥੇਰੋ ਕਾਕੇਨ ਖਜ੍ਜਮਾਨਂ ਮਨੁਸ੍ਸਕੁਣਪਂ ਪਸ੍ਸਿਤ੍ਵਾ ਅਸੁਭਸਞ੍ਞਂ ਪਟਿਲਭਿ, ਤਂ ਸਨ੍ਧਾਯ ਏਵਮਾਹ. ਤੇਨ ਕਾਯੇ ਸਬ੍ਬਸੋ ਛਨ੍ਦਰਾਗਸ੍ਸ ਨਤ੍ਥਿਤਾਯ ਵਨੇਯੇਵ ਵਸਿਤੁਕਾਮੋਮ੍ਹੀਤਿ ਦਸ੍ਸੇਤਿ. ਯਞ੍ਚਾਤਿ ਚ-ਸਦ੍ਦੋ ਸਮੁਚ੍ਚਯਤ੍ਥੋ, ਤੇਨ ਅਞ੍ਞਮ੍ਪਿ ਮਮ ਅਰਞ੍ਞਵਾਸਕਾਰਣਂ ਸੁਣਾਹੀਤਿ ਦਸ੍ਸੇਤਿ. ਯਂ ਪਬ੍ਬਜਿਤਂ ਮੇਤ੍ਤਾਵਿਹਾਰਿਤਾਯ ਅਲੋਭਨਿਯਪਰਿਕ੍ਖਾਰਤਾਯ ਚ ਰਕ੍ਖਿਤਬ੍ਬਸ੍ਸ ਅਭਾਵਤੋ ਅਞ੍ਞੇ ਸੇਵਕਾਦਯੋ ਨ ਰਕ੍ਖਨ੍ਤਿ. ਯੋ ਚ ਪਬ੍ਬਜਿਤੋ ਅਞ੍ਞੇ ਕੇਨਚਿ ਕਿਞ੍ਚਨਪਲਿਬੋਧਭੂਤੇ ਨ ਰਕ੍ਖਤਿ ਤਾਦਿਸਾਨਂਯੇਵ ਅਭਾਵਤੋ. ਸ ਵੇ ਭਿਕ੍ਖੁ ਸੁਖਂ ਸੇਤੀਤਿ, ਸੋ ਭਿਕ੍ਖੁ ਸਮੁਚ੍ਛਿਨ੍ਨਕਿਲੇਸਕਾਮਤਾਯ ਸਬ੍ਬਸੋ ਵਤ੍ਥੁਕਾਮੇਸੁ ਅਨਪੇਕ੍ਖਵਾ ਅਪੇਕ੍ਖਾਰਹਿਤੋ ਯਤ੍ਥ ਕਤ੍ਥਚਿ ਸੁਖਂ ਸੇਤਿ. ਤਸ੍ਸ ਅਨੁਸਙ੍ਕਿਤਪਰਿਸਙ੍ਕਿਤਾਭਾਵਤੋ ਅਰਞ੍ਞਮ੍ਹਿ ਗਾਮਮ੍ਹਿ ਸਦਿਸਮੇਵਾਤਿ ਅਤ੍ਥੋ.

ਇਦਾਨਿ ਪਬ੍ਬਤਵਨਾਦੀਨਂ ਰਮਣੀਯਤਂ ਵਸਿਤਪੁਬ੍ਬਤਞ੍ਚ ਦਸ੍ਸੇਤੁਂ ‘‘ਅਚ੍ਛੋਦਿਕਾ’’ਤਿਆਦਿ ਵੁਤ੍ਤਂ. ਤਤ੍ਥ ਵਸਿਤਂ ਮੇਤਿ, ਵੁਟ੍ਠਪੁਬ੍ਬਂ ਮਯਾ. ਵਾਲ਼ਮਿਗਨਿਸੇਵਿਤੇਤਿ, ਸੀਹਬ੍ਯਗ੍ਘਾਦੀਹਿ ਵਾਲ਼ਮਿਗੇਹਿ ਉਪਸੇਵਿਤੇ ਵਨੇ.

ਸਙ੍ਕਪ੍ਪਂ ਨਾਭਿਜਾਨਾਮੀਤਿ, ਇਮੇ ਯੇ ਕੇਚਿ ਪਾਣਿਨੋ ਸਤ੍ਤਾ ਉਸੁਸਤ੍ਤਿਆਦੀਹਿ ਪਹਰਣੇਹਿ ਹਞ੍ਞਨ੍ਤੁ ਮਾਰਿਯਨ੍ਤੁ ਮੁਟ੍ਠਿਪ੍ਪਹਾਰਾਦੀਹਿ ਵਜ੍ਝਨ੍ਤੁ ਬਾਧੀਯਨ੍ਤੁ, ਅਞ੍ਞੇਨ ਵਾ ਯੇਨ ਕੇਨਚਿ ਆਕਾਰੇਨ ਦੁਕ੍ਖਂ ਪਪ੍ਪੋਨ੍ਤੁ ਪਾਪੁਣਨ੍ਤੂਤਿ; ਏਵਂ ਦੋਸਸਂਹਿਤਂ ਪਟਿਘਸਂਯੁਤ੍ਤਂ ਤਤੋ ਏਵ ਅਨਰਿਯਂ ਬ੍ਯਾਪਾਦਵਿਹਿਂਸਾਦਿਪ੍ਪਭੇਦਂ ਪਾਪਸਙ੍ਕਪ੍ਪਂ ਉਪ੍ਪਾਦਿਤਂ ਨਾਭਿਜਾਨਾਮਿ, ਮਿਚ੍ਛਾਵਿਤਕ੍ਕੋ ਨ ਉਪ੍ਪਨ੍ਨਪੁਬ੍ਬੋਤਿ ਮੇਤ੍ਤਾਵਿਹਾਰਿਤਂ ਦਸ੍ਸੇਤਿ.

ਇਦਾਨਿ ‘‘ਪਰਿਚਿਣ੍ਣੋ’’ਤਿਆਦਿਨਾ ਅਤ੍ਤਨੋ ਕਤਕਿਚ੍ਚਤਂ ਦਸ੍ਸੇਤਿ. ਤਤ੍ਥ ਪਰਿਚਿਣ੍ਣੋਤਿ ਉਪਾਸਿਤੋ ਓਵਾਦਾਨੁਸਾਸਨੀਕਰਣਵਸੇਨ. ਓਹਿਤੋਤਿ ਓਰੋਹਿਤੋ. ਗਰੁਕੋ ਭਾਰੋਤਿ ਗਰੁਤਰੋ ਖਨ੍ਧਭਾਰੋ.

ਨਾਭਿਨਨ੍ਦਾਮਿ ਮਰਣਨ੍ਤਿ ‘‘ਕਥਂ ਨੁ ਖੋ ਮੇ ਮਰਣਂ ਸਿਯਾ’’ਤਿ ਮਰਣਂ ਨ ਇਚ੍ਛਾਮਿ. ਨਾਭਿਨਨ੍ਦਾਮਿ ਜੀਵਿਤਨ੍ਤਿ ‘‘ਕਥਂ ਨੁ ਖੋ ਅਹਂ ਚਿਰਂ ਜੀਵੇਯ੍ਯ’’ਨ੍ਤਿ ਜੀਵਿਤਮ੍ਪਿ ਨ ਇਚ੍ਛਾਮਿ. ਏਤੇਨ ਮਰਣੇ ਜੀਵਿਤੇ ਚ ਸਮਾਨਚਿਤ੍ਤਤਂ ਦਸ੍ਸੇਤਿ. ਕਾਲਞ੍ਚ ਪਟਿਕਙ੍ਖਾਮੀਤਿ ਪਰਿਨਿਬ੍ਬਾਨਕਾਲਂਵ ਆਗਮੇਮਿ. ਨਿਬ੍ਬਿਸਨ੍ਤਿ ਨਿਬ੍ਬਿਸਨ੍ਤੋ, ਭਤਿਯਾ ਕਮ੍ਮਂ ਕਰੋਨ੍ਤੋ. ਭਤਕੋ ਯਥਾਤਿ ਯਥਾ ਭਤਕੋ ਪਰਸ੍ਸ ਕਮ੍ਮਂ ਕਰੋਨ੍ਤੋ ਕਮ੍ਮਸਿਦ੍ਧਿਂ ਅਨਭਿਨਨ੍ਦਨ੍ਤੋਪਿ ਕਮ੍ਮਂ ਕਰੋਨ੍ਤੋਵ ਦਿਵਸਕ੍ਖਯਂ ਉਦਿਕ੍ਖਤਿ, ਏਵਂ ਅਹਮ੍ਪਿ ਜੀਵਿਤਂ ਅਨਭਿਨਨ੍ਦਨ੍ਤੋਪਿ ਅਤ੍ਤਭਾਵਸ੍ਸ ਯਾਪਨੇਨ ਮਰਣਂ ਅਨਭਿਨਨ੍ਦਨ੍ਤੋਪਿ ਪਰਿਯੋਸਾਨਕਾਲਂ ਪਟਿਕਙ੍ਖਾਮੀਤਿ. ਸੇਸਂ ਵੁਤ੍ਤਨਯਮੇਵ.

ਸਂਕਿਚ੍ਚਤ੍ਥੇਰਗਾਥਾਵਣ੍ਣਨਾ ਨਿਟ੍ਠਿਤਾ.

ਏਕਾਦਸਨਿਪਾਤਵਣ੍ਣਨਾ ਨਿਟ੍ਠਿਤਾ.