੧੨. ਦ੍ਵਾਦਸਕਨਿਪਾਤੋ

੧. ਸੀਲਵਤ੍ਥੇਰਗਾਥਾਵਣ੍ਣਨਾ

ਦ੍ਵਾਦਸਕਨਿਪਾਤੇ ਸੀਲਮੇਵਾਤਿਆਦਿਕਾ ਆਯਸ੍ਮਤੋ ਸੀਲਵਤ੍ਥੇਰਸ੍ਸ ਗਾਥਾ. ਕਾ ਉਪ੍ਪਤ੍ਤਿ? ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਂ ਕੁਸਲਂ ਉਪਚਿਨਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਰਾਜਗਹੇ ਬਿਮ੍ਬਿਸਾਰਰਞ੍ਞੋ ਪੁਤ੍ਤੋ ਹੁਤ੍ਵਾ ਨਿਬ੍ਬਤ੍ਤਿ, ਸੀਲਵਾਤਿਸ੍ਸ ਨਾਮਂ ਅਹੋਸਿ. ਤਂ ਵਯਪ੍ਪਤ੍ਤਂ ਰਾਜਾ ਅਜਾਤਸਤ੍ਤੁ ਮਾਰੇਤੁਕਾਮੋ ਚਣ੍ਡਂ ਮਤ੍ਤਹਤ੍ਥਿਂ ਆਰੋਪੇਤ੍ਵਾ ਨਾਨਾਵਿਧੇਹਿ ਉਪਾਯੇਹਿ ਉਪਕ੍ਕਮਨ੍ਤੋਪਿ ਮਾਰੇਤੁਂ ਨਾਸਕ੍ਖਿ ਪਚ੍ਛਿਮਭਵਿਕਸ੍ਸ ਅਰਹਤ੍ਤਂ ਅਪ੍ਪਤ੍ਵਾ ਅਨ੍ਤਰਾ ਜੀਵਿਤਨ੍ਤਰਾਯਾਭਾਵਤੋ. ਤਸ੍ਸ ਪਵਤ੍ਤਿਂ ਦਿਸ੍ਵਾ ਭਗਵਾ ਮਹਾਮੋਗ੍ਗਲ੍ਲਾਨਤ੍ਥੇਰਂ ਆਣਾਪੇਸਿ – ‘‘ਸੀਲਵਕੁਮਾਰਂ ਆਨੇਹੀ’’ਤਿ. ਥੇਰੋ ਇਦ੍ਧਿਬਲੇਨ ਸਦ੍ਧਿਂ ਹਤ੍ਥਿਨਾ ਤਂ ਆਨੇਸਿ. ਕੁਮਾਰੋ ਹਤ੍ਥਿਤੋ ਓਰੁਯ੍ਹ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਭਗਵਾ ਤਸ੍ਸ ਅਜ੍ਝਾਸਯਾਨੁਰੂਪਂ ਧਮ੍ਮਂ ਦੇਸੇਸਿ. ਸੋ ਧਮ੍ਮਂ ਸੁਤ੍ਵਾ ਪਟਿਲਦ੍ਧਸਦ੍ਧੋ ਪਬ੍ਬਜਿਤ੍ਵਾ ਵਿਪਸ੍ਸਨਾਯ ਕਮ੍ਮਂ ਕਰੋਨ੍ਤੋ ਨਚਿਰਸ੍ਸੇਵ ਅਰਹਤ੍ਤਂ ਪਤ੍ਵਾ ਕੋਸਲਰਟ੍ਠੇ ਵਸਤਿ. ਅਥ ਨਂ ਅਜਾਤਸਤ੍ਤੁ ‘‘ਮਾਰੇਥਾ’’ਤਿ ਪੁਰਿਸੇ ਆਣਾਪੇਸਿ. ਤੇ ਥੇਰਸ੍ਸ ਸਨ੍ਤਿਕਂ ਗਨ੍ਤ੍ਵਾ ਠਿਤਾ ਥੇਰੇਨ ਕਥਿਤਂ ਧਮ੍ਮਕਥਂ ਸੁਤ੍ਵਾ ਸਞ੍ਜਾਤਸਂਵੇਗਾ ਪਸਨ੍ਨਚਿਤ੍ਤਾ ਹੁਤ੍ਵਾ ਪਬ੍ਬਜਿਂਸੁ. ਥੇਰੋ ਤੇਸਂ –

੬੦੮. ‘‘ਸੀਲਮੇਵਿਧ ਸਿਕ੍ਖੇਥ, ਅਸ੍ਮਿਂ ਲੋਕੇ ਸੁਸਿਕ੍ਖਿਤਂ.

ਸੀਲਞ੍ਹਿ ਸਬ੍ਬਸਮ੍ਪਤ੍ਤਿਂ, ਉਪਨਾਮੇਤਿ ਸੇਵਿਤਂ.

੬੦੯. ‘‘ਸੀਲਂ ਰਕ੍ਖੇਯ੍ਯ ਮੇਧਾਵੀ, ਪਤ੍ਥਯਾਨੋ ਤਯੋ ਸੁਖੇ;

ਪਸਂਸਂ ਵਿਤ੍ਤਿਲਾਭਞ੍ਚ, ਪੇਚ੍ਚ ਸਗ੍ਗੇ ਪਮੋਦਨਂ.

੬੧੦. ‘‘ਸੀਲਵਾ ਹਿ ਬਹੂ ਮਿਤ੍ਤੇ, ਸਞ੍ਞਮੇਨਾਧਿਗਚ੍ਛਤਿ;

ਦੁਸ੍ਸੀਲੋ ਪਨ ਮਿਤ੍ਤੇਹਿ, ਧਂਸਤੇ ਪਾਪਮਾਚਰਂ.

੬੧੧. ‘‘ਅਵਣ੍ਣਞ੍ਚ ਅਕਿਤ੍ਤਿਞ੍ਚ, ਦੁਸ੍ਸੀਲੋ ਲਭਤੇ ਨਰੋ;

ਵਣ੍ਣਂ ਕਿਤ੍ਤਿਂ ਪਸਂਸਞ੍ਚ, ਸਦਾ ਲਭਤਿ ਸੀਲਵਾ.

੬੧੨. ‘‘ਆਦਿ ਸੀਲਂ ਪਤਿਟ੍ਠਾ ਚ, ਕਲ੍ਯਾਣਾਨਞ੍ਚ ਮਾਤੁਕਂ;

ਪਮੁਖਂ ਸਬ੍ਬਧਮ੍ਮਾਨਂ, ਤਸ੍ਮਾ ਸੀਲਂ ਵਿਸੋਧਯੇ.

੬੧੩. ‘‘ਵੇਲਾ ਚ ਸਂਵਰਂ ਸੀਲਂ, ਚਿਤ੍ਤਸ੍ਸ ਅਭਿਹਾਸਨਂ;

ਤਿਤ੍ਥਞ੍ਚ ਸਬ੍ਬਬੁਦ੍ਧਾਨਂ, ਤਸ੍ਮਾ ਸੀਲਂ ਵਿਸੋਧਯੇ.

੬੧੪. ‘‘ਸੀਲਂ ਬਲਂ ਅਪ੍ਪਟਿਮਂ, ਸੀਲਂ ਆਵੁਧਮੁਤ੍ਤਮਂ;

ਸੀਲਮਾਭਰਣਂ ਸੇਟ੍ਠਂ, ਸੀਲਂ ਕਵਚਮਬ੍ਭੁਤਂ.

੬੧੫. ‘‘ਸੀਲਂ ਸੇਤੁ ਮਹੇਸਕ੍ਖੋ, ਸੀਲਂ ਗਨ੍ਧੋ ਅਨੁਤ੍ਤਰੋ;

ਸੀਲਂ ਵਿਲੇਪਨਂ ਸੇਟ੍ਠਂ, ਯੇਨ ਵਾਤਿ ਦਿਸੋਦਿਸਂ.

੬੧੬. ‘‘ਸੀਲਂ ਸਮ੍ਬਲਮੇਵਗ੍ਗਂ, ਸੀਲਂ ਪਾਥੇਯ੍ਯਮੁਤ੍ਤਮਂ;

ਸੀਲਂ ਸੇਟ੍ਠੋ ਅਤਿਵਾਹੋ, ਯੇਨ ਯਾਤਿ ਦਿਸੋਦਿਸਂ.

੬੧੭. ‘‘ਇਧੇਵ ਨਿਨ੍ਦਂ ਲਭਤਿ, ਪੇਚ੍ਚਾਪਾਯੇ ਚ ਦੁਮ੍ਮਨੋ;

ਸਬ੍ਬਤ੍ਥ ਦੁਮ੍ਮਨੋ ਬਾਲੋ, ਸੀਲੇਸੁ ਅਸਮਾਹਿਤੋ.

੬੧੮. ‘‘ਇਧੇਵ ਕਿਤ੍ਤਿਂ ਲਭਤਿ, ਪੇਚ੍ਚ ਸਗ੍ਗੇ ਚ ਸੁਮ੍ਮਨੋ;

ਸਬ੍ਬਤ੍ਥ ਸੁਮਨੋ ਧੀਰੋ, ਸੀਲੇਸੁ ਸੁਸਮਾਹਿਤੋ.

੬੧੯. ‘‘ਸੀਲਮੇਵ ਇਧ ਅਗ੍ਗਂ, ਪਞ੍ਞਵਾ ਪਨ ਉਤ੍ਤਮੋ;

ਮਨੁਸ੍ਸੇਸੁ ਚ ਦੇਵੇਸੁ, ਸੀਲਪਞ੍ਞਾਣਤੋ ਜਯ’’ਨ੍ਤਿ. –

ਇਮਾਹਿ ਗਾਥਾਹਿ ਧਮ੍ਮਂ ਦੇਸੇਸਿ.

ਤਤ੍ਥ ਸੀਲਮੇਵਿਧ ਸਿਕ੍ਖੇਥ, ਅਸ੍ਮਿਂ ਲੋਕੇਤਿ ਇਧਾਤਿ, ਨਿਪਾਤਮਤ੍ਤਂ, ਇਮਸ੍ਮਿਂ ਸਤ੍ਤਲੋਕੇ ਅਤ੍ਥਕਾਮੋ ਕੁਲਪੁਤ੍ਤੋ ਚਾਰਿਤ੍ਤਵਾਰਿਤ੍ਤਾਦਿਭੇਦਂ ਆਦਿਤੋ ਸੀਲਮੇਵ ਸਿਕ੍ਖੇਯ੍ਯ, ਸਿਕ੍ਖਨ੍ਤੋ ਚ ਨਂ ਸੁਸਿਕ੍ਖਿਤਂ ਅਖਣ੍ਡਾਦਿਭਾਵਾਪਾਦਨੇਨ ਸੁਟ੍ਠੁ ਸਿਕ੍ਖਿਤਂ ਸੁਪਰਿਸੁਦ੍ਧਂ ਪਰਿਪੁਣ੍ਣਞ੍ਚ ਕਤ੍ਵਾ ਸਿਕ੍ਖੇਯ੍ਯ. ਅਸ੍ਮਿਂ ਲੋਕੇਤਿ ਵਾ ਇਮਸ੍ਮਿਂ ਸਙ੍ਖਾਰਲੋਕੇ ਸਿਕ੍ਖਿਤਬ੍ਬਧਮ੍ਮੇਸੁ ਸੀਲਂ ਆਦਿਤੋ ਸਿਕ੍ਖੇਯ੍ਯ. ਦਿਟ੍ਠਿਸਮ੍ਪਤ੍ਤਿਯਾਪਿ ਸੀਲਸ੍ਸ ਪਤਿਟ੍ਠਾਭਾਵਤੋ ਆਹ ‘‘ਸੀਲਂ ਹੀ’’ਤਿਆਦਿ. ਤਤ੍ਥ ਹੀਤਿ ਕਾਰਣਵਚਨਂ. ਯਸ੍ਮਾ ਸੀਲਂ ਸੇਵਿਤਂ ਪਰਿਚਿਤਂ ਰਕ੍ਖਿਤਂ ਮਨੁਸ੍ਸਸਮ੍ਪਤ੍ਤਿ, ਦਿਬ੍ਬਸਮ੍ਪਤ੍ਤਿ, ਨਿਬ੍ਬਾਨਸਮ੍ਪਤ੍ਤੀਤਿ ਏਤਂ ਸਬ੍ਬਸਮ੍ਪਤ੍ਤਿਂ ਤਂਸਮਙ੍ਗਿਨੋ ਸਤ੍ਤਸ੍ਸ ਉਪਨਾਮੇਤਿ ਆਵਹਤਿ.

ਸੀਲਂ ਸਬ੍ਬਸਮ੍ਪਤ੍ਤਿਂ ਉਪਨਾਮੇਤੀਤਿ ਸਙ੍ਖੇਪਤੋ ਵੁਤ੍ਤਮਤ੍ਥਂ ਵਿਤ੍ਥਾਰਤੋ ਦਸ੍ਸੇਨ੍ਤੋ ‘‘ਸੀਲਂ ਰਕ੍ਖੇਯ੍ਯਾ’’ਤਿਆਦਿਮਾਹ. ਤਤ੍ਥ ਰਕ੍ਖੇਯ੍ਯਾਤਿ ਗੋਪੇਯ੍ਯ. ਪਾਣਾਤਿਪਾਤਾਦਿਤੋ ਹਿ ਵਿਰਮਨ੍ਤੋ ਵਤ੍ਤਪਟਿਵਤ੍ਤਞ੍ਚ ਪੂਰੇਨ੍ਤੋ ਪਟਿਪਕ੍ਖਾਭਿਭਵਨਤੋ ਤਂ ਰਕ੍ਖਤਿ ਨਾਮ. ਮੇਧਾਵੀਤਿ ਪਞ੍ਞਵਾ, ਇਦਂ ਤਸ੍ਸ ਰਕ੍ਖਨੁਪਾਯਦਸ੍ਸਨਂ ਞਾਣਬਲੇਨ ਹਿਸ੍ਸ ਸਮਾਦਾਨਂ ਅਵਿਕੋਪਨਞ੍ਚ ਹੋਤਿ. ਪਤ੍ਥਯਾਨੋਤਿ ਇਚ੍ਛਨ੍ਤੋ. ਤਯੋ ਸੁਖੇਤਿ ਤੀਣਿ ਸੁਖਾਨਿ. ਸੁਖਨਿਮਿਤ੍ਤਂ ਵਾ ‘‘ਸੁਖ’’ਨ੍ਤਿ ਅਧਿਪ੍ਪੇਤਂ. ਪਸਂਸਨ੍ਤਿ ਕਿਤ੍ਤਿਂ, ਵਿਞ੍ਞੂਹਿ ਵਾ ਪਸਂਸਨਂ. ਵਿਤ੍ਤਿਲਾਭਨ੍ਤਿ ਤੁਟ੍ਠਿਲਾਭਂ. ‘‘ਵਿਤ੍ਤਲਾਭ’’ਨ੍ਤਿ ਚ ਪਠਨ੍ਤਿ, ਧਨਲਾਭਨ੍ਤਿ ਅਤ੍ਥੋ. ਸੀਲਵਾ ਹਿ ਅਪ੍ਪਮਤ੍ਤਤਾਯ ਮਹਨ੍ਤਂ ਭੋਗਕ੍ਖਨ੍ਧਂ ਅਧਿਗਚ੍ਛਤਿ. ਪੇਚ੍ਚਾਤਿ ਕਾਲਙ੍ਕਤ੍ਵਾ. ਸਗ੍ਗੇ ਪਮੋਦਨਨ੍ਤਿ ਦੇਵਲੋਕੇ ਇਟ੍ਠੇਹਿ ਕਾਮਗੁਣੇਹਿ, ਮੋਦਨਞ੍ਚ ਪਤ੍ਥਯਮਾਨੋਤਿ ਸਮ੍ਬਨ੍ਧੋ. ਇਧਲੋਕੇ ਪਸਂਸਂ ਵਿਤ੍ਤਿਲਾਭਂ ਪਰਲੋਕੇ ਦਿਬ੍ਬਸਮ੍ਪਤ੍ਤਿਯਾ ਮੋਦਨਞ੍ਚ ਇਚ੍ਛਨ੍ਤੋ ਸੀਲਂ ਰਕ੍ਖੇਯ੍ਯਾਤਿ ਯੋਜਨਾ.

ਸਞ੍ਞਮੇਨਾਤਿ ਕਾਯਾਦੀਨਂ ਸਂਯਮੇਨ. ਸਂਯਤੋ ਹਿ ਕਾਯਦੁਚ੍ਚਰਿਤਾਦੀਹਿ ਕਞ੍ਚਿ ਅਵਿਹੇਠੇਨ੍ਤੋ ਅਭਯਦਾਨਂ ਦਦਨ੍ਤੋ ਪਿਯਮਨਾਪਤਾਯ ਮਿਤ੍ਤਾਨਿ ਗਨ੍ਥਤਿ. ਧਂਸਤੇਤਿ ਅਪੇਤਿ. ਪਾਪਮਾਚਰਨ੍ਤਿ ਪਾਣਾਤਿਪਾਤਾਦਿਪਾਪਕਮ੍ਮਂ ਕਰੋਨ੍ਤੋ. ਦੁਸ੍ਸੀਲਞ੍ਹਿ ਪੁਗ੍ਗਲਂ ਅਤ੍ਥਕਾਮਾ ਸਤ੍ਤਾ ਨ ਭਜਨ੍ਤਿ, ਅਞ੍ਞਦਤ੍ਥੁ ਪਰਿਵਜ੍ਜੇਨ੍ਤਿ.

ਅਵਣ੍ਣਨ੍ਤਿ ਅਗੁਣਂ, ਸਮ੍ਮੁਖਾ ਗਰਹਂ ਵਾ. ਅਕਿਤ੍ਤਿਨ੍ਤਿ, ਅਯਸਂ ਅਸਿਲੋਕਂ. ਵਣ੍ਣਨ੍ਤਿ ਗੁਣਂ. ਕਿਤ੍ਤਿਨ੍ਤਿ ਸਿਲੋਕਂ ਪਤ੍ਥਟਯਸਤਂ. ਪਸਂਸਨ੍ਤਿ ਸਮ੍ਮੁਖਾ ਥੋਮਨਂ.

ਆਦੀਤਿ ਮੂਲਂ. ਸੀਲਞ੍ਹਿ ਕੁਸਲਾਨਂ ਧਮ੍ਮਾਨਂ ਆਦਿ. ਯਥਾਹ – ‘‘ਤਸ੍ਮਾਤਿਹ ਤ੍ਵਂ, ਭਿਕ੍ਖੁ, ਆਦਿਮੇਵ ਵਿਸੋਧੇਹਿ ਕੁਸਲੇਸੁ ਧਮ੍ਮੇਸੁ. ਕੋ ਚਾਦਿ ਕੁਸਲਾਨਂ ਧਮ੍ਮਾਨਂ? ਸੀਲਞ੍ਚ ਸੁਵਿਸੁਦ੍ਧ’’ਨ੍ਤਿ (ਸਂ. ਨਿ. ੫.੩੬੯). ਪਤਿਟ੍ਠਾਤਿ ਅਧਿਟ੍ਠਾਨਂ. ਸੀਲਞ੍ਹਿ ਸਬ੍ਬੇਸਂ ਉਤ੍ਤਰਿਮਨੁਸ੍ਸਧਮ੍ਮਾਨਂ ਪਤਿਟ੍ਠਾ. ਤੇਨਾਹ – ‘‘ਸੀਲੇ ਪਤਿਟ੍ਠਾਯਾ’’ਤਿਆਦਿ (ਸਂ. ਨਿ. ੧.੨੩; ੧੯੨; ਪੇਟਕੋ. ੨੨; ਮਿ. ਪ. ੨.੧.੯). ਕਲ੍ਯਾਣਾਨਞ੍ਚ ਮਾਤੁਕਨ੍ਤਿ ਸਮਥਵਿਪਸ੍ਸਨਾਦੀਨਂ ਕਲ੍ਯਾਣਧਮ੍ਮਾਨਂ ਮਾਤੁਭੂਤਂ, ਜਨਕਨ੍ਤਿ, ਅਤ੍ਥੋ. ਪਮੁਖਂ ਸਬ੍ਬਧਮ੍ਮਾਨਨ੍ਤਿ, ਸਬ੍ਬੇਸਂ ਪਾਮੋਜ੍ਜਾਦੀਨਂ ਅਨਵਜ੍ਜਧਮ੍ਮਾਨਂ ਪਮੁਖਂ ਮੁਖਭੂਤਂ, ਪਵਤ੍ਤਿਦ੍ਵਾਰਨ੍ਤਿ ਅਤ੍ਥੋ. ਤਸ੍ਮਾਤਿ ਆਦਿਭਾਵਾਦਿਤੋ. ਵਿਸੋਧਯੇਤਿ ਅਕ੍ਖਣ੍ਡਾਦਿਭਾਵੇਨ ਸਮ੍ਪਾਦੇਯ੍ਯ.

ਵੇਲਾਤਿ ਦੁਚ੍ਚਰਿਤੇਹਿ ਅਨਤਿਕ੍ਕਮਨੀਯਟ੍ਠੇਨ ਵੇਲਾ, ਸੀਮਾਤਿ ਅਤ੍ਥੋ. ਵੇਲਾਯਤਿ ਵਾ ਦੁਸ੍ਸਿਲ੍ਯਂ ਚਲਯਤਿ ਵਿਦ੍ਧਂਸੇਤੀਤਿ ਵੇਲਾ. ਸਂਵਰਂ ਸੀਲਂ ਕਾਯਦੁਚ੍ਚਰਿਤਾਦੀਨਂ ਉਪ੍ਪਤ੍ਤਿਦ੍ਵਾਰਸ੍ਸ ਪਿਦਹਨਤੋ. ਅਭਿਹਾਸਨਨ੍ਤਿ ਤੋਸਨਂ ਅਵਿਪ੍ਪਟਿਸਾਰਹੇਤੁਤਾਯ ਚਿਤ੍ਤਸ੍ਸਾਭਿਪ੍ਪਮੋਦਨਤੋ. ਤਿਤ੍ਥਞ੍ਚ ਸਬ੍ਬਬੁਦ੍ਧਾਨਨ੍ਤਿ ਸਾਵਕਬੁਦ੍ਧਾ, ਪਚ੍ਚੇਕਬੁਦ੍ਧਾ, ਸਮ੍ਮਾਸਮ੍ਬੁਦ੍ਧਾਤਿ ਸਬ੍ਬੇਸਂ ਬੁਦ੍ਧਾਨਂ ਕਿਲੇਸਮਲਪ੍ਪਵਾਹਨੇ ਨਿਬ੍ਬਾਨਮਹਾਸਮੁਦ੍ਦਾਵਗਾਹਣੇ ਚ ਤਿਤ੍ਥਭੂਤਞ੍ਚ.

ਸੀਲਂ ਬਲਂ ਅਪ੍ਪਟਿਮਨ੍ਤਿ ਮਾਰਸੇਨਪ੍ਪਮਦ੍ਦਨੇ ਅਸਦਿਸਂ ਬਲਂ ਸੇਨਾਥਾਮੋ ਚ. ਆਵੁਧਮੁਤ੍ਤਮਨ੍ਤਿ ਸਂਕਿਲੇਸਧਮ੍ਮਾਨਂ ਛੇਦਨੇ ਉਤ੍ਤਮਂ ਪਹਰਣਂ. ਗੁਣਸਰੀਰੋਪਸੋਭਨਟ੍ਠੇਨ ਆਭਰਣਂ. ਸੇਟ੍ਠਨ੍ਤਿ ਸਬ੍ਬਕਾਲਂ ਉਤ੍ਤਮਂ ਦਬ੍ਬਞ੍ਚ. ਸਪਾਣਪਰਿਤ੍ਤਾਨਤੋ ਕਵਚਮਬ੍ਭੁਤਂ. ‘‘ਅਬ੍ਭਿਦ’’ਨ੍ਤਿ ਚ ਪਠਨ੍ਤਿ, ਅਭੇਜ੍ਜਨ੍ਤਿ ਅਤ੍ਥੋ.

ਅਪਾਯਮਹੋਘਾਤਿਕ੍ਕਮਨੇ ਸਂਸਾਰਮਹੋਘਾਤਿਕ੍ਕਮਨੇ ਚ ਕਿਲੇਸੇਹਿ ਅਸਂਸੀਦਨਟ੍ਠੇਨ ਸੇਤੁ. ਮਹੇਸਕ੍ਖੋਤਿ ਮਹਬ੍ਬਲੋ. ਗਨ੍ਧੋ ਅਨੁਤ੍ਤਰੋਤਿ ਪਟਿਵਾਤਂ ਸਬ੍ਬਦਿਸਾਸੁ ਵਾਯਨਤੋ ਅਨੁਤ੍ਤਰੋ ਗਨ੍ਧੋ ਸਬ੍ਬਜਨਮਨੋਹਰਤ੍ਤਾ. ਤੇਨਾਹ ‘‘ਯੇਨ ਵਾਤਿ ਦਿਸੋਦਿਸ’’ਨ੍ਤਿ ਯੇਨ ਸੀਲਗਨ੍ਧੇਨ ਤਂਸਮਙ੍ਗੀ ਦਿਸੋਦਿਸਂ ਸਬ੍ਬਾ ਦਿਸਾ ਵਾਯਤਿ. ‘‘ਦਿਸੋਦਿਸਾ’’ਤਿਪਿ ਪਾਲ਼ਿ, ਦਸ ਦਿਸਾਤਿ ਅਤ੍ਥੋ.

ਸਮ੍ਬਲਮੇਵਗ੍ਗਨ੍ਤਿ ਸਮ੍ਬਲਂ ਨਾਮ ਪੁਟਭਤ੍ਤਂ. ਯਥਾ ਪੁਟਭਤ੍ਤਂ ਗਹੇਤ੍ਵਾ ਮਗ੍ਗਂ ਗਚ੍ਛਨ੍ਤੋ ਪੁਰਿਸੋ ਅਨ੍ਤਰਾਮਗ੍ਗੇ ਜਿਘਚ੍ਛਾਦੁਕ੍ਖੇਨ ਨ ਕਿਲਮਤਿ, ਏਵਂ ਸੀਲਸਮ੍ਪਨ੍ਨੋਪਿ ਸੁਦ੍ਧਂ ਸੀਲਸਮ੍ਬਲਂ ਗਹੇਤ੍ਵਾ ਸਂਸਾਰਕਨ੍ਤਾਰਂ ਪਟਿਪਨ੍ਨੋ ਗਤਗਤਟ੍ਠਾਨੇ ਨ ਕਿਲਮਤੀਤਿ ਸੀਲਂ ਅਗ੍ਗਂ ਸਮ੍ਬਲਂ ਨਾਮ. ਤਥਾ ਸੀਲਂ ਪਾਥੇਯ੍ਯਮੁਤ੍ਤਮਂ ਚੋਰਾਦੀਹਿ ਅਸਾਧਾਰਣਤ੍ਤਾ ਤਤ੍ਥ ਤਤ੍ਥ ਇਚ੍ਛਿਤਬ੍ਬਸਮ੍ਪਤ੍ਤਿਨਿਪ੍ਫਾਦਨਤੋ ਚ. ਅਤਿਕ੍ਕਾਮੇਨ੍ਤੋ ਤਂ ਤਂ ਠਾਨਂ ਯਥਿਚ੍ਛਿਤਟ੍ਠਾਨਂ ਵਾ ਵਾਹੇਤਿ ਸਮ੍ਪਾਪੇਤੀਤਿ ਅਤਿਵਾਹੋ, ਯਾਨਂ. ਕੇਨਚਿ ਅਨੁਪਦ੍ਦੁਤਂ ਹੁਤ੍ਵਾ ਇਚ੍ਛਿਤਟ੍ਠਾਨਪ੍ਪਤ੍ਤਿਹੇਤੁਤਾਯ ਸੀਲਂ ਸੇਟ੍ਠਂ ਅਤਿਵਾਹੋ. ਯੇਨਾਤਿ ਯੇਨ ਅਤਿਵਾਹੇਨ ਯਾਤਿ ਦਿਸੋਦਿਸਨ੍ਤਿ ਅਗਤਿਂ ਗਤਿਞ੍ਚਾਪਿ ਤਂ ਤਂ ਦਿਸਂ ਸੁਖੇਨੇਵ ਗਚ੍ਛਤਿ.

ਇਧੇਵ ਨਿਨ੍ਦਂ ਲਭਤੀਤਿ ਇਧਲੋਕੇਪਿ ਦੁਮ੍ਮਨੋ ਰਾਗਾਦੀਹਿ ਦੂਸਿਤਚਿਤ੍ਤੋ ‘‘ਦੁਸ੍ਸੀਲੋ ਪਾਪਧਮ੍ਮੋ’’ਤਿ ਨਿਨ੍ਦਂ ਗਰਹਂ ਲਭਤਿ. ਪੇਚ੍ਚ ਪਰਲੋਕੇਪਿ ਅਪਾਯੇ ‘‘ਪੁਰਿਸਤ੍ਤਕਲਿ ਅਵਜਾਤਾ’’ਤਿਆਦਿਨਾ ਯਮਪੁਰਿਸਾਦੀਹਿ ਚ ਨਿਨ੍ਦਂ ਲਭਤਿ. ਨ ਕੇਵਲਂ ਨਿਨ੍ਦਮੇਵ ਲਭਤਿ, ਅਥ ਖੋ ਸਬ੍ਬਤ੍ਥ ਦੁਮ੍ਮਨੋ ਬਾਲੋ ਇਧਲੋਕੇ ਦੁਚ੍ਚਰਿਤਚਰਣੇਨ ਦੂਸਿਤਚਿਤ੍ਤੋ ਪਰਲੋਕੇ ਕਮ੍ਮਕਾਰਣਾਦਿਵਸੇਨ ਦੁਕ੍ਖੁਪ੍ਪਤ੍ਤਿਯਾਤਿ ਸਬ੍ਬਤ੍ਥ ਬਾਲੋ ਦੁਮ੍ਮਨੋ ਹੋਤਿ. ਕਥਂ? ਸੀਲੇਸੁ ਅਸਮਾਹਿਤੋ ਸਮ੍ਮਾ ਸੀਲੇਸੁ ਨ ਠਪਿਤਚਿਤ੍ਤੋ ਅਪ੍ਪਤਿਟ੍ਠਿਤਚਿਤ੍ਤੋ.

ਇਧੇਵ ਕਿਤ੍ਤਿਂ ਲਭਤੀਤਿ ਇਧਲੋਕੇਪਿ ਸੁਮਨੋ ‘‘ਸਪ੍ਪੁਰਿਸੋ ਸੀਲਵਾ ਕਲ੍ਯਾਣਧਮ੍ਮੋ’’ਤਿ ਕਿਤ੍ਤਿਂ ਲਭਤਿ. ਪੇਚ੍ਚ ਪਰਲੋਕੇਪਿ ਸਗ੍ਗੇ ‘‘ਅਯਂ ਸਪ੍ਪੁਰਿਸੋ ਸੀਲਵਾ ਕਲ੍ਯਾਣਧਮ੍ਮੋ. ਤਥਾ ਹਿ ਦੇਵਾਨਂ ਸਹਬ੍ਯਤਂ ਉਪਪਨ੍ਨੋ’’ਤਿਆਦਿਨਾ ਕਿਤ੍ਤਿਂ ਲਭਤਿ. ਨ ਕੇਵਲਂ ਕਿਤ੍ਤਿਮੇਵ ਲਭਤਿ, ਅਥ ਖੋ ਧੀਰੋ ਧਿਤਿਸਮ੍ਪਨ੍ਨੋ ਸੀਲੇਸੁ ਸੁਟ੍ਠੁ ਸਮਾਹਿਤੋ ਅਪ੍ਪਿਤਚਿਤ੍ਤੋ ਸੁਪਤਿਟ੍ਠਿਤਚਿਤ੍ਤੋ ਸਬ੍ਬਤ੍ਥ ਇਧਲੋਕੇ ਸੁਚਰਿਤਚਰਣੇਨ, ਪਰਲੋਕੇ ਸਮ੍ਪਤ੍ਤਿਪਟਿਲਾਭੇਨ ਸੁਮਨੋ ਸੋਮਨਸ੍ਸਪ੍ਪਤ੍ਤੋ ਹੋਤਿ. ਸੀਲਮੇਵ ਇਧ ਅਗ੍ਗਨ੍ਤਿ ਦੁਵਿਧਂ ਸੀਲਂ ਲੋਕਿਯਂ ਲੋਕੁਤ੍ਤਰਨ੍ਤਿ. ਤਤ੍ਥ ਲੋਕਿਯਂ ਤਾਵ ਕਾਮਲੋਕੇ ਖਤ੍ਤਿਯਮਹਾਸਾਲਾਦੀਸੁ, ਦੇਵਲੋਕੇ ਬ੍ਰਹ੍ਮਲੋਕੇ ਚ ਉਪਪਤ੍ਤਿਵਿਸੇਸਂ ਆਵਹਤਿ, ਲਾਭੀਭਾਵਾਦਿਕਸ੍ਸ ਚ ਕਾਰਣਂ ਹੋਤਿ. ਲੋਕੁਤ੍ਤਰਂ ਪਨ ਸਕਲਮ੍ਪਿ ਵਟ੍ਟਦੁਕ੍ਖਂ ਅਤਿਕ੍ਕਾਮੇਤੀਤਿ ਸੀਲਂ ਅਗ੍ਗਮੇਵ. ਤਥਾ ਹਿ ਵੁਤ੍ਤਂ –

‘‘ਹੀਨੇਨ ਬ੍ਰਹ੍ਮਚਰਿਯੇਨ, ਖਤ੍ਤਿਯੇ ਉਪਪਜ੍ਜਤਿ;

ਮਜ੍ਝਿਮੇਨ ਚ ਦੇਵਤ੍ਤਂ, ਉਤ੍ਤਮੇਨ ਵਿਸੁਜ੍ਝਤੀ’’ਤਿ. (ਜਾ. ੧.੮.੭੫);

ਆਕਙ੍ਖੇਯ੍ਯ ਚੇ, ਭਿਕ੍ਖਵੇ, ਭਿਕ੍ਖੁ – ‘‘ਲਾਭੀ ਅਸ੍ਸਂ ਚੀਵਰਪਿਣ੍ਡਪਾਤਸੇਨਾਸਨਗਿਲਾਨਪਚ੍ਚਯਭੇਸਜ੍ਜਪਰਿਕ੍ਖਾਰਾਨ’’ਨ੍ਤਿ (ਮ. ਨਿ. ੧.੬੫), ‘‘ਸੀਲੇਸ੍ਵੇਵਸ੍ਸ ਪਰਿਪੂਰਕਾਰੀ’’ਤਿ (ਮ. ਨਿ. ੧.੬੫), ‘‘ਇਜ੍ਝਤਿ, ਭਿਕ੍ਖਵੇ, ਸੀਲਵਤੋ ਚੇਤੋਪਣਿਧਿ ਵਿਸੁਦ੍ਧਤ੍ਤਾ’’ਤਿ (ਅ. ਨਿ. ੮.੩੫; ਦੀ. ਨਿ. ੩.੩੩੭) ਚ.

ਲੋਕੁਤ੍ਤਰਸੀਲਸ੍ਸ ਪਨ ਸਬ੍ਬਸੋ ਪਹੀਨਪਟਿਪਕ੍ਖਸ੍ਸ ਸਤ੍ਤਮਭਵਤੋ ਪਟ੍ਠਾਯ ਸਂਸਾਰਦੁਕ੍ਖਂ ਵਿਨਿਵਤ੍ਤੇਨ੍ਤਸ੍ਸ ਅਗ੍ਗਭਾਵੇ ਵਤ੍ਤਬ੍ਬਮੇਵ ਨਤ੍ਥਿ. ਪਞ੍ਞਵਾ ਪਨ ਉਤ੍ਤਮੋਤਿ ‘‘ਪਞ੍ਞਵਾ ਪਨ ਪੁਗ੍ਗਲੋ ਉਤ੍ਤਮੋ ਪਰਮੋ ਸੇਟ੍ਠੋਯੇਵਾ’’ਤਿ ਪੁਗ੍ਗਲਾਧਿਟ੍ਠਾਨੇਨ ਪਞ੍ਞਾਯ ਏਵ ਸੇਟ੍ਠਭਾਵਂ ਵਦਤਿ. ਇਦਾਨਿ ਸੀਲਪਞ੍ਞਾਨਂ ਸੇਟ੍ਠਭਾਵਂ ਕਿਚ੍ਚਤੋ ਦਸ੍ਸੇਨ੍ਤੋ ‘‘ਸੀਲਪਞ੍ਞਾਣਤੋ ਜਯ’’ਨ੍ਤਿ ਆਹ. ਜਯਨ੍ਤਿ ਚ ਲਿਙ੍ਗਵਿਪਲ੍ਲਾਸੋ ਦਟ੍ਠਬ੍ਬੋ, ਅਹੂਤਿ ਵਾ ਵਚਨਸੇਸੋ. ਤਤ੍ਥ ਪਜਾਨਨਟ੍ਠੇਨ ਪਞ੍ਞਾਣਂ, ਸੀਲਤੋ ਪਞ੍ਞਾਣਤੋ ਚ ਪਟਿਪਕ੍ਖਜਯੋ. ਨ ਹਿ ਸੀਲੇਨ ਵਿਨਾ ਪਞ੍ਞਾ ਸਮ੍ਭਵਤਿ, ਪਞ੍ਞਾਯ ਚ ਵਿਨਾ ਸੀਲਂ ਕਿਚ੍ਚਕਰਂ, ਅਞ੍ਞਮਞ੍ਞੋਪਕਾਰਕਞ੍ਚੇਤਂ. ਵੁਤ੍ਤਞ੍ਹਿ ‘‘ਸੀਲਪਰਿਧੋਤਾ ਪਞ੍ਞਾ, ਪਞ੍ਞਾਪਰਿਧੋਤਂ ਸੀਲ’’ਨ੍ਤਿ (ਦੀ. ਨਿ. ੧.੩੧੭) ਮਨੁਸ੍ਸੇਸੁ ਚ ਦੇਵੇਸੂਤਿ ਇਦਂ ਨੇਸਂ ਠਾਨਵਿਸੇਸਦਸ੍ਸਨਂ. ਤਤ੍ਥ ਹਿ ਤਾਨਿ ਸਵਿਸੇਸਾਨਿ ਵਤ੍ਤਨ੍ਤਿ, ਸਮਾਧਿ ਪਨੇਤ੍ਥ ਸੀਲਪਕ੍ਖਿਕੋ ਪਞ੍ਞਾਯ ਅਧਿਟ੍ਠਾਨਭਾਵਤੋ, ਪਞ੍ਞਾਪਕ੍ਖਿਕੋ ਵਾ ਭਾਵੇਤਬ੍ਬਤੋ ਸੀਲਾਧਿਟ੍ਠਾਨਤੋ ਚ.

ਏਵਂ ਥੇਰੋ ਤੇਸਂ ਭਿਕ੍ਖੂਨਂ ਸੀਲਮੁਖੇਨ ਧਮ੍ਮਂ ਦੇਸੇਨ੍ਤੋ ਅਤ੍ਤਨੋ ਸੁਵਿਸੁਦ੍ਧਸੀਲਾਦਿਗੁਣਤਾਦੀਪਨੇਨ ਅਞ੍ਞਂ ਬ੍ਯਾਕਾਸਿ.

ਸੀਲਵਤ੍ਥੇਰਗਾਥਾਵਣ੍ਣਨਾ ਨਿਟ੍ਠਿਤਾ.

੨. ਸੁਨੀਤਤ੍ਥੇਰਗਾਥਾਵਣ੍ਣਨਾ

ਨੀਚੇ ਕੁਲਮ੍ਹੀਤਿਆਦਿਕਾ ਆਯਸ੍ਮਤੋ ਸੁਨੀਤਤ੍ਥੇਰਸ੍ਸ ਗਾਥਾ. ਕਾ ਉਪ੍ਪਤ੍ਤਿ? ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਪੁਞ੍ਞਾਨਿ ਉਪਚਿਨਿਤ੍ਵਾ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਬੁਦ੍ਧਸ੍ਸ ਸੁਞ੍ਞਕਾਲੇ ਕੁਲਗੇਹੇ ਨਿਬ੍ਬਤ੍ਤਿਤ੍ਵਾ ਵਯਪ੍ਪਤ੍ਤੋ ਬਾਲਜਨੇਹਿ ਸਦ੍ਧਿਂ ਕੀਲ਼ਾਪਸੁਤੋ ਹੁਤ੍ਵਾ ਵਿਚਰਨ੍ਤੋ ਏਕਂ ਪਚ੍ਚੇਕਬੁਦ੍ਧਂ ਗਾਮੇ ਪਿਣ੍ਡਾਯ ਚਰਨ੍ਤਂ ਦਿਸ੍ਵਾ, ‘‘ਕਿਂ ਤੁਯ੍ਹਂ ਸਬ੍ਬਸੋ ਵਣਿਤਸਰੀਰਸ੍ਸ ਵਿਯ ਸਕਲਂ ਕਾਯਂ ਪਟਿਚ੍ਛਾਦੇਤ੍ਵਾ ਭਿਕ੍ਖਾਚਰਣੇਨ, ਨਨੁ ਨਾਮ ਕਸਿਵਾਣਿਜ੍ਜਾਦੀਹਿ ਜੀਵਿਕਾ ਕਪ੍ਪੇਤਬ੍ਬਾ? ਤਾਨਿ ਚੇ ਕਾਤੁਂ ਨ ਸਕ੍ਕੋਸਿ, ਘਰੇ ਘਰੇ ਮੁਤ੍ਤਕਰੀਸਾਦੀਨਿ ਨੀਹਰਨ੍ਤੋ ਪਚ੍ਛਾ ਵਤ੍ਥੁਸੋਧਨੇਨ ਜੀਵਾਹੀ’’ਤਿ ਅਕ੍ਕੋਸਿ. ਸੋ ਤੇਨ ਕਮ੍ਮੇਨ ਨਿਰਯੇ ਪਚ੍ਚਿਤ੍ਵਾ ਤਸ੍ਸੇਵ ਕਮ੍ਮਸ੍ਸ ਵਿਪਾਕਾਵਸੇਸੇਨ ਮਨੁਸ੍ਸਲੋਕੇਪਿ ਬਹੂਨਿ ਜਾਤਿਸਤਾਨਿ ਪੁਪ੍ਫਛਡ੍ਡਕਕੁਲੇ ਨਿਬ੍ਬਤ੍ਤਿਤ੍ਵਾ ਤਥਾ ਜੀਵਿਕਂ ਕਪ੍ਪੇਸਿ. ਇਮਸ੍ਮਿਞ੍ਚ ਬੁਦ੍ਧੁਪ੍ਪਾਦੇ ਪੁਪ੍ਫਛਡ੍ਡਕਕੁਲੇ ਏਵ ਨਿਬ੍ਬਤ੍ਤੋ ਉਕ੍ਕਾਰਸੋਧਨਕਮ੍ਮੇਨ ਜੀਵਿਕਂ ਕਪ੍ਪੇਤਿ ਘਾਸਚ੍ਛਾਦਨਮਤ੍ਤਮ੍ਪਿ ਅਲਭਨ੍ਤੋ.

ਅਥ ਭਗਵਾ ਪਚ੍ਛਿਮਯਾਮੇ ਬੁਦ੍ਧਾਚਿਣ੍ਣਂ ਮਹਾਕਰੁਣਾਸਮਾਪਤ੍ਤਿਂ ਸਮਾਪਜ੍ਜਿਤ੍ਵਾ ਤਤੋ ਵੁਟ੍ਠਾਯ ਬੁਦ੍ਧਚਕ੍ਖੁਨਾ ਲੋਕਂ ਵੋਲੋਕੇਨ੍ਤੋ ਸੁਨੀਤਸ੍ਸ ਹਦਯਬ੍ਭਨ੍ਤਰੇ ਘਟੇ ਪਦੀਪਂ ਵਿਯ ਪਜ੍ਜਲਨ੍ਤਂ ਅਰਹਤ੍ਤੂਪਨਿਸ੍ਸਯਂ ਦਿਸ੍ਵਾ ਵਿਭਾਤਾਯ ਰਤ੍ਤਿਯਾ ਪੁਬ੍ਬਣ੍ਹਸਮਯਂ ਨਿਵਾਸੇਤ੍ਵਾ ਪਤ੍ਤਚੀਵਰਮਾਦਾਯ ਭਿਕ੍ਖੁਸਙ੍ਘਪਰਿਵੁਤੋ ਰਾਜਗਹਂ ਪਿਣ੍ਡਾਯ ਪਵਿਟ੍ਠੋ. ਯਸ੍ਸਂ ਵੀਥਿਯਂ ਸੁਨੀਤੋ ਉਕ੍ਕਾਰਸੋਧਨਕਮ੍ਮਂ ਕਰੋਤਿ, ਤਂ ਵੀਥਿਂ ਪਟਿਪਜ੍ਜਿ. ਸੁਨੀਤੋਪਿ ਤਤ੍ਥ ਤਤ੍ਥ ਵਿਘਾਸੁਚ੍ਚਾਰਸਙ੍ਕਾਰਾਦਿਕਂ ਰਾਸਿਂ ਕਤ੍ਵਾ ਪਿਟਕੇਸੁ ਪਕ੍ਖਿਪਿਤ੍ਵਾ ਕਾਜੇਨਾਦਾਯ ਪਰਿਹਰਨ੍ਤੋ ਭਿਕ੍ਖੁਸਙ੍ਘਪਰਿਵੁਤਂ ਸਤ੍ਥਾਰਂ ਆਗਚ੍ਛਨ੍ਤਂ ਦਿਸ੍ਵਾ ਸਾਰਜ੍ਜਮਾਨੋ ਸਮ੍ਭਮਾਕੁਲਹਦਯੋ ਗਮਨਮਗ੍ਗਂ ਨਿਲੀਯਨੋਕਾਸਞ੍ਚ ਅਲਭਨ੍ਤੋ ਕਾਜਂ ਭਿਤ੍ਤਿਪਸ੍ਸੇ ਠਪੇਤ੍ਵਾ ਏਕੇਨ ਪਸ੍ਸੇਨ ਅਨੁਪਵਿਸਨ੍ਤੋ ਵਿਯ ਭਿਤ੍ਤਿਂ ਅਲ੍ਲੀਨੋ ਪਞ੍ਜਲਿਕੋ ਅਟ੍ਠਾਸਿ. ‘‘ਭਿਤ੍ਤਿਛਿਦ੍ਦੇਨ ਅਪਕ੍ਕਮਿਤੁਕਾਮੋ ਅਹੋਸੀ’’ਤਿਪਿ ਵਦਨ੍ਤਿ.

ਸਤ੍ਥਾ ਤਸ੍ਸ ਸਮੀਪਂ ਪਤ੍ਵਾ ‘‘ਅਯਂ ਅਤ੍ਤਨੋ ਕੁਸਲਮੂਲਸਞ੍ਚੋਦਿਤਂ ਉਪਗਤਂ ਮਂ ਸਾਰਜ੍ਜਮਾਨੋ ਜਾਤਿਯਾ ਕਮ੍ਮਸ੍ਸ ਚ ਨਿਹੀਨਤਾਯ ਸਮ੍ਮੁਖੀਭਾਵਮ੍ਪਿ ਲਜ੍ਜਤਿ, ਹਨ੍ਦਸ੍ਸ ਵੇਸਾਰਜ੍ਜਂ ਉਪ੍ਪਾਦੇਸ੍ਸਾਮੀ’’ਤਿ ਕਰਵੀਕਰੁਤਮਞ੍ਜੁਨਾ ਸਕਲਨਗਰਨਿਨ੍ਨਾਦਵਰ-ਗਮ੍ਭੀਰੇਨ ਬ੍ਰਹ੍ਮਸ੍ਸਰੇਨ ‘‘ਸੁਨੀਤਾ’’ਤਿ ਆਲਪਿਤ੍ਵਾ ‘‘ਕਿਂ ਇਮਾਯ ਦੁਕ੍ਖਜੀਵਿਕਾਯ ਪਬ੍ਬਜਿਤੁਂ ਸਕ੍ਖਿਸ੍ਸਤੀ’’ਤਿ ਆਹ. ਸੁਨੀਤੋ ਤੇਨ ਸਤ੍ਥੁ ਵਚਨੇਨ ਅਮਤੇਨ ਵਿਯ ਅਭਿਸਿਤ੍ਤੋ ਉਲ਼ਾਰਂ ਪੀਤਿਸੋਮਨਸ੍ਸਂ ਪਟਿਸਂਵੇਦੇਨ੍ਤੋ ‘‘ਭਗਵਾ, ਸਚੇ ਮਾਦਿਸਾਪਿ ਇਧ ਪਬ੍ਬਜ੍ਜਂ ਲਭਨ੍ਤਿ, ਕਸ੍ਮਾਹਂ ਨ ਪਬ੍ਬਜਿਸ੍ਸਾਮਿ, ਪਬ੍ਬਾਜੇਥ ਮਂ ਭਗਵਾ’’ਤਿ ਆਹ. ਸਤ੍ਥਾ ‘‘ਏਹਿ, ਭਿਕ੍ਖੂ’’ਤਿ ਆਹ. ਸੋ ਤਾਵਦੇਵ ਏਹਿਭਿਕ੍ਖੁਭਾਵੇਨ ਪਬ੍ਬਜ੍ਜਂ ਉਪਸਮ੍ਪਦਞ੍ਚ ਲਭਿਤ੍ਵਾ ਇਦ੍ਧਿਮਯਪਤ੍ਤਚੀਵਰਧਰੋ ਵਸ੍ਸਸਟ੍ਠਿਕਤ੍ਥੇਰੋ ਵਿਯ ਹੁਤ੍ਵਾ ਸਤ੍ਥੁ ਸਨ੍ਤਿਕੇ ਅਟ੍ਠਾਸਿ. ਭਗਵਾ ਤਂ ਵਿਹਾਰਂ ਨੇਤ੍ਵਾ ਕਮ੍ਮਟ੍ਠਾਨਂ ਆਚਿਕ੍ਖਿ. ਸੋ ਪਠਮਂ ਅਟ੍ਠ ਸਮਾਪਤ੍ਤਿਯੋ, ਪਞ੍ਚ ਚ ਅਭਿਞ੍ਞਾਯੋ ਨਿਬ੍ਬਤ੍ਤੇਤ੍ਵਾ ਵਿਪਸ੍ਸਨਂ ਵਡ੍ਢੇਤ੍ਵਾ ਛਲ਼ਭਿਞ੍ਞੋ ਅਹੋਸਿ. ਤਂ ਸਕ੍ਕਾਦਯੋ ਦੇਵਾ ਬ੍ਰਹ੍ਮਾਨੋ ਚ ਉਪਸਙ੍ਕਮਿਤ੍ਵਾ ਨਮਸ੍ਸਿਂਸੁ. ਤੇਨ ਵੁਤ੍ਤਂ –

‘‘ਤਾ ਦੇਵਤਾ ਸਤ੍ਤਸਤਾ ਉਲ਼ਾਰਾ, ਬ੍ਰਹ੍ਮਾ ਚ ਇਨ੍ਦੋ ਉਪਸਙ੍ਕਮਿਤ੍ਵਾ;

ਆਜਾਨੀਯਂ ਜਾਤਿਜਰਾਭਿਭੂਤਂ, ਸੁਨੀਤਂ ਨਮਸ੍ਸਨ੍ਤਿ ਪਸਨ੍ਨਚਿਤ੍ਤਾ’’ਤਿਆਦਿ.

ਭਗਵਾ ਤਂਯੇਵ ਦੇਵਸਙ੍ਘਪੁਰਕ੍ਖਤਂ ਦਿਸ੍ਵਾ ਸਿਤਂ ਕਤ੍ਵਾ ਪਸਂਸਨ੍ਤੋ ‘‘ਤਪੇਨ ਬ੍ਰਹ੍ਮਚਰਿਯੇਨਾ’’ਤਿ ਗਾਥਾਯ ਧਮ੍ਮਂ ਦੇਸੇਸਿ. ਅਥ ਨਂ ਸਮ੍ਬਹੁਲਾ ਭਿਕ੍ਖੂ ਸੀਹਨਾਦਂ ਨਦਾਪੇਤੁਕਾਮਾ, ‘‘ਆਵੁਸੋ ਸੁਨੀਤ, ਕਸ੍ਮਾ ਕੁਲਾ ਤ੍ਵਂ ਪਬ੍ਬਜਿਤੋ, ਕਥਂ ਵਾ ਪਬ੍ਬਜਿਤੋ, ਕਥਞ੍ਚ ਸਚ੍ਚਾਨਿ ਪਟਿਵਿਜ੍ਝੀ’’ਤਿ ਪੁਚ੍ਛਿਂਸੁ. ਸੋ ਤਂ ਸਬ੍ਬਂ ਪਕਾਸੇਨ੍ਤੋ –

੬੨੦. ‘‘ਨੀਚੇ ਕੁਲਮ੍ਹਿ ਜਾਤੋਹਂ, ਦਲਿਦ੍ਦੋ ਅਪ੍ਪਭੋਜਨੋ;

ਹੀਨਕਮ੍ਮਂ ਮਮਂ ਆਸਿ, ਅਹੋਸਿਂ ਪੁਪ੍ਫਛਡ੍ਡਕੋ.

੬੨੧. ‘‘ਜਿਗੁਚ੍ਛਿਤੋ ਮਨੁਸ੍ਸਾਨਂ, ਪਰਿਭੂਤੋ ਚ ਵਮ੍ਭਿਤੋ;

ਨੀਚਂ ਮਨਂ ਕਰਿਤ੍ਵਾਨ, ਵਨ੍ਦਿਸ੍ਸਂ ਬਹੁਕਂ ਜਨਂ.

੬੨੨. ‘‘ਅਥਦ੍ਦਸਾਸਿਂ ਸਮ੍ਬੁਦ੍ਧਂ, ਭਿਕ੍ਖੁਸਙ੍ਘਪੁਰਕ੍ਖਤਂ;

ਪਵਿਸਨ੍ਤਂ ਮਹਾਵੀਰਂ, ਮਗਧਾਨਂ ਪੁਰੁਤ੍ਤਮਂ.

੬੨੩. ‘‘ਨਿਕ੍ਖਿਪਿਤ੍ਵਾਨ ਬ੍ਯਾਭਙ੍ਗਿਂ, ਵਨ੍ਦਿਤੁਂ ਉਪਸਙ੍ਕਮਿਂ;

ਮਮੇਵ ਅਨੁਕਮ੍ਪਾਯ, ਅਟ੍ਠਾਸਿ ਪੁਰਿਸੁਤ੍ਤਮੋ.

੬੨੪. ‘‘ਵਨ੍ਦਿਤ੍ਵਾ ਸਤ੍ਥੁਨੋ ਪਾਦੇ, ਏਕਮਨ੍ਤਂ ਠਿਤੋ ਤਦਾ;

ਪਬ੍ਬਜ੍ਜਂ ਅਹਮਾਯਾਚਿਂ, ਸਬ੍ਬਸਤ੍ਤਾਨਮੁਤ੍ਤਮਂ.

੬੨੫. ‘‘ਤਤੋ ਕਾਰੁਣਿਕੋ ਸਤ੍ਥਾ, ਸਬ੍ਬਲੋਕਾਨੁਕਮ੍ਪਕੋ;

‘ਏਹਿ ਭਿਕ੍ਖੂ’ਤਿ ਮਂ ਆਹ, ਸਾ ਮੇ ਆਸੂਪਸਮ੍ਪਦਾ.

੬੨੬. ‘‘ਸੋਹਂ ਏਕੋ ਅਰਞ੍ਞਸ੍ਮਿਂ, ਵਿਹਰਨ੍ਤੋ ਅਤਨ੍ਦਿਤੋ.

ਅਕਾਸਿਂ ਸਤ੍ਥੁ ਵਚਨਂ, ਯਥਾ ਮਂ ਓਵਦੀ ਜਿਨੋ.

੬੨੭. ‘‘ਰਤ੍ਤਿਯਾ ਪਠਮਂ ਯਾਮਂ, ਪੁਬ੍ਬਜਾਤਿਮਨੁਸ੍ਸਰਿਂ;

ਰਤ੍ਤਿਯਾ ਮਜ੍ਝਿਮਂ ਯਾਮਂ, ਦਿਬ੍ਬਚਕ੍ਖੁਂ ਵਿਸੋਧਯਿਂ;

ਰਤ੍ਤਿਯਾ ਪਚ੍ਛਿਮੇ ਯਾਮੇ, ਤਮੋਖਨ੍ਧਂ ਪਦਾਲਯਿਂ.

੬੨੮. ‘‘ਤਤੋ ਰਤ੍ਯਾਵਿਵਸਾਨੇ, ਸੂਰਿਯੁਗ੍ਗਮਨਂ ਪਤਿ; (ਜਾ. ੧.੧੧.੭੯);

ਇਨ੍ਦੋ ਬ੍ਰਹ੍ਮਾ ਚ ਆਗਨ੍ਤ੍ਵਾ, ਮਂ ਨਮਸ੍ਸਿਂਸੁ ਪਞ੍ਜਲੀ.

੬੨੯. ‘‘ਨਮੋ ਤੇ ਪੁਰਿਸਾਜਞ੍ਞ, ਨਮੋ ਤੇ ਪੁਰਿਸੁਤ੍ਤਮ;

ਯਸ੍ਸ ਤੇ ਆਸਵਾ ਖੀਣਾ, ਦਕ੍ਖਿਣੇਯ੍ਯੋਸਿ ਮਾਰਿਸ.

੬੩੦. ‘‘ਤਤੋ ਦਿਸ੍ਵਾਨ ਮਂ ਸਤ੍ਥਾ, ਦੇਵਸਙ੍ਘਪੁਰਕ੍ਖਤਂ;

ਸਿਤਂ ਪਾਤੁਕਰਿਤ੍ਵਾਨ, ਇਮਮਤ੍ਥਂ ਅਭਾਸਥ.

੬੩੧. ‘‘ਤਪੇਨ ਬ੍ਰਹ੍ਮਚਰਿਯੇਨ, ਸਂਯਮੇਨ ਦਮੇਨ ਚ;

ਏਤੇਨ ਬ੍ਰਾਹ੍ਮਣੋ ਹੋਤਿ, ਏਤਂ ਬ੍ਰਾਹ੍ਮਣਮੁਤ੍ਤਮ’’ਨ੍ਤਿ. –

ਇਮਾਹਿ ਗਾਥਾਹਿ ਸੀਹਨਾਦਂ ਨਦਿ.

ਤਤ੍ਥ ਨੀਚੇਤਿ ਲਾਮਕੇ ਸਬ੍ਬਨਿਹੀਨੇ. ਉਚ੍ਚਨੀਚਭਾਵੋ ਹਿ ਨਾਮ ਸਤ੍ਤਾਨਂ ਉਪਾਦਾਯੁਪਾਦਾਯ, ਅਯਂ ਪਨ ਸਬ੍ਬਨਿਹੀਨੇ ਪੁਕ੍ਕੁਸਕੁਲੇ ਉਪ੍ਪਨ੍ਨਤਂ ਦਸ੍ਸੇਨ੍ਤੋ ‘‘ਨੀਚੇ ਕੁਲਮ੍ਹਿ ਜਾਤੋ’’ਤਿ ਆਹ. ਤੇਨ ਵੁਤ੍ਤਂ – ‘‘ਨੀਚੇਤਿ ਲਾਮਕੇ ਸਬ੍ਬਨਿਹੀਨੇ’’ਤਿ. ਦਲਿਦ੍ਦੋਤਿ ਦੁਗ੍ਗਤੋ, ਦਲਿਦ੍ਦਾਪਿ ਕੇਚਿ ਕਦਾਚਿ ਘਾਸਚ੍ਛਾਦਨਸ੍ਸ ਲਾਭਿਨੋ, ਅਕਸਿਰਵੁਤ੍ਤਿਨੋ ਹੋਨ੍ਤਿ, ਅਹਂ ਪਨ ਸਬ੍ਬਕਾਲਂ ਕਸਿਰਵੁਤ੍ਤਿਤਾਯ ਹੀਨੋ ਉਦ੍ਧਨਂ ਉਪਟ੍ਠਪਿਤਉਕ੍ਖਲਿਕੋ ਦਸ੍ਸਨਯੁਤ੍ਤਂ ਥੇਵਕਮ੍ਪਿ ਅਪਸ੍ਸਿਂ ਯੇਵਾਤਿ ਦਸ੍ਸੇਨ੍ਤੋ ‘‘ਅਪ੍ਪਭੋਜਨੋ’’ਤਿ ਆਹ. ਨੀਚਕੁਲਿਕਾ ਦਲਿਦ੍ਦਾਪਿ ਕੇਚਿ ਅਨੀਚਕਮ੍ਮਾਜੀਵਾ ਹੋਨ੍ਤਿ, ਮਯ੍ਹਂ ਪਨ ਨ ਤਥਾਤਿ ਦਸ੍ਸੇਨ੍ਤੋ ਆਹ ‘‘ਹੀਨਕਮ੍ਮਂ ਮਮਂ ਆਸੀ’’ਤਿ. ਕੀਦਿਸਨ੍ਤਿ ਚੇ? ਅਹੋਸਿਂ ਪੁਪ੍ਫਛਡ੍ਡਕੋ, ਹਤ੍ਥਵਿਕਲਸ੍ਸ ਹਤ੍ਥਵਾਤਿ ਵਿਯ ਉਪਚਾਰਵਸੇਨਾਯਂ ਇਮਸ੍ਸ ਸਮਞ੍ਞਾ ਅਹੋਸਿ ਯਦਿਦਂ ‘‘ਪੁਪ੍ਫਛਡ੍ਡਕੋ’’ਤਿ. ਮਿਲਾਤਪੁਪ੍ਫਸਨ੍ਥਰਵਣ੍ਣਤਾਯ ਵਾ ਉਕ੍ਕਾਰਭੂਮਿਯਾ ਏਵਂ ਵੁਤ੍ਤੋ.

ਜਿਗੁਚ੍ਛਿਤੋਤਿ ਜਾਤਿਯਾ ਚੇਵ ਕਮ੍ਮੁਨਾ ਚ ਹੀਲ਼ਿਤੋ. ਮਨੁਸ੍ਸਾਨਨ੍ਤਿ ਮਨੁਸ੍ਸੇਹਿ. ਪਰਿਭੂਤੋਤਿ ਅਵਞ੍ਞਾਤੋ. ਵਮ੍ਭਿਤੋਤਿ ਖੁਂਸਿਤੋ. ਨੀਚਂ ਮਨਂ ਕਰਿਤ੍ਵਾਨਾਤਿ ਅਞ੍ਞੇ ਮਨੁਸ੍ਸੇ ਸਿਨੇਰੁਂ ਵਿਯ ਉਕ੍ਖਿਪਿਤ੍ਵਾ ਤੇਸਂ ਪਾਦਪਂਸੁਤੋਪਿ ਅਤ੍ਤਾਨਂ ਨਿਹੀਨਂ ਕਤ੍ਵਾ ਪਵਤ੍ਤਿਯਾ ਨੀਚਂ ਨਿਹੀਨਂ ਮਨਂ ਕਤ੍ਵਾ. ਵਨ੍ਦਿਸ੍ਸਂ ਬਹੁਕਂ ਜਨਨ੍ਤਿ ਪੁਥੁਮਹਾਜਨਂ ਦਿਟ੍ਠਦਿਟ੍ਠਕਾਲੇ ਵਨ੍ਦਿਂ ਸਿਰਸਿ ਅਞ੍ਜਲਿਂ ਕਰੋਨ੍ਤੋ ਪਣਾਮਿਂ.

ਅਥਾਤਿ ਅਧਿਕਾਰਨ੍ਤਰਦੀਪਨੇ ਨਿਪਾਤੋ. ਅਦ੍ਦਸਾਸਿਨ੍ਤਿ ਅਦ੍ਦਕ੍ਖਿਂ. ਮਗਧਾਨਨ੍ਤਿ ਮਗਧਾ ਨਾਮ ਜਾਨਪਦਿਨੋ ਰਾਜਕੁਮਾਰਾ, ਤੇਸਂ ਨਿਵਾਸੋ ਏਕੋਪਿ ਜਨਪਦੋ ਰੁਲ਼੍ਹਿਯਾ ‘‘ਮਗਧਾਨ’’ਨ੍ਤਿ ਵੁਤ੍ਤੋ, ਮਗਧਜਨਪਦਸ੍ਸਾਤਿ ਅਤ੍ਥੋ. ਪੁਰੁਤ੍ਤਮਨ੍ਤਿ ਉਤ੍ਤਮਂ ਨਗਰਂ.

ਬ੍ਯਾਭਙ੍ਗਿਨ੍ਤਿ ਕਾਜਂ. ਪਬ੍ਬਜ੍ਜਂ ਅਹਮਾਯਾਚਿਨ੍ਤਿ, ‘‘ਸੁਨੀਤ, ਪਬ੍ਬਜਿਤੁਂ ਸਕ੍ਖਿਸ੍ਸਸੀ’’ਤਿ ਸਤ੍ਥਾਰਾ ਓਕਾਸੇ ਕਤੇ ਅਹਂ ਪਬ੍ਬਜ੍ਜਂ ਅਯਾਚਿਂ. ਆਸੂਪਸਮ੍ਪਦਾਤਿ ‘‘ਏਹਿ, ਭਿਕ੍ਖੂ’’ਤਿ ਸਤ੍ਥੁ ਵਚਨਮਤ੍ਤੇਨ ਆਸਿ ਉਪਸਮ੍ਪਦਾ. ਯਥਾ ਮਂ ਓਵਦੀਤਿ ‘‘ਏਵਂ ਸਮਥਪੁਬ੍ਬਙ੍ਗਮਂ ਵਿਪਸ੍ਸਨਂ ਭਾਵੇਹੀ’’ਤਿ ਯਥਾ ਮਂ ਓਵਦਿ, ਤਥਾ ਸਤ੍ਥੁਨੋ ਵਚਨਂ ਅਕਾਸਿਂ ਪਟਿਪਜ੍ਜਿਂ. ਰਤ੍ਤਿਯਾਤਿਆਦਿ ਤਸ੍ਸਾ ਪਟਿਪਤ੍ਤਿਯਾ ਰਸਦਸ੍ਸਨਂ. ਤਤ੍ਥ ਪੁਬ੍ਬੇਨਿਵਾਸਞਾਣਂ ਅਨਾਗਤਂਸਞਾਣਞ੍ਚ ਬਹੁਕਿਚ੍ਚਨ੍ਤਿ ‘‘ਪਠਮਂ ਯਾਮਂ ਮਜ੍ਝਿਮਂ ਯਾਮ’’ਨ੍ਤਿ ਅਚ੍ਚਨ੍ਤਸਂਯੋਗਵਸੇਨ ਉਪਯੋਗਵਚਨਂ ਵੁਤ੍ਤਂ. ਨ ਤਥਾ ਆਸਵਕ੍ਖਯਞਾਣਂ ਏਕਾਭਿਸਮਯਵਸੇਨ ਪਵਤ੍ਤਨਤੋਤਿ ‘‘ਪਚ੍ਛਿਮੇ ਯਾਮੇ’’ਤਿ ਭੁਮ੍ਮਵਸੇਨ ਵੁਤ੍ਤਨ੍ਤਿ ਦਟ੍ਠਬ੍ਬਂ. ਇਨ੍ਦੋਤਿ ਸਕ੍ਕੋ ਦੇਵਰਾਜਾ. ਬ੍ਰਹ੍ਮਾਤਿ ਮਹਾਬ੍ਰਹ੍ਮਾ. ਇਨ੍ਦਬ੍ਰਹ੍ਮਗ੍ਗਹਣੇਨ ਅਞ੍ਞੇਸਂ ਕਾਮਦੇਵਾਨਂ ਬ੍ਰਹ੍ਮੂਨਞ੍ਚ ਆਗਮਨਂ ਵੁਤ੍ਤਮੇਵਾਤਿ ਦਟ੍ਠਬ੍ਬਂ. ਉਕ੍ਕਟ੍ਠਨਿਦ੍ਦੇਸੋ ਹੇਸ ਯਥਾ ‘‘ਰਾਜਾ ਆਗਤੋ’’ਤਿ. ਨਮਸ੍ਸਿਂਸੂਤਿ ਕਾਯੇਨ ਵਾਚਾਯ ਚ ਨਮਕ੍ਕਾਰਂ ਅਕਂਸੁ.

ਤਤ੍ਥ ਕਾਯੇਨ ਕਤਂ ਨਮਕ੍ਕਾਰਂ ਦਸ੍ਸੇਨ੍ਤੋ ‘‘ਪਞ੍ਜਲੀ’’ਤਿ ਵਤ੍ਵਾ ਵਾਚਾਯ ਕਤਂ ਦਸ੍ਸੇਤੁਂ ‘‘ਨਮੋ ਤੇ’’ਤਿਆਦਿ ਵੁਤ੍ਤਂ. ਦੇਵਸਙ੍ਘਪੁਰਕ੍ਖਤਨ੍ਤਿ ਦੇਵਗ੍ਗਹਣੇਨ ਉਪਪਤ੍ਤਿਦੇਵਭਾਵਤੋ ਬ੍ਰਹ੍ਮਾਨੋਪਿ ਗਹਿਤਾ. ਸਿਤਂ ਪਾਤੁਕਰਿਤ੍ਵਾਨਾਤਿ ਅਤ੍ਤਨੋ ਓਵਾਦਸ੍ਸ ਮਹਪ੍ਫਲਤਂ ਦੇਵਬ੍ਰਹ੍ਮੂਨਞ੍ਚ ਗੁਣਸਮ੍ਪਤ੍ਤਿਂ ਨਿਸ੍ਸਾਯ ਸਤ੍ਥਾ ਸਿਤਂ ਪਾਤ੍ਵਾਕਾਸਿ. ਪਾਤੁਕਰੋਨ੍ਤੋ ਚ ਨ ਅਞ੍ਞੇ ਵਿਯ ਦਨ੍ਤੇ ਵਿਦਂਸੇਤਿ, ਮੁਖਾਧਾਨਂ ਪਨ ਥੋਕਂ ਵਿਵਰਤਿ, ਤਤ੍ਤਕੇਨ ਚ ਅਭਿਭੂਤਦਿਬ੍ਬਫਲਿਕਮੁਤ੍ਤਰਸ੍ਮਿਯੋ ਅਵਹਸਿਤਤਾਰਕਾਸਸਿਮਰੀਚਿਯੋ ਸੁਸੁਕ੍ਕਦਾਠਸਮ੍ਭਵਾ ਘਨਰਸ੍ਮਿਯੋ ਨਿਕ੍ਖਮਿਤ੍ਵਾ ਤਿਕ੍ਖਤ੍ਤੁਂ ਸਤ੍ਥੁ ਮੁਖਂ ਪਦਕ੍ਖਿਣਂ ਕਰੋਨ੍ਤਿ, ਤਂ ਦਿਸ੍ਵਾ ਪਚ੍ਛਤੋ ਗਚ੍ਛਨ੍ਤਾਪਿ ਸਤ੍ਥਾ ਸਿਤਂ ਪਾਤ੍ਵਾਕਾਸੀਤਿ ਸਞ੍ਜਾਨਨ੍ਤਿ.

ਤਪੇਨਾਤਿ ਇਨ੍ਦ੍ਰਿਯਸਂਵਰੇਨ, ‘‘ਧੁਤਧਮ੍ਮਸਮਾਦਾਨੇਨਾ’’ਤਿ ਕੇਚਿ. ਸਂਯਮੇਨਾਤਿ ਸੀਲੇਨ. ਦਮੇਨਾਤਿ ਪਞ੍ਞਾਯ. ਬ੍ਰਹ੍ਮਚਰਿਯੇਨਾਤਿ ਅਵਸਿਟ੍ਠਸੇਟ੍ਠਚਰਿਯਾਯ. ਏਤੇਨਾਤਿ ਯਥਾਵੁਤ੍ਤੇਨ ਤਪਾਦਿਨਾ. ਬ੍ਰਾਹ੍ਮਣੋ ਹੋਤਿ ਬਾਹਿਤਪਾਪਭਾਵਤੋ. ਏਤਨ੍ਤਿ ਤਪਾਦਿ ਯਥਾਵੁਤ੍ਤਂ. ਬ੍ਰਾਹ੍ਮਣਮੁਤ੍ਤਮਨ੍ਤਿ ਉਤ੍ਤਮਂ ਬ੍ਰਾਹ੍ਮਣਂ, ਬ੍ਰਾਹ੍ਮਣੇਸੁ ਵਾ ਉਤ੍ਤਮਂ ਸਬ੍ਬਸੇਟ੍ਠਂ, ਅਹੂਤਿ ਵਚਨਸੇਸੋ. ਬ੍ਰਾਹ੍ਮਣਨ੍ਤਿ ਵਾ ਬ੍ਰਹ੍ਮਞ੍ਞਮਾਹ, ਏਵਂ ਉਤ੍ਤਮਂ ਬ੍ਰਹ੍ਮਞ੍ਞਂ, ਨ ਜਚ੍ਚਾਦੀਤਿ ਅਧਿਪ੍ਪਾਯੋ. ਨ ਹਿ ਜਾਤਿਕੁਲਪਦੇਸਗੋਤ੍ਤਸਮ੍ਪਤ੍ਤਿਆਦਯੋ ਅਰਿਯਭਾਵਸ੍ਸ ਕਾਰਣਂ, ਅਧਿਸੀਲਸਿਕ੍ਖਾਦਯੋ ਏਵ ਪਨ ਕਾਰਣਂ. ਤੇਨਾਹ –

‘‘ਯਥਾ ਸਙ੍ਕਾਰਠਾਨਸ੍ਮਿਂ, ਉਜ੍ਝਿਤਸ੍ਮਿਂ ਮਹਾਪਥੇ;

ਪਦੁਮਂ ਤਤ੍ਥ ਜਾਯੇਥ, ਸੁਚਿਗਨ੍ਧਂ ਮਨੋਰਮਂ.

‘‘ਏਵਂ ਸਙ੍ਕਾਰਭੂਤੇਸੁ, ਅਨ੍ਧਭੂਤੇ ਪੁਥੁਜ੍ਜਨੇ;

ਅਤਿਰੋਚਤਿ ਪਞ੍ਞਾਯ, ਸਮ੍ਮਾਸਮ੍ਬੁਦ੍ਧਸਾਵਕੋ’’ਤਿ. (ਧ. ਪ. ੫੮-੫੯);

ਏਵਂ ਥੇਰੋ ਤੇਹਿ ਭਿਕ੍ਖੂਹਿ ਪੁਚ੍ਛਿਤਮਤ੍ਥਂ ਇਮਾਹਿ ਗਾਥਾਹਿ ਵਿਸ੍ਸਜ੍ਜੇਨ੍ਤੋ ਸੀਹਨਾਦਂ ਨਦੀਤਿ.

ਸੁਨੀਤਤ੍ਥੇਰਗਾਥਾਵਣ੍ਣਨਾ ਨਿਟ੍ਠਿਤਾ.

ਦ੍ਵਾਦਸਕਨਿਪਾਤਵਣ੍ਣਨਾ ਨਿਟ੍ਠਿਤਾ.