੫. ਕਪ੍ਪਤ੍ਥੇਰਗਾਥਾਵਣ੍ਣਨਾ

ਨਾਨਾਕੁਲਮਲਸਮ੍ਪੁਣ੍ਣੋਤਿਆਦਿਕਾ ਆਯਸ੍ਮਤੋ ਕਪ੍ਪਤ੍ਥੇਰਸ੍ਸ ਗਾਥਾ. ਕਾ ਉਪ੍ਪਤ੍ਤਿ? ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਪੁਞ੍ਞਾਨਿ ਉਪਚਿਨਨ੍ਤੋ ਸਿਦ੍ਧਤ੍ਥਸ੍ਸ ਭਗਵਤੋ ਕਾਲੇ ਵਿਭਵਸਮ੍ਪਨ੍ਨੇ ਕੁਲੇ ਨਿਬ੍ਬਤ੍ਤਿਤ੍ਵਾ ਪਿਤੁ ਅਚ੍ਚਯੇਨ ਵਿਞ੍ਞੁਤਂ ਪਤ੍ਤੋ ਨਾਨਾਵਿਰਾਗਵਣ੍ਣਵਿਚਿਤ੍ਤੇਹਿ ਵਤ੍ਥੇਹਿ ਅਨੇਕਵਿਧੇਹਿ ਆਭਰਣੇਹਿ ਨਾਨਾਵਿਧੇਹਿ ਮਣਿਰਤਨੇਹਿ ਬਹੁਵਿਧੇਹਿ ਪੁਪ੍ਫਦਾਮਮਾਲਾਦੀਹਿ ਚ ਕਪ੍ਪਰੁਕ੍ਖਂ ਨਾਮ ਅਲਙ੍ਕਰਿਤ੍ਵਾ ਤੇਨ ਸਤ੍ਥੁ ਥੂਪਂ ਪੂਜੇਸਿ. ਸੋ ਤੇਨ ਪੁਞ੍ਞਕਮ੍ਮੇਨ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਮਗਧਰਟ੍ਠੇ ਮਣ੍ਡਲਿਕਰਾਜਕੁਲੇ ਨਿਬ੍ਬਤ੍ਤਿਤ੍ਵਾ ਪਿਤੁ ਅਚ੍ਚਯੇਨ ਰਜ੍ਜੇ ਪਤਿਟ੍ਠਿਤੋ ਕਾਮੇਸੁ ਅਤਿਵਿਯ ਰਤ੍ਤੋ ਗਿਦ੍ਧੋ ਹੁਤ੍ਵਾ ਵਿਹਰਤਿ. ਤਂ ਸਤ੍ਥਾ ਮਹਾਕਰੁਣਾਸਮਾਪਤ੍ਤਿਤੋ ਵੁਟ੍ਠਾਯ ਲੋਕਂ ਵੋਲੋਕੇਨ੍ਤੋ ਞਾਣਜਾਲੇ ਪਞ੍ਞਾਯਮਾਨਂ ਦਿਸ੍ਵਾ, ‘‘ਕਿਂ ਨੁ ਖੋ ਭਵਿਸ੍ਸਤੀ’’ਤਿ ਆਵਜ੍ਜੇਨ੍ਤੋ, ‘‘ਏਸ ਮਮ ਸਨ੍ਤਿਕੇ ਅਸੁਭਕਥਂ ਸੁਤ੍ਵਾ ਕਾਮੇਸੁ ਵਿਰਤ੍ਤਚਿਤ੍ਤੋ ਹੁਤ੍ਵਾ ਪਬ੍ਬਜਿਤ੍ਵਾ ਅਰਹਤ੍ਤਂ ਪਾਪੁਣਿਸ੍ਸਤੀ’’ਤਿ ਞਤ੍ਵਾ ਆਕਾਸੇਨ ਤਤ੍ਥ ਗਨ੍ਤ੍ਵਾ –

੫੬੭. ‘‘ਨਾਨਾਕੁਲਮਲਸਮ੍ਪੁਣ੍ਣੋ, ਮਹਾਉਕ੍ਕਾਰਸਮ੍ਭਵੋ;

ਚਨ੍ਦਨਿਕਂਵ ਪਰਿਪਕ੍ਕਂ, ਮਹਾਗਣ੍ਡੋ ਮਹਾਵਣੋ.

੫੬੮. ‘‘ਪੁਬ੍ਬਰੁਹਿਰਸਮ੍ਪੁਣ੍ਣੋ, ਗੂਥਕੂਪੇਨ ਗਾਲ਼੍ਹਿਤੋ;

ਆਪੋਪਗ੍ਘਰਣੋ ਕਾਯੋ, ਸਦਾ ਸਨ੍ਦਤਿ ਪੂਤਿਕਂ.

੫੬੯. ‘‘ਸਟ੍ਠਿਕਣ੍ਡਰਸਮ੍ਬਨ੍ਧੋ, ਮਂਸਲੇਪਨਲੇਪਿਤੋ;

ਚਮ੍ਮਕਞ੍ਚੁਕਸਨ੍ਨਦ੍ਧੋ, ਪੂਤਿਕਾਯੋ ਨਿਰਤ੍ਥਕੋ.

੫੭੦. ‘‘ਅਟ੍ਠਿਸਙ੍ਘਾਤਘਟਿਤੋ, ਨ੍ਹਾਰੁਸੁਤ੍ਤਨਿਬਨ੍ਧਨੋ;

ਨੇਕੇਸਂ ਸਂਗਤੀਭਾਵਾ, ਕਪ੍ਪੇਤਿ ਇਰਿਯਾਪਥਂ.

੫੭੧. ‘‘ਧੁਵਪ੍ਪਯਾਤੋ ਮਰਣਾਯ, ਮਚ੍ਚੁਰਾਜਸ੍ਸ ਸਨ੍ਤਿਕੇ;

ਇਧੇਵ ਛਡ੍ਡਯਿਤ੍ਵਾਨ, ਯੇਨਕਾਮਙ੍ਗਮੋ ਨਰੋ.

੫੭੨. ‘‘ਅਵਿਜ੍ਜਾਯ ਨਿਵੁਤੋ ਕਾਯੋ, ਚਤੁਗਨ੍ਥੇਨ ਗਨ੍ਥਿਤੋ;

ਓਘਸਂਸੀਦਨੋ ਕਾਯੋ, ਅਨੁਸਯਾਜਾਲਮੋਤ੍ਥਤੋ.

੫੭੩. ‘‘ਪਞ੍ਚਨੀਵਰਣੇ ਯੁਤ੍ਤੋ, ਵਿਤਕ੍ਕੇਨ ਸਮਪ੍ਪਿਤੋ;

ਤਣ੍ਹਾਮੂਲੇਨਾਨੁਗਤੋ, ਮੋਹਚ੍ਛਾਦਨਛਾਦਿਤੋ.

੫੭੪. ‘‘ਏਵਾਯਂ ਵਤ੍ਤਤੇ ਕਾਯੋ, ਕਮ੍ਮਯਨ੍ਤੇਨ ਯਨ੍ਤਿਤੋ;

ਸਮ੍ਪਤ੍ਤਿ ਚ ਵਿਪਤ੍ਯਨ੍ਤਾ, ਨਾਨਾਭਾਵੋ ਵਿਪਜ੍ਜਤਿ.

੫੭੫. ‘‘ਯੇਮਂ ਕਾਯਂ ਮਮਾਯਨ੍ਤਿ, ਅਨ੍ਧਬਾਲਾ ਪੁਥੁਜ੍ਜਨਾ;

ਵਡ੍ਢੇਨ੍ਤਿ ਕਟਸਿਂ ਘੋਰਂ, ਆਦਿਯਨ੍ਤਿ ਪੁਨਬ੍ਭਵਂ.

੫੭੬. ‘‘ਯੇਮਂ ਕਾਯਂ ਵਿਵਜ੍ਜੇਨ੍ਤਿ, ਗੂਥਲਿਤ੍ਤਂਵ ਪਨ੍ਨਗਂ;

ਭਵਮੂਲਂ ਵਮਿਤ੍ਵਾਨ, ਪਰਿਨਿਬ੍ਬਿਸ੍ਸਨ੍ਤਿਨਾਸਵਾ’’ਤਿ. –

ਇਮਾਹਿ ਗਾਥਾਹਿ ਤਸ੍ਸ ਅਸੁਭਕਥਂ ਕਥੇਸਿ. ਸੋ ਸਤ੍ਥੁ ਸਮ੍ਮੁਖਾ ਅਨੇਕਾਕਾਰਵੋਕਾਰਂ ਯਾਥਾਵਤੋ ਸਰੀਰਸਭਾਵਵਿਭਾਵਨਂ ਅਸੁਭਕਥਂ ਸੁਤ੍ਵਾ ਸਕੇਨ ਕਾਯੇਨ ਅਟ੍ਟੀਯਮਾਨੋ ਹਰਾਯਮਾਨੋ ਜਿਗੁਚ੍ਛਮਾਨੋ ਸਂਵਿਗ੍ਗਹਦਯੋ ਸਤ੍ਥਾਰਂ ਵਨ੍ਦਿਤ੍ਵਾ, ‘‘ਲਭੇਯ੍ਯਾਹਂ, ਭਨ੍ਤੇ, ਭਗਵਤੋ ਸਨ੍ਤਿਕੇ ਪਬ੍ਬਜ੍ਜ’’ਨ੍ਤਿ ਪਬ੍ਬਜ੍ਜਂ ਯਾਚਿ. ਸਤ੍ਥਾ ਸਮੀਪੇ ਠਿਤਮਞ੍ਞਤਰਂ ਭਿਕ੍ਖੁਂ ਆਣਾਪੇਸਿ – ‘‘ਗਚ੍ਛ, ਭਿਕ੍ਖੁ, ਇਮਂ ਪਬ੍ਬਾਜੇਤ੍ਵਾ ਉਪਸਮ੍ਪਾਦੇਤ੍ਵਾ ਆਨੇਹੀ’’ਤਿ. ਸੋ ਤਂ ਤਚਪਞ੍ਚਕਕਮ੍ਮਟ੍ਠਾਨਂ ਦਤ੍ਵਾ ਪਬ੍ਬਾਜੇਸਿ. ਸੋ ਖੁਰਗ੍ਗੇਯੇਵ ਸਹ ਪਟਿਸਮ੍ਭਿਦਾਹਿ ਅਰਹਤ੍ਤਂ ਪਾਪੁਣਿ. ਤੇਨ ਵੁਤ੍ਤਂ ਅਪਦਾਨੇ (ਅਪ. ਤੇਰ ੧.੪.੧੦੨-੧੦੭) –

‘‘ਸਿਦ੍ਧਤ੍ਥਸ੍ਸ ਭਗਵਤੋ, ਥੂਪਸੇਟ੍ਠਸ੍ਸ ਸਮ੍ਮੁਖਾ;

ਵਿਚਿਤ੍ਤਦੁਸ੍ਸੇ ਲਗੇਤ੍ਵਾ, ਕਪ੍ਪਰੁਕ੍ਖਂ ਠਪੇਸਹਂ.

‘‘ਯਂ ਯਂ ਯੋਨੁਪਪਜ੍ਜਾਮਿ, ਦੇਵਤ੍ਤਂ ਅਥ ਮਾਨੁਸਂ;

ਸੋਭਯਨ੍ਤੋ ਮਮ ਦ੍ਵਾਰਂ, ਕਪ੍ਪਰੁਕ੍ਖੋ ਪਤਿਟ੍ਠਤਿ.

‘‘ਅਹਞ੍ਚ ਪਰਿਸਾ ਚੇਵ, ਯੇ ਕੇਚਿ ਮਮਵਸ੍ਸਿਤਾ;

ਤਮ੍ਹਾ ਦੁਸ੍ਸਂ ਗਹੇਤ੍ਵਾਨ, ਨਿਵਾਸੇਮ ਮਯਂ ਸਦਾ.

‘‘ਚਤੁਨ੍ਨਵੁਤਿਤੋ ਕਪ੍ਪੇ, ਯਂ ਰੁਕ੍ਖਂ ਠਪਯਿਂ ਅਹਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਕਪ੍ਪਰੁਕ੍ਖਸ੍ਸਿਦਂ ਫਲਂ.

‘‘ਇਤੋ ਚ ਸਤ੍ਤਮੇ ਕਪ੍ਪੇ, ਸੁਚੇਲ਼ਾ ਅਟ੍ਠ ਖਤ੍ਤਿਯਾ;

ਸਤ੍ਤਰਤਨਸਮ੍ਪਨ੍ਨਾ, ਚਕ੍ਕਵਤ੍ਤੀ ਮਹਬ੍ਬਲਾ.

‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨ’’ਨ੍ਤਿ.

ਅਰਹਤ੍ਤਂ ਪਨ ਪਤ੍ਵਾ ਲਦ੍ਧੂਪਸਮ੍ਪਦੋ ਸਤ੍ਥਾਰਂ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸਿਨ੍ਨੋ ਅਞ੍ਞਂ ਬ੍ਯਾਕਰੋਨ੍ਤੋ ਤਾ ਏਵ ਗਾਥਾ ਅਭਾਸਿ. ਤੇਨੇਵ ਤਾ ਥੇਰਗਾਥਾ ਨਾਮ ਜਾਤਾ.

ਤਤ੍ਥ ਨਾਨਾਕੁਲਮਲਸਮ੍ਪੁਣ੍ਣੋਤਿ, ਨਾਨਾਕੁਲੇਹਿ ਨਾਨਾਭਾਗੇਹਿ ਮਲੇਹਿ ਸਮ੍ਪੁਣ੍ਣੋ, ਕੇਸਲੋਮਾਦਿਨਾਨਾਵਿਧਅਸੁਚਿਕੋਟ੍ਠਾਸਭਰਿਤੋਤਿ ਅਤ੍ਥੋ. ਮਹਾਉਕ੍ਕਾਰਸਮ੍ਭਵੋਤਿ, ਉਕ੍ਕਾਰੋ ਵੁਚ੍ਚਤਿ ਵਚ੍ਚਕੂਪਂ. ਯਤ੍ਤਕਵਯਾ ਮਾਤਾ, ਤਤ੍ਤਕਂ ਕਾਲਂ ਕਾਰਪਰਿਸੇਦਿਤਵਚ੍ਚਕੂਪਸਦਿਸਤਾਯ ਮਾਤੁ ਕੁਚ੍ਛਿ ਇਧ ‘‘ਮਹਾਉਕ੍ਕਾਰੋ’’ਤਿ ਅਧਿਪ੍ਪੇਤੋ. ਸੋ ਕੁਚ੍ਛਿ ਸਮ੍ਭਵੋ ਉਪ੍ਪਤ੍ਤਿਟ੍ਠਾਨਂ ਏਤਸ੍ਸਾਤਿ ਮਹਾਉਕ੍ਕਾਰਸਮ੍ਭਵੋ. ਚਨ੍ਦਨਿਕਂਵਾਤਿ ਚਨ੍ਦਨਿਕਂ ਨਾਮ ਉਚ੍ਛਿਟ੍ਠੋਦਕਗਬ੍ਭਮਲਾਦੀਨਂ ਛਡ੍ਡਨਟ੍ਠਾਨਂ, ਯਂ ਜਣ੍ਣੁਮਤ੍ਤਂ ਅਸੁਚਿਭਰਿਤਮ੍ਪਿ ਹੋਤਿ, ਤਾਦਿਸਨ੍ਤਿ ਅਤ੍ਥੋ. ਪਰਿਪਕ੍ਕਨ੍ਤਿ, ਪਰਿਣਤਂ ਪੁਰਾਣਂ. ਤੇਨ ਯਥਾ ਚਣ੍ਡਾਲਗਾਮਦ੍ਵਾਰੇ ਨਿਦਾਘਸਮਯੇ ਥੁਲ੍ਲਫੁਸਿਤਕੇ ਦੇਵੇ ਵਸ੍ਸਨ੍ਤੇ ਉਦਕੇਨ ਸਮੁਪਬ੍ਯੂਲ਼੍ਹਮੁਤ੍ਤਕਰੀਸਅਟ੍ਠਿਚਮ੍ਮਨ੍ਹਾਰੁਖਣ੍ਡਖੇਲ਼ਸਿਙ੍ਘਾਣਿਕਾਦਿਨਾਨਾਕੁਣਪਭਰਿਤਂ ਕਦ੍ਦਮੋਦਕਾਲੁਲ਼ਿਤਂ ਕਤਿਪਯਦਿਵਸਾਤਿਕ੍ਕਮੇਨ ਸਂਜਾਤ ਕਿਮਿਕੁਲਾਕੁਲਂ ਸੂਰਿਯਾਤਪਸਨ੍ਤਾਪਕੁਥਿਤਂ ਉਪਰਿ ਫੇਣਪੁਬ੍ਬੁਲ਼ਕਾਨਿ ਮੁਞ੍ਚਨ੍ਤਂ ਅਭਿਨੀਲਵਣ੍ਣਂ ਪਰਮਦੁਗ੍ਗਨ੍ਧਂ ਜੇਗੁਚ੍ਛਂ ਚਨ੍ਦਨਿਕਾਵਾਟਂ ਨੇਵ ਉਪਗਨ੍ਤੁਂ, ਨ ਦਟ੍ਠੁਂ ਅਰਹਰੂਪਂ ਹੁਤ੍ਵਾ ਤਿਟ੍ਠਤਿ, ਤਥਾਰੂਪੋਯਂ ਕਾਯੋਤਿ ਦਸ੍ਸੇਤਿ. ਸਦਾ ਦੁਕ੍ਖਤਾਮੂਲਯੋਗਤੋ ਅਸੁਚਿਪਗ੍ਘਰਣਤੋ ਉਪ੍ਪਾਦਜਰਾਮਰਣੇਹਿ ਉਦ੍ਧੁਮਾਯਨਪਰਿਪਚ੍ਚਨਭਿਜ੍ਜਨਸਭਾਵਤ੍ਤਾ ਚ ਮਹਨ੍ਤੋ ਗਣ੍ਡੋ ਵਿਯਾਤਿ ਮਹਾਗਣ੍ਡੋ. ਸਬ੍ਬਤ੍ਥਕਮੇਵ ਦੁਕ੍ਖਵੇਦਨਾਨੁਬਦ੍ਧਤ੍ਤਾ ਗਣ੍ਡਾਨਂ ਸਹਨਤੋ ਅਸੁਚਿਵਿਸ੍ਸਨ੍ਦਨਤੋ ਚ ਮਹਨ੍ਤੋ ਵਣੋ ਵਿਯਾਤਿ ਮਹਾਵਣੋ ਗੂਥਕੂਪੇਨ ਗਾਲ਼ਿਤੋਤਿ, ਵਚ੍ਚਕੂਪੇਨ ਵਚ੍ਚੇਨੇਵ ਵਾ ਭਰਿਤੋ. ‘‘ਗੂਥਕੂਪਨਿਗਾਲ਼੍ਹਿਤੋ’’ਤਿਪਿ ਪਾਲ਼ਿ, ਵਚ੍ਚਕੂਪਤੋ ਨਿਕ੍ਖਨ੍ਤੋਤਿ ਅਤ੍ਥੋ. ਆਪੋਪਗ੍ਘਰਣੋ ਕਾਯੋ, ਸਦਾ ਸਨ੍ਦਤਿ ਪੂਤਿਕਨ੍ਤਿ, ਅਯਂ ਕਾਯੋ ਆਪੋਧਾਤੁਯਾ ਸਦਾ ਪਗ੍ਘਰਣਸੀਲੋ, ਤਞ੍ਚ ਖੋ ਪਿਤ੍ਤਸੇਮ੍ਹਸੇਦਮੁਤ੍ਤਾਦਿਕਂ ਪੂਤਿਕਂ ਅਸੁਚਿਂਯੇਵ ਸਨ੍ਦਤਿ, ਨ ਕਦਾਚਿ ਸੁਚਿਨ੍ਤਿ ਅਤ੍ਥੋ.

ਸਟ੍ਠਿਕਣ੍ਡਰਸਮ੍ਬਨ੍ਧੋਤਿ, ਗੀਵਾਯ ਉਪਰਿਮਭਾਗਤੋ ਪਟ੍ਠਾਯ ਸਰੀਰਂ ਵਿਨਦ੍ਧਮਾਨਾ ਸਰੀਰਸ੍ਸ ਪੁਰਿਮਪਚ੍ਛਿਮਦਕ੍ਖਿਣਵਾਮਪਸ੍ਸੇਸੁ ਪਚ੍ਚੇਕਂ ਪਞ੍ਚ ਪਞ੍ਚ ਕਤ੍ਵਾ ਵੀਸਤਿ, ਹਤ੍ਥਪਾਦੇ ਵਿਨਦ੍ਧਮਾਨਾ ਤੇਸਂ ਪੁਰਿਮਪਚ੍ਛਿਮਪਸ੍ਸੇਸੁ ਪਞ੍ਚ ਪਞ੍ਚ ਕਤ੍ਵਾ ਚਤ੍ਤਾਲੀਸਾਤਿ ਸਟ੍ਠਿਯਾ ਕਣ੍ਡਰੇਹਿ ਮਹਾਨ੍ਹਾਰੂਹਿ ਸਬ੍ਬਸੋ ਬਦ੍ਧੋ ਵਿਨਦ੍ਧੋਤਿ ਸਟ੍ਠਿਕਣ੍ਡਰਸਮ੍ਬਨ੍ਧੋ. ਮਂਸਲੇਪਨਲੇਪਿਤੋਤਿ, ਮਂਸਸਙ੍ਖਾਤੇਨ ਲੇਪਨੇਨ ਲਿਤ੍ਤੋ, ਨਵਮਂਸਪੇਸਿਸਤਾਨੁਲਿਤ੍ਤੋਤਿ ਅਤ੍ਥੋ. ਚਮ੍ਮਕਞ੍ਚੁਕਸਨ੍ਨਦ੍ਧੋਤਿ, ਚਮ੍ਮਸਙ੍ਖਾਤੇਨ ਕਞ੍ਚੁਕੇਨ ਸਬ੍ਬਸੋ ਓਨਦ੍ਧੋ ਪਰਿਯੋਨਦ੍ਧੋ ਪਰਿਚ੍ਛਿਨ੍ਨੋ. ਪੂਤਿਕਾਯੋਤਿ, ਸਬ੍ਬਸੋ ਪੂਤਿਗਨ੍ਧਿਕੋ ਕਾਯੋ. ਨਿਰਤ੍ਥਕੋਤਿ, ਨਿਪ੍ਪਯੋਜਨੋ. ਅਞ੍ਞੇਸਞ੍ਹਿ ਪਾਣੀਨਂ ਕਾਯੋ ਚਮ੍ਮਾਦਿਵਿਨਿਯੋਗੇਨ ਸਿਯਾ ਸਪ੍ਪਯੋਜਨੋ, ਨ ਤਥਾ ਮਨੁਸ੍ਸਕਾਯੋਤਿ. ਅਟ੍ਠਿਸਙ੍ਘਾਤਘਟਿਤੋਤਿ, ਅਤਿਰੇਕਤਿਸਤਾਨਂ ਅਟ੍ਠੀਨਂ ਸਙ੍ਘਾਤੇਨ ਘਟਿਤੋ ਸਮ੍ਬਨ੍ਧੋ. ਨ੍ਹਾਰੁਸੁਤ੍ਤਨਿਬਨ੍ਧਨੋਤਿ, ਸੁਤ੍ਤਸਦਿਸੇਹਿ ਨਵਹਿ ਨ੍ਹਾਰੁਸਤੇਹਿ ਨਿਬਨ੍ਧਿਤੋ. ਨੇਕੇਸਂ ਸਂਗਤੀਭਾਵਾਤਿ, ਚਤੁਮਹਾਭੂਤਜੀਵਿਤਿਨ੍ਦ੍ਰਿਯਅਸ੍ਸਾਸਪਸ੍ਸਾਸਵਿਞ੍ਞਾਣਾਦੀਨਂ ਸਮਵਾਯਸਮ੍ਬਨ੍ਧੇਨ ਸੁਤ੍ਤਮੇਰਕਸਮਵਾਯੇਨ ਯਨ੍ਤਂ ਵਿਯ ਠਾਨਾਦਿਇਰਿਯਾਪਥਂ ਕਪ੍ਪੇਤਿ.

ਧੁਵਪ੍ਪਯਾਤੋ ਮਰਣਾਯਾਤਿ, ਮਰਣਸ੍ਸ ਅਤ੍ਥਾਯ ਏਕਨ੍ਤਗਮਨੋ, ਨਿਬ੍ਬਤ੍ਤਿਤੋ ਪਟ੍ਠਾਯ ਮਰਣਂ ਪਤਿ ਪਵਤ੍ਤੋ. ਤਤੋ ਏਵ ਮਚ੍ਚੁਰਾਜਸ੍ਸ ਮਰਣਸ੍ਸ ਸਨ੍ਤਿਕੇ ਠਿਤੋ. ਇਧੇਵ ਛਡ੍ਡਯਿਤ੍ਵਾਨਾਤਿ, ਇਮਸ੍ਮਿਂਯੇਵ ਲੋਕੇ ਕਾਯਂ ਛਡ੍ਡੇਤ੍ਵਾ, ਯਥਾਰੁਚਿਤਟ੍ਠਾਨਗਾਮੀ ਅਯਂ ਸਤ੍ਤੋ, ਤਸ੍ਮਾ ‘‘ਪਹਾਯ ਗਮਨੀਯੋ ਅਯਂ ਕਾਯੋ’’ਤਿ ਏਵਮ੍ਪਿ ਸਙ੍ਗੋ ਨ ਕਾਤਬ੍ਬੋਤਿ ਦਸ੍ਸੇਤਿ.

ਅਵਿਜ੍ਜਾਯ ਨਿਵੁਤੋਤਿ, ਅਵਿਜ੍ਜਾਨੀਵਰਣੇਨ ਨਿਵੁਤੋ ਪਟਿਚ੍ਛਾਦਿਤਾਦੀਨਵੋ, ਅਞ੍ਞਥਾ ਕੋ ਏਤ੍ਥ ਸਙ੍ਗਂ ਜਨੇਯ੍ਯਾਤਿ ਅਧਿਪ੍ਪਾਯੋ. ਚਤੁਗਨ੍ਥੇਨਾਤਿ, ਅਭਿਜ੍ਝਾਕਾਯਗਨ੍ਥਾਦਿਨਾ ਚਤੁਬ੍ਬਿਧੇਨ ਗਨ੍ਥੇਨ ਗਨ੍ਥਿਤੋ, ਗਨ੍ਥਨਿਯਭਾਵੇਨ ਵਿਨਦ੍ਧਿਤੋ. ਓਘਸਂਸੀਦਨੋਤਿ, ਓਘਨਿਯਭਾਵੇਨ ਕਾਮੋਘਾਦੀਸੁ ਚਤੂਸੁ ਓਘੇਸੁ ਸਂਸੀਦਨਕੋ. ਅਪ੍ਪਹੀਨਭਾਵੇਨ ਸਨ੍ਤਾਨੇ ਅਨੁ ਅਨੁ ਸੇਨ੍ਤੀਤਿ ਅਨੁਸਯਾ, ਕਾਮਰਾਗਾਦਯੋ ਅਨੁਸਯਾ. ਤੇਸਂ ਜਾਲੇਨ ਓਤ੍ਥਤੋ ਅਭਿਭੂਤੋਤਿ ਅਨੁਸਯਾਜਾਲਮੋਤ੍ਥਤੋ. ਮਕਾਰੋ ਪਦਸਨ੍ਧਿਕਰੋ, ਗਾਥਾਸੁਖਤ੍ਥਂ ਦੀਘਂ ਕਤ੍ਵਾ ਵੁਤ੍ਤਂ. ਕਾਮਚ੍ਛਨ੍ਦਾਦਿਨਾ ਪਞ੍ਚਵਿਧੇਨ ਨੀਵਰਣੇਨ ਯੁਤ੍ਤੋ ਅਧਿਮੁਤ੍ਤੋਤਿ ਪਞ੍ਚਨੀਵਰਣੇ ਯੁਤ੍ਤੋ, ਕਰਣਤ੍ਥੇ ਭੁਮ੍ਮਵਚਨਂ.

ਕਾਮਵਿਤਕ੍ਕਾਦਿਨਾ ਮਿਚ੍ਛਾਵਿਤਕ੍ਕੇਨ ਸਮਪ੍ਪਿਤੋ ਸਮਸ੍ਸਿਤੋਤਿ ਵਿਤਕ੍ਕੇਨ ਸਮਪ੍ਪਿਤੋ. ਤਣ੍ਹਾਮੂਲੇਨਾਨੁਗਤੋਤਿ, ਤਣ੍ਹਾਸਙ੍ਖਾਤੇਨ ਭਵਮੂਲੇਨ ਅਨੁਬਦ੍ਧੋ. ਮੋਹਚ੍ਛਾਦਨਛਾਦਿਤੋਤਿ, ਸਮ੍ਮੋਹਸਙ੍ਖਾਤੇਨ ਆਵਰਣੇਨ ਪਲਿਗੁਣ੍ਠਿਤੋ. ਸਬ੍ਬਮੇਤਂ ਸਵਿਞ੍ਞਾਣਕਂ ਕਰਜਕਾਯਂ ਸਨ੍ਧਾਯ ਵਦਤਿ. ਸਵਿਞ੍ਞਾਣਕੋ ਹਿ ਅਤ੍ਤਭਾਵੋ ‘‘ਉਚ੍ਛਿਨ੍ਨਭਵਨੇਤ੍ਤਿਕੋ, ਭਿਕ੍ਖਵੇ, ਤਥਾਗਤਸ੍ਸ ਕਾਯੋ ਤਿਟ੍ਠਤਿ, ਅਯਞ੍ਚੇਵ ਕਾਯੋ ਬਹਿਦ੍ਧਾ ਚ ਨਾਮਰੂਪ’’ਨ੍ਤਿਆਦੀਸੁ (ਦੀ. ਨਿ. ੧.੧.੧੪੭) ਕਾਯੋਤਿ ਵੁਚ੍ਚਤਿ, ਏਵਾਯਂ ਵਤ੍ਤਤੇ ਕਾਯੋਤਿ ਏਵਂ ‘‘ਨਾਨਾਕੁਲਮਲਸਮ੍ਪੁਣ੍ਣੋ’’ਤਿਆਦਿਨਾ ‘‘ਅਵਿਜ੍ਜਾਯ ਨਿਵੁਤੋ’’ਤਿਆਦਿਨਾ ਚ ਵੁਤ੍ਤਪ੍ਪਕਾਰੇਨ ਅਯਂ ਕਾਯੋ ਵਤ੍ਤਤਿ, ਵਤ੍ਤਨ੍ਤੋ ਚ ਕਮ੍ਮਯਨ੍ਤੇਨ ਸੁਕਤਦੁਕ੍ਕਟੇਨ ਕਮ੍ਮਸਙ੍ਖਾਤੇਨ ਯਨ੍ਤੇਨ ਯਨ੍ਤਿਤੋ ਸਙ੍ਘਟਿਤੋ. ਯਥਾ ਵਾ ਖੇਮਨ੍ਤਂ ਗਨ੍ਤੁਂ ਨ ਸਕ੍ਕੋਤਿ, ਤਥਾ ਸਙ੍ਖੋਭਿਤੋ ਸੁਗਤਿਦੁਗ੍ਗਤੀਸੁ ਵਤ੍ਤਤਿ ਪਰਿਬ੍ਭਮਤਿ. ਸਮ੍ਪਤ੍ਤਿ ਚ ਵਿਪਤ੍ਯਨ੍ਤਾਤਿ ਯਾ ਏਤ੍ਥ ਸਮ੍ਪਤ੍ਤਿ, ਸਾ ਵਿਪਤ੍ਤਿਪਰਿਯੋਸਾਨਾ. ਸਬ੍ਬਞ੍ਹਿ ਯੋਬ੍ਬਨਂ ਜਰਾਪਰਿਯੋਸਾਨਂ, ਸਬ੍ਬਂ ਆਰੋਗ੍ਯਂ ਬ੍ਯਾਧਿਪਰਿਯੋਸਾਨਂ, ਸਬ੍ਬਂ ਜੀਵਿਤਂ ਮਰਣਪਰਿਯੋਸਾਨਂ, ਸਬ੍ਬੋ ਸਮਾਗਮੋ ਵਿਯੋਗਪਰਿਯੋਸਾਨੋ. ਤੇਨਾਹ ‘‘ਨਾਨਾਭਾਵੋ ਵਿਪਜ੍ਜਤੀ’’ਤਿ. ਨਾਨਾਭਾਵੋਤਿ, ਵਿਨਾਭਾਵੋ ਵਿਪ੍ਪਯੋਗੋ, ਸੋ ਕਦਾਚਿ ਵਿਪ੍ਪਯੁਞ੍ਜਕਸ੍ਸ ਵਸੇਨ, ਕਦਾਚਿ ਵਿਪ੍ਪਯੁਞ੍ਜਿਤਬ੍ਬਸ੍ਸ ਵਸੇਨਾਤਿ ਵਿਵਿਧਂ ਪਜ੍ਜਤਿ ਪਾਪੁਣੀਯਤਿ.

ਯੇਮਂ ਕਾਯਂ ਮਮਾਯਨ੍ਤੀਤਿ ਯੇ ਅਨ੍ਧਬਾਲਾ ਪੁਥੁਜ੍ਜਨਾ ਏਵਂ ਅਸੁਭਂ ਅਨਿਚ੍ਚਂ ਅਧੁਵਂ ਦੁਕ੍ਖਂ ਅਸਾਰਂ ਇਮਂ ਕਾਯਂ ‘‘ਮਮ ਇਦ’’ਨ੍ਤਿ ਗਣ੍ਹਨ੍ਤਾ ਮਮਾਯਨ੍ਤਿ ਛਨ੍ਦਰਾਗਂ ਉਪ੍ਪਾਦੇਨ੍ਤਿ, ਤੇ ਜਾਤਿਆਦੀਹਿ ਨਿਰਯਾਦੀਹਿ ਚ ਘੋਰਂ ਭਯਾਨਕਂ ਅਪਣ੍ਡਿਤੇਹਿ ਅਭਿਰਮਿਤਬ੍ਬਤੋ ਕਟਸਿਸਙ੍ਖਾਤਂ ਸਂਸਾਰਂ ਪੁਨਪ੍ਪੁਨਂ ਜਨਨਮਰਣਾਦੀਹਿ ਵਡ੍ਢੇਨ੍ਤਿ, ਤੇਨਾਹ ‘‘ਆਦਿਯਨ੍ਤਿ ਪੁਨਬ੍ਭਵ’’ਨ੍ਤਿ.

ਯੇਮਂ ਕਾਯਂ ਵਿਵਜ੍ਜੇਨ੍ਤਿ, ਗੂਥਲਿਤ੍ਤਂਵ ਪਨ੍ਨਗਨ੍ਤਿ ਯਥਾ ਨਾਮ ਪੁਰਿਸੋ ਸੁਖਕਾਮੋ ਜੀਵਿਤੁਕਾਮੋ ਗੂਥਗਤਂ ਆਸੀਵਿਸਂ ਦਿਸ੍ਵਾ ਜਿਗੁਚ੍ਛਨਿਯਤਾਯ ਵਾ ਸਪ੍ਪਟਿਭਯਤਾਯ ਵਾ ਵਿਵਜ੍ਜੇਤਿ ਨ ਅਲ੍ਲੀਯਤਿ, ਏਵਮੇਵਂ ਯੇ ਪਣ੍ਡਿਤਾ ਕੁਲਪੁਤ੍ਤਾ ਅਸੁਚਿਭਾਵੇਨ ਜੇਗੁਚ੍ਛਂ ਅਨਿਚ੍ਚਾਦਿਭਾਵੇਨ ਸਪ੍ਪਟਿਭਯਂ ਇਮਂ ਕਾਯਂ ਵਿਵਜ੍ਜੇਨ੍ਤਿ ਛਨ੍ਦਰਾਗਪ੍ਪਹਾਨੇਨ ਪਜਹਨ੍ਤਿ. ਤੇ ਭਵਮੂਲਂ ਅਵਿਜ੍ਜਂ ਭਵਤਣ੍ਹਞ੍ਚ ਵਮਿਤ੍ਵਾ ਛਡ੍ਡੇਤ੍ਵਾ ਅਚ੍ਚਨ੍ਤਮੇਵ ਪਹਾਯ ਤਤੋ ਏਵ ਸਬ੍ਬਸੋ ਅਨਾਸਵਾ ਸਉਪਾਦਿਸੇਸਾਯ ਅਨੁਪਾਦਿਸੇਸਾਯ ਚ ਨਿਬ੍ਬਾਨਧਾਤੁਯਾ ਪਰਿਨਿਬ੍ਬਾਯਿਸ੍ਸਨ੍ਤੀਤਿ.

ਕਪ੍ਪਤ੍ਥੇਰਗਾਥਾਵਣ੍ਣਨਾ ਨਿਟ੍ਠਿਤਾ.