੨. ਏਕਵਿਹਾਰਿਯਤ੍ਥੇਰਗਾਥਾਵਣ੍ਣਨਾ

ਪੁਰਤੋ ਪਚ੍ਛਤੋ ਵਾਤਿਆਦਿਕਾ ਆਯਸ੍ਮਤੋ ਏਕਵਿਹਾਰਿਯਤ੍ਥੇਰਸ੍ਸ ਗਾਥਾ. ਕਾ ਉਪ੍ਪਤ੍ਤਿ? ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਪੁਞ੍ਞਾਨਿ ਉਪਚਿਨਨ੍ਤੋ ਕਸ੍ਸਪਦਸਬਲਸ੍ਸ ਕਾਲੇ ਕੁਲਗੇਹੇ ਨਿਬ੍ਬਤ੍ਤਿਤ੍ਵਾ ਵਿਞ੍ਞੁਤਂ ਪਤ੍ਤੋ ਸਤ੍ਥੁ ਸਨ੍ਤਿਕੇ ਧਮ੍ਮਂ ਸੁਤ੍ਵਾ ਪਟਿਲਦ੍ਧਸਦ੍ਧੋ ਪਬ੍ਬਜਿਤ੍ਵਾ ਅਰਞ੍ਞਂ ਪਵਿਸਿਤ੍ਵਾ ਵਿਵੇਕਵਾਸਂ ਵਸਿ.

ਸੋ ਤੇਨ ਪੁਞ੍ਞਕਮ੍ਮੇਨ ਏਕਂ ਬੁਦ੍ਧਨ੍ਤਰਂ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਭਗਵਤਿ ਪਰਿਨਿਬ੍ਬੁਤੇ ਧਮ੍ਮਾਸੋਕਰਞ੍ਞੋ ਕਨਿਟ੍ਠਭਾਤਾ ਹੁਤ੍ਵਾ ਨਿਬ੍ਬਤ੍ਤਿ. ਅਸੋਕਮਹਾਰਾਜਾ ਕਿਰ ਸਤ੍ਥੁ ਪਰਿਨਿਬ੍ਬਾਨਤੋ ਦ੍ਵਿਨ੍ਨਂ ਵਸ੍ਸਸਤਾਨਂ ਉਪਰਿ ਅਟ੍ਠਾਰਸਮੇ ਵਸ੍ਸੇ ਸਕਲਜਮ੍ਬੁਦੀਪੇ ਏਕਰਜ੍ਜਾਭਿਸੇਕਂ ਪਤ੍ਵਾ ਅਤ੍ਤਨੋ ਕਨਿਟ੍ਠਂ ਤਿਸ੍ਸਕੁਮਾਰਂ ਓਪਰਜ੍ਜੇ ਠਪੇਤ੍ਵਾ ਏਕੇਨ ਉਪਾਯੇਨ ਤਂ ਸਾਸਨੇ ਅਭਿਪ੍ਪਸਨ੍ਨਂ ਅਕਾਸਿ. ਸੋ ਏਕਦਿਵਸਂ ਮਿਗਵਂ ਗਤੋ ਅਰਞ੍ਞੇ ਯੋਨਕਮਹਾਧਮ੍ਮਰਕ੍ਖਿਤਤ੍ਥੇਰਂ ਹਤ੍ਥਿਨਾਗੇਨ ਸਾਲਸਾਖਂ ਗਹੇਤ੍ਵਾ ਬੀਜਿਯਮਾਨਂ ਨਿਸਿਨ੍ਨਂ ਦਿਸ੍ਵਾ ਸਞ੍ਜਾਤਪਸਾਦੋ ‘‘ਅਹੋ ਵਤਾਹਮ੍ਪਿ ਅਯਂ ਮਹਾਥੇਰੋ ਵਿਯ ਪਬ੍ਬਜਿਤ੍ਵਾ ਅਰਞ੍ਞੇ ਵਿਹਰੇਯ੍ਯ’’ਨ੍ਤਿ ਚਿਨ੍ਤੇਸਿ. ਥੇਰੋ ਤਸ੍ਸ ਚਿਤ੍ਤਾਚਾਰਂ ਞਤ੍ਵਾ ਤਸ੍ਸ ਪਸ੍ਸਨ੍ਤਸ੍ਸੇਵ ਆਕਾਸਂ ਅਬ੍ਭੁਗ੍ਗਨ੍ਤ੍ਵਾ ਅਸੋਕਾਰਾਮੇ ਪੋਕ੍ਖਰਣਿਯਾ ਅਭਿਜ੍ਜਮਾਨੇ ਉਦਕੇ ਠਤ੍ਵਾ ਚੀਵਰਞ੍ਚ ਉਤ੍ਤਰਾਸਙ੍ਗਞ੍ਚ ਆਕਾਸੇ ਓਲਗ੍ਗੇਤ੍ਵਾ ਨ੍ਹਾਯਿਤੁਂ ਆਰਭਿ. ਕੁਮਾਰੋ ਥੇਰਸ੍ਸ ਆਨੁਭਾਵਂ ਦਿਸ੍ਵਾ ਅਭਿਪ੍ਪਸਨ੍ਨੋ ਅਰਞ੍ਞਤੋ ਨਿਵਤ੍ਤਿਤ੍ਵਾ ਰਾਜਗੇਹਂ ਗਨ੍ਤ੍ਵਾ ‘‘ਪਬ੍ਬਜਿਸ੍ਸਾਮੀ’’ਤਿ ਰਞ੍ਞੋ ਆਰੋਚੇਸਿ. ਰਾਜਾ ਤਂ ਅਨੇਕਪ੍ਪਕਾਰਂ ਯਾਚਿਤ੍ਵਾ ਪਬ੍ਬਜ੍ਜਾਧਿਪ੍ਪਾਯਂ ਨਿਵਤ੍ਤੇਤੁਂ ਨਾਸਕ੍ਖਿ. ਸੋ ਉਪਾਸਕੋ ਹੁਤ੍ਵਾ ਪਬ੍ਬਜ੍ਜਾਸੁਖਂ ਪਤ੍ਥੇਨ੍ਤੋ –

੫੩੭. ‘‘ਪੁਰਤੋ ਪਚ੍ਛਤੋ ਵਾਪਿ, ਅਪਰੋ ਚੇ ਨ ਵਿਜ੍ਜਤਿ;

ਅਤੀਵ ਫਾਸੁ ਭਵਤਿ, ਏਕਸ੍ਸ ਵਸਤੋ ਵਨੇ.

੫੩੮. ‘‘ਹਨ੍ਦ ਏਕੋ ਗਮਿਸ੍ਸਾਮਿ, ਅਰਞ੍ਞਂ ਬੁਦ੍ਧਵਣ੍ਣਿਤਂ;

ਫਾਸੁ ਏਕਵਿਹਾਰਿਸ੍ਸ, ਪਹਿਤਤ੍ਤਸ੍ਸ ਭਿਕ੍ਖੁਨੋ.

੫੩੯. ‘‘ਯੋਗੀ-ਪੀਤਿਕਰਂ ਰਮ੍ਮਂ, ਮਤ੍ਤਕੁਞ੍ਜਰਸੇਵਿਤਂ;

ਏਕੋ ਅਤ੍ਥਵਸੀ ਖਿਪ੍ਪਂ, ਪਵਿਸਿਸ੍ਸਾਮਿ ਕਾਨਨਂ.

੫੪੦. ‘‘ਸੁਪੁਪ੍ਫਿਤੇ ਸੀਤਵਨੇ, ਸੀਤਲੇ ਗਿਰਿਕਨ੍ਦਰੇ;

ਗਤ੍ਤਾਨਿ ਪਰਿਸਿਞ੍ਚਿਤ੍ਵਾ, ਚਙ੍ਕਮਿਸ੍ਸਾਮਿ ਏਕਕੋ.

੫੪੧. ‘‘ਏਕਾਕਿਯੋ ਅਦੁਤਿਯੋ, ਰਮਣੀਯੇ ਮਹਾਵਨੇ;

ਕਦਾਹਂ ਵਿਹਰਿਸ੍ਸਾਮਿ, ਕਤਕਿਚ੍ਚੋ ਅਨਾਸਵੋ.

੫੪੨. ‘‘ਏਵਂ ਮੇ ਕਤ੍ਤੁਕਾਮਸ੍ਸ, ਅਧਿਪ੍ਪਾਯੋ ਸਮਿਜ੍ਝਤੁ;

ਸਾਧਯਿਸ੍ਸਾਮਹਂਯੇਵ, ਨਾਞ੍ਞੋ ਅਞ੍ਞਸ੍ਸ ਕਾਰਕੋ’’ਤਿ. –

ਇਮਾ ਛ ਗਾਥਾ ਅਭਾਸਿ.

ਤਤ੍ਥ ਪੁਰਤੋ ਪਚ੍ਛਤੋ ਵਾਤਿ ਅਤ੍ਤਨੋ ਪੁਰਤੋ ਵਾ ਪਚ੍ਛਤੋ ਵਾ, ਵਾ-ਸਦ੍ਦਸ੍ਸ ਵਿਕਪ੍ਪਤ੍ਥਤ੍ਤਾ ਪਸ੍ਸਤੋ ਵਾ ਅਪਰੋ ਅਞ੍ਞੋ ਜਨੋ ਨ ਵਿਜ੍ਜਤਿ ਚੇ, ਅਤੀਵ ਅਤਿਵਿਯ ਫਾਸੁ ਚਿਤ੍ਤਸੁਖਂ ਭਵਤਿ. ਏਕਵਿਹਾਰੀਭਾਵੇਨ ਏਕਸ੍ਸ ਅਸਹਾਯਸ੍ਸ. ਵਨੇ ਵਸਤੋਤਿ ਚਿਰਪਰਿਚਿਤੇਨ ਵਿਵੇਕਜ੍ਝਾਸਯੇਨ ਆਕਡ੍ਢਿਯਮਾਨਹਦਯੋ ਸੋ ਰਤ੍ਤਿਨ੍ਦਿਵਂ ਮਹਾਜਨਪਰਿਵੁਤਸ੍ਸ ਵਸਤੋ ਸਙ੍ਗਣਿਕਵਿਹਾਰਂ ਨਿਬ੍ਬਿਨ੍ਦਨ੍ਤੋ ਵਿਵੇਕਸੁਖਞ੍ਚ ਬਹੁਂ ਮਞ੍ਞਨ੍ਤੋ ਵਦਤਿ.

ਹਨ੍ਦਾਤਿ ਵੋਸ੍ਸਗ੍ਗਤ੍ਥੇ ਨਿਪਾਤੋ, ਤੇਨ ਇਦਾਨਿ ਕਰੀਯਮਾਨਸ੍ਸ ਅਰਞ੍ਞਗਮਨਸ੍ਸ ਨਿਚ੍ਛਿਤਭਾਵਮਾਹ. ਏਕੋ ਗਮਿਸ੍ਸਾਮੀਤਿ ‘‘ਸੁਞ੍ਞਾਗਾਰੇ ਖੋ, ਗਹਪਤਿ, ਤਥਾਗਤਾ ਅਭਿਰਮਨ੍ਤੀ’’ਤਿਆਦਿਵਚਨਤੋ (ਚੂਲ਼ਵ. ੩੦੬) ਬੁਦ੍ਧੇਹਿ ਵਣ੍ਣਿਤਂ ਪਸਟ੍ਠਂ ਅਰਞ੍ਞਂ ਏਕੋ ਅਸਹਾਯੋ ਗਮਿਸ੍ਸਾਮਿ ਵਾਸਾਧਿਪ੍ਪਾਯੇਨ ਉਪਗਚ੍ਛਾਮਿ. ਯਸ੍ਮਾ ਏਕਵਿਹਾਰਿਸ੍ਸ ਠਾਨਾਦੀਸੁ ਅਸਹਾਯਭਾਵੇਨ ਏਕਵਿਹਾਰਿਸ੍ਸ ਨਿਬ੍ਬਾਨਂ ਪਟਿਪੇਸਿਤਚਿਤ੍ਤਤਾਯ ਪਹਿਤਤ੍ਤਸ੍ਸ ਅਧਿਸੀਲਸਿਕ੍ਖਾਦਿਕਾ ਤਿਸ੍ਸੋ ਸਿਕ੍ਖਾ ਸਿਕ੍ਖਤੋ ਭਿਕ੍ਖੁਨੋ ਅਰਞ੍ਞਂ ਫਾਸੁ ਇਟ੍ਠਂ ਸੁਖਾਵਹਨ੍ਤਿ ਅਤ੍ਥੋ.

ਯੋਗੀ-ਪੀਤਿਕਰਨ੍ਤਿ ਯੋਗੀਨਂ ਭਾਵਨਾਯ ਯੁਤ੍ਤਪ੍ਪਯੁਤ੍ਤਾਨਂ ਅਪ੍ਪਸਦ੍ਦਾਦਿਭਾਵੇਨ ਝਾਨਵਿਪਸ੍ਸਨਾਦਿਪੀਤਿਂ ਆਵਹਨਤੋ ਯੋਗੀ-ਪੀਤਿਕਰਂ. ਵਿਸਭਾਗਾਰਮ੍ਮਣਾਭਾਵੇਨ ਪਟਿਸਲ੍ਲਾਨਸਾਰੁਪ੍ਪਤਾਯ ਰਮ੍ਮਂ. ਮਤ੍ਤਕੁਞ੍ਜਰਸੇਵਿਤਨ੍ਤਿ ਮਤ੍ਤਵਰਵਾਰਣਵਿਚਰਿਤਂ, ਇਮਿਨਾਪਿ ਬ੍ਰਹਾਰਞ੍ਞਭਾਵੇਨ ਜਨਵਿਵੇਕਂਯੇਵ ਦਸ੍ਸੇਤਿ. ਅਤ੍ਥਵਸੀਤਿ ਇਧ ਅਤ੍ਥੋਤਿ ਸਮਣਧਮ੍ਮੋ ਅਧਿਪ੍ਪੇਤੋ. ‘‘ਕਥਂ ਨੁ ਖੋ ਸੋ ਮੇ ਭਵੇਯ੍ਯਾ’’ਤਿ ਤਸ੍ਸ ਵਸਂ ਗਤੋ.

ਸੁਪੁਪ੍ਫਿਤੇਤਿ ਸੁਟ੍ਠੁ ਪੁਪ੍ਫਿਤੇ. ਸੀਤਵਨੇਤਿ ਛਾਯੂਦਕਸਮ੍ਪਤ੍ਤਿਯਾ ਸੀਤੇ ਵਨੇ. ਉਭਯੇਨਪਿ ਤਸ੍ਸ ਰਮਣੀਯਤਂਯੇਵ ਵਿਭਾਵੇਤਿ. ਗਿਰਿਕਨ੍ਦਰੇਤਿ ਗਿਰੀਨਂ ਅਬ੍ਭਨ੍ਤਰੇ ਕਨ੍ਦਰੇ. ਕਨ੍ਤਿ ਹਿ ਉਦਕਂ, ਤੇਨ ਦਾਰਿਤਂ ਨਿਨ੍ਨਟ੍ਠਾਨਂ ਕਨ੍ਦਰਂ ਨਾਮ. ਤਾਦਿਸੇ ਸੀਤਲੇ ਗਿਰਿਕਨ੍ਦਰੇ ਘਮ੍ਮਪਰਿਤਾਪਂ ਵਿਨੋਦੇਤ੍ਵਾ ਅਤ੍ਤਨੋ ਗਤ੍ਤਾਨਿ ਪਰਿਸਿਞ੍ਚਿਤ੍ਵਾ ਨ੍ਹਾਯਿਤ੍ਵਾ ਚਙ੍ਕਮਿਸ੍ਸਾਮਿ ਏਕਕੋਤਿ ਕਤ੍ਥਚਿ ਅਨਾਯਤ੍ਤਵੁਤ੍ਤਿਤਂ ਦਸ੍ਸੇਤਿ.

ਏਕਾਕਿਯੋਤਿ ਏਕਾਕੀ ਅਸਹਾਯੋ. ਅਦੁਤਿਯੋਤਿ ਤਣ੍ਹਾਸਙ੍ਖਾਤਦੁਤਿਯਾਭਾਵੇਨ ਅਦੁਤਿਯੋ. ਤਣ੍ਹਾ ਹਿ ਪੁਰਿਸਸ੍ਸ ਸਬ੍ਬਦਾ ਅਵਿਜਹਨਟ੍ਠੇਨ ਦੁਤਿਯਾ ਨਾਮ. ਤੇਨਾਹ ਭਗਵਾ – ‘‘ਤਣ੍ਹਾਦੁਤਿਯੋ ਪੁਰਿਸੋ, ਦੀਘਮਦ੍ਧਾਨ ਸਂਸਰ’’ਨ੍ਤਿ (ਇਤਿਵੁ. ੧੫, ੧੦੫).

ਏਵਂ ਮੇ ਕਤ੍ਤੁਕਾਮਸ੍ਸਾਤਿ ‘‘ਹਨ੍ਦ ਏਕੋ ਗਮਿਸ੍ਸਾਮੀ’’ਤਿਆਦਿਨਾ ਵੁਤ੍ਤਵਿਧਿਨਾ ਅਰਞ੍ਞਂ ਗਨ੍ਤ੍ਵਾ ਭਾਵਨਾਭਿਯੋਗਂ ਕਤ੍ਤੁਕਾਮਸ੍ਸ ਮੇ. ਅਧਿਪ੍ਪਾਯੋ ਸਮਿਜ੍ਝਤੂਤਿ ‘‘ਕਦਾਹਂ ਵਿਹਰਿਸ੍ਸਾਮਿ, ਕਤਕਿਚ੍ਚੋ ਅਨਾਸਵੋ’’ਤਿ ਏਵਂ ਪਵਤ੍ਤੋ ਮਨੋਰਥੋ ਇਜ੍ਝਤੁ ਸਿਦ੍ਧਿਂ ਪਾਪੁਣਾਤੁ. ਅਰਹਤ੍ਤਪ੍ਪਤ੍ਤਿ ਚ ਯਸ੍ਮਾ ਨ ਆਯਾਚਨਮਤ੍ਤੇਨ ਸਿਜ੍ਝਤਿ, ਨਾਪਿ ਅਞ੍ਞੇਨ ਸਾਧੇਤਬ੍ਬਾ, ਤਸ੍ਮਾ ਆਹ ‘‘ਸਾਧਯਿਸ੍ਸਾਮਹਂਯੇਵ, ਨਾਞ੍ਞੋ ਅਞ੍ਞਸ੍ਸ ਕਾਰਕੋ’’ਤਿ.

ਏਵਂ ਉਪਰਾਜਸ੍ਸ ਪਬ੍ਬਜ੍ਜਾਯ ਦਲ਼੍ਹਨਿਚ੍ਛਯਤਂ ਞਤ੍ਵਾ ਰਾਜਾ ਅਸੋਕਾਰਾਮਗਮਨੀਯਂ ਮਗ੍ਗਂ ਅਲਙ੍ਕਾਰਾਪੇਤ੍ਵਾ ਕੁਮਾਰਂ ਸਬ੍ਬਾਲਙ੍ਕਾਰਵਿਭੂਸਿਤਂ ਮਹਤਿਯਾ ਸੇਨਾਯ ਮਹਚ੍ਚਰਾਜਾਨੁਭਾਵੇਨ ਵਿਹਾਰਂ ਨੇਸਿ. ਕੁਮਾਰੋ ਪਧਾਨਘਰਂ ਗਨ੍ਤ੍ਵਾ ਮਹਾਧਮ੍ਮਰਕ੍ਖਿਤਤ੍ਥੇਰਸ੍ਸ ਸਨ੍ਤਿਕੇ ਪਬ੍ਬਜਿ, ਅਨੇਕਸਤਾ ਮਨੁਸ੍ਸਾ ਤਂ ਅਨੁਪਬ੍ਬਜਿਂਸੁ. ਰਞ੍ਞੋ ਭਾਗਿਨੇਯ੍ਯੋ ਸਙ੍ਘਮਿਤ੍ਤਾਯ ਸਾਮਿਕੋ ਅਗ੍ਗਿਬ੍ਰਹ੍ਮਾਪਿ ਤਮੇਵ ਅਨੁਪਬ੍ਬਜਿ. ਸੋ ਪਬ੍ਬਜਿਤ੍ਵਾ ਹਟ੍ਠਤੁਟ੍ਠੋ ਅਤ੍ਤਨਾ ਕਾਤਬ੍ਬਂ ਪਕਾਸੇਨ੍ਤੋ –

੫੪੩. ‘‘ਏਸ ਬਨ੍ਧਾਮਿ ਸਨ੍ਨਾਹਂ, ਪਵਿਸਿਸ੍ਸਾਮਿ ਕਾਨਨਂ;

ਨ ਤਤੋ ਨਿਕ੍ਖਮਿਸ੍ਸਾਮਿ, ਅਪ੍ਪਤ੍ਤੋ ਆਸਵਕ੍ਖਯਂ.

੫੪੪. ‘‘ਮਾਲੁਤੇ ਉਪਵਾਯਨ੍ਤੇ, ਸੀਤੇ ਸੁਰਭਿਗਨ੍ਧਿਕੇ;

ਅਵਿਜ੍ਜਂ ਦਾਲਯਿਸ੍ਸਾਮਿ, ਨਿਸਿਨ੍ਨੋ ਨਗਮੁਦ੍ਧਨਿ.

੫੪੫. ‘‘ਵਨੇ ਕੁਸੁਮਸਞ੍ਛਨ੍ਨੇ, ਪਬ੍ਭਾਰੇ ਨੂਨ ਸੀਤਲੇ;

ਵਿਮੁਤ੍ਤਿਸੁਖੇਨ ਸੁਖਿਤੋ, ਰਮਿਸ੍ਸਾਮਿ ਗਿਰਿਬ੍ਬਜੇ’’ਤਿ. –

ਤਿਸ੍ਸੋ ਗਾਥਾ ਅਭਾਸਿ.

ਤਤ੍ਥ ਏਸ ਬਨ੍ਧਾਮਿ ਸਨ੍ਨਾਹਨ੍ਤਿ ਏਸਾਹਂ ਵੀਰਿਯਸਙ੍ਖਾਤਂ ਸਨ੍ਨਾਹਂ ਬਨ੍ਧਾਮਿ, ਕਾਯੇ ਚ ਜੀਵਿਤੇ ਚ ਨਿਰਪੇਕ੍ਖੋ ਵੀਰਿਯਸਨ੍ਨਾਹੇਨ ਸਨ੍ਨਯ੍ਹਾਮਿ. ਇਦਂ ਵੁਤ੍ਤਂ ਹੋਤਿ – ਯਥਾ ਨਾਮ ਸੂਰੋ ਪੁਰਿਸੋ ਪਚ੍ਚਤ੍ਥਿਕੇ ਪਚ੍ਚੁਪਟ੍ਠਿਤੇ ਤਂ ਜੇਤੁਕਾਮੋ ਅਞ੍ਞਂ ਕਿਚ੍ਚਂ ਪਹਾਯ ਕਵਚਪਟਿਮੁਚ੍ਚਨਾਦਿਨਾ ਯੁਦ੍ਧਾਯ ਸਨ੍ਨਯ੍ਹਤਿ, ਯੁਦ੍ਧਭੂਮਿਞ੍ਚ ਗਨ੍ਤ੍ਵਾ ਪਚ੍ਚਤ੍ਥਿਕੇ ਅਜੇਤ੍ਵਾ ਤਤੋ ਨ ਨਿਵਤ੍ਤਤਿ, ਏਵਮਹਮ੍ਪਿ ਕਿਲੇਸਪਚ੍ਚਤ੍ਥਿਕੇ ਜੇਤੁਂ ਆਦਿਤ੍ਤਮ੍ਪਿ ਸੀਸਂ ਚੇਲਞ੍ਚ ਅਜ੍ਝੁਪੇਕ੍ਖਿਤ੍ਵਾ ਚਤੁਬ੍ਬਿਧਸਮ੍ਮਪ੍ਪਧਾਨਵੀਰਿਯਸਨ੍ਨਾਹਂ ਸਨ੍ਨਯ੍ਹਾਮਿ, ਕਿਲੇਸੇ ਅਜੇਤ੍ਵਾ ਕਿਲੇਸਵਿਜਯਯੋਗ੍ਗਂ ਵਿਵੇਕਟ੍ਠਾਨਂ ਨ ਵਿਸ੍ਸਜ੍ਜੇਮੀਤਿ. ਤੇਨ ਵੁਤ੍ਤਂ ‘‘ਪਵਿਸਿਸ੍ਸਾਮਿ ਕਾਨਨਂ ਨ ਤਤੋ ਨਿਕ੍ਖਮਿਸ੍ਸਾਮਿ, ਅਪ੍ਪਤ੍ਤੋ ਆਸਵਕ੍ਖਯ’’ਨ੍ਤਿ.

‘‘ਮਾਲੁਤੇ ਉਪਵਾਯਨ੍ਤੇ’’ਤਿਆਦਿਨਾ ਅਰਞ੍ਞਟ੍ਠਾਨਸ੍ਸ ਕਮ੍ਮਟ੍ਠਾਨਭਾਵਨਾਯੋਗ੍ਯਤਂ ਵਦਤਿ, ਰਮਿਸ੍ਸਾਮਿ ਨੂਨ ਗਿਰਿਬ੍ਬਜੇਤਿ ਯੋਜਨਾ. ਪਬ੍ਬਤਪਰਿਕ੍ਖੇਪੇ ਅਭਿਰਮਿਸ੍ਸਾਮਿ ਮਞ੍ਞੇਤਿ ਅਨਾਗਤਤ੍ਥਂ ਪਰਿਕਪ੍ਪੇਨ੍ਤੋ ਵਦਤਿ. ਸੇਸਂ ਸੁਵਿਞ੍ਞੇਯ੍ਯਮੇਵ.

ਏਵਂ ਵਤ੍ਵਾ ਥੇਰੋ ਅਰਞ੍ਞਂ ਪਵਿਸਿਤ੍ਵਾ ਸਮਣਧਮ੍ਮਂ ਕਰੋਨ੍ਤੋ ਉਪਜ੍ਝਾਯੇਨ ਸਦ੍ਧਿਂ ਕਲਿਙ੍ਗਰਟ੍ਠਂ ਅਗਮਾਸਿ. ਤਤ੍ਥਸ੍ਸ ਪਾਦੇ ਚਮ੍ਮਿਕਾਬਾਧੋ ਉਪ੍ਪਜ੍ਜਿ, ਤਂ ਦਿਸ੍ਵਾ ਏਕੋ ਵੇਜ੍ਜੋ ‘‘ਸਪ੍ਪਿਂ, ਭਨ੍ਤੇ, ਪਰਿਯੇਸਥ, ਤਿਕਿਚ੍ਛਿਸ੍ਸਾਮਿ ਨ’’ਨ੍ਤਿ ਆਹ. ਥੇਰੋ ਸਪ੍ਪਿਪਰਿਯੇਸਨਂ ਅਕਤ੍ਵਾ ਵਿਪਸ੍ਸਨਾਯ ਏਵ ਕਮ੍ਮਂ ਕਰੋਤਿ, ਰੋਗੋ ਵਡ੍ਢਤਿ, ਵੇਜ੍ਜੋ ਥੇਰਸ੍ਸ ਤਤ੍ਥ ਅਪ੍ਪੋਸ੍ਸੁਕ੍ਕਤਂ ਦਿਸ੍ਵਾ ਸਯਮੇਵ ਸਪ੍ਪਿਂ ਪਰਿਯੇਸਿਤ੍ਵਾ ਥੇਰਂ ਅਰੋਗਂ ਅਕਾਸਿ. ਸੋ ਅਰੋਗੋ ਹੁਤ੍ਵਾ ਨਚਿਰਸ੍ਸੇਵ ਅਰਹਤ੍ਤਂ ਪਾਪੁਣਿ. ਤੇਨ ਵੁਤ੍ਤਂ ਅਪਦਾਨੇ (ਅਪ. ਥੇਰ ੨.੪੪.੧-੧੨) –

‘‘ਇਮਮ੍ਹਿ ਭਦ੍ਦਕੇ ਕਪ੍ਪੇ, ਬ੍ਰਹ੍ਮਬਨ੍ਧੁ ਮਹਾਯਸੋ;

ਕਸ੍ਸਪੋ ਨਾਮ ਗੋਤ੍ਤੇਨ, ਉਪ੍ਪਜ੍ਜਿ ਵਦਤਂ ਵਰੋ.

‘‘ਨਿਪ੍ਪਪਞ੍ਚੋ ਨਿਰਾਲਮ੍ਬੋ, ਆਕਾਸਸਮਮਾਨਸੋ;

ਸੁਞ੍ਞਤਾਬਹੁਲੋ ਤਾਦੀ, ਅਨਿਮਿਤ੍ਤਰਤੋ ਵਸੀ.

‘‘ਅਸਙ੍ਗਚਿਤ੍ਤੋ ਨਿਕ੍ਲੇਸੋ, ਅਸਂਸਟ੍ਠੋ ਕੁਲੇ ਗਣੇ;

ਮਹਾਕਾਰੁਣਿਕੋ ਵੀਰੋ, ਵਿਨਯੋਪਾਯਕੋਵਿਦੋ.

‘‘ਉਯ੍ਯੁਤ੍ਤੋ ਪਰਕਿਚ੍ਚੇਸੁ, ਵਿਨਯਨ੍ਤੋ ਸਦੇਵਕੇ;

ਨਿਬ੍ਬਾਨਗਮਨਂ ਮਗ੍ਗਂ, ਗਤਿਂ ਪਙ੍ਕਵਿਸੋਸਨਂ.

‘‘ਅਮਤਂ ਪਰਮਸ੍ਸਾਦਂ, ਜਰਾਮਚ੍ਚੁਨਿਵਾਰਣਂ;

ਮਹਾਪਰਿਸਮਜ੍ਝੇ ਸੋ, ਨਿਸਿਨ੍ਨੋ ਲੋਕਤਾਰਕੋ.

‘‘ਕਰਵੀਕਰੁਤੋ ਨਾਥੋ, ਬ੍ਰਹ੍ਮਘੋਸੋ ਤਥਾਗਤੋ;

ਉਦ੍ਧਰਨ੍ਤੋ ਮਹਾਦੁਗ੍ਗਾ, ਵਿਪ੍ਪਨਟ੍ਠੇ ਅਨਾਯਕੇ.

‘‘ਦੇਸੇਨ੍ਤੋ ਵਿਰਜਂ ਧਮ੍ਮਂ, ਦਿਟ੍ਠੋ ਮੇ ਲੋਕਨਾਯਕੋ;

ਤਸ੍ਸ ਧਮ੍ਮਂ ਸੁਣਿਤ੍ਵਾਨ, ਪਬ੍ਬਜਿਂ ਅਨਗਾਰਿਯਂ.

‘‘ਪਬ੍ਬਜਿਤ੍ਵਾ ਤਦਾਪਾਹਂ, ਚਿਨ੍ਤੇਨ੍ਤੋ ਜਿਨਸਾਸਨਂ;

ਏਕਕੋਵ ਵਨੇ ਰਮ੍ਮੇ, ਵਸਿਂ ਸਂਸਗ੍ਗਪੀਲ਼ਿਤੋ.

‘‘ਸਕ੍ਕਾਯਵੂਪਕਾਸੋ ਮੇ, ਹੇਤੁਭੂਤੋ ਮਮਾਭਵੀ;

ਮਨਸੋ ਵੂਪਕਾਸਸ੍ਸ, ਸਂਸਗ੍ਗਭਯਦਸ੍ਸਿਨੋ.

‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਕਤਂ ਬੁਦ੍ਧਸ੍ਸ ਸਾਸਨ’’ਨ੍ਤਿ.

ਅਰਹਤ੍ਤਂ ਪਨ ਪਤ੍ਵਾ ਥੇਰੇ ਤਤ੍ਥ ਵਿਹਰਨ੍ਤੇ ਰਾਜਾ ਕੋਟਿਧਨਪਰਿਚ੍ਚਾਗੇਨ ਭੋਜਕਗਿਰਿਵਿਹਾਰਂ ਨਾਮ ਕਾਰੇਤ੍ਵਾ ਥੇਰਂ ਤਤ੍ਥ ਵਾਸੇਸਿ. ਸੋ ਤਤ੍ਥ ਵਿਹਰਨ੍ਤੋ ਪਰਿਨਿਬ੍ਬਾਨਕਾਲੇ –

੫੪੬. ‘‘ਸੋਹਂ ਪਰਿਪੁਣ੍ਣਸਙ੍ਕਪ੍ਪੋ, ਚਨ੍ਦੋ ਪਨ੍ਨਰਸੋ ਯਥਾ;

ਸਬ੍ਬਾਸਵਪਰਿਕ੍ਖੀਣੋ, ਨਤ੍ਥਿ ਦਾਨਿ ਪੁਨਬ੍ਭਵੋ’’ਤਿ. –

ਓਸਾਨਗਾਥਮਾਹ. ਸਾ ਉਤ੍ਤਾਨਤ੍ਥਾਵ. ਤਦੇਵ ਚ ਥੇਰਸ੍ਸ ਅਞ੍ਞਾਬ੍ਯਾਕਰਣਂ ਅਹੋਸੀਤਿ.

ਏਕਵਿਹਾਰਿਯਤ੍ਥੇਰਗਾਥਾਵਣ੍ਣਨਾ ਨਿਟ੍ਠਿਤਾ.