੧. ਕਾਲ਼ੁਦਾਯਿਤ੍ਥੇਰਗਾਥਾਵਣ੍ਣਨਾ

ਦਸਕਨਿਪਾਤੇ ਅਙ੍ਗਾਰਿਨੋਤਿਆਦਿਕਾ ਆਯਸ੍ਮਤੋ ਕਾਲ਼ੁਦਾਯਿਤ੍ਥੇਰਸ੍ਸ ਗਾਥਾ. ਕਾ ਉਪ੍ਪਤ੍ਤਿ? ਅਯਮ੍ਪਿ ਪਦੁਮੁਤ੍ਤਰਬੁਦ੍ਧਸ੍ਸ ਕਾਲੇ ਹਂਸਵਤੀਨਗਰੇ ਕੁਲਗੇਹੇ ਨਿਬ੍ਬਤ੍ਤੋ ਸਤ੍ਥੁ ਧਮ੍ਮਦੇਸਨਂ ਸੁਣਨ੍ਤੋ ਸਤ੍ਥਾਰਂ ਏਕਂ ਭਿਕ੍ਖੁਂ ਕੁਲਪ੍ਪਸਾਦਕਾਨਂ ਅਗ੍ਗਟ੍ਠਾਨੇ ਠਪੇਨ੍ਤਂ ਦਿਸ੍ਵਾ ਤਜ੍ਜਂ ਅਭਿਨੀਹਾਰਕਮ੍ਮਂ ਕਤ੍ਵਾ ਤਂ ਠਾਨਨ੍ਤਰਂ ਪਤ੍ਥੇਸਿ.

ਸੋ ਯਾਵਜੀਵਂ ਕੁਸਲਂ ਕਤ੍ਵਾ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਅਮ੍ਹਾਕਂ ਬੋਧਿਸਤ੍ਤਸ੍ਸ ਮਾਤੁਕੁਚ੍ਛਿਯਂ ਪਟਿਸਨ੍ਧਿਗ੍ਗਹਣਦਿਵਸੇ ਕਪਿਲਵਤ੍ਥੁਸ੍ਮਿਂਯੇਵ ਅਮਚ੍ਚਗੇਹੇ ਪਟਿਸਨ੍ਧਿਂ ਗਣ੍ਹਿ. ਬੋਧਿਸਤ੍ਤੇਨ ਸਦ੍ਧਿਂ ਏਕਦਿਵਸਂਯੇਵ ਜਾਤੋਤਿ ਤਂਦਿਵਸਂਯੇਵ ਨਂ ਦੁਕੂਲਚੁਮ੍ਬਟੇ ਨਿਪਜ੍ਜਾਪੇਤ੍ਵਾ ਬੋਧਿਸਤ੍ਤਸ੍ਸ ਉਪਟ੍ਠਾਨਂ ਨਯਿਂਸੁ. ਬੋਧਿਸਤ੍ਤੇਨ ਹਿ ਸਦ੍ਧਿਂ ਬੋਧਿਰੁਕ੍ਖੋ, ਰਾਹੁਲਮਾਤਾ, ਚਤ੍ਤਾਰੋ ਨਿਧੀ, ਆਰੋਹਨਿਯਹਤ੍ਥੀ, ਅਸ੍ਸਕਣ੍ਡਕੋ, ਛਨ੍ਨੋ ਕਾਲ਼ੁਦਾਯੀਤਿ ਇਮੇ ਸਤ੍ਤ ਏਕਦਿਵਸਂਯੇਵ ਜਾਤਤ੍ਤਾ ਸਹਜਾਤਾ ਨਾਮ ਅਹੇਸੁਂ. ਅਥਸ੍ਸ ਨਾਮਗ੍ਗਹਣਦਿਵਸੇ ਸਕਲਨਗਰਸ੍ਸ ਉਦਗ੍ਗਚਿਤ੍ਤਦਿਵਸੇ ਜਾਤਤ੍ਤਾ ਉਦਾਯੀਤ੍ਵੇਵ ਨਾਮਂ ਅਕਂਸੁ, ਥੋਕਂ ਕਾਲ਼ਧਾਤੁਕਤ੍ਤਾ ਪਨ ਕਾਲ਼ੁਦਾਯੀਤਿ ਪਞ੍ਞਾਯਿਤ੍ਥ. ਸੋ ਬੋਧਿਸਤ੍ਤੇਨ ਸਦ੍ਧਿਂ ਕੁਮਾਰਕੀਲ਼ਂ ਕੀਲ਼ਨ੍ਤੋ ਵੁਦ੍ਧਿਂ ਅਗਮਾਸਿ.

ਅਪਰਭਾਗੇ ਲੋਕਨਾਥੇ ਮਹਾਭਿਨਿਕ੍ਖਮਨਂ ਨਿਕ੍ਖਮਿਤ੍ਵਾ ਅਨੁਕ੍ਕਮੇਨ ਸਬ੍ਬਞ੍ਞੁਤਂ ਪਤ੍ਵਾ ਪਵਤ੍ਤਿਤਵਰਧਮ੍ਮਚਕ੍ਕੇ ਰਾਜਗਹਂ ਉਪਨਿਸ੍ਸਾਯ ਵੇਲ਼ੁਵਨੇ ਵਿਹਰਨ੍ਤੇ ਸੁਦ੍ਧੋਦਨਮਹਾਰਾਜਾ ਤਂ ਪਵਤ੍ਤਿਂ ਸੁਤ੍ਵਾ ਪੁਰਿਸਸਹਸ੍ਸਪਰਿਵਾਰਂ ਏਕਂ ਅਮਚ੍ਚਂ ‘‘ਪੁਤ੍ਤਂ ਮੇ ਇਧਾਨੇਹੀ’’ਤਿ ਪੇਸੇਸਿ. ਸੋ ਧਮ੍ਮਦੇਸਨਾਵੇਲਾਯ ਸਤ੍ਥੁ ਸਨ੍ਤਿਕਂ ਗਨ੍ਤ੍ਵਾ ਪਰਿਸਪਰਿਯਨ੍ਤੇ ਠਿਤੋ ਧਮ੍ਮਂ ਸੁਤ੍ਵਾ ਸਪਰਿਸੋ ਅਰਹਤ੍ਤਂ ਪਾਪੁਣਿ. ਅਥ ਨੇ ਸਤ੍ਥਾ ‘‘ਏਥ, ਭਿਕ੍ਖਵੋ’’ਤਿ ਹਤ੍ਥਂ ਪਸਾਰੇਤਿ. ਸਬ੍ਬੇ ਤਙ੍ਖਣਂਯੇਵ ਇਦ੍ਧਿਮਯਪਤ੍ਤਚੀਵਰਧਰਾ ਵਸ੍ਸਸਟ੍ਠਿਕਤ੍ਥੇਰਾ ਵਿਯ ਅਹੇਸੁਂ. ਅਰਹਤ੍ਤਂ ਪਤ੍ਤਤੋ ਪਟ੍ਠਾਯ ਪਨ ਅਰਿਯਾ ਮਜ੍ਝਤ੍ਤਾਵ ਹੋਨ੍ਤਿ, ਤਸ੍ਮਾ ਰਞ੍ਞਾ ਪਹਿਤਸਾਸਨਂ ਦਸਬਲਸ੍ਸ ਨ ਕਥੇਸਿ. ਰਾਜਾ ‘‘ਨੇਵ ਗਤਬਲਕੋਟ੍ਠਕੋ ਆਗਚ੍ਛਤਿ, ਨ ਸਾਸਨਂ ਸੁਯ੍ਯਤੀ’’ਤਿ ਅਪਰਮ੍ਪਿ ਅਮਚ੍ਚਂ ਪੁਰਿਸਸਹਸ੍ਸੇਨ ਪੇਸੇਸਿ. ਤਸ੍ਮਿਮ੍ਪਿ ਤਥਾ ਪਟਿਪਨ੍ਨੇ ਅਪਰਨ੍ਤਿ ਏਵਂ ਨਵਹਿ ਅਮਚ੍ਚੇਹਿ ਸਦ੍ਧਿਂ ਨਵ ਪੁਰਿਸਸਹਸ੍ਸਾਨਿ ਪੇਸੇਸਿ ਸਬ੍ਬੇ ਅਰਹਤ੍ਤਂ ਪਤ੍ਵਾ ਤੁਣ੍ਹੀ ਅਹੇਸੁਂ.

ਅਥ ਰਾਜਾ ਚਿਨ੍ਤੇਸਿ – ‘‘ਏਤ੍ਤਕਾ ਜਨਾ ਮਯਿ ਸਿਨੇਹਾਭਾਵੇਨ ਦਸਬਲਸ੍ਸ ਇਧਾਗਮਨਤ੍ਥਾਯ ਨ ਕਿਞ੍ਚਿ ਕਥਯਿਂਸੁ, ਅਯਂ ਖੋ ਪਨ ਉਦਾਯੀ ਦਸਬਲੇਨ ਸਮਵਯੋ ਸਹਪਂਸੁਕੀਲ਼ਿਕੋ, ਮਯਿ ਚ ਸਿਨੇਹਵਾ, ਇਮਂ ਪੇਸੇਸ੍ਸਾਮੀ’’ਤਿ ਤਂ ਪਕ੍ਕੋਸਾਪੇਤ੍ਵਾ, ‘‘ਤਾਤ, ਤ੍ਵਂ ਪੁਰਿਸਸਹਸ੍ਸਪਰਿਵਾਰੋ ਰਾਜਗਹਂ ਗਨ੍ਤ੍ਵਾ ਦਸਬਲਂ ਆਨੇਹੀ’’ਤਿ ਵਤ੍ਵਾ ਪੇਸੇਸਿ. ਸੋ ਪਨ ਗਚ੍ਛਨ੍ਤੋ ‘‘ਸਚਾਹਂ, ਦੇਵ, ਪਬ੍ਬਜਿਤੁਂ ਲਭਿਸ੍ਸਾਮਿ, ਏਵਾਹਂ ਭਗਵਨ੍ਤਂ ਇਧਾਨੇਸ੍ਸਾਮੀ’’ਤਿ ਵਤ੍ਵਾ ‘‘ਯਂ ਕਿਞ੍ਚਿ ਕਤ੍ਵਾ ਮਮ ਪੁਤ੍ਤਂ ਦਸ੍ਸੇਹੀ’’ਤਿ ਵੁਤ੍ਤੋ ਰਾਜਗਹਂ ਗਨ੍ਤ੍ਵਾ ਸਤ੍ਥੁ ਧਮ੍ਮਦੇਸਨਾਵੇਲਾਯ ਪਰਿਸਪਰਿਯਨ੍ਤੇ ਠਿਤੋ ਧਮ੍ਮਂ ਸੁਤ੍ਵਾ ਸਪਰਿਵਾਰੋ ਅਰਹਤ੍ਤਂ ਪਤ੍ਵਾ ਏਹਿਭਿਕ੍ਖੁਭਾਵੇ ਪਤਿਟ੍ਠਾਸਿ. ਤੇਨ ਵੁਤ੍ਤਂ ਅਪਦਾਨੇ (ਅਪ. ਥੇਰ ੧.੪.੪੮-੬੩) –

‘‘ਪਦੁਮੁਤ੍ਤਰਬੁਦ੍ਧਸ੍ਸ, ਲੋਕਜੇਟ੍ਠਸ੍ਸ ਤਾਦਿਨੋ;

ਅਦ੍ਧਾਨਂ ਪਟਿਪਨ੍ਨਸ੍ਸ, ਚਰਤੋ ਚਾਰਿਕਂ ਤਦਾ.

‘‘ਸੁਫੁਲ੍ਲਂ ਪਦੁਮਂ ਗਯ੍ਹ, ਉਪ੍ਪਲਂ ਮਲ੍ਲਿਕਞ੍ਚਹਂ;

ਪਰਮਨ੍ਨਂ ਗਹੇਤ੍ਵਾਨ, ਅਦਾਸਿਂ ਸਤ੍ਥੁਨੋ ਅਹਂ.

‘‘ਪਰਿਭੁਞ੍ਜਿ ਮਹਾਵੀਰੋ, ਪਰਮਨ੍ਨਂ ਸੁਭੋਜਨਂ;

ਤਞ੍ਚ ਪੁਪ੍ਫਂ ਗਹੇਤ੍ਵਾਨ, ਜਨਸ੍ਸ ਸਮ੍ਪਦਸ੍ਸਯਿ.

‘‘ਇਟ੍ਠਂ ਕਨ੍ਤਂ ਪਿਯਂ ਲੋਕੇ, ਜਲਜਂ ਪੁਪ੍ਫਮੁਤ੍ਤਮਂ;

ਸੁਦੁਕ੍ਕਰਂ ਕਤਂ ਤੇਨ, ਯੋ ਮੇ ਪੁਪ੍ਫਂ ਅਦਾਸਿਦਂ.

‘‘ਯੋ ਪੁਪ੍ਫਮਭਿਰੋਪੇਸਿ, ਪਰਮਨ੍ਨਞ੍ਚਦਾਸਿ ਮੇ;

ਤਮਹਂ ਕਿਤ੍ਤਯਿਸ੍ਸਾਮਿ, ਸੁਣਾਥ ਮਮ ਭਾਸਤੋ.

‘‘ਦਸ ਅਟ੍ਠ ਚਕ੍ਖਤ੍ਤੁਂ ਸੋ, ਦੇਵਰਜ੍ਜਂ ਕਰਿਸ੍ਸਤਿ;

ਉਪ੍ਪਲਂ ਪਦੁਮਞ੍ਚਾਪਿ, ਮਲ੍ਲਿਕਞ੍ਚ ਤਦੁਤ੍ਤਰਿ.

‘‘ਅਸ੍ਸ ਪੁਞ੍ਞਵਿਪਾਕੇਨ, ਦਿਬ੍ਬਗਨ੍ਧਸਮਾਯੁਤਂ;

ਆਕਾਸੇ ਛਦਨਂ ਕਤ੍ਵਾ, ਧਾਰਯਿਸ੍ਸਤਿ ਤਾਵਦੇ.

‘‘ਪਞ੍ਚਵੀਸਤਿਕ੍ਖਤ੍ਤੁਞ੍ਚ, ਚਕ੍ਕਵਤ੍ਤੀ ਭਵਿਸ੍ਸਤਿ;

ਪਥਬ੍ਯਾ ਰਜ੍ਜਂ ਪਞ੍ਚਸਤਂ, ਵਸੁਧਂ ਆਵਸਿਸ੍ਸਤਿ.

‘‘ਕਪ੍ਪਸਤਸਹਸ੍ਸਮ੍ਹਿ, ਓਕ੍ਕਾਕਕੁਲਸਮ੍ਭਵੋ;

ਗੋਤਮੋ ਨਾਮ ਗੋਤ੍ਤੇਨ, ਸਤ੍ਥਾ ਲੋਕੇ ਭਵਿਸ੍ਸਤਿ.

‘‘ਸਕਕਮ੍ਮਾਭਿਰਦ੍ਧੋ ਸੋ, ਸੁਕ੍ਕਮੂਲੇਨ ਚੋਦਿਤੋ;

ਸਕ੍ਯਾਨਂ ਨਨ੍ਦਿਜਨਨੋ, ਞਾਤਿਬਨ੍ਧੁ ਭਵਿਸ੍ਸਤਿ.

‘‘ਸੋ ਪਚ੍ਛਾ ਪਬ੍ਬਜਿਤ੍ਵਾਨ, ਸੁਕ੍ਕਮੂਲੇਨ ਚੋਦਿਤੋ;

ਸਬ੍ਬਾਸਵੇ ਪਰਿਞ੍ਞਾਯ, ਨਿਬ੍ਬਾਯਿਸ੍ਸਤਿਨਾਸਵੋ.

‘‘ਪਟਿਸਮ੍ਭਿਦਮਨੁਪ੍ਪਤ੍ਤਂ, ਕਤਕਿਚ੍ਚਮਨਾਸਵਂ;

ਗੋਤਮੋ ਲੋਕਬਨ੍ਧੁ ਤਂ, ਏਤਦਗ੍ਗੇ ਠਪੇਸ੍ਸਤਿ.

‘‘ਪਧਾਨਪਹਿਤਤ੍ਤੋ ਸੋ, ਉਪਸਨ੍ਤੋ ਨਿਰੂਪਧਿ;

ਉਦਾਯੀ ਨਾਮ ਨਾਮੇਨ, ਹੇਸ੍ਸਤਿ ਸਤ੍ਥੁ ਸਾਵਕੋ.

‘‘ਰਾਗੋ ਦੋਸੋ ਚ ਮੋਹੋ ਚ, ਮਾਨੋ ਮਕ੍ਖੋ ਚ ਧਂਸਿਤੋ;

ਸਬ੍ਬਾਸਵੇ ਪਰਿਞ੍ਞਾਯ, ਵਿਹਰਾਮਿ ਅਨਾਸਵੋ.

‘‘ਤੋਸਯਿਞ੍ਚਾਪਿ ਸਮ੍ਬੁਦ੍ਧਂ, ਆਤਾਪੀ ਨਿਪਕੋ ਅਹਂ;

ਪਸਾਦਿਤੋ ਚ ਸਮ੍ਬੁਦ੍ਧੋ, ਏਤਦਗ੍ਗੇ ਠਪੇਸਿ ਮਂ.

‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨ’’ਨ੍ਤਿ.

ਅਰਹਤ੍ਤਂ ਪਨ ਪਤ੍ਵਾ ‘‘ਨ ਤਾਵਾਯਂ ਦਸਬਲਸ੍ਸ ਕੁਲਨਗਰਂ ਗਨ੍ਤੁਂ ਕਾਲੋ, ਵਸਨ੍ਤੇ ਪਨ ਉਪਗਤੇ ਪੁਪ੍ਫਿਤੇਸੁ ਵਨਸਣ੍ਡੇਸੁ ਹਰਿਤਤਿਣਸਞ੍ਛਨ੍ਨਾਯ ਭੂਮਿਯਾ ਗਮਨਕਾਲੋ ਭਵਿਸ੍ਸਤੀ’’ਤਿ ਕਾਲਂ ਪਟਿਮਾਨੇਨ੍ਤੋ ਵਸਨ੍ਤੇ ਸਮ੍ਪਤ੍ਤੇ ਸਤ੍ਥੁ ਕੁਲਨਗਰਂ ਗਨ੍ਤੁਂ ਗਮਨਮਗ੍ਗਵਣ੍ਣਂ ਸਂਵਣ੍ਣੇਨ੍ਤੋ –

੫੨੭. ‘‘ਅਙ੍ਗਾਰਿਨੋ ਦਾਨਿ ਦੁਮਾ ਭਦਨ੍ਤੇ, ਫਲੇਸਿਨੋ ਛਦਨਂ ਵਿਪ੍ਪਹਾਯ;

ਤੇ ਅਚ੍ਚਿਮਨ੍ਤੋਵ ਪਭਾਸਯਨ੍ਤਿ, ਸਮਯੋ ਮਹਾਵੀਰ ਭਾਗੀਰਸਾਨਂ.

੫੨੮. ‘‘ਦੁਮਾਨਿ ਫੁਲ੍ਲਾਨਿ ਮਨੋਰਮਾਨਿ, ਸਮਨ੍ਤਤੋ ਸਬ੍ਬਦਿਸਾ ਪਵਨ੍ਤਿ;

ਪਤ੍ਤਂ ਪਹਾਯ ਫਲਮਾਸਸਾਨਾ, ਕਾਲੋ ਇਤੋ ਪਕ੍ਕਮਨਾਯ ਵੀਰ.

੫੨੯. ‘‘ਨੇਵਾਤਿਸੀਤਂ ਨ ਪਨਾਤਿਉਣ੍ਹਂ, ਸੁਖਾ ਉਤੁ ਅਦ੍ਧਨਿਯਾ ਭਦਨ੍ਤੇ;

ਪਸ੍ਸਨ੍ਤੁ ਤਂ ਸਾਕਿਯਾ ਕੋਲ਼ਿਯਾ ਚ, ਪਚ੍ਛਾਮੁਖਂ ਰੋਹਿਨਿਯਂ ਤਰਨ੍ਤਂ.

੫੩੦. ‘‘ਆਸਾਯ ਕਸਤੇ ਖੇਤ੍ਤਂ, ਬੀਜਂ ਆਸਾਯ ਵਪ੍ਪਤਿ;

ਆਸਾਯ ਵਾਣਿਜਾ ਯਨ੍ਤਿ, ਸਮੁਦ੍ਦਂ ਧਨਹਾਰਕਾ;

ਯਾਯ ਆਸਾਯ ਤਿਟ੍ਠਾਮਿ, ਸਾ ਮੇ ਆਸਾ ਸਮਿਜ੍ਝਤੁ.

੫੩੧. ‘‘ਪੁਨਪ੍ਪੁਨਞ੍ਚੇਵ ਵਪਨ੍ਤਿ ਬੀਜਂ, ਪੁਨਪ੍ਪੁਨਂ ਵਸ੍ਸਤਿ ਦੇਵਰਾਜਾ;

ਪੁਨਪ੍ਪੁਨਂ ਖੇਤ੍ਤਂ ਕਸਨ੍ਤਿ ਕਸ੍ਸਕਾ, ਪੁਨਪ੍ਪੁਨਂ ਧਞ੍ਞਮੁਪੇਤਿ ਰਟ੍ਠਂ.

੫੩੨. ‘‘ਪੁਨਪ੍ਪੁਨਂ ਯਾਚਨਕਾ ਚਰਨ੍ਤਿ, ਪੁਨਪ੍ਪੁਨਂ ਦਾਨਪਤੀ ਦਦਨ੍ਤਿ;

ਪੁਨਪ੍ਪੁਨਂ ਦਾਨਪਤੀ ਦਦਿਤ੍ਵਾ, ਪੁਨਪ੍ਪੁਨਂ ਸਗ੍ਗਮੁਪੇਨ੍ਤਿ ਠਾਨਂ.

੫੩੩. ‘‘ਵੀਰੋ ਹਵੇ ਸਤ੍ਤਯੁਗਂ ਪੁਨੇਤਿ, ਯਸ੍ਮਿਂ ਕੁਲੇ ਜਾਯਤਿ ਭੂਰਿਪਞ੍ਞੋ;

ਮਞ੍ਞਾਮਹਂ ਸਕ੍ਕਤਿ ਦੇਵਦੇਵੋ, ਤਯਾ ਹਿ ਜਾਤੋ ਮੁਨਿ ਸਚ੍ਚਨਾਮੋ.

੫੩੪. ‘‘ਸੁਦ੍ਧੋਦਨੋ ਨਾਮ ਪਿਤਾ ਮਹੇਸਿਨੋ, ਬੁਦ੍ਧਸ੍ਸ ਮਾਤਾ ਪਨ ਮਾਯਨਾਮਾ;

ਯਾ ਬੋਧਿਸਤ੍ਤਂ ਪਰਿਹਰਿਯ ਕੁਚ੍ਛਿਨਾ, ਕਾਯਸ੍ਸ ਭੇਦਾ ਤਿਦਿਵਮ੍ਹਿ ਮੋਦਤਿ.

੫੩੫. ‘‘ਸਾ ਗੋਤਮੀ ਕਾਲਕਤਾ ਇਤੋ ਚੁਤਾ, ਦਿਬ੍ਬੇਹਿ ਕਾਮੇਹਿ ਸਮਙ੍ਗਿਭੂਤਾ;

ਸਾ ਮੋਦਤਿ ਕਾਮਗੁਣੇਹਿ ਪਞ੍ਚਹਿ, ਪਰਿਵਾਰਿਤਾ ਦੇਵਗਣੇਹਿ ਤੇਹਿ.

੫੩੬. ‘‘ਬੁਦ੍ਧਸ੍ਸ ਪੁਤ੍ਤੋਮ੍ਹਿ ਅਸਯ੍ਹਸਾਹਿਨੋ, ਅਙ੍ਗੀਰਸਸ੍ਸਪ੍ਪਟਿਮਸ੍ਸ ਤਾਦਿਨੋ;

ਪਿਤੁਪਿਤਾ ਮਯ੍ਹਂ ਤੁਵਂਸਿ ਸਕ੍ਕ, ਧਮ੍ਮੇਨ ਮੇ ਗੋਤਮ ਅਯ੍ਯਕੋਸੀ’’ਤਿ. –

ਇਮਾ ਗਾਥਾ ਅਭਾਸਿ.

ਤਤ੍ਥ ਅਙ੍ਗਾਰਿਨੋਤਿ ਅਙ੍ਗਾਰਾਨਿ ਵਿਯਾਤਿ ਅਙ੍ਗਾਰਾਨਿ, ਰਤ੍ਤਪਵਾਲ਼ਵਣ੍ਣਾਨਿ ਰੁਕ੍ਖਾਨਂ ਪੁਪ੍ਫਪਲ੍ਲਵਾਨਿ, ਤਾਨਿ ਏਤੇਸਂ ਸਨ੍ਤੀਤਿ ਅਙ੍ਗਾਰਿਨੋ, ਅਤਿਲੋਹਿਤਕੁਸੁਮਕਿਸਲਯੇਹਿ ਅਙ੍ਗਾਰਵੁਟ੍ਠਿਸਂਪਰਿਕਿਣ੍ਣਾ ਵਿਯਾਤਿ ਅਤ੍ਥੋ. ਇਦਾਨੀਤਿ ਇਮਸ੍ਮਿਂ ਕਾਲੇ. ਦੁਮਾਤਿ ਰੁਕ੍ਖਾ. ਭਦਨ੍ਤੇਤਿ, ਭਦ੍ਦਂ ਅਨ੍ਤੇ ਏਤਸ੍ਸਾਤਿ ਭਦਨ੍ਤੇਤਿ ਏਕਸ੍ਸ ਦਕਾਰਸ੍ਸ ਲੋਪਂ ਕਤ੍ਵਾ ਵੁਚ੍ਚਤਿ, ਗੁਣਵਿਸੇਸਯੁਤ੍ਤੋ, ਗੁਣਵਿਸੇਸਯੁਤ੍ਤਾਨਞ੍ਚ ਅਗ੍ਗਭੂਤੋ ਸਤ੍ਥਾ. ਤਸ੍ਮਾ ਭਦਨ੍ਤੇਤਿ ਸਤ੍ਥੁ ਆਲਪਨਂ. ਪਚ੍ਚਤ੍ਤਵਚਨਞ੍ਚੇਤਂ ਏਕਾਰਨ੍ਤਂ ‘‘ਸੁਕਟੇ ਪਟਿਕਮ੍ਮੇ ਸੁਖੇ ਦੁਕ੍ਖੇਪਿ ਚੇ’’ਤਿਆਦੀਸੁ ਵਿਯ. ਇਧ ਪਨ ਸਮ੍ਬੋਧਨਤ੍ਥੇ ਦਟ੍ਠਬ੍ਬਂ. ਤੇਨ ਵੁਤ੍ਤਂ ‘‘ਭਦਨ੍ਤੇਤਿ ਆਲਪਨ’’ਨ੍ਤਿ. ‘‘ਭਦ੍ਦਸਦ੍ਦਸਮਾਨਤ੍ਥਂ ਪਦਨ੍ਤਰਮੇਕ’’ਨ੍ਤਿ ਕੇਚਿ. ਫਲਾਨਿ ਏਸਨ੍ਤੀਤਿ ਫਲੇਸਿਨੋ. ਅਚੇਤਨੇਪਿ ਹਿ ਸਚੇਤਨਕਿਰਿਯਮਾਰੋਪੇਤ੍ਵਾ ਵੋਹਰਨ੍ਤਿ, ਯਥਾ ਕੁਲਂ ਪਤਿਤੁਕਾਮਨ੍ਤਿ, ਫਲਾਨਿ ਗਹੇਤੁਮਾਰਦ੍ਧਾ ਸਮ੍ਪਤ੍ਤਿਫਲਗਹਣਕਾਲਾਤਿ ਅਤ੍ਥੋ. ਛਦਨਂ ਵਿਪ੍ਪਹਾਯਾਤਿ ਪੁਰਾਣਪਣ੍ਣਾਨਿ ਪਜਹਿਤ੍ਵਾ ਸਮ੍ਪਨ੍ਨਪਣ੍ਡੁਪਲਾਸਾਤਿ ਅਤ੍ਥੋ. ਤੇਤਿ ਦੁਮਾ. ਅਚ੍ਚਿਮਨ੍ਤੋਵ ਪਭਾਸਯਨ੍ਤੀਤਿ ਦੀਪਸਿਖਾਵਨ੍ਤੋ ਵਿਯ ਜਲਿਤਅਗ੍ਗੀ ਵਿਯ ਵਾ ਓਭਾਸਯਨ੍ਤਿ ਸਬ੍ਬਾ ਦਿਸਾਤਿ ਅਧਿਪ੍ਪਾਯੋ. ਸਮਯੋਤਿ ਕਾਲੋ, ‘‘ਅਨੁਗ੍ਗਹਾਯਾ’’ਤਿ ਵਚਨਸੇਸੋ. ਮਹਾਵੀਰਾਤਿ ਮਹਾਵਿਕ੍ਕਨ੍ਤ. ਭਾਗੀ ਰਸਾਨਨ੍ਤਿ ਅਤ੍ਥਰਸਾਦੀਨਂ ਭਾਗੀ. ਵੁਤ੍ਤਞ੍ਹੇਤਂ ਧਮ੍ਮਸੇਨਾਪਤਿਨਾ – ‘‘ਭਾਗੀ ਵਾ ਭਗਵਾ ਅਤ੍ਥਰਸਸ੍ਸ ਧਮ੍ਮਰਸਸ੍ਸਾ’’ਤਿਆਦਿ (ਚੂਲ਼ਨਿ. ਅਜਿਤਮਾਣਵਪੁਚ੍ਛਾਨਿਦ੍ਦੇਸ ੨). ਮਹਾਵੀਰ, ਭਾਗੀਤਿ ਚ ਇਦਮ੍ਪਿ ਦ੍ਵਯਂ ਸਮ੍ਬੋਧਨਵਚਨਂ ਦਟ੍ਠਬ੍ਬਂ. ਭਾਗੀਰਥਾਨਨ੍ਤਿ ਪਨ ਪਾਠੇ ਭਗੀਰਥੋ ਨਾਮ ਆਦਿਰਾਜਾ. ਤਬ੍ਬਂਸਜਾਤਤਾਯ ਸਾਕਿਯਾ ਭਾਗੀਰਥਾ, ਤੇਸਂ ਭਾਗੀਰਥਾਨਂ ਉਪਕਾਰਤ੍ਥਨ੍ਤਿ ਅਧਿਪ੍ਪਾਯੋ.

ਦੁਮਾਨੀਤਿ ਲਿਙ੍ਗਵਿਪਲ੍ਲਾਸੇਨ ਵੁਤ੍ਤਂ, ਦੁਮਾ ਰੁਕ੍ਖਾਤਿ ਅਤ੍ਥੋ. ਸਮਨ੍ਤਤੋ ਸਬ੍ਬਦਿਸਾ ਪਵਨ੍ਤੀਤਿ, ਸਮਨ੍ਤਤੋ ਸਬ੍ਬਭਾਗਤੋ ਸਬ੍ਬਦਿਸਾਸੁ ਚ ਫੁਲ੍ਲਾਨਿ, ਤਥਾ ਫੁਲ੍ਲਤ੍ਤਾ ਏਵ ਸਬ੍ਬਦਿਸਾ ਪਵਨ੍ਤਿ ਗਨ੍ਧਂ ਵਿਸ੍ਸਜ੍ਜੇਨ੍ਤਿ. ਆਸਮਾਨਾਤਿ ਆਸੀਸਨ੍ਤਾ ਗਹਿਤੁਕਾਮਾ. ਏਵਂ ਰੁਕ੍ਖਸੋਭਾਯ ਗਮਨਮਗ੍ਗਸ੍ਸ ਰਾਮਣੇਯ੍ਯਤਂ ਦਸ੍ਸੇਤ੍ਵਾ ਇਦਾਨਿ ‘‘ਨੇਵਾਤਿਸੀਤ’’ਨ੍ਤਿਆਦਿਨਾ ਉਤੁਸਮ੍ਪਤ੍ਤਿਂ ਦਸ੍ਸੇਤਿ. ਸੁਖਾਤਿ ਨਾਤਿਸੀਤਨਾਤਿਉਣ੍ਹਭਾਵੇਨੇਵ ਸੁਖਾ ਇਟ੍ਠਾ. ਉਤੁ ਅਦ੍ਧਨਿਯਾਤਿ ਅਦ੍ਧਾਨਗਮਨਯੋਗ੍ਗਾ ਉਤੁ. ਪਸ੍ਸਨ੍ਤੁ ਤਂ ਸਾਕਿਯਾ ਕੋਲ਼ਿਯਾ ਚ, ਪਚ੍ਛਾਮੁਖਂ ਰੋਹਿਨਿਯਂ ਤਰਨ੍ਤਨ੍ਤਿ ਰੋਹਿਨੀ ਨਾਮ ਨਦੀ ਸਾਕਿਯਕੋਲ਼ਿਯਜਨਪਦਾਨਂ ਅਨ੍ਤਰੇ ਉਤ੍ਤਰਦਿਸਤੋ ਦਕ੍ਖਿਣਮੁਖਾ ਸਨ੍ਦਤਿ, ਰਾਜਗਹਂ ਚਸ੍ਸਾ ਪੁਰਤ੍ਥਿਮਦਕ੍ਖਿਣਾਯ ਦਿਸਾਯ, ਤਸ੍ਮਾ ਰਾਜਗਹਤੋ ਕਪਿਲਵਤ੍ਥੁਂ ਗਨ੍ਤੁਂ ਤਂ ਨਦਿਂ ਤਰਨ੍ਤਾ ਪਚ੍ਛਾਮੁਖਾ ਹੁਤ੍ਵਾ ਤਰਨ੍ਤਿ. ਤੇਨਾਹ ‘‘ਪਸ੍ਸਨ੍ਤੁ ਤਂ…ਪੇ… ਤਰਨ੍ਤ’’ਨ੍ਤਿ. ‘‘ਭਗਵਨ੍ਤਂ ਪਚ੍ਛਾਮੁਖਂ ਰੋਹਿਨਿਂ ਨਾਮ ਨਦਿਂ ਅਤਿਕ੍ਕਮਨ੍ਤਂ ਸਾਕਿਯਕੋਲ਼ਿਯਜਨਪਦਵਾਸਿਨੋ ਪਸ੍ਸਨ੍ਤੂ’’ਤਿ ਕਪਿਲਵਤ੍ਥੁਗਮਨਾਯ ਭਗਵਨ੍ਤਂ ਆਯਾਚਨ੍ਤੋ ਉਸ੍ਸਾਹੇਤਿ.

ਇਦਾਨਿ ਅਤ੍ਤਨੋ ਪਤ੍ਥਨਂ ਉਪਮਾਹਿ ਪਕਾਸੇਨ੍ਤੋ ‘‘ਆਸਾਯ ਕਸਤੇ’’ਤਿ ਗਾਥਮਾਹ. ਆਸਾਯ ਕਸਤੇ ਖੇਤ੍ਤਨ੍ਤਿ ਕਸ੍ਸਕੋ ਕਸਨ੍ਤੋ ਖੇਤ੍ਤਂ ਫਲਾਸਾਯ ਕਸਤਿ. ਬੀਜਂ ਆਸਾਯ ਵਪ੍ਪਤੀਤਿ ਕਸਿਤ੍ਵਾ ਚ ਵਪਨ੍ਤੇਨ ਫਲਾਸਾਯ ਏਵ ਬੀਜਂ ਵਪ੍ਪਤਿ ਨਿਕ੍ਖਿਪੀਯਤਿ. ਆਸਾਯ ਵਾਣਿਜਾ ਯਨ੍ਤੀਤਿ ਧਨਹਾਰਕਾ ਵਾਣਿਜਾ ਧਨਾਸਾਯ ਸਮੁਦ੍ਦਂ ਤਰਿਤੁਂ ਦੇਸਂ ਉਪਗਨ੍ਤੁਂ ਸਮੁਦ੍ਦਂ ਨਾਵਾਯ ਯਨ੍ਤਿ ਗਚ੍ਛਨ੍ਤਿ. ਯਾਯ ਆਸਾਯ ਤਿਟ੍ਠਾਮੀਤਿ ਏਵਂ ਅਹਮ੍ਪਿ ਯਾਯ ਆਸਾਯ ਪਤ੍ਥਨਾਯ ਭਗਵਾ ਤੁਮ੍ਹਾਕਂ ਕਪਿਲਪੁਰਗਮਨਪਤ੍ਥਨਾਯ ਇਧ ਤਿਟ੍ਠਾਮਿ. ਸਾ ਮੇ ਆਸਾ ਸਮਿਜ੍ਝਤੁ, ਤੁਮ੍ਹੇਹਿ ‘‘ਕਪਿਲਵਤ੍ਥੁ ਗਨ੍ਤਬ੍ਬ’’ਨ੍ਤਿ ਵਦਤਿ, ਆਸਾਯ ਸਦਿਸਤਾਯ ਚੇਤ੍ਥ ਕਤ੍ਤੁਕਮ੍ਯਤਾਛਨ੍ਦਂ ਆਸਾਤਿ ਆਹ.

ਗਮਨਮਗ੍ਗਸਂਵਣ੍ਣਨਾਦਿਨਾ ਅਨੇਕਵਾਰਂ ਯਾਚਨਾਯ ਕਾਰਣਂ ਦਸ੍ਸੇਤੁਂ ‘‘ਪੁਨਪ੍ਪੁਨ’’ਨ੍ਤਿਆਦਿ ਵੁਤ੍ਤਂ. ਤਸ੍ਸਤ੍ਥੋ – ਸਕਿਂ ਵੁਤ੍ਤਮਤ੍ਤੇਨ ਵਪ੍ਪੇ ਅਸਮ੍ਪਜ੍ਜਮਾਨੇ ਕਸ੍ਸਕਾ ਪੁਨਪ੍ਪੁਨਂ ਦੁਤਿਯਮ੍ਪਿ ਤਤਿਯਮ੍ਪਿ ਬੀਜਂ ਵਪਨ੍ਤਿ. ਪਜ੍ਜੁਨ੍ਨੋ ਦੇਵਰਾਜਾਪਿ ਏਕਵਾਰਮੇਵ ਅਵਸ੍ਸਿਤ੍ਵਾ ਪੁਨਪ੍ਪੁਨਂ ਕਾਲੇਨ ਕਾਲਂ ਵਸ੍ਸਤਿ. ਕਸ੍ਸਕਾਪਿ ਏਕਵਾਰਮੇਵ ਅਕਸਿਤ੍ਵਾ ਸਸ੍ਸਸਮ੍ਪਤ੍ਤਿਅਤ੍ਥਂ ਪਂਸੁਂ ਕਦ੍ਦਮਂ ਵਾ ਮੁਦੁਂ ਕਾਤੁਂ ਖੇਤ੍ਤਂ ਪੁਨਪ੍ਪੁਨਂ ਕਸਨ੍ਤਿ. ਏਕਵਾਰਮੇਵ ਧਞ੍ਞਂ ਸਙ੍ਗਹਂ ਕਤ੍ਵਾ ‘‘ਅਲਮੇਤ੍ਤਾਵਤਾ’’ਤਿ ਅਪਰਿਤੁਸ੍ਸਨਤੋ ਕੋਟ੍ਠਾਗਾਰਾਦੀਸੁ ਪਟਿਸਾਮਨਵਸੇਨ ਮਨੁਸ੍ਸੇਹਿ ਉਪਨੀਯਮਾਨਂ ਪੁਨਪ੍ਪੁਨਂ ਸਾਲਿਆਦਿਧਞ੍ਞਂ ਰਟ੍ਠਂ ਉਪੇਤਿ ਉਪਗਚ੍ਛਤਿ.

ਯਾਚਨਕਾਪਿ ਯਾਚਨ੍ਤਾ ਪੁਨਪ੍ਪੁਨਂ ਕੁਲਾਨਿ ਚਰਨ੍ਤਿ ਉਪਗਚ੍ਛਨ੍ਤਿ, ਨ ਏਕਵਾਰਮੇਵ, ਯਾਚਿਤਾ ਪਨ ਤੇਸਂ ਪੁਨਪ੍ਪੁਨਂ ਦਾਨਪਤੀ ਦਦਨ੍ਤਿ, ਨ ਸਕਿਂਯੇਵ. ਤਥਾ ਪਨ ਦੇਯ੍ਯਧਮ੍ਮਂ ਪੁਨਪ੍ਪੁਨਂ ਦਾਨਪਤੀ ਦਦਿਤ੍ਵਾ ਦਾਨਮਯਂ ਪੁਞ੍ਞਂ ਉਪਚਿਨਿਤ੍ਵਾ ਪੁਨਪ੍ਪੁਨਂ ਅਪਰਾਪਰਂ ਸਗ੍ਗਮੁਪੇਨ੍ਤਿ ਠਾਨਂ ਪਟਿਸਨ੍ਧਿਵਸੇਨ ਦੇਵਲੋਕਂ ਉਪਗਚ੍ਛਨ੍ਤਿ. ਤਸ੍ਮਾ ਅਹਮ੍ਪਿ ਪੁਨਪ੍ਪੁਨਂ ਯਾਚਾਮਿ ਭਗਵਾ ਮਯ੍ਹਂ ਮਨੋਰਥਂ ਮਤ੍ਥਕਂ ਪਾਪੇਹੀਤਿ ਅਧਿਪ੍ਪਾਯੋ.

ਇਦਾਨਿ ਯਦਤ੍ਥਂ ਸਤ੍ਥਾਰਂ ਕਪਿਲਵਤ੍ਥੁਗਮਨਂ ਯਾਚਤਿ, ਤਂ ਦਸ੍ਸੇਤੁਂ ‘‘ਵੀਰੋ ਹਵੇ’’ਤਿਗਾਥਮਾਹ. ਤਸ੍ਸਤ੍ਥੋ – ਵੀਰੋ ਵੀਰਿਯਵਾ ਮਹਾਵਿਕ੍ਕਨ੍ਤੋ ਭੂਰਿਪਞ੍ਞੋ ਮਹਾਪਞ੍ਞੋ ਪੁਰਿਸੋ ਯਸ੍ਮਿਂ ਕੁਲੇ ਜਾਯਤਿ ਨਿਬ੍ਬਤ੍ਤਤਿ, ਤਤ੍ਥ ਹਵੇ ਏਕਂਸੇਨ ਸਤ੍ਤਯੁਗਂ ਸਤ੍ਤਪੁਰਿਸਯੁਗਂ ਯਾਵਸਤ੍ਤਮਂ ਪਿਤਾਮਹਯੁਗਂ ਸਮ੍ਮਾਪਟਿਪਤ੍ਤਿਯਾ ਪੁਨੇਤਿ ਸੋਧੇਤੀਤਿ ਲੋਕਵਾਦੋ ਅਤਿਵਾਦੋ ਅਞ੍ਞੇਸੁ. ਭਗਵਾ ਪਨ ਸਬ੍ਬੇਸਂ ਦੇਵਾਨਂ ਉਤ੍ਤਮਦੇਵਤਾਯ ਦੇਵਦੇਵੋ ਪਾਪਨਿਵਾਰਣੇਨ ਕਲ੍ਯਾਣਪਤਿਟ੍ਠਾਪਨੇਨ ਤਤੋ ਪਰਮ੍ਪਿ ਸੋਧੇਤੁਂ ਸਕ੍ਕਤਿ ਸਕ੍ਕੋਤੀਤਿ ਮਞ੍ਞਾਮਿ ਅਹਂ. ਕਸ੍ਮਾ? ਤਯਾ ਹਿ ਜਾਤੋ ਮੁਨਿ ਸਚ੍ਚਨਾਮੋ ਯਸ੍ਮਾ ਤਯਾ ਸਤ੍ਥਾਰਾ ਅਰਿਯਾਯ ਜਾਤਿਯਾ ਜਾਤੋ ਮੁਨਿਭਾਵੋ, ਮੁਨਿ ਵਾ ਸਮਾਨੋ ਅਤ੍ਤਹਿਤਪਰਹਿਤਾਨਂ ਇਧਲੋਕਪਰਲੋਕਾਨਞ੍ਚ ਮੁਨਨਟ੍ਠੇਨ ‘‘ਮੁਨੀ’’ਤਿ ਅਵਿਤਥਨਾਮੋ, ਮੋਨਵਾ ਵਾ ਮੁਨਿ, ‘‘ਸਮਣੋ ਪਬ੍ਬਜਿਤੋ ਇਸੀ’’ਤਿ ਅਵਿਤਥਨਾਮੋ ਤਯਾ ਜਾਤੋ. ਤਸ੍ਮਾ ਸਤ੍ਤਾਨਂ ਏਕਨ੍ਤਹਿਤਪਟਿਲਾਭਹੇਤੁਭਾਵਤੋ ਭਗਵਾ ਤਵ ਤਤ੍ਥ ਗਮਨਂ ਯਾਚਾਮਾਤਿ ਅਤ੍ਥੋ.

ਇਦਾਨਿ ‘‘ਸਤ੍ਤਯੁਗ’’ਨ੍ਤਿ ਵੁਤ੍ਤੇ ਪਿਤੁਯੁਗਂ ਦਸ੍ਸੇਤੁਂ ‘‘ਸੁਦ੍ਧੋਦਨੋ ਨਾਮਾ’’ਤਿਆਦਿ ਵੁਤ੍ਤਂ. ਸੁਦ੍ਧਂ ਓਦਨਂ ਜੀਵਨਂ ਏਤਸ੍ਸਾਤਿ ਸੁਦ੍ਧੋਦਨੋ. ਬੁਦ੍ਧਪਿਤਾ ਹਿ ਏਕਂਸਤੋ ਸੁਵਿਸੁਦ੍ਧਕਾਯਵਚੀਮਨੋਸਮਾਚਾਰੋ ਸੁਵਿਸੁਦ੍ਧਾਜੀਵੋ ਹੋਤਿ ਤਥਾ ਅਭਿਨੀਹਾਰਸਮ੍ਪਨ੍ਨਤ੍ਤਾ. ਮਾਯਨਾਮਾਤਿ ਕੁਲਰੂਪਸੀਲਾਚਾਰਾਦਿਸਮ੍ਪਤ੍ਤਿਯਾ ਞਾਤਿਮਿਤ੍ਤਾਦੀਹਿ ‘‘ਮਾ ਯਾਹੀ’’ਤਿ ਵਤ੍ਤਬ੍ਬਗੁਣਤਾਯ ‘‘ਮਾਯਾ’’ਤਿ ਲਦ੍ਧਨਾਮਾ. ਪਰਿਹਰਿਯਾਤਿ ਧਾਰੇਤ੍ਵਾ. ਕਾਯਸ੍ਸ ਭੇਦਾਤਿ ਸਦੇਵਕਸ੍ਸ ਲੋਕਸ੍ਸ ਚੇਤਿਯਸਦਿਸਸ੍ਸ ਅਤ੍ਤਨੋ ਕਾਯਸ੍ਸ ਵਿਨਾਸਤੋ ਉਦ੍ਧਂ. ਤਿਦਿਵਮ੍ਹੀਤਿ ਤੁਸਿਤਦੇਵਲੋਕੇ.

ਸਾਤਿ ਮਾਯਾਦੇਵੀ. ਗੋਤਮੀਤਿ ਗੋਤ੍ਤੇਨ ਤਂ ਕਿਤ੍ਤੇਤਿ. ਦਿਬ੍ਬੇਹਿ ਕਾਮੇਹੀਤਿ, ਤੁਸਿਤਭਵਨਪਰਿਯਾਪਨ੍ਨੇਹਿ ਦਿਬ੍ਬੇਹਿ ਵਤ੍ਥੁਕਾਮੇਹਿ. ਸਮਙ੍ਗਿਭੂਤਾਤਿ ਸਮਨ੍ਨਾਗਤਾ. ਕਾਮਗੁਣੇਹੀਤਿ ਕਾਮਕੋਟ੍ਠਾਸੇਹਿ, ‘‘ਕਾਮੇਹੀ’’ਤਿ ਵਤ੍ਵਾ ਪੁਨ ‘‘ਕਾਮਗੁਣੇਹੀ’’ਤਿ ਵਚਨੇਨ ਅਨੇਕਭਾਗੇਹਿ ਵਤ੍ਥੁਕਾਮੇਹਿ ਪਰਿਚਾਰਿਯਤੀਤਿ ਦੀਪੇਤਿ. ਤੇਹੀਤਿ ਯਸ੍ਮਿਂ ਦੇਵਨਿਕਾਯੇ ਨਿਬ੍ਬਤ੍ਤਿ, ਤੇਹਿ ਤੁਸਿਤਦੇਵਗਣੇਹਿ, ਤੇਹਿ ਵਾ ਕਾਮਗੁਣੇਹਿ. ‘‘ਸਮਙ੍ਗਿਭੂਤਾ ਪਰਿਵਾਰਿਤਾ’’ਤਿ ਚ ਇਤ੍ਥਿਲਿਙ੍ਗਨਿਦ੍ਦੇਸੋ ਪੁਰਿਮਤ੍ਤਭਾਵਸਿਦ੍ਧਂ ਇਤ੍ਥਿਭਾਵਂ, ਦੇਵਤਾਭਾਵਂ ਵਾ ਸਨ੍ਧਾਯ ਕਤੋ, ਦੇਵੂਪਪਤ੍ਤਿ ਪਨ ਪੁਰਿਸਭਾਵੇਨੇਵ ਜਾਤਾ.

ਏਵਂ ਥੇਰੇਨ ਯਾਚਿਤੋ ਭਗਵਾ ਤਤ੍ਥ ਗਮਨੇ ਬਹੂਨਂ ਵਿਸੇਸਾਧਿਗਮਂ ਦਿਸ੍ਵਾ ਵੀਸਤਿਸਹਸ੍ਸ ਖੀਣਾਸਵਪਰਿਵੁਤੋ ਰਾਜਗਹਤੋ ਅਤੁਰਿਤਚਾਰਿਕਾਵਸੇਨ ਕਪਿਲਵਤ੍ਥੁਗਾਮਿਮਗ੍ਗਂ ਪਟਿਪਜ੍ਜਿ. ਥੇਰੋ ਇਦ੍ਧਿਯਾ ਕਪਿਲਵਤ੍ਥੁਂ ਗਨ੍ਤ੍ਵਾ ਰਞ੍ਞੋ ਪੁਰਤੋ ਆਕਾਸੇ ਠਿਤੋ ਅਦਿਟ੍ਠਪੁਬ੍ਬਂ ਵੇਸਂ ਦਿਸ੍ਵਾ ਰਞ੍ਞਾ ‘‘ਕੋਸਿ ਤ੍ਵ’’ਨ੍ਤਿ ਪੁਚ੍ਛਿਤੋ, ‘‘ਸਚੇ ਅਮਚ੍ਚਪੁਤ੍ਤਂ ਤਯਾ ਭਗਵਤੋ ਸਨ੍ਤਿਕਂ ਪੇਸਿਤਂ ਮਂ ਨ ਜਾਨਾਸਿ, ਏਵਂ ਪਨ ਜਾਨਾਹੀ’’ਤਿ ਦਸ੍ਸੇਨ੍ਤੋ –

‘‘ਬੁਦ੍ਧਸ੍ਸ ਪੁਤ੍ਤੋਮ੍ਹਿ ਅਸਯ੍ਹਸਾਹਿਨੋ, ਅਙ੍ਗੀਰਸਸ੍ਸਪ੍ਪਟਿਮਸ੍ਸ ਤਾਦਿਨੋ;

ਪਿਤੁਪਿਤਾ ਮਯ੍ਹਂ ਤੁਵਂਸਿ ਸਕ੍ਕ, ਧਮ੍ਮੇਨ ਮੇ ਗੋਤਮ ਅਯ੍ਯਕੋਸੀ’’ਤਿ. –

ਓਸਾਨਗਾਥਮਾਹ.

ਤਤ੍ਥ ਬੁਦ੍ਧਸ੍ਸ ਪੁਤ੍ਤੋਮ੍ਹੀਤਿ, ਸਬ੍ਬਞ੍ਞੁਬੁਦ੍ਧਸ੍ਸ ਉਰੇ ਜਾਤਤਾਯ ਓਰਸਪੁਤ੍ਤੋ ਅਮ੍ਹਿ. ਅਸਯ੍ਹਸਾਹਿਨੋਤਿ, ਅਭਿਸਮ੍ਬੋਧਿਤੋ ਪੁਬ੍ਬੇ ਠਪੇਤ੍ਵਾ ਮਹਾਬੋਧਿਸਤ੍ਤਂ ਅਞ੍ਞੇਹਿ ਸਹਿਤੁਂ ਵਹਿਤੁਂ ਅਸਕ੍ਕੁਣੇਯ੍ਯਤ੍ਤਾ ਅਸਯ੍ਹਸ੍ਸ ਸਕਲਸ੍ਸ ਬੋਧਿਸਮ੍ਭਾਰਸ੍ਸ ਮਹਾਕਾਰੁਣਿਕਾਧਿਕਾਰਸ੍ਸ ਚ ਸਹਨਤੋ ਵਹਨਤੋ, ਤਤੋ ਪਰਮ੍ਪਿ ਅਞ੍ਞੇਹਿ ਸਹਿਤੁਂ ਅਭਿਭਵਿਤੁਂ ਅਸਕ੍ਕੁਣੇਯ੍ਯਤ੍ਤਾ ਅਸਯ੍ਹਾਨਂ ਪਞ੍ਚਨ੍ਨਂ ਮਾਰਾਨਂ ਸਹਨਤੋ ਅਭਿਭਵਨਤੋ, ਆਸਯਾਨੁਸਯਚਰਿਤਾਧਿਮੁਤ੍ਤਿਆਦਿਵਿਭਾਗਾਵਬੋਧਨੇਨ ਯਥਾਰਹਂ ਵੇਨੇਯ੍ਯਾਨਂ ਦਿਟ੍ਠਧਮ੍ਮਿਕਸਮ੍ਪਰਾਯਿਕਪਰਮਤ੍ਥੇਹਿ ਅਨੁਸਾਸਨੀਸਙ੍ਖਾਤਸ੍ਸ ਅਞ੍ਞੇਹਿ ਅਸਯ੍ਹਸ੍ਸ ਬੁਦ੍ਧਕਿਚ੍ਚਸ੍ਸ ਚ ਸਹਨਤੋ, ਤਤ੍ਥ ਵਾ ਸਾਧੁਕਾਰੀਭਾਵਤੋ ਅਸਯ੍ਹਸਾਹਿਨੋ. ਅਙ੍ਗੀਰਸਸ੍ਸਾਤਿ ਅਙ੍ਗੀਕਤਸੀਲਾਦਿਸਮ੍ਪਤ੍ਤਿਕਸ੍ਸ. ‘‘ਅਙ੍ਗਮਙ੍ਗੇਹਿ ਨਿਚ੍ਛਰਣਕਓਭਾਸਸ੍ਸਾ’’ਤਿ ਅਪਰੇ. ਕੇਚਿ ਪਨ ‘‘ਅਙ੍ਗੀਰਸੋ, ਸਿਦ੍ਧਤ੍ਥੋਤਿ ਦ੍ਵੇ ਨਾਮਾਨਿ ਪਿਤਰਾਯੇਵ ਗਹਿਤਾਨੀ’’ਤਿ ਵਦਨ੍ਤਿ. ਅਪ੍ਪਟਿਮਸ੍ਸਾਤਿ ਅਨੂਪਮਸ੍ਸ. ਇਟ੍ਠਾਨਿਟ੍ਠੇਸੁ ਤਾਦਿਲਕ੍ਖਣਪ੍ਪਤ੍ਤਿਯਾ ਤਾਦਿਨੋ. ਪਿਤੁਪਿਤਾ ਮਯ੍ਹਂ ਤੁਵਂਸੀਤਿ ਅਰਿਯਜਾਤਿਵਸੇਨ ਮਯ੍ਹਂ ਪਿਤੁ ਸਮ੍ਮਾਸਮ੍ਬੁਦ੍ਧਸ੍ਸ ਲੋਕਵੋਹਾਰੇਨ ਤ੍ਵਂ ਪਿਤਾ ਅਸਿ. ਸਕ੍ਕਾਤਿ ਜਾਤਿਵਸੇਨ ਰਾਜਾਨਂ ਆਲਪਤਿ. ਧਮ੍ਮੇਨਾਤਿ ਸਭਾਵੇਨ ਅਰਿਯਜਾਤਿ ਲੋਕਿਯਜਾਤੀਤਿ ਦ੍ਵਿਨ੍ਨਂ ਜਾਤੀਨਂ ਸਭਾਵਸਮੋਧਾਨੇਨ ਗੋਤਮਾਤਿ ਰਾਜਾਨਂ ਗੋਤ੍ਤੇਨ ਆਲਪਤਿ. ਅਯ੍ਯਕੋਸੀਤਿ ਪਿਤਾਮਹੋ ਅਸਿ. ਏਤ੍ਥ ਚ ‘‘ਬੁਦ੍ਧਸ੍ਸ ਪੁਤ੍ਤੋਮ੍ਹੀ’’ਤਿਆਦਿਂ ਵਦਨ੍ਤੋ ਥੇਰੋ ਅਞ੍ਞਂ ਬ੍ਯਾਕਾਸਿ.

ਏਵਂ ਪਨ ਅਤ੍ਤਾਨਂ ਜਾਨਾਪੇਤ੍ਵਾ ਹਟ੍ਠਤੁਟ੍ਠੇਨ ਰਞ੍ਞਾ ਮਹਾਰਹੇ ਪਲ੍ਲਙ੍ਕੇ ਨਿਸੀਦਾਪੇਤ੍ਵਾ ਅਤ੍ਤਨੋ ਪਟਿਯਾਦਿਤਸ੍ਸ ਨਾਨਗ੍ਗਰਸਸ੍ਸ ਭੋਜਨਸ੍ਸ ਪਤ੍ਤਂ ਪੂਰੇਤ੍ਵਾ ਦਿਨ੍ਨੇ ਗਮਨਾਕਾਰਂ ਦਸ੍ਸੇਤਿ. ‘‘ਕਸ੍ਮਾ ਗਨ੍ਤੁਕਾਮਤ੍ਥ, ਭੁਞ੍ਜਥਾ’’ਤਿ ਚ ਵੁਤ੍ਤੇ, ‘‘ਸਤ੍ਥੁ ਸਨ੍ਤਿਕਂ ਗਨ੍ਤ੍ਵਾ ਭੁਞ੍ਜਿਸ੍ਸਾਮੀ’’ਤਿ. ‘‘ਕਹਂ ਪਨ ਸਤ੍ਥਾ’’ਤਿ? ‘‘ਵੀਸਤਿਸਹਸ੍ਸਭਿਕ੍ਖੁਪਰਿਵਾਰੋ ਤੁਮ੍ਹਾਕਂ ਦਸ੍ਸਨਤ੍ਥਾਯ ਮਗ੍ਗਂ ਪਟਿਪਨ੍ਨੋ’’ਤਿ. ‘‘ਤੁਮ੍ਹੇ ਇਮਂ ਪਿਣ੍ਡਪਾਤਂ ਪਰਿਭੁਞ੍ਜਿਤ੍ਵਾ ਯਾਵ ਮਮ ਪੁਤ੍ਤੋ ਇਮਂ ਨਗਰਂ ਸਮ੍ਪਾਪੁਣਾਤਿ, ਤਾਵਸ੍ਸ ਇਤੋਵ ਪਿਣ੍ਡਪਾਤਂ ਹਰਥਾ’’ਤਿ. ਥੇਰੋ ਭਤ੍ਤਕਿਚ੍ਚਂ ਕਤ੍ਵਾ ਰਞ੍ਞੋ ਪਰਿਸਾਯ ਚ ਧਮ੍ਮਂ ਕਥੇਤ੍ਵਾ ਸਤ੍ਥੁ ਆਗਮਨਤੋ ਪੁਰੇਤਰਮੇਵ ਸਕਲਂ ਰਾਜਨਿਵੇਸਨਂ ਰਤਨਤ੍ਤਯੇ ਅਭਿਪ੍ਪਸਨ੍ਨਂ ਕਰੋਨ੍ਤੋ ਸਬ੍ਬੇਸਂ ਪਸ੍ਸਨ੍ਤਾਨਂਯੇਵ ਸਤ੍ਥੁ ਆਹਰਿਤਬ੍ਬਭਤ੍ਤਪੁਣ੍ਣਂ ਪਤ੍ਤਂ ਆਕਾਸੇ ਵਿਸ੍ਸਜ੍ਜੇਤ੍ਵਾ ਸਯਮ੍ਪਿ ਵੇਹਾਸਂ ਅਬ੍ਭੁਗ੍ਗਨ੍ਤ੍ਵਾ ਪਿਣ੍ਡਪਾਤਂ ਉਪਨੇਤ੍ਵਾ ਸਤ੍ਥੁ ਹਤ੍ਥੇ ਠਪੇਸਿ. ਸਤ੍ਥਾ ਤਂ ਪਿਣ੍ਡਪਾਤਂ ਪਰਿਭੁਞ੍ਜਿ. ਏਵਂ ਸਟ੍ਠਿਯੋਜਨਂ ਮਗ੍ਗਂ ਦਿਵਸੇ ਦਿਵਸੇ ਯੋਜਨਂ ਗਚ੍ਛਨ੍ਤਸ੍ਸ ਸਤ੍ਥੁ ਰਾਜਗੇਹਤੋਵ ਭਤ੍ਤਂ ਆਹਰਿਤ੍ਵਾ ਅਦਾਸਿ. ਅਥ ਨਂ ਭਗਵਾ ‘‘ਮਯ੍ਹਂ ਪਿਤੁ ਮਹਾਰਾਜਸ੍ਸ ਸਕਲਨਿਵੇਸਨਂ ਪਸਾਦੇਸੀ’’ਤਿ ਕੁਲਪ੍ਪਸਾਦਕਾਨਂ ਅਗ੍ਗਟ੍ਠਾਨੇ ਠਪੇਸੀਤਿ.

ਕਾਲ਼ੁਦਾਯਿਤ੍ਥੇਰਗਾਥਾਵਣ੍ਣਨਾ ਨਿਟ੍ਠਿਤਾ.