੯. ਪਿਲਿਨ੍ਦਵਚ੍ਛਤ੍ਥੇਰਗਾਥਾਵਣ੍ਣਨਾ

ਸ੍ਵਾਗਤਨ੍ਤਿ ਆਯਸ੍ਮਤੋ ਪਿਲਿਨ੍ਦਵਚ੍ਛਤ੍ਥੇਰਸ੍ਸ ਗਾਥਾ. ਕਾ ਉਪ੍ਪਤ੍ਤਿ? ਅਯਂ ਕਿਰ ਪਦੁਮੁਤ੍ਤਰਬੁਦ੍ਧਕਾਲੇ ਹਂਸਵਤੀਨਗਰੇ ਮਹਾਭੋਗਕੁਲੇ ਨਿਬ੍ਬਤ੍ਤੋ ਹੇਟ੍ਠਾ ਵੁਤ੍ਤਨਯੇਨੇਵ ਸਤ੍ਥੁ ਸਨ੍ਤਿਕੇ ਧਮ੍ਮਂ ਸੁਣਨ੍ਤੋ ਸਤ੍ਥਾਰਂ ਏਕਂ ਭਿਕ੍ਖੁਂ ਦੇਵਤਾਨਂ ਪਿਯਮਨਾਪਭਾਵੇਨ ਅਗ੍ਗਟ੍ਠਾਨੇ ਠਪੇਨ੍ਤਂ ਦਿਸ੍ਵਾ ਤਂ ਠਾਨਨ੍ਤਰਂ ਪਤ੍ਥੇਤ੍ਵਾ ਯਾਵਜੀਵਂ ਕੁਸਲਂ ਕਤ੍ਵਾ ਤਤੋ ਚੁਤੋ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਸੁਮੇਧਸ੍ਸ ਭਗਵਤੋ ਕਾਲੇ ਮਨੁਸ੍ਸਲੋਕੇ ਨਿਬ੍ਬਤ੍ਤਿਤ੍ਵਾ ਭਗਵਤਿ ਪਰਿਨਿਬ੍ਬੁਤੇ ਸਤ੍ਥੁ ਥੂਪਸ੍ਸ ਪੂਜਂ ਕਤ੍ਵਾ ਸਙ੍ਘੇ ਚ ਮਹਾਦਾਨਂ ਪਵਤ੍ਤੇਤ੍ਵਾ ਤਤੋ ਚੁਤੋ ਦੇਵਮਨੁਸ੍ਸੇਸੁ ਏਵ ਸਂਸਰਨ੍ਤੋ ਅਨੁਪ੍ਪਨ੍ਨੇ ਬੁਦ੍ਧੇ ਚਕ੍ਕਵਤ੍ਤੀ ਰਾਜਾ ਹੁਤ੍ਵਾ ਮਹਾਜਨਂ ਪਞ੍ਚਸੁ ਸੀਲੇਸੁ ਪਤਿਟ੍ਠਾਪੇਤ੍ਵਾ ਸਗ੍ਗਪਰਾਯਣਂ ਅਕਾਸਿ. ਸੋ ਅਨੁਪ੍ਪਨ੍ਨੇਯੇਵ ਅਮ੍ਹਾਕਂ ਭਗਵਤਿ ਸਾਵਤ੍ਥਿਯਂ ਬ੍ਰਾਹ੍ਮਣਗੇਹੇ ਨਿਬ੍ਬਤ੍ਤਿ. ‘‘ਪਿਲਿਨ੍ਦੋ’’ਤਿਸ੍ਸ ਨਾਮਂ ਅਕਂਸੁ. ਵਚ੍ਛੋਤਿ ਪਨ ਗੋਤ੍ਤਂ. ਤੇਨ ਸੋ ਅਪਰਭਾਗੇ ‘‘ਪਿਲਿਨ੍ਦਵਚ੍ਛੋ’’ਤਿ ਪਞ੍ਞਾਯਿਤ੍ਥ. ਸਂਸਾਰੇ ਪਨ ਸਂਵੇਗਬਹੁਲਤਾਯ ਪਰਿਬ੍ਬਾਜਕਪਬ੍ਬਜ੍ਜਂ ਪਬ੍ਬਜਿਤ੍ਵਾ ਚੂਲ਼ਗਨ੍ਧਾਰਂ ਨਾਮ ਵਿਜ੍ਜਂ ਸਾਧੇਤ੍ਵਾ ਤਾਯ ਵਿਜ੍ਜਾਯ ਆਕਾਸਚਾਰੀ ਪਰਚਿਤ੍ਤਵਿਦੂ ਚ ਹੁਤ੍ਵਾ ਰਾਜਗਹੇ ਲਾਭਗ੍ਗਯਸਗ੍ਗਪ੍ਪਤ੍ਤੋ ਪਟਿਵਸਤਿ.

ਅਥ ਯਦਾ ਅਮ੍ਹਾਕਂ ਭਗਵਾ ਅਭਿਸਮ੍ਬੁਦ੍ਧੋ ਹੁਤ੍ਵਾ ਅਨੁਕ੍ਕਮੇਨ ਰਾਜਗਹਂ ਉਪਗਤੋ, ਤਤੋ ਪਟ੍ਠਾਯ ਬੁਦ੍ਧਾਨੁਭਾਵੇਨ ਤਸ੍ਸ ਸਾ ਵਿਜ੍ਜਾ ਨ ਸਮ੍ਪਜ੍ਜਤਿ, ਅਤ੍ਤਨੋ ਕਿਚ੍ਚਂ ਨ ਸਾਧੇਤਿ. ਸੋ ਚਿਨ੍ਤੇਸਿ – ‘‘ਸੁਤਂ ਖੋ ਪਨ ਮੇਤਂ ਆਚਰਿਯਪਾਚਰਿਯਾਨਂ ਭਾਸਮਾਨਾਨਂ ‘ਯਤ੍ਥ ਮਹਾਗਨ੍ਧਾਰਵਿਜ੍ਜਾ ਧਰਤਿ, ਤਤ੍ਥ ਚੂਲ਼ਗਨ੍ਧਾਰਵਿਜ੍ਜਾ ਨ ਸਮ੍ਪਜ੍ਜਤੀ’ਤਿ, ਸਮਣਸ੍ਸ ਪਨ ਗੋਤਮਸ੍ਸ ਆਗਤਕਾਲਤੋ ਪਟ੍ਠਾਯ ਨਾਯਂ ਮਮ ਵਿਜ੍ਜਾ ਸਮ੍ਪਜ੍ਜਤਿ, ਨਿਸ੍ਸਂਸਯਂ ਸਮਣੋ ਗੋਤਮੋ ਮਹਾਗਨ੍ਧਾਰਵਿਜ੍ਜਂ ਜਾਨਾਤਿ, ਯਂਨੂਨਾਹਂ ਤਂ ਪਯਿਰੁਪਾਸਿਤ੍ਵਾ ਤਸ੍ਸ ਸਨ੍ਤਿਕੇ ਤਂ ਵਿਜ੍ਜਂ ਪਰਿਯਾਪੁਣੇਯ੍ਯ’’ਨ੍ਤਿ. ਸੋ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਏਤਦਵੋਚ – ‘‘ਅਹਂ, ਮਹਾਸਮਣ, ਤਵ ਸਨ੍ਤਿਕੇ ਏਕਂ ਵਿਜ੍ਜਂ ਪਰਿਯਾਪੁਣਿਤੁਕਾਮੋ, ਓਕਾਸਂ ਮੇ ਕਰੋਹੀ’’ਤਿ. ਭਗਵਾ ‘‘ਤੇਨ ਹਿ ਪਬ੍ਬਜਾ’’ਤਿ ਆਹ. ਸੋ ‘‘ਵਿਜ੍ਜਾਯ ਪਰਿਕਮ੍ਮਂ ਪਬ੍ਬਜ੍ਜਾ’’ਤਿ ਮਞ੍ਞਮਾਨੋ ਪਬ੍ਬਜਿ. ਤਸ੍ਸ ਭਗਵਾ ਧਮ੍ਮਂ ਕਥੇਤ੍ਵਾ ਚਰਿਤਾਨੁਕੂਲਂ ਕਮ੍ਮਟ੍ਠਾਨਂ ਅਦਾਸਿ. ਸੋ ਉਪਨਿਸ੍ਸਯਸਮ੍ਪਨ੍ਨਤਾਯ ਨਚਿਰਸ੍ਸੇਵ ਵਿਪਸ੍ਸਨਂ ਵਡ੍ਢੇਤ੍ਵਾ ਅਰਹਤ੍ਤਂ ਪਾਪੁਣਿ. ਯਾ ਪਨ ਪੁਰਿਮਜਾਤਿਯਂ ਤਸ੍ਸੋਵਾਦੇ ਠਤ੍ਵਾ ਸਗ੍ਗੇ ਨਿਬ੍ਬਤ੍ਤਾ ਦੇਵਤਾ, ਤਂ ਕਤਞ੍ਞੁਤਂ ਨਿਸ੍ਸਾਯ ਸਞ੍ਜਾਤਬਹੁਮਾਨਾ ਸਾਯਂ ਪਾਤਂ ਥੇਰਂ ਪਯਿਰੁਪਾਸਿਤ੍ਵਾ ਗਚ੍ਛਨ੍ਤਿ. ਤਸ੍ਮਾ ਥੇਰੋ ਦੇਵਤਾਨਂ ਪਿਯਮਨਾਪਤਾਯ ਅਗ੍ਗਤਂ ਪਤ੍ਤੋ. ਤੇਨ ਵੁਤ੍ਤਂ ਅਪਦਾਨੇ (ਅਪ. ਥੇਰ ੧.੨.੫੫-੬੭) –

‘‘ਨਿਬ੍ਬੁਤੇ ਲੋਕਨਾਥਮ੍ਹਿ, ਸੁਮੇਧੇ ਅਗ੍ਗਪੁਗ੍ਗਲੇ;

ਪਸਨ੍ਨਚਿਤ੍ਤੋ ਸੁਮਨੋ, ਥੂਪਪੂਜਂ ਅਕਾਸਹਂ.

‘‘ਯੇ ਚ ਖੀਣਾਸਵਾ ਤਤ੍ਥ, ਛਲ਼ਭਿਞ੍ਞਾ ਮਹਿਦ੍ਧਿਕਾ;

ਤੇਹਂ ਤਤ੍ਥ ਸਮਾਨੇਤ੍ਵਾ, ਸਙ੍ਘਭਤ੍ਤਂ ਅਕਾਸਹਂ.

‘‘ਸੁਮੇਧਸ੍ਸ ਭਗਵਤੋ, ਉਪਟ੍ਠਾਕੋ ਤਦਾ ਅਹੁ;

ਸੁਮੇਧੋ ਨਾਮ ਨਾਮੇਨ, ਅਨੁਮੋਦਿਤ੍ਥ ਸੋ ਤਦਾ.

‘‘ਤੇਨ ਚਿਤ੍ਤਪ੍ਪਸਾਦੇਨ, ਵਿਮਾਨਂ ਉਪਪਜ੍ਜਹਂ;

ਛਲ਼ਾਸੀਤਿਸਹਸ੍ਸਾਨਿ, ਅਚ੍ਛਰਾਯੋ ਰਮਿਂਸੁ ਮੇ.

‘‘ਮਮੇਵ ਅਨੁਵਤ੍ਤਨ੍ਤਿ, ਸਬ੍ਬਕਾਮੇਹਿ ਤਾ ਸਦਾ;

ਅਞ੍ਞੇ ਦੇਵੇ ਅਭਿਭੋਮਿ, ਪੁਞ੍ਞਕਮ੍ਮਸ੍ਸਿਦਂ ਫਲਂ.

‘‘ਪਞ੍ਚਵੀਸਮ੍ਹਿ ਕਪ੍ਪਮ੍ਹਿ, ਵਰੁਣੋ ਨਾਮ ਖਤ੍ਤਿਯੋ;

ਵਿਸੁਦ੍ਧਭੋਜਨੋ ਆਸਿਂ, ਚਕ੍ਕਵਤ੍ਤੀ ਅਹਂ ਤਦਾ.

‘‘ਨ ਤੇ ਬੀਜਂ ਪਵਪ੍ਪਨ੍ਤਿ, ਨਪਿ ਨੀਯਨ੍ਤਿ ਨਙ੍ਗਲਾ;

ਅਕਟ੍ਠਪਾਕਿਮਂ ਸਾਲਿਂ, ਪਰਿਭੁਞ੍ਜਨ੍ਤਿ ਮਾਨੁਸਾ.

‘‘ਤਤ੍ਥ ਰਜ੍ਜਂ ਕਰਿਤ੍ਵਾਨ, ਦੇਵਤ੍ਤਂ ਪੁਨ ਗਚ੍ਛਹਂ;

ਤਦਾਪਿ ਏਦਿਸਾ ਮਯ੍ਹਂ, ਨਿਬ੍ਬਤ੍ਤਾ ਭੋਗਸਮ੍ਪਦਾ.

‘‘ਨ ਮਂ ਮਿਤ੍ਤਾ ਅਮਿਤ੍ਤਾ ਵਾ, ਹਿਂਸਨ੍ਤਿ ਸਬ੍ਬਪਾਣਿਨੋ;

ਸਬ੍ਬੇਸਮ੍ਪਿ ਪਿਯੋ ਹੋਮਿ, ਪੁਞ੍ਞਕਮ੍ਮਸ੍ਸਿਦਂ ਫਲਂ.

‘‘ਤਿਂਸਕਪ੍ਪਸਹਸ੍ਸਮ੍ਹਿ, ਯਂ ਦਾਨਮਦਦਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਗਨ੍ਧਾਲੇਪਸ੍ਸਿਦਂ ਫਲਂ.

‘‘ਇਮਸ੍ਮਿਂ ਭਦ੍ਦਕੇ ਕਪ੍ਪੇ, ਏਕੋ ਆਸਿਂ ਜਨਾਧਿਪੋ;

ਮਹਾਨੁਭਾਵੋ ਰਾਜਾਹਂ, ਚਕ੍ਕਵਤ੍ਤੀ ਮਹਬ੍ਬਲੋ.

‘‘ਸੋਹਂ ਪਞ੍ਚਸੁ ਸੀਲੇਸੁ, ਠਪੇਤ੍ਵਾ ਜਨਤਂ ਬਹੁਂ;

ਪਾਪੇਤ੍ਵਾ ਸੁਗਤਿਂਯੇਵ, ਦੇਵਤਾਨਂ ਪਿਯੋ ਅਹੁਂ.

‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਕਤਂ ਬੁਦ੍ਧਸ੍ਸ ਸਾਸਨ’’ਨ੍ਤਿ.

ਤਥਾ ਦੇਵਤਾਹਿ ਅਤਿਵਿਯ ਪਿਯਾਯਿਤਬ੍ਬਭਾਵਤੋ ਇਮਂ ਥੇਰਂ ਭਗਵਾ ਦੇਵਤਾਨਂ ਪਿਯਮਨਾਪਭਾਵੇਨ ਅਗ੍ਗਟ੍ਠਾਨੇ ਠਪੇਸਿ – ‘‘ਏਤਦਗ੍ਗਂ, ਭਿਕ੍ਖਵੇ, ਮਮ ਸਾਵਕਾਨਂ ਭਿਕ੍ਖੂਨਂ ਦੇਵਤਾਨਂ ਪਿਯਮਨਾਪਾਨਂ ਯਦਿਦਂ ਪਿਲਿਨ੍ਦਵਚ੍ਛੋ’’ਤਿ (ਅ. ਨਿ. ੧.੨੦੯, ੨੧੫) ਸੋ ਏਕਦਿਵਸਂ ਭਿਕ੍ਖੁਸਙ੍ਘਮਜ੍ਝੇ ਨਿਸਿਨ੍ਨੋ ਅਤ੍ਤਨੋ ਗੁਣੇ ਪਚ੍ਚਵੇਕ੍ਖਿਤ੍ਵਾ ਤੇਸਂ ਕਾਰਣਭੂਤਂ ਵਿਜ੍ਜਾਨਿਮਿਤ੍ਤਂ ਭਗਵਤੋ ਸਨ੍ਤਿਕੇ ਆਗਮਨਂ ਪਸਂਸਨ੍ਤੋ ‘‘ਸ੍ਵਾਗਤਂ ਨਾਪਗਤ’’ਨ੍ਤਿ ਗਾਥਂ ਅਭਾਸਿ.

੯. ਤਤ੍ਥ ਸ੍ਵਾਗਤਨ੍ਤਿ ਸੁਨ੍ਦਰਂ ਆਗਮਨਂ, ਇਦਂ ਮਮਾਤਿ ਸਮ੍ਬਨ੍ਧੋ. ਅਥ ਵਾ ਸ੍ਵਾਗਤਨ੍ਤਿ ਸੁਟ੍ਠੁ ਆਗਤਂ, ਮਯਾਤਿ ਵਿਭਤ੍ਤਿ ਵਿਪਰਿਣਾਮੇਤਬ੍ਬਾ. ਨਾਪਗਤਨ੍ਤਿ ਨ ਅਪਗਤਂ ਹਿਤਾਭਿਵੁਦ੍ਧਿਤੋ ਨ ਅਪੇਤਂ. ਨਯਿਦਂ ਦੁਮਨ੍ਤਿਤਂ ਮਮਾਤਿ ਇਦਂ ਮਮ ਦੁਟ੍ਠੁ ਕਥਿਤਂ, ਦੁਟ੍ਠੁ ਵਾ ਵੀਮਂਸਿਤਂ ਨ ਹੋਤਿ. ਇਦਂ ਵੁਤ੍ਤਂ ਹੋਤਿ – ਯਂ ਭਗਵਤੋ ਸਨ੍ਤਿਕੇ ਮਮਾਗਮਨਂ, ਯਂ ਵਾ ਮਯਾ ਤਤ੍ਥ ਆਗਤਂ, ਤਂ ਸ੍ਵਾਗਤਂ, ਸ੍ਵਾਗਤਤ੍ਤਾਯੇਵ ਨ ਦੁਰਾਗਤਂ. ਯਂ ‘‘ਭਗਵਤੋ ਸਨ੍ਤਿਕੇ ਧਮ੍ਮਂ ਸੁਤ੍ਵਾ ਪਬ੍ਬਜਿਸ੍ਸਾਮੀ’’ਤਿ ਮਮ ਮਨ੍ਤਿਤਂ ਗਦਿਤਂ ਕਥਿਤਂ, ਚਿਤ੍ਤੇਨ ਵਾ ਵੀਮਂਸਿਤਂ ਇਦਮ੍ਪਿ ਨ ਦੁਮ੍ਮਨ੍ਤਿਨ੍ਤਿ. ਇਦਾਨਿ ਤਤ੍ਥ ਕਾਰਣਂ ਦਸ੍ਸੇਨ੍ਤੋ ‘‘ਸਂਵਿਭਤ੍ਤੇਸੂ’’ਤਿਆਦਿਮਾਹ. ਸਂਵਿਭਤ੍ਤੇਸੂਤਿ ਪਕਾਰਤੋ ਵਿਭਤ੍ਤੇਸੁ. ਧਮ੍ਮੇਸੂਤਿ ਞੇਯ੍ਯਧਮ੍ਮੇਸੁ ਸਮਥਧਮ੍ਮੇਸੁ ਵਾ, ਨਾਨਾਤਿਤ੍ਥਿਯੇਹਿ ਪਕਤਿਆਦਿਵਸੇਨ, ਸਮ੍ਮਾਸਮ੍ਬੁਦ੍ਧੇਹਿ ਦੁਕ੍ਖਾਦਿਵਸੇਨ ਸਂਵਿਭਜਿਤ੍ਵਾ ਵੁਤ੍ਤਧਮ੍ਮੇਸੁ. ਯਂ ਸੇਟ੍ਠਂ ਤਦੁਪਾਗਮਿਨ੍ਤਿ ਯਂ ਤਤ੍ਥ ਸੇਟ੍ਠਂ, ਤਂ ਚਤੁਸਚ੍ਚਧਮ੍ਮਂ, ਤਸ੍ਸ ਵਾ ਬੋਧਕਂ ਸਾਸਨਧਮ੍ਮਂ ਉਪਾਗਮਿਂ, ‘‘ਅਯਂ ਧਮ੍ਮੋ ਅਯਂ ਵਿਨਯੋ’’ਤਿ ਉਪਗਚ੍ਛਿਂ. ਸਮ੍ਮਾਸਮ੍ਬੁਦ੍ਧੇਹਿ ਏਵ ਵਾ ਕੁਸਲਾਦਿਵਸੇਨ ਖਨ੍ਧਾਦਿਵਸੇਨ ਯਥਾਸਭਾਵਤੋ ਸਂਵਿਭਤ੍ਤੇਸੁ ਸਭਾਵਧਮ੍ਮੇਸੁ ਯਂ ਤਤ੍ਥ ਸੇਟ੍ਠਂ ਉਤ੍ਤਮਂ ਪਵਰਂ, ਤਂ ਮਗ੍ਗਫਲਨਿਬ੍ਬਾਨਧਮ੍ਮਂ ਉਪਾਗਮਿਂ, ਅਤ੍ਤਪਚ੍ਚਕ੍ਖਤੋ ਉਪਗਚ੍ਛਿਂ ਸਚ੍ਛਾਕਾਸਿਂ, ਤਸ੍ਮਾ ਸ੍ਵਾਗਤਂ ਮਮ ਨ ਅਪਗਤਂ ਸੁਮਨ੍ਤਿਤਂ ਨ ਦੁਮ੍ਮਨ੍ਤਿਤਨ੍ਤਿ ਯੋਜਨਾ.

ਪਿਲਿਨ੍ਦਵਚ੍ਛਤ੍ਥੇਰਗਾਥਾਵਣ੍ਣਨਾ ਨਿਟ੍ਠਿਤਾ.