੮. ਵੀਰਤ੍ਥੇਰਗਾਥਾਵਣ੍ਣਨਾ
ਯੋ ਦੁਦ੍ਦਮਿਯੋਤਿ ਆਯਸ੍ਮਤੋ ਵੀਰਤ੍ਥੇਰਸ੍ਸ ਗਾਥਾ. ਕਾ ਉਪ੍ਪਤ੍ਤਿ? ਅਯਂ ਕਿਰ ਇਤੋ ਏਕਨਵੁਤੇ ਕਪ੍ਪੇ ਵਿਪਸ੍ਸਿਸ੍ਸ ਭਗਵਤੋ ਵਸਨਆਵਾਸਂ ਪਟਿਜਗ੍ਗਿ. ਏਕਦਿਵਸਞ੍ਚ ਸਿਨ੍ਧੁਵਾਰਪੁਪ੍ਫਸਦਿਸਾਨਿ ਨਿਗ੍ਗੁਣ੍ਠਿਪੁਪ੍ਫਾਨਿ ਗਹੇਤ੍ਵਾ ਭਗਵਨ੍ਤਂ ਪੂਜੇਸਿ. ਸੋ ਤੇਨ ਪੁਞ੍ਞਕਮ੍ਮੇਨ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਇਤੋ ਪਞ੍ਚਤਿਂਸੇ ਕਪ੍ਪੇ ਖਤ੍ਤਿਯਕੁਲੇ ਨਿਬ੍ਬਤ੍ਤਿਤ੍ਵਾ ਮਹਾਪਤਾਪੋ ਨਾਮ ਰਾਜਾ ਅਹੋਸਿ ਚਕ੍ਕਵਤ੍ਤੀ. ਸੋ ਧਮ੍ਮੇਨ ਸਮੇਨ ਰਜ੍ਜਂ ਕਾਰੇਨ੍ਤੋ ਸਤ੍ਤੇ ਸਗ੍ਗਮਗ੍ਗੇ ਪਤਿਟ੍ਠਾਪੇਸਿ. ਪੁਨ ਇਮਸ੍ਮਿਂ ਕਪ੍ਪੇ ਕਸ੍ਸਪਸ੍ਸ ਭਗਵਤੋ ਕਾਲੇ ਮਹਾਵਿਭਵੋ ਸੇਟ੍ਠਿ ਹੁਤ੍ਵਾ ਕਪਣਦ੍ਧਿਕਾਦੀਨਂ ਦਾਨਂ ਦੇਨ੍ਤੋ ਸਙ੍ਘਸ੍ਸ ਖੀਰਭਤ੍ਤਂ ਅਦਾਸਿ. ਏਵਂ ਤਤ੍ਥ ਤਤ੍ਥ ਦਾਨਮਯਂ ਪੁਞ੍ਞਸਮ੍ਭਾਰਂ ਕਰੋਨ੍ਤੋ ਇਤਰਞ੍ਚ ਨਿਬ੍ਬਾਨਤ੍ਥਂ ਸਮ੍ਭਰਨ੍ਤੋ ਦੇਵਮਨੁਸ੍ਸੇਸੁ ਸਂਸਰਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਸਾਵਤ੍ਥਿਨਗਰੇ ਰਞ੍ਞੋ ਪਸੇਨਦਿਸ੍ਸ ਅਮਚ੍ਚਕੁਲੇ ਨਿਬ੍ਬਤ੍ਤਿ, ‘‘ਵੀਰੋ’’ਤਿਸ੍ਸ ਨਾਮਂ ਅਕਂਸੁ. ਸੋ ਵਯਪ੍ਪਤ੍ਤੋ ਨਾਮਾਨੁਗਤੇਹਿ ਪਤ੍ਤਬਲਜਵਾਦਿਗੁਣੇਹਿ ਸਮਨ੍ਨਾਗਤੋ ਸਙ੍ਗਾਮਸੂਰੋ ਹੁਤ੍ਵਾ ਮਾਤਾਪਿਤੂਹਿ ਨਿਬਨ੍ਧਵਸੇਨ ਕਾਰਿਤੇ ਦਾਰਪਰਿਗ੍ਗਹੇ ਏਕਂਯੇਵ ਪੁਤ੍ਤਂ ਲਭਿਤ੍ਵਾ ਪੁਬ੍ਬਹੇਤੁਨਾ ਚੋਦਿਯਮਾਨੋ ਕਾਮੇਸੁ ਸਂਸਾਰੇ ਚ ਆਦੀਨਵਂ ਦਿਸ੍ਵਾ ਸਂਵੇਗਜਾਤੋ ਪਬ੍ਬਜਿਤ੍ਵਾ ਘਟੇਨ੍ਤੋ ਵਾਯਮਨ੍ਤੋ ਨਚਿਰਸ੍ਸੇਵ ਛਲ਼ਭਿਞ੍ਞੋ ਅਹੋਸਿ. ਤੇਨ ਵੁਤ੍ਤਂ ਅਪਦਾਨੇ (ਅਪ. ਥੇਰ ੧.੨੧.੨੧-੨੪) –
‘‘ਵਿਪਸ੍ਸਿਸ੍ਸ ਭਗਵਤੋ, ਆਸਿਮਾਰਾਮਿਕੋ ਅਹਂ;
ਨਿਗ੍ਗੁਣ੍ਠਿਪੁਪ੍ਫਂ ਪਗ੍ਗਯ੍ਹ, ਬੁਦ੍ਧਸ੍ਸ ਅਭਿਰੋਪਯਿਂ.
‘‘ਏਕਨਵੁਤਿਤੋ ਕਪ੍ਪੇ, ਯਂ ਪੁਪ੍ਫਮਭਿਪੂਜਯਿਂ;
ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਪੂਜਾਯਿਦਂ ਫਲਂ.
‘‘ਪਞ੍ਚਵੀਸੇ ਇਤੋ ਕਪ੍ਪੇ, ਏਕੋ ਆਸਿਂ ਜਨਾਧਿਪੋ;
ਮਹਾਪਤਾਪਨਾਮੇਨ, ਚਕ੍ਕਵਤ੍ਤੀ ਮਹਬ੍ਬਲੋ.
‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਕਤਂ ਬੁਦ੍ਧਸ੍ਸ ਸਾਸਨ’’ਨ੍ਤਿ.
ਏਵਂ ਪਨ ਅਰਹਤ੍ਤਂ ਪਤ੍ਵਾ ਫਲਸਮਾਪਤ੍ਤਿਸੁਖੇਨ ਵੀਤਿਨਾਮੇਨ੍ਤਂ ਥੇਰਂ ਪੁਰਾਣਦੁਤਿਯਿਕਾ ਉਪ੍ਪਬ੍ਬਾਜੇਤੁਕਾਮਾ ਅਨ੍ਤਰਨ੍ਤਰਾ ਨਾਨਾਨਯੇਹਿ ਪਲੋਭੇਤੁਂ ਪਰਕ੍ਕਮਨ੍ਤੀ ਏਕਦਿਵਸਂ ਦਿਵਾਵਿਹਾਰਟ੍ਠਾਨਂ ਗਨ੍ਤ੍ਵਾ ਇਤ੍ਥਿਕੁਤ੍ਤਾਦੀਨਿ ਦਸ੍ਸੇਤੁਂ ਆਰਭਿ. ਅਥਾਯਸ੍ਮਾ ਵੀਰੋ ‘‘ਮਂ ਪਲੋਭੇਤੁਕਾਮਾ ਸਿਨੇਰੁਂ ਮਕਸਪਕ੍ਖਵਾਤੇਨ ਚਾਲੇਤੁਕਾਮਾ ਵਿਯ ਯਾਵ ਬਾਲਾ ਵਤਾਯਂ ਇਤ੍ਥੀ’’ਤਿ ਤਸ੍ਸਾ ਕਿਰਿਯਾਯ ਨਿਰਤ੍ਥਕਭਾਵਂ ਦੀਪੇਨ੍ਤੋ ‘‘ਯੋ ਦੁਦ੍ਦਮਿਯੋ’’ਤਿ ਗਾਥਂ ਅਭਾਸਿ.
੮. ਤਤ੍ਥ ਯੋ ਦੁਦ੍ਦਮਿਯੋਤਿਆਦੀਨਂ ਪਦਾਨਂ ਅਤ੍ਥੋ ਹੇਟ੍ਠਾ ਵੁਤ੍ਤੋਯੇਵ. ਇਦਂ ਪਨੇਤ੍ਥ ਯੋਜਨਾਮਤ੍ਤਂ ਯੋ ਪੁਬ੍ਬੇ ਅਦਨ੍ਤ ਕਿਲੇਸਤਾਯ ਪਚ੍ਚਤ੍ਥਿਕੇਹਿ ਵਾ ਸਙ੍ਗਮਸੀਸੇ ਦਮੇਤੁਂ ਜੇਤੁਂ ਅਸਕ੍ਕੁਣੇਯ੍ਯਤਾਯਦੁਦ੍ਦਮਿਯੋ, ਇਦਾਨਿ ਪਨ ਉਤ੍ਤਮੇਨ ਦਮੇਨ ਦਨ੍ਤੋ ਚਤੁਬ੍ਬਿਧਸਮ੍ਮਪ੍ਪਮਧਾਨਵੀਰਿਯਸਮ੍ਪਤ੍ਤਿਯਾ ਵੀਰੋ, ਵੁਤ੍ਤਨਯੇਨੇਵ ਸਨ੍ਤੁਸਿਤੋ ਵਿਤਿਣ੍ਣਕਙ੍ਖੋ ਵਿਜਿਤਾਵੀ ਅਪੇਤਲੋਮਹਂਸੋ ਵੀਰੋ ਵੀਰਨਾਮਕੋ ਅਨਵਸੇਸਤੋ ਕਿਲੇਸਪਰਿਨਿਬ੍ਬਾਨੇਨ ਪਰਿਨਿਬ੍ਬੁਤੋ, ਤਤੋ ਏਵ ਠਿਤਸਭਾਵੋ, ਨ ਤਾਦਿਸਾਨਂ ਸਤੇਨਪਿ ਸਹਸ੍ਸੇਨਪਿ ਚਾਲਨੀਯੋਤਿ. ਤਂ ਸੁਤ੍ਵਾ ਸਾ ਇਤ੍ਥੀ – ‘‘ਮਯ੍ਹਂ ਸਾਮਿਕੇ ਏਵਂ ਪਟਿਪਨ੍ਨੇ ਕੋ ਮਯ੍ਹਂ ਘਰਾਵਾਸੇਨ ਅਤ੍ਥੋ’’ਤਿ ਸਂਵੇਗਜਾਤਾ ਭਿਕ੍ਖੁਨੀਸੁ ਪਬ੍ਬਜਿਤ੍ਵਾ ਨਚਿਰਸ੍ਸੇਵ ਤੇਵਿਜ੍ਜਾ ਅਹੋਸੀਤਿ.
ਵੀਰਤ੍ਥੇਰਗਾਥਾਵਣ੍ਣਨਾ ਨਿਟ੍ਠਿਤਾ.