੩. ਕਙ੍ਖਾਰੇਵਤਤ੍ਥੇਰਗਾਥਾਵਣ੍ਣਨਾ

ਪਞ੍ਞਂ ਇਮਂ ਪਸ੍ਸਾਤਿ ਆਯਸ੍ਮਤੋ ਕਙ੍ਖਾਰੇਵਤਸ੍ਸ ਗਾਥਾ. ਕਾ ਉਪ੍ਪਤ੍ਤਿ? ਅਯਮ੍ਪਿ ਥੇਰੋ ਪਦੁਮੁਤ੍ਤਰਭਗਵਤੋ ਕਾਲੇ ਹਂਸਵਤੀਨਗਰੇ ਬ੍ਰਾਹ੍ਮਣਮਹਾਸਾਲਕੁਲੇ ਨਿਬ੍ਬਤ੍ਤੋ. ਏਕਦਿਵਸਂ ਬੁਦ੍ਧਾਨਂ ਧਮ੍ਮਦੇਸਨਾਕਾਲੇ ਹੇਟ੍ਠਾ ਵੁਤ੍ਤਨਯੇਨ ਮਹਾਜਨੇਨ ਸਦ੍ਧਿਂ ਵਿਹਾਰਂ ਗਨ੍ਤ੍ਵਾ ਪਰਿਸਪਰਿਯਨ੍ਤੇ ਠਿਤੋ ਧਮ੍ਮਂ ਸੁਣਨ੍ਤੋ ਸਤ੍ਥਾਰਂ ਏਕਂ ਭਿਕ੍ਖੁਂ ਝਾਨਾਭਿਰਤਾਨਂ ਅਗ੍ਗਟ੍ਠਾਨੇ ਠਪੇਨ੍ਤਂ ਦਿਸ੍ਵਾ ‘‘ਮਯਾਪਿ ਅਨਾਗਤੇ ਏਵਰੂਪੇਨ ਭਵਿਤੁਂ ਵਟ੍ਟਤੀ’’ਤਿ ਚਿਨ੍ਤੇਤ੍ਵਾ ਦੇਸਨਾਵਸਾਨੇ ਸਤ੍ਥਾਰਂ ਨਿਮਨ੍ਤੇਤ੍ਵਾ ਹੇਟ੍ਠਾ ਵੁਤ੍ਤਨਯੇਨ ਮਹਾਸਕ੍ਕਾਰਂ ਕਤ੍ਵਾ ਭਗਵਨ੍ਤਂ ਆਹ – ‘‘ਭਨ੍ਤੇ, ਅਹਂ ਇਮਿਨਾ ਅਧਿਕਾਰਕਮ੍ਮੇਨ ਅਞ੍ਞਂ ਸਮ੍ਪਤ੍ਤਿਂ ਨ ਪਤ੍ਥੇਮਿ, ਯਥਾ ਪਨ ਸੋ ਭਿਕ੍ਖੁ ਤੁਮ੍ਹੇਹਿ ਇਤੋ ਸਤ੍ਤਮਦਿਵਸਮਤ੍ਥਕੇ ਝਾਯੀਨਂ ਅਗ੍ਗਟ੍ਠਾਨੇ ਠਪਿਤੋ, ਏਵਂ ਅਹਮ੍ਪਿ ਅਨਾਗਤੇ ਏਕਸ੍ਸ ਬੁਦ੍ਧਸ੍ਸ ਸਾਸਨੇ ਝਾਯੀਨਂ ਅਗ੍ਗੋ ਭਵੇਯ੍ਯ’’ਨ੍ਤਿ ਪਤ੍ਥਨਮਕਾਸਿ. ਸਤ੍ਥਾ ਅਨਾਗਤਂ ਓਲੋਕੇਤ੍ਵਾ ਨਿਪ੍ਫਜ੍ਜਨਭਾਵਂ ਦਿਸ੍ਵਾ ‘‘ਅਨਾਗਤੇ ਕਪ੍ਪਸਤਸਹਸ੍ਸਾਵਸਾਨੇ ਗੋਤਮੋ ਨਾਮ ਬੁਦ੍ਧੋ ਉਪ੍ਪਜ੍ਜਿਸ੍ਸਤਿ, ਤਸ੍ਸ ਸਾਸਨੇ ਤ੍ਵਂ ਝਾਯੀਨਂ ਅਗ੍ਗੋ ਭਵਿਸ੍ਸਸੀ’’ਤਿ ਬ੍ਯਾਕਰਿਤ੍ਵਾ ਪਕ੍ਕਾਮਿ.

ਸੋ ਯਾਵਜੀਵਂ ਕਲ੍ਯਾਣਕਮ੍ਮਂ ਕਤ੍ਵਾ ਕਪ੍ਪਸਤਸਹਸ੍ਸਂ ਦੇਵਮਨੁਸ੍ਸੇਸੁ ਸਂਸਰਿਤ੍ਵਾ ਅਮ੍ਹਾਕਂ ਭਗਵਤੋ ਕਾਲੇ ਸਾਵਤ੍ਥਿਨਗਰੇ ਮਹਾਭੋਗਕੁਲੇ ਨਿਬ੍ਬਤ੍ਤੋ ਪਚ੍ਛਾਭਤ੍ਤਂ ਧਮ੍ਮਸ੍ਸਵਨਤ੍ਥਂ ਗਚ੍ਛਨ੍ਤੇਨ ਮਹਾਜਨੇਨ ਸਦ੍ਧਿਂ ਵਿਹਾਰਂ ਗਨ੍ਤ੍ਵਾ ਪਰਿਸਪਰਿਯਨ੍ਤੇ ਠਿਤੋ ਦਸਬਲਸ੍ਸ ਧਮ੍ਮਕਥਂ ਸੁਤ੍ਵਾ ਪਟਿਲਦ੍ਧਸਦ੍ਧੋ ਪਬ੍ਬਜਿਤ੍ਵਾ ਉਪਸਮ੍ਪਦਂ ਲਭਿਤ੍ਵਾ ਕਮ੍ਮਟ੍ਠਾਨਂ ਕਥਾਪੇਤ੍ਵਾ ਝਾਨਪਰਿਕਮ੍ਮਂ ਕਰੋਨ੍ਤੋ ਝਾਨਲਾਭੀ ਹੁਤ੍ਵਾ ਝਾਨਂ ਪਾਦਕਂ ਕਤ੍ਵਾ ਅਰਹਤ੍ਤਂ ਪਾਪੁਣਿ. ਸੋ ਯੇਭੁਯ੍ਯੇਨ ਦਸਬਲੇਨ ਸਮਾਪਜ੍ਜਿਤਬ੍ਬਸਮਾਪਤ੍ਤਿਂ ਸਮਾਪਜ੍ਜਨ੍ਤੋ ਅਹੋਰਤ੍ਤਂ ਝਾਨੇਸੁ ਚਿਣ੍ਣਵਸੀ ਅਹੋਸਿ. ਅਥ ਨਂ ਸਤ੍ਥਾ ‘‘ਏਤਦਗ੍ਗਂ, ਭਿਕ੍ਖਵੇ, ਮਮ ਸਾਵਕਾਨਂ ਭਿਕ੍ਖੂਨਂ ਝਾਯੀਨਂ ਯਦਿਦਂ ਕਙ੍ਖਾਰੇਵਤੋ’’ਤਿ (ਅ. ਨਿ. ੧.੧੯੮, ੨੦੪) ਝਾਯੀਨਂ ਅਗ੍ਗਟ੍ਠਾਨੇ ਠਪੇਸਿ. ਵੁਤ੍ਤਮ੍ਪਿ ਚੇਤਂ ਅਪਦਾਨੇ (ਅਪ. ਥੇਰ ੨.੫੫.੩੪-੫੩) –

‘‘ਪਦੁਮੁਤ੍ਤਰੋ ਨਾਮ ਜਿਨੋ, ਸਬ੍ਬਧਮ੍ਮੇਸੁ ਚਕ੍ਖੁਮਾ;

ਇਤੋ ਸਤਸਹਸ੍ਸਮ੍ਹਿ, ਕਪ੍ਪੇ ਉਪ੍ਪਜ੍ਜਿ ਨਾਯਕੋ.

‘‘ਸੀਹਹਨੁ ਬ੍ਰਹ੍ਮਗਿਰੋ, ਹਂਸਦੁਨ੍ਦੁਭਿਨਿਸ੍ਸਨੋ;

ਨਾਗਵਿਕ੍ਕਨ੍ਤਗਮਨੋ, ਚਨ੍ਦਸੂਰਾਧਿਕਪ੍ਪਭੋ.

‘‘ਮਹਾਮਤਿ ਮਹਾਵੀਰੋ, ਮਹਾਝਾਯੀ ਮਹਾਬਲੋ;

ਮਹਾਕਾਰੁਣਿਕੋ ਨਾਥੋ, ਮਹਾਤਮਪਨੂਦਨੋ.

‘‘ਸ ਕਦਾਚਿ ਤਿਲੋਕਗ੍ਗੋ, ਵੇਨੇਯ੍ਯਂ ਵਿਨਯਂ ਬਹੁਂ;

ਧਮ੍ਮਂ ਦੇਸੇਸਿ ਸਮ੍ਬੁਦ੍ਧੋ, ਸਤ੍ਤਾਸਯਵਿਦੂ ਮੁਨਿ.

‘‘ਝਾਯਿਂ ਝਾਨਰਤਂ ਵੀਰਂ, ਉਪਸਨ੍ਤਂ ਅਨਾਵਿਲਂ;

ਵਣ੍ਣਯਨ੍ਤੋ ਪਰਿਸਤਿਂ, ਤੋਸੇਸਿ ਜਨਤਂ ਜਿਨੋ.

‘‘ਤਦਾਹਂ ਹਂਸਵਤਿਯਂ, ਬ੍ਰਾਹ੍ਮਣੋ ਵੇਦਪਾਰਗੂ;

ਧਮ੍ਮਂ ਸੁਤ੍ਵਾਨ ਮੁਦਿਤੋ, ਤਂ ਠਾਨਮਭਿਪਤ੍ਥਯਿਂ.

‘‘ਤਦਾ ਜਿਨੋ ਵਿਯਾਕਾਸਿ, ਸਙ੍ਘਮਜ੍ਝੇ ਵਿਨਾਯਕੋ;

ਮੁਦਿਤੋ ਹੋਹਿ ਤ੍ਵਂ ਬ੍ਰਹ੍ਮੇ, ਲਚ੍ਛਸੇ ਤਂ ਮਨੋਰਥਂ.

‘‘ਸਤਸਹਸ੍ਸਿਤੋ ਕਪ੍ਪੇ, ਓਕ੍ਕਾਕਕੁਲਸਮ੍ਭਵੋ;

ਗੋਤਮੋ ਨਾਮ ਗੋਤ੍ਤੇਨ, ਸਤ੍ਥਾ ਲੋਕੇ ਭਵਿਸ੍ਸਤਿ.

‘‘ਤਸ੍ਸ ਧਮ੍ਮੇਸੁ ਦਾਯਾਦੋ, ਓਰਸੋ ਧਮ੍ਮਨਿਮ੍ਮਿਤੋ;

ਰੇਵਤੋ ਨਾਮ ਨਾਮੇਨ, ਹੇਸ੍ਸਤਿ ਸਤ੍ਥੁ ਸਾਵਕੋ.

‘‘ਤੇਨ ਕਮ੍ਮੇਨ ਸੁਕਤੇਨ, ਚੇਤਨਾਪਣਿਧੀਹਿ ਚ;

ਜਹਿਤ੍ਵਾ ਮਾਨੁਸਂ ਦੇਹਂ, ਤਾਵਤਿਂਸਮਗਚ੍ਛਹਂ.

‘‘ਪਚ੍ਛਿਮੇ ਚ ਭਵੇ ਦਾਨਿ, ਜਾਤੋਹਂ ਕੋਲਿਯੇ ਪੁਰੇ;

ਖਤ੍ਤਿਯੇ ਕੁਲਸਮ੍ਪਨ੍ਨੇ, ਇਦ੍ਧੇ ਫੀਤੇ ਮਹਦ੍ਧਨੇ.

‘‘ਯਦਾ ਕਪਿਲਵਤ੍ਥੁਸ੍ਮਿਂ, ਬੁਦ੍ਧੋ ਧਮ੍ਮਮਦੇਸਯਿ;

ਤਦਾ ਪਸਨ੍ਨੋ ਸੁਗਤੇ, ਪਬ੍ਬਜਿਂ ਅਨਗਾਰਿਯਂ.

‘‘ਕਙ੍ਖਾ ਮੇ ਬਹੁਲਾ ਆਸਿ, ਕਪ੍ਪਾਕਪ੍ਪੇ ਤਹਿਂ ਤਹਿਂ;

ਸਬ੍ਬਂ ਤਂ ਵਿਨਯੀ ਬੁਦ੍ਧੋ, ਦੇਸੇਤ੍ਵਾ ਧਮ੍ਮਮੁਤ੍ਤਮਂ.

‘‘ਤਤੋਹਂ ਤਿਣ੍ਣਸਂਸਾਰੋ, ਤਦਾ ਝਾਨਸੁਖੇ ਰਤੋ;

ਵਿਹਰਾਮਿ ਤਦਾ ਬੁਦ੍ਧੋ, ਮਂ ਦਿਸ੍ਵਾ ਏਤਦਬ੍ਰਵਿ.

‘‘ਯਾ ਕਾਚਿ ਕਙ੍ਖਾ ਇਧ ਵਾ ਹੁਰਂ ਵਾ, ਸਵੇਦਿਯਾ ਵਾ ਪਰਵੇਦਿਯਾ ਵਾ;

ਯੇ ਝਾਯਿਨੋ ਤਾ ਪਜਹਨ੍ਤਿ ਸਬ੍ਬਾ, ਆਤਾਪਿਨੋ ਬ੍ਰਹ੍ਮਚਰਿਯਂ ਚਰਨ੍ਤਾ.

‘‘ਸਤਸਹਸ੍ਸੇ ਕਤਂ ਕਮ੍ਮਂ, ਫਲਂ ਦਸ੍ਸੇਸਿ ਮੇ ਇਧ;

ਸੁਮੁਤ੍ਤੋ ਸਰਵੇਗੋਵ, ਕਿਲੇਸੇ ਝਾਪਯਿਂ ਮਮ.

‘‘ਤਤੋ ਝਾਨਰਤ੍ਤਂ ਦਿਸ੍ਵਾ, ਬੁਦ੍ਧੋ ਲੋਕਨ੍ਤਗੂ ਮੁਨਿ;

ਝਾਯੀਨਂ ਭਿਕ੍ਖੂਨਂ ਅਗ੍ਗੋ, ਪਞ੍ਞਾਪੇਸਿ ਮਹਾਮਤਿ.

‘‘ਕਿਲੇਸਾ ਝਾਪਿਤਾ ਮਯ੍ਹਂ, ਭਵਾ ਸਬ੍ਬੇ ਸਮੂਹਤਾ;

ਨਾਗੋਵ ਬਨ੍ਧਨਂ ਛੇਤ੍ਵਾ, ਵਿਹਰਾਮਿ ਅਨਾਸਵੋ.

‘‘ਸ੍ਵਾਗਤਂ ਵਤ ਮੇ ਆਸਿ, ਮਮ ਬੁਦ੍ਧਸ੍ਸ ਸਨ੍ਤਿਕੇ;

ਤਿਸ੍ਸੋ ਵਿਜ੍ਜਾ ਅਨੁਪ੍ਪਤ੍ਤਾ, ਕਤਂ ਬੁਦ੍ਧਸ੍ਸ ਸਾਸਨਂ.

‘‘ਪਟਿਸਮ੍ਭਿਦਾ ਚਤਸ੍ਸੋ, ਵਿਮੋਕ੍ਖਾਪਿ ਚ ਅਟ੍ਠਿਮੇ;

ਛਲ਼ਭਿਞ੍ਞਾ ਸਚ੍ਛਿਕਤਾ, ਕਤਂ ਬੁਦ੍ਧਸ੍ਸ ਸਾਸਨ’’ਨ੍ਤਿ.

ਤਥਾ ਕਤਕਿਚ੍ਚੋ ਪਨਾਯਂ ਮਹਾਥੇਰੋ ਪੁਬ੍ਬੇ ਦੀਘਰਤ੍ਤਂ ਅਤ੍ਤਨੋ ਕਙ੍ਖਾਪਕਤਚਿਤ੍ਤਤਂ ਇਦਾਨਿ ਸਬ੍ਬਸੋ ਵਿਗਤਕਙ੍ਖਤਞ੍ਚ ਪਚ੍ਚਵੇਕ੍ਖਿਤ੍ਵਾ ‘‘ਅਹੋ ਨੂਨ ਮਯ੍ਹਂ ਸਤ੍ਥੁਨੋ ਦੇਸਨਾਨੁਭਾਵੋ, ਤੇਨੇਤਰਹਿ ਏਵਂ ਵਿਗਤਕਙ੍ਖੋ ਅਜ੍ਝਤ੍ਤਂ ਵੂਪਸਨ੍ਤਚਿਤ੍ਤੋ ਜਾਤੋ’’ਤਿ ਸਞ੍ਜਾਤਬਹੁਮਾਨੋ ਭਗਵਤੋ ਪਞ੍ਞਂ ਪਸਂਸਨ੍ਤੋ ‘‘ਪਞ੍ਞਂ ਇਮਂ ਪਸ੍ਸਾ’’ਤਿ ਇਮਂ ਗਾਥਮਾਹ.

੩. ਤਤ੍ਥ ਪਞ੍ਞਨ੍ਤਿ ਪਕਾਰੇ ਜਾਨਾਤਿ, ਪਕਾਰੇਹਿ ਞਾਪੇਤੀਤਿ ਚ ਪਞ੍ਞਾ. ਵੇਨੇਯ੍ਯਾਨਂ ਆਸਯਾਨੁਸਯਚਰਿਯਾਧਿਮੁਤ੍ਤਿਆਦਿਪ੍ਪਕਾਰੇ ਧਮ੍ਮਾਨਂ ਕੁਸਲਾਦਿਕੇ ਖਨ੍ਧਾਦਿਕੇ ਚ ਦੇਸੇਤਬ੍ਬਪ੍ਪਕਾਰੇ ਜਾਨਾਤਿ, ਯਥਾਸਭਾਵਤੋ ਪਟਿਵਿਜ੍ਝਤਿ, ਤੇਹਿ ਚ ਪਕਾਰੇਹਿ ਞਾਪੇਤੀਤਿ ਅਤ੍ਥੋ. ਸਤ੍ਥੁ ਦੇਸਨਾਞਾਣਞ੍ਹਿ ਇਧਾਧਿਪ੍ਪੇਤਂ, ਤੇਨਾਹ ‘‘ਇਮ’’ਨ੍ਤਿ. ਤਞ੍ਹਿ ਅਤ੍ਤਨਿ ਸਿਦ੍ਧੇਨ ਦੇਸਨਾਬਲੇਨ ਨਯਗ੍ਗਾਹਤੋ ਪਚ੍ਚਕ੍ਖਂ ਵਿਯ ਉਪਟ੍ਠਿਤਂ ਗਹੇਤ੍ਵਾ ‘‘ਇਮ’’ਨ੍ਤਿ ਵੁਤ੍ਤਂ. ਯਦਗ੍ਗੇਨ ਵਾ ਸਤ੍ਥੁ ਦੇਸਨਾਞਾਣਂ ਸਾਵਕੇਹਿ ਨਯਤੋ ਗਯ੍ਹਤਿ, ਤਦਗ੍ਗੇਨ ਅਤ੍ਤਨੋ ਵਿਸਯੇ ਪਟਿਵੇਧਞਾਣਮ੍ਪਿ ਨਯਤੋ ਗਯ੍ਹਤੇਵ. ਤੇਨਾਹ ਆਯਸ੍ਮਾ ਧਮ੍ਮਸੇਨਾਪਤਿ – ‘‘ਅਪਿਚ ਮੇ, ਭਨ੍ਤੇ, ਧਮ੍ਮਨ੍ਵਯੋ ਵਿਦਿਤੋ’’ਤਿ (ਦੀ. ਨਿ. ੨.੧੪੬; ੩.੧੪੩). ਪਸ੍ਸਾਤਿ ਵਿਮ੍ਹਯਪ੍ਪਤ੍ਤੋ ਅਨਿਯਮਤੋ ਆਲਪਤਿ ਅਤ੍ਤਨੋਯੇਵ ਵਾ ਚਿਤ੍ਤਂ, ਯਥਾਹ ਭਗਵਾ ਉਦਾਨੇਨ੍ਤੋ – ‘‘ਲੋਕਮਿਮਂ ਪਸ੍ਸ; ਪੁਥੂ ਅਵਿਜ੍ਜਾਯ ਪਰੇਤਂ ਭੂਤਂ ਭੂਤਰਤਂ ਭਵਾ ਅਪਰਿਮੁਤ੍ਤ’’ਨ੍ਤਿ (ਉਦਾ. ੩੦). ਤਥਾਗਤਾਨਨ੍ਤਿ ਤਥਾ ਆਗਮਨਾਦਿਅਤ੍ਥੇਨ ਤਥਾਗਤਾਨਂ. ਤਥਾ ਆਗਤੋਤਿ ਹਿ ਤਥਾਗਤੋ, ਤਥਾ ਗਤੋਤਿ ਤਥਾਗਤੋ, ਤਥਲਕ੍ਖਣਂ ਆਗਤੋਤਿ ਤਥਾਗਤੋ, ਤਥਧਮ੍ਮੇ ਯਾਥਾਵਤੋ ਅਭਿਸਮ੍ਬੁਦ੍ਧੋਤਿ ਤਥਾਗਤੋ, ਤਥਦਸ੍ਸਿਤਾਯ ਤਥਾਗਤੋ, ਤਥਵਾਦਿਤਾਯ ਤਥਾਗਤੋ, ਤਥਾਕਾਰਿਤਾਯ ਤਥਾਗਤੋ, ਅਭਿਭਵਨਟ੍ਠੇਨ ਤਥਾਗਤੋਤਿ ਏਵਂ ਅਟ੍ਠਹਿ ਕਾਰਣੇਹਿ ਭਗਵਾ ਤਥਾਗਤੋ. ਤਥਾਯ ਆਗਤੋਤਿ ਤਥਾਗਤੋ, ਤਥਾਯ ਗਤੋਤਿ ਤਥਾਗਤੋ, ਤਥਲਕ੍ਖਣਂ ਗਤੋਤਿ ਤਥਾਗਤੋ, ਤਥਾਨਿ ਆਗਤੋਤਿ ਤਥਾਗਤੋ, ਤਥਾਵਿਧੋਤਿ ਤਥਾਗਤੋ, ਤਥਾ ਪਵਤ੍ਤਿਤੋਤਿ ਤਥਾਗਤੋ, ਤਥੇਹਿ ਆਗਤੋਤਿ ਤਥਾਗਤੋ, ਤਥਾ ਗਤਭਾਵੇਨ ਤਥਾਗਤੋਤਿ ਏਵਮ੍ਪਿ ਅਟ੍ਠਹਿ ਕਾਰਣੇਹਿ ਭਗਵਾ ਤਥਾਗਤੋਤਿ ਅਯਮੇਤ੍ਥ ਸਙ੍ਖੇਪੋ. ਵਿਤ੍ਥਾਰੋ ਪਨ ਪਰਮਤ੍ਥਦੀਪਨਿਯਾ ਉਦਾਨਟ੍ਠਕਥਾਯ (ਉਦਾ. ਅਟ੍ਠ. ੧੮) ਇਤਿਵੁਤ੍ਤਕਟ੍ਠਕਥਾਯ (ਇਤਿਵੁ. ਅਟ੍ਠ. ੩੮) ਚ ਵੁਤ੍ਤਨਯੇਨੇਵ ਵੇਦਿਤਬ੍ਬੋ.

ਇਦਾਨਿ ਤਸ੍ਸਾ ਪਞ੍ਞਾਯ ਅਸਾਧਾਰਣਵਿਸੇਸਂ ਦਸ੍ਸੇਤੁਂ ‘‘ਅਗ੍ਗਿ ਯਥਾ’’ਤਿਆਦਿ ਵੁਤ੍ਤਂ. ਯਥਾ ਅਗ੍ਗੀਤਿ ਉਪਮਾਵਚਨਂ. ਯਥਾਤਿ ਤਸ੍ਸ ਉਪਮਾਭਾਵਦਸ੍ਸਨਂ. ਪਜ੍ਜਲਿਤੋਤਿ ਉਪਮੇਯ੍ਯੇਨ ਸਮ੍ਬਨ੍ਧਦਸ੍ਸਨਂ. ਨਿਸੀਥੇਤਿ ਕਿਚ੍ਚਕਰਣਕਾਲਦਸ੍ਸਨਂ. ਅਯਞ੍ਹੇਤ੍ਥ ਅਤ੍ਥੋ – ਯਥਾ ਨਾਮ ਨਿਸੀਥੇ ਰਤ੍ਤਿਯਂ ਚਤੁਰਙ੍ਗਸਮਨ੍ਨਾਗਤੇ ਅਨ੍ਧਕਾਰੇ ਵਤ੍ਤਮਾਨੇ ਉਨ੍ਨਤੇ ਠਾਨੇ ਪਜ੍ਜਲਿਤੋ ਅਗ੍ਗਿ ਤਸ੍ਮਿਂ ਪਦੇਸੇ ਤਯਗਤਂ ਵਿਧਮਨ੍ਤਂ ਤਿਟ੍ਠਤਿ, ਏਵਮੇਵ ਤਥਾਗਤਾਨਂ ਇਮਂ ਦੇਸਨਾਞਾਣਸਙ੍ਖਾਤਂ ਸਬ੍ਬਸੋ ਵੇਨੇਯ੍ਯਾਨਂ ਸਂਸਯਤਮਂ ਵਿਧਮਨ੍ਤਂ ਪਞ੍ਞਂ ਪਸ੍ਸਾਤਿ. ਯਤੋ ਦੇਸਨਾਵਿਲਾਸੇਨ ਸਤ੍ਤਾਨਂ ਞਾਣਮਯਂ ਆਲੋਕਂ ਦੇਨ੍ਤੀਤਿ ਆਲੋਕਦਾ. ਪਞ੍ਞਾਮਯਮੇਵ ਚਕ੍ਖੁਂ ਦਦਨ੍ਤੀਤਿ ਚਕ੍ਖੁਦਦਾ. ਤਦੁਭਯਮ੍ਪਿ ਕਙ੍ਖਾਵਿਨਯਪਦਟ੍ਠਾਨਮੇਵ ਕਤ੍ਵਾ ਦਸ੍ਸੇਨ੍ਤੋ ‘‘ਯੇ ਆਗਤਾਨਂ ਵਿਨਯਨ੍ਤਿ ਕਙ੍ਖ’’ਨ੍ਤਿ ਆਹ, ਯੇ ਤਥਾਗਤਾ ਅਤ੍ਤਨੋ ਸਨ੍ਤਿਕਂ ਆਗਤਾਨਂ ਉਪਗਤਾਨਂ ਵੇਨੇਯ੍ਯਾਨਂ ‘‘ਅਹੋਸਿਂ ਨੁ ਖੋ ਅਹਮਤੀਤਮਦ੍ਧਾਨ’’ਨ੍ਤਿਆਦਿਨਯਪ੍ਪਵਤ੍ਤਂ (ਮ. ਨਿ. ੧.੧੮; ਸਂ. ਨਿ. ੨.੨੦) ਸੋਲ਼ਸਵਤ੍ਥੁਕਂ, ‘‘ਬੁਦ੍ਧੇ ਕਙ੍ਖਤਿ ਧਮ੍ਮੇ ਕਙ੍ਖਤੀ’’ਤਿਆਦਿਨਯਪ੍ਪਵਤ੍ਤਂ (ਧ. ਸ. ੧੦੦੮) ਅਟ੍ਠਵਤ੍ਥੁਕਞ੍ਚ ਕਙ੍ਖਂ ਵਿਚਿਕਿਚ੍ਛਂ ਵਿਨਯਨ੍ਤਿ ਦੇਸਨਾਨੁਭਾਵੇਨ ਅਨਵਸੇਸਤੋ ਵਿਧਮਨ੍ਤਿ ਵਿਦ੍ਧਂਸੇਨ੍ਤਿ. ਵਿਨਯਕੁਕ੍ਕੁਚ੍ਚਸਙ੍ਖਾਤਾ ਪਨ ਕਙ੍ਖਾ ਤਬ੍ਬਿਨਯੇਨੇਵ ਵਿਨੀਤਾ ਹੋਨ੍ਤੀਤਿ.

ਅਪਰੋ ਨਯੋ – ਯਥਾ ਅਗ੍ਗਿ ਨਿਸੀਥੇ ਰਤ੍ਤਿਭਾਗੇ ਪਜ੍ਜਲਿਤੋ ਪਟੁਤਰਜਾਲੋ ਸਮੁਜ੍ਜਲਂ ਉਚ੍ਚਾਸਨੇ ਠਿਤਾਨਂ ਓਭਾਸਦਾਨਮਤ੍ਤੇਨ ਅਨ੍ਧਕਾਰਂ ਵਿਧਮਿਤ੍ਵਾ ਸਮਵਿਸਮਂ ਵਿਭਾਵੇਨ੍ਤੋ ਆਲੋਕਦਦੋ ਹੋਤਿ. ਅਚ੍ਚਾਸਨ੍ਨੇ ਪਨ ਠਿਤਾਨਂ ਤਂ ਸੁਪਾਕਟਂ ਕਰੋਨ੍ਤੋ ਚਕ੍ਖੁਕਿਚ੍ਚਕਰਣਤੋ ਚਕ੍ਖੁਦਦੋ ਨਾਮ ਹੋਤਿ, ਏਵਮੇਵ ਤਥਾਗਤੋ ਅਤ੍ਤਨੋ ਧਮ੍ਮਕਾਯਸ੍ਸ ਦੂਰੇ ਠਿਤਾਨਂ ਅਕਤਾਧਿਕਾਰਾਨਂ ਪਞ੍ਞਾਪਜ੍ਜੋਤੇਨ ਮੋਹਨ੍ਧਕਾਰਂ ਵਿਧਮਿਤ੍ਵਾ ਕਾਯਵਿਸਮਾਦਿਸਮਵਿਸਮਂ ਵਿਭਾਵੇਨ੍ਤੋ ਆਲੋਕਦਾ ਭਵਨ੍ਤਿ, ਆਸਨ੍ਨੇ ਠਿਤਾਨਂ ਪਨ ਕਤਾਧਿਕਾਰਾਨਂ ਧਮ੍ਮਚਕ੍ਖੁਂ ਉਪ੍ਪਾਦੇਨ੍ਤੋ ਚਕ੍ਖੁਦਦਾ ਭਵਨ੍ਤਿ. ਯੇ ਏਵਂਭੂਤਾ ਅਤ੍ਤਨੋ ਵਚੀਗੋਚਰਂ ਆਗਤਾਨਂ ਮਾਦਿਸਾਨਮ੍ਪਿ ਕਙ੍ਖਾਬਹੁਲਾਨਂ ਕਙ੍ਖਂ ਵਿਨਯਨ੍ਤਿ ਅਰਿਯਮਗ੍ਗਸਮੁਪ੍ਪਾਦਨੇਨ ਵਿਧਮਨ੍ਤਿ, ਤੇਸਂ ਤਥਾਗਤਾਨਂ ਪਞ੍ਞਂ ਞਾਣਾਤਿਸਯਂ ਪਸ੍ਸਾਤਿ ਯੋਜਨਾ. ਏਵਮਯਂ ਥੇਰਸ੍ਸ ਅਤ੍ਤਨੋ ਕਙ੍ਖਾਵਿਤਰਣਪ੍ਪਕਾਸਨੇਨ ਅਞ੍ਞਾਬ੍ਯਾਕਰਣਗਾਥਾਪਿ ਹੋਤਿ. ਅਯਞ੍ਹਿ ਥੇਰੋ ਪੁਥੁਜ੍ਜਨਕਾਲੇ ਕਪ੍ਪਿਯੇਪਿ ਕੁਕ੍ਕੁਚ੍ਚਕੋ ਹੁਤ੍ਵਾ ਕਙ੍ਖਾਬਹੁਲਤਾਯ ‘‘ਕਙ੍ਖਾਰੇਵਤੋ’’ਤਿ ਪਞ੍ਞਾਤੋ, ਪਚ੍ਛਾ ਖੀਣਾਸਵਕਾਲੇਪਿ ਤਥੇਵ ਵੋਹਰਯਿਤ੍ਥ. ਤੇਨਾਹ – ‘‘ਇਤ੍ਥਂ ਸੁਦਂ ਆਯਸ੍ਮਾ ਕਙ੍ਖਾਰੇਵਤੋ ਗਾਥਂ ਅਭਾਸਿਤ੍ਥਾ’’ਤਿ. ਤਂ ਵੁਤ੍ਤਤ੍ਥਮੇਵ.

ਕਙ੍ਖਾਰੇਵਤਤ੍ਥੇਰਗਾਥਾਵਣ੍ਣਨਾ ਨਿਟ੍ਠਿਤਾ.