੪. ਪੁਣ੍ਣਤ੍ਥੇਰਗਾਥਾਵਣ੍ਣਨਾ

ਸਬ੍ਭਿਰੇਵ ਸਮਾਸੇਥਾਤਿ ਆਯਸ੍ਮਤੋ ਪੁਣ੍ਣਤ੍ਥੇਰਸ੍ਸ ਗਾਥਾ. ਕਾ ਉਪ੍ਪਤ੍ਤਿ? ਅਯਂ ਕਿਰ ਪਦੁਮੁਤ੍ਤਰਸ੍ਸ ਦਸਬਲਸ੍ਸ ਉਪ੍ਪਤ੍ਤਿਤੋ ਪੁਰੇਤਰਮੇਵ ਹਂਸਵਤੀਨਗਰੇ ਬ੍ਰਾਹ੍ਮਣਮਹਾਸਾਲਕੁਲੇ ਨਿਬ੍ਬਤ੍ਤੋ ਅਨੁਕ੍ਕਮੇਨ ਵਿਞ੍ਞੁਤਂ ਪਤ੍ਤੋ ਸਤ੍ਥਰਿ ਲੋਕੇ ਉਪ੍ਪਜ੍ਜਨ੍ਤੇ ਏਕਦਿਵਸਂ ਬੁਦ੍ਧਾਨਂ ਧਮ੍ਮਦੇਸਨਾਕਾਲੇ ਹੇਟ੍ਠਾ ਵੁਤ੍ਤਨਯੇਨ ਮਹਾਜਨੇਨ ਸਦ੍ਧਿਂ ਵਿਹਾਰਂ ਗਨ੍ਤ੍ਵਾ ਪਰਿਸਪਰਿਯਨ੍ਤੇ ਨਿਸੀਦਿਤ੍ਵਾ ਧਮ੍ਮਂ ਸੁਣਨ੍ਤੋ ਸਤ੍ਥਾਰਂ ਏਕਂ ਭਿਕ੍ਖੁਂ ਧਮ੍ਮਕਥਿਕਾਨਂ ਅਗ੍ਗਟ੍ਠਾਨੇ ਠਪੇਨ੍ਤਂ ਦਿਸ੍ਵਾ ‘‘ਮਯਾਪਿ ਅਨਾਗਤੇ ਏਵਰੂਪੇਨ ਭਵਿਤੁਂ ਵਟ੍ਟਤੀ’’ਤਿ ਚਿਨ੍ਤੇਤ੍ਵਾ ਦੇਸਨਾਵਸਾਨੇ ਵੁਟ੍ਠਿਤਾਯ ਪਰਿਸਾਯ ਸਤ੍ਥਾਰਂ ਉਪਸਙ੍ਕਮਿਤ੍ਵਾ ਨਿਮਨ੍ਤੇਤ੍ਵਾ ਹੇਟ੍ਠਾ ਵੁਤ੍ਤਨਯੇਨੇਵ ਮਹਾਸਕ੍ਕਾਰਂ ਕਤ੍ਵਾ ਭਗਵਨ੍ਤਂ ਏਵਮਾਹ – ‘‘ਭਨ੍ਤੇ, ਅਹਂ ਇਮਿਨਾ ਅਧਿਕਾਰਕਮ੍ਮੇਨ ਨਾਞ੍ਞਂ ਸਮ੍ਪਤ੍ਤਿਂ ਪਤ੍ਥੇਮਿ. ਯਥਾ ਪਨ ਸੋ ਭਿਕ੍ਖੁ ਇਤੋ ਸਤ੍ਤਮਦਿਵਸਮਤ੍ਥਕੇ ਧਮ੍ਮਕਥਿਕਾਨਂ ਅਗ੍ਗਟ੍ਠਾਨੇ ਠਪਿਤੋ, ਏਵਂ ਅਹਮ੍ਪਿ ਅਨਾਗਤੇ ਏਕਸ੍ਸ ਬੁਦ੍ਧਸ੍ਸ ਸਾਸਨੇ ਧਮ੍ਮਕਥਿਕਾਨਂ ਭਿਕ੍ਖੂਨਂ ਅਗ੍ਗੋ ਭਵੇਯ੍ਯ’’ਨ੍ਤਿ ਪਤ੍ਥਨਂ ਅਕਾਸਿ. ਸਤ੍ਥਾ ਅਨਾਗਤਂ ਓਲੋਕੇਤ੍ਵਾ ਤਸ੍ਸ ਪਤ੍ਥਨਾਯ ਸਮਿਜ੍ਝਨਭਾਵਂ ਦਿਸ੍ਵਾ ‘‘ਅਨਾਗਤੇ ਕਪ੍ਪਸਤਸਹਸ੍ਸਮਤ੍ਥਕੇ ਗੋਤਮੋ ਨਾਮ ਬੁਦ੍ਧੋ ਉਪ੍ਪਜ੍ਜਿਸ੍ਸਤਿ, ਤਸ੍ਸ ਸਾਸਨੇ ਤ੍ਵਂ ਪਬ੍ਬਜਿਤ੍ਵਾ ਧਮ੍ਮਕਥਿਕਾਨਂ ਅਗ੍ਗੋ ਭਵਿਸ੍ਸਸੀ’’ਤਿ ਬ੍ਯਾਕਾਸਿ.

ਸੋ ਤਤ੍ਥ ਯਾਵਜੀਵਂ ਕਲ੍ਯਾਣਧਮ੍ਮਂ ਕਤ੍ਵਾ ਤਤੋ ਚੁਤੋ ਕਪ੍ਪਸਤਸਹਸ੍ਸਂ ਪੁਞ੍ਞਞਾਣਸਮ੍ਭਾਰਂ ਸਮ੍ਭਰਨ੍ਤੋ ਦੇਵਮਨੁਸ੍ਸੇਸੁ ਸਂਸਰਿਤ੍ਵਾ ਅਮ੍ਹਾਕਂ ਭਗਵਤੋ ਕਾਲੇ ਕਪਿਲਵਤ੍ਥੁਨਗਰਸ੍ਸ ਅਵਿਦੂਰੇ ਦੋਣਵਤ੍ਥੁਨਾਮਕੇ ਬ੍ਰਾਹ੍ਮਣਗਾਮੇ ਬ੍ਰਾਹ੍ਮਣਮਹਾਸਾਲਕੁਲੇ ਅਞ੍ਞਾਸਿਕੋਣ੍ਡਞ੍ਞਤ੍ਥੇਰਸ੍ਸ ਭਾਗਿਨੇਯ੍ਯੋ ਹੁਤ੍ਵਾ ਨਿਬ੍ਬਤ੍ਤਿ. ਤਸ੍ਸ ਨਾਮਗ੍ਗਹਣਦਿਵਸੇ ‘‘ਪੁਣ੍ਣੋ’’ਤਿ ਨਾਮਂ ਅਕਂਸੁ. ਸੋ ਸਤ੍ਥਰਿ ਅਭਿਸਮ੍ਬੋਧਿਂ ਪਤ੍ਵਾ ਪਵਤ੍ਤਵਰਧਮ੍ਮਚਕ੍ਕੇ ਅਨੁਪੁਬ੍ਬੇਨ ਰਾਜਗਹਂ ਗਨ੍ਤ੍ਵਾ ਤਂ ਉਪਨਿਸ੍ਸਾਯ ਵਿਹਰਨ੍ਤੇ ਅਞ੍ਞਾਸਿਕੋਣ੍ਡਞ੍ਞਤ੍ਥੇਰਸ੍ਸ ਸਨ੍ਤਿਕੇ ਪਬ੍ਬਜਿਤ੍ਵਾ ਲਦ੍ਧੂਪਸਮ੍ਪਦੋ ਸਬ੍ਬਂ ਪੁਬ੍ਬਕਿਚ੍ਚਂ ਕਤ੍ਵਾ ਪਧਾਨਮਨੁਯੁਞ੍ਜਨ੍ਤੋ ਪਬ੍ਬਜਿਤਕਿਚ੍ਚਂ ਮਤ੍ਥਕਂ ਪਾਪੇਤ੍ਵਾਵ ‘‘ਦਸਬਲਸ੍ਸ ਸਨ੍ਤਿਕਂ ਗਮਿਸ੍ਸਾਮੀ’’ਤਿ ਮਾਤੁਲਤ੍ਥੇਰੇਨ ਸਦ੍ਧਿਂ ਸਤ੍ਥੁ ਸਨ੍ਤਿਕਂ ਅਗਨ੍ਤ੍ਵਾ ਕਪਿਲਵਤ੍ਥੁਸਾਮਨ੍ਤਾਯੇਵ ਓਹੀਯਿਤ੍ਵਾ ਯੋਨਿਸੋਮਨਸਿਕਾਰੇ ਕਮ੍ਮਂ ਕਰੋਨ੍ਤੋ ਨਚਿਰਸ੍ਸੇਵ ਵਿਪਸ੍ਸਨਂ ਉਸ੍ਸੁਕ੍ਕਾਪੇਤ੍ਵਾ ਅਰਹਤ੍ਤਂ ਪਾਪੁਣਿ. ਵੁਤ੍ਤਮ੍ਪਿ ਚੇਤਂ ਅਪਦਾਨੇ (ਅਪ. ਥੇਰ ੧.੧.੪੩੪-੪੪੦) –

‘‘ਅਜ੍ਝਾਯਕੋ ਮਨ੍ਤਧਰੋ, ਤਿਣ੍ਣਂ ਵੇਦਾਨ ਪਾਰਗੂ;

ਪੁਰਕ੍ਖਤੋਮ੍ਹਿ ਸਿਸ੍ਸੇਹਿ, ਉਪਗਚ੍ਛਿਂ ਨਰੁਤ੍ਤਮਂ.

‘‘ਪਦੁਮੁਤ੍ਤਰੋ ਲੋਕਵਿਦੂ, ਆਹੁਤੀਨਂ ਪਟਿਗ੍ਗਹੋ;

ਮਮ ਕਮ੍ਮਂ ਪਕਿਤ੍ਤੇਸਿ, ਸਂਖਿਤ੍ਤੇਨ ਮਹਾਮੁਨਿ.

‘‘ਤਾਹਂ ਧਮ੍ਮਂ ਸੁਣਿਤ੍ਵਾਨ, ਅਭਿਵਾਦੇਤ੍ਵਾਨ ਸਤ੍ਥੁਨੋ;

ਅਞ੍ਜਲਿਂ ਪਗ੍ਗਹੇਤ੍ਵਾਨ, ਪਕ੍ਕਮਿਂ ਦਕ੍ਖਿਣਾਮੁਖੋ.

‘‘ਸਂਖਿਤ੍ਤੇਨ ਸੁਣਿਤ੍ਵਾਨ, ਵਿਤ੍ਥਾਰੇਨ ਅਭਾਸਯਿਂ;

ਸਬ੍ਬੇ ਸਿਸ੍ਸਾ ਅਤ੍ਤਮਨਾ, ਸੁਤ੍ਵਾਨ ਮਮ ਭਾਸਤੋ.

‘‘ਸਕਂ ਦਿਟ੍ਠਿਂ ਵਿਨੋਦੇਤ੍ਵਾ, ਬੁਦ੍ਧੇ ਚਿਤ੍ਤਂ ਪਸਾਦਯੁਂ;

ਸਂਖਿਤ੍ਤੇਨਪਿ ਦੇਸੇਮਿ, ਵਿਤ੍ਥਾਰੇਨ ਤਥੇਵਹਂ.

‘‘ਅਭਿਧਮ੍ਮਨਯਞ੍ਞੂਹਂ, ਕਥਾਵਤ੍ਥੁਵਿਸੁਦ੍ਧਿਯਾ;

ਸਬ੍ਬੇਸਂ ਵਿਞ੍ਞਾਪੇਤ੍ਵਾਨ, ਵਿਹਰਾਮਿ ਅਨਾਸਵੋ.

‘‘ਇਤੋ ਪਞ੍ਚਸਤੇ ਕਪ੍ਪੇ, ਚਤੁਰੋ ਸੁਪ੍ਪਕਾਸਕਾ;

ਸਤ੍ਤਰਤਨਸਮ੍ਪਨ੍ਨਾ, ਚਤੁਦੀਪਮ੍ਹਿ ਇਸ੍ਸਰਾ.

‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨ’’ਨ੍ਤਿ.

ਤਸ੍ਸ ਪਨ ਪੁਣ੍ਣਤ੍ਥੇਰਸ੍ਸ ਸਨ੍ਤਿਕੇ ਪਬ੍ਬਜਿਤਾ ਕੁਲਪੁਤ੍ਤਾ ਪਞ੍ਚਸਤਾ ਅਹੇਸੁਂ. ਥੇਰੋ ਸਯਂ ਦਸਕਥਾਵਤ੍ਥੁਲਾਭਿਤਾਯ ਤੇਪਿ ਦਸਹਿ ਕਥਾਵਤ੍ਥੂਹਿ ਓਵਦਿ. ਤੇ ਤਸ੍ਸ ਓਵਾਦੇ ਠਤ੍ਵਾ ਸਬ੍ਬੇਵ ਅਰਹਤ੍ਤਂ ਪਤ੍ਤਾ. ਤੇ ਅਤ੍ਤਨੋ ਪਬ੍ਬਜਿਤਕਿਚ੍ਚਂ ਮਤ੍ਥਕਪ੍ਪਤ੍ਤਂ ਞਤ੍ਵਾ ਉਪਜ੍ਝਾਯਂ ਉਪਸਙ੍ਕਮਿਤ੍ਵਾ ਆਹਂਸੁ – ‘‘ਭਨ੍ਤੇ, ਅਮ੍ਹਾਕਂ ਕਿਚ੍ਚਂ ਮਤ੍ਥਕਪ੍ਪਤ੍ਤਂ, ਦਸਨ੍ਨਞ੍ਚਮ੍ਹ ਕਥਾਵਤ੍ਥੂਨਂ ਲਾਭਿਨੋ, ਸਮਯੋ, ਦਾਨਿ ਨੋ ਦਸਬਲਂ ਪਸ੍ਸਿਤੁ’’ਨ੍ਤਿ. ਥੇਰੋ ਤੇਸਂ ਵਚਨਂ ਸੁਤ੍ਵਾ ਚਿਨ੍ਤੇਸਿ – ‘‘ਮਮ ਦਸਕਥਾਵਤ੍ਥੁਲਾਭਿਤਂ ਸਤ੍ਥਾ ਜਾਨਾਤਿ ਅਹਂ ਧਮ੍ਮਂ ਦੇਸੇਨ੍ਤੋ ਦਸ ਕਥਾਵਤ੍ਥੂਨਿ ਅਮੁਞ੍ਚਿਤ੍ਵਾਵ ਦੇਸੇਮਿ, ਮਯਿ ਗਚ੍ਛਨ੍ਤੇ ਸਬ੍ਬੇਪਿਮੇ ਭਿਕ੍ਖੂ ਮਂ ਪਰਿਵਾਰੇਤ੍ਵਾ ਗਚ੍ਛਿਸ੍ਸਨ੍ਤਿ, ਏਵਂ ਗਣਸਙ੍ਗਣਿਕਾਯ ਗਨ੍ਤ੍ਵਾ ਪਨ ਅਯੁਤ੍ਤਂ ਮਯ੍ਹਂ ਦਸਬਲਂ ਪਸ੍ਸਿਤੁਂ, ਇਮੇ ਤਾਵ ਗਨ੍ਤ੍ਵਾ ਪਸ੍ਸਨ੍ਤੂ’’ਤਿ ਤੇ ਭਿਕ੍ਖੂ ਆਹ – ‘‘ਆਵੁਸੋ, ਤੁਮ੍ਹੇ ਪੁਰਤੋ ਗਨ੍ਤ੍ਵਾ ਤਥਾਗਤਂ ਪਸ੍ਸਥ, ਮਮ ਵਚਨੇਨ ਚਸ੍ਸ ਪਾਦੇ ਵਨ੍ਦਥ, ਅਹਮ੍ਪਿ ਤੁਮ੍ਹਾਕਂ ਗਤਮਗ੍ਗੇਨਾਗਮਿਸ੍ਸਾਮੀ’’ਤਿ. ਤੇ ਥੇਰਾ ਸਬ੍ਬੇਪਿ ਦਸਬਲਸ੍ਸ ਜਾਤਿਭੂਮਿਰਟ੍ਠਵਾਸਿਨੋ ਸਬ੍ਬੇ ਖੀਣਾਸਵਾ ਸਬ੍ਬੇ ਦਸਕਥਾਵਤ੍ਥੁਲਾਭਿਨੋ ਅਤ੍ਤਨੋ ਉਪਜ੍ਝਾਯਸ੍ਸ ਓਵਾਦਂ ਸਮ੍ਪਟਿਚ੍ਛਿਤ੍ਵਾ ਥੇਰਂ ਵਨ੍ਦਿਤ੍ਵਾ ਅਨੁਪੁਬ੍ਬੇਨ ਚਾਰਿਕਂ ਚਰਨ੍ਤਾ ਸਟ੍ਠਿਯੋਜਨਮਗ੍ਗਂ ਅਤਿਕ੍ਕਮ੍ਮ ਰਾਜਗਹੇ ਵੇਲ਼ੁਵਨਮਹਾਵਿਹਾਰਂ ਗਨ੍ਤ੍ਵਾ ਦਸਬਲਸ੍ਸ ਪਾਦੇ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸੀਦਿਂਸੁ.

ਆਚਿਣ੍ਣਂ ਖੋ ਪਨੇਤਂ ਬੁਦ੍ਧਾਨਂ ਭਗਵਨ੍ਤਾਨਂ ਆਗਨ੍ਤੁਕੇਹਿ ਭਿਕ੍ਖੂਹਿ ਸਦ੍ਧਿਂ ਪਟਿਸਮ੍ਮੋਦਿਤੁਨ੍ਤਿ ਭਗਵਾ ਤੇਹਿ ਸਦ੍ਧਿਂ – ‘‘ਕਚ੍ਚਿ, ਭਿਕ੍ਖਵੇ, ਖਮਨੀਯ’’ਨ੍ਤਿਆਦਿਨਾ ਨਯੇਨ ਮਧੁਰਪਟਿਸਨ੍ਥਾਰਂ ਕਤ੍ਵਾ ‘‘ਕੁਤੋ ਚ ਤੁਮ੍ਹੇ, ਭਿਕ੍ਖਵੇ, ਆਗਚ੍ਛਥਾ’’ਤਿ ਪੁਚ੍ਛਿ. ਅਥ ਤੇਹਿ ‘‘ਜਾਤਿਭੂਮਿਤੋ’’ਤਿ ਵੁਤ੍ਤੇ ‘‘ਕੋ ਨੁ ਖੋ, ਭਿਕ੍ਖਵੇ, ਜਾਤਿਭੂਮਿਯਂ ਜਾਤਿਭੂਮਕਾਨਂ ਭਿਕ੍ਖੂਨਂ ਸਬ੍ਰਹ੍ਮਚਾਰੀਨਂ ਏਵਂ ਸਮ੍ਭਾਵਿਤੋ ‘ਅਤ੍ਤਨਾ ਚ ਅਪ੍ਪਿਚ੍ਛੋ ਅਪ੍ਪਿਚ੍ਛਕਥਞ੍ਚ ਭਿਕ੍ਖੂਨਂ ਕਤ੍ਤਾ’’’ਤਿ (ਮ. ਨਿ. ੧.੨੫੨) ਦਸਕਥਾਵਤ੍ਥੁਲਾਭਿਂ ਭਿਕ੍ਖੁਂ ਪੁਚ੍ਛਿ. ਤੇਪਿ ‘‘ਪੁਣ੍ਣੋ ਨਾਮ, ਭਨ੍ਤੇ, ਆਯਸ੍ਮਾ ਮਨ੍ਤਾਣਿਪੁਤ੍ਤੋ’’ਤਿ ਆਰੋਚਯਿਂਸੁ. ਤਂ ਕਥਂ ਸੁਤ੍ਵਾ ਆਯਸ੍ਮਾ ਸਾਰਿਪੁਤ੍ਤੋ ਥੇਰਸ੍ਸ ਦਸ੍ਸਨਕਾਮੋ ਅਹੋਸਿ. ਅਥ ਸਤ੍ਥਾ ਰਾਜਗਹਤੋ ਸਾਵਤ੍ਥਿਂ ਅਗਮਾਸਿ. ਪੁਣ੍ਣਤ੍ਥੇਰੋਪਿ ਦਸਬਲਸ੍ਸ ਤਤ੍ਥ ਆਗਤਭਾਵਂ ਸੁਤ੍ਵਾ – ‘‘ਸਤ੍ਥਾਰਂ ਪਸ੍ਸਿਸ੍ਸਾਮੀ’’ਤਿ ਗਨ੍ਤ੍ਵਾ ਅਨ੍ਤੋਗਨ੍ਧਕੁਟਿਯਂਯੇਵ ਤਥਾਗਤਂ ਸਮ੍ਪਾਪੁਣਿ. ਸਤ੍ਥਾ ਤਸ੍ਸ ਧਮ੍ਮਂ ਦੇਸੇਸਿ. ਥੇਰੋ ਧਮ੍ਮਂ ਸੁਤ੍ਵਾ ਦਸਬਲਂ ਵਨ੍ਦਿਤ੍ਵਾ ਪਟਿਸਲ੍ਲਾਨਤ੍ਥਾਯ ਅਨ੍ਧਵਨਂ ਗਨ੍ਤ੍ਵਾ ਅਞ੍ਞਤਰਮ੍ਹਿ ਰੁਕ੍ਖਮੂਲੇ ਦਿਵਾਵਿਹਾਰਂ ਨਿਸੀਦਿ.

ਸਾਰਿਪੁਤ੍ਤਤ੍ਥੇਰੋਪਿ ਤਸ੍ਸਾਗਮਨਂ ਸੁਤ੍ਵਾ ਸੀਸਾਨੁਲੋਕਿਕੋ ਗਨ੍ਤ੍ਵਾ ਓਕਾਸਂ ਸਲ੍ਲਕ੍ਖੇਤ੍ਵਾ ਤਂ ਰੁਕ੍ਖਮੂਲੇ ਨਿਸਿਨ੍ਨਂ ਉਪਸਙ੍ਕਮਿਤ੍ਵਾ ਥੇਰੇਨ ਸਦ੍ਧਿਂ ਸਮ੍ਮੋਦਿਤ੍ਵਾ, ਤਂ ਸਤ੍ਤਵਿਸੁਦ੍ਧਿਕ੍ਕਮਂ ਪੁਚ੍ਛਿ. ਥੇਰੋਪਿਸ੍ਸ ਪੁਚ੍ਛਿਤਪੁਚ੍ਛਿਤਂ ਬ੍ਯਾਕਰੋਨ੍ਤੋ ਰਥਵਿਨੀਤੂਪਮਾਯ ਚਿਤ੍ਤਂ ਆਰਾਧੇਸਿ, ਤੇ ਅਞ੍ਞਮਞ੍ਞਸ੍ਸ ਸੁਭਾਸਿਤਂ ਸਮਨੁਮੋਦਿਂਸੁ. ਅਥ ਸਤ੍ਥਾ ਅਪਰਭਾਗੇ ਭਿਕ੍ਖੁਸਙ੍ਘਮਜ੍ਝੇ ਨਿਸਿਨ੍ਨੋ ਥੇਰਂ ‘‘ਏਤਦਗ੍ਗਂ, ਭਿਕ੍ਖਵੇ, ਮਮ ਸਾਵਕਾਨਂ ਭਿਕ੍ਖੂਨਂ ਧਮ੍ਮਕਥਿਕਾਨਂ ਯਦਿਦਂ ਪੁਣ੍ਣੋ’’ਤਿ (ਅ. ਨਿ. ੧.੧੮੮, ੧੯੬) ਧਮ੍ਮਕਥਿਕਾਨਂ ਅਗ੍ਗਟ੍ਠਾਨੇ ਠਪੇਸਿ. ਸੋ ਏਕਦਿਵਸਂ ਅਤ੍ਤਨੋ ਵਿਮੁਤ੍ਤਿਸਮ੍ਪਤ੍ਤਿਂ ਪਚ੍ਚਵੇਕ੍ਖਿਤ੍ਵਾ ‘‘ਸਤ੍ਥਾਰਂ ਨਿਸ੍ਸਾਯ ਅਹਞ੍ਚੇਵ ਅਞ੍ਞੇ ਚ ਬਹੂ ਸਤ੍ਤਾ ਸਂਸਾਰਦੁਕ੍ਖਤੋ ਵਿਪ੍ਪਮੁਤ੍ਤਾ, ਬਹੂਪਕਾਰਾ ਵਤ ਸਪ੍ਪੁਰਿਸਸਂਸੇਵਾ’’ਤਿ ਪੀਤਿਸੋਮਨਸ੍ਸਜਾਤੋ ਉਦਾਨਵਸੇਨ ਪੀਤਿਵੇਗਵਿਸ੍ਸਟ੍ਠਂ ‘‘ਸਬ੍ਭਿਰੇਵ ਸਮਾਸੇਥਾ’’ਤਿ ਗਾਥਂ ਅਭਾਸਿ.

੪. ਤਤ੍ਥ ਸਬ੍ਭਿਰੇਵਾਤਿ ਸਪ੍ਪੁਰਿਸੇਹਿ ਏਵ. ਸਨ੍ਤੋਤਿ ਪਨੇਤ੍ਥ ਬੁਦ੍ਧਾਦਯੋ ਅਰਿਯਾ ਅਧਿਪ੍ਪੇਤਾ. ਤੇ ਹਿ ਅਨਵਸੇਸਤੋ ਅਸਤਂ ਧਮ੍ਮਂ ਪਹਾਯ ਸਦ੍ਧਮ੍ਮੇ ਉਕ੍ਕਂਸਗਤਤ੍ਤਾ ਸਾਤਿਸਯਂ ਪਸਂਸਿਯਤ੍ਤਾ ਚ ਵਿਸੇਸਤੋ ‘‘ਸਨ੍ਤੋ ਸਪ੍ਪੁਰਿਸਾ’’ਤਿ ਚ ਵੁਚ੍ਚਨ੍ਤਿ. ਸਮਾਸੇਥਾਤਿ ਸਮਂ ਆਸੇਥ ਸਹ ਵਸੇਯ੍ਯ. ਤੇ ਪਯਿਰੁਪਾਸਨ੍ਤੋ ਤੇਸਂ ਸੁਸ੍ਸੂਸਨ੍ਤੋ ਦਿਟ੍ਠਾਨੁਗਤਿਞ੍ਚ ਆਪਜ੍ਜਨ੍ਤੋ ਸਮਾਨਵਾਸੋ ਭਵੇਯ੍ਯਾਤਿ ਅਤ੍ਥੋ. ਪਣ੍ਡਿਤੇਹਤ੍ਥਦਸ੍ਸਿਭੀਤਿ ਤੇਸਂ ਥੋਮਨਾ. ਪਣ੍ਡਾ ਵੁਚ੍ਚਤਿ ਪਞ੍ਞਾ, ਸਾ ਇਮੇਸਂ ਸਞ੍ਜਾਤਾਤਿ ਪਣ੍ਡਿਤਾ. ਤਤੋ ਏਵ ਅਤ੍ਤਤ੍ਥਾਦਿਭੇਦਂ ਅਤ੍ਥਂ ਅਵਿਪਰੀਤਤੋ ਪਸ੍ਸਨ੍ਤੀਤਿ ਅਤ੍ਥਦਸ੍ਸਿਨੋ. ਤੇਹਿ ਪਣ੍ਡਿਤੇਹਿ ਅਤ੍ਥਦਸ੍ਸੀਭਿ ਸਮਾਸੇਥ. ਕਸ੍ਮਾਤਿ ਚੇ? ਯਸ੍ਮਾ ਤੇ ਸਨ੍ਤੋ ਪਣ੍ਡਿਤਾ, ਤੇ ਵਾ ਸਮ੍ਮਾ ਸੇਵਨ੍ਤਾ ਏਕਨ੍ਤਹਿਤਭਾਵਤੋ ਮਗ੍ਗਞਾਣਾਦੀਹੇਵ ਅਰਣੀਯਤੋ ਅਤ੍ਥਂ, ਮਹਾਗੁਣਤਾਯ ਸਨ੍ਤਤਾਯ ਚ ਮਹਨ੍ਤਂ, ਅਗਾਧਭਾਵਤੋ ਗਮ੍ਭੀਰਞਾਣਗੋਚਰਤੋ ਚ ਗਮ੍ਭੀਰਂ, ਹੀਨਚ੍ਛਨ੍ਦਾਦੀਹਿ ਦਟ੍ਠੁਂ ਅਸਕ੍ਕੁਣੇਯ੍ਯਤ੍ਤਾ ਇਤਰੇਹਿ ਚ ਕਿਚ੍ਛੇਨ ਦਟ੍ਠਬ੍ਬਤ੍ਤਾ ਦੁਦ੍ਦਸਂ, ਦੁਦ੍ਦਸਤ੍ਤਾ ਸਣ੍ਹਨਿਪੁਣਸਭਾਵਤ੍ਤਾ ਨਿਪੁਣਞਾਣਗੋਚਰਤੋ ਚ ਨਿਪੁਣਂ, ਨਿਪੁਣਤ੍ਤਾ ਏਵਂ ਸੁਖੁਮਸਭਾਵਤਾਯ ਅਣੁਂ ਨਿਬ੍ਬਾਨਂ, ਅਵਿਪਰੀਤਟ੍ਠੇਨ ਵਾ ਪਰਮਤ੍ਥਸਭਾਵਤ੍ਤਾ ਅਤ੍ਥਂ, ਅਰਿਯਭਾਵਕਰਤ੍ਤਾ ਮਹਤ੍ਤਨਿਮਿਤ੍ਤਤਾਯ ਮਹਨ੍ਤਂ, ਅਨੁਤ੍ਤਾਨਸਭਾਵਤਾਯ ਗਮ੍ਭੀਰਂ, ਦੁਕ੍ਖੇਨ ਦਟ੍ਠਬ੍ਬਂ ਨ ਸੁਖੇਨ ਦਟ੍ਠੁਂ ਸਕ੍ਕਾਤਿ ਦੁਦ੍ਦਸਂ, ਗਮ੍ਭੀਰਤ੍ਤਾ ਦੁਦ੍ਦਸਂ, ਦੁਦ੍ਦਸਤ੍ਤਾ ਗਮ੍ਭੀਰਨ੍ਤਿ ਚਤੁਸਚ੍ਚਂ, ਵਿਸੇਸਤੋ ਨਿਪੁਣਂ ਅਣੁਂ, ਨਿਰੋਧਸਚ੍ਚਨ੍ਤਿ ਏਵਮੇਤਂ ਚਤੁਸਚ੍ਚਂ ਧੀਰਾ ਸਮਧਿਗਚ੍ਛਨ੍ਤਿ ਧਿਤਿਸਮ੍ਪਨ੍ਨਤਾਯ ਧੀਰਾ ਚਤੁਸਚ੍ਚਕਮ੍ਮਟ੍ਠਾਨਭਾਵਨਂ ਉਸ੍ਸੁਕ੍ਕਾਪੇਤ੍ਵਾ ਸਮ੍ਮਦੇਵ ਅਧਿਗਚ੍ਛਨ੍ਤਿ. ਅਪ੍ਪਮਤ੍ਤਾਤਿ ਸਬ੍ਬਤ੍ਥ ਸਤਿਅਵਿਪ੍ਪਵਾਸੇਨ ਅਪ੍ਪਮਾਦਪਟਿਪਤ੍ਤਿਂ ਪੂਰੇਨ੍ਤਾ. ਵਿਚਕ੍ਖਣਾਤਿ ਵਿਪਸ੍ਸਨਾਭਾਵਨਾਯ ਛੇਕਾ ਕੁਸਲਾ. ਤਸ੍ਮਾ ਸਬ੍ਭਿਰੇਵ ਸਮਾਸੇਥਾਤਿ ਯੋਜਨਾ. ਪਣ੍ਡਿਤੇਹਤ੍ਥਦਸ੍ਸਿਭੀਤਿ ਵਾ ਏਤਂ ਨਿਸ੍ਸਕ੍ਕਵਚਨਂ. ਯਸ੍ਮਾ ਪਣ੍ਡਿਤੇਹਿ ਅਤ੍ਥਦਸ੍ਸੀਭਿ ਸਮੁਦਾਯਭੂਤੇਹਿ ਧੀਰਾ ਅਪ੍ਪਮਤ੍ਤਾ ਵਿਚਕ੍ਖਣਾ ਮਹਨ੍ਤਾਦਿਵਿਸੇਸਵਨ੍ਤਂ ਅਤ੍ਥਂ ਸਮਧਿਗਚ੍ਛਨ੍ਤਿ, ਤਸ੍ਮਾ ਤਾਦਿਸੇਹਿ ਸਬ੍ਭਿਰੇਵ ਸਮਾਸੇਥਾਤਿ ਸਮ੍ਬਨ੍ਧੋ. ਏਵਮੇਸਾ ਥੇਰਸ੍ਸ ਪਟਿਵੇਧਦੀਪਨੇਨ ਅਞ੍ਞਾਬ੍ਯਾਕਰਣਗਾਥਾਪਿ ਅਹੋਸੀਤਿ.

ਪੁਣ੍ਣਤ੍ਥੇਰਗਾਥਾਵਣ੍ਣਨਾ ਨਿਟ੍ਠਿਤਾ.