੨. ਮਹਾਕੋਟ੍ਠਿਕਤ੍ਥੇਰਗਾਥਾਵਣ੍ਣਨਾ

ਉਪਸਨ੍ਤੋਤਿ ਆਯਸ੍ਮਤੋ ਮਹਾਕੋਟ੍ਠਿਕਤ੍ਥੇਰਸ੍ਸ ਗਾਥਾ. ਤਸ੍ਸ ਕਾ ਉਪ੍ਪਤ੍ਤਿ? ਅਯਮ੍ਪਿ ਥੇਰੋ ਪਦੁਮੁਤ੍ਤਰਸ੍ਸ ਭਗਵਤੋ ਕਾਲੇ ਹਂਸਵਤੀਨਗਰੇ ਮਹਾਭੋਗਕੁਲੇ ਨਿਬ੍ਬਤ੍ਤਿਤ੍ਵਾ ਵਿਞ੍ਞੁਤਂ ਪਤ੍ਤੋ ਮਾਤਾਪਿਤੂਨਂ ਅਚ੍ਚਯੇਨ ਕੁਟੁਮ੍ਬਂ ਸਣ੍ਠਪੇਤ੍ਵਾ ਘਰਾਵਾਸਂ ਵਸਨ੍ਤੋ ਏਕਦਿਵਸਂ ਪਦੁਮੁਤ੍ਤਰਸ੍ਸ ਭਗਵਤੋ ਧਮ੍ਮਦੇਸਨਾਕਾਲੇ ਹਂਸਵਤੀਨਗਰਵਾਸਿਕੇ ਗਨ੍ਧਮਾਲਾਦਿਹਤ੍ਥੇ ਯੇਨ ਬੁਦ੍ਧੋ ਯੇਨ ਧਮ੍ਮੋ ਯੇਨ ਸਙ੍ਘੋ, ਤਨ੍ਨਿਨ੍ਨੇ ਤਪ੍ਪੋਣੇ ਤਪ੍ਪਬ੍ਭਾਰੇ ਗਚ੍ਛਨ੍ਤੇ ਦਿਸ੍ਵਾ ਮਹਾਜਨੇਨ ਸਦ੍ਧਿਂ ਉਪਗਤੋ ਸਤ੍ਥਾਰਂ ਏਕਂ ਭਿਕ੍ਖੁਂ ਪਟਿਸਮ੍ਭਿਦਾਪਤ੍ਤਾਨਂ ਅਗ੍ਗਟ੍ਠਾਨੇ ਠਪੇਨ੍ਤਂ ਦਿਸ੍ਵਾ ‘‘ਅਯਂ ਕਿਰ ਇਮਸ੍ਮਿਂ ਸਾਸਨੇ ਪਟਿਸਮ੍ਭਿਦਾਪਤ੍ਤਾਨਂ ਅਗ੍ਗੋ, ਅਹੋ ਵਤਾਹਮ੍ਪਿ ਏਕਸ੍ਸ ਬੁਦ੍ਧਸ੍ਸ ਸਾਸਨੇ ਅਯਂ ਵਿਯ ਪਟਿਸਮ੍ਭਿਦਾਪਤ੍ਤਾਨਂ ਅਗ੍ਗੋ ਭਵੇਯ੍ਯ’’ਨ੍ਤਿ ਚਿਨ੍ਤੇਤ੍ਵਾ ਸਤ੍ਥੁ ਦੇਸਨਾਪਰਿਯੋਸਾਨੇ ਵੁਟ੍ਠਿਤਾਯ ਪਰਿਸਾਯ ਭਗਵਨ੍ਤਂ ਉਪਸਙ੍ਕਮਿਤ੍ਵਾ, ‘‘ਭਨ੍ਤੇ, ਸ੍ਵੇ ਮਯ੍ਹਂ ਭਿਕ੍ਖਂ ਗਣ੍ਹਥਾ’’ਤਿ ਨਿਮਨ੍ਤੇਸਿ. ਸਤ੍ਥਾ ਅਧਿਵਾਸੇਸਿ. ਸੋ ਭਗਵਨ੍ਤਂ ਅਭਿਵਾਦੇਤ੍ਵਾ ਪਦਕ੍ਖਿਣਂ ਕਤ੍ਵਾ ਸਕਨਿਵੇਸਨਂ ਗਨ੍ਤ੍ਵਾ ਸਬ੍ਬਰਤ੍ਤਿਂ ਬੁਦ੍ਧਸ੍ਸ ਭਿਕ੍ਖੁਸਙ੍ਘਸ੍ਸ ਚ ਨਿਸਜ੍ਜਟ੍ਠਾਨਂ ਗਨ੍ਧਦਾਮਮਾਲਾਦਾਮਾਦੀਹਿ ਅਲਙ੍ਕਰਿਤ੍ਵਾ ਪਣੀਤਂ ਖਾਦਨੀਯਂ ਭੋਜਨੀਯਂ ਪਟਿਯਾਦਾਪੇਤ੍ਵਾ ਤਸ੍ਸਾ ਰਤ੍ਤਿਯਾ ਅਚ੍ਚਯੇਨ ਸਕੇ ਨਿਵੇਸਨੇ ਭਿਕ੍ਖੁਸਤਸਹਸ੍ਸਪਰਿਵਾਰਂ ਭਗਵਨ੍ਤਂ ਵਿਵਿਧਯਾਗੁਖਜ੍ਜਕਪਰਿਵਾਰਂ ਨਾਨਾਰਸਸੂਪਬ੍ਯਞ੍ਜਨਂ ਗਨ੍ਧਸਾਲਿਭੋਜਨਂ ਭੋਜੇਤ੍ਵਾ ਭਤ੍ਤਕਿਚ੍ਚਪਰਿਯੋਸਾਨੇ ਚਿਨ੍ਤੇਸਿ – ‘‘ਮਹਨ੍ਤਂ, ਖੋ, ਅਹਂ ਠਾਨਨ੍ਤਰਂ ਪਤ੍ਥੇਮਿ ਨ ਖੋ ਪਨ ਮਯ੍ਹਂ ਯੁਤ੍ਤਂ ਏਕਦਿਵਸਮੇਵ ਦਾਨਂ ਦਤ੍ਵਾ ਤਂ ਠਾਨਨ੍ਤਰਂ ਪਤ੍ਥੇਤੁਂ, ਅਨੁਪਟਿਪਾਟਿਯਾ ਸਤ੍ਤ ਦਿਵਸੇ ਦਾਨਂ ਦਤ੍ਵਾ ਪਤ੍ਥੇਸ੍ਸਾਮੀ’’ਤਿ. ਸੋ ਤੇਨੇਵ ਨਿਯਾਮੇਨ ਸਤ੍ਤ ਦਿਵਸੇ ਮਹਾਦਾਨਾਨਿ ਦਤ੍ਵਾ ਭਤ੍ਤਕਿਚ੍ਚਪਰਿਯੋਸਾਨੇ ਦੁਸ੍ਸਕੋਟ੍ਠਾਗਾਰਂ ਵਿਵਰਾਪੇਤ੍ਵਾ ਉਤ੍ਤਮਂ ਤਿਚੀਵਰਪ੍ਪਹੋਨਕਂ ਸੁਖੁਮਵਤ੍ਥਂ ਬੁਦ੍ਧਸ੍ਸ ਪਾਦਮੂਲੇ ਠਪੇਤ੍ਵਾ ਭਿਕ੍ਖੁਸਤਸਹਸ੍ਸਸ੍ਸ ਚ ਤਿਚੀਵਰਂ ਦਤ੍ਵਾ ਤਥਾਗਤਂ ਉਪਸਙ੍ਕਮਿਤ੍ਵਾ, ‘‘ਭਨ੍ਤੇ, ਯੋ ਸੋ ਭਿਕ੍ਖੁ ਤੁਮ੍ਹੇਹਿ ਇਤੋ ਸਤ੍ਤਮਦਿਵਸਮਤ੍ਥਕੇ ਏਤਦਗ੍ਗੇ ਠਪਿਤੋ, ਅਹਮ੍ਪਿ ਸੋ ਭਿਕ੍ਖੁ ਵਿਯ ਅਨਾਗਤੇ ਉਪ੍ਪਜ੍ਜਨਕਬੁਦ੍ਧਸ੍ਸ ਸਾਸਨੇ ਪਬ੍ਬਜਿਤ੍ਵਾ ਪਟਿਸਮ੍ਭਿਦਾਪਤ੍ਤਾਨਂ ਅਗ੍ਗੋ ਭਵੇਯ੍ਯ’’ਨ੍ਤਿ ਵਤ੍ਵਾ ਸਤ੍ਥੁ ਪਾਦਮੂਲੇ ਨਿਪਜ੍ਜਿਤ੍ਵਾ ਪਤ੍ਥਨਂ ਅਕਾਸਿ. ਸਤ੍ਥਾ ਤਸ੍ਸ ਪਤ੍ਥਨਾਯ ਸਮਿਜ੍ਝਨਭਾਵਂ ਦਿਸ੍ਵਾ ‘‘ਅਨਾਗਤੇ ਇਤੋ ਕਪ੍ਪਸਤਸਹਸ੍ਸਮਤ੍ਥਕੇ ਗੋਤਮੋ ਨਾਮ ਬੁਦ੍ਧੋ ਲੋਕੇ ਉਪ੍ਪਜ੍ਜਿਸ੍ਸਤਿ, ਤਸ੍ਸ ਸਾਸਨੇ ਤਵ ਪਤ੍ਥਨਾ ਸਮਿਜ੍ਝਿਸ੍ਸਤੀ’’ਤਿ ਬ੍ਯਾਕਾਸਿ. ਵੁਤ੍ਤਮ੍ਪਿ ਚੇਤਂ ਅਪਦਾਨੇ (ਅਪ. ਥੇਰ ੨.੫੪.੨੨੧-੨੫੦) –

‘‘ਪਦੁਮੁਤ੍ਤਰੋ ਨਾਮ ਜਿਨੋ, ਸਬ੍ਬਲੋਕਵਿਦੂ ਮੁਨਿ;

ਇਤੋ ਸਤਸਹਸ੍ਸਮ੍ਹਿ, ਕਪ੍ਪੇ ਉਪ੍ਪਜ੍ਜਿ ਚਕ੍ਖੁਮਾ.

‘‘ਓਵਾਦਕੋ ਵਿਞ੍ਞਾਪਕੋ, ਤਾਰਕੋ ਸਬ੍ਬਪਾਣਿਨਂ;

ਦੇਸਨਾਕੁਸਲੋ ਬੁਦ੍ਧੋ, ਤਾਰੇਸਿ ਜਨਤਂ ਬਹੁਂ.

‘‘ਅਨੁਕਮ੍ਪਕੋ ਕਾਰੁਣਿਕੋ, ਹਿਤੇਸੀ ਸਬ੍ਬਪਾਣਿਨਂ;

ਸਮ੍ਪਤ੍ਤੇ ਤਿਤ੍ਥਿਯੇ ਸਬ੍ਬੇ, ਪਞ੍ਚਸੀਲੇ ਪਤਿਟ੍ਠਪਿ.

‘‘ਏਵਂ ਨਿਰਾਕੁਲਂ ਆਸਿ, ਸੁਞ੍ਞਤਂ ਤਿਤ੍ਥਿਯੇਹਿ ਚ;

ਵਿਚਿਤ੍ਤਂ ਅਰਹਨ੍ਤੇਹਿ, ਵਸੀਭੂਤੇਹਿ ਤਾਦਿਭਿ.

‘‘ਰਤਨਾਨਟ੍ਠਪਞ੍ਞਾਸਂ, ਉਗ੍ਗਤੋ ਸੋ ਮਹਾਮੁਨਿ;

ਕਞ੍ਚਨਗ੍ਘਿਯਸਙ੍ਕਾਸੋ, ਬਾਤ੍ਤਿਂਸਵਰਲਕ੍ਖਣੋ.

‘‘ਵਸ੍ਸਸਤਸਹਸ੍ਸਾਨਿ, ਆਯੁ ਵਿਜ੍ਜਤਿ ਤਾਵਦੇ;

ਤਾਵਤਾ ਤਿਟ੍ਠਮਾਨੋ ਸੋ, ਤਾਰੇਸਿ ਜਨਤਂ ਬਹੁਂ.

‘‘ਤਦਾਹਂ ਹਂਸਵਤਿਯਂ, ਬ੍ਰਾਹ੍ਮਣੋ ਵੇਦਪਾਰਗੂ;

ਉਪੇਚ੍ਚ ਸਬ੍ਬਲੋਕਗ੍ਗਂ, ਅਸ੍ਸੋਸਿਂ ਧਮ੍ਮਦੇਸਨਂ.

‘‘ਤਦਾ ਸੋ ਸਾਵਕਂ ਵੀਰੋ, ਪਭਿਨ੍ਨਮਤਿਗੋਚਰਂ;

ਅਤ੍ਥੇ ਧਮ੍ਮੇ ਨਿਰੁਤ੍ਤੇ ਚ, ਪਟਿਭਾਨੇ ਚ ਕੋਵਿਦਂ.

‘‘ਠਪੇਸਿ ਏਤਦਗ੍ਗਮ੍ਹਿ, ਤਂ ਸੁਤ੍ਵਾ ਮੁਦਿਤੋ ਅਹਂ;

ਸਸਾਵਕਂ ਜਿਨਵਰਂ, ਸਤ੍ਤਾਹਂ ਭੋਜਯਿਂ ਤਦਾ.

‘‘ਦੁਸ੍ਸੇਹਚ੍ਛਾਦਯਿਤ੍ਵਾਨ, ਸਸਿਸ੍ਸਂ ਬੁਦ੍ਧਿਸਾਗਰਂ;

ਨਿਪਚ੍ਚ ਪਾਦਮੂਲਮ੍ਹਿ, ਤਂ ਠਾਨਂ ਪਤ੍ਥਯਿਂ ਅਹਂ.

‘‘ਤਤੋ ਅਵੋਚ ਲੋਕਗ੍ਗੋ, ਪਸ੍ਸਥੇਤਂ ਦਿਜੁਤ੍ਤਮਂ;

ਵਿਨਤਂ ਪਾਦਮੂਲੇ ਮੇ, ਕਮਲੋਦਰਸਪ੍ਪਭਂ.

‘‘ਬੁਦ੍ਧਸੇਟ੍ਠਸ੍ਸ ਭਿਕ੍ਖੁਸ੍ਸ, ਠਾਨਂ ਪਤ੍ਥਯਤੇ ਅਯਂ;

ਤਾਯ ਸਦ੍ਧਾਯ ਚਾਗੇਨ, ਸਦ੍ਧਮ੍ਮਸ੍ਸਵਨੇਨ ਚ.

‘‘ਸਬ੍ਬਤ੍ਥ ਸੁਖਿਤੋ ਹੁਤ੍ਵਾ, ਸਂਸਰਿਤ੍ਵਾ ਭਵਾਭਵੇ;

ਅਨਾਗਤਮ੍ਹਿ ਅਦ੍ਧਾਨੇ, ਲਚ੍ਛਸੇਤਂ ਮਨੋਰਥਂ.

‘‘ਸਤਸਹਸ੍ਸਿਤੋ ਕਪ੍ਪੇ, ਓਕ੍ਕਾਕਕੁਲਸਮ੍ਭਵੋ;

ਗੋਤਮੋ ਨਾਮ ਗੋਤ੍ਤੇਨ, ਸਤ੍ਥਾ ਲੋਕੇ ਭਵਿਸ੍ਸਤਿ.

‘‘ਤਸ੍ਸ ਧਮ੍ਮੇਸੁ ਦਾਯਾਦੋ, ਓਰਸੋ ਧਮ੍ਮਨਿਮ੍ਮਿਤੋ;

ਕੋਟ੍ਠਿਕੋ ਨਾਮ ਨਾਮੇਨ, ਹੇਸ੍ਸਤਿ ਸਤ੍ਥੁ ਸਾਵਕੋ.

‘‘ਤਂ ਸੁਤ੍ਵਾ ਮੁਦਿਤੋ ਹੁਤ੍ਵਾ, ਯਾਵਜੀਵਂ ਤਦਾ ਜਿਨਂ;

ਮੇਤ੍ਤਚਿਤ੍ਤੋ ਪਰਿਚਰਿਂ, ਸਤੋ ਪਞ੍ਞਾ ਸਮਾਹਿਤੋ.

‘‘ਤੇਨ ਕਮ੍ਮਵਿਪਾਕੇਨ, ਚੇਤਨਾਪਣਿਧੀਹਿ ਚ;

ਜਹਿਤ੍ਵਾ ਮਾਨੁਸਂ ਦੇਹਂ, ਤਾਵਤਿਂਸਮਗਚ੍ਛਹਂ.

‘‘ਸਤਾਨਂ ਤੀਣਿਕ੍ਖਤ੍ਤੁਞ੍ਚ, ਦੇਵਰਜ੍ਜਮਕਾਰਯਿਂ;

ਸਤਾਨਂ ਪਞ੍ਚਕ੍ਖਤ੍ਤੁਞ੍ਚ, ਚਕ੍ਕਵਤ੍ਤੀ ਅਹੋਸਹਂ.

‘‘ਪਦੇਸਰਜ੍ਜਂ ਵਿਪੁਲਂ, ਗਣਨਾਤੋ ਅਸਙ੍ਖਿਯਂ;

ਸਬ੍ਬਤ੍ਥ ਸੁਖਿਤੋ ਆਸਿਂ, ਤਸ੍ਸ ਕਮ੍ਮਸ੍ਸ ਵਾਹਸਾ.

‘‘ਦੁਵੇ ਭਵੇ ਸਂਸਰਾਮਿ, ਦੇਵਤ੍ਤੇ ਅਥ ਮਾਨੁਸੇ;

ਅਞ੍ਞਂ ਗਤਿਂ ਨ ਗਚ੍ਛਾਮਿ, ਸੁਚਿਣ੍ਣਸ੍ਸ ਇਦਂ ਫਲਂ.

‘‘ਦੁਵੇ ਕੁਲੇ ਪਜਾਯਾਮਿ, ਖਤ੍ਤਿਯੇ ਅਥ ਬ੍ਰਾਹ੍ਮਣੇ;

ਨੀਚੇ ਕੁਲੇ ਨ ਜਾਯਾਮਿ, ਸੁਚਿਣ੍ਣਸ੍ਸ ਇਦਂ ਫਲਂ.

‘‘ਪਚ੍ਛਿਮੇ ਭਵੇ ਸਮ੍ਪਤ੍ਤੇ, ਬ੍ਰਹ੍ਮਬਨ੍ਧੁ ਅਹੋਸਹਂ;

ਸਾਵਤ੍ਥਿਯਂ ਵਿਪ੍ਪਕੁਲੇ, ਪਚ੍ਚਾਜਾਤੋ ਮਹਦ੍ਧਨੇ.

‘‘ਮਾਤਾ ਚਨ੍ਦਵਤੀ ਨਾਮ, ਪਿਤਾ ਮੇ ਅਸ੍ਸਲਾਯਨੋ;

ਯਦਾ ਮੇ ਪਿਤਰਂ ਬੁਦ੍ਧੋ, ਵਿਨਯੀ ਸਬ੍ਬਸੁਦ੍ਧਿਯਾ.

‘‘ਤਦਾ ਪਸਨ੍ਨੋ ਸੁਗਤੇ, ਪਬ੍ਬਜਿਂ ਅਨਗਾਰਿਯਂ;

ਮੋਗ੍ਗਲ੍ਲਾਨੋ ਆਚਰਿਯੋ, ਉਪਜ੍ਝਾ ਸਾਰਿਸਮ੍ਭਵੋ.

‘‘ਕੇਸੇਸੁ ਛਿਜ੍ਜਮਾਨੇਸੁ, ਦਿਟ੍ਠਿ ਛਿਨ੍ਨਾ ਸਮੂਲਿਕਾ;

ਨਿਵਾਸੇਨ੍ਤੋ ਚ ਕਾਸਾਵਂ, ਅਰਹਤ੍ਤਮਪਾਪੁਣਿਂ.

‘‘ਅਤ੍ਥਧਮ੍ਮਨਿਰੁਤ੍ਤੀਸੁ, ਪਟਿਭਾਨੇ ਚ ਮੇ ਮਤਿ;

ਪਭਿਨ੍ਨਾ ਤੇਨ ਲੋਕਗ੍ਗੋ, ਏਤਦਗ੍ਗੇ ਠਪੇਸਿ ਮਂ.

‘‘ਅਸਨ੍ਦਿਟ੍ਠਂ ਵਿਯਾਕਾਸਿਂ, ਉਪਤਿਸ੍ਸੇਨ ਪੁਚ੍ਛਿਤੋ;

ਪਟਿਸਮ੍ਭਿਦਾਸੁ ਤੇਨਾਹਂ, ਅਗ੍ਗੋ ਸਮ੍ਬੁਦ੍ਧਸਾਸਨੇ.

‘‘ਕਿਲੇਸਾ ਝਾਪਿਤਾ ਮਯ੍ਹਂ, ਭਵਾ ਸਬ੍ਬੇ ਸਮੂਹਤਾ;

ਨਾਗੋਵ ਬਨ੍ਧਨਂ ਛੇਤ੍ਵਾ, ਵਿਹਰਾਮਿ ਅਨਾਸਵੋ.

‘‘ਸ੍ਵਾਗਤਂ ਵਤ ਮੇ ਆਸਿ, ਮਮ ਬੁਦ੍ਧਸ੍ਸ ਸਨ੍ਤਿਕੇ;

ਤਿਸ੍ਸੋ ਵਿਜ੍ਜਾ ਅਨੁਪ੍ਪਤ੍ਤਾ, ਕਤਂ ਬੁਦ੍ਧਸ੍ਸ ਸਾਸਨਂ.

‘‘ਪਟਿਸਮ੍ਭਿਦਾ ਚਤਸ੍ਸੋ, ਵਿਮੋਕ੍ਖਾਪਿ ਚ ਅਟ੍ਠਿਮੇ;

ਛਲ਼ਭਿਞ੍ਞਾ ਸਚ੍ਛਿਕਤਾ, ਕਤਂ ਬੁਦ੍ਧਸ੍ਸ ਸਾਸਨ’’ਨ੍ਤਿ.

ਏਵਂ ਸੋ ਤਤ੍ਥ ਤਤ੍ਥ ਭਵੇ ਪੁਞ੍ਞਞਾਣਸਮ੍ਭਾਰਂ ਸਮ੍ਭਰਨ੍ਤੋ ਅਪਰਾਪਰਂ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਸਾਵਤ੍ਥਿਯਂ ਬ੍ਰਾਹ੍ਮਣਮਹਾਸਾਲਕੁਲੇ ਨਿਬ੍ਬਤ੍ਤਿ. ਕੋਟ੍ਠਿਕੋਤਿਸ੍ਸ ਨਾਮਂ ਅਕਂਸੁ. ਸੋ ਵਯਪ੍ਪਤ੍ਤੋ ਤਯੋ ਵੇਦੇ ਉਗ੍ਗਹੇਤ੍ਵਾ ਬ੍ਰਾਹ੍ਮਣਸਿਪ੍ਪੇ ਨਿਪ੍ਫਤ੍ਤਿਂ ਗਤੋ ਏਕਦਿਵਸਂ ਸਤ੍ਥੁ ਸਨ੍ਤਿਕਂ ਗਨ੍ਤ੍ਵਾ ਧਮ੍ਮਂ ਸੁਤ੍ਵਾ ਪਟਿਲਦ੍ਧਸਦ੍ਧੋ ਪਬ੍ਬਜਿਤ੍ਵਾ ਉਪਸਮ੍ਪਨ੍ਨਕਾਲਤੋ ਪਟ੍ਠਾਯ ਵਿਪਸ੍ਸਨਾਯ ਕਮ੍ਮਂ ਕਰੋਨ੍ਤੋ ਸਹ ਪਟਿਸਮ੍ਭਿਦਾਹਿ ਅਰਹਤ੍ਤਂ ਪਤ੍ਵਾ ਪਟਿਸਮ੍ਭਿਦਾਸੁ ਚਿਣ੍ਣਵਸੀ ਹੁਤ੍ਵਾ ਅਭਿਞ੍ਞਾਤੇ ਅਭਿਞ੍ਞਾਤੇ ਮਹਾਥੇਰੇ ਉਪਸਙ੍ਕਮਿਤ੍ਵਾ ਪਞ੍ਹਂ ਪੁਚ੍ਛਨ੍ਤੋਪਿ ਦਸਬਲਂ ਉਪਸਙ੍ਕਮਿਤ੍ਵਾ ਪਞ੍ਹਂ ਪੁਚ੍ਛਨ੍ਤੋਪਿ ਪਟਿਸਮ੍ਭਿਦਾਸੁਯੇਵ ਪਞ੍ਹਂ ਪੁਚ੍ਛਿ. ਏਵਮਯਂ ਥੇਰੋ ਤਤ੍ਥ ਕਤਾਧਿਕਾਰਤਾਯ ਚਿਣ੍ਣਵਸੀਭਾਵੇਨ ਚ ਪਟਿਸਮ੍ਭਿਦਾਪਤ੍ਤਾਨਂ ਅਗ੍ਗੋ ਜਾਤੋ. ਅਥ ਨਂ ਸਤ੍ਥਾ ਮਹਾਵੇਦਲ੍ਲਸੁਤ੍ਤਂ (ਮ. ਨਿ. ੧.੪੪੯ ਆਦਯੋ) ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਪਟਿਸਮ੍ਭਿਦਾਪਤ੍ਤਾਨਂ ਅਗ੍ਗਟ੍ਠਾਨੇ ਠਪੇਸਿ – ‘‘ਏਤਦਗ੍ਗਂ, ਭਿਕ੍ਖਵੇ, ਮਮ ਸਾਵਕਾਨਂ ਭਿਕ੍ਖੂਨਂ ਪਟਿਸਮ੍ਭਿਦਾਪਤ੍ਤਾਨਂ ਯਦਿਦਂ ਮਹਾਕੋਟ੍ਠਿਕੋ’’ਤਿ (ਅ. ਨਿ. ੧.੨੦੯, ੨੧੮). ਸੋ ਅਪਰੇਨ ਸਮਯੇਨ ਵਿਮੁਤ੍ਤਿਸੁਖਂ ਪਟਿਸਂਵੇਦੇਨ੍ਤੋ ਉਦਾਨਵਸੇਨ –

੨. ‘‘ਉਪਸਨ੍ਤੋ ਉਪਰਤੋ, ਮਨ੍ਤਭਾਣੀ ਅਨੁਦ੍ਧਤੋ;

ਧੁਨਾਤਿ ਪਾਪਕੇ ਧਮ੍ਮੇ, ਦੁਮਪਤ੍ਤਂਵ ਮਾਲੁਤੋ’’ਤਿ. –

ਇਤ੍ਥਂ ਸੁਦਂ ਆਯਸ੍ਮਾ ਮਹਾਕੋਟ੍ਠਿਕਤ੍ਥੇਰੋ ਗਾਥਂ ਅਭਾਸਿ.

ਤਤ੍ਥ ਉਪਸਨ੍ਤੋਤਿ ਮਨਚ੍ਛਟ੍ਠਾਨਂ ਇਨ੍ਦ੍ਰਿਯਾਨਂ ਉਪਸਮਨੇਨ ਨਿਬ੍ਬਿਸੇਵਨਭਾਵਕਰਣੇਨ ਉਪਸਨ੍ਤੋ. ਉਪਰਤੋਤਿ ਸਬ੍ਬਸ੍ਮਾ ਪਾਪਕਰਣਤੋ ਓਰਤੋ ਵਿਰਤੋ. ਮਨ੍ਤਭਾਣੀਤਿ ਮਨ੍ਤਾ ਵੁਚ੍ਚਤਿ ਪਞ੍ਞਾ, ਤਾਯ ਪਨ ਉਪਪਰਿਕ੍ਖਿਤ੍ਵਾ ਭਣਤੀਤਿ ਮਨ੍ਤਭਾਣੀ, ਕਾਲਵਾਦੀਆਦਿਭਾਵਂ ਅਵਿਸ੍ਸਜ੍ਜੇਨ੍ਤੋਯੇਵ ਭਣਤੀਤਿ ਅਤ੍ਥੋ. ਮਨ੍ਤਭਣਨਵਸੇਨ ਵਾ ਭਣਤੀਤਿ ਮਨ੍ਤਭਾਣੀ, ਦੁਬ੍ਭਾਸਿਤਤੋ ਵਿਨਾ ਅਤ੍ਤਨੋ ਭਾਸਨਵਸੇਨ ਚਤੁਰਙ੍ਗਸਮਨ੍ਨਾਗਤਂ ਸੁਭਾਸਿਤਂਯੇਵ ਭਣਤੀਤਿ ਅਤ੍ਥੋ. ਜਾਤਿਆਦਿਵਸੇਨ ਅਤ੍ਤਨੋ ਅਨੁਕ੍ਕਂਸਨਤੋ ਨ ਉਦ੍ਧਤੋਤਿ ਅਨੁਦ੍ਧਤੋ ਅਥ ਵਾ ਤਿਣ੍ਣਂ ਕਾਯਦੁਚ੍ਚਰਿਤਾਨਂ ਵੂਪਸਮਨੇਨ ਤਤੋ ਪਟਿਵਿਰਤਿਯਾ ਉਪਸਨ੍ਤੋ, ਤਿਣ੍ਣਂ ਮਨੋਦੁਚ੍ਚਰਿਤਾਨਂ ਉਪਰਮਣੇਨ ਪਜਹਨੇਨ ਉਪਰਤੋ, ਚਤੁਨ੍ਨਂ ਵਚੀਦੁਚ੍ਚਰਿਤਾਨਂ ਅਪ੍ਪਵਤ੍ਤਿਯਾ ਪਰਿਮਿਤਭਾਣਿਤਾਯ ਮਨ੍ਤਭਾਣੀ, ਤਿਵਿਧਦੁਚ੍ਚਰਿਤਨਿਮਿਤ੍ਤਉਪ੍ਪਜ੍ਜਨਕਸ੍ਸ ਉਦ੍ਧਚ੍ਚਸ੍ਸ ਅਭਾਵਤੋ ਅਨੁਦ੍ਧਤੋ. ਏਵਂ ਪਨ ਤਿਵਿਧਦੁਚ੍ਚਰਿਤਪ੍ਪਹਾਨੇਨ ਸੁਦ੍ਧੇ ਸੀਲੇ ਪਤਿਟ੍ਠਿਤੋ, ਉਦ੍ਧਚ੍ਚਪ੍ਪਹਾਨੇਨ ਸਮਾਹਿਤੋ, ਤਮੇਵ ਸਮਾਧਿਂ ਪਦਟ੍ਠਾਨਂ ਕਤ੍ਵਾ ਵਿਪਸ੍ਸਨਂ ਵਡ੍ਢੇਤ੍ਵਾ ਮਗ੍ਗਪਟਿਪਾਟਿਯਾ ਧੁਨਾਤਿ ਪਾਪਕੇ ਧਮ੍ਮੇ ਲਾਮਕਟ੍ਠੇਨ ਪਾਪਕੇ ਸਬ੍ਬੇਪਿ ਸਂਕਿਲੇਸਧਮ੍ਮੇ ਨਿਦ੍ਧੁਨਾਤਿ, ਸਮੁਚ੍ਛੇਦਵਸੇਨ ਪਜਹਤਿ. ਯਥਾ ਕਿਂ? ਦੁਮਪਤ੍ਤਂਵ ਮਾਲੁਤੋ, ਯਥਾ ਨਾਮ ਦੁਮਸ੍ਸ ਰੁਕ੍ਖਸ੍ਸ ਪਤ੍ਤਂ ਪਣ੍ਡੁਪਲਾਸਂ ਮਾਲੁਤੋ ਵਾਤੋ ਧੁਨਾਤਿ, ਬਨ੍ਧਨਤੋ ਵਿਯੋਜੇਨ੍ਤੋ ਨੀਹਰਤਿ, ਏਵਂ ਯਥਾਵੁਤ੍ਤਪਟਿਪਤ੍ਤਿਯਂ ਠਿਤੋ ਪਾਪਧਮ੍ਮੇ ਅਤ੍ਤਨੋ ਸਨ੍ਤਾਨਤੋ ਨੀਹਰਤਿ, ਏਵਮਯਂ ਥੇਰਸ੍ਸ ਅਞ੍ਞਾਪਦੇਸੇਨ ਅਞ੍ਞਾਬ੍ਯਾਕਰਣਗਾਥਾਪਿ ਹੋਤੀਤਿ ਵੇਦਿਤਬ੍ਬਾ.

ਏਤ੍ਥ ਚ ਕਾਯਵਚੀਦੁਚ੍ਚਰਿਤਪ੍ਪਹਾਨਵਚਨੇਨ ਪਯੋਗਸੁਦ੍ਧਿਂ ਦਸ੍ਸੇਤਿ, ਮਨੋਦੁਚ੍ਚਰਿਤਪ੍ਪਹਾਨਵਚਨੇਨ ਆਸਯਸੁਦ੍ਧਿਂ. ਏਵਂ ਪਯੋਗਾਸਯਸੁਦ੍ਧਸ੍ਸ ‘‘ਅਨੁਦ੍ਧਤੋ’’ਤਿ ਇਮਿਨਾ ਉਦ੍ਧਚ੍ਚਾਭਾਵਵਚਨੇਨ ਤਦੇਕਟ੍ਠਤਾਯ ਨੀਵਰਣਪ੍ਪਹਾਨਂ ਦਸ੍ਸੇਤਿ. ਤੇਸੁ ਪਯੋਗਸੁਦ੍ਧਿਯਾ ਸੀਲਸਮ੍ਪਤ੍ਤਿ ਵਿਭਾਵਿਤਾ, ਆਸਯਸੁਦ੍ਧਿਯਾ ਸਮਥਭਾਵਨਾਯ ਉਪਕਾਰਕਧਮ੍ਮਪਰਿਗ੍ਗਹੋ, ਨੀਵਰਣਪ੍ਪਹਾਨੇਨ ਸਮਾਧਿਭਾਵਨਾ, ‘‘ਧੁਨਾਤਿ ਪਾਪਕੇ ਧਮ੍ਮੇ’’ਤਿ ਇਮਿਨਾ ਪਞ੍ਞਾਭਾਵਨਾ ਵਿਭਾਵਿਤਾ ਹੋਤਿ. ਏਵਂ ਅਧਿਸੀਲਸਿਕ੍ਖਾਦਯੋ ਤਿਸ੍ਸੋ ਸਿਕ੍ਖਾ, ਤਿਵਿਧਕਲ੍ਯਾਣਂ ਸਾਸਨਂ, ਤਦਙ੍ਗਪ੍ਪਹਾਨਾਦੀਨਿ ਤੀਣਿ ਪਹਾਨਾਨਿ, ਅਨ੍ਤਦ੍ਵਯਪਰਿਵਜ੍ਜਨੇਨ ਸਦ੍ਧਿਂ ਮਜ੍ਝਿਮਾਯ ਪਟਿਪਤ੍ਤਿਯਾ ਪਟਿਪਜ੍ਜਨਂ, ਅਪਾਯਭਵਾਦੀਨਂ ਸਮਤਿਕ੍ਕਮਨੂਪਾਯੋ ਚ ਯਥਾਰਹਂ ਨਿਦ੍ਧਾਰੇਤ੍ਵਾ ਯੋਜੇਤਬ੍ਬਾ. ਇਮਿਨਾ ਨਯੇਨ ਸੇਸਗਾਥਾਸੁਪਿ ਯਥਾਰਹਂ ਅਤ੍ਥਯੋਜਨਾ ਵੇਦਿਤਬ੍ਬਾ. ਅਤ੍ਥਮਤ੍ਤਮੇਵ ਪਨ ਤਤ੍ਥ ਤਤ੍ਥ ਅਪੁਬ੍ਬਂ ਵਣ੍ਣਯਿਸ੍ਸਾਮ. ‘‘ਇਤ੍ਥਂ ਸੁਦਂ ਆਯਸ੍ਮਾ ਮਹਾਕੋਟ੍ਠਿਕੋ’’ਤਿ ਇਦਂ ਪੂਜਾਵਚਨਂ, ਯਥਾ ਤਂ ਮਹਾਮੋਗ੍ਗਲ੍ਲਾਨੋਤਿ.

ਮਹਾਕੋਟ੍ਠਿਕਤ੍ਥੇਰਗਾਥਾਵਣ੍ਣਨਾ ਨਿਟ੍ਠਿਤਾ.