੯. ਵਾਸੇਟ੍ਠਸੁਤ੍ਤਵਣ੍ਣਨਾ

ਏਵਂ ਮੇ ਸੁਤਨ੍ਤਿ ਵਾਸੇਟ੍ਠਸੁਤ੍ਤਂ. ਕਾ ਉਪ੍ਪਤ੍ਤਿ? ਅਯਮੇਵ ਯਾਸ੍ਸ ਨਿਦਾਨੇ ਵੁਤ੍ਤਾ ਅਤ੍ਥਵਣ੍ਣਨਂ ਪਨਸ੍ਸ ਵੁਤ੍ਤਨਯਾਨਿ ਉਤ੍ਤਾਨਤ੍ਥਾਨਿ ਚ ਪਦਾਨਿ ਪਰਿਹਰਨ੍ਤਾ ਕਰਿਸ੍ਸਾਮ. ਇਚ੍ਛਾਨਙ੍ਗਲੋਤਿ ਗਾਮਸ੍ਸ ਨਾਮਂ. ਬ੍ਰਾਹ੍ਮਣਮਹਾਸਾਲਾਨਂ ਚਙ੍ਕੀ ਤਾਰੁਕ੍ਖੋ ਤੋਦੇਯ੍ਯੋਤਿ ਵੋਹਾਰਨਾਮਮੇਤਂ. ਪੋਕ੍ਖਰਸਾਤਿ ਜਾਣੁਸ੍ਸੋਣੀਤਿ ਨੇਮਿਤ੍ਤਿਕਂ. ਤੇਸੁ ਕਿਰ ਏਕੋ ਹਿਮਵਨ੍ਤਪਸ੍ਸੇ ਪੋਕ੍ਖਰਣਿਯਾ ਪਦੁਮੇ ਨਿਬ੍ਬਤ੍ਤੋ, ਅਞ੍ਞਤਰੋ ਤਾਪਸੋ ਤਂ ਪਦੁਮਂ ਗਹੇਤ੍ਵਾ ਤਤ੍ਥ ਸਯਿਤਂ ਦਾਰਕਂ ਦਿਸ੍ਵਾ ਸਂਵਡ੍ਢੇਤ੍ਵਾ ਰਞ੍ਞੋ ਦਸ੍ਸੇਸਿ. ਪੋਕ੍ਖਰੇ ਸਯਿਤਤ੍ਤਾ ‘‘ਪੋਕ੍ਖਰਸਾਤੀ’’ਤਿ ਚਸ੍ਸ ਨਾਮਮਕਾਸਿ. ਏਕਸ੍ਸ ਠਾਨਨ੍ਤਰੇ ਨੇਮਿਤ੍ਤਿਕਂ. ਤੇਨ ਕਿਰ ਜਾਣੁਸ੍ਸੋਣਿਨਾਮਕਂ ਪੁਰੋਹਿਤਟ੍ਠਾਨਂ ਲਦ੍ਧਂ, ਸੋ ਤੇਨੇਵ ਪਞ੍ਞਾਯਿ.

ਤੇ ਸਬ੍ਬੇਪਿ ਅਞ੍ਞੇ ਚ ਅਭਿਞ੍ਞਾਤਾ ਅਭਿਞ੍ਞਾਤਾ ਬ੍ਰਾਹ੍ਮਣਮਹਾਸਾਲਾ ਕਸ੍ਮਾ ਇਚ੍ਛਾਨਙ੍ਗਲੇ ਪਟਿਵਸਨ੍ਤੀਤਿ? ਵੇਦਸਜ੍ਝਾਯਨਪਰਿਵੀਮਂਸਨਤ੍ਥਂ. ਤੇਨ ਕਿਰ ਸਮਯੇਨ ਕੋਸਲਜਨਪਦੇ ਵੇਦਕਾ ਬ੍ਰਾਹ੍ਮਣਾ ਵੇਦਾਨਂ ਸਜ੍ਝਾਯਕਰਣਤ੍ਥਞ੍ਚ ਅਤ੍ਥੂਪਪਰਿਕ੍ਖਣਤ੍ਥਞ੍ਚ ਤਸ੍ਮਿਂਯੇਵ ਗਾਮੇ ਸਨ੍ਨਿਪਤਨ੍ਤਿ. ਤੇਨ ਤੇਪਿ ਅਨ੍ਤਰਨ੍ਤਰਾ ਅਤ੍ਤਨੋ ਭੋਗਗਾਮਤੋ ਆਗਮ੍ਮ ਤਤ੍ਥ ਪਟਿਵਸਨ੍ਤਿ.

ਵਾਸੇਟ੍ਠਭਾਰਦ੍ਵਾਜਾਨਨ੍ਤਿ ਵਾਸੇਟ੍ਠਸ੍ਸ ਚ ਭਾਰਦ੍ਵਾਜਸ੍ਸ ਚ. ਅਯਮਨ੍ਤਰਾਕਥਾਤਿ ਯਂ ਅਤ੍ਤਨੋ ਸਹਾਯਕਭਾਵਾਨੁਰੂਪਂ ਕਥਂ ਕਥੇਨ੍ਤਾ ਅਨੁਵਿਚਰਿਂਸੁ, ਤਸ੍ਸਾ ਕਥਾਯ ਅਨ੍ਤਰਾ ਵੇਮਜ੍ਝੇਯੇਵ ਅਯਂ ਅਞ੍ਞਾ ਕਥਾ ਉਦਪਾਦੀਤਿ ਵੁਤ੍ਤਂ ਹੋਤਿ. ਸਂਸੁਦ੍ਧਗਹਣਿਕੋਤਿ ਸਂਸੁਦ੍ਧਕੁਚ੍ਛਿਕੋ, ਸਂਸੁਦ੍ਧਾਯ ਬ੍ਰਾਹ੍ਮਣਿਯਾ ਏਵ ਕੁਚ੍ਛਿਸ੍ਮਿਂ ਨਿਬ੍ਬਤ੍ਤੋਤਿ ਅਧਿਪ੍ਪਾਯੋ. ‘‘ਸਮਵੇਪਾਕਿਨਿਯਾ ਗਹਣਿਯਾ’’ਤਿਆਦੀਸੁ ਹਿ ਉਦਰਗ੍ਗਿ ‘‘ਗਹਣੀ’’ਤਿ ਵੁਚ੍ਚਤਿ. ਇਧ ਪਨ ਮਾਤੁਕੁਚ੍ਛਿ. ਯਾਵ ਸਤ੍ਤਮਾਤਿ ਮਾਤੁ ਮਾਤਾ, ਪਿਤੁ ਪਿਤਾਤਿ ਏਵਂ ਪਟਿਲੋਮੇਨ ਯਾਵ ਸਤ੍ਤ ਜਾਤਿਯੋ. ਏਤ੍ਥ ਚ ਪਿਤਾਮਹੋ ਚ ਪਿਤਾਮਹੀ ਚ ਪਿਤਾਮਹਾ, ਤਥਾ ਮਾਤਾਮਹੋ ਚ ਮਾਤਾਮਹੀ ਚ ਮਾਤਾਮਹਾ, ਪਿਤਾਮਹਾ ਚ ਮਾਤਾਮਹਾ ਚ ਪਿਤਾਮਹਾਯੇਵ. ਪਿਤਾਮਹਾਨਂ ਯੁਗਂ ਪਿਤਾਮਹਯੁਗਂ. ਯੁਗਨ੍ਤਿ ਆਯੁਪ੍ਪਮਾਣਂ. ਅਭਿਲਾਪਮਤ੍ਤਮੇਵ ਚੇਤਂ, ਅਤ੍ਥਤੋ ਪਨ ਪਿਤਾਮਹਾਯੇਵ ਪਿਤਾਮਹਯੁਗਂ. ਅਕ੍ਖਿਤ੍ਤੋਤਿ ਜਾਤਿਂ ਆਰਬ੍ਭ ‘‘ਕਿਂ ਸੋ’’ਤਿ ਕੇਨਚਿ ਅਨਵਞ੍ਞਾਤੋ. ਅਨੁਪਕ੍ਕੁਟ੍ਠੋਤਿ ਜਾਤਿਸਨ੍ਦੋਸਵਾਦੇਨ ਅਨੁਪਕ੍ਕੁਟ੍ਠਪੁਬ੍ਬੋ. ਵਤਸਮ੍ਪਨ੍ਨੋਤਿ ਆਚਾਰਸਮ੍ਪਨ੍ਨੋ. ਸਞ੍ਞਾਪੇਤੁਨ੍ਤਿ ਞਾਪੇਤੁਂ ਬੋਧੇਤੁਂ, ਨਿਰਨ੍ਤਰਂ ਕਾਤੁਨ੍ਤਿ ਵੁਤ੍ਤਂ ਹੋਤਿ. ਆਯਾਮਾਤਿ ਗਚ੍ਛਾਮ.

੬੦੦. ਅਨੁਞ੍ਞਾਤਪਟਿਞ੍ਞਾਤਾਤਿ ‘‘ਤੇਵਿਜ੍ਜਾ ਤੁਮ੍ਹੇ’’ਤਿ ਏਵਂ ਮਯਂ ਆਚਰਿਯੇਹਿ ਚ ਅਨੁਞ੍ਞਾਤਾ ਅਤ੍ਤਨਾ ਚ ਪਟਿਜਾਨਿਮ੍ਹਾਤਿ ਅਤ੍ਥੋ. ਅਸ੍ਮਾਤਿ ਭਵਾਮ. ਉਭੋਤਿ ਦ੍ਵੇਪਿ ਜਨਾ. ਅਹਂ ਪੋਕ੍ਖਰਸਾਤਿਸ੍ਸ, ਤਾਰੁਕ੍ਖਸ੍ਸਾਯਂ ਮਾਣਵੋਤਿ ਅਹਂ ਪੋਕ੍ਖਰਸਾਤਿਸ੍ਸ ਜੇਟ੍ਠਨ੍ਤੇਵਾਸੀ ਅਗ੍ਗਸਿਸ੍ਸੋ, ਅਯਂ ਤਾਰੁਕ੍ਖਸ੍ਸਾਤਿ ਅਧਿਪ੍ਪਾਯੇਨ ਭਣਤਿ ਆਚਰਿਯਸਮ੍ਪਤ੍ਤਿਂ ਅਤ੍ਤਨੋ ਸਮ੍ਪਤ੍ਤਿਞ੍ਚ ਦੀਪੇਨ੍ਤੋ.

੬੦੧. ਤੇਵਿਜ੍ਜਾਨਨ੍ਤਿ ਤਿਵੇਦਾਨਂ. ਕੇਵਲਿਨੋਤਿ ਨਿਟ੍ਠਙ੍ਗਤਾ. ਅਸ੍ਮਸੇਤਿ ਅਮ੍ਹ ਭਵਾਮ. ਇਦਾਨਿ ਤਂ ਕੇਵਲਿਭਾਵਂ ਵਿਤ੍ਥਾਰੇਨ੍ਤੋ ਆਹ – ‘‘ਪਦਕਸ੍ਮਾ…ਪੇ… ਸਾਦਿਸਾ’’ਤਿ. ਤਤ੍ਥ ਜਪ੍ਪੇਤਿ ਵੇਦੇ. ਕਮ੍ਮੁਨਾਤਿ ਦਸਵਿਧੇਨ ਕੁਸਲਕਮ੍ਮਪਥਕਮ੍ਮੁਨਾ. ਅਯਞ੍ਹਿ ਪੁਬ੍ਬੇ ਸਤ੍ਤਵਿਧਂ ਕਾਯਵਚੀਕਮ੍ਮਂ ਸਨ੍ਧਾਯ ‘‘ਯਤੋ ਖੋ ਭੋ ਸੀਲਵਾ ਹੋਤੀ’’ਤਿ ਆਹ. ਤਿਵਿਧਂ ਮਨੋਕਮ੍ਮਂ ਸਨ੍ਧਾਯ ‘‘ਵਤਸਮ੍ਪਨ੍ਨੋ’’ਤਿ ਆਹ. ਤੇਨ ਸਮਨ੍ਨਾਗਤੋ ਹਿ ਆਚਾਰਸਮ੍ਪਨ੍ਨੋ ਹੋਤਿ.

੬੦੨-੫. ਇਦਾਨਿ ਤਂ ਵਚਨਨ੍ਤਰੇਨ ਦਸ੍ਸੇਨ੍ਤੋ ਆਹ – ‘‘ਅਹਞ੍ਚ ਕਮ੍ਮੁਨਾ ਬ੍ਰੂਮੀ’’ਤਿ. ਖਯਾਤੀਤਨ੍ਤਿ ਊਨਭਾਵਂ ਅਤੀਤਂ, ਪਰਿਪੁਣ੍ਣਨ੍ਤਿ ਅਤ੍ਥੋ. ਪੇਚ੍ਚਾਤਿ ਉਪਗਨ੍ਤ੍ਵਾ. ਨਮਸ੍ਸਨ੍ਤੀਤਿ ਨਮੋ ਕਰੋਨ੍ਤਿ. ਚਕ੍ਖੁਂ ਲੋਕੇ ਸਮੁਪ੍ਪਨ੍ਨਨ੍ਤਿ ਅਵਿਜ੍ਜਨ੍ਧਕਾਰੇ ਲੋਕੇ, ਤਂ ਅਨ੍ਧਕਾਰਂ ਵਿਧਮਿਤ੍ਵਾ ਲੋਕਸ੍ਸ ਦਿਟ੍ਠਧਮ੍ਮਿਕਾਦਿਅਤ੍ਥਸਨ੍ਦਸ੍ਸਨੇਨ ਚਕ੍ਖੁ ਹੁਤ੍ਵਾ ਸਮੁਪ੍ਪਨ੍ਨਂ.

੬੦੬. ਏਵਂ ਅਭਿਤ੍ਥਵਿਤ੍ਵਾ ਵਾਸੇਟ੍ਠੇਨ ਯਾਚਿਤੋ ਭਗਵਾ ਦ੍ਵੇਪਿ ਜਨੇ ਸਙ੍ਗਣ੍ਹਨ੍ਤੋ ਆਹ – ‘‘ਤੇਸਂ ਵੋ ਅਹਂ ਬ੍ਯਕ੍ਖਿਸ੍ਸ’’ਨ੍ਤਿਆਦਿ. ਤਤ੍ਥ ਬ੍ਯਕ੍ਖਿਸ੍ਸਨ੍ਤਿ ਬ੍ਯਾਕਰਿਸ੍ਸਾਮਿ. ਅਨੁਪੁਬ੍ਬਨ੍ਤਿ ਤਿਟ੍ਠਤੁ ਤਾਵ ਬ੍ਰਾਹ੍ਮਣਚਿਨ੍ਤਾ, ਕੀਟਪਟਙ੍ਗਤਿਣਰੁਕ੍ਖਤੋ ਪਭੁਤਿ ਵੋ ਅਨੁਪੁਬ੍ਬਂ ਬ੍ਯਕ੍ਖਿਸ੍ਸਨ੍ਤਿ ਏਵਮੇਤ੍ਥ ਅਧਿਪ੍ਪਾਯੋ ਵੇਦਿਤਬ੍ਬੋ, ਏਵਂ ਵਿਤ੍ਥਾਰਕਥਾਯ ਵਿਨੇਤਬ੍ਬਾ ਹਿ ਤੇ ਮਾਣਵਕਾ. ਜਾਤਿਵਿਭਙ੍ਗਨ੍ਤਿ ਜਾਤਿਵਿਤ੍ਥਾਰਂ. ਅਞ੍ਞਮਞ੍ਞਾ ਹਿ ਜਾਤਿਯੋਤਿ ਤੇਸਂ ਤੇਸਞ੍ਹਿ ਪਾਣਾਨਂ ਜਾਤਿਯੋ ਅਞ੍ਞਾ ਅਞ੍ਞਾ ਨਾਨਪ੍ਪਕਾਰਾਤਿ ਅਤ੍ਥੋ.

੬੦੭. ਤਤੋ ਪਾਣਾਨਂ ਜਾਤਿਵਿਭਙ੍ਗੇ ਕਥੇਤਬ੍ਬੇ ‘‘ਤਿਣਰੁਕ੍ਖੇਪਿ ਜਾਨਾਥਾ’’ਤਿ ਅਨੁਪਾਦਿਨ੍ਨਕਾਨਂ ਤਾਵ ਕਥੇਤੁਂ ਆਰਦ੍ਧੋ. ਤਂ ਕਿਮਤ੍ਥਮਿਤਿ ਚੇ? ਉਪਾਦਿਨ੍ਨੇਸੁ ਸੁਖਞਾਪਨਤ੍ਥਂ. ਅਨੁਪਾਦਿਨ੍ਨੇਸੁ ਹਿ ਜਾਤਿਭੇਦੇ ਗਹਿਤੇ ਉਪਾਦਿਨ੍ਨੇਸੁ ਸੋ ਪਾਕਟਤਰੋ ਹੋਤਿ. ਤਤ੍ਥ ਤਿਣਾਨਿ ਨਾਮ ਅਨ੍ਤੋਫੇਗ੍ਗੂਨਿ ਬਹਿਸਾਰਾਨਿ. ਤਸ੍ਮਾ ਤਾਲਨਾਲ਼ਿਕੇਰਾਦਯੋਪਿ ਤਿਣਸਙ੍ਗਹਂ ਗਚ੍ਛਨ੍ਤਿ. ਰੁਕ੍ਖਾ ਨਾਮ ਬਹਿਫੇਗ੍ਗੂ ਅਨ੍ਤੋਸਾਰਾ. ਤਿਣਾਨਿ ਚ ਰੁਕ੍ਖਾ ਚ ਤਿਣਰੁਕ੍ਖਾ. ਤੇ ਉਪਯੋਗਬਹੁਵਚਨੇਨ ਦਸ੍ਸੇਨ੍ਤੋ ਆਹ – ‘‘ਤਿਣਰੁਕ੍ਖੇਪਿ ਜਾਨਾਥਾ’’ਤਿ. ਨ ਚਾਪਿ ਪਟਿਜਾਨਰੇਤਿ ‘‘ਮਯਂ ਤਿਣਾ, ਮਯਂ ਰੁਕ੍ਖਾ’’ਤਿ ਏਵਮ੍ਪਿ ਨ ਪਟਿਜਾਨਨ੍ਤਿ. ਲਿਙ੍ਗਂ ਜਾਤਿਮਯਨ੍ਤਿ ਅਪਟਿਜਾਨਨ੍ਤਾਨਮ੍ਪਿ ਚ ਤੇਸਂ ਜਾਤਿਮਯਮੇਵ ਸਣ੍ਠਾਨਂ ਅਤ੍ਤਨੋ ਮੂਲਭੂਤਤਿਣਾਦਿਸਦਿਸਮੇਵ ਹੋਤਿ. ਕਿਂ ਕਾਰਣਂ? ਅਞ੍ਞਮਞ੍ਞਾ ਹਿ ਜਾਤਿਯੋ, ਯਸ੍ਮਾ ਅਞ੍ਞਾ ਤਿਣਜਾਤਿ, ਅਞ੍ਞਾ ਰੁਕ੍ਖਜਾਤਿ; ਤਿਣੇਸੁਪਿ ਅਞ੍ਞਾ ਤਾਲਜਾਤਿ, ਅਞ੍ਞਾ ਨਾਲ਼ਿਕੇਰਜਾਤੀਤਿ ਏਵਂ ਵਿਤ੍ਥਾਰੇਤਬ੍ਬਂ.

ਤੇਨ ਕਿਂ ਦੀਪੇਤਿ? ਯਂ ਜਾਤਿਵਸੇਨ ਨਾਨਾ ਹੋਤਿ, ਤਂ ਅਤ੍ਤਨੋ ਪਟਿਞ੍ਞਂ ਪਰੇਸਂ ਵਾ ਉਪਦੇਸਂ ਵਿਨਾਪਿ ਅਞ੍ਞਜਾਤਿਤੋ ਵਿਸੇਸੇਨ ਗਯ੍ਹਤਿ. ਯਦਿ ਚ ਜਾਤਿਯਾ ਬ੍ਰਾਹ੍ਮਣੋ ਭਵੇਯ੍ਯ, ਸੋਪਿ ਅਤ੍ਤਨੋ ਪਟਿਞ੍ਞਂ ਪਰੇਸਂ ਵਾ ਉਪਦੇਸਂ ਵਿਨਾ ਖਤ੍ਤਿਯਤੋ ਵੇਸ੍ਸਸੁਦ੍ਦਤੋ ਵਾ ਵਿਸੇਸੇਨ ਗਯ੍ਹੇਯ੍ਯ, ਨ ਚ ਗਯ੍ਹਤਿ, ਤਸ੍ਮਾ ਨ ਜਾਤਿਯਾ ਬ੍ਰਾਹ੍ਮਣੋਤਿ. ਪਰਤੋ ਪਨ ‘‘ਯਥਾ ਏਤਾਸੁ ਜਾਤੀਸੂ’’ਤਿ ਇਮਾਯ ਗਾਥਾਯ ਏਤਮਤ੍ਥਂ ਵਚੀਭੇਦੇਨੇਵ ਆਵਿਕਰਿਸ੍ਸਤਿ.

੬੦੮. ਏਵਂ ਅਨੁਪਾਦਿਨ੍ਨੇਸੁ ਜਾਤਿਭੇਦਂ ਦਸ੍ਸੇਤ੍ਵਾ ਉਪਾਦਿਨ੍ਨੇਸੁ ਤਂ ਦਸ੍ਸੇਨ੍ਤੋ ‘‘ਤਤੋ ਕੀਟੇ’’ਤਿ ਏਵਮਾਦਿਮਾਹ. ਤਤ੍ਥ ਕੀਟਾਤਿ ਕਿਮਯੋ. ਪਟਙ੍ਗਾਤਿ ਪਟਙ੍ਗਾਯੇਵ. ਯਾਵ ਕੁਨ੍ਥਕਿਪਿਲ੍ਲਿਕੇਤਿ ਕੁਨ੍ਥਕਿਪਿਲ੍ਲਿਕਂ ਪਰਿਯਨ੍ਤਂ ਕਤ੍ਵਾਤਿ ਅਤ੍ਥੋ.

੬੦੯. ਖੁਦ੍ਦਕੇਤਿ ਕਾਲ਼ਕਕਣ੍ਡਕਾਦਯੋ. ਮਹਲ੍ਲਕੇਤਿ ਸਸਬਿਲ਼ਾਰਾਦਯੋ. ਸਬ੍ਬੇ ਹਿ ਤੇ ਅਨੇਕਵਣ੍ਣਾ.

੬੧੦. ਪਾਦੂਦਰੇਤਿ ਉਦਰਪਾਦੇ, ਉਦਰਂਯੇਵ ਯੇਸਂ ਪਾਦਾਤਿ ਵੁਤ੍ਤਂ ਹੋਤਿ. ਦੀਘਪਿਟ੍ਠਿਕੇਤਿ ਸਪ੍ਪਾਨਞ੍ਹਿ ਸੀਸਤੋ ਯਾਵ ਨਙ੍ਗੁਟ੍ਠਾ ਪਿਟ੍ਠਿ ਏਵ ਹੋਤਿ, ਤੇਨ ਤੇ ‘‘ਦੀਘਪਿਟ੍ਠਿਕਾ’’ਤਿ ਵੁਚ੍ਚਨ੍ਤਿ. ਤੇਪਿ ਅਨੇਕਪ੍ਪਕਾਰਾ ਆਸੀਵਿਸਾਦਿਭੇਦੇਨ.

੬੧੧. ਓਦਕੇਤਿ ਉਦਕਮ੍ਹਿ ਜਾਤੇ. ਮਚ੍ਛਾਪਿ ਅਨੇਕਪ੍ਪਕਾਰਾ ਰੋਹਿਤਮਚ੍ਛਾਦਿਭੇਦੇਨ.

੬੧੨. ਪਕ੍ਖੀਤਿ ਸਕੁਣੇ. ਤੇ ਹਿ ਪਕ੍ਖਾਨਂ ਅਤ੍ਥਿਤਾਯ ‘‘ਪਕ੍ਖੀ’’ਤਿ ਵੁਚ੍ਚਨ੍ਤਿ. ਪਤ੍ਤੇਹਿ ਯਨ੍ਤੀਤਿ ਪਤ੍ਤਯਾਨਾ. ਵੇਹਾਸੇ ਗਚ੍ਛਨ੍ਤੀਤਿ ਵਿਹਙ੍ਗਮਾ. ਤੇਪਿ ਅਨੇਕਪ੍ਪਕਾਰਾ ਕਾਕਾਦਿਭੇਦੇਨ.

੬੧੩. ਏਵਂ ਥਲਜਲਾਕਾਸਗੋਚਰਾਨਂ ਪਾਣਾਨਂ ਜਾਤਿਭੇਦਂ ਦਸ੍ਸੇਤ੍ਵਾ ਇਦਾਨਿ ਯੇਨਾਧਿਪ੍ਪਾਯੇਨ ਤਂ ਦਸ੍ਸੇਸਿ, ਤਂ ਆਵਿਕਰੋਨ੍ਤੋ ‘‘ਯਥਾ ਏਤਾਸੂ’’ਤਿ ਗਾਥਮਾਹ. ਤਸ੍ਸਤ੍ਥੋ ਸਙ੍ਖੇਪਤੋ ਪੁਬ੍ਬੇ ਵੁਤ੍ਤਾਧਿਪ੍ਪਾਯਵਣ੍ਣਨਾਵਸੇਨੇਵ ਵੇਦਿਤਬ੍ਬੋ.

੬੧੪-੬. ਵਿਤ੍ਥਾਰਤੋ ਪਨੇਤ੍ਥ ਯਂ ਵਤ੍ਤਬ੍ਬਂ, ਤਂ ਸਯਮੇਵ ਦਸ੍ਸੇਨ੍ਤੋ ‘‘ਨ ਕੇਸੇਹੀ’’ਤਿਆਦਿਮਾਹ. ਤਤ੍ਰਾਯਂ ਯੋਜਨਾ – ਯਂ ਵੁਤ੍ਤਂ ‘‘ਨਤ੍ਥਿ ਮਨੁਸ੍ਸੇਸੁ ਲਿਙ੍ਗਂ ਜਾਤਿਮਯਂ ਪੁਥੂ’’ਤਿ, ਤਂ ਏਵਂ ਨਤ੍ਥੀਤਿ ਵੇਦਿਤਬ੍ਬਂ. ਸੇਯ੍ਯਥਿਦਂ, ਨ ਕੇਸੇਹੀਤਿ. ਨ ਹਿ ‘‘ਬ੍ਰਾਹ੍ਮਣਾਨਂ ਈਦਿਸਾ ਕੇਸਾ ਹੋਨ੍ਤਿ, ਖਤ੍ਤਿਯਾਨਂ ਈਦਿਸਾ’’ਤਿ ਨਿਯਮੋ ਅਤ੍ਥਿ ਯਥਾ ਹਤ੍ਥਿਅਸ੍ਸਮਿਗਾਦੀਨਨ੍ਤਿ ਇਮਿਨਾ ਨਯੇਨ ਸਬ੍ਬਂ ਯੋਜੇਤਬ੍ਬਂ. ਲਿਙ੍ਗਂ ਜਾਤਿਮਯਂ ਨੇਵ, ਯਥਾ ਅਞ੍ਞਾਸੁ ਜਾਤਿਸੂਤਿ ਇਦਂ ਪਨ ਵੁਤ੍ਤਸ੍ਸੇਵਤ੍ਥਸ੍ਸ ਨਿਗਮਨਨ੍ਤਿ ਵੇਦਿਤਬ੍ਬਂ. ਤਸ੍ਸ ਯੋਜਨਾ – ਤਦੇਵ ਯਸ੍ਮਾ ਇਮੇਹਿ ਕੇਸਾਦੀਹਿ ਨਤ੍ਥਿ ਮਨੁਸ੍ਸੇਸੁ ਲਿਙ੍ਗਂ ਜਾਤਿਮਯਂ ਪੁਥੁ, ਤਸ੍ਮਾ ਵੇਦਿਤਬ੍ਬਮੇਤਂ ‘‘ਬ੍ਰਾਹ੍ਮਣਾਦਿਭੇਦੇਸੁ ਮਨੁਸ੍ਸੇਸੁ ਲਿਙ੍ਗਂ ਜਾਤਿਮਯਂ ਨੇਵ ਯਥਾ ਅਞ੍ਞਾਸੁ ਜਾਤੀਸੂ’’ਤਿ.

੬੧੭. ਇਦਾਨਿ ਏਵਂ ਜਾਤਿਭੇਦੇ ਅਸਨ੍ਤੇਪਿ ਬ੍ਰਾਹ੍ਮਣੋ ਖਤ੍ਤਿਯੋਤਿ ਇਦਂ ਨਾਨਤ੍ਤਂ ਯਥਾ ਜਾਤਂ, ਤਂ ਦਸ੍ਸੇਤੁਂ ‘‘ਪਚ੍ਚਤ੍ਤ’’ਨ੍ਤਿ ਗਾਥਮਾਹ. ਤਸ੍ਸਤ੍ਥੋ – ਏਤਂ ਤਿਰਚ੍ਛਾਨਾਨਂ ਵਿਯ ਯੋਨਿਸਿਦ੍ਧਮੇਵ ਕੇਸਾਦਿਸਣ੍ਠਾਨਾਨਤ੍ਤਂ ਮਨੁਸ੍ਸੇਸੁ ਬ੍ਰਾਹ੍ਮਣਾਦੀਨਂ ਅਤ੍ਤਨੋ ਅਤ੍ਤਨੋ ਸਰੀਰੇਸੁ ਨ ਵਿਜ੍ਜਤਿ. ਅਵਿਜ੍ਜਮਾਨੇਪਿ ਪਨ ਏਤਸ੍ਮਿਂ ਯਦੇਤਂ ਬ੍ਰਾਹ੍ਮਣੋ ਖਤ੍ਤਿਯੋਤਿ ਨਾਨਤ੍ਤਵਿਧਾਨਪਰਿਯਾਯਂ ਵੋਕਾਰਂ, ਤਂ ਵੋਕਾਰਞ੍ਚ ਮਨੁਸ੍ਸੇਸੁ ਸਮਞ੍ਞਾਯ ਪਵੁਚ੍ਚਤਿ, ਵੋਹਾਰਮਤ੍ਤੇਨ ਵੁਚ੍ਚਤੀਤਿ.

੬੧੯-੬੨੫. ਏਤ੍ਤਾਵਤਾ ਭਗਵਾ ਭਾਰਦ੍ਵਾਜਸ੍ਸ ਵਾਦਂ ਨਿਗ੍ਗਹੇਤ੍ਵਾ ਇਦਾਨਿ ਯਦਿ ਜਾਤਿਯਾ ਬ੍ਰਾਹ੍ਮਣੋ ਭਵੇਯ੍ਯ, ਆਜੀਵਸੀਲਾਚਾਰਵਿਪਨ੍ਨੋਪਿ ਬ੍ਰਾਹ੍ਮਣੋ ਭਵੇਯ੍ਯ. ਯਸ੍ਮਾ ਪਨ ਪੋਰਾਣਾ ਬ੍ਰਾਹ੍ਮਣਾ ਤਸ੍ਸ ਬ੍ਰਾਹ੍ਮਣਭਾਵਂ ਨ ਇਚ੍ਛਨ੍ਤਿ ਲੋਕੇ ਚ ਅਞ੍ਞੇਪਿ ਪਣ੍ਡਿਤਮਨੁਸ੍ਸਾ, ਤਸ੍ਮਾ ਵਾਸੇਟ੍ਠਸ੍ਸ ਵਾਦਪਗ੍ਗਹਣਤ੍ਥਂ ਤਂ ਦਸ੍ਸੇਨ੍ਤੋ ‘‘ਯੋ ਹਿ ਕੋਚਿ ਮਨੁਸ੍ਸੇਸੂ’’ਤਿਆਦਿਕਾ ਅਟ੍ਠ ਗਾਥਾਯੋ ਆਹ. ਤਤ੍ਥ ਗੋਰਕ੍ਖਨ੍ਤਿ ਖੇਤ੍ਤਰਕ੍ਖਂ, ਕਸਿਕਮ੍ਮਨ੍ਤਿ ਵੁਤ੍ਤਂ ਹੋਤਿ. ਪਥਵੀ ਹਿ ‘‘ਗੋ’’ਤਿ ਵੁਚ੍ਚਤਿ, ਤਪ੍ਪਭੇਦੋ ਚ ਖੇਤ੍ਤਂ. ਪੁਥੁਸਿਪ੍ਪੇਨਾਤਿ ਤਨ੍ਤਵਾਯਕਮ੍ਮਾਦਿਨਾਨਾਸਿਪ੍ਪੇਨ. ਵੋਹਾਰਨ੍ਤਿ ਵਣਿਜ੍ਜਂ. ਪਰਪੇਸ੍ਸੇਨਾਤਿ ਪਰੇਸਂ ਵੇਯ੍ਯਾਵਚ੍ਚੇਨ. ਇਸ੍ਸਤ੍ਥਨ੍ਤਿ ਆਵੁਧਜੀਵਿਕਂ, ਉਸੁਞ੍ਚ ਸਤ੍ਤਿਞ੍ਚਾਤਿ ਵੁਤ੍ਤਂ ਹੋਤਿ. ਪੋਰੋਹਿਚ੍ਚੇਨਾਤਿ ਪੁਰੋਹਿਤਕਮ੍ਮੇਨ.

੬੨੬. ਏਵਂ ਬ੍ਰਾਹ੍ਮਣਸਮਯੇਨ ਚ ਲੋਕਵੋਹਾਰੇਨ ਚ ਆਜੀਵਸੀਲਾਚਾਰਵਿਪਨ੍ਨਸ੍ਸ ਅਬ੍ਰਾਹ੍ਮਣਭਾਵਂ ਸਾਧੇਤ੍ਵਾ ਏਵਂ ਸਨ੍ਤੇ ਨ ਜਾਤਿਯਾ ਬ੍ਰਾਹ੍ਮਣੋ, ਗੁਣੇਹਿ ਪਨ ਬ੍ਰਾਹ੍ਮਣੋ ਹੋਤਿ. ਤਸ੍ਮਾ ਯਤ੍ਥ ਯਤ੍ਥ ਕੁਲੇ ਜਾਤੋ ਯੋ ਗੁਣਵਾ, ਸੋ ਬ੍ਰਾਹ੍ਮਣੋ, ਅਯਮੇਤ੍ਥ ਞਾਯੋਤਿ ਏਵਮੇਤਂ ਞਾਯਂ ਅਤ੍ਥਤੋ ਆਪਾਦੇਤ੍ਵਾ ਪੁਨ ਤਦੇਵ ਞਾਯਂ ਵਚੀਭੇਦੇਨ ਪਕਾਸੇਨ੍ਤੋ ਆਹ ‘‘ਨ ਚਾਹਂ ਬ੍ਰਾਹ੍ਮਣਂ ਬ੍ਰੂਮੀ’’ਤਿ.

ਤਸ੍ਸਤ੍ਥੋ – ਅਹਂ ਪਨ ਯ੍ਵਾਯਂ ਚਤੂਸੁ ਯੋਨੀਸੁ ਯਤ੍ਥ ਕਤ੍ਥਚਿ ਜਾਤੋ, ਤਤ੍ਰਾਪਿ ਵਾ ਵਿਸੇਸੇਨ ਯੋ ਬ੍ਰਾਹ੍ਮਣਸਮਞ੍ਞਿਤਾਯ ਮਾਤਰਿ ਸਮ੍ਭੂਤੋ, ਤਂ ਯੋਨਿਜਂ ਮਤ੍ਤਿਸਮ੍ਭਵਂ ਯਾ ਚਾਯਂ ‘‘ਉਭਤੋ ਸੁਜਾਤੋ’’ਤਿਆਦਿਨਾ (ਦੀ. ਨਿ. ੧.੩੦੩; ਮ. ਨਿ. ੨.੪੨੪) ਨਯੇਨ ਬ੍ਰਾਹ੍ਮਣੇਹਿ ਬ੍ਰਾਹ੍ਮਣਸ੍ਸ ਪਰਿਸੁਦ੍ਧਉਪ੍ਪਤ੍ਤਿਮਗ੍ਗਸਙ੍ਖਾਤਾ ਯੋਨਿ ਕਥੀਯਤਿ, ‘‘ਸਂਸੁਦ੍ਧਗਹਣਿਕੋ’’ਤਿ ਇਮਿਨਾ ਚ ਮਾਤੁਸਮ੍ਪਤ੍ਤਿ, ਤਤੋਪਿ ਜਾਤਸਮ੍ਭੂਤਤ੍ਤਾ ‘‘ਯੋਨਿਜੋ ਮਤ੍ਤਿਸਮ੍ਭਵੋ’’ਤਿ ਚ ਵੁਚ੍ਚਤਿ, ਤਮ੍ਪਿ ਯੋਨਿਜਂ ਮਤ੍ਤਿਸਮ੍ਭਵਂ ਇਮਿਨਾ ਚ ਯੋਨਿਜਮਤ੍ਤਿਸਮ੍ਭਵਮਤ੍ਤੇਨ ਬ੍ਰਾਹ੍ਮਣਂ ਨ ਬ੍ਰੂਮਿ. ਕਸ੍ਮਾ? ਯਸ੍ਮਾ ‘‘ਭੋ ਭੋ’’ਤਿ ਵਚਨਮਤ੍ਤੇਨ ਅਞ੍ਞੇਹਿ ਸਕਿਞ੍ਚਨੇਹਿ ਵਿਸਿਟ੍ਠਤ੍ਤਾ ਭੋਵਾਦੀ ਨਾਮ ਸੋ ਹੋਤਿ, ਸਚੇ ਹੋਤਿ ਸਕਿਞ੍ਚਨੋ. ਯੋ ਪਨਾਯਂ ਯਤ੍ਥ ਕਤ੍ਥਚਿ ਕੁਲੇ ਜਾਤੋਪਿ ਰਾਗਾਦਿਕਿਞ੍ਚਨਾਭਾਵੇਨ ਅਕਿਞ੍ਚਨੋ, ਸਬ੍ਬਗਹਣਪਟਿਨਿਸ੍ਸਗ੍ਗੇਨ ਚ ਅਨਾਦਾਨੋ, ਅਕਿਞ੍ਚਨਂ ਅਨਾਦਾਨਂ ਤਮਹਂ ਬ੍ਰੂਮਿ ਬ੍ਰਾਹ੍ਮਣਂ. ਕਸ੍ਮਾ? ਯਸ੍ਮਾ ਬਾਹਿਤਪਾਪੋਤਿ.

੬੨੭. ਕਿਞ੍ਚ ਭਿਯ੍ਯੋ – ‘‘ਸਬ੍ਬਸਂਯੋਜਨਂ ਛੇਤ੍ਵਾ’’ਤਿਆਦਿਕਾ ਸਤ੍ਤਵੀਸਤਿ ਗਾਥਾ. ਤਤ੍ਥ ਸਬ੍ਬਸਂਯੋਜਨਨ੍ਤਿ ਦਸਵਿਧਂ ਸਂਯੋਜਨਂ. ਨ ਪਰਿਤਸ੍ਸਤੀਤਿ ਤਣ੍ਹਾਯ ਨ ਤਸ੍ਸਤਿ. ਤਮਹਨ੍ਤਿ ਤਂ ਅਹਂ ਰਾਗਾਦੀਨਂ ਸਙ੍ਗਾਨਂ ਅਤਿਕ੍ਕਨ੍ਤਤ੍ਤਾ ਸਙ੍ਗਾਤਿਗਂ, ਚਤੁਨ੍ਨਮ੍ਪਿ ਯੋਗਾਨਂ ਅਭਾਵੇਨ ਵਿਸਂਯੁਤ੍ਤਂ ਬ੍ਰਾਹ੍ਮਣਂ ਵਦਾਮੀਤਿ ਅਤ੍ਥੋ.

੬੨੮. ਨਦ੍ਧਿਨ੍ਤਿ ਨਯ੍ਹਨਭਾਵੇਨ ਪਵਤ੍ਤਂ ਕੋਧਂ. ਵਰਤ੍ਤਨ੍ਤਿ ਬਨ੍ਧਨਭਾਵੇਨ ਪਵਤ੍ਤਂ ਤਣ੍ਹਂ. ਸਨ੍ਦਾਨਂ ਸਹਨੁਕ੍ਕਮਨ੍ਤਿ ਅਨੁਸਯਾਨੁਕ੍ਕਮਸਹਿਤਂ ਦ੍ਵਾਸਟ੍ਠਿਦਿਟ੍ਠਿਸਨ੍ਦਾਨਂ, ਇਦਂ ਸਬ੍ਬਮ੍ਪਿ ਛਿਨ੍ਦਿਤ੍ਵਾ ਠਿਤਂ ਅਵਿਜ੍ਜਾਪਲਿਘਸ੍ਸ ਉਕ੍ਖਿਤ੍ਤਤ੍ਤਾ ਉਕ੍ਖਿਤ੍ਤਪਲਿਘਂ ਚਤੁਨ੍ਨਂ ਸਚ੍ਚਾਨ੍ਨਂ ਬੁਦ੍ਧਤ੍ਤਾ ਬੁਦ੍ਧਂ ਅਹਂ ਬ੍ਰਾਹ੍ਮਣਂ ਵਦਾਮੀਤਿ ਅਤ੍ਥੋ.

੬੨੯. ਅਦੁਟ੍ਠੋਤਿ ਏਵਂ ਦਸਹਿ ਅਕ੍ਕੋਸਵਤ੍ਥੂਹਿ ਅਕ੍ਕੋਸਞ੍ਚ ਪਾਣਿਆਦੀਹਿ ਪੋਥਨਞ੍ਚ ਅਨ੍ਦੁਬਨ੍ਧਨਾਦੀਹਿ ਬਨ੍ਧਨਞ੍ਚ ਯੋ ਅਕੁਦ੍ਧਮਾਨਸੋ ਹੁਤ੍ਵਾ ਅਧਿਵਾਸੇਸਿ, ਖਨ੍ਤਿਬਲੇਨ ਸਮਨ੍ਨਾਗਤਤ੍ਤਾ ਖਨ੍ਤੀਬਲਂ, ਪੁਨਪ੍ਪੁਨਂ ਉਪ੍ਪਤ੍ਤਿਯਾ ਅਨੀਕਭੂਤੇਨ ਤੇਨੇਵ ਖਨ੍ਤੀਬਲਾਨੀਕੇਨ ਸਮਨ੍ਨਾਗਤਤ੍ਤਾ ਬਲਾਨੀਕਂ ਤਂ ਏਵਰੂਪਂ ਅਹਂ ਬ੍ਰਾਹ੍ਮਣਂ ਵਦਾਮੀਤਿ ਅਤ੍ਥੋ.

੬੩੦. ਵਤਨ੍ਤਨ੍ਤਿ ਧੁਤਵਤੇਨ ਸਮਨ੍ਨਾਗਤਂ, ਚਤੁਪਾਰਿਸੁਦ੍ਧਿਸੀਲੇਨ ਸੀਲਵਨ੍ਤਂ, ਤਣ੍ਹਾਉਸ੍ਸਦਾਭਾਵੇਨ ਅਨੁਸ੍ਸਦਂ, ਛਲ਼ਿਨ੍ਦ੍ਰਿਯਦਮਨੇਨ ਦਨ੍ਤਂ, ਕੋਟਿਯਂ ਠਿਤੇਨ ਅਤ੍ਤਭਾਵੇਨ ਅਨ੍ਤਿਮਸਾਰੀਰਂ ਤਮਹਂ ਬ੍ਰਾਹ੍ਮਣਂ ਵਦਾਮੀਤਿ ਅਤ੍ਥੋ.

੬੩੧. ਯੋ ਨ ਲਿਮ੍ਪਤੀਤਿ ਏਵਮੇਵ ਯੋ ਅਬ੍ਭਨ੍ਤਰੇ ਦੁਵਿਧੇਪਿ ਕਾਮੇ ਨ ਲਿਮ੍ਪਤਿ, ਤਸ੍ਮਿਂ ਕਾਮੇ ਨ ਸਣ੍ਠਾਤਿ, ਤਮਹਂ ਬ੍ਰਾਹ੍ਮਣਂ ਵਦਾਮੀਤਿ ਅਤ੍ਥੋ.

੬੩੨. ਦੁਕ੍ਖਸ੍ਸਾਤਿ ਖਨ੍ਧਦੁਕ੍ਖਸ੍ਸ. ਪਨ੍ਨਭਾਰਨ੍ਤਿ ਓਹਿਤਕ੍ਖਨ੍ਧਭਾਰਂ ਚਤੂਹਿ ਯੋਗੇਹਿ ਸਬ੍ਬਕਿਲੇਸੇਹਿ ਵਾ ਵਿਸਂਯੁਤ੍ਤਂ ਤਮਹਂ ਬ੍ਰਾਹ੍ਮਣਂ ਵਦਾਮੀਤਿ ਅਤ੍ਥੋ.

੬੩੩. ਗਮ੍ਭੀਰਪਞ੍ਞਨ੍ਤਿ ਗਮ੍ਭੀਰੇਸੁ ਖਨ੍ਧਾਦੀਸੁ ਪਵਤ੍ਤਾਯ ਪਞ੍ਞਾਯ ਸਮਨ੍ਨਾਗਤਂ, ਧਮ੍ਮੋਜਪਞ੍ਞਾਯ ਮੇਧਾਵਿਂ, ‘‘ਅਯਂ ਦੁਗ੍ਗਤਿਯਾ, ਅਯਂ ਸੁਗਤਿਯਾ, ਅਯਂ ਨਿਬ੍ਬਾਨਸ੍ਸ ਮਗ੍ਗੋ, ਅਯਂ ਅਮਗ੍ਗੋ’’ਤਿ ਏਵਂ ਮਗ੍ਗੇ ਅਮਗ੍ਗੇ ਚ ਛੇਕਤਾਯ ਮਗ੍ਗਾਮਗ੍ਗਸ੍ਸ ਕੋਵਿਦਂ, ਅਰਹਤ੍ਤਸਙ੍ਖਾਤਂ ਉਤ੍ਤਮਤ੍ਥਮਨੁਪ੍ਪਤ੍ਤਂ ਤਮਹਂ ਬ੍ਰਾਹ੍ਮਣਂ ਵਦਾਮੀਤਿ ਅਤ੍ਥੋ.

੬੩੪. ਅਸਂਸਟ੍ਠਨ੍ਤਿ ਦਸ੍ਸਨਸਵਨਸਮੁਲ੍ਲਾਪਪਰਿਭੋਗਕਾਯਸਂਸਗ੍ਗਾਨਂ ਅਭਾਵੇਨ ਅਸਂਸਟ੍ਠਂ. ਉਭਯਨ੍ਤਿ ਗਿਹੀਹਿ ਚ ਅਨਗਾਰੇਹਿ ਚਾਤਿ ਉਭਯੇਹਿਪਿ ਅਸਂਸਟ੍ਠਂ. ਅਨੋਕਸਾਰਿਨ੍ਤਿ ਅਨਾਲਯਚਾਰਿਂ, ਤਂ ਏਵਰੂਪਂ ਅਹਂ ਬ੍ਰਾਹ੍ਮਣਂ ਵਦਾਮੀਤਿ ਅਤ੍ਥੋ.

੬੩੫. ਨਿਧਾਯਾਤਿ ਨਿਕ੍ਖਿਪਿਤ੍ਵਾ ਓਰੋਪੇਤ੍ਵਾ. ਤਸੇਸੁ ਥਾਵਰੇਸੁ ਚਾਤਿ ਤਣ੍ਹਾਤਾਸੇਨ ਤਸੇਸੁ ਤਣ੍ਹਾਭਾਵੇਨ ਥਿਰਤਾਯ ਥਾਵਰੇਸੁ. ਯੋ ਨ ਹਨ੍ਤੀਤਿ ਯੋ ਏਵਂ ਸਬ੍ਬਸਤ੍ਤੇਸੁ ਵਿਗਤਪਟਿਘਤਾਯ ਨਿਕ੍ਖਿਤ੍ਤਦਣ੍ਡੋ ਨੇਵ ਕਞ੍ਚਿ ਸਯਂ ਹਨਤਿ, ਨ ਅਞ੍ਞੇਨ ਘਾਤੇਤਿ, ਤਮਹਂ ਬ੍ਰਾਹ੍ਮਣਂ ਵਦਾਮੀਤਿ ਅਤ੍ਥੋ.

੬੩੬. ਅਵਿਰੁਦ੍ਧਨ੍ਤਿ ਆਘਾਤਵਸੇਨ ਵਿਰੁਦ੍ਧੇਸੁਪਿ ਲੋਕਿਯਮਹਾਜਨੇਸੁ ਆਘਾਤਾਭਾਵੇਨ ਅਵਿਰੁਦ੍ਧਂ, ਹਤ੍ਥਗਤੇ ਦਣ੍ਡੇ ਵਾ ਸਤ੍ਥੇ ਵਾ ਅਵਿਜ੍ਜਮਾਨੇਪਿ ਪਰੇਸਂ ਪਹਾਰਦਾਨਤੋ ਅਵਿਰਤਤ੍ਤਾ ਅਤ੍ਤਦਣ੍ਡੇਸੁ ਜਨੇਸੁ ਨਿਬ੍ਬੁਤਂ ਨਿਕ੍ਖਿਤ੍ਤਦਣ੍ਡਂ, ਪਞ੍ਚਨ੍ਨਂ ਖਨ੍ਧਾਨਂ ‘‘ਅਹਂ ਮਮ’’ਨ੍ਤਿ ਗਹਿਤਤ੍ਤਾ ਸਾਦਾਨੇਸੁ, ਤਸ੍ਸ ਗਹਣਸ੍ਸ ਅਭਾਵੇਨ ਅਨਾਦਾਨਂ ਤਂ ਏਵਰੂਪਂ ਅਹਂ ਬ੍ਰਾਹ੍ਮਣਂ ਵਦਾਮੀਤਿ ਅਤ੍ਥੋ.

੬੩੭. ਆਰਗ੍ਗਾਤਿ ਯਸ੍ਸੇਤੇ ਰਾਗਾਦਯੋ ਅਯਞ੍ਚ ਪਰਗੁਣਮਕ੍ਖਣਲਕ੍ਖਣੋ ਮਕ੍ਖੋ ਆਰਗ੍ਗਾ ਸਾਸਪੋ ਵਿਯ ਪਪਤਿਤੋ, ਯਥਾ ਸਾਸਪੋ ਆਰਗ੍ਗੇ ਨ ਸਨ੍ਤਿਟ੍ਠਤਿ, ਏਵਂ ਚਿਤ੍ਤੇ ਨ ਤਿਟ੍ਠਤਿ, ਤਮਹਂ ਬ੍ਰਾਹ੍ਮਣਂ ਵਦਾਮੀਤਿ ਅਤ੍ਥੋ.

੬੩੮. ਅਕਕ੍ਕਸਨ੍ਤਿ ਅਫਰੁਸਂ. ਵਿਞ੍ਞਾਪਨਿਨ੍ਤਿ ਅਤ੍ਥਵਿਞ੍ਞਾਪਨਿਂ. ਸਚ੍ਚਨ੍ਤਿ ਭੂਤਂ. ਨਾਭਿਸਜੇਤਿ ਯਾਯ ਗਿਰਾਯ ਅਞ੍ਞਂ ਕੁਜ੍ਝਾਪਨਵਸੇਨ ਨ ਲਗ੍ਗਾਪੇਯ੍ਯ. ਖੀਣਾਸਵੋ ਨਾਮ ਏਵਰੂਪਮੇਵ ਗਿਰਂ ਭਾਸੇਯ੍ਯ. ਤਸ੍ਮਾ ਤਮਹਂ ਬ੍ਰਾਹ੍ਮਣਂ ਵਦਾਮੀਤਿ ਅਤ੍ਥੋ.

੬੩੯. ਸਾਟਕਾਭਰਣਾਦੀਸੁ ਦੀਘਂ ਵਾ ਰਸ੍ਸਂ ਵਾ, ਮਣਿਮੁਤ੍ਤਾਦੀਸੁ ਅਣੁਂ ਵਾ ਥੂਲਂ ਵਾ ਮਹਗ੍ਘਅਪ੍ਪਗ੍ਘਵਸੇਨ ਸੁਭਂ ਵਾ ਅਸੁਭਂ ਵਾ ਯੋ ਪੁਗ੍ਗਲੋ ਇਮਸ੍ਮਿਂ ਲੋਕੇ ਪਰਪਰਿਗ੍ਗਹਿਤਂ ਨਾਦਿਯਤਿ, ਤਮਹਂ ਬ੍ਰਾਹ੍ਮਣਂ ਵਦਾਮੀਤਿ ਅਤ੍ਥੋ.

੬੪੦. ਨਿਰਾਸਾਸਨ੍ਤਿ ਨਿਤ੍ਤਣ੍ਹਂ. ਵਿਸਂਯੁਤ੍ਤਨ੍ਤਿ ਸਬ੍ਬਕਿਲੇਸੇਹਿ ਵਿਯੁਤ੍ਤਂ ਤਮਹਂ ਬ੍ਰਾਹ੍ਮਣਂ ਵਦਾਮੀਤਿ ਅਤ੍ਥੋ.

੬੪੧. ਆਲਯਾਤਿ ਤਣ੍ਹਾ. ਅਞ੍ਞਾਯ ਅਕਥਂਕਥੀਤਿ ਅਟ੍ਠ ਵਤ੍ਥੂਨਿ ਯਥਾਭੂਤਂ ਜਾਨਿਤ੍ਵਾ ਅਟ੍ਠਵਤ੍ਥੁਕਾਯ ਵਿਚਿਕਿਚ੍ਛਾਯ ਨਿਬ੍ਬਿਚਿਕਿਚ੍ਛੋ. ਅਮਤੋਗਧਮਨੁਪ੍ਪਤ੍ਤਨ੍ਤਿ ਅਮਤਂ ਨਿਬ੍ਬਾਨਂ ਓਗਹੇਤ੍ਵਾ ਅਨੁਪ੍ਪਤ੍ਤਂ ਤਮਹਂ ਬ੍ਰਾਹ੍ਮਣਂ ਵਦਾਮੀਤਿ ਅਤ੍ਥੋ.

੬੪੨. ਉਭੋਤਿ ਦ੍ਵੇਪਿ ਪੁਞ੍ਞਾਨਿ ਪਾਪਾਨਿ ਚ ਛਡ੍ਡੇਤ੍ਵਾਤਿ ਅਤ੍ਥੋ. ਸਙ੍ਗਨ੍ਤਿ ਰਾਗਾਦਿਭੇਦਂ ਸਙ੍ਗਂ. ਉਪਚ੍ਚਗਾਤਿ ਅਤਿਕ੍ਕਨ੍ਤੋ. ਤਮਹਂ ਵਟ੍ਟਮੂਲਸੋਕੇਨ ਅਸੋਕਂ, ਅਬ੍ਭਨ੍ਤਰੇ ਰਾਗਰਜਾਦੀਨਂ ਅਭਾਵੇਨ ਵਿਰਜਂ, ਨਿਰੁਪਕ੍ਕਿਲੇਸਤਾਯ ਸੁਦ੍ਧਂ ਬ੍ਰਾਹ੍ਮਣਂ ਵਦਾਮੀਤਿ ਅਤ੍ਥੋ.

੬੪੩. ਵਿਮਲਨ੍ਤਿ ਅਬ੍ਭਾਦਿਮਲਵਿਰਹਿਤਂ. ਸੁਦ੍ਧਨ੍ਤਿ ਨਿਰੁਪਕ੍ਕਿਲੇਸਂ. ਵਿਪ੍ਪਸਨ੍ਨਨ੍ਤਿ ਪਸਨ੍ਨਚਿਤ੍ਤਂ. ਅਨਾਵਿਲਨ੍ਤਿ ਕਿਲੇਸਾਵਿਲਤ੍ਤਵਿਰਹਿਤਂ. ਨਨ੍ਦੀਭਵਪਰਿਕ੍ਖੀਣਨ੍ਤਿ ਤੀਸੁ ਭਵੇਸੁ ਪਰਿਕ੍ਖੀਣਤਣ੍ਹਂ ਤਮਹਂ ਬ੍ਰਾਹ੍ਮਣਂ ਵਦਾਮੀਤਿ ਅਤ੍ਥੋ.

੬੪੪. ਯੋ ਭਿਕ੍ਖੁ ਇਮਂਰਾਗਪਲਿਪਥਞ੍ਚੇਵ ਕਿਲੇਸਦੁਗ੍ਗਞ੍ਚ ਸਂਸਾਰਵਟ੍ਟਞ੍ਚ ਚਤੁਨ੍ਨਂ ਸਚ੍ਚਾਨਂ ਅਪ੍ਪਟਿਵਿਜ੍ਝਨਕਮੋਹਞ੍ਚ ਅਤੀਤੋ, ਚਤ੍ਤਾਰੋ ਓਘੇ ਤਿਣ੍ਣੋ ਹੁਤ੍ਵਾ ਪਾਰਂ ਅਨੁਪ੍ਪਤ੍ਤੋ, ਦੁਵਿਧੇਨ ਝਾਨੇਨ ਝਾਯੀ, ਤਣ੍ਹਾਯ ਅਭਾਵੇਨ ਅਨੇਜੋ, ਕਥਂਕਥਾਯ ਅਭਾਵੇਨ ਅਕਥਂਕਥੀ, ਉਪਾਦਾਨਾਨਂ ਅਭਾਵੇਨ ਅਨੁਪਾਦਿਯਿਤ੍ਵਾ ਕਿਲੇਸਨਿਬ੍ਬਾਨੇਨ ਨਿਬ੍ਬੁਤੋ, ਤਮਹਂ ਬ੍ਰਾਹ੍ਮਣਂ ਵਦਾਮੀਤਿ ਅਤ੍ਥੋ.

੬੪੫. ਯੋ ਪੁਗ੍ਗਲੋ, ਇਧ ਲੋਕੇ, ਉਭੋਪਿ ਕਾਮੇ ਹਿਤ੍ਵਾ ਅਨਾਗਾਰੋ ਹੁਤ੍ਵਾ ਪਰਿਬ੍ਬਜਤਿ, ਤਂ ਪਰਿਕ੍ਖੀਣਕਾਮਞ੍ਚੇਵ ਪਰਿਕ੍ਖੀਣਭਵਞ੍ਚ ਅਹਂ ਬ੍ਰਾਹ੍ਮਣਂ ਵਦਾਮੀਤਿ ਅਤ੍ਥੋ.

੬੪੬. ਯੋ ਇਧ ਲੋਕੇ ਛਦ੍ਵਾਰਿਕਂ ਤਣ੍ਹਂ ਜਹਿਤ੍ਵਾ ਘਰਾਵਾਸੇਨ ਅਨਤ੍ਥਿਕੋ ਅਨਾਗਾਰੋ ਹੁਤ੍ਵਾ ਪਰਿਬ੍ਬਜਤਿ, ਤਣ੍ਹਾਯ ਚੇਵ ਭਵਸ੍ਸ ਚ ਪਰਿਕ੍ਖੀਣਤ੍ਤਾ ਤਣ੍ਹਾਭਵਪਰਿਕ੍ਖੀਣਂ ਤਮਹਂ ਬ੍ਰਾਹ੍ਮਣਂ ਵਦਾਮੀਤਿ ਅਤ੍ਥੋ.

੬੪੭. ਮਾਨੁਸਕਂ ਯੋਗਨ੍ਤਿ ਮਾਨੁਸਕਂ ਆਯੁਞ੍ਚੇਵ ਪਞ੍ਚਵਿਧਕਾਮਗੁਣੇ ਚ. ਦਿਬ੍ਬਯੋਗੇਪਿ ਏਸੇਵ ਨਯੋ. ਉਪਚ੍ਚਗਾਤਿ ਯੋ ਮਾਨੁਸਕਂ ਯੋਗਂ ਹਿਤ੍ਵਾ ਦਿਬ੍ਬਂ ਅਤਿਕ੍ਕਨ੍ਤੋ, ਤਂ ਸਬ੍ਬੇਹਿ ਚਤੂਹਿ ਯੋਗੇਹਿ ਵਿਸਂਯੁਤ੍ਤਂ ਅਹਂ ਬ੍ਰਾਹ੍ਮਣਂ ਵਦਾਮੀਤਿ ਅਤ੍ਥੋ.

੬੪੮. ਰਤਿਨ੍ਤਿ ਪਞ੍ਚਕਾਮਗੁਣਰਤਿਂ. ਅਰਤਿਨ੍ਤਿ ਅਰਞ੍ਞਵਾਸੇ ਉਕ੍ਕਣ੍ਠਿਤਤ੍ਤਂ. ਸੀਤਿਭੂਤਨ੍ਤਿ ਨਿਬ੍ਬੁਤਂ, ਨਿਰੁਪਧਿਨ੍ਤਿ ਨਿਰੁਪਕ੍ਕਿਲੇਸਂ, ਵੀਰਨ੍ਤਿ ਤਂ ਏਵਰੂਪਂ ਸਬ੍ਬਂ ਖਨ੍ਧਲੋਕਂ ਅਭਿਭਵਿਤ੍ਵਾ ਠਿਤਂ ਵੀਰਿਯਵਨ੍ਤਂ ਅਹਂ ਬ੍ਰਾਹ੍ਮਣਂ ਵਦਾਮੀਤਿ ਅਤ੍ਥੋ.

੬੪੯. ਯੋ ਵੇਦੀਤਿ ਯੋ ਸਤ੍ਤਾਨਂ ਸਬ੍ਬਾਕਾਰੇਨ ਚੁਤਿਞ੍ਚ ਪਟਿਸਨ੍ਧਿਞ੍ਚ ਪਾਕਟਂ ਕਤ੍ਵਾ ਜਾਨਾਤਿ, ਤਮਹਂ ਅਲਗ੍ਗਤਾਯ ਅਸਤ੍ਤਂ, ਪਟਿਪਤ੍ਤਿਯਾ ਸੁਟ੍ਠੁ ਗਤਤ੍ਤਾ ਸੁਗਤਂ, ਚਤੁਨ੍ਨਂ ਸਚ੍ਚਾਨਂ ਬੁਦ੍ਧਤਾਯ ਬੁਦ੍ਧਂ ਬ੍ਰਾਹ੍ਮਣਂ ਵਦਾਮੀਤਿ ਅਤ੍ਥੋ.

੬੫੦. ਯਸ੍ਸਾਤਿ ਯਸ੍ਸੇਤੇ ਦੇਵਾਦਯੋ ਗਤਿਂ ਨ ਜਾਨਨ੍ਤਿ, ਤਮਹਂ ਆਸਵਾਨਂ ਖੀਣਤਾਯ ਖੀਣਾਸਵਂ, ਕਿਲੇਸੇਹਿ ਆਰਕਤ੍ਤਾ ਅਰਹਨ੍ਤਂ ਬ੍ਰਾਹ੍ਮਣਂ ਵਦਾਮੀਤਿ ਅਤ੍ਥੋ.

੬੫੧. ਪੁਰੇਤਿ ਅਤੀਤਕ੍ਖਨ੍ਧੇਸੁ. ਪਚ੍ਛਾਤਿ ਅਨਾਗਤੇਸੁ. ਮਜ੍ਝੇਤਿ ਪਚ੍ਚੁਪ੍ਪਨ੍ਨੇਸੁ. ਕਿਞ੍ਚਨਨ੍ਤਿ ਯਸ੍ਸੇਤੇਸੁ ਠਾਨੇਸੁ ਤਣ੍ਹਾਗਾਹਸਙ੍ਖਾਤਂ ਕਿਞ੍ਚਨਂ ਨਤ੍ਥਿ. ਤਮਹਂ ਰਾਗਕਿਞ੍ਚਨਾਦੀਹਿ ਅਕਿਞ੍ਚਨਂ. ਕਸ੍ਸਚਿ ਗਹਣਸ੍ਸ ਅਭਾਵੇਨ ਅਨਾਦਾਨਂ ਬ੍ਰਾਹ੍ਮਣਂ ਵਦਾਮੀਤਿ ਅਤ੍ਥੋ.

੬੫੨. ਅਚ੍ਛਮ੍ਭਿਤਤ੍ਤੇਨ ਉਸਭਸਦਿਸਤਾਯ ਉਸਭਂ, ਉਤ੍ਤਮਟ੍ਠੇਨ ਪਵਰਂ, ਵੀਰਿਯਸਮ੍ਪਤ੍ਤਿਯਾ ਵੀਰਂ, ਮਹਨ੍ਤਾਨਂ ਸੀਲਕ੍ਖਨ੍ਧਾਦੀਨਂ ਏਸਿਤਤ੍ਤਾ ਮਹੇਸਿਂ, ਤਿਣ੍ਣਂ ਮਾਰਾਨਂ ਵਿਜਿਤਤ੍ਤਾ ਵਿਜਿਤਾਵਿਨਂ, ਨਿਨ੍ਹਾਤਕਿਲੇਸਤਾਯ ਨ੍ਹਾਤਕਂ, ਚਤੁਸਚ੍ਚਬੁਦ੍ਧਤਾਯ ਬੁਦ੍ਧਂ ਤਂ ਏਵਰੂਪਂ ਬ੍ਰਾਹ੍ਮਣਂ ਵਦਾਮੀਤਿ ਅਤ੍ਥੋ.

੬੫੩. ਯੋ ਪੁਬ੍ਬੇਨਿਵਾਸਂ ਪਾਕਟਂ ਕਤ੍ਵਾ ਜਾਨਾਤਿ, ਛਬ੍ਬੀਸਤਿਦੇਵਲੋਕਭੇਦਂ ਸਗ੍ਗਂ, ਚਤੁਬ੍ਬਿਧਂ ਅਪਾਯਞ੍ਚ ਦਿਬ੍ਬਚਕ੍ਖੁਨਾ ਪਸ੍ਸਤਿ, ਅਥੋ ਜਾਤਿਕ੍ਖਯਸਙ੍ਖਾਤਂ ਅਰਹਤ੍ਤਂ ਪਤ੍ਤੋ, ਤਮਹਂ ਬ੍ਰਾਹ੍ਮਣਂ ਵਦਾਮੀਤਿ ਅਤ੍ਥੋ.

੬੫੪. ਏਵਂ ਭਗਵਾ ਗੁਣਤੋ ਬ੍ਰਾਹ੍ਮਣਂ ਵਤ੍ਵਾ ‘‘ਯੇ ‘ਜਾਤਿਤੋ ਬ੍ਰਾਹ੍ਮਣੋ’ਤਿ ਅਭਿਨਿਵੇਸਂ ਕਰੋਨ੍ਤਿ, ਤੇ ਇਦਂ ਵੋਹਾਰਮਤ੍ਤਂ ਅਜਾਨਨ੍ਤਾ, ਸਾ ਚ ਨੇਸਂ ਦਿਟ੍ਠਿ ਦੁਦ੍ਦਿਟ੍ਠੀ’’ਤਿ ਦਸ੍ਸੇਨ੍ਤੋ ‘‘ਸਮਞ੍ਞਾ ਹੇਸਾ’’ਤਿ ਗਾਥਾਦ੍ਵਯਮਾਹ. ਤਸ੍ਸਤ੍ਥੋ – ‘‘ਯਦਿਦਂ ਬ੍ਰਾਹ੍ਮਣੋ ਖਤ੍ਤਿਯੋ ਭਾਰਦ੍ਵਾਜੋ ਵਾਸੇਟ੍ਠੋ’’ਤਿ ਨਾਮਗੋਤ੍ਤਂ ਪਕਪ੍ਪਿਤਂ, ਸਮਞ੍ਞਾ ਹੇਸਾ ਲੋਕਸ੍ਮਿਂ, ਪਞ੍ਞਤ੍ਤਿਵੋਹਾਰਮਤ੍ਤਨ੍ਤਿ ਵੇਦਿਤਬ੍ਬਂ. ਕਸ੍ਮਾ? ਯਸ੍ਮਾ ਸਮ੍ਮੁਚ੍ਚਾ ਸਮੁਦਾਗਤਂ ਸਮਨੁਞ੍ਞਾਯ ਆਗਤਂ. ਤਞ੍ਹਿ ਤਤ੍ਥ ਤਤ੍ਥ ਜਾਤਕਾਲੇਯੇਵਸ੍ਸ ਞਾਤਿਸਾਲੋਹਿਤੇਹਿ ਪਕਪ੍ਪਿਤਂ ਕਤਂ. ਨੋ ਚੇਤਂ ਏਵਂ ਪਕਪ੍ਪੇਯ੍ਯੁਂ, ਨ ਕੋਚਿ ਕਞ੍ਚਿ ਦਿਸ੍ਵਾ ‘‘ਅਯਂ ਬ੍ਰਾਹ੍ਮਣੋ’’ਤਿ ਵਾ ‘‘ਭਾਰਦ੍ਵਾਜੋ’’ਤਿ ਵਾ ਜਾਨੇਯ੍ਯ.

੬੫੫. ਏਵਂ ਪਕਪ੍ਪਿਤਞ੍ਚੇਤਂ ਦੀਘਰਤ੍ਤਮਨੁਸਯਿਤਂ ਦਿਟ੍ਠਿਗਤਮਜਾਨਤਂ, ‘‘ਪਕਪ੍ਪਿਤਂ ਨਾਮਗੋਤ੍ਤਂ, ਨਾਮਗੋਤ੍ਤਮਤ੍ਤਮੇਤਂ ਸਂਵੋਹਾਰਤ੍ਥਂ ਪਕਪ੍ਪਿਤ’’ਨ੍ਤਿ ਅਜਾਨਨ੍ਤਾਨਂ ਸਤ੍ਤਾਨਂ ਹਦਯੇ ਦੀਘਰਤ੍ਤਂ ਦਿਟ੍ਠਿਗਤਮਨੁਸਯਿਤਂ, ਤਸ੍ਸ ਅਨੁਸਯਿਤਤ੍ਤਾ ਤਂ ਨਾਮਗੋਤ੍ਤਂ ਅਜਾਨਨ੍ਤਾ ਤੇ ਪਬ੍ਰੁਵਨ੍ਤਿ ‘‘ਜਾਤਿਯਾ ਹੋਤਿ ਬ੍ਰਾਹ੍ਮਣੋ’’ਤਿ, ਅਜਾਨਨ੍ਤਾਯੇਵ ਏਵਂ ਵਦਨ੍ਤੀਤਿ ਵੁਤ੍ਤਂ ਹੋਤਿ.

੬੫੬-੭. ਏਵਂ ‘‘ਯੇ ‘ਜਾਤਿਤੋ ਬ੍ਰਾਹ੍ਮਣੋ’ਤਿ ਅਭਿਨਿਵੇਸਂ ਕਰੋਨ੍ਤਿ, ਤੇ ਇਦਂ ਵੋਹਾਰਮਤ੍ਤਮਜਾਨਨ੍ਤਾ, ਸਾ ਚ ਨੇਸਂ ਦਿਟ੍ਠਿ ਦੁਦ੍ਦਿਟ੍ਠੀ’’ਤਿ ਦਸ੍ਸੇਤ੍ਵਾ ਇਦਾਨਿ ਨਿਪ੍ਪਰਿਯਾਯਮੇਵ ਜਾਤਿਵਾਦਂ ਪਟਿਕ੍ਖਿਪਨ੍ਤੋ ਕਮ੍ਮਵਾਦਞ੍ਚ ਨਿਰੋਪੇਨ੍ਤੋ ‘‘ਨ ਜਚ੍ਚਾ’’ਤਿਆਦਿਮਾਹ. ਤਤ੍ਥ ‘‘ਕਮ੍ਮੁਨਾ ਬ੍ਰਾਹ੍ਮਣੋ ਹੋਤਿ, ਕਮ੍ਮੁਨਾ ਹੋਤਿ ਅਬ੍ਰਾਹ੍ਮਣੋ’’ਤਿ ਇਮਿਸ੍ਸਾ ਉਪਡ੍ਢਗਾਥਾਯ ਅਤ੍ਥਵਿਤ੍ਥਾਰਣਤ੍ਥਂ ‘‘ਕਸ੍ਸਕੋ ਕਮ੍ਮੁਨਾ’’ਤਿਆਦਿ ਵੁਤ੍ਤਂ. ਤਤ੍ਥ ਕਮ੍ਮੁਨਾਤਿ ਪਚ੍ਚੁਪ੍ਪਨ੍ਨੇਨ ਕਸਿਕਮ੍ਮਾਦਿਨਿਬ੍ਬਤ੍ਤਕਚੇਤਨਾਕਮ੍ਮੁਨਾ.

੬੫੯. ਪਟਿਚ੍ਚਸਮੁਪ੍ਪਾਦਦਸ੍ਸਾਤਿ ‘‘ਇਮਿਨਾ ਪਚ੍ਚਯੇਨ ਏਵਂ ਹੋਤੀ’’ਤਿ ਏਵਂ ਪਟਿਚ੍ਚਸਮੁਪ੍ਪਾਦਦਸ੍ਸਾਵਿਨੋ. ਕਮ੍ਮਵਿਪਾਕਕੋਵਿਦਾਤਿ ਸਮ੍ਮਾਨਾਵਮਾਨਾਰਹੇ ਕੁਲੇ ਕਮ੍ਮਵਸੇਨ ਉਪ੍ਪਤ੍ਤਿ ਹੋਤਿ, ਅਞ੍ਞਾਪਿ ਹੀਨਪਣੀਤਤਾ ਹੀਨਪਣੀਤੇ ਕਮ੍ਮੇ ਵਿਪਚ੍ਚਮਾਨੇ ਹੋਤੀਤਿ ਏਵਂ ਕਮ੍ਮਵਿਪਾਕਕੁਸਲਾ.

੬੬੦. ‘‘ਕਮ੍ਮੁਨਾਵਤ੍ਤਤੀ’’ਤਿ ਗਾਥਾਯ ਪਨ ‘‘ਲੋਕੋ’’ਤਿ ਵਾ ‘‘ਪਜਾ’’ਤਿ ਵਾ ‘‘ਸਤ੍ਤਾ’’ਤਿ ਵਾ ਏਕੋਯੇਵ ਅਤ੍ਥੋ, ਵਚਨਮਤ੍ਤਮੇਵ ਨਾਨਂ. ਪੁਰਿਮਪਦੇਨ ਚੇਤ੍ਥ ‘‘ਅਤ੍ਥਿ ਬ੍ਰਹ੍ਮਾ ਮਹਾਬ੍ਰਹ੍ਮਾ…ਪੇ… ਸੇਟ੍ਠੋ ਸਜਿਤਾ ਵਸੀ ਪਿਤਾ ਭੂਤਭਬ੍ਯਾਨ’’ਨ੍ਤਿ (ਦੀ. ਨਿ. ੧.੪੨) ਇਮਿਸ੍ਸਾ ਦਿਟ੍ਠਿਯਾ ਨਿਸੇਧੋ ਵੇਦਿਤਬ੍ਬੋ. ਕਮ੍ਮੁਨਾ ਹਿ ਵਤ੍ਤਤਿ ਤਾਸੁ ਤਾਸੁ ਗਤੀਸੁ ਉਪ੍ਪਜ੍ਜਤਿ ਲੋਕੋ, ਤਸ੍ਸ ਕੋ ਸਜਿਤਾਤਿ? ਦੁਤਿਯੇਨ ‘‘ਏਵਂ ਕਮ੍ਮੁਨਾ ਉਪ੍ਪਨ੍ਨੋਪਿ ਚ ਪਵਤ੍ਤਿਯਮ੍ਪਿ ਅਤੀਤਪਚ੍ਚੁਪ੍ਪਨ੍ਨਭੇਦੇਨ ਕਮ੍ਮੁਨਾ ਏਵ ਪਵਤ੍ਤਤਿ, ਸੁਖਦੁਕ੍ਖਾਨਿ ਪਚ੍ਚਨੁਭੋਨ੍ਤੋ ਹੀਨਪਣੀਤਾਦਿਭਾਵਂ ਆਪਜ੍ਜਨ੍ਤੋ ਪਵਤ੍ਤਤੀ’’ਤਿ ਦਸ੍ਸੇਤਿ. ਤਤਿਯੇਨ ਤਮੇਵਤ੍ਥਂ ਨਿਗਮੇਤਿ ‘‘ਏਵਂ ਸਬ੍ਬਥਾਪਿ ਕਮ੍ਮਨਿਬਨ੍ਧਨਾ ਸਤ੍ਤਾ ਕਮ੍ਮੇਨੇਵ ਬਦ੍ਧਾ ਹੁਤ੍ਵਾ ਪਵਤ੍ਤਨ੍ਤਿ, ਨ ਅਞ੍ਞਥਾ’’ਤਿ. ਚਤੁਤ੍ਥੇਨ ਤਮਤ੍ਥਂ ਉਪਮਾਯ ਵਿਭਾਵੇਤਿ ਰਥਸ੍ਸਾਣੀਵ ਯਾਯਤੋਤਿ. ਯਥਾ ਰਥਸ੍ਸ ਯਾਯਤੋ ਆਣਿ ਨਿਬਨ੍ਧਨਂ ਹੋਤਿ, ਨ ਤਾਯ ਅਨਿਬਦ੍ਧੋ ਯਾਤਿ, ਏਵਂ ਲੋਕਸ੍ਸ ਉਪ੍ਪਜ੍ਜਤੋ ਚ ਪਵਤ੍ਤਤੋ ਚ ਕਮ੍ਮਂ ਨਿਬਨ੍ਧਨਂ, ਨ ਤੇਨ ਅਨਿਬਦ੍ਧੋ ਉਪ੍ਪਜ੍ਜਤਿ ਨਪ੍ਪਵਤ੍ਤਤਿ.

੬੬੧. ਇਦਾਨਿ ਯਸ੍ਮਾ ਏਵਂ ਕਮ੍ਮਨਿਬਨ੍ਧਨੋ ਲੋਕੋ, ਤਸ੍ਮਾ ਸੇਟ੍ਠੇਨ ਕਮ੍ਮੁਨਾ ਸੇਟ੍ਠਭਾਵਂ ਦਸ੍ਸੇਨ੍ਤੋ ‘‘ਤਪੇਨਾ’’ਤਿ ਗਾਥਾਦ੍ਵਯਮਾਹ. ਤਤ੍ਥ ਤਪੇਨਾਤਿ ਇਨ੍ਦ੍ਰਿਯਸਂਵਰੇਨ. ਬ੍ਰਹ੍ਮਚਰਿਯੇਨਾਤਿ ਸਿਕ੍ਖਾਨਿਸ੍ਸਿਤੇਨ ਵੁਤ੍ਤਾਵਸੇਸਸੇਟ੍ਠਚਰਿਯੇਨ. ਸਂਯਮੇਨਾਤਿ ਸੀਲੇਨ. ਦਮੇਨਾਤਿ ਪਞ੍ਞਾਯ. ਏਤੇਨ ਸੇਟ੍ਠਟ੍ਠੇਨ ਬ੍ਰਹ੍ਮਭੂਤੇਨ ਕਮ੍ਮੁਨਾ ਬ੍ਰਾਹ੍ਮਣੋ ਹੋਤਿ. ਕਸ੍ਮਾ? ਯਸ੍ਮਾ ਏਤਂ ਬ੍ਰਾਹ੍ਮਣਮੁਤ੍ਤਮਂ, ਯਸ੍ਮਾ ਏਤਂ ਕਮ੍ਮਂ ਉਤ੍ਤਮੋ ਬ੍ਰਾਹ੍ਮਣਭਾਵੋਤਿ ਵੁਤ੍ਤਂ ਹੋਤਿ. ‘‘ਬ੍ਰਹ੍ਮਾਨ’’ਨ੍ਤਿਪਿ ਪਾਠੋ, ਤਸ੍ਸਤ੍ਥੋ – ਬ੍ਰਹ੍ਮਂ ਆਨੇਤੀਤਿ ਬ੍ਰਹ੍ਮਾਨਂ, ਬ੍ਰਹ੍ਮਭਾਵਂ ਆਨੇਤਿ ਆਵਹਤਿ ਦੇਤੀਤਿ ਵੁਤ੍ਤਂ ਹੋਤਿ.

੬੬੨. ਦੁਤਿਯਗਾਥਾਯ ਸਨ੍ਤੋਤਿ ਸਨ੍ਤਕਿਲੇਸੋ. ਬ੍ਰਹ੍ਮਾ ਸਕ੍ਕੋਤਿ ਬ੍ਰਹ੍ਮਾ ਚ ਸਕ੍ਕੋ ਚ. ਯੋ ਏਵਰੂਪੋ, ਸੋ ਨ ਕੇਵਲਂ ਬ੍ਰਾਹ੍ਮਣੋ, ਅਪਿਚ ਖੋ ਬ੍ਰਹ੍ਮਾ ਚ ਸਕ੍ਕੋ ਚ ਸੋ ਵਿਜਾਨਤਂ ਪਣ੍ਡਿਤਾਨਂ, ਏਵਂ ਵਾਸੇਟ੍ਠ ਜਾਨਾਹੀਤਿ ਵੁਤ੍ਤਂ ਹੋਤਿ. ਸੇਸਂ ਵੁਤ੍ਤਨਯਮੇਵਾਤਿ.

ਪਰਮਤ੍ਥਜੋਤਿਕਾਯ ਖੁਦ੍ਦਕ-ਅਟ੍ਠਕਥਾਯ

ਸੁਤ੍ਤਨਿਪਾਤ-ਅਟ੍ਠਕਥਾਯ ਵਾਸੇਟ੍ਠਸੁਤ੍ਤਵਣ੍ਣਨਾ ਨਿਟ੍ਠਿਤਾ.