੧੦. ਕੋਕਾਲਿਕਸੁਤ੍ਤਵਣ੍ਣਨਾ

ਏਵਂ ਮੇ ਸੁਤਨ੍ਤਿ ਕੋਕਾਲਿਕਸੁਤ੍ਤਂ. ਕਾ ਉਪ੍ਪਤ੍ਤਿ? ਇਮਸ੍ਸ ਸੁਤ੍ਤਸ੍ਸ ਉਪ੍ਪਤ੍ਤਿ ਅਤ੍ਥਵਣ੍ਣਨਾਯਮੇਵ ਆਵਿ ਭਵਿਸ੍ਸਤਿ. ਅਤ੍ਥਵਣ੍ਣਨਾਯ ਚਸ੍ਸ ਏਵਂ ਮੇ ਸੁਤਨ੍ਤਿਆਦਿ ਵੁਤ੍ਤਨਯਮੇਵ. ਅਥ ਖੋ ਕੋਕਾਲਿਕੋਤਿ ਏਤ੍ਥ ਪਨ ਕੋ ਅਯਂ ਕੋਕਾਲਿਕੋ, ਕਸ੍ਮਾ ਚ ਉਪਸਙ੍ਕਮੀਤਿ? ਵੁਚ੍ਚਤੇ – ਅਯਂ ਕਿਰ ਕੋਕਾਲਿਕਰਟ੍ਠੇ ਕੋਕਾਲਿਕਨਗਰੇ ਕੋਕਾਲਿਕਸੇਟ੍ਠਿਸ੍ਸ ਪੁਤ੍ਤੋ ਪਬ੍ਬਜਿਤ੍ਵਾ ਪਿਤਰਾ ਕਾਰਾਪਿਤੇ ਵਿਹਾਰੇਯੇਵ ਪਟਿਵਸਤਿ ‘‘ਚੂਲ਼ਕੋਕਾਲਿਕੋ’’ਤਿ ਨਾਮੇਨ, ਨ ਦੇਵਦਤ੍ਤਸ੍ਸ ਸਿਸ੍ਸੋ. ਸੋ ਹਿ ਬ੍ਰਾਹ੍ਮਣਪੁਤ੍ਤੋ ‘‘ਮਹਾਕੋਕਾਲਿਕੋ’’ਤਿ ਪਞ੍ਞਾਯਿ.

ਭਗਵਤਿ ਕਿਰ ਸਾਵਤ੍ਥਿਯਂ ਵਿਹਰਨ੍ਤੇ ਦ੍ਵੇ ਅਗ੍ਗਸਾਵਕਾ ਪਞ੍ਚਮਤ੍ਤੇਹਿ ਭਿਕ੍ਖੁਸਤੇਹਿ ਸਦ੍ਧਿਂ ਜਨਪਦਚਾਰਿਕਂ ਚਰਮਾਨਾ ਉਪਕਟ੍ਠਾਯ ਵਸ੍ਸੂਪਨਾਯਿਕਾਯ ਵਿਵੇਕਵਾਸਂ ਵਸਿਤੁਕਾਮਾ ਤੇ ਭਿਕ੍ਖੂ ਉਯ੍ਯੋਜੇਤ੍ਵਾ ਅਤ੍ਤਨੋ ਪਤ੍ਤਚੀਵਰਮਾਦਾਯ ਤਸ੍ਮਿਂ ਜਨਪਦੇ ਤਂ ਨਗਰਂ ਪਤ੍ਵਾ ਤਂ ਵਿਹਾਰਂ ਅਗਮਂਸੁ. ਤਤ੍ਥ ਤੇ ਕੋਕਾਲਿਕੇਨ ਸਦ੍ਧਿਂ ਸਮ੍ਮੋਦਿਤ੍ਵਾ ਤਂ ਆਹਂਸੁ – ‘‘ਆਵੁਸੋ, ਮਯਂ ਇਧ ਤੇਮਾਸਂ ਵਸਿਸ੍ਸਾਮ, ਮਾ ਕਸ੍ਸਚਿ ਆਰੋਚੇਯ੍ਯਾਸੀ’’ਤਿ. ਸੋ ‘‘ਸਾਧੂ’’ਤਿ ਪਟਿਸ੍ਸੁਣਿਤ੍ਵਾ ਤੇਮਾਸੇ ਅਤੀਤੇ ਇਤਰਦਿਵਸਂ ਪਗੇਵ ਨਗਰਂ ਪਵਿਸਿਤ੍ਵਾ ਆਰੋਚੇਸਿ – ‘‘ਤੁਮ੍ਹੇ ਅਗ੍ਗਸਾਵਕੇ ਇਧਾਗਨ੍ਤ੍ਵਾ ਵਸਮਾਨੇ ਨ ਜਾਨਿਤ੍ਥ, ਨ ਤੇ ਕੋਚਿ ਪਚ੍ਚਯੇਨਾਪਿ ਨਿਮਨ੍ਤੇਤੀ’’ਤਿ. ਨਗਰਵਾਸਿਨੋ ‘‘ਕਸ੍ਮਾ ਨੋ, ਭਨ੍ਤੇ, ਨਾਰੋਚਯਿਤ੍ਥਾ’’ਤਿ. ਕਿਂ ਆਰੋਚਿਤੇਨ, ਕਿਂ ਨਾਦ੍ਦਸਥ ਦ੍ਵੇ ਭਿਕ੍ਖੂ ਵਸਨ੍ਤੇ, ਨਨੁ ਏਤੇ ਅਗ੍ਗਸਾਵਕਾਤਿ. ਤੇ ਖਿਪ੍ਪਂ ਸਨ੍ਨਿਪਤਿਤ੍ਵਾ ਸਪ੍ਪਿਗੁਲ਼ਵਤ੍ਥਾਦੀਨਿ ਆਨੇਤ੍ਵਾ ਕੋਕਾਲਿਕਸ੍ਸ ਪੁਰਤੋ ਨਿਕ੍ਖਿਪਿਂਸੁ. ਸੋ ਚਿਨ੍ਤੇਸਿ – ‘‘ਪਰਮਪ੍ਪਿਚ੍ਛਾ ਅਗ੍ਗਸਾਵਕਾ ‘ਪਯੁਤ੍ਤਵਾਚਾਯ ਉਪ੍ਪਨ੍ਨੋ ਲਾਭੋ’ਤਿ ਞਤ੍ਵਾ ਨ ਸਾਦਿਯਿਸ੍ਸਨ੍ਤਿ, ਅਸਾਦਿਯਨ੍ਤਾ ਅਦ੍ਧਾ ‘ਆਵਾਸਿਕਸ੍ਸ ਦੇਥਾ’ਤਿ ਭਣਿਸ੍ਸਨ੍ਤਿ, ਹਨ੍ਦਾਹਂ ਇਮਂ ਲਾਭਂ ਗਾਹਾਪੇਤ੍ਵਾ ਗਚ੍ਛਾਮੀ’’ਤਿ. ਸੋ ਤਥਾ ਅਕਾਸਿ, ਥੇਰਾ ਦਿਸ੍ਵਾਵ ਪਯੁਤ੍ਤਵਾਚਾਯ ਉਪ੍ਪਨ੍ਨਭਾਵਂ ਞਤ੍ਵਾ ‘‘ਇਮੇ ਪਚ੍ਚਯਾ ਨੇਵ ਅਮ੍ਹਾਕਂ ਨ ਕੋਕਾਲਿਕਸ੍ਸ ਵਟ੍ਟਨ੍ਤੀ’’ਤਿ ਚਿਨ੍ਤੇਤ੍ਵਾ ‘‘ਆਵਾਸਿਕਸ੍ਸ ਦੇਥਾ’’ਤਿ ਅਵਤ੍ਵਾ ਪਟਿਕ੍ਖਿਪਿਤ੍ਵਾ ਪਕ੍ਕਮਿਂਸੁ. ਤੇਨ ਕੋਕਾਲਿਕੋ ‘‘ਕਥਞ੍ਹਿ ਨਾਮ ਅਤ੍ਤਨਾ ਅਗ੍ਗਣ੍ਹਨ੍ਤਾ ਮਯ੍ਹਮ੍ਪਿ ਨ ਦਾਪੇਸੁ’’ਨ੍ਤਿ ਦੋਮਨਸ੍ਸਂ ਉਪ੍ਪਾਦੇਸਿ.

ਤੇ ਭਗਵਤੋ ਸਨ੍ਤਿਕਂ ਅਗਮਂਸੁ. ਭਗਵਾ ਚ ਪਵਾਰੇਤ੍ਵਾ ਸਚੇ ਅਤ੍ਤਨਾ ਜਨਪਦਚਾਰਿਕਂ ਨ ਗਚ੍ਛਤਿ, ਅਗ੍ਗਸਾਵਕੇ ਪੇਸੇਤਿ – ‘‘ਚਰਥ, ਭਿਕ੍ਖਵੇ, ਚਾਰਿਕਂ ਬਹੁਜਨਹਿਤਾਯਾ’’ਤਿਆਦੀਨਿ (ਮਹਾਵ. ੩੨) ਵਤ੍ਵਾ. ਇਦਮਾਚਿਣ੍ਣਂ ਤਥਾਗਤਾਨਂ. ਤੇਨ ਖੋ ਪਨ ਸਮਯੇਨ ਅਤ੍ਤਨਾ ਅਗਨ੍ਤੁਕਾਮੋ ਹੋਤਿ. ਅਥ ਖੋ ਇਮੇ ਪੁਨਦੇਵ ਉਯ੍ਯੋਜੇਸਿ – ‘‘ਗਚ੍ਛਥ, ਭਿਕ੍ਖਵੇ, ਚਰਥ ਚਾਰਿਕ’’ਨ੍ਤਿ. ਤੇ ਪਞ੍ਚਮਤ੍ਤੇਹਿ ਭਿਕ੍ਖੁਸਤੇਹਿ ਸਦ੍ਧਿਂ ਚਾਰਿਕਂ ਚਰਮਾਨਾ ਅਨੁਪੁਬ੍ਬੇਨ ਤਸ੍ਮਿਂ ਰਟ੍ਠੇ ਤਮੇਵ ਨਗਰਂ ਅਗਮਂਸੁ. ਨਾਗਰਾ ਥੇਰੇ ਸਞ੍ਜਾਨਿਤ੍ਵਾ ਸਹ ਪਰਿਕ੍ਖਾਰੇਹਿ ਦਾਨਂ ਸਜ੍ਜੇਤ੍ਵਾ ਨਗਰਮਜ੍ਝੇ ਮਣ੍ਡਪਂ ਕਤ੍ਵਾ ਦਾਨਂ ਅਦਂਸੁ, ਥੇਰਾਨਞ੍ਚ ਪਰਿਕ੍ਖਾਰੇ ਉਪਨਾਮੇਸੁਂ. ਥੇਰਾ ਗਹੇਤ੍ਵਾ ਭਿਕ੍ਖੁਸਙ੍ਘਸ੍ਸ ਅਦਂਸੁ. ਤਂ ਦਿਸ੍ਵਾ ਕੋਕਾਲਿਕੋ ਚਿਨ੍ਤੇਸਿ – ‘‘ਇਮੇ ਪੁਬ੍ਬੇ ਅਪ੍ਪਿਚ੍ਛਾ ਅਹੇਸੁਂ, ਇਦਾਨਿ ਲੋਭਾਭਿਭੂਤਾ ਪਾਪਿਚ੍ਛਾ ਜਾਤਾ, ਪੁਬ੍ਬੇਪਿ ਅਪ੍ਪਿਚ੍ਛਸਨ੍ਤੁਟ੍ਠਪਵਿਵਿਤ੍ਤਸਦਿਸਾ ਮਞ੍ਞੇ, ਇਮੇ ਪਾਪਿਚ੍ਛਾ ਅਸਨ੍ਤਗੁਣਪਰਿਦੀਪਕਾ ਪਾਪਭਿਕ੍ਖੂ’’ਤਿ. ਸੋ ਥੇਰੇ ਉਪਸਙ੍ਕਮਿਤ੍ਵਾ ‘‘ਆਵੁਸੋ, ਤੁਮ੍ਹੇ ਪੁਬ੍ਬੇ ਅਪ੍ਪਿਚ੍ਛਾ ਸਨ੍ਤੁਟ੍ਠਾ ਪਵਿਵਿਤ੍ਤਾ ਵਿਯ ਅਹੁਵਤ੍ਥ, ਇਦਾਨਿ ਪਨਤ੍ਥ ਪਾਪਭਿਕ੍ਖੂ ਜਾਤਾ’’ਤਿ ਵਤ੍ਵਾ ਪਤ੍ਤਚੀਵਰਮਾਦਾਯ ਤਾਵਦੇਵ ਤਰਮਾਨਰੂਪੋ ਨਿਕ੍ਖਮਿਤ੍ਵਾ ਗਨ੍ਤ੍ਵਾ ‘‘ਭਗਵਤੋ ਏਤਮਤ੍ਥਂ ਆਰੋਚੇਸ੍ਸਾਮੀ’’ਤਿ ਸਾਵਤ੍ਥਾਭਿਮੁਖੋ ਗਨ੍ਤ੍ਵਾ ਅਨੁਪੁਬ੍ਬੇਨ ਭਗਵਨ੍ਤਂ ਉਪਸਙ੍ਕਮਿ. ਅਯਮੇਤ੍ਥ ਕੋਕਾਲਿਕੋ, ਇਮਿਨਾ ਕਾਰਣੇਨ ਉਪਸਙ੍ਕਮਿ. ਤੇਨ ਵੁਤ੍ਤਂ ‘‘ਅਥ ਖੋ ਕੋਕਾਲਿਕੋ ਭਿਕ੍ਖੁ ਯੇਨ ਭਗਵਾ ਤੇਨੁਪਸਙ੍ਕਮੀ’’ਤਿਆਦਿ.

ਭਗਵਾ ਤਂ ਤੁਰਿਤਤੁਰਿਤਂ ਆਗਚ੍ਛਨ੍ਤਂ ਦਿਸ੍ਵਾਵ ਆਵਜ੍ਜੇਤ੍ਵਾ ਅਞ੍ਞਾਸਿ – ‘‘ਅਗ੍ਗਸਾਵਕੇ ਅਕ੍ਕੋਸਿਤੁਕਾਮੋ ਆਗਤੋ’’ਤਿ. ‘‘ਸਕ੍ਕਾ ਨੁ ਖੋ ਪਟਿਸੇਧੇਤੁ’’ਨ੍ਤਿ ਚ ਆਵਜ੍ਜੇਨ੍ਤੋ ‘‘ਨ ਸਕ੍ਕਾ, ਥੇਰੇਸੁ ਅਪਰਜ੍ਝਿਤ੍ਵਾ ਆਗਤੋ, ਏਕਂਸੇਨ ਪਦੁਮਨਿਰਯੇ ਉਪ੍ਪਜ੍ਜਿਸ੍ਸਤੀ’’ਤਿ ਅਦ੍ਦਸ. ਏਵਂ ਦਿਸ੍ਵਾਪਿ ਪਨ ‘‘ਸਾਰਿਪੁਤ੍ਤਮੋਗ੍ਗਲ੍ਲਾਨੇਪਿ ਨਾਮ ਗਰਹਨ੍ਤਂ ਸੁਤ੍ਵਾ ਨ ਨਿਸੇਧੇਤੀ’’ਤਿ ਪਰੂਪਵਾਦਮੋਚਨਤ੍ਥਂ ਅਰਿਯੂਪਵਾਦਸ੍ਸ ਮਹਾਸਾਵਜ੍ਜਭਾਵਦਸ੍ਸਨਤ੍ਥਞ੍ਚ ‘‘ਮਾ ਹੇਵ’’ਨ੍ਤਿਆਦਿਨਾ ਨਯੇਨ ਤਿਕ੍ਖਤ੍ਤੁਂ ਪਟਿਸੇਧੇਸਿ. ਤਤ੍ਥ ਮਾ ਹੇਵਨ੍ਤਿ ਮਾ ਏਵਮਾਹ, ਮਾ ਏਵਂ ਅਭਣੀਤਿ ਅਤ੍ਥੋ. ਪੇਸਲਾਤਿ ਪਿਯਸੀਲਾ. ਸਦ੍ਧਾਯਿਕੋਤਿ ਸਦ੍ਧਾਗਮਕਰੋ, ਪਸਾਦਾਵਹੋਤਿ ਵੁਤ੍ਤਂ ਹੋਤਿ. ਪਚ੍ਚਯਿਕੋਤਿ ਪਚ੍ਚਯਕਰੋ, ‘‘ਏਵਮੇਤ’’ਨ੍ਤਿ ਸਨ੍ਨਿਟ੍ਠਾਵਹੋਤਿ ਵੁਤ੍ਤਂ ਹੋਤਿ.

ਅਚਿਰਪਕ੍ਕਨ੍ਤਸ੍ਸਾਤਿ ਪਕ੍ਕਨ੍ਤਸ੍ਸ ਸਤੋ ਨ ਚਿਰੇਨੇਵ ਸਬ੍ਬੋ ਕਾਯੋ ਫੁਟੋ ਅਹੋਸੀਤਿ ਕੇਸਗ੍ਗਮਤ੍ਤਮ੍ਪਿ ਓਕਾਸਂ ਅਵਜ੍ਜੇਤ੍ਵਾ ਸਕਲਸਰੀਰਂ ਅਟ੍ਠੀਨਿ ਭਿਨ੍ਦਿਤ੍ਵਾ ਉਗ੍ਗਤਾਹਿ ਪੀਲ਼ਕਾਹਿ ਅਜ੍ਝੋਤ੍ਥਟਂ ਅਹੋਸਿ. ਤਤ੍ਥ ਯਸ੍ਮਾ ਬੁਦ੍ਧਾਨੁਭਾਵੇਨ ਤਥਾਰੂਪਂ ਕਮ੍ਮਂ ਬੁਦ੍ਧਾਨਂ ਸਮ੍ਮੁਖੀਭਾਵੇ ਵਿਪਾਕਂ ਨ ਦੇਤਿ, ਦਸ੍ਸਨੂਪਚਾਰੇ ਪਨ ਵਿਜਹਿਤਮਤ੍ਤੇ ਦੇਤਿ, ਤਸ੍ਮਾ ਤਸ੍ਸ ਅਚਿਰਪਕ੍ਕਨ੍ਤਸ੍ਸ ਪੀਲ਼ਕਾ ਉਟ੍ਠਹਿਂਸੁ. ਤੇਨੇਵ ਵੁਤ੍ਤਂ ‘‘ਅਚਿਰਪਕ੍ਕਨ੍ਤਸ੍ਸ ਚ ਕੋਕਾਲਿਕਸ੍ਸਾ’’ਤਿ. ਅਥ ਕਸ੍ਮਾ ਤਤ੍ਥੇਵ ਨ ਅਟ੍ਠਾਸੀਤਿ ਚੇ? ਕਮ੍ਮਾਨੁਭਾਵੇਨ. ਓਕਾਸਕਤਞ੍ਹਿ ਕਮ੍ਮਂ ਅਵਸ੍ਸਂ ਵਿਪਚ੍ਚਤਿ, ਤਂ ਤਸ੍ਸ ਤਤ੍ਥ ਠਾਤੁਂ ਨ ਦੇਤਿ. ਸੋ ਕਮ੍ਮਾਨੁਭਾਵੇਨ ਚੋਦਿਯਮਾਨੋ ਉਟ੍ਠਾਯਾਸਨਾ ਪਕ੍ਕਾਮਿ. ਕਲ਼ਾਯਮਤ੍ਤਿਯੋਤਿ ਚਣਕਮਤ੍ਤਿਯੋ. ਬੇਲੁਵਸਲਾਟੁਕਮਤ੍ਤਿਯੋਤਿ ਤਰੁਣਬੇਲੁਵਮਤ੍ਤਿਯੋ. ਪਭਿਜ੍ਜਿਂਸੂਤਿ ਭਿਜ੍ਜਿਂਸੁ. ਤਾਸੁ ਭਿਨ੍ਨਾਸੁ ਸਕਲਸਰੀਰਂ ਪਨਸਪਕ੍ਕਂ ਵਿਯ ਅਹੋਸਿ. ਸੋ ਪਕ੍ਕੇਨ ਗਤ੍ਤੇਨ ਅਨਯਬ੍ਯਸਨਂ ਪਤ੍ਵਾ ਦੁਕ੍ਖਾਭਿਭੂਤੋ ਜੇਤਵਨਦ੍ਵਾਰਕੋਟ੍ਠਕੇ ਸਯਿ. ਅਥ ਧਮ੍ਮਸ੍ਸਵਨਤ੍ਥਂ ਆਗਤਾਗਤਾ ਮਨੁਸ੍ਸਾ ਤਂ ਦਿਸ੍ਵਾ ‘‘ਧਿ ਕੋਕਾਲਿਕ, ਧਿ ਕੋਕਾਲਿਕ, ਅਯੁਤ੍ਤਮਕਾਸਿ, ਅਤ੍ਤਨੋਯੇਵ ਮੁਖਂ ਨਿਸ੍ਸਾਯ ਅਨਯਬ੍ਯਸਨਂ ਪਤ੍ਤੋਸੀ’’ਤਿ ਆਹਂਸੁ. ਤੇਸਂ ਸੁਤ੍ਵਾ ਆਰਕ੍ਖਦੇਵਤਾ ਧਿਕ੍ਕਾਰਂ ਅਕਂਸੁ, ਆਰਕ੍ਖਦੇਵਤਾਨਂ ਆਕਾਸਟ੍ਠਦੇਵਤਾਤਿ ਇਮਿਨਾ ਉਪਾਯੇਨ ਯਾਵ ਅਕਨਿਟ੍ਠਭਵਨਾ ਏਕਧਿਕ੍ਕਾਰੋ ਉਦਪਾਦਿ.

ਤਦਾ ਚ ਤੁਰੂ ਨਾਮ ਭਿਕ੍ਖੁ ਕੋਕਾਲਿਕਸ੍ਸ ਉਪਜ੍ਝਾਯੋ ਅਨਾਗਾਮਿਫਲਂ ਪਤ੍ਵਾ ਸੁਦ੍ਧਾਵਾਸੇਸੁ ਨਿਬ੍ਬਤ੍ਤੋ ਹੋਤਿ. ਸੋਪਿ ਸਮਾਪਤ੍ਤਿਯਾ ਵੁਟ੍ਠਿਤੋ ਤਂ ਧਿਕ੍ਕਾਰਂ ਸੁਤ੍ਵਾ ਆਗਮ੍ਮ ਕੋਕਾਲਿਕਂ ਓਵਦਿ ਸਾਰਿਪੁਤ੍ਤਮੋਗ੍ਗਲ੍ਲਾਨੇਸੁ ਚਿਤ੍ਤਪ੍ਪਸਾਦਜਨਨਤ੍ਥਂ. ਸੋ ਤਸ੍ਸਾਪਿ ਵਚਨਂ ਅਗ੍ਗਹੇਤ੍ਵਾ ਅਞ੍ਞਦਤ੍ਥੁ ਤਮੇਵ ਅਪਰਾਧੇਤ੍ਵਾ ਕਾਲਂ ਕਤ੍ਵਾ ਪਦੁਮਨਿਰਯੇ ਉਪ੍ਪਜ੍ਜਿ. ਤੇਨਾਹ – ‘‘ਅਥ ਖੋ ਕੋਕਾਲਿਕੋ ਭਿਕ੍ਖੁ ਤੇਨੇਵਾਬਾਧੇਨ…ਪੇ… ਆਘਾਤੇਤ੍ਵਾ’’ਤਿ.

ਅਥ ਖੋ ਬ੍ਰਹ੍ਮਾ ਸਹਮ੍ਪਤੀਤਿ ਕੋ ਅਯਂ ਬ੍ਰਹ੍ਮਾ, ਕਸ੍ਮਾ ਚ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਏਤਦਵੋਚਾਤਿ? ਅਯਂ ਕਸ੍ਸਪਸ੍ਸ ਭਗਵਤੋ ਸਾਸਨੇ ਸਹਕੋ ਨਾਮ ਭਿਕ੍ਖੁ ਅਨਾਗਾਮੀ ਹੁਤ੍ਵਾ ਸੁਦ੍ਧਾਵਾਸੇਸੁ ਉਪ੍ਪਨ੍ਨੋ, ਤਤ੍ਥ ਨਂ ‘‘ਸਹਮ੍ਪਤਿ ਬ੍ਰਹ੍ਮਾ’’ਤਿ ਸਞ੍ਜਾਨਨ੍ਤਿ. ਸੋ ਪਨ ‘‘ਅਹਂ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਪਦੁਮਨਿਰਯਂ ਕਿਤ੍ਤੇਸ੍ਸਾਮਿ, ਤਤੋ ਭਗਵਾ ਭਿਕ੍ਖੂਨਂ ਆਰੋਚੇਸ੍ਸਤਿ. ਕਥਾਨੁਸਨ੍ਧਿਕੁਸਲਾ ਭਿਕ੍ਖੂ ਤਤ੍ਥਾਯੁਪ੍ਪਮਾਣਂ ਪੁਚ੍ਛਿਸ੍ਸਨ੍ਤਿ, ਭਗਵਾ ਆਚਿਕ੍ਖਨ੍ਤੋ ਅਰਿਯੂਪਵਾਦੇ ਆਦੀਨਵਂ ਪਕਾਸੇਸ੍ਸਤੀ’’ਤਿ ਇਮਿਨਾ ਕਾਰਣੇਨ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਏਤਦਵੋਚ. ਭਗਵਾ ਤਥੇਵ ਅਕਾਸਿ, ਅਞ੍ਞਤਰੋਪਿ ਭਿਕ੍ਖੁ ਪੁਚ੍ਛਿ. ਤੇਨ ਚ ਪੁਟ੍ਠੋ ‘‘ਸੇਯ੍ਯਥਾਪਿ ਭਿਕ੍ਖੂ’’ਤਿਆਦਿਮਾਹ.

ਤਤ੍ਥ ਵੀਸਤਿਖਾਰਿਕੋਤਿ ਮਾਗਧਕੇਨ ਪਤ੍ਥੇਨ ਚਤ੍ਤਾਰੋ ਪਤ੍ਥਾ ਕੋਸਲਰਟ੍ਠੇ ਏਕੋ ਪਤ੍ਥੋ ਹੋਤਿ, ਤੇਨ ਪਤ੍ਥੇਨ ਚਤ੍ਤਾਰੋ ਪਤ੍ਥਾ ਆਲ਼੍ਹਕਂ, ਚਤ੍ਤਾਰਿ ਆਲ਼੍ਹਕਾਨਿ ਦੋਣਂ, ਚਤੁਦੋਣਾ ਮਾਨਿਕਾ, ਚਤੁਮਾਨਿਕਾ ਖਾਰੀ, ਤਾਯ ਖਾਰਿਯਾ ਵੀਸਤਿਖਾਰਿਕੋ. ਤਿਲਵਾਹੋਤਿ ਤਿਲਸਕਟਂ. ਅਬ੍ਬੁਦੋ ਨਿਰਯੋਤਿ ਅਬ੍ਬੁਦੋ ਨਾਮ ਕੋਚਿ ਪਚ੍ਚੇਕਨਿਰਯੋ ਨਤ੍ਥਿ, ਅਵੀਚਿਮ੍ਹਿਯੇਵ ਅਬ੍ਬੁਦਗਣਨਾਯ ਪਚ੍ਚਨੋਕਾਸੋ ਪਨ ‘‘ਅਬ੍ਬੁਦੋ ਨਿਰਯੋ’’ਤਿ ਵੁਤ੍ਤੋ. ਏਸ ਨਯੋ ਨਿਰਬ੍ਬੁਦਾਦੀਸੁ.

ਤਤ੍ਥ ਵਸ੍ਸਗਣਨਾਪਿ ਏਵਂ ਵੇਦਿਤਬ੍ਬਾ – ਯਥੇਵ ਹਿ ਸਤਂ ਸਤਸਹਸ੍ਸਾਨਿ ਕੋਟਿ ਹੋਤਿ, ਏਵਂ ਸਤਂ ਸਤਸਹਸ੍ਸਕੋਟਿਯੋ ਪਕੋਟਿ ਨਾਮ ਹੋਤਿ, ਸਤਂ ਸਤਸਹਸ੍ਸਪਕੋਟਿਯੋ ਕੋਟਿਪ੍ਪਕੋਟਿ ਨਾਮ, ਸਤਂ ਸਤਸਹਸ੍ਸਕੋਟਿਪ੍ਪਕੋਟਿਯੋ ਨਹੁਤਂ, ਸਤਂ ਸਤਸਹਸ੍ਸਨਹੁਤਾਨਿ ਨਿਨ੍ਨਹੁਤਂ, ਸਤਂ ਸਤਸਹਸ੍ਸਨਿਨ੍ਨਹੁਤਾਨਿ ਏਕਂ ਅਬ੍ਬੁਦਂ, ਤਤੋ ਵੀਸਤਿਗੁਣਂ ਨਿਰਬ੍ਬੁਦਂ. ਏਸ ਨਯੋ ਸਬ੍ਬਤ੍ਥ. ਕੇਚਿ ਪਨ ‘‘ਤਤ੍ਥ ਤਤ੍ਥ ਪਰਿਦੇਵਨਾਨਤ੍ਤੇਨਪਿ ਕਮ੍ਮਕਰਣਨਾਨਤ੍ਤੇਨਪਿ ਇਮਾਨਿ ਨਾਮਾਨਿ ਲਦ੍ਧਾਨੀ’’ਤਿ ਵਦਨ੍ਤਿ, ਅਪਰੇ ‘‘ਸੀਤਨਰਕਾ ਏਵ ਏਤੇ’’ਤਿ.

ਅਥਾਪਰਨ੍ਤਿ ਤਦਤ੍ਥਵਿਸੇਸਤ੍ਥਦੀਪਕਂ ਗਾਥਾਬਨ੍ਧਂ ਸਨ੍ਧਾਯ ਵੁਤ੍ਤਂ. ਪਾਠਵਸੇਨ ਵੁਤ੍ਤਵੀਸਤਿਗਾਥਾਸੁ ਹਿ ਏਤ੍ਥ ‘‘ਸਤਂ ਸਹਸ੍ਸਾਨ’’ਨ੍ਤਿ ਅਯਮੇਕਾ ਏਵ ਗਾਥਾ ਵੁਤ੍ਤਤ੍ਥਦੀਪਿਕਾ, ਸੇਸਾ ਵਿਸੇਸਤ੍ਥਦੀਪਿਕਾ ਏਵ, ਅਵਸਾਨੇ ਗਾਥਾਦ੍ਵਯਮੇਵ ਪਨ ਮਹਾਅਟ੍ਠਕਥਾਯਂ ਵਿਨਿਚ੍ਛਿਤਪਾਠੇ ਨਤ੍ਥਿ. ਤੇਨਾਵੋਚੁਮ੍ਹ ‘‘ਵੀਸਤਿਗਾਥਾਸੂ’’ਤਿ.

੬੬੩. ਤਤ੍ਥ ਕੁਠਾਰੀਤਿ ਅਤ੍ਤਚ੍ਛੇਦਕਟ੍ਠੇਨ ਕੁਠਾਰਿਸਦਿਸਾ ਫਰੁਸਵਾਚਾ. ਛਿਨ੍ਦਤੀਤਿ ਕੁਸਲਮੂਲਸਙ੍ਖਾਤਂ ਅਤ੍ਤਨੋ ਮੂਲਂਯੇਵ ਨਿਕਨ੍ਤਤਿ.

੬੬੪. ਨਿਨ੍ਦਿਯਨ੍ਤਿ ਨਿਨ੍ਦਿਤਬ੍ਬਂ. ਤਂ ਵਾ ਨਿਨ੍ਦਤਿ ਯੋ ਪਸਂਸਿਯੋਤਿ ਯੋ ਉਤ੍ਤਮਟ੍ਠੇਨ ਪਸਂਸਾਰਹੋ ਪੁਗ੍ਗਲੋ, ਤਂ ਵਾ ਸੋ ਪਾਪਿਚ੍ਛਤਾਦੀਨਿ ਆਰੋਪੇਤ੍ਵਾ ਗਰਹਤਿ. ਵਿਚਿਨਾਤੀਤਿ ਉਪਚਿਨਾਤਿ. ਕਲਿਨ੍ਤਿ ਅਪਰਾਧਂ.

੬੬੫. ਅਯਂ ਕਲੀਤਿ ਅਯਂ ਅਪਰਾਧੋ. ਅਕ੍ਖੇਸੂਤਿ ਜੂਤਕੀਲ਼ਨਅਕ੍ਖੇਸੁ. ਸਬ੍ਬਸ੍ਸਾਪਿ ਸਹਾਪਿ ਅਤ੍ਤਨਾਤਿ ਸਬ੍ਬੇਨ ਅਤ੍ਤਨੋ ਧਨੇਨਪਿ ਅਤ੍ਤਨਾਪਿ ਸਦ੍ਧਿਂ. ਸੁਗਤੇਸੂਪਿ ਸੁਟ੍ਠੁ ਗਤਤ੍ਤਾ, ਸੁਨ੍ਦਰਞ੍ਚ ਠਾਨਂ ਗਤਤ੍ਤਾ ਸੁਗਤਨਾਮਕੇਸੁ ਬੁਦ੍ਧਪਚ੍ਚੇਕਬੁਦ੍ਧਸਾਵਕੇਸੁ. ਮਨਂ ਪਦੋਸਯੇਤਿ ਯੋ ਮਨਂ ਪਦੂਸੇਯ੍ਯ. ਤਸ੍ਸਾਯਂ ਮਨੋਪਦੋਸੋ ਏਵ ਮਹਤ੍ਤਰੋ ਕਲੀਤਿ ਵੁਤ੍ਤਂ ਹੋਤਿ.

੬੬੬. ਕਸ੍ਮਾ? ਯਸ੍ਮਾ ਸਤਂ ਸਹਸ੍ਸਾਨਂ…ਪੇ… ਪਾਪਕਂ, ਯਸ੍ਮਾ ਵਸ੍ਸਗਣਨਾਯ ਏਤ੍ਤਕੋ ਸੋ ਕਾਲੋ, ਯਂ ਕਾਲਂ ਅਰਿਯਗਰਹੀ ਵਾਚਂ ਮਨਞ੍ਚ ਪਣਿਧਾਯ ਪਾਪਕਂ ਨਿਰਯਂ ਉਪੇਤਿ, ਤਤ੍ਥ ਪਚ੍ਚਤੀਤਿ ਵੁਤ੍ਤਂ ਹੋਤਿ. ਇਦਞ੍ਹਿ ਸਙ੍ਖੇਪੇਨ ਪਦੁਮਨਿਰਯੇ ਆਯੁਪ੍ਪਮਾਣਂ.

੬੬੭. ਇਦਾਨਿ ਅਪਰੇਨਪਿ ਨਯੇਨ ‘‘ਅਯਮੇਵ ਮਹਤ੍ਤਰੋ ਕਲਿ, ਯੋ ਸੁਗਤੇਸੁ ਮਨਂ ਪਦੂਸਯੇ’’ਤਿ ਇਮਮਤ੍ਥਂ ਵਿਭਾਵੇਨ੍ਤੋ ‘‘ਅਭੂਤਵਾਦੀ’’ਤਿ ਆਦਿਮਾਹ. ਤਤ੍ਥ ਅਭੂਤਵਾਦੀਤਿ ਅਰਿਯੂਪਵਾਦਵਸੇਨ ਅਲਿਕਵਾਦੀ. ਨਿਰਯਨ੍ਤਿ ਪਦੁਮਾਦਿਂ. ਪੇਚ੍ਚ ਸਮਾ ਭਵਨ੍ਤੀਤਿ ਇਤੋ ਪਟਿਗਨ੍ਤ੍ਵਾ ਨਿਰਯੂਪਪਤ੍ਤਿਯਾ ਸਮਾ ਭਵਨ੍ਤਿ. ਪਰਤ੍ਥਾਤਿ ਪਰਲੋਕੇ.

੬੬੮. ਕਿਞ੍ਚ ਭਿਯ੍ਯੋ – ਯੋ ਅਪ੍ਪਦੁਟ੍ਠਸ੍ਸਾਤਿ. ਤਤ੍ਥ ਮਨੋਪਦੋਸਾਭਾਵੇਨ ਅਪ੍ਪਦੁਟ੍ਠੋ, ਅਵਿਜ੍ਜਾਮਲਾਭਾਵੇਨ ਸੁਦ੍ਧੋ, ਪਾਪਿਚ੍ਛਾਭਾਵੇਨ ਅਨਙ੍ਗਣੋਤਿ ਵੇਦਿਤਬ੍ਬੋ. ਅਪ੍ਪਦੁਟ੍ਠਤ੍ਤਾ ਵਾ ਸੁਦ੍ਧਸ੍ਸ, ਸੁਦ੍ਧਤ੍ਤਾ ਅਨਙ੍ਗਣਸ੍ਸਾਤਿ ਏਵਮ੍ਪੇਤ੍ਥ ਯੋਜੇਤਬ੍ਬਂ.

੬੬੯. ਏਵਂ ਸੁਗਤੇਸੁ ਮਨੋਪਦੋਸਸ੍ਸ ਮਹਤ੍ਤਰਕਲਿਭਾਵਂ ਸਾਧੇਤ੍ਵਾ ਇਦਾਨਿ ਵਾਰਿਤਵਤ੍ਥੁਗਾਥਾ ਨਾਮ ਚੁਦ੍ਦਸ ਗਾਥਾ ਆਹ. ਇਮਾ ਕਿਰ ਕੋਕਾਲਿਕਂ ਮੀਯਮਾਨਮੇਵ ਓਵਦਨ੍ਤੇਨਾਯਸ੍ਮਤਾ ਮਹਾਮੋਗ੍ਗਲ੍ਲਾਨੇਨ ਵੁਤ੍ਤਾ, ‘‘ਮਹਾਬ੍ਰਹ੍ਮੁਨਾ’’ਤਿ ਏਕੇ. ਤਾਸਂ ਇਮਿਨਾ ਸੁਤ੍ਤੇਨ ਸਦ੍ਧਿਂ ਏਕਸਙ੍ਗਹਤ੍ਥਂ ਅਯਮੁਦ੍ਦੇਸੋ ‘‘ਯੋ ਲੋਭਗੁਣੇ ਅਨੁਯੁਤ੍ਤੋ’’ਤਿਆਦਿ. ਤਤ੍ਥ ਪਠਮਗਾਥਾਯ ਤਾਵ ‘‘ਗੁਣੋ’’ਤਿ ਨਿਦ੍ਦਿਟ੍ਠਤ੍ਤਾ ਅਨੇਕਕ੍ਖਤ੍ਤੁਂ ਪਵਤ੍ਤਤ੍ਤਾ ਵਾ ਲੋਭੋਯੇਵ ਲੋਭਗੁਣੋ, ਤਣ੍ਹਾਯੇਤਂ ਅਧਿਵਚਨਂ. ਅਵਦਞ੍ਞੂਤਿ ਅਵਚਨਞ੍ਞੂ ਬੁਦ੍ਧਾਨਮ੍ਪਿ ਓਵਾਦਂ ਅਗ੍ਗਹਣੇਨ. ਮਚ੍ਛਰੀਤਿ ਪਞ੍ਚਵਿਧਮਚ੍ਛਰਿਯੇਨ. ਪੇਸੁਣਿਯਂ ਅਨੁਯੁਤ੍ਤੋਤਿ ਅਗ੍ਗਸਾਵਕਾਨਂ ਭੇਦਕਾਮਤਾਯ. ਸੇਸਂ ਪਾਕਟਮੇਵ. ਇਦਂ ਵੁਤ੍ਤਂ ਹੋਤਿ – ਯੋ, ਆਵੁਸੋ ਕੋਕਾਲਿਕ, ਤੁਮ੍ਹਾਦਿਸੋ ਅਨੁਯੁਤ੍ਤਲੋਭਤਣ੍ਹਾਯ ਲੋਭਗੁਣੇ ਅਨੁਯੁਤ੍ਤੋ ਅਸ੍ਸਦ੍ਧੋ ਕਦਰਿਯੋ ਅਵਦਞ੍ਞੂ ਮਚ੍ਛਰੀ ਪੇਸੁਣਿਯਂ ਅਨੁਯੁਤ੍ਤੋ, ਸੋ ਵਚਸਾ ਪਰਿਭਾਸਤਿ ਅਞ੍ਞਂ ਅਭਾਸਨੇਯ੍ਯਮ੍ਪਿ ਪੁਗ੍ਗਲਂ. ਤੇਨ ਤਂ ਵਦਾਮਿ ‘‘ਮੁਖਦੁਗ੍ਗਾ’’ਤਿ ਗਾਥਾਤ੍ਤਯਂ.

੬੭੦. ਤਸ੍ਸਾਯਂ ਅਨੁਤ੍ਤਾਨਪਦਤ੍ਥੋ – ਮੁਖਦੁਗ੍ਗ ਮੁਖਵਿਸਮ, ਵਿਭੂਤ ਵਿਗਤਭੂਤ, ਅਲਿਕਵਾਦਿ, ਅਨਰਿਯ ਅਸਪ੍ਪੁਰਿਸ, ਭੂਨਹੁ ਭੂਤਿਹਨਕ, ਵੁਡ੍ਢਿਨਾਸਕ, ਪੁਰਿਸਨ੍ਤ ਅਨ੍ਤਿਮਪੁਰਿਸ, ਕਲਿ ਅਲਕ੍ਖਿਪੁਰਿਸ, ਅਵਜਾਤ ਬੁਦ੍ਧਸ੍ਸ ਅਵਜਾਤਪੁਤ੍ਤ.

੬੭੧. ਰਜਮਾਕਿਰਸੀਤਿ ਕਿਲੇਸਰਜਂ ਅਤ੍ਤਨਿ ਪਕ੍ਖਿਪਸਿ. ਪਪਤਨ੍ਤਿ ਸੋਬ੍ਭਂ. ‘‘ਪਪਾਤ’’ਨ੍ਤਿਪਿ ਪਾਠੋ, ਸੋ ਏਵਤ੍ਥੋ. ‘‘ਪਪਦ’’ਨ੍ਤਿਪਿ ਪਾਠੋ, ਮਹਾਨਿਰਯਨ੍ਤਿ ਅਤ੍ਥੋ.

੬੭੨. ਏਤਿ ਹਤਨ੍ਤਿ ਏਤ੍ਥ ਹ-ਇਤਿ ਨਿਪਾਤੋ, ਤਨ੍ਤਿ ਤਂ ਕੁਸਲਾਕੁਸਲਕਮ੍ਮਂ. ਅਥ ਵਾ ਹਤਨ੍ਤਿ ਗਤਂ ਪਟਿਪਨ੍ਨਂ, ਉਪਚਿਤਨ੍ਤਿ ਅਤ੍ਥੋ. ਸੁਵਾਮੀਤਿ ਸਾਮਿ ਤਸ੍ਸ ਕਮ੍ਮਸ੍ਸ ਕਤਤ੍ਤਾ. ਸੋ ਹਿ ਤਂ ਕਮ੍ਮਂ ਲਭਤੇਵ, ਨਾਸ੍ਸ ਤਂ ਨਸ੍ਸਤੀਤਿ ਵੁਤ੍ਤਂ ਹੋਤਿ. ਯਸ੍ਮਾ ਚ ਲਭਤਿ, ਤਸ੍ਮਾ ਦੁਕ੍ਖਂ ਮਨ੍ਦੋ…ਪੇ… ਕਿਬ੍ਬਿਸਕਾਰੀ.

੬੭੩. ਇਦਾਨਿ ਯਂ ਦੁਕ੍ਖਂ ਮਨ੍ਦੋ ਪਸ੍ਸਤਿ, ਤਂ ਪਕਾਸੇਨ੍ਤੋ ‘‘ਅਯੋਸਙ੍ਕੁਸਮਾਹਤਟ੍ਠਾਨ’’ਨ੍ਤਿਆਦਿਮਾਹ. ਤਤ੍ਥ ਪੁਰਿਮਉਪਡ੍ਢਗਾਥਾਯ ਤਾਵ ਅਤ੍ਥੋ – ਯਂ ਤਂ ਅਯੋਸਙ੍ਕੁਸਮਾਹਤਟ੍ਠਾਨਂ ਸਨ੍ਧਾਯ ਭਗਵਤਾ ‘‘ਤਮੇਨਂ, ਭਿਕ੍ਖਵੇ, ਨਿਰਯਪਾਲਾ ਪਞ੍ਚਵਿਧਬਨ੍ਧਨਂ ਨਾਮ ਕਾਰਣਂ ਕਰੋਨ੍ਤੀ’’ਤਿ (ਮ. ਨਿ. ੩.੨੫੦; ਅ. ਨਿ. ੩.੩੬) ਵੁਤ੍ਤਂ, ਤਂ ਉਪੇਤਿ, ਏਵਂ ਉਪੇਨ੍ਤੋ ਚ ਤਤ੍ਥੇਵ ਆਦਿਤ੍ਤਾਯ ਲੋਹਪਥਵਿਯਾ ਨਿਪਜ੍ਜਾਪੇਤ੍ਵਾ ਨਿਰਯਪਾਲੇਹਿ ਪਞ੍ਚਸੁ ਠਾਨੇਸੁ ਆਕੋਟਿਯਮਾਨਂ ਤਤ੍ਤਂ ਖਿਲਸਙ੍ਖਾਤਂ ਤਿਣ੍ਹਧਾਰਮਯਸੂਲਮੁਪੇਤਿ, ਯਂ ਸਨ੍ਧਾਯ ਭਗਵਤਾ ਵੁਤ੍ਤਂ ‘‘ਤਤ੍ਤਂ ਅਯੋਖਿਲਂ ਹਤ੍ਥੇ ਗਮੇਨ੍ਤੀ’’ਤਿਆਦਿ. ਤਤੋ ਪਰਾ ਉਪਡ੍ਢਗਾਥਾ ਅਨੇਕਾਨਿ ਵਸ੍ਸਸਹਸ੍ਸਾਨਿ ਤਤ੍ਥ ਪਚ੍ਚਿਤ੍ਵਾ ਪਕ੍ਕਾਵਸੇਸਾਨੁਭਵਨਤ੍ਥਂ ਅਨੁਪੁਬ੍ਬੇਨ ਖਾਰੋਦਕਨਦੀਤੀਰਂ ਗਤਸ੍ਸ ਯਂ ਤਂ ‘‘ਤਤ੍ਤਂ ਅਯੋਗੁਲ਼ਂ ਮੁਖੇ ਪਕ੍ਖਿਪਨ੍ਤਿ, ਤਤ੍ਤਂ ਤਮ੍ਬਲੋਹਂ ਮੁਖੇ ਆਸਿਞ੍ਚਨ੍ਤੀ’’ਤਿ ਵੁਤ੍ਤਂ, ਤਂ ਸਨ੍ਧਾਯ ਵੁਤ੍ਤਂ. ਤਤ੍ਥ ਅਯੋਤਿ ਲੋਹਂ. ਗੁਲ਼ਸਨ੍ਨਿਭਨ੍ਤਿ ਬੇਲੁਵਸਣ੍ਠਾਨਂ. ਅਯੋਗਹਣੇਨ ਚੇਤ੍ਥ ਤਮ੍ਬਲੋਹਂ, ਇਤਰੇਨ ਅਯੋਗੁਲ਼ਂ ਵੇਦਿਤਬ੍ਬਂ. ਪਤਿਰੂਪਨ੍ਤਿ ਕਤਕਮ੍ਮਾਨੁਰੂਪਂ.

੬੭੪. ਤਤੋ ਪਰਾਸੁ ਗਾਥਾਸੁ ਨ ਹਿ ਵਗ੍ਗੂਤਿ ‘‘ਗਣ੍ਹਥ, ਪਹਰਥਾ’’ਤਿਆਦੀਨਿ ਵਦਨ੍ਤਾ ਨਿਰਯਪਾਲਾ ਮਧੁਰਵਾਚਂ ਨ ਵਦਨ੍ਤਿ. ਨਾਭਿਜਵਨ੍ਤੀਤਿ ਨ ਸੁਮੁਖਭਾਵੇਨ ਅਭਿਮੁਖਾ ਜਵਨ੍ਤਿ, ਨ ਸੁਮੁਖਾ ਉਪਸਙ੍ਕਮਨ੍ਤਿ, ਅਨਯਬ੍ਯਸਨਮਾਵਹਨ੍ਤਾ ਏਵ ਉਪਸਙ੍ਕਮਨ੍ਤੀਤਿ ਵੁਤ੍ਤਂ ਹੋਤਿ. ਨ ਤਾਣਮੁਪੇਨ੍ਤੀਤਿ ਤਾਣਂ ਲੇਣਂ ਪਟਿਸਰਣਂ ਹੁਤ੍ਵਾ ਨ ਉਪਗਚ੍ਛਨ੍ਤਿ, ਗਣ੍ਹਨ੍ਤਾ ਹਨਨ੍ਤਾ ਏਵ ਉਪੇਨ੍ਤੀਤਿ ਵੁਤ੍ਤਂ ਹੋਤਿ. ਅਙ੍ਗਾਰੇ ਸਨ੍ਥਤੇ ਸਯਨ੍ਤੀਤਿ ਅਙ੍ਗਾਰਪਬ੍ਬਤਂ ਆਰੋਪਿਤਾ ਸਮਾਨਾ ਅਨੇਕਾਨਿ ਵਸ੍ਸਸਹਸ੍ਸਾਨਿ ਸਨ੍ਥਤੇ ਅਙ੍ਗਾਰੇ ਸੇਨ੍ਤਿ. ਗਿਨਿਸਮ੍ਪਜ੍ਜਲਿਤਨ੍ਤਿ ਸਮਨ੍ਤਤੋ ਜਲਿਤਂ ਸਬ੍ਬਦਿਸਾਸੁ ਚ ਸਮ੍ਪਜ੍ਜਲਿਤਂ ਅਗ੍ਗਿਂ. ਪਵਿਸਨ੍ਤੀਤਿ ਮਹਾਨਿਰਯੇ ਪਕ੍ਖਿਤ੍ਤਾ ਸਮਾਨਾ ਓਗਾਹਨ੍ਤਿ. ਮਹਾਨਿਰਯੋ ਨਾਮ ਯੋ ਸੋ ‘‘ਚਤੁਕ੍ਕਣ੍ਣੋ’’ਤਿ (ਅ. ਨਿ. ੩.੩੬) ਵੁਤ੍ਤੋ, ਨਂ ਯੋਜਨਸਤੇ ਠਤ੍ਵਾ ਪਸ੍ਸਤਂ ਅਕ੍ਖੀਨਿ ਭਿਜ੍ਜਨ੍ਤਿ.

੬੭੫. ਜਾਲੇਨ ਚ ਓਨਹਿਯਾਨਾਤਿ ਅਯੋਜਾਲੇਨ ਪਲਿਵੇਠੇਤ੍ਵਾ ਮਿਗਲੁਦ੍ਦਕਾ ਮਿਗਂ ਵਿਯ ਹਨਨ੍ਤਿ. ਇਦਂ ਦੇਵਦੂਤੇ ਅਵੁਤ੍ਤਕਮ੍ਮਕਾਰਣਂ. ਅਨ੍ਧਂਵ ਤਿਮਿਸਮਾਯਨ੍ਤੀਤਿ ਅਨ੍ਧਕਰਣੇਨ ਅਨ੍ਧਮੇਵ ਬਹਲਨ੍ਧਕਾਰਤ੍ਤਾ ‘‘ਤਿਮਿਸ’’ਨ੍ਤਿ ਸਞ੍ਞਿਤਂ ਧੂਮਰੋਰੁਵਂ ਨਾਮ ਨਰਕਂ ਗਚ੍ਛਨ੍ਤਿ. ਤਤ੍ਰ ਕਿਰ ਨੇਸਂ ਖਰਧੂਮਂ ਘਾਯਿਤ੍ਵਾ ਅਕ੍ਖੀਨਿ ਭਿਜ੍ਜਨ੍ਤਿ, ਤੇਨ ‘‘ਅਨ੍ਧਂਵਾ’’ਤਿ ਵੁਤ੍ਤਂ. ਤਂ ਵਿਤਤਞ੍ਹਿ ਯਥਾ ਮਹਿਕਾਯੋਤਿ ਤਞ੍ਚ ਅਨ੍ਧਤਿਮਿਸਂ ਮਹਿਕਾਯੋ ਵਿਯ ਵਿਤਤਂ ਹੋਤੀਤਿ ਅਤ੍ਥੋ. ‘‘ਵਿਤ੍ਥਤ’’ਨ੍ਤਿਪਿ ਪਾਠੋ. ਇਦਮ੍ਪਿ ਦੇਵਦੂਤੇ ਅਵੁਤ੍ਤਕਮ੍ਮਕਾਰਣਮੇਵ.

੬੭੬. ਅਥ ਲੋਹਮਯਨ੍ਤਿ ਅਯਂ ਪਨ ਲੋਹਕੁਮ੍ਭੀ ਪਥਵਿਪਰਿਯਨ੍ਤਿਕਾ ਚਤੁਨਹੁਤਾਧਿਕਾਨਿ ਦ੍ਵੇਯੋਜਨਸਤਸਹਸ੍ਸਾਨਿ ਗਮ੍ਭੀਰਾ ਸਮਤਿਤ੍ਤਿਕਾ ਤਤ੍ਰਲੋਹਪੂਰਾ ਹੋਤਿ. ਪਚ੍ਚਨ੍ਤਿ ਹਿ ਤਾਸੁ ਚਿਰਰਤ੍ਤਨ੍ਤਿ ਤਾਸੁ ਕੁਮ੍ਭੀਸੁ ਦੀਘਰਤ੍ਤਂ ਪਚ੍ਚਨ੍ਤਿ. ਅਗ੍ਗਿਨਿਸਮਾਸੂਤਿ ਅਗ੍ਗਿਸਮਾਸੁ. ਸਮੁਪ੍ਪਿਲਵਾਤੇਤਿ ਸਮੁਪ੍ਪਿਲਵਨ੍ਤਾ, ਸਕਿਮ੍ਪਿ ਉਦ੍ਧਂ ਸਕਿਮ੍ਪਿ ਅਧੋ ਗਚ੍ਛਮਾਨਾ ਫੇਣੁਦ੍ਦੇਹਕਂ ਪਚ੍ਚਨ੍ਤੀਤਿ ਵੁਤ੍ਤਂ ਹੋਤਿ. ਦੇਵਦੂਤੇ ਵੁਤ੍ਤਨਯੇਨੇਵ ਤਂ ਵੇਦਿਤਬ੍ਬਂ.

੬੭੭. ਪੁਬ੍ਬਲੋਹਿਤਮਿਸ੍ਸੇਤਿ ਪੁਬ੍ਬਲੋਹਿਤਮਿਸ੍ਸਾਯ ਲੋਹਕੁਮ੍ਭਿਯਾ. ਤਤ੍ਥ ਕਿਨ੍ਤਿ ਤਤ੍ਥ. ਯਂ ਯਂ ਦਿਸਕਨ੍ਤਿ ਦਿਸਂ ਵਿਦਿਸਂ. ਅਧਿਸੇਤੀਤਿ ਗਚ੍ਛਤਿ. ‘‘ਅਭਿਸੇਤੀ’’ਤਿਪਿ ਪਾਠੋ, ਤਤ੍ਥ ਯਂ ਯਂ ਦਿਸਂ ਅਲ੍ਲੀਯਤਿ ਅਪਸ੍ਸਯਤੀਤਿ ਅਤ੍ਥੋ. ਕਿਲਿਸ੍ਸਤੀਤਿ ਬਾਧੀਯਤਿ. ‘‘ਕਿਲਿਜ੍ਜਤੀ’’ਤਿਪਿ ਪਾਠੋ, ਪੂਤਿ ਹੋਤੀਤਿ ਅਤ੍ਥੋ. ਸਮ੍ਫੁਸਮਾਨੋਤਿ ਤੇਨ ਪੁਬ੍ਬਲੋਹਿਤੇਨ ਫੁਟ੍ਠੋ ਸਮਾਨੋ. ਇਦਮ੍ਪਿ ਦੇਵਦੂਤੇ ਅਵੁਤ੍ਤਕਮ੍ਮਕਾਰਣਂ.

੬੭੮. ਪੁਲ਼ਵਾਵਸਥੇਤਿ ਪੁਲ਼ਵਾਨਂ ਆਵਾਸੇ. ਅਯਮ੍ਪਿ ਲੋਹਕੁਮ੍ਭੀਯੇਵ ਦੇਵਦੂਤੇ ‘‘ਗੂਥਨਿਰਯੋ’’ਤਿ ਵੁਤ੍ਤਾ, ਤਤ੍ਥ ਪਤਿਤਸ੍ਸ ਸੂਚਿਮੁਖਪਾਣਾ ਛਵਿਆਦੀਨਿ ਛਿਨ੍ਦਿਤ੍ਵਾ ਅਟ੍ਠਿਮਿਞ੍ਜਂ ਖਾਦਨ੍ਤਿ. ਗਨ੍ਤੁਂ ਨ ਹਿ ਤੀਰਮਪਤ੍ਥੀਤਿ ਅਪਗਨ੍ਤੁਂ ਨ ਹਿ ਤੀਰਂ ਅਤ੍ਥਿ. ‘‘ਤੀਰਵਮਤ੍ਥੀ’’ਤਿਪਿ ਪਾਠੋ, ਸੋਯੇਵਤ੍ਥੋ. ਤੀਰਮੇਵ ਏਤ੍ਥ ‘‘ਤੀਰਵ’’ਨ੍ਤਿ ਵੁਤ੍ਤਂ. ਸਬ੍ਬਸਮਾ ਹਿ ਸਮਨ੍ਤਕਪਲ੍ਲਾਤਿ ਯਸ੍ਮਾ ਤਸ੍ਸਾ ਕੁਮ੍ਭਿਯਾ ਉਪਰਿਭਾਗੇਪਿ ਨਿਕੁਜ੍ਜਿਤਤ੍ਤਾ ਸਬ੍ਬਤ੍ਥ ਸਮਾ ਸਮਨ੍ਤਤੋ ਕਟਾਹਾ, ਤਸ੍ਮਾ ਅਪਗਨ੍ਤੁਂ ਤੀਰਂ ਨਤ੍ਥੀਤਿ ਵੁਤ੍ਤਂ ਹੋਤਿ.

੬੭੯. ਅਸਿਪਤ੍ਤਵਨਂ ਦੇਵਦੂਤੇ ਵੁਤ੍ਤਨਯਮੇਵ. ਤਞ੍ਹਿ ਦੂਰਤੋ ਰਮਣੀਯਂ ਅਮ੍ਬਵਨਂ ਵਿਯ ਦਿਸ੍ਸਤਿ, ਅਥੇਤ੍ਥ ਲੋਭੇਨ ਨੇਰਯਿਕਾ ਪਵਿਸਨ੍ਤਿ, ਤਤੋ ਨੇਸਂ ਵਾਤੇਰਿਤਾਨਿ ਪਤ੍ਤਾਨਿ ਪਤਿਤ੍ਵਾ ਅਙ੍ਗਪਚ੍ਚਙ੍ਗਾਨਿ ਛਿਨ੍ਦਨ੍ਤਿ. ਤੇਨਾਹ – ‘‘ਤਂ ਪਵਿਸਨ੍ਤਿ ਸਮੁਚ੍ਛਿਦਗਤ੍ਤਾ’’ਤਿ. ਤਂ ਪਵਿਸਨ੍ਤਿ ਤਤੋ ਸੁਟ੍ਠੁ ਛਿਨ੍ਨਗਤ੍ਤਾ ਹੋਨ੍ਤੀਤਿ. ਜਿਵ੍ਹਂ ਬਲ਼ਿਸੇਨ ਗਹੇਤ੍ਵਾ ਆਰਜਯਾਰਜਯਾ ਵਿਹਨਨ੍ਤੀਤਿ ਤਤ੍ਥ ਅਸਿਪਤ੍ਤਵਨੇ ਵੇਗੇਨ ਧਾਵਿਤ੍ਵਾ ਪਤਿਤਾਨਂ ਮੁਸਾਵਾਦੀਨਂ ਨੇਰਯਿਕਾਨਂ ਨਿਰਯਪਾਲਾ ਜਿਵ੍ਹਂ ਬਲ਼ਿਸੇਨ ਨਿਕ੍ਕਡ੍ਢਿਤ੍ਵਾ ਯਥਾ ਮਨੁਸ੍ਸਾ ਅਲ੍ਲਚਮ੍ਮਂ ਭੂਮਿਯਂ ਪਤ੍ਥਰਿਤ੍ਵਾ ਖਿਲੇਹਿ ਆਕੋਟੇਨ੍ਤਿ, ਏਵਂ ਆਕੋਟੇਤ੍ਵਾ ਫਰਸੂਹਿ ਫਾਲੇਤ੍ਵਾ ਫਾਲੇਤ੍ਵਾ ਏਕਮੇਕਂ ਕੋਟਿਂ ਛਿਨ੍ਦੇਤ੍ਵਾ ਵਿਹਨਨ੍ਤਿ, ਛਿਨ੍ਨਛਿਨ੍ਨਾ ਕੋਟਿ ਪੁਨਪ੍ਪੁਨਂ ਸਮੁਟ੍ਠਾਤਿ. ‘‘ਆਰਚਯਾਰਚਯਾ’’ਤਿਪਿ ਪਾਠੋ, ਆਵਿਞ੍ਛਿਤ੍ਵਾ ਆਵਿਞ੍ਛਿਤ੍ਵਾਤਿ ਅਤ੍ਥੋ. ਏਤਮ੍ਪਿ ਦੇਵਦੂਤੇ ਅਵੁਤ੍ਤਕਮ੍ਮਕਾਰਣਂ.

੬੮੦. ਵੇਤਰਣਿਨ੍ਤਿ ਦੇਵਦੂਤੇ ‘‘ਮਹਤੀ ਖਾਰੋਦਕਾ ਨਦੀ’’ਤਿ (ਮ. ਨਿ. ੩.੨੬੯) ਵੁਤ੍ਤਨਦਿਂ. ਸਾ ਕਿਰ ਗਙ੍ਗਾ ਵਿਯ ਉਦਕਭਰਿਤਾ ਦਿਸ੍ਸਤਿ. ਅਥੇਤ੍ਥ ਨ੍ਹਾਯਿਸ੍ਸਾਮ ਪਿਵਿਸ੍ਸਾਮਾਤਿ ਨੇਰਯਿਕਾ ਪਤਨ੍ਤਿ. ਤਿਣ੍ਹਧਾਰਖੁਰਧਾਰਨ੍ਤਿ ਤਿਣ੍ਹਧਾਰਂ ਖੁਰਧਾਰਂ, ਤਿਕ੍ਖਧਾਰਖੁਰਧਾਰਵਤਿਨ੍ਤਿ ਵੁਤ੍ਤਂ ਹੋਤਿ. ਤਸ੍ਸਾ ਕਿਰ ਨਦਿਯਾ ਉਦ੍ਧਮਧੋ ਉਭਯਤੀਰੇਸੁ ਚ ਤਿਣ੍ਹਧਾਰਾ ਖੁਰਾ ਪਟਿਪਾਟਿਯਾ ਠਪਿਤਾ ਵਿਯ ਤਿਟ੍ਠਨ੍ਤਿ, ਤੇਨ ਸਾ ‘‘ਤਿਣ੍ਹਧਾਰਾ ਖੁਰਧਾਰਾ’’ਤਿ ਵੁਚ੍ਚਤਿ. ਤਂ ਤਿਣ੍ਹਧਾਰਖੁਰਧਾਰਂ ਉਦਕਾਸਾਯ ਉਪੇਨ੍ਤਿ ਅਲ੍ਲੀਯਨ੍ਤੀਤਿ ਅਤ੍ਥੋ. ਏਵਂ ਉਪੇਨ੍ਤਾ ਚ ਪਾਪਕਮ੍ਮੇਨ ਚੋਦਿਤਾ ਤਤ੍ਥ ਮਨ੍ਦਾ ਪਪਤਨ੍ਤਿ ਬਾਲਾਤਿ ਅਤ੍ਥੋ.

੬੮੧. ਸਾਮਾ ਸਬਲਾਤਿ ਏਤਂ ਪਰਤੋ ‘‘ਸੋਣਾ’’ਤਿ ਇਮਿਨਾ ਯੋਜੇਤਬ੍ਬਂ. ਸਾਮਵਣ੍ਣਾ ਕਮ੍ਮਾਸਵਣ੍ਣਾ ਚ ਸੋਣਾ ਖਾਦਨ੍ਤੀਤਿ ਵੁਤ੍ਤਂ ਹੋਤਿ. ਕਾਕੋਲਗਣਾਤਿ ਕਣ੍ਹਕਾਕਗਣਾ. ਪਟਿਗਿਦ੍ਧਾਤਿ ਸੁਟ੍ਠੁ ਸਞ੍ਜਾਤਗੇਧਾ ਹੁਤ੍ਵਾ, ‘‘ਮਹਾਗਿਜ੍ਝਾ’’ਤਿ ਏਕੇ. ਕੁਲਲਾਤਿ ਕੁਲਲਪਕ੍ਖਿਨੋ, ‘‘ਸੇਨਾਨਮੇਤਂ ਨਾਮ’’ਨ੍ਤਿ ਏਕੇ. ਵਾਯਸਾਤਿ ਅਕਣ੍ਹਕਾਕਾ. ਇਦਮ੍ਪਿ ਦੇਵਦੂਤੇ ਅਵੁਤ੍ਤਕਮ੍ਮਕਾਰਣਂ. ਤਤ੍ਥ ਵੁਤ੍ਤਾਨਿਪਿ ਪਨ ਕਾਨਿਚਿ ਇਧ ਨ ਵੁਤ੍ਤਾਨਿ, ਤਾਨਿ ਏਤੇਸਂ ਪੁਰਿਮਪਚ੍ਛਿਮਭਾਗਤ੍ਤਾ ਵੁਤ੍ਤਾਨੇਵ ਹੋਨ੍ਤੀਤਿ ਵੇਦਿਤਬ੍ਬਾਨਿ.

੬੮੨. ਇਦਾਨਿ ਸਬ੍ਬਮੇਵੇਤਂ ਨਰਕਵੁਤ੍ਤਿਂ ਦਸ੍ਸੇਤ੍ਵਾ ਓਵਦਨ੍ਤੋ ‘‘ਕਿਚ੍ਛਾ ਵਤਾਯ’’ਨ੍ਤਿ ਗਾਥਮਾਹ. ਤਸ੍ਸਤ੍ਥੋ – ਕਿਚ੍ਛਾ ਵਤ ਅਯਂ ਇਧ ਨਰਕੇ ਨਾਨਪ੍ਪਕਾਰਕਮ੍ਮਕਰਣਭੇਦਾ ਵੁਤ੍ਤਿ, ਯਂ ਜਨੋ ਫੁਸਤਿ ਕਿਬ੍ਬਿਸਕਾਰੀ. ਤਸ੍ਮਾ ਇਧ ਜੀਵਿਤਸੇਸੇ ਜੀਵਿਤਸਨ੍ਤਤਿਯਾ ਵਿਜ੍ਜਮਾਨਾਯ ਇਧ ਲੋਕੇ ਠਿਤੋਯੇਵ ਸਮਾਨੋ ਸਰਣਗਮਨਾਦਿਕੁਸਲਧਮ੍ਮਾਨੁਟ੍ਠਾਨੇਨ ਕਿਚ੍ਚਕਰੋ ਨਰੋ ਸਿਯਾ ਭਵੇਯ੍ਯ. ਕਿਚ੍ਚਕਰੋ ਭਵਨ੍ਤੋਪਿ ਚ ਸਾਤਚ੍ਚਕਾਰਿਤਾਵਸੇਨੇਵ ਭਵੇਯ੍ਯ, ਨ ਪਮਜ੍ਜੇ ਮੁਹੁਤ੍ਤਮ੍ਪਿ ਨ ਪਮਾਦਮਾਪਜ੍ਜੇਯ੍ਯਾਤਿ ਅਯਮੇਤ੍ਥ ਸਮੁਚ੍ਚਯਵਣ੍ਣਨਾ. ਯਸ੍ਮਾ ਪਨ ਵੁਤ੍ਤਾਵਸੇਸਾਨਿ ਪਦਾਨਿ ਪੁਬ੍ਬੇ ਵੁਤ੍ਤਨਯਤ੍ਤਾ ਉਤ੍ਤਾਨਤ੍ਥਤ੍ਤਾ ਚ ਸੁਵਿਞ੍ਞੇਯ੍ਯਾਨੇਵ, ਤਸ੍ਮਾ ਅਨੁਪਦਵਣ੍ਣਨਾ ਨ ਕਤਾਤਿ.

ਪਰਮਤ੍ਥਜੋਤਿਕਾਯ ਖੁਦ੍ਦਕ-ਅਟ੍ਠਕਥਾਯ

ਸੁਤ੍ਤਨਿਪਾਤ-ਅਟ੍ਠਕਥਾਯ ਕੋਕਾਲਿਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.