੧੧. ਨਾਲਕਸੁਤ੍ਤਵਣ੍ਣਨਾ

੬੮੫. ਆਨਨ੍ਦਜਾਤੇਤਿ ਨਾਲਕਸੁਤ੍ਤਂ. ਕਾ ਉਪ੍ਪਤ੍ਤਿ? ਪਦੁਮੁਤ੍ਤਰਸ੍ਸ ਕਿਰ ਭਗਵਤੋ ਸਾਵਕਂ ਮੋਨੇਯ੍ਯਪਟਿਪਦਂ ਪਟਿਪਨ੍ਨਂ ਦਿਸ੍ਵਾ ਤਥਤ੍ਤਂ ਅਭਿਕਙ੍ਖਮਾਨੋ ਤਤੋ ਪਭੁਤਿ ਕਪ੍ਪਸਤਸਹਸ੍ਸਂ ਪਾਰਮਿਯੋ ਪੂਰੇਤ੍ਵਾ ਅਸਿਤਸ੍ਸ ਇਸਿਨੋ ਭਾਗਿਨੇਯ੍ਯੋ ਨਾਲਕੋ ਨਾਮ ਤਾਪਸੋ ਭਗਵਨ੍ਤਂ ਧਮ੍ਮਚਕ੍ਕਪ੍ਪਵਤ੍ਤਿਤਦਿਵਸਤੋ ਸਤ੍ਤਮੇ ਦਿਵਸੇ ‘‘ਅਞ੍ਞਾਤਮੇਤ’’ਨ੍ਤਿਆਦੀਹਿ ਦ੍ਵੀਹਿ ਗਾਥਾਹਿ ਮੋਨੇਯ੍ਯਪਟਿਪਦਂ ਪੁਚ੍ਛਿ. ਤਸ੍ਸ ਭਗਵਾ ‘‘ਮੋਨੇਯ੍ਯਂ ਤੇ ਉਪਞ੍ਞਿਸ੍ਸ’’ਨ੍ਤਿਆਦਿਨਾ ਨਯੇਨ ਤਂ ਬ੍ਯਾਕਾਸਿ. ਪਰਿਨਿਬ੍ਬੁਤੇ ਪਨ ਭਗਵਤਿ ਸਙ੍ਗੀਤਿਂ ਕਰੋਨ੍ਤੇਨਾਯਸ੍ਮਤਾ ਮਹਾਕਸ੍ਸਪੇਨ ਆਯਸ੍ਮਾ ਆਨਨ੍ਦੋ ਤਮੇਵ ਮੋਨੇਯ੍ਯਪਟਿਪਦਂ ਪੁਟ੍ਠੋ ਯੇਨ ਯਦਾ ਚ ਸਮਾਦਪਿਤੋ ਨਾਲਕੋ ਭਗਵਨ੍ਤਂ ਪੁਚ੍ਛਿ. ਤਂ ਸਬ੍ਬਂ ਪਾਕਟਂ ਕਤ੍ਵਾ ਦਸ੍ਸੇਤੁਕਾਮੋ ‘‘ਆਨਨ੍ਦਜਾਤੇ’’ਤਿਆਦਿਕਾ ਵੀਸਤਿ ਵਤ੍ਥੁਗਾਥਾਯੋ ਵਤ੍ਵਾ ਅਭਾਸਿ. ਤਂ ਸਬ੍ਬਮ੍ਪਿ ‘‘ਨਾਲਕਸੁਤ੍ਤ’’ਨ੍ਤਿ ਵੁਚ੍ਚਤਿ.

ਤਤ੍ਥ ਆਨਨ੍ਦਜਾਤੇਤਿ ਸਮਿਦ੍ਧਿਜਾਤੇ ਵੁਦ੍ਧਿਪ੍ਪਤ੍ਤੇ. ਪਤੀਤੇਤਿ ਤੁਟ੍ਠੇ. ਅਥ ਵਾ ਆਨਨ੍ਦਜਾਤੇਤਿ ਪਮੁਦਿਤੇ. ਪਤੀਤੇਤਿ ਸੋਮਨਸ੍ਸਜਾਤੇ. ਸੁਚਿਵਸਨੇਤਿ ਅਕਿਲਿਟ੍ਠਵਸਨੇ. ਦੇਵਾਨਞ੍ਹਿ ਕਪ੍ਪਰੁਕ੍ਖਨਿਬ੍ਬਤ੍ਤਾਨਿ ਵਸਨਾਨਿ ਰਜਂ ਵਾ ਮਲਂ ਵਾ ਨ ਗਣ੍ਹਨ੍ਤਿ. ਦੁਸ੍ਸਂ ਗਹੇਤ੍ਵਾਤਿ ਇਧ ਦੁਸ੍ਸਸਦਿਸਤ੍ਤਾ ‘‘ਦੁਸ੍ਸ’’ਨ੍ਤਿ ਲਦ੍ਧਵੋਹਾਰਂ ਦਿਬ੍ਬਵਤ੍ਥਂ ਉਕ੍ਖਿਪਿਤ੍ਵਾ. ਅਸਿਤੋ ਇਸੀਤਿ ਕਣ੍ਹਸਰੀਰਵਣ੍ਣਤ੍ਤਾ ਏਵਂਲਦ੍ਧਨਾਮੋ ਇਸਿ. ਦਿਵਾਵਿਹਾਰੇਤਿ ਦਿਵਾਵਿਹਾਰਟ੍ਠਾਨੇ. ਸੇਸਂ ਪਦਤੋ ਉਤ੍ਤਾਨਮੇਵ.

ਸਮ੍ਬਨ੍ਧਤੋ ਪਨ – ਅਯਂ ਕਿਰ ਸੁਦ੍ਧੋਦਨਸ੍ਸ ਪਿਤੁ ਸੀਹਹਨੁਰਞ੍ਞੋ ਪੁਰੋਹਿਤੋ ਸੁਦ੍ਧੋਦਨਸ੍ਸਪਿ ਅਨਭਿਸਿਤ੍ਤਕਾਲੇ ਸਿਪ੍ਪਾਚਰਿਯੋ ਹੁਤ੍ਵਾ ਅਭਿਸਿਤ੍ਤਕਾਲੇ ਪੁਰੋਹਿਤੋਯੇਵ ਅਹੋਸਿ. ਤਸ੍ਸ ਸਾਯਂ ਪਾਤਂ ਰਾਜੁਪਟ੍ਠਾਨਂ ਆਗਤਸ੍ਸ ਰਾਜਾ ਦਹਰਕਾਲੇ ਵਿਯ ਨਿਪਚ੍ਚਕਾਰਂ ਅਕਤ੍ਵਾ ਅਞ੍ਜਲਿਕਮ੍ਮਮਤ੍ਤਮੇਵ ਕਰੋਤਿ. ਧਮ੍ਮਤਾ ਕਿਰੇਸਾ ਪਤ੍ਤਾਭਿਸੇਕਾਨਂ ਸਕ੍ਯਰਾਜੂਨਂ. ਪੁਰੋਹਿਤੋ ਤੇਨ ਨਿਬ੍ਬਿਜ੍ਜਿਤ੍ਵਾ ‘‘ਪਬ੍ਬਜ੍ਜਾਮਹਂ ਮਹਾਰਾਜਾ’’ਤਿ ਆਹ. ਰਾਜਾ ਤਸ੍ਸ ਨਿਚ੍ਛਯਂ ਞਤ੍ਵਾ ‘‘ਤੇਨ ਹਿ, ਆਚਰਿਯ, ਮਮੇਵ ਉਯ੍ਯਾਨੇ ਵਸਿਤਬ੍ਬਂ, ਯਥਾ ਤੇ ਅਹਂ ਅਭਿਣ੍ਹਂ ਪਸ੍ਸੇਯ੍ਯ’’ਨ੍ਤਿ ਯਾਚਿ. ਸੋ ‘‘ਏਵਂ ਹੋਤੂ’’ਤਿ ਪਟਿਸ੍ਸੁਣਿਤ੍ਵਾ ਤਾਪਸਪਬ੍ਬਜ੍ਜਂ ਪਬ੍ਬਜਿਤ੍ਵਾ ਰਞ੍ਞਾ ਉਪਟ੍ਠਹਿਯਮਾਨੋ ਉਯ੍ਯਾਨੇਯੇਵ ਵਸਨ੍ਤੋ ਕਸਿਣਪਰਿਕਮ੍ਮਂ ਕਤ੍ਵਾ ਅਟ੍ਠ ਸਮਾਪਤ੍ਤਿਯੋ ਪਞ੍ਚਾਭਿਞ੍ਞਾਯੋ ਚ ਨਿਬ੍ਬਤ੍ਤੇਸਿ. ਸੋ ਤਤੋ ਪਭੁਤਿ ਰਾਜਕੁਲੇ ਭਤ੍ਤਕਿਚ੍ਚਂ ਕਤ੍ਵਾ ਹਿਮਵਨ੍ਤਚਾਤੁਮਹਾਰਾਜਿਕਭਵਨਾਦੀਨਂ ਅਞ੍ਞਤਰਂ ਗਨ੍ਤ੍ਵਾ ਦਿਵਾਵਿਹਾਰਂ ਕਰੋਤਿ. ਅਥੇਕਦਿਵਸਂ ਤਾਵਤਿਂਸਭਵਨਂ ਗਨ੍ਤ੍ਵਾ ਰਤਨਵਿਮਾਨਂ ਪਵਿਸਿਤ੍ਵਾ ਦਿਬ੍ਬਰਤਨਪਲ੍ਲਙ੍ਕੇ ਨਿਸਿਨ੍ਨੋ ਸਮਾਧਿਸੁਖਂ ਅਨੁਭਵਿਤ੍ਵਾ ਸਾਯਨ੍ਹਸਮਯਂ ਵੁਟ੍ਠਾਯ ਵਿਮਾਨਦ੍ਵਾਰੇ ਠਤ੍ਵਾ ਇਤੋ ਚਿਤੋ ਚ ਵਿਲੋਕੇਨ੍ਤੋ ਸਟ੍ਠਿਯੋਜਨਾਯ ਮਹਾਵੀਥਿਯਾ ਚੇਲੁਕ੍ਖੇਪਂ ਕਤ੍ਵਾ ਬੋਧਿਸਤ੍ਤਗੁਣਪਸਂਸਿਤਾਨਿ ਥੁਤਿਵਚਨਾਨਿ ਵਤ੍ਵਾ ਕੀਲ਼ਨ੍ਤੇ ਸਕ੍ਕਪ੍ਪਮੁਖੇ ਦੇਵੇ ਅਦ੍ਦਸ. ਤੇਨਾਹ ਆਯਸ੍ਮਾ ਆਨਨ੍ਦੋ – ‘‘ਆਨਨ੍ਦਜਾਤੇ…ਪੇ… ਦਿਵਾਵਿਹਾਰੇ’’ਤਿ.

੬੮੬. ਤਤੋ ਸੋ ਏਵਂ ਦਿਸ੍ਵਾਨ ਦੇਵੇ…ਪੇ… ਕਿਂ ਪਟਿਚ੍ਚ. ਤਤ੍ਥ ਉਦਗ੍ਗੇਤਿ ਅਬ੍ਭੁਨ੍ਨਤਕਾਯੇ. ਚਿਤ੍ਤਿਂ ਕਰਿਤ੍ਵਾਨਾਤਿ ਆਦਰਂ ਕਤ੍ਵਾ. ਕਲ੍ਯਰੂਪੋਤਿ ਤੁਟ੍ਠਰੂਪੋ. ਸੇਸਂ ਉਤ੍ਤਾਨਤ੍ਥਮੇਵ.

੬੮੭. ਇਦਾਨਿ ‘‘ਯਦਾਪਿ ਆਸੀ’’ਤਿਆਦਿਗਾਥਾ ਉਤ੍ਤਾਨਸਮ੍ਬਨ੍ਧਾ ਏਵ. ਪਦਤ੍ਥੋ ਪਨ ਪਠਮਗਾਥਾਯ ਤਾਵ ਸਙ੍ਗਮੋਤਿ ਸਙ੍ਗਾਮੋ. ਜਯੋ ਸੁਰਾਨਨ੍ਤਿ ਦੇਵਾਨਂ ਜਯੋ.

ਤਸ੍ਸਾਵਿਭਾਵਤ੍ਥਂ ਅਯਮਨੁਪੁਬ੍ਬਿਕਥਾ ਵੇਦਿਤਬ੍ਬਾ – ਸਕ੍ਕੋ ਕਿਰ ਮਗਧਰਟ੍ਠੇ ਮਚਲਗਾਮਵਾਸੀ ਤੇਤ੍ਤਿਂਸਮਨੁਸ੍ਸਸੇਟ੍ਠੋ ਮਘੋ ਨਾਮ ਮਾਣਵੋ ਹੁਤ੍ਵਾ ਸਤ੍ਤ ਵਤ੍ਤਪਦਾਨਿ ਪੂਰੇਤ੍ਵਾ ਤਾਵਤਿਂਸਭਵਨੇ ਨਿਬ੍ਬਤ੍ਤਿ ਸਦ੍ਧਿਂ ਪਰਿਸਾਯ. ਤਤੋ ਪੁਬ੍ਬਦੇਵਾ ‘‘ਆਗਨ੍ਤੁਕਦੇਵਪੁਤ੍ਤਾ ਆਗਤਾ, ਸਕ੍ਕਾਰਂ ਨੇਸਂ ਕਰਿਸ੍ਸਾਮਾ’’ਤਿ ਵਤ੍ਵਾ ਦਿਬ੍ਬਪਦੁਮਾਨਿ ਉਪਨਾਮੇਸੁਂ, ਉਪਡ੍ਢਰਜ੍ਜੇਨ ਚ ਨਿਮਨ੍ਤੇਸੁਂ. ਸਕ੍ਕੋ ਉਪਡ੍ਢਰਜ੍ਜੇਨ ਅਸਨ੍ਤੁਟ੍ਠੋ ਸਕਪਰਿਸਂ ਸਞ੍ਞਾਪੇਤ੍ਵਾ ਏਕਦਿਵਸਂ ਸੁਰਾਮਦਮਤ੍ਤੇ ਤੇ ਪਾਦੇ ਗਹੇਤ੍ਵਾ ਸਿਨੇਰੁਪਬ੍ਬਤਪਾਦੇ ਖਿਪਿ. ਤੇਸਂ ਸਿਨੇਰੁਸ੍ਸ ਹੇਟ੍ਠਿਮਤਲੇ ਦਸਸਹਸ੍ਸਯੋਜਨਂ ਅਸੁਰਭਵਨਂ ਨਿਬ੍ਬਤ੍ਤਿ ਪਾਰਿਚ੍ਛਤ੍ਤਕਪਟਿਚ੍ਛਨ੍ਨਭੂਤਾਯ ਚਿਤ੍ਰਪਾਟਲਿਯਾ ਉਪਸੋਭਿਤਂ. ਤਤੋ ਤੇ ਸਤਿਂ ਪਟਿਲਭਿਤ੍ਵਾ ਤਾਵਤਿਂਸਭਵਨਂ ਅਪਸ੍ਸਨ੍ਤਾ ‘‘ਅਹੋ ਰੇ ਨਟ੍ਠਾ ਮਯਂ ਪਾਨਮਦਦੋਸੇਨ, ਨ ਦਾਨਿ ਮਯਂ ਸੁਰਂ ਪਿਵਿਮ੍ਹਾ, ਅਸੁਰਂ ਪਿਵਿਮ੍ਹਾ, ਨ ਦਾਨਿਮ੍ਹਾ ਸੁਰਾ, ਅਸੁਰਾ ਦਾਨਿ ਜਾਤਮ੍ਹਾ’’ਤਿ. ਤਤੋ ਪਭੁਤਿ ‘‘ਅਸੁਰਾ’’ਇਚ੍ਚੇਵ ਉਪ੍ਪਨ੍ਨਸਮਞ੍ਞਾ ਹੁਤ੍ਵਾ ‘‘ਹਨ੍ਦ ਦਾਨਿ ਦੇਵੇਹਿ ਸਦ੍ਧਿਂ ਸਙ੍ਗਾਮੇਮਾ’’ਤਿ ਸਿਨੇਰੁਂ ਪਰਿਤੋ ਆਰੋਹਿਂਸੁ. ਤਤੋ ਸਕ੍ਕੋ ਅਸੁਰੇ ਯੁਦ੍ਧੇਨ ਅਬ੍ਭੁਗ੍ਗਨ੍ਤ੍ਵਾ ਪੁਨਪਿ ਸਮੁਦ੍ਦੇ ਪਕ੍ਖਿਪਿਤ੍ਵਾ ਚਤੂਸੁ ਦ੍ਵਾਰੇਸੁ ਅਤ੍ਤਨਾ ਸਦਿਸਂ ਇਨ੍ਦਪਟਿਮਂ ਮਾਪੇਤ੍ਵਾ ਠਪੇਸਿ. ਤਤੋ ਅਸੁਰਾ ‘‘ਅਪ੍ਪਮਤ੍ਤੋ ਵਤਾਯਂ ਸਕ੍ਕੋ ਨਿਚ੍ਚਂ ਰਕ੍ਖਨ੍ਤੋ ਤਿਟ੍ਠਤੀ’’ਤਿ ਚਿਨ੍ਤੇਤ੍ਵਾ ਪੁਨਦੇਵ ਨਗਰਂ ਅਗਮਿਂਸੁ. ਤਤੋ ਦੇਵਾ ਅਤ੍ਤਨੋ ਜਯਂ ਘੋਸੇਨ੍ਤਾ ਮਹਾਵੀਥਿਯਂ ਚੇਲੁਕ੍ਖੇਪਂ ਕਰੋਨ੍ਤਾ ਨਕ੍ਖਤ੍ਤਂ ਕੀਲ਼ਿਂਸੁ. ਅਥ ਅਸਿਤੋ ਅਤੀਤਾਨਾਗਤੇ ਚਤ੍ਤਾਲੀਸਕਪ੍ਪੇ ਅਨੁਸ੍ਸਰਿਤੁਂ ਸਮਤ੍ਥਤਾਯ ‘‘ਕਿਂ ਨੁ ਖੋ ਇਮੇਹਿ ਪੁਬ੍ਬੇਪਿ ਏਵਂ ਕੀਲ਼ਿਤਪੁਬ੍ਬ’’ਨ੍ਤਿ ਆਵਜ੍ਜੇਨ੍ਤੋ ਤਂ ਦੇਵਾਸੁਰਸਙ੍ਗਾਮੇ ਦੇਵਵਿਜਯਂ ਦਿਸ੍ਵਾ ਆਹ –

‘‘ਯਦਾਪਿ ਆਸੀ ਅਸੁਰੇਹਿ ਸਙ੍ਗਮੋ,

ਜਯੋ ਸੁਰਾਨਂ ਅਸੁਰਾ ਪਰਾਜਿਤਾ;

ਤਦਾਪਿ ਨੇਤਾਦਿਸੋ ਲੋਮਹਂਸਨੋ’’ਤਿ.

ਤਸ੍ਮਿਮ੍ਪਿ ਕਾਲੇ ਏਤਾਦਿਸੋ ਲੋਮਹਂਸਨੋ ਪਮੋਦੋ ਨ ਆਸਿ. ਕਿਮਬ੍ਭੁਤਂ ਦਟ੍ਠੁ ਮਰੂ ਪਮੋਦਿਤਾਤਿ ਅਜ੍ਜ ਪਨ ਕਿਂ ਅਬ੍ਭੁਤਂ ਦਿਸ੍ਵਾ ਏਵਂ ਦੇਵਾ ਪਮੁਦਿਤਾਤਿ.

੬੮੮. ਦੁਤਿਯਗਾਥਾਯ ਸੇਲ਼ੇਨ੍ਤੀਤਿ ਮੁਖੇਨ ਉਸ੍ਸੇਲ਼ਨਸਦ੍ਦਂ ਮੁਞ੍ਚਨ੍ਤਿ. ਗਾਯਨ੍ਤਿ ਨਾਨਾਵਿਧਾਨਿ ਗੀਤਾਨਿ, ਵਾਦਯਨ੍ਤਿ ਅਟ੍ਠਸਟ੍ਠਿ ਤੂਰਿਯਸਹਸ੍ਸਾਨਿ, ਫੋਟੇਨ੍ਤੀਤਿ ਅਪ੍ਫੋਟੇਨ੍ਤਿ. ਪੁਚ੍ਛਾਮਿ ਵੋਹਨ੍ਤਿ ਅਤ੍ਤਨਾ ਆਵਜ੍ਜੇਤ੍ਵਾ ਞਾਤੁਂ ਸਮਤ੍ਥੋਪਿ ਤੇਸਂ ਵਚਨਂ ਸੋਤੁਕਾਮਤਾਯ ਪੁਚ੍ਛਤਿ. ਮੇਰੁਮੁਦ੍ਧਵਾਸਿਨੇਤਿ ਸਿਨੇਰੁਮੁਦ੍ਧਨਿ ਵਸਨ੍ਤੇ. ਸਿਨੇਰੁਸ੍ਸ ਹਿ ਹੇਟ੍ਠਿਮਤਲੇ ਦਸਯੋਜਨਸਹਸ੍ਸਂ ਅਸੁਰਭਵਨਂ, ਮਜ੍ਝਿਮਤਲੇ ਦ੍ਵਿਸਹਸ੍ਸਪਰਿਤ੍ਤਦੀਪਪਰਿਵਾਰਾ ਚਤ੍ਤਾਰੋ ਮਹਾਦੀਪਾ, ਉਪਰਿਮਤਲੇ ਦਸਯੋਜਨਸਹਸ੍ਸਂ ਤਾਵਤਿਂਸਭਵਨਂ. ਤਸ੍ਮਾ ਦੇਵਾ ‘‘ਮੇਰੁਮੁਦ੍ਧਵਾਸਿਨੋ’’ਤਿ ਵੁਚ੍ਚਨ੍ਤਿ. ਮਾਰਿਸਾਤਿ ਦੇਵੇ ਆਮਨ੍ਤੇਤਿ, ਨਿਦੁਕ੍ਖਾ ਨਿਰਾਬਾਧਾਤਿ ਵੁਤ੍ਤਂ ਹੋਤਿ.

੬੮੯. ਅਥਸ੍ਸ ਤਮਤ੍ਥਂ ਆਰੋਚੇਨ੍ਤੇਹਿ ਦੇਵੇਹਿ ਵੁਤ੍ਤਾਯ ਤਤਿਯਗਾਥਾਯ ਬੋਧਿਸਤ੍ਤੋਤਿ ਬੁਜ੍ਝਨਕਸਤ੍ਤੋ, ਸਮ੍ਮਾਸਮ੍ਬੋਧਿਂ ਗਨ੍ਤੁਂ ਅਰਹੋ ਸਤ੍ਤੋ ਰਤਨਵਰੋਤਿ ਵਰਰਤਨਭੂਤੋ. ਤੇਨਮ੍ਹ ਤੁਟ੍ਠਾਤਿ ਤੇਨ ਕਾਰਣੇਨ ਮਯਂ ਤੁਟ੍ਠਾ. ਸੋ ਹਿ ਬੁਦ੍ਧਤ੍ਤਂ ਪਤ੍ਵਾ ਤਥਾ ਧਮ੍ਮਂ ਦੇਸੇਸ੍ਸਤਿ, ਯਥਾ ਮਯਞ੍ਚ ਅਞ੍ਞੇ ਚ ਦੇਵਗਣਾ ਸੇਕ੍ਖਾਸੇਕ੍ਖਭੂਮਿਂ ਪਾਪੁਣਿਸ੍ਸਾਮ. ਮਨੁਸ੍ਸਾਪਿਸ੍ਸ ਧਮ੍ਮਂ ਸੁਤ੍ਵਾ ਯੇ ਨ ਸਕ੍ਖਿਸ੍ਸਨ੍ਤਿ ਪਰਿਨਿਬ੍ਬਾਤੁਂ, ਤੇ ਦਾਨਾਦੀਨਿ ਕਤ੍ਵਾ ਦੇਵਲੋਕੇ ਪਰਿਪੂਰੇਸ੍ਸਨ੍ਤੀਤਿ ਅਯਂ ਕਿਰ ਨੇਸਂ ਅਧਿਪ੍ਪਾਯੋ. ਤਤ੍ਥ ‘‘ਤੁਟ੍ਠਾ ਕਲ੍ਯਰੂਪਾ’’ਤਿ ਕਿਞ੍ਚਾਪਿ ਇਦਂ ਪਦਦ੍ਵਯਂ ਅਤ੍ਥਤੋ ਅਭਿਨ੍ਨਂ, ਤਥਾਪਿ ‘‘ਕਿਮਬ੍ਭੁਤਂ ਦਟ੍ਠੁ ਮਰੂ ਪਮੋਦਿਤਾ, ਕਿਂ ਦੇਵਸਙ੍ਘੋ ਅਤਿਰਿਵ ਕਲ੍ਯਰੂਪੋ’’ਤਿ ਇਮਸ੍ਸ ਪਞ੍ਹਦ੍ਵਯਸ੍ਸ ਵਿਸ੍ਸਜ੍ਜਨਤ੍ਥਂ ਵੁਤ੍ਤਨ੍ਤਿ ਵੇਦਿਤਬ੍ਬਂ.

੬੯੦. ਇਦਾਨਿ ਯੇਨ ਅਧਿਪ੍ਪਾਯੇਨ ਬੋਧਿਸਤ੍ਤੇ ਜਾਤੇ ਤੁਟ੍ਠਾ ਅਹੇਸੁਂ, ਤਂ ਆਵਿਕਰੋਨ੍ਤੇਹਿ ਵੁਤ੍ਤਾਯ ਚਤੁਤ੍ਥਗਾਥਾਯ ਸਤ੍ਤਗ੍ਗਹਣੇਨ ਦੇਵਮਨੁਸ੍ਸਗ੍ਗਹਣਂ, ਪਜਾਗਹਣੇਨ ਸੇਸਗਤਿਗ੍ਗਹਣਂ. ਏਵਂ ਦ੍ਵੀਹਿ ਪਦੇਹਿ ਪਞ੍ਚਸੁਪਿ ਗਤੀਸੁ ਸੇਟ੍ਠਭਾਵਂ ਦਸ੍ਸੇਤਿ. ਤਿਰਚ੍ਛਾਨਾਪਿ ਹਿ ਸੀਹਾਦਯੋ ਅਸਨ੍ਤਾਸਾਦਿਗੁਣਯੁਤ੍ਤਾ, ਤੇਪਿ ਅਯਮੇਵ ਅਤਿਸੇਤਿ. ਤਸ੍ਮਾ ‘‘ਪਜਾਨਮੁਤ੍ਤਮੋ’’ਤਿ ਵੁਤ੍ਤੋ. ਦੇਵਮਨੁਸ੍ਸੇਸੁ ਪਨ ਯੇ ਅਤ੍ਤਹਿਤਾਯ ਪਟਿਪਨ੍ਨਾਦਯੋ ਚਤ੍ਤਾਰੋ ਪੁਗ੍ਗਲਾ, ਤੇਸੁ ਉਭਯਹਿਤਪਟਿਪਨ੍ਨੋ ਅਗ੍ਗਪੁਗ੍ਗਲੋ ਅਯਂ, ਨਰੇਸੁ ਚ ਉਸਭਸਦਿਸਤ੍ਤਾ ਨਰਾਸਭੋ. ਤੇਨਸ੍ਸ ਥੁਤਿਂ ਭਣਨ੍ਤਾ ਇਦਮ੍ਪਿ ਪਦਦ੍ਵਯਮਾਹਂਸੁ.

੬੯੧. ਪਞ੍ਚਮਗਾਥਾਯ ਤਂ ਸਦ੍ਦਨ੍ਤਿ ਤਂ ਦੇਵੇਹਿ ਵੁਤ੍ਤਵਚਨਸਦ੍ਦਂ. ਅਵਸਰੀਤਿ ਓਤਰਿ. ਤਦ ਭਵਨਨ੍ਤਿ ਤਦਾ ਭਵਨਂ.

੬੯੨. ਛਟ੍ਠਗਾਥਾਯ ਤਤੋਤਿ ਅਸਿਤਸ੍ਸ ਵਚਨਤੋ ਅਨਨ੍ਤਰਂ. ਉਕ੍ਕਾਮੁਖੇਵਾਤਿ ਉਕ੍ਕਾਮੁਖੇ ਏਵ, ਮੂਸਾਮੁਖੇਤਿ ਵੁਤ੍ਤਂ ਹੋਤਿ. ਸੁਕੁਸਲਸਮ੍ਪਹਟ੍ਠਨ੍ਤਿ ਸੁਕੁਸਲੇਨ ਸੁਵਣ੍ਣਕਾਰੇਨ ਸਙ੍ਘਟ੍ਟਿਤਂ, ਸਙ੍ਘਟ੍ਟੇਨ੍ਤੇਨ ਤਾਪਿਤਨ੍ਤਿ ਅਧਿਪ੍ਪਾਯੋ. ਦਦ੍ਦਲ੍ਲਮਾਨਨ੍ਤਿ ਵਿਜ੍ਜੋਤਮਾਨਂ. ਅਸਿਤਵ੍ਹਯਸ੍ਸਾਤਿ ਅਸਿਤਨਾਮਸ੍ਸ ਦੁਤਿਯੇਨ ਨਾਮੇਨ ਕਣ੍ਹਦੇਵਿਲਸ੍ਸ ਇਸਿਨੋ.

੬੯੩. ਸਤ੍ਤਮਗਾਥਾਯ ਤਾਰਾਸਭਂ ਵਾਤਿ ਤਾਰਾਨਂ ਉਸਭਸਦਿਸਂ, ਚਨ੍ਦਨ੍ਤਿ ਅਧਿਪ੍ਪਾਯੋ. ਵਿਸੁਦ੍ਧਨ੍ਤਿ ਅਬ੍ਭਾਦਿਉਪਕ੍ਕਿਲੇਸਰਹਿਤਂ. ਸਰਦਰਿਵਾਤਿ ਸਰਦੇ ਇਵ. ਆਨਨ੍ਦਜਾਤੋਤਿ ਸਵਨਮਤ੍ਤੇਨੇਵ ਉਪ੍ਪਨ੍ਨਾਯ ਪੀਤਿਯਾ ਪੀਤਿਜਾਤੋ. ਅਲਤ੍ਥ ਪੀਤਿਨ੍ਤਿ ਦਿਸ੍ਵਾ ਪੁਨਪਿ ਪੀਤਿਂ ਲਭਿ.

੬੯੪. ਤਤੋ ਪਰਂ ਬੋਧਿਸਤ੍ਤਸ੍ਸ ਦੇਵੇਹਿ ਸਦਾ ਪਯੁਜ੍ਜਮਾਨਸਕ੍ਕਾਰਦੀਪਨਤ੍ਥਂ ਵੁਤ੍ਤਅਟ੍ਠਮਗਾਥਾਯ ਅਨੇਕਸਾਖਨ੍ਤਿ ਅਨੇਕਸਲਾਕਂ. ਸਹਸ੍ਸਮਣ੍ਡਲਨ੍ਤਿ ਰਤ੍ਤਸੁਵਣ੍ਣਮਯਸਹਸ੍ਸਮਣ੍ਡਲਯੁਤ੍ਤਂ. ਛਤ੍ਤਨ੍ਤਿ ਦਿਬ੍ਬਸੇਤਚ੍ਛਤ੍ਤਂ. ਵੀਤਿਪਤਨ੍ਤੀਤਿ ਸਰੀਰਂ ਬੀਜਮਾਨਾ ਪਤਨੁਪ੍ਪਤਨਂ ਕਰੋਨ੍ਤਿ.

੬੯੫. ਨਵਮਗਾਥਾਯ ਜਟੀਤਿ ਜਟਿਲੋ. ਕਣ੍ਹਸਿਰਿਵ੍ਹਯੋਤਿ ਕਣ੍ਹਸਦ੍ਦੇਨ ਚ ਸਿਰਿਸਦ੍ਦੇਨ ਚ ਅਵ੍ਹਯਮਾਨੋ. ਤਂ ਕਿਰ ‘‘ਸਿਰਿਕਣ੍ਹੋ’’ਤਿਪਿ ਅਵ੍ਹਯਨ੍ਤਿ ਆਮਨ੍ਤੇਨ੍ਤਿ, ਆਲਪਨ੍ਤੀਤਿ ਵੁਤ੍ਤਂ ਹੋਤਿ. ਪਣ੍ਡੁਕਮ੍ਬਲੇਤਿ ਰਤ੍ਤਕਮ੍ਬਲੇ. ਅਧਿਕਾਰਤੋ ਚੇਤ੍ਥ ‘‘ਕੁਮਾਰ’’ਨ੍ਤਿ ਵਤ੍ਤਬ੍ਬਂ, ਪਾਠਸੇਸੋ ਵਾ ਕਾਤਬ੍ਬੋ. ਪੁਰਿਮਗਾਥਾਯ ਚ ਅਹਤ੍ਥਪਾਸਗਤਂ ਸਨ੍ਧਾਯ ‘‘ਦਿਸ੍ਵਾ’’ਤਿ ਵੁਤ੍ਤਂ. ਇਧ ਪਨ ਹਤ੍ਥਪਾਸਗਤਂ ਪਟਿਗ੍ਗਹਣਤ੍ਥਂ ਉਪਨੀਤਂ, ਤਸ੍ਮਾ ਪੁਨ ਵਚਨਂ ‘‘ਦਿਸ੍ਵਾ’’ਤਿ. ਪੁਰਿਮਂ ਵਾ ਦਸ੍ਸਨਪੀਤਿਲਾਭਾਪੇਕ੍ਖਂ ਗਾਥਾਵਸਾਨੇ ‘‘ਵਿਪੁਲਮਲਤ੍ਥ ਪੀਤਿ’’ਨ੍ਤਿ ਵਚਨਤੋ, ਇਦਂ ਪਟਿਗ੍ਗਹਾਪੇਕ੍ਖਂ ਅਵਸਾਨੇ ‘‘ਸੁਮਨੋ ਪਟਿਗ੍ਗਹੇ’’ਤਿ ਵਚਨਤੋ. ਪੁਰਿਮਞ੍ਚ ਕੁਮਾਰਸਮ੍ਬਨ੍ਧਮੇਵ, ਇਦਂ ਸੇਤਚ੍ਛਤ੍ਤਸਮ੍ਬਨ੍ਧਮ੍ਪਿ. ਦਿਸ੍ਵਾਤਿ ਸਤਸਹਸ੍ਸਗ੍ਘਨਕੇ ਗਨ੍ਧਾਰਰਤ੍ਤਕਮ੍ਬਲੇ ਸੁਵਣ੍ਣਨਿਕ੍ਖਂ ਵਿਯ ਕੁਮਾਰਂ ‘‘ਛਤ੍ਤਂ ਮਰੂ’’ਤਿ ਏਤ੍ਥ ਵੁਤ੍ਤਪ੍ਪਕਾਰਂ ਸੇਤਚ੍ਛਤ੍ਤਂ ਧਾਰਿਯਨ੍ਤਂ ਮੁਦ੍ਧਨਿ ਦਿਸ੍ਵਾ. ਕੇਚਿ ਪਨ ‘‘ਇਦਂ ਮਾਨੁਸਕਂ ਛਤ੍ਤਂ ਸਨ੍ਧਾਯ ਵੁਤ੍ਤ’’ਨ੍ਤਿ ਭਣਨ੍ਤਿ. ਯਥੇਵ ਹਿ ਦੇਵਾ, ਏਵਂ ਮਨੁਸ੍ਸਾਪਿ ਛਤ੍ਤਚਾਮਰਮੋਰਹਤ੍ਥਤਾਲਵਣ੍ਟਵਾਲ਼ਬੀਜਨਿਹਤ੍ਥਾ ਮਹਾਪੁਰਿਸਂ ਉਪਗਚ੍ਛਨ੍ਤੀਤਿ. ਏਵਂ ਸਨ੍ਤੇਪਿ ਨ ਤਸ੍ਸ ਵਚਨੇਨ ਕੋਚਿਪਿ ਅਤਿਸਯੋ ਅਤ੍ਥਿ, ਤਸ੍ਮਾ ਯਥਾਵੁਤ੍ਤਮੇਵ ਸੁਨ੍ਦਰਂ. ਪਟਿਗ੍ਗਹੇਤਿ ਉਭੋਹਿ ਹਤ੍ਥੇਹਿ ਪਟਿਗ੍ਗਹੇਸਿ. ਇਸਿਂ ਕਿਰ ਵਨ੍ਦਾਪੇਤੁਂ ਕੁਮਾਰਂ ਉਪਨੇਸੁਂ. ਅਥਸ੍ਸ ਪਾਦਾ ਪਰਿਵਤ੍ਤਿਤ੍ਵਾ ਇਸਿਸ੍ਸ ਮਤ੍ਥਕੇ ਪਤਿਟ੍ਠਹਿਂਸੁ. ਸੋ ਤਮ੍ਪਿ ਅਚ੍ਛਰਿਯਂ ਦਿਸ੍ਵਾ ਉਦਗ੍ਗਚਿਤ੍ਤੋ ਸੁਮਨੋ ਪਟਿਗ੍ਗਹੇਸਿ.

੬੯੬. ਦਸਮਗਾਥਾਯਂ ਜਿਗੀਸਕੋਤਿ ਜਿਗੀਸਨ੍ਤੋ ਮਗ੍ਗਨ੍ਤੋ ਪਰਿਯੇਸਨ੍ਤੋ, ਉਪਪਰਿਕ੍ਖਨ੍ਤੋਤਿ ਵੁਤ੍ਤਂ ਹੋਤਿ. ਲਕ੍ਖਣਮਨ੍ਤਪਾਰਗੂਤਿ ਲਕ੍ਖਣਾਨਂ ਵੇਦਾਨਞ੍ਚ ਪਾਰਂ ਗਤੋ. ਅਨੁਤ੍ਤਰਾਯਨ੍ਤਿ ਅਨੁਤ੍ਤਰੋ ਅਯਂ. ਸੋ ਕਿਰ ਅਤ੍ਤਨੋ ਅਭਿਮੁਖਾਗਤੇਸੁ ਮਹਾਸਤ੍ਤਸ੍ਸ ਪਾਦਤਲੇਸੁ ਚਕ੍ਕਾਨਿ ਦਿਸ੍ਵਾ ਤਦਨੁਸਾਰੇਨ ਸੇਸਲਕ੍ਖਣਾਨਿ ਜਿਗੀਸਨ੍ਤੋ ਸਬ੍ਬਂ ਲਕ੍ਖਣਸਮ੍ਪਤ੍ਤਿਂ ਦਿਸ੍ਵਾ ‘‘ਅਦ੍ਧਾਯਂ ਬੁਦ੍ਧੋ ਭਵਿਸ੍ਸਤੀ’’ਤਿ ਞਤ੍ਵਾ ਏਵਮਾਹ.

੬੯੭. ਏਕਾਦਸਾਯਂ ਅਥਤ੍ਤਨੋ ਗਮਨਨ੍ਤਿ ਪਟਿਸਨ੍ਧਿਵਸੇਨ ਅਰੂਪਗਮਨਂ. ਅਕਲ੍ਯਰੂਪੋ ਗਲ਼ਯਤਿ ਅਸ੍ਸੁਕਾਨੀਤਿ ਤਂ ਅਤ੍ਤਨੋ ਅਰੂਪੂਪਪਤ੍ਤਿਂ ਅਨੁਸ੍ਸਰਿਤ੍ਵਾ ‘‘ਨ ਦਾਨਾਹਂ ਅਸ੍ਸ ਧਮ੍ਮਦੇਸਨਂ ਸੋਤੁਂ ਲਚ੍ਛਾਮੀ’’ਤਿ ਅਤੁਟ੍ਠਰੂਪੋ ਬਲਵਸੋਕਾਭਿਭਵੇਨ ਦੋਮਨਸ੍ਸਜਾਤੋ ਹੁਤ੍ਵਾ ਅਸ੍ਸੂਨਿ ਪਾਤੇਤਿ ਗਲ਼ਯਤਿ. ‘‘ਗਰਯਤੀ’’ਤਿਪਿ ਪਾਠੋ. ਯਦਿ ਪਨੇਸ ਰੂਪਭਵੇ ਚਿਤ੍ਤਂ ਨਮੇਯ੍ਯ, ਕਿਂ ਤਤ੍ਥ ਨ ਉਪ੍ਪਜ੍ਜੇਯ੍ਯ, ਯੇਨੇਵਂ ਰੋਦਤੀਤਿ? ਨ ਨ ਉਪ੍ਪਜ੍ਜੇਯ੍ਯ, ਅਕੁਸਲਤਾਯ ਪਨੇਤਂ ਵਿਧਿਂ ਨ ਜਾਨਾਤਿ. ਏਵਂ ਸਨ੍ਤੇਪਿ ਦੋਮਨਸ੍ਸੁਪ੍ਪਤ੍ਤਿਯੇਵਸ੍ਸ ਅਯੁਤ੍ਤਾ ਸਮਾਪਤ੍ਤਿਲਾਭੇਨ ਵਿਕ੍ਖਮ੍ਭਿਤਤ੍ਤਾਤਿ ਚੇ? ਨ, ਵਿਕ੍ਖਮ੍ਭਿਤਤ੍ਤਾ ਏਵ. ਮਗ੍ਗਭਾਵਨਾਯ ਸਮੁਚ੍ਛਿਨ੍ਨਾ ਹਿ ਕਿਲੇਸਾ ਨ ਉਪ੍ਪਜ੍ਜਨ੍ਤਿ, ਸਮਾਪਤ੍ਤਿਲਾਭੀਨਂ ਪਨ ਬਲਵਪਚ੍ਚਯੇਨ ਉਪ੍ਪਜ੍ਜਨ੍ਤਿ. ਉਪ੍ਪਨ੍ਨੇ ਕਿਲੇਸੇ ਪਰਿਹੀਨਜ੍ਝਾਨਤ੍ਤਾ ਕੁਤਸ੍ਸ ਅਰੂਪਗਮਨਨ੍ਤਿ ਚੇ? ਅਪ੍ਪਕਸਿਰੇਨ ਪੁਨਾਧਿਗਮਤੋ. ਸਮਾਪਤ੍ਤਿਲਾਭਿਨੋ ਹਿ ਉਪ੍ਪਨ੍ਨੇ ਕਿਲੇਸੇ ਬਲਵਵੀਤਿਕ੍ਕਮਂ ਅਨਾਪਜ੍ਜਨ੍ਤਾ ਵੂਪਸਨ੍ਤਮਤ੍ਤੇਯੇਵ ਕਿਲੇਸਵੇਗੇ ਪੁਨ ਤਂ ਵਿਸੇਸਂ ਅਪ੍ਪਕਸਿਰੇਨੇਵਾਧਿਗਚ੍ਛਨ੍ਤਿ, ‘‘ਪਰਿਹੀਨਵਿਸੇਸਾ ਇਮੇ’’ਤਿਪਿ ਦੁਵਿਞ੍ਞੇਯ੍ਯਾ ਹੋਨ੍ਤਿ, ਤਾਦਿਸੋ ਚ ਏਸੋ. ਨੋ ਚੇ ਕੁਮਾਰੇ ਭਵਿਸ੍ਸਤਿ ਅਨ੍ਤਰਾਯੋਤਿ ਨ ਭਵਿਸ੍ਸਤਿ ਨੁ ਖੋ ਇਮਸ੍ਮਿਂ ਕੁਮਾਰੇ ਅਨ੍ਤਰਾਯੋ.

੬੯੮. ਦ੍ਵਾਦਸਾਯਂ ਨ ਓਰਕਾਯਨ੍ਤਿ ਅਯਂ ਓਰਕੋ ਪਰਿਤ੍ਤੋ ਨ ਹੋਤਿ. ਉਤ੍ਤਰਗਾਥਾਯ ਵਤ੍ਤਬ੍ਬਂ ਬੁਦ੍ਧਭਾਵਂ ਸਨ੍ਧਾਯਾਹ.

੬੯੯. ਤੇਰਸਾਯਂ ਸਮ੍ਬੋਧਿਯਗ੍ਗਨ੍ਤਿ ਸਬ੍ਬਞ੍ਞੁਤਞ੍ਞਾਣਂ. ਤਞ੍ਹਿ ਅਵਿਪਰੀਤਭਾਵੇਨ ਸਮ੍ਮਾ ਬੁਜ੍ਝਨਤੋ ਸਮ੍ਬੋਧਿ, ਕਤ੍ਥਚਿ ਆਵਰਣਾਭਾਵੇਨ ਸਬ੍ਬਞਾਣੁਤ੍ਤਮਤੋ ‘‘ਅਗ੍ਗ’’ਨ੍ਤਿ ਵੁਚ੍ਚਤਿ. ਫੁਸਿਸ੍ਸਤੀਤਿ ਪਾਪੁਣਿਸ੍ਸਤਿ. ਪਰਮਵਿਸੁਦ੍ਧਦਸ੍ਸੀਤਿ ਨਿਬ੍ਬਾਨਦਸ੍ਸੀ. ਤਞ੍ਹਿ ਏਕਨ੍ਤਵਿਸੁਦ੍ਧਤ੍ਤਾ ਪਰਮਵਿਸੁਦ੍ਧਂ. ਵਿਤ੍ਥਾਰਿਕਸ੍ਸਾਤਿ ਵਿਤ੍ਥਾਰਿਕਂ ਅਸ੍ਸ. ਬ੍ਰਹ੍ਮਚਰਿਯਨ੍ਤਿ ਸਾਸਨਂ.

੭੦੦. ਚੁਦ੍ਦਸਾਯਂ ਅਥਨ੍ਤਰਾਤਿ ਅਨ੍ਤਰਾਯੇਵ ਅਸ੍ਸ, ਸਮ੍ਬੋਧਿਪ੍ਪਤ੍ਤਿਤੋ ਓਰਤੋ ਏਵਾਤਿ ਵੁਤ੍ਤਂ ਹੋਤਿ. ਨ ਸੋਸ੍ਸਨ੍ਤਿ ਨ ਸੁਣਿਸ੍ਸਂ. ਅਸਮਧੁਰਸ੍ਸਾਤਿ ਅਸਮਵੀਰਿਯਸ੍ਸ. ਅਟ੍ਟੋਤਿ ਆਤੁਰੋ. ਬ੍ਯਸਨਂ ਗਤੋਤਿ ਸੁਖਵਿਨਾਸਂ ਪਤ੍ਤੋ. ਅਘਾਵੀਤਿ ਦੁਕ੍ਖਿਤੋ, ਸਬ੍ਬਂ ਦੋਮਨਸ੍ਸੁਪ੍ਪਾਦਮੇਵ ਸਨ੍ਧਾਯਾਹ. ਦੋਮਨਸ੍ਸੇਨ ਹਿ ਸੋ ਆਤੁਰੋ. ਤਞ੍ਚਸ੍ਸ ਸੁਖਬ੍ਯਸਨਤੋ ਬ੍ਯਸਨਂ, ਸੁਖਵਿਨਾਸਨਤੋਤਿ ਵੁਤ੍ਤਂ ਹੋਤਿ. ਤੇਨ ਚ ਸੋ ਚੇਤਸਿਕਅਘਭੂਤੇਨ ਅਘਾਵੀ.

੭੦੧. ਪਨ੍ਨਰਸਾਯਂ ਵਿਪੁਲਂ ਜਨੇਤ੍ਵਾਨਾਤਿ ਵਿਪੁਲਂ ਜਨੇਤ੍ਵਾ. ਅਯਮੇਵ ਵਾ ਪਾਠੋ. ਨਿਗ੍ਗਮਾਤਿ ਨਿਗ੍ਗਤੋ. ਏਵਂ ਨਿਗ੍ਗਤੋ ਚ ਸੋ ਭਾਗਿਨੇਯ੍ਯਂ ਸਯਨ੍ਤਿ ਸਕਂ ਭਾਗਿਨੇਯ੍ਯਂ, ਅਤ੍ਤਨੋ ਭਗਿਨਿਯਾ ਪੁਤ੍ਤਨ੍ਤਿ ਵੁਤ੍ਤਂ ਹੋਤਿ. ਸਮਾਦਪੇਸੀਤਿ ਅਤ੍ਤਨੋ ਅਪ੍ਪਾਯੁਕਭਾਵਂ ਞਤ੍ਵਾ ਕਨਿਟ੍ਠਭਗਿਨਿਯਾ ਚ ਪੁਤ੍ਤਸ੍ਸ ਨਾਲਕਸ੍ਸ ਮਾਣਵਕਸ੍ਸ ਉਪਚਿਤਪੁਞ੍ਞਤਂ ਅਤ੍ਤਨੋ ਬਲੇਨ ਞਤ੍ਵਾ ‘‘ਵੁਡ੍ਢਿਪ੍ਪਤ੍ਤੋ ਪਮਾਦਮ੍ਪਿ ਆਪਜ੍ਜੇਯ੍ਯਾ’’ਤਿ ਨਂ ਅਨੁਕਮ੍ਪਮਾਨੋ ਭਗਿਨਿਯਾ ਘਰਂ ਗਨ੍ਤ੍ਵਾ ‘‘ਕਹਂ ਨਾਲਕੋ’’ਤਿ. ‘‘ਬਹਿ, ਭਨ੍ਤੇ, ਕੀਲ਼ਤੀ’’ਤਿ. ‘‘ਆਨੇਥ ਨ’’ਨ੍ਤਿ ਆਣਾਪੇਤ੍ਵਾ ਤਙ੍ਖਣਂਯੇਵ ਤਾਪਸਪਬ੍ਬਜ੍ਜਂ ਪਬ੍ਬਾਜੇਤ੍ਵਾ ਸਮਾਦਪੇਸਿ ਓਵਦਿ ਅਨੁਸਾਸਿ. ਕਥਂ? ‘‘ਬੁਦ੍ਧੋਤਿ ਘੋਸਂ…ਪੇ… ਬ੍ਰਹ੍ਮਚਰਿਯ’’ਨ੍ਤਿ ਸੋਲ਼ਸਮਗਾਥਮਾਹ.

੭੦੨. ਤਤ੍ਥ ਯਦ ਪਰਤੋਤਿ ਯਦਾ ਪਰਤੋ. ਧਮ੍ਮਮਗ੍ਗਨ੍ਤਿ ਪਰਮਧਮ੍ਮਸ੍ਸ ਨਿਬ੍ਬਾਨਸ੍ਸ ਮਗ੍ਗਂ, ਧਮ੍ਮਂ ਵਾ ਅਗ੍ਗਂ ਸਹ ਪਟਿਪਦਾਯ ਨਿਬ੍ਬਾਨਂ. ਤਸ੍ਮਿਨ੍ਤਿ ਤਸ੍ਸ ਸਨ੍ਤਿਕੇ. ਬ੍ਰਹ੍ਮਚਰਿਯਨ੍ਤਿ ਸਮਣਧਮ੍ਮਂ.

੭੦੩. ਸਤ੍ਤਰਸਾਯਂ ਤਾਦਿਨਾਤਿ ਤਸ੍ਸਣ੍ਠਿਤੇਨ, ਤਸ੍ਮਿਂ ਸਮਯੇ ਕਿਲੇਸਵਿਕ੍ਖਮ੍ਭਨੇ ਸਮਾਧਿਲਾਭੇ ਚ ਸਤਿ ਵਿਕ੍ਖਮ੍ਭਿਤਕਿਲੇਸੇਨ ਸਮਾਹਿਤਚਿਤ੍ਤੇਨ ਚਾਤਿ ਅਧਿਪ੍ਪਾਯੋ. ਅਨਾਗਤੇ ਪਰਮਵਿਸੁਦ੍ਧਦਸ੍ਸਿਨਾਤਿ ‘‘ਅਯਂ ਨਾਲਕੋ ਅਨਾਗਤੇ ਕਾਲੇ ਭਗਵਤੋ ਸਨ੍ਤਿਕੇ ਪਰਮਵਿਸੁਦ੍ਧਂ ਨਿਬ੍ਬਾਨਂ ਪਸ੍ਸਿਸ੍ਸਤੀ’’ਤਿ ਏਵਂ ਦਿਟ੍ਠਤ੍ਤਾ ਸੋ ਇਸਿ ਇਮਿਨਾ ਪਰਿਯਾਯੇਨ ‘‘ਅਨਾਗਤੇ ਪਰਮਵਿਸੁਦ੍ਧਦਸ੍ਸੀ’’ਤਿ ਵੁਤ੍ਤੋ. ਤੇਨ ਅਨਾਗਤੇ ਪਰਮਵਿਸੁਦ੍ਧਦਸ੍ਸਿਨਾ. ਉਪਚਿਤਪੁਞ੍ਞਸਞ੍ਚਯੋਤਿ ਪਦੁਮੁਤ੍ਤਰਤੋ ਪਭੁਤਿ ਕਤਪੁਞ੍ਞਸਞ੍ਚਯੋ. ਪਤਿਕ੍ਖਨ੍ਤਿ ਆਗਮਯਮਾਨੋ. ਪਰਿਵਸੀਤਿ ਪਬ੍ਬਜਿਤ੍ਵਾ ਤਾਪਸਵੇਸੇਨ ਵਸਿ. ਰਕ੍ਖਿਤਿਨ੍ਦ੍ਰਿਯੋਤਿ ਰਕ੍ਖਿਤਸੋਤਿਨ੍ਦ੍ਰਿਯੋ ਹੁਤ੍ਵਾ. ਸੋ ਕਿਰ ਤਤੋ ਪਭੁਤਿ ਉਦਕੇ ਨ ਨਿਮੁਜ੍ਜਿ ‘‘ਉਦਕਂ ਪਵਿਸਿਤ੍ਵਾ ਸੋਤਿਨ੍ਦ੍ਰਿਯਂ ਵਿਨਾਸੇਯ੍ਯ, ਤਤੋ ਧਮ੍ਮਸ੍ਸਵਨਬਾਹਿਰੋ ਭਵੇਯ੍ਯ’’ਨ੍ਤਿ ਚਿਨ੍ਤੇਤ੍ਵਾ.

੭੦੪. ਅਟ੍ਠਾਰਸਾਯਂ ਸੁਤ੍ਵਾਨ ਘੋਸਨ੍ਤਿ ਸੋ ਨਾਲਕੋ ਏਵਂ ਪਰਿਵਸਨ੍ਤੋ ਅਨੁਪੁਬ੍ਬੇਨ ਭਗਵਤਾ ਸਮ੍ਬੋਧਿਂ ਪਤ੍ਵਾ ਬਾਰਾਣਸਿਯਂ ਧਮ੍ਮਚਕ੍ਕੇ ਪਵਤ੍ਤਿਤੇ ਤਂ ‘‘ਭਗਵਤਾ ਧਮ੍ਮਚਕ੍ਕਂ ਪਵਤ੍ਤਿਤਂ, ਸਮ੍ਮਾਸਮ੍ਬੁਦ੍ਧੋ ਵਤ ਸੋ ਭਗਵਾ ਉਪ੍ਪਨ੍ਨੋ’’ਤਿਆਦਿਨਾ ਨਯੇਨ ਜਿਨਵਰਚਕ੍ਕਵਤ੍ਤਨੇ ਪਵਤ੍ਤਘੋਸਂ ਅਤ੍ਤਨੋ ਅਤ੍ਥਕਾਮਾਹਿ ਦੇਵਤਾਹਿ ਆਗਨ੍ਤ੍ਵਾ ਆਰੋਚਿਤਂ ਸੁਤ੍ਵਾ. ਗਨ੍ਤ੍ਵਾਨ ਦਿਸ੍ਵਾ ਇਸਿਨਿਸਭਨ੍ਤਿ ਸਤ੍ਤਾਹਂ ਦੇਵਤਾਹਿ ਮੋਨੇਯ੍ਯਕੋਲਾਹਲੇ ਕਯਿਰਮਾਨੇ ਸਤ੍ਤਮੇ ਦਿਵਸੇ ਇਸਿਪਤਨਂ ਗਨ੍ਤ੍ਵਾ ‘‘ਨਾਲਕੋ ਆਗਮਿਸ੍ਸਤਿ, ਤਸ੍ਸ ਧਮ੍ਮਂ ਦੇਸੇਸ੍ਸਾਮੀ’’ਤਿ ਇਮਿਨਾ ਚ ਅਭਿਸਨ੍ਧਿਨਾ ਵਰਬੁਦ੍ਧਾਸਨੇ ਨਿਸਿਨ੍ਨਂ ਦਿਸ੍ਵਾ ਨਿਸਭਸਦਿਸਂ ਇਸਿਨਿਸਭਂ ਭਗਵਨ੍ਤਂ. ਪਸਨ੍ਨੋਤਿ ਸਹ ਦਸ੍ਸਨੇਨੇਵ ਪਸਨ੍ਨਚਿਤ੍ਤੋ ਹੁਤ੍ਵਾ. ਮੋਨੇਯ੍ਯਸੇਟ੍ਠਨ੍ਤਿ ਞਾਣੁਤ੍ਤਮਂ, ਮਗ੍ਗਞਾਣਨ੍ਤਿ ਵੁਤ੍ਤਂ ਹੋਤਿ. ਸਮਾਗਤੇ ਅਸਿਤਾਵ੍ਹਯਸ੍ਸ ਸਾਸਨੇਤਿ ਅਸਿਤਸ੍ਸ ਇਸਿਨੋ ਓਵਾਦਕਾਲੇ ਅਨੁਪ੍ਪਤ੍ਤੇ. ਤੇਨ ਹਿ – ‘‘ਯਦਾ ਵਿਵਰਤਿ ਧਮ੍ਮਮਗ੍ਗਂ, ਤਦਾ ਗਨ੍ਤ੍ਵਾ ਸਮਯਂ ਪਰਿਪੁਚ੍ਛਮਾਨੋ ਚਰਸ੍ਸੁ ਤਸ੍ਮਿਂ ਭਗਵਤਿ ਬ੍ਰਹ੍ਮਚਰਿਯ’’ਨ੍ਤਿ ਅਨੁਸਿਟ੍ਠੋ, ਅਯਞ੍ਚ ਸੋ ਕਾਲੋ. ਤੇਨ ਵੁਤ੍ਤਂ – ‘‘ਸਮਾਗਤੇ ਅਸਿਤਾਵ੍ਹਯਸ੍ਸ ਸਾਸਨੇ’’ਤਿ. ਸੇਸਮੇਤ੍ਥ ਪਾਕਟਮੇਵ.

ਅਯਂ ਤਾਵ ਵਤ੍ਥੁਗਾਥਾਵਣ੍ਣਨਾ.

੭੦੫. ਪੁਚ੍ਛਾਗਾਥਾਦ੍ਵਯੇ ਅਞ੍ਞਾਤਮੇਤਨ੍ਤਿ ਵਿਦਿਤਂ ਮਯਾ ਏਤਂ. ਯਥਾਤਥਨ੍ਤਿ ਅਵਿਪਰੀਤਂ. ਕੋ ਅਧਿਪ੍ਪਾਯੋ? ਯਂ ਅਸਿਤੋ ‘‘ਸਮ੍ਬੋਧਿਯਗ੍ਗਂ ਫੁਸਿਸ੍ਸਤਾਯਂ ਕੁਮਾਰੋ’’ਤਿ ਞਤ੍ਵਾ ‘‘ਬੁਦ੍ਧੋਤਿ ਘੋਸਂ ਯਦ ਪਰਤੋ ਸੁਣੋਸਿ, ਸਮ੍ਬੋਧਿਪ੍ਪਤ੍ਤੋ ਵਿਵਰਤਿ ਧਮ੍ਮਮਗ੍ਗ’’ਨ੍ਤਿ ਮਂ ਅਵਚ, ਤਦੇਤਂ ਮਯਾ ਅਸਿਤਸ੍ਸ ਵਚਨਂ ਅਜ੍ਜ ਭਗਵਨ੍ਤਂ ਸਕ੍ਖਿਂ ਦਿਸ੍ਵਾ ‘‘ਯਥਾਤਥਮੇਵਾ’’ਤਿ ਅਞ੍ਞਾਤਨ੍ਤਿ. ਤਂ ਤਨ੍ਤਿ ਤਸ੍ਮਾ ਤਂ. ਸਬ੍ਬਧਮ੍ਮਾਨ ਪਾਰਗੁਨ੍ਤਿ ਹੇਮਵਤਸੁਤ੍ਤੇ ਵੁਤ੍ਤਨਯੇਨ ਛਹਿ ਆਕਾਰੇਹਿ. ਸਬ੍ਬਧਮ੍ਮਾਨਂ ਪਾਰਗਤਂ.

੭੦੬. ਅਨਗਾਰਿਯੁਪੇਤਸ੍ਸਾਤਿ ਅਨਗਾਰਿਯਂ ਉਪੇਤਸ੍ਸ, ਪਬ੍ਬਜਿਤਸ੍ਸਾਤਿ ਅਤ੍ਥੋ. ਭਿਕ੍ਖਾਚਰਿਯਂ ਜਿਗੀਸਤੋਤਿ ਅਰਿਯੇਹਿ ਆਚਿਣ੍ਣਂ ਅਨੁਪਕ੍ਕਿਲਿਟ੍ਠਂ ਭਿਕ੍ਖਾਚਰਿਯਂ ਪਰਿਯੇਸਮਾਨਸ੍ਸ. ਮੋਨੇਯ੍ਯਨ੍ਤਿ ਮੁਨੀਨਂ ਸਨ੍ਤਕਂ. ਉਤ੍ਤਮਂ ਪਦਨ੍ਤਿ ਉਤ੍ਤਮਪਟਿਪਦਂ. ਸੇਸਮੇਤ੍ਥ ਪਾਕਟਮੇਵ.

੭੦੭. ਅਥਸ੍ਸ ਏਵਂ ਪੁਟ੍ਠੋ ਭਗਵਾ ‘‘ਮੋਨੇਯ੍ਯਂ ਤੇ ਉਪਞ੍ਞਿਸ੍ਸ’’ਨ੍ਤਿਆਦਿਨਾ ਨਯੇਨ ਮੋਨੇਯ੍ਯਪਟਿਪਦਂ ਬ੍ਯਾਕਾਸਿ. ਤਤ੍ਥ ਉਪਞ੍ਞਿਸ੍ਸਨ੍ਤਿ ਉਪਞ੍ਞਾਪੇਯ੍ਯਂ, ਵਿਵਰੇਯ੍ਯਂ ਪਞ੍ਞਾਪੇਯ੍ਯਨ੍ਤਿ ਅਤ੍ਥੋ. ਦੁਕ੍ਕਰਂ ਦੁਰਭਿਸਮ੍ਭਵਨ੍ਤਿ ਕਾਤੁਞ੍ਚ ਦੁਕ੍ਖਂ ਕਯਿਰਮਾਨਞ੍ਚ ਸਮ੍ਭਵਿਤੁਂ ਸਹਿਤੁਂ ਦੁਕ੍ਖਨ੍ਤਿ ਵੁਤ੍ਤਂ ਹੋਤਿ. ਅਯਂ ਪਨੇਤ੍ਥ ਅਧਿਪ੍ਪਾਯੋ – ਅਹਂ ਤੇ ਮੋਨੇਯ੍ਯਂ ਪਞ੍ਞਾਪੇਯ੍ਯਂ, ਯਦਿ ਨਂ ਕਾਤੁਂ ਵਾ ਅਭਿਸਮ੍ਭੋਤੁਂ ਵਾ ਸੁਖਂ ਭਵੇਯ੍ਯ, ਏਵਂ ਪਨ ਦੁਕ੍ਕਰਂ ਦੁਰਭਿਸਮ੍ਭਵਂ ਪੁਥੁਜ੍ਜਨਕਾਲਤੋ ਪਭੁਤਿ ਕਿਲਿਟ੍ਠਚਿਤ੍ਤਂ ਅਨੁਪ੍ਪਾਦੇਤ੍ਵਾ ਪਟਿਪਜ੍ਜਿਤਬ੍ਬਤੋ. ਤਥਾ ਹਿ ਨਂ ਏਕਸ੍ਸ ਬੁਦ੍ਧਸ੍ਸ ਏਕੋਵ ਸਾਵਕੋ ਕਰੋਤਿ ਚ ਸਮ੍ਭੋਤਿ ਚਾਤਿ.

ਏਵਂ ਭਗਵਾ ਮੋਨੇਯ੍ਯਸ੍ਸ ਦੁਕ੍ਕਰਭਾਵਂ ਦੁਰਭਿਸਮ੍ਭਵਤਞ੍ਚ ਦਸ੍ਸੇਨ੍ਤੋ ਨਾਲਕਸ੍ਸ ਉਸ੍ਸਾਹਂ ਜਨੇਤ੍ਵਾ ਤਮਸ੍ਸ ਵਤ੍ਤੁਕਾਮੋ ਆਹ ‘‘ਹਨ੍ਦ ਤੇ ਨਂ ਪਵਕ੍ਖਾਮਿ, ਸਨ੍ਥਮ੍ਭਸ੍ਸੁ ਦਲ਼੍ਹੋ ਭਵਾ’’ਤਿ. ਤਤ੍ਥ ਹਨ੍ਦਾਤਿ ਬ੍ਯਵਸਾਯਤ੍ਥੇ ਨਿਪਾਤੋ. ਤੇ ਨਂ ਪਵਕ੍ਖਾਮੀਤਿ ਤੁਯ੍ਹਂ ਤਂ ਮੋਨੇਯ੍ਯਂ ਪਵਕ੍ਖਾਮਿ. ਸਨ੍ਥਮ੍ਭਸ੍ਸੂਤਿ ਦੁਕ੍ਕਰਕਰਣਸਮਤ੍ਥੇਨ ਵੀਰਿਯੂਪਤ੍ਥਮ੍ਭੇਨ ਅਤ੍ਤਾਨਂ ਉਪਤ੍ਥਮ੍ਭਯ. ਦਲ਼੍ਹੋ ਭਵਾਤਿ ਦੁਰਭਿਸਮ੍ਭਵਸਹਨਸਮਤ੍ਥਾਯ ਅਸਿਥਿਲਪਰਕ੍ਕਮਤਾਯ ਥਿਰੋ ਹੋਤਿ. ਕਿਂ ਵੁਤ੍ਤਂ ਹੋਤਿ? ਯਸ੍ਮਾ ਤ੍ਵਂ ਉਪਚਿਤਪੁਞ੍ਞਸਮ੍ਭਾਰੋ, ਤਸ੍ਮਾਹਂ ਏਕਨ੍ਤਬ੍ਯਵਸਿਤੋਵ ਹੁਤ੍ਵਾ ਏਵਂ ਦੁਕ੍ਕਰਂ ਦੁਰਭਿਸਮ੍ਭਵਮ੍ਪਿ ਸਮਾਨਂ ਤੁਯ੍ਹਂ ਤਂ ਮੋਨੇਯ੍ਯਂ ਪਵਕ੍ਖਾਮਿ, ਸਨ੍ਥਮ੍ਭਸ੍ਸੁ ਦਲ਼੍ਹੋ ਭਵਾਤਿ.

੭੦੮. ਏਵਂ ਪਰਮਸਲ੍ਲੇਖਂ ਮੋਨੇਯ੍ਯਵਤ੍ਤਂ ਵਤ੍ਤੁਕਾਮੋ ਨਾਲਕਂ ਸਨ੍ਥਮ੍ਭਨੇ ਦਲ਼੍ਹੀਭਾਵੇ ਚ ਨਿਯੋਜੇਤ੍ਵਾ ਪਠਮਂ ਤਾਵ ਗਾਮੂਪਨਿਬਦ੍ਧਕਿਲੇਸਪ੍ਪਹਾਨਂ ਦਸ੍ਸੇਨ੍ਤੋ ‘‘ਸਮਾਨਭਾਗ’’ਨ੍ਤਿ ਉਪਡ੍ਢਗਾਥਮਾਹ. ਤਤ੍ਥ ਸਮਾਨਭਾਗਨ੍ਤਿ ਸਮਭਾਗਂ ਏਕਸਦਿਸਂ ਨਿਨ੍ਨਾਨਾਕਰਣਂ. ਅਕ੍ਕੁਟ੍ਠਵਨ੍ਦਿਤਨ੍ਤਿ ਅਕ੍ਕੋਸਞ੍ਚ ਵਨ੍ਦਨਞ੍ਚ.

ਇਦਾਨਿ ਯਥਾ ਤਂ ਸਮਾਨਭਾਗਂ ਕਯਿਰਤਿ, ਤਂ ਉਪਾਯਂ ਦਸ੍ਸੇਨ੍ਤੋ ‘‘ਮਨੋਪਦੋਸ’’ਨ੍ਤਿ ਉਪਡ੍ਢਗਾਥਮਾਹ. ਤਸ੍ਸਤ੍ਥੋ – ਅਕ੍ਕੁਟ੍ਠੋ ਮਨੋਪਦੋਸਂ ਰਕ੍ਖੇਯ੍ਯ, ਵਨ੍ਦਿਤੋ ਸਨ੍ਤੋ ਅਨੁਣ੍ਣਤੋ ਚਰੇ, ਰਞ੍ਞਾਪਿ ਵਨ੍ਦਿਤੋ ਸਮਾਨੋ ‘‘ਮਂ ਵਨ੍ਦਤੀ’’ਤਿ ਉਦ੍ਧਚ੍ਚਂ ਨਾਪਜ੍ਜੇਯ੍ਯ.

੭੦੯. ਇਦਾਨਿ ਅਰਞ੍ਞੂਪਨਿਬਦ੍ਧਕਿਲੇਸਪ੍ਪਹਾਨਂ ਦਸ੍ਸੇਨ੍ਤੋ ‘‘ਉਚ੍ਚਾਵਚਾ’’ਤਿ ਗਾਥਮਾਹ. ਤਸ੍ਸਤ੍ਥੋ – ਅਰਞ੍ਞਸਞ੍ਞਿਤੇ ਦਾਯੇਪਿ ਇਟ੍ਠਾਨਿਟ੍ਠਵਸੇਨ ਉਚ੍ਚਾਵਚਾ ਨਾਨਪ੍ਪਕਾਰਾ ਆਰਮ੍ਮਣਾ ਨਿਚ੍ਛਰਨ੍ਤਿ, ਚਕ੍ਖਾਦੀਨਂ ਆਪਾਥਮਾਗਚ੍ਛਨ੍ਤਿ, ਤੇ ਚ ਖੋ ਅਗ੍ਗਿਸਿਖੂਪਮਾ ਪਰਿਲ਼ਾਹਜਨਕਟ੍ਠੇਨ. ਯਥਾ ਵਾ ਡਯ੍ਹਮਾਨੇ ਵਨੇ ਅਗ੍ਗਿਸਿਖਾ ਨਾਨਪ੍ਪਕਾਰਤਾਯ ਉਚ੍ਚਾਵਚਾ ਨਿਚ੍ਛਰਨ੍ਤਿ, ਸਧੂਮਾਪਿ, ਵਿਧੂਮਾਪਿ, ਨੀਲਾਪਿ, ਪੀਤਾਪਿ, ਰਤ੍ਤਾਪਿ, ਖੁਦ੍ਦਕਾਪਿ, ਮਹਨ੍ਤਾਪਿ, ਏਵਂ ਸੀਹਬ੍ਯਗ੍ਘਮਨੁਸ੍ਸਾਮਨੁਸ੍ਸਵਿਵਿਧਵਿਹਙ੍ਗਵਿਰੁਤਪੁਪ੍ਫਫਲਪਲ੍ਲਵਾਦਿਭੇਦਵਸੇਨ ਨਾਨਪ੍ਪਕਾਰਤਾਯ ਦਾਯੇ ਉਚ੍ਚਾਵਚਾ ਆਰਮ੍ਮਣਾ ਨਿਚ੍ਛਰਨ੍ਤਿ ਭਿਂਸਨਕਾਪਿ, ਰਜਨੀਯਾਪਿ, ਦੋਸਨੀਯਾਪਿ, ਮੋਹਨੀਯਾਪਿ. ਤੇਨਾਹ – ‘‘ਉਚ੍ਚਾਵਚਾ ਨਿਚ੍ਛਰਨ੍ਤਿ, ਦਾਯੇ ਅਗ੍ਗਿਸਿਖੂਪਮਾ’’ਤਿ. ਏਵਂ ਨਿਚ੍ਛਰਨ੍ਤੇਸੁ ਚ ਉਚ੍ਚਾਵਚੇਸੁ ਆਰਮ੍ਮਣੇਸੁ ਯਾ ਕਾਚਿ ਉਯ੍ਯਾਨਵਨਚਾਰਿਕਂ ਗਤਾ ਸਮਾਨਾ ਪਕਤਿਯਾ ਵਾ ਵਨਚਾਰਿਨਿਯੋ ਕਟ੍ਠਹਾਰਿਕਾਦਯੋ ਰਹੋਗਤਂ ਦਿਸ੍ਵਾ ਹਸਿਤਲਪਿਤਰੁਦਿਤਦੁਨ੍ਨਿਵਤ੍ਥਾਦੀਹਿ ਨਾਰਿਯੋ ਮੁਨਿਂ ਪਲੋਭੇਨ੍ਤਿ, ਤਾ ਸੁ ਤਂ ਮਾ ਪਲੋਭਯੁਂ, ਤਾ ਨਾਰਿਯੋ ਤਂ ਮਾ ਪਲੋਭਯੁਂ. ਯਥਾ ਨ ਪਲੋਭੇਨ੍ਤਿ, ਤਥਾ ਕਰੋਹੀਤਿ ਵੁਤ੍ਤਂ ਹੋਤਿ.

੭੧੦-੧੧. ਏਵਮਸ੍ਸ ਭਗਵਾ ਗਾਮੇ ਚ ਅਰਞ੍ਞੇ ਚ ਪਟਿਪਤ੍ਤਿਵਿਧਿਂ ਦਸ੍ਸੇਤ੍ਵਾ ਇਦਾਨਿ ਸੀਲਸਂਵਰਂ ਦਸ੍ਸੇਨ੍ਤੋ ‘‘ਵਿਰਤੋ ਮੇਥੁਨਾ ਧਮ੍ਮਾ’’ਤਿ ਗਾਥਾਦ੍ਵਯਮਾਹ. ਤਤ੍ਥ ਹਿਤ੍ਵਾ ਕਾਮੇ ਪਰੋਪਰੇਤਿ ਮੇਥੁਨਧਮ੍ਮਤੋ ਅਵਸੇਸੇਪਿ ਸੁਨ੍ਦਰੇ ਚ ਅਸੁਨ੍ਦਰੇ ਚ ਪਞ੍ਚ ਕਾਮਗੁਣੇ ਹਿਤ੍ਵਾ. ਤਪ੍ਪਹਾਨੇਨ ਹਿ ਮੇਥੁਨਵਿਰਤਿ ਸੁਸਮ੍ਪਨ੍ਨਾ ਹੋਤਿ. ਤੇਨਾਹ – ‘‘ਹਿਤ੍ਵਾ ਕਾਮੇ ਪਰੋਪਰੇ’’ਤਿ. ਅਯਮੇਤ੍ਥ ਅਧਿਪ੍ਪਾਯੋ. ‘‘ਅਵਿਰੁਦ੍ਧੋ’’ਤਿਆਦੀਨਿ ਪਨ ਪਦਾਨਿ ‘‘ਨ ਹਨੇਯ੍ਯ, ਨ ਘਾਤਯੇ’’ਤਿ ਏਤ੍ਥ ਵੁਤ੍ਤਾਯ ਪਾਣਾਤਿਪਾਤਾਵੇਰਮਣਿਯਾ ਸਮ੍ਪਤ੍ਤਿਦਸ੍ਸਨਤ੍ਥਂ ਵੁਤ੍ਤਾਨਿ. ਤਤ੍ਰਾਯਂ ਸਙ੍ਖੇਪਵਣ੍ਣਨਾ – ਪਰਪਕ੍ਖਿਯੇਸੁ ਪਾਣੇਸੁ ਅਵਿਰੁਦ੍ਧੋ, ਅਤ੍ਤਪਕ੍ਖਿਯੇਸੁ ਅਸਾਰਤ੍ਤੋ, ਸਬ੍ਬੇਪਿ ਸਤਣ੍ਹਨਿਤ੍ਤਣ੍ਹਤਾਯ ਤਸਥਾਵਰੇ ਪਾਣੇ ਜੀਵਿਤੁਕਾਮਤਾਯ ਅਮਰਿਤੁਕਾਮਤਾਯ ਸੁਖਕਾਮਤਾਯ ਦੁਕ੍ਖਪਟਿਕੂਲਤਾਯ ਚ ‘‘ਯਥਾ ਅਹਂ ਤਥਾ ਏਤੇ’’ਤਿ ਅਤ੍ਤਸਮਾਨਤਾਯ ਤੇਸੁ ਵਿਰੋਧਂ ਵਿਨੇਨ੍ਤੋ ਤੇਨੇਵ ਪਕਾਰੇਨ ‘‘ਯਥਾ ਏਤੇ ਤਥਾ ਅਹ’’ਨ੍ਤਿ ਪਰੇਸਂ ਸਮਾਨਤਾਯ ਚ ਅਤ੍ਤਨਿ ਅਨੁਰੋਧਂ ਵਿਨੇਨ੍ਤੋ ਏਵਂ ਉਭਯਥਾਪਿ ਅਨੁਰੋਧਵਿਰੋਧਵਿਪ੍ਪਹੀਨੋ ਹੁਤ੍ਵਾ ਮਰਣਪਟਿਕੂਲਤਾਯ ਅਤ੍ਤਾਨਂ ਉਪਮਂ ਕਤ੍ਵਾ ਪਾਣੇਸੁ ਯੇ ਕੇਚਿ ਤਸੇ ਵਾ ਥਾਵਰੇ ਵਾ ਪਾਣੇ ਨ ਹਨੇਯ੍ਯ ਸਾਹਤ੍ਥਿਕਾਦੀਹਿ ਪਯੋਗੇਹਿ, ਨ ਘਾਤਯੇ ਆਣਤ੍ਤਿਕਾਦੀਹੀਤਿ.

੭੧੨. ਏਵਮਸ੍ਸ ਮੇਥੁਨਵਿਰਤਿਪਾਣਾਤਿਪਾਤਵਿਰਤਿਮੁਖੇਨ ਸਙ੍ਖੇਪਤੋ ਪਾਤਿਮੋਕ੍ਖਸਂਵਰਸੀਲਂ ਵਤ੍ਵਾ ‘‘ਹਿਤ੍ਵਾ ਕਾਮੇ’’ਤਿਆਦੀਹਿ ਇਨ੍ਦ੍ਰਿਯਸਂਵਰਞ੍ਚ ਦਸ੍ਸੇਤ੍ਵਾ ਇਦਾਨਿ ਆਜੀਵਪਾਰਿਸੁਦ੍ਧਿਂ ਦਸ੍ਸੇਨ੍ਤੋ ‘‘ਹਿਤ੍ਵਾ ਇਚ੍ਛਞ੍ਚਾ’’ਤਿਆਦਿਮਾਹ. ਤਸ੍ਸਤ੍ਥੋ – ਯਾਯਂ ਤਣ੍ਹਾ ਏਕਂ ਲਦ੍ਧਾ ਦੁਤਿਯਂ ਇਚ੍ਛਤਿ, ਦ੍ਵੇ ਲਦ੍ਧਾ ਤਤਿਯਂ, ਸਤਸਹਸ੍ਸਂ ਲਦ੍ਧਾ ਤਦੁਤ੍ਤਰਿਮ੍ਪਿ ਇਚ੍ਛਤੀਤਿ ਏਵਂ ਅਪ੍ਪਟਿਲਦ੍ਧਵਿਸਯਂ ਇਚ੍ਛਨਤੋ ‘‘ਇਚ੍ਛਾ’’ਤਿ ਵੁਚ੍ਚਤਿ, ਯੋ ਚਾਯਂ ਪਟਿਲਦ੍ਧਵਿਸਯਲੁਬ੍ਭਨੋ ਲੋਭੋ. ਤਂ ਹਿਤ੍ਵਾ ਇਚ੍ਛਞ੍ਚ ਲੋਭਞ੍ਚ ਯਤ੍ਥ ਸਤ੍ਤੋ ਪੁਥੁਜ੍ਜਨੋ, ਯਸ੍ਮਿਂ ਚੀਵਰਾਦਿਪਚ੍ਚਯੇ ਤੇਹਿ ਇਚ੍ਛਾਲੋਭੇਹਿ ਪੁਥੁਜ੍ਜਨੋ ਸਤ੍ਤੋ ਲਗ੍ਗੋ ਪਟਿਬਦ੍ਧੋ ਤਿਟ੍ਠਤਿ, ਤਤ੍ਥ ਤਂ ਉਭਯਮ੍ਪਿ ਹਿਤ੍ਵਾ ਪਚ੍ਚਯਤ੍ਥਂ ਆਜੀਵਪਾਰਿਸੁਦ੍ਧਿਂ ਅਵਿਰੋਧੇਨ੍ਤੋ ਞਾਣਚਕ੍ਖੁਨਾ ਚਕ੍ਖੁਮਾ ਹੁਤ੍ਵਾ ਇਮਂ ਮੋਨੇਯ੍ਯਪਟਿਪਦਂ ਪਟਿਪਜ੍ਜੇਯ੍ਯ. ਏਵਞ੍ਹਿ ਪਟਿਪਨ੍ਨੋ ਤਰੇਯ੍ਯ ਨਰਕਂ ਇਮਂ, ਦੁਪ੍ਪੂਰਣਟ੍ਠੇਨ ਨਰਕਸਞ੍ਞਿਤਂ ਮਿਚ੍ਛਾਜੀਵਹੇਤੁਭੂਤਂ ਇਮਂ ਪਚ੍ਚਯਤਣ੍ਹਂ ਤਰੇਯ੍ਯ, ਇਮਾਯ ਵਾ ਪਟਿਪਦਾਯ ਤਰੇਯ੍ਯਾਤਿ ਵੁਤ੍ਤਂ ਹੋਤਿ.

੭੧੩. ਏਵਂ ਪਚ੍ਚਯਤਣ੍ਹਾਪਹਾਨਮੁਖੇਨ ਆਜੀਵਪਾਰਿਸੁਦ੍ਧਿਂ ਦਸ੍ਸੇਤ੍ਵਾ ਇਦਾਨਿ ਭੋਜਨੇ ਮਤ੍ਤਞ੍ਞੁਤਾਮੁਖੇਨ ਪਚ੍ਚਯਪਰਿਭੋਗਸੀਲਂ ਤਦਨੁਸਾਰੇਨ ਚ ਯਾਵ ਅਰਹਤ੍ਤਪ੍ਪਤ੍ਤਿ, ਤਾਵ ਪਟਿਪਦਂ ਦਸ੍ਸੇਨ੍ਤੋ ‘‘ਊਨੂਦਰੋ’’ਤਿ ਗਾਥਮਾਹ. ਤਸ੍ਸਤ੍ਥੋ – ਧਮ੍ਮੇਨ ਸਮੇਨ ਲਦ੍ਧੇਸੁ ਇਤਰੀਤਰਚੀਵਰਾਦੀਸੁ ਪਚ੍ਚਯੇਸੁ ਆਹਾਰਂ ਤਾਵ ਆਹਾਰੇਨ੍ਤੋ –

‘‘ਚਤ੍ਤਾਰੋ ਪਞ੍ਚ ਆਲੋਪੇ, ਅਭੁਤ੍ਵਾ ਉਦਕਂ ਪਿਵੇ;

ਅਲਂ ਫਾਸੁਵਿਹਾਰਾਯ, ਪਹਿਤਤ੍ਤਸ੍ਸ ਭਿਕ੍ਖੁਨੋ’’ਤਿ. (ਥੇਰਗਾ. ੯੮੩) –

ਵੁਤ੍ਤਨਯੇਨ ਊਨਉਦਰੋ ਅਸ੍ਸ, ਨ ਵਾਤਭਰਿਤਭਸ੍ਤਾ ਵਿਯ ਉਦ੍ਧੁਮਾਤੁਦਰੋ, ਭਤ੍ਤਸਮ੍ਮਦਪਚ੍ਚਯਾ ਥਿਨਮਿਦ੍ਧਂ ਪਰਿਹਰੇਯ੍ਯਾਤਿ ਵੁਤ੍ਤਂ ਹੋਤਿ. ਊਨੂਦਰੋ ਹੋਨ੍ਤੋਪਿ ਚ ਮਿਤਾਹਾਰੋ ਅਸ੍ਸ ਭੋਜਨੇ ਮਤ੍ਤਞ੍ਞੂ, ‘‘ਨੇਵ ਦਵਾਯਾ’’ਤਿਆਦਿਨਾ ਪਚ੍ਚਵੇਕ੍ਖਣੇਨ ਗੁਣਤੋ ਦੋਸਤੋ ਚ ਪਰਿਚ੍ਛਿਨ੍ਨਾਹਾਰੋ. ਏਵਂ ਮਿਤਾਹਾਰੋ ਸਮਾਨੋਪਿ ਪਚ੍ਚਯਧੁਤਙ੍ਗਪਰਿਯਤ੍ਤਿਅਧਿਗਮਵਸੇਨ ਚਤੁਬ੍ਬਿਧਾਯ ਅਪ੍ਪਿਚ੍ਛਤਾਯ ਅਪ੍ਪਿਚ੍ਛੋ ਅਸ੍ਸ. ਏਕਂਸੇਨ ਹਿ ਮੋਨੇਯ੍ਯਪਟਿਪਦਂ ਪਟਿਪਨ੍ਨੇਨ ਭਿਕ੍ਖੁਨਾ ਏਵਂ ਅਪ੍ਪਿਚ੍ਛੇਨ ਭਵਿਤਬ੍ਬਂ. ਤਤ੍ਥ ਏਕੇਕਸ੍ਮਿਂ ਪਚ੍ਚਯੇ ਤੀਹਿ ਸਨ੍ਤੋਸੇਹਿ ਸਨ੍ਤੁਸ੍ਸਨਾ ਪਚ੍ਚਯਪ੍ਪਿਚ੍ਛਤਾ. ਧੁਤਙ੍ਗਧਰਸ੍ਸੇਵ ਸਤੋ ‘‘ਧੁਤਵਾਤਿ ਮਂ ਪਰੇ ਜਾਨਨ੍ਤੂ’’ਤਿ ਅਨਿਚ੍ਛਨਤਾ ਧੁਤਙ੍ਗਪ੍ਪਿਚ੍ਛਤਾ. ਬਹੁਸ੍ਸੁਤਸ੍ਸੇਵ ਸਤੋ ‘‘ਬਹੁਸ੍ਸੁਤੋਤਿ ਮਂ ਪਰੇ ਜਾਨਨ੍ਤੂ’’ਤਿ ਅਨਿਚ੍ਛਨਤਾ ਪਰਿਯਤ੍ਤਿਅਪ੍ਪਿਚ੍ਛਤਾ ਮਜ੍ਝਨ੍ਤਿਕਤ੍ਥੇਰਸ੍ਸ ਵਿਯ. ਅਧਿਗਮਸਮ੍ਪਨ੍ਨਸ੍ਸੇਵ ਸਤੋ ‘‘ਅਧਿਗਤੋ ਅਯਂ ਕੁਸਲਂ ਧਮ੍ਮਨ੍ਤਿ ਮਂ ਪਰੇ ਜਾਨਨ੍ਤੂ’’ਤਿ ਅਨਿਚ੍ਛਨਤਾ ਅਧਿਗਮਪ੍ਪਿਚ੍ਛਤਾ. ਸਾ ਚ ਅਰਹਤ੍ਤਾਧਿਗਮਤੋ ਓਰਂ ਵੇਦਿਤਬ੍ਬਾ. ਅਰਹਤ੍ਤਾਧਿਗਮਤ੍ਥਞ੍ਹਿ ਅਯਂ ਪਟਿਪਦਾਤਿ. ਏਵਂ ਅਪ੍ਪਿਚ੍ਛੋਪਿ ਚ ਅਰਹਤ੍ਤਮਗ੍ਗੇਨ ਤਣ੍ਹਾਲੋਲੁਪ੍ਪਂ ਹਿਤ੍ਵਾ ਅਲੋਲੁਪੋ ਅਸ੍ਸ. ਏਵਂ ਅਲੋਲੁਪੋ ਹਿ ਸਦਾ ਇਚ੍ਛਾਯ ਨਿਚ੍ਛਾਤੋ ਅਨਿਚ੍ਛੋ ਹੋਤਿ ਨਿਬ੍ਬੁਤੋ, ਯਾਯ ਇਚ੍ਛਾਯ ਛਾਤਾ ਹੋਨ੍ਤਿ ਸਤ੍ਤਾ ਖੁਪ੍ਪਿਪਾਸਾਤੁਰਾ ਵਿਯ ਅਤਿਤ੍ਤਾ, ਤਾਯ ਇਚ੍ਛਾਯ ਅਨਿਚ੍ਛੋ ਹੋਤਿ ਅਨਿਚ੍ਛਤ੍ਤਾ ਚ ਨਿਚ੍ਛਾਤੋ ਹੋਤਿ ਅਨਾਤੁਰੋ ਪਰਮਤਿਤ੍ਤਿਪ੍ਪਤ੍ਤੋ. ਏਵਂ ਨਿਚ੍ਛਾਤਤ੍ਤਾ ਨਿਬ੍ਬੁਤੋ ਹੋਤਿ ਵੂਪਸਨ੍ਤਸਬ੍ਬਕਿਲੇਸਪਰਿਲ਼ਾਹੋਤਿ ਏਵਮੇਤ੍ਥ ਉਪ੍ਪਟਿਪਾਟਿਯਾ ਯੋਜਨਾ ਵੇਦਿਤਬ੍ਬਾ.

੭੧੪. ਏਵਂ ਯਾਵ ਅਰਹਤ੍ਤਪ੍ਪਤ੍ਤਿ, ਤਾਵਪਟਿਪਦਂ ਕਥੇਤ੍ਵਾ ਇਦਾਨਿ ਤਂ ਪਟਿਪਦਂ ਪਟਿਪਨ੍ਨਸ੍ਸ ਭਿਕ੍ਖੁਨੋ ਅਰਹਤ੍ਤਪ੍ਪਤ੍ਤਿਨਿਟ੍ਠਂ ਧੁਤਙ੍ਗਸਮਾਦਾਨਂ ਸੇਨਾਸਨਵਤ੍ਤਞ੍ਚ ਕਥੇਨ੍ਤੋ ‘‘ਸ ਪਿਣ੍ਡਚਾਰ’’ਨ੍ਤਿ ਗਾਥਾਦ੍ਵਯਮਾਹ. ਤਤ੍ਥ ਸ ਪਿਣ੍ਡਚਾਰਂ ਚਰਿਤ੍ਵਾਤਿ ਸੋ ਭਿਕ੍ਖੁ ਭਿਕ੍ਖਂ ਚਰਿਤ੍ਵਾ ਭਤ੍ਤਕਿਚ੍ਚਂ ਵਾ ਕਤ੍ਵਾ. ਵਨਨ੍ਤਮਭਿਹਾਰਯੇਤਿ ਅਪਪਞ੍ਚਿਤੋ ਗਿਹਿਪਪਞ੍ਚੇਨ ਵਨਂ ਏਵ ਗਚ੍ਛੇਯ੍ਯ. ਉਪਟ੍ਠਿਤੋ ਰੁਕ੍ਖਮੂਲਸ੍ਮਿਨ੍ਤਿ ਰੁਕ੍ਖਮੂਲੇ ਠਿਤੋ ਵਾ ਹੁਤ੍ਵਾ. ਆਸਨੂਪਗਤੋਤਿ ਆਸਨਂ ਉਪਗਤੋ ਵਾ ਹੁਤ੍ਵਾ, ਨਿਸਿਨ੍ਨੋਤਿ ਵੁਤ੍ਤਂ ਹੋਤਿ. ਮੁਨੀਤਿ ਮੋਨੇਯ੍ਯਪਟਿਪਦਂ ਪਟਿਪਨ੍ਨੋ. ਏਤ੍ਥ ਚ ‘‘ਪਿਣ੍ਡਚਾਰਂ ਚਰਿਤ੍ਵਾ’’ਤਿ ਇਮਿਨਾ ਪਿਣ੍ਡਪਾਤਿਕਙ੍ਗਂ ਵੁਤ੍ਤਂ. ਯਸ੍ਮਾ ਪਨ ਉਕ੍ਕਟ੍ਠਪਿਣ੍ਡਪਾਤਿਕੋ ਸਪਦਾਨਚਾਰੀ ਏਕਾਸਨਿਕੋ ਪਤ੍ਤਪਿਣ੍ਡਿਕੋ ਖਲੁਪਚ੍ਛਾਭਤ੍ਤਿਕੋ ਚ ਹੋਤਿਯੇਵ, ਤੇਚੀਵਰਿਕਪਂਸੁਕੂਲਮ੍ਪਿ ਚ ਸਮਾਦਿਯਤੇਵ, ਤਸ੍ਮਾ ਇਮਾਨਿਪਿ ਛ ਵੁਤ੍ਤਾਨੇਵ ਹੋਨ੍ਤਿ. ‘‘ਵਨਨ੍ਤਮਭਿਹਾਰਯੇ’’ਤਿ ਇਮਿਨਾ ਪਨ ਆਰਞ੍ਞਿਕਙ੍ਗਂ ਵੁਤ੍ਤਂ, ‘‘ਉਪਟ੍ਠਿਤੋ ਰੁਕ੍ਖਮੂਲਸ੍ਮਿ’’ਨ੍ਤਿ ਇਮਿਨਾ ਰੁਕ੍ਖਮੂਲਿਕਙ੍ਗਂ, ‘‘ਆਸਨੂਪਗਤੋ’’ਤਿ ਇਮਿਨਾ ਨੇਸਜ੍ਜਿਕਙ੍ਗਂ. ਯਥਾਕ੍ਕਮਂ ਪਨ ਏਤੇਸਂ ਅਨੁਲੋਮਤ੍ਤਾ ਅਬ੍ਭੋਕਾਸਿਕਯਥਾਸਨ੍ਥਤਿਕਸੋਸਾਨਿਕਙ੍ਗਾਨਿ ਵੁਤ੍ਤਾਨਿਯੇਵ ਹੋਨ੍ਤੀਤਿ ਏਵਮੇਤਾਯ ਗਾਥਾਯ ਤੇਰਸ ਧੁਤਙ੍ਗਾਨਿ ਨਾਲਕਤ੍ਥੇਰਸ੍ਸ ਕਥੇਸਿ.

੭੧੫. ਸ ਝਾਨਪਸੁਤੋ ਧੀਰੋਤਿ ਸੋ ਅਨੁਪ੍ਪਨ੍ਨਸ੍ਸ ਝਾਨਸ੍ਸ ਉਪ੍ਪਾਦਨੇਨ ਉਪ੍ਪਨ੍ਨਸ੍ਸ ਆਵਜ੍ਜਨਸਮਾਪਜ੍ਜਨਾਧਿਟ੍ਠਾਨਵੁਟ੍ਠਾਨਪਚ੍ਚਵੇਕ੍ਖਣੇਹਿ ਚ ਝਾਨੇਸੁ ਪਸੁਤੋ ਅਨੁਯੁਤ੍ਤੋ. ਧੀਰੋਤਿ ਧਿਤਿਸਮ੍ਪਨ੍ਨੋ. ਵਨਨ੍ਤੇ ਰਮਿਤੋ ਸਿਯਾਤਿ ਵਨੇ ਅਭਿਰਤੋ ਸਿਯਾ, ਗਾਮਨ੍ਤਸੇਨਾਸਨੇ ਨਾਭਿਰਮੇਯ੍ਯਾਤਿ ਵੁਤ੍ਤਂ ਹੋਤਿ. ਝਾਯੇਥ ਰੁਕ੍ਖਮੂਲਸ੍ਮਿਂ, ਅਤ੍ਤਾਨਮਭਿਤੋਸਯਨ੍ਤਿ ਨ ਕੇਵਲਂ ਲੋਕਿਯਜ੍ਝਾਨਪਸੁਤੋਯੇਵ ਸਿਯਾ, ਅਪਿਚ ਖੋ ਤਸ੍ਮਿਂਯੇਵ ਰੁਕ੍ਖਮੂਲੇ ਸੋਤਾਪਤ੍ਤਿਮਗ੍ਗਾਦਿਸਮ੍ਪਯੁਤ੍ਤੇਨ ਲੋਕੁਤ੍ਤਰਜ੍ਝਾਨੇਨਾਪਿ ਅਤ੍ਤਾਨਂ ਅਤੀਵ ਤੋਸੇਨ੍ਤੋ ਝਾਯੇਥ. ਪਰਮਸ੍ਸਾਸਪ੍ਪਤ੍ਤਿਯਾ ਹਿ ਲੋਕੁਤ੍ਤਰਜ੍ਝਾਨੇਨੇਵ ਚਿਤ੍ਤਂ ਅਤੀਵ ਤੁਸ੍ਸਤਿ, ਨ ਅਞ੍ਞੇਨ. ਤੇਨਾਹ – ‘‘ਅਤ੍ਤਾਨਮਭਿਤੋਸਯ’’ਨ੍ਤਿ. ਏਵਮਿਮਾਯ ਗਾਥਾਯ ਝਾਨਪਸੁਤਤਾਯ ਵਨਨ੍ਤਸੇਨਾਸਨਾਭਿਰਤਿਂ ਅਰਹਤ੍ਤਞ੍ਚ ਕਥੇਸਿ.

੭੧੬. ਇਦਾਨਿ ਯਸ੍ਮਾ ਇਮਂ ਧਮ੍ਮਦੇਸਨਂ ਸੁਤ੍ਵਾ ਨਾਲਕਤ੍ਥੇਰੋ ਵਨਨ੍ਤਮਭਿਹਾਰੇਤ੍ਵਾ ਨਿਰਾਹਾਰੋਪਿ ਪਟਿਪਦਾਪੂਰਣੇ ਅਤੀਵ ਉਸ੍ਸੁਕ੍ਕੋ ਅਹੋਸਿ, ਨਿਰਾਹਾਰੇਨ ਚ ਸਮਣਧਮ੍ਮਂ ਕਾਤੁਂ ਨ ਸਕ੍ਕਾ. ਤਥਾ ਕਰੋਨ੍ਤਸ੍ਸ ਹਿ ਜੀਵਿਤਂ ਨਪ੍ਪਵਤ੍ਤਤਿ, ਕਿਲੇਸੇ ਪਨ ਅਨੁਪ੍ਪਾਦੇਨ੍ਤੇਨ ਆਹਾਰੋ ਪਰਿਯੇਸਿਤਬ੍ਬੋ, ਅਯਮੇਤ੍ਥ ਞਾਯੋ. ਤਸ੍ਮਾ ਤਸ੍ਸ ਭਗਵਾ ਅਪਰਾਪਰੇਸੁਪਿ ਦਿਵਸੇਸੁ ਪਿਣ੍ਡਾਯ ਚਰਿਤਬ੍ਬਂ, ਕਿਲੇਸਾ ਪਨ ਨ ਉਪ੍ਪਾਦੇਤਬ੍ਬਾਤਿ ਦਸ੍ਸਨਤ੍ਥਂ ਅਰਹਤ੍ਤਪ੍ਪਤ੍ਤਿਨਿਟ੍ਠਂਯੇਵ ਭਿਕ੍ਖਾਚਾਰਵਤ੍ਤਂ ਕਥੇਨ੍ਤੋ ‘‘ਤਤੋ ਰਤ੍ਯਾ ਵਿਵਸਾਨੇ’’ਤਿਆਦਿਕਾ ਛ ਗਾਥਾਯੋ ਅਭਾਸਿ. ਤਤ੍ਥ ਤਤੋਤਿ ‘‘ਸ ਪਿਣ੍ਡਚਾਰਂ ਚਰਿਤ੍ਵਾ, ਵਨਨ੍ਤਮਭਿਹਾਰਯੇ’’ਤਿ ਏਤ੍ਥ ਵੁਤ੍ਤਪਿਣ੍ਡਚਾਰਵਨਨ੍ਤਾਭਿਹਾਰਤੋ ਉਤ੍ਤਰਿਪਿ. ਰਤ੍ਯਾ ਵਿਵਸਾਨੇਤਿ ਰਤ੍ਤਿਸਮਤਿਕ੍ਕਮੇ, ਦੁਤਿਯਦਿਵਸੇਤਿ ਵੁਤ੍ਤਂ ਹੋਤਿ. ਗਾਮਨ੍ਤਮਭਿਹਾਰਯੇਤਿ ਆਭਿਸਮਾਚਾਰਿਕਵਤ੍ਤਂ ਕਤ੍ਵਾ ਯਾਵ ਭਿਕ੍ਖਾਚਾਰਵੇਲਾ, ਤਾਵ ਵਿਵੇਕਮਨੁਬ੍ਰੂਹੇਤ੍ਵਾ ਗਤਪਚ੍ਚਾਗਤਵਤ੍ਤੇ ਵੁਤ੍ਤਨਯੇਨ ਕਮ੍ਮਟ੍ਠਾਨਂ ਮਨਸਿ ਕਰੋਨ੍ਤੋ ਗਾਮਂ ਗਚ੍ਛੇਯ੍ਯ. ਅਵ੍ਹਾਨਂ ਨਾਭਿਨਨ੍ਦੇਯ੍ਯਾਤਿ ‘‘ਭਨ੍ਤੇ, ਅਮ੍ਹਾਕਂ ਘਰੇ ਭੁਞ੍ਜਿਤਬ੍ਬ’’ਨ੍ਤਿ ਨਿਮਨ੍ਤਨਂ, ‘‘ਦੇਤਿ ਨੁ ਖੋ ਨ ਦੇਤਿ ਨੁ ਖੋ ਸੁਨ੍ਦਰਂ ਨੁ ਖੋ ਦੇਤਿ ਅਸੁਨ੍ਦਰਂ ਨੁ ਖੋ ਦੇਤੀ’’ਤਿ ਏਵਰੂਪਂ ਵਿਤਕ੍ਕਂ ਭੋਜਨਞ੍ਚ ਪਟਿਪਦਾਪੂਰਕੋ ਭਿਕ੍ਖੁ ਨਾਭਿਨਨ੍ਦੇਯ੍ਯ, ਨਪ੍ਪਟਿਗ੍ਗਣ੍ਹੇਯ੍ਯਾਤਿ ਵੁਤ੍ਤਂ ਹੋਤਿ. ਯਦਿ ਪਨ ਬਲਕ੍ਕਾਰੇਨ ਪਤ੍ਤਂ ਗਹੇਤ੍ਵਾ ਪੂਰੇਤ੍ਵਾ ਦੇਨ੍ਤਿ, ਪਰਿਭੁਞ੍ਜਿਤ੍ਵਾ ਸਮਣਧਮ੍ਮੋ ਕਾਤਬ੍ਬੋ, ਧੁਤਙ੍ਗਂ ਨ ਕੁਪ੍ਪਤਿ, ਤਦੁਪਾਦਾਯ ਪਨ ਤਂ ਗਾਮਂ ਨ ਪਵਿਸਿਤਬ੍ਬਂ. ਅਭਿਹਾਰਞ੍ਚ ਗਾਮਤੋਤਿ ਸਚੇ ਗਾਮਂ ਪਵਿਟ੍ਠਸ੍ਸ ਪਾਤਿਸਤੇਹਿਪਿ ਭਤ੍ਤਂ ਅਭਿਹਰਨ੍ਤਿ, ਤਮ੍ਪਿ ਨਾਭਿਨਨ੍ਦੇਯ੍ਯ, ਤਤੋ ਏਕਸਿਤ੍ਥਮ੍ਪਿ ਨਪ੍ਪਟਿਗ੍ਗਣ੍ਹੇਯ੍ਯ, ਅਞ੍ਞਦਤ੍ਥੁ ਘਰਪਟਿਪਾਟਿਯਾ ਪਿਣ੍ਡਪਾਤਮੇਵ ਚਰੇਯ੍ਯਾਤਿ.

੭੧੭. ਨ ਮੁਨੀ ਗਾਮਮਾਗਮ੍ਮ, ਕੁਲੇਸੁ ਸਹਸਾ ਚਰੇਤਿ ਸੋ ਚ ਮੋਨਤ੍ਥਾਯ ਪਟਿਪਨ੍ਨਕੋ ਮੁਨਿ ਗਾਮਂ ਗਤੋ ਸਮਾਨੋ ਕੁਲੇਸੁ ਸਹਸਾ ਨ ਚਰੇ, ਸਹਸੋਕਿਤਾਦਿਅਨਨੁਲੋਮਿਕਂ ਗਿਹਿਸਂਸਗ੍ਗਂ ਨ ਆਪਜ੍ਜੇਯ੍ਯਾਤਿ ਵੁਤ੍ਤਂ ਹੋਤਿ. ਘਾਸੇਸਨਂ ਛਿਨ੍ਨਕਥੋ, ਨ ਵਾਚਂ ਪਯੁਤਂ ਭਣੇਤਿ ਛਿਨ੍ਨਕਥੋ ਵਿਯ ਹੁਤ੍ਵਾ ਓਭਾਸਪਰਿਕਥਾਨਿਮਿਤ੍ਤਵਿਞ੍ਞਤ੍ਤਿਪਯੁਤ੍ਤਂ ਘਾਸੇਸਨਵਾਚਂ ਨ ਭਣੇਯ੍ਯ. ਸਚੇ ਆਕਙ੍ਖੇਯ੍ਯ, ਗਿਲਾਨੋ ਸਮਾਨੋ ਗੇਲਞ੍ਞਪਟਿਬਾਹਨਤ੍ਥਾਯ ਭਣੇਯ੍ਯ. ਸੇਨਾਸਨਤ੍ਥਾਯ ਵਾ ਵਿਞ੍ਞਤ੍ਤਿਂ ਠਪੇਤ੍ਵਾ ਓਭਾਸਪਰਿਕਥਾਨਿਮਿਤ੍ਤਪਯੁਤ੍ਤਂ, ਅਵਸੇਸਪਚ੍ਚਯਤ੍ਥਾਯ ਪਨ ਅਗਿਲਾਨੋ ਨੇਵ ਕਿਞ੍ਚਿ ਭਣੇਯ੍ਯਾਤਿ.

੭੧੮-੯. ਅਲਤ੍ਥਂ ਯਦਿਦਨ੍ਤਿ ਇਮਿਸ੍ਸਾ ਪਨ ਗਾਥਾਯ ਅਯਮਤ੍ਥੋ – ਗਾਮਂ ਪਿਣ੍ਡਾਯ ਪਵਿਟ੍ਠੋ ਅਪ੍ਪਮਤ੍ਤਕੇਪਿ ਕਿਸ੍ਮਿਞ੍ਚਿ ਲਦ੍ਧੇ ‘‘ਅਲਤ੍ਥਂ ਯਂ ਇਦਂ ਸਾਧੂ’’ਤਿ ਚਿਨ੍ਤੇਤ੍ਵਾ ਅਲਦ੍ਧੇ ‘‘ਨਾਲਤ੍ਥਂ ਕੁਸਲ’’ਨ੍ਤਿ ਤਮ੍ਪਿ ‘‘ਸੁਨ੍ਦਰ’’ਨ੍ਤਿ ਚਿਨ੍ਤੇਤ੍ਵਾ ਉਭਯੇਨੇਵ ਲਾਭਾਲਾਭੇਨ ਸੋ ਤਾਦੀ ਨਿਬ੍ਬਿਕਾਰੋ ਹੁਤ੍ਵਾ ਰੁਕ੍ਖਂਵੁਪਨਿਵਤ੍ਤਤਿ, ਯਥਾਪਿ ਪੁਰਿਸੋ ਫਲਗਵੇਸੀ ਰੁਕ੍ਖਂ ਉਪਗਮ੍ਮ ਫਲਂ ਲਦ੍ਧਾਪਿ ਅਲਦ੍ਧਾਪਿ ਅਨਨੁਨੀਤੋ ਅਪ੍ਪਟਿਹਤੋ ਮਜ੍ਝਤ੍ਤੋਯੇਵ ਹੁਤ੍ਵਾ ਗਚ੍ਛਤਿ, ਏਵਂ ਕੁਲਂ ਉਪਗਮ੍ਮ ਲਾਭਂ ਲਦ੍ਧਾਪਿ ਅਲਦ੍ਧਾਪਿ ਮਜ੍ਝਤ੍ਤੋਵ ਹੁਤ੍ਵਾ ਗਚ੍ਛਤੀਤਿ. ਸ ਪਤ੍ਤਪਾਣੀ ਤਿ ਗਾਥਾ ਉਤ੍ਤਾਨਤ੍ਥਾਵ.

੭੨੦. ਉਚ੍ਚਾਵਚਾਤਿ ਇਮਿਸ੍ਸਾ ਗਾਥਾਯ ਸਮ੍ਬਨ੍ਧੋ – ਏਵਂ ਭਿਕ੍ਖਾਚਾਰਵਤ੍ਤਸਮ੍ਪਨ੍ਨੋ ਹੁਤ੍ਵਾਪਿ ਤਾਵਤਕੇਨੇਵ ਤੁਟ੍ਠਿਂ ਅਨਾਪਜ੍ਜਿਤ੍ਵਾ ਪਟਿਪਦਂ ਆਰੋਧੇਯ੍ਯ. ਪਟਿਪਤ੍ਤਿਸਾਰਞ੍ਹਿ ਸਾਸਨਂ. ਸਾ ਚਾਯਂ ਉਚ੍ਚਾਵਚਾ…ਪੇ… ਮੁਤਨ੍ਤਿ. ਤਸ੍ਸਤ੍ਥੋ – ਸਾ ਚਾਯਂ ਮਗ੍ਗਪਟਿਪਦਾ ਉਤ੍ਤਮਨਿਹੀਨਭੇਦਤੋ ਉਚ੍ਚਾਵਚਾ ਬੁਦ੍ਧਸਮਣੇਨ ਪਕਾਸਿਤਾ. ਸੁਖਾਪਟਿਪਦਾ ਹਿ ਖਿਪ੍ਪਾਭਿਞ੍ਞਾ ਉਚ੍ਚਾ, ਦੁਕ੍ਖਾਪਟਿਪਦਾ ਦਨ੍ਧਾਭਿਞ੍ਞਾ ਅਵਚਾ. ਇਤਰਾ ਦ੍ਵੇ ਏਕੇਨਙ੍ਗੇਨ ਉਚ੍ਚਾ, ਏਕੇਨ ਅਵਚਾ. ਪਠਮਾ ਏਵ ਵਾ ਉਚ੍ਚਾ, ਇਤਰਾ ਤਿਸ੍ਸੋਪਿ ਅਵਚਾ. ਤਾਯ ਚੇਤਾਯ ਉਚ੍ਚਾਯ ਅਵਚਾਯ ਵਾ ਪਟਿਪਦਾਯ ਨ ਪਾਰਂ ਦਿਗੁਣਂ ਯਨ੍ਤਿ. ‘‘ਦੁਗੁਣ’’ਨ੍ਤਿ ਵਾ ਪਾਠੋ, ਏਕਮਗ੍ਗੇਨ ਦ੍ਵਿਕ੍ਖਤ੍ਤੁਂ ਨਿਬ੍ਬਾਨਂ ਨ ਯਨ੍ਤੀਤਿ ਅਤ੍ਥੋ. ਕਸ੍ਮਾ? ਯੇਨ ਮਗ੍ਗੇਨ ਯੇ ਕਿਲੇਸਾ ਪਹੀਨਾ, ਤੇਸਂ ਪੁਨ ਅਪ੍ਪਹਾਤਬ੍ਬਤੋ. ਏਤੇਨ ਪਰਿਹਾਨਧਮ੍ਮਾਭਾਵਂ ਦੀਪੇਤਿ. ਨਯਿਦਂ ਏਕਗੁਣਂ ਮੁਤਨ੍ਤਿ ਤਞ੍ਚ ਇਦਂ ਪਾਰਂ ਏਕਕ੍ਖਤ੍ਤੁਂਯੇਵ ਫੁਸਨਾਰਹਮ੍ਪਿ ਨ ਹੋਤਿ. ਕਸ੍ਮਾ? ਏਕੇਨ ਮਗ੍ਗੇਨ ਸਬ੍ਬਕਿਲੇਸਪ੍ਪਹਾਨਾਭਾਵਤੋ. ਏਤੇਨ ਏਕਮਗ੍ਗੇਨੇਵ ਅਰਹਤ੍ਤਾਭਾਵਂ ਦੀਪੇਤਿ.

੭੨੧. ਇਦਾਨਿ ਪਟਿਪਦਾਨਿਸਂਸਂ ਦਸ੍ਸੇਨ੍ਤੋ ‘‘ਯਸ੍ਸ ਚ ਵਿਸਤਾ’’ਤਿ ਗਾਥਮਾਹ. ਤਸ੍ਸਤ੍ਥੋ – ਯਸ੍ਸ ਚ ਏਵਂ ਪਟਿਪਨ੍ਨਸ੍ਸ ਭਿਕ੍ਖੁਨੋ ਤਾਯ ਪਟਿਪਦਾਯ ਪਹੀਨਤ੍ਤਾ ਅਟ੍ਠਸਤਤਣ੍ਹਾਵਿਚਰਿਤਭਾਵੇਨ ਵਿਸਤਤ੍ਤਾ ਵਿਸਤਾ ਤਣ੍ਹਾ ਨਤ੍ਥਿ, ਤਸ੍ਸ ਕਿਲੇਸਸੋਤਚ੍ਛੇਦੇਨ ਛਿਨ੍ਨਸੋਤਸ੍ਸ ਕੁਸਲਾਕੁਸਲਪ੍ਪਹਾਨੇਨ ਕਿਚ੍ਚਾਕਿਚ੍ਚਪ੍ਪਹੀਨਸ੍ਸ ਰਾਗਜੋ ਵਾ ਦੋਸਜੋ ਵਾ ਅਪ੍ਪਮਤ੍ਤਕੋਪਿ ਪਰਿਲ਼ਾਹੋ ਨ ਵਿਜ੍ਜਤੀਤਿ.

੭੨੨. ਇਦਾਨਿ ਯਸ੍ਮਾ ਇਮਾ ਗਾਥਾਯੋ ਸੁਤ੍ਵਾ ਨਾਲਕਤ੍ਥੇਰਸ੍ਸ ਚਿਤ੍ਤਂ ਉਦਪਾਦਿ – ‘‘ਯਦਿ ਏਤ੍ਤਕਂ ਮੋਨੇਯ੍ਯਂ ਸੁਕਰਂ ਨ ਦੁਕ੍ਕਰਂ, ਸਕ੍ਕਾ ਅਪ੍ਪਕਸਿਰੇਨ ਪੂਰੇਤੁ’’ਨ੍ਤਿ, ਤਸ੍ਮਾਸ੍ਸ ਭਗਵਾ ‘‘ਦੁਕ੍ਕਰਮੇਵ ਮੋਨੇਯ੍ਯ’’ਨ੍ਤਿ ਦਸ੍ਸੇਨ੍ਤੋ ਪੁਨ ‘‘ਮੋਨੇਯ੍ਯਂ ਤੇ ਉਪਞ੍ਞਿਸ੍ਸ’’ਨ੍ਤਿਆਦਿਮਾਹ. ਤਤ੍ਥ ਉਪਞ੍ਞਿਸ੍ਸਨ੍ਤਿ ਉਪਞ੍ਞਾਪੇਯ੍ਯਂ, ਕਥਯਿਸ੍ਸਨ੍ਤਿ ਵੁਤ੍ਤਂ ਹੋਤਿ. ਖੁਰਧਾਰਾ ਉਪਮਾ ਅਸ੍ਸਾਤਿ ਖੁਰਧਾਰੂਪਮੋ. ਭਵੇਤਿ ਭਵੇਯ੍ਯ. ਕੋ ਅਧਿਪ੍ਪਾਯੋ? ਮੋਨੇਯ੍ਯਂ ਪਟਿਪਨ੍ਨੋ ਭਿਕ੍ਖੁ ਖੁਰਧਾਰਂ ਉਪਮਂ ਕਤ੍ਵਾ ਪਚ੍ਚਯੇਸੁ ਵਤ੍ਤੇਯ੍ਯ. ਯਥਾ ਮਧੁਦਿਦ੍ਧਂ ਖੁਰਧਾਰਂ ਲਿਹਨ੍ਤੋ, ਛੇਦਤੋ, ਜਿਵ੍ਹਂ ਰਕ੍ਖਤਿ, ਏਵਂ ਧਮ੍ਮੇਨ ਲਦ੍ਧੇ ਪਚ੍ਚਯੇ ਪਰਿਭੁਞ੍ਜਨ੍ਤੋ ਚਿਤ੍ਤਂ ਕਿਲੇਸੁਪ੍ਪਤ੍ਤਿਤੋ ਰਕ੍ਖੇਯ੍ਯਾਤਿ ਵੁਤ੍ਤਂ ਹੋਤਿ. ਪਚ੍ਚਯਾ ਹਿ ਪਰਿਸੁਦ੍ਧੇਨ ਞਾਯੇਨ ਲਦ੍ਧੁਞ੍ਚ ਅਨਵਜ੍ਜਪਰਿਭੋਗੇਨ ਪਰਿਭੁਞ੍ਜਿਤੁਞ੍ਚ ਨ ਸੁਖੇਨ ਸਕ੍ਕਾਤਿ ਭਗਵਾ ਪਚ੍ਚਯਨਿਸ੍ਸਿਤਮੇਵ ਬਹੁਸੋ ਭਣਤਿ. ਜਿਵ੍ਹਾਯ ਤਾਲੁਮਾਹਚ੍ਚ, ਉਦਰੇ ਸਞ੍ਞਤੋ ਸਿਯਾਤਿ ਜਿਵ੍ਹਾਯ ਤਾਲੁਂ ਉਪ੍ਪੀਲ਼ੇਤ੍ਵਾਪਿ ਰਸਤਣ੍ਹਂ ਵਿਨੋਦੇਨ੍ਤੋ ਕਿਲਿਟ੍ਠੇਨ ਮਗ੍ਗੇਨ ਉਪ੍ਪਨ੍ਨਪਚ੍ਚਯੇ ਅਸੇਵਨ੍ਤੋ ਉਦਰੇ ਸਂਯਤੋ ਸਿਯਾ.

੭੨੩. ਅਲੀਨਚਿਤ੍ਤੋ ਚ ਸਿਯਾਤਿ ਨਿਚ੍ਚਂ ਕੁਸਲਾਨਂ ਧਮ੍ਮਾਨਂ ਭਾਵਨਾਯ ਅਟ੍ਠਿਤਕਾਰਿਤਾਯ ਅਕੁਸੀਤਚਿਤ੍ਤੋ ਚ ਭਵੇਯ੍ਯ. ਨ ਚਾਪਿ ਬਹੁ ਚਿਨ੍ਤਯੇਤਿ ਞਾਤਿਜਨਪਦਾਮਰਵਿਤਕ੍ਕਵਸੇਨ ਚ ਬਹੁਂ ਨ ਚਿਨ੍ਤੇਯ੍ਯ. ਨਿਰਾਮਗਨ੍ਧੋ ਅਸਿਤੋ, ਬ੍ਰਹ੍ਮਚਰਿਯਪਰਾਯਣੋਤਿ ਨਿਕ੍ਕਿਲੇਸੋ ਚ ਹੁਤ੍ਵਾ ਤਣ੍ਹਾਦਿਟ੍ਠੀਹਿ ਕਿਸ੍ਮਿਞ੍ਚਿ ਭਵੇ ਅਨਿਸ੍ਸਿਤੋ ਸਿਕ੍ਖਾਤ੍ਤਯਸਕਲਸਾਸਨਬ੍ਰਹ੍ਮਚਰਿਯਪਰਾਯਣੋ ਏਵ ਭਵੇਯ੍ਯ.

੭੨੪-੫. ਏਕਾਸਨਸ੍ਸਾਤਿ ਵਿਵਿਤ੍ਤਾਸਨਸ੍ਸ. ਆਸਨਮੁਖੇਨ ਚੇਤ੍ਥ ਸਬ੍ਬਇਰਿਯਾਪਥਾ ਵੁਤ੍ਤਾ. ਯਤੋ ਸਬ੍ਬਇਰਿਯਾਪਥੇਸੁ ਏਕੀਭਾਵਸ੍ਸ ਸਿਕ੍ਖੇਯ੍ਯਾਤਿ ਵੁਤ੍ਤਂ ਹੋਤੀਤਿ ਵੇਦਿਤਬ੍ਬਂ. ਏਕਾਸਨਸ੍ਸਾਤਿ ਚ ਸਮ੍ਪਦਾਨਵਚਨਮੇਤਂ. ਸਮਣੂਪਾਸਨਸ੍ਸ ਚਾਤਿ ਸਮਣੇਹਿ ਉਪਾਸਿਤਬ੍ਬਸ੍ਸ ਅਟ੍ਠਤਿਂਸਾਰਮ੍ਮਣਭਾਵਨਾਨੁਯੋਗਸ੍ਸ, ਸਮਣਾਨਂ ਵਾ ਉਪਾਸਨਭੂਤਸ੍ਸ ਅਟ੍ਠਤਿਂਸਾਰਮ੍ਮਣਭੇਦਸ੍ਸੇਵ. ਇਦਮ੍ਪਿ ਸਮ੍ਪਦਾਨਵਚਨਮੇਵ, ਉਪਾਸਨਤ੍ਥਨ੍ਤਿ ਵੁਤ੍ਤਂ ਹੋਤਿ. ਏਤ੍ਥ ਚ ਏਕਾਸਨੇਨ ਕਾਯਵਿਵੇਕੋ, ਸਮਣੂਪਾਸਨੇਨ ਚਿਤ੍ਤਵਿਵੇਕੋ ਵੁਤ੍ਤੋ ਹੋਤੀਤਿ ਵੇਦਿਤਬ੍ਬੋ. ਏਕਤ੍ਤਂ ਮੋਨਮਕ੍ਖਾਤਨ੍ਤਿ ਏਵਮਿਦਂ ਕਾਯਚਿਤ੍ਤਵਿਵੇਕਵਸੇਨ ‘‘ਏਕਤ੍ਤਂ ਮੋਨ’’ਨ੍ਤਿ ਅਕ੍ਖਾਤਂ. ਏਕੋ ਚੇ ਅਭਿਰਮਿਸ੍ਸਸੀਤਿ ਇਦਂ ਪਨ ਉਤ੍ਤਰਗਾਥਾਪੇਕ੍ਖਂ ਪਦਂ, ‘‘ਅਥ ਭਾਹਿਸਿ ਦਸਦਿਸਾ’’ਤਿ ਇਮਿਨਾ ਅਸ੍ਸ ਸਮ੍ਬਨ੍ਧੋ.

ਭਾਹਿਸੀਤਿ ਭਾਸਿਸ੍ਸਸਿ ਪਕਾਸੇਸ੍ਸਸਿ. ਇਮਂ ਪਟਿਪਦਂ ਭਾਵੇਨ੍ਤੋ ਸਬ੍ਬਦਿਸਾਸੁ ਕਿਤ੍ਤਿਯਾ ਪਾਕਟੋ ਭਵਿਸ੍ਸਸੀਤਿ ਵੁਤ੍ਤਂ ਹੋਤਿ. ਸੁਤ੍ਵਾ ਧੀਰਾਨਨ੍ਤਿਆਦੀਨਂ ਪਨ ਚਤੁਨ੍ਨਂ ਪਦਾਨਂ ਅਯਮਤ੍ਥੋ – ਯੇਨ ਚ ਕਿਤ੍ਤਿਘੋਸੇਨ ਭਾਹਿਸਿ ਦਸਦਿਸਾ ਤਂ ਧੀਰਾਨਂ ਝਾਯੀਨਂ ਕਾਮਚਾਗਿਨਂ ਨਿਘੋਸਂ ਸੁਤ੍ਵਾ ਅਥ ਤ੍ਵਂ ਤੇਨ ਉਦ੍ਧਚ੍ਚਂ ਅਨਾਪਜ੍ਜਿਤ੍ਵਾ ਭਿਯ੍ਯੋ ਹਿਰਿਞ੍ਚ ਸਦ੍ਧਞ੍ਚ ਕਰੇਯ੍ਯਾਸਿ, ਤੇਨ ਘੋਸੇਨ ਹਰਾਯਮਾਨੋ ‘‘ਨਿਯ੍ਯਾਨਿਕਪਟਿਪਦਾ ਅਯ’’ਨ੍ਤਿ ਸਦ੍ਧਂ ਉਪ੍ਪਾਦੇਤ੍ਵਾ ਉਤ੍ਤਰਿ ਪਟਿਪਤ੍ਤਿਮੇਵ ਬ੍ਰੂਹੇਯ੍ਯਾਸਿ. ਮਾਮਕੋਤਿ ਏਵਞ੍ਹਿ ਸਨ੍ਤੇ ਮਮ ਸਾਵਕੋ ਹੋਤੀਤਿ.

੭੨੬. ਤਂ ਨਦੀਹੀਤਿ ਯਂ ਤਂ ਮਯਾ ‘‘ਹਿਰਿਞ੍ਚ ਸਦ੍ਧਞ੍ਚ ਭਿਯ੍ਯੋ ਕੁਬ੍ਬੇਥਾ’’ਤਿ ਵਦਤਾ ‘‘ਉਦ੍ਧਚ੍ਚਂ ਨ ਕਾਤਬ੍ਬ’’ਨ੍ਤਿ ਵੁਤ੍ਤਂ, ਤਂ ਇਮਿਨਾ ਨਦੀਨਿਦਸ੍ਸਨੇਨਾਪਿ ਜਾਨਾਥ, ਤਬ੍ਬਿਪਰਿਯਾਯਞ੍ਚ ਸੋਬ੍ਭੇਸੁ ਚ ਪਦਰੇਸੁਚ ਜਾਨਾਥ. ਸੋਬ੍ਭੇਸੂਤਿ ਮਾਤਿਕਾਸੁ. ਪਦਰੇਸੂਤਿ ਦਰੀਸੁ. ਕਥਂ? ਸਣਨ੍ਤਾ ਯਨ੍ਤਿ ਕੁਸੋਬ੍ਭਾ, ਤੁਣ੍ਹੀ ਯਨ੍ਤਿ ਮਹੋਦਧੀਤਿ. ਕੁਸੋਬ੍ਭਾ ਹਿ ਸੋਬ੍ਭਪਦਰਾਦਿਭੇਦਾ ਸਬ੍ਬਾਪਿ ਕੁਨ੍ਨਦਿਯੋ ਸਣਨ੍ਤਾ ਸਦ੍ਦਂ ਕਰੋਨ੍ਤਾ ਉਦ੍ਧਤਾ ਹੁਤ੍ਵਾ ਯਨ੍ਤਿ, ਗਙ੍ਗਾਦਿਭੇਦਾ ਪਨ ਮਹਾਨਦਿਯੋ ਤੁਣ੍ਹੀ ਯਨ੍ਤਿ, ਏਵਂ ‘‘ਮੋਨੇਯ੍ਯਂ ਪੂਰੇਮੀ’’ਤਿ ਉਦ੍ਧਤੋ ਹੋਤਿ ਅਮਾਮਕੋ, ਮਾਮਕੋ ਪਨ ਹਿਰਿਞ੍ਚ ਸਦ੍ਧਞ੍ਚ ਉਪ੍ਪਾਦੇਤ੍ਵਾ ਨੀਚਚਿਤ੍ਤੋਵ ਹੋਤਿ.

੭੨੭-੯. ਕਿਞ੍ਚ ਭਿਯ੍ਯੋ – ਯਦੂਨਕਂ…ਪੇ… ਪਣ੍ਡਿਤੋਤਿ. ਤਤ੍ਥ ਸਿਯਾ – ਸਚੇ ਅਡ੍ਢਕੁਮ੍ਭੂਪਮੋ ਬਾਲੋ ਸਣਨ੍ਤਤਾਯ, ਰਹਦੋ ਪੂਰੋਵ ਪਣ੍ਡਿਤੋ ਸਨ੍ਤਤਾਯ, ਅਥ ਕਸ੍ਮਾ ਬੁਦ੍ਧਸਮਣੋ ਏਵਂ ਧਮ੍ਮਦੇਸਨਾਬ੍ਯਾਵਟੋ ਹੁਤ੍ਵਾ ਬਹੁਂ ਭਾਸਤੀਤਿ ਇਮਿਨਾ ਸਮ੍ਬਨ੍ਧੇਨ ‘‘ਯਂ ਸਮਣੋ’’ਤਿ ਗਾਥਮਾਹ. ਤਸ੍ਸਤ੍ਥੋ – ਯਂ ਬੁਦ੍ਧਸਮਣੋ ਬਹੁਂ ਭਾਸਤਿ ਉਪੇਤਂ ਅਤ੍ਥਸਞ੍ਹਿਤਂ, ਅਤ੍ਥੁਪੇਤਂ ਧਮ੍ਮੁਪੇਤਞ੍ਚ ਹਿਤੇਨ ਚ ਸਂਹਿਤਂ, ਤਂ ਨ ਉਦ੍ਧਚ੍ਚੇਨ, ਅਪਿਚ ਖੋ ਜਾਨਂ ਸੋ ਧਮ੍ਮਂ ਦੇਸੇਤਿ ਦਿਵਸਮ੍ਪਿ ਦੇਸੇਨ੍ਤੋ ਨਿਪ੍ਪਪਞ੍ਚੋਵ ਹੁਤ੍ਵਾ. ਤਸ੍ਸ ਹਿ ਸਬ੍ਬਂ ਵਚੀਕਮ੍ਮਂ ਞਾਣਾਨੁਪਰਿਵਤ੍ਤਿ. ਏਵਂ ਦੇਸੇਨ੍ਤੋ ਚ ‘‘ਇਦਮਸ੍ਸ ਹਿਤਂ ਇਦਮਸ੍ਸ ਹਿਤ’’ਨ੍ਤਿ ਨਾਨਪ੍ਪਕਾਰਤੋ ਜਾਨਂ ਸੋ ਬਹੁ ਭਾਸਤਿ, ਨ ਕੇਵਲਂ ਬਹੁਭਾਣਿਤਾਯ. ਅਵਸਾਨਗਾਥਾਯ ਸਮ੍ਬਨ੍ਧੋ – ਏਵਂ ਤਾਵ ਸਬ੍ਬਞ੍ਞੁਤਞ੍ਞਾਣੇਨ ਸਮਨ੍ਨਾਗਤੋ ਬੁਦ੍ਧਸਮਣੋ ਜਾਨਂ ਸੋ ਧਮ੍ਮਂ ਦੇਸੇਤਿ, ਜਾਨਂ ਸੋ ਬਹੁ ਭਾਸਤਿ. ਤੇਨ ਦੇਸਿਤਂ ਪਨ ਧਮ੍ਮਂ ਨਿਬ੍ਬੇਧਭਾਗਿਯੇਨੇਵ ਞਾਣੇਨ ਯੋ ਚ ਜਾਨਂ ਸਂਯਤਤ੍ਤੋ, ਜਾਨਂ ਨ ਬਹੁ ਭਾਸਤਿ, ਸ ਮੁਨਿ ਮੋਨਮਰਹਤਿ, ਸ ਮੁਨਿ ਮੋਨਮਜ੍ਝਗਾਤਿ. ਤਸ੍ਸਤ੍ਥੋ – ਤਂ ਧਮ੍ਮਂ ਜਾਨਨ੍ਤੋ ਸਂਯਤਤ੍ਤੋ ਗੁਤ੍ਤਚਿਤ੍ਤੋ ਹੁਤ੍ਵਾ ਯਂ ਭਾਸਿਤਂ ਸਤ੍ਤਾਨਂ ਹਿਤਸੁਖਾਵਹਂ ਨ ਹੋਤਿ, ਤਂ ਜਾਨਂ ਨ ਬਹੁ ਭਾਸਤਿ. ਸੋ ਏਵਂਵਿਧੋ ਮੋਨਤ੍ਥਂ ਪਟਿਪਨ੍ਨਕੋ ਮੁਨਿ ਮੋਨੇਯ੍ਯਪਟਿਪਦਾਸਙ੍ਖਾਤਂ ਮੋਨਂ ਅਰਹਤਿ. ਨ ਕੇਵਲਞ੍ਚ ਅਰਹਤਿਯੇਵ, ਅਪਿਚ ਖੋ ਪਨ ਸ ਮੁਨਿ ਅਰਹਤ੍ਤਮਗ੍ਗਞਾਣਸਙ੍ਖਾਤਂ ਮੋਨਂ ਅਜ੍ਝਗਾ ਇਚ੍ਚੇਵ ਵੇਦਿਤਬ੍ਬੋਤਿ ਅਰਹਤ੍ਤਨਿਕੂਟੇਨ ਦੇਸਨਂ ਨਿਟ੍ਠਾਪੇਸਿ.

ਤਂ ਸੁਤ੍ਵਾ ਨਾਲਕਤ੍ਥੇਰੋ ਤੀਸੁ ਠਾਨੇਸੁ ਅਪ੍ਪਿਚ੍ਛੋ ਅਹੋਸਿ ਦਸ੍ਸਨੇ ਸਵਨੇ ਪੁਚ੍ਛਾਯਾਤਿ. ਸੋ ਹਿ ਦੇਸਨਾਪਰਿਯੋਸਾਨੇ ਪਸਨ੍ਨਚਿਤ੍ਤੋ ਭਗਵਨ੍ਤਂ ਵਨ੍ਦਿਤ੍ਵਾ ਵਨਂ ਪਵਿਟ੍ਠੋ, ਪੁਨ ‘‘ਅਹੋ ਵਤਾਹਂ ਭਗਵਨ੍ਤਂ ਪਸ੍ਸੇਯ੍ਯ’’ਨ੍ਤਿ ਲੋਲਭਾਵਂ ਨ ਜਨੇਸਿ. ਅਯਮਸ੍ਸ ਦਸ੍ਸਨੇ ਅਪ੍ਪਿਚ੍ਛਤਾ. ਤਥਾ ‘‘ਅਹੋ ਵਤਾਹਂ ਪੁਨ ਧਮ੍ਮਦੇਸਨਂ ਸੁਣੇਯ੍ਯ’’ਨ੍ਤਿ ਲੋਲਭਾਵਂ ਨ ਜਨੇਸਿ. ਅਯਮਸ੍ਸ ਸਵਨੇ ਅਪ੍ਪਿਚ੍ਛਤਾ. ਤਥਾ ‘‘ਅਹੋ ਵਤਾਹਂ ਪੁਨ ਮੋਨੇਯ੍ਯਪਟਿਪਦਂ ਪੁਚ੍ਛੇਯ੍ਯ’’ਨ੍ਤਿ ਲੋਲਭਾਵਂ ਨ ਜਨੇਸਿ. ਅਯਮਸ੍ਸ ਪੁਚ੍ਛਾਯ ਅਪ੍ਪਿਚ੍ਛਤਾ.

ਸੋ ਏਵਂ ਅਪ੍ਪਿਚ੍ਛੋ ਸਮਾਨੋ ਪਬ੍ਬਤਪਾਦਂ ਪਵਿਸਿਤ੍ਵਾ ਏਕਵਨਸਣ੍ਡੇ ਦ੍ਵੇ ਦਿਵਸਾਨਿ ਨ ਵਸਿ, ਏਕਰੁਕ੍ਖਮੂਲੇ ਦ੍ਵੇ ਦਿਵਸਾਨਿ ਨ ਨਿਸੀਦਿ, ਏਕਗਾਮੇ ਦ੍ਵੇ ਦਿਵਸਾਨਿ ਪਿਣ੍ਡਾਯ ਨ ਪਾਵਿਸਿ. ਇਤਿ ਵਨਤੋ ਵਨਂ, ਰੁਕ੍ਖਤੋ ਰੁਕ੍ਖਂ, ਗਾਮਤੋ ਗਾਮਂ ਆਹਿਣ੍ਡਨ੍ਤੋ ਅਨੁਰੂਪਪਟਿਪਦਂ ਪਟਿਪਜ੍ਜਿਤ੍ਵਾ ਅਗ੍ਗਫਲੇ ਪਤਿਟ੍ਠਾਸਿ. ਅਥ ਯਸ੍ਮਾ ਮੋਨੇਯ੍ਯਪਟਿਪਦਂ ਉਕ੍ਕਟ੍ਠਂ ਕਤ੍ਵਾ ਪੂਰੇਨ੍ਤੋ ਭਿਕ੍ਖੁ ਸਤ੍ਤੇਵ ਮਾਸਾਨਿ ਜੀਵਤਿ, ਮਜ੍ਝਿਮਂ ਕਤ੍ਵਾ ਪੂਰੇਨ੍ਤੋ ਸਤ੍ਤ ਵਸ੍ਸਾਨਿ, ਮਨ੍ਦਂ ਕਤ੍ਵਾ ਪੂਰੇਨ੍ਤੋ ਸੋਲ਼ਸ ਵਸ੍ਸਾਨਿ. ਅਯਞ੍ਚ ਉਕ੍ਕਟ੍ਠਂ ਕਤ੍ਵਾ ਪੂਰੇਸਿ, ਤਸ੍ਮਾ ਸਤ੍ਤ ਮਾਸੇ ਠਤ੍ਵਾ ਅਤ੍ਤਨੋ ਆਯੁਸਙ੍ਖਾਰਪਰਿਕ੍ਖਯਂ ਞਤ੍ਵਾ ਨ੍ਹਾਯਿਤ੍ਵਾ ਨਿਵਾਸੇਤ੍ਵਾ ਕਾਯਬਨ੍ਧਨਂ ਬਨ੍ਧਿਤ੍ਵਾ ਦਿਗੁਣਂ ਸਙ੍ਘਾਟਿਂ ਪਾਰੁਪਿਤ੍ਵਾ ਦਸਬਲਾਭਿਮੁਖੋ ਪਞ੍ਚਪਤਿਟ੍ਠਿਤਂ ਵਨ੍ਦਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ਹਿਙ੍ਗੁਲਕਪਬ੍ਬਤਂ ਨਿਸ੍ਸਾਯ ਠਿਤਕੋਵ ਅਨੁਪਾਦਿਸੇਸਾਯ ਨਿਬ੍ਬਾਨਧਾਤੁਯਾ ਪਰਿਨਿਬ੍ਬਾਯਿ. ਤਸ੍ਸ ਪਰਿਨਿਬ੍ਬੁਤਭਾਵਂ ਞਤ੍ਵਾ ਭਗਵਾ ਭਿਕ੍ਖੁਸਙ੍ਘੇਨ ਸਦ੍ਧਿਂ ਤਤ੍ਥ ਗਨ੍ਤ੍ਵਾ ਸਰੀਰਕਿਚ੍ਚਂ ਕਤ੍ਵਾ ਧਾਤੁਯੋ ਗਾਹਾਪੇਤ੍ਵਾ ਚੇਤਿਯਂ ਪਤਿਟ੍ਠਾਪੇਤ੍ਵਾ ਅਗਮਾਸੀਤਿ.

ਪਰਮਤ੍ਥਜੋਤਿਕਾਯ ਖੁਦ੍ਦਕ-ਅਟ੍ਠਕਥਾਯ

ਸੁਤ੍ਤਨਿਪਾਤ-ਅਟ੍ਠਕਥਾਯ ਨਾਲਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.