੫. ਮਾਘਸੁਤ੍ਤਵਣ੍ਣਨਾ

ਏਵਂ ਮੇ ਸੁਤਨ੍ਤਿ ਮਾਘਸੁਤ੍ਤਂ. ਕਾ ਉਪ੍ਪਤ੍ਤਿ? ਅਯਮੇਵ ਯਾਸ੍ਸ ਨਿਦਾਨੇ ਵੁਤ੍ਤਾ. ਅਯਞ੍ਹਿ ਮਾਘੋ ਮਾਣਵੋ ਦਾਯਕੋ ਅਹੋਸਿ ਦਾਨਪਤਿ. ਤਸ੍ਸੇਤਦਹੋਸਿ – ‘‘ਸਮ੍ਪਤ੍ਤਕਪਣਦ੍ਧਿਕਾਦੀਨਂ ਦਾਨਂ ਦਿਨ੍ਨਂ ਮਹਪ੍ਫਲਂ ਹੋਤਿ, ਉਦਾਹੁ ਨੋਤਿ ਸਮਣਂ ਗੋਤਮਂ ਏਤਮਤ੍ਥਂ ਪੁਚ੍ਛਿਸ੍ਸਾਮਿ, ਸਮਣੋ ਕਿਰ ਗੋਤਮੋ ਅਤੀਤਾਨਾਗਤਪਚ੍ਚੁਪ੍ਪਨ੍ਨਂ ਜਾਨਾਤੀ’’ਤਿ. ਸੋ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਪੁਚ੍ਛਿ. ਭਗਵਾ ਚਸ੍ਸ ਪੁਚ੍ਛਾਨੁਰੂਪਂ ਬ੍ਯਾਕਾਸਿ. ਤਯਿਦਂ ਸਙ੍ਗੀਤਿਕਾਰਾਨਂ ਬ੍ਰਾਹ੍ਮਣਸ੍ਸ ਭਗਵਤੋਤਿ ਤਿਣ੍ਣਮ੍ਪਿ ਵਚਨਂ ਸਮੋਧਾਨੇਤ੍ਵਾ ‘‘ਮਾਘਸੁਤ੍ਤ’’ਨ੍ਤਿ ਵੁਚ੍ਚਤਿ.

ਤਤ੍ਥ ਰਾਜਗਹੇਤਿ ਏਵਂਨਾਮਕੇ ਨਗਰੇ. ਤਞ੍ਹਿ ਮਨ੍ਧਾਤੁਮਹਾਗੋਵਿਨ੍ਦਾਦੀਹਿ ਪਰਿਗ੍ਗਹਿਤਤ੍ਤਾ ‘‘ਰਾਜਗਹ’’ਨ੍ਤਿ ਵੁਚ੍ਚਤਿ. ਅਞ੍ਞੇਪੇਤ੍ਥ ਪਕਾਰੇ ਵਣ੍ਣਯਨ੍ਤਿ. ਕਿਂ ਤੇਹਿ, ਨਾਮਮੇਤਂ ਤਸ੍ਸ ਨਗਰਸ੍ਸ? ਤਂ ਪਨੇਤਂ ਬੁਦ੍ਧਕਾਲੇ ਚ ਚਕ੍ਕਵਤ੍ਤਿਕਾਲੇ ਚ ਨਗਰਂ ਹੋਤਿ, ਸੇਸਕਾਲੇ ਸੁਞ੍ਞਂ ਹੋਤਿ ਯਕ੍ਖਪਰਿਗ੍ਗਹਿਤਂ, ਤੇਸਂ ਵਸਨ੍ਤਵਨਂ ਹੁਤ੍ਵਾ ਤਿਟ੍ਠਤਿ. ਏਵਂ ਗੋਚਰਗਾਮਂ ਦਸ੍ਸੇਤ੍ਵਾ ਨਿਵਾਸਟ੍ਠਾਨਮਾਹ – ‘‘ਗਿਜ੍ਝਕੂਟੇ ਪਬ੍ਬਤੇ’’ਤਿ. ਸੋ ਚ ਗਿਜ੍ਝਾ ਤਸ੍ਸ ਕੂਟੇਸੁ ਵਸਿਂਸੁ, ਗਿਜ੍ਝਸਦਿਸਾਨਿ ਵਾਸ੍ਸ ਕੂਟਾਨਿ, ਤਸ੍ਮਾ ‘‘ਗਿਜ੍ਝਕੂਟੋ’’ਤਿ ਵੁਚ੍ਚਤੀਤਿ ਵੇਦਿਤਬ੍ਬੋ.

ਅਥ ਖੋ…ਪੇ… ਅਵੋਚਾਤਿ ਏਤ੍ਥ ਮਾਘੋਤਿ ਤਸ੍ਸ ਬ੍ਰਾਹ੍ਮਣਸ੍ਸ ਨਾਮਂ. ਮਾਣਵੋਤਿ ਅਨ੍ਤੇਵਾਸਿਵਾਸਂ ਅਨਤੀਤਭਾਵੇਨ ਵੁਚ੍ਚਤਿ, ਜਾਤਿਯਾ ਪਨ ਮਹਲ੍ਲਕੋ. ‘‘ਪੁਬ੍ਬਾਚਿਣ੍ਣਵਸੇਨਾ’’ਤਿ ਏਕੇ ਪਿਙ੍ਗਿਯੋ ਮਾਣਵੋ ਵਿਯ. ਸੋ ਹਿ ਵੀਸਵਸ੍ਸਸਤਿਕੋਪਿ ਪੁਬ੍ਬਾਚਿਣ੍ਣਵਸੇਨ ‘‘ਪਿਙ੍ਗਿਯੋ ਮਾਣਵੋ’’ ਤ੍ਵੇਵ ਸਙ੍ਖਂ ਅਗਮਾਸਿ. ਸੇਸਂ ਵੁਤ੍ਤਨਯਮੇਵ.

ਅਹਞ੍ਹਿ, ਭੋ ਗੋਤਮ…ਪੇ… ਪਸਵਾਮੀਤਿ ਏਤ੍ਥ ਦਾਯਕੋ ਦਾਨਪਤੀਤਿ ਦਾਯਕੋ ਚੇਵ ਦਾਨਪਤਿ ਚ. ਯੋ ਹਿ ਅਞ੍ਞਸ੍ਸ ਸਨ੍ਤਕਂ ਤੇਨਾਣਤ੍ਤੋ ਦੇਤਿ, ਸੋਪਿ ਦਾਯਕੋ ਹੋਤਿ, ਤਸ੍ਮਿਂ ਪਨ ਦਾਨੇ ਇਸ੍ਸਰਿਯਾਭਾਵਤੋ ਨ ਦਾਨਪਤਿ. ਅਯਂ ਪਨ ਅਤ੍ਤਨੋ ਸਨ੍ਤਕਂਯੇਵ ਦੇਤਿ. ਤੇਨਾਹ – ‘‘ਅਹਞ੍ਹਿ, ਭੋ ਗੋਤਮ, ਦਾਯਕੋ ਦਾਨਪਤੀ’’ਤਿ. ਅਯਮੇਵ ਹਿ ਏਤ੍ਥ ਅਤ੍ਥੋ, ਅਞ੍ਞਤ੍ਰ ਪਨ ਅਨ੍ਤਰਨ੍ਤਰਾ ਮਚ੍ਛੇਰੇਨ ਅਭਿਭੁਯ੍ਯਮਾਨੋ ਦਾਯਕੋ ਅਨਭਿਭੂਤੋ ਦਾਨਪਤੀਤਿਆਦਿਨਾਪਿ ਨਯੇਨ ਵਤ੍ਤੁਂ ਵਟ੍ਟਤਿ. ਵਦਞ੍ਞੂਤਿ ਯਾਚਕਾਨਂ ਵਚਨਂ ਜਾਨਾਮਿ ਵੁਤ੍ਤਮਤ੍ਤੇਯੇਵ ‘‘ਅਯਮਿਦਮਰਹਤਿ ਅਯਮਿਦ’’ਨ੍ਤਿ ਪੁਰਿਸਵਿਸੇਸਾਵਧਾਰਣੇਨ ਬਹੂਪਕਾਰਭਾਵਗਹਣੇਨ ਵਾ. ਯਾਚਯੋਗੋਤਿ ਯਾਚਿਤੁਂ ਯੁਤ੍ਤੋ. ਯੋ ਹਿ ਯਾਚਕੇ ਦਿਸ੍ਵਾਵ ਭਕੁਟਿਂ ਕਤ੍ਵਾ ਫਰੁਸਵਚਨਾਦੀਨਿ ਭਣਤਿ, ਸੋ ਨ ਯਾਚਯੋਗੋ ਹੋਤਿ. ਅਹਂ ਪਨ ਨ ਤਾਦਿਸੋਤਿ ਦੀਪੇਤਿ. ਧਮ੍ਮੇਨਾਤਿ ਅਦਿਨ੍ਨਾਦਾਨਨਿਕਤਿਵਞ੍ਚਨਾਦੀਨਿ ਵਜ੍ਜੇਤ੍ਵਾ ਭਿਕ੍ਖਾਚਰਿਯਾਯ, ਯਾਚਨਾਯਾਤਿ ਅਤ੍ਥੋ. ਯਾਚਨਾ ਹਿ ਬ੍ਰਾਹ੍ਮਣਾਨਂ ਭੋਗਪਰਿਯੇਸਨੇ ਧਮ੍ਮੋ, ਯਾਚਮਾਨਾਨਞ੍ਚ ਨੇਸਂ ਪਰੇਹਿ ਅਨੁਗ੍ਗਹਕਾਮੇਹਿ ਦਿਨ੍ਨਾ ਭੋਗਾ ਧਮ੍ਮਲਦ੍ਧਾ ਨਾਮ ਧਮ੍ਮਾਧਿਗਤਾ ਚ ਹੋਨ੍ਤਿ, ਸੋ ਚ ਤਥਾ ਪਰਿਯੇਸਿਤ੍ਵਾ ਲਭਿ. ਤੇਨਾਹ – ‘‘ਧਮ੍ਮੇਨ ਭੋਗੇ ਪਰਿਯੇਸਾਮਿ…ਪੇ… ਧਮ੍ਮਾਧਿਗਤੇਹੀ’’ਤਿ. ਭਿਯ੍ਯੋਪਿ ਦਦਾਮੀਤਿ ਤਤੋ ਉਤ੍ਤਰਿਪਿ ਦਦਾਮਿ, ਪਮਾਣਂ ਨਤ੍ਥਿ, ਏਤ੍ਥ ਲਦ੍ਧਭੋਗਪ੍ਪਮਾਣੇਨ ਦਦਾਮੀਤਿ ਦਸ੍ਸੇਤਿ.

ਤਗ੍ਘਾਤਿ ਏਕਂਸਵਚਨੇ ਨਿਪਾਤੋ. ਏਕਂਸੇਨੇਵ ਹਿ ਸਬ੍ਬਬੁਦ੍ਧਪਚ੍ਚੇਕਬੁਦ੍ਧਸਾਵਕੇਹਿ ਪਸਤ੍ਥਂ ਦਾਨਂ ਅਨ੍ਤਮਸੋ ਤਿਰਚ੍ਛਾਨਗਤਾਨਮ੍ਪਿ ਦੀਯਮਾਨਂ. ਵੁਤ੍ਤਞ੍ਚੇਤਂ ‘‘ਸਬ੍ਬਤ੍ਥ ਵਣ੍ਣਿਤਂ ਦਾਨਂ, ਨ ਦਾਨਂ ਗਰਹਿਤਂ ਕ੍ਵਚੀ’’ਤਿ. ਤਸ੍ਮਾ ਭਗਵਾਪਿ ਏਕਂਸੇਨੇਵ ਤਂ ਪਸਂਸਨ੍ਤੋ ਆਹ – ‘‘ਤਗ੍ਘ ਤ੍ਵਂ ਮਾਣਵ…ਪੇ… ਪਸਵਸੀ’’ਤਿ. ਸੇਸਂ ਉਤ੍ਤਾਨਤ੍ਥਮੇਵ. ਏਵਂ ਭਗਵਤਾ ‘‘ਬਹੁਂ ਸੋ ਪੁਞ੍ਞਂ ਪਸਵਤੀ’’ਤਿ ਵੁਤ੍ਤੇਪਿ ਦਕ੍ਖਿਣੇਯ੍ਯਤੋ ਦਕ੍ਖਿਣਾਵਿਸੁਦ੍ਧਿਂ ਸੋਤੁਕਾਮੋ ਬ੍ਰਾਹ੍ਮਣੋ ਉਤ੍ਤਰਿ ਭਗਵਨ੍ਤਂ ਪੁਚ੍ਛਿ. ਤੇਨਾਹੁ ਸਙ੍ਗੀਤਿਕਾਰਾ – ‘‘ਅਥ ਖੋ ਮਾਘੋ ਮਾਣਵੋ ਭਗਵਨ੍ਤਂ ਗਾਥਾਯ ਅਜ੍ਝਭਾਸੀ’’ਤਿ. ਤਂ ਅਤ੍ਥਤੋ ਵੁਤ੍ਤਨਯਮੇਵ.

੪੯੨. ਪੁਚ੍ਛਾਮਹਨ੍ਤਿਆਦਿਗਾਥਾਸੁ ਪਨ ਵਦਞ੍ਞੁਨ੍ਤਿ ਵਚਨਵਿਦੁਂ, ਸਬ੍ਬਾਕਾਰੇਨ ਸਤ੍ਤਾਨਂ ਵੁਤ੍ਤਵਚਨਾਧਿਪ੍ਪਾਯਞ੍ਞੁਨ੍ਤਿ ਵੁਤ੍ਤਂ ਹੋਤਿ. ਸੁਜ੍ਝੇਤਿ ਦਕ੍ਖਿਣੇਯ੍ਯਵਸੇਨ ਸੁਦ੍ਧਂ ਮਹਪ੍ਫਲਂ ਭਵੇਯ੍ਯ. ਯੋਜਨਾ ਪਨੇਤ੍ਥ – ਯੋ ਯਾਚਯੋਗੋ ਦਾਨਪਤਿ ਗਹਟ੍ਠੋ ਪੁਞ੍ਞਤ੍ਥਿਕੋ ਹੁਤ੍ਵਾ ਪਰੇਸਂ ਅਨ੍ਨਪਾਨਂ ਦਦਂ ਯਜਤਿ, ਨ ਅਗ੍ਗਿਮ੍ਹਿ ਆਹੁਤਿਮਤ੍ਤਂ ਪਕ੍ਖਿਪਨ੍ਤੋ, ਤਞ੍ਚ ਖੋ ਪੁਞ੍ਞਪੇਕ੍ਖੋਵ ਨ ਪਚ੍ਚੁਪਕਾਰਕਲ੍ਯਾਣਕਿਤ੍ਤਿਸਦ੍ਦਾਦਿਅਪੇਕ੍ਖੋ, ਤਸ੍ਸ ਏਵਰੂਪਸ੍ਸ ਯਜਮਾਨਸ੍ਸ ਹੁਤਂ ਕਥਂ ਸੁਜ੍ਝੇਯ੍ਯਾਤਿ?

੪੯੩. ਆਰਾਧਯੇ ਦਕ੍ਖਿਣੇਯ੍ਯੇਭਿ ਤਾਦੀਤਿ ਤਾਦਿਸੋ ਯਾਚਯੋਗੋ ਦਕ੍ਖਿਣੇਯ੍ਯੇਹਿ ਆਰਾਧਯੇ ਸਮ੍ਪਾਦਯੇ ਸੋਧਯੇ, ਮਹਪ੍ਫਲਂ ਤਂ ਹੁਤਂ ਕਰੇਯ੍ਯ, ਨ ਅਞ੍ਞਥਾਤਿ ਅਤ੍ਥੋ. ਇਮਿਨਾਸ੍ਸ ‘‘ਕਥਂ ਹੁਤਂ ਯਜਮਾਨਸ੍ਸ ਸੁਜ੍ਝੇ’’ ਇਚ੍ਚੇਤਂ ਬ੍ਯਾਕਤਂ ਹੋਤਿ.

੪੯੪. ਅਕ੍ਖਾਹਿ ਮੇ ਭਗਵਾ ਦਕ੍ਖਿਣੇਯ੍ਯੇਤਿ ਏਤ੍ਥ ਯੋ ਯਾਚਯੋਗੋ ਦਦਂ ਪਰੇਸਂ ਯਜਤਿ, ਤਸ੍ਸ ਮੇ ਭਗਵਾ ਦਕ੍ਖਿਣੇਯ੍ਯੇ ਅਕ੍ਖਾਹੀਤਿ ਏਵਂ ਯੋਜਨਾ ਵੇਦਿਤਬ੍ਬਾ.

੪੯੫. ਅਥਸ੍ਸ ਭਗਵਾ ਨਾਨਪ੍ਪਕਾਰੇਹਿ ਨਯੇਹਿ ਦਕ੍ਖਿਣੇਯ੍ਯੇ ਪਕਾਸੇਨ੍ਤੋ ‘‘ਯੇ ਵੇ ਅਸਤ੍ਤਾ’’ਤਿਆਦਿਕਾ ਗਾਥਾਯੋ ਅਭਾਸਿ. ਤਤ੍ਥ ਅਸਤ੍ਤਾਤਿ ਰਾਗਾਦਿਸਙ੍ਗਵਸੇਨ ਅਲਗ੍ਗਾ. ਕੇਵਲਿਨੋਤਿ ਪਰਿਨਿਟ੍ਠਿਤਕਿਚ੍ਚਾ. ਯਤਤ੍ਤਾਤਿ ਗੁਤ੍ਤਚਿਤ੍ਤਾ.

੪੯੬-੭. ਦਨ੍ਤਾ ਅਨੁਤ੍ਤਰੇਨ ਦਮਥੇਨ, ਵਿਮੁਤ੍ਤਾ ਪਞ੍ਞਾਚੇਤੋਵਿਮੁਤ੍ਤੀਹਿ, ਅਨੀਘਾ ਆਯਤਿਂ ਵਟ੍ਟਦੁਕ੍ਖਾਭਾਵੇਨ, ਨਿਰਾਸਾ ਸਮ੍ਪਤਿ ਕਿਲੇਸਾਭਾਵੇਨ. ਇਮਿਸ੍ਸਾ ਪਨ ਗਾਥਾਯ ਦੁਤਿਯਗਾਥਾ ਭਾਵਨਾਨੁਭਾਵਪ੍ਪਕਾਸਨਨਯੇਨ ਵੁਤ੍ਤਾਤਿ ਵੇਦਿਤਬ੍ਬਾ. ‘‘ਭਾਵਨਾਨੁਯੋਗਮਨੁਯੁਤ੍ਤਸ੍ਸ, ਭਿਕ੍ਖਵੇ, ਭਿਕ੍ਖੁਨੋ ਵਿਹਰਤੋ ਕਿਞ੍ਚਾਪਿ ਨ ਏਵਂ ਇਚ੍ਛਾ ਉਪ੍ਪਜ੍ਜੇਯ੍ਯ ‘ਅਹੋ ਵਤ ਮੇ ਅਨੁਪਾਦਾਯ ਆਸਵੇਹਿ ਚਿਤ੍ਤਂ ਵਿਮੁਚ੍ਚੇਯ੍ਯਾ’ਤਿ (ਅ. ਨਿ. ੭.੭੧), ਅਥ ਖ੍ਵਾਸ੍ਸ ਅਨੁਪਾਦਾਯ ਆਸਵੇਹਿ ਚਿਤ੍ਤਂ ਵਿਮੁਚ੍ਚਤੀ’’ਤਿ ਇਦਂ ਚੇਤ੍ਥ ਸੁਤ੍ਤਂ ਸਾਧਕਂ.

੪੯੮-੫੦੨. ਰਾਗਞ੍ਚ…ਪੇ… ਯੇਸੁ ਨ ਮਾਯਾ…ਪੇ… ਨ ਤਣ੍ਹਾਸੁ ਉਪਾਤਿਪਨ੍ਨਾਤਿ ਕਾਮਤਣ੍ਹਾਦੀਸੁ ਨਾਧਿਮੁਤ੍ਤਾ. ਵਿਤਰੇਯ੍ਯਾਤਿ ਵਿਤਰਿਤ੍ਵਾ. ਤਣ੍ਹਾਤਿ ਰੂਪਤਣ੍ਹਾਦਿਛਬ੍ਬਿਧਾ. ਭਵਾਭਵਾਯਾਤਿ ਸਸ੍ਸਤਾਯ ਵਾ ਉਚ੍ਛੇਦਾਯ ਵਾ. ਅਥ ਵਾ ਭਵਸ੍ਸ ਅਭਵਾਯ ਭਵਾਭਵਾਯ, ਪੁਨਬ੍ਭਵਾਭਿਨਿਬ੍ਬਤ੍ਤਿਯਾਤਿ ਵੁਤ੍ਤਂ ਹੋਤਿ. ਇਧ ਵਾ ਹੁਰਂ ਵਾਤਿ ਇਦਂ ਪਨ ‘‘ਕੁਹਿਞ੍ਚਿ ਲੋਕੇ’’ਤਿ ਇਮਸ੍ਸ ਵਿਤ੍ਥਾਰਵਚਨਂ.

੫੦੪. ਯੇ ਵੀਤਰਾਗਾ…ਪੇ… ਸਮਿਤਾਵਿਨੋਤਿ ਸਮਿਤਵਨ੍ਤੋ, ਕਿਲੇਸਵੂਪਸਮਕਾਰਿਨੋਤਿ ਅਤ੍ਥੋ. ਸਮਿਤਾਵਿਤਤ੍ਤਾ ਚ ਵੀਤਰਾਗਾ ਅਕੋਪਾ. ਇਧ ਵਿਪ੍ਪਹਾਯਾਤਿ ਇਧਲੋਕੇ ਵਤ੍ਤਮਾਨੇ ਖਨ੍ਧੇ ਵਿਹਾਯ, ਤਤੋ ਪਰਂ ਯੇਸਂ ਗਮਨਂ ਨਤ੍ਥੀਤਿ ਵੁਤ੍ਤਂ ਹੋਤਿ. ਇਤੋ ਪਰਂ ‘‘ਯੇ ਕਾਮੇ ਹਿਤ੍ਵਾ ਅਗਹਾ ਚਰਨ੍ਤਿ, ਸੁਸਞ੍ਞਤਤ੍ਤਾ ਤਸਰਂਵ ਉਜ੍ਜੁ’’ਨ੍ਤਿ ਇਮਮ੍ਪਿ ਗਾਥਂ ਕੇਚਿ ਪਠਨ੍ਤਿ.

੫੦੬-੮. ਜਹਿਤ੍ਵਾਤਿ ਹਿਤ੍ਵਾ. ‘‘ਜਹਿਤ੍ਵਾਨਾ’’ਤਿਪਿ ਪਾਠੋ, ਅਯਮੇਵਤ੍ਥੋ. ਅਤ੍ਤਦੀਪਾਤਿ ਅਤ੍ਤਨੋ ਗੁਣੇ ਏਵ ਅਤ੍ਤਨੋ ਦੀਪਂ ਕਤ੍ਵਾ ਵਿਚਰਨ੍ਤਾ ਖੀਣਾਸਵਾ ਵੁਚ੍ਚਨ੍ਤਿ. ਯੇ ਹੇਤ੍ਥਾਤਿ ਹਕਾਰੋ ਨਿਪਾਤੋ ਪਦਪੂਰਣਮਤ੍ਤੇ. ਅਯਂ ਪਨਤ੍ਥੋ – ਯੇ ਏਤ੍ਥ ਖਨ੍ਧਾਯਤਨਾਦਿਸਨ੍ਤਾਨੇ ਯਥਾ ਇਦਂ ਖਨ੍ਧਾਯਤਨਾਦਿ ਤਥਾ ਜਾਨਨ੍ਤਿ, ਯਂਸਭਾਵਂ ਤਂਸਭਾਵਂਯੇਵ ਸਞ੍ਜਾਨਨ੍ਤਿ ਅਨਿਚ੍ਚਾਦਿਵਸੇਨ ਜਾਨਨ੍ਤਾ. ਅਯਮਨ੍ਤਿਮਾ ਨਤ੍ਥਿ ਪੁਨਬ੍ਭਵੋਤਿ ਅਯਂ ਨੋ ਅਨ੍ਤਿਮਾ ਜਾਤਿ, ਇਦਾਨਿ ਨਤ੍ਥਿ ਪੁਨਬ੍ਭਵੋਤਿ ਏਵਞ੍ਚ ਯੇ ਜਾਨਨ੍ਤੀਤਿ.

੫੦੯. ਯੋ ਵੇਦਗੂਤਿ ਇਦਾਨਿ ਅਤ੍ਤਾਨਂ ਸਨ੍ਧਾਯ ਭਗਵਾ ਇਮਂ ਗਾਥਮਾਹ. ਤਤ੍ਥ ਸਤਿਮਾਤਿ ਛਸਤਤਵਿਹਾਰਸਤਿਯਾ ਸਮਨ੍ਨਾਗਤੋ. ਸਮ੍ਬੋਧਿਪਤ੍ਤੋਤਿ ਸਬ੍ਬਞ੍ਞੁਤਂ ਪਤ੍ਤੋ. ਸਰਣਂ ਬਹੂਨਨ੍ਤਿ ਬਹੂਨਂ ਦੇਵਮਨੁਸ੍ਸਾਨਂ ਭਯਵਿਹਿਂਸਨੇਨ ਸਰਣਭੂਤੋ.

੫੧੦. ਏਵਂ ਦਕ੍ਖਿਣੇਯ੍ਯੇ ਸੁਤ੍ਵਾ ਅਤ੍ਤਮਨੋ ਬ੍ਰਾਹ੍ਮਣੋ ਆਹ – ‘‘ਅਦ੍ਧਾ ਅਮੋਘਾ’’ਤਿ. ਤਤ੍ਥ ਤ੍ਵਞ੍ਹੇਤ੍ਥ ਜਾਨਾਸਿ ਯਥਾ ਤਥਾ ਇਦਨ੍ਤਿ ਤ੍ਵਞ੍ਹਿ ਏਤ੍ਥ ਲੋਕੇ ਇਦਂ ਸਬ੍ਬਮ੍ਪਿ ਞੇਯ੍ਯਂ ਯਥਾ ਤਥਾ ਜਾਨਾਸਿ ਯਾਥਾਵਤੋ ਜਾਨਾਸਿ, ਯਾਦਿਸਂ ਤਂ ਤਾਦਿਸਮੇਵ ਜਾਨਾਸੀਤਿ ਵੁਤ੍ਤਂ ਹੋਤਿ. ਤਥਾ ਹਿ ਤੇ ਵਿਦਿਤੋ ਏਸ ਧਮ੍ਮੋਤਿ ਤਥਾ ਹਿ ਤੇ ਏਸਾ ਧਮ੍ਮਧਾਤੁ ਸੁਪ੍ਪਟਿਵਿਦ੍ਧਾ, ਯਸ੍ਸਾ ਸੁਪ੍ਪਟਿਵਿਦ੍ਧਤਾ ਯਂ ਯਂ ਇਚ੍ਛਸਿ, ਤਂ ਤਂ ਜਾਨਾਸੀਤਿ ਅਧਿਪ੍ਪਾਯੋ.

੫੧੧. ਏਵਂ ਸੋ ਬ੍ਰਾਹ੍ਮਣੋ ਭਗਵਨ੍ਤਂ ਪਸਂਸਿਤ੍ਵਾ ਦਕ੍ਖਿਣੇਯ੍ਯਸਮ੍ਪਦਾਯ ਯਞ੍ਞਸਮ੍ਪਦਂ ਞਤ੍ਵਾ ਦਾਯਕਸਮ੍ਪਦਾਯਪਿ ਤਂ ਛਲ਼ਙ੍ਗਪਰਿਪੂਰਂ ਯਞ੍ਞਸਮ੍ਪਦਂ ਸੋਤੁਕਾਮੋ ‘‘ਯੋ ਯਾਚਯੋਗੋ’’ਤਿ ਉਤ੍ਤਰਿਪਞ੍ਹਂ ਪੁਚ੍ਛਿ. ਤਤ੍ਰਾਯਂ ਯੋਜਨਾ – ਯੋ ਯਾਚਯੋਗੋ ਦਦਂ ਪਰੇਸਂ ਯਜਤਿ, ਤਸ੍ਸ ਅਕ੍ਖਾਹਿ ਮੇ ਭਗਵਾ ਯਞ੍ਞਸਮ੍ਪਦਨ੍ਤਿ.

੫੧੨. ਅਥਸ੍ਸ ਭਗਵਾ ਦ੍ਵੀਹਿ ਗਾਥਾਹਿ ਅਕ੍ਖਾਸਿ. ਤਤ੍ਥਾਯਂ ਅਤ੍ਥਯੋਜਨਾ – ਯਜਸ੍ਸੁ ਮਾਘ, ਯਜਮਾਨੋ ਚ ਸਬ੍ਬਤ੍ਥ ਵਿਪ੍ਪਸਾਦੇਹਿ ਚਿਤ੍ਤਂ, ਤੀਸੁਪਿ ਕਾਲੇਸੁ ਚਿਤ੍ਤਂ ਪਸਾਦੇਹਿ. ਏਵਂ ਤੇ ਯਾਯਂ –

‘‘ਪੁਬ੍ਬੇਵ ਦਾਨਾ ਸੁਮਨੋ, ਦਦਂ ਚਿਤ੍ਤਂ ਪਸਾਦਯੇ;

ਦਤ੍ਵਾ ਅਤ੍ਤਮਨੋ ਹੋਤਿ, ਏਸਾ ਯਞ੍ਞਸ੍ਸ ਸਮ੍ਪਦਾ’’ਤਿ. (ਅ. ਨਿ. ੬.੩੭; ਪੇ. ਵ. ੩੦੫) –

ਯਞ੍ਞਸਮ੍ਪਦਾ ਵੁਤ੍ਤਾ, ਤਾਯ ਸਮ੍ਪਨ੍ਨੋ ਯਞ੍ਞੋ ਭਵਿਸ੍ਸਤਿ. ਤਤ੍ਥ ਸਿਯਾ ‘‘ਕਥਂ ਚਿਤ੍ਤਂ ਪਸਾਦੇਤਬ੍ਬ’’ਨ੍ਤਿ? ਦੋਸਪ੍ਪਹਾਨੇਨ. ਕਥਂ ਦੋਸਪ੍ਪਹਾਨਂ ਹੋਤਿ? ਯਞ੍ਞਾਰਮ੍ਮਣਤਾਯ. ਅਯਞ੍ਹਿ ਆਰਮ੍ਮਣਂ ਯਜਮਾਨਸ੍ਸ ਯਞ੍ਞੋ ਏਤ੍ਥ ਪਤਿਟ੍ਠਾਯ ਜਹਾਤਿ ਦੋਸਂ, ਅਯਞ੍ਹਿ ਸਤ੍ਤੇਸੁ ਮੇਤ੍ਤਾਪੁਬ੍ਬਙ੍ਗਮੇਨ ਸਮ੍ਮਾਦਿਟ੍ਠਿਪਦੀਪਵਿਹਤਮੋਹਨ੍ਧਕਾਰੇਨ ਚਿਤ੍ਤੇਨ ਯਜਮਾਨਸ੍ਸ ਦੇਯ੍ਯਧਮ੍ਮਸਙ੍ਖਾਤੋ ਯਞ੍ਞੋ ਆਰਮ੍ਮਣਂ ਹੋਤਿ, ਸੋ ਏਤ੍ਥ ਯਞ੍ਞੇ ਆਰਮ੍ਮਣਵਸੇਨ ਪਵਤ੍ਤਿਯਾ ਪਤਿਟ੍ਠਾਯ ਦੇਯ੍ਯਧਮ੍ਮਪਚ੍ਚਯਂ ਲੋਭਂ, ਪਟਿਗ੍ਗਾਹਕਪਚ੍ਚਯਂ ਕੋਧਂ, ਤਦੁਭਯਨਿਦਾਨਂ ਮੋਹਨ੍ਤਿ ਏਵਂ ਤਿਵਿਧਮ੍ਪਿ ਜਹਾਤਿ ਦੋਸਂ. ਸੋ ਏਵਂ ਭੋਗੇਸੁ ਵੀਤਰਾਗੋ, ਸਤ੍ਤੇਸੁ ਚ ਪਵਿਨੇਯ੍ਯ ਦੋਸਂ ਤਪ੍ਪਹਾਨੇਨੇਵ ਪਹੀਨਪਞ੍ਚਨੀਵਰਣੋ ਅਨੁਕ੍ਕਮੇਨ ਉਪਚਾਰਪ੍ਪਨਾਭੇਦਂ ਅਪਰਿਮਾਣਸਤ੍ਤਫਰਣੇਨ ਏਕਸਤ੍ਤੇ ਵਾ ਅਨਵਸੇਸਫਰਣੇਨ ਅਪ੍ਪਮਾਣਂ ਮੇਤ੍ਤਂ ਚਿਤ੍ਤਂ ਭਾਵੇਨ੍ਤੋ ਪੁਨ ਭਾਵਨਾਵੇਪੁਲ੍ਲਤ੍ਥਂ, ਰਤ੍ਤਿਨ੍ਦਿਵਂ ਸਤਤਂ ਸਬ੍ਬਇਰਿਯਾਪਥੇਸੁ ਅਪ੍ਪਮਤ੍ਤੋ ਹੁਤ੍ਵਾ ਤਮੇਵ ਮੇਤ੍ਤਜ੍ਝਾਨਸਙ੍ਖਾਤਂ ਸਬ੍ਬਾ ਦਿਸਾ ਫਰਤੇ ਅਪ੍ਪਮਞ੍ਞਨ੍ਤਿ.

੫੧੪. ਅਥ ਬ੍ਰਾਹ੍ਮਣੋ ਤਂ ਮੇਤ੍ਤਂ ‘‘ਬ੍ਰਹ੍ਮਲੋਕਮਗ੍ਗੋ ਅਯ’’ਨ੍ਤਿ ਅਜਾਨਨ੍ਤੋ ਕੇਵਲਂ ਅਤ੍ਤਨੋ ਵਿਸਯਾਤੀਤਂ ਮੇਤ੍ਤਾਭਾਵਨਂ ਸੁਤ੍ਵਾ ਸੁਟ੍ਠੁਤਰਂ ਸਞ੍ਜਾਤਸਬ੍ਬਞ੍ਞੁਸਮ੍ਭਾਵਨੋ ਭਗਵਤਿ ਅਤ੍ਤਨਾ ਬ੍ਰਹ੍ਮਲੋਕਾਧਿਮੁਤ੍ਤਤ੍ਤਾ ਬ੍ਰਹ੍ਮਲੋਕੂਪਪਤ੍ਤਿਮੇਵ ਚ ਸੁਦ੍ਧਿਂ ਮੁਤ੍ਤਿਞ੍ਚ ਮਞ੍ਞਮਾਨੋ ਬ੍ਰਹ੍ਮਲੋਕਮਗ੍ਗਂ ਪੁਚ੍ਛਨ੍ਤੋ ‘‘ਕੋ ਸੁਜ੍ਝਤੀ’’ਤਿ ਗਾਥਮਾਹ. ਤਤ੍ਰ ਚ ਬ੍ਰਹ੍ਮਲੋਕਗਾਮਿਂ ਪੁਞ੍ਞਂ ਕਰੋਨ੍ਤਂ ਸਨ੍ਧਾਯਾਹ – ‘‘ਕੋ ਸੁਜ੍ਝਤਿ ਮੁਚ੍ਚਤੀ’’ਤਿ, ਅਕਰੋਨ੍ਤਂ ਸਨ੍ਧਾਯ ‘‘ਬਜ੍ਝਤੀ ਚਾ’’ਤਿ. ਕੇਨਤ੍ਤਨਾਤਿ ਕੇਨ ਕਾਰਣੇਨ. ਸਕ੍ਖਿ ਬ੍ਰਹ੍ਮਜ੍ਜਦਿਟ੍ਠੋਤਿ ਬ੍ਰਹ੍ਮਾ ਅਜ੍ਜ ਸਕ੍ਖਿ ਦਿਟ੍ਠੋ. ਸਚ੍ਚਨ੍ਤਿ ਭਗਵਤੋ ਬ੍ਰਹ੍ਮਸਮਤ੍ਤਂ ਆਰਬ੍ਭ ਅਚ੍ਚਾਦਰੇਨ ਸਪਥਂ ਕਰੋਤਿ. ਕਥਂ ਉਪਪਜ੍ਜਤੀਤਿ ਅਚ੍ਚਾਦਰੇਨੇਵ ਪੁਨਪਿ ਪੁਚ੍ਛਤਿ. ਜੁਤਿਮਾਤਿ ਭਗਵਨ੍ਤਂ ਆਲਪਤਿ.

ਤਤ੍ਥ ਯਸ੍ਮਾ ਯੋ ਭਿਕ੍ਖੁ ਮੇਤ੍ਤਾਯ ਤਿਕਚਤੁਕ੍ਕਜ੍ਝਾਨਂ ਉਪ੍ਪਾਦੇਤ੍ਵਾ ਤਮੇਵ ਪਾਦਕਂ ਕਤ੍ਵਾ ਵਿਪਸ੍ਸਨ੍ਤੋ ਅਰਹਤ੍ਤਂ ਪਾਪੁਣਾਤਿ, ਸੋ ਸੁਜ੍ਝਤਿ ਮੁਚ੍ਚਤਿ ਚ, ਤਥਾਰੂਪੋ ਚ ਬ੍ਰਹ੍ਮਲੋਕਂ ਨ ਗਚ੍ਛਤਿ. ਯੋ ਪਨ ਮੇਤ੍ਤਾਯ ਤਿਕਚਤੁਕ੍ਕਜ੍ਝਾਨਂ ਉਪ੍ਪਾਦੇਤ੍ਵਾ ‘‘ਸਨ੍ਤਾ ਏਸਾ ਸਮਾਪਤ੍ਤੀ’’ਤਿਆਦਿਨਾ ਨਯੇਨ ਤਂ ਅਸ੍ਸਾਦੇਤਿ, ਸੋ ਬਜ੍ਝਤਿ. ਅਪਰਿਹੀਨਜ੍ਝਾਨੋ ਚ ਤੇਨੇਵ ਝਾਨੇਨ ਬ੍ਰਹ੍ਮਲੋਕਂ ਗਚ੍ਛਤਿ, ਤਸ੍ਮਾ ਭਗਵਾ ਯੋ ਸੁਜ੍ਝਤਿ ਮੁਚ੍ਚਤਿ ਚ, ਤਸ੍ਸ ਬ੍ਰਹ੍ਮਲੋਕਗਮਨਂ ਅਨਨੁਜਾਨਨ੍ਤੋ ਅਨਾਮਸਿਤ੍ਵਾਵ ਤਂ ਪੁਗ੍ਗਲਂ ਯੋ ਬਜ੍ਝਤਿ. ਤਸ੍ਸ ਤੇਨ ਝਾਨੇਨ ਬ੍ਰਹ੍ਮਲੋਕਗਮਨਂ ਦਸ੍ਸੇਨ੍ਤੋ ਬ੍ਰਾਹ੍ਮਣਸ੍ਸ ਸਪ੍ਪਾਯੇਨ ਨਯੇਨ ‘‘ਯੋ ਯਜਤੀ’’ਤਿ ਇਮਂ ਗਾਥਮਾਹ.

੫੧੫. ਤਤ੍ਥ ਤਿਵਿਧਨ੍ਤਿ ਤਿਕਾਲਪ੍ਪਸਾਦਂ ਸਨ੍ਧਾਯਾਹ. ਤੇਨ ਦਾਯਕਤੋ ਅਙ੍ਗਤ੍ਤਯਂ ਦਸ੍ਸੇਤਿ. ਆਰਾਧਯੇ ਦਕ੍ਖਿਣੇਯ੍ਯੇਭਿ ਤਾਦੀਤਿ ਤਞ੍ਚ ਸੋ ਤਾਦਿਸੋ ਤਿਵਿਧਸਮ੍ਪਤ੍ਤਿਸਾਧਕੋ ਪੁਗ੍ਗਲੋ ਤਿਵਿਧਂ ਯਞ੍ਞਸਮ੍ਪਦਂ ਦਕ੍ਖਿਣੇਯ੍ਯੇਹਿ ਖੀਣਾਸਵੇਹਿ ਸਾਧੇਯ੍ਯ ਸਮ੍ਪਾਦੇਯ੍ਯ. ਇਮਿਨਾ ਪਟਿਗ੍ਗਾਹਕਤੋ ਅਙ੍ਗਤ੍ਤਯਂ ਦਸ੍ਸੇਤਿ. ਏਵਂ ਯਜਿਤ੍ਵਾ ਸਮ੍ਮਾ ਯਾਚਯੋਗੋਤਿ ਏਵਂ ਮੇਤ੍ਤਜ੍ਝਾਨਪਦਟ੍ਠਾਨਭਾਵੇਨ ਛਲ਼ਙ੍ਗਸਮਨ੍ਨਾਗਤਂ ਯਞ੍ਞਂ ਸਮ੍ਮਾ ਯਜਿਤ੍ਵਾ ਸੋ ਯਾਚਯੋਗੋ ਤੇਨ ਛਲ਼ਙ੍ਗਯਞ੍ਞੂਪਨਿਸ੍ਸਯੇਨ ਮੇਤ੍ਤਜ੍ਝਾਨੇਨ ਉਪਪਜ੍ਜਤਿ ਬ੍ਰਹ੍ਮਲੋਕਨ੍ਤਿ ਬ੍ਰੂਮੀਤਿ ਬ੍ਰਾਹ੍ਮਣਂ ਸਮੁਸ੍ਸਾਹੇਨ੍ਤੋ ਦੇਸਨਂ ਸਮਾਪੇਸਿ. ਸੇਸਂ ਸਬ੍ਬਗਾਥਾਸੁ ਉਤ੍ਤਾਨਤ੍ਥਮੇਵ. ਇਤੋ ਪਰਞ੍ਚ ਪੁਬ੍ਬੇ ਵੁਤ੍ਤਨਯਮੇਵਾਤਿ.

ਪਰਮਤ੍ਥਜੋਤਿਕਾਯ ਖੁਦ੍ਦਕ-ਅਟ੍ਠਕਥਾਯ

ਸੁਤ੍ਤਨਿਪਾਤ-ਅਟ੍ਠਕਥਾਯ ਮਾਘਸੁਤ੍ਤਵਣ੍ਣਨਾ ਨਿਟ੍ਠਿਤਾ.