੧. ਪਬ੍ਬਜ੍ਜਾਸੁਤ੍ਤਵਣ੍ਣਨਾ

੪੦੮. ਪਬ੍ਬਜ੍ਜਂ ਕਿਤ੍ਤਯਿਸ੍ਸਾਮੀਤਿ ਪਬ੍ਬਜ੍ਜਾਸੁਤ੍ਤਂ. ਕਾ ਉਪ੍ਪਤ੍ਤਿ? ਭਗਵਤਿ ਕਿਰ ਸਾਵਤ੍ਥਿਯਂ ਵਿਹਰਨ੍ਤੇ ਆਯਸ੍ਮਤੋ ਆਨਨ੍ਦਸ੍ਸ ਪਰਿਵਿਤਕ੍ਕੋ ਉਦਪਾਦਿ – ‘‘ਸਾਰਿਪੁਤ੍ਤਾਦੀਨਂ ਮਹਾਸਾਵਕਾਨਂ ਪਬ੍ਬਜ੍ਜਾ ਕਿਤ੍ਤਿਤਾ, ਤਂ ਭਿਕ੍ਖੂ ਚ ਉਪਾਸਕਾ ਚ ਜਾਨਨ੍ਤਿ. ਭਗਵਤੋ ਪਨ ਅਕਿਤ੍ਤਿਤਾ, ਯਂਨੂਨਾਹਂ ਕਿਤ੍ਤੇਯ੍ਯ’’ਨ੍ਤਿ. ਸੋ ਜੇਤਵਨਵਿਹਾਰੇ ਆਸਨੇ ਨਿਸੀਦਿਤ੍ਵਾ ਚਿਤ੍ਤਬੀਜਨਿਂ ਗਹੇਤ੍ਵਾ ਭਿਕ੍ਖੂਨਂ ਭਗਵਤੋ ਪਬ੍ਬਜ੍ਜਂ ਕਿਤ੍ਤੇਨ੍ਤੋ ਇਮਂ ਸੁਤ੍ਤਮਭਾਸਿ.

ਤਤ੍ਥ ਯਸ੍ਮਾ ਪਬ੍ਬਜ੍ਜਂ ਕਿਤ੍ਤੇਨ੍ਤੇਨ ਯਥਾ ਪਬ੍ਬਜਿ, ਤਂ ਕਿਤ੍ਤੇਤਬ੍ਬਂ. ਯਥਾ ਚ ਪਬ੍ਬਜਿ, ਤਂ ਕਿਤ੍ਤੇਨ੍ਤੇਨ ਯਥਾ ਵੀਮਂਸਮਾਨੋ ਪਬ੍ਬਜ੍ਜਂ ਰੋਚੇਸਿ, ਤਂ ਕਿਤ੍ਤੇਤਬ੍ਬਂ. ਤਸ੍ਮਾ ‘‘ਪਬ੍ਬਜ੍ਜਂ ਕਿਤ੍ਤਯਿਸ੍ਸਾਮੀ’’ਤਿ ਵਤ੍ਵਾ ‘‘ਯਥਾ ਪਬ੍ਬਜੀ’’ਤਿਆਦਿਮਾਹ. ਚਕ੍ਖੁਮਾਤਿ ਪਞ੍ਚਹਿ ਚਕ੍ਖੂਹਿ ਚਕ੍ਖੁਮਾ ਚਕ੍ਖੁਸਮ੍ਪਨ੍ਨੋਤਿ ਅਤ੍ਥੋ. ਸੇਸਮਾਦਿਗਾਥਾਯ ਉਤ੍ਤਾਨਮੇਵ.

੪੦੯. ਇਦਾਨਿ ‘‘ਯਥਾ ਵੀਮਂਸਮਾਨੋ’’ਤਿ ਤਮਤ੍ਥਂ ਪਕਾਸੇਨ੍ਤੋ ਆਹ ‘‘ਸਮ੍ਬਾਧੋਯ’’ਨ੍ਤਿ. ਤਤ੍ਥ ਸਮ੍ਬਾਧੋਤਿ ਪੁਤ੍ਤਦਾਰਾਦਿਸਮ੍ਪੀਲ਼ਨੇਨ ਕਿਲੇਸਸਮ੍ਪੀਲ਼ਨੇਨ ਚ ਕੁਸਲਕਿਰਿਯਾਯ ਓਕਾਸਰਹਿਤੋ. ਰਜਸ੍ਸਾਯਤਨਨ੍ਤਿ ਕਮ੍ਬੋਜਾਦਯੋ ਵਿਯ ਅਸ੍ਸਾਦੀਨਂ, ਰਾਗਾਦਿਰਜਸ੍ਸ ਉਪ੍ਪਤ੍ਤਿਦੇਸੋ. ਅਬ੍ਭੋਕਾਸੋਤਿ ਵੁਤ੍ਤਸਮ੍ਬਾਧਪਟਿਪਕ੍ਖਭਾਵੇਨ ਆਕਾਸੋ ਵਿਯ ਵਿਵਟਾ. ਇਤਿ ਦਿਸ੍ਵਾਨ ਪਬ੍ਬਜੀਤਿ ਇਤਿ ਘਰਾਵਾਸਪਬ੍ਬਜ੍ਜਾਸੁ ਬ੍ਯਾਧਿਜਰਾਮਰਣੇਹਿ ਸੁਟ੍ਠੁਤਰਂ ਚੋਦਿਯਮਾਨਹਦਯੋ ਆਦੀਨਵਮਾਨਿਸਂਸਞ੍ਚ ਵੀਮਂਸਿਤ੍ਵਾ, ਮਹਾਭਿਨਿਕ੍ਖਮਨਂ ਨਿਕ੍ਖਮਿਤ੍ਵਾ, ਅਨੋਮਾਨਦੀਤੀਰੇ ਖਗ੍ਗੇਨ ਕੇਸੇ ਛਿਨ੍ਦਿਤ੍ਵਾ, ਤਾਵਦੇਵ ਚ ਦ੍ਵਙ੍ਗੁਲਮਤ੍ਤਸਣ੍ਠਿਤਸਮਣਸਾਰੁਪ੍ਪਕੇਸਮਸ੍ਸੁ ਹੁਤ੍ਵਾ ਘਟਿਕਾਰੇਨ ਬ੍ਰਹ੍ਮੁਨਾ ਉਪਨੀਤੇ ਅਟ੍ਠ ਪਰਿਕ੍ਖਾਰੇ ਗਹੇਤ੍ਵਾ ‘‘ਏਵਂ ਨਿਵਾਸੇਤਬ੍ਬਂ ਪਾਰੁਪਿਤਬ੍ਬ’’ਨ੍ਤਿ ਕੇਨਚਿ ਅਨਨੁਸਿਟ੍ਠੋ ਅਨੇਕਜਾਤਿਸਹਸ੍ਸਪਵਤ੍ਤਿਤੇਨ ਅਤ੍ਤਨੋ ਪਬ੍ਬਜ੍ਜਾਚਿਣ੍ਣੇਨੇਵ ਸਿਕ੍ਖਾਪਿਯਮਾਨੋ ਪਬ੍ਬਜਿ. ਏਕਂ ਕਾਸਾਵਂ ਨਿਵਾਸੇਤ੍ਵਾ ਏਕਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਏਕਂ ਚੀਵਰਂ ਖਨ੍ਧੇ ਕਰਿਤ੍ਵਾ ਮਤ੍ਤਿਕਾਪਤ੍ਤਂ ਅਂਸੇ ਆਲਗ੍ਗੇਤ੍ਵਾ ਪਬ੍ਬਜਿਤਵੇਸਂ ਅਧਿਟ੍ਠਾਸੀਤਿ ਵੁਤ੍ਤਂ ਹੋਤਿ. ਸੇਸਮੇਤ੍ਥ ਉਤ੍ਤਾਨਮੇਵ.

੪੧੦. ਏਵਂ ਭਗਵਤੋ ਪਬ੍ਬਜ੍ਜਂ ਕਿਤ੍ਤੇਤ੍ਵਾ ਤਤੋ ਪਰਂ ਪਬ੍ਬਜਿਤਪਟਿਪਤ੍ਤਿਂ ਅਨੋਮਾਨਦੀਤੀਰਂ ਹਿਤ੍ਵਾ ਪਧਾਨਾਯ ਗਮਨਞ੍ਚ ਪਕਾਸੇਤੁਂ ‘‘ਪਬ੍ਬਜਿਤ੍ਵਾਨ ਕਾਯੇਨਾ’’ਤਿਆਦਿਂ ਸਬ੍ਬਮਭਾਸਿ. ਤਤ੍ਥ ਕਾਯੇਨ ਪਾਪਕਮ੍ਮਂ ਵਿਵਜ੍ਜਯੀਤਿ ਤਿਵਿਧਂ ਕਾਯਦੁਚ੍ਚਰਿਤਂ ਵਜ੍ਜੇਸਿ. ਵਚੀਦੁਚ੍ਚਰਿਤਨ੍ਤਿ ਚਤੁਬ੍ਬਿਧਂ ਵਚੀਦੁਚ੍ਚਰਿਤਂ. ਆਜੀਵਂ ਪਰਿਸੋਧਯੀਤਿ ਮਿਚ੍ਛਾਜੀਵਂ ਹਿਤ੍ਵਾ ਸਮ੍ਮਾਜੀਵਮੇਵ ਪਵਤ੍ਤਯਿ.

੪੧੧. ਏਵਂ ਆਜੀਵਟ੍ਠਮਕਸੀਲਂ ਸੋਧੇਤ੍ਵਾ ਅਨੋਮਾਨਦੀਤੀਰਤੋ ਤਿਂਸਯੋਜਨਪ੍ਪਮਾਣਂ ਸਤ੍ਤਾਹੇਨ ਅਗਮਾ ਰਾਜਗਹਂ ਬੁਦ੍ਧੋ. ਤਤ੍ਥ ਕਿਞ੍ਚਾਪਿ ਯਦਾ ਰਾਜਗਹਂ ਅਗਮਾਸਿ, ਤਦਾ ਬੁਦ੍ਧੋ ਨ ਹੋਤਿ, ਤਥਾਪਿ ਬੁਦ੍ਧਸ੍ਸ ਪੁਬ੍ਬਚਰਿਯਾਤਿ ਕਤ੍ਵਾ ਏਵਂ ਵਤ੍ਤੁਂ ਲਬ੍ਭਤਿ – ‘‘ਇਧ ਰਾਜਾ ਜਾਤੋ, ਇਧ ਰਜ੍ਜਂ ਅਗ੍ਗਹੇਸੀ’’ਤਿਆਦਿ ਲੋਕਿਯਵੋਹਾਰਵਚਨਂ ਵਿਯ. ਮਗਧਾਨਨ੍ਤਿ ਮਗਧਾਨਂ ਜਨਪਦਸ੍ਸ ਨਗਰਨ੍ਤਿ ਵੁਤ੍ਤਂ ਹੋਤਿ. ਗਿਰਿਬ੍ਬਜਨ੍ਤਿ ਇਦਮ੍ਪਿ ਤਸ੍ਸ ਨਾਮਂ. ਤਞ੍ਹਿ ਪਣ੍ਡਵਗਿਜ੍ਝਕੂਟਵੇਭਾਰਇਸਿਗਿਲਿਵੇਪੁਲ੍ਲਨਾਮਕਾਨਂ ਪਞ੍ਚਨ੍ਨਂ ਗਿਰੀਨਂ ਮਜ੍ਝੇ ਵਜੋ ਵਿਯ ਠਿਤਂ, ਤਸ੍ਮਾ ‘‘ਗਿਰਿਬ੍ਬਜ’’ਨ੍ਤਿ ਵੁਚ੍ਚਤਿ. ਪਿਣ੍ਡਾਯ ਅਭਿਹਾਰੇਸੀਤਿ ਭਿਕ੍ਖਤ੍ਥਾਯ ਤਸ੍ਮਿਂ ਨਗਰੇ ਚਰਿ. ਸੋ ਕਿਰ ਨਗਰਦ੍ਵਾਰੇ ਠਤ੍ਵਾ ਚਿਨ੍ਤੇਸਿ – ‘‘ਸਚਾਹਂ ਰਞ੍ਞੋ ਬਿਮ੍ਬਿਸਾਰਸ੍ਸ ਅਤ੍ਤਨੋ ਆਗਮਨਂ ਨਿਵੇਦੇਯ੍ਯਂ, ‘ਸੁਦ੍ਧੋਦਨਸ੍ਸ ਪੁਤ੍ਤੋ ਸਿਦ੍ਧਤ੍ਥੋ ਨਾਮ ਕੁਮਾਰੋ ਆਗਤੋ’ਤਿ ਬਹੁਮ੍ਪਿ ਮੇ ਪਚ੍ਚਯਂ ਅਭਿਹਰੇਯ੍ਯ. ਨ ਖੋ ਪਨ ਮੇ ਤਂ ਪਤਿਰੂਪਂ ਪਬ੍ਬਜਿਤਸ੍ਸ ਆਰੋਚੇਤ੍ਵਾ ਪਚ੍ਚਯਗਹਣਂ, ਹਨ੍ਦਾਹਂ ਪਿਣ੍ਡਾਯ ਚਰਾਮੀ’’ਤਿ ਦੇਵਦਤ੍ਤਿਯਂ ਪਂਸੁਕੂਲਚੀਵਰਂ ਪਾਰੁਪਿਤ੍ਵਾ ਮਤ੍ਤਿਕਾਪਤ੍ਤਂ ਗਹੇਤ੍ਵਾ ਪਾਚੀਨਦ੍ਵਾਰੇਨ ਨਗਰਂ ਪਵਿਸਿਤ੍ਵਾ ਅਨੁਘਰਂ ਪਿਣ੍ਡਾਯ ਅਚਰਿ. ਤੇਨਾਹ ਆਯਸ੍ਮਾ ਆਨਨ੍ਦੋ – ‘‘ਪਿਣ੍ਡਾਯ ਅਭਿਹਾਰੇਸੀ’’ਤਿ. ਆਕਿਣ੍ਣਵਰਲਕ੍ਖਣੋਤਿ ਸਰੀਰੇ ਆਕਿਰਿਤ੍ਵਾ ਵਿਯ ਠਪਿਤਵਰਲਕ੍ਖਣੋ ਵਿਪੁਲਵਰਲਕ੍ਖਣੋ ਵਾ. ਵਿਪੁਲਮ੍ਪਿ ਹਿ ‘‘ਆਕਿਣ੍ਣ’’ਨ੍ਤਿ ਵੁਚ੍ਚਤਿ. ਯਥਾਹ – ‘‘ਆਕਿਣ੍ਣਲੁਦ੍ਦੋ ਪੁਰਿਸੋ, ਧਾਤਿਚੇਲਂਵ ਮਕ੍ਖਿਤੋ’’ਤਿ (ਜਾ. ੧.੬.੧੧੮; ੧.੯.੧੦੬). ਵਿਪੁਲਲੁਦ੍ਦੋਤਿ ਅਤ੍ਥੋ.

੪੧੨. ਤਮਦ੍ਦਸਾਤਿ ਤਤੋ ਕਿਰ ਪੁਰਿਮਾਨਿ ਸਤ੍ਤ ਦਿਵਸਾਨਿ ਨਗਰੇ ਨਕ੍ਖਤ੍ਤਂ ਘੋਸਿਤਂ ਅਹੋਸਿ. ਤਂ ਦਿਵਸਂ ਪਨ ‘‘ਨਕ੍ਖਤ੍ਤਂ ਵੀਤਿਵਤ੍ਤਂ, ਕਮ੍ਮਨ੍ਤਾ ਪਯੋਜੇਤਬ੍ਬਾ’’ਤਿ ਭੇਰਿ ਚਰਿ. ਅਥ ਮਹਾਜਨੋ ਰਾਜਙ੍ਗਣੇ ਸਨ੍ਨਿਪਤਿ. ਰਾਜਾਪਿ ‘‘ਕਮ੍ਮਨ੍ਤਂ ਸਂਵਿਦਹਿਸ੍ਸਾਮੀ’’ਤਿ ਸੀਹਪਞ੍ਜਰਂ ਵਿਵਰਿਤ੍ਵਾ ਬਲਕਾਯਂ ਪਸ੍ਸਨ੍ਤੋ ਤਂ ਪਿਣ੍ਡਾਯ ਅਭਿਹਾਰੇਨ੍ਤਂ ਮਹਾਸਤ੍ਤਂ ਅਦ੍ਦਸ. ਤੇਨਾਹ ਆਯਸ੍ਮਾ ਆਨਨ੍ਦੋ – ‘‘ਤਮਦ੍ਦਸਾ ਬਿਮ੍ਬਿਸਾਰੋ, ਪਾਸਾਦਸ੍ਮਿਂ ਪਤਿਟ੍ਠਿਤੋ’’ਤਿ. ਇਮਮਤ੍ਥਂ ਅਭਾਸਥਾਤਿ ਇਮਂ ਅਤ੍ਥਂ ਅਮਚ੍ਚਾਨਂ ਅਭਾਸਿ.

੪੧੩. ਇਦਾਨਿ ਤਂ ਤੇਸਂ ਅਮਚ੍ਚਾਨਂ ਭਾਸਿਤਮਤ੍ਥਂ ਦਸ੍ਸੇਨ੍ਤੋ ਆਹ – ‘‘ਇਮਂ ਭੋਨ੍ਤੋ’’ਤਿ. ਤਤ੍ਥ ਇਮਨ੍ਤਿ ਸੋ ਰਾਜਾ ਬੋਧਿਸਤ੍ਤਂ ਦਸ੍ਸੇਤਿ, ਭੋਨ੍ਤੋਤਿ ਅਮਚ੍ਚੇ ਆਲਪਤਿ. ਨਿਸਾਮੇਥਾਤਿ ਪਸ੍ਸਥ. ਅਭਿਰੂਪੋਤਿ ਦਸ੍ਸਨੀਯਙ੍ਗਪਚ੍ਚਙ੍ਗੋ. ਬ੍ਰਹ੍ਮਾਤਿ ਆਰੋਹਪਰਿਣਾਹਸਮ੍ਪਨ੍ਨੋ. ਸੁਚੀਤਿ ਪਰਿਸੁਦ੍ਧਛਵਿਵਣ੍ਣੋ. ਚਰਣੇਨਾਤਿ ਗਮਨੇਨ.

੪੧੪-੫. ਨੀਚਕੁਲਾਮਿਵਾਤਿ ਨੀਚਕੁਲਾ ਇਵ ਪਬ੍ਬਜਿਤੋ ਨ ਹੋਤੀਤਿ ਅਤ੍ਥੋ. ਮਕਾਰੋ ਪਦਸਨ੍ਧਿਕਰੋ. ਕੁਹਿਂ ਭਿਕ੍ਖੁ ਗਮਿਸ੍ਸਤੀਤਿ ਅਯਂ ਭਿਕ੍ਖੁ ਕੁਹਿਂ ਗਮਿਸ੍ਸਤਿ, ਅਜ੍ਜ ਕਤ੍ਥ ਵਸਿਸ੍ਸਤੀਤਿ ਜਾਨਿਤੁਂ ਰਾਜਦੂਤਾ ਸੀਘਂ ਗਚ੍ਛਨ੍ਤੁ. ਦਸ੍ਸਨਕਾਮਾ ਹਿ ਮਯਂ ਅਸ੍ਸਾਤਿ ਇਮਿਨਾ ਅਧਿਪ੍ਪਾਯੇਨ ਆਹ. ਗੁਤ੍ਤਦ੍ਵਾਰੋ ਓਕ੍ਖਿਤ੍ਤਚਕ੍ਖੁਤਾਯ, ਸੁਸਂਵੁਤੋ ਸਤਿਯਾ. ਗੁਤ੍ਤਦ੍ਵਾਰੋ ਵਾ ਸਤਿਯਾ, ਸੁਸਂਵੁਤੋ ਪਾਸਾਦਿਕੇਨ ਸਙ੍ਘਾਟਿਚੀਵਰਧਾਰਣੇਨ.

੪੧੬. ਖਿਪ੍ਪਂ ਪਤ੍ਤਂ ਅਪੂਰੇਸੀਤਿ ਸਮ੍ਪਜਾਨਤ੍ਤਾ ਪਤਿਸ੍ਸਤਤ੍ਤਾ ਚ ਅਧਿਕਂ ਅਗਣ੍ਹਨ੍ਤੋ ‘‘ਅਲਂ ਏਤ੍ਤਾਵਤਾ’’ਤਿ ਅਜ੍ਝਾਸਯਪੂਰਣੇਨ ਖਿਪ੍ਪਂ ਪਤ੍ਤਂ ਅਪੂਰੇਸਿ. ਮੁਨੀਤਿ ਮੋਨਤ੍ਥਾਯ ਪਟਿਪਨ੍ਨਤ੍ਤਾ ਅਪ੍ਪਤ੍ਤਮੁਨਿਭਾਵੋਪਿ ਮੁਨਿਇਚ੍ਚੇਵ ਵੁਤ੍ਤੋ, ਲੋਕਵੋਹਾਰੇਨ ਵਾ. ਲੋਕਿਯਾ ਹਿ ਅਮੋਨਸਮ੍ਪਤ੍ਤਮ੍ਪਿ ਪਬ੍ਬਜਿਤਂ ‘‘ਮੁਨੀ’’ਤਿ ਭਣਨ੍ਤਿ. ਪਣ੍ਡਵਂ ਅਭਿਹਾਰੇਸੀਤਿ ਤਂ ਪਬ੍ਬਤਂ ਅਭਿਰੁਹਿ. ਸੋ ਕਿਰ ਮਨੁਸ੍ਸੇ ਪੁਚ੍ਛਿ ‘‘ਇਮਸ੍ਮਿਂ ਨਗਰੇ ਪਬ੍ਬਜਿਤਾ ਕਤ੍ਥ ਵਸਨ੍ਤੀ’’ਤਿ. ਅਥਸ੍ਸ ਤੇ ‘‘ਪਣ੍ਡਵਸ੍ਸ ਉਪਰਿ ਪੁਰਤ੍ਥਾਭਿਮੁਖਪਬ੍ਭਾਰੇ’’ਤਿ ਆਰੋਚੇਸੁਂ. ਤਸ੍ਮਾ ਤਮੇਵ ਪਣ੍ਡਵਂ ਅਭਿਹਾਰੇਸਿ ‘‘ਏਤ੍ਥ ਵਾਸੋ ਭਵਿਸ੍ਸਤੀ’’ਤਿ ਏਵਂ ਚਿਨ੍ਤੇਤ੍ਵਾ.

੪੧੯-੨੩. ਬ੍ਯਗ੍ਘੁਸਭੋਵ ਸੀਹੋਵ ਗਿਰਿਗਬ੍ਭਰੇਤਿ ਗਿਰਿਗੁਹਾਯਂ ਬ੍ਯਗ੍ਘੋ ਵਿਯ ਉਸਭੋ ਵਿਯ ਸੀਹੋ ਵਿਯ ਚ ਨਿਸਿਨ੍ਨੋਤਿ ਅਤ੍ਥੋ. ਏਤੇ ਹਿ ਤਯੋ ਸੇਟ੍ਠਾ ਵਿਗਤਭਯਭੇਰਵਾ ਗਿਰਿਗਬ੍ਭਰੇ ਨਿਸੀਦਨ੍ਤਿ, ਤਸ੍ਮਾ ਏਵਂ ਉਪਮਂ ਅਕਾਸਿ. ਭਦ੍ਦਯਾਨੇਨਾਤਿ ਹਤ੍ਥਿਅਸ੍ਸਰਥਸਿਵਿਕਾਦਿਨਾ ਉਤ੍ਤਮਯਾਨੇਨ. ਸਯਾਨਭੂਮਿਂ ਯਾਯਿਤ੍ਵਾਤਿ ਯਾਵਤਿਕਾ ਭੂਮਿ ਹਤ੍ਥਿਅਸ੍ਸਾਦਿਨਾ ਯਾਨੇਨ ਸਕ੍ਕਾ ਗਨ੍ਤੁਂ, ਤਂ ਗਨ੍ਤ੍ਵਾ. ਆਸਜ੍ਜਾਤਿ ਪਤ੍ਵਾ, ਸਮੀਪਮਸ੍ਸ ਗਨ੍ਤ੍ਵਾਤਿ ਅਤ੍ਥੋ. ਉਪਾਵਿਸੀਤਿ ਨਿਸੀਦਿ. ਯੁਵਾਤਿ ਯੋਬ੍ਬਨਸਮ੍ਪਨ੍ਨੋ. ਦਹਰੋਤਿ ਜਾਤਿਯਾ ਤਰੁਣੋ. ਪਠਮੁਪ੍ਪਤ੍ਤਿਕੋ ਸੁਸੂਤਿ ਤਦੁਭਯਵਿਸੇਸਨਮੇਵ. ਯੁਵਾ ਸੁਸੂਤਿ ਅਤਿਯੋਬ੍ਬਨੋ. ਪਠਮੁਪ੍ਪਤ੍ਤਿਕੋਤਿ ਪਠਮੇਨੇਵ ਯੋਬ੍ਬਨਵੇਸੇਨ ਉਟ੍ਠਿਤੋ. ਦਹਰੋ ਚਾਸੀਤਿ ਸਤਿ ਚ ਦਹਰਤ੍ਤੇ ਸੁਸੁ ਬਾਲਕੋ ਵਿਯ ਖਾਯਸੀਤਿ.

੪੨੪-੫. ਅਨੀਕਗ੍ਗਨ੍ਤਿ ਬਲਕਾਯਂ ਸੇਨਾਮੁਖਂ. ਦਦਾਮਿ ਭੋਗੇ ਭੁਞ੍ਜਸ੍ਸੂਤਿ ਏਤ੍ਥ ‘‘ਅਹਂ ਤੇ ਅਙ੍ਗਮਗਧੇਸੁ ਯਾਵਿਚ੍ਛਸਿ, ਤਾਵ ਦਦਾਮਿ ਭੋਗੇ. ਤਂ ਤ੍ਵਂ ਸੋਭਯਨ੍ਤੋ ਅਨੀਕਗ੍ਗਂ ਨਾਗਸਙ੍ਘਪੁਰਕ੍ਖਤੋ ਭੁਞ੍ਜਸ੍ਸੂ’’ਤਿ ਏਵਂ ਸਮ੍ਬਨ੍ਧੋ ਵੇਦਿਤਬ੍ਬੋ. ਉਜੁਂ ਜਨਪਦੋ ਰਾਜਾਤਿ ‘‘ਦਦਾਮਿ ਭੋਗੇ ਭੁਞ੍ਜਸ੍ਸੁ, ਜਾਤਿਂ ਅਕ੍ਖਾਹਿ ਪੁਚ੍ਛਿਤੋ’’ਤਿ ਏਵਂ ਕਿਰ ਵੁਤ੍ਤੋ ਮਹਾਪੁਰਿਸੋ ਚਿਨ੍ਤੇਸਿ – ‘‘ਸਚੇ ਅਹਂ ਰਜ੍ਜੇਨ ਅਤ੍ਥਿਕੋ ਅਸ੍ਸਂ, ਚਾਤੁਮਹਾਰਾਜਿਕਾਦਯੋਪਿ ਮਂ ਅਤ੍ਤਨੋ ਅਤ੍ਤਨੋ ਰਜ੍ਜੇਨ ਨਿਮਨ੍ਤੇਯ੍ਯੁਂ, ਗੇਹੇ ਠਿਤੋ ਏਵ ਵਾ ਚਕ੍ਕਵਤ੍ਤਿਰਜ੍ਜਂ ਕਾਰੇਯ੍ਯਂ. ਅਯਂ ਪਨ ਰਾਜਾ ਅਜਾਨਨ੍ਤੋ ਏਵਮਾਹ – ‘ਹਨ੍ਦਾਹਂ, ਤਂ ਜਾਨਾਪੇਮੀ’’’ਤਿ ਬਾਹਂ ਉਚ੍ਚਾਰੇਤ੍ਵਾ ਅਤ੍ਤਨੋ ਆਗਤਦਿਸਾਭਾਗਂ ਨਿਦ੍ਦਿਸਨ੍ਤੋ ‘‘ਉਜੁਂ ਜਨਪਦੋ ਰਾਜਾ’’ਤਿਆਦਿਮਾਹ. ਤਤ੍ਥ ਹਿਮਵਨ੍ਤਸ੍ਸ ਪਸ੍ਸਤੋਤਿ ਭਣਨ੍ਤੋ ਸਸ੍ਸਸਮ੍ਪਤ੍ਤਿਵੇਕਲ੍ਲਾਭਾਵਂ ਦਸ੍ਸੇਤਿ. ਹਿਮਵਨ੍ਤਞ੍ਹਿ ਨਿਸ੍ਸਾਯ ਪਾਸਾਣਵਿਵਰਸਮ੍ਭਵਾ ਮਹਾਸਾਲਾਪਿ ਪਞ੍ਚਹਿ ਵੁਦ੍ਧੀਹਿ ਵਡ੍ਢਨ੍ਤਿ, ਕਿਮਙ੍ਗਂ ਪਨ ਖੇਤ੍ਤੇ ਵੁਤ੍ਤਾਨਿ ਸਸ੍ਸਾਨਿ. ਧਨਵੀਰਿਯੇਨ ਸਮ੍ਪਨ੍ਨੋਤਿ ਭਣਨ੍ਤੋ ਸਤ੍ਤਹਿ ਰਤਨੇਹਿ ਅਵੇਕਲ੍ਲਤ੍ਤਂ, ਪਰਰਾਜੂਹਿ ਅਤਕ੍ਕਨੀਯਂ ਵੀਰਪੁਰਿਸਾਧਿਟ੍ਠਿਤਭਾਵਞ੍ਚਸ੍ਸ ਦਸ੍ਸੇਤਿ. ਕੋਸਲੇਸੁ ਨਿਕੇਤਿਨੋਤਿ ਭਣਨ੍ਤੋ ਨਵਕਰਾਜਭਾਵਂ ਪਟਿਕ੍ਖਿਪਤਿ. ਨਵਕਰਾਜਾ ਹਿ ਨਿਕੇਤੀਤਿ ਨ ਵੁਚ੍ਚਤਿ. ਯਸ੍ਸ ਪਨ ਆਦਿਕਾਲਤੋ ਪਭੁਤਿ ਅਨ੍ਵਯਵਸੇਨ ਸੋ ਏਵ ਜਨਪਦੋ ਨਿਵਾਸੋ, ਸੋ ਨਿਕੇਤੀਤਿ ਵੁਚ੍ਚਤਿ. ਤਥਾਰੂਪੋ ਚ ਰਾਜਾ ਸੁਦ੍ਧੋਦਨੋ, ਯਂ ਸਨ੍ਧਾਯਾਹ ‘‘ਕੋਸਲੇਸੁ ਨਿਕੇਤਿਨੋ’’ਤਿ. ਤੇਨ ਅਨ੍ਵਯਾਗਤਮ੍ਪਿ ਭੋਗਸਮ੍ਪਤ੍ਤਿਂ ਦੀਪੇਤਿ.

੪੨੬. ਏਤ੍ਤਾਵਤਾ ਅਤ੍ਤਨੋ ਭੋਗਸਮ੍ਪਤ੍ਤਿਂ ਦੀਪੇਤ੍ਵਾ ‘‘ਆਦਿਚ੍ਚਾ ਨਾਮ ਗੋਤ੍ਤੇਨ, ਸਾਕਿਯਾ ਨਾਮ ਜਾਤਿਯਾ’’ਤਿ ਇਮਿਨਾ ਜਾਤਿਸਮ੍ਪਤ੍ਤਿਞ੍ਚ ਆਚਿਕ੍ਖਿਤ੍ਵਾ ਯਂ ਵੁਤ੍ਤਂ ਰਞ੍ਞਾ ‘‘ਦਦਾਮਿ ਭੋਗੇ ਭੁਞ੍ਜਸ੍ਸੂ’’ਤਿ, ਤਂ ਪਟਿਕ੍ਖਿਪਨ੍ਤੋ ਆਹ – ‘‘ਤਮ੍ਹਾ ਕੁਲਾ ਪਬ੍ਬਜਿਤੋਮ੍ਹਿ, ਨ ਕਾਮੇ ਅਭਿਪਤ੍ਥਯ’’ਨ੍ਤਿ. ਯਦਿ ਹਿ ਅਹਂ ਕਾਮੇ ਅਭਿਪਤ੍ਥਯੇਯ੍ਯਂ, ਨ ਈਦਿਸਂ ਧਨਵੀਰਿਯਸਮ੍ਪਨ੍ਨਂ ਦ੍ਵਾਸੀਤਿਸਹਸ੍ਸਵੀਰਪੁਰਿਸਸਮਾਕੁਲਂ ਕੁਲਂ ਛਡ੍ਡੇਤ੍ਵਾ ਪਬ੍ਬਜੇਯ੍ਯਨ੍ਤਿ ਅਯਂ ਕਿਰੇਤ੍ਥ ਅਧਿਪ੍ਪਾਯੋ.

੪੨੭. ਏਵਂ ਰਞ੍ਞੋ ਵਚਨਂ ਪਟਿਕ੍ਖਿਪਿਤ੍ਵਾ ਤਤੋ ਪਰਂ ਅਤ੍ਤਨੋ ਪਬ੍ਬਜ੍ਜਾਹੇਤੁਂ ਦਸ੍ਸੇਨ੍ਤੋ ਆਹ – ‘‘ਕਾਮੇਸ੍ਵਾਦੀਨਵਂ ਦਿਸ੍ਵਾ, ਨੇਕ੍ਖਮ੍ਮਂ ਦਟ੍ਠੁ ਖੇਮਤੋ’’ਤਿ. ਏਤਂ ‘‘ਪਬ੍ਬਜਿਤੋਮ੍ਹੀ’’ਤਿ ਇਮਿਨਾ ਸਮ੍ਬਨ੍ਧਿਤਬ੍ਬਂ. ਤਤ੍ਥ ਦਟ੍ਠੂਤਿ ਦਿਸ੍ਵਾ. ਸੇਸਮੇਤ੍ਥ ਇਤੋ ਪੁਰਿਮਗਾਥਾਸੁ ਚ ਯਂ ਯਂ ਨ ਵਿਚਾਰਿਤਂ, ਤਂ ਤਂ ਸਬ੍ਬਂ ਉਤ੍ਤਾਨਤ੍ਥਤ੍ਤਾ ਏਵ ਨ ਵਿਚਾਰਿਤਨ੍ਤਿ ਵੇਦਿਤਬ੍ਬਂ. ਏਵਂ ਅਤ੍ਤਨੋ ਪਬ੍ਬਜ੍ਜਾਹੇਤੁਂ ਵਤ੍ਵਾ ਪਧਾਨਤ੍ਥਾਯ ਗਨ੍ਤੁਕਾਮੋ ਰਾਜਾਨਂ ਆਮਨ੍ਤੇਨ੍ਤੋ ਆਹ – ‘‘ਪਧਾਨਾਯ ਗਮਿਸ੍ਸਾਮਿ, ਏਤ੍ਥ ਮੇ ਰਞ੍ਜਤੀ ਮਨੋ’’ਤਿ. ਤਸ੍ਸਤ੍ਥੋ – ਯਸ੍ਮਾਹਂ, ਮਹਾਰਾਜ, ਨੇਕ੍ਖਮ੍ਮਂ ਦਟ੍ਠੁ ਖੇਮਤੋ ਪਬ੍ਬਜਿਤੋ, ਤਸ੍ਮਾ ਤਂ ਪਰਮਤ੍ਥਨੇਕ੍ਖਮ੍ਮਂ ਨਿਬ੍ਬਾਨਾਮਤਂ ਸਬ੍ਬਧਮ੍ਮਾਨਂ ਅਗ੍ਗਟ੍ਠੇਨ ਪਧਾਨਂ ਪਤ੍ਥੇਨ੍ਤੋ ਪਧਾਨਤ੍ਥਾਯ ਗਮਿਸ੍ਸਾਮਿ, ਏਤ੍ਥ ਮੇ ਪਧਾਨੇ ਰਞ੍ਜਤਿ ਮਨੋ, ਨ ਕਾਮੇਸੂਤਿ. ਏਵਂ ਵੁਤ੍ਤੇ ਕਿਰ ਰਾਜਾ ਬੋਧਿਸਤ੍ਤਂ ਆਹ – ‘‘ਪੁਬ੍ਬੇਵ ਮੇਤਂ, ਭਨ੍ਤੇ, ਸੁਤਂ ‘ਸੁਦ੍ਧੋਦਨਰਞ੍ਞੋ ਕਿਰ ਪੁਤ੍ਤੋ ਸਿਦ੍ਧਤ੍ਥਕੁਮਾਰੋ ਚਤ੍ਤਾਰਿ ਪੁਬ੍ਬਨਿਮਿਤ੍ਤਾਨਿ ਦਿਸ੍ਵਾ ਪਬ੍ਬਜਿਤ੍ਵਾ ਬੁਦ੍ਧੋ ਭਵਿਸ੍ਸਤੀ’ਤਿ, ਸੋਹਂ, ਭਨ੍ਤੇ, ਤੁਮ੍ਹਾਕਂ ਅਧਿਮੁਤ੍ਤਿਂ ਦਿਸ੍ਵਾ ਏਵਂਪਸਨ੍ਨੋ ‘ਅਦ੍ਧਾ ਬੁਦ੍ਧਤ੍ਤਂ ਪਾਪੁਣਿਸ੍ਸਥਾ’ਤਿ. ਸਾਧੁ, ਭਨ੍ਤੇ, ਬੁਦ੍ਧਤ੍ਤਂ ਪਤ੍ਵਾ ਪਠਮਂ ਮਮ ਵਿਜਿਤਂ ਓਕ੍ਕਮੇਯ੍ਯਾਥਾ’’ਤਿ.

ਪਰਮਤ੍ਥਜੋਤਿਕਾਯ ਖੁਦ੍ਦਕ-ਅਟ੍ਠਕਥਾਯ

ਸੁਤ੍ਤਨਿਪਾਤ-ਅਟ੍ਠਕਥਾਯ ਪਬ੍ਬਜ੍ਜਾਸੁਤ੍ਤਵਣ੍ਣਨਾ ਨਿਟ੍ਠਿਤਾ.