੯. ਕਿਂਸੀਲਸੁਤ੍ਤਵਣ੍ਣਨਾ

੩੨੭. ਕਿਂਸੀਲੋਤਿ ਕਿਂਸੀਲਸੁਤ੍ਤਂ. ਕਾ ਉਪ੍ਪਤ੍ਤਿ? ਆਯਸ੍ਮਤੋ ਸਾਰਿਪੁਤ੍ਤਸ੍ਸ ਗਿਹਿਸਹਾਯਕੋ ਏਕੋ ਥੇਰਸ੍ਸੇਵ ਪਿਤੁਨੋ ਵਙ੍ਗਨ੍ਤਬ੍ਰਾਹ੍ਮਣਸ੍ਸ ਸਹਾਯਸ੍ਸ ਬ੍ਰਾਹ੍ਮਣਸ੍ਸ ਪੁਤ੍ਤੋ ਸਟ੍ਠਿਕੋਟਿਅਧਿਕਂ ਪਞ੍ਚਸਤਕੋਟਿਧਨਂ ਪਰਿਚ੍ਚਜਿਤ੍ਵਾ ਆਯਸ੍ਮਤੋ ਸਾਰਿਪੁਤ੍ਤਤ੍ਥੇਰਸ੍ਸ ਸਨ੍ਤਿਕੇ ਪਬ੍ਬਜਿਤ੍ਵਾ ਸਬ੍ਬਂ ਬੁਦ੍ਧਵਚਨਂ ਪਰਿਯਾਪੁਣਿ. ਤਸ੍ਸ ਥੇਰੋ ਬਹੁਸੋ ਓਵਦਿਤ੍ਵਾ ਕਮ੍ਮਟ੍ਠਾਨਮਦਾਸਿ, ਸੋ ਤੇਨ ਵਿਸੇਸਂ ਨਾਧਿਗਚ੍ਛਤਿ. ਤਤੋ ਥੇਰੋ ‘‘ਬੁਦ੍ਧਵੇਨੇਯ੍ਯੋ ਏਸੋ’’ਤਿ ਞਤ੍ਵਾ ਤਂ ਆਦਾਯ ਭਗਵਤੋ ਸਨ੍ਤਿਕਂ ਗਨ੍ਤ੍ਵਾ ਤਂ ਭਿਕ੍ਖੁਂ ਆਰਬ੍ਭ ਪੁਗ੍ਗਲਂ ਅਨਿਯਮੇਤ੍ਵਾ ‘‘ਕਿਂਸੀਲੋ’’ਤਿ ਪੁਚ੍ਛਿ. ਅਥਸ੍ਸ ਭਗਵਾ ਤਤੋ ਪਰਂ ਅਭਾਸਿ. ਤਤ੍ਥ ਕਿਂਸੀਲੋਤਿ ਕੀਦਿਸੇਨ ਵਾਰਿਤ੍ਤਸੀਲੇਨ ਸਮਨ੍ਨਾਗਤੋ, ਕੀਦਿਸਪਕਤਿਕੋ ਵਾ. ਕਿਂਸਮਾਚਾਰੋਤਿ ਕੀਦਿਸੇਨ ਚਾਰਿਤ੍ਤੇਨ ਯੁਤ੍ਤੋ. ਕਾਨਿ ਕਮ੍ਮਾਨਿ ਬ੍ਰੂਹਯਨ੍ਤਿ ਕਾਨਿ ਕਾਯਕਮ੍ਮਾਦੀਨਿ ਵਡ੍ਢੇਨ੍ਤੋ. ਨਰੋ ਸਮ੍ਮਾ ਨਿਵਿਟ੍ਠਸ੍ਸਾਤਿ ਅਭਿਰਤੋ ਨਰੋ ਸਾਸਨੇ ਸਮ੍ਮਾ ਪਤਿਟ੍ਠਿਤੋ ਭਵੇਯ੍ਯ. ਉਤ੍ਤਮਤ੍ਥਞ੍ਚ ਪਾਪੁਣੇਤਿ ਸਬ੍ਬਤ੍ਥਾਨਂ ਉਤ੍ਤਮਂ ਅਰਹਤ੍ਤਞ੍ਚ ਪਾਪੁਣੇਯ੍ਯਾਤਿ ਵੁਤ੍ਤਂ ਹੋਤਿ.

੩੨੮. ਤਤੋ ਭਗਵਾ ‘‘ਸਾਰਿਪੁਤ੍ਤੋ ਅਡ੍ਢਮਾਸੂਪਸਮ੍ਪਨ੍ਨੋ ਸਾਵਕਪਾਰਮਿਪ੍ਪਤ੍ਤੋ, ਕਸ੍ਮਾ ਆਦਿਕਮ੍ਮਿਕਪੁਥੁਜ੍ਜਨਪਞ੍ਹਂ ਪੁਚ੍ਛਤੀ’’ਤਿ ਆਵਜ੍ਜੇਨ੍ਤੋ ‘‘ਸਦ੍ਧਿਵਿਹਾਰਿਕਂ ਆਰਬ੍ਭਾ’’ਤਿ ਞਤ੍ਵਾ ਪੁਚ੍ਛਾਯ ਵੁਤ੍ਤਂ ਚਾਰਿਤ੍ਤਸੀਲਂ ਅਵਿਭਜਿਤ੍ਵਾਵ ਤਸ੍ਸ ਸਪ੍ਪਾਯਵਸੇਨ ਧਮ੍ਮਂ ਦੇਸੇਨ੍ਤੋ ‘‘ਵੁਡ੍ਢਾਪਚਾਯੀ’’ਤਿਆਦਿਮਾਹ.

ਤਤ੍ਥ ਪਞ੍ਞਾਵੁਡ੍ਢੋ, ਗੁਣਵੁਡ੍ਢੋ, ਜਾਤਿਵੁਡ੍ਢੋ, ਵਯੋਵੁਡ੍ਢੋਤਿ ਚਤ੍ਤਾਰੋ ਵੁਡ੍ਢਾ. ਜਾਤਿਯਾ ਹਿ ਦਹਰੋਪਿ ਬਹੁਸ੍ਸੁਤੋ ਭਿਕ੍ਖੁ ਅਪ੍ਪਸ੍ਸੁਤਮਹਲ੍ਲਕਭਿਕ੍ਖੂਨਮਨ੍ਤਰੇ ਬਾਹੁਸਚ੍ਚਪਞ੍ਞਾਯ ਵੁਡ੍ਢਤ੍ਤਾ ਪਞ੍ਞਾਵੁਡ੍ਢੋ. ਤਸ੍ਸ ਹਿ ਸਨ੍ਤਿਕੇ ਮਹਲ੍ਲਕਭਿਕ੍ਖੂਪਿ ਬੁਦ੍ਧਵਚਨਂ ਪਰਿਯਾਪੁਣਨ੍ਤਿ, ਓਵਾਦਵਿਨਿਚ੍ਛਯਪਞ੍ਹਵਿਸ੍ਸਜ੍ਜਨਾਨਿ ਚ ਪਚ੍ਚਾਸੀਸਨ੍ਤਿ. ਤਥਾ ਦਹਰੋਪਿ ਭਿਕ੍ਖੁ ਅਧਿਗਮਸਮ੍ਪਨ੍ਨੋ ਗੁਣਵੁਡ੍ਢੋ ਨਾਮ. ਤਸ੍ਸ ਹਿ ਓਵਾਦੇ ਪਤਿਟ੍ਠਾਯ ਮਹਲ੍ਲਕਾਪਿ ਵਿਪਸ੍ਸਨਾਗਬ੍ਭਂ ਗਹੇਤ੍ਵਾ ਅਰਹਤ੍ਤਫਲਂ ਪਾਪੁਣਨ੍ਤਿ. ਤਥਾ ਦਹਰੋਪਿ ਰਾਜਾ ਖਤ੍ਤਿਯੋ ਮੁਦ੍ਧਾਵਸਿਤ੍ਤੋ ਬ੍ਰਾਹ੍ਮਣੋ ਵਾ ਸੇਸਜਨਸ੍ਸ ਵਨ੍ਦਨਾਰਹਤੋ ਜਾਤਿਵੁਡ੍ਢੋ ਨਾਮ. ਸਬ੍ਬੋ ਪਨ ਪਠਮਜਾਤੋ ਵਯੋਵੁਡ੍ਢੋ ਨਾਮ. ਤਤ੍ਥ ਯਸ੍ਮਾ ਪਞ੍ਞਾਯ ਸਾਰਿਪੁਤ੍ਤਤ੍ਥੇਰਸ੍ਸ ਸਦਿਸੋ ਨਤ੍ਥਿ ਠਪੇਤ੍ਵਾ ਭਗਵਨ੍ਤਂ, ਤਥਾ ਗੁਣੇਨਪਿ ਅਡ੍ਢਮਾਸੇਨ ਸਬ੍ਬਸਾਵਕਪਾਰਮੀਞਾਣਸ੍ਸ ਪਟਿਵਿਦ੍ਧਤ੍ਤਾ. ਜਾਤਿਯਾਪਿ ਸੋ ਬ੍ਰਾਹ੍ਮਣਮਹਾਸਾਲਕੁਲੇ ਉਪ੍ਪਨ੍ਨੋ, ਤਸ੍ਮਾ ਤਸ੍ਸ ਭਿਕ੍ਖੁਨੋ ਵਯੇਨ ਸਮਾਨੋਪਿ ਸੋ ਇਮੇਹਿ ਤੀਹਿ ਕਾਰਣੇਹਿ ਵੁਡ੍ਢੋ. ਇਮਸ੍ਮਿਂ ਪਨਤ੍ਥੇ ਪਞ੍ਞਾਗੁਣੇਹਿ ਏਵ ਵੁਡ੍ਢਭਾਵਂ ਸਨ੍ਧਾਯ ਭਗਵਾ ਆਹ – ‘‘ਵੁਡ੍ਢਾਪਚਾਯੀ’’ਤਿ. ਤਸ੍ਮਾ ਤਾਦਿਸਾਨਂ ਵੁਡ੍ਢਾਨਂ ਅਪਚਿਤਿਕਰਣੇਨ ਵੁਡ੍ਢਾਪਚਾਯੀ, ਤੇਸਮੇਵ ਵੁਡ੍ਢਾਨਂ ਲਾਭਾਦੀਸੁ ਉਸੂਯਵਿਗਮੇਨ ਅਨੁਸੂਯਕੋ ਚ ਸਿਯਾਤਿ ਅਯਮਾਦਿਪਾਦਸ੍ਸ ਅਤ੍ਥੋ.

ਕਾਲਞ੍ਞੂ ਚਸ੍ਸਾਤਿ ਏਤ੍ਥ ਪਨ ਰਾਗੇ ਉਪ੍ਪਨ੍ਨੇ ਤਸ੍ਸ ਵਿਨੋਦਨਤ੍ਥਾਯ ਗਰੂਨਂ ਦਸ੍ਸਨਂ ਗਚ੍ਛਨ੍ਤੋਪਿ ਕਾਲਞ੍ਞੂ, ਦੋਸੇ… ਮੋਹੇ… ਕੋਸਜ੍ਜੇ ਉਪ੍ਪਨ੍ਨੇ ਤਸ੍ਸ ਵਿਨੋਦਨਤ੍ਥਾਯ ਗਰੂਨਂ ਦਸ੍ਸਨਂ ਗਚ੍ਛਨ੍ਤੋਪਿ ਕਾਲਞ੍ਞੂ, ਯਤੋ ਏਵਂ ਕਾਲਞ੍ਞੂ ਚ ਅਸ੍ਸ ਗਰੂਨਂ ਦਸ੍ਸਨਾਯ. ਧਮ੍ਮਿਂ ਕਥਨ੍ਤਿ ਸਮਥਵਿਪਸ੍ਸਨਾਯੁਤ੍ਤਂ. ਏਰਯਿਤਨ੍ਤਿ ਵੁਤ੍ਤਂ. ਖਣਞ੍ਞੂਤਿ ਤਸ੍ਸਾ ਕਥਾਯ ਖਣਵੇਦੀ, ਦੁਲ੍ਲਭੋ ਵਾ ਅਯਂ ਈਦਿਸਾਯ ਕਥਾਯ ਸਵਨਕ੍ਖਣੋਤਿ ਜਾਨਨ੍ਤੋ. ਸੁਣੇਯ੍ਯ ਸਕ੍ਕਚ੍ਚਾਤਿ ਤਂ ਕਥਂ ਸਕ੍ਕਚ੍ਚਂ ਸੁਣੇਯ੍ਯ. ਨ ਕੇਵਲਞ੍ਚ ਤਮੇਵ, ਅਞ੍ਞਾਨਿਪਿ ਬੁਦ੍ਧਗੁਣਾਦਿਪਟਿਸਂਯੁਤ੍ਤਾਨਿ ਸੁਭਾਸਿਤਾਨਿ ਸਕ੍ਕਚ੍ਚਮੇਵ ਸੁਣੇਯ੍ਯਾਤਿ ਅਤ੍ਥੋ.

੩੨੯. ‘‘ਕਾਲਞ੍ਞੂ ਚਸ੍ਸ ਗਰੂਨਂ ਦਸ੍ਸਨਾਯਾ’’ਤਿ ਏਤ੍ਥ ਵੁਤ੍ਤਨਯਞ੍ਚ ਅਤ੍ਤਨੋ ਉਪ੍ਪਨ੍ਨਰਾਗਾਦਿਵਿਨੋਦਨਕਾਲਂ ਞਤ੍ਵਾਪਿ ਗਰੂਨਂ ਸਨ੍ਤਿਕਂ ਗਚ੍ਛਨ੍ਤੋ ਕਾਲੇਨ ਗਚ੍ਛੇ ਗਰੂਨਂ ਸਕਾਸਂ, ‘‘ਅਹਂ ਕਮ੍ਮਟ੍ਠਾਨਿਕੋ ਧੁਤਙ੍ਗਧਰੋ ਚਾ’’ਤਿ ਕਤ੍ਵਾ ਨ ਚੇਤਿਯਵਨ੍ਦਨਬੋਧਿਯਙ੍ਗਣਭਿਕ੍ਖਾਚਾਰਮਗ੍ਗਅਤਿਮਜ੍ਝਨ੍ਹਿਕਵੇਲਾਦੀਸੁ ਯਤ੍ਥ ਕਤ੍ਥਚਿ ਠਿਤਮਾਚਰਿਯਂ ਦਿਸ੍ਵਾ ਪਰਿਪੁਚ੍ਛਨਤ੍ਥਾਯ ਉਪਸਙ੍ਕਮੇਯ੍ਯ, ਸਕਸੇਨਾਸਨੇ ਪਨ ਅਤ੍ਤਨੋ ਆਸਨੇ ਨਿਸਿਨ੍ਨਂ ਵੂਪਸਨ੍ਤਦਰਥਂ ਸਲ੍ਲਕ੍ਖੇਤ੍ਵਾ ਕਮ੍ਮਟ੍ਠਾਨਾਦਿਵਿਧਿਪੁਚ੍ਛਨਤ੍ਥਂ ਉਪਸਙ੍ਕਮੇਯ੍ਯਾਤਿ ਅਤ੍ਥੋ. ਏਵਂ ਉਪਸਙ੍ਕਮਨ੍ਤੋਪਿ ਚ ਥਮ੍ਭਂ ਨਿਰਂਕਤ੍ਵਾ ਨਿਵਾਤਵੁਤ੍ਤਿ ਥਦ੍ਧਭਾਵਕਰਂ ਮਾਨਂ ਵਿਨਾਸੇਤ੍ਵਾ ਨੀਚਵੁਤ੍ਤਿ ਪਾਦਪੁਞ੍ਛਨਚੋਲ਼ਕਛਿਨ੍ਨਵਿਸਾਣੁਸਭਉਦ੍ਧਤਦਾਠਸਪ੍ਪਸਦਿਸੋ ਹੁਤ੍ਵਾ ਉਪਸਙ੍ਕਮੇਯ੍ਯ. ਅਥ ਤੇਨ ਗਰੁਨਾ ਵੁਤ੍ਤਂ ਅਤ੍ਥਂ ਧਮ੍ਮਂ…ਪੇ… ਸਮਾਚਰੇ ਚ. ਅਤ੍ਥਨ੍ਤਿ ਭਾਸਿਤਤ੍ਥਂ. ਧਮ੍ਮਨ੍ਤਿ ਪਾਲ਼ਿਧਮ੍ਮਂ. ਸਂਯਮਨ੍ਤਿ ਸੀਲਂ. ਬ੍ਰਹ੍ਮਚਰਿਯਨ੍ਤਿ ਅਵਸੇਸਸਾਸਨਬ੍ਰਹ੍ਮਚਰਿਯਂ. ਅਨੁਸ੍ਸਰੇ ਚੇਵ ਸਮਾਚਰੇ ਚਾਤਿ ਅਤ੍ਥਂ ਕਥਿਤੋਕਾਸੇ ਅਨੁਸ੍ਸਰੇਯ੍ਯ, ਧਮ੍ਮਂ ਸਂਯਮਂ ਬ੍ਰਹ੍ਮਚਰਿਯਂ ਕਥਿਤੋਕਾਸੇ ਅਨੁਸ੍ਸਰੇਯ੍ਯ, ਅਨੁਸ੍ਸਰਣਮਤ੍ਤੇਨੇਵ ਚ ਅਤੁਸ੍ਸਨ੍ਤੋ ਤਂ ਸਬ੍ਬਮ੍ਪਿ ਸਮਾਚਰੇ ਸਮਾਚਰੇਯ੍ਯ ਸਮਾਦਾਯ ਵਤ੍ਤੇਯ੍ਯ. ਤਾਸਂ ਕਥਾਨਂ ਅਤ੍ਤਨਿ ਪਵਤ੍ਤਨੇ ਉਸ੍ਸੁਕ੍ਕਂ ਕਰੇਯ੍ਯਾਤਿ ਅਤ੍ਥੋ. ਏਵਂ ਕਰੋਨ੍ਤੋ ਹਿ ਕਿਚ੍ਚਕਰੋ ਹੋਤਿ.

੩੩੦. ਤਤੋ ਪਰਞ੍ਚ ਧਮ੍ਮਾਰਾਮੋ ਧਮ੍ਮਰਤੋ ਧਮ੍ਮੇ ਠਿਤੋ ਧਮ੍ਮਵਿਨਿਚ੍ਛਯਞ੍ਞੂ ਭਵੇਯ੍ਯ. ਸਬ੍ਬਪਦੇਸੁ ਚੇਤ੍ਥ ਧਮ੍ਮੋਤਿ ਸਮਥਵਿਪਸ੍ਸਨਾ, ਆਰਾਮੋ ਰਤੀਤਿ ਏਕੋਵ ਅਤ੍ਥੋ, ਧਮ੍ਮੇ ਆਰਾਮੋ ਅਸ੍ਸਾਤਿ ਧਮ੍ਮਾਰਾਮੋ. ਧਮ੍ਮੇ ਰਤੋ, ਨ ਅਞ੍ਞਂ ਪਿਹੇਤੀਤਿ ਧਮ੍ਮਰਤੋ. ਧਮ੍ਮੇ ਠਿਤੋ ਧਮ੍ਮਂ ਵਤ੍ਤਨਤੋ. ਧਮ੍ਮਵਿਨਿਚ੍ਛਯਂ ਜਾਨਾਤਿ ‘‘ਇਦਂ ਉਦਯਞਾਣਂ ਇਦਂ ਵਯਞਾਣ’’ਨ੍ਤਿ ਧਮ੍ਮਵਿਨਿਚ੍ਛਯਞ੍ਞੂ, ਏਵਰੂਪੋ ਅਸ੍ਸ. ਅਥ ਯਾਯਂ ਰਾਜਕਥਾਦਿਤਿਰਚ੍ਛਾਨਕਥਾ ਤਰੁਣਵਿਪਸ੍ਸਕਸ੍ਸ ਬਹਿਦ੍ਧਾਰੂਪਾਦੀਸੁ ਅਭਿਨਨ੍ਦਨੁਪ੍ਪਾਦਨੇਨ ਤਂ ਸਮਥਵਿਪਸ੍ਸਨਾਧਮ੍ਮਂ ਸਨ੍ਦੂਸੇਤਿ, ਤਸ੍ਮਾ ‘‘ਧਮ੍ਮਸਨ੍ਦੋਸਵਾਦੋ’’ਤਿ ਵੁਚ੍ਚਤਿ, ਤਂ ਨੇਵਾਚਰੇ ਧਮ੍ਮਸਨ੍ਦੋਸਵਾਦਂ, ਅਞ੍ਞਦਤ੍ਥੁ ਆਵਾਸਗੋਚਰਾਦਿਸਪ੍ਪਾਯਾਨਿ ਸੇਵਨ੍ਤੋ ਤਚ੍ਛੇਹਿ ਨੀਯੇਥ ਸੁਭਾਸਿਤੇਹਿ. ਸਮਥਵਿਪਸ੍ਸਨਾਪਟਿਸਂਯੁਤ੍ਤਾਨੇਵੇਤ੍ਥ ਤਚ੍ਛਾਨਿ, ਤਥਾਰੂਪੇਹਿ ਸੁਭਾਸਿਤੇਹਿ ਨੀਯੇਥ ਨੀਯੇਯ੍ਯ, ਕਾਲਂ ਖੇਪੇਯ੍ਯਾਤਿ ਅਤ੍ਥੋ.

੩੩੧. ਇਦਾਨਿ ‘‘ਧਮ੍ਮਸਨ੍ਦੋਸਵਾਦ’’ਨ੍ਤਿ ਏਤ੍ਥ ਅਤਿਸਙ੍ਖੇਪੇਨ ਵੁਤ੍ਤਂ ਸਮਥਵਿਪਸ੍ਸਨਾਯੁਤ੍ਤਸ੍ਸ ਭਿਕ੍ਖੁਨੋ ਉਪਕ੍ਕਿਲੇਸਂ ਪਾਕਟਂ ਕਰੋਨ੍ਤੋ ਤਦਞ੍ਞੇਨਪਿ ਉਪਕ੍ਕਿਲੇਸੇਨ ਸਦ੍ਧਿਂ ‘‘ਹਸ੍ਸਂ ਜਪ੍ਪ’’ਨ੍ਤਿ ਇਮਂ ਗਾਥਮਾਹ. ਹਾਸਨ੍ਤਿਪਿ ਪਾਠੋ. ਵਿਪਸ੍ਸਕੇਨ ਹਿ ਭਿਕ੍ਖੁਨਾ ਹਸਨੀਯਸ੍ਮਿਂ ਵਤ੍ਥੁਸ੍ਮਿਂ ਸਿਤਮਤ੍ਤਮੇਵ ਕਾਤਬ੍ਬਂ, ਨਿਰਤ੍ਥਕਕਥਾਜਪ੍ਪੋ ਨ ਭਾਸਿਤਬ੍ਬੋ, ਞਾਤਿਬ੍ਯਸਨਾਦੀਸੁ ਪਰਿਦੇਵੋ ਨ ਕਾਤਬ੍ਬੋ, ਖਾਣੁਕਣ੍ਟਕਾਦਿਮ੍ਹਿ ਮਨੋਪਦੋਸੋ ਨ ਉਪ੍ਪਾਦੇਤਬ੍ਬੋ. ਮਾਯਾਕਤਨ੍ਤਿ ਵੁਤ੍ਤਾ ਮਾਯਾ, ਤਿਵਿਧਂ ਕੁਹਨਂ, ਪਚ੍ਚਯੇਸੁ ਗਿਦ੍ਧਿ, ਜਾਤਿਆਦੀਹਿ ਮਾਨੋ, ਪਚ੍ਚਨੀਕਸਾਤਤਾਸਙ੍ਖਾਤੋ ਸਾਰਮ੍ਭੋ, ਫਰੁਸਵਚਨਲਕ੍ਖਣਂ ਕਕ੍ਕਸਂ, ਰਾਗਾਦਯੋ ਕਸਾਵਾ, ਅਧਿਮਤ੍ਤਤਣ੍ਹਾਲਕ੍ਖਣਾ ਮੁਚ੍ਛਾਤਿ ਇਮੇ ਚ ਦੋਸਾ ਸੁਖਕਾਮੇਨ ਅਙ੍ਗਾਰਕਾਸੁ ਵਿਯ, ਸੁਚਿਕਾਮੇਨ ਗੂਥਠਾਨਂ ਵਿਯ, ਜੀਵਿਤੁਕਾਮੇਨ ਆਸਿਵਿਸਾਦਯੋ ਵਿਯ ਚ ਪਹਾਤਬ੍ਬਾ. ਹਿਤ੍ਵਾ ਚ ਆਰੋਗ੍ਯਮਦਾਦਿਵਿਗਮਾ ਵੀਤਮਦੇਨ ਚਿਤ੍ਤਵਿਕ੍ਖੇਪਾਭਾਵਾ ਠਿਤਤ੍ਤੇਨ ਚਰਿਤਬ੍ਬਂ. ਏਵਂ ਪਟਿਪਨ੍ਨੋ ਹਿ ਸਬ੍ਬੁਪਕ੍ਕਿਲੇਸਪਰਿਸੁਦ੍ਧਾਯ ਭਾਵਨਾਯ ਨ ਚਿਰਸ੍ਸੇਵ ਅਰਹਤ੍ਤਂ ਪਾਪੁਣਾਤਿ. ਤੇਨਾਹ ਭਗਵਾ – ‘‘ਹਸ੍ਸਂ ਜਪ੍ਪਂ…ਪੇ… ਠਿਤਤ੍ਤੋ’’ਤਿ.

੩੩੨. ਇਦਾਨਿ ਯ੍ਵਾਯਂ ‘‘ਹਸ੍ਸਂ ਜਪ੍ਪ’’ਨ੍ਤਿਆਦਿਨਾ ਨਯੇਨ ਉਪਕ੍ਕਿਲੇਸੋ ਵੁਤ੍ਤੋ, ਤੇਨ ਸਮਨ੍ਨਾਗਤੋ ਭਿਕ੍ਖੁ ਯਸ੍ਮਾ ਸਾਹਸੋ ਹੋਤਿ ਅਵੀਮਂਸਕਾਰੀ, ਰਤ੍ਤੋ ਰਾਗਵਸੇਨ ਦੁਟ੍ਠੋ ਦੋਸਵਸੇਨ ਗਚ੍ਛਤਿ, ਪਮਤ੍ਤੋ ਚ ਹੋਤਿ ਕੁਸਲਾਨਂ ਧਮ੍ਮਾਨਂ ਭਾਵਨਾਯ ਅਸਾਤਚ੍ਚਕਾਰੀ, ਤਥਾਰੂਪਸ੍ਸ ਚ ‘‘ਸੁਣੇਯ੍ਯ ਸਕ੍ਕਚ੍ਚ ਸੁਭਾਸਿਤਾਨੀ’’ਤਿਆਦਿਨਾ ਨਯੇਨ ਵੁਤ੍ਤੋ ਓਵਾਦੋ ਨਿਰਤ੍ਥਕੋ, ਤਸ੍ਮਾ ਇਮਸ੍ਸ ਸਂਕਿਲੇਸਸ੍ਸ ਪੁਗ੍ਗਲਾਧਿਟ੍ਠਾਨਾਯ ਦੇਸਨਾਯ ਸੁਤਾਦਿਵੁਦ੍ਧਿਪਟਿਪਕ੍ਖਭਾਵਂ ਦਸ੍ਸੇਨ੍ਤੋ ‘‘ਵਿਞ੍ਞਾਤਸਾਰਾਨੀ’’ਤਿ ਇਮਂ ਗਾਥਮਾਹ.

ਤਸ੍ਸਤ੍ਥੋ – ਯਾਨਿ ਹੇਤਾਨਿ ਸਮਥਵਿਪਸ੍ਸਨਾਪਟਿਸਂਯੁਤ੍ਤਾਨਿ ਸੁਭਾਸਿਤਾਨਿ, ਤੇਸਂ ਵਿਜਾਨਨਂ ਸਾਰੋ. ਯਦਿ ਵਿਞ੍ਞਾਤਾਨਿ ਸਾਧੁ, ਅਥ ਸਦ੍ਦਮਤ੍ਤਮੇਵ ਗਹਿਤਂ, ਨ ਕਿਞ੍ਚਿ ਕਤਂ ਹੋਤਿ, ਯੇਨ ਏਤਾਨਿ ਸੁਤਮਯੇਨ ਞਾਣੇਨ ਵਿਞ੍ਞਾਯਨ੍ਤਿ, ਤਂ ਸੁਤਂ, ਏਤਞ੍ਚ ਸੁਤਮਯਞਾਣਂ ਵਿਞ੍ਞਾਤਸਮਾਧਿਸਾਰਂ, ਤੇਸੁ ਵਿਞ੍ਞਾਤੇਸੁ ਧਮ੍ਮੇਸੁ ਯੋ ਸਮਾਧਿ ਚਿਤ੍ਤਸ੍ਸਾਵਿਕ੍ਖੇਪੋ ਤਥਤ੍ਤਾਯ ਪਟਿਪਤ੍ਤਿ, ਅਯਮਸ੍ਸ ਸਾਰੋ. ਨ ਹਿ ਵਿਜਾਨਨਮਤ੍ਤੇਨੇਵ ਕੋਚਿ ਅਤ੍ਥੋ ਸਿਜ੍ਝਤਿ. ਯੋ ਪਨਾਯਂ ਨਰੋ ਰਾਗਾਦਿਵਸੇਨ ਵਤ੍ਤਨਤੋ ਸਾਹਸੋ, ਕੁਸਲਾਨਂ ਧਮ੍ਮਾਨਂ ਭਾਵਨਾਯ ਅਸਾਤਚ੍ਚਕਾਰਿਤਾਯ ਪਮਤ੍ਤੋ, ਸੋ ਸਦ੍ਦਮਤ੍ਤਗ੍ਗਾਹੀਯੇਵ ਹੋਤਿ. ਤੇਨ ਤਸ੍ਸ ਅਤ੍ਥਵਿਜਾਨਨਾਭਾਵਤੋ ਸਾ ਸੁਭਾਸਿਤਵਿਜਾਨਨਪਞ੍ਞਾ ਚ, ਤਥਤ੍ਤਾਯ ਪਟਿਪਤ੍ਤਿਯਾ ਅਭਾਵਤੋ ਸੁਤਞ੍ਚ ਨ ਵਡ੍ਢਤੀਤਿ.

੩੩੩. ਏਵਂ ਪਮਤ੍ਤਾਨਂ ਸਤ੍ਤਾਨਂ ਪਞ੍ਞਾਪਰਿਹਾਨਿਂ ਸੁਤਪਰਿਹਾਨਿਞ੍ਚ ਦਸ੍ਸੇਤ੍ਵਾ ਇਦਾਨਿ ਅਪ੍ਪਮਤ੍ਤਾਨਂ ਤਦੁਭਯਸਾਰਾਧਿਗਮਂ ਦਸ੍ਸੇਨ੍ਤੋ ਆਹ – ‘‘ਧਮ੍ਮੇ ਚ ਯੇ…ਪੇ… ਸਾਰਮਜ੍ਝਗੂ’’ਤਿ. ਤਤ੍ਥ ਅਰਿਯਪ੍ਪਵੇਦਿਤੋ ਧਮ੍ਮੋ ਨਾਮ ਸਮਥਵਿਪਸ੍ਸਨਾਧਮ੍ਮੋ. ਏਕੋਪਿ ਹਿ ਬੁਦ੍ਧੋ ਸਮਥਵਿਪਸ੍ਸਨਾਧਮ੍ਮਂ ਅਦੇਸੇਤ੍ਵਾ ਪਰਿਨਿਬ੍ਬੁਤੋ ਨਾਮ ਨਤ੍ਥਿ. ਤਸ੍ਮਾ ਏਤਸ੍ਮਿਂ ਧਮ੍ਮੇ ਚ ਯੇ ਅਰਿਯਪ੍ਪਵੇਦਿਤੇਰਤਾ ਨਿਰਤਾ ਅਪ੍ਪਮਤ੍ਤਾ ਸਾਤਚ੍ਚਾਨੁਯੋਗਿਨੋ, ਅਨੁਤ੍ਤਰਾ ਤੇ ਵਚਸਾ ਮਨਸਾ ਕਮ੍ਮੁਨਾ ਚ, ਤੇ ਚਤੁਬ੍ਬਿਧੇਨ ਵਚੀਸੁਚਰਿਤੇਨ ਤਿਵਿਧੇਨ ਮਨੋਸੁਚਰਿਤੇਨ ਤਿਵਿਧੇਨ ਕਾਯਸੁਚਰਿਤੇਨ ਚ ਸਮਨ੍ਨਾਗਤਤ੍ਤਾ ਵਚਸਾ ਮਨਸਾ ਕਮ੍ਮੁਨਾ ਚ ਅਨੁਤ੍ਤਰਾ, ਅਵਸੇਸਸਤ੍ਤੇਹਿ ਅਸਮਾ ਅਗ੍ਗਾਵਿਸਿਟ੍ਠਾ. ਏਤ੍ਤਾਵਤਾ ਸਦ੍ਧਿਂ ਪੁਬ੍ਬਭਾਗਸੀਲੇਨ ਅਰਿਯਮਗ੍ਗਸਮ੍ਪਯੁਤ੍ਤਂ ਸੀਲਂ ਦਸ੍ਸੇਤਿ. ਏਵਂ ਪਰਿਸੁਦ੍ਧਸੀਲਾ ਤੇ ਸਨ੍ਤਿਸੋਰਚ੍ਚਸਮਾਧਿਸਣ੍ਠਿਤਾ, ਸੁਤਸ੍ਸ ਪਞ੍ਞਾਯ ਚ ਸਾਰਮਜ੍ਝਗੂ, ਯੇ ਅਰਿਯਪ੍ਪਵੇਦਿਤੇ ਧਮ੍ਮੇ ਰਤਾ, ਤੇ ਨ ਕੇਵਲਂ ਵਾਚਾਦੀਹਿ ਅਨੁਤ੍ਤਰਾ ਹੋਨ੍ਤਿ, ਅਪਿਚ ਖੋ ਪਨ ਸਨ੍ਤਿਸੋਰਚ੍ਚੇ ਸਮਾਧਿਮ੍ਹਿ ਚ ਸਣ੍ਠਿਤਾ ਹੁਤ੍ਵਾ ਸੁਤਸ੍ਸ ਪਞ੍ਞਾਯ ਚ ਸਾਰਮਜ੍ਝਗੂ ਅਧਿਗਤਾ ਇਚ੍ਚੇਵ ਵੇਦਿਤਬ੍ਬਾ. ਆਸਂਸਾਯਂ ਭੂਤਵਚਨਂ. ਤਤ੍ਥ ਸਨ੍ਤੀਤਿ ਨਿਬ੍ਬਾਨਂ, ਸੋਰਚ੍ਚਨ੍ਤਿ ਸੁਨ੍ਦਰੇ ਰਤਭਾਵੇਨ ਯਥਾਭੂਤਪਟਿਵੇਧਿਕਾ ਪਞ੍ਞਾ, ਸਨ੍ਤਿਯਾ ਸੋਰਚ੍ਚਨ੍ਤਿ ਸਨ੍ਤਿਸੋਰਚ੍ਚਂ, ਨਿਬ੍ਬਾਨਾਰਮ੍ਮਣਾਯ ਮਗ੍ਗਪਞ੍ਞਾਯੇਤਂ ਅਧਿਵਚਨਂ. ਸਮਾਧੀਤਿ ਤਂਸਮ੍ਪਯੁਤ੍ਤੋਵ ਮਗ੍ਗਸਮਾਧਿ. ਸਣ੍ਠਿਤਾਤਿ ਤਦੁਭਯੇ ਪਤਿਟ੍ਠਿਤਾ. ਸੁਤਪਞ੍ਞਾਨਂ ਸਾਰਂ ਨਾਮ ਅਰਹਤ੍ਤਫਲਵਿਮੁਤ੍ਤਿ. ਵਿਮੁਤ੍ਤਿਸਾਰਞ੍ਹਿ ਇਦਂ ਬ੍ਰਹ੍ਮਚਰਿਯਂ.

ਏਵਮੇਤ੍ਥ ਭਗਵਾ ਧਮ੍ਮੇਨ ਪੁਬ੍ਬਭਾਗਪਟਿਪਦਂ, ‘‘ਅਨੁਤ੍ਤਰਾ ਵਚਸਾ’’ਤਿਆਦੀਹਿ ਸੀਲਕ੍ਖਨ੍ਧਂ, ਸਨ੍ਤਿਸੋਰਚ੍ਚਸਮਾਧੀਹਿ ਪਞ੍ਞਾਕ੍ਖਨ੍ਧਸਮਾਧਿਕ੍ਖਨ੍ਧੇਤਿ ਤੀਹਿਪਿ ਇਮੇਹਿ ਖਨ੍ਧੇਹਿ ਅਪਰਭਾਗਪਟਿਪਦਞ੍ਚ ਦਸ੍ਸੇਤ੍ਵਾ ਸੁਤਪਞ੍ਞਾਸਾਰੇਨ ਅਕੁਪ੍ਪਵਿਮੁਤ੍ਤਿਂ ਦਸ੍ਸੇਨ੍ਤੋ ਅਰਹਤ੍ਤਨਿਕੂਟੇਨ ਦੇਸਨਂ ਸਮਾਪੇਸਿ. ਦੇਸਨਾਪਰਿਯੋਸਾਨੇ ਚ ਸੋ ਭਿਕ੍ਖੁ ਸੋਤਾਪਤ੍ਤਿਫਲਂ ਪਤ੍ਵਾ ਪੁਨ ਨ ਚਿਰਸ੍ਸੇਵ ਅਗ੍ਗਫਲੇ ਅਰਹਤ੍ਤੇ ਪਤਿਟ੍ਠਾਸੀਤਿ.

ਪਰਮਤ੍ਥਜੋਤਿਕਾਯ ਖੁਦ੍ਦਕ-ਅਟ੍ਠਕਥਾਯ

ਸੁਤ੍ਤਨਿਪਾਤ-ਅਟ੍ਠਕਥਾਯ ਕਿਂਸੀਲਸੁਤ੍ਤਵਣ੍ਣਨਾ ਨਿਟ੍ਠਿਤਾ.