੧੦. ਉਟ੍ਠਾਨਸੁਤ੍ਤਵਣ੍ਣਨਾ

੩੩੪. ਉਟ੍ਠਹਥਾਤਿ ਉਟ੍ਠਾਨਸੁਤ੍ਤਂ. ਕਾ ਉਪ੍ਪਤ੍ਤਿ? ਏਕਂ ਸਮਯਂ ਭਗਵਾ ਸਾਵਤ੍ਥਿਯਂ ਵਿਹਰਨ੍ਤੋ ਰਤ੍ਤਿਂ ਜੇਤਵਨਵਿਹਾਰੇ ਵਸਿਤ੍ਵਾ ਪੁਬ੍ਬਣ੍ਹਸਮਯਂ ਭਿਕ੍ਖੁਸਙ੍ਘਪਰਿਵੁਤੋ ਸਾਵਤ੍ਥਿਯਂ ਪਿਣ੍ਡਾਯ ਚਰਿਤ੍ਵਾ ਪਾਚੀਨਦ੍ਵਾਰੇਨ ਨਗਰਾ ਨਿਕ੍ਖਮਿਤ੍ਵਾ ਮਿਗਾਰਮਾਤੁਪਾਸਾਦਂ ਅਗਮਾਸਿ ਦਿਵਾਵਿਹਾਰਤ੍ਥਾਯ. ਆਚਿਣ੍ਣਂ ਕਿਰੇਤਂ ਭਗਵਤੋ ਰਤ੍ਤਿਂ ਜੇਤਵਨਵਿਹਾਰੇ ਵਸਿਤ੍ਵਾ ਮਿਗਾਰਮਾਤੁਪਾਸਾਦੇ ਦਿਵਾਵਿਹਾਰੂਪਗਮਨਂ, ਰਤ੍ਤਿਞ੍ਚ ਮਿਗਾਰਮਾਤੁਪਾਸਾਦੇ ਵਸਿਤ੍ਵਾ ਜੇਤਵਨੇ ਦਿਵਾਵਿਹਾਰੂਪਗਮਨਂ. ਕਸ੍ਮਾ? ਦ੍ਵਿਨ੍ਨਂ ਕੁਲਾਨਂ ਅਨੁਗ੍ਗਹਤ੍ਥਾਯ ਮਹਾਪਰਿਚ੍ਚਾਗਗੁਣਪਰਿਦੀਪਨਤ੍ਥਾਯ ਚ. ਮਿਗਾਰਮਾਤੁਪਾਸਾਦਸ੍ਸ ਚ ਹੇਟ੍ਠਾ ਪਞ੍ਚ ਕੂਟਾਗਾਰਗਬ੍ਭਸਤਾਨਿ ਹੋਨ੍ਤਿ, ਯੇਸੁ ਪਞ੍ਚਸਤਾ ਭਿਕ੍ਖੂ ਵਸਨ੍ਤਿ. ਤਤ੍ਥ ਯਦਾ ਭਗਵਾ ਹੇਟ੍ਠਾਪਾਸਾਦੇ ਵਸਤਿ, ਤਦਾ ਭਿਕ੍ਖੂ ਭਗਵਤੋ ਗਾਰਵੇਨ ਉਪਰਿਪਾਸਾਦਂ ਨਾਰੁਹਨ੍ਤਿ. ਤਂ ਦਿਵਸਂ ਪਨ ਭਗਵਾ ਉਪਰਿਪਾਸਾਦੇ ਕੂਟਾਗਾਰਗਬ੍ਭਂ ਪਾਵਿਸਿ, ਤੇਨ ਹੇਟ੍ਠਾਪਾਸਾਦੇ ਪਞ੍ਚਪਿ ਗਬ੍ਭਸਤਾਨਿ ਪਞ੍ਚਸਤਾ ਭਿਕ੍ਖੂ ਪਵਿਸਿਂਸੁ. ਤੇ ਚ ਸਬ੍ਬੇਵ ਨਵਾ ਹੋਨ੍ਤਿ ਅਧੁਨਾਗਤਾ ਇਮਂ ਧਮ੍ਮਵਿਨਯਂ ਉਦ੍ਧਤਾ ਉਨ੍ਨਲ਼ਾ ਪਾਕਤਿਨ੍ਦ੍ਰਿਯਾ. ਤੇ ਪਵਿਸਿਤ੍ਵਾ ਦਿਵਾਸੇਯ੍ਯਂ ਸੁਪਿਤ੍ਵਾ ਸਾਯਂ ਉਟ੍ਠਾਯ ਮਹਾਤਲੇ ਸਨ੍ਨਿਪਤਿਤ੍ਵਾ ‘‘ਅਜ੍ਜ ਭਤ੍ਤਗ੍ਗੇ ਤੁਯ੍ਹਂ ਕਿਂ ਅਹੋਸਿ, ਤ੍ਵਂ ਕਤ੍ਥ ਅਗਮਾਸਿ, ਅਹਂ ਆਵੁਸੋ ਕੋਸਲਰਞ੍ਞੋ ਘਰਂ, ਅਹਂ ਅਨਾਥਪਿਣ੍ਡਿਕਸ੍ਸ, ਤਤ੍ਥ ਏਵਰੂਪੋ ਚ ਏਵਰੂਪੋ ਚ ਭੋਜਨਵਿਧਿ ਅਹੋਸੀ’’ਤਿ ਨਾਨਪ੍ਪਕਾਰਂ ਆਮਿਸਕਥਂ ਕਥੇਨ੍ਤਾ ਉਚ੍ਚਾਸਦ੍ਦਮਹਾਸਦ੍ਦਾ ਅਹੇਸੁਂ.

ਭਗਵਾ ਤਂ ਸਦ੍ਦਂ ਸੁਤ੍ਵਾ ‘‘ਇਮੇ ਮਯਾ ਸਦ੍ਧਿਂ ਵਸਨ੍ਤਾਪਿ ਏਵਂ ਪਮਤ੍ਤਾ, ਅਹੋ ਅਯੁਤ੍ਤਕਾਰਿਨੋ’’ਤਿ ਮਹਾਮੋਗ੍ਗਲ੍ਲਾਨਤ੍ਥੇਰਸ੍ਸ ਆਗਮਨਂ ਚਿਨ੍ਤੇਸਿ. ਤਾਵਦੇਵ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਭਗਵਤੋ ਚਿਤ੍ਤਂ ਞਤ੍ਵਾ ਇਦ੍ਧਿਯਾ ਆਗਮ੍ਮ ਪਾਦਮੂਲੇ ਵਨ੍ਦਮਾਨੋਯੇਵ ਅਹੋਸਿ. ਤਤੋ ਨਂ ਭਗਵਾ ਆਮਨ੍ਤੇਸਿ – ‘‘ਏਤੇ ਤੇ, ਮੋਗ੍ਗਲ੍ਲਾਨ, ਸਬ੍ਰਹ੍ਮਚਾਰਿਨੋ ਪਮਤ੍ਤਾ, ਸਾਧੁ ਨੇ ਸਂਵੇਜੇਹੀ’’ਤਿ. ‘‘ਏਵਂ ਭਨ੍ਤੇ’’ਤਿ ਖੋ ਸੋ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਭਗਵਤੋ ਪਟਿਸ੍ਸੁਣਿਤ੍ਵਾ ਤਾਵਦੇਵ ਆਪੋਕਸਿਣਂ ਸਮਾਪਜ੍ਜਿਤ੍ਵਾ ਕਰੀਸਭੂਮਿਯਂ ਠਿਤਂ ਮਹਾਪਾਸਾਦਂ ਨਾਵਂ ਵਿਯ ਮਹਾਵਾਤੋ ਪਾਦਙ੍ਗੁਟ੍ਠਕੇਨ ਕਮ੍ਪੇਸਿ ਸਦ੍ਧਿਂ ਪਤਿਟ੍ਠਿਤਪਥਵਿਪ੍ਪਦੇਸੇਨ. ਅਥ ਤੇ ਭਿਕ੍ਖੂ ਭੀਤਾ ਵਿਸ੍ਸਰਂ ਕਰੋਨ੍ਤਾ ਸਕਸਕਚੀਵਰਾਨਿ ਛਡ੍ਡੇਤ੍ਵਾ ਚਤੂਹਿ ਦ੍ਵਾਰੇਹਿ ਨਿਕ੍ਖਮਿਂਸੁ. ਭਗਵਾ ਤੇਸਂ ਅਤ੍ਤਾਨਂ ਦਸ੍ਸੇਨ੍ਤੋ ਅਞ੍ਞੇਨ ਦ੍ਵਾਰੇਨ ਗਨ੍ਧਕੁਟਿਂ ਪਵਿਸਨ੍ਤੋ ਵਿਯ ਅਹੋਸਿ, ਤੇ ਭਗਵਨ੍ਤਂ ਦਿਸ੍ਵਾ ਵਨ੍ਦਿਤ੍ਵਾ ਅਟ੍ਠਂਸੁ. ਭਗਵਾ ‘‘ਕਿਂ, ਭਿਕ੍ਖਵੇ, ਭੀਤਤ੍ਥਾ’’ਤਿ ਪੁਚ੍ਛਿ, ਤੇ ‘‘ਅਯਂ, ਭਨ੍ਤੇ, ਮਿਗਾਰਮਾਤੁਪਾਸਾਦੋ ਕਮ੍ਪਿਤੋ’’ਤਿ ਆਹਂਸੁ. ‘‘ਜਾਨਾਥ, ਭਿਕ੍ਖਵੇ, ਕੇਨਾ’’ਤਿ? ‘‘ਨ ਜਾਨਾਮ, ਭਨ੍ਤੇ’’ਤਿ. ਅਥ ਭਗਵਾ ‘‘ਤੁਮ੍ਹਾਦਿਸਾਨਂ, ਭਿਕ੍ਖਵੇ, ਮੁਟ੍ਠਸ੍ਸਤੀਨਂ ਅਸਮ੍ਪਜਾਨਾਨਂ ਪਮਾਦਵਿਹਾਰੀਨਂ ਸਂਵੇਗਜਨਨਤ੍ਥਂ ਮੋਗ੍ਗਲ੍ਲਾਨੇਨ ਕਮ੍ਪਿਤੋ’’ਤਿ ਵਤ੍ਵਾ ਤੇਸਂ ਭਿਕ੍ਖੂਨਂ ਧਮ੍ਮਦੇਸਨਤ੍ਥਂ ਇਮਂ ਸੁਤ੍ਤਮਭਾਸਿ.

ਤਤ੍ਥ ਉਟ੍ਠਹਥਾਤਿ ਆਸਨਾ ਉਟ੍ਠਹਥ ਘਟਥ ਵਾਯਮਥ, ਮਾ ਕੁਸੀਤਾ ਹੋਥ. ਨਿਸੀਦਥਾਤਿ ਪਲ੍ਲਙ੍ਕਂ ਆਭੁਜਿਤ੍ਵਾ ਕਮ੍ਮਟ੍ਠਾਨਾਨੁਯੋਗਤ੍ਥਾਯ ਨਿਸੀਦਥ. ਕੋ ਅਤ੍ਥੋ ਸੁਪਿਤੇਨ ਵੋਤਿ ਕੋ ਤੁਮ੍ਹਾਕਂ ਅਨੁਪਾਦਾਪਰਿਨਿਬ੍ਬਾਨਤ੍ਥਾਯ ਪਬ੍ਬਜਿਤਾਨਂ ਸੁਪਿਤੇਨ ਅਤ੍ਥੋ. ਨ ਹਿ ਸਕ੍ਕਾ ਸੁਪਨ੍ਤੇਨ ਕੋਚਿ ਅਤ੍ਥੋ ਪਾਪੁਣਿਤੁਂ. ਆਤੁਰਾਨਞ੍ਹਿ ਕਾ ਨਿਦ੍ਦਾ, ਸਲ੍ਲਵਿਦ੍ਧਾਨ ਰੁਪ੍ਪਤਨ੍ਤਿ ਯਤ੍ਰ ਚ ਨਾਮ ਅਪ੍ਪਕੇਪਿ ਸਰੀਰਪ੍ਪਦੇਸੇ ਉਟ੍ਠਿਤੇਨ ਚਕ੍ਖੁਰੋਗਾਦਿਨਾ ਰੋਗੇਨ ਆਤੁਰਾਨਂ ਏਕਦ੍ਵਙ੍ਗੁਲਮਤ੍ਤਮ੍ਪਿ ਪਵਿਟ੍ਠੇਨ ਅਯਸਲ੍ਲਅਟ੍ਠਿਸਲ੍ਲਦਨ੍ਤਸਲ੍ਲਵਿਸਾਣਸਲ੍ਲਕਟ੍ਠਸਲ੍ਲਾਨਂ ਅਞ੍ਞਤਰੇਨ ਸਲ੍ਲੇਨ ਰੁਪ੍ਪਮਾਨਾਨਂ ਮਨੁਸ੍ਸਾਨਂ ਨਿਦ੍ਦਾ ਨਤ੍ਥਿ, ਤਤ੍ਥ ਤੁਮ੍ਹਾਕਂ ਸਕਲਚਿਤ੍ਤਸਰੀਰਸਨ੍ਤਾਨਂ ਭਞ੍ਜਿਤ੍ਵਾ ਉਪ੍ਪਨ੍ਨੇਹਿ ਨਾਨਪ੍ਪਕਾਰਕਿਲੇਸਰੋਗੇਹਿ ਆਤੁਰਾਨਞ੍ਹਿ ਕਾ ਨਿਦ੍ਦਾ ਰਾਗਸਲ੍ਲਾਦੀਹਿ ਚ ਪਞ੍ਚਹਿ ਸਲ੍ਲੇਹਿ ਅਨ੍ਤੋਹਦਯਂ ਪਵਿਸਿਯ ਵਿਦ੍ਧਤ੍ਤਾ ਸਲ੍ਲਵਿਦ੍ਧਾਨਂ ਰੁਪ੍ਪਤਂ.

੩੩੫. ਏਵਂ ਵਤ੍ਵਾ ਪੁਨ ਭਗਵਾ ਭਿਯ੍ਯੋਸੋਮਤ੍ਤਾਯ ਤੇ ਭਿਕ੍ਖੂ ਉਸ੍ਸਾਹੇਨ੍ਤੋ ਸਂਵੇਜੇਨ੍ਤੋ ਚ ਆਹ – ‘‘ਉਟ੍ਠਹਥ…ਪੇ… ਵਸਾਨੁਗੇ’’ਤਿ. ਤਤ੍ਰਾਯਂ ਸਾਧਿਪ੍ਪਾਯਯੋਜਨਾ ਅਤ੍ਥਵਣ੍ਣਨਾ – ਏਵਂ ਕਿਲੇਸਸਲ੍ਲਵਿਦ੍ਧਾਨਞ੍ਹਿ ਵੋ, ਭਿਕ੍ਖਵੇ, ਕਾਲੋ ਪਬੁਜ੍ਝਿਤੁਂ. ਕਿਂ ਕਾਰਣਂ? ਮਣ੍ਡਪੇਯ੍ਯਮਿਦਂ, ਭਿਕ੍ਖਵੇ, ਬ੍ਰਹ੍ਮਚਰਿਯਂ, ਸਤ੍ਥਾ ਸਮ੍ਮੁਖੀਭੂਤੋ, ਇਤੋ ਪੁਬ੍ਬੇ ਪਨ ਵੋ ਦੀਘਰਤ੍ਤਂ ਸੁਤ੍ਤਂ, ਗਿਰੀਸੁ ਸੁਤ੍ਤਂ, ਨਦੀਸੁ ਸੁਤ੍ਤਂ, ਸਮੇਸੁ ਸੁਤ੍ਤਂ, ਵਿਸਮੇਸੁ ਸੁਤ੍ਤਂ, ਰੁਕ੍ਖਗ੍ਗੇਸੁਪਿ ਸੁਤ੍ਤਂ ਅਦਸ੍ਸਨਾ ਅਰਿਯਸਚ੍ਚਾਨਂ, ਤਸ੍ਮਾ ਤਸ੍ਸਾ ਨਿਦ੍ਦਾਯ ਅਨ੍ਤਕਿਰਿਯਤ੍ਥਂ ਉਟ੍ਠਹਥ ਨਿਸੀਦਥ ਦਲ਼੍ਹਂ ਸਿਕ੍ਖਥ ਸਨ੍ਤਿਯਾ.

ਤਤ੍ਥ ਪੁਰਿਮਪਾਦਸ੍ਸਤ੍ਥੋ ਵੁਤ੍ਤਨਯੋ ਏਵ. ਦੁਤਿਯਪਾਦੇ ਪਨ ਸਨ੍ਤੀਤਿ ਤਿਸ੍ਸੋ ਸਨ੍ਤਿਯੋ – ਅਚ੍ਚਨ੍ਤਸਨ੍ਤਿ, ਤਦਙ੍ਗਸਨ੍ਤਿ, ਸਮ੍ਮੁਤਿਸਨ੍ਤੀਤਿ, ਨਿਬ੍ਬਾਨਵਿਪਸ੍ਸਨਾਦਿਟ੍ਠਿਗਤਾਨਮੇਤਂ ਅਧਿਵਚਨਂ. ਇਧ ਪਨ ਅਚ੍ਚਨ੍ਤਸਨ੍ਤਿ ਨਿਬ੍ਬਾਨਮਧਿਪ੍ਪੇਤਂ, ਤਸ੍ਮਾ ਨਿਬ੍ਬਾਨਤ੍ਥਂ ਦਲ਼੍ਹਂ ਸਿਕ੍ਖਥ, ਅਸਿਥਿਲਪਰਕ੍ਕਮਾ ਹੁਤ੍ਵਾ ਸਿਕ੍ਖਥਾਤਿ ਵੁਤ੍ਤਂ ਹੋਤਿ. ਕਿਂ ਕਾਰਣਂ? ਮਾ ਵੋ ਪਮਤ੍ਤੇ ਵਿਞ੍ਞਾਯ, ਮਚ੍ਚੁਰਾਜਾ ਅਮੋਹਯਿਤ੍ਥ ਵਸਾਨੁਗੇ, ਮਾ ਤੁਮ੍ਹੇ ‘‘ਪਮਤ੍ਤਾ ਏਤੇ’’ਤਿ ਏਵਂ ਞਤ੍ਵਾ ਮਚ੍ਚੁਰਾਜਪਰਿਯਾਯਨਾਮੋ ਮਾਰੋ ਵਸਾਨੁਗੇ ਅਮੋਹਯਿਤ੍ਥ, ਯਥਾ ਤਸ੍ਸ ਵਸਂ ਗਚ੍ਛਥ, ਏਵਂ ਵਸਾਨੁਗੇ ਕਰੋਨ੍ਤੋ ਮਾ ਅਮੋਹਯਿਤ੍ਥਾਤਿ ਵੁਤ੍ਤਂ ਹੋਤਿ.

੩੩੬. ਯਤੋ ਤਸ੍ਸ ਵਸਂ ਅਨੁਪਗਚ੍ਛਨ੍ਤਾ ਯਾਯ ਦੇਵਾ ਮਨੁਸ੍ਸਾ ਚ…ਪੇ… ਸਮਪ੍ਪਿਤਾ, ਯਾਯ ਦੇਵਾ ਚ ਮਨੁਸ੍ਸਾ ਚ ਅਤ੍ਥਿਕਾ ਰੂਪਸਦ੍ਦਗਨ੍ਧਰਸਫੋਟ੍ਠਬ੍ਬਤ੍ਥਿਕਾ, ਤਂ ਰੂਪਾਦਿਂ ਸਿਤਾ ਨਿਸ੍ਸਿਤਾ ਅਲ੍ਲੀਨਾ ਹੁਤ੍ਵਾ ਤਿਟ੍ਠਨ੍ਤਿ, ਤਰਥ ਸਮਤਿਕ੍ਕਮਥ ਏਤਂ ਨਾਨਪ੍ਪਕਾਰੇਸੁ ਵਿਸਯੇਸੁ ਵਿਸਟਵਿਤ੍ਥਿਣ੍ਣਵਿਸਾਲਤ੍ਤਾ ਵਿਸਤ੍ਤਿਕਂ ਭਵਭੋਗਤਣ੍ਹਂ. ਖਣੋ ਵੋ ਮਾ ਉਪਚ੍ਚਗਾ, ਅਯਂ ਤੁਮ੍ਹਾਕਂ ਸਮਣਧਮ੍ਮਕਰਣਕ੍ਖਣੋ ਮਾ ਅਤਿਕ੍ਕਮਿ. ਯੇਸਞ੍ਹਿ ਅਯਮੇਵਰੂਪੋ ਖਣੋ ਅਤਿਕ੍ਕਮਤਿ, ਯੇ ਚ ਇਮਂ ਖਣਂ ਅਤਿਕ੍ਕਮਨ੍ਤਿ, ਤੇ ਖਣਾਤੀਤਾ ਹਿ ਸੋਚਨ੍ਤਿ ਨਿਰਯਮ੍ਹਿ ਸਮਪ੍ਪਿਤਾ, ਨਿਰਸ੍ਸਾਦਟ੍ਠੇਨ ਨਿਰਯਸਞ੍ਞਿਤੇ ਚਤੁਬ੍ਬਿਧੇਪਿ ਅਪਾਯੇ ਪਤਿਟ੍ਠਿਤਾ ‘‘ਅਕਤਂ ਵਤ ਨੋ ਕਲ੍ਯਾਣ’’ਨ੍ਤਿਆਦਿਨਾ ਨਯੇਨ ਸੋਚਨ੍ਤਿ.

੩੩੭. ਏਵਂ ਭਗਵਾ ਤੇ ਭਿਕ੍ਖੂ ਉਸ੍ਸਾਹੇਤ੍ਵਾ ਸਂਵੇਜੇਤ੍ਵਾ ਚ ਇਦਾਨਿ ਤੇਸਂ ਤਂ ਪਮਾਦਵਿਹਾਰਂ ਵਿਗਰਹਿਤ੍ਵਾ ਸਬ੍ਬੇਵ ਤੇ ਅਪ੍ਪਮਾਦੇ ਨਿਯੋਜੇਨ੍ਤੋ ‘‘ਪਮਾਦੋ ਰਜੋ’’ਤਿ ਇਮਂ ਗਾਥਮਾਹ. ਤਤ੍ਥ ਪਮਾਦੋਤਿ ਸਙ੍ਖੇਪਤੋ ਸਤਿਵਿਪ੍ਪਵਾਸੋ, ਸੋ ਚਿਤ੍ਤਮਲਿਨਟ੍ਠੇਨ ਰਜੋ. ਤਂ ਪਮਾਦਮਨੁਪਤਿਤੋ ਪਮਾਦਾਨੁਪਤਿਤੋ, ਪਮਾਦਾਨੁਪਤਿਤਤ੍ਤਾ ਅਪਰਾਪਰੁਪ੍ਪਨ੍ਨੋ ਪਮਾਦੋ ਏਵ, ਸੋਪਿ ਰਜੋ. ਨ ਹਿ ਕਦਾਚਿ ਪਮਾਦੋ ਨਾਮ ਅਰਜੋ ਅਤ੍ਥਿ. ਤੇਨ ਕਿਂ ਦੀਪੇਤਿ? ਮਾ ਤੁਮ੍ਹੇ ‘‘ਦਹਰਾ ਤਾਵ ਮਯਂ ਪਚ੍ਛਾ ਜਾਨਿਸ੍ਸਾਮਾ’’ਤਿ ਵਿਸ੍ਸਾਸਮਾਪਜ੍ਜਿਤ੍ਥ. ਦਹਰਕਾਲੇਪਿ ਹਿ ਪਮਾਦੋ ਰਜੋ, ਮਜ੍ਝਿਮਕਾਲੇਪਿ ਥੇਰਕਾਲੇਪਿ ਪਮਾਦਾਨੁਪਤਿਤਤ੍ਤਾ ਮਹਾਰਜੋ ਸਙ੍ਕਾਰਕੂਟੋ ਏਵ ਹੋਤਿ, ਯਥਾ ਘਰੇ ਏਕਦ੍ਵੇਦਿਵਸਿਕੋ ਰਜੋ ਰਜੋ ਏਵ, ਵਡ੍ਢਮਾਨੋ ਪਨ ਗਣਵਸ੍ਸਿਕੋ ਸਙ੍ਕਾਰਕੂਟੋ ਏਵ ਹੋਤਿ. ਏਵਂ ਸਨ੍ਤੇਪਿ ਪਨ ਪਠਮਵਯੇ ਬੁਦ੍ਧਵਚਨਂ ਪਰਿਯਾਪੁਣਿਤ੍ਵਾ ਇਤਰਵਯੇਸੁ ਸਮਣਧਮ੍ਮਂ ਕਰੋਨ੍ਤੋ, ਪਠਮਵਯੇ ਵਾ ਪਰਿਯਾਪੁਣਿਤ੍ਵਾ ਮਜ੍ਝਿਮਵਯੇ ਸੁਣਿਤ੍ਵਾ ਪਚ੍ਛਿਮਵਯੇ ਸਮਣਧਮ੍ਮਂ ਕਰੋਨ੍ਤੋਪਿ ਭਿਕ੍ਖੁ ਪਮਾਦਵਿਹਾਰੀ ਨ ਹੋਤਿ ਅਪ੍ਪਮਾਦਾਨੁਲੋਮਪਟਿਪਦਂ ਪਟਿਪਨ੍ਨਤ੍ਤਾ. ਯੋ ਪਨ ਸਬ੍ਬਵਯੇਸੁ ਪਮਾਦਵਿਹਾਰੀ ਦਿਵਾਸੇਯ੍ਯਂ ਆਮਿਸਕਥਞ੍ਚ ਅਨੁਯੁਤ੍ਤੋ, ਸੇਯ੍ਯਥਾਪਿ ਤੁਮ੍ਹੇ, ਤਸ੍ਸੇਵ ਸੋ ਪਠਮਵਯੇ ਪਮਾਦੋ ਰਜੋ, ਇਤਰਵਯੇਸੁ ਪਮਾਦਾਨੁਪਤਿਤੋ ਮਹਾਪਮਾਦੋ ਚ ਮਹਾਰਜੋ ਏਵਾਤਿ.

ਏਵਂ ਤੇਸਂ ਪਮਾਦਵਿਹਾਰਂ ਵਿਗਰਹਿਤ੍ਵਾ ਅਪ੍ਪਮਾਦੇ ਨਿਯੋਜੇਨ੍ਤੋ ਆਹ – ‘‘ਅਪ੍ਪਮਾਦੇਨ ਵਿਜ੍ਜਾਯ, ਅਬ੍ਬਹੇ ਸਲ੍ਲਮਤ੍ਤਨੋ’’ਤਿ, ਤਸ੍ਸਤ੍ਥੋ – ਯਸ੍ਮਾ ਏਵਮੇਸੋ ਸਬ੍ਬਦਾਪਿ ਪਮਾਦੋ ਰਜੋ, ਤਸ੍ਮਾ ਸਤਿਅਵਿਪ੍ਪਵਾਸਸਙ੍ਖਾਤੇਨ ਅਪ੍ਪਮਾਦੇਨ ਆਸਵਾਨਂ ਖਯਞਾਣਸਙ੍ਖਾਤਾਯ ਚ ਵਿਜ੍ਜਾਯ ਪਣ੍ਡਿਤੋ ਕੁਲਪੁਤ੍ਤੋ ਉਦ੍ਧਰੇ ਅਤ੍ਤਨੋ ਹਦਯਨਿਸ੍ਸਿਤਂ ਰਾਗਾਦਿਪਞ੍ਚਵਿਧਂ ਸਲ੍ਲਨ੍ਤਿ ਅਰਹਤ੍ਤਨਿਕੂਟੇਨ ਦੇਸਨਂ ਸਮਾਪੇਸਿ. ਦੇਸਨਾਪਰਿਯੋਸਾਨੇ ਸਂਵੇਗਮਾਪਜ੍ਜਿਤ੍ਵਾ ਤਮੇਵ ਧਮ੍ਮਦੇਸਨਂ ਮਨਸਿ ਕਰਿਤ੍ਵਾ ਪਚ੍ਚਵੇਕ੍ਖਮਾਨਾ ਵਿਪਸ੍ਸਨਂ ਆਰਭਿਤ੍ਵਾ ਪਞ੍ਚਸਤਾਪਿ ਤੇ ਭਿਕ੍ਖੂ ਅਰਹਤ੍ਤੇ ਪਤਿਟ੍ਠਹਿਂਸੂਤਿ.

ਪਰਮਤ੍ਥਜੋਤਿਕਾਯ ਖੁਦ੍ਦਕ-ਅਟ੍ਠਕਥਾਯ

ਸੁਤ੍ਤਨਿਪਾਤ-ਅਟ੍ਠਕਥਾਯ ਉਟ੍ਠਾਨਸੁਤ੍ਤਵਣ੍ਣਨਾ ਨਿਟ੍ਠਿਤਾ.