੧੧. ਰਾਹੁਲਸੁਤ੍ਤਵਣ੍ਣਨਾ

੩੩੮. ਕਚ੍ਚਿ ਅਭਿਣ੍ਹਸਂਵਾਸਾਤਿ ਰਾਹੁਲਸੁਤ੍ਤਂ. ਕਾ ਉਪ੍ਪਤ੍ਤਿ? ਭਗਵਾ ਸਮ੍ਮਾਸਮ੍ਬੋਧਿਂ ਅਭਿਸਮ੍ਬੁਜ੍ਝਿਤ੍ਵਾ ਬੋਧਿਮਣ੍ਡਤੋ ਅਨੁਪੁਬ੍ਬੇਨ ਕਪਿਲਵਤ੍ਥੁਂ ਗਨ੍ਤ੍ਵਾ ਤਤ੍ਥ ਰਾਹੁਲਕੁਮਾਰੇਨ ‘‘ਦਾਯਜ੍ਜਂ ਮੇ ਸਮਣ ਦੇਹੀ’’ਤਿ ਦਾਯਜ੍ਜਂ ਯਾਚਿਤੋ ਸਾਰਿਪੁਤ੍ਤਤ੍ਥੇਰਂ ਆਣਾਪੇਸਿ – ‘‘ਰਾਹੁਲਕੁਮਾਰਂ ਪਬ੍ਬਾਜੇਹੀ’’ਤਿ. ਤਂ ਸਬ੍ਬਂ ਖਨ੍ਧਕਟ੍ਠਕਥਾਯਂ (ਮਹਾਵ. ਅਟ੍ਠ. ੧੦੫) ਵੁਤ੍ਤਨਯੇਨੇਵ ਗਹੇਤਬ੍ਬਂ. ਏਵਂ ਪਬ੍ਬਜਿਤਂ ਪਨ ਰਾਹੁਲਕੁਮਾਰਂ ਵੁਡ੍ਢਿਪ੍ਪਤ੍ਤਂ ਸਾਰਿਪੁਤ੍ਤਤ੍ਥੇਰੋਵ ਉਪਸਮ੍ਪਾਦੇਸਿ, ਮਹਾਮੋਗ੍ਗਲ੍ਲਾਨਤ੍ਥੇਰੋ ਅਸ੍ਸ ਕਮ੍ਮਵਾਚਾਚਰਿਯੋ ਅਹੋਸਿ. ਤਂ ਭਗਵਾ ‘‘ਅਯਂ ਕੁਮਾਰੋ ਜਾਤਿਆਦਿਸਮ੍ਪਨ੍ਨੋ, ਸੋ ਜਾਤਿਗੋਤ੍ਤਕੁਲਵਣ੍ਣਪੋਕ੍ਖਰਤਾਦੀਨਿ ਨਿਸ੍ਸਾਯ ਮਾਨਂ ਵਾ ਮਦਂ ਵਾ ਮਾ ਅਕਾਸੀ’’ਤਿ ਦਹਰਕਾਲਤੋ ਪਭੁਤਿ ਯਾਵ ਨ ਅਰਿਯਭੂਮਿਂ ਪਾਪੁਣਿ, ਤਾਵ ਓਵਦਨ੍ਤੋ ਅਭਿਣ੍ਹਂ ਇਮਂ ਸੁਤ੍ਤਮਭਾਸਿ. ਤਸ੍ਮਾ ਚੇਤਂ ਸੁਤ੍ਤਪਰਿਯੋਸਾਨੇਪਿ ਵੁਤ੍ਤਂ ‘‘ਇਤ੍ਥਂ ਸੁਦਂ ਭਗਵਾ ਆਯਸ੍ਮਨ੍ਤਂ ਰਾਹੁਲਂ ਇਮਾਹਿ ਗਾਥਾਹਿ ਅਭਿਣ੍ਹਂ ਓਵਦਤੀ’’ਤਿ. ਤਤ੍ਥ ਪਠਮਗਾਥਾਯਂ ਅਯਂ ਸਙ੍ਖੇਪਤ੍ਥੋ ‘‘ਕਚ੍ਚਿ ਤ੍ਵਂ, ਰਾਹੁਲ, ਅਭਿਣ੍ਹਂ ਸਂਵਾਸਹੇਤੁ ਜਾਤਿਆਦੀਨਂ ਅਞ੍ਞਤਰੇਨ ਵਤ੍ਥੁਨਾ ਨ ਪਰਿਭਵਸਿ ਪਣ੍ਡਿਤਂ, ਞਾਣਪਦੀਪਸ੍ਸ ਧਮ੍ਮਦੇਸਨਾਪਦੀਪਸ੍ਸ ਚ ਧਾਰਣਤੋ ਉਕ੍ਕਾਧਾਰੋ ਮਨੁਸ੍ਸਾਨਂ ਕਚ੍ਚਿ ਅਪਚਿਤੋ ਤਯਾ, ਕਚ੍ਚਿ ਨਿਚ੍ਚਂ ਪੂਜਿਤੋ ਤਯਾ’’ਤਿ ਆਯਸ੍ਮਨ੍ਤਂ ਸਾਰਿਪੁਤ੍ਤਂ ਸਨ੍ਧਾਯ ਭਣਤਿ.

੩੩੯. ਏਵਂ ਵੁਤ੍ਤੇ ਆਯਸ੍ਮਾ ਰਾਹੁਲੋ ‘‘ਨਾਹਂ ਭਗਵਾ ਨੀਚਪੁਰਿਸੋ ਵਿਯ ਸਂਵਾਸਹੇਤੁ ਮਾਨਂ ਵਾ ਮਦਂ ਵਾ ਕਰੋਮੀ’’ਤਿ ਦੀਪੇਨ੍ਤੋ ਇਮਂ ਪਟਿਗਾਥਮਾਹ ‘‘ਨਾਹਂ ਅਭਿਣ੍ਹਸਂਵਾਸਾ’’ਤਿ. ਸਾ ਉਤ੍ਤਾਨਤ੍ਥਾ ਏਵ.

੩੪੦. ਤਤੋ ਨਂ ਭਗਵਾ ਉਤ੍ਤਰਿਂ ਓਵਦਨ੍ਤੋ ਪਞ੍ਚ ਕਾਮਗੁਣੇਤਿਆਦਿਕਾ ਅਵਸੇਸਗਾਥਾਯੋ ਆਹ. ਤਤ੍ਥ ਯਸ੍ਮਾ ਪਞ੍ਚ ਕਾਮਗੁਣਾ ਸਤ੍ਤਾਨਂ ਪਿਯਰੂਪਾ ਪਿਯਜਾਤਿਕਾ ਅਤਿਵਿਯ ਸਤ੍ਤੇਹਿ ਇਚ੍ਛਿਤਾ ਪਤ੍ਥਿਤਾ, ਮਨੋ ਚ ਨੇਸਂ ਰਮਯਨ੍ਤਿ, ਤੇ ਚਾਯਸ੍ਮਾ ਰਾਹੁਲੋ ਹਿਤ੍ਵਾ ਸਦ੍ਧਾਯ ਘਰਾ ਨਿਕ੍ਖਨ੍ਤੋ, ਨ ਰਾਜਾਭਿਨੀਤੋ, ਨ ਚੋਰਾਭਿਨੀਤੋ, ਨ ਇਣਟ੍ਟੋ, ਨ ਭਯਟ੍ਟੋ, ਨ ਜੀਵਿਕਾਪਕਤੋ, ਤਸ੍ਮਾ ਨਂ ਭਗਵਾ ‘‘ਪਞ੍ਚ ਕਾਮਗੁਣੇ ਹਿਤ੍ਵਾ, ਪਿਯਰੂਪੇ ਮਨੋਰਮੇ, ਸਦ੍ਧਾਯ ਘਰਾ ਨਿਕ੍ਖਮ੍ਮਾ’’ਤਿ ਸਮੁਤ੍ਤੇਜੇਤ੍ਵਾ ਇਮਸ੍ਸ ਨੇਕ੍ਖਮ੍ਮਸ੍ਸ ਪਤਿਰੂਪਾਯ ਪਟਿਪਤ੍ਤਿਯਾ ਨਿਯੋਜੇਨ੍ਤੋ ਆਹ – ‘‘ਦੁਕ੍ਖਸ੍ਸਨ੍ਤਕਰੋ ਭਵਾ’’ਤਿ.

ਤਤ੍ਥ ਸਿਯਾ ‘‘ਨਨੁ ਚਾਯਸ੍ਮਾ ਦਾਯਜ੍ਜਂ ਪਤ੍ਥੇਨ੍ਤੋ ਬਲਕ੍ਕਾਰੇਨ ਪਬ੍ਬਾਜਿਤੋ, ਅਥ ਕਸ੍ਮਾ ਭਗਵਾ ਆਹ – ‘ਸਦ੍ਧਾਯ ਘਰਾ ਨਿਕ੍ਖਮ੍ਮਾ’’’ਤਿ ਵੁਚ੍ਚਤੇ – ਨੇਕ੍ਖਮ੍ਮਾਧਿਮੁਤ੍ਤਤ੍ਤਾ. ਅਯਞ੍ਹਿ ਆਯਸ੍ਮਾ ਦੀਘਰਤ੍ਤਂ ਨੇਕ੍ਖਮ੍ਮਾਧਿਮੁਤ੍ਤੋ ਪਦੁਮੁਤ੍ਤਰਸਮ੍ਮਾਸਮ੍ਬੁਦ੍ਧਸ੍ਸ ਪੁਤ੍ਤਂ ਉਪਰੇਵਤਂ ਨਾਮ ਸਾਮਣੇਰਂ ਦਿਸ੍ਵਾ ਸਙ੍ਖੋ ਨਾਮ ਨਾਗਰਾਜਾ ਹੁਤ੍ਵਾ ਸਤ੍ਤ ਦਿਵਸੇ ਦਾਨਂ ਦਤ੍ਵਾ ਤਥਾਭਾਵਂ ਪਤ੍ਥੇਤ੍ਵਾ ਤਤੋ ਪਭੁਤਿ ਪਤ੍ਥਨਾਸਮ੍ਪਨ੍ਨੋ ਅਭਿਨੀਹਾਰਸਮ੍ਪਨ੍ਨੋ ਸਤਸਹਸ੍ਸਕਪ੍ਪੇ ਪਾਰਮਿਯੋ ਪੂਰੇਤ੍ਵਾ ਅਨ੍ਤਿਮਭਵਂ ਉਪਪਨ੍ਨੋ. ਏਵਂ ਨੇਕ੍ਖਮ੍ਮਾਧਿਮੁਤ੍ਤਤਞ੍ਚਸ੍ਸ ਭਗਵਾ ਜਾਨਾਤਿ. ਤਥਾਗਤਬਲਞ੍ਞਤਰਞ੍ਹਿ ਏਤਂ ਞਾਣਂ. ਤਸ੍ਮਾ ਆਹ – ‘‘ਸਦ੍ਧਾਯ ਘਰਾ ਨਿਕ੍ਖਮ੍ਮਾ’’ਤਿ. ਅਥ ਵਾ ਦੀਘਰਤ੍ਤਂ ਸਦ੍ਧਾਯੇਵ ਘਰਾ ਨਿਕ੍ਖਮ੍ਮ ਇਦਾਨਿ ਦੁਕ੍ਖਸ੍ਸਨ੍ਤਕਰੋ ਭਵਾਤਿ ਅਯਮੇਤ੍ਥ ਅਧਿਪ੍ਪਾਯੋ.

੩੪੧. ਇਦਾਨਿਸ੍ਸ ਆਦਿਤੋ ਪਭੁਤਿ ਵਟ੍ਟਦੁਕ੍ਖਸ੍ਸ ਅਨ੍ਤਕਿਰਿਯਾਯ ਪਟਿਪਤ੍ਤਿਂ ਦਸ੍ਸੇਤੁਂ ‘‘ਮਿਤ੍ਤੇ ਭਜਸ੍ਸੁ ਕਲ੍ਯਾਣੇ’’ਤਿਆਦਿਮਾਹ. ਤਤ੍ਥ ਸੀਲਾਦੀਹਿ ਅਧਿਕਾ ਕਲ੍ਯਾਣਮਿਤ੍ਤਾ ਨਾਮ, ਤੇ ਭਜਨ੍ਤੋ ਹਿਮਵਨ੍ਤਂ ਨਿਸ੍ਸਾਯ ਮਹਾਸਾਲਾ ਮੂਲਾਦੀਹਿ ਵਿਯ ਸੀਲਾਦੀਹਿ ਵਡ੍ਢਤਿ. ਤੇਨਾਹ – ‘‘ਮਿਤ੍ਤੇ ਭਜਸ੍ਸੁ ਕਲ੍ਯਾਣੇ’’ਤਿ. ਪਨ੍ਤਞ੍ਚ ਸਯਨਾਸਨਂ, ਵਿਵਿਤ੍ਤਂ ਅਪ੍ਪਨਿਗ੍ਘੋਸਨ੍ਤਿ ਯਞ੍ਚ ਸਯਨਾਸਨਂ ਪਨ੍ਤਂ ਦੂਰਂ ਵਿਵਿਤ੍ਤਂ ਅਪ੍ਪਾਕਿਣ੍ਣਂ ਅਪ੍ਪਨਿਗ੍ਘੋਸਂ, ਯਤ੍ਥ ਮਿਗਸੂਕਰਾਦਿਸਦ੍ਦੇਨ ਅਰਞ੍ਞਸਞ੍ਞਾ ਉਪ੍ਪਜ੍ਜਤਿ, ਤਥਾਰੂਪਂ ਸਯਨਾਸਨਞ੍ਚ ਭਜਸ੍ਸੁ. ਮਤ੍ਤਞ੍ਞੂ ਹੋਹਿ ਭੋਜਨੇਤਿ ਪਮਾਣਞ੍ਞੂ ਹੋਹਿ, ਪਟਿਗ੍ਗਹਣਮਤ੍ਤਂ ਪਰਿਭੋਗਮਤ੍ਤਞ੍ਚ ਜਾਨਾਹੀਤਿ ਅਤ੍ਥੋ. ਤਤ੍ਥ ਪਟਿਗ੍ਗਹਣਮਤ੍ਤਞ੍ਞੁਨਾ ਦੇਯ੍ਯਧਮ੍ਮੇਪਿ ਅਪ੍ਪੇ ਦਾਯਕੇਪਿ ਅਪ੍ਪਂ ਦਾਤੁਕਾਮੇ ਅਪ੍ਪਮੇਵ ਗਹੇਤਬ੍ਬਂ, ਦੇਯ੍ਯਧਮ੍ਮੇ ਅਪ੍ਪੇ ਦਾਯਕੇ ਪਨ ਬਹੁਂ ਦਾਤੁਕਾਮੇਪਿ ਅਪ੍ਪਮੇਵ ਗਹੇਤਬ੍ਬਂ, ਦੇਯ੍ਯਧਮ੍ਮੇ ਪਨ ਬਹੁਤਰੇ ਦਾਯਕੇਪਿ ਅਪ੍ਪਂ ਦਾਤੁਕਾਮੇ ਅਪ੍ਪਮੇਵ ਗਹੇਤਬ੍ਬਂ, ਦੇਯ੍ਯਧਮ੍ਮੇਪਿ ਬਹੁਤਰੇ ਦਾਯਕੇਪਿ ਬਹੁਂ ਦਾਤੁਕਾਮੇ ਅਤ੍ਤਨੋ ਬਲਂ ਜਾਨਿਤ੍ਵਾ ਗਹੇਤਬ੍ਬਂ. ਅਪਿਚ ਮਤ੍ਤਾਯੇਵ ਵਣ੍ਣਿਤਾ ਭਗਵਤਾਤਿ ਪਰਿਭੋਗਮਤ੍ਤਞ੍ਞੁਨਾ ਪੁਤ੍ਤਮਂਸਂ ਵਿਯ ਅਕ੍ਖਬ੍ਭਞ੍ਜਨਮਿਵ ਚ ਯੋਨਿਸੋ ਮਨਸਿ ਕਰਿਤ੍ਵਾ ਭੋਜਨਂ ਪਰਿਭੁਞ੍ਜਿਤਬ੍ਬਨ੍ਤਿ.

੩੪੨. ਏਵਮਿਮਾਯ ਗਾਥਾਯ ਬ੍ਰਹ੍ਮਚਰਿਯਸ੍ਸ ਉਪਕਾਰਭੂਤਾਯ ਕਲ੍ਯਾਣਮਿਤ੍ਤਸੇਵਨਾਯ ਨਿਯੋਜੇਤ੍ਵਾ ਸੇਨਾਸਨਭੋਜਨਮੁਖੇਨ ਚ ਪਚ੍ਚਯਪਰਿਭੋਗਪਾਰਿਸੁਦ੍ਧਿਸੀਲੇ ਸਮਾਦਪੇਤ੍ਵਾ ਇਦਾਨਿ ਯਸ੍ਮਾ ਚੀਵਰਾਦੀਸੁ ਤਣ੍ਹਾਯ ਮਿਚ੍ਛਾਆਜੀਵੋ ਹੋਤਿ, ਤਸ੍ਮਾ ਤਂ ਪਟਿਸੇਧੇਤ੍ਵਾ ਆਜੀਵਪਾਰਿਸੁਦ੍ਧਿਸੀਲੇ ਸਮਾਦਪੇਨ੍ਤੋ ‘‘ਚੀਵਰੇ ਪਿਣ੍ਡਪਾਤੇ ਚਾ’’ਤਿ ਇਮਂ ਗਾਥਮਾਹ. ਤਤ੍ਥ ਪਚ੍ਚਯੇਤਿ ਗਿਲਾਨਪ੍ਪਚ੍ਚਯੇ. ਏਤੇਸੂਤਿ ਏਤੇਸੁ ਚਤੂਸੁ ਚੀਵਰਾਦੀਸੁ ਭਿਕ੍ਖੂਨਂ ਤਣ੍ਹੁਪ੍ਪਾਦਵਤ੍ਥੂਸੁ. ਤਣ੍ਹਂ ਮਾਕਾਸੀਤਿ ‘‘ਹਿਰਿਕੋਪੀਨਪਟਿਚ੍ਛਾਦਨਾਦਿਅਤ੍ਥਮੇਵ ਤੇ ਚਤ੍ਤਾਰੋ ਪਚ੍ਚਯਾ ਨਿਚ੍ਚਾਤੁਰਾਨਂ ਪੁਰਿਸਾਨਂ ਪਟਿਕਾਰਭੂਤਾ ਜਜ੍ਜਰਘਰਸ੍ਸੇਵਿਮਸ੍ਸ ਅਤਿਦੁਬ੍ਬਲਸ੍ਸ ਕਾਯਸ੍ਸ ਉਪਤ੍ਥਮ੍ਭਭੂਤਾ’’ਤਿਆਦਿਨਾ ਨਯੇਨ ਆਦੀਨਵਂ ਪਸ੍ਸਨ੍ਤੋ ਤਣ੍ਹਂ ਮਾ ਜਨੇਸਿ, ਅਜਨੇਨ੍ਤੋ ਅਨੁਪ੍ਪਾਦੇਨ੍ਤੋ ਵਿਹਰਾਹੀਤਿ ਵੁਤ੍ਤਂ ਹੋਤਿ. ਕਿਂ ਕਾਰਣਂ? ਮਾ ਲੋਕਂ ਪੁਨਰਾਗਮਿ. ਏਤੇਸੁ ਹਿ ਤਣ੍ਹਂ ਕਰੋਨ੍ਤੋ ਤਣ੍ਹਾਯ ਆਕਡ੍ਢਿਯਮਾਨੋ ਪੁਨਪਿ ਇਮਂ ਲੋਕਂ ਆਗਚ੍ਛਤਿ. ਸੋ ਤ੍ਵਂ ਏਤੇਸੁ ਤਣ੍ਹਂ ਮਾਕਾਸਿ, ਏਵਂ ਸਨ੍ਤੇ ਨ ਪੁਨ ਇਮਂ ਲੋਕਂ ਆਗਮਿਸ੍ਸਸੀਤਿ.

ਏਵਂ ਵੁਤ੍ਤੇ ਆਯਸ੍ਮਾ ਰਾਹੁਲੋ ‘‘ਚੀਵਰੇ ਤਣ੍ਹਂ ਮਾਕਾਸੀਤਿ ਮਂ ਭਗਵਾ ਆਹਾ’’ਤਿ ਚੀਵਰਪਟਿਸਂਯੁਤ੍ਤਾਨਿ ਦ੍ਵੇ ਧੁਤਙ੍ਗਾਨਿ ਸਮਾਦਿਯਿ ਪਂਸੁਕੂਲਿਕਙ੍ਗਞ੍ਚ, ਤੇਚੀਵਰਿਕਙ੍ਗਞ੍ਚ. ‘‘ਪਿਣ੍ਡਪਾਤੇ ਤਣ੍ਹਂ ਮਾਕਾਸੀਤਿ ਮਂ ਭਗਵਾ ਆਹਾ’’ਤਿ ਪਿਣ੍ਡਪਾਤਪਟਿਸਂਯੁਤ੍ਤਾਨਿ ਪਞ੍ਚ ਧੁਤਙ੍ਗਾਨਿ ਸਮਾਦਿਯਿ – ਪਿਣ੍ਡਪਾਤਿਕਙ੍ਗਂ, ਸਪਦਾਨਚਾਰਿਕਙ੍ਗਂ, ਏਕਾਸਨਿਕਙ੍ਗਂ, ਪਤ੍ਤਪਿਣ੍ਡਿਕਙ੍ਗਂ, ਖਲੁਪਚ੍ਛਾਭਤ੍ਤਿਕਙ੍ਗਨ੍ਤਿ. ‘‘ਸੇਨਾਸਨੇ ਤਣ੍ਹਂ ਮਾਕਾਸੀਤਿ ਮਂ ਭਗਵਾ ਆਹਾ’’ਤਿ ਸੇਨਾਸਨਪਟਿਸਂਯੁਤ੍ਤਾਨਿ ਛ ਧੁਤਙ੍ਗਾਨਿ ਸਮਾਦਿਯਿ – ਆਰਞ੍ਞਿਕਙ੍ਗਂ, ਅਬ੍ਭੋਕਾਸਿਕਙ੍ਗਂ, ਰੁਕ੍ਖਮੂਲਿਕਙ੍ਗਂ, ਯਥਾਸਨ੍ਥਤਿਕਙ੍ਗਂ, ਸੋਸਾਨਿਕਙ੍ਗਂ, ਨੇਸਜ੍ਜਿਕਙ੍ਗਨ੍ਤਿ. ‘‘ਗਿਲਾਨਪ੍ਪਚ੍ਚਯੇ ਤਣ੍ਹਂ ਮਾਕਾਸੀਤਿ ਮਂ ਭਗਵਾ ਆਹਾ’’ਤਿ ਸਬ੍ਬਪ੍ਪਚ੍ਚਯੇਸੁ ਯਥਾਲਾਭਂ ਯਥਾਬਲਂ ਯਥਾਸਾਰੁਪ੍ਪਨ੍ਤਿ ਤੀਹਿ ਸਨ੍ਤੋਸੇਹਿ ਸਨ੍ਤੁਟ੍ਠੋ ਅਹੋਸਿ, ਯਥਾ ਤਂ ਸੁਬ੍ਬਚੋ ਕੁਲਪੁਤ੍ਤੋ ਪਦਕ੍ਖਿਣਗ੍ਗਾਹੀ ਅਨੁਸਾਸਨਿਨ੍ਤਿ.

੩੪੩. ਏਵਂ ਭਗਵਾ ਆਯਸ੍ਮਨ੍ਤਂ ਰਾਹੁਲਂ ਆਜੀਵਪਾਰਿਸੁਦ੍ਧਿਸੀਲੇ ਸਮਾਦਪੇਤ੍ਵਾ ਇਦਾਨਿ ਅਵਸੇਸਸੀਲੇ ਸਮਥਵਿਪਸ੍ਸਨਾਸੁ ਚ ਸਮਾਦਪੇਤੁਂ ‘‘ਸਂਵੁਤੋ ਪਾਤਿਮੋਕ੍ਖਸ੍ਮਿ’’ਨ੍ਤਿਆਦਿਮਾਹ. ਤਤ੍ਥ ਸਂਵੁਤੋ ਪਾਤਿਮੋਕ੍ਖਸ੍ਮਿਨ੍ਤਿ ਏਤ੍ਥ ਭਵਸ੍ਸੂਤਿ ਪਾਠਸੇਸੋ. ਭਵਾਤਿ ਅਨ੍ਤਿਮਪਦੇਨ ਵਾ ਸਮ੍ਬਨ੍ਧੋ ਵੇਦਿਤਬ੍ਬੋ, ਤਥਾ ਦੁਤਿਯਪਦੇ. ਏਵਮੇਤੇਹਿ ਦ੍ਵੀਹਿ ਵਚਨੇਹਿ ਪਾਤਿਮੋਕ੍ਖਸਂਵਰਸੀਲੇ, ਇਨ੍ਦ੍ਰਿਯਸਂਵਰਸੀਲੇ ਚ ਸਮਾਦਪੇਸਿ. ਪਾਕਟਵਸੇਨ ਚੇਤ੍ਥ ਪਞ੍ਚਿਨ੍ਦ੍ਰਿਯਾਨਿ ਵੁਤ੍ਤਾਨਿ. ਲਕ੍ਖਣਤੋ ਪਨ ਛਟ੍ਠਮ੍ਪਿ ਵੁਤ੍ਤਂਯੇਵ ਹੋਤੀਤਿ ਵੇਦਿਤਬ੍ਬਂ. ਸਤਿ ਕਾਯਗਤਾ ਤ੍ਯਤ੍ਥੂਤਿ ਏਵਂ ਚਤੁਪਾਰਿਸੁਦ੍ਧਿਸੀਲੇ ਪਤਿਟ੍ਠਿਤਸ੍ਸ ਤੁਯ੍ਹਂ ਚਤੁਧਾਤੁਵਵਤ੍ਥਾਨਚਤੁਬ੍ਬਿਧਸਮ੍ਪਜਞ੍ਞਾਨਾਪਾਨਸ੍ਸਤਿਆਹਾਰੇਪਟਿਕੂਲਸਞ੍ਞਾਭਾਵਨਾਦਿਭੇਦਾ ਕਾਯਗਤਾ ਸਤਿ ਅਤ੍ਥੁ ਭਵਤੁ, ਭਾਵੇਹਿ ਨਨ੍ਤਿ ਅਤ੍ਥੋ. ਨਿਬ੍ਬਿਦਾਬਹੁਲੋ ਭਵਾਤਿ ਸਂਸਾਰਵਟ੍ਟੇ ਉਕ੍ਕਣ੍ਠਨਬਹੁਲੋ ਸਬ੍ਬਲੋਕੇ ਅਨਭਿਰਤਸਞ੍ਞੀ ਹੋਹੀਤਿ ਅਤ੍ਥੋ.

੩੪੪. ਏਤ੍ਤਾਵਤਾ ਨਿਬ੍ਬੇਧਭਾਗਿਯਂ ਉਪਚਾਰਭੂਮਿਂ ਦਸ੍ਸੇਤ੍ਵਾ ਇਦਾਨਿ ਅਪ੍ਪਨਾਭੂਮਿਂ ਦਸ੍ਸੇਨ੍ਤੋ ‘‘ਨਿਮਿਤ੍ਤਂ ਪਰਿਵਜ੍ਜੇਹੀ’’ਤਿਆਦਿਮਾਹ. ਤਤ੍ਥ ਨਿਮਿਤ੍ਤਨ੍ਤਿ ਰਾਗਟ੍ਠਾਨਿਯਂ ਸੁਭਨਿਮਿਤ੍ਤਂ. ਤੇਨੇਵ ਨਂ ਪਰਤੋ ਵਿਸੇਸੇਨ੍ਤੋ ਆਹ – ‘‘ਸੁਭਂ ਰਾਗੂਪਸਞ੍ਹਿਤ’’ਨ੍ਤਿ. ਪਰਿਵਜ੍ਜੇਹੀਤਿ ਅਮਨਸਿਕਾਰੇਨ ਪਰਿਚ੍ਚਜਾਹਿ. ਅਸੁਭਾਯ ਚਿਤ੍ਤਂ ਭਾਵੇਹੀਤਿ ਯਥਾ ਸਵਿਞ੍ਞਾਣਕੇ ਅਵਿਞ੍ਞਾਣਕੇ ਵਾ ਕਾਯੇ ਅਸੁਭਭਾਵਨਾ ਸਮ੍ਪਜ੍ਜਤਿ, ਏਵਂ ਚਿਤ੍ਤਂ ਭਾਵੇਹਿ. ਏਕਗ੍ਗਂ ਸੁਸਮਾਹਿਤਨ੍ਤਿ ਉਪਚਾਰਸਮਾਧਿਨਾ ਏਕਗ੍ਗਂ, ਅਪ੍ਪਨਾਸਮਾਧਿਨਾ ਸੁਸਮਾਹਿਤਂ. ਯਥਾ ਤੇ ਈਦਿਸਂ ਚਿਤ੍ਤਂ ਹੋਤਿ, ਤਥਾ ਨਂ ਭਾਵੇਹੀਤਿ ਅਤ੍ਥੋ.

੩੪੫. ਏਵਮਸ੍ਸ ਅਪ੍ਪਨਾਭੂਮਿਂ ਦਸ੍ਸੇਤ੍ਵਾ ਵਿਪਸ੍ਸਨਂ ਦਸ੍ਸੇਨ੍ਤੋ ‘‘ਅਨਿਮਿਤ੍ਤ’’ਨ੍ਤਿਆਦਿਮਾਹ. ਤਤ੍ਥ ਅਨਿਮਿਤ੍ਤਞ੍ਚ ਭਾਵੇਹੀਤਿ ਏਵਂ ਨਿਬ੍ਬੇਧਭਾਗਿਯੇਨ ਸਮਾਧਿਨਾ ਸਮਾਹਿਤਚਿਤ੍ਤੋ ਵਿਪਸ੍ਸਨਂ ਭਾਵੇਹੀਤਿ ਵੁਤ੍ਤਂ ਹੋਤਿ. ਵਿਪਸ੍ਸਨਾ ਹਿ ‘‘ਅਨਿਚ੍ਚਾਨੁਪਸ੍ਸਨਾਞਾਣਂ ਨਿਚ੍ਚਨਿਮਿਤ੍ਤਤੋ ਵਿਮੁਚ੍ਚਤੀਤਿ ਅਨਿਮਿਤ੍ਤੋ ਵਿਮੋਕ੍ਖੋ’’ਤਿਆਦਿਨਾ ਨਯੇਨ ਰਾਗਨਿਮਿਤ੍ਤਾਦੀਨਂ ਵਾ ਅਗ੍ਗਹਣੇਨ ਅਨਿਮਿਤ੍ਤਵੋਹਾਰਂ ਲਭਤਿ. ਯਥਾਹ –

‘‘ਸੋ ਖ੍ਵਾਹਂ, ਆਵੁਸੋ, ਸਬ੍ਬਨਿਮਿਤ੍ਤਾਨਂ ਅਮਨਸਿਕਾਰਾ ਅਨਿਮਿਤ੍ਤਂ ਚੇਤੋਸਮਾਧਿਂ ਉਪਸਮ੍ਪਜ੍ਜ ਵਿਹਰਾਮਿ. ਤਸ੍ਸ ਮਯ੍ਹਂ, ਆਵੁਸੋ, ਇਮਿਨਾ ਵਿਹਾਰੇਨ ਵਿਹਰਤੋ ਨਿਮਿਤ੍ਤਾਨੁਸਾਰਿ ਵਿਞ੍ਞਾਣਂ ਹੋਤੀ’’ਤਿ (ਸਂ. ਨਿ. ੪.੩੪੦).

ਮਾਨਾਨੁਸਯਮੁਜ੍ਜਹਾਤਿ ਇਮਾਯ ਅਨਿਮਿਤ੍ਤਭਾਵਨਾਯ ਅਨਿਚ੍ਚਸਞ੍ਞਂ ਪਟਿਲਭਿਤ੍ਵਾ ‘‘ਅਨਿਚ੍ਚਸਞ੍ਞਿਨੋ, ਮੇਘਿਯ, ਅਨਤ੍ਤਸਞ੍ਞਾ ਸਣ੍ਠਾਤਿ, ਅਨਤ੍ਤਸਞ੍ਞੀ ਅਸ੍ਮਿਮਾਨਸਮੁਗ੍ਘਾਤਂ ਪਾਪੁਣਾਤੀ’’ਤਿ ਏਵਮਾਦਿਨਾ (ਅ. ਨਿ. ੯.੩; ਉਦਾ. ੩੧) ਅਨੁਕ੍ਕਮੇਨ ਮਾਨਾਨੁਸਯਂ ਉਜ੍ਜਹ ਪਜਹ ਪਰਿਚ੍ਚਜਾਹੀਤਿ ਅਤ੍ਥੋ. ਤਤੋ ਮਾਨਾਭਿਸਮਯਾ, ਉਪਸਨ੍ਤੋ ਚਰਿਸ੍ਸਸੀਤਿ ਅਥੇਵਂ ਅਰਿਯਮਗ੍ਗੇਨ ਮਾਨਸ੍ਸ ਅਭਿਸਮਯਾ ਖਯਾ ਵਯਾ ਪਹਾਨਾ ਪਟਿਨਿਸ੍ਸਗ੍ਗਾ ਉਪਸਨ੍ਤੋ ਨਿਬ੍ਬੁਤੋ ਸੀਤਿਭੂਤੋ ਸਬ੍ਬਦਰਥਪਰਿਲ਼ਾਹਵਿਰਹਿਤੋ ਯਾਵ ਅਨੁਪਾਦਿਸੇਸਾਯ ਨਿਬ੍ਬਾਨਧਾਤੁਯਾ ਪਰਿਨਿਬ੍ਬਾਸਿ, ਤਾਵ ਸੁਞ੍ਞਤਾਨਿਮਿਤ੍ਤਾਪ੍ਪਣਿਹਿਤਾਨਂ ਅਞ੍ਞਤਰਞ੍ਞਤਰੇਨ ਫਲਸਮਾਪਤ੍ਤਿਵਿਹਾਰੇਨ ਚਰਿਸ੍ਸਸਿ ਵਿਹਰਿਸ੍ਸਸੀਤਿ ਅਰਹਤ੍ਤਨਿਕੂਟੇਨ ਦੇਸਨਂ ਨਿਟ੍ਠਾਪੇਸਿ.

ਤਤੋ ਪਰਂ ‘‘ਇਤ੍ਥਂ ਸੁਦਂ ਭਗਵਾ’’ਤਿਆਦਿ ਸਙ੍ਗੀਤਿਕਾਰਕਾਨਂ ਵਚਨਂ. ਤਤ੍ਥ ਇਤ੍ਥਂ ਸੁਦਨ੍ਤਿ ਇਤ੍ਥਂ ਸੁ ਇਦਂ, ਏਵਮੇਵਾਤਿ ਵੁਤ੍ਤਂ ਹੋਤਿ. ਸੇਸਮੇਤ੍ਥ ਉਤ੍ਤਾਨਤ੍ਥਮੇਵ. ਏਵਂ ਓਵਦਿਯਮਾਨੋ ਚਾਯਸ੍ਮਾ ਰਾਹੁਲੋ ਪਰਿਪਾਕਗਤੇਸੁ ਵਿਮੁਤ੍ਤਿਪਰਿਪਾਚਨਿਯੇਸੁ ਧਮ੍ਮੇਸੁ ਚੂਲ਼ਰਾਹੁਲੋਵਾਦਸੁਤ੍ਤਪਰਿਯੋਸਾਨੇ ਅਨੇਕੇਹਿ ਦੇਵਤਾਸਹਸ੍ਸੇਹਿ ਸਦ੍ਧਿਂ ਅਰਹਤ੍ਤੇ ਪਤਿਟ੍ਠਾਸੀਤਿ.

ਪਰਮਤ੍ਥਜੋਤਿਕਾਯ ਖੁਦ੍ਦਕ-ਅਟ੍ਠਕਥਾਯ

ਸੁਤ੍ਤਨਿਪਾਤ-ਅਟ੍ਠਕਥਾਯ ਰਾਹੁਲਸੁਤ੍ਤਵਣ੍ਣਨਾ ਨਿਟ੍ਠਿਤਾ.