੧੨. ਨਿਗ੍ਰੋਧਕਪ੍ਪਸੁਤ੍ਤ-(ਵਙ੍ਗੀਸਸੁਤ੍ਤ)-ਵਣ੍ਣਨਾ

ਏਵਂ ਮੇ ਸੁਤਨ੍ਤਿ ਨਿਗ੍ਰੋਧਕਪ੍ਪਸੁਤ੍ਤਂ, ‘‘ਵਙ੍ਗੀਸਸੁਤ੍ਤ’’ਨ੍ਤਿਪਿ ਵੁਚ੍ਚਤਿ. ਕਾ ਉਪ੍ਪਤ੍ਤਿ? ਅਯਮੇਵ ਯਾਸ੍ਸ ਨਿਦਾਨੇ ਵੁਤ੍ਤਾ. ਤਤ੍ਥ ਏਵਂ ਮੇਤਿਆਦੀਨਿ ਵੁਤ੍ਤਤ੍ਥਾਨੇਵ, ਯਤੋ ਤਾਨਿ ਅਞ੍ਞਾਨਿ ਚ ਤਥਾਵਿਧਾਨਿ ਛਡ੍ਡੇਤ੍ਵਾ ਅਵੁਤ੍ਤਨਯਮੇਵ ਵਣ੍ਣਯਿਸ੍ਸਾਮ. ਅਗ੍ਗਾਲ਼ਵੇ ਚੇਤਿਯੇਤਿ ਆਲ਼ਵਿਯਂ ਅਗ੍ਗਚੇਤਿਯੇ. ਅਨੁਪ੍ਪਨ੍ਨੇ ਹਿ ਭਗਵਤਿ ਅਗ੍ਗਾਲ਼ਵਗੋਤਮਕਾਦੀਨਿ ਅਨੇਕਾਨਿ ਚੇਤਿਯਾਨਿ ਅਹੇਸੁਂ ਯਕ੍ਖਨਾਗਾਦੀਨਂ ਭਵਨਾਨਿ. ਤਾਨਿ ਉਪ੍ਪਨ੍ਨੇ ਭਗਵਤਿ ਮਨੁਸ੍ਸਾ ਵਿਨਾਸੇਤ੍ਵਾ ਵਿਹਾਰੇ ਅਕਂਸੁ, ਤੇਨੇਵ ਚ ਨਾਮੇਨ ਵੋਹਰਿਂਸੁ. ਤਤੋ ਅਗ੍ਗਾਲ਼ਵਚੇਤਿਯਸਙ੍ਖਾਤੇ ਵਿਹਾਰੇ ਵਿਹਰਤੀਤਿ ਵੁਤ੍ਤਂ ਹੋਤਿ. ਆਯਸ੍ਮਤੋ ਵਙ੍ਗੀਸਸ੍ਸਾਤਿ ਏਤ੍ਥ ਆਯਸ੍ਮਾਤਿ ਪਿਯਵਚਨਂ, ਵਙ੍ਗੀਸੋਤਿ ਤਸ੍ਸ ਥੇਰਸ੍ਸ ਨਾਮਂ. ਸੋ ਜਾਤਿਤੋ ਪਭੁਤਿ ਏਵਂ ਵੇਦਿਤਬ੍ਬੋ – ਸੋ ਕਿਰ ਪਰਿਬ੍ਬਾਜਕਸ੍ਸ ਪੁਤ੍ਤੋ ਪਰਿਬ੍ਬਾਜਿਕਾਯ ਕੁਚ੍ਛਿਮ੍ਹਿ ਜਾਤੋ ਅਞ੍ਞਤਰਂ ਵਿਜ੍ਜਂ ਜਾਨਾਤਿ, ਯਸ੍ਸਾਨੁਭਾਵੇਨ ਛਵਸੀਸਂ ਆਕੋਟੇਤ੍ਵਾ ਸਤ੍ਤਾਨਂ ਗਤਿਂ ਜਾਨਾਤਿ. ਮਨੁਸ੍ਸਾਪਿ ਸੁਦਂ ਅਤ੍ਤਨੋ ਞਾਤੀਨਂ ਕਾਲਕਤਾਨਂ ਸੁਸਾਨਤੋ ਸੀਸਾਨਿ ਆਨੇਤ੍ਵਾ ਤਂ ਤੇਸਂ ਗਤਿਂ ਪੁਚ੍ਛਨ੍ਤਿ. ਸੋ ‘‘ਅਸੁਕਨਿਰਯੇ ਨਿਬ੍ਬਤ੍ਤੋ, ਅਸੁਕਮਨੁਸ੍ਸਲੋਕੇ’’ਤਿ ਵਦਤਿ. ਤੇ ਤੇਨ ਵਿਮ੍ਹਿਤਾ ਤਸ੍ਸ ਬਹੁਂ ਧਨਂ ਦੇਨ੍ਤਿ. ਏਵਂ ਸੋ ਸਕਲਜਮ੍ਬੁਦੀਪੇ ਪਾਕਟੋ ਅਹੋਸਿ.

ਸੋ ਸਤਸਹਸ੍ਸਕਪ੍ਪਂ ਪੂਰਿਤਪਾਰਮੀ ਅਭਿਨੀਹਾਰਸਮ੍ਪਨ੍ਨੋ ਪਞ੍ਚਹਿ ਪੁਰਿਸਸਹਸ੍ਸੇਹਿ ਪਰਿਵੁਤੋ ਗਾਮਨਿਗਮਜਨਪਦਰਾਜਧਾਨੀਸੁ ਵਿਚਰਨ੍ਤੋ ਸਾਵਤ੍ਥਿਂ ਅਨੁਪ੍ਪਤ੍ਤੋ. ਤੇਨ ਚ ਸਮਯੇਨ ਭਗਵਾ ਸਾਵਤ੍ਥਿਯਂ ਵਿਹਰਤਿ, ਸਾਵਤ੍ਥਿਵਾਸਿਨੋ ਪੁਰੇਭਤ੍ਤਂ ਦਾਨਂ ਦਤ੍ਵਾ ਪਚ੍ਛਾਭਤ੍ਤਂ ਸੁਨਿਵਤ੍ਥਾ ਸੁਪਾਰੁਤਾ ਪੁਪ੍ਫਗਨ੍ਧਾਦੀਨਿ ਗਹੇਤ੍ਵਾ ਧਮ੍ਮਸ੍ਸਵਨਤ੍ਥਾਯ ਜੇਤਵਨਂ ਗਚ੍ਛਨ੍ਤਿ. ਸੋ ਤੇ ਦਿਸ੍ਵਾ ‘‘ਮਹਾਜਨਕਾਯੋ ਕੁਹਿਂ ਗਚ੍ਛਤੀ’’ਤਿ ਪੁਚ੍ਛਿ. ਅਥਸ੍ਸ ਤੇ ਆਚਿਕ੍ਖਿਂਸੁ – ‘‘ਬੁਦ੍ਧੋ ਲੋਕੇ ਉਪ੍ਪਨ੍ਨੋ, ਸੋ ਬਹੁਜਨਹਿਤਾਯ ਧਮ੍ਮਂ ਦੇਸੇਤਿ, ਤਤ੍ਥ ਗਚ੍ਛਾਮਾ’’ਤਿ. ਸੋਪਿ ਤੇਹਿ ਸਦ੍ਧਿਂ ਸਪਰਿਵਾਰੋ ਗਨ੍ਤ੍ਵਾ ਭਗਵਤਾ ਸਦ੍ਧਿਂ ਸਮ੍ਮੋਦਿਤ੍ਵਾ ਏਕਮਨ੍ਤਂ ਨਿਸੀਦਿ. ਅਥ ਨਂ ਭਗਵਾ ਆਮਨ੍ਤੇਸਿ – ‘‘ਕਿਂ, ਵਙ੍ਗੀਸ, ਜਾਨਾਸਿ ਕਿਰ ਤਾਦਿਸਂ ਵਿਜ੍ਜਂ, ਯਾਯ ਸਤ੍ਤਾਨਂ ਛਵਸੀਸਾਨਿ ਆਕੋਟੇਤ੍ਵਾ ਗਤਿਂ ਪਵੇਦੇਸੀ’’ਤਿ? ‘‘ਏਵਂ, ਭੋ ਗੋਤਮ, ਜਾਨਾਮੀ’’ਤਿ. ਭਗਵਾ ਨਿਰਯੇ ਨਿਬ੍ਬਤ੍ਤਸ੍ਸ ਸੀਸਂ ਆਹਰਾਪੇਤ੍ਵਾ ਦਸ੍ਸੇਸਿ, ਸੋ ਨਖੇਨ ਆਕੋਟੇਤ੍ਵਾ ‘‘ਨਿਰਯੇ ਨਿਬ੍ਬਤ੍ਤਸ੍ਸ ਸੀਸਂ ਭੋ ਗੋਤਮਾ’’ਤਿ ਆਹ. ਏਵਂ ਸਬ੍ਬਗਤਿਨਿਬ੍ਬਤ੍ਤਾਨਂ ਸੀਸਾਨਿ ਦਸ੍ਸੇਸਿ, ਸੋਪਿ ਤਥੇਵ ਞਤ੍ਵਾ ਆਰੋਚੇਸਿ. ਅਥਸ੍ਸ ਭਗਵਾ ਖੀਣਾਸਵਸੀਸਂ ਦਸ੍ਸੇਸਿ, ਸੋ ਪੁਨਪ੍ਪੁਨਂ ਆਕੋਟੇਤ੍ਵਾ ਨ ਅਞ੍ਞਾਸਿ. ਤਤੋ ਭਗਵਾ ‘‘ਅਵਿਸਯੋ ਤੇ ਏਤ੍ਥ ਵਙ੍ਗੀਸ, ਮਮੇਵੇਸੋ ਵਿਸਯੋ, ਖੀਣਾਸਵਸੀਸ’’ਨ੍ਤਿ ਵਤ੍ਵਾ ਇਮਂ ਗਾਥਮਭਾਸਿ –

‘‘ਗਤੀ ਮਿਗਾਨਂ ਪਵਨਂ, ਆਕਾਸੋ ਪਕ੍ਖਿਨਂ ਗਤਿ;

ਵਿਭਵੋ ਗਤਿ ਧਮ੍ਮਾਨਂ, ਨਿਬ੍ਬਾਨਂ ਅਰਹਤੋ ਗਤੀ’’ਤਿ. (ਪਰਿ. ੩੩੯);

ਵਙ੍ਗੀਸੋ ਗਾਥਂ ਸੁਤ੍ਵਾ ‘‘ਇਮਂ ਮੇ, ਭੋ ਗੋਤਮ, ਵਿਜ੍ਜਂ ਦੇਹੀ’’ਤਿ ਆਹ. ਭਗਵਾ ‘‘ਨਾਯਂ ਵਿਜ੍ਜਾ ਅਪਬ੍ਬਜਿਤਾਨਂ ਸਮ੍ਪਜ੍ਜਤੀ’’ਤਿ ਆਹ. ਸੋ ‘‘ਪਬ੍ਬਾਜੇਤ੍ਵਾ ਵਾ ਮਂ, ਭੋ ਗੋਤਮ, ਯਂ ਵਾ ਇਚ੍ਛਸਿ, ਤਂ ਕਤ੍ਵਾ ਇਮਂ ਵਿਜ੍ਜਂ ਦੇਹੀ’’ਤਿ ਆਹ. ਤਦਾ ਚ ਭਗਵਤੋ ਨਿਗ੍ਰੋਧਕਪ੍ਪਤ੍ਥੇਰੋ ਸਮੀਪੇ ਹੋਤਿ, ਤਂ ਭਗਵਾ ਆਣਾਪੇਸਿ – ‘‘ਤੇਨ ਹਿ, ਨਿਗ੍ਰੋਧਕਪ੍ਪ, ਇਮਂ ਪਬ੍ਬਾਜੇਹੀ’’ਤਿ. ਸੋ ਤਂ ਪਬ੍ਬਾਜੇਤ੍ਵਾ ਤਚਪਞ੍ਚਕਕਮ੍ਮਟ੍ਠਾਨਂ ਆਚਿਕ੍ਖਿ. ਵਙ੍ਗੀਸੋ ਅਨੁਪੁਬ੍ਬੇਨ ਪਟਿਸਮ੍ਭਿਦਾਪ੍ਪਤ੍ਤੋ ਅਰਹਾ ਅਹੋਸਿ. ਏਤਦਗ੍ਗੇ ਚ ਭਗਵਤਾ ਨਿਦ੍ਦਿਟ੍ਠੋ ‘‘ਏਤਦਗ੍ਗਂ, ਭਿਕ੍ਖਵੇ, ਮਮ ਸਾਵਕਾਨਂ ਭਿਕ੍ਖੂਨਂ ਪਟਿਭਾਨਵਨ੍ਤਾਨਂ ਯਦਿਦਂ ਵਙ੍ਗੀਸੋ’’ਤਿ (ਅ. ਨਿ. ੧.੨੧੨).

ਏਵਂ ਸਮੁਦਾਗਤਸ੍ਸ ਆਯਸ੍ਮਤੋ ਵਙ੍ਗੀਸਸ੍ਸ ਉਪਜ੍ਝਾਯੋ ਵਜ੍ਜਾਵਜ੍ਜਾਦਿਉਪਨਿਜ੍ਝਾਯਨੇਨ ਏਵਂ ਲਦ੍ਧਵੋਹਾਰੋ ਨਿਗ੍ਰੋਧਕਪ੍ਪੋ ਨਾਮ ਥੇਰੋ. ਕਪ੍ਪੋਤਿ ਤਸ੍ਸ ਥੇਰਸ੍ਸ ਨਾਮਂ, ਨਿਗ੍ਰੋਧਮੂਲੇ ਪਨ ਅਰਹਤ੍ਤਂ ਅਧਿਗਤਤ੍ਤਾ ‘‘ਨਿਗ੍ਰੋਧਕਪ੍ਪੋ’’ਤਿ ਭਗਵਤਾ ਵੁਤ੍ਤੋ. ਤਤੋ ਨਂ ਭਿਕ੍ਖੂਪਿ ਏਵਂ ਵੋਹਰਨ੍ਤਿ. ਸਾਸਨੇ ਥਿਰਭਾਵਂ ਪਤ੍ਤੋਤਿ ਥੇਰੋ. ਅਗ੍ਗਾਲ਼ਵੇ ਚੇਤਿਯੇ ਅਚਿਰਪਰਿਨਿਬ੍ਬੁਤੋ ਹੋਤੀਤਿ ਤਸ੍ਮਿਂ ਚੇਤਿਯੇ ਅਚਿਰਪਰਿਨਿਬ੍ਬੁਤੋ ਹੋਤਿ. ਰਹੋਗਤਸ੍ਸ ਪਟਿਸਲ੍ਲੀਨਸ੍ਸਾਤਿ ਗਣਮ੍ਹਾ ਵੂਪਕਟ੍ਠਤ੍ਤਾ ਰਹੋਗਤਸ੍ਸ ਕਾਯੇਨ, ਪਟਿਸਲ੍ਲੀਨਸ੍ਸ ਚਿਤ੍ਤੇਨ ਤੇਹਿ ਤੇਹਿ ਵਿਸਯੇਹਿ ਪਟਿਨਿਵਤ੍ਤਿਤ੍ਵਾ ਸਲ੍ਲੀਨਸ੍ਸ. ਏਵਂ ਚੇਤਸੋ ਪਰਿਵਿਤਕ੍ਕੋ ਉਦਪਾਦੀਤਿ ਇਮਿਨਾ ਆਕਾਰੇਨ ਵਿਤਕ੍ਕੋ ਉਪ੍ਪਜ੍ਜਿ. ਕਸ੍ਮਾ ਪਨ ਉਦਪਾਦੀਤਿ. ਅਸਮ੍ਮੁਖਤ੍ਤਾ ਦਿਟ੍ਠਾਸੇਵਨਤ੍ਤਾ ਚ. ਅਯਞ੍ਹਿ ਤਸ੍ਸ ਪਰਿਨਿਬ੍ਬਾਨਕਾਲੇ ਨ ਸਮ੍ਮੁਖਾ ਅਹੋਸਿ, ਦਿਟ੍ਠਪੁਬ੍ਬਞ੍ਚਾਨੇਨ ਅਸ੍ਸ ਹਤ੍ਥਕੁਕ੍ਕੁਚ੍ਚਾਦਿਪੁਬ੍ਬਾਸੇਵਨਂ, ਤਾਦਿਸਞ੍ਚ ਅਖੀਣਾਸਵਾਨਮ੍ਪਿ ਹੋਤਿ ਖੀਣਾਸਵਾਨਮ੍ਪਿ ਪੁਬ੍ਬਪਰਿਚਯੇਨ.

ਤਥਾ ਹਿ ਪਿਣ੍ਡੋਲਭਾਰਦ੍ਵਾਜੋ ਪਚ੍ਛਾਭਤ੍ਤਂ ਦਿਵਾਵਿਹਾਰਤ੍ਥਾਯ ਉਦੇਨਸ੍ਸ ਉਯ੍ਯਾਨਮੇਵ ਗਚ੍ਛਤਿ ਪੁਬ੍ਬੇ ਰਾਜਾ ਹੁਤ੍ਵਾ ਤਤ੍ਥ ਪਰਿਚਾਰੇਸੀਤਿ ਇਮਿਨਾ ਪੁਬ੍ਬਪਰਿਚਯੇਨ, ਗਵਮ੍ਪਤਿਤ੍ਥੇਰੋ ਤਾਵਤਿਂਸਭਵਨੇ ਸੁਞ੍ਞਂ ਦੇਵਵਿਮਾਨਂ ਗਚ੍ਛਤਿ ਦੇਵਪੁਤ੍ਤੋ ਹੁਤ੍ਵਾ ਤਤ੍ਥ ਪਰਿਚਾਰੇਸੀਤਿ ਇਮਿਨਾ ਪੁਬ੍ਬਪਰਿਚਯੇਨ. ਪਿਲਿਨ੍ਦਵਚ੍ਛੋ ਭਿਕ੍ਖੂ ਵਸਲਵਾਦੇਨ ਸਮੁਦਾਚਰਤਿ ਅਬ੍ਬੋਕਿਣ੍ਣਾਨਿ ਪਞ੍ਚ ਜਾਤਿਸਤਾਨਿ ਬ੍ਰਾਹ੍ਮਣੋ ਹੁਤ੍ਵਾ ਤਥਾ ਅਭਾਸੀਤਿ ਇਮਿਨਾ ਪੁਬ੍ਬਪਰਿਚਯੇਨ. ਤਸ੍ਮਾ ਅਸਮ੍ਮੁਖਤ੍ਤਾ ਦਿਟ੍ਠਾਸੇਵਨਤ੍ਤਾ ਚਸ੍ਸ ਏਵਂ ਚੇਤਸੋ ਪਰਿਵਿਤਕ੍ਕੋ ਉਦਪਾਦਿ ‘‘ਪਰਿਨਿਬ੍ਬੁਤੋ ਨੁ ਖੋ ਮੇ ਉਪਜ੍ਝਾਯੋ, ਉਦਾਹੁ ਨੋ ਪਰਿਨਿਬ੍ਬੁਤੋ’’ਤਿ. ਤਤੋ ਪਰਂ ਉਤ੍ਤਾਨਤ੍ਥਮੇਵ. ਏਕਂਸਂ ਚੀਵਰਂ ਕਤ੍ਵਾਤਿ ਏਤ੍ਥ ਪਨ ਪੁਨ ਸਣ੍ਠਾਪਨੇਨ ਏਵਂ ਵੁਤ੍ਤਂ. ਏਕਂਸਨ੍ਤਿ ਚ ਵਾਮਂਸਂ ਪਾਰੁਪਿਤ੍ਵਾ ਠਿਤਸ੍ਸੇਤਂ ਅਧਿਵਚਨਂ. ਯਤੋ ਯਥਾ ਵਾਮਂਸਂ ਪਾਰੁਪਿਤ੍ਵਾ ਠਿਤਂ ਹੋਤਿ, ਤਥਾ ਚੀਵਰਂ ਕਤ੍ਵਾਤਿ ਏਵਮਸ੍ਸਤ੍ਥੋ ਵੇਦਿਤਬ੍ਬੋ. ਸੇਸਂ ਪਾਕਟਮੇਵ.

੩੪੬. ਅਨੋਮਪਞ੍ਞਨ੍ਤਿ ਓਮਂ ਵੁਚ੍ਚਤਿ ਪਰਿਤ੍ਤਂ ਲਾਮਕਂ, ਨ ਓਮਪਞ੍ਞਂ, ਅਨੋਮਪਞ੍ਞਂ, ਮਹਾਪਞ੍ਞਨ੍ਤਿ ਅਤ੍ਥੋ. ਦਿਟ੍ਠੇਵ ਧਮ੍ਮੇਤਿ ਪਚ੍ਚਕ੍ਖਮੇਵ, ਇਮਸ੍ਮਿਂਯੇਵ ਅਤ੍ਤਭਾਵੇਤਿ ਵਾ ਅਤ੍ਥੋ. ਵਿਚਿਕਿਚ੍ਛਾਨਨ੍ਤਿ ਏਵਰੂਪਾਨਂ ਪਰਿਵਿਤਕ੍ਕਾਨਂ. ਞਾਤੋਤਿ ਪਾਕਟੋ. ਯਸਸ੍ਸੀਤਿ ਲਾਭਪਰਿਵਾਰਸਮ੍ਪਨ੍ਨੋ ਅਭਿਨਿਬ੍ਬੁਤਤ੍ਤੋਤਿ ਗੁਤ੍ਤਚਿਤ੍ਤੋ ਅਪਰਿਡਯ੍ਹਮਾਨਚਿਤ੍ਤੋ ਵਾ.

੩੪੭. ਤਯਾ ਕਤਨ੍ਤਿ ਨਿਗ੍ਰੋਧਮੂਲੇ ਨਿਸਿਨ੍ਨਤ੍ਤਾ ‘‘ਨਿਗ੍ਰੋਧਕਪ੍ਪੋ’’ਤਿ ਵਦਤਾ ਤਯਾ ਕਤਨ੍ਤਿ ਯਥਾ ਅਤ੍ਤਨਾ ਉਪਲਕ੍ਖੇਤਿ, ਤਥਾ ਭਣਤਿ. ਭਗਵਾ ਪਨ ਨ ਨਿਸਿਨ੍ਨਤ੍ਤਾ ਏਵ ਤਂ ਤਥਾ ਆਲਪਿ, ਅਪਿਚ ਖੋ ਤਤ੍ਥ ਅਰਹਤ੍ਤਂ ਪਤ੍ਤਤ੍ਤਾ. ਬ੍ਰਾਹ੍ਮਣਸ੍ਸਾਤਿ ਜਾਤਿਂ ਸਨ੍ਧਾਯ ਭਣਤਿ. ਸੋ ਕਿਰ ਬ੍ਰਾਹ੍ਮਣਮਹਾਸਾਲਕੁਲਾ ਪਬ੍ਬਜਿਤੋ. ਨਮਸ੍ਸਂ ਅਚਰੀਤਿ ਨਮਸ੍ਸਮਾਨੋ ਵਿਹਾਸਿ. ਮੁਤ੍ਯਪੇਕ੍ਖੋਤਿ ਨਿਬ੍ਬਾਨਸਙ੍ਖਾਤਂ ਵਿਮੁਤ੍ਤਿਂ ਅਪੇਕ੍ਖਮਾਨੋ, ਨਿਬ੍ਬਾਨਂ ਪਤ੍ਥੇਨ੍ਤੋਤਿ ਵੁਤ੍ਤਂ ਹੋਤਿ. ਦਲ਼੍ਹਧਮ੍ਮਦਸ੍ਸੀਤਿ ਭਗਵਨ੍ਤਂ ਆਲਪਤਿ. ਦਲ਼੍ਹਧਮ੍ਮੋ ਹਿ ਨਿਬ੍ਬਾਨਂ ਅਭਿਜ੍ਜਨਟ੍ਠੇਨ, ਤਞ੍ਚ ਭਗਵਾ ਦਸ੍ਸੇਤਿ. ਤਸ੍ਮਾ ਤਂ ‘‘ਦਲ਼੍ਹਧਮ੍ਮਦਸ੍ਸੀ’’ਤਿ ਆਹ.

੩੪੮. ਸਕ੍ਯਾਤਿਪਿ ਭਗਵਨ੍ਤਮੇਵ ਕੁਲਨਾਮੇਨ ਆਲਪਤਿ. ਮਯਮ੍ਪਿ ਸਬ੍ਬੇਤਿ ਨਿਰਵਸੇਸਪਰਿਸਂ ਸਙ੍ਗਣ੍ਹਿਤ੍ਵਾ ਅਤ੍ਤਾਨਂ ਦਸ੍ਸੇਨ੍ਤੋ ਭਣਤਿ. ਸਮਨ੍ਤਚਕ੍ਖੂਤਿਪਿ ਭਗਵਨ੍ਤਮੇਵ ਸਬ੍ਬਞ੍ਞੁਤਞ੍ਞਾਣੇਨ ਆਲਪਤਿ. ਸਮਵਟ੍ਠਿਤਾਤਿ ਸਮ੍ਮਾ ਅਵਟ੍ਠਿਤਾ ਆਭੋਗਂ ਕਤ੍ਵਾ ਠਿਤਾ. ਨੋਤਿ ਅਮ੍ਹਾਕਂ. ਸਵਨਾਯਾਤਿ ਇਮਸ੍ਸ ਪਞ੍ਹਸ੍ਸ ਵੇਯ੍ਯਾਕਰਣਸ੍ਸਵਨਤ੍ਥਾਯ. ਸੋਤਾਤਿ ਸੋਤਿਨ੍ਦ੍ਰਿਯਾਨਿ. ਤੁਵਂ ਨੋ ਸਤ੍ਥਾ ਤ੍ਵਮਨੁਤ੍ਤਰੋਸੀਤਿ ਥੁਤਿਵਚਨਮਤ੍ਤਮੇਵੇਤਂ.

੩੪੯. ਛਿਨ੍ਦੇਵ ਨੋ ਵਿਚਿਕਿਚ੍ਛਨ੍ਤਿ ਅਕੁਸਲਵਿਚਿਕਿਚ੍ਛਾਯ ਨਿਬ੍ਬਿਚਿਕਿਚ੍ਛੋ ਸੋ, ਵਿਚਿਕਿਚ੍ਛਾਪਤਿਰੂਪਕਂ ਪਨ ਤਂ ਪਰਿਵਿਤਕ੍ਕਂ ਸਨ੍ਧਾਯੇਵਮਾਹ. ਬ੍ਰੂਹਿ ਮੇਤਨ੍ਤਿ ਬ੍ਰੂਹਿ ਮੇ ਏਤਂ, ਯਂ ਮਯਾ ਯਾਚਿਤੋਸਿ ‘‘ਤਂ ਸਾਵਕਂ ਸਕ੍ਯ, ਮਯਮ੍ਪਿ ਸਬ੍ਬੇ ਅਞ੍ਞਾਤੁਮਿਚ੍ਛਾਮਾ’’ਤਿ, ਬ੍ਰੂਵਨ੍ਤੋ ਚ ਤਂ ਬ੍ਰਾਹ੍ਮਣਂ ਪਰਿਨਿਬ੍ਬੁਤਂ ਵੇਦਯ ਭੂਰਿਪਞ੍ਞ ਮਜ੍ਝੇਵ ਨੋ ਭਾਸ, ਪਰਿਨਿਬ੍ਬੁਤਂ ਞਤ੍ਵਾ ਮਹਾਪਞ੍ਞਂ ਭਗਵਾ ਮਜ੍ਝੇਵ ਅਮ੍ਹਾਕਂ ਸਬ੍ਬੇਸਂ ਭਾਸ, ਯਥਾ ਸਬ੍ਬੇਵ ਮਯਂ ਜਾਨੇਯ੍ਯਾਮ. ਸਕ੍ਕੋਵ ਦੇਵਾਨ ਸਹਸ੍ਸਨੇਤ੍ਤੋਤਿ ਇਦਂ ਪਨ ਥੁਤਿਵਚਨਮੇਵ. ਅਪਿਚਸ੍ਸ ਅਯਂ ਅਧਿਪ੍ਪਾਯੋ – ਯਥਾ ਸਕ੍ਕੋ ਸਹਸ੍ਸਨੇਤ੍ਤੋ ਦੇਵਾਨਂ ਮਜ੍ਝੇ ਤੇਹਿ ਸਕ੍ਕਚ੍ਚਂ ਸਮ੍ਪਟਿਚ੍ਛਿਤਵਚਨੋ ਭਾਸਤਿ, ਏਵਂ ਅਮ੍ਹਾਕਂ ਮਜ੍ਝੇ ਅਮ੍ਹੇਹਿ ਸਮ੍ਪਟਿਚ੍ਛਿਤਵਚਨੋ ਭਾਸਾਤਿ.

੩੫੦. ਯੇ ਕੇਚੀਤਿ ਇਮਮ੍ਪਿ ਗਾਥਂ ਭਗਵਨ੍ਤਂ ਥੁਨਨ੍ਤੋਯੇਵ ਵਤ੍ਤੁਕਾਮਤਂ ਜਨੇਤੁਂ ਭਣਤਿ. ਤਸ੍ਸਤ੍ਥੋ ਯੇ ਕੇਚਿ ਅਭਿਜ੍ਝਾਦਯੋ ਗਨ੍ਥਾ ਤੇਸਂ ਅਪ੍ਪਹਾਨੇ ਮੋਹਵਿਚਿਕਿਚ੍ਛਾਨਂ ਪਹਾਨਾਭਾਵਤੋ ‘‘ਮੋਹਮਗ੍ਗਾ’’ਤਿ ਚ ‘‘ਅਞ੍ਞਾਣਪਕ੍ਖਾ’’ਤਿ ਚ ‘‘ਵਿਚਿਕਿਚ੍ਛਟ੍ਠਾਨਾ’’ਤਿ ਚ ਵੁਚ੍ਚਨ੍ਤਿ. ਸਬ੍ਬੇ ਤੇ ਤਥਾਗਤਂ ਪਤ੍ਵਾ ਤਥਾਗਤਸ੍ਸ ਦੇਸਨਾਬਲੇਨ ਵਿਦ੍ਧਂਸਿਤਾ ਨ ਭਵਨ੍ਤਿ ਨਸ੍ਸਨ੍ਤਿ. ਕਿਂ ਕਾਰਣਂ? ਚਕ੍ਖੁਞ੍ਹਿ ਏਤਂ ਪਰਮਂ ਨਰਾਨਂ, ਯਸ੍ਮਾ ਤਥਾਗਤੋ ਸਬ੍ਬਗਨ੍ਥਵਿਧਮਨਪਞ੍ਞਾਚਕ੍ਖੁਜਨਨਤੋ ਨਰਾਨਂ ਪਰਮਂ ਚਕ੍ਖੁਨ੍ਤਿ ਵੁਤ੍ਤਂ ਹੋਤਿ.

੩੫੧. ਨੋ ਚੇ ਹਿ ਜਾਤੂਤਿ ਇਮਮ੍ਪਿ ਗਾਥਂ ਥੁਨਨ੍ਤੋਯੇਵ ਵਤ੍ਤੁਕਾਮਤਂ ਜਨੇਨ੍ਤੋਵ ਭਣਤਿ. ਤਤ੍ਥ ਜਾਤੂਤਿ ਏਕਂਸਵਚਨਂ. ਪੁਰਿਸੋਤਿ ਭਗਵਨ੍ਤਂ ਸਨ੍ਧਾਯਾਹ. ਜੋਤਿਮਨ੍ਤੋਤਿ ਪਞ੍ਞਾਜੋਤਿਸਮਨ੍ਨਾਗਤਾ ਸਾਰਿਪੁਤ੍ਤਾਦਯੋ. ਇਦਂ ਵੁਤ੍ਤਂ ਹੋਤਿ – ਯਦਿ ਭਗਵਾ ਯਥਾ ਪੁਰਤ੍ਥਿਮਾਦਿਭੇਦੋ ਵਾਤੋ ਅਬ੍ਭਘਨਂ ਵਿਹਨਤਿ, ਏਵਂ ਦੇਸਨਾਵੇਗੇਨ ਕਿਲੇਸੇ ਨ ਵਿਹਨੇਯ੍ਯ. ਤਥਾ ਯਥਾ ਅਬ੍ਭਘਨੇਨ ਨਿਵੁਤੋ ਲੋਕੋ ਤਮੋਵ ਹੋਤਿ ਏਕਨ੍ਧਕਾਰੋ, ਏਵਂ ਅਞ੍ਞਾਣਨਿਵੁਤੋਪਿ ਤਮੋਵਸ੍ਸ. ਯੇਪਿ ਇਮੇ ਦਾਨਿ ਜੋਤਿਮਨ੍ਤੋ ਖਾਯਨ੍ਤਿ ਸਾਰਿਪੁਤ੍ਤਾਦਯੋ, ਤੇਪਿ ਨਰਾ ਨ ਤਪੇਯ੍ਯੁਨ੍ਤਿ.

੩੫੨. ਧੀਰਾ ਚਾਤਿ ਇਮਮ੍ਪਿ ਗਾਥਂ ਪੁਰਿਮਨਯੇਨੇਵ ਭਣਤਿ. ਤਸ੍ਸਤ੍ਥੋ ਧੀਰਾ ਚ ਪਣ੍ਡਿਤਾ ਪੁਰਿਸਾ ਪਜ੍ਜੋਤਕਰਾ ਭਵਨ੍ਤਿ, ਪਞ੍ਞਾਪਜ੍ਜੋਤਂ ਉਪ੍ਪਾਦੇਨ੍ਤਿ. ਤਸ੍ਮਾ ਅਹਂ ਤਂ ਵੀਰ ਪਧਾਨਵੀਰਿਯਸਮਨ੍ਨਾਗਤੋ ਭਗਵਾ ਤਥੇਵ ਮਞ੍ਞੇ ਧੀਰੋਤਿ ਚ ਪਜ੍ਜੋਤਕਰੋਤ੍ਵੇਵ ਚ ਮਞ੍ਞਾਮਿ. ਮਯਞ੍ਹਿ ਵਿਪਸ੍ਸਿਨਂ ਸਬ੍ਬਧਮ੍ਮੇ ਯਥਾਭੂਤਂ ਪਸ੍ਸਨ੍ਤਂ ਭਗਵਨ੍ਤਂ ਜਾਨਨ੍ਤਾ ਏਵ ਉਪਾਗਮੁਮ੍ਹਾ, ਤਸ੍ਮਾ ਪਰਿਸਾਸੁ ਨੋ ਆਵਿਕਰੋਹਿ ਕਪ੍ਪਂ, ਨਿਗ੍ਰੋਧਕਪ੍ਪਂ ਆਚਿਕ੍ਖ ਪਕਾਸੇਹੀਤਿ.

੩੫੩. ਖਿਪ੍ਪਨ੍ਤਿ ਇਮਮ੍ਪਿ ਗਾਥਂ ਪੁਰਿਮਨਯੇਨੇਵ ਭਣਤਿ. ਤਸ੍ਸਤ੍ਥੋ ਖਿਪ੍ਪਂ ਗਿਰਂ ਏਰਯ ਲਹੁਂ ਅਚਿਰਾਯਮਾਨੋ ਵਚਨਂ ਭਾਸ, ਵਗ੍ਗੁਂ ਮਨੋਰਮਂ ਭਗਵਾ. ਯਥਾ ਸੁਵਣ੍ਣਹਂਸੋ ਗੋਚਰਪਟਿਕ੍ਕਨ੍ਤੋ ਜਾਤਸ੍ਸਰਵਨਸਣ੍ਡਂ ਦਿਸ੍ਵਾ ਗੀਵਂ ਪਗ੍ਗਯ੍ਹ ਉਚ੍ਚਾਰੇਤ੍ਵਾ ਰਤ੍ਤਤੁਣ੍ਡੇਨ ਸਣਿਕਂ ਅਤਰਮਾਨੋ ਵਗ੍ਗੁਂ ਗਿਰਂ ਨਿਕੂਜਤਿ ਨਿਚ੍ਛਾਰੇਤਿ, ਏਵਮੇਵ ਤ੍ਵਮ੍ਪਿ ਸਣਿਕਂ ਨਿਕੂਜ, ਇਮਿਨਾ ਮਹਾਪੁਰਿਸਲਕ੍ਖਣਞ੍ਞਤਰੇਨ ਬਿਨ੍ਦੁਸ੍ਸਰੇਨ ਸੁਵਿਕਪ੍ਪਿਤੇਨ ਸੁਟ੍ਠੁਵਿਕਪ੍ਪਿਤੇਨ ਅਭਿਸਙ੍ਖਤੇਨ. ਏਤੇ ਮਯਂ ਸਬ੍ਬੇਵ ਉਜੁਗਤਾ ਅਵਿਕ੍ਖਿਤ੍ਤਮਾਨਸਾ ਹੁਤ੍ਵਾ ਤਵ ਨਿਕੂਜਿਤਂ ਸੁਣੋਮਾਤਿ.

੩੫੪. ਪਹੀਨਜਾਤਿਮਰਣਨ੍ਤਿ ਇਮਮ੍ਪਿ ਗਾਥਂ ਪੁਰਿਮਨਯੇਨੇਵ ਭਣਤਿ. ਤਤ੍ਥ ਨ ਸੇਸੇਤੀਤਿ ਅਸੇਸੋ, ਤਂ ਅਸੇਸਂ. ਸੋਤਾਪਨ੍ਨਾਦਯੋ ਵਿਯ ਕਿਞ੍ਚਿ ਅਸੇਸੇਤ੍ਵਾ ਪਹੀਨਜਾਤਿਮਰਣਨ੍ਤਿ ਵੁਤ੍ਤਂ ਹੋਤਿ. ਨਿਗ੍ਗਯ੍ਹਾਤਿ ਸੁਟ੍ਠੁ ਯਾਚਿਤ੍ਵਾ ਨਿਬਨ੍ਧਿਤ੍ਵਾ. ਧੋਨਨ੍ਤਿ ਧੁਤਸਬ੍ਬਪਾਪਂ. ਵਦੇਸ੍ਸਾਮੀਤਿ ਕਥਾਪੇਸ੍ਸਾਮਿ ਧਮ੍ਮਂ. ਨ ਕਾਮਕਾਰੋ ਹਿ ਪੁਥੁਜ੍ਜਨਾਨਨ੍ਤਿ ਪੁਥੁਜ੍ਜਨਾਨਮੇਵ ਹਿ ਕਾਮਕਾਰੋ ਨਤ੍ਥਿ, ਯਂ ਪਤ੍ਥੇਨ੍ਤਿ ਞਾਤੁਂ ਵਾ ਵਤ੍ਤੁਂ ਵਾ, ਤਂ ਨ ਸਕ੍ਕੋਨ੍ਤਿ. ਸਙ੍ਖੇਯ੍ਯਕਾਰੋ ਚ ਤਥਾਗਤਾਨਨ੍ਤਿ ਤਥਾਗਤਾਨਂ ਪਨ ਵੀਮਂਸਕਾਰੋ ਪਞ੍ਞਾਪੁਬ੍ਬਙ੍ਗਮਾ ਕਿਰਿਯਾ. ਤੇ ਯਂ ਪਤ੍ਥੇਨ੍ਤਿ ਞਾਤੁਂ ਵਾ ਵਤ੍ਤੁਂ ਵਾ, ਤਂ ਸਕ੍ਕੋਨ੍ਤੀਤਿ ਅਧਿਪ੍ਪਾਯੋ.

੩੫੫. ਇਦਾਨਿ ਤਂ ਸਙ੍ਖੇਯ੍ਯਕਾਰਂ ਪਕਾਸੇਨ੍ਤੋ ‘‘ਸਮ੍ਪਨ੍ਨਵੇਯ੍ਯਾਕਰਣ’’ਨ੍ਤਿ ਗਾਥਮਾਹ. ਤਸ੍ਸਤ੍ਥੋ – ਤਥਾ ਹਿ ਤਵ ਭਗਵਾ ਇਦਂ ਸਮੁਜ੍ਜੁਪਞ੍ਞਸ੍ਸ ਤਤ੍ਥ ਤਤ੍ਥ ਸਮੁਗ੍ਗਹੀਤਂ ਵੁਤ੍ਤਂ ਪਵਤ੍ਤਿਤਂ ਸਮ੍ਪਨ੍ਨਵੇਯ੍ਯਾਕਰਣਂ, ‘‘ਸਨ੍ਤਤਿਮਹਾਮਤ੍ਤੋ ਸਤ੍ਤਤਾਲਮਤ੍ਤਂ ਅਬ੍ਭੁਗ੍ਗਨ੍ਤ੍ਵਾ ਪਰਿਨਿਬ੍ਬਾਯਿਸ੍ਸਤਿ, ਸੁਪ੍ਪਬੁਦ੍ਧੋ ਸਕ੍ਕੋ ਸਤ੍ਤਮੇ ਦਿਵਸੇ ਪਥਵਿਂ ਪਵਿਸਿਸ੍ਸਤੀ’’ਤਿ ਏਵਮਾਦੀਸੁ ਅਵਿਪਰੀਤਂ ਦਿਟ੍ਠਂ. ਤਤੋ ਪਨ ਸੁਟ੍ਠੁਤਰਂ ਅਞ੍ਜਲਿਂ ਪਣਾਮੇਤ੍ਵਾ ਆਹ – ਅਯਮਞ੍ਜਲੀ ਪਚ੍ਛਿਮੋ ਸੁਪ੍ਪਣਾਮਿਤੋ, ਅਯਮਪਰੋਪਿ ਅਞ੍ਜਲੀ ਸੁਟ੍ਠੁਤਰਂ ਪਣਾਮਿਤੋ. ਮਾ ਮੋਹਯੀਤਿ ਮਾ ਨੋ ਅਕਥਨੇਨ ਮੋਹਯਿ ਜਾਨਂ ਜਾਨਨ੍ਤੋ ਕਪ੍ਪਸ੍ਸ ਗਤਿਂ. ਅਨੋਮਪਞ੍ਞਾਤਿ ਭਗਵਨ੍ਤਂ ਆਲਪਤਿ.

੩੫੬. ਪਰੋਵਰਨ੍ਤਿ ਇਮਂ ਪਨ ਗਾਥਂ ਅਪਰੇਨਪਿ ਪਰਿਯਾਯੇਨ ਅਮੋਹਨਮੇਵ ਯਾਚਨ੍ਤੋ ਆਹ. ਤਤ੍ਥ ਪਰੋਵਰਨ੍ਤਿ ਲੋਕਿਯਲੋਕੁਤ੍ਤਰਵਸੇਨ ਸੁਨ੍ਦਰਾਸੁਨ੍ਦਰਂ ਦੂਰੇਸਨ੍ਤਿਕਂ ਵਾ. ਅਰਿਯਧਮ੍ਮਨ੍ਤਿ ਚਤੁਸਚ੍ਚਧਮ੍ਮਂ. ਵਿਦਿਤ੍ਵਾਤਿ ਪਟਿਵਿਜ੍ਝਿਤ੍ਵਾ. ਜਾਨਨ੍ਤਿ ਸਬ੍ਬਂ ਞੇਯ੍ਯਧਮ੍ਮਂ ਜਾਨਨ੍ਤੋ. ਵਾਚਾਭਿਕਙ੍ਖਾਮੀਤਿ ਯਥਾ ਘਮ੍ਮਨਿ ਘਮ੍ਮਤਤ੍ਤੋ ਪੁਰਿਸੋ ਕਿਲਨ੍ਤੋ ਤਸਿਤੋ ਵਾਰਿਂ, ਏਵਂ ਤੇ ਵਾਚਂ ਅਭਿਕਙ੍ਖਾਮਿ. ਸੁਤਂ ਪਵਸ੍ਸਾਤਿ ਸੁਤਸਙ੍ਖਾਤਂ ਸਦ੍ਦਾਯਤਨਂ ਪਵਸ੍ਸ ਪਗ੍ਘਰ ਮੁਞ੍ਚ ਪਵਤ੍ਤੇਹਿ. ‘‘ਸੁਤਸ੍ਸ ਵਸ੍ਸਾ’’ਤਿਪਿ ਪਾਠੋ, ਵੁਤ੍ਤਪ੍ਪਕਾਰਸ੍ਸ ਸਦ੍ਦਾਯਤਨਸ੍ਸ ਵੁਟ੍ਠਿਂ ਵਸ੍ਸਾਤਿ ਅਤ੍ਥੋ.

੩੫੭. ਇਦਾਨਿ ਯਾਦਿਸਂ ਵਾਚਂ ਅਭਿਕਙ੍ਖਤਿ, ਤਂ ਪਕਾਸੇਨ੍ਤੋ –

‘‘ਯਦਤ੍ਥਿਕਂ ਬ੍ਰਹ੍ਮਚਰਿਯਂ ਅਚਰੀ,

ਕਪ੍ਪਾਯਨੋ ਕਚ੍ਚਿਸ੍ਸ ਤਂ ਅਮੋਘਂ;

ਨਿਬ੍ਬਾਯਿ ਸੋ ਆਦੁ ਸਉਪਾਦਿਸੇਸੋ,

ਯਥਾ ਵਿਮੁਤ੍ਤੋ ਅਹੁ ਤਂ ਸੁਣੋਮਾ’’ਤਿ. –

ਗਾਥਮਾਹ. ਤਤ੍ਥ ਕਪ੍ਪਾਯਨੋਤਿ ਕਪ੍ਪਮੇਵ ਪੂਜਾਵਸੇਨ ਭਣਤਿ. ਯਥਾ ਵਿਮੁਤ੍ਤੋਤਿ ‘‘ਕਿਂ ਅਨੁਪਾਦਿਸੇਸਾਯ ਨਿਬ੍ਬਾਨਧਾਤੁਯਾ ਯਥਾ ਅਸੇਕ੍ਖਾ, ਉਦਾਹੁ ਉਪਾਦਿਸੇਸਾਯ ਯਥਾ ਸੇਕ੍ਖਾ’’ਤਿ ਪੁਚ੍ਛਤਿ. ਸੇਸਮੇਤ੍ਥ ਪਾਕਟਮੇਵ.

੩੫੮. ਏਵਂ ਦ੍ਵਾਦਸਹਿ ਗਾਥਾਹਿ ਯਾਚਿਤੋ ਭਗਵਾ ਤਂ ਵਿਯਾਕਰੋਨ੍ਤੋ –

‘‘ਅਚ੍ਛੇਚ੍ਛਿ ਤਣ੍ਹਂ ਇਧ ਨਾਮਰੂਪੇ, (ਇਤਿ ਭਗਵਾ)

ਕਣ੍ਹਸ੍ਸ ਸੋਤਂ ਦੀਘਰਤ੍ਤਾਨੁਸਯਿਤਂ;

ਅਤਾਰਿ ਜਾਤਿਂ ਮਰਣਂ ਅਸੇਸਂ,

ਇਚ੍ਚਬ੍ਰਵੀ ਭਗਵਾ ਪਞ੍ਚਸੇਟ੍ਠੋ’’ਤਿ. –

ਗਾਥਮਾਹ. ਤਤ੍ਥ ਪੁਰਿਮਪਦਸ੍ਸ ਤਾਵ ਅਤ੍ਥੋ – ਯਾਪਿ ਇਮਸ੍ਮਿਂ ਨਾਮਰੂਪੇ ਕਾਮਤਣ੍ਹਾਦਿਭੇਦਾ ਤਣ੍ਹਾਦੀਘਰਤ੍ਤਂ ਅਪ੍ਪਹੀਨਟ੍ਠੇਨ ਅਨੁਸਯਿਤਾ ਕਣ੍ਹਨਾਮਕਸ੍ਸ ਮਾਰਸ੍ਸ ‘‘ਸੋਤ’’ਨ੍ਤਿਪਿ ਵੁਚ੍ਚਤਿ, ਤਂ ਕਣ੍ਹਸ੍ਸ ਸੋਤਭੂਤਂ ਦੀਘਰਤ੍ਤਾਨੁਸਯਿਤਂ ਇਧ ਨਾਮਰੂਪੇ ਤਣ੍ਹਂ ਕਪ੍ਪਾਯਨੋ ਛਿਨ੍ਦੀਤਿ. ਇਤਿ ਭਗਵਾਤਿ ਇਦਂ ਪਨੇਤ੍ਥ ਸਙ੍ਗੀਤਿਕਾਰਾਨਂ ਵਚਨਂ. ਅਤਾਰਿ ਜਾਤਿਂ ਮਰਣਂ ਅਸੇਸਨ੍ਤਿ ਸੋ ਤਂ ਤਣ੍ਹਂ ਛੇਤ੍ਵਾ ਅਸੇਸਂ ਜਾਤਿਮਰਣਂ ਅਤਾਰਿ, ਅਨੁਪਾਦਿਸੇਸਾਯ ਨਿਬ੍ਬਾਨਧਾਤੁਯਾ ਪਰਿਨਿਬ੍ਬਾਯੀਤਿ ਦਸ੍ਸੇਤਿ. ਇਚ੍ਚਬ੍ਰਵੀ ਭਗਵਾ ਪਞ੍ਚਸੇਟ੍ਠੋਤਿ ਵਙ੍ਗੀਸੇਨ ਪੁਟ੍ਠੋ ਭਗਵਾ ਏਤਦਵੋਚ ਪਞ੍ਚਨ੍ਨਂ ਪਠਮਸਿਸ੍ਸਾਨਂ ਪਞ੍ਚਵਗ੍ਗਿਯਾਨਂ ਸੇਟ੍ਠੋ, ਪਞ੍ਚਹਿ ਵਾ ਸਦ੍ਧਾਦੀਹਿ ਇਨ੍ਦ੍ਰਿਯੇਹਿ, ਸੀਲਾਦੀਹਿ ਵਾ ਧਮ੍ਮਕ੍ਖਨ੍ਧੇਹਿ ਅਤਿਵਿਸਿਟ੍ਠੇਹਿ ਚਕ੍ਖੂਹਿ ਚ ਸੇਟ੍ਠੋਤਿ ਸਙ੍ਗੀਤਿਕਾਰਾਨਮੇਵਿਦਂ ਵਚਨਂ.

੩੫੯. ਏਵਂ ਵੁਤ੍ਤੇ ਭਗਵਤੋ ਭਾਸਿਤਮਭਿਨਨ੍ਦਮਾਨਸੋ ਵਙ੍ਗੀਸੋ ‘‘ਏਸ ਸੁਤ੍ਵਾ’’ਤਿਆਦਿਗਾਥਾਯੋ ਆਹ. ਤਤ੍ਥ ਪਠਮਗਾਥਾਯ ਇਸਿਸਤ੍ਤਮਾਤਿ ਭਗਵਾ ਇਸਿ ਚ ਸਤ੍ਤਮੋ ਚ ਉਤ੍ਤਮਟ੍ਠੇਨ ਵਿਪਸ੍ਸੀਸਿਖੀਵੇਸ੍ਸਭੂਕਕੁਸਨ੍ਧਕੋਣਾਗਮਨਕਸ੍ਸਪਨਾਮਕੇ ਛ ਇਸਯੋ ਅਤ੍ਤਨਾ ਸਹ ਸਤ੍ਤ ਕਰੋਨ੍ਤੋ ਪਾਤੁਭੂਤੋਤਿਪਿ ਇਸਿਸਤ੍ਤਮੋ, ਤਂ ਆਲਪਨ੍ਤੋ ਆਹ. ਨ ਮਂ ਵਞ੍ਚੇਸੀਤਿ ਯਸ੍ਮਾ ਪਰਿਨਿਬ੍ਬੁਤੋ, ਤਸ੍ਮਾ ਤਸ੍ਸ ਪਰਿਨਿਬ੍ਬੁਤਭਾਵਂ ਇਚ੍ਛਨ੍ਤਂ ਮਂ ਨ ਵਞ੍ਚੇਸਿ, ਨ ਵਿਸਂਵਾਦੇਸੀਤਿ ਅਤ੍ਥੋ. ਸੇਸਮੇਤ੍ਥ ਪਾਕਟਮੇਵ.

੩੬੦. ਦੁਤਿਯਗਾਥਾਯ ਯਸ੍ਮਾ ਮੁਤ੍ਯਪੇਕ੍ਖੋ ਵਿਹਾਸਿ, ਤਸ੍ਮਾ ਤਂ ਸਨ੍ਧਾਯਾਹ ‘‘ਯਥਾਵਾਦੀ ਤਥਾਕਾਰੀ, ਅਹੁ ਬੁਦ੍ਧਸ੍ਸ ਸਾਵਕੋ’’ਤਿ. ਮਚ੍ਚੁਨੋ ਜਾਲਂ ਤਤਨ੍ਤਿ ਤੇਭੂਮਕਵਟ੍ਟੇ ਵਿਤ੍ਥਤਂ ਮਾਰਸ੍ਸ ਤਣ੍ਹਾਜਾਲਂ. ਮਾਯਾਵਿਨੋਤਿ ਬਹੁਮਾਯਸ੍ਸ. ‘‘ਤਥਾ ਮਾਯਾਵਿਨੋ’’ਤਿਪਿ ਕੇਚਿ ਪਠਨ੍ਤਿ, ਤੇਸਂ ਯੋ ਅਨੇਕਾਹਿ ਮਾਯਾਹਿ ਅਨੇਕਕ੍ਖਤ੍ਤੁਮ੍ਪਿ ਭਗਵਨ੍ਤਂ ਉਪਸਙ੍ਕਮਿ, ਤਸ੍ਸ ਤਥਾ ਮਾਯਾਵਿਨੋਤਿ ਅਧਿਪ੍ਪਾਯੋ.

੩੬੧. ਤਤਿਯਗਾਥਾਯ ਆਦੀਤਿ ਕਾਰਣਂ. ਉਪਾਦਾਨਸ੍ਸਾਤਿ ਵਟ੍ਟਸ੍ਸ. ਵਟ੍ਟਞ੍ਹਿ ਉਪਾਦਾਤਬ੍ਬਟ੍ਠੇਨ ਇਧ ‘‘ਉਪਾਦਾਨ’’ਨ੍ਤਿ ਵੁਤ੍ਤਂ, ਤਸ੍ਸੇਵ ਉਪਾਦਾਨਸ੍ਸ ਆਦਿਂ ਅਵਿਜ੍ਜਾਤਣ੍ਹਾਦਿਭੇਦਂ ਕਾਰਣਂ ਅਦ੍ਦਸ ਕਪ੍ਪੋਤਿ ਏਵਂ ਵਤ੍ਤੁਂ ਵਟ੍ਟਤਿ ਭਗਵਾਤਿ ਅਧਿਪ੍ਪਾਯੇਨ ਵਦਤਿ. ਅਚ੍ਚਗਾ ਵਤਾਤਿ ਅਤਿਕ੍ਕਨ੍ਤੋ ਵਤ. ਮਚ੍ਚੁਧੇਯ੍ਯਨ੍ਤਿ ਮਚ੍ਚੁ ਏਤ੍ਥ ਧਿਯਤੀਤਿ ਮਚ੍ਚੁਧੇਯ੍ਯਂ, ਤੇਭੂਮਕਵਟ੍ਟਸ੍ਸੇਤਂ ਅਧਿਵਚਨਂ. ਤਂ ਸੁਦੁਤ੍ਤਰਂ ਮਚ੍ਚੁਧੇਯ੍ਯਂ ਅਚ੍ਚਗਾ ਵਤਾਤਿ ਵੇਦਜਾਤੋ ਭਣਤਿ. ਸੇਸਮੇਤ੍ਥ ਪਾਕਟਮੇਵਾਤਿ.

ਪਰਮਤ੍ਥਜੋਤਿਕਾਯ ਖੁਦ੍ਦਕ-ਅਟ੍ਠਕਥਾਯ

ਸੁਤ੍ਤਨਿਪਾਤ-ਅਟ੍ਠਕਥਾਯ ਨਿਗ੍ਰੋਧਕਪ੍ਪਸੁਤ੍ਤਵਣ੍ਣਨਾ ਨਿਟ੍ਠਿਤਾ.