੧੩. ਸਮ੍ਮਾਪਰਿਬ੍ਬਾਜਨੀਯਸੁਤ੍ਤ-(ਮਹਾਸਮਯਸੁਤ੍ਤ)-ਵਣ੍ਣਨਾ

੩੬੨. ਪੁਚ੍ਛਾਮਿ ਮੁਨਿਂ ਪਹੂਤਪਞ੍ਞਨ੍ਤਿ ਸਮ੍ਮਾਪਰਿਬ੍ਬਾਜਨੀਯਸੁਤ੍ਤਂ, ‘‘ਮਹਾਸਮਯਸੁਤ੍ਤ’’ਨ੍ਤਿਪਿ ਵੁਚ੍ਚਤਿ ਮਹਾਸਮਯਦਿਵਸੇ ਕਥਿਤਤ੍ਤਾ. ਕਾ ਉਪ੍ਪਤ੍ਤਿ? ਪੁਚ੍ਛਾਵਸਿਕਾ ਉਪ੍ਪਤ੍ਤਿ. ਨਿਮ੍ਮਿਤਬੁਦ੍ਧੇਨ ਹਿ ਪੁਟ੍ਠੋ ਭਗਵਾ ਇਮਂ ਸੁਤ੍ਤਮਭਾਸਿ, ਤਂ ਸਦ੍ਧਿਂ ਪੁਚ੍ਛਾਯ ‘‘ਸਮ੍ਮਾਪਰਿਬ੍ਬਾਜਨੀਯਸੁਤ੍ਤ’’ਨ੍ਤਿ ਵੁਚ੍ਚਤਿ. ਅਯਮੇਤ੍ਥ ਸਙ੍ਖੇਪੋ, ਵਿਤ੍ਥਾਰਤੋ ਪਨ ਸਾਕਿਯਕੋਲਿਯਾਨਂ ਉਪ੍ਪਤ੍ਤਿਤੋ ਪਭੁਤਿ ਪੋਰਾਣੇਹਿ ਵਣ੍ਣੀਯਤਿ.

ਤਤ੍ਰਾਯਂ ਉਦ੍ਦੇਸਮਗ੍ਗਵਣ੍ਣਨਾ – ਪਠਮਕਪ੍ਪਿਕਾਨਂ ਕਿਰ ਰਞ੍ਞੋ ਮਹਾਸਮ੍ਮਤਸ੍ਸ ਰੋਜੋ ਨਾਮ ਪੁਤ੍ਤੋ ਅਹੋਸਿ. ਰੋਜਸ੍ਸ ਵਰਰੋਜੋ, ਵਰਰੋਜਸ੍ਸ ਕਲ੍ਯਾਣੋ, ਕਲ੍ਯਾਣਸ੍ਸ ਵਰਕਲ੍ਯਾਣੋ, ਵਰਕਲ੍ਯਾਣਸ੍ਸ ਮਨ੍ਧਾਤਾ, ਮਨ੍ਧਾਤੁਸ੍ਸ ਵਰਮਨ੍ਧਾਤਾ, ਵਰਮਨ੍ਧਾਤੁਸ੍ਸ ਉਪੋਸਥੋ, ਉਪੋਸਥਸ੍ਸ ਵਰੋ, ਵਰਸ੍ਸ ਉਪਵਰੋ, ਉਪਵਰਸ੍ਸ ਮਘਦੇਵੋ, ਮਘਦੇਵਸ੍ਸ ਪਰਮ੍ਪਰਾ ਚਤੁਰਾਸੀਤਿ ਖਤ੍ਤਿਯਸਹਸ੍ਸਾਨਿ ਅਹੇਸੁਂ. ਤੇਸਂ ਪਰਤੋ ਤਯੋ ਓਕ੍ਕਾਕਵਂਸਾ ਅਹੇਸੁਂ. ਤੇਸੁ ਤਤਿਯਓਕ੍ਕਾਕਸ੍ਸ ਪਞ੍ਚ ਮਹੇਸਿਯੋ ਅਹੇਸੁਂ – ਹਤ੍ਥਾ, ਚਿਤ੍ਤਾ, ਜਨ੍ਤੁ, ਜਾਲਿਨੀ, ਵਿਸਾਖਾਤਿ. ਏਕੇਕਿਸ੍ਸਾ ਪਞ੍ਚ ਪਞ੍ਚ ਇਤ੍ਥਿਸਤਾਨਿ ਪਰਿਵਾਰਾ. ਸਬ੍ਬਜੇਟ੍ਠਾਯ ਚਤ੍ਤਾਰੋ ਪੁਤ੍ਤਾ – ਓਕ੍ਕਾਮੁਖੋ, ਕਰਕਣ੍ਡੁ, ਹਤ੍ਥਿਨਿਕੋ, ਸਿਨਿਪੁਰੋਤਿ; ਪਞ੍ਚ ਧੀਤਰੋ – ਪਿਯਾ, ਸੁਪ੍ਪਿਯਾ, ਆਨਨ੍ਦਾ, ਵਿਜਿਤਾ, ਵਿਜਿਤਸੇਨਾਤਿ. ਏਵਂ ਸਾ ਨਵ ਪੁਤ੍ਤੇ ਲਭਿਤ੍ਵਾ ਕਾਲਮਕਾਸਿ.

ਅਥ ਰਾਜਾ ਅਞ੍ਞਂ ਦਹਰਂ ਅਭਿਰੂਪਂ ਰਾਜਧੀਤਰਂ ਆਨੇਤ੍ਵਾ ਅਗ੍ਗਮਹੇਸਿਟ੍ਠਾਨੇ ਠਪੇਸਿ. ਸਾਪਿ ਜਨ੍ਤੁਂ ਨਾਮ ਏਕਂ ਪੁਤ੍ਤਂ ਵਿਜਾਯਿ. ਤਂ ਜਨ੍ਤੁਕੁਮਾਰਂ ਪਞ੍ਚਮਦਿਵਸੇ ਅਲਙ੍ਕਰਿਤ੍ਵਾ ਰਞ੍ਞੋ ਦਸ੍ਸੇਸਿ. ਰਾਜਾ ਤੁਟ੍ਠੋ ਮਹੇਸਿਯਾ ਵਰਂ ਅਦਾਸਿ. ਸਾ ਞਾਤਕੇਹਿ ਸਦ੍ਧਿਂ ਮਨ੍ਤੇਤ੍ਵਾ ਪੁਤ੍ਤਸ੍ਸ ਰਜ੍ਜਂ ਯਾਚਿ. ਰਾਜਾ ‘‘ਨਸ੍ਸ ਵਸਲਿ, ਮਮ ਪੁਤ੍ਤਾਨਂ ਅਨ੍ਤਰਾਯਮਿਚ੍ਛਸੀ’’ਤਿ ਨਾਦਾਸਿ. ਸਾ ਪੁਨਪ੍ਪੁਨਂ ਰਹੋ ਰਾਜਾਨਂ ਪਰਿਤੋਸੇਤ੍ਵਾ ‘‘ਨ, ਮਹਾਰਾਜ, ਮੁਸਾਵਾਦੋ ਵਟ੍ਟਤੀ’’ਤਿਆਦੀਨਿ ਵਤ੍ਵਾ ਯਾਚਤਿ ਏਵ. ਅਥ ਰਾਜਾ ਪੁਤ੍ਤੇ ਆਮਨ੍ਤੇਸਿ – ‘‘ਅਹਂ, ਤਾਤਾ, ਤੁਮ੍ਹਾਕਂ ਕਨਿਟ੍ਠਂ ਜਨ੍ਤੁਕੁਮਾਰਂ ਦਿਸ੍ਵਾ ਤਸ੍ਸ ਮਾਤੁਯਾ ਸਹਸਾ ਵਰਂ ਅਦਾਸਿਂ. ਸਾ ਪੁਤ੍ਤਸ੍ਸ ਰਜ੍ਜਂ ਪਰਿਣਾਮੇਤੁਂ ਇਚ੍ਛਤਿ. ਤੁਮ੍ਹੇ ਮਮਚ੍ਚਯੇਨ ਆਗਨ੍ਤ੍ਵਾ ਰਜ੍ਜਂ ਕਾਰੇਯ੍ਯਾਥਾ’’ਤਿ ਅਟ੍ਠਹਿ ਅਮਚ੍ਚੇਹਿ ਸਦ੍ਧਿਂ ਉਯ੍ਯੋਜੇਸਿ. ਤੇ ਭਗਿਨਿਯੋ ਆਦਾਯ ਚਤੁਰਙ੍ਗਿਨਿਯਾ ਸੇਨਾਯ ਨਗਰਾ ਨਿਕ੍ਖਮਿਂਸੁ. ‘‘ਕੁਮਾਰਾ ਪਿਤੁਅਚ੍ਚਯੇਨ ਆਗਨ੍ਤ੍ਵਾ ਰਜ੍ਜਂ ਕਾਰੇਸ੍ਸਨ੍ਤਿ, ਗਚ੍ਛਾਮ ਨੇ ਉਪਟ੍ਠਹਾਮਾ’’ਤਿ ਚਿਨ੍ਤੇਤ੍ਵਾ ਬਹੂ ਮਨੁਸ੍ਸਾ ਅਨੁਬਨ੍ਧਿਂਸੁ. ਪਠਮਦਿਵਸੇ ਯੋਜਨਮਤ੍ਤਾ ਸੇਨਾ ਅਹੋਸਿ, ਦੁਤਿਯਦਿਵਸੇ ਦ੍ਵਿਯੋਜਨਮਤ੍ਤਾ, ਤਤਿਯਦਿਵਸੇ ਤਿਯੋਜਨਮਤ੍ਤਾ. ਕੁਮਾਰਾ ਚਿਨ੍ਤੇਸੁਂ – ‘‘ਮਹਾ ਅਯਂ ਬਲਕਾਯੋ, ਸਚੇ ਮਯਂ ਕਞ੍ਚਿ ਸਾਮਨ੍ਤਰਾਜਾਨਂ ਅਕ੍ਕਮਿਤ੍ਵਾ ਜਨਪਦਂ ਗਣ੍ਹਿਸ੍ਸਾਮ, ਸੋਪਿ ਨੋ ਨ ਪਹੋਸ੍ਸਤਿ, ਕਿਂ ਪਰੇਸਂ ਪੀਲ਼ਂ ਕਤ੍ਵਾ ਲਦ੍ਧਰਜ੍ਜੇਨ, ਮਹਾ ਜਮ੍ਬੁਦੀਪੋ, ਅਰਞ੍ਞੇ ਨਗਰਂ ਮਾਪੇਸ੍ਸਾਮਾ’’ਤਿ ਹਿਮਵਨ੍ਤਾਭਿਮੁਖਾ ਅਗਮਿਂਸੁ.

ਤਤ੍ਥ ਨਗਰਮਾਪਨੋਕਾਸਂ ਪਰਿਯੇਸਮਾਨਾ ਹਿਮਵਤਿ ਕਪਿਲੋ ਨਾਮ ਘੋਰਤਪੋ ਤਾਪਸੋ ਪਟਿਵਸਤਿ ਪੋਕ੍ਖਰਣਿਤੀਰੇ ਮਹਾਸਾਕਸਣ੍ਡੇ, ਤਸ੍ਸ ਵਸਨੋਕਾਸਂ ਗਤਾ. ਸੋ ਤੇ ਦਿਸ੍ਵਾ ਪੁਚ੍ਛਿਤ੍ਵਾ ਸਬ੍ਬਂ ਪਵਤ੍ਤਿਂ ਸੁਤ੍ਵਾ ਤੇਸੁ ਅਨੁਕਮ੍ਪਂ ਅਕਾਸਿ. ਸੋ ਕਿਰ ਭੁਮ੍ਮਜਾਲਂ ਨਾਮ ਵਿਜ੍ਜਂ ਜਾਨਾਤਿ, ਯਾਯ ਉਦ੍ਧਂ ਅਸੀਤਿਹਤ੍ਥੇ ਆਕਾਸੇ ਚ ਹੇਟ੍ਠਾ ਭੂਮਿਯਞ੍ਚ ਗੁਣਦੋਸੇ ਪਸ੍ਸਤਿ. ਅਥੇਕਸ੍ਮਿਂ ਪਦੇਸੇ ਸੂਕਰਮਿਗਾ ਸੀਹਬ੍ਯਗ੍ਘਾਦਯੋ ਤਾਸੇਤ੍ਵਾ ਪਰਿਪਾਤੇਨ੍ਤਿ, ਮਣ੍ਡੂਕਮੂਸਿਕਾ ਸਪ੍ਪੇ ਭਿਂਸਾਪੇਨ੍ਤਿ. ਸੋ ਤੇ ਦਿਸ੍ਵਾ ‘‘ਅਯਂ ਭੂਮਿਪ੍ਪਦੇਸੋ ਪਥਵੀਅਗ੍ਗ’’ਨ੍ਤਿ ਤਸ੍ਮਿਂ ਪਦੇਸੇ ਅਸ੍ਸਮਂ ਮਾਪੇਸਿ. ਤਤੋ ਸੋ ਰਾਜਕੁਮਾਰੇ ਆਹ – ‘‘ਸਚੇ ਮਮ ਨਾਮੇਨ ਨਗਰਂ ਕਰੋਥ, ਦੇਮਿ ਵੋ ਇਮਂ ਓਕਾਸ’’ਨ੍ਤਿ. ਤੇ ਤਥਾ ਪਟਿਜਾਨਿਂਸੁ. ਤਾਪਸੋ ‘‘ਇਮਸ੍ਮਿਂ ਓਕਾਸੇ ਠਤ੍ਵਾ ਚਣ੍ਡਾਲਪੁਤ੍ਤੋਪਿ ਚਕ੍ਕਵਤ੍ਤਿਂ ਬਲੇਨ ਅਤਿਸੇਤੀ’’ਤਿ ਵਤ੍ਵਾ ‘‘ਅਸ੍ਸਮੇ ਰਞ੍ਞੋ ਘਰਂ ਮਾਪੇਤ੍ਵਾ ਨਗਰਂ ਮਾਪੇਥਾ’’ਤਿ ਤਂ ਓਕਾਸਂ ਦਤ੍ਵਾ ਸਯਂ ਅਵਿਦੂਰੇ ਪਬ੍ਬਤਪਾਦੇ ਅਸ੍ਸਮਂ ਕਤ੍ਵਾ ਵਸਿ. ਤਤੋ ਕੁਮਾਰਾ ਤਤ੍ਥ ਨਗਰਂ ਮਾਪੇਤ੍ਵਾ ਕਪਿਲਸ੍ਸ ਵੁਤ੍ਥੋਕਾਸੇ ਕਤਤ੍ਤਾ ‘‘ਕਪਿਲਵਤ੍ਥੂ’’ਤਿ ਨਾਮਂ ਆਰੋਪੇਤ੍ਵਾ ਤਤ੍ਥ ਨਿਵਾਸਂ ਕਪ੍ਪੇਸੁਂ.

ਅਥ ਅਮਚ੍ਚਾ ‘‘ਇਮੇ ਕੁਮਾਰਾ ਵਯਪ੍ਪਤ੍ਤਾ, ਯਦਿ ਨੇਸਂ ਪਿਤਾ ਸਨ੍ਤਿਕੇ ਭਵੇਯ੍ਯ, ਸੋ ਆਵਾਹਵਿਵਾਹਂ ਕਾਰੇਯ੍ਯ. ਇਦਾਨਿ ਪਨ ਅਮ੍ਹਾਕਂ ਭਾਰੋ’’ਤਿ ਚਿਨ੍ਤੇਤ੍ਵਾ ਕੁਮਾਰੇਹਿ ਸਦ੍ਧਿਂ ਮਨ੍ਤੇਸੁਂ. ਕੁਮਾਰਾ ‘‘ਅਮ੍ਹਾਕਂ ਸਦਿਸਾ ਖਤ੍ਤਿਯਧੀਤਰੋ ਨ ਪਸ੍ਸਾਮ, ਤਾਸਮ੍ਪਿ ਭਗਿਨੀਨਂ ਸਦਿਸੇ ਖਤ੍ਤਿਯਕੁਮਾਰੇ, ਜਾਤਿਸਮ੍ਭੇਦਞ੍ਚ ਨ ਕਰੋਮਾ’’ਤਿ. ਤੇ ਜਾਤਿਸਮ੍ਭੇਦਭਯੇਨ ਜੇਟ੍ਠਭਗਿਨਿਂ ਮਾਤੁਟ੍ਠਾਨੇ ਠਪੇਤ੍ਵਾ ਅਵਸੇਸਾਹਿ ਸਂਵਾਸਂ ਕਪ੍ਪੇਸੁਂ. ਤੇਸਂ ਪਿਤਾ ਤਂ ਪਵਤ੍ਤਿਂ ਸੁਤ੍ਵਾ ‘‘ਸਕ੍ਯਾ ਵਤ, ਭੋ ਕੁਮਾਰਾ, ਪਰਮਸਕ੍ਯਾ ਵਤ, ਭੋ ਕੁਮਾਰਾ’’ਤਿ ਉਦਾਨਂ ਉਦਾਨੇਸਿ. ਅਯਂ ਤਾਵ ਸਕ੍ਯਾਨਂ ਉਪ੍ਪਤ੍ਤਿ. ਵੁਤ੍ਤਮ੍ਪਿ ਚੇਤਂ ਭਗਵਤਾ –

‘‘ਅਥ ਖੋ, ਅਮ੍ਬਟ੍ਠ, ਰਾਜਾ ਓਕ੍ਕਾਕੋ ਅਮਚ੍ਚੇ ਪਾਰਿਸਜ੍ਜੇ ਆਮਨ੍ਤੇਸਿ – ‘ਕਹਂ ਨੁ ਖੋ, ਭੋ, ਏਤਰਹਿ ਕੁਮਾਰਾ ਸਮ੍ਮਨ੍ਤੀ’ਤਿ. ਅਤ੍ਥਿ, ਦੇਵ, ਹਿਮਵਨ੍ਤਪਸ੍ਸੇ ਪੋਕ੍ਖਰਣਿਯਾ ਤੀਰੇ ਮਹਾਸਾਕਸਣ੍ਡੋ, ਤਤ੍ਥੇਤਰਹਿ ਕੁਮਾਰਾ ਸਮ੍ਮਨ੍ਤਿ. ਤੇ ਜਾਤਿਸਮ੍ਭੇਦਭਯਾ ਸਕਾਹਿ ਭਗਿਨੀਹਿ ਸਦ੍ਧਿਂ ਸਂਵਾਸਂ ਕਪ੍ਪੇਨ੍ਤੀਤਿ. ਅਥ ਖੋ, ਅਮ੍ਬਟ੍ਠ, ਰਾਜਾ ਓਕ੍ਕਾਕੋ ਉਦਾਨਂ ਉਦਾਨੇਸਿ – ‘ਸਕ੍ਯਾ ਵਤ, ਭੋ ਕੁਮਾਰਾ, ਪਰਮਸਕ੍ਯਾ ਵਤ, ਭੋ ਕੁਮਾਰਾ’ਤਿ, ਤਦਗ੍ਗੇ ਖੋ ਪਨ, ਅਮ੍ਬਟ੍ਠ, ਸਕ੍ਯਾ ਪਞ੍ਞਾਯਨ੍ਤਿ, ਸੋ ਚ ਸਕ੍ਯਾਨਂ ਪੁਬ੍ਬਪੁਰਿਸੋ’’ਤਿ (ਦੀ. ਨਿ. ੧.੨੬੭).

ਤਤੋ ਨੇਸਂ ਜੇਟ੍ਠਭਗਿਨਿਯਾ ਕੁਟ੍ਠਰੋਗੋ ਉਦਪਾਦਿ, ਕੋਵਿਲ਼ਾਰਪੁਪ੍ਫਸਦਿਸਾਨਿ ਗਤ੍ਤਾਨਿ ਅਹੇਸੁਂ. ਰਾਜਕੁਮਾਰਾ ‘‘ਇਮਾਯ ਸਦ੍ਧਿਂ ਏਕਤੋ ਨਿਸਜ੍ਜਟ੍ਠਾਨਭੋਜਨਾਦੀਨਿ ਕਰੋਨ੍ਤਾਨਮ੍ਪਿ ਉਪਰਿ ਏਸ ਰੋਗੋ ਸਙ੍ਕਮਤੀ’’ਤਿ ਚਿਨ੍ਤੇਤ੍ਵਾ ਉਯ੍ਯਾਨਕੀਲ਼ਂ ਗਚ੍ਛਨ੍ਤਾ ਵਿਯ ਤਂ ਯਾਨੇ ਆਰੋਪੇਤ੍ਵਾ ਅਰਞ੍ਞਂ ਪਵਿਸਿਤ੍ਵਾ ਪੋਕ੍ਖਰਣਿਂ ਖਣਾਪੇਤ੍ਵਾ ਤਂ ਤਤ੍ਥ ਖਾਦਨੀਯਭੋਜਨੀਯੇਹਿ ਸਦ੍ਧਿਂ ਪਕ੍ਖਿਪਿਤ੍ਵਾ ਉਪਰਿ ਪਦਰਂ ਪਟਿਚ੍ਛਾਦਾਪੇਤ੍ਵਾ ਪਂਸੁਂ ਦਤ੍ਵਾ ਪਕ੍ਕਮਿਂਸੁ. ਤੇਨ ਚ ਸਮਯੇਨ ਰਾਮੋ ਨਾਮ ਰਾਜਾ ਕੁਟ੍ਠਰੋਗੀ ਓਰੋਧੇਹਿ ਚ ਨਾਟਕੇਹਿ ਚ ਜਿਗੁਚ੍ਛਿਯਮਾਨੋ ਤੇਨ ਸਂਵੇਗੇਨ ਜੇਟ੍ਠਪੁਤ੍ਤਸ੍ਸ ਰਜ੍ਜਂ ਦਤ੍ਵਾ ਅਰਞ੍ਞਂ ਪਵਿਸਿਤ੍ਵਾ ਤਤ੍ਥ ਪਣ੍ਣਮੂਲਫਲਾਨਿ ਪਰਿਭੁਞ੍ਜਨ੍ਤੋ ਨਚਿਰਸ੍ਸੇਵ ਅਰੋਗੋ ਸੁਵਣ੍ਣਵਣ੍ਣੋ ਹੁਤ੍ਵਾ, ਇਤੋ ਚਿਤੋ ਚ ਵਿਚਰਨ੍ਤੋ ਮਹਨ੍ਤਂ ਸੁਸਿਰਰੁਕ੍ਖਂ ਦਿਸ੍ਵਾ ਤਸ੍ਸਬ੍ਭਨ੍ਤਰੇ ਸੋਲ਼ਸਹਤ੍ਥਪ੍ਪਮਾਣਂ ਤਂ ਕੋਲਾਪਂ ਸੋਧੇਤ੍ਵਾ, ਦ੍ਵਾਰਞ੍ਚ ਵਾਤਪਾਨਞ੍ਚ ਕਤ੍ਵਾ ਨਿਸ੍ਸੇਣਿਂ ਬਨ੍ਧਿਤ੍ਵਾ ਤਤ੍ਥ ਵਾਸਂ ਕਪ੍ਪੇਸਿ. ਸੋ ਅਙ੍ਗਾਰਕਟਾਹੇ ਅਗ੍ਗਿਂ ਕਤ੍ਵਾ ਰਤ੍ਤਿਂ ਵਿਸ੍ਸਰਞ੍ਚ ਸੁਸ੍ਸਰਞ੍ਚ ਸੁਣਨ੍ਤੋ ਸਯਤਿ. ਸੋ ‘‘ਅਸੁਕਸ੍ਮਿਂ ਪਦੇਸੇ ਸੀਹੋ ਸਦ੍ਦਮਕਾਸਿ, ਅਸੁਕਸ੍ਮਿਂ ਬ੍ਯਗ੍ਘੋ’’ਤਿ ਸਲ੍ਲਕ੍ਖੇਤ੍ਵਾ ਪਭਾਤੇ ਤਤ੍ਥ ਗਨ੍ਤ੍ਵਾ ਵਿਘਾਸਮਂਸਂ ਆਦਾਯ ਪਚਿਤ੍ਵਾ ਖਾਦਤਿ.

ਅਥੇਕਦਿਵਸਂ ਸੋ ਪਚ੍ਚੂਸਸਮਯੇ ਅਗ੍ਗਿਂ ਜਾਲੇਤ੍ਵਾ ਨਿਸੀਦਿ. ਤੇਨ ਚ ਸਮਯੇਨ ਤਸ੍ਸਾ ਰਾਜਧੀਤਾਯ ਗਨ੍ਧਂ ਘਾਯਿਤ੍ਵਾ ਬ੍ਯਗ੍ਘੋ ਤਂ ਪਦੇਸਂ ਖਣਿਤ੍ਵਾ ਪਦਰਤ੍ਥਰੇ ਵਿਵਰਮਕਾਸਿ. ਤੇਨ ਵਿਵਰੇਨ ਸਾ ਬ੍ਯਗ੍ਘਂ ਦਿਸ੍ਵਾ ਭੀਤਾ ਵਿਸ੍ਸਰਮਕਾਸਿ. ਸੋ ਤਂ ਸਦ੍ਦਂ ਸੁਤ੍ਵਾ ‘‘ਇਤ੍ਥਿਸਦ੍ਦੋ ਏਸੋ’’ਤਿ ਚ ਸਲ੍ਲਕ੍ਖੇਤ੍ਵਾ ਪਾਤੋਵ ਤਤ੍ਥ ਗਨ੍ਤ੍ਵਾ ‘‘ਕੋ ਏਤ੍ਥਾ’’ਤਿ ਆਹ. ‘‘ਮਾਤੁਗਾਮੋ ਸਾਮੀ’’ਤਿ. ‘‘ਨਿਕ੍ਖਮਾ’’ਤਿ. ‘‘ਨ ਨਿਕ੍ਖਮਾਮੀ’’ਤਿ. ‘‘ਕਿਂ ਕਾਰਣਾ’’ਤਿ? ‘‘ਖਤ੍ਤਿਯਕਞ੍ਞਾ ਅਹ’’ਨ੍ਤਿ. ਏਵਂ ਸੋਬ੍ਭੇ ਨਿਖਾਤਾਪਿ ਮਾਨਮੇਵ ਕਰੋਤਿ. ਸੋ ਸਬ੍ਬਂ ਪੁਚ੍ਛਿਤ੍ਵਾ ‘‘ਅਹਮ੍ਪਿ ਖਤ੍ਤਿਯੋ’’ਤਿ ਜਾਤਿਂ ਆਚਿਕ੍ਖਿਤ੍ਵਾ ‘‘ਏਹਿ ਦਾਨਿ ਖੀਰੇ ਪਕ੍ਖਿਤ੍ਤਸਪ੍ਪਿ ਵਿਯ ਜਾਤ’’ਨ੍ਤਿ ਆਹ. ਸਾ ‘‘ਕੁਟ੍ਠਰੋਗਿਨੀਮ੍ਹਿ ਸਾਮਿ, ਨ ਸਕ੍ਕਾ ਨਿਕ੍ਖਮਿਤੁ’’ਨ੍ਤਿ ਆਹ. ਸੋ ‘‘ਕਤਕਮ੍ਮੋ ਦਾਨਿ ਅਹਂ ਸਕ੍ਕਾ ਤਿਕਿਚ੍ਛਿਤੁ’’ਨ੍ਤਿ ਨਿਸ੍ਸੇਣਿਂ ਦਤ੍ਵਾ ਤਂ ਉਦ੍ਧਰਿਤ੍ਵਾ ਅਤ੍ਤਨੋ ਵਸਨੋਕਾਸਂ ਨੇਤ੍ਵਾ ਸਯਂ ਪਰਿਭੁਤ੍ਤਭੇਸਜ੍ਜਾਨਿ ਏਵ ਦਤ੍ਵਾ ਨਚਿਰਸ੍ਸੇਵ ਅਰੋਗਂ ਸੁਵਣ੍ਣਵਣ੍ਣਮਕਾਸਿ. ਸੋ ਤਾਯ ਸਦ੍ਧਿਂ ਸਂਵਾਸਂ ਕਪ੍ਪੇਸਿ. ਸਾ ਪਠਮਸਂਵਾਸੇਨੇਵ ਗਬ੍ਭਂ ਗਣ੍ਹਿਤ੍ਵਾ ਦ੍ਵੇ ਪੁਤ੍ਤੇ ਵਿਜਾਯਿ, ਪੁਨਪਿ ਦ੍ਵੇਤਿ ਏਵਂ ਸੋਲ਼ਸਕ੍ਖਤ੍ਤੁਂ ਵਿਜਾਯਿ. ਏਵਂ ਤੇ ਦ੍ਵਤ੍ਤਿਂਸ ਭਾਤਰੋ ਅਹੇਸੁਂ. ਤੇ ਅਨੁਪੁਬ੍ਬੇਨ ਵੁਡ੍ਢਿਪ੍ਪਤ੍ਤੇ ਪਿਤਾ ਸਬ੍ਬਸਿਪ੍ਪਾਨਿ ਸਿਕ੍ਖਾਪੇਸਿ.

ਅਥੇਕਦਿਵਸਂ ਏਕੋ ਰਾਮਰਞ੍ਞੋ ਨਗਰਵਾਸੀ ਪਬ੍ਬਤੇ ਰਤਨਾਨਿ ਗਵੇਸਨ੍ਤੋ ਤਂ ਪਦੇਸਂ ਆਗਤੋ ਰਾਜਾਨਂ ਦਿਸ੍ਵਾ ਅਞ੍ਞਾਸਿ. ‘‘ਜਾਨਾਮਹਂ, ਦੇਵ, ਤੁਮ੍ਹੇ’’ਤਿ ਆਹ. ‘‘ਕੁਤੋ ਤ੍ਵਂ ਆਗਤੋਸੀ’’ਤਿ ਚ ਤੇਨ ਪੁਟ੍ਠੋ ‘‘ਨਗਰਤੋ ਦੇਵਾ’’ਤਿ ਆਹ. ਤਤੋ ਨਂ ਰਾਜਾ ਸਬ੍ਬਂ ਪਵਤ੍ਤਿਂ ਪੁਚ੍ਛਿ. ਏਵਂ ਤੇਸੁ ਸਮੁਲ੍ਲਪਮਾਨੇਸੁ ਤੇ ਦਾਰਕਾ ਆਗਮਿਂਸੁ. ਸੋ ਤੇ ਦਿਸ੍ਵਾ ‘‘ਇਮੇ ਕੇ ਦੇਵਾ’’ਤਿ ਪੁਚ੍ਛਿ. ‘‘ਪੁਤ੍ਤਾ ਮੇ ਭਣੇ’’ਤਿ. ‘‘ਇਮੇਹਿ ਦਾਨਿ, ਦੇਵ, ਦ੍ਵਤ੍ਤਿਂਸਕੁਮਾਰੇਹਿ ਪਰਿਵੁਤੋ ਵਨੇ ਕਿਂ ਕਰਿਸ੍ਸਸਿ, ਏਹਿ ਰਜ੍ਜਮਨੁਸਾਸਾ’’ਤਿ? ‘‘ਅਲਂ, ਭਣੇ, ਇਧੇਵ ਸੁਖ’’ਨ੍ਤਿ. ਸੋ ‘‘ਲਦ੍ਧਂ ਦਾਨਿ ਮੇ ਕਥਾਪਾਭਤ’’ਨ੍ਤਿ ਨਗਰਂ ਗਨ੍ਤ੍ਵਾ ਰਞ੍ਞੋ ਪੁਤ੍ਤਸ੍ਸਾਰੋਚੇਸਿ. ਰਞ੍ਞੋ ਪੁਤ੍ਤੋ ‘‘ਪਿਤਰਂ ਆਨੇਸ੍ਸਾਮੀ’’ਤਿ ਚਤੁਰਙ੍ਗਿਨਿਯਾ ਸੇਨਾਯ ਤਤ੍ਥ ਗਨ੍ਤ੍ਵਾ ਨਾਨਪ੍ਪਕਾਰੇਹਿ ਪਿਤਰਂ ਯਾਚਿ. ਸੋਪਿ ‘‘ਅਲਂ, ਤਾਤ ਕੁਮਾਰ, ਇਧੇਵ ਸੁਖ’’ਨ੍ਤਿ ਨੇਵ ਇਚ੍ਛਿ. ਤਤੋ ਰਾਜਪੁਤ੍ਤੋ ‘‘ਨ ਦਾਨਿ ਰਾਜਾ ਆਗਨ੍ਤੁਂ ਇਚ੍ਛਤਿ, ਹਨ੍ਦਸ੍ਸ ਇਧੇਵ ਨਗਰਂ ਮਾਪੇਮੀ’’ਤਿ ਚਿਨ੍ਤੇਤ੍ਵਾ ਤਂ ਕੋਲਰੁਕ੍ਖਂ ਉਦ੍ਧਰਿਤ੍ਵਾ ਘਰਂ ਕਤ੍ਵਾ ਨਗਰਂ ਮਾਪੇਤ੍ਵਾ ਕੋਲਰੁਕ੍ਖਂ ਅਪਨੇਤ੍ਵਾ ਕਤਤ੍ਤਾ ‘‘ਕੋਲਨਗਰ’’ਨ੍ਤਿ ਚ ਬ੍ਯਗ੍ਘਪਥੇ ਕਤਤ੍ਤਾ ‘‘ਬ੍ਯਗ੍ਘਪਜ੍ਜ’’ਨ੍ਤਿ ਚਾਤਿ ਦ੍ਵੇ ਨਾਮਾਨਿ ਆਰੋਪੇਤ੍ਵਾ ਅਗਮਾਸਿ.

ਤਤੋ ਵਯਪ੍ਪਤ੍ਤੇ ਕੁਮਾਰੇ ਮਾਤਾ ਆਣਾਪੇਸਿ – ‘‘ਤਾਤਾ, ਤੁਮ੍ਹਾਕਂ ਕਪਿਲਵਤ੍ਥੁਵਾਸਿਨੋ ਸਕ੍ਯਾ ਮਾਤੁਲਾ ਹੋਨ੍ਤਿ, ਧੀਤਰੋ ਨੇਸਂ ਗਣ੍ਹਥਾ’’ਤਿ. ਤੇ ਯਂ ਦਿਵਸਂ ਖਤ੍ਤਿਯਕਞ੍ਞਾਯੋ ਨਦੀਕੀਲ਼ਨਂ ਗਚ੍ਛਨ੍ਤਿ, ਤਂ ਦਿਵਸਂ ਗਨ੍ਤ੍ਵਾ ਨਦੀਤਿਤ੍ਥਂ ਉਪਰੁਨ੍ਧਿਤ੍ਵਾ ਨਾਮਾਨਿ ਸਾਵੇਤ੍ਵਾ ਪਤ੍ਥਿਤਾ ਪਤ੍ਥਿਤਾ ਰਾਜਧੀਤਰੋ ਗਹੇਤ੍ਵਾ ਅਗਮਂਸੁ. ਸਕ੍ਯਰਾਜਾਨੋ ਸੁਤ੍ਵਾ ‘‘ਹੋਤੁ ਭਣੇ, ਅਮ੍ਹਾਕਂ ਞਾਤਕਾ ਏਵਾ’’ਤਿ ਤੁਣ੍ਹੀ ਅਹੇਸੁਂ. ਅਯਂ ਕੋਲਿਯਾਨਂ ਉਪ੍ਪਤ੍ਤਿ.

ਏਵਂ ਤੇਸਂ ਸਾਕਿਯਕੋਲਿਯਾਨਂ ਅਞ੍ਞਮਞ੍ਞਂ ਆਵਾਹਵਿਵਾਹਂ ਕਰੋਨ੍ਤਾਨਂ ਆਗਤੋ ਵਂਸੋ ਯਾਵ ਸੀਹਹਨੁਰਾਜਾ, ਤਾਵ ਵਿਤ੍ਥਾਰਤੋ ਵੇਦਿਤਬ੍ਬੋ – ਸੀਹਹਨੁਰਞ੍ਞੋ ਕਿਰ ਪਞ੍ਚ ਪੁਤ੍ਤਾ ਅਹੇਸੁਂ – ਸੁਦ੍ਧੋਦਨੋ, ਅਮਿਤੋਦਨੋ, ਧੋਤੋਦਨੋ, ਸਕ੍ਕੋਦਨੋ, ਸੁਕ੍ਕੋਦਨੋਤਿ. ਤੇਸੁ ਸੁਦ੍ਧੋਦਨੇ ਰਜ੍ਜਂ ਕਾਰਯਮਾਨੇ ਤਸ੍ਸ ਪਜਾਪਤਿਯਾ ਅਞ੍ਜਨਰਞ੍ਞੋ ਧੀਤਾਯ ਮਹਾਮਾਯਾਦੇਵਿਯਾ ਕੁਚ੍ਛਿਮ੍ਹਿ ਪੂਰਿਤਪਾਰਮੀ ਮਹਾਪੁਰਿਸੋ ਜਾਤਕਨਿਦਾਨੇ ਵੁਤ੍ਤਨਯੇਨ ਤੁਸਿਤਪੁਰਾ ਚਵਿਤ੍ਵਾ ਪਟਿਸਨ੍ਧਿਂ ਗਹੇਤ੍ਵਾ ਅਨੁਪੁਬ੍ਬੇਨ ਕਤਮਹਾਭਿਨਿਕ੍ਖਮਨੋ ਸਮ੍ਮਾਸਮ੍ਬੋਧਿਂ ਅਭਿਸਮ੍ਬੁਜ੍ਝਿਤ੍ਵਾ ਪਵਤ੍ਤਿਤਵਰਧਮ੍ਮਚਕ੍ਕੋ ਅਨੁਕ੍ਕਮੇਨ ਕਪਿਲਵਤ੍ਥੁਂ ਗਨ੍ਤ੍ਵਾ ਸੁਦ੍ਧੋਦਨਮਹਾਰਾਜਾਦਯੋ ਅਰਿਯਫਲੇ ਪਤਿਟ੍ਠਾਪੇਤ੍ਵਾ ਜਨਪਦਚਾਰਿਕਂ ਪਕ੍ਕਮਿਤ੍ਵਾ ਪੁਨਪਿ ਅਪਰੇਨ ਸਮਯੇਨ ਪਚ੍ਚਾਗਨ੍ਤ੍ਵਾ ਪਨ੍ਨਰਸਹਿ ਭਿਕ੍ਖੁਸਤੇਹਿ ਸਦ੍ਧਿਂ ਕਪਿਲਵਤ੍ਥੁਸ੍ਮਿਂ ਵਿਹਰਤਿ ਨਿਗ੍ਰੋਧਾਰਾਮੇ.

ਤਤ੍ਥ ਵਿਹਰਨ੍ਤੇ ਚ ਭਗਵਤਿ ਸਾਕਿਯਕੋਲਿਯਾਨਂ ਉਦਕਂ ਪਟਿਚ੍ਚ ਕਲਹੋ ਅਹੋਸਿ. ਕਥਂ? ਨੇਸਂ ਕਿਰ ਉਭਿਨ੍ਨਮ੍ਪਿ ਕਪਿਲਪੁਰਕੋਲਿਯਪੁਰਾਨਂ ਅਨ੍ਤਰੇ ਰੋਹਿਣੀ ਨਾਮ ਨਦੀ ਪਵਤ੍ਤਤਿ. ਸਾ ਕਦਾਚਿ ਅਪ੍ਪੋਦਕਾ ਹੋਤਿ, ਕਦਾਚਿ ਮਹੋਦਕਾ. ਅਪ੍ਪੋਦਕਕਾਲੇ ਸੇਤੁਂ ਕਤ੍ਵਾ ਸਾਕਿਯਾਪਿ ਕੋਲਿਯਾਪਿ ਅਤ੍ਤਨੋ ਅਤ੍ਤਨੋ ਸਸ੍ਸਪਾਯਨਤ੍ਥਂ ਉਦਕਂ ਆਨੇਨ੍ਤਿ. ਤੇਸਂ ਮਨੁਸ੍ਸਾ ਏਕਦਿਵਸਂ ਸੇਤੁਂ ਕਰੋਨ੍ਤਾ ਅਞ੍ਞਮਞ੍ਞਂ ਭਣ੍ਡਨ੍ਤਾ ‘‘ਅਰੇ ਤੁਮ੍ਹਾਕਂ ਰਾਜਕੁਲਂ ਭਗਿਨੀਹਿ ਸਦ੍ਧਿਂ ਸਂਵਾਸਂ ਕਪ੍ਪੇਸਿ ਕੁਕ੍ਕੁਟਸੋਣਸਿਙ੍ਗਾਲਾਦਿਤਿਰਚ੍ਛਾਨਾ ਵਿਯ, ਤੁਮ੍ਹਾਕਂ ਰਾਜਕੁਲਂ ਸੁਸਿਰਰੁਕ੍ਖੇ ਵਾਸਂ ਕਪ੍ਪੇਸਿ ਪਿਸਾਚਿਲ੍ਲਿਕਾ ਵਿਯਾ’’ਤਿ ਏਵਂ ਜਾਤਿਵਾਦੇਨ ਖੁਂਸੇਤ੍ਵਾ ਅਤ੍ਤਨੋ ਅਤ੍ਤਨੋ ਰਾਜੂਨਂ ਆਰੋਚੇਸੁਂ. ਤੇ ਕੁਦ੍ਧਾ ਯੁਦ੍ਧਸਜ੍ਜਾ ਹੁਤ੍ਵਾ ਰੋਹਿਣੀਨਦੀਤੀਰਂ ਸਮ੍ਪਤ੍ਤਾ. ਏਵਂ ਸਾਗਰਸਦਿਸਂ ਬਲਂ ਅਟ੍ਠਾਸਿ.

ਅਥ ਭਗਵਾ ‘‘ਞਾਤਕਾ ਕਲਹਂ ਕਰੋਨ੍ਤਿ, ਹਨ੍ਦ, ਨੇ ਵਾਰੇਸ੍ਸਾਮੀ’’ਤਿ ਆਕਾਸੇਨਾਗਨ੍ਤ੍ਵਾ ਦ੍ਵਿਨ੍ਨਂ ਸੇਨਾਨਂ ਮਜ੍ਝੇ ਅਟ੍ਠਾਸਿ. ਤਮ੍ਪਿ ਆਵਜ੍ਜੇਤ੍ਵਾ ਸਾਵਤ੍ਥਿਤੋ ਆਗਤੋਤਿ ਏਕੇ. ਏਵਂ ਠਤ੍ਵਾ ਚ ਪਨ ਅਤ੍ਤਦਣ੍ਡਸੁਤ੍ਤਂ (ਸੁ. ਨਿ. ੯੪੧ ਆਦਯੋ) ਅਭਾਸਿ. ਤਂ ਸੁਤ੍ਵਾ ਸਬ੍ਬੇ ਸਂਵੇਗਪ੍ਪਤ੍ਤਾ ਆਵੁਧਾਨਿ ਛਡ੍ਡੇਤ੍ਵਾ ਭਗਵਨ੍ਤਂ ਨਮਸ੍ਸਮਾਨਾ ਅਟ੍ਠਂਸੁ, ਮਹਗ੍ਘਞ੍ਚ ਆਸਨਂ ਪਞ੍ਞਾਪੇਸੁਂ. ਭਗਵਾ ਓਰੁਯ੍ਹ ਪਞ੍ਞਤ੍ਤਾਸਨੇ ਨਿਸੀਦਿਤ੍ਵਾ ‘‘ਕੁਠਾਰੀਹਤ੍ਥੋ ਪੁਰਿਸੋ’’ਤਿਆਦਿਕਂ ਫਨ੍ਦਨਜਾਤਕਂ (ਜਾ. ੧.੧੩.੧੪), ‘‘ਵਨ੍ਦਾਮਿ ਤਂ ਕੁਞ੍ਜਰਾ’’ਤਿਆਦਿਕਂ ਲਟੁਕਿਕਜਾਤਕਂ (ਜਾ. ੧.੫.੩੯).

‘‘ਸਮ੍ਮੋਦਮਾਨਾ ਗਚ੍ਛਨ੍ਤਿ, ਜਾਲਮਾਦਾਯ ਪਕ੍ਖਿਨੋ;

ਯਦਾ ਤੇ ਵਿਵਦਿਸ੍ਸਨ੍ਤਿ, ਤਦਾ ਏਹਿਨ੍ਤਿ ਮੇ ਵਸ’’ਨ੍ਤਿ. (ਜਾ. ੧.੧.੩੩) –

ਇਮਂ ਵਟ੍ਟਕਜਾਤਕਞ੍ਚ ਕਥੇਤ੍ਵਾ ਪੁਨ ਤੇਸਂ ਚਿਰਕਾਲਪ੍ਪਵਤ੍ਤਂ ਞਾਤਿਭਾਵਂ ਦਸ੍ਸੇਨ੍ਤੋ ਇਮਂ ਮਹਾਵਂਸਂ ਕਥੇਸਿ. ਤੇ ‘‘ਪੁਬ੍ਬੇ ਕਿਰ ਮਯਂ ਞਾਤਕਾ ਏਵਾ’’ਤਿ ਅਤਿਵਿਯ ਪਸੀਦਿਂਸੁ. ਤਤੋ ਸਕ੍ਯਾ ਅਡ੍ਢਤੇਯ੍ਯਕੁਮਾਰਸਤੇ, ਕੋਲਿਯਾ ਅਡ੍ਢਤੇਯ੍ਯਕੁਮਾਰਸਤੇਤਿ ਪਞ੍ਚ ਕੁਮਾਰਸਤੇ ਭਗਵਤੋ ਪਰਿਵਾਰਤ੍ਥਾਯ ਅਦਂਸੁ. ਭਗਵਾ ਤੇਸਂ ਪੁਬ੍ਬਹੇਤੁਂ ਦਿਸ੍ਵਾ ‘‘ਏਥ ਭਿਕ੍ਖਵੋ’’ਤਿ ਆਹ. ਤੇ ਸਬ੍ਬੇ ਇਦ੍ਧਿਯਾ ਨਿਬ੍ਬਤ੍ਤਅਟ੍ਠਪਰਿਕ੍ਖਾਰਯੁਤ੍ਤਾ ਆਕਾਸੇ ਅਬ੍ਭੁਗ੍ਗਨ੍ਤ੍ਵਾ ਆਗਮ੍ਮ ਭਗਵਨ੍ਤਂ ਵਨ੍ਦਿਤ੍ਵਾ ਅਟ੍ਠਂਸੁ. ਭਗਵਾ ਤੇ ਆਦਾਯ ਮਹਾਵਨਂ ਅਗਮਾਸਿ. ਤੇਸਂ ਪਜਾਪਤਿਯੋ ਦੂਤੇ ਪਾਹੇਸੁਂ, ਤੇ ਤਾਹਿ ਨਾਨਪ੍ਪਕਾਰੇਹਿ ਪਲੋਭਿਯਮਾਨਾ ਉਕ੍ਕਣ੍ਠਿਂਸੁ. ਭਗਵਾ ਤੇਸਂ ਉਕ੍ਕਣ੍ਠਿਤਭਾਵਂ ਞਤ੍ਵਾ ਹਿਮਵਨ੍ਤਂ ਦਸ੍ਸੇਤ੍ਵਾ ਤਤ੍ਥ ਕੁਣਾਲਜਾਤਕਕਥਾਯ (ਜਾ. ੨.੨੧.੨੮੯ ਕੁਣਾਲਜਾਤਕਂ) ਤੇਸਂ ਅਨਭਿਰਤਿਂ ਵਿਨੋਦੇਤੁਕਾਮੋ ਆਹ – ‘‘ਦਿਟ੍ਠਪੁਬ੍ਬੋ ਵੋ, ਭਿਕ੍ਖਵੇ, ਹਿਮਵਾ’’ਤਿ? ‘‘ਨ ਭਗਵਾ’’ਤਿ. ‘‘ਏਥ, ਭਿਕ੍ਖਵੇ, ਪੇਕ੍ਖਥਾ’’ਤਿ ਅਤ੍ਤਨੋ ਇਦ੍ਧਿਯਾ ਤੇ ਆਕਾਸੇਨ ਨੇਨ੍ਤੋ ‘‘ਅਯਂ ਸੁਵਣ੍ਣਪਬ੍ਬਤੋ, ਅਯਂ ਰਜਤਪਬ੍ਬਤੋ, ਅਯਂ ਮਣਿਪਬ੍ਬਤੋ’’ਤਿ ਨਾਨਪ੍ਪਕਾਰੇ ਪਬ੍ਬਤੇ ਦਸ੍ਸੇਤ੍ਵਾ ਕੁਣਾਲਦਹੇ ਮਨੋਸਿਲਾਤਲੇ ਪਚ੍ਚੁਟ੍ਠਾਸਿ. ਤਤੋ ‘‘ਹਿਮਵਨ੍ਤੇ ਸਬ੍ਬੇ ਚਤੁਪ੍ਪਦਬਹੁਪ੍ਪਦਾਦਿਭੇਦਾ ਤਿਰਚ੍ਛਾਨਗਤਾ ਪਾਣਾ ਆਗਚ੍ਛਨ੍ਤੁ, ਸਬ੍ਬੇਸਞ੍ਚ ਪਚ੍ਛਤੋ ਕੁਣਾਲਸਕੁਣੋ’’ਤਿ ਅਧਿਟ੍ਠਾਸਿ. ਆਗਚ੍ਛਨ੍ਤੇ ਚ ਤੇ ਜਾਤਿਨਾਮਨਿਰੁਤ੍ਤਿਵਸੇਨ ਵਣ੍ਣੇਨ੍ਤੋ ‘‘ਏਤੇ, ਭਿਕ੍ਖਵੇ, ਹਂਸਾ, ਏਤੇ ਕੋਞ੍ਚਾ, ਏਤੇ ਚਕ੍ਕਵਾਕਾ, ਕਰਵੀਕਾ, ਹਤ੍ਥਿਸੋਣ੍ਡਕਾ, ਪੋਕ੍ਖਰਸਾਤਕਾ’’ਤਿ ਤੇਸਂ ਦਸ੍ਸੇਸਿ.

ਤੇ ਵਿਮ੍ਹਿਤਹਦਯਾ ਪਸ੍ਸਨ੍ਤਾ ਸਬ੍ਬਪਚ੍ਛਤੋ ਆਗਚ੍ਛਨ੍ਤਂ ਦ੍ਵੀਹਿ ਦਿਜਕਞ੍ਞਾਹਿ ਮੁਖਤੁਣ੍ਡਕੇਨ ਡਂਸਿਤ੍ਵਾ ਗਹਿਤਕਟ੍ਠਵੇਮਜ੍ਝੇ ਨਿਸਿਨ੍ਨਂ ਸਹਸ੍ਸਦਿਜਕਞ੍ਞਾਪਰਿਵਾਰਂ ਕੁਣਾਲਸਕੁਣਂ ਦਿਸ੍ਵਾ ਅਚ੍ਛਰਿਯਬ੍ਭੁਤਚਿਤ੍ਤਜਾਤਾ ਭਗਵਨ੍ਤਂ ਆਹਂਸੁ – ‘‘ਕਚ੍ਚਿ, ਭਨ੍ਤੇ, ਭਗਵਾਪਿ ਇਧ ਕੁਣਾਲਰਾਜਾ ਭੂਤਪੁਬ੍ਬੋ’’ਤਿ? ‘‘ਆਮ, ਭਿਕ੍ਖਵੇ, ਮਯਾਵੇਸ ਕੁਣਾਲਵਂਸੋ ਕਤੋ. ਅਤੀਤੇ ਹਿ ਮਯਂ ਚਤ੍ਤਾਰੋ ਜਨਾ ਇਧ ਵਸਿਮ੍ਹਾ – ਨਾਰਦੋ ਦੇਵਿਲੋ ਇਸਿ, ਆਨਨ੍ਦੋ ਗਿਜ੍ਝਰਾਜਾ, ਪੁਣ੍ਣਮੁਖੋ ਫੁਸ੍ਸਕੋਕਿਲੋ, ਅਹਂ ਕੁਣਾਲੋ ਸਕੁਣੋ’’ਤਿ ਸਬ੍ਬਂ ਮਹਾਕੁਣਾਲਜਾਤਕਂ ਕਥੇਸਿ. ਤਂ ਸੁਤ੍ਵਾ ਤੇਸਂ ਭਿਕ੍ਖੂਨਂ ਪੁਰਾਣਦੁਤਿਯਿਕਾਯੋ ਆਰਬ੍ਭ ਉਪ੍ਪਨ੍ਨਾ ਅਨਭਿਰਤਿ ਵੂਪਸਨ੍ਤਾ. ਤਤੋ ਤੇਸਂ ਭਗਵਾ ਸਚ੍ਚਕਥਂ ਕਥੇਸਿ, ਕਥਾਪਰਿਯੋਸਾਨੇ ਸਬ੍ਬਪਚ੍ਛਿਮਕੋ ਸੋਤਾਪਨ੍ਨੋ, ਸਬ੍ਬਉਪਰਿਮੋ ਅਨਾਗਾਮੀ ਅਹੋਸਿ, ਏਕੋਪਿ ਪੁਥੁਜ੍ਜਨੋ ਵਾ ਅਰਹਾ ਵਾ ਨਤ੍ਥਿ. ਤਤੋ ਭਗਵਾ ਤੇ ਆਦਾਯ ਪੁਨਦੇਵ ਮਹਾਵਨੇ ਓਰੁਹਿ. ਆਗਚ੍ਛਮਾਨਾ ਚ ਤੇ ਭਿਕ੍ਖੂ ਅਤ੍ਤਨੋਵ ਇਦ੍ਧਿਯਾ ਆਗਚ੍ਛਿਂਸੁ.

ਅਥ ਨੇਸਂ ਭਗਵਾ ਉਪਰਿਮਗ੍ਗਤ੍ਥਾਯ ਪੁਨ ਧਮ੍ਮਂ ਦੇਸੇਸਿ. ਤੇ ਪਞ੍ਚਸਤਾਪਿ ਵਿਪਸ੍ਸਨਂ ਆਰਭਿਤ੍ਵਾ ਅਰਹਤ੍ਤੇ ਪਤਿਟ੍ਠਹਿਂਸੁ. ਪਠਮਂ ਪਤ੍ਤੋ ਪਠਮਮੇਵ ਅਗਮਾਸਿ ‘‘ਭਗਵਤੋ ਆਰੋਚੇਸ੍ਸਾਮੀ’’ਤਿ. ਆਗਨ੍ਤ੍ਵਾ ਚ ‘‘ਅਭਿਰਮਾਮਹਂ ਭਗਵਾ, ਨ ਉਕ੍ਕਣ੍ਠਾਮੀ’’ਤਿ ਵਤ੍ਵਾ ਭਗਵਨ੍ਤਂ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸੀਦਿ. ਏਵਂ ਤੇ ਸਬ੍ਬੇਪਿ ਅਨੁਕ੍ਕਮੇਨ ਆਗਨ੍ਤ੍ਵਾ ਭਗਵਨ੍ਤਂ ਪਰਿਵਾਰੇਤ੍ਵਾ ਨਿਸੀਦਿਂਸੁ ਜੇਟ੍ਠਮਾਸਉਪੋਸਥਦਿਵਸੇ ਸਾਯਨ੍ਹਸਮਯੇ. ਤਤੋ ਪਞ੍ਚਸਤਖੀਣਾਸਵਪਰਿਵੁਤਂ ਵਰਬੁਦ੍ਧਾਸਨੇ ਨਿਸਿਨ੍ਨਂ ਭਗਵਨ੍ਤਂ ਠਪੇਤ੍ਵਾ ਅਸਞ੍ਞਸਤ੍ਤੇ ਚ ਅਰੂਪਬ੍ਰਹ੍ਮਾਨੋ ਚ ਸਕਲਦਸਸਹਸ੍ਸਚਕ੍ਕਵਾਲ਼ੇ ਅਵਸੇਸਦੇਵਤਾਦਯੋ ਮਙ੍ਗਲਸੁਤ੍ਤਵਣ੍ਣਨਾਯਂ ਵੁਤ੍ਤਨਯੇਨ ਸੁਖੁਮਤ੍ਤਭਾਵੇ ਨਿਮ੍ਮਿਨਿਤ੍ਵਾ ਸਮ੍ਪਰਿਵਾਰੇਸੁਂ ‘‘ਵਿਚਿਤ੍ਰਪਟਿਭਾਨਂ ਧਮ੍ਮਦੇਸਨਂ ਸੋਸ੍ਸਾਮਾ’’ਤਿ. ਤਤ੍ਥ ਚਤ੍ਤਾਰੋ ਖੀਣਾਸਵਬ੍ਰਹ੍ਮਾਨੋ ਸਮਾਪਤ੍ਤਿਤੋ ਵੁਟ੍ਠਾਯ ਬ੍ਰਹ੍ਮਗਣਂ ਅਪਸ੍ਸਨ੍ਤਾ ‘‘ਕੁਹਿਂ ਗਤਾ’’ਤਿ ਆਵਜ੍ਜੇਤ੍ਵਾ ਤਮਤ੍ਥਂ ਞਤ੍ਵਾ ਪਚ੍ਛਾ ਆਗਨ੍ਤ੍ਵਾ ਓਕਾਸਂ ਅਲਭਮਾਨਾ ਚਕ੍ਕਵਾਲ਼ਮੁਦ੍ਧਨਿ ਠਤ੍ਵਾ ਪਚ੍ਚੇਕਗਾਥਾਯੋ ਅਭਾਸਿਂਸੁ. ਯਥਾਹ –

‘‘ਅਥ ਖੋ ਚਤੁਨ੍ਨਂ ਸੁਦ੍ਧਾਵਾਸਕਾਯਿਕਾਨਂ ਦੇਵਤਾਨਂ ਏਤਦਹੋਸਿ – ‘ਅਯਂ, ਖੋ, ਭਗਵਾ ਸਕ੍ਕੇਸੁ ਵਿਹਰਤਿ ਕਪਿਲਵਤ੍ਥੁਸ੍ਮਿਂ ਮਹਾਵਨੇ ਮਹਤਾ ਭਿਕ੍ਖੁਸਙ੍ਘੇਨ ਸਦ੍ਧਿਂ ਪਞ੍ਚਮਤ੍ਤੇਹਿ ਭਿਕ੍ਖੁਸਤੇਹਿ ਸਬ੍ਬੇਹੇਵ ਅਰਹਨ੍ਤੇਹਿ. ਦਸਹਿ ਚ ਲੋਕਧਾਤੂਹਿ ਦੇਵਤਾ ਯੇਭੁਯ੍ਯੇਨ ਸਨ੍ਨਿਪਤਿਤਾ ਹੋਨ੍ਤਿ ਭਗਵਨ੍ਤਂ ਦਸ੍ਸਨਾਯ ਭਿਕ੍ਖੁਸਙ੍ਘਞ੍ਚ. ਯਂਨੂਨ ਮਯਮ੍ਪਿ ਯੇਨ ਭਗਵਾ ਤੇਨੁਪਸਙ੍ਕਮੇਯ੍ਯਾਮ, ਉਪਸਙ੍ਕਮਿਤ੍ਵਾ ਭਗਵਤੋ ਸਨ੍ਤਿਕੇ ਪਚ੍ਚੇਕਂ ਗਾਥਂ ਭਾਸੇਯ੍ਯਾਮਾ’’’ਤਿ (ਦੀ. ਨਿ. ੨.੩੩੧; ਸਂ. ਨਿ. ੧.੩੭).

ਸਬ੍ਬਂ ਸਗਾਥਾਵਗ੍ਗੇ ਵੁਤ੍ਤਨਯੇਨੇਵ ਵੇਦਿਤਬ੍ਬਂ. ਏਵਂ ਗਨ੍ਤ੍ਵਾ ਚ ਤਤ੍ਥ ਏਕੋ ਬ੍ਰਹ੍ਮਾ ਪੁਰਤ੍ਥਿਮਚਕ੍ਕਵਾਲ਼ਮੁਦ੍ਧਨਿ ਓਕਾਸਂ ਲਭਿਤ੍ਵਾ ਤਤ੍ਥ ਠਿਤੋ ਇਮਂ ਗਾਥਂ ਅਭਾਸਿ –

‘‘ਮਹਾਸਮਯੋ ਪਵਨਸ੍ਮਿਂ…ਪੇ…

ਦਕ੍ਖਿਤਾਯੇ ਅਪਰਾਜਿਤਸਙ੍ਘ’’ਨ੍ਤਿ. (ਦੀ. ਨਿ. ੨.੩੩੨; ਸਂ. ਨਿ. ੧.੩੭);

ਇਮਞ੍ਚਸ੍ਸ ਗਾਥਂ ਭਾਸਮਾਨਸ੍ਸ ਪਚ੍ਛਿਮਚਕ੍ਕਵਾਲ਼ਪਬ੍ਬਤੇ ਠਿਤੋ ਸਦ੍ਦਂ ਅਸ੍ਸੋਸਿ.

ਦੁਤਿਯੋ ਪਚ੍ਛਿਮਚਕ੍ਕਵਾਲ਼ਮੁਦ੍ਧਨਿ ਓਕਾਸਂ ਲਭਿਤ੍ਵਾ ਤਤ੍ਥ ਠਿਤੋ ਤਂ ਗਾਥਂ ਸੁਤ੍ਵਾ ਇਮਂ ਗਾਥਂ ਅਭਾਸਿ –

‘‘ਤਤ੍ਰ ਭਿਕ੍ਖਵੋ ਸਮਾਦਹਂਸੁ…ਪੇ…

ਇਨ੍ਦ੍ਰਿਯਾਨਿ ਰਕ੍ਖਨ੍ਤਿ ਪਣ੍ਡਿਤਾ’’ਤਿ. (ਦੀ. ਨਿ. ੨.੩੩੨; ਸਂ. ਨਿ. ੧.੩੭);

ਤਤਿਯੋ ਦਕ੍ਖਿਣਚਕ੍ਕਵਾਲ਼ਮੁਦ੍ਧਨਿ ਓਕਾਸਂ ਲਭਿਤ੍ਵਾ ਤਤ੍ਥ ਠਿਤੋ ਤਂ ਗਾਥਂ ਸੁਤ੍ਵਾ ਇਮਂ ਗਾਥਂ ਅਭਾਸਿ –

‘‘ਛੇਤ੍ਵਾ ਖੀਲਂ ਛੇਤ੍ਵਾ ਪਲਿਘਂ…ਪੇ… ਸੁਸੁਨਾਗਾ’’ਤਿ. (ਦੀ. ਨਿ. ੨.੩੩੨; ਸਂ. ਨਿ. ੧.੩੭);

ਚਤੁਤ੍ਥੋ ਉਤ੍ਤਰਚਕ੍ਕਵਾਲ਼ਮੁਦ੍ਧਨਿ ਓਕਾਸਂ ਲਭਿਤ੍ਵਾ ਤਤ੍ਥ ਠਿਤੋ ਤਂ ਗਾਥਂ ਸੁਤ੍ਵਾ ਇਮਂ ਗਾਥਮਭਾਸਿ –

‘‘ਯੇ ਕੇਚਿ ਬੁਦ੍ਧਂ ਸਰਣਂ ਗਤਾਸੇ…ਪੇ…

ਦੇਵਕਾਯਂ ਪਰਿਪੂਰੇਸ੍ਸਨ੍ਤੀ’’ਤਿ. (ਦੀ. ਨਿ. ੨.੩੩੨; ਸਂ. ਨਿ. ੧.੩੭);

ਤਸ੍ਸਪਿ ਤਂ ਸਦ੍ਦਂ ਦਕ੍ਖਿਣਚਕ੍ਕਵਾਲ਼ਮੁਦ੍ਧਨਿ ਠਿਤੋ ਅਸ੍ਸੋਸਿ. ਏਵਂ ਤਦਾ ਇਮੇ ਚਤ੍ਤਾਰੋ ਬ੍ਰਹ੍ਮਾਨੋ ਪਰਿਸਂ ਥੋਮੇਤ੍ਵਾ ਠਿਤਾ ਅਹੇਸੁਂ, ਮਹਾਬ੍ਰਹ੍ਮਾਨੋ ਏਕਚਕ੍ਕਵਾਲ਼ਂ ਛਾਦੇਤ੍ਵਾ ਅਟ੍ਠਂਸੁ.

ਅਥ ਭਗਵਾ ਦੇਵਪਰਿਸਂ ਓਲੋਕੇਤ੍ਵਾ ਭਿਕ੍ਖੂਨਂ ਆਰੋਚੇਸਿ – ‘‘ਯੇਪਿ ਤੇ, ਭਿਕ੍ਖਵੇ, ਅਹੇਸੁਂ ਅਤੀਤਮਦ੍ਧਾਨਂ ਅਰਹਨ੍ਤੋ ਸਮ੍ਮਾਸਮ੍ਬੁਦ੍ਧਾ, ਤੇਸਮ੍ਪਿ ਭਗਵਨ੍ਤਾਨਂ ਏਤਪ੍ਪਰਮਾਯੇਵ ਦੇਵਤਾ ਸਨ੍ਨਿਪਤਿਤਾ ਅਹੇਸੁਂ. ਸੇਯ੍ਯਥਾਪਿ ਮਯ੍ਹਂ ਏਤਰਹਿ, ਯੇਪਿ ਤੇ, ਭਿਕ੍ਖਵੇ, ਭਵਿਸ੍ਸਨ੍ਤਿ ਅਨਾਗਤਮਦ੍ਧਾਨਂ ਅਰਹਨ੍ਤੋ ਸਮ੍ਮਾਸਮ੍ਬੁਦ੍ਧਾ, ਤੇਸਮ੍ਪਿ ਭਗਵਨ੍ਤਾਨਂ ਏਤਪ੍ਪਰਮਾਯੇਵ ਦੇਵਤਾ ਸਨ੍ਨਿਪਤਿਤਾ ਭਵਿਸ੍ਸਨ੍ਤਿ ਸੇਯ੍ਯਥਾਪਿ ਮਯ੍ਹਂ ਏਤਰਹੀ’’ਤਿ. ਤਤੋ ਤਂ ਦੇਵਪਰਿਸਂ ਭਬ੍ਬਾਭਬ੍ਬਵਸੇਨ ਦ੍ਵਿਧਾ ਵਿਭਜਿ ‘‘ਏਤ੍ਤਕਾ ਭਬ੍ਬਾ, ਏਤ੍ਤਕਾ ਅਭਬ੍ਬਾ’’ਤਿ. ਤਤ੍ਥ ‘‘ਅਭਬ੍ਬਪਰਿਸਾ ਬੁਦ੍ਧਸਤੇਪਿ ਧਮ੍ਮਂ ਦੇਸੇਨ੍ਤੇ ਨ ਬੁਜ੍ਝਤਿ, ਭਬ੍ਬਪਰਿਸਾ ਸਕ੍ਕਾ ਬੋਧੇਤੁ’’ਨ੍ਤਿ ਞਤ੍ਵਾ ਪੁਨ ਭਬ੍ਬਪੁਗ੍ਗਲੇ ਚਰਿਯਵਸੇਨ ਛਧਾ ਵਿਭਜਿ ‘‘ਏਤ੍ਤਕਾ ਰਾਗਚਰਿਤਾ, ਏਤ੍ਤਕਾ ਦੋਸ-ਮੋਹ-ਵਿਤਕ੍ਕ-ਸਦ੍ਧਾ-ਬੁਦ੍ਧਿਚਰਿਤਾ’’ਤਿ. ਏਵਂ ਚਰਿਯਵਸੇਨ ਪਰਿਗ੍ਗਹੇਤ੍ਵਾ ‘‘ਅਸ੍ਸਾ ਪਰਿਸਾਯ ਕੀਦਿਸਾ ਧਮ੍ਮਦੇਸਨਾ ਸਪ੍ਪਾਯਾ’’ਤਿ ਧਮ੍ਮਕਥਂ ਵਿਚਿਨਿਤ੍ਵਾ ਪੁਨ ਤਂ ਪਰਿਸਂ ਮਨਸਾਕਾਸਿ – ‘‘ਅਤ੍ਤਜ੍ਝਾਸਯੇਨ ਨੁ ਖੋ ਜਾਨੇਯ੍ਯ, ਪਰਜ੍ਝਾਸਯੇਨ, ਅਟ੍ਠੁਪ੍ਪਤ੍ਤਿਵਸੇਨ, ਪੁਚ੍ਛਾਵਸੇਨਾ’’ਤਿ. ਤਤੋ ‘‘ਪੁਚ੍ਛਾਵਸੇਨ ਜਾਨੇਯ੍ਯਾ’’ਤਿ ਞਤ੍ਵਾ ‘‘ਪਞ੍ਹਂ ਪੁਚ੍ਛਿਤੁਂ ਸਮਤ੍ਥੋ ਅਤ੍ਥਿ, ਨਤ੍ਥੀ’’ਤਿ ਪੁਨ ਸਕਲਪਰਿਸਂ ਆਵਜ੍ਜੇਤ੍ਵਾ ‘‘ਨਤ੍ਥਿ ਕੋਚੀ’’ਤਿ ਞਤ੍ਵਾ ‘‘ਸਚੇ ਅਹਮੇਵ ਪੁਚ੍ਛਿਤ੍ਵਾ ਅਹਮੇਵ ਵਿਸ੍ਸਜ੍ਜੇਯ੍ਯਂ, ਏਵਮਸ੍ਸਾ ਪਰਿਸਾਯ ਸਪ੍ਪਾਯਂ ਨ ਹੋਤਿ. ਯਂਨੂਨਾਹਂ ਨਿਮ੍ਮਿਤਬੁਦ੍ਧਂ ਮਾਪੇਯ੍ਯਨ੍ਤਿ ਪਾਦਕਜ੍ਝਾਨਂ ਸਮਾਪਜ੍ਜਿਤ੍ਵਾ ਵੁਟ੍ਠਾਯ ਮਨੋਮਯਿਦ੍ਧਿਯਾ ਅਭਿਸਙ੍ਖਰਿਤ੍ਵਾ ਨਿਮ੍ਮਿਤਬੁਦ੍ਧਂ ਮਾਪੇਸਿ. ਸਬ੍ਬਙ੍ਗਪਚ੍ਚਙ੍ਗੀ ਲਕ੍ਖਣਸਮ੍ਪਨ੍ਨੋ ਪਤ੍ਤਚੀਵਰਧਰੋ ਆਲੋਕਿਤਵਿਲੋਕਿਤਾਦਿਸਮ੍ਪਨ੍ਨੋ ਹੋਤੂ’’ਤਿ ਅਧਿਟ੍ਠਾਨਚਿਤ੍ਤੇਨ ਸਹ ਪਾਤੁਰਹੋਸਿ. ਸੋ ਪਾਚੀਨਲੋਕਧਾਤੁਤੋ ਆਗਨ੍ਤ੍ਵਾ ਭਗਵਤੋ ਸਮਸਮੇ ਆਸਨੇ ਨਿਸਿਨ੍ਨੋ ਏਵਂ ਆਗਨ੍ਤ੍ਵਾ ਯਾਨਿ ਭਗਵਤਾ ਇਮਮ੍ਹਿ ਸਮਾਗਮੇ ਚਰਿਯਵਸੇਨ ਛ ਸੁਤ੍ਤਾਨਿ (ਸੁ. ਨਿ. ੮੫੪ ਆਦਯੋ, ੮੬੮ ਆਦਯੋ, ੮੮੪ ਆਦਯੋ, ੯੦੧ ਆਦਯੋ, ੯੨੧ ਆਦਯੋ) ਕਥਿਤਾਨਿ. ਸੇਯ੍ਯਥਿਦਂ – ਪੁਰਾਭੇਦਸੁਤ੍ਤਂ ਕਲਹਵਿਵਾਦਸੁਤ੍ਤਂ ਚੂਲ਼ਬ੍ਯੂਹਂ ਮਹਾਬ੍ਯੂਹਂ ਤੁਵਟਕਂ ਇਦਮੇਵ ਸਮ੍ਮਾਪਰਿਬ੍ਬਾਜਨੀਯਨ੍ਤਿ. ਤੇਸੁ ਰਾਗਚਰਿਤਦੇਵਤਾਨਂ ਸਪ੍ਪਾਯਵਸੇਨ ਕਥੇਤਬ੍ਬਸ੍ਸ ਇਮਸ੍ਸ ਸੁਤ੍ਤਸ੍ਸ ਪਵਤ੍ਤਨਤ੍ਥਂ ਪਞ੍ਹਂ ਪੁਚ੍ਛਨ੍ਤੋ ‘‘ਪੁਚ੍ਛਾਮਿ ਮੁਨਿਂ ਪਹੂਤਪਞ੍ਞ’’ਨ੍ਤਿ ਇਮਂ ਗਾਥਮਾਹ.

ਤਤ੍ਥ ਪਹੂਤਪਞ੍ਞਨ੍ਤਿ ਮਹਾਪਞ੍ਞਂ. ਤਿਣ੍ਣਨ੍ਤਿ ਚਤੁਰੋਘਤਿਣ੍ਣਂ. ਪਾਰਙ੍ਗਤਨ੍ਤਿ ਨਿਬ੍ਬਾਨਪ੍ਪਤ੍ਤਂ. ਪਰਿਨਿਬ੍ਬੁਤਨ੍ਤਿ ਸਉਪਾਦਿਸੇਸਨਿਬ੍ਬਾਨਵਸੇਨ ਪਰਿਨਿਬ੍ਬੁਤਂ. ਠਿਤਤ੍ਤਨ੍ਤਿ ਲੋਕਧਮ੍ਮੇਹਿ ਅਕਮ੍ਪਨੀਯਚਿਤ੍ਤਂ. ਨਿਕ੍ਖਮ੍ਮ ਘਰਾ ਪਨੁਜ੍ਜ ਕਾਮੇਤਿ ਵਤ੍ਥੁਕਾਮੇ ਪਨੁਦਿਤ੍ਵਾ ਘਰਾਵਾਸਾ ਨਿਕ੍ਖਮ੍ਮ. ਕਥਂ ਭਿਕ੍ਖੁ ਸਮ੍ਮਾ ਸੋ ਲੋਕੇ ਪਰਿਬ੍ਬਜੇਯ੍ਯਾਤਿ ਸੋ ਭਿਕ੍ਖੁ ਕਥਂ ਲੋਕੇ ਸਮ੍ਮਾ ਪਰਿਬ੍ਬਜੇਯ੍ਯ ਵਿਹਰੇਯ੍ਯ ਅਨੁਪਲਿਤ੍ਤੋ ਲੋਕੇਨ ਹੁਤ੍ਵਾ, ਲੋਕਂ ਅਤਿਕ੍ਕਮੇਯ੍ਯਾਤਿ ਵੁਤ੍ਤਂ ਹੋਤਿ. ਸੇਸਮੇਤ੍ਥ ਵੁਤ੍ਤਨਯਮੇਵ.

੩੬੩. ਅਥ ਭਗਵਾ ਯਸ੍ਮਾ ਆਸਵਕ੍ਖਯਂ ਅਪ੍ਪਤ੍ਵਾ ਲੋਕੇ ਸਮ੍ਮਾ ਪਰਿਬ੍ਬਜਨ੍ਤੋ ਨਾਮ ਨਤ੍ਥਿ, ਤਸ੍ਮਾ ਤਸ੍ਮਿਂ ਰਾਗਚਰਿਤਾਦਿਵਸੇਨ ਪਰਿਗ੍ਗਹਿਤੇ ਸਬ੍ਬਪੁਗ੍ਗਲਸਮੂਹੇ ਤਂ ਤਂ ਤੇਸਂ ਤੇਸਂ ਸਮਾਨਦੋਸਾਨਂ ਦੇਵਤਾਗਣਾਨਂ ਆਚਿਣ੍ਣਦੋਸਪ੍ਪਹਾਨਤ੍ਥਂ ‘‘ਯਸ੍ਸ ਮਙ੍ਗਲਾ’’ਤਿ ਆਰਭਿਤ੍ਵਾ ਅਰਹਤ੍ਤਨਿਕੂਟੇਨੇਵ ਖੀਣਾਸਵਪਟਿਪਦਂ ਪਕਾਸੇਨ੍ਤੋ ਪਨ੍ਨਰਸ ਗਾਥਾਯੋ ਅਭਾਸਿ.

ਤਤ੍ਥ ਪਠਮਗਾਥਾਯ ਤਾਵ ਮਙ੍ਗਲਾਤਿ ਮਙ੍ਗਲਸੁਤ੍ਤੇ ਵੁਤ੍ਤਾਨਂ ਦਿਟ੍ਠਮਙ੍ਗਲਾਦੀਨਮੇਤਂ ਅਧਿਵਚਨਂ. ਸਮੂਹਤਾਤਿ ਸੁਟ੍ਠੁ ਊਹਤਾ ਪਞ੍ਞਾਸਤ੍ਥੇਨ ਸਮੁਚ੍ਛਿਨ੍ਨਾ. ਉਪ੍ਪਾਤਾਤਿ ‘‘ਉਕ੍ਕਾਪਾਤਦਿਸਾਡਾਹਾਦਯੋ ਏਵਂ ਵਿਪਾਕਾ ਹੋਨ੍ਤੀ’’ਤਿ ਏਵਂ ਪਵਤ੍ਤਾ ਉਪ੍ਪਾਤਾਭਿਨਿਵੇਸਾ. ਸੁਪਿਨਾਤਿ ‘‘ਪੁਬ੍ਬਣ੍ਹਸਮਯੇ ਸੁਪਿਨਂ ਦਿਸ੍ਵਾ ਇਦਂ ਨਾਮ ਹੋਤਿ, ਮਜ੍ਝਨ੍ਹਿਕਾਦੀਸੁ ਇਦਂ, ਵਾਮਪਸ੍ਸੇਨ ਸਯਤਾ ਦਿਟ੍ਠੇ ਇਦਂ ਨਾਮ ਹੋਤਿ, ਦਕ੍ਖਿਣਪਸ੍ਸਾਦੀਹਿ ਇਦਂ, ਸੁਪਿਨਨ੍ਤੇ ਚਨ੍ਦਂ ਦਿਸ੍ਵਾ ਇਦਂ ਨਾਮ ਹੋਤਿ, ਸੂਰਿਯਾਦਯੋ ਦਿਸ੍ਵਾ ਇਦ’’ਨ੍ਤਿ ਏਵਂ ਪਵਤ੍ਤਾ ਸੁਪਿਨਾਭਿਨਿਵੇਸਾ. ਲਕ੍ਖਣਾਤਿ ਦਣ੍ਡਲਕ੍ਖਣਵਤ੍ਥਲਕ੍ਖਣਾਦਿਪਾਠਂ ਪਠਿਤ੍ਵਾ ‘‘ਇਮਿਨਾ ਇਦਂ ਨਾਮ ਹੋਤੀ’’ਤਿ ਏਵਂ ਪਵਤ੍ਤਾ ਲਕ੍ਖਣਾਭਿਨਿਵੇਸਾ. ਤੇ ਸਬ੍ਬੇਪਿ ਬ੍ਰਹ੍ਮਜਾਲੇ ਵੁਤ੍ਤਨਯੇਨੇਵ ਵੇਦਿਤਬ੍ਬਾ. ਸੋ ਮਙ੍ਗਲਦੋਸਵਿਪ੍ਪਹੀਨੋਤਿ ਅਟ੍ਠਤਿਂਸ ਮਹਾਮਙ੍ਗਲਾਨਿ ਠਪੇਤ੍ਵਾ ਅਵਸੇਸਾ ਮਙ੍ਗਲਦੋਸਾ ਨਾਮ. ਯਸ੍ਸ ਪਨੇਤੇ ਮਙ੍ਗਲਾਦਯੋ ਸਮੂਹਤਾ, ਸੋ ਮਙ੍ਗਲਦੋਸਵਿਪ੍ਪਹੀਨੋ ਹੋਤਿ. ਅਥ ਵਾ ਮਙ੍ਗਲਾਨਞ੍ਚ ਉਪ੍ਪਾਤਾਦਿਦੋਸਾਨਞ੍ਚ ਪਹੀਨਤ੍ਤਾ ਮਙ੍ਗਲਦੋਸਵਿਪ੍ਪਹੀਨੋ ਹੋਤਿ, ਨ ਮਙ੍ਗਲਾਦੀਹਿ ਸੁਦ੍ਧਿਂ ਪਚ੍ਚੇਤਿ ਅਰਿਯਮਗ੍ਗਸ੍ਸ ਅਧਿਗਤਤ੍ਤਾ. ਤਸ੍ਮਾ ਸਮ੍ਮਾ ਸੋ ਲੋਕੇ ਪਰਿਬ੍ਬਜੇਯ੍ਯ, ਸੋ ਖੀਣਾਸਵੋ ਸਮ੍ਮਾ ਲੋਕੇ ਪਰਿਬ੍ਬਜੇਯ੍ਯ ਅਨੁਪਲਿਤ੍ਤੋ ਲੋਕੇਨਾਤਿ.

੩੬੪. ਦੁਤਿਯਗਾਥਾਯ ਰਾਗਂ ਵਿਨਯੇਥ ਮਾਨੁਸੇਸੁ, ਦਿਬ੍ਬੇਸੁ ਕਾਮੇਸੁ ਚਾਪਿ ਭਿਕ੍ਖੂਤਿ ਮਾਨੁਸੇਸੁ ਚ ਦਿਬ੍ਬੇਸੁ ਚ ਕਾਮਗੁਣੇਸੁ ਅਨਾਗਾਮਿਮਗ੍ਗੇਨ ਅਨੁਪ੍ਪਤ੍ਤਿਧਮ੍ਮਤਂ ਨੇਨ੍ਤੋ ਰਾਗਂ ਵਿਨਯੇਥ. ਅਤਿਕ੍ਕਮ੍ਮ ਭਵਂ ਸਮੇਚ੍ਚ ਧਮ੍ਮਨ੍ਤਿ ਏਵਂ ਰਾਗਂ ਵਿਨੇਤ੍ਵਾ ਤਤੋ ਪਰਂ ਅਰਹਤ੍ਤਮਗ੍ਗੇਨ ਸਬ੍ਬਪ੍ਪਕਾਰਤੋ ਪਰਿਞ੍ਞਾਭਿਸਮਯਾਦਯੋ ਸਾਧੇਨ੍ਤੋ ਚਤੁਸਚ੍ਚਭੇਦਮ੍ਪਿ ਸਮੇਚ੍ਚ ਧਮ੍ਮਂ ਇਮਾਯ ਪਟਿਪਦਾਯ ਤਿਵਿਧਮ੍ਪਿ ਅਤਿਕ੍ਕਮ੍ਮ ਭਵਂ. ਸਮ੍ਮਾ ਸੋਤਿ ਸੋਪਿ ਭਿਕ੍ਖੁ ਸਮ੍ਮਾ ਲੋਕੇ ਪਰਿਬ੍ਬਜੇਯ੍ਯ.

੩੬੫. ਤਤਿਯਗਾਥਾਯ ‘‘ਅਨੁਰੋਧਵਿਰੋਧਵਿਪ੍ਪਹੀਨੋ’’ਤਿ ਸਬ੍ਬਵਤ੍ਥੂਸੁ ਪਹੀਨਰਾਗਦੋਸੋ. ਸੇਸਂ ਵੁਤ੍ਤਨਯਮੇਵ ਸਬ੍ਬਗਾਥਾਸੁ ਚ ‘‘ਸੋਪਿ ਭਿਕ੍ਖੁ ਸਮ੍ਮਾ ਲੋਕੇ ਪਰਿਬ੍ਬਜੇਯ੍ਯਾ’’ਤਿ ਯੋਜੇਤਬ੍ਬਂ. ਇਤੋ ਪਰਞ੍ਹਿ ਯੋਜਨਮ੍ਪਿ ਅਵਤ੍ਵਾ ਅਵੁਤ੍ਤਨਯਮੇਵ ਵਣ੍ਣਯਿਸ੍ਸਾਮ.

੩੬੬. ਚਤੁਤ੍ਥਗਾਥਾਯ ਸਤ੍ਤਸਙ੍ਖਾਰਵਸੇਨ ਦੁਵਿਧਂ ਪਿਯਞ੍ਚ ਅਪ੍ਪਿਯਞ੍ਚ ਵੇਦਿਤਬ੍ਬਂ, ਤਤ੍ਥ ਛਨ੍ਦਰਾਗਪਟਿਘਪ੍ਪਹਾਨੇਨ ਹਿਤ੍ਵਾ. ਅਨੁਪਾਦਾਯਾਤਿ ਚਤੂਹਿ ਉਪਾਦਾਨੇਹਿ ਕਞ੍ਚਿ ਧਮ੍ਮਂ ਅਗ੍ਗਹੇਤ੍ਵਾ. ਅਨਿਸ੍ਸਿਤੋ ਕੁਹਿਞ੍ਚੀਤਿ ਅਟ੍ਠਸਤਭੇਦੇਨ ਤਣ੍ਹਾਨਿਸ੍ਸਯੇਨ ਦ੍ਵਾਸਟ੍ਠਿਭੇਦੇਨ ਦਿਟ੍ਠਿਨਿਸ੍ਸਯੇਨ ਚ ਕੁਹਿਞ੍ਚਿ ਰੂਪਾਦਿਧਮ੍ਮੇ ਭਵੇ ਵਾ ਅਨਿਸ੍ਸਿਤੋ. ਸਂਯੋਜਨਿਯੇਹਿ ਵਿਪ੍ਪਮੁਤ੍ਤੋਤਿ ਸਬ੍ਬੇਪਿ ਤੇਭੂਮਕਧਮ੍ਮਾ ਦਸਵਿਧਸਂਯੋਜਨਸ੍ਸ ਵਿਸਯਤ੍ਤਾ ਸਂਯੋਜਨਿਯਾ, ਤੇਹਿ ਸਬ੍ਬਪ੍ਪਕਾਰਤੋ ਮਗ੍ਗਭਾਵਨਾਯ ਪਰਿਞ੍ਞਾਤਤ੍ਤਾ ਚ ਵਿਪ੍ਪਮੁਤ੍ਤੋਤਿ ਅਤ੍ਥੋ. ਪਠਮਪਾਦੇਨ ਚੇਤ੍ਥ ਰਾਗਦੋਸਪ੍ਪਹਾਨਂ ਵੁਤ੍ਤਂ, ਦੁਤਿਯੇਨ ਉਪਾਦਾਨਨਿਸ੍ਸਯਾਭਾਵੋ, ਤਤਿਯੇਨ ਸੇਸਾਕੁਸਲੇਹਿ ਅਕੁਸਲਵਤ੍ਥੂਹਿ ਚ ਵਿਪ੍ਪਮੋਕ੍ਖੋ. ਪਠਮੇਨ ਵਾ ਰਾਗਦੋਸਪ੍ਪਹਾਨਂ, ਦੁਤਿਯੇਨ ਤਦੁਪਾਯੋ, ਤਤਿਯੇਨ ਤੇਸਂ ਪਹੀਨਤ੍ਤਾ ਸਂਯੋਜਨਿਯੇਹਿ ਵਿਪ੍ਪਮੋਕ੍ਖੋਤਿ ਵੇਦਿਤਬ੍ਬੋ.

੩੬੭. ਪਞ੍ਚਮਗਾਥਾਯ ਉਪਧੀਸੂਤਿ ਖਨ੍ਧੁਪਧੀਸੁ. ਆਦਾਨਨ੍ਤਿ ਆਦਾਤਬ੍ਬਟ੍ਠੇਨ ਤੇਯੇਵ ਵੁਚ੍ਚਨ੍ਤਿ. ਅਨਞ੍ਞਨੇਯ੍ਯੋਤਿ ਅਨਿਚ੍ਚਾਦੀਨਂ ਸੁਦਿਟ੍ਠਤ੍ਤਾ ‘‘ਇਦਂ ਸੇਯ੍ਯੋ’’ਤਿ ਕੇਨਚਿ ਅਨੇਤਬ੍ਬੋ. ਸੇਸਂ ਉਤ੍ਤਾਨਪਦਤ੍ਥਮੇਵ. ਇਦਂ ਵੁਤ੍ਤਂ ਹੋਤਿ – ਆਦਾਨੇਸੁ ਚਤੁਤ੍ਥਮਗ੍ਗੇਨ ਸਬ੍ਬਸੋ ਛਨ੍ਦਰਾਗਂ ਵਿਨੇਤ੍ਵਾ ਸੋ ਵਿਨੀਤਛਨ੍ਦਰਾਗੋ, ਤੇਸੁ ਉਪਧੀਸੁ ਨ ਸਾਰਮੇਤਿ, ਸਬ੍ਬੇ ਉਪਧੀ ਅਸਾਰਕਤ੍ਤੇਨੇਵ ਪਸ੍ਸਤਿ. ਤਤੋ ਤੇਸੁ ਦੁਵਿਧੇਨਪਿ ਨਿਸ੍ਸਯੇਨ ਅਨਿਸ੍ਸਿਤੋ ਅਞ੍ਞੇਨ ਵਾ ਕੇਨਚਿ ‘‘ਇਦਂ ਸੇਯ੍ਯੋ’’ਤਿ ਅਨੇਤਬ੍ਬੋ ਖੀਣਾਸਵੋ ਭਿਕ੍ਖੁ ਸਮ੍ਮਾ ਸੋ ਲੋਕੇ ਪਰਿਬ੍ਬਜੇਯ੍ਯ.

੩੬੮. ਛਟ੍ਠਗਾਥਾਯ ਅਵਿਰੁਦ੍ਧੋਤਿ ਏਤੇਸਂ ਤਿਣ੍ਣਂ ਦੁਚ੍ਚਰਿਤਾਨਂ ਪਹੀਨਤ੍ਤਾ ਸੁਚਰਿਤੇਹਿ ਸਦ੍ਧਿਂ ਅਵਿਰੁਦ੍ਧੋ. ਵਿਦਿਤ੍ਵਾ ਧਮ੍ਮਨ੍ਤਿ ਮਗ੍ਗੇਨ ਚਤੁਸਚ੍ਚਧਮ੍ਮਂ ਞਤ੍ਵਾ. ਨਿਬ੍ਬਾਨਪਦਾਭਿਪਤ੍ਥਯਾਨੋਤਿ ਅਨੁਪਾਦਿਸੇਸਂ ਖਨ੍ਧਪਰਿਨਿਬ੍ਬਾਨਪਦਂ ਪਤ੍ਥਯਮਾਨੋ. ਸੇਸਂ ਉਤ੍ਤਾਨਤ੍ਥਮੇਵ.

੩੬੯. ਸਤ੍ਤਮਗਾਥਾਯ ਅਕ੍ਕੁਟ੍ਠੋਤਿ ਦਸਹਿ ਅਕ੍ਕੋਸਵਤ੍ਥੂਹਿ ਅਭਿਸਤ੍ਤੋ. ਨ ਸਨ੍ਧਿਯੇਥਾਤਿ ਨ ਉਪਨਯ੍ਹੇਥ ਨ ਕੁਪ੍ਪੇਯ੍ਯ. ਲਦ੍ਧਾ ਪਰਭੋਜਨਂ ਨ ਮਜ੍ਜੇਤਿ ਪਰੇਹਿ ਦਿਨ੍ਨਂ ਸਦ੍ਧਾਦੇਯ੍ਯਂ ਲਭਿਤ੍ਵਾ ‘‘ਅਹਂ ਞਾਤੋ ਯਸਸ੍ਸੀ ਲਾਭੀ’’ਤਿ ਨ ਮਜ੍ਜੇਯ੍ਯ. ਸੇਸਂ ਉਤ੍ਤਾਨਤ੍ਥਮੇਵ.

੩੭੦. ਅਟ੍ਠਮਗਾਥਾਯ ਲੋਭਨ੍ਤਿ ਵਿਸਮਲੋਭਂ. ਭਵਨ੍ਤਿ ਕਾਮਭਵਾਦਿਭਵਂ. ਏਵਂ ਦ੍ਵੀਹਿ ਪਦੇਹਿ ਭਵਭੋਗਤਣ੍ਹਾ ਵੁਤ੍ਤਾ. ਪੁਰਿਮੇਨ ਵਾ ਸਬ੍ਬਾਪਿ ਤਣ੍ਹਾ, ਪਚ੍ਛਿਮੇਨ ਕਮ੍ਮਭਵੋ. ਵਿਰਤੋ ਛੇਦਨਬਨ੍ਧਨਾ ਚਾਤਿ ਏਵਮੇਤੇਸਂ ਕਮ੍ਮਕਿਲੇਸਾਨਂ ਪਹੀਨਤ੍ਤਾ ਪਰਸਤ੍ਤਛੇਦਨਬਨ੍ਧਨਾ ਚ ਵਿਰਤੋਤਿ. ਸੇਸਂ ਵੁਤ੍ਤਨਯਮੇਵ.

੩੭੧. ਨਵਮਗਾਥਾਯ ਸਾਰੁਪ੍ਪਂ ਅਤ੍ਤਨੋ ਵਿਦਿਤ੍ਵਾਤਿ ਅਤ੍ਤਨੋ ਭਿਕ੍ਖੁਭਾਵਸ੍ਸ ਪਤਿਰੂਪਂ ਅਨੇਸਨਾਦਿਂ ਪਹਾਯ ਸਮ੍ਮਾਏਸਨਾਦਿਆਜੀਵਸੁਦ੍ਧਿਂ ਅਞ੍ਞਞ੍ਚ ਸਮ੍ਮਾਪਟਿਪਤ੍ਤਿਂ ਤਤ੍ਥ ਪਤਿਟ੍ਠਹਨੇਨ ਵਿਦਿਤ੍ਵਾ. ਨ ਹਿ ਞਾਤਮਤ੍ਤੇਨੇਵ ਕਿਞ੍ਚਿ ਹੋਤਿ. ਯਥਾਤਥਿਯਨ੍ਤਿ ਯਥਾਤਥਂ ਯਥਾਭੂਤਂ. ਧਮ੍ਮਨ੍ਤਿ ਖਨ੍ਧਾਯਤਨਾਦਿਭੇਦਂ ਯਥਾਭੂਤਞਾਣੇਨ, ਚਤੁਸਚ੍ਚਧਮ੍ਮਂ ਵਾ ਮਗ੍ਗੇਨ ਵਿਦਿਤ੍ਵਾ. ਸੇਸਂ ਉਤ੍ਤਾਨਤ੍ਥਮੇਵ.

੩੭੨. ਦਸਮਗਾਥਾਯ ਸੋ ਨਿਰਾਸੋ ਅਨਾਸਿਸਾਨੋਤਿ ਯਸ੍ਸ ਅਰਿਯਮਗ੍ਗੇਨ ਵਿਨਾਸਿਤਤ੍ਤਾ ਅਨੁਸਯਾ ਚ ਨ ਸਨ੍ਤਿ, ਅਕੁਸਲਮੂਲਾ ਚ ਸਮੂਹਤਾ, ਸੋ ਨਿਰਾਸੋ ਨਿਤ੍ਤਣ੍ਹੋ ਹੋਤਿ. ਤਤੋ ਆਸਾਯ ਅਭਾਵੇਨ ਕਞ੍ਚਿ ਰੂਪਾਦਿਧਮ੍ਮਂ ਨਾਸੀਸਤਿ. ਤੇਨਾਹ ‘‘ਨਿਰਾਸੋ ਅਨਾਸਿਸਾਨੋ’’ਤਿ. ਸੇਸਂ ਵੁਤ੍ਤਨਯਮੇਵ.

੩੭੩. ਏਕਾਦਸਮਗਾਥਾਯ ਆਸਵਖੀਣੋਤਿ ਖੀਣਚਤੁਰਾਸਵੋ. ਪਹੀਨਮਾਨੋਤਿ ਪਹੀਨਨਵਵਿਧਮਾਨੋ. ਰਾਗਪਥਨ੍ਤਿ ਰਾਗਵਿਸਯਭੂਤਂ ਤੇਭੂਮਕਧਮ੍ਮਜਾਤਂ. ਉਪਾਤਿਵਤ੍ਤੋਤਿ ਪਰਿਞ੍ਞਾਪਹਾਨੇਹਿ ਅਤਿਕ੍ਕਨ੍ਤੋ. ਦਨ੍ਤੋਤਿ ਸਬ੍ਬਦ੍ਵਾਰਵਿਸੇਵਨਂ ਹਿਤ੍ਵਾ ਅਰਿਯੇਨ ਦਮਥੇਨ ਦਨ੍ਤਭੂਮਿਂ ਪਤ੍ਤੋ. ਪਰਿਨਿਬ੍ਬੁਤੋਤਿ ਕਿਲੇਸਗ੍ਗਿਵੂਪਸਮੇਨ ਸੀਤਿਭੂਤੋ. ਸੇਸਂ ਵੁਤ੍ਤਨਯਮੇਵ.

੩੭੪. ਦ੍ਵਾਦਸਮਗਾਥਾਯ ਸਦ੍ਧੋਤਿ ਬੁਦ੍ਧਾਦਿਗੁਣੇਸੁ ਪਰਪ੍ਪਚ੍ਚਯਵਿਰਹਿਤਤ੍ਤਾ ਸਬ੍ਬਾਕਾਰਸਮ੍ਪਨ੍ਨੇਨ ਅਵੇਚ੍ਚਪ੍ਪਸਾਦੇਨ ਸਮਨ੍ਨਾਗਤੋ, ਨ ਪਰਸ੍ਸ ਸਦ੍ਧਾਯ ਪਟਿਪਤ੍ਤਿਯਂ ਗਮਨਭਾਵੇਨ. ਯਥਾਹ – ‘‘ਨ ਖ੍ਵਾਹਂ ਏਤ੍ਥ ਭਨ੍ਤੇ ਭਗਵਤੋ ਸਦ੍ਧਾਯ ਗਚ੍ਛਾਮੀ’’ਤਿ (ਅ. ਨਿ. ੫.੩੪). ਸੁਤਵਾਤਿ ਵੋਸਿਤਸੁਤਕਿਚ੍ਚਤ੍ਤਾ ਪਰਮਤ੍ਥਿਕਸੁਤਸਮਨ੍ਨਾਗਤੋ. ਨਿਯਾਮਦਸ੍ਸੀਤਿ ਸਂਸਾਰਕਨ੍ਤਾਰਮੂਲ਼੍ਹੇ ਲੋਕੇ ਅਮਤਪੁਰਗਾਮਿਨੋ ਸਮ੍ਮਤ੍ਤਨਿਯਾਮਭੂਤਸ੍ਸ ਮਗ੍ਗਸ੍ਸ ਦਸ੍ਸਾਵੀ, ਦਿਟ੍ਠਮਗ੍ਗੋਤਿ ਵੁਤ੍ਤਂ ਹੋਤਿ. ਵਗ੍ਗਗਤੇਸੁ ਨ ਵਗ੍ਗਸਾਰੀਤਿ ਵਗ੍ਗਗਤਾ ਨਾਮ ਦ੍ਵਾਸਟ੍ਠਿਦਿਟ੍ਠਿਗਤਿਕਾ ਅਞ੍ਞਮਞ੍ਞਂ ਪਟਿਲੋਮਤ੍ਤਾ, ਏਵਂ ਵਗ੍ਗਾਹਿ ਦਿਟ੍ਠੀਹਿ ਗਤੇਸੁ ਸਤ੍ਤੇਸੁ ਨ ਵਗ੍ਗਸਾਰੀ – ‘‘ਇਦਂ ਉਚ੍ਛਿਜ੍ਜਿਸ੍ਸਤਿ, ਇਦਂ ਤਥੇਵ ਭਵਿਸ੍ਸਤੀ’’ਤਿ ਏਵਂ ਦਿਟ੍ਠਿਵਸੇਨ ਅਗਮਨਤੋ. ਪਟਿਘਨ੍ਤਿ ਪਟਿਘਾਤਕਂ, ਚਿਤ੍ਤਵਿਘਾਤਕਨ੍ਤਿ ਵੁਤ੍ਤਂ ਹੋਤਿ. ਦੋਸਵਿਸੇਸਨਮੇਵੇਤਂ. ਵਿਨੇਯ੍ਯਾਤਿ ਵਿਨੇਤ੍ਵਾ. ਸੇਸਂ ਵੁਤ੍ਤਨਯਮੇਵ.

੩੭੫. ਤੇਰਸਮਗਾਥਾਯ ਸਂਸੁਦ੍ਧਜਿਨੋਤਿ ਸਂਸੁਦ੍ਧੇਨ ਅਰਹਤ੍ਤਮਗ੍ਗੇਨ ਵਿਜਿਤਕਿਲੇਸੋ. ਵਿਵਟ੍ਟਚ੍ਛਦੋਤਿ ਵਿਵਟਰਾਗਦੋਸਮੋਹਛਦਨੋ. ਧਮ੍ਮੇਸੁ ਵਸੀਤਿ ਚਤੁਸਚ੍ਚਧਮ੍ਮੇਸੁ ਵਸਿਪ੍ਪਤ੍ਤੋ. ਨ ਹਿਸ੍ਸ ਸਕ੍ਕਾ ਤੇ ਧਮ੍ਮਾ ਯਥਾ ਞਾਤਾ ਕੇਨਚਿ ਅਞ੍ਞਥਾ ਕਾਤੁਂ, ਤੇਨ ਖੀਣਾਸਵੋ ‘‘ਧਮ੍ਮੇਸੁ ਵਸੀ’’ਤਿ ਵੁਚ੍ਚਤਿ. ਪਾਰਗੂਤਿ ਪਾਰਂ ਵੁਚ੍ਚਤਿ ਨਿਬ੍ਬਾਨਂ, ਤਂ ਗਤੋ, ਸਉਪਾਦਿਸੇਸਵਸੇਨ ਅਧਿਗਤੋਤਿ ਵੁਤ੍ਤਂ ਹੋਤਿ. ਅਨੇਜੋਤਿ ਅਪਗਤਤਣ੍ਹਾਚਲਨੋ. ਸਙ੍ਖਾਰਨਿਰੋਧਞਾਣਕੁਸਲੋਤਿ ਸਙ੍ਖਾਰਨਿਰੋਧੋ ਵੁਚ੍ਚਤਿ ਨਿਬ੍ਬਾਨਂ, ਤਮ੍ਹਿ ਞਾਣਂ ਅਰਿਯਮਗ੍ਗਪਞ੍ਞਾ, ਤਤ੍ਥ ਕੁਸਲੋ, ਚਤੁਕ੍ਖਤ੍ਤੁਂ ਭਾਵਿਤਤ੍ਤਾ ਛੇਕੋਤਿ ਵੁਤ੍ਤਂ ਹੋਤਿ.

੩੭੬. ਚੁਦ੍ਦਸਮਗਾਥਾਯ ਅਤੀਤੇਸੂਤਿ ਪਵਤ੍ਤਿਂ ਪਤ੍ਵਾ ਅਤਿਕ੍ਕਨ੍ਤੇਸੁ ਪਞ੍ਚਕ੍ਖਨ੍ਧੇਸੁ. ਅਨਾਗਤੇਸੂਤਿ ਪਵਤ੍ਤਿਂ ਅਪ੍ਪਤ੍ਤੇਸੁ ਪਞ੍ਚਕ੍ਖਨ੍ਧੇਸੁ ਏਵ. ਕਪ੍ਪਾਤੀਤੋਤਿ ‘‘ਅਹਂ ਮਮ’’ਨ੍ਤਿ ਕਪ੍ਪਨਂ ਸਬ੍ਬਮ੍ਪਿ ਵਾ ਤਣ੍ਹਾਦਿਟ੍ਠਿਕਪ੍ਪਂ ਅਤੀਤੋ. ਅਤਿਚ੍ਚ ਸੁਦ੍ਧਿਪਞ੍ਞੋਤਿ ਅਤੀਵ ਸੁਦ੍ਧਿਪਞ੍ਞੋ, ਅਤਿਕ੍ਕਮਿਤ੍ਵਾ ਵਾ ਸੁਦ੍ਧਿਪਞ੍ਞੋ. ਕਿਂ ਅਤਿਕ੍ਕਮਿਤ੍ਵਾ? ਅਦ੍ਧਤ੍ਤਯਂ. ਅਰਹਾ ਹਿ ਯ੍ਵਾਯਂ ਅਵਿਜ੍ਜਾਸਙ੍ਖਾਰਸਙ੍ਖਾਤੋ ਅਤੀਤੋ ਅਦ੍ਧਾ, ਜਾਤਿਜਰਾਮਰਣਸਙ੍ਖਾਤੋ ਅਨਾਗਤੋ ਅਦ੍ਧਾ, ਵਿਞ੍ਞਾਣਾਦਿਭਵਪਰਿਯਨ੍ਤੋ ਪਚ੍ਚੁਪ੍ਪਨ੍ਨੋ ਚ ਅਦ੍ਧਾ, ਤਂ ਸਬ੍ਬਮ੍ਪਿ ਅਤਿਕ੍ਕਮ੍ਮ ਕਙ੍ਖਂ ਵਿਤਰਿਤ੍ਵਾ ਪਰਮਸੁਦ੍ਧਿਪ੍ਪਤ੍ਤਪਞ੍ਞੋ ਹੁਤ੍ਵਾ ਠਿਤੋ. ਤੇਨ ਵੁਚ੍ਚਤਿ ‘‘ਅਤਿਚ੍ਚ ਸੁਦ੍ਧਿਪਞ੍ਞੋ’’ਤਿ. ਸਬ੍ਬਾਯਤਨੇਹੀਤਿ ਦ੍ਵਾਦਸਹਾਯਤਨੇਹਿ. ਅਰਹਾ ਹਿ ਏਵਂ ਕਪ੍ਪਾਤੀਤੋ. ਕਪ੍ਪਾਤੀਤਤ੍ਤਾ ਅਤਿਚ੍ਚ ਸੁਦ੍ਧਿਪਞ੍ਞਤ੍ਤਾ ਚ ਆਯਤਿਂ ਨ ਕਿਞ੍ਚਿ ਆਯਤਨਂ ਉਪੇਤਿ. ਤੇਨਾਹ – ‘‘ਸਬ੍ਬਾਯਤਨੇਹਿ ਵਿਪ੍ਪਮੁਤ੍ਤੋ’’ਤਿ.

੩੭੭. ਪਨ੍ਨਰਸਮਗਾਥਾਯ ਅਞ੍ਞਾਯ ਪਦਨ੍ਤਿ ਯੇ ਤੇ ‘‘ਸਚ੍ਚਾਨਂ ਚਤੁਰੋ ਪਦਾ’’ਤਿ ਵੁਤ੍ਤਾ, ਤੇਸੁ ਏਕੇਕਪਦਂ ਪੁਬ੍ਬਭਾਗਸਚ੍ਚਵਵਤ੍ਥਾਪਨਪਞ੍ਞਾਯ ਞਤ੍ਵਾ. ਸਮੇਚ੍ਚ ਧਮ੍ਮਨ੍ਤਿ ਤਤੋ ਪਰਂ ਚਤੂਹਿ ਅਰਿਯਮਗ੍ਗੇਹਿ ਚਤੁਸਚ੍ਚਧਮ੍ਮਂ ਸਮੇਚ੍ਚ. ਵਿਵਟਂ ਦਿਸ੍ਵਾਨ ਪਹਾਨਮਾਸਵਾਨਨ੍ਤਿ ਅਥ ਪਚ੍ਚਵੇਕ੍ਖਣਞਾਣੇਨ ਆਸਵਕ੍ਖਯਸਞ੍ਞਿਤਂ ਨਿਬ੍ਬਾਨਂ ਵਿਵਟਂ ਪਾਕਟਮਨਾਵਟਂ ਦਿਸ੍ਵਾ. ਸਬ੍ਬੁਪਧੀਨਂ ਪਰਿਕ੍ਖਯਾਤਿ ਸਬ੍ਬੇਸਂ ਖਨ੍ਧਕਾਮਗੁਣਕਿਲੇਸਾਭਿਸਙ੍ਖਾਰਭੇਦਾਨਂ ਉਪਧੀਨਂ ਪਰਿਕ੍ਖੀਣਤ੍ਤਾ ਕਤ੍ਥਚਿ ਅਸਜ੍ਜਮਾਨੋ ਭਿਕ੍ਖੁ ਸਮ੍ਮਾ ਸੋ ਲੋਕੇ ਪਰਿਬ੍ਬਜੇਯ੍ਯ ਵਿਹਰੇਯ੍ਯ, ਅਨਲ੍ਲੀਯਨ੍ਤੋ ਲੋਕਂ ਗਚ੍ਛੇਯ੍ਯਾਤਿ ਦੇਸਨਂ ਨਿਟ੍ਠਾਪੇਸਿ.

੩੭੮. ਤਤੋ ਸੋ ਨਿਮ੍ਮਿਤੋ ਧਮ੍ਮਦੇਸਨਂ ਥੋਮੇਨ੍ਤੋ ‘‘ਅਦ੍ਧਾ ਹਿ ਭਗਵਾ’’ਤਿ ਇਮਂ ਗਾਥਮਾਹ. ਤਤ੍ਥ ਯੋ ਸੋ ਏਵਂ ਵਿਹਾਰੀਤਿ ਯੋ ਸੋ ਮਙ੍ਗਲਾਦੀਨਿ ਸਮੂਹਨਿਤ੍ਵਾ ਸਬ੍ਬਮਙ੍ਗਲਦੋਸਪ੍ਪਹਾਨਵਿਹਾਰੀ, ਯੋਪਿ ਸੋ ਦਿਬ੍ਬਮਾਨੁਸਕੇਸੁ ਕਾਮੇਸੁ ਰਾਗਂ ਵਿਨੇਯ੍ਯ ਭਵਾਤਿਕ੍ਕਮ੍ਮ ਧਮ੍ਮਾਭਿਸਮਯਵਿਹਾਰੀਤਿ ਏਵਂ ਤਾਯ ਤਾਯ ਗਾਥਾਯ ਨਿਦ੍ਦਿਟ੍ਠਭਿਕ੍ਖੁਂ ਦਸ੍ਸੇਨ੍ਤੋ ਆਹ. ਸੇਸਂ ਉਤ੍ਤਾਨਮੇਵ. ਅਯਂ ਪਨ ਯੋਜਨਾ – ਅਦ੍ਧਾ ਹਿ ਭਗਵਾ ਤਥੇਵ ਏਤਂ ਯਂ ਤ੍ਵਂ ‘‘ਯਸ੍ਸ ਮਙ੍ਗਲਾ ਸਮੂਹਤਾ’’ਤਿਆਦੀਨਿ ਵਤ੍ਵਾ ਤਸ੍ਸਾ ਤਸ੍ਸਾ ਗਾਥਾਯ ਪਰਿਯੋਸਾਨੇ ‘‘ਸਮ੍ਮਾ ਸੋ ਲੋਕੇ ਪਰਿਬ੍ਬਜੇਯ੍ਯਾ’’ਤਿ ਅਵਚ. ਕਿਂ ਕਾਰਣਂ? ਯੋ ਸੋ ਏਵਂਵਿਹਾਰੀ ਭਿਕ੍ਖੁ, ਸੋ ਉਤ੍ਤਮੇਨ ਦਮਥੇਨ ਦਨ੍ਤੋ, ਸਬ੍ਬਾਨਿ ਚ ਦਸਪਿ ਸਂਯੋਜਨਾਨਿ ਚਤੁਰੋ ਚ ਯੋਗੇ ਵੀਤਿਵਤ੍ਤੋ ਹੋਤਿ. ਤਸ੍ਮਾ ਸਮ੍ਮਾ ਸੋ ਲੋਕੇ ਪਰਿਬ੍ਬਜੇਯ੍ਯ, ਨਤ੍ਥਿ ਮੇ ਏਤ੍ਥ ਵਿਚਿਕਿਚ੍ਛਾਤਿ ਇਤਿ ਦੇਸਨਾਥੋਮਨਗਾਥਮ੍ਪਿ ਵਤ੍ਵਾ ਅਰਹਤ੍ਤਨਿਕੂਟੇਨੇਵ ਦੇਸਨਂ ਨਿਟ੍ਠਾਪੇਸਿ. ਸੁਤ੍ਤਪਰਿਯੋਸਾਨੇ ਕੋਟਿਸਤਸਹਸ੍ਸਦੇਵਤਾਨਂ ਅਗ੍ਗਫਲਪ੍ਪਤ੍ਤਿ ਅਹੋਸਿ, ਸੋਤਾਪਤ੍ਤਿਸਕਦਾਗਾਮਿਅਨਾਗਾਮਿਫਲਪ੍ਪਤ੍ਤਾ ਪਨ ਗਣਨਤੋ ਅਸਙ੍ਖ੍ਯੇਯ੍ਯਾਤਿ.

ਪਰਮਤ੍ਥਜੋਤਿਕਾਯ ਖੁਦ੍ਦਕ-ਅਟ੍ਠਕਥਾਯ

ਸੁਤ੍ਤਨਿਪਾਤ-ਅਟ੍ਠਕਥਾਯ ਸਮ੍ਮਾਪਰਿਬ੍ਬਾਜਨੀਯਸੁਤ੍ਤਵਣ੍ਣਨਾ

ਨਿਟ੍ਠਿਤਾ.