੧੪. ਧਮ੍ਮਿਕਸੁਤ੍ਤਵਣ੍ਣਨਾ

ਏਵਂ ਮੇ ਸੁਤਨ੍ਤਿ ਧਮ੍ਮਿਕਸੁਤ੍ਤਂ. ਕਾ ਉਪ੍ਪਤ੍ਤਿ? ਤਿਟ੍ਠਮਾਨੇ ਕਿਰ ਭਗਵਤਿ ਲੋਕਨਾਥੇ ਧਮ੍ਮਿਕੋ ਨਾਮ ਉਪਾਸਕੋ ਅਹੋਸਿ ਨਾਮੇਨ ਚ ਪਟਿਪਤ੍ਤਿਯਾ ਚ. ਸੋ ਕਿਰ ਸਰਣਸਮ੍ਪਨ੍ਨੋ ਸੀਲਸਮ੍ਪਨ੍ਨੋ ਬਹੁਸ੍ਸੁਤੋ ਪਿਟਕਤ੍ਤਯਧਰੋ ਅਨਾਗਾਮੀ ਅਭਿਞ੍ਞਾਲਾਭੀ ਆਕਾਸਚਾਰੀ ਅਹੋਸਿ. ਤਸ੍ਸ ਪਰਿਵਾਰਾ ਪਞ੍ਚਸਤਾ ਉਪਾਸਕਾ, ਤੇਪਿ ਤਾਦਿਸਾ ਏਵ ਅਹੇਸੁਂ. ਤਸ੍ਸੇਕਦਿਵਸਂ ਉਪੋਸਥਿਕਸ੍ਸ ਰਹੋਗਤਸ੍ਸ ਪਟਿਸਲ੍ਲੀਨਸ੍ਸ ਮਜ੍ਝਿਮਯਾਮਾਵਸਾਨਸਮਯੇ ਏਵਂ ਪਰਿਵਿਤਕ੍ਕੋ ਉਦਪਾਦਿ – ‘‘ਯਂਨੂਨਾਹਂ ਅਗਾਰਿਯਅਨਗਾਰਿਯਾਨਂ ਪਟਿਪਦਂ ਪੁਚ੍ਛੇਯ੍ਯ’’ਨ੍ਤਿ. ਸੋ ਪਞ੍ਚਹਿ ਉਪਾਸਕਸਤੇਹਿ ਪਰਿਵੁਤੋ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਤਮਤ੍ਥਂ ਪੁਚ੍ਛਿ, ਭਗਵਾ ਚਸ੍ਸ ਬ੍ਯਾਕਾਸਿ. ਤਤ੍ਥ ਪੁਬ੍ਬੇ ਵਣ੍ਣਿਤਸਦਿਸਂ ਵੁਤ੍ਤਨਯੇਨੇਵ ਵੇਦਿਤਬ੍ਬਂ, ਅਪੁਬ੍ਬਂ ਵਣ੍ਣਯਿਸ੍ਸਾਮ.

੩੭੯. ਤਤ੍ਥ ਪਠਮਗਾਥਾਯ ਤਾਵ ਕਥਂਕਰੋਤਿ ਕਥਂ ਕਰੋਨ੍ਤੋ ਕਥਂ ਪਟਿਪਜ੍ਜਨ੍ਤੋ. ਸਾਧੁ ਹੋਤੀਤਿ ਸੁਨ੍ਦਰੋ ਅਨਵਜ੍ਜੋ ਅਤ੍ਥਸਾਧਨੋ ਹੋਤਿ. ਉਪਾਸਕਾਸੇਤਿ ਉਪਾਸਕਾਇਚ੍ਚੇਵ ਵੁਤ੍ਤਂ ਹੋਤਿ. ਸੇਸਮਤ੍ਥਤੋ ਪਾਕਟਮੇਵ. ਅਯਂ ਪਨ ਯੋਜਨਾ – ਯੋ ਵਾ ਅਗਾਰਾ ਅਨਗਾਰਮੇਤਿ ਪਬ੍ਬਜਤਿ, ਯੇ ਵਾ ਅਗਾਰਿਨੋ ਉਪਾਸਕਾ, ਏਤੇਸੁ ਦੁਵਿਧੇਸੁ ਸਾਵਕੇਸੁ ਕਥਂਕਰੋ ਸਾਵਕੋ ਸਾਧੁ ਹੋਤੀਤਿ.

੩੮੦-੧. ਇਦਾਨਿ ਏਵਂ ਪੁਟ੍ਠਸ੍ਸ ਭਗਵਤੋ ਬ੍ਯਾਕਰਣਸਮਤ੍ਥਤਂ ਦੀਪੇਨ੍ਤੋ ‘‘ਤੁਵਞ੍ਹੀ’’ਤਿ ਗਾਥਾਦ੍ਵਯਮਾਹ. ਤਤ੍ਥ ਗਤਿਨ੍ਤਿ ਅਜ੍ਝਾਸਯਗਤਿਂ. ਪਰਾਯਣਨ੍ਤਿ ਨਿਪ੍ਫਤ੍ਤਿਂ. ਅਥ ਵਾ ਗਤਿਨ੍ਤਿ ਨਿਰਯਾਦਿਪਞ੍ਚਪ੍ਪਭੇਦਂ. ਪਰਾਯਣਨ੍ਤਿ ਗਤਿਤੋ ਪਰਂ ਅਯਨਂ ਗਤਿਵਿਪ੍ਪਮੋਕ੍ਖਂ ਪਰਿਨਿਬ੍ਬਾਨਂ, ਨ ਚਤ੍ਥਿ ਤੁਲ੍ਯੋਤਿ ਤਯਾ ਸਦਿਸੋ ਨਤ੍ਥਿ. ਸਬ੍ਬਂ ਤੁਵਂ ਞਾਣਮਵੇਚ੍ਚ ਧਮ੍ਮਂ, ਪਕਾਸੇਸਿ ਸਤ੍ਤੇ ਅਨੁਕਮ੍ਪਮਾਨੋਤਿ ਤ੍ਵਂ ਭਗਵਾ ਯਦਤ੍ਥਿ ਞੇਯ੍ਯਂ ਨਾਮ, ਤਂ ਅਨਵਸੇਸਂ ਅਵੇਚ੍ਚ ਪਟਿਵਿਜ੍ਝਿਤ੍ਵਾ ਸਤ੍ਤੇ ਅਨੁਕਮ੍ਪਮਾਨੋ ਸਬ੍ਬਂ ਞਾਣਞ੍ਚ ਧਮ੍ਮਞ੍ਚ ਪਕਾਸੇਸਿ. ਯਂ ਯਂ ਯਸ੍ਸ ਹਿਤਂ ਹੋਤਿ, ਤਂ ਤਂ ਤਸ੍ਸ ਆਵਿਕਾਸਿਯੇਵ ਦੇਸੇਸਿਯੇਵ, ਨ ਤੇ ਅਤ੍ਥਿ ਆਚਰਿਯਮੁਟ੍ਠੀਤਿ ਵੁਤ੍ਤਂ ਹੋਤਿ. ਵਿਰੋਚਸਿ ਵਿਮਲੋਤਿ ਧੂਮਰਜਾਦਿਵਿਰਹਿਤੋ ਵਿਯ ਚਨ੍ਦੋ, ਰਾਗਾਦਿਮਲਾਭਾਵੇਨ ਵਿਮਲੋ ਵਿਰੋਚਸਿ. ਸੇਸਮੇਤ੍ਥ ਉਤ੍ਤਾਨਤ੍ਥਮੇਵ.

੩੮੨. ਇਦਾਨਿ ਯੇਸਂ ਤਦਾ ਭਗਵਾ ਧਮ੍ਮਂ ਦੇਸੇਸਿ, ਤੇ ਦੇਵਪੁਤ੍ਤੇ ਕਿਤ੍ਤੇਤ੍ਵਾ ਭਗਵਨ੍ਤਂ ਪਸਂਸਨ੍ਤੋ ‘‘ਆਗਞ੍ਛੀ ਤੇ ਸਨ੍ਤਿਕੇ’’ਤਿ ਗਾਥਾਦ੍ਵਯਮਾਹ. ਤਤ੍ਥ ਨਾਗਰਾਜਾ ਏਰਾਵਣੋ ਨਾਮਾਤਿ ਅਯਂ ਕਿਰ ਏਰਾਵਣੋ ਨਾਮ ਦੇਵਪੁਤ੍ਤੋ ਕਾਮਰੂਪੀ ਦਿਬ੍ਬੇ ਵਿਮਾਨੇ ਵਸਤਿ. ਸੋ ਯਦਾ ਸਕ੍ਕੋ ਉਯ੍ਯਾਨਕੀਲ਼ਂ ਗਚ੍ਛਤਿ, ਤਦਾ ਦਿਯਡ੍ਢਸਤਯੋਜਨਂ ਕਾਯਂ ਅਭਿਨਿਮ੍ਮਿਨਿਤ੍ਵਾ ਤੇਤ੍ਤਿਂਸ ਕੁਮ੍ਭੇ ਮਾਪੇਤ੍ਵਾ ਏਰਾਵਣੋ ਨਾਮ ਹਤ੍ਥੀ ਹੋਤਿ. ਤਸ੍ਸ ਏਕੇਕਸ੍ਮਿਂ ਕੁਮ੍ਭੇ ਦ੍ਵੇ ਦ੍ਵੇ ਦਨ੍ਤਾ ਹੋਨ੍ਤਿ, ਏਕੇਕਸ੍ਮਿਂ ਦਨ੍ਤੇ ਸਤ੍ਤ ਸਤ੍ਤ ਪੋਕ੍ਖਰਣਿਯੋ, ਏਕੇਕਿਸ੍ਸਾ ਪੋਕ੍ਖਰਣਿਯਾ ਸਤ੍ਤ ਸਤ੍ਤ ਪਦੁਮਿਨਿਯੋ, ਏਕੇਕਿਸ੍ਸਾ ਪਦੁਮਿਨਿਯਾ ਸਤ੍ਤ ਸਤ੍ਤ ਪੁਪ੍ਫਾਨਿ, ਏਕੇਕਸ੍ਮਿਂ ਪੁਪ੍ਫੇ ਸਤ੍ਤ ਸਤ੍ਤ ਪਤ੍ਤਾਨਿ, ਏਕੇਕਸ੍ਮਿਂ ਪਤ੍ਤੇ ਸਤ੍ਤ ਸਤ੍ਤ ਅਚ੍ਛਰਾਯੋ ਨਚ੍ਚਨ੍ਤਿ ਪਦੁਮਚ੍ਛਰਾਯੋਤ੍ਵੇਵ ਵਿਸ੍ਸੁਤਾ ਸਕ੍ਕਸ੍ਸ ਨਾਟਕਿਤ੍ਥਿਯੋ, ਯਾ ਚ ਵਿਮਾਨਵਤ੍ਥੁਸ੍ਮਿਮ੍ਪਿ ‘‘ਭਮਨ੍ਤਿ ਕਞ੍ਞਾ ਪਦੁਮੇਸੁ ਸਿਕ੍ਖਿਤਾ’’ਤਿ (ਵਿ. ਵ. ੧੦੩੪) ਆਗਤਾ. ਤੇਸਂ ਪਨ ਤੇਤ੍ਤਿਸਂਕੁਮ੍ਭਾਨਂ ਮਜ੍ਝੇ ਸੁਦਸ੍ਸਨਕੁਮ੍ਭੋ ਨਾਮ ਤਿਂਸਯੋਜਨਮਤ੍ਤੋ ਹੋਤਿ, ਤਤ੍ਥ ਯੋਜਨਪ੍ਪਮਾਣੋ ਮਣਿਪਲ੍ਲਙ੍ਕੋ ਤਿਯੋਜਨੁਬ੍ਬੇਧੇ ਪੁਪ੍ਫਮਣ੍ਡਪੇ ਅਤ੍ਥਰੀਯਤਿ. ਤਤ੍ਥ ਸਕ੍ਕੋ ਦੇਵਾਨਮਿਨ੍ਦੋ ਅਚ੍ਛਰਾਸਙ੍ਘਪਰਿਵੁਤੋ ਦਿਬ੍ਬਸਮ੍ਪਤ੍ਤਿਂ ਪਚ੍ਚਨੁਭੋਤਿ. ਸਕ੍ਕੇ ਪਨ ਦੇਵਾਨਮਿਨ੍ਦੇ ਉਯ੍ਯਾਨਕੀਲ਼ਾਤੋ ਪਟਿਨਿਵਤ੍ਤੇ ਪੁਨ ਤਂ ਰੂਪਂ ਸਂਹਰਿਤ੍ਵਾਨ ਦੇਵਪੁਤ੍ਤੋਵ ਹੋਤਿ. ਤਂ ਸਨ੍ਧਾਯਾਹ – ‘‘ਆਗਞ੍ਛਿ ਤੇ ਸਨ੍ਤਿਕੇ ਨਾਗਰਾਜਾ ਏਰਾਵਣੋ ਨਾਮਾ’’ਤਿ. ਜਿਨੋਤਿ ਸੁਤ੍ਵਾਤਿ ‘‘ਵਿਜਿਤਪਾਪਧਮ੍ਮੋ ਏਸ ਭਗਵਾ’’ਤਿ ਏਵਂ ਸੁਤ੍ਵਾ. ਸੋਪਿ ਤਯਾ ਮਨ੍ਤਯਿਤ੍ਵਾਤਿ ਤਯਾ ਸਦ੍ਧਿਂ ਮਨ੍ਤਯਿਤ੍ਵਾ, ਪਞ੍ਹਂ ਪੁਚ੍ਛਿਤ੍ਵਾਤਿ ਅਧਿਪ੍ਪਾਯੋ. ਅਜ੍ਝਗਮਾਤਿ ਅਧਿਅਗਮਾ, ਗਤੋਤਿ ਵੁਤ੍ਤਂ ਹੋਤਿ. ਸਾਧੂਤਿ ਸੁਤ੍ਵਾਨ ਪਤੀਤਰੂਪੋਤਿ ਤਂ ਪਞ੍ਹਂ ਸੁਤ੍ਵਾ ‘‘ਸਾਧੁ ਭਨ੍ਤੇ’’ਤਿ ਅਭਿਨਨ੍ਦਿਤ੍ਵਾ ਤੁਟ੍ਠਰੂਪੋ ਗਤੋਤਿ ਅਤ੍ਥੋ.

੩੮੩. ਰਾਜਾਪਿ ਤਂ ਵੇਸ੍ਸਵਣੋ ਕੁਵੇਰੋਤਿ ਏਤ੍ਥ ਸੋ ਯਕ੍ਖੋ ਰਞ੍ਜਨਟ੍ਠੇਨ ਰਾਜਾ, ਵਿਸਾਣਾਯ ਰਾਜਧਾਨਿਯਾ ਰਜ੍ਜਂ ਕਾਰੇਤੀਤਿ ਵੇਸ੍ਸਵਣੋ, ਪੁਰਿਮਨਾਮੇਨ ਕੁਵੇਰੋਤਿ ਵੇਦਿਤਬ੍ਬੋ. ਸੋ ਕਿਰ ਕੁਵੇਰੋ ਨਾਮ ਬ੍ਰਾਹ੍ਮਣਮਹਾਸਾਲੋ ਹੁਤ੍ਵਾ ਦਾਨਾਦੀਨਿ ਪੁਞ੍ਞਾਨਿ ਕਤ੍ਵਾ ਵਿਸਾਣਾਯ ਰਾਜਧਾਨਿਯਾ ਅਧਿਪਤਿ ਹੁਤ੍ਵਾ ਨਿਬ੍ਬਤ੍ਤੋ. ਤਸ੍ਮਾ ‘‘ਕੁਵੇਰੋ ਵੇਸ੍ਸਵਣੋ’’ਤਿ ਵੁਚ੍ਚਤਿ. ਵੁਤ੍ਤਞ੍ਚੇਤਂ ਆਟਾਨਾਟਿਯਸੁਤ੍ਤੇ –

‘‘ਕੁਵੇਰਸ੍ਸ ਖੋ ਪਨ, ਮਾਰਿਸ, ਮਹਾਰਾਜਸ੍ਸ ਵਿਸਾਣਾ ਨਾਮ ਰਾਜਧਾਨੀ, ਤਸ੍ਮਾ ਕੁਵੇਰੋ ਮਹਾਰਾਜਾ ‘ਵੇਸ੍ਸਵਣੋ’ਤਿ ਪਵੁਚ੍ਚਤੀ’’ਤਿ (ਦੀ. ਨਿ. ੩.੨੯੧) –

ਸੇਸਮੇਤ੍ਥ ਪਾਕਟਮੇਵ.

ਤਤ੍ਥ ਸਿਯਾ – ਕਸ੍ਮਾ ਪਨ ਦੂਰਤਰੇ ਤਾਵਤਿਂਸਭਵਨੇ ਵਸਨ੍ਤੋ ਏਰਾਵਣੋ ਪਠਮਂ ਆਗਤੋ, ਵੇਸ੍ਸਵਣੋ ਪਚ੍ਛਾ, ਏਕਨਗਰੇਵ ਵਸਨ੍ਤੋ ਅਯਂ ਉਪਾਸਕੋ ਸਬ੍ਬਪਚ੍ਛਾ, ਕਥਞ੍ਚ ਸੋ ਤੇਸਂ ਆਗਮਨਂ ਅਞ੍ਞਾਸਿ, ਯੇਨ ਏਵਮਾਹਾਤਿ? ਵੁਚ੍ਚਤੇ – ਵੇਸ੍ਸਵਣੋ ਕਿਰ ਤਦਾ ਅਨੇਕਸਹਸ੍ਸਪਵਾਲ਼ਪਲ੍ਲਙ੍ਕਂ ਦ੍ਵਾਦਸਯੋਜਨਂ ਨਾਰਿਵਾਹਨਂ ਅਭਿਰੁਯ੍ਹ ਪਵਾਲ਼ਕੁਨ੍ਤਂ ਉਚ੍ਚਾਰੇਤ੍ਵਾ ਦਸਸਹਸ੍ਸਕੋਟਿਯਕ੍ਖੇਹਿ ਪਰਿਵੁਤੋ ‘‘ਭਗਵਨ੍ਤਂ ਪਞ੍ਹਂ ਪੁਚ੍ਛਿਸ੍ਸਾਮੀ’’ਤਿ ਆਕਾਸਟ੍ਠਕਵਿਮਾਨਾਨਿ ਪਰਿਹਰਿਤ੍ਵਾ ਮਗ੍ਗੇਨ ਮਗ੍ਗਂ ਆਗਚ੍ਛਨ੍ਤੋ ਵੇਲ਼ੁਕਣ੍ਡਕਨਗਰੇ ਨਨ੍ਦਮਾਤਾਯ ਉਪਾਸਿਕਾਯ ਨਿਵੇਸਨਸ੍ਸ ਉਪਰਿਭਾਗਂ ਸਮ੍ਪਤ੍ਤੋ. ਉਪਾਸਿਕਾਯ ਅਯਮਾਨੁਭਾਵੋ – ਪਰਿਸੁਦ੍ਧਸੀਲਾ ਹੋਤਿ, ਨਿਚ੍ਚਂ ਵਿਕਾਲਭੋਜਨਾ ਪਟਿਵਿਰਤਾ, ਪਿਟਕਤ੍ਤਯਧਾਰਿਨੀ, ਅਨਾਗਾਮਿਫਲੇ ਪਤਿਟ੍ਠਿਤਾ. ਸਾ ਤਮ੍ਹਿ ਸਮਯੇ ਸੀਹਪਞ੍ਜਰਂ ਉਗ੍ਘਾਟੇਤ੍ਵਾ ਉਤੁਗ੍ਗਹਣਤ੍ਥਾਯ ਮਾਲੁਤੇਰਿਤੋਕਾਸੇ ਠਤ੍ਵਾ ਅਟ੍ਠਕਪਾਰਾਯਨਵਗ੍ਗੇ ਪਰਿਮਣ੍ਡਲੇਹਿ ਪਦਬ੍ਯਞ੍ਜਨੇਹਿ ਮਧੁਰੇਨ ਸਰੇਨ ਭਾਸਤਿ. ਵੇਸ੍ਸਵਣੋ ਤਤ੍ਥੇਵ ਯਾਨਾਨਿ ਠਪੇਤ੍ਵਾ ਯਾਵ ਉਪਾਸਿਕਾ ‘‘ਇਦਮਵੋਚ ਭਗਵਾ ਮਗਧੇਸੁ ਵਿਹਰਨ੍ਤੋ ਪਾਸਾਣਕੇ ਚੇਤਿਯੇ ਪਰਿਚਾਰਕਸੋਲ਼ਸਨ੍ਨਂ ਬ੍ਰਾਹ੍ਮਣਾਨ’’ਨ੍ਤਿ ਨਿਗਮਨਂ ਅਭਾਸਿ, ਤਾਵ ਸਬ੍ਬਂ ਸੁਤ੍ਵਾ ਵਗ੍ਗਪਰਿਯੋਸਾਨੇ ਸੁਵਣ੍ਣਮੁਰਜਸਦਿਸਂ ਮਹਨ੍ਤਂ ਗੀਵਂ ਪਗ੍ਗਹੇਤ੍ਵਾ ‘‘ਸਾਧੁ ਸਾਧੁ ਭਗਿਨੀ’’ਤਿ ਸਾਧੁਕਾਰਮਦਾਸਿ. ਸਾ ‘‘ਕੋ ਏਤ੍ਥਾ’’ਤਿ ਆਹ. ‘‘ਅਹਂ ਭਗਿਨਿ ਵੇਸ੍ਸਵਣੋ’’ਤਿ. ਉਪਾਸਿਕਾ ਕਿਰ ਪਠਮਂ ਸੋਤਾਪਨ੍ਨਾ ਅਹੋਸਿ, ਪਚ੍ਛਾ ਵੇਸ੍ਸਵਣੋ. ਤਂ ਸੋ ਧਮ੍ਮਤੋ ਸਹੋਦਰਭਾਵਂ ਸਨ੍ਧਾਯ ਉਪਾਸਿਕਂ ਭਗਿਨਿਵਾਦੇਨ ਸਮੁਦਾਚਰਤਿ. ਉਪਾਸਿਕਾਯ ਚ ‘‘ਵਿਕਾਲੋ, ਭਾਤਿਕ ਭਦ੍ਰਮੁਖ, ਯਸ੍ਸ ਦਾਨਿ ਕਾਲਂ ਮਞ੍ਞਸੀ’’ਤਿ ਵੁਤ੍ਤੋ ‘‘ਅਹਂ ਭਗਿਨਿ ਤਯਿ ਪਸਨ੍ਨੋ ਪਸਨ੍ਨਾਕਾਰਂ ਕਰੋਮੀ’’ਤਿ ਆਹ. ਤੇਨ ਹਿ ਭਦ੍ਰਮੁਖ, ਮਮ ਖੇਤ੍ਤੇ ਨਿਪ੍ਫਨ੍ਨਂ ਸਾਲਿਂ ਕਮ੍ਮਕਰਾ ਆਹਰਿਤੁਂ ਨ ਸਕ੍ਕੋਨ੍ਤਿ, ਤਂ ਤਵ ਪਰਿਸਾਯ ਆਣਾਪੇਹੀਤਿ. ਸੋ ‘‘ਸਾਧੁ ਭਗਿਨੀ’’ਤਿ ਯਕ੍ਖੇ ਆਣਾਪੇਸਿ. ਤੇ ਅਡ੍ਢਤੇਰਸ ਕੋਟ੍ਠਾਗਾਰਸਤਾਨਿ ਪੂਰੇਸੁਂ. ਤਤੋ ਪਭੁਤਿ ਕੋਟ੍ਠਾਗਾਰਂ ਊਨਂ ਨਾਮ ਨਾਹੋਸਿ, ‘‘ਨਨ੍ਦਮਾਤੁ ਕੋਟ੍ਠਾਗਾਰਂ ਵਿਯਾ’’ਤਿ ਲੋਕੇ ਨਿਦਸ੍ਸਨਂ ਅਹੋਸਿ. ਵੇਸ੍ਸਵਣੋ ਕੋਟ੍ਠਾਗਾਰਾਨਿ ਪੂਰੇਤ੍ਵਾ ਭਗਵਨ੍ਤਂ ਉਪਸਙ੍ਕਮਿ. ਭਗਵਾ ‘‘ਵਿਕਾਲੇ ਆਗਤੋਸੀ’’ਤਿ ਆਹ. ਅਥ ਭਗਵਤੋ ਸਬ੍ਬਂ ਆਰੋਚੇਸਿ. ਇਮਿਨਾ ਕਾਰਣੇਨ ਆਸਨ੍ਨਤਰੇਪਿ ਚਾਤੁਮਹਾਰਾਜਿਕਭਵਨੇ ਵਸਨ੍ਤੋ ਵੇਸ੍ਸਵਣੋ ਪਚ੍ਛਾ ਆਗਤੋ. ਏਰਾਵਣਸ੍ਸ ਪਨ ਨ ਕਿਞ੍ਚਿ ਅਨ੍ਤਰਾ ਕਰਣੀਯਂ ਅਹੋਸਿ, ਤੇਨ ਸੋ ਪਠਮਤਰਂ ਆਗਤੋ.

ਅਯਂ ਪਨ ਉਪਾਸਕੋ ਕਿਞ੍ਚਾਪਿ ਅਨਾਗਾਮੀ ਪਕਤਿਯਾਵ ਏਕਭਤ੍ਤਿਕੋ, ਤਥਾਪਿ ਤਦਾ ਉਪੋਸਥਦਿਵਸੋਤਿ ਕਤ੍ਵਾ ਉਪੋਸਥਙ੍ਗਾਨਿ ਅਧਿਟ੍ਠਾਯ ਸਾਯਨ੍ਹਸਮਯਂ ਸੁਨਿਵਤ੍ਥੋ ਸੁਪਾਰੁਤੋ ਪਞ੍ਚਸਤਉਪਾਸਕਪਰਿਵੁਤੋ ਜੇਤਵਨਂ ਗਨ੍ਤ੍ਵਾ ਧਮ੍ਮਦੇਸਨਂ ਸੁਤ੍ਵਾ ਅਤ੍ਤਨੋ ਘਰਂ ਆਗਮ੍ਮ ਤੇਸਂ ਉਪਾਸਕਾਨਂ ਸਰਣਸੀਲਉਪੋਸਥਾਨਿਸਂਸਾਦਿਭੇਦਂ ਉਪਾਸਕਧਮ੍ਮਂ ਕਥੇਤ੍ਵਾ ਤੇ ਉਪਾਸਕੇ ਉਯ੍ਯੋਜੇਸਿ. ਤੇਸਞ੍ਚ ਤਸ੍ਸੇਵ ਘਰੇ ਮੁਟ੍ਠਿਹਤ੍ਥਪ੍ਪਮਾਣਪਾਦਕਾਨਿ ਪਞ੍ਚ ਕਪ੍ਪਿਯਮਞ੍ਚਸਤਾਨਿ ਪਾਟੇਕ੍ਕੋਵਰਕੇਸੁ ਪਞ੍ਞਤ੍ਤਾਨਿ ਹੋਨ੍ਤਿ. ਤੇ ਅਤ੍ਤਨੋ ਅਤ੍ਤਨੋ ਓਵਰਕਂ ਪਵਿਸਿਤ੍ਵਾ ਸਮਾਪਤ੍ਤਿਂ ਅਪ੍ਪੇਤ੍ਵਾ ਨਿਸੀਦਿਂਸੁ, ਉਪਾਸਕੋਪਿ ਤਥੇਵਾਕਾਸਿ. ਤੇਨ ਚ ਸਮਯੇਨ ਸਾਵਤ੍ਥਿਨਗਰੇ ਸਤ੍ਤਪਞ੍ਞਾਸ ਕੁਲਸਤਸਹਸ੍ਸਾਨਿ ਵਸਨ੍ਤਿ, ਮਨੁਸ੍ਸਗਣਨਾਯ ਅਟ੍ਠਾਰਸਕੋਟਿਮਨੁਸ੍ਸਾ. ਤੇਨ ਪਠਮਯਾਮੇ ਹਤ੍ਥਿਅਸ੍ਸਮਨੁਸ੍ਸਭੇਰਿਸਦ੍ਦਾਦੀਹਿ ਸਾਵਤ੍ਥਿਨਗਰਂ ਮਹਾਸਮੁਦ੍ਦੋ ਵਿਯ ਏਕਸਦ੍ਦਂ ਹੋਤਿ. ਮਜ੍ਝਿਮਯਾਮਸਮਨਨ੍ਤਰੇ ਸੋ ਸਦ੍ਦੋ ਪਟਿਪ੍ਪਸ੍ਸਮ੍ਭਤਿ. ਤਮ੍ਹਿ ਕਾਲੇ ਉਪਾਸਕੋ ਸਮਾਪਤ੍ਤਿਤੋ ਵੁਟ੍ਠਾਯ ਅਤ੍ਤਨੋ ਗੁਣੇ ਆਵਜ੍ਜੇਤ੍ਵਾ ‘‘ਯੇਨਾਹਂ ਮਗ੍ਗਸੁਖੇਨ ਫਲਸੁਖੇਨ ਸੁਖਿਤੋ ਵਿਹਰਾਮਿ, ਇਦਂ ਸੁਖਂ ਕਂ ਨਿਸ੍ਸਾਯ ਲਦ੍ਧ’’ਨ੍ਤਿ ਚਿਨ੍ਤੇਤ੍ਵਾ ‘‘ਭਗਵਨ੍ਤਂ ਨਿਸ੍ਸਾਯਾ’’ਤਿ ਭਗਵਤਿ ਚਿਤ੍ਤਂ ਪਸਾਦੇਤ੍ਵਾ ‘‘ਭਗਵਾ ਏਤਰਹਿ ਕਤਮੇਨ ਵਿਹਾਰੇਨ ਵਿਹਰਤੀ’’ਤਿ ਆਵਜ੍ਜੇਨ੍ਤੋ ਦਿਬ੍ਬੇਨ ਚਕ੍ਖੁਨਾ ਏਰਾਵਣਵੇਸ੍ਸਵਣੇ ਦਿਸ੍ਵਾ ਦਿਬ੍ਬਾਯ ਸੋਤਧਾਤੁਯਾ ਧਮ੍ਮਦੇਸਨਂ ਸੁਤ੍ਵਾ ਚੇਤੋਪਰਿਯਞਾਣੇਨ ਤੇਸਂ ਪਸਨ੍ਨਚਿਤ੍ਤਤਂ ਞਤ੍ਵਾ ‘‘ਯਂਨੂਨਾਹਮ੍ਪਿ ਭਗਵਨ੍ਤਂ ਉਭਯਹਿਤਂ ਪਟਿਪਦਂ ਪੁਚ੍ਛੇਯ੍ਯ’’ਨ੍ਤਿ ਚਿਨ੍ਤੇਸਿ. ਤਸ੍ਮਾ ਸੋ ਏਕਨਗਰੇ ਵਸਨ੍ਤੋਪਿ ਸਬ੍ਬਪਚ੍ਛਾ ਆਗਤੋ, ਏਵਞ੍ਚ ਨੇਸਂ ਆਗਮਨਂ ਅਞ੍ਞਾਸਿ. ਤੇਨਾਹ – ‘‘ਆਗਞ੍ਛਿ ਤੇ ਸਨ੍ਤਿਕੇ ਨਾਗਰਾਜਾ…ਪੇ… ਸੋ ਚਾਪਿ ਸੁਤ੍ਵਾਨ ਪਤੀਤਰੂਪੋ’’ਤਿ.

੩੮੪. ਇਦਾਨਿ ਇਤੋ ਬਹਿਦ੍ਧਾ ਲੋਕਸਮ੍ਮਤੇਹਿ ਸਮਣਬ੍ਰਾਹ੍ਮਣੇਹਿ ਉਕ੍ਕਟ੍ਠਭਾਵੇਨ ਭਗਵਨ੍ਤਂ ਪਸਂਸਨ੍ਤੋ ‘‘ਯੇ ਕੇਚਿਮੇ’’ਤਿ ਗਾਥਾਦ੍ਵਯਮਾਹ. ਤਤ੍ਥ ਤਿਤ੍ਥਿਯਾਤਿ ਨਨ੍ਦਵਚ੍ਛਸਂਕਿਚ੍ਚੇਹਿ ਆਦਿਪੁਗ੍ਗਲੇਹਿ ਤੀਹਿ ਤਿਤ੍ਥਕਰੇਹਿ ਕਤੇ ਦਿਟ੍ਠਿਤਿਤ੍ਥੇ ਜਾਤਾ, ਤੇਸਂ ਸਾਸਨੇ ਪਬ੍ਬਜਿਤਾ ਪੂਰਣਾਦਯੋ ਛ ਸਤ੍ਥਾਰੋ. ਤਤ੍ਥ ਨਾਟਪੁਤ੍ਤੋ ਨਿਗਣ੍ਠੋ, ਅਵਸੇਸਾ ਆਜੀਵਕਾਤਿ ਤੇ ਸਬ੍ਬੇ ਦਸ੍ਸੇਨ੍ਤੋ ਆਹ ‘‘ਯੇ ਕੇਚਿਮੇ ਤਿਤ੍ਥਿਯਾ ਵਾਦਸੀਲਾ’’ਤਿ, ‘‘ਮਯਂ ਸਮ੍ਮਾ ਪਟਿਪਨ੍ਨਾ, ਅਞ੍ਞੇ ਮਿਚ੍ਛਾ ਪਟਿਪਨ੍ਨਾ’’ਤਿ ਏਵਂ ਵਾਦਕਰਣਸੀਲਾ ਲੋਕਂ ਮੁਖਸਤ੍ਤੀਹਿ ਵਿਤੁਦਨ੍ਤਾ ਵਿਚਰਨ੍ਤਿ. ਆਜੀਵਕਾ ਵਾਤਿ ਤੇ ਏਕਜ੍ਝਮੁਦ੍ਦਿਟ੍ਠੇ ਭਿਨ੍ਦਿਤ੍ਵਾ ਦਸ੍ਸੇਤਿ. ਨਾਤਿਤਰਨ੍ਤੀਤਿ ਨਾਤਿਕ੍ਕਮਨ੍ਤਿ. ਸਬ੍ਬੇਤਿ ਅਞ੍ਞੇਪਿ ਯੇ ਕੇਚਿ ਤਿਤ੍ਥਿਯਸਾਵਕਾਦਯੋ, ਤੇਪਿ ਪਰਿਗ੍ਗਣ੍ਹਨ੍ਤੋ ਆਹ. ‘‘ਠਿਤੋ ਵਜਨ੍ਤਂ ਵਿਯਾ’’ਤਿ ਯਥਾ ਕੋਚਿ ਠਿਤੋ ਗਤਿਵਿਕਲੋ ਸੀਘਗਾਮਿਨਂ ਪੁਰਿਸਂ ਗਚ੍ਛਨ੍ਤਂ ਨਾਤਿਤਰੇਯ੍ਯ, ਏਵਂ ਤੇ ਪਞ੍ਞਾਗਤਿਯਾ ਅਭਾਵੇਨ ਤੇ ਤੇ ਅਤ੍ਥਪ੍ਪਭੇਦੇ ਬੁਜ੍ਝਿਤੁਂ ਅਸਕ੍ਕੋਨ੍ਤਾ ਠਿਤਾ, ਅਤਿਜਵਨਪਞ੍ਞਂ ਭਗਵਨ੍ਤਂ ਨਾਤਿਤਰਨ੍ਤੀਤਿ ਅਤ੍ਥੋ.

੩੮੫. ਬ੍ਰਾਹ੍ਮਣਾ ਵਾਦਸੀਲਾ ਵੁਦ੍ਧਾ ਚਾਤਿ ਏਤ੍ਤਾਵਤਾ ਚਙ੍ਕੀਤਾਰੁਕ੍ਖਪੋਕ੍ਖਰਸਾਤਿਜਾਣੁਸ੍ਸੋਣਿਆਦਯੋ ਦਸ੍ਸੇਤਿ, ਅਪਿ ਬ੍ਰਾਹ੍ਮਣਾ ਸਨ੍ਤਿ ਕੇਚੀਤਿ ਇਮਿਨਾ ਮਜ੍ਝਿਮਾਪਿ ਦਹਰਾਪਿ ਕੇਵਲਂ ਬ੍ਰਾਹ੍ਮਣਾ ਸਨ੍ਤਿ ਅਤ੍ਥਿ ਉਪਲਬ੍ਭਨ੍ਤਿ ਕੇਚੀਤਿ ਏਵਂ ਅਸ੍ਸਲਾਯਨਵਾਸੇਟ੍ਠਅਮ੍ਬਟ੍ਠਉਤ੍ਤਰਮਾਣਵਕਾਦਯੋ ਦਸ੍ਸੇਤਿ. ਅਤ੍ਥਬਦ੍ਧਾਤਿ ‘‘ਅਪਿ ਨੁ ਖੋ ਇਮਂ ਪਞ੍ਹਂ ਬ੍ਯਾਕਰੇਯ੍ਯ, ਇਮਂ ਕਙ੍ਖਂ ਛਿਨ੍ਦੇਯ੍ਯਾ’’ਤਿ ਏਵਂ ਅਤ੍ਥਬਦ੍ਧਾ ਭਵਨ੍ਤਿ. ਯੇ ਚਾਪਿ ਅਞ੍ਞੇਤਿ ਅਞ੍ਞੇਪਿ ਯੇ ‘‘ਮਯਂ ਵਾਦਿਨੋ’’ਤਿ ਏਵਂ ਮਞ੍ਞਮਾਨਾ ਵਿਚਰਨ੍ਤਿ ਖਤ੍ਤਿਯਪਣ੍ਡਿਤਬ੍ਰਾਹ੍ਮਣਬ੍ਰਹ੍ਮਦੇਵਯਕ੍ਖਾਦਯੋ ਅਪਰਿਮਾਣਾ. ਤੇਪਿ ਸਬ੍ਬੇ ਤਯਿ ਅਤ੍ਥਬਦ੍ਧਾ ਭਵਨ੍ਤੀਤਿ ਦਸ੍ਸੇਤਿ.

੩੮੬-੭. ਏਵਂ ਨਾਨਪ੍ਪਕਾਰੇਹਿ ਭਗਵਨ੍ਤਂ ਪਸਂਸਿਤ੍ਵਾ ਇਦਾਨਿ ਧਮ੍ਮੇਨੇਵ ਤਂ ਪਸਂਸਿਤ੍ਵਾ ਧਮ੍ਮਕਥਂ ਯਾਚਨ੍ਤੋ ‘‘ਅਯਞ੍ਹਿ ਧਮ੍ਮੋ’’ਤਿ ਗਾਥਾਦ੍ਵਯਮਾਹ. ਤਤ੍ਥ ਅਯਞ੍ਹਿ ਧਮ੍ਮੋਤਿ ਸਤ੍ਤਤਿਂਸ ਬੋਧਿਪਕ੍ਖਿਯਧਮ੍ਮੇ ਸਨ੍ਧਾਯਾਹ. ਨਿਪੁਣੋਤਿ ਸਣ੍ਹੋ ਦੁਪ੍ਪਟਿਵਿਜ੍ਝੋ. ਸੁਖੋਤਿ ਪਟਿਵਿਦ੍ਧੋ ਸਮਾਨੋ ਲੋਕੁਤ੍ਤਰਸੁਖਮਾਵਹਤਿ, ਤਸ੍ਮਾ ਸੁਖਾਵਹਤ੍ਤਾ ‘‘ਸੁਖੋ’’ਤਿ ਵੁਚ੍ਚਤਿ. ਸੁਪ੍ਪਵੁਤ੍ਤੋਤਿ ਸੁਦੇਸਿਤੋ. ਸੁਸ੍ਸੂਸਮਾਨਾਤਿ ਸੋਤੁਕਾਮਮ੍ਹਾਤਿ ਅਤ੍ਥੋ. ਤਂ ਨੋ ਵਦਾਤਿ ਤਂ ਧਮ੍ਮਂ ਅਮ੍ਹਾਕਂ ਵਦ. ‘‘ਤ੍ਵਂ ਨੋ’’ਤਿਪਿ ਪਾਠੋ, ਤ੍ਵਂ ਅਮ੍ਹਾਕਂ ਵਦਾਤਿ ਅਤ੍ਥੋ. ਸਬ੍ਬੇਪਿਮੇ ਭਿਕ੍ਖਵੋਤਿ ਤਙ੍ਖਣਂ ਨਿਸਿਨ੍ਨਾਨਿ ਕਿਰ ਪਞ੍ਚ ਭਿਕ੍ਖੁਸਤਾਨਿ ਹੋਨ੍ਤਿ, ਤਾਨਿ ਦਸ੍ਸੇਨ੍ਤੋ ਯਾਚਤਿ. ਉਪਾਸਕਾ ਚਾਪੀਤਿ ਅਤ੍ਤਨੋ ਪਰਿਵਾਰੇ ਅਞ੍ਞੇ ਚ ਦਸ੍ਸੇਤਿ. ਸੇਸਮੇਤ੍ਥ ਪਾਕਟਮੇਵ.

੩੮੮. ਅਥ ਭਗਵਾ ਅਨਗਾਰਿਯਪਟਿਪਦਂ ਤਾਵ ਦਸ੍ਸੇਤੁਂ ਭਿਕ੍ਖੂ ਆਮਨ੍ਤੇਤ੍ਵਾ ‘‘ਸੁਣਾਥ ਮੇ ਭਿਕ੍ਖਵੋ’’ਤਿਆਦਿਮਾਹ. ਤਤ੍ਥ ਧਮ੍ਮਂ ਧੁਤਂ ਤਞ੍ਚ ਚਰਾਥ ਸਬ੍ਬੇਤਿ ਕਿਲੇਸੇ ਧੁਨਾਤੀਤਿ ਧੁਤੋ, ਏਵਰੂਪਂ ਕਿਲੇਸਧੁਨਨਕਂ ਪਟਿਪਦਾਧਮ੍ਮਂ ਸਾਵਯਾਮਿ ਵੋ, ਤਞ੍ਚ ਮਯਾ ਸਾਵਿਤਂ ਸਬ੍ਬੇ ਚਰਥ ਪਟਿਪਜ੍ਜਥ, ਮਾ ਪਮਾਦਿਤ੍ਥਾਤਿ ਵੁਤ੍ਤਂ ਹੋਤਿ. ਇਰਿਯਾਪਥਨ੍ਤਿ ਗਮਨਾਦਿਚਤੁਬ੍ਬਿਧਂ. ਪਬ੍ਬਜਿਤਾਨੁਲੋਮਿਕਨ੍ਤਿ ਸਮਣਸਾਰੁਪ੍ਪਂ ਸਤਿਸਮ੍ਪਜਞ੍ਞਯੁਤ੍ਤਂ. ਅਰਞ੍ਞੇ ਕਮ੍ਮਟ੍ਠਾਨਾਨੁਯੋਗਵਸੇਨ ਪਵਤ੍ਤਮੇਵਾਤਿ ਅਪਰੇ. ਸੇਵੇਥ ਨਨ੍ਤਿ ਤਂ ਇਰਿਯਾਪਥਂ ਭਜੇਯ੍ਯ. ਅਤ੍ਥਦਸੋਤਿ ਹਿਤਾਨੁਪਸ੍ਸੀ. ਮੁਤੀਮਾਤਿ ਬੁਦ੍ਧਿਮਾ. ਸੇਸਮੇਤ੍ਥ ਗਾਥਾਯ ਪਾਕਟਮੇਵ.

੩੮੯. ਨੋ ਵੇ ਵਿਕਾਲੇਤਿ ਏਵਂ ਪਬ੍ਬਜਿਤਾਨੁਲੋਮਿਕਂ ਇਰਿਯਾਪਥਂ ਸੇਵਮਾਨੋ ਚ ਦਿਵਾਮਜ੍ਝਨ੍ਹਿਕਵੀਤਿਕ੍ਕਮਂ ਉਪਾਦਾਯ ਵਿਕਾਲੇ ਨ ਚਰੇਯ੍ਯ ਭਿਕ੍ਖੁ, ਯੁਤ੍ਤਕਾਲੇ ਏਵ ਪਨ ਗਾਮਂ ਪਿਣ੍ਡਾਯ ਚਰੇਯ੍ਯ. ਕਿਂ ਕਾਰਣਂ? ਅਕਾਲਚਾਰਿਞ੍ਹਿ ਸਜਨ੍ਤਿ ਸਙ੍ਗਾ, ਅਕਾਲਚਾਰਿਂ ਪੁਗ੍ਗਲਂ ਰਾਗਸਙ੍ਗਾਦਯੋ ਅਨੇਕੇ ਸਙ੍ਗਾ ਸਜਨ੍ਤਿ ਪਰਿਸ੍ਸਜਨ੍ਤਿ ਉਪਗੁਹਨ੍ਤਿ ਅਲ੍ਲੀਯਨ੍ਤਿ. ਤਸ੍ਮਾ ਵਿਕਾਲੇ ਨ ਚਰਨ੍ਤਿ ਬੁਦ੍ਧਾ, ਤਸ੍ਮਾ ਯੇ ਚਤੁਸਚ੍ਚਬੁਦ੍ਧਾ ਅਰਿਯਪੁਗ੍ਗਲਾ, ਨ ਤੇ ਵਿਕਾਲੇ ਪਿਣ੍ਡਾਯ ਚਰਨ੍ਤੀਤਿ. ਤੇਨ ਕਿਰ ਸਮਯੇਨ ਵਿਕਾਲਭੋਜਨਸਿਕ੍ਖਾਪਦਂ ਅਪ੍ਪਞ੍ਞਤ੍ਤਂ ਹੋਤਿ, ਤਸ੍ਮਾ ਧਮ੍ਮਦੇਸਨਾਵਸੇਨੇਵੇਤ੍ਥ ਪੁਥੁਜ੍ਜਨਾਨਂ ਆਦੀਨਵਂ ਦਸ੍ਸੇਨ੍ਤੋ ਇਮਂ ਗਾਥਮਾਹ. ਅਰਿਯਾ ਪਨ ਸਹ ਮਗ੍ਗਪਟਿਲਾਭਾ ਏਵ ਤਤੋ ਪਟਿਵਿਰਤਾ ਹੋਨ੍ਤਿ, ਏਸਾ ਧਮ੍ਮਤਾ.

੩੯੦. ਏਵਂ ਵਿਕਾਲਚਰਿਯਂ ਪਟਿਸੇਧੇਤ੍ਵਾ ‘‘ਕਾਲੇ ਚਰਨ੍ਤੇਨਪਿ ਏਵਂ ਚਰਿਤਬ੍ਬ’’ਨ੍ਤਿ ਦਸ੍ਸੇਨ੍ਤੋ ਆਹ ‘‘ਰੂਪਾ ਚ ਸਦ੍ਦਾ ਚਾ’’ਤਿ. ਤਸ੍ਸਤ੍ਥੋ – ਯੇ ਤੇ ਰੂਪਾਦਯੋ ਨਾਨਪ੍ਪਕਾਰਕਂ ਮਦਂ ਜਨੇਨ੍ਤਾ ਸਤ੍ਤੇ ਸਮ੍ਮਦਯਨ੍ਤਿ, ਤੇਸੁ ਪਿਣ੍ਡਪਾਤਪਾਰਿਸੁਦ੍ਧਿਸੁਤ੍ਤਾਦੀਸੁ (ਮ. ਨਿ. ੩.੪੩੮ ਆਦਯੋ) ਵੁਤ੍ਤਨਯੇਨ ਛਨ੍ਦਂ ਵਿਨੋਦੇਤ੍ਵਾ ਯੁਤ੍ਤਕਾਲੇਨੇਵ ਪਾਤਰਾਸਂ ਪਵਿਸੇਯ੍ਯਾਤਿ. ਏਤ੍ਥ ਚ ਪਾਤੋ ਅਸਿਤਬ੍ਬੋਤਿ ਪਾਤਰਾਸੋ, ਪਿਣ੍ਡਪਾਤਸ੍ਸੇਤਂ ਨਾਮਂ. ਯੋ ਯਤ੍ਥ ਲਬ੍ਭਤਿ, ਸੋ ਪਦੇਸੋਪਿ ਤਂ ਯੋਗੇਨ ‘‘ਪਾਤਰਾਸੋ’’ਤਿ ਇਧ ਵੁਤ੍ਤੋ. ਯਤੋ ਪਿਣ੍ਡਪਾਤਂ ਲਭਤਿ, ਤਂ ਓਕਾਸਂ ਗਚ੍ਛੇਯ੍ਯਾਤਿ ਏਵਮੇਤ੍ਥ ਅਤ੍ਥੋ ਵੇਦਿਤਬ੍ਬੋ.

੩੯੧. ਏਵਂ ਪਵਿਟ੍ਠੋ –

‘‘ਪਿਣ੍ਡਞ੍ਚ ਭਿਕ੍ਖੁ ਸਮਯੇਨ ਲਦ੍ਧਾ,

ਏਕੋ ਪਟਿਕ੍ਕਮ੍ਮ ਰਹੋ ਨਿਸੀਦੇ;

ਅਜ੍ਝਤ੍ਤਚਿਨ੍ਤੀ ਨ ਮਨੋ ਬਹਿਦ੍ਧਾ,

ਨਿਚ੍ਛਾਰਯੇ ਸਙ੍ਗਹਿਤਤ੍ਤਭਾਵੋ’’.

ਤਤ੍ਥ ਪਿਣ੍ਡਨ੍ਤਿ ਮਿਸ੍ਸਕਭਿਕ੍ਖਂ, ਸਾ ਹਿ ਤਤੋ ਤਤੋ ਸਮੋਧਾਨੇਤ੍ਵਾ ਸਮ੍ਪਿਣ੍ਡਿਤਟ੍ਠੇਨ ‘‘ਪਿਣ੍ਡੋ’’ਤਿ ਵੁਚ੍ਚਤਿ. ਸਮਯੇਨਾਤਿ ਅਨ੍ਤੋਮਜ੍ਝਨ੍ਹਿਕਕਾਲੇ. ਏਕੋ ਪਟਿਕ੍ਕਮ੍ਮਾਤਿ ਕਾਯਵਿਵੇਕਂ ਸਮ੍ਪਾਦੇਨ੍ਤੋ ਅਦੁਤਿਯੋ ਨਿਵਤ੍ਤਿਤ੍ਵਾ. ਅਜ੍ਝਤ੍ਤਚਿਨ੍ਤੀਤਿ ਤਿਲਕ੍ਖਣਂ ਆਰੋਪੇਤ੍ਵਾ ਖਨ੍ਧਸਨ੍ਤਾਨਂ ਚਿਨ੍ਤੇਨ੍ਤੋ. ਨ ਮਨੋ ਬਹਿਦ੍ਧਾ ਨਿਚ੍ਛਾਰਯੇਤਿ ਬਹਿਦ੍ਧਾ ਰੂਪਾਦੀਸੁ ਰਾਗਵਸੇਨ ਚਿਤ੍ਤਂ ਨ ਨੀਹਰੇ. ਸਙ੍ਗਹਿਤਤ੍ਤਭਾਵੋਤਿ ਸੁਟ੍ਠੁ ਗਹਿਤਚਿਤ੍ਤੋ.

੩੯੨. ਏਵਂ ਵਿਹਰਨ੍ਤੋ ਚ –

‘‘ਸਚੇਪਿ ਸੋ ਸਲ੍ਲਪੇ ਸਾਵਕੇਨ,

ਅਞ੍ਞੇਨ ਵਾ ਕੇਨਚਿ ਭਿਕ੍ਖੁਨਾ ਵਾ;

ਧਮ੍ਮਂ ਪਣੀਤਂ ਤਮੁਦਾਹਰੇਯ੍ਯ,

ਨ ਪੇਸੁਣਂ ਨੋਪਿ ਪਰੂਪਵਾਦਂ’’.

ਕਿਂ ਵੁਤ੍ਤਂ ਹੋਤਿ? ਸੋ ਯੋਗਾਵਚਰੋ ਕਿਞ੍ਚਿਦੇਵ ਸੋਤੁਕਾਮਤਾਯ ਉਪਗਤੇਨ ਸਾਵਕੇਨ ਵਾ ਕੇਨਚਿ ਅਞ੍ਞਤਿਤ੍ਥਿਯਗਹਟ੍ਠਾਦਿਨਾ ਵਾ ਇਧੇਵ ਪਬ੍ਬਜਿਤੇਨ ਭਿਕ੍ਖੁਨਾ ਵਾ ਸਦ੍ਧਿਂ ਸਚੇਪਿ ਸਲ੍ਲਪੇ, ਅਥ ਯ੍ਵਾਯਂ ਮਗ੍ਗਫਲਾਦਿਪਟਿਸਂਯੁਤ੍ਤੋ ਦਸਕਥਾਵਤ੍ਥੁਭੇਦੋ ਵਾ ਅਤਪ੍ਪਕਟ੍ਠੇਨ ਪਣੀਤੋ ਧਮ੍ਮੋ. ਤਂ ਧਮ੍ਮਂ ਪਣੀਤਂ ਉਦਾਹਰੇਯ੍ਯ, ਅਞ੍ਞਂ ਪਨ ਪਿਸੁਣਵਚਨਂ ਵਾ ਪਰੂਪਵਾਦਂ ਵਾ ਅਪ੍ਪਮਤ੍ਤਕਮ੍ਪਿ ਨ ਉਦਾਹਰੇਯ੍ਯਾਤਿ.

੩੯੩. ਇਦਾਨਿ ਤਸ੍ਮਿਂ ਪਰੂਪਵਾਦੇ ਦੋਸਂ ਦਸ੍ਸੇਨ੍ਤੋ ਆਹ ‘‘ਵਾਦਞ੍ਹਿ ਏਕੇ’’ਤਿ. ਤਸ੍ਸਤ੍ਥੋ – ਇਧੇਕਚ੍ਚੇ ਮੋਘਪੁਰਿਸਾ ਪਰੂਪਵਾਦਸਞ੍ਹਿਤਂ ਨਾਨਪ੍ਪਕਾਰਂ ਵਿਗ੍ਗਾਹਿਕਕਥਾਭੇਦਂ ਵਾਦਂ ਪਟਿਸੇਨਿਯਨ੍ਤਿ ਵਿਰੁਜ੍ਝਨ੍ਤਿ, ਯੁਜ੍ਝਿਤੁਕਾਮਾ ਹੁਤ੍ਵਾ ਸੇਨਾਯ ਪਟਿਮੁਖਂ ਗਚ੍ਛਨ੍ਤਾ ਵਿਯ ਹੋਨ੍ਤਿ, ਤੇ ਮਯਂ ਲਾਮਕਪਞ੍ਞੇ ਨ ਪਸਂਸਾਮ. ਕਿਂ ਕਾਰਣਂ? ਤਤੋ ਤਤੋ ਨੇ ਪਸਜਨ੍ਤਿ ਸਙ੍ਗਾ, ਯਸ੍ਮਾ ਤੇ ਤਾਦਿਸਕੇ ਪੁਗ੍ਗਲੇ ਤਤੋ ਤਤੋ ਵਚਨਪਥਤੋ ਸਮੁਟ੍ਠਾਯ ਵਿਵਾਦਸਙ੍ਗਾ ਸਜਨ੍ਤਿ ਅਲ੍ਲੀਯਨ੍ਤਿ. ਕਿਂ ਕਾਰਣਾ ਸਜਨ੍ਤੀਤਿ? ਚਿਤ੍ਤਞ੍ਹਿ ਤੇ ਤਤ੍ਥ ਗਮੇਨ੍ਤਿ ਦੂਰੇ, ਯਸ੍ਮਾ ਤੇ ਪਟਿਸੇਨਿਯਨ੍ਤਾ ਚਿਤ੍ਤਂ ਤਤ੍ਥ ਗਮੇਨ੍ਤਿ, ਯਤ੍ਥ ਗਤਂ ਸਮਥਵਿਪਸ੍ਸਨਾਨਂ ਦੂਰੇ ਹੋਤੀਤਿ.

੩੯੪-੫. ਏਵਂ ਪਰਿਤ੍ਤਪਞ੍ਞਾਨਂ ਪਵਤ੍ਤਿਂ ਦਸ੍ਸੇਤ੍ਵਾ ਇਦਾਨਿ ਮਹਾਪਞ੍ਞਾਨਂ ਪਵਤ੍ਤਿਂ ਦਸ੍ਸੇਨ੍ਤੋ ਆਹ ‘‘ਪਿਣ੍ਡਂ ਵਿਹਾਰਂ…ਪੇ… ਸਾਵਕੋ’’ਤਿ. ਤਤ੍ਥ ਵਿਹਾਰੇਨ ਪਤਿਸ੍ਸਯੋ, ਸਯਨਾਸਨੇਨ ਮਞ੍ਚਪੀਠਨ੍ਤਿ ਤੀਹਿਪਿ ਪਦੇਹਿ ਸੇਨਾਸਨਮੇਵ ਵੁਤ੍ਤਂ. ਆਪਨ੍ਤਿ ਉਦਕਂ. ਸਙ੍ਘਾਟਿਰਜੂਪਵਾਹਨਨ੍ਤਿ ਪਂਸੁਮਲਾਦਿਨੋ ਸਙ੍ਘਾਟਿਰਜਸ੍ਸ ਧੋਵਨਂ. ਸੁਤ੍ਵਾਨ ਧਮ੍ਮਂ ਸੁਗਤੇਨ ਦੇਸਿਤਨ੍ਤਿ ਸਬ੍ਬਾਸਵਸਂਵਰਾਦੀਸੁ ‘‘ਪਟਿਸਙ੍ਖਾ ਯੋਨਿਸੋ ਚੀਵਰਂ ਪਟਿਸੇਵਤਿ ਸੀਤਸ੍ਸ ਪਟਿਘਾਤਾਯਾ’’ਤਿਆਦਿਨਾ (ਮ. ਨਿ. ੧.੨੩; ਅ. ਨਿ. ੬.੫੮) ਨਯੇਨ ਭਗਵਤਾ ਦੇਸਿਤਂ ਧਮ੍ਮਂ ਸੁਤ੍ਵਾ. ਸਙ੍ਖਾਯ ਸੇਵੇ ਵਰਪਞ੍ਞਸਾਵਕੋਤਿ ਏਤਂ ਇਧ ਪਿਣ੍ਡਨ੍ਤਿ ਵੁਤ੍ਤਂ ਪਿਣ੍ਡਪਾਤਂ, ਵਿਹਾਰਾਦੀਹਿ ਵੁਤ੍ਤਂ ਸੇਨਾਸਨਂ, ਆਪਮੁਖੇਨ ਦਸ੍ਸਿਤਂ ਗਿਲਾਨਪਚ੍ਚਯਂ, ਸਙ੍ਘਾਟਿਯਾ ਚੀਵਰਨ੍ਤਿ ਚਤੁਬ੍ਬਿਧਮ੍ਪਿ ਪਚ੍ਚਯਂ ਸਙ੍ਖਾਯ ‘‘ਯਾਵਦੇਵ ਇਮਸ੍ਸ ਕਾਯਸ੍ਸ ਠਿਤਿਯਾ’’ਤਿਆਦਿਨਾ (ਮ. ਨਿ. ੧.੨੩; ਅ. ਨਿ. ੬.੫੮) ਨਯੇਨ ਪਚ੍ਚਵੇਕ੍ਖਿਤ੍ਵਾ ਸੇਵੇ ਵਰਪਞ੍ਞਸਾਵਕੋ, ਸੇਵਿਤੁਂ ਸਕ੍ਕੁਣੇਯ੍ਯ ਵਰਪਞ੍ਞਸ੍ਸ ਤਥਾਗਤਸ੍ਸ ਸਾਵਕੋ ਸੇਕ੍ਖੋ ਵਾ ਪੁਥੁਜ੍ਜਨੋ ਵਾ, ਨਿਪ੍ਪਰਿਯਾਯੇਨ ਚ ਅਰਹਾ. ਸੋ ਹਿ ਚਤੁਰਾਪਸ੍ਸੇਨੋ ‘‘ਸਙ੍ਖਾਯੇਕਂ ਪਟਿਸੇਵਤਿ, ਸਙ੍ਖਾਯੇਕਂ ਅਧਿਵਾਸੇਤਿ, ਸਙ੍ਖਾਯੇਕਂ ਪਰਿਵਜ੍ਜੇਤਿ, ਸਙ੍ਖਾਯੇਕਂ ਵਿਨੋਦੇਤੀ’’ਤਿ (ਦੀ. ਨਿ. ੩.੩੦੮; ਮ. ਨਿ. ੨.੧੬੮; ਅ. ਨਿ. ੧੦.੨੦) ਵੁਤ੍ਤੋ. ਯਸ੍ਸਾ ਚ ਸਙ੍ਖਾਯ ਸੇਵੇ ਵਰਪਞ੍ਞਸਾਵਕੋ, ਤਸ੍ਮਾ ਹਿ ਪਿਣ੍ਡੇ…ਪੇ… ਯਥਾ ਪੋਕ੍ਖਰੇ ਵਾਰਿਬਿਨ੍ਦੁ, ਤਥਾ ਹੋਤੀਤਿ ਵੇਦਿਤਬ੍ਬੋ.

੩੯੬. ਏਵਂ ਖੀਣਾਸਵਪਟਿਪਤ੍ਤਿਂ ਦਸ੍ਸੇਨ੍ਤੋ ਅਰਹਤ੍ਤਨਿਕੂਟੇਨ ਅਨਗਾਰਿਯਪਟਿਪਦਂ ਨਿਟ੍ਠਾਪੇਤ੍ਵਾ ਇਦਾਨਿ ਅਗਾਰਿਯਪਟਿਪਦਂ ਦਸ੍ਸੇਤੁਂ ‘‘ਗਹਟ੍ਠਵਤ੍ਤਂ ਪਨ ਵੋ’’ਤਿਆਦਿਮਾਹ. ਤਤ੍ਥ ਪਠਮਗਾਥਾਯ ਤਾਵ ਸਾਵਕੋਤਿ ਅਗਾਰਿਯਸਾਵਕੋ. ਸੇਸਂ ਉਤ੍ਤਾਨਤ੍ਥਮੇਵ. ਅਯਂ ਪਨ ਯੋਜਨਾ – ਯੋ ਮਯਾ ਇਤੋ ਪੁਬ੍ਬੇ ਕੇਵਲੋ ਅਬ੍ਯਾਮਿਸ੍ਸੋ ਸਕਲੋ ਪਰਿਪੁਣ੍ਣੋ ਭਿਕ੍ਖੁਧਮ੍ਮੋ ਕਥਿਤੋ. ਏਸ ਖੇਤ੍ਤਵਤ੍ਥੁਆਦਿਪਰਿਗ੍ਗਹੇਹਿ ਸਪਰਿਗ੍ਗਹੇਨ ਨ ਲਬ੍ਭਾ ਫਸ੍ਸੇਤੁਂ ਨ ਸਕ੍ਕਾ ਅਧਿਗਨ੍ਤੁਨ੍ਤਿ.

੩੯੭. ਏਵਂ ਤਸ੍ਸ ਭਿਕ੍ਖੁਧਮ੍ਮਂ ਪਟਿਸੇਧੇਤ੍ਵਾ ਗਹਟ੍ਠਧਮ੍ਮਮੇਵ ਦਸ੍ਸੇਨ੍ਤੋ ਆਹ ‘‘ਪਾਣਂ ਨ ਹਨੇ’’ਤਿ. ਤਤ੍ਥ ਪੁਰਿਮਡ੍ਢੇਨ ਤਿਕੋਟਿਪਰਿਸੁਦ੍ਧਾ ਪਾਣਾਤਿਪਾਤਾਵੇਰਮਣਿ ਵੁਤ੍ਤਾ, ਪਚ੍ਛਿਮਡ੍ਢੇਨ ਸਤ੍ਤੇਸੁ ਹਿਤਪਟਿਪਤ੍ਤਿ. ਤਤਿਯਪਾਦੋ ਚੇਤ੍ਥ ਖਗ੍ਗਵਿਸਾਣਸੁਤ੍ਤੇ (ਸੁ. ਨਿ. ੩੫ ਆਦਯੋ) ਚਤੁਤ੍ਥਪਾਦੇ ਥਾਵਰਤਸਭੇਦੋ ਮੇਤ੍ਤਸੁਤ੍ਤਵਣ੍ਣਨਾਯਂ (ਸੁ. ਨਿ. ੧੪੩ ਆਦਯੋ) ਸਬ੍ਬਪ੍ਪਕਾਰਤੋ ਵਣ੍ਣਿਤੋ. ਸੇਸਂ ਉਤ੍ਤਾਨਤ੍ਥਮੇਵ. ਉਪ੍ਪਟਿਪਾਟਿਯਾ ਪਨ ਯੋਜਨਾ ਕਾਤਬ੍ਬਾ – ਤਸਥਾਵਰੇਸੁ ਸਬ੍ਬੇਸੁ ਭੂਤੇਸੁ ਨਿਧਾਯ ਦਣ੍ਡਂ ਨ ਹਨੇ ਨ ਘਾਤਯੇਯ੍ਯ ਨਾਨੁਜਞ੍ਞਾਤਿ. ‘‘ਨਿਧਾਯ ਦਣ੍ਡ’’ਨ੍ਤਿ ਇਤੋ ਵਾ ਪਰਂ ‘‘ਵਤ੍ਤੇਯ੍ਯਾ’’ਤਿ ਪਾਠਸੇਸੋ ਆਹਰਿਤਬ੍ਬੋ. ਇਤਰਥਾ ਹਿ ਨ ਪੁਬ੍ਬੇਨਾਪਰਂ ਸਨ੍ਧਿਯਤਿ.

੩੯੮. ਏਵਂ ਪਠਮਸਿਕ੍ਖਾਪਦਂ ਦਸ੍ਸੇਤ੍ਵਾ ਇਦਾਨਿ ਦੁਤਿਯਸਿਕ੍ਖਾਪਦਂ ਦਸ੍ਸੇਨ੍ਤੋ ਆਹ ‘‘ਤਤੋ ਅਦਿਨ੍ਨ’’ਨ੍ਤਿ. ਤਤ੍ਥ ਕਿਞ੍ਚੀਤਿ ਅਪ੍ਪਂ ਵਾ ਬਹੁਂ ਵਾ. ਕ੍ਵਚੀਤਿ ਗਾਮੇ ਵਾ ਅਰਞ੍ਞੇ ਵਾ. ਸਾਵਕੋਤਿ ਅਗਾਰਿਯਸਾਵਕੋ. ਬੁਜ੍ਝਮਾਨੋਤਿ ‘‘ਪਰਸਨ੍ਤਕਮਿਦ’’ਨ੍ਤਿ ਜਾਨਮਾਨੋ. ਸਬ੍ਬਂ ਅਦਿਨ੍ਨਂ ਪਰਿਵਜ੍ਜਯੇਯ੍ਯਾਤਿ ਏਵਞ੍ਹਿ ਪਟਿਪਜ੍ਜਮਾਨੋ ਸਬ੍ਬਂ ਅਦਿਨ੍ਨਂ ਪਰਿਵਜ੍ਜੇਯ੍ਯ, ਨੋ ਅਞ੍ਞਥਾਤਿ ਦੀਪੇਤਿ. ਸੇਸਮੇਤ੍ਥ ਵੁਤ੍ਤਨਯਞ੍ਚ ਪਾਕਟਞ੍ਚਾਤਿ.

੩੯੯. ਏਵਂ ਦੁਤਿਯਸਿਕ੍ਖਾਪਦਮ੍ਪਿ ਤਿਕੋਟਿਪਰਿਸੁਦ੍ਧਂ ਦਸ੍ਸੇਤ੍ਵਾ ਉਕ੍ਕਟ੍ਠਪਰਿਚ੍ਛੇਦਤੋ ਪਭੁਤਿ ਤਤਿਯਂ ਦਸ੍ਸੇਨ੍ਤੋ ਆਹ ‘‘ਅਬ੍ਰਹ੍ਮਚਰਿਯ’’ਨ੍ਤਿ. ਤਤ੍ਥ ਅਸਮ੍ਭੁਣਨ੍ਤੋਤਿ ਅਸਕ੍ਕੋਨ੍ਤੋ.

੪੦੦. ਇਦਾਨਿ ਚਤੁਤ੍ਥਸਿਕ੍ਖਾਪਦਂ ਦਸ੍ਸੇਨ੍ਤੋ ਆਹ ‘‘ਸਭਗ੍ਗਤੋ ਵਾ’’ਤਿ. ਤਤ੍ਥ ਸਭਗ੍ਗਤੋਤਿ ਸਨ੍ਥਾਗਾਰਾਦਿਗਤੋ. ਪਰਿਸਗ੍ਗਤੋਤਿ ਪੂਗਮਜ੍ਜਗਤੋ. ਸੇਸਮੇਤ੍ਥ ਵੁਤ੍ਤਨਯਞ੍ਚ ਪਾਕਟਞ੍ਚਾਤਿ.

੪੦੧. ਏਵਂ ਚਤੁਤ੍ਥਸਿਕ੍ਖਾਪਦਮ੍ਪਿ ਤਿਕੋਟਿਪਰਿਸੁਦ੍ਧਂ ਦਸ੍ਸੇਤ੍ਵਾ ਪਞ੍ਚਮਂ ਦਸ੍ਸੇਨ੍ਤੋ ਆਹ ‘‘ਮਜ੍ਜਞ੍ਚ ਪਾਨ’’ਨ੍ਤਿ. ਤਤ੍ਥ ਮਜ੍ਜਞ੍ਚ ਪਾਨਨ੍ਤਿ ਗਾਥਾਬਨ੍ਧਸੁਖਤ੍ਥਂ ਏਵਂ ਵੁਤ੍ਤਂ. ਅਯਂ ਪਨਤ੍ਥੋ ‘‘ਮਜ੍ਜਪਾਨਞ੍ਚ ਨ ਸਮਾਚਰੇਯ੍ਯਾ’’ਤਿ. ਧਮ੍ਮਂ ਇਮਨ੍ਤਿ ਇਮਂ ਮਜ੍ਜਪਾਨਵੇਰਮਣੀਧਮ੍ਮਂ. ਉਮ੍ਮਾਦਨਨ੍ਤਨ੍ਤਿ ਉਮ੍ਮਾਦਨਪਰਿਯੋਸਾਨਂ. ਯੋ ਹਿ ਸਬ੍ਬਲਹੁਕੋ ਮਜ੍ਜਪਾਨਸ੍ਸ ਵਿਪਾਕੋ, ਸੋ ਮਨੁਸ੍ਸਭੂਤਸ੍ਸ ਉਮ੍ਮਤ੍ਤਕਸਂਵਤ੍ਤਨਿਕੋ ਹੋਤਿ. ਇਤਿ ਨਂ ਵਿਦਿਤ੍ਵਾਤਿ ਇਤਿ ਨਂ ਮਜ੍ਜਪਾਨਂ ਞਤ੍ਵਾ. ਸੇਸਮੇਤ੍ਥ ਵੁਤ੍ਤਨਯਞ੍ਚ ਪਾਕਟਞ੍ਚਾਤਿ.

੪੦੨. ਏਵਂ ਪਞ੍ਚਮਸਿਕ੍ਖਾਪਦਮ੍ਪਿ ਤਿਕੋਟਿਪਰਿਸੁਦ੍ਧਂ ਦਸ੍ਸੇਤ੍ਵਾ ਇਦਾਨਿ ਪੁਰਿਮਸਿਕ੍ਖਾਪਦਾਨਮ੍ਪਿ ਮਜ੍ਜਪਾਨਮੇਵ ਸਂਕਿਲੇਸਕਰਞ੍ਚ ਭੇਦਕਰਞ੍ਚ ਦਸ੍ਸੇਤ੍ਵਾ ਦਲ਼੍ਹਤਰਂ ਤਤੋ ਵੇਰਮਣਿਯਂ ਨਿਯੋਜੇਨ੍ਤੋ ਆਹ ‘‘ਮਦਾ ਹਿ ਪਾਪਾਨਿ ਕਰੋਨ੍ਤੀ’’ਤਿ. ਤਤ੍ਥ ਮਦਾਤਿ ਮਦਹੇਤੁ. ਹਿਕਾਰੋ ਪਦਪੂਰਣਮਤ੍ਤੇ ਨਿਪਾਤੋ. ਪਾਪਾਨਿ ਕਰੋਨ੍ਤੀਤਿ ਪਾਣਾਤਿਪਾਤਾਦੀਨਿ ਸਬ੍ਬਾਕੁਸਲਾਨਿ ਕਰੋਨ੍ਤਿ. ਉਮ੍ਮਾਦਨਂ ਮੋਹਨਨ੍ਤਿ ਪਰਲੋਕੇ ਉਮ੍ਮਾਦਨਂ ਇਹਲੋਕੇ ਮੋਹਨਂ. ਸੇਸਂ ਉਤ੍ਤਾਨਤ੍ਥਮੇਵ.

੪੦੩-੪. ਏਤ੍ਤਾਵਤਾ ਅਗਾਰਿਯਸਾਵਕਸ੍ਸ ਨਿਚ੍ਚਸੀਲਂ ਦਸ੍ਸੇਤ੍ਵਾ ਇਦਾਨਿ ਉਪੋਸਥਙ੍ਗਾਨਿ ਦਸ੍ਸੇਨ੍ਤੋ ‘‘ਪਾਣਂ ਨ ਹਨੇ’’ਤਿ ਗਾਥਾਦ੍ਵਯਮਾਹ. ਤਤ੍ਥ ਅਬ੍ਰਹ੍ਮਚਰਿਯਾਤਿ ਅਸੇਟ੍ਠਚਰਿਯਭੂਤਾ. ਮੇਥੁਨਾਤਿ ਮੇਥੁਨਧਮ੍ਮਸਮਾਪਤ੍ਤਿਤੋ. ਰਤ੍ਤਿਂ ਨ ਭੁਞ੍ਜੇਯ੍ਯ ਵਿਕਾਲਭੋਜਨਨ੍ਤਿ ਰਤ੍ਤਿਮ੍ਪਿ ਨ ਭੁਞ੍ਜੇਯ੍ਯ, ਦਿਵਾਪਿ ਕਾਲਾਤਿਕ੍ਕਨ੍ਤਭੋਜਨਂ ਨ ਭੁਞ੍ਜੇਯ੍ਯ. ਨ ਚ ਗਨ੍ਧਨ੍ਤਿ ਏਤ੍ਥ ਗਨ੍ਧਗ੍ਗਹਣੇਨ ਵਿਲੇਪਨਚੁਣ੍ਣਾਦੀਨਿਪਿ ਗਹਿਤਾਨੇਵਾਤਿ ਵੇਦਿਤਬ੍ਬਾਨਿ. ਮਞ੍ਚੇਤਿ ਕਪ੍ਪਿਯਮਞ੍ਚੇ. ਸਨ੍ਥਤੇਤਿ ਤਟ੍ਟਿਕਾਦੀਹਿ ਕਪ੍ਪਿਯਤ੍ਥਰਣੇਹਿ ਅਤ੍ਥਤੇ. ਛਮਾਯਂ ਪਨ ਗੋਨਕਾਦਿਸਨ੍ਥਤਾਯਪਿ ਵਟ੍ਟਤਿ. ਅਟ੍ਠਙ੍ਗਿਕਨ੍ਤਿ ਪਞ੍ਚਙ੍ਗਿਕਂ ਵਿਯ ਤੂਰਿਯਂ, ਨ ਅਙ੍ਗਵਿਨਿਮੁਤ੍ਤਂ. ਦੁਕ੍ਖਨ੍ਤਗੁਨਾਤਿ ਵਟ੍ਟਦੁਕ੍ਖਸ੍ਸ ਅਨ੍ਤਗਤੇਨ. ਸੇਸਮੇਤ੍ਥ ਪਾਕਟਮੇਵ. ਪਚ੍ਛਿਮਡ੍ਢੁਂ ਪਨ ਸਙ੍ਗੀਤਿਕਾਰਕੇਹਿ ਵੁਤ੍ਤਨ੍ਤਿਪਿ ਆਹੁ.

੪੦੫. ਏਵਂ ਉਪੋਸਥਙ੍ਗਾਨਿ ਦਸ੍ਸੇਤ੍ਵਾ ਇਦਾਨਿ ਉਪੋਸਥਕਾਲਂ ਦਸ੍ਸੇਨ੍ਤੋ ਆਹ ‘‘ਤਤੋ ਚ ਪਕ੍ਖਸ੍ਸਾ’’ਤਿ. ਤਤ੍ਥ ਤਤੋਤਿ ਪਦਪੂਰਣਮਤ੍ਤੇ ਨਿਪਾਤੋ. ਪਕ੍ਖਸ੍ਸੁਪਵਸ੍ਸੁਪੋਸਥਨ੍ਤਿ ਏਵਂ ਪਰਪਦੇਨ ਯੋਜੇਤਬ੍ਬਂ ‘‘ਪਕ੍ਖਸ੍ਸ ਚਾਤੁਦ੍ਦਸਿਂ ਪਞ੍ਚਦਸਿਂ ਅਟ੍ਠਮਿਨ੍ਤਿ ਏਤੇ ਤਯੋ ਦਿਵਸੇ ਉਪਵਸ੍ਸ ਉਪੋਸਥਂ, ਏਤਂ ਅਟ੍ਠਙ੍ਗਿਕਉਪੋਸਥਂ ਉਪਗਮ੍ਮ ਵਸਿਤ੍ਵਾ’’ਤਿ. ਪਾਟਿਹਾਰਿਯਪਕ੍ਖਞ੍ਚਾਤਿ ਏਤ੍ਥ ਪਨ ਵਸ੍ਸੂਪਨਾਯਿਕਾਯ ਪੁਰਿਮਭਾਗੇ ਆਸਾਲ਼੍ਹਮਾਸੋ, ਅਨ੍ਤੋਵਸ੍ਸਂ ਤਯੋ ਮਾਸਾ, ਕਤ੍ਤਿਕਮਾਸੋਤਿ ਇਮੇ ਪਞ੍ਚ ਮਾਸਾ ‘‘ਪਾਟਿਹਾਰਿਯਪਕ੍ਖੋ’’ਤਿ ਵੁਚ੍ਚਨ੍ਤਿ. ਆਸਾਲ਼੍ਹਕਤ੍ਤਿਕਫਗ੍ਗੁਣਮਾਸਾ ਤਯੋ ਏਵਾਤਿ ਅਪਰੇ. ਪਕ੍ਖੁਪੋਸਥਦਿਵਸਾਨਂ ਪੁਰਿਮਪਚ੍ਛਿਮਦਿਵਸਵਸੇਨ ਪਕ੍ਖੇ ਪਕ੍ਖੇ ਤੇਰਸੀਪਾਟਿਪਦਸਤ੍ਤਮੀਨਵਮੀਸਙ੍ਖਾਤਾ ਚਤ੍ਤਾਰੋ ਚਤ੍ਤਾਰੋ ਦਿਵਸਾਤਿ ਅਪਰੇ. ਯਂ ਰੁਚ੍ਚਤਿ, ਤਂ ਗਹੇਤਬ੍ਬਂ. ਸਬ੍ਬਂ ਵਾ ਪਨ ਪੁਞ੍ਞਕਾਮੀਨਂ ਭਾਸਿਤਬ੍ਬਂ. ਏਵਮੇਤਂ ਪਾਟਿਹਾਰਿਯਪਕ੍ਖਞ੍ਚ ਪਸਨ੍ਨਮਾਨਸੋ ਸੁਸਮਤ੍ਤਰੂਪਂ ਸੁਪਰਿਪੁਣ੍ਣਰੂਪਂ ਏਕਮ੍ਪਿ ਦਿਵਸਂ ਅਪਰਿਚ੍ਚਜਨ੍ਤੋ ਅਟ੍ਠਙ੍ਗੁਪੇਤਂ ਉਪੋਸਥਂ ਉਪਵਸ੍ਸਾਤਿ ਸਮ੍ਬਨ੍ਧਿਤਬ੍ਬਂ.

੪੦੬. ਏਵਂ ਉਪੋਸਥਕਾਲਂ ਦਸ੍ਸੇਤ੍ਵਾ ਇਦਾਨਿ ਤੇਸੁ ਕਾਲੇਸੁ ਏਤਂ ਉਪੋਸਥਂ ਉਪਵਸ੍ਸ ਯਂ ਕਾਤਬ੍ਬਂ, ਤਂ ਦਸ੍ਸੇਨ੍ਤੋ ਆਹ ‘‘ਤਤੋ ਚ ਪਾਤੋ’’ਤਿ. ਏਤ੍ਥਾਪਿ ਤਤੋਤਿ ਪਦਪੂਰਣਮਤ੍ਤੇ ਨਿਪਾਤੋ, ਅਨਨ੍ਤਰਤ੍ਥੇ ਵਾ, ਅਥਾਤਿ ਵੁਤ੍ਤਂ ਹੋਤਿ. ਪਾਤੋਤਿ ਅਪਰਜ੍ਜੁਦਿਵਸਪੁਬ੍ਬਭਾਗੇ. ਉਪਵੁਤ੍ਥੁਪੋਸਥੋਤਿ ਉਪਵਸਿਤਉਪੋਸਥੋ. ਅਨ੍ਨੇਨਾਤਿ ਯਾਗੁਭਤ੍ਤਾਦਿਨਾ. ਪਾਨੇਨਾਤਿ ਅਟ੍ਠਵਿਧਪਾਨੇਨ. ਅਨੁਮੋਦਮਾਨੋਤਿ ਅਨੁਪਮੋਦਮਾਨੋ, ਨਿਰਨ੍ਤਰਂ ਮੋਦਮਾਨੋਤਿ ਅਤ੍ਥੋ. ਯਥਾਰਹਨ੍ਤਿ ਅਤ੍ਤਨੋ ਅਨੁਰੂਪੇਨ, ਯਥਾਸਤ੍ਤਿ ਯਥਾਬਲਨ੍ਤਿ ਵੁਤ੍ਤਂ ਹੋਤਿ. ਸਂਵਿਭਜੇਥਾਤਿ ਭਾਜੇਯ੍ਯ ਪਤਿਮਾਨੇਯ੍ਯ. ਸੇਸਂ ਪਾਕਟਮੇਵ.

੪੦੭. ਏਵਂ ਉਪਵੁਤ੍ਥੁਪੋਸਥਸ੍ਸ ਕਿਚ੍ਚਂ ਵਤ੍ਵਾ ਇਦਾਨਿ ਯਾਵਜੀਵਿਕਂ ਗਰੁਵਤ੍ਤਂ ਆਜੀਵਪਾਰਿਸੁਦ੍ਧਿਞ੍ਚ ਕਥੇਤ੍ਵਾ ਤਾਯ ਪਟਿਪਦਾਯ ਅਧਿਗਨ੍ਤਬ੍ਬਟ੍ਠਾਨਂ ਦਸ੍ਸੇਨ੍ਤੋ ਆਹ ‘‘ਧਮ੍ਮੇਨ ਮਾਤਾਪਿਤਰੋ’’ਤਿ. ਤਤ੍ਥ ਧਮ੍ਮੇਨਾਤਿ ਧਮ੍ਮਲਦ੍ਧੇਨ ਭੋਗੇਨ. ਭਰੇਯ੍ਯਾਤਿ ਪੋਸੇਯ੍ਯ. ਧਮ੍ਮਿਕਂ ਸੋ ਵਣਿਜ੍ਜਨ੍ਤਿ ਸਤ੍ਤਵਣਿਜ੍ਜਾ, ਸਤ੍ਥਵਣਿਜ੍ਜਾ, ਵਿਸਵਣਿਜ੍ਜਾ, ਮਂਸਵਣਿਜ੍ਜਾ, ਸੁਰਾਵਣਿਜ੍ਜਾਤਿ ਇਮਾ ਪਞ੍ਚ ਅਧਮ੍ਮਵਣਿਜ੍ਜਾ ਵਜ੍ਜੇਤ੍ਵਾ ਅਵਸੇਸਾ ਧਮ੍ਮਿਕਵਣਿਜ੍ਜਾ. ਵਣਿਜ੍ਜਾਮੁਖੇਨ ਚੇਤ੍ਥ ਕਸਿਗੋਰਕ੍ਖਾਦਿ ਅਪਰੋਪਿ ਧਮ੍ਮਿਕੋ ਵੋਹਾਰੋ ਸਙ੍ਗਹਿਤੋ. ਸੇਸਮੁਤ੍ਤਾਨਤ੍ਥਮੇਵ. ਅਯਂ ਪਨ ਯੋਜਨਾ – ਸੋ ਨਿਚ੍ਚਸੀਲਉਪੋਸਥਸੀਲਦਾਨਧਮ੍ਮਸਮਨ੍ਨਾਗਤੋ ਅਰਿਯਸਾਵਕੋ ਪਯੋਜਯੇ ਧਮ੍ਮਿਕਂ ਵਣਿਜ੍ਜਂ, ਤਤੋ ਲਦ੍ਧੇਨ ਚ ਧਮ੍ਮਤੋ ਅਨਪੇਤਤ੍ਤਾ ਧਮ੍ਮੇਨ ਭੋਗੇਨ ਮਾਤਾਪਿਤਰੋ ਭਰੇਯ੍ਯ. ਅਥ ਸੋ ਗਿਹੀ ਏਵਂ ਅਪ੍ਪਮਤ੍ਤੋ ਆਦਿਤੋ ਪਭੁਤਿ ਵੁਤ੍ਤਂ ਇਮਂ ਵਤ੍ਤਂ ਵਤ੍ਤਯਨ੍ਤੋ ਕਾਯਸ੍ਸ ਭੇਦਾ ਯੇ ਤੇ ਅਤ੍ਤਨੋ ਆਭਾਯ ਅਨ੍ਧਕਾਰਂ ਵਿਧਮੇਤ੍ਵਾ ਆਲੋਕਕਰਣੇਨ ਸਯਮ੍ਪਭਾਤਿ ਲਦ੍ਧਨਾਮਾ ਛ ਕਾਮਾਵਚਰਦੇਵਾ, ਤੇ ਸਯਮ੍ਪਭੇ ਨਾਮ ਦੇਵੇ ਉਪੇਤਿ ਭਜਤਿ ਅਲ੍ਲੀਯਤਿ, ਤੇਸਂ ਨਿਬ੍ਬਤ੍ਤਟ੍ਠਾਨੇ ਨਿਬ੍ਬਤ੍ਤਤੀਤਿ.

ਪਰਮਤ੍ਥਜੋਤਿਕਾਯ ਖੁਦ੍ਦਕ-ਅਟ੍ਠਕਥਾਯ

ਸੁਤ੍ਤਨਿਪਾਤ-ਅਟ੍ਠਕਥਾਯ ਧਮ੍ਮਿਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.

ਨਿਟ੍ਠਿਤੋ ਚ ਦੁਤਿਯੋ ਵਗ੍ਗੋ ਅਤ੍ਥਵਣ੍ਣਨਾਨਯਤੋ, ਨਾਮੇਨ

ਚੂਲ਼ਵਗ੍ਗੋਤਿ.