੭. ਬ੍ਰਾਹ੍ਮਣਧਮ੍ਮਿਕਸੁਤ੍ਤਵਣ੍ਣਨਾ

ਏਵਂ ਮੇ ਸੁਤਨ੍ਤਿ ਬ੍ਰਾਹ੍ਮਣਧਮ੍ਮਿਕਸੁਤ੍ਤਂ. ਕਾ ਉਪ੍ਪਤ੍ਤਿ? ਅਯਮੇਵ ਯਾਸ੍ਸ ਨਿਦਾਨੇ ‘‘ਅਥ ਖੋ ਸਮ੍ਬਹੁਲਾ’’ਤਿਆਦਿਨਾ ਨਯੇਨ ਵੁਤ੍ਤਾ. ਤਤ੍ਥ ਸਮ੍ਬਹੁਲਾਤਿ ਬਹੂ ਅਨੇਕੇ. ਕੋਸਲਕਾਤਿ ਕੋਸਲਰਟ੍ਠਵਾਸਿਨੋ. ਬ੍ਰਾਹ੍ਮਣਮਹਾਸਾਲਾਤਿ ਜਾਤਿਯਾ ਬ੍ਰਾਹ੍ਮਣਾ ਮਹਾਸਾਰਤਾਯ ਮਹਾਸਾਲਾ. ਯੇਸਂ ਕਿਰ ਨਿਦਹਿਤ੍ਵਾ ਠਪਿਤਂਯੇਵ ਅਸੀਤਿਕੋਟਿਸਙ੍ਖ੍ਯਂ ਧਨਮਤ੍ਥਿ, ਤੇ ‘‘ਬ੍ਰਾਹ੍ਮਣਮਹਾਸਾਲਾ’’ਤਿ ਵੁਚ੍ਚਨ੍ਤਿ. ਇਮੇ ਚ ਤਾਦਿਸਾ, ਤੇਨ ਵੁਤ੍ਤਂ ‘‘ਬ੍ਰਾਹ੍ਮਣਮਹਾਸਾਲਾ’’ਤਿ. ਜਿਣ੍ਣਾਤਿ ਜਜ੍ਜਰੀਭੂਤਾ ਜਰਾਯ ਖਣ੍ਡਿਚ੍ਚਾਦਿਭਾਵਮਾਪਾਦਿਤਾ. ਵੁਡ੍ਢਾਤਿ ਅਙ੍ਗਪਚ੍ਚਙ੍ਗਾਨਂ ਵੁਡ੍ਢਿਮਰਿਯਾਦਂ ਪਤ੍ਤਾ. ਮਹਲ੍ਲਕਾਤਿ ਜਾਤਿਮਹਲ੍ਲਕਤਾਯ ਸਮਨ੍ਨਾਗਤਾ, ਚਿਰਕਾਲਪ੍ਪਸੁਤਾਤਿ ਵੁਤ੍ਤਂ ਹੋਤਿ. ਅਦ੍ਧਗਤਾਤਿ ਅਦ੍ਧਾਨਂ ਗਤਾ, ਦ੍ਵੇ ਤਯੋ ਰਾਜਪਰਿਵਟ੍ਟੇ ਅਤੀਤਾਤਿ ਅਧਿਪ੍ਪਾਯੋ. ਵਯੋ ਅਨੁਪ੍ਪਤ੍ਤਾਤਿ ਪਚ੍ਛਿਮਵਯਂ ਸਮ੍ਪਤ੍ਤਾ. ਅਪਿਚ ਜਿਣ੍ਣਾਤਿ ਪੋਰਾਣਾ, ਚਿਰਕਾਲਪ੍ਪਵਤ੍ਤਕੁਲਨ੍ਵਯਾਤਿ ਵੁਤ੍ਤਂ ਹੋਤਿ. ਵੁਡ੍ਢਾਤਿ ਸੀਲਾਚਾਰਾਦਿਗੁਣਵੁਡ੍ਢਿਯੁਤ੍ਤਾ. ਮਹਲ੍ਲਕਾਤਿ ਵਿਭਵਮਹਨ੍ਤਤਾਯ ਸਮਨ੍ਨਾਗਤਾ ਮਹਦ੍ਧਨਾ ਮਹਾਭੋਗਾ. ਅਦ੍ਧਗਤਾਤਿ ਮਗ੍ਗਪਟਿਪਨ੍ਨਾ ਬ੍ਰਾਹ੍ਮਣਾਨਂ ਵਤਚਰਿਯਾਦਿਮਰਿਯਾਦਂ ਅਵੀਤਿਕ੍ਕਮ੍ਮ ਚਰਮਾਨਾ. ਵਯੋ ਅਨੁਪ੍ਪਤ੍ਤਾਤਿ ਜਾਤਿਵੁਡ੍ਢਭਾਵਮ੍ਪਿ ਅਨ੍ਤਿਮਵਯਂ ਅਨੁਪ੍ਪਤ੍ਤਾਤਿ ਏਵਮ੍ਪੇਤ੍ਥ ਯੋਜਨਾ ਵੇਦਿਤਬ੍ਬਾ. ਸੇਸਮੇਤ੍ਥ ਪਾਕਟਮੇਵ.

ਭਗਵਤਾ ਸਦ੍ਧਿਂ ਸਮ੍ਮੋਦਿਂਸੂਤਿ ਖਮਨੀਯਾਦੀਨਿ ਪੁਚ੍ਛਨ੍ਤਾ ਅਞ੍ਞਮਞ੍ਞਂ ਸਮਪ੍ਪਵਤ੍ਤਮੋਦਾ ਅਹੇਸੁਂ. ਯਾਯ ਚ ‘‘ਕਚ੍ਚਿ ਭੋਤੋ ਗੋਤਮਸ੍ਸ ਖਮਨੀਯਂ, ਕਚ੍ਚਿ ਯਾਪਨੀਯਂ, ਅਪ੍ਪਾਬਾਧਂ, ਅਪ੍ਪਾਤਙ੍ਕਂ, ਬਲਂ, ਲਹੁਟ੍ਠਾਨਂ, ਫਾਸੁਵਿਹਾਰੋ’’ਤਿਆਦਿਕਾਯ ਕਥਾਯ ਸਮ੍ਮੋਦਿਂਸੁ, ਤਂ ਪੀਤਿਪਾਮੋਜ੍ਜਸਙ੍ਖਾਤਸਮ੍ਮੋਦਜਨਨਤੋ ਸਮ੍ਮੋਦਿਤੁਂ ਅਰਹਤੋ ਚ ਸਮ੍ਮੋਦਨੀਯਂ, ਅਤ੍ਥਬ੍ਯਞ੍ਜਨਮਧੁਰਤਾਯ ਸੁਚਿਰਮ੍ਪਿ ਕਾਲਂ ਸਾਰੇਤੁਂ ਨਿਰਨ੍ਤਰਂ ਪਵਤ੍ਤੇਤੁਂ ਅਰਹਤੋ ਸਰਿਤਬ੍ਬਭਾਵਤੋ ਚ ਸਾਰਣੀਯਂ. ਸੁਯ੍ਯਮਾਨਸੁਖਤੋ ਚ ਸਮ੍ਮੋਦਨੀਯਂ, ਅਨੁਸ੍ਸਰਿਯਮਾਨਸੁਖਤੋ ਸਾਰਣੀਯਂ, ਤਥਾ ਬ੍ਯਞ੍ਜਨਪਰਿਸੁਦ੍ਧਤਾਯ ਸਮ੍ਮੋਦਨੀਯਂ, ਅਤ੍ਥਪਰਿਸੁਦ੍ਧਤਾਯ ਸਾਰਣੀਯਨ੍ਤਿ ਏਵਂ ਅਨੇਕੇਹਿ ਪਰਿਯਾਯੇਹਿ ਸਮ੍ਮੋਦਨੀਯਂ ਕਥਂ ਸਾਰਣੀਯਂ ਵੀਤਿਸਾਰੇਤ੍ਵਾ ਪਰਿਯੋਸਾਪੇਤ੍ਵਾ ਨਿਟ੍ਠਾਪੇਤ੍ਵਾ ਯੇਨਤ੍ਥੇਨ ਆਗਤਾ, ਤਂ ਪੁਚ੍ਛਿਤੁਕਾਮਾ ਏਕਮਨ੍ਤਂ ਨਿਸੀਦਿਂਸੁ. ਤਂ –

‘‘ਨ ਪਚ੍ਛਤੋ ਨ ਪੁਰਤੋ, ਨਾਪਿ ਆਸਨ੍ਨਦੂਰਤੋ;

ਨ ਪਸ੍ਸੇ ਨਾਪਿ ਪਟਿਵਾਤੇ, ਨ ਚਾਪਿ ਓਣਤੁਣ੍ਣਤੇ’’ਤਿ. –

ਆਦਿਨਾ ਨਯੇਨ ਮਙ੍ਗਲਸੁਤ੍ਤਵਣ੍ਣਨਾਯਂ ਵੁਤ੍ਤਮੇਵ.

ਏਵਂ ਏਕਮਨ੍ਤਂ ਨਿਸਿਨ੍ਨਾ ਖੋ ਤੇ ਬ੍ਰਾਹ੍ਮਣਮਹਾਸਾਲਾ ਭਗਵਨ੍ਤਂ ਏਤਦਵੋਚੁਂ – ‘‘ਕਿਂ ਤ’’ਨ੍ਤਿ? ‘‘ਸਨ੍ਦਿਸ੍ਸਨ੍ਤਿ ਨੁ ਖੋ’’ਤਿਆਦਿ. ਤਂ ਸਬ੍ਬਂ ਉਤ੍ਤਾਨਤ੍ਥਮੇਵ. ਕੇਵਲਞ੍ਹੇਤ੍ਥ ਬ੍ਰਾਹ੍ਮਣਾਨਂ ਬ੍ਰਾਹ੍ਮਣਧਮ੍ਮੇਤਿ ਦੇਸਕਾਲਾਦਿਧਮ੍ਮੇ ਛਡ੍ਡੇਤ੍ਵਾ ਯੋ ਬ੍ਰਾਹ੍ਮਣਧਮ੍ਮੋ, ਤਸ੍ਮਿਂਯੇਵ. ਤੇਨ ਹਿ ਬ੍ਰਾਹ੍ਮਣਾਤਿ ਯਸ੍ਮਾ ਮਂ ਤੁਮ੍ਹੇ ਯਾਚਿਤ੍ਥ, ਤਸ੍ਮਾ ਬ੍ਰਾਹ੍ਮਣਾ ਸੁਣਾਥ, ਸੋਤਂ ਓਦਹਥ, ਸਾਧੁਕਂ ਮਨਸਿ ਕਰੋਥ, ਯੋਨਿਸੋ ਮਨਸਿ ਕਰੋਥ. ਤਥਾ ਪਯੋਗਸੁਦ੍ਧਿਯਾ ਸੁਣਾਥ, ਆਸਯਸੁਦ੍ਧਿਯਾ ਸਾਧੁਕਂ ਮਨਸਿ ਕਰੋਥ. ਅਵਿਕ੍ਖੇਪੇਨ ਸੁਣਾਥ, ਪਗ੍ਗਹੇਨ ਸਾਧੁਕਂ ਮਨਸਿ ਕਰੋਥਾਤਿਆਦਿਨਾ ਨਯੇਨ ਏਤੇਸਂ ਪਦਾਨਂ ਪੁਬ੍ਬੇ ਅਵੁਤ੍ਤੋਪਿ ਅਧਿਪ੍ਪਾਯੋ ਵੇਦਿਤਬ੍ਬੋ. ਅਥ ਭਗਵਤਾ ਵੁਤ੍ਤਂ ਤਂ ਵਚਨਂ ਸਮ੍ਪਟਿਚ੍ਛਨ੍ਤਾ ‘‘ਏਵਂ ਭੋ’’ਤਿ ਖੋ ਤੇ ਬ੍ਰਾਹ੍ਮਣਮਹਾਸਾਲਾ ਭਗਵਤੋ ਪਚ੍ਚਸ੍ਸੋਸੁਂ, ਭਗਵਤੋ ਵਚਨਂ ਅਭਿਮੁਖਾ ਹੁਤ੍ਵਾ ਅਸ੍ਸੋਸੁਂ. ਅਥ ਵਾ ਪਟਿਸ੍ਸੁਣਿਂਸੁ. ‘‘ਸੁਣਾਥ ਸਾਧੁਕਂ ਮਨਸਿ ਕਰੋਥਾ’’ਤਿ ਵੁਤ੍ਤਮਤ੍ਥਂ ਕਤ੍ਤੁਕਾਮਤਾਯ ਪਟਿਜਾਨਿਂਸੂਤਿ ਵੁਤ੍ਤਂ ਹੋਤਿ. ਅਥ ਤੇਸਂ ਏਵਂ ਪਟਿਸ੍ਸੁਤਵਤਂ ਭਗਵਾ ਏਤਦਵੋਚ – ‘‘ਕਿਂ ਤ’’ਨ੍ਤਿ? ‘‘ਇਸਯੋ ਪੁਬ੍ਬਕਾ’’ਤਿਆਦਿ.

੨੮੭. ਤਤ੍ਥ ਪਠਮਗਾਥਾਯ ਤਾਵ ਸਞ੍ਞਤਤ੍ਤਾਤਿ ਸੀਲਸਂਯਮੇਨ ਸਂਯਤਚਿਤ੍ਤਾ. ਤਪਸ੍ਸਿਨੋਤਿ ਇਨ੍ਦ੍ਰਿਯਸਂਵਰਤਪਯੁਤ੍ਤਾ. ਅਤ੍ਤਦਤ੍ਥਮਚਾਰਿਸੁਨ੍ਤਿ ਮਨ੍ਤਜ੍ਝੇਨਬ੍ਰਹ੍ਮਵਿਹਾਰਭਾਵਨਾਦਿਂ ਅਤ੍ਤਨੋ ਅਤ੍ਥਂ ਅਕਂਸੁ. ਸੇਸਂ ਪਾਕਟਮੇਵ.

੨੮੮. ਦੁਤਿਯਗਾਥਾਦੀਸੁਪਿ ਅਯਂ ਸਙ੍ਖੇਪਵਣ੍ਣਨਾ – ਨ ਪਸੂ ਬ੍ਰਾਹ੍ਮਣਾਨਾਸੁਨ੍ਤਿ ਪੋਰਾਣਾਨਂ ਬ੍ਰਾਹ੍ਮਣਾਨਂ ਪਸੂ ਨ ਆਸੁਂ, ਨ ਤੇ ਪਸੁਪਰਿਗ੍ਗਹਮਕਂਸੁ. ਨ ਹਿਰਞ੍ਞਂ ਨ ਧਾਨਿਯਨ੍ਤਿ ਹਿਰਞ੍ਞਞ੍ਚ ਬ੍ਰਾਹ੍ਮਣਾਨਂ ਅਨ੍ਤਮਸੋ ਜਤੁਮਾਸਕੋਪਿ ਨਾਹੋਸਿ, ਤਥਾ ਵੀਹਿਸਾਲਿਯਵਗੋਧੂਮਾਦਿ ਪੁਬ੍ਬਣ੍ਣਾਪਰਣ੍ਣਭੇਦਂ ਧਾਨਿਯਮ੍ਪਿ ਤੇਸਂ ਨਾਹੋਸਿ. ਤੇ ਹਿ ਨਿਕ੍ਖਿਤ੍ਤਜਾਤਰੂਪਰਜਤਾ ਅਸਨ੍ਨਿਧਿਕਾਰਕਾਵ ਹੁਤ੍ਵਾ ਕੇਵਲਂ ਸਜ੍ਝਾਯਧਨਧਞ੍ਞਾ ਅਤ੍ਤਨੋ ਮਨ੍ਤਜ੍ਝੇਨਸਙ੍ਖਾਤੇਨੇਵ ਧਨੇਨ ਧਞ੍ਞੇਨ ਚ ਸਮਨ੍ਨਾਗਤਾ ਅਹੇਸੁਂ. ਯੋ ਚਾਯਂ ਮੇਤ੍ਤਾਦਿਵਿਹਾਰੋ ਸੇਟ੍ਠਤ੍ਤਾ ਅਨੁਗਾਮਿਕਤ੍ਤਾ ਚ ਬ੍ਰਹ੍ਮਨਿਧੀਤਿ ਵੁਚ੍ਚਤਿ, ਤਞ੍ਚ ਬ੍ਰਹ੍ਮਂ ਨਿਧਿਮਪਾਲਯੁਂ ਸਦਾ ਤਸ੍ਸ ਭਾਵਨਾਨੁਯੋਗੇਨ.

੨੮੯. ਏਵਂ ਵਿਹਾਰੀਨਂ ਯਂ ਨੇਸਂ ਪਕਤਂ ਆਸਿ, ਯਂ ਏਤੇਸਂ ਪਕਤਂ ਏਤੇ ਬ੍ਰਾਹ੍ਮਣੇ ਉਦ੍ਦਿਸ੍ਸ ਕਤਂ ਅਹੋਸਿ. ਦ੍ਵਾਰਭਤ੍ਤਂ ਉਪਟ੍ਠਿਤਨ੍ਤਿ ‘‘ਬ੍ਰਾਹ੍ਮਣਾਨਂ ਦਸ੍ਸਾਮਾ’’ਤਿ ਸਜ੍ਜੇਤ੍ਵਾ ਤੇਹਿ ਤੇਹਿ ਦਾਯਕੇਹਿ ਅਤ੍ਤਨੋ ਅਤ੍ਤਨੋ ਘਰਦ੍ਵਾਰੇ ਠਪਿਤਭਤ੍ਤਂ. ਸਦ੍ਧਾਪਕਤਨ੍ਤਿ ਸਦ੍ਧਾਯ ਪਕਤਂ, ਸਦ੍ਧਾਦੇਯ੍ਯਨ੍ਤਿ ਵੁਤ੍ਤਂ ਹੋਤਿ. ਏਸਾਨਨ੍ਤਿ ਏਸਨ੍ਤੀਤਿ ਏਸਾ, ਤੇਸਂ ਏਸਾਨਂ, ਏਸਮਾਨਾਨਂ ਪਰਿਯੇਸਮਾਨਾਨਨ੍ਤਿ ਵੁਤ੍ਤਂ ਹੋਤਿ. ਦਾਤਵੇਤਿ ਦਾਤਬ੍ਬਂ. ਤਦਮਞ੍ਞਿਸੁਨ੍ਤਿ ਤਂ ਅਮਞ੍ਞਿਂਸੁ, ਤਂ ਦ੍ਵਾਰੇ ਸਜ੍ਜੇਤ੍ਵਾ ਠਪਿਤਂ ਭਤ੍ਤਂ ਸਦ੍ਧਾਦੇਯ੍ਯਂ ਪਰਿਯੇਸਮਾਨਾਨਂ ਏਤੇਸਂ ਬ੍ਰਾਹ੍ਮਣਾਨਂ ਦਾਤਬ੍ਬਂ ਅਮਞ੍ਞਿਂਸੁ ਦਾਯਕਾ ਜਨਾ, ਨ ਤਤੋ ਪਰਂ. ਅਨਤ੍ਥਿਕਾ ਹਿ ਤੇ ਅਞ੍ਞੇਨ ਅਹੇਸੁਂ, ਕੇਵਲਂ ਘਾਸਚ੍ਛਾਦਨਪਰਮਤਾਯ ਸਨ੍ਤੁਟ੍ਠਾਤਿ ਅਧਿਪ੍ਪਾਯੋ.

੨੯੦. ਨਾਨਾਰਤ੍ਤੇਹੀਤਿ ਨਾਨਾਵਿਧਰਾਗਰਤ੍ਤੇਹਿ ਵਤ੍ਥੇਹਿ ਵਿਚਿਤ੍ਰਤ੍ਥਰਣਤ੍ਥਤੇਹਿ, ਸਯਨੇਹਿ ਏਕਭੂਮਿਕਦ੍ਵਿਭੂਮਿਕਾਦਿਪਾਸਾਦਵਰੇਹਿ. ਆਵਸਥੇਹੀਤਿ ਏਵਰੂਪੇਹਿ ਉਪਕਰਣੇਹਿ. ਫੀਤਾ ਜਨਪਦਾ ਰਟ੍ਠਾ ਏਕੇਕਪ੍ਪਦੇਸਭੂਤਾ ਜਨਪਦਾ ਚ ਕੇਚਿ ਕੇਚਿ ਸਕਲਰਟ੍ਠਾ ਚ ‘‘ਨਮੋ ਬ੍ਰਾਹ੍ਮਣਾਨ’’ਨ੍ਤਿ ਸਾਯਂ ਪਾਤਂ ਬ੍ਰਾਹ੍ਮਣੇ ਦੇਵੇ ਵਿਯ ਨਮਸ੍ਸਿਂਸੁ.

੨੯੧. ਤੇ ਏਵਂ ਨਮਸ੍ਸਿਯਮਾਨਾ ਲੋਕੇਨ ਅਵਜ੍ਝਾ ਬ੍ਰਾਹ੍ਮਣਾ ਆਸੁਂ, ਨ ਕੇਵਲਞ੍ਚ ਅਵਜ੍ਝਾ, ਅਜੇਯ੍ਯਾ ਵਿਹਿਂਸਿਤੁਮ੍ਪਿ ਅਨਭਿਭਵਨੀਯਤ੍ਤਾ ਅਜੇਯ੍ਯਾ ਚ ਅਹੇਸੁਂ. ਕਿਂ ਕਾਰਣਾ? ਧਮ੍ਮਰਕ੍ਖਿਤਾ, ਯਸ੍ਮਾ ਧਮ੍ਮੇਨ ਰਕ੍ਖਿਤਾ. ਤੇ ਹਿ ਪਞ੍ਚ ਵਰਸੀਲਧਮ੍ਮੇ ਰਕ੍ਖਿਂਸੁ, ‘‘ਧਮ੍ਮੋ ਹਵੇ ਰਕ੍ਖਤਿ ਧਮ੍ਮਚਾਰਿ’’ਨ੍ਤਿ (ਜਾ. ੧.੧੦.੧੦੨; ੧.੧੫.੩੮੫) ਧਮ੍ਮਰਕ੍ਖਿਤਾ ਹੁਤ੍ਵਾ ਅਵਜ੍ਝਾ ਅਜੇਯ੍ਯਾ ਚ ਅਹੇਸੁਨ੍ਤਿ ਅਧਿਪ੍ਪਾਯੋ. ਨ ਨੇ ਕੋਚਿ ਨਿਵਾਰੇਸੀਤਿ ਤੇ ਬ੍ਰਾਹ੍ਮਣੇ ਕੁਲਾਨਂ ਦ੍ਵਾਰੇਸੁ ਸਬ੍ਬਸੋ ਬਾਹਿਰੇਸੁ ਚ ਅਬ੍ਭਨ੍ਤਰੇਸੁ ਚ ਸਬ੍ਬਦ੍ਵਾਰੇਸੁ ਯਸ੍ਮਾ ਤੇਸੁ ਪਿਯਸਮ੍ਮਤੇਸੁ ਵਰਸੀਲਸਮਨ੍ਨਾਗਤੇਸੁ ਮਾਤਾਪਿਤੂਸੁ ਵਿਯ ਅਤਿਵਿਸ੍ਸਤ੍ਥਾ ਮਨੁਸ੍ਸਾ ਅਹੇਸੁਂ, ਤਸ੍ਮਾ ‘‘ਇਦਂ ਨਾਮ ਠਾਨਂ ਤਯਾ ਨ ਪਵਿਸਿਤਬ੍ਬ’’ਨ੍ਤਿ ਨ ਕੋਚਿ ਨਿਵਾਰੇਸਿ.

੨੯੨. ਏਵਂ ਧਮ੍ਮਰਕ੍ਖਿਤਾ ਕੁਲਦ੍ਵਾਰੇਸੁ ਅਨਿਵਾਰਿਤਾ ਚਰਨ੍ਤਾ ਅਟ੍ਠ ਚ ਚਤ੍ਤਾਲੀਸਞ੍ਚਾਤਿ ਅਟ੍ਠਚਤ੍ਤਾਲੀਸਂ ਵਸ੍ਸਾਨਿ ਕੁਮਾਰਭਾਵਤੋ ਪਭੁਤਿ ਚਰਣੇਨ ਕੋਮਾਰਂ ਬ੍ਰਹ੍ਮਚਰਿਯਂ ਚਰਿਂਸੁ ਤੇ. ਯੇਪਿ ਬ੍ਰਾਹ੍ਮਣਚਣ੍ਡਾਲਾ ਅਹੇਸੁਂ, ਕੋ ਪਨ ਵਾਦੋ ਬ੍ਰਹ੍ਮਸਮਾਦੀਸੂਤਿ ਏਵਮੇਤ੍ਥ ਅਧਿਪ੍ਪਾਯੋ ਵੇਦਿਤਬ੍ਬੋ. ਏਵਂ ਬ੍ਰਹ੍ਮਚਰਿਯਂ ਚਰਨ੍ਤਾ ਏਵ ਹਿ ਵਿਜ੍ਜਾਚਰਣਪਰਿਯੇਟ੍ਠਿਂ ਅਚਰੁਂ ਬ੍ਰਾਹ੍ਮਣਾ ਪੁਰੇ, ਨ ਅਬ੍ਰਹ੍ਮਚਾਰਿਨੋ ਹੁਤ੍ਵਾ. ਤਤ੍ਥ ਵਿਜ੍ਜਾਪਰਿਯੇਟ੍ਠੀਤਿ ਮਨ੍ਤਜ੍ਝੇਨਂ. ਵੁਤ੍ਤਞ੍ਚੇਤਂ ‘‘ਸੋ ਅਟ੍ਠਚਤ੍ਤਾਲੀਸ ਵਸ੍ਸਾਨਿ ਕੋਮਾਰਂ ਬ੍ਰਹ੍ਮਚਰਿਯਂ ਚਰਤਿ ਮਨ੍ਤੇ ਅਧੀਯਮਾਨੋ’’ਤਿ (ਅ. ਨਿ. ੫.੧੯੨). ਚਰਣਪਰਿਯੇਟ੍ਠੀਤਿ ਸੀਲਰਕ੍ਖਣਂ. ‘‘ਵਿਜ੍ਜਾਚਰਣਪਰਿਯੇਟ੍ਠੁ’’ਨ੍ਤਿਪਿ ਪਾਠੋ, ਵਿਜ੍ਜਾਚਰਣਂ ਪਰਿਯੇਸਿਤੁਂ ਅਚਰੁਨ੍ਤਿ ਅਤ੍ਥੋ.

੨੯੩. ਯਥਾਵੁਤ੍ਤਞ੍ਚ ਕਾਲਂ ਬ੍ਰਹ੍ਮਚਰਿਯਂ ਚਰਿਤ੍ਵਾ ਤਤੋ ਪਰਂ ਘਰਾਵਾਸਂ ਕਪ੍ਪੇਨ੍ਤਾਪਿ ਨ ਬ੍ਰਾਹ੍ਮਣਾ ਅਞ੍ਞਮਗਮੁਂ ਖਤ੍ਤਿਯਂ ਵਾ ਵੇਸ੍ਸਾਦੀਸੁ ਅਞ੍ਞਤਰਂ ਵਾ, ਯੇ ਅਹੇਸੁਂ ਦੇਵਸਮਾ ਵਾ ਮਰਿਯਾਦਾ ਵਾਤਿ ਅਧਿਪ੍ਪਾਯੋ. ਤਥਾ ਸਤਂ ਵਾ ਸਹਸ੍ਸਂ ਵਾ ਦਤ੍ਵਾ ਨਪਿ ਭਰਿਯਂ ਕਿਣਿਂਸੁ ਤੇ, ਸੇਯ੍ਯਥਾਪਿ ਏਤਰਹਿ ਏਕਚ੍ਚੇ ਕਿਣਨ੍ਤਿ. ਤੇ ਹਿ ਧਮ੍ਮੇਨ ਦਾਰਂ ਪਰਿਯੇਸਨ੍ਤਿ. ਕਥਂ? ਅਟ੍ਠਚਤ੍ਤਾਲੀਸਂ ਵਸ੍ਸਾਨਿ ਬ੍ਰਹ੍ਮਚਰਿਯਂ ਚਰਿਤ੍ਵਾ ਬ੍ਰਾਹ੍ਮਣਾ ਕਞ੍ਞਾਭਿਕ੍ਖਂ ਆਹਿਣ੍ਡਨ੍ਤਿ – ‘‘ਅਹਂ ਅਟ੍ਠਚਤ੍ਤਾਲੀਸ ਵਸ੍ਸਾਨਿ ਚਿਣ੍ਣਬ੍ਰਹ੍ਮਚਰਿਯੋ, ਯਦਿ ਵਯਪ੍ਪਤ੍ਤਾ ਦਾਰਿਕਾ ਅਤ੍ਥਿ, ਦੇਥ ਮੇ’’ਤਿ. ਤਤੋ ਯਸ੍ਸ ਵਯਪ੍ਪਤ੍ਤਾ ਦਾਰਿਕਾ ਹੋਤਿ, ਸੋ ਤਂ ਅਲਙ੍ਕਰਿਤ੍ਵਾ ਨੀਹਰਿਤ੍ਵਾ ਦ੍ਵਾਰੇ ਠਿਤਸ੍ਸੇਵ ਬ੍ਰਾਹ੍ਮਣਸ੍ਸ ਹਤ੍ਥੇ ਉਦਕਂ ਆਸਿਞ੍ਚਨ੍ਤੋ ‘‘ਇਮਂ ਤੇ, ਬ੍ਰਾਹ੍ਮਣ, ਭਰਿਯਂ ਪੋਸਾਵਨਤ੍ਥਾਯ ਦਮ੍ਮੀ’’ਤਿ ਵਤ੍ਵਾ ਦੇਤਿ.

ਕਸ੍ਮਾ ਪਨ ਤੇ ਏਵਂ ਚਿਰਂ ਬ੍ਰਹ੍ਮਚਰਿਯਂ ਚਰਿਤ੍ਵਾਪਿ ਦਾਰਂ ਪਰਿਯੇਸਨ੍ਤਿ, ਨ ਯਾਵਜੀਵਂ ਬ੍ਰਹ੍ਮਚਾਰਿਨੋ ਹੋਨ੍ਤੀਤਿ? ਮਿਚ੍ਛਾਦਿਟ੍ਠਿਵਸੇਨ. ਤੇਸਞ੍ਹਿ ਏਵਂਦਿਟ੍ਠਿ ਹੋਤਿ – ‘‘ਯੋ ਪੁਤ੍ਤਂ ਨ ਉਪ੍ਪਾਦੇਤਿ, ਸੋ ਕੁਲਵਂਸਚ੍ਛੇਦਕਰੋ ਹੋਤਿ, ਤਤੋ ਨਿਰਯੇ ਪਚ੍ਚਤੀ’’ਤਿ. ਚਤ੍ਤਾਰੋ ਕਿਰ ਅਭਾਯਿਤਬ੍ਬਂ ਭਾਯਨ੍ਤਿ ਗਣ੍ਡੁਪ੍ਪਾਦੋ ਕਿਕੀ ਕੁਨ੍ਤਨੀ ਬ੍ਰਾਹ੍ਮਣਾਤਿ. ਗਣ੍ਡੁਪ੍ਪਾਦਾ ਕਿਰ ਮਹਾਪਥਵਿਯਾ ਖਯਭਯੇਨ ਮਤ੍ਤਭੋਜਿਨੋ ਹੋਨ੍ਤਿ, ਨ ਬਹੁਂ ਮਤ੍ਤਿਕਂ ਖਾਦਨ੍ਤਿ. ਕਿਕੀ ਸਕੁਣਿਕਾ ਆਕਾਸਪਤਨਭਯੇਨ ਅਣ੍ਡਸ੍ਸ ਉਪਰਿ ਉਤ੍ਤਾਨਾ ਸੇਤਿ. ਕੁਨ੍ਤਨੀ ਸਕੁਣਿਕਾ ਪਥਵਿਕਮ੍ਪਨਭਯੇਨ ਪਾਦੇਹਿ ਭੂਮਿਂ ਨ ਸੁਟ੍ਠੁ ਅਕ੍ਕਮਤਿ. ਬ੍ਰਾਹ੍ਮਣਾ ਕੁਲਵਂਸੂਪਚ੍ਛੇਦਭਯੇਨ ਦਾਰਂ ਪਰਿਯੇਸਨ੍ਤਿ. ਆਹ ਚੇਤ੍ਥ –

‘‘ਗਣ੍ਡੁਪ੍ਪਾਦੋ ਕਿਕੀ ਚੇਵ, ਕੁਨ੍ਤੀ ਬ੍ਰਾਹ੍ਮਣਧਮ੍ਮਿਕੋ;

ਏਤੇ ਅਭਯਂ ਭਾਯਨ੍ਤਿ, ਸਮ੍ਮੂਲ਼੍ਹਾ ਚਤੁਰੋ ਜਨਾ’’ਤਿ.

ਏਵਂ ਧਮ੍ਮੇਨ ਦਾਰਂ ਪਰਿਯੇਸਿਤ੍ਵਾਪਿ ਚ ਸਮ੍ਪਿਯੇਨੇਵ ਸਂਵਾਸਂ ਸਙ੍ਗਨ੍ਤ੍ਵਾ ਸਮਰੋਚਯੁਂ, ਸਮ੍ਪਿਯੇਨੇਵ ਅਞ੍ਞਮਞ੍ਞਂ ਪੇਮੇਨੇਵ ਕਾਯੇਨ ਚ ਚਿਤ੍ਤੇਨ ਚ ਮਿਸ੍ਸੀਭੂਤਾ ਸਙ੍ਘਟਿਤਾ ਸਂਸਟ੍ਠਾ ਹੁਤ੍ਵਾ ਸਂਵਾਸਂ ਸਮਰੋਚਯੁਂ, ਨ ਅਪ੍ਪਿਯੇਨ ਨ ਨਿਗ੍ਗਹੇਨ ਚਾਤਿ ਵੁਤ੍ਤਂ ਹੋਤਿ.

੨੯੪. ਏਵਂ ਸਮ੍ਪਿਯੇਨੇਵ ਸਂਵਾਸਂ ਕਰੋਨ੍ਤਾਪਿ ਚ ਅਞ੍ਞਤ੍ਰ ਤਮ੍ਹਾਤਿ, ਯੋ ਸੋ ਉਤੁਸਮਯੋ, ਯਮ੍ਹਿ ਸਮਯੇ ਬ੍ਰਾਹ੍ਮਣੀ ਬ੍ਰਾਹ੍ਮਣੇਨ ਉਪਗਨ੍ਤਬ੍ਬਾ, ਅਞ੍ਞਤ੍ਰ ਤਮ੍ਹਾ ਸਮਯਾ ਠਪੇਤ੍ਵਾ ਤਂ ਸਮਯਂ ਉਤੁਤੋ ਵਿਰਤਂ ਉਤੁਵੇਰਮਣਿਂ ਪਤਿ ਭਰਿਯਂ, ਯਾਵ ਪੁਨ ਸੋ ਸਮਯੋ ਆਗਚ੍ਛਤਿ, ਤਾਵ ਅਟ੍ਠਤ੍ਵਾ ਅਨ੍ਤਰਾਯੇਵ. ਮੇਥੁਨਂ ਧਮ੍ਮਨ੍ਤਿ ਮੇਥੁਨਾਯ ਧਮ੍ਮਾਯ. ਸਮ੍ਪਦਾਨਵਚਨਪਤ੍ਤਿਯਾ ਕਿਰੇਤਂ ਉਪਯੋਗਵਚਨਂ. ਨਾਸ੍ਸੁ ਗਚ੍ਛਨ੍ਤੀਤਿ ਨੇਵ ਗਚ੍ਛਨ੍ਤਿ. ਬ੍ਰਾਹ੍ਮਣਾਤਿ ਯੇ ਹੋਨ੍ਤਿ ਦੇਵਸਮਾ ਚ ਮਰਿਯਾਦਾ ਚਾਤਿ ਅਧਿਪ੍ਪਾਯੋ.

੨੯੫. ਅਵਿਸੇਸੇਨ ਪਨ ਸਬ੍ਬੇਪਿ ਬ੍ਰਹ੍ਮਚਰਿਯਞ੍ਚ…ਪੇ… ਅਵਣ੍ਣਯੁਂ. ਤਤ੍ਥ ਬ੍ਰਹ੍ਮਚਰਿਯਨ੍ਤਿ ਮੇਥੁਨਵਿਰਤਿ. ਸੀਲਨ੍ਤਿ ਸੇਸਾਨਿ ਚਤ੍ਤਾਰਿ ਸਿਕ੍ਖਾਪਦਾਨਿ. ਅਜ੍ਜਵਨ੍ਤਿ ਉਜੁਭਾਵੋ, ਅਤ੍ਥਤੋ ਅਸਠਤਾ ਅਮਾਯਾਵਿਤਾ ਚ. ਮਦ੍ਦਵਨ੍ਤਿ ਮੁਦੁਭਾਵੋ, ਅਤ੍ਥਤੋ ਅਤ੍ਥਦ੍ਧਤਾ ਅਨਤਿਮਾਨਿਤਾ ਚ. ਤਪੋਤਿ ਇਨ੍ਦ੍ਰਿਯਸਂਵਰੋ. ਸੋਰਚ੍ਚਨ੍ਤਿ ਸੁਰਤਭਾਵੋ ਸੁਖਸੀਲਤਾ ਅਪ੍ਪਟਿਕੂਲਸਮਾਚਾਰਤਾ. ਅਵਿਹਿਂਸਾਤਿ ਪਾਣਿਆਦੀਹਿ ਅਵਿਹੇਸਿਕਜਾਤਿਕਤਾ ਸਕਰੁਣਭਾਵੋ. ਖਨ੍ਤੀਤਿ ਅਧਿਵਾਸਨਕ੍ਖਨ੍ਤਿ. ਇਚ੍ਚੇਤੇ ਗੁਣੇ ਅਵਣ੍ਣਯੁਂ. ਯੇਪਿ ਨਾਸਕ੍ਖਿਂਸੁ ਸਬ੍ਬਸੋ ਪਟਿਪਤ੍ਤਿਯਾ ਆਰਾਧੇਤੁਂ, ਤੇਪਿ ਤਤ੍ਥ ਸਾਰਦਸ੍ਸਿਨੋ ਹੁਤ੍ਵਾ ਵਾਚਾਯ ਵਣ੍ਣਯਿਂਸੁ ਪਸਂਸਿਂਸੁ.

੨੯੬. ਏਵਂ ਵਣ੍ਣੇਨ੍ਤਾਨਞ੍ਚ ਯੋ ਨੇਸਂ…ਪੇ… ਨਾਗਮਾ, ਯੋ ਏਤੇਸਂ ਬ੍ਰਾਹ੍ਮਣਾਨਂ ਪਰਮੋ ਬ੍ਰਹ੍ਮਾ ਅਹੋਸਿ, ਬ੍ਰਹ੍ਮਸਮੋ ਨਾਮ ਉਤ੍ਤਮੋ ਬ੍ਰਾਹ੍ਮਣੋ ਅਹੋਸਿ, ਦਲ਼੍ਹੇਨ ਪਰਕ੍ਕਮੇਨ ਸਮਨ੍ਨਾਗਤਤ੍ਤਾ ਦਲ਼੍ਹਪਰਕ੍ਕਮੋ. ਸ ਵਾਤਿ ਵਿਭਾਵਨੇ ਵਾ-ਸਦ੍ਦੋ, ਤੇਨ ਸੋ ਏਵਰੂਪੋ ਬ੍ਰਾਹ੍ਮਣੋਤਿ ਤਮੇਵ ਵਿਭਾਵੇਤਿ. ਮੇਥੁਨਂ ਧਮ੍ਮਨ੍ਤਿ ਮੇਥੁਨਸਮਾਪਤ੍ਤਿਂ. ਸੁਪਿਨਨ੍ਤੇਪਿ ਨਾਗਮਾਤਿ ਸੁਪਿਨੇਪਿ ਨ ਅਗਮਾਸਿ.

੨੯੭. ਤਤੋ ਤਸ੍ਸ ਵਤ੍ਤਂ…ਪੇ… ਅਵਣ੍ਣਯੁਂ. ਇਮਾਯ ਗਾਥਾਯ ਨਵਮਗਾਥਾਯ ਵੁਤ੍ਤਗੁਣੇਯੇਵ ਆਦਿਅਨ੍ਤਵਸੇਨ ਨਿਦ੍ਦਿਸਨ੍ਤੋ ਦੇਵਸਮੇ ਬ੍ਰਾਹ੍ਮਣੇ ਪਕਾਸੇਤਿ. ਤੇ ਹਿ ਵਿਞ੍ਞੁਜਾਤਿਕਾ ਪਣ੍ਡਿਤਾ ਤਸ੍ਸ ਬ੍ਰਹ੍ਮਸਮਸ੍ਸ ਬ੍ਰਾਹ੍ਮਣਸ੍ਸ ਵਤ੍ਤਂ ਅਨੁਸਿਕ੍ਖਨ੍ਤਿ ਪਬ੍ਬਜ੍ਜਾਯ ਝਾਨਭਾਵਨਾਯ ਚ, ਤੇ ਚ ਇਮੇ ਬ੍ਰਹ੍ਮਚਰਿਯਾਦਿਗੁਣੇ ਪਟਿਪਤ੍ਤਿਯਾ ਏਵ ਵਣ੍ਣਯਨ੍ਤੀਤਿ. ਤੇ ਸਬ੍ਬੇਪਿ ਬ੍ਰਾਹ੍ਮਣਾ ਪਞ੍ਚਕਨਿਪਾਤੇ ਦੋਣਸੁਤ੍ਤੇ (ਅ. ਨਿ. ੫.੧੯੨) ਵੁਤ੍ਤਨਯੇਨੇਵ ਵੇਦਿਤਬ੍ਬਾ.

੨੯੮. ਇਦਾਨਿ ਮਰਿਯਾਦੇ ਬ੍ਰਾਹ੍ਮਣੇ ਦਸ੍ਸੇਨ੍ਤੋ ਆਹ – ‘‘ਤਣ੍ਡੁਲਂ ਸਯਨ’’ਨ੍ਤਿ. ਤਸ੍ਸਤ੍ਥੋ – ਤੇਸੁ ਯੇ ਹੋਨ੍ਤਿ ਮਰਿਯਾਦਾ, ਤੇ ਬ੍ਰਾਹ੍ਮਣਾ ਸਚੇ ਯਞ੍ਞਂ ਕਪ੍ਪੇਤੁਕਾਮਾ ਹੋਨ੍ਤਿ, ਅਥ ਆਮਕਧਞ੍ਞਪਟਿਗ੍ਗਹਣਾ ਪਟਿਵਿਰਤਤ੍ਤਾ ਨਾਨਪ੍ਪਕਾਰਕਂ ਤਣ੍ਡੁਲਞ੍ਚ, ਮਞ੍ਚਪੀਠਾਦਿਭੇਦਂ ਸਯਨਞ੍ਚ, ਖੋਮਾਦਿਭੇਦਂ ਵਤ੍ਥਞ੍ਚ, ਗੋਸਪ੍ਪਿਤਿਲਤੇਲਾਦਿਭੇਦਂ ਸਪ੍ਪਿਤੇਲਞ੍ਚ ਯਾਚਿਯ ਧਮ੍ਮੇਨ, ‘‘ਉਦ੍ਦਿਸ੍ਸ ਅਰਿਯਾ ਤਿਟ੍ਠਨ੍ਤਿ, ਏਸਾ ਅਰਿਯਾਨ ਯਾਚਨਾ’’ਤਿ ਏਵਂ ਵੁਤ੍ਤੇਨ ਉਦ੍ਦਿਸ੍ਸਠਾਨਸਙ੍ਖਾਤੇਨ ਧਮ੍ਮੇਨ ਯਾਚਿਤ੍ਵਾ, ਅਥ ਯੋ ਯਂ ਇਚ੍ਛਤਿ ਦਾਤੁਂ, ਤੇਨ ਤਂ ਦਿਨ੍ਨਤਣ੍ਡੁਲਾਦਿਂ ਸਮੋਧਾਨੇਤ੍ਵਾ ਸਂਕਡ੍ਢਿਤ੍ਵਾ. ‘‘ਸਮੁਦਾਨੇਤ੍ਵਾ’’ਤਿਪਿ ਪਾਠੋ, ਏਕੋਯੇਵਤ੍ਥੋ. ਤਤੋ ਯਞ੍ਞਮਕਪ੍ਪਯੁਨ੍ਤਿ ਤਤੋ ਗਹੇਤ੍ਵਾ ਦਾਨਮਕਂਸੁ.

੨੯੯. ਕਰੋਨ੍ਤਾ ਚ ਏਵਮੇਤਸ੍ਮਿਂ ਉਪਟ੍ਠਿਤਸ੍ਮਿਂ ਦਾਨਸਙ੍ਖਾਤੇ ਯਞ੍ਞਸ੍ਮਿਂ ਨਾਸ੍ਸੁ ਗਾਵੋ ਹਨਿਂਸੁ ਤੇ, ਨ ਤੇ ਗਾਵਿਯੋ ਹਨਿਂਸੁ. ਗਾਵੀਮੁਖੇਨ ਚੇਤ੍ਥ ਸਬ੍ਬਪਾਣਾ ਵੁਤ੍ਤਾਤਿ ਵੇਦਿਤਬ੍ਬਾ. ਕਿਂਕਾਰਣਾ ਨ ਹਨਿਂਸੂਤਿ? ਬ੍ਰਹ੍ਮਚਰਿਯਾਦਿਗੁਣਯੁਤ੍ਤਤ੍ਤਾ. ਅਪਿਚ ਵਿਸੇਸਤੋ ਯਥਾ ਮਾਤਾ…ਪੇ… ਨਾਸ੍ਸੁ ਗਾਵੋ ਹਨਿਂਸੁ ਤੇ. ਤਤ੍ਥ ਯਾਸੁ ਜਾਯਨ੍ਤਿ ਓਸਧਾਤਿ ਯਾਸੁ ਪਿਤ੍ਤਾਦੀਨਂ ਭੇਸਜ੍ਜਭੂਤਾ ਪਞ੍ਚ ਗੋਰਸਾ ਜਾਯਨ੍ਤਿ.

੩੦੦. ਅਨ੍ਨਦਾਤਿਆਦੀਸੁ ਯਸ੍ਮਾ ਪਞ੍ਚ ਗੋਰਸੇ ਪਰਿਭੁਞ੍ਜਨ੍ਤਾਨਂ ਖੁਦਾ ਵੂਪਸਮ੍ਮਤਿ, ਬਲਂ ਵਡ੍ਢਤਿ, ਛਵਿਵਣ੍ਣੋ ਵਿਪ੍ਪਸੀਦਤਿ, ਕਾਯਿਕਮਾਨਸਿਕਂ ਸੁਖਂ ਉਪ੍ਪਜ੍ਜਤਿ, ਤਸ੍ਮਾ ਅਨ੍ਨਦਾ ਬਲਦਾ ਵਣ੍ਣਦਾ ਸੁਖਦਾ ਚੇਤਾਤਿ ਵੇਦਿਤਬ੍ਬਾ. ਸੇਸਮੇਤ੍ਥ ਉਤ੍ਤਾਨਤ੍ਥਮੇਵ.

੩੦੧. ਏਵਂ ਤੇ ਯਞ੍ਞੇਸੁ ਗਾਵੋ ਅਹਨਨ੍ਤਾ ਪੁਞ੍ਞਪ੍ਪਭਾਵਾਨੁਗ੍ਗਹਿਤਸਰੀਰਾ ਸੁਖੁਮਾਲਾ…ਪੇ… ਸੁਖਮੇਧਿਤ੍ਥ ਯਂ ਪਜਾ. ਤਤ੍ਥ ਸੁਖੁਮਾਲਾ ਮੁਦੁਤਲੁਣਹਤ੍ਥਪਾਦਾਦਿਤਾਯ, ਮਹਾਕਾਯਾ ਆਰੋਹਪਰਿਣਾਹਸਮ੍ਪਤ੍ਤਿਯਾ, ਵਣ੍ਣਵਨ੍ਤੋ ਸੁਵਣ੍ਣਵਣ੍ਣਤਾਯ ਸਣ੍ਠਾਨਯੁਤ੍ਤਤਾਯ ਚ, ਯਸਸ੍ਸਿਨੋ ਲਾਭਪਰਿਵਾਰਸਮ੍ਪਦਾਯ. ਸੇਹਿ ਧਮ੍ਮੇਹੀਤਿ ਸਕੇਹਿ ਚਾਰਿਤ੍ਤੇਹਿ. ਕਿਚ੍ਚਾਕਿਚ੍ਚੇਸੁ ਉਸ੍ਸੁਕਾਤਿ ਕਿਚ੍ਚੇਸੁ ‘‘ਇਦਂ ਕਾਤਬ੍ਬਂ’’, ਅਕਿਚ੍ਚੇਸੁ ‘‘ਇਦਂ ਨ ਕਾਤਬ੍ਬ’’ਨ੍ਤਿ ਉਸ੍ਸੁਕ੍ਕਮਾਪਨ੍ਨਾ ਹੁਤ੍ਵਾਤਿ ਅਤ੍ਥੋ. ਏਵਂ ਤੇ ਪੋਰਾਣਾ ਬ੍ਰਾਹ੍ਮਣਾ ਏਵਰੂਪਾ ਹੁਤ੍ਵਾ ਦਸ੍ਸਨੀਯਾ ਪਸਾਦਨੀਯਾ ਲੋਕਸ੍ਸ ਪਰਮਦਕ੍ਖਿਣੇਯ੍ਯਾ ਇਮਾਯ ਪਟਿਪਤ੍ਤਿਯਾ ਯਾਵ ਲੋਕੇ ਅਵਤ੍ਤਿਂਸੁ, ਤਾਵ ਵਿਗਤਈਤਿਭਯੁਪਦ੍ਦਵਾ ਹੁਤ੍ਵਾ ਨਾਨਪ੍ਪਕਾਰਕਂ ਸੁਖਂ ਏਧਿਤ੍ਥ ਪਾਪੁਣਿ, ਸੁਖਂ ਵਾ ਏਧਿਤ੍ਥ ਸੁਖਂ ਵੁਡ੍ਢਿਂ ਅਗਮਾਸਿ. ਅਯਂ ਪਜਾਤਿ ਸਤ੍ਤਲੋਕਂ ਨਿਦਸ੍ਸੇਤਿ.

੩੦੨-੩. ਕਾਲਚ੍ਚਯੇਨ ਪਨ ਸਮ੍ਭਿਨ੍ਨਮਰਿਯਾਦਭਾਵਂ ਆਪਜ੍ਜਿਤੁਕਾਮਾਨਂ ਤੇਸਂ ਆਸਿ ਵਿਪਲ੍ਲਾਸੋ…ਪੇ… ਭਾਗਸੋ ਮਿਤੇ. ਤਤ੍ਥ ਵਿਪਲ੍ਲਾਸੋਤਿ ਵਿਪਰੀਤਸਞ੍ਞਾ. ਅਣੁਤੋ ਅਣੁਨ੍ਤਿ ਲਾਮਕਟ੍ਠੇਨ ਪਰਿਤ੍ਤਟ੍ਠੇਨ ਅਪ੍ਪਸ੍ਸਾਦਟ੍ਠੇਨ ਅਣੁਭੂਤਤੋ ਕਾਮਗੁਣਤੋ ਉਪ੍ਪਨ੍ਨਂ ਝਾਨਸਾਮਞ੍ਞਨਿਬ੍ਬਾਨਸੁਖਾਨਿ ਉਪਨਿਧਾਯ ਸਙ੍ਖ੍ਯਮ੍ਪਿ ਅਨੁਪਗਮਨੇਨ ਅਣੁਂ ਕਾਮਸੁਖਂ, ਲੋਕੁਤ੍ਤਰਸੁਖਂ ਵਾ ਉਪਨਿਧਾਯ ਅਣੁਭੂਤਤੋ ਅਤ੍ਤਨਾ ਪਟਿਲਦ੍ਧਲੋਕਿਯਸਮਾਪਤ੍ਤਿਸੁਖਤੋ ਅਣੁਂ ਅਪ੍ਪਕਤੋਪਿ ਅਪ੍ਪਕਂ ਕਾਮਸੁਖਂ ਦਿਸ੍ਵਾਤਿ ਅਧਿਪ੍ਪਾਯੋ. ਰਾਜਿਨੋ ਚਾਤਿ ਰਞ੍ਞੋ ਚ. ਵਿਯਾਕਾਰਨ੍ਤਿ ਸਮ੍ਪਤ੍ਤਿਂ. ਆਜਞ੍ਞਸਂਯੁਤ੍ਤੇਤਿ ਅਸ੍ਸਾਜਾਨੀਯਸਂਯੁਤ੍ਤੇ. ਸੁਕਤੇਤਿ ਦਾਰੁਕਮ੍ਮਲੋਹਕਮ੍ਮੇਨ ਸੁਨਿਟ੍ਠਿਤੇ. ਚਿਤ੍ਤਸਿਬ੍ਬਨੇਤਿ ਸੀਹਚਮ੍ਮਾਦੀਹਿ ਅਲਙ੍ਕਰਣਵਸੇਨ ਚਿਤ੍ਰਸਿਬ੍ਬਨੇ. ਨਿਵੇਸਨੇਤਿ ਘਰਵਤ੍ਥੂਨਿ. ਨਿਵੇਸੇਤਿ ਤਤ੍ਥ ਪਤਿਟ੍ਠਾਪਿਤਘਰਾਨਿ. ਵਿਭਤ੍ਤੇਤਿ ਆਯਾਮਵਿਤ੍ਥਾਰਵਸੇਨ ਵਿਭਤ੍ਤਾਨਿ. ਭਾਗਸੋ ਮਿਤੇਤਿ ਅਙ੍ਗਣਦ੍ਵਾਰਪਾਸਾਦਕੂਟਾਗਾਰਾਦਿਵਸੇਨ ਕੋਟ੍ਠਾਸਂ ਕੋਟ੍ਠਾਸਂ ਕਤ੍ਵਾ ਮਿਤਾਨਿ. ਕਿਂ ਵੁਤ੍ਤਂ ਹੋਤਿ? ਤੇਸਂ ਬ੍ਰਾਹ੍ਮਣਾਨਂ ਅਣੁਤੋ ਅਣੁਸਞ੍ਞਿਤਂ ਕਾਮਸੁਖਞ੍ਚ ਰਞ੍ਞੋ ਬ੍ਯਾਕਾਰਞ੍ਚ ਅਲਙ੍ਕਤਨਾਰਿਯੋ ਚ ਵੁਤ੍ਤਪ੍ਪਕਾਰੇ ਰਥੇ ਚ ਨਿਵੇਸਨੇ ਨਿਵੇਸੇ ਚ ਦਿਸ੍ਵਾ ਦੁਕ੍ਖੇਸੁਯੇਵ ਏਤੇਸੁ ਵਤ੍ਥੂਸੁ ‘‘ਸੁਖ’’ਨ੍ਤਿ ਪਵਤ੍ਤਤ੍ਤਾ ਪੁਬ੍ਬੇ ਪਵਤ੍ਤਨੇਕ੍ਖਮ੍ਮਸਞ੍ਞਾਵਿਪਲ੍ਲਾਸਸਙ੍ਖਾਤਾ ਵਿਪਰੀਤਸਞ੍ਞਾ ਆਸਿ.

੩੦੪. ਤੇ ਏਵਂ ਵਿਪਰੀਤਸਞ੍ਞਾ ਹੁਤ੍ਵਾ ਗੋਮਣ੍ਡਲਪਰਿਬ੍ਯੂਲ਼੍ਹਂ…ਪੇ… ਬ੍ਰਾਹ੍ਮਣਾ. ਤਤ੍ਥ ਗੋਮਣ੍ਡਲਪਰਿਬ੍ਯੂਲ਼੍ਹਨ੍ਤਿ ਗੋਯੂਥੇਹਿ ਪਰਿਕਿਣ੍ਣਂ. ਨਾਰੀਵਰਗਣਾਯੁਤਨ੍ਤਿ ਵਰਨਾਰੀਗਣਸਂਯੁਤ੍ਤਂ. ਉਲ਼ਾਰਨ੍ਤਿ ਵਿਪੁਲਂ. ਮਾਨੁਸਂ ਭੋਗਨ੍ਤਿ ਮਨੁਸ੍ਸਾਨਂ ਨਿਵੇਸਨਾਦਿਭੋਗਵਤ੍ਥੁਂ. ਅਭਿਜ੍ਝਾਯਿਂਸੂਤਿ ‘‘ਅਹੋ ਵਤਿਦਂ ਅਮ੍ਹਾਕਂ ਅਸ੍ਸਾ’’ਤਿ ਤਣ੍ਹਂ ਵਡ੍ਢੇਤ੍ਵਾ ਅਭਿਪਤ੍ਥਯਮਾਨਾ ਝਾਯਿਂਸੁ.

੩੦੫. ਏਵਂ ਅਭਿਜ੍ਝਾਯਨ੍ਤਾ ਚ ‘‘ਏਤੇ ਮਨੁਸ੍ਸਾ ਸੁਨ੍ਹਾਤਾ ਸੁਵਿਲਿਤ੍ਤਾ ਕਪ੍ਪਿਤਕੇਸਮਸ੍ਸੂ ਆਮੁਤ੍ਤਮਣਿਆਭਰਣਾ ਪਞ੍ਚਹਿ ਕਾਮਗੁਣੇਹਿ ਪਰਿਚਾਰੇਨ੍ਤਿ, ਮਯਂ ਪਨ ਏਵਂ ਤੇਹਿ ਨਮਸ੍ਸਿਯਮਾਨਾਪਿ ਸੇਦਮਲਕਿਲਿਟ੍ਠਗਤ੍ਤਾ ਪਰੂਲ਼੍ਹਕਚ੍ਛਨਖਲੋਮਾ ਭੋਗਰਹਿਤਾ ਪਰਮਕਾਰੁਞ੍ਞਤਂ ਪਤ੍ਤਾ ਵਿਹਰਾਮ. ਏਤੇ ਚ ਹਤ੍ਥਿਕ੍ਖਨ੍ਧਅਸ੍ਸਪਿਟ੍ਠਿਸਿਵਿਕਾਸੁਵਣ੍ਣਰਥਾਦੀਹਿ ਵਿਚਰਨ੍ਤਿ, ਮਯਂ ਪਾਦੇਹਿ. ਏਤੇ ਦ੍ਵਿਭੂਮਿਕਾਦਿਪਾਸਾਦਤਲੇਸੁ ਵਸਨ੍ਤਿ, ਮਯਂ ਅਰਞ੍ਞਰੁਕ੍ਖਮੂਲਾਦੀਸੁ. ਏਤੇ ਚ ਗੋਨਕਾਦੀਹਿ ਅਤ੍ਥਰਣੇਹਿ ਅਤ੍ਥਤਾਸੁ ਵਰਸੇਯ੍ਯਾਸੁ ਸਯਨ੍ਤਿ, ਮਯਂ ਤਟ੍ਟਿਕਾਚਮ੍ਮਖਣ੍ਡਾਦੀਨਿ ਅਤ੍ਥਰਿਤ੍ਵਾ ਭੂਮਿਯਂ. ਏਤੇ ਨਾਨਾਰਸਾਨਿ ਭੋਜਨਾਨਿ ਭੁਞ੍ਜਨ੍ਤਿ, ਮਯਂ ਉਞ੍ਛਾਚਰਿਯਾਯ ਯਾਪੇਮ. ਕਥਂ ਨੁ ਖੋ ਮਯਮ੍ਪਿ ਏਤੇਹਿ ਸਦਿਸਾ ਭਵੇਯ੍ਯਾਮਾ’’ਤਿ ਚਿਨ੍ਤੇਤ੍ਵਾ ‘‘ਧਨਂ ਇਚ੍ਛਿਤਬ੍ਬਂ, ਨ ਸਕ੍ਕਾ ਧਨਰਹਿਤੇਹਿ ਅਯਂ ਸਮ੍ਪਤ੍ਤਿ ਪਾਪੁਣਿਤੁ’’ਨ੍ਤਿ ਚ ਅਵਧਾਰੇਤ੍ਵਾ ਵੇਦੇ ਭਿਨ੍ਦਿਤ੍ਵਾ ਧਮ੍ਮਯੁਤ੍ਤੇ ਪੁਰਾਣਮਨ੍ਤੇ ਨਾਸੇਤ੍ਵਾ ਅਧਮ੍ਮਯੁਤ੍ਤੇ ਕੂਟਮਨ੍ਤੇ ਗਨ੍ਥੇਤ੍ਵਾ ਧਨਤ੍ਥਿਕਾ ਓਕ੍ਕਾਕਰਾਜਾਨਮੁਪਸਙ੍ਕਮ੍ਮ ਸੋਤ੍ਥਿਵਚਨਾਦੀਨਿ ਪਯੁਞ੍ਜਿਤ੍ਵਾ ‘‘ਅਮ੍ਹਾਕਂ, ਮਹਾਰਾਜ, ਬ੍ਰਾਹ੍ਮਣਵਂਸੇ ਪਵੇਣਿਯਾ ਆਗਤਂ ਪੋਰਾਣਮਨ੍ਤਪਦਂ ਅਤ੍ਥਿ, ਤਂ ਮਯਂ ਆਚਰਿਯਮੁਟ੍ਠਿਤਾਯ ਨ ਕਸ੍ਸਚਿ ਭਣਿਮ੍ਹਾ, ਤਂ ਮਹਾਰਾਜਾ ਸੋਤੁਮਰਹਤੀ’’ਤਿ ਚ ਵਤ੍ਵਾ ਅਸ੍ਸਮੇਧਾਦਿਯਞ੍ਞਂ ਵਣ੍ਣਯਿਂਸੁ. ਵਣ੍ਣਯਿਤ੍ਵਾ ਚ ਰਾਜਾਨਂ ਉਸ੍ਸਾਹੇਨ੍ਤਾ ‘‘ਯਜ, ਮਹਾਰਾਜ, ਏਵਂ ਪਹੂਤਧਨਧਞ੍ਞੋ ਤ੍ਵਂ, ਨਤ੍ਥਿ ਤੇ ਯਞ੍ਞਸਮ੍ਭਾਰਵੇਕਲ੍ਲਂ, ਏਵਞ੍ਹਿ ਤੇ ਯਜਤੋ ਸਤ੍ਤਕੁਲਪਰਿਵਟ੍ਟਾ ਸਗ੍ਗੇ ਉਪ੍ਪਜ੍ਜਿਸ੍ਸਨ੍ਤੀ’’ਤਿ ਅਵੋਚੁਂ. ਤੇਨ ਨੇਸਂ ਤਂ ਪਵਤ੍ਤਿਂ ਦਸ੍ਸੇਨ੍ਤੋ ਆਹ ਭਗਵਾ ‘‘ਤੇ ਤਤ੍ਥ ਮਨ੍ਤੇ…ਪੇ… ਬਹੁ ਤੇ ਧਨ’’ਨ੍ਤਿ.

ਤਤ੍ਥ ਤਤ੍ਥਾਤਿ ਤਸ੍ਮਿਂ, ਯਂ ਭੋਗਮਭਿਜ੍ਝਾਯਿਂਸੁ, ਤਨ੍ਨਿਮਿਤ੍ਤਨ੍ਤਿ ਵੁਤ੍ਤਂ ਹੋਤਿ. ਨਿਮਿਤ੍ਤਤ੍ਥੇ ਹਿ ਏਤਂ ਭੁਮ੍ਮਵਚਨਂ. ਤਦੁਪਾਗਮੁਨ੍ਤਿ ਤਦਾ ਉਪਾਗਮੁਂ. ਪਹੂਤਧਨਧਞ੍ਞੋਸੀਤਿ ਪਹੂਤਧਨਧਞ੍ਞੋ ਭਵਿਸ੍ਸਸਿ, ਅਭਿਸਮ੍ਪਰਾਯਨ੍ਤਿ ਅਧਿਪ੍ਪਾਯੋ. ਆਸਂਸਾਯਞ੍ਹਿ ਅਨਾਗਤੇਪਿ ਵਤ੍ਤਮਾਨਵਚਨਂ ਇਚ੍ਛਨ੍ਤਿ ਸਦ੍ਦਕੋਵਿਦਾ. ਯਜਸ੍ਸੂਤਿ ਯਜਾਹਿ. ਵਿਤ੍ਤਂ ਧਨਨ੍ਤਿ ਜਾਤਰੂਪਾਦਿਰਤਨਮੇਵ ਵਿਤ੍ਤਿਕਾਰਣਤੋ ਵਿਤ੍ਤਂ, ਸਮਿਦ੍ਧਿਕਾਰਣਤੋ ਧਨਨ੍ਤਿ ਵੁਤ੍ਤਂ. ਅਥ ਵਾ ਵਿਤ੍ਤਨ੍ਤਿ ਵਿਤ੍ਤਿਕਾਰਣਭੂਤਮੇਵ ਆਭਰਣਾਦਿ ਉਪਕਰਣਂ, ਯਂ ‘‘ਪਹੂਤਵਿਤ੍ਤੂਪਕਰਣੋ’’ਤਿਆਦੀਸੁ (ਦੀ. ਨਿ. ੧.੩੩੧) ਆਗਚ੍ਛਤਿ. ਧਨਨ੍ਤਿ ਹਿਰਞ੍ਞਸੁਵਣ੍ਣਾਦਿ. ਕਿਂ ਵੁਤ੍ਤਂ ਹੋਤਿ? ਤੇ ਬ੍ਰਾਹ੍ਮਣਾ ਮਨ੍ਤੇ ਗਨ੍ਥੇਤ੍ਵਾ ਤਦਾ ਓਕ੍ਕਾਕਂ ਉਪਾਗਮੁਂ. ਕਿਨ੍ਤਿ? ‘‘ਮਹਾਰਾਜ, ਬਹੂ ਤੇ ਵਿਤ੍ਤਞ੍ਚ ਧਨਞ੍ਚ, ਯਜਸ੍ਸੁ, ਆਯਤਿਮ੍ਪਿ ਪਹੂਤਧਨਧਞ੍ਞੋ ਭਵਿਸ੍ਸਸੀ’’ਤਿ.

੩੦੬. ਏਵਂ ਕਾਰਣਂ ਵਤ੍ਵਾ ਸਞ੍ਞਾਪੇਨ੍ਤੇਹਿ ਤਤੋ ਚ ਰਾਜਾ…ਪੇ… ਅਦਾ ਧਨਂ. ਤਤ੍ਥ ਸਞ੍ਞਤ੍ਤੋਤਿ ਞਾਪਿਤੋ. ਰਥੇਸਭੋਤਿ ਮਹਾਰਥੇਸੁ ਖਤ੍ਤਿਯੇਸੁ ਅਕਮ੍ਪਿਯਟ੍ਠੇਨ ਉਸਭਸਦਿਸੋ. ‘‘ਅਸ੍ਸਮੇਧ’’ਨ੍ਤਿਆਦੀਸੁ ਅਸ੍ਸਮੇਤ੍ਥ ਮੇਧਨ੍ਤੀਤਿ ਅਸ੍ਸਮੇਧੋ, ਦ੍ਵੀਹਿ ਪਰਿਯਞ੍ਞੇਹਿ ਯਜਿਤਬ੍ਬਸ੍ਸ ਏਕਵੀਸਤਿਯੂਪਸ੍ਸ ਠਪੇਤ੍ਵਾ ਭੂਮਿਞ੍ਚ ਪੁਰਿਸੇ ਚ ਅਵਸੇਸਸਬ੍ਬਵਿਭਵਦਕ੍ਖਿਣਸ੍ਸ ਯਞ੍ਞਸ੍ਸੇਤਂ ਅਧਿਵਚਨਂ. ਪੁਰਿਸਮੇਤ੍ਥ ਮੇਧਨ੍ਤੀਤਿ ਪੁਰਿਸਮੇਧੋ, ਚਤੂਹਿ ਪਰਿਯਞ੍ਞੇਹਿ ਯਜਿਤਬ੍ਬਸ੍ਸ ਸਦ੍ਧਿਂ ਭੂਮਿਯਾ ਅਸ੍ਸਮੇਧੇ ਵੁਤ੍ਤਵਿਭਵਦਕ੍ਖਿਣਸ੍ਸ ਯਞ੍ਞਸ੍ਸੇਤਂ ਅਧਿਵਚਨਂ. ਸਮ੍ਮਮੇਤ੍ਥ ਪਾਸਨ੍ਤੀਤਿ ਸਮ੍ਮਾਪਾਸੋ, ਦਿਵਸੇ ਦਿਵਸੇ ਸਮ੍ਮਂ ਖਿਪਿਤ੍ਵਾ ਤਸ੍ਸ ਪਤਿਤੋਕਾਸੇ ਵੇਦਿਂ ਕਤ੍ਵਾ ਸਂਹਾਰਿਮੇਹਿ ਯੂਪਾਦੀਹਿ ਸਰਸ੍ਸਤਿਨਦਿਯਾ ਨਿਮੁਗ੍ਗੋਕਾਸਤੋ ਪਭੁਤਿ ਪਟਿਲੋਮਂ ਗਚ੍ਛਨ੍ਤੇਨ ਯਜਿਤਬ੍ਬਸ੍ਸ ਸਤ੍ਰਯਾਗਸ੍ਸੇਤਂ ਅਧਿਵਚਨਂ. ਵਾਜਮੇਤ੍ਥ ਪਿਵਨ੍ਤੀਤਿ ਵਾਜਪੇਯ੍ਯੋ. ਏਕੇਨ ਪਰਿਯਞ੍ਞੇਨ ਸਤ੍ਤਰਸਹਿ ਪਸੂਹਿ ਯਜਿਤਬ੍ਬਸ੍ਸ ਬੇਲੁਵਯੂਪਸ੍ਸ ਸਤ੍ਤਰਸਕਦਕ੍ਖਿਣਸ੍ਸ ਯਞ੍ਞਸ੍ਸੇਤਂ ਅਧਿਵਚਨਂ. ਨਤ੍ਥਿ ਏਤ੍ਥ ਅਗ੍ਗਲ਼ਾਤਿ ਨਿਰਗ੍ਗਲ਼ੋ, ਨਵਹਿ ਪਰਿਯਞ੍ਞੇਹਿ ਯਜਿਤਬ੍ਬਸ੍ਸ ਸਦ੍ਧਿਂ ਭੂਮਿਯਾ ਚ ਪੁਰਿਸੇਹਿ ਚ ਅਸ੍ਸਮੇਧੇ ਵੁਤ੍ਤਵਿਭਵਦਕ੍ਖਿਣਸ੍ਸ ਸਬ੍ਬਮੇਧਪਰਿਯਾਯਨਾਮਸ੍ਸ ਅਸ੍ਸਮੇਧਵਿਕਪ੍ਪਸ੍ਸੇਤਂ ਅਧਿਵਚਨਂ. ਸੇਸਮੇਤ੍ਥ ਪਾਕਟਮੇਵ.

੩੦੭-੮. ਇਦਾਨਿ ਯਂ ਵੁਤ੍ਤਂ ‘‘ਬ੍ਰਾਹ੍ਮਣਾਨਮਦਾ ਧਨ’’ਨ੍ਤਿ, ਤਂ ਦਸ੍ਸੇਨ੍ਤੋ ‘‘ਗਾਵੋ ਸਯਨਞ੍ਚਾ’’ਤਿ ਗਾਥਾਦ੍ਵਯਮਾਹ. ਸੋ ਹਿ ਰਾਜਾ ‘‘ਦੀਘਰਤ੍ਤਂ ਲੂਖਾਹਾਰੇਨ ਕਿਲਨ੍ਤਾ ਪਞ੍ਚ ਗੋਰਸੇ ਪਰਿਭੁਞ੍ਜਨ੍ਤੂ’’ਤਿ ਨੇਸਂ ਸਪੁਙ੍ਗਵਾਨਿ ਗੋਯੂਥਾਨੇਵ ਅਦਾਸਿ, ਤਥਾ ‘‘ਦੀਘਰਤ੍ਤਂ ਥਣ੍ਡਿਲਸਾਯਿਤਾਯ ਥੂਲਸਾਟਕਨਿਵਾਸਨੇਨ ਏਕਸੇਯ੍ਯਾਯ ਪਾਦਚਾਰੇਨ ਰੁਕ੍ਖਮੂਲਾਦਿਵਾਸੇਨ ਚ ਕਿਲਨ੍ਤਾ ਗੋਨਕਾਦਿਅਤ੍ਥਤਵਰਸਯਨਾਦੀਸੁ ਸੁਖਂ ਅਨੁਭੋਨ੍ਤੂ’’ਤਿ ਨੇਸਂ ਮਹਗ੍ਘਾਨਿ ਸਯਨਾਦੀਨਿ ਚ ਅਦਾਸਿ. ਏਵਮੇਤਂ ਨਾਨਪ੍ਪਕਾਰਕਂ ਅਞ੍ਞਞ੍ਚ ਹਿਰਞ੍ਞਸੁਵਣ੍ਣਾਦਿਧਨਂ ਅਦਾਸਿ. ਤੇਨਾਹ ਭਗਵਾ – ‘‘ਗਾਵੋ ਸਯਨਞ੍ਚ ਵਤ੍ਥਞ੍ਚ…ਪੇ… ਬ੍ਰਾਹ੍ਮਣਾਨਮਦਾ ਧਨ’’ਨ੍ਤਿ.

੩੦੯-੧੦. ਏਵਂ ਤਸ੍ਸ ਰਞ੍ਞੋ ਸਨ੍ਤਿਕਾ ਤੇ ਚ ਤਤ੍ਥ…ਪੇ… ਪੁਨ ਮੁਪਾਗਮੁਂ. ਕਿਂ ਵੁਤ੍ਤਂ ਹੋਤਿ? ਤਸ੍ਸ ਰਞ੍ਞੋ ਸਨ੍ਤਿਕਾ ਤੇ ਬ੍ਰਾਹ੍ਮਣਾ ਤੇਸੁ ਯਾਗੇਸੁ ਧਨਂ ਲਭਿਤ੍ਵਾ ਦੀਘਰਤ੍ਤਂ ਦਿਵਸੇ ਦਿਵਸੇ ਏਵਮੇਵ ਘਾਸਚ੍ਛਾਦਨਂ ਪਰਿਯੇਸਿਤ੍ਵਾ ਨਾਨਪ੍ਪਕਾਰਕਂ ਵਤ੍ਥੁਕਾਮ ਸਨ੍ਨਿਧਿਂਸਮਰੋਚਯੁਂ. ਤਤੋ ਤੇਸਂ ਇਚ੍ਛਾਵਤਿਣ੍ਣਾਨਂ ਖੀਰਾਦਿਪਞ੍ਚਗੋਰਸਸ੍ਸਾਦਵਸੇਨ ਰਸਤਣ੍ਹਾਯ ਓਤਿਣ੍ਣਚਿਤ੍ਤਾਨਂ ‘‘ਖੀਰਾਦੀਨਿਪਿ ਤਾਵ ਗੁਨ੍ਨਂ ਸਾਦੂਨਿ, ਅਦ੍ਧਾ ਇਮਾਸਂ ਮਂਸਂ ਸਾਦੁਤਰਂ ਭਵਿਸ੍ਸਤੀ’’ਤਿ ਏਵਂ ਮਂਸਂ ਪਟਿਚ੍ਚ ਭਿਯ੍ਯੋ ਤਣ੍ਹਾ ਪਵਡ੍ਢਥ. ਤਤੋ ਚਿਨ੍ਤੇਸੁਂ – ‘‘ਸਚੇ ਮਯਂ ਮਾਰੇਤ੍ਵਾ ਖਾਦਿਸ੍ਸਾਮ, ਗਾਰਯ੍ਹਾ ਭਵਿਸ੍ਸਾਮ, ਯਂਨੂਨ ਮਨ੍ਤੇ ਗਨ੍ਥੇਯ੍ਯਾਮਾ’’ਤਿ. ਅਥ ਪੁਨਪਿ ਵੇਦਂ ਭਿਨ੍ਦਿਤ੍ਵਾ ਤਦਨੁਰੂਪੇ ਤੇ ਤਤ੍ਥ ਮਨ੍ਤੇ ਗਨ੍ਥੇਤ੍ਵਾ ਤੇ ਬ੍ਰਾਹ੍ਮਣਾ ਤਨ੍ਨਿਮਿਤ੍ਤਂ ਕੂਟਮਨ੍ਤੇ ਗਨ੍ਥੇਤ੍ਵਾ ਓਕ੍ਕਾਕਰਾਜਾਨਂ ਪੁਨ ਉਪਾਗਮਿਂਸੁ. ਇਮਮਤ੍ਥਂ ਭਾਸਮਾਨਾ ‘‘ਯਥਾ ਆਪੋ ਚ…ਪੇ… ਬਹੁ ਤੇ ਧਨ’’ਨ੍ਤਿ.

ਕਿਂ ਵੁਤ੍ਤਂ ਹੋਤਿ? ਅਮ੍ਹਾਕਂ, ਮਹਾਰਾਜ, ਮਨ੍ਤੇਸੁ ਏਤਦਾਗਤਂ ਯਥਾ ਆਪੋ ਹਤ੍ਥਧੋਵਨਾਦਿਸਬ੍ਬਕਿਚ੍ਚੇਸੁ ਪਾਣੀਨਂ ਉਪਯੋਗਂ ਗਚ੍ਛਤਿ, ਨਤ੍ਥਿ ਤੇਸਂ ਤਤੋਨਿਦਾਨਂ ਪਾਪਂ. ਕਸ੍ਮਾ? ਯਸ੍ਮਾ ਪਰਿਕ੍ਖਾਰੋ ਸੋ ਹਿ ਪਾਣਿਨਂ, ਉਪਕਰਣਤ੍ਥਾਯ ਉਪ੍ਪਨ੍ਨੋਤਿ ਅਧਿਪ੍ਪਾਯੋ. ਯਥਾ ਚਾਯਂ ਮਹਾਪਥਵੀ ਗਮਨਟ੍ਠਾਨਾਦਿਸਬ੍ਬਕਿਚ੍ਚੇਸੁ ਕਹਾਪਣਸਙ੍ਖਾਤਂ ਹਿਰਞ੍ਞਂ ਸੁਵਣ੍ਣਰਜਤਾਦਿਭੇਦਂ ਧਨਂ, ਯਵਗੋਧੂਮਾਦਿਭੇਦਂ ਧਾਨਿਯਞ੍ਚ, ਸਂਵੋਹਾਰਾਦਿਸਬ੍ਬਕਿਚ੍ਚੇਸੁ ਉਪਯੋਗਂ ਗਚ੍ਛਤਿ, ਏਵਂ ਗਾਵੋ ਮਨੁਸ੍ਸਾਨਂ ਸਬ੍ਬਕਿਚ੍ਚੇਸੁ ਉਪਯੋਗਗਮਨਤ੍ਥਾਯ ਉਪ੍ਪਨ੍ਨਾ. ਤਸ੍ਮਾ ਏਤਾ ਹਨਿਤ੍ਵਾ ਨਾਨਪ੍ਪਕਾਰਕੇ ਯਾਗੇ ਯਜਸ੍ਸੁ ਬਹੁ ਤੇ ਵਿਤ੍ਤਂ, ਯਜਸ੍ਸੁ ਬਹੁ ਤੇ ਧਨਨ੍ਤਿ.

੩੧੧-੧੨. ਏਵਂ ਪੁਰਿਮਨਯੇਨੇਵ ਤਤੋ ਚ ਰਾਜਾ…ਪੇ… ਅਘਾਤਯਿ, ਯਂ ਤਤੋ ਪੁਬ੍ਬੇ ਕਞ੍ਚਿ ਸਤ੍ਤਂ ਨ ਪਾਦਾ…ਪੇ… ਘਾਤਯਿ. ਤਦਾ ਕਿਰ ਬ੍ਰਾਹ੍ਮਣਾ ਯਞ੍ਞਾਵਾਟਂ ਗਾਵੀਨਂ ਪੂਰੇਤ੍ਵਾ ਮਙ੍ਗਲਉਸਭਂ ਬਨ੍ਧਿਤ੍ਵਾ ਰਞ੍ਞੋ ਮੂਲਂ ਨੇਤ੍ਵਾ ‘‘ਮਹਾਰਾਜ, ਗੋਮੇਧਯਞ੍ਞਂ ਯਜਸ੍ਸੁ, ਏਵਂ ਤੇ ਬ੍ਰਹ੍ਮਲੋਕਸ੍ਸ ਮਗ੍ਗੋ ਵਿਸੁਦ੍ਧੋ ਭਵਿਸ੍ਸਤੀ’’ਤਿ ਆਹਂਸੁ. ਰਾਜਾ ਕਤਮਙ੍ਗਲਕਿਚ੍ਚੋ ਖਗ੍ਗਂ ਗਹੇਤ੍ਵਾ ਪੁਙ੍ਗਵੇਨ ਸਹ ਅਨੇਕਸਤਸਹਸ੍ਸਾ ਗਾਵੋ ਮਾਰੇਸਿ. ਬ੍ਰਾਹ੍ਮਣਾ ਯਞ੍ਞਾਵਾਟੇ ਮਂਸਾਨਿ ਛਿਨ੍ਦਿਤ੍ਵਾ ਖਾਦਿਂਸੁ, ਪੀਤਕੋਦਾਤਰਤ੍ਤਕਮ੍ਬਲੇ ਚ ਪਾਰੁਪਿਤ੍ਵਾ ਮਾਰੇਸੁਂ. ਤਦੁਪਾਦਾਯ ਕਿਰ ਗਾਵੋ ਪਾਰੁਤੇ ਦਿਸ੍ਵਾ ਉਬ੍ਬਿਜ੍ਜਨ੍ਤਿ. ਤੇਨਾਹ ਭਗਵਾ – ‘‘ਨ ਪਾਦਾ…ਪੇ… ਘਾਤਯੀ’’ਤਿ.

੩੧੩. ਤਤੋ ਦੇਵਾਤਿ ਏਵਂ ਤਸ੍ਮਿਂ ਰਾਜਿਨਿ ਗਾਵਿਯੋ ਘਾਤੇਤੁਮਾਰਦ੍ਧੇ ਅਥ ਤਦਨਨ੍ਤਰਮੇਵ ਤਂ ਗੋਘਾਤਕਂ ਦਿਸ੍ਵਾ ਏਤੇ ਚਾਤੁਮਹਾਰਾਜਿਕਾਦਯੋ ਦੇਵਾ ਚ, ਪਿਤਰੋਤਿ ਬ੍ਰਾਹ੍ਮਣੇਸੁ ਲਦ੍ਧਵੋਹਾਰਾ ਬ੍ਰਹ੍ਮਾਨੋ ਚ, ਸਕ੍ਕੋ ਦੇਵਾਨਮਿਨ੍ਦੋ ਚ, ਪਬ੍ਬਤਪਾਦਨਿਵਾਸਿਨੋ ਦਾਨਵਯਕ੍ਖਸਞ੍ਞਿਤਾ ਅਸੁਰਰਕ੍ਖਸਾ ਚ ‘‘ਅਧਮ੍ਮੋ ਅਧਮ੍ਮੋ’’ਤਿ ਏਵਂ ਵਾਚਂ ਨਿਚ੍ਛਾਰੇਨ੍ਤਾ ‘‘ਧਿ ਮਨੁਸ੍ਸਾ, ਧਿ ਮਨੁਸ੍ਸਾ’’ਤਿ ਚ ਵਦਨ੍ਤਾ ਪਕ੍ਕਨ੍ਦੁਂ. ਏਵਂ ਭੂਮਿਤੋ ਪਭੁਤਿ ਸੋ ਸਦ੍ਦੋ ਮੁਹੁਤ੍ਤੇਨ ਯਾਵ ਬ੍ਰਹ੍ਮਲੋਕਾ ਅਗਮਾਸਿ, ਏਕਧਿਕ੍ਕਾਰਪਰਿਪੁਣ੍ਣੋ ਲੋਕੋ ਅਹੋਸਿ. ਕਿਂ ਕਾਰਣਂ? ਯਂ ਸਤ੍ਥਂ ਨਿਪਤੀ ਗਵੇ, ਯਸ੍ਮਾ ਗਾਵਿਮ੍ਹਿ ਸਤ੍ਥਂ ਨਿਪਤੀਤਿ ਵੁਤ੍ਤਂ ਹੋਤਿ.

੩੧੪. ਨ ਕੇਵਲਞ੍ਚ ਦੇਵਾਦਯੋ ਪਕ੍ਕਨ੍ਦੁਂ, ਅਯਮਞ੍ਞੋਪਿ ਲੋਕੇ ਅਨਤ੍ਥੋ ਉਦਪਾਦਿ – ਯੇ ਹਿ ਤੇ ਤਯੋ ਰੋਗਾ ਪੁਰੇ ਆਸੁਂ, ਇਚ੍ਛਾ ਅਨਸਨਂ ਜਰਾ, ਕਿਞ੍ਚਿ ਕਿਞ੍ਚਿਦੇਵ ਪਤ੍ਥਨਤਣ੍ਹਾ ਚ ਖੁਦਾ ਚ ਪਰਿਪਾਕਜਰਾ ਚਾਤਿ ਵੁਤ੍ਤਂ ਹੋਤਿ. ਤੇ ਪਸੂਨਞ੍ਚ ਸਮਾਰਮ੍ਭਾ, ਅਟ੍ਠਾਨਵੁਤਿਮਾਗਮੁਂ, ਚਕ੍ਖੁਰੋਗਾਦਿਨਾ ਭੇਦੇਨ ਅਟ੍ਠਨਵੁਤਿਭਾਵਂ ਪਾਪੁਣਿਂਸੂਤਿ ਅਤ੍ਥੋ.

੩੧੫. ਇਦਾਨਿ ਭਗਵਾ ਤਂ ਪਸੁਸਮਾਰਮ੍ਭਂ ਨਿਨ੍ਦਨ੍ਤੋ ਆਹ ‘‘ਏਸੋ ਅਧਮ੍ਮੋ’’ਤਿ. ਤਸ੍ਸਤ੍ਥੋ ਏਸੋ ਪਸੁਸਮਾਰਮ੍ਭਸਙ੍ਖਾਤੋ ਕਾਯਦਣ੍ਡਾਦੀਨਂ ਤਿਣ੍ਣਂ ਦਣ੍ਡਾਨਂ ਅਞ੍ਞਤਰਦਣ੍ਡਭੂਤੋ ਧਮ੍ਮਤੋ ਅਪੇਤਤ੍ਤਾ ਅਧਮ੍ਮੋ ਓਕ੍ਕਨ੍ਤੋ ਅਹੁ, ਪਵਤ੍ਤੋ ਆਸਿ, ਸੋ ਚ ਖੋ ਤਤੋ ਪਭੁਤਿ ਪਵਤ੍ਤਤ੍ਤਾ ਪੁਰਾਣੋ, ਯਸ੍ਸ ਓਕ੍ਕਮਨਤੋ ਪਭੁਤਿ ਕੇਨਚਿ ਪਾਦਾਦਿਨਾ ਅਹਿਂਸਨਤੋ ਅਦੂਸਿਕਾਯੋ ਗਾਵੋ ਹਞ੍ਞਨ੍ਤਿ. ਯਾ ਘਾਤੇਨ੍ਤਾ ਧਮ੍ਮਾ ਧਂਸਨ੍ਤਿ ਚਵਨ੍ਤਿ ਪਰਿਹਾਯਨ੍ਤਿ ਯਾਜਕਾ ਯਞ੍ਞਯਾਜਿਨੋ ਜਨਾਤਿ.

੩੧੬. ਏਵਮੇਸੋ ਅਣੁਧਮ੍ਮੋਤਿ ਏਵਂ ਏਸੋ ਲਾਮਕਧਮ੍ਮੋ ਹੀਨਧਮ੍ਮੋ, ਅਧਮ੍ਮੋਤਿ ਵੁਤ੍ਤਂ ਹੋਤਿ. ਯਸ੍ਮਾ ਵਾ ਏਤ੍ਥ ਦਾਨਧਮ੍ਮੋਪਿ ਅਪ੍ਪਕੋ ਅਤ੍ਥਿ, ਤਸ੍ਮਾ ਤਂ ਸਨ੍ਧਾਯਾਹ ‘‘ਅਣੁਧਮ੍ਮੋ’’ਤਿ. ਪੋਰਾਣੋਤਿ ਤਾਵ ਚਿਰਕਾਲਤੋ ਪਭੁਤਿ ਪਵਤ੍ਤਤ੍ਤਾ ਪੋਰਾਣੋ. ਵਿਞ੍ਞੂਹਿ ਪਨ ਗਰਹਿਤਤ੍ਤਾ ਵਿਞ੍ਞੂਗਰਹਿਤੋਤਿ ਵੇਦਿਤਬ੍ਬੋ. ਯਸ੍ਮਾ ਚ ਵਿਞ੍ਞੁਗਰਹਿਤੋ, ਤਸ੍ਮਾ ਯਤ੍ਥ ਏਦਿਸਕਂ ਪਸ੍ਸਤਿ, ਯਾਜਕਂ ਗਰਹਤੀ ਜਨੋ. ਕਥਂ? ‘‘ਅਬ੍ਬੁਦਂ ਬ੍ਰਾਹ੍ਮਣੇਹਿ ਉਪ੍ਪਾਦਿਤਂ, ਗਾਵੋ ਵਧਿਤ੍ਵਾ ਮਂਸਂ ਖਾਦਨ੍ਤੀ’’ਤਿ ਏਵਮਾਦੀਨਿ ਵਤ੍ਵਾਤਿ ਅਯਮੇਤ੍ਥ ਅਨੁਸ੍ਸਵੋ.

੩੧੭. ਏਵਂ ਧਮ੍ਮੇ ਵਿਯਾਪਨ੍ਨੇਤਿ ਏਵਂ ਪੋਰਾਣੇ ਬ੍ਰਾਹ੍ਮਣਧਮ੍ਮੇ ਨਟ੍ਠੇ. ‘‘ਵਿਯਾਵਤ੍ਤੇ’’ਤਿਪਿ ਪਾਠੋ, ਵਿਪਰਿਵਤ੍ਤਿਤ੍ਵਾ ਅਞ੍ਞਥਾ ਭੂਤੇਤਿ ਅਤ੍ਥੋ. ਵਿਭਿਨ੍ਨਾ ਸੁਦ੍ਦਵੇਸ੍ਸਿਕਾਤਿ ਪੁਬ੍ਬੇ ਸਮਗ੍ਗਾ ਵਿਹਰਨ੍ਤਾ ਸੁਦ੍ਦਾ ਚ ਵੇਸ੍ਸਾ ਚ ਤੇ ਵਿਭਿਨ੍ਨਾ. ਪੁਥੂ ਵਿਭਿਨ੍ਨਾ ਖਤ੍ਤਿਯਾਤਿ ਖਤ੍ਤਿਯਾਪਿ ਬਹੂ ਅਞ੍ਞਮਞ੍ਞਂ ਭਿਨ੍ਨਾ. ਪਤਿਂ ਭਰਿਯਾਵਮਞ੍ਞਥਾਤਿ ਭਰਿਯਾ ਚ ਘਰਾਵਾਸਤ੍ਥਂ ਇਸ੍ਸਰਿਯਬਲੇ ਠਪਿਤਾ ਪੁਤ੍ਤਬਲਾਦੀਹਿ ਉਪੇਤਾ ਹੁਤ੍ਵਾ ਪਤਿਂ ਅਵਮਞ੍ਞਥ, ਪਰਿਭਵਿ ਅਵਮਞ੍ਞਿ ਨ ਸਕ੍ਕਚ੍ਚਂ ਉਪਟ੍ਠਾਸਿ.

੩੧੮. ਏਵਂ ਅਞ੍ਞਮਞ੍ਞਂ ਵਿਭਿਨ੍ਨਾ ਸਮਾਨਾ ਖਤ੍ਤਿਯਾ ਬ੍ਰਹ੍ਮਬਨ੍ਧੂ ਚ…ਪੇ… ਕਾਮਾਨਂ ਵਸਮਨ੍ਵਗੁਨ੍ਤਿ. ਖਤ੍ਤਿਯਾ ਚ ਬ੍ਰਾਹ੍ਮਣਾ ਚ ਯੇ ਚਞ੍ਞੇ ਵੇਸ੍ਸਸੁਦ੍ਦਾ ਯਥਾ ਸਙ੍ਕਰਂ ਨਾਪਜ੍ਜਨ੍ਤਿ, ਏਵਂ ਅਤ੍ਤਨੋ ਅਤ੍ਤਨੋ ਗੋਤ੍ਤੇਨ ਰਕ੍ਖਿਤਤ੍ਤਾ ਗੋਤ੍ਤਰਕ੍ਖਿਤਾ. ਤੇ ਸਬ੍ਬੇਪਿ ਤਂ ਜਾਤਿਵਾਦਂ ਨਿਰਂਕਤ੍ਵਾ, ‘‘ਅਹਂ ਖਤ੍ਤਿਯੋ, ਅਹਂ ਬ੍ਰਾਹ੍ਮਣੋ’’ਤਿ ਏਤਂ ਸਬ੍ਬਮ੍ਪਿ ਨਾਸੇਤ੍ਵਾ ਪਞ੍ਚਕਾਮਗੁਣਸਙ੍ਖਾਤਾਨਂ ਕਾਮਾਨਂ ਵਸਂ ਅਨ੍ਵਗੁਂ ਆਸਤ੍ਤਂ ਪਾਪੁਣਿਂਸੁ, ਕਾਮਹੇਤੁ ਨ ਕਿਞ੍ਚਿ ਅਕਤ੍ਤਬ੍ਬਂ ਨਾਕਂਸੂਤਿ ਵੁਤ੍ਤਂ ਹੋਤਿ.

ਏਵਮੇਤ੍ਥ ਭਗਵਾ ‘‘ਇਸਯੋ ਪੁਬ੍ਬਕਾ’’ਤਿਆਦੀਹਿ ਨਵਹਿ ਗਾਥਾਹਿ ਪੋਰਾਣਾਨਂ ਬ੍ਰਾਹ੍ਮਣਾਨਂ ਵਣ੍ਣਂ ਭਾਸਿਤ੍ਵਾ ‘‘ਯੋ ਨੇਸਂ ਪਰਮੋ’’ਤਿ ਗਾਥਾਯ ਬ੍ਰਹ੍ਮਸਮਂ, ‘‘ਤਸ੍ਸ ਵਤ੍ਤਮਨੁਸਿਕ੍ਖਨ੍ਤਾ’’ਤਿ ਗਾਥਾਯ ਦੇਵਸਮਂ, ‘‘ਤਣ੍ਡੁਲਂ ਸਯਨ’’ਨ੍ਤਿਆਦਿਕਾਹਿ ਚਤੂਹਿ ਗਾਥਾਹਿ ਮਰਿਯਾਦਂ, ‘‘ਤੇਸਂ ਆਸਿ ਵਿਪਲ੍ਲਾਸੋ’’ਤਿਆਦੀਹਿ ਸਤ੍ਤਰਸਹਿ ਗਾਥਾਹਿ ਸਮ੍ਭਿਨ੍ਨਮਰਿਯਾਦਂ, ਤਸ੍ਸ ਵਿਪ੍ਪਟਿਪਤ੍ਤਿਯਾ ਦੇਵਾਦੀਨਂ ਪਕ੍ਕਨ੍ਦਨਾਦਿਦੀਪਨਤ੍ਥਞ੍ਚ ਦਸ੍ਸੇਤ੍ਵਾ ਦੇਸਨਂ ਨਿਟ੍ਠਾਪੇਸਿ. ਬ੍ਰਾਹ੍ਮਣਚਣ੍ਡਾਲੋ ਪਨ ਇਧ ਅਵੁਤ੍ਤੋਯੇਵ. ਕਸ੍ਮਾ? ਯਸ੍ਮਾ ਵਿਪਤ੍ਤਿਯਾ ਅਕਾਰਣਂ. ਬ੍ਰਾਹ੍ਮਣਧਮ੍ਮਸਮ੍ਪਤ੍ਤਿਯਾ ਹਿ ਬ੍ਰਹ੍ਮਸਮਦੇਵਸਮਮਰਿਯਾਦਾ ਕਾਰਣਂ ਹੋਨ੍ਤਿ, ਵਿਪਤ੍ਤਿਯਾ ਸਮ੍ਭਿਨ੍ਨਮਰਿਯਾਦੋ. ਅਯਂ ਪਨ ਦੋਣਸੁਤ੍ਤੇ (ਅ. ਨਿ. ੫.੧੯੨) ਵੁਤ੍ਤਪ੍ਪਕਾਰੋ ਬ੍ਰਾਹ੍ਮਣਚਣ੍ਡਾਲੋ ਬ੍ਰਾਹ੍ਮਣਧਮ੍ਮਵਿਪਤ੍ਤਿਯਾਪਿ ਅਕਾਰਣਂ. ਕਸ੍ਮਾ? ਵਿਪਨ੍ਨੇ ਧਮ੍ਮੇ ਉਪ੍ਪਨ੍ਨਤ੍ਤਾ. ਤਸ੍ਮਾ ਤਂ ਅਦਸ੍ਸੇਤ੍ਵਾਵ ਦੇਸਨਂ ਨਿਟ੍ਠਾਪੇਸਿ. ਏਤਰਹਿ ਪਨ ਸੋਪਿ ਬ੍ਰਾਹ੍ਮਣਚਣ੍ਡਾਲੋ ਦੁਲ੍ਲਭੋ. ਏਵਮਯਂ ਬ੍ਰਾਹ੍ਮਣਾਨਂ ਧਮ੍ਮੋ ਵਿਨਟ੍ਠੋ. ਤੇਨੇਵਾਹ ਦੋਣੋ ਬ੍ਰਾਹ੍ਮਣੋ – ‘‘ਏਵਂ ਸਨ੍ਤੇ ਮਯਂ, ਭੋ ਗੋਤਮ, ਬ੍ਰਾਹ੍ਮਣਚਣ੍ਡਾਲਮ੍ਪਿ ਨ ਪੂਰੇਮਾ’’ਤਿ. ਸੇਸਮੇਤ੍ਥ ਵੁਤ੍ਤਨਯਮੇਵ.

ਪਰਮਤ੍ਥਜੋਤਿਕਾਯ ਖੁਦ੍ਦਕ-ਅਟ੍ਠਕਥਾਯ

ਸੁਤ੍ਤਨਿਪਾਤ-ਅਟ੍ਠਕਥਾਯ ਬ੍ਰਾਹ੍ਮਣਧਮ੍ਮਿਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.