੬. ਕਪਿਲਸੁਤ੍ਤ-(ਧਮ੍ਮਚਰਿਯਸੁਤ੍ਤ)-ਵਣ੍ਣਨਾ

ਧਮ੍ਮਚਰਿਯਨ੍ਤਿ ਕਪਿਲਸੁਤ੍ਤਂ. ਕਾ ਉਪ੍ਪਤ੍ਤਿ? ਹੇਮਵਤਸੁਤ੍ਤੇ ਵੁਤ੍ਤਨਯੇਨੇਵ ਪਰਿਨਿਬ੍ਬੁਤੇ ਕਸ੍ਸਪੇ ਭਗਵਤਿ ਦ੍ਵੇ ਕੁਲਪੁਤ੍ਤਾ ਭਾਤਰੋ ਨਿਕ੍ਖਮਿਤ੍ਵਾ ਸਾਵਕਾਨਂ ਸਨ੍ਤਿਕੇ ਪਬ੍ਬਜਿਂਸੁ. ਜੇਟ੍ਠੋ ਸੋਧਨੋ ਨਾਮ, ਕਨਿਟ੍ਠੋ ਕਪਿਲੋ ਨਾਮ. ਤੇਸਂ ਮਾਤਾ ਸਾਧਨੀ ਨਾਮ, ਕਨਿਟ੍ਠਭਗਿਨੀ ਤਾਪਨਾ ਨਾਮ. ਤਾਪਿ ਭਿਕ੍ਖੁਨੀਸੁ ਪਬ੍ਬਜਿਂਸੁ. ਤਤੋ ਤੇ ਦ੍ਵੇਪਿ ਹੇਮਵਤਸੁਤ੍ਤੇ ਵੁਤ੍ਤਨਯੇਨੇਵ ‘‘ਸਾਸਨੇ ਕਤਿ ਧੁਰਾਨੀ’’ਤਿ ਪੁਚ੍ਛਿਤ੍ਵਾ ਸੁਤ੍ਵਾ ਚ ਜੇਟ੍ਠੋ ‘‘ਵਾਸਧੁਰਂ ਪੂਰੇਸ੍ਸਾਮੀ’’ਤਿ ਪਞ੍ਚ ਵਸ੍ਸਾਨਿ ਆਚਰਿਯੁਪਜ੍ਝਾਯਾਨਂ ਸਨ੍ਤਿਕੇ ਵਸਿਤ੍ਵਾ ਪਞ੍ਚਵਸ੍ਸੋ ਹੁਤ੍ਵਾ ਯਾਵ ਅਰਹਤ੍ਤਂ, ਤਾਵ ਕਮ੍ਮਟ੍ਠਾਨਂ ਸੁਤ੍ਵਾ ਅਰਞ੍ਞਂ ਪਵਿਸਿਤ੍ਵਾ ਵਾਯਮਨ੍ਤੋ ਅਰਹਤ੍ਤਂ ਪਾਪੁਣਿ. ਕਪਿਲੋ ‘‘ਅਹਂ ਤਾਵ ਤਰੁਣੋ, ਵੁਡ੍ਢਕਾਲੇ ਵਾਸਧੁਰਂ ਪਰਿਪੂਰੇਸ੍ਸਾਮੀ’’ਤਿ ਗਨ੍ਥਧੁਰਂ ਆਰਭਿਤ੍ਵਾ ਤੇਪਿਟਕੋ ਅਹੋਸਿ. ਤਸ੍ਸ ਪਰਿਯਤ੍ਤਿਂ ਨਿਸ੍ਸਾਯ ਪਰਿਵਾਰੋ, ਪਰਿਵਾਰਂ ਨਿਸ੍ਸਾਯ ਲਾਭੋ ਚ ਉਦਪਾਦਿ.

ਸੋ ਬਾਹੁਸਚ੍ਚਮਦੇਨ ਮਤ੍ਤੋ ਪਣ੍ਡਿਤਮਾਨੀ ਅਨਞ੍ਞਾਤੇਪਿ ਅਞ੍ਞਾਤਮਾਨੀ ਹੁਤ੍ਵਾ ਪਰੇਹਿ ਵੁਤ੍ਤਂ ਕਪ੍ਪਿਯਮ੍ਪਿ ਅਕਪ੍ਪਿਯਂ, ਅਕਪ੍ਪਿਯਮ੍ਪਿ ਕਪ੍ਪਿਯਂ, ਸਾਵਜ੍ਜਮ੍ਪਿ ਅਨਵਜ੍ਜਂ, ਅਨਵਜ੍ਜਮ੍ਪਿ ਸਾਵਜ੍ਜਨ੍ਤਿ ਭਣਤਿ. ਸੋ ਪੇਸਲੇਹਿ ਭਿਕ੍ਖੂਹਿ, ‘‘ਮਾ, ਆਵੁਸੋ ਕਪਿਲ, ਏਵਂ ਅਵਚਾ’’ਤਿਆਦਿਨਾ ਨਯੇਨ ਓਵਦਿਯਮਾਨੋ ‘‘ਤੁਮ੍ਹੇ ਕਿਂ ਜਾਨਾਥ ਰਿਤ੍ਤਮੁਟ੍ਠਿਸਦਿਸਾ’’ਤਿਆਦੀਹਿ ਵਚਨੇਹਿ ਖੁਂਸੇਨ੍ਤੋ ਵਮ੍ਭੇਨ੍ਤੋਯੇਵ ਚਰਤਿ. ਭਿਕ੍ਖੂ ਤਸ੍ਸ ਭਾਤੁਨੋ ਸੋਧਨਤ੍ਥੇਰਸ੍ਸਾਪਿ ਏਤਮਤ੍ਥਂ ਆਰੋਚੇਸੁਂ. ਸੋਪਿ ਨਂ ਉਪਸਙ੍ਕਮਿਤ੍ਵਾ ਆਹ – ‘‘ਆਵੁਸੋ ਕਪਿਲ, ਸਾਸਨਸ੍ਸ ਆਯੁ ਨਾਮ ਤੁਮ੍ਹਾਦਿਸਾਨਂ ਸਮ੍ਮਾਪਟਿਪਤ੍ਤਿ. ਮਾ, ਆਵੁਸੋ ਕਪਿਲ, ਕਪ੍ਪਿਯਮ੍ਪਿ ਅਕਪ੍ਪਿਯਂ, ਅਕਪ੍ਪਿਯਮ੍ਪਿ ਕਪ੍ਪਿਯਂ, ਸਾਵਜ੍ਜਮ੍ਪਿ ਅਨਵਜ੍ਜਂ, ਅਨਵਜ੍ਜਮ੍ਪਿ ਸਾਵਜ੍ਜਨ੍ਤਿ ਵਦੇਹੀ’’ਤਿ. ਸੋ ਤਸ੍ਸਪਿ ਵਚਨਂ ਨਾਦਿਯਿ. ਤਤੋ ਨਂ ਸੋਧਨਤ੍ਥੇਰੋ ਦ੍ਵਤ੍ਤਿਕ੍ਖਤ੍ਤੁਂ ਵਤ੍ਵਾ –

‘‘ਏਕਵਾਚਮ੍ਪਿ ਦ੍ਵਿਵਾਚਂ, ਭਣੇਯ੍ਯ ਅਨੁਕਮ੍ਪਕੋ;

ਤਤੁਤ੍ਤਰਿਂ ਨ ਭਾਸੇਯ੍ਯ, ਦਾਸੋਵਯ੍ਯਸ੍ਸ ਸਨ੍ਤਿਕੇ’’ਤਿ. (ਜਾ. ੨.੧੯.੩੪) –

ਪਰਿਵਜ੍ਜੇਤ੍ਵਾ ‘‘ਤ੍ਵਮੇਵ, ਆਵੁਸੋ, ਸਕੇਨ ਕਮ੍ਮੇਨ ਪਞ੍ਞਾਯਿਸ੍ਸਸੀ’’ਤਿ ਪਕ੍ਕਾਮਿ. ਤਤੋ ਪਭੁਤਿ ਨਂ ਪੇਸਲਾ ਭਿਕ੍ਖੂ ਛਡ੍ਡੇਸੁਂ.

ਸੋ ਦੁਰਾਚਾਰੋ ਹੁਤ੍ਵਾ ਦੁਰਾਚਾਰਪਰਿਵੁਤੋ ਵਿਹਰਨ੍ਤੋ ਏਕਦਿਵਸਂ ‘‘ਉਪੋਸਥਂ ਓਸਾਰੇਸ੍ਸਾਮੀ’’ਤਿ ਸੀਹਾਸਨਂ ਅਭਿਰੁਯ੍ਹ ਚਿਤ੍ਰਬੀਜਨਿਂ ਗਹੇਤ੍ਵਾ ਨਿਸਿਨ੍ਨੋ ‘‘ਵਤ੍ਤਤਿ, ਆਵੁਸੋ, ਏਤ੍ਥ ਭਿਕ੍ਖੂਨਂ ਪਾਤਿਮੋਕ੍ਖੋ’’ਤਿ ਤਿਕ੍ਖਤ੍ਤੁਂ ਆਹ. ਅਥੇਕੋ ਭਿਕ੍ਖੁਪਿ ‘‘ਮਯ੍ਹਂ ਵਤ੍ਤਤੀ’’ਤਿ ਨ ਅਵੋਚ. ਨ ਚ ਤਸ੍ਸ ਤੇਸਂ ਵਾ ਪਾਤਿਮੋਕ੍ਖੋ ਵਤ੍ਤਤਿ. ਤਤੋ ਸੋ ‘‘ਪਾਤਿਮੋਕ੍ਖੇ ਸੁਤੇਪਿ ਅਸੁਤੇਪਿ ਵਿਨਯੋ ਨਾਮ ਨਤ੍ਥੀ’’ਤਿ ਆਸਨਾ ਵੁਟ੍ਠਾਸਿ. ਏਵਂ ਕਸ੍ਸਪਸ੍ਸ ਭਗਵਤੋ ਸਾਸਨਂ ਓਸਕ੍ਕਾਪੇਸਿ ਵਿਨਾਸੇਸਿ. ਅਥ ਸੋਧਨਤ੍ਥੇਰੋ ਤਦਹੇਵ ਪਰਿਨਿਬ੍ਬਾਯਿ. ਸੋਪਿ ਕਪਿਲੋ ਏਵਂ ਤਂ ਸਾਸਨਂ ਓਸਕ੍ਕਾਪੇਤ੍ਵਾ ਕਾਲਕਤੋ ਅਵੀਚਿਮਹਾਨਿਰਯੇ ਨਿਬ੍ਬਤ੍ਤਿ, ਸਾਪਿਸ੍ਸ ਮਾਤਾ ਚ ਭਗਿਨੀ ਚ ਤਸ੍ਸੇਵ ਦਿਟ੍ਠਾਨੁਗਤਿਂ ਆਪਜ੍ਜਿਤ੍ਵਾ ਪੇਸਲੇ ਭਿਕ੍ਖੂ ਅਕ੍ਕੋਸਮਾਨਾ ਪਰਿਭਾਸਮਾਨਾ ਕਾਲਂ ਕਤ੍ਵਾ ਨਿਰਯੇ ਨਿਬ੍ਬਤ੍ਤਿਂਸੁ.

ਤਸ੍ਮਿਂਯੇਵ ਚ ਕਾਲੇ ਪਞ੍ਚਸਤਾ ਪੁਰਿਸਾ ਗਾਮਘਾਤਾਦੀਨਿ ਕਤ੍ਵਾ ਚੋਰਿਕਾਯ ਜੀਵਨ੍ਤਾ ਜਨਪਦਮਨੁਸ੍ਸੇਹਿ ਅਨੁਬਦ੍ਧਾ ਪਲਾਯਮਾਨਾ ਅਰਞ੍ਞਂ ਪਵਿਸਿਤ੍ਵਾ ਤਤ੍ਥ ਕਿਞ੍ਚਿ ਗਹਨਂ ਵਾ ਪਟਿਸਰਣਂ ਵਾ ਅਪਸ੍ਸਨ੍ਤਾ ਅਵਿਦੂਰੇ ਪਾਸਾਣੇ ਵਸਨ੍ਤਂ ਅਞ੍ਞਤਰਂ ਆਰਞ੍ਞਿਕਂ ਭਿਕ੍ਖੁਂ ਦਿਸ੍ਵਾ ਵਨ੍ਦਿਤ੍ਵਾ ‘‘ਅਮ੍ਹਾਕਂ, ਭਨ੍ਤੇ, ਪਟਿਸਰਣਂ ਹੋਥਾ’’ਤਿ ਭਣਿਂਸੁ. ਥੇਰੋ ‘‘ਤੁਮ੍ਹਾਕਂ ਸੀਲਸਦਿਸਂ ਪਟਿਸਰਣਂ ਨਤ੍ਥਿ, ਸਬ੍ਬੇ ਪਞ੍ਚ ਸੀਲਾਨਿ ਸਮਾਦਿਯਥਾ’’ਤਿ ਆਹ. ਤੇ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ਸੀਲਾਨਿ ਸਮਾਦਿਯਿਂਸੁ. ਥੇਰੋ ‘‘ਤੁਮ੍ਹੇ ਸੀਲਵਨ੍ਤੋ, ਇਦਾਨਿ ਅਤ੍ਤਨੋ ਜੀਵਿਤਂ ਵਿਨਾਸੇਨ੍ਤੇਸੁਪਿ ਮਾ ਮਨੋ ਪਦੂਸਯਿਤ੍ਥਾ’’ਤਿ ਆਹ. ਤੇ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਂਸੁ. ਅਥ ਤੇ ਜਾਨਪਦਾ ਸਮ੍ਪਤ੍ਤਾ ਇਤੋ ਚਿਤੋ ਚ ਮਗ੍ਗਮਾਨਾ ਤੇ ਚੋਰੇ ਦਿਸ੍ਵਾ ਸਬ੍ਬੇਵ ਜੀਵਿਤਾ ਵੋਰੋਪੇਸੁਂ. ਤੇ ਕਾਲਂ ਕਤ੍ਵਾ ਕਾਮਾਵਚਰਦੇਵਲੋਕੇ ਨਿਬ੍ਬਤ੍ਤਿਂਸੁ. ਤੇਸੁ ਜੇਟ੍ਠਕਚੋਰੋ ਜੇਟ੍ਠਕਦੇਵਪੁਤ੍ਤੋ ਅਹੋਸਿ, ਇਤਰੇ ਤਸ੍ਸੇਵ ਪਰਿਵਾਰਾ.

ਤੇ ਅਨੁਲੋਮਪਟਿਲੋਮਂ ਸਂਸਰਨ੍ਤਾ ਏਕਂ ਬੁਦ੍ਧਨ੍ਤਰਂ ਦੇਵਲੋਕੇ ਖੇਪੇਤ੍ਵਾ ਅਮ੍ਹਾਕਂ ਭਗਵਤੋ ਕਾਲੇ ਦੇਵਲੋਕਤੋ ਚਵਿਤ੍ਵਾ ਜੇਟ੍ਠਕਦੇਵਪੁਤ੍ਤੋ ਸਾਵਤ੍ਥਿਦ੍ਵਾਰੇ ਕੇਵਟ੍ਟਗਾਮੋ ਅਤ੍ਥਿ, ਤਤ੍ਥ ਪਞ੍ਚਸਤਕੁਲਜੇਟ੍ਠਸ੍ਸ ਕੇਵਟ੍ਟਸ੍ਸ ਪਜਾਪਤਿਯਾ ਕੁਚ੍ਛਿਮ੍ਹਿ ਪਟਿਸਨ੍ਧਿਂ ਅਗ੍ਗਹੇਸਿ, ਇਤਰੇ ਅਵਸੇਸਕੇਵਟ੍ਟਪਜਾਪਤੀਨਂ. ਏਵਂ ਤੇਸਂ ਏਕਦਿਵਸਂਯੇਵ ਪਟਿਸਨ੍ਧਿਗ੍ਗਹਣਞ੍ਚ ਗਬ੍ਭਵੁਟ੍ਠਾਨਞ੍ਚ ਅਹੋਸਿ. ਅਥ ਕੇਵਟ੍ਟਜੇਟ੍ਠੋ ‘‘ਅਤ੍ਥਿ ਨੁ ਖੋ ਇਮਸ੍ਮਿਂ ਗਾਮੇ ਅਞ੍ਞੇਪਿ ਦਾਰਕਾ ਅਜ੍ਜ ਜਾਤਾ’’ਤਿ ਵਿਚਿਨਨ੍ਤੋ ਤੇ ਦਾਰਕੇ ਦਿਸ੍ਵਾ ‘‘ਇਮੇ ਮੇ ਪੁਤ੍ਤਸ੍ਸ ਸਹਾਯਕਾ ਭਵਿਸ੍ਸਨ੍ਤੀ’’ਤਿ ਸਬ੍ਬੇਸਂ ਪੋਸਾਵਨਿਕਂ ਅਦਾਸਿ. ਤੇ ਸਬ੍ਬੇ ਸਹਾਯਕਾ ਸਹਪਂਸੁਂ ਕੀਲ਼ਨ੍ਤਾ ਅਨੁਪੁਬ੍ਬੇਨ ਵਯਪ੍ਪਤ੍ਤਾ ਅਹੇਸੁਂ. ਯਸੋਜੋ ਤੇਸਂ ਅਗ੍ਗੋ ਅਹੋਸਿ.

ਕਪਿਲੋਪਿ ਤਦਾ ਨਿਰਯੇ ਪਕ੍ਕਾਵਸੇਸੇਨ ਅਚਿਰਵਤਿਯਾ ਸੁਵਣ੍ਣਵਣ੍ਣੋ ਦੁਗ੍ਗਨ੍ਧਮੁਖੋ ਮਚ੍ਛੋ ਹੁਤ੍ਵਾ ਨਿਬ੍ਬਤ੍ਤਿ. ਅਥੇਕਦਿਵਸਂ ਸਬ੍ਬੇਪਿ ਕੇਵਟ੍ਟਦਾਰਕਾ ਜਾਲਾਨਿ ਗਹੇਤ੍ਵਾ ‘‘ਮਚ੍ਛੇ ਬਨ੍ਧਿਸ੍ਸਾਮਾ’’ਤਿ ਨਦਿਂ ਗਨ੍ਤ੍ਵਾ ਜਾਲਾਨਿ ਪਕ੍ਖਿਪਿਂਸੁ. ਤੇਸਂ ਜਾਲਂ ਸੋ ਮਚ੍ਛੋ ਪਾਵਿਸਿ. ਤਂ ਦਿਸ੍ਵਾ ਸਬ੍ਬੋ ਕੇਵਟ੍ਟਗਾਮੋ ਉਚ੍ਚਾਸਦ੍ਦਮਹਾਸਦ੍ਦੋ ਅਹੋਸਿ – ‘‘ਅਮ੍ਹਾਕਂ ਪੁਤ੍ਤਾ ਪਠਮਂ ਮਚ੍ਛੇ ਬਨ੍ਧਨ੍ਤਾ ਸੁਵਣ੍ਣਮਚ੍ਛਂ ਬਨ੍ਧਿਂਸੁ, ਵੁਡ੍ਢਿ ਨੇਸਂ ਦਾਰਕਾਨਂ, ਇਦਾਨਿ ਚ ਨੋ ਰਾਜਾ ਪਹੂਤਂ ਧਨਂ ਦਸ੍ਸਤੀ’’ਤਿ. ਅਥ ਤੇ ਪਞ੍ਚਸਤਾਪਿ ਦਾਰਕਸਹਾਯਕਾ ਮਚ੍ਛਂ ਨਾਵਾਯ ਪਕ੍ਖਿਪਿਤ੍ਵਾ ਨਾਵਂ ਉਕ੍ਖਿਪਿਤ੍ਵਾ ਰਞ੍ਞੋ ਸਨ੍ਤਿਕਂ ਅਗਮਂਸੁ. ਰਾਜਾ ਦਿਸ੍ਵਾ ‘‘ਕਿਂ ਏਤਂ ਭਣੇ’’ਤਿ ਆਹ. ‘‘ਮਚ੍ਛੋ ਦੇਵਾ’’ਤਿ. ਰਾਜਾ ਸੁਵਣ੍ਣਵਣ੍ਣਂ ਮਚ੍ਛਂ ਦਿਸ੍ਵਾ ‘‘ਭਗਵਾ ਏਤਸ੍ਸ ਵਣ੍ਣਕਾਰਣਂ ਜਾਨਿਸ੍ਸਤੀ’’ਤਿ ਮਚ੍ਛਂ ਗਾਹਾਪੇਤ੍ਵਾ ਭਗਵਤੋ ਸਨ੍ਤਿਕਂ ਅਗਮਾਸਿ. ਮਚ੍ਛਸ੍ਸ ਮੁਖਵਿਵਰਣਕਾਲੇ ਜੇਤਵਨਂ ਅਤਿਵਿਯ ਦੁਗ੍ਗਨ੍ਧਂ ਹੋਤਿ.

ਰਾਜਾ ਭਗਵਨ੍ਤਂ ਪੁਚ੍ਛਿ – ‘‘ਕਸ੍ਮਾ, ਭਨ੍ਤੇ, ਮਚ੍ਛੋ ਸੁਵਣ੍ਣਵਣ੍ਣੋ ਜਾਤੋ, ਕਸ੍ਮਾ ਚਸ੍ਸ ਮੁਖਤੋ ਦੁਗ੍ਗਨ੍ਧੋ ਵਾਯਤੀ’’ਤਿ? ਅਯਂ, ਮਹਾਰਾਜ, ਕਸ੍ਸਪਸ੍ਸ ਭਗਵਤੋ ਪਾਵਚਨੇ ਕਪਿਲੋ ਨਾਮ ਭਿਕ੍ਖੁ ਅਹੋਸਿ, ਬਹੁਸ੍ਸੁਤੋ ਆਗਤਾਗਮੋ. ਅਤ੍ਤਨੋ ਵਚਨਂ ਅਗਣ੍ਹਨ੍ਤਾਨਂ ਭਿਕ੍ਖੂਨਂ ਅਕ੍ਕੋਸਕਪਰਿਭਾਸਕੋ. ਤਸ੍ਸ ਚ ਭਗਵਤੋ ਸਾਸਨਵਿਨਾਸਕੋ. ਯਂ ਸੋ ਤਸ੍ਸ ਭਗਵਤੋ ਸਾਸਨਂ ਵਿਨਾਸੇਸਿ, ਤੇਨ ਕਮ੍ਮੇਨ ਅਵੀਚਿਮਹਾਨਿਰਯੇ ਨਿਬ੍ਬਤ੍ਤਿ, ਵਿਪਾਕਾਵਸੇਸੇਨ ਚ ਇਦਾਨਿ ਮਚ੍ਛੋ ਜਾਤੋ. ਯਂ ਦੀਘਰਤ੍ਤਂ ਬੁਦ੍ਧਵਚਨਂ ਵਾਚੇਸਿ, ਬੁਦ੍ਧਸ੍ਸ ਵਣ੍ਣਂ ਕਥੇਸਿ, ਤਸ੍ਸ ਨਿਸ੍ਸਨ੍ਦੇਨ ਈਦਿਸਂ ਵਣ੍ਣਂ ਪਟਿਲਭਿ. ਯਂ ਭਿਕ੍ਖੂਨਂ ਅਕ੍ਕੋਸਕਪਰਿਭਾਸਕੋ ਅਹੋਸਿ, ਤੇਨਸ੍ਸ ਮੁਖਤੋ ਦੁਗ੍ਗਨ੍ਧੋ ਵਾਯਤਿ. ‘‘ਉਲ੍ਲਪਾਪੇਮਿ ਨਂ ਮਹਾਰਾਜਾ’’ਤਿ? ‘‘ਆਮ ਭਗਵਾ’’ਤਿ. ਅਥ ਭਗਵਾ ਮਚ੍ਛਂ ਆਲਪਿ – ‘‘ਤ੍ਵਂਸਿ ਕਪਿਲੋ’’ਤਿ? ‘‘ਆਮ ਭਗਵਾ, ਅਹਂ ਕਪਿਲੋ’’ਤਿ. ‘‘ਕੁਤੋ ਆਗਤੋਸੀ’’ਤਿ? ‘‘ਅਵੀਚਿਮਹਾਨਿਰਯਤੋ ਭਗਵਾ’’ਤਿ. ‘‘ਸੋਧਨੋ ਕੁਹਿਂ ਗਤੋ’’ਤਿ? ‘‘ਪਰਿਨਿਬ੍ਬੁਤੋ ਭਗਵਾ’’ਤਿ. ‘‘ਸਾਧਨੀ ਕੁਹਿਂ ਗਤਾ’’ਤਿ? ‘‘ਮਹਾਨਿਰਯੇ ਨਿਬ੍ਬਤ੍ਤਾ ਭਗਵਾ’’ਤਿ. ‘‘ਤਾਪਨਾ ਕੁਹਿਂ ਗਤਾ’’ਤਿ? ‘‘ਮਹਾਨਿਰਯੇ ਨਿਬ੍ਬਤ੍ਤਾ ਭਗਵਾ’’ਤਿ. ‘‘ਇਦਾਨਿ ਤ੍ਵਂ ਕੁਹਿਂ ਗਮਿਸ੍ਸਸੀ’’ਤਿ? ‘‘ਮਹਾਨਿਰਯਂ ਭਗਵਾ’’ਤਿ. ਤਾਵਦੇਵ ਵਿਪ੍ਪਟਿਸਾਰਾਭਿਭੂਤੋ ਨਾਵਂ ਸੀਸੇਨ ਪਹਰਿਤ੍ਵਾ ਕਾਲਕਤੋ ਮਹਾਨਿਰਯੇ ਨਿਬ੍ਬਤ੍ਤਿ. ਮਹਾਜਨੋ ਸਂਵਿਗ੍ਗੋ ਅਹੋਸਿ ਲੋਮਹਟ੍ਠਜਾਤੋ. ਅਥ ਭਗਵਾ ਤਤ੍ਥ ਸਮ੍ਪਤ੍ਤਗਹਟ੍ਠਪਬ੍ਬਜਿਤਪਰਿਸਾਯ ਤਙ੍ਖਣਾਨੁਰੂਪਂ ਧਮ੍ਮਂ ਦੇਸੇਨ੍ਤੋ ਇਮਂ ਸੁਤ੍ਤਮਭਾਸਿ.

੨੭੭-੮. ਤਤ੍ਥ ਧਮ੍ਮਚਰਿਯਨ੍ਤਿ ਕਾਯਸੁਚਰਿਤਾਦਿ ਧਮ੍ਮਚਰਿਯਂ. ਬ੍ਰਹ੍ਮਚਰਿਯਨ੍ਤਿ ਮਗ੍ਗਬ੍ਰਹ੍ਮਚਰਿਯਂ. ਏਤਦਾਹੁ ਵਸੁਤ੍ਤਮਨ੍ਤਿ ਏਤਂ ਉਭਯਮ੍ਪਿ ਲੋਕਿਯਲੋਕੁਤ੍ਤਰਂ ਸੁਚਰਿਤਂ ਸਗ੍ਗਮੋਕ੍ਖਸੁਖਸਮ੍ਪਾਪਕਤ੍ਤਾ ਵਸੁਤ੍ਤਮਨ੍ਤਿ ਆਹੁ ਅਰਿਯਾ. ਵਸੁਤ੍ਤਮਂ ਨਾਮ ਉਤ੍ਤਮਰਤਨਂ, ਅਨੁਗਾਮਿਕਂ ਅਤ੍ਤਾਧੀਨਂ ਰਾਜਾਦੀਨਂ ਅਸਾਧਾਰਣਨ੍ਤਿ ਅਧਿਪ੍ਪਾਯੋ.

ਏਤ੍ਤਾਵਤਾ ‘‘ਗਹਟ੍ਠਸ੍ਸ ਵਾ ਪਬ੍ਬਜਿਤਸ੍ਸ ਵਾ ਸਮ੍ਮਾਪਟਿਪਤ੍ਤਿਯੇਵ ਪਟਿਸਰਣ’’ਨ੍ਤਿ ਦਸ੍ਸੇਤ੍ਵਾ ਇਦਾਨਿ ਪਟਿਪਤ੍ਤਿਵਿਰਹਿਤਾਯ ਪਬ੍ਬਜ੍ਜਾਯ ਅਸਾਰਕਤ੍ਤਦਸ੍ਸਨੇਨ ਕਪਿਲਂ ਅਞ੍ਞੇ ਚ ਤਥਾਰੂਪੇ ਗਰਹਨ੍ਤੋ ‘‘ਪਬ੍ਬਜਿਤੋਪਿ ਚੇ ਹੋਤੀ’’ਤਿ ਏਵਮਾਦਿਮਾਹ.

ਤਤ੍ਰਾਯਂ ਅਤ੍ਥਵਣ੍ਣਨਾ – ਯੋ ਹਿ ਕੋਚਿ ਗਿਹਿਬ੍ਯਞ੍ਜਨਾਨਿ ਅਪਨੇਤ੍ਵਾ ਭਣ੍ਡੁਕਾਸਾਵਾਦਿਗਹਣਮਤ੍ਤਂ ਉਪਸਙ੍ਕਮਨੇਨ ਪਬ੍ਬਜਿਤੋਪਿ ਚੇਹੋਤਿ ਪੁਬ੍ਬੇ ਵੁਤ੍ਤਤ੍ਥਂ ਅਗਾਰਸ੍ਮਾ ਅਨਗਾਰਿਯਂ, ਸੋ ਚੇ ਮੁਖਰਜਾਤਿਕੋ ਹੋਤਿ ਫਰੁਸਵਚਨੋ, ਨਾਨਪ੍ਪਕਾਰਾਯ ਵਿਹੇਸਾਯ ਅਭਿਰਤਤ੍ਤਾ ਵਿਹੇਸਾਭਿਰਤੋ, ਹਿਰੋਤ੍ਤਪ੍ਪਾਭਾਵੇਨ ਮਗਸਦਿਸਤ੍ਤਾ ਮਗੋ, ਜੀਵਿਤਂ ਤਸ੍ਸ ਪਾਪਿਯੋ, ਤਸ੍ਸ ਏਵਰੂਪਸ੍ਸ ਜੀਵਿਤਂ ਅਤਿਪਾਪਂ ਅਤਿਹੀਨਂ. ਕਸ੍ਮਾ? ਯਸ੍ਮਾ ਇਮਾਯ ਮਿਚ੍ਛਾਪਟਿਪਤ੍ਤਿਯਾ ਰਾਗਾਦਿਮਨੇਕਪ੍ਪਕਾਰਂ ਰਜਂ ਵਡ੍ਢੇਤਿ ਅਤ੍ਤਨੋ.

੨੭੯. ਨ ਕੇਵਲਞ੍ਚ ਇਮਿਨਾਵ ਕਾਰਣੇਨਸ੍ਸ ਜੀਵਿਤਂ ਪਾਪਿਯੋ, ਅਪਿਚ ਖੋ ਪਨ ਅਯਂ ਏਵਰੂਪੋ ਮੁਖਰਜਾਤਿਕਤ੍ਤਾ ਕਲਹਾਭਿਰਤੋ ਭਿਕ੍ਖੁ ਸੁਭਾਸਿਤਸ੍ਸ ਅਤ੍ਥਵਿਜਾਨਨਸਮ੍ਮੋਹਨੇਨ ਮੋਹਧਮ੍ਮੇਨ ਆਵੁਤੋ, ‘‘ਮਾ, ਆਵੁਸੋ ਕਪਿਲ, ਏਵਂ ਅਵਚ, ਇਮਿਨਾਪਿ ਪਰਿਯਾਯੇਨ ਤਂ ਗਣ੍ਹਾਹੀ’’ਤਿ ਏਵਮਾਦਿਨਾ ਨਯੇਨ ਪੇਸਲੇਹਿ ਭਿਕ੍ਖੂਹਿ ਅਕ੍ਖਾਤਮ੍ਪਿ ਨ ਜਾਨਾਤਿ ਧਮ੍ਮਂ ਬੁਦ੍ਧੇਨ ਦੇਸਿਤਂ. ਯੋ ਧਮ੍ਮੋ ਬੁਦ੍ਧੇਨ ਦੇਸਿਤੋ, ਤਂ ਨਾਨਪ੍ਪਕਾਰੇਨ ਅਤ੍ਤਨੋ ਵੁਚ੍ਚਮਾਨਮ੍ਪਿ ਨ ਜਾਨਾਤਿ. ਏਵਮ੍ਪਿਸ੍ਸ ਜੀਵਿਤਂ ਪਾਪਿਯੋ.

੨੮੦. ਤਥਾ ਸੋ ਏਵਰੂਪੋ ਵਿਹੇਸਾਭਿਰਤਤ੍ਤਾ ਵਿਹੇਸਂ ਭਾਵਿਤਤ੍ਤਾਨਂ ਭਾਵਿਤਤ੍ਤੇ ਖੀਣਾਸਵਭਿਕ੍ਖੂ ਸੋਧਨਤ੍ਥੇਰਪਭੁਤਿਕੇ ‘‘ਨ ਤੁਮ੍ਹੇ ਵਿਨਯਂ ਜਾਨਾਥ, ਨ ਸੁਤ੍ਤਂ ਨ ਅਭਿਧਮ੍ਮਂ, ਵੁਡ੍ਢਪਬ੍ਬਜਿਤਾ’’ਤਿਆਦਿਨਾ ਨਯੇਨ ਵਿਹੇਸਨ੍ਤੋ. ਉਪਯੋਗਪ੍ਪਵਤ੍ਤਿਯਞ੍ਹਿ ਇਦਂ ਸਾਮਿਵਚਨਂ. ਅਥ ਵਾ ਯਥਾਵੁਤ੍ਤੇਨੇਵ ਨਯੇਨ ‘‘ਵਿਹੇਸਂ ਭਾਵਿਤਤ੍ਤਾਨਂ ਕਰੋਨ੍ਤੋ’’ਤਿ ਪਾਠਸੇਸੋ ਵੇਦਿਤਬ੍ਬੋ. ਏਵਂ ਨਿਪ੍ਪਰਿਯਾਯਮੇਵ ਸਾਮਿਵਚਨਂ ਸਿਜ੍ਝਤਿ. ਅਵਿਜ੍ਜਾਯ ਪੁਰਕ੍ਖਤੋਤਿ ਭਾਵਿਤਤ੍ਤਵਿਹੇਸਨੇ ਆਦੀਨਵਦਸ੍ਸਨਪਟਿਚ੍ਛਾਦਿਕਾਯ ਅਵਿਜ੍ਜਾਯ ਪੁਰਕ੍ਖਤੋ ਪੇਸਿਤੋ ਪਯੋਜਿਤੋ ਸੇਸਪਬ੍ਬਜਿਤਾਨਂ ਭਾਵਿਤਤ੍ਤਾਨਂ ਵਿਹੇਸਭਾਵੇਨ ਪਵਤ੍ਤਂ ਦਿਟ੍ਠੇਵ ਧਮ੍ਮੇ ਚਿਤ੍ਤਵਿਬਾਧਨੇਨ ਸਙ੍ਕਿਲੇਸਂ, ਆਯਤਿਞ੍ਚ ਨਿਰਯਸਮ੍ਪਾਪਨੇਨ ਮਗ੍ਗਂ ਨਿਰਯਗਾਮਿਨਂ ਨ ਜਾਨਾਤਿ.

੨੮੧. ਅਜਾਨਨ੍ਤੋ ਚ ਤੇਨ ਮਗ੍ਗੇਨ ਚਤੁਬ੍ਬਿਧਾਪਾਯਭੇਦਂ ਵਿਨਿਪਾਤਂ ਸਮਾਪਨ੍ਨੋ. ਤਤ੍ਥ ਚ ਵਿਨਿਪਾਤੇ ਗਬ੍ਭਾ ਗਬ੍ਭਂ ਤਮਾ ਤਮਂ ਏਕੇਕਨਿਕਾਯੇ ਸਤਕ੍ਖਤ੍ਤੁਂ ਸਹਸ੍ਸਕ੍ਖਤ੍ਤੁਮ੍ਪਿ ਮਾਤੁਕੁਚ੍ਛਿਤੋ ਮਾਤੁਕੁਚ੍ਛਿਂ ਚਨ੍ਦਿਮਸੂਰਿਯੇਹਿਪਿ ਅਵਿਦ੍ਧਂਸਨੀਯਾ ਅਸੁਰਕਾਯਤਮਾ ਤਮਞ੍ਚ ਸਮਾਪਨ੍ਨੋ. ਸ ਵੇ ਤਾਦਿਸਕੋ ਭਿਕ੍ਖੁ ਪੇਚ੍ਚ ਇਤੋ ਪਰਲੋਕਂ ਗਨ੍ਤ੍ਵਾ ਅਯਂ ਕਪਿਲਮਚ੍ਛੋ ਵਿਯ ਨਾਨਪ੍ਪਕਾਰਂ ਦੁਕ੍ਖਂ ਨਿਗਚ੍ਛਤਿ.

੨੮੨. ਕਿਂ ਕਾਰਣਾ? ਗੂਥਕੂਪੋ ਯਥਾ ਅਸ੍ਸ, ਸਮ੍ਪੁਣ੍ਣੋ ਗਣਵਸ੍ਸਿਕੋ,ਯਥਾ ਵਚ੍ਚਕੁਟਿਗੂਥਕੂਪੋ ਗਣਵਸ੍ਸਿਕੋ ਅਨੇਕਵਸ੍ਸਿਕੋ ਬਹੂਨਿ ਵਸ੍ਸਾਨਿ ਮੁਖਤੋ ਗੂਥੇਨ ਪੂਰਿਯਮਾਨੋ ਸਮ੍ਪੁਣ੍ਣੋ ਅਸ੍ਸ, ਸੋ ਉਦਕਕੁਮ੍ਭਸਤੇਹਿ ਉਦਕਕੁਮ੍ਭਸਹਸ੍ਸੇਹਿ ਧੋਵਿਯਮਾਨੋਪਿ ਦੁਗ੍ਗਨ੍ਧਦੁਬ੍ਬਣ੍ਣਿਯਾਨਪਗਮਾ ਦੁਬ੍ਬਿਸੋਧੋ ਹੋਤਿ, ਏਵਮੇਵ ਯੋ ਏਵਰੂਪੋ ਅਸ੍ਸ ਦੀਘਰਤ੍ਤਂ ਸਂਕਿਲਿਟ੍ਠਕਮ੍ਮਨ੍ਤੋ ਗੂਥਕੂਪੋ ਵਿਯ ਗੂਥੇਨ ਪਾਪੇਨ ਸਮ੍ਪੁਣ੍ਣਤ੍ਤਾ ਸਮ੍ਪੁਣ੍ਣੋ ਪੁਗ੍ਗਲੋ, ਸੋ ਦੁਬ੍ਬਿਸੋਧੋ ਹਿ ਸਾਙ੍ਗਣੋ, ਚਿਰਕਾਲਂ ਤਸ੍ਸ ਅਙ੍ਗਣਸ੍ਸ ਵਿਪਾਕਂ ਪਚ੍ਚਨੁਭੋਨ੍ਤੋਪਿ ਨ ਸੁਜ੍ਝਤਿ. ਤਸ੍ਮਾ ਵਸ੍ਸਗਣਨਾਯ ਅਪਰਿਮਾਣਮ੍ਪਿ ਕਾਲਂ ਸ ਵੇ ਤਾਦਿਸਕੋ ਭਿਕ੍ਖੁ ਪੇਚ੍ਚ ਦੁਕ੍ਖਂ ਨਿਗਚ੍ਛਤੀਤਿ. ਅਥ ਵਾ ਅਯਂ ਇਮਿਸ੍ਸਾ ਗਾਥਾਯ ਸਮ੍ਬਨ੍ਧੋ – ਯਂ ਵੁਤ੍ਤਂ ‘‘ਸ ਵੇ ਤਾਦਿਸਕੋ ਭਿਕ੍ਖੁ, ਪੇਚ੍ਚ ਦੁਕ੍ਖਂ ਨਿਗਚ੍ਛਤੀ’’ਤਿ, ਤਤ੍ਰ ਸਿਯਾ ਤੁਮ੍ਹਾਕਂ ‘‘ਸਕ੍ਕਾ ਪਨਾਯਂ ਤਥਾ ਕਾਤੁਂ, ਯਥਾ ਪੇਚ੍ਚ ਦੁਕ੍ਖਂ ਨ ਨਿਗਚ੍ਛੇਯ੍ਯਾ’’ਤਿ. ਨ ਸਕ੍ਕਾ. ਕਸ੍ਮਾ? ਯਸ੍ਮਾ ਗੂਥਕੂਪੋ…ਪੇ… ਸਾਙ੍ਗਣੋਤਿ.

੨੮੩-੪. ਯਤੋ ਪਟਿਕਚ੍ਚੇਵ ਯਂ ਏਵਰੂਪਂ ਜਾਨਾਥ, ਭਿਕ੍ਖਵੋ ਗੇਹਨਿਸ੍ਸਿਤਂ, ਯਂ ਏਵਰੂਪਂ ਪਞ੍ਚਕਾਮਗੁਣਨਿਸ੍ਸਿਤਂ ਜਾਨੇਯ੍ਯਾਥ ਅਭੂਤਗੁਣਪਤ੍ਥਨਾਕਾਰਪ੍ਪਵਤ੍ਤਾਯ ਪਾਪਿਕਾਯ ਇਚ੍ਛਾਯ ਸਮਨ੍ਨਾਗਤਤ੍ਤਾ ਪਾਪਿਚ੍ਛਂ, ਕਾਮਵਿਤਕ੍ਕਾਦੀਹਿ ਸਮਨ੍ਨਾਗਤਤ੍ਤਾ ਪਾਪਸਙ੍ਕਪ੍ਪਂ, ਕਾਯਿਕਵੀਤਿਕ੍ਕਮਾਦਿਨਾ ਵੇਲ਼ੁਦਾਨਾਦਿਭੇਦੇਨ ਚ ਪਾਪਾਚਾਰੇਨ ਸਮਨ੍ਨਾਗਤਤ੍ਤਾ ਪਾਪਾਚਾਰਂ, ਵੇਸਿਯਾਦਿਪਾਪਗੋਚਰਤੋ ਪਾਪਗੋਚਰਂ, ਸਬ੍ਬੇ ਸਮਗ੍ਗਾ ਹੁਤ੍ਵਾਨ ਅਭਿਨਿਬ੍ਬਜ੍ਜਿਯਾਥ ਨਂ. ਤਤ੍ਥ ਅਭਿਨਿਬ੍ਬਜ੍ਜਿਯਾਥਾਤਿ ਵਿਵਜ੍ਜੇਯ੍ਯਾਥ ਮਾ ਭਜੇਯ੍ਯਾਥ, ਮਾ ਚਸ੍ਸ ਅਭਿਨਿਬ੍ਬਜ੍ਜਨਮਤ੍ਤੇਨੇਵ ਅਪ੍ਪੋਸ੍ਸੁਕ੍ਕਤਂ ਆਪਜ੍ਜੇਯ੍ਯਾਥ, ਅਪਿਚ ਖੋ ਪਨ ਕਾਰਣ੍ਡਵਂ ਨਿਦ੍ਧਮਥ, ਕਸਮ੍ਬੁਂ ਅਪਕਸ੍ਸਥ, ਤਂ ਕਚਵਰਭੂਤਂ ਪੁਗ੍ਗਲਂ ਕਚਵਰਮਿਵ ਅਨਪੇਕ੍ਖਾ ਨਿਦ੍ਧਮਥ, ਕਸਟਭੂਤਞ੍ਚ ਨਂ ਖਤ੍ਤਿਯਾਦੀਨਂ ਮਜ੍ਝੇ ਪਵਿਟ੍ਠਂ ਪਭਿਨ੍ਨਪਗ੍ਘਰਿਤਕੁਟ੍ਠਂ ਚਣ੍ਡਾਲਂ ਵਿਯ ਅਪਕਸ੍ਸਥ, ਹਤ੍ਥੇ ਵਾ ਸੀਸੇ ਵਾ ਗਹੇਤ੍ਵਾ ਨਿਕ੍ਕਡ੍ਢਥ. ਸੇਯ੍ਯਥਾਪਿ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਤਂ ਪੁਗ੍ਗਲਂ ਪਾਪਧਮ੍ਮਂ ਬਾਹਾਯ ਗਹੇਤ੍ਵਾ ਬਹਿਦ੍ਵਾਰਕੋਟ੍ਠਕਾ ਨਿਕ੍ਖਾਮੇਤ੍ਵਾ ਸੂਚਿਘਟਿਕਂ ਅਦਾਸਿ, ਏਵਂ ਅਪਕਸ੍ਸਥਾਤਿ ਦਸ੍ਸੇਤਿ. ਕਿਂ ਕਾਰਣਾ? ਸਙ੍ਘਾਰਾਮੋ ਨਾਮ ਸੀਲਵਨ੍ਤਾਨਂ ਕਤੋ, ਨ ਦੁਸ੍ਸੀਲਾਨਂ.

੨੮੫-੬. ਯਤੋ ਏਤਦੇਵ ਤਤੋ ਪਲਾਪੇ ਵਾਹੇਥ, ਅਸ੍ਸਮਣੇ ਸਮਣਮਾਨਿਨੇ, ਯਥਾ ਹਿ ਪਲਾਪਾ ਅਨ੍ਤੋ ਤਣ੍ਡੁਲਰਹਿਤਾਪਿ ਬਹਿ ਥੁਸੇਹਿ ਵੀਹੀ ਵਿਯ ਦਿਸ੍ਸਨ੍ਤਿ, ਏਵਂ ਪਾਪਭਿਕ੍ਖੂ ਅਨ੍ਤੋ ਸੀਲਾਦਿਵਿਰਹਿਤਾਪਿ ਬਹਿ ਕਾਸਾਵਾਦਿਪਰਿਕ੍ਖਾਰੇਨ ਭਿਕ੍ਖੂ ਵਿਯ ਦਿਸ੍ਸਨ੍ਤਿ. ਤਸ੍ਮਾ ‘‘ਪਲਾਪਾ’’ਤਿ ਵੁਚ੍ਚਨ੍ਤਿ. ਤੇ ਪਲਾਪੇ ਵਾਹੇਥ, ਓਪੁਨਾਥ, ਵਿਧਮਥ ਪਰਮਤ੍ਥਤੋ ਅਸ੍ਸਮਣੇ ਵੇਸਮਤ੍ਤੇਨ ਸਮਣਮਾਨਿਨੇ. ਏਵਂ ਨਿਦ੍ਧਮਿਤ੍ਵਾਨ…ਪੇ… ਪਤਿਸ੍ਸਤਾ. ਤਤ੍ਥ ਕਪ੍ਪਯਵ੍ਹੋਤਿ ਕਪ੍ਪੇਥ, ਕਰੋਥਾਤਿ ਵੁਤ੍ਤਂ ਹੋਤਿ. ਪਤਿਸ੍ਸਤਾਤਿ ਅਞ੍ਞਮਞ੍ਞਂ ਸਗਾਰਵਾ ਸਪ੍ਪਤਿਸ੍ਸਾ. ਤਤੋ ਸਮਗ੍ਗਾ ਨਿਪਕਾ, ਦੁਕ੍ਖਸ੍ਸਨ੍ਤਂ ਕਰਿਸ੍ਸਥਾਤਿ ਅਥੇਵਂ ਤੁਮ੍ਹੇ ਸੁਦ੍ਧਾ ਸੁਦ੍ਧੇਹਿ ਸਂਵਾਸਂ ਕਪ੍ਪੇਨ੍ਤਾ, ਦਿਟ੍ਠਿਸੀਲਸਾਮਞ੍ਞਤਾਯ ਸਮਗ੍ਗਾ, ਅਨੁਪੁਬ੍ਬੇਨ ਪਰਿਪਾਕਗਤਾਯ ਪਞ੍ਞਾਯ ਨਿਪਕਾ, ਸਬ੍ਬਸ੍ਸੇਵਿਮਸ੍ਸ ਵਟ੍ਟਦੁਕ੍ਖਾਦਿਨੋ ਦੁਕ੍ਖਸ੍ਸ ਅਨ੍ਤਂ ਕਰਿਸ੍ਸਥਾਤਿ ਅਰਹਤ੍ਤਨਿਕੂਟੇਨੇਵ ਦੇਸਨਂ ਨਿਟ੍ਠਪੇਸਿ.

ਦੇਸਨਾਪਰਿਯੋਸਾਨੇ ਤੇ ਪਞ੍ਚਸਤਾ ਕੇਵਟ੍ਟਪੁਤ੍ਤਾ ਸਂਵੇਗਮਾਪਜ੍ਜਿਤ੍ਵਾ ਦੁਕ੍ਖਸ੍ਸਨ੍ਤਕਿਰਿਯਂ ਪਤ੍ਥਯਮਾਨਾ ਭਗਵਤੋ ਸਨ੍ਤਿਕੇ ਪਬ੍ਬਜਿਤ੍ਵਾ ਨਚਿਰਸ੍ਸੇਵ ਦੁਕ੍ਖਸ੍ਸਨ੍ਤਂ ਕਤ੍ਵਾ ਭਗਵਤਾ ਸਦ੍ਧਿਂ ਆਨੇਞ੍ਜਵਿਹਾਰਸਮਾਪਤ੍ਤਿਧਮ੍ਮਪਰਿਭੋਗੇਨ ਏਕਪਰਿਭੋਗਾ ਅਹੇਸੁਂ. ਸਾ ਚ ਨੇਸਂ ਏਵਂ ਭਗਵਤਾ ਸਦ੍ਧਿਂ ਏਕਪਰਿਭੋਗਤਾ ਉਦਾਨੇ ਵੁਤ੍ਤਯਸੋਜਸੁਤ੍ਤਵਸੇਨੇਵ ਵੇਦਿਤਬ੍ਬਾਤਿ.

ਪਰਮਤ੍ਥਜੋਤਿਕਾਯ ਖੁਦ੍ਦਕ-ਅਟ੍ਠਕਥਾਯ

ਸੁਤ੍ਤਨਿਪਾਤ-ਅਟ੍ਠਕਥਾਯ ਕਪਿਲਸੁਤ੍ਤਵਣ੍ਣਨਾ ਨਿਟ੍ਠਿਤਾ.