੫. ਸੂਚਿਲੋਮਸੁਤ੍ਤਵਣ੍ਣਨਾ

ਏਵਂ ਮੇ ਸੁਤਨ੍ਤਿ ਸੂਚਿਲੋਮਸੁਤ੍ਤਂ. ਕਾ ਉਪ੍ਪਤ੍ਤਿ? ਅਤ੍ਥਵਣ੍ਣਨਾਨਯੇਨੇਵਸ੍ਸ ਉਪ੍ਪਤ੍ਤਿ ਆਵਿ ਭਵਿਸ੍ਸਤਿ. ਅਤ੍ਥਵਣ੍ਣਨਾਯਞ੍ਚ ‘‘ਏਵਂ ਮੇ ਸੁਤ’’ਨ੍ਤਿਆਦਿ ਵੁਤ੍ਤਤ੍ਥਮੇਵ. ਗਯਾਯਂ ਵਿਹਰਤਿ ਟਙ੍ਕਿਤਮਞ੍ਚੇ ਸੂਚਿਲੋਮਸ੍ਸ ਯਕ੍ਖਸ੍ਸ ਭਵਨੇਤਿ ਏਤ੍ਥ ਪਨ ਕਾ ਗਯਾ, ਕੋ ਟਙ੍ਕਿਤਮਞ੍ਚੋ, ਕਸ੍ਮਾ ਚ ਭਗਵਾ ਤਸ੍ਸ ਯਕ੍ਖਸ੍ਸ ਭਵਨੇ ਵਿਹਰਤੀਤਿ? ਵੁਚ੍ਚਤੇ – ਗਯਾਤਿ ਗਾਮੋਪਿ ਤਿਤ੍ਥਮ੍ਪਿ ਵੁਚ੍ਚਤਿ, ਤਦੁਭਯਮ੍ਪਿ ਇਧ ਵਟ੍ਟਤਿ. ਗਯਾਗਾਮਸ੍ਸ ਹਿ ਅਵਿਦੂਰੇ ਦੇਸੇ ਵਿਹਰਨ੍ਤੋਪਿ ‘‘ਗਯਾਯਂ ਵਿਹਰਤੀ’’ਤਿ ਵੁਚ੍ਚਤਿ, ਤਸ੍ਸ ਚ ਗਾਮਸ੍ਸ ਸਮੀਪੇ ਅਵਿਦੂਰੇ ਦ੍ਵਾਰਸਨ੍ਤਿਕੇ ਸੋ ਟਙ੍ਕਿਤਮਞ੍ਚੋ. ਗਯਾਤਿਤ੍ਥੇ ਵਿਹਰਨ੍ਤੋਪਿ ‘‘ਗਯਾਯਂ ਵਿਹਰਤੀ’’ਤਿ ਵੁਚ੍ਚਤਿ, ਗਯਾਤਿਤ੍ਥੇ ਚ ਸੋ ਟਙ੍ਕਿਤਮਞ੍ਚੋ. ਟਙ੍ਕਿਤਮਞ੍ਚੋਤਿ ਚਤੁਨ੍ਨਂ ਪਾਸਾਣਾਨਂ ਉਪਰਿ ਵਿਤ੍ਥਤਂ ਪਾਸਾਣਂ ਆਰੋਪੇਤ੍ਵਾ ਕਤੋ ਪਾਸਾਣਮਞ੍ਚੋ. ਤਂ ਨਿਸ੍ਸਾਯ ਯਕ੍ਖਸ੍ਸ ਭਵਨਂ ਆਲ਼ਵਕਸ੍ਸ ਭਵਨਂ ਵਿਯ. ਯਸ੍ਮਾ ਵਾ ਪਨ ਭਗਵਾ ਤਂ ਦਿਵਸਂ ਪਚ੍ਚੂਸਸਮਯੇ ਮਹਾਕਰੁਣਾਸਮਾਪਤ੍ਤਿਤੋ ਵੁਟ੍ਠਾਯ ਬੁਦ੍ਧਚਕ੍ਖੁਨਾ ਲੋਕਂ ਵੋਲੋਕੇਨ੍ਤੋ ਸੂਚਿਲੋਮਸ੍ਸ ਚ ਖਰਲੋਮਸ੍ਸ ਚਾਤਿ ਦ੍ਵਿਨ੍ਨਮ੍ਪਿ ਯਕ੍ਖਾਨਂ ਸੋਤਾਪਤ੍ਤਿਫਲੂਪਨਿਸ੍ਸਯਂ ਅਦ੍ਦਸ, ਤਸ੍ਮਾ ਪਤ੍ਤਚੀਵਰਂ ਆਦਾਯ ਅਨ੍ਤੋਅਰੁਣੇਯੇਵ ਨਾਨਾਦਿਸਾਹਿ ਸਨ੍ਨਿਪਤਿਤਸ੍ਸ ਜਨਸ੍ਸ ਖੇਲ਼ਸਿਙ੍ਘਾਣਿਕਾਦਿਨਾਨਪ੍ਪਕਾਰਾਸੁਚਿਨਿਸ੍ਸਨ੍ਦਕਿਲਿਨ੍ਨਭੂਮਿਭਾਗਮ੍ਪਿ ਤਂ ਤਿਤ੍ਥਪ੍ਪਦੇਸਂ ਆਗਨ੍ਤ੍ਵਾ ਤਸ੍ਮਿਂ ਟਙ੍ਕਿਤਮਞ੍ਚੇ ਨਿਸੀਦਿ ਸੂਚਿਲੋਮਸ੍ਸ ਯਕ੍ਖਸ੍ਸ ਭਵਨੇ. ਤੇਨ ਵੁਤ੍ਤਂ ‘‘ਏਕਂ ਸਮਯਂ ਭਗਵਾ ਗਯਾਯਂ ਵਿਹਰਤਿ ਟਙ੍ਕਿਤਮਞ੍ਚੇ ਸੂਚਿਲੋਮਸ੍ਸ ਯਕ੍ਖਸ੍ਸ ਭਵਨੇ’’ਤਿ.

ਤੇਨ ਖੋ ਪਨ ਸਮਯੇਨਾਤਿ ਯਂ ਸਮਯਂ ਭਗਵਾ ਤਤ੍ਥ ਵਿਹਰਤਿ, ਤੇਨ ਸਮਯੇਨ. ਖਰੋ ਚ ਯਕ੍ਖੋ ਸੂਚਿਲੋਮੋ ਚ ਯਕ੍ਖੋ ਭਗਵਤੋ ਅਵਿਦੂਰੇ ਅਤਿਕ੍ਕਮਨ੍ਤੀਤਿ. ਕੇ ਤੇ ਯਕ੍ਖਾ, ਕਸ੍ਮਾ ਚ ਅਤਿਕ੍ਕਮਨ੍ਤੀਤਿ? ਵੁਚ੍ਚਤੇ – ਤੇਸੁ ਤਾਵ ਏਕੋ ਅਤੀਤੇ ਸਙ੍ਘਸ੍ਸ ਤੇਲਂ ਅਨਾਪੁਚ੍ਛਾ ਗਹੇਤ੍ਵਾ ਅਤ੍ਤਨੋ ਸਰੀਰਂ ਮਕ੍ਖੇਸਿ. ਸੋ ਤੇਨ ਕਮ੍ਮੇਨ ਨਿਰਯੇ ਪਚ੍ਚਿਤ੍ਵਾ ਗਯਾਪੋਕ੍ਖਰਣਿਤੀਰੇ ਯਕ੍ਖਯੋਨਿਯਂ ਨਿਬ੍ਬਤ੍ਤੋ. ਤਸ੍ਸੇਵ ਚਸ੍ਸ ਕਮ੍ਮਸ੍ਸ ਵਿਪਾਕਾਵਸੇਸੇਨ ਵਿਰੂਪਾਨਿ ਅਙ੍ਗਪਚ੍ਚਙ੍ਗਾਨਿ ਅਹੇਸੁਂ, ਇਟ੍ਠਕਚ੍ਛਦਨਸਦਿਸਞ੍ਚ ਖਰਸਮ੍ਫਸ੍ਸਂ ਚਮ੍ਮਂ. ਸੋ ਕਿਰ ਯਦਾ ਪਰਂ ਭਿਂਸਾਪੇਤੁਕਾਮੋ ਹੋਤਿ, ਤਦਾ ਛਦਨਿਟ੍ਠਕਸਦਿਸਾਨਿ ਚਮ੍ਮਕਪਾਲਾਨਿ ਉਕ੍ਖਿਪਿਤ੍ਵਾ ਭਿਂਸਾਪੇਤਿ. ਏਵਂ ਸੋ ਖਰਸਮ੍ਫਸ੍ਸਤ੍ਤਾ ਖਰੋ ਯਕ੍ਖੋਤ੍ਵੇਵ ਨਾਮਂ ਲਭਿ.

ਇਤਰੋ ਕਸ੍ਸਪਸ੍ਸ ਭਗਵਤੋ ਕਾਲੇ ਉਪਾਸਕੋ ਹੁਤ੍ਵਾ ਮਾਸਸ੍ਸ ਅਟ੍ਠ ਦਿਵਸੇ ਵਿਹਾਰਂ ਗਨ੍ਤ੍ਵਾ ਧਮ੍ਮਂ ਸੁਣਾਤਿ. ਸੋ ਏਕਦਿਵਸਂ ਧਮ੍ਮਸ੍ਸਵਨੇ ਘੋਸਿਤੇ ਸਙ੍ਘਾਰਾਮਦ੍ਵਾਰੇ ਅਤ੍ਤਨੋ ਖੇਤ੍ਤਂ ਕੇਲਾਯਨ੍ਤੋ ਉਗ੍ਘੋਸਨਂ ਸੁਤ੍ਵਾ ‘‘ਸਚੇ ਨ੍ਹਾਯਾਮਿ, ਚਿਰਂ ਭਵਿਸ੍ਸਤੀ’’ਤਿ ਕਿਲਿਟ੍ਠਗਤ੍ਤੋਵ ਉਪੋਸਥਾਗਾਰਂ ਪਵਿਸਿਤ੍ਵਾ ਮਹਗ੍ਘੇ ਭੁਮ੍ਮਤ੍ਥਰਣੇ ਅਨਾਦਰੇਨ ਨਿਪਜ੍ਜਿਤ੍ਵਾ ਸੁਪਿ. ਭਿਕ੍ਖੁ ਏਵਾਯਂ, ਨ ਉਪਾਸਕੋਤਿ ਸਂਯੁਤ੍ਤਭਾਣਕਾ. ਸੋ ਤੇਨ ਚ ਅਞ੍ਞੇਨ ਕਮ੍ਮੇਨ ਚ ਨਿਰਯੇ ਪਚ੍ਚਿਤ੍ਵਾ ਗਯਾਪੋਕ੍ਖਰਣਿਯਾ ਤੀਰੇ ਯਕ੍ਖਯੋਨਿਯਂ ਨਿਬ੍ਬਤ੍ਤੋ. ਸੋ ਤਸ੍ਸ ਕਮ੍ਮਸ੍ਸ ਵਿਪਾਕਾਵਸੇਸੇਨ ਦੁਦ੍ਦਸਿਕੋ ਅਹੋਸਿ, ਸਰੀਰੇ ਚਸ੍ਸ ਸੂਚਿਸਦਿਸਾਨਿ ਲੋਮਾਨਿ ਅਹੇਸੁਂ. ਸੋ ਹਿ ਭਿਂਸਾਪੇਤਬ੍ਬਕੇ ਸਤ੍ਤੇ ਸੂਚੀਹਿ ਵਿਜ੍ਝਨ੍ਤੋ ਵਿਯ ਭਿਂਸਾਪੇਤਿ. ਏਵਂ ਸੋ ਸੂਚਿਸਦਿਸਲੋਮਤ੍ਤਾ ਸੂਚਿਲੋਮੋ ਯਕ੍ਖੋਤ੍ਵੇਵ ਨਾਮਂ ਲਭਿ. ਤੇ ਅਤ੍ਤਨੋ ਗੋਚਰਤ੍ਥਾਯ ਭਵਨਤੋ ਨਿਕ੍ਖਮਿਤ੍ਵਾ ਮੁਹੁਤ੍ਤਂ ਗਨ੍ਤ੍ਵਾ ਗਤਮਗ੍ਗੇਨੇਵ ਨਿਵਤ੍ਤਿਤ੍ਵਾ ਇਤਰਂ ਦਿਸਾਭਾਗਂ ਗਚ੍ਛਨ੍ਤਾ ਭਗਵਤੋ ਅਵਿਦੂਰੇ ਅਤਿਕ੍ਕਮਨ੍ਤਿ.

ਅਥ ਖੋ ਖਰੋਤਿ ਕਸ੍ਮਾ ਤੇ ਏਵਮਾਹਂਸੁ? ਖਰੋ ਸਮਣਕਪ੍ਪਂ ਦਿਸ੍ਵਾ ਆਹ. ਸੂਚਿਲੋਮੋ ਪਨ ‘‘ਯੋ ਭਾਯਤਿ ਨ ਸੋ ਸਮਣੋ, ਸਮਣਪਟਿਰੂਪਕਤ੍ਤਾ ਪਨ ਸਮਣਕੋ ਹੋਤੀ’’ਤਿ ਏਵਂਲਦ੍ਧਿਕੋ. ਤਸ੍ਮਾ ਤਾਦਿਸਂ ਭਗਵਨ੍ਤਂ ਮਞ੍ਞਮਾਨੋ ‘‘ਨੇਸੋ ਸਮਣੋ, ਸਮਣਕੋ ਏਸੋ’’ਤਿ ਸਹਸਾਵ ਵਤ੍ਵਾਪਿ ਪੁਨ ਵੀਮਂਸਿਤੁਕਾਮੋ ਆਹ – ‘‘ਯਾਵਾਹਂ ਜਾਨਾਮੀ’’ਤਿ. ‘‘ਅਥ ਖੋ’’ਤਿ ਏਵਂ ਵਤ੍ਵਾ ਤਤੋ. ਸੂਚਿਲੋਮੋ ਯਕ੍ਖੋਤਿ ਇਤੋ ਪਭੁਤਿ ਯਾਵ ਅਪਿਚ ਖੋ ਤੇ ਸਮ੍ਫਸ੍ਸੋ ਪਾਪਕੋਤਿ, ਤਾਵ ਉਤ੍ਤਾਨਤ੍ਥਮੇਵ ਕੇਵਲਞ੍ਚੇਤ੍ਥ ਭਗਵਤੋ ਕਾਯਨ੍ਤਿ ਅਤ੍ਤਨੋ ਕਾਯਂ ਭਗਵਤੋ ਉਪਨਾਮੇਸੀਤਿ ਏਵਂ ਸਮ੍ਬਨ੍ਧੋ ਵੇਦਿਤਬ੍ਬੋ.

ਤਤੋ ਅਭਾਯਨ੍ਤਂ ਭਗਵਨ੍ਤਂ ਦਿਸ੍ਵਾ ‘‘ਪਞ੍ਹਂ ਤਂ ਸਮਣਾ’’ਤਿਆਦਿਮਾਹ. ਕਿਂ ਕਾਰਣਾ? ਸੋ ਹਿ ਚਿਨ੍ਤੇਸਿ – ‘‘ਇਮਿਨਾਪਿ ਨਾਮ ਮੇ ਏਵਂ ਖਰੇਨ ਅਮਨੁਸ੍ਸਸਮ੍ਫਸ੍ਸੇਨ ਮਨੁਸ੍ਸੋ ਸਮਾਨੋ ਅਯਂ ਨ ਭਾਯਤਿ, ਹਨ੍ਦਾਹਂ ਏਤਂ ਬੁਦ੍ਧਵਿਸਯੇ ਪਞ੍ਹਂ ਪੁਚ੍ਛਾਮਿ, ਅਦ੍ਧਾ ਅਯਂ ਤਤ੍ਥ ਨ ਸਮ੍ਪਾਯਿਸ੍ਸਤਿ, ਤਤੋ ਨਂ ਏਵਂ ਵਿਹੇਠੇਸ੍ਸਾਮੀ’’ਤਿ. ਭਗਵਾ ਤਂ ਸੁਤ੍ਵਾ ‘‘ਨ ਖ੍ਵਾਹਂ ਤਂ ਆਵੁਸੋ’’ਤਿਆਦਿਮਾਹ. ਤਂ ਸਬ੍ਬਂ ਆਲ਼ਵਕਸੁਤ੍ਤੇ ਵੁਤ੍ਤਨਯੇਨੇਵ ਸਬ੍ਬਾਕਾਰੇਹਿ ਵੇਦਿਤਬ੍ਬਂ.

੨੭੩. ਅਥ ਖੋ ਸੂਚਿਲੋਮੋ ਯਕ੍ਖੋ ਭਗਵਨ੍ਤਂ ਗਾਥਾਯ ਅਜ੍ਝਭਾਸਿ ‘‘ਰਾਗੋ ਚ ਦੋਸੋ ਚਾ’’ਤਿ. ਤਤ੍ਥ ਰਾਗਦੋਸਾ ਵੁਤ੍ਤਨਯਾ ਏਵ. ਕੁਤੋਨਿਦਾਨਾਤਿ ਕਿਂਨਿਦਾਨਾ ਕਿਂਹੇਤੁਕਾ. ਕੁਤੋਤਿ ਪਚ੍ਚਤ੍ਤਵਚਨਸ੍ਸ ਤੋ-ਆਦੇਸੋ ਵੇਦਿਤਬ੍ਬੋ, ਸਮਾਸੇ ਚਸ੍ਸ ਲੋਪਾਭਾਵੋ. ਅਥ ਵਾ ਨਿਦਾਨਾਤਿ ਜਾਤਾ ਉਪ੍ਪਨ੍ਨਾਤਿ ਅਤ੍ਥੋ, ਤਸ੍ਮਾ ਕੁਤੋਨਿਦਾਨਾ, ਕੁਤੋਜਾਤਾ, ਕੁਤੋਉਪ੍ਪਨ੍ਨਾਤਿ ਵੁਤ੍ਤਂ ਹੋਤਿ. ਅਰਤੀ ਰਤੀ ਲੋਮਹਂਸੋ ਕੁਤੋਜਾਤਿ ਯਾਯਂ ‘‘ਪਨ੍ਤੇਸੁ ਵਾ ਸੇਨਾਸਨੇਸੁ ਅਞ੍ਞਤਰਞ੍ਞਤਰੇਸੁ ਵਾ ਅਧਿਕੁਸਲੇਸੁ ਧਮ੍ਮੇਸੁ ਅਰਤਿ ਅਰਤਿਤਾ ਅਨਭਿਰਤਿ ਅਨਭਿਰਮਣਾ ਉਕ੍ਕਣ੍ਠਿਤਾ ਪਰਿਤਸ੍ਸਿਤਾ’’ਤਿ (ਵਿਭ. ੮੫੬) ਏਵਂ ਵਿਭਤ੍ਤਾ ਅਰਤਿ, ਯਾ ਚ ਪਞ੍ਚਸੁ ਕਾਮਗੁਣੇਸੁ ਰਤਿ, ਯੋ ਚ ਲੋਮਹਂਸਸਮੁਟ੍ਠਾਪਨਤੋ ‘‘ਲੋਮਹਂਸੋ’’ਤ੍ਵੇਵ ਸਙ੍ਖ੍ਯਂ ਗਤੋ ਚਿਤ੍ਤੁਤ੍ਰਾਸੋ. ਇਮੇ ਤਯੋ ਧਮ੍ਮਾ ਕੁਤੋਜਾ ਕੁਤੋਜਾਤਾਤਿ ਪੁਚ੍ਛਤਿ. ਕੁਤੋ ਸਮੁਟ੍ਠਾਯਾਤਿ ਕੁਤੋ ਉਪ੍ਪਜ੍ਜਿਤ੍ਵਾ. ਮਨੋਤਿ ਕੁਸਲਚਿਤ੍ਤਂ, ਵਿਤਕ੍ਕਾਤਿ ਉਰਗਸੁਤ੍ਤੇ ਵੁਤ੍ਤਾ ਨਵ ਕਾਮਵਿਤਕ੍ਕਾਦਯੋ. ਕੁਮਾਰਕਾ ਧਙ੍ਕਮਿਵੋਸ੍ਸਜਨ੍ਤੀਤਿ ਯਥਾ ਗਾਮਦਾਰਕਾ ਕੀਲ਼ਨ੍ਤਾ ਕਾਕਂ ਸੁਤ੍ਤੇਨ ਪਾਦੇ ਬਨ੍ਧਿਤ੍ਵਾ ਓਸ੍ਸਜਨ੍ਤਿ ਖਿਪਨ੍ਤਿ, ਏਵਂ ਕੁਸਲਮਨਂ ਅਕੁਸਲਵਿਤਕ੍ਕਾ ਕੁਤੋ ਸਮੁਟ੍ਠਾਯ ਓਸ੍ਸਜਨ੍ਤੀਤਿ ਪੁਚ੍ਛਤਿ.

੨੭੪. ਅਥਸ੍ਸ ਭਗਵਾ ਤੇ ਪਞ੍ਹੇ ਵਿਸ੍ਸਜ੍ਜੇਨ੍ਤੋ ‘‘ਰਾਗੋ ਚਾ’’ਤਿ ਦੁਤਿਯਗਾਥਮਭਾਸਿ. ਤਤ੍ਥ ਇਤੋਤਿ ਅਤ੍ਤਭਾਵਂ ਸਨ੍ਧਾਯਾਹ. ਅਤ੍ਤਭਾਵਨਿਦਾਨਾ ਹਿ ਰਾਗਦੋਸਾ. ਅਰਤਿਰਤਿਲੋਮਹਂਸਾ ਚ ਅਤ੍ਤਭਾਵਤੋ ਜਾਤਾ, ਕਾਮਵਿਤਕ੍ਕਾਦਿਅਕੁਸਲਵਿਤਕ੍ਕਾ ਚ ਅਤ੍ਤਭਾਵਤੋਯੇਵ ਸਮੁਟ੍ਠਾਯ ਕੁਸਲਮਨੋ ਓਸ੍ਸਜਨ੍ਤਿ, ਤੇਨ ਤਦਞ੍ਞਂ ਪਕਤਿਆਦਿਕਾਰਣਂ ਪਟਿਕ੍ਖਿਪਨ੍ਤੋ ਆਹ – ‘‘ਇਤੋਨਿਦਾਨਾ ਇਤੋਜਾ ਇਤੋ ਸਮੁਟ੍ਠਾਯਾ’’ਤਿ. ਸਦ੍ਦਸਿਦ੍ਧਿ ਚੇਤ੍ਥ ਪੁਰਿਮਗਾਥਾਯ ਵੁਤ੍ਤਨਯੇਨੇਵ ਵੇਦਿਤਬ੍ਬਾ.

੨੭੫-੬. ਏਵਂ ਤੇ ਪਞ੍ਹੇ ਵਿਸ੍ਸਜ੍ਜੇਤ੍ਵਾ ਇਦਾਨਿ ਯ੍ਵਾਯਂ ‘‘ਇਤੋਨਿਦਾਨਾ’’ਤਿਆਦੀਸੁ ‘‘ਅਤ੍ਤਭਾਵਨਿਦਾਨਾ ਅਤ੍ਤਭਾਵਤੋ ਜਾਤਾ ਅਤ੍ਤਭਾਵਤੋ ਸਮੁਟ੍ਠਾਯਾ’’ਤਿ ਅਤ੍ਥੋ ਵੁਤ੍ਤੋ, ਤਂ ਸਾਧੇਨ੍ਤੋ ਆਹ – ‘‘ਸ੍ਨੇਹਜਾ ਅਤ੍ਤਸਮ੍ਭੂਤਾ’’ਤਿ. ਏਤੇ ਹਿ ਸਬ੍ਬੇਪਿ ਰਾਗਾਦਯੋ ਵਿਤਕ੍ਕਪਰਿਯੋਸਾਨਾ ਤਣ੍ਹਾਸ੍ਨੇਹੇਨ ਜਾਤਾ, ਤਥਾ ਜਾਯਨ੍ਤਾ ਚ ਪਞ੍ਚੁਪਾਦਾਨਕ੍ਖਨ੍ਧਭੇਦੇ ਅਤ੍ਤਭਾਵਪਰਿਯਾਯੇ ਅਤ੍ਤਨਿ ਸਮ੍ਭੂਤਾ. ਤੇਨਾਹ – ‘‘ਸ੍ਨੇਹਜਾ ਅਤ੍ਤਸਮ੍ਭੂਤਾ’’ਤਿ. ਇਦਾਨਿ ਤਦਤ੍ਥਜੋਤਿਕਂ ਉਪਮਂ ਕਰੋਤਿ ‘‘ਨਿਗ੍ਰੋਧਸ੍ਸੇਵ ਖਨ੍ਧਜਾ’’ਤਿ. ਤਤ੍ਥ ਖਨ੍ਧੇਸੁ ਜਾਤਾ ਖਨ੍ਧਜਾ, ਪਾਰੋਹਾਨਮੇਤਂ ਅਧਿਵਚਨਂ. ਕਿਂ ਵੁਤ੍ਤਂ ਹੋਤਿ? ਯਥਾ ਨਿਗ੍ਰੋਧਸ੍ਸ ਖਨ੍ਧਜਾ ਨਾਮ ਪਾਰੋਹਾ ਆਪੋਰਸਸਿਨੇਹੇ ਸਤਿ ਜਾਯਨ੍ਤਿ, ਜਾਯਨ੍ਤਾ ਚ ਤਸ੍ਮਿਂਯੇਵ ਨਿਗ੍ਰੋਧੇ ਤੇਸੁ ਤੇਸੁ ਸਾਖਪ੍ਪਭੇਦੇਸੁ ਸਮ੍ਭਵਨ੍ਤਿ, ਏਵਮੇਤੇਪਿ ਰਾਗਾਦਯੋ ਅਜ੍ਝਤ੍ਤਤਣ੍ਹਾਸ੍ਨੇਹੇ ਸਤਿ ਜਾਯਨ੍ਤਿ, ਜਾਯਨ੍ਤਾ ਚ ਤਸ੍ਮਿਂਯੇਵ ਅਤ੍ਤਭਾਵੇ ਤੇਸੁ ਤੇਸੁ ਚਕ੍ਖਾਦਿਭੇਦੇਸੁ ਦ੍ਵਾਰਾਰਮ੍ਮਣਵਤ੍ਥੂਸੁ ਸਮ੍ਭਵਨ੍ਤਿ. ਤਸ੍ਮਾ ਵੇਦਿਤਬ੍ਬਮੇਤਂ ‘‘ਅਤ੍ਤਭਾਵਨਿਦਾਨਾ ਅਤ੍ਤਭਾਵਜਾ ਅਤ੍ਤਭਾਵਸਮੁਟ੍ਠਾਨਾ ਚ ਏਤੇ’’ਤਿ.

ਅਵਸੇਸਦਿਯਡ੍ਢਗਾਥਾਯ ਪਨ ਅਯਂ ਸਬ੍ਬਸਙ੍ਗਾਹਿਕਾ ਅਤ੍ਥਵਣ੍ਣਨਾ – ਏਵਂ ਅਤ੍ਤਸਮ੍ਭੂਤਾ ਚ ਏਤੇ ਪੁਥੂ ਵਿਸਤ੍ਤਾ ਕਾਮੇਸੁ. ਰਾਗੋਪਿ ਹਿ ਪਞ੍ਚਕਾਮਗੁਣਿਕਾਦਿਵਸੇਨ, ਦੋਸੋਪਿ ਆਘਾਤਵਤ੍ਥਾਦਿਵਸੇਨ, ਅਰਤਿਆਦਯੋਪਿ ਤਸ੍ਸ ਤਸ੍ਸੇਵ ਭੇਦਸ੍ਸ ਵਸੇਨਾਤਿ ਸਬ੍ਬਥਾ ਸਬ੍ਬੇਪਿਮੇ ਕਿਲੇਸਾ ਪੁਥੂ ਅਨੇਕਪ੍ਪਕਾਰਾ ਹੁਤ੍ਵਾ ਵਤ੍ਥੁਦ੍ਵਾਰਾਰਮ੍ਮਣਾਦਿਵਸੇਨ ਤੇਸੁ ਤੇਸੁ ਵਤ੍ਥੁਕਾਮੇਸੁ ਤਥਾ ਤਥਾ ਵਿਸਤ੍ਤਾ ਲਗ੍ਗਾ ਲਗ੍ਗਿਤਾ ਸਂਸਿਬ੍ਬਿਤ੍ਵਾ ਠਿਤਾ. ਕਿਮਿਵ? ਮਾਲੁਵਾਵ ਵਿਤਤਾ ਵਨੇ, ਯਥਾ ਵਨੇ ਵਿਤਤਾ ਮਾਲੁਵਾ ਤੇਸੁ ਤੇਸੁ ਰੁਕ੍ਖਸ੍ਸ ਸਾਖਪਸਾਖਾਦਿਭੇਦੇਸੁ ਵਿਸਤ੍ਤਾ ਹੋਤਿ ਲਗ੍ਗਾ ਲਗ੍ਗਿਤਾ ਸਂਸਿਬ੍ਬਿਤ੍ਵਾ ਠਿਤਾ, ਏਵਂ ਪੁਥੁਪ੍ਪਭੇਦੇਸੁ ਵਤ੍ਥੁਕਾਮੇਸੁ ਵਿਸਤ੍ਤਂ ਕਿਲੇਸਗਣਂ ਯੇ ਨਂ ਪਜਾਨਨ੍ਤਿ ਯਤੋਨਿਦਾਨਂ, ਤੇ ਨਂ ਵਿਨੋਦੇਨ੍ਤਿ ਸੁਣੋਹਿ ਯਕ੍ਖ.

ਤਤ੍ਥ ਯਤੋਨਿਦਾਨਨ੍ਤਿ ਭਾਵਨਪੁਂਸਕਨਿਦ੍ਦੇਸੋ, ਤੇਨ ਕਿਂ ਦੀਪੇਤਿ? ਯੇ ਸਤ੍ਤਾ ਨਂ ਕਿਲੇਸਗਣਂ ‘‘ਯਤੋਨਿਦਾਨਂ ਉਪ੍ਪਜ੍ਜਤੀ’’ਤਿ ਏਵਂ ਜਾਨਨ੍ਤਿ, ਤੇ ਨਂ ‘‘ਤਣ੍ਹਾਸ੍ਨੇਹਸ੍ਨੇਹਿਤੇ ਅਤ੍ਤਭਾਵੇ ਉਪ੍ਪਜ੍ਜਤੀ’’ਤਿ ਞਤ੍ਵਾ ਤਂ ਤਣ੍ਹਾਸ੍ਨੇਹਂ ਆਦੀਨਵਾਨੁਪਸ੍ਸਨਾਦਿਭਾਵਨਾਞਾਣਗ੍ਗਿਨਾ ਵਿਸੋਸੇਨ੍ਤਾ ਵਿਨੋਦੇਨ੍ਤਿ ਪਜਹਨ੍ਤਿ ਬ੍ਯਨ੍ਤੀਕਰੋਨ੍ਤਿ ਚ, ਏਤਂ ਅਮ੍ਹਾਕਂ ਸੁਭਾਸਿਤਂ ਸੁਣੋਹਿ ਯਕ੍ਖਾਤਿ. ਏਵਮੇਤ੍ਥ ਅਤ੍ਤਭਾਵਜਾਨਨੇਨ ਦੁਕ੍ਖਪਰਿਞ੍ਞਂ ਤਣ੍ਹਾਸ੍ਨੇਹਰਾਗਾਦਿਕਿਲੇਸਗਣਵਿਨੋਦਨੇਨ ਸਮੁਦਯਪ੍ਪਹਾਨਞ੍ਚ ਦੀਪੇਤਿ.

ਯੇ ਚ ਨਂ ਵਿਨੋਦੇਨ੍ਤਿ, ਤੇ ਦੁਤ੍ਤਰਂ ਓਘਮਿਮਂ ਤਰਨ੍ਤਿ ਅਤਿਣ੍ਣਪੁਬ੍ਬਂ ਅਪੁਨਬ੍ਭਵਾਯ. ਏਤੇਨ ਮਗ੍ਗਭਾਵਨਂ ਨਿਰੋਧਸਚ੍ਛਿਕਿਰਿਯਞ੍ਚ ਦੀਪੇਤਿ. ਯੇ ਹਿ ਨਂ ਕਿਲੇਸਗਣਂ ਵਿਨੋਦੇਨ੍ਤਿ, ਤੇ ਅਵਸ੍ਸਂ ਮਗ੍ਗਂ ਭਾਵੇਨ੍ਤਿ. ਨ ਹਿ ਮਗ੍ਗਭਾਵਨਂ ਵਿਨਾ ਕਿਲੇਸਵਿਨੋਦਨਂ ਅਤ੍ਥਿ. ਯੇ ਚ ਮਗ੍ਗਂ ਭਾਵੇਨ੍ਤਿ, ਤੇ ਦੁਤ੍ਤਰਂ ਪਕਤਿਞਾਣੇਨ ਕਾਮੋਘਾਦਿਂ ਚਤੁਬ੍ਬਿਧਮ੍ਪਿ ਓਘਮਿਮਂ ਤਰਨ੍ਤਿ. ਮਗ੍ਗਭਾਵਨਾ ਹਿ ਓਘਤਰਣਂ. ਅਤਿਣ੍ਣਪੁਬ੍ਬਨ੍ਤਿ ਇਮਿਨਾ ਦੀਘੇਨ ਅਦ੍ਧੁਨਾ ਸੁਪਿਨਨ੍ਤੇਨਪਿ ਅਵੀਤਿਕ੍ਕਨ੍ਤਪੁਬ੍ਬਂ. ਅਪੁਨਬ੍ਭਵਾਯਾਤਿ ਨਿਬ੍ਬਾਨਾਯ. ਏਵਮਿਮਂ ਚਤੁਸਚ੍ਚਦੀਪਿਕਂ ਗਾਥਂ ਸੁਣਨ੍ਤਾ ‘‘ਸੁਤ੍ਵਾ ਧਮ੍ਮਂ ਧਾਰੇਨ੍ਤਿ, ਧਤਾਨਂ ਧਮ੍ਮਾਨਂ ਅਤ੍ਥਮੁਪਪਰਿਕ੍ਖਨ੍ਤੀ’’ਤਿਆਦਿਕਂ ਕਥਂ ਸੁਭਾਵਿਨਿਯਾ ਪਞ੍ਞਾਯ ਅਨੁਕ੍ਕਮਮਾਨਾ ਤੇ ਦ੍ਵੇਪਿ ਸਹਾਯਕਾ ਯਕ੍ਖਾ ਗਾਥਾਪਰਿਯੋਸਾਨੇਯੇਵ ਸੋਤਾਪਤ੍ਤਿਫਲੇ ਪਤਿਟ੍ਠਹਿਂਸੁ, ਪਾਸਾਦਿਕਾ ਚ ਅਹੇਸੁਂ ਸੁਵਣ੍ਣਵਣ੍ਣਾ ਦਿਬ੍ਬਾਲਙ੍ਕਾਰਵਿਭੂਸਿਤਾਤਿ.

ਪਰਮਤ੍ਥਜੋਤਿਕਾਯ ਖੁਦ੍ਦਕ-ਅਟ੍ਠਕਥਾਯ

ਸੁਤ੍ਤਨਿਪਾਤ-ਅਟ੍ਠਕਥਾਯ ਸੂਚਿਲੋਮਸੁਤ੍ਤਵਣ੍ਣਨਾ ਨਿਟ੍ਠਿਤਾ.