੭. ਰਾਜਪੁਤ੍ਤਪੇਤਵਤ੍ਥੁਵਣ੍ਣਨਾ

ਪੁਬ੍ਬੇ ਕਤਾਨਂ ਕਮ੍ਮਾਨਨ੍ਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਰਾਜਪੁਤ੍ਤਪੇਤਂ ਆਰਬ੍ਭ ਕਥੇਸਿ. ਤਤ੍ਥ ਯੋ ਸੋ ਅਤੀਤੇ ਕਿਤਵਸ੍ਸ ਨਾਮ ਰਞ੍ਞੋ ਪੁਤ੍ਤੋ ਅਤੀਤੇ ਪਚ੍ਚੇਕਬੁਦ੍ਧੇ ਅਪਰਜ੍ਝਿਤ੍ਵਾ ਬਹੂਨਿ ਵਸ੍ਸਸਹਸ੍ਸਾਨਿ ਨਿਰਯੇ ਪਚ੍ਚਿਤ੍ਵਾ ਤਸ੍ਸੇਵ ਕਮ੍ਮਸ੍ਸ ਵਿਪਾਕਾਵਸੇਸੇਨ ਪੇਤੇਸੁ ਉਪ੍ਪਨ੍ਨੋ. ਸੋ ਇਧ ‘‘ਰਾਜਪੁਤ੍ਤਪੇਤੋ’’ਤਿ ਅਧਿਪ੍ਪੇਤੋ. ਤਸ੍ਸ ਵਤ੍ਥੁ ਹੇਟ੍ਠਾ ਸਾਣਵਾਸਿਪੇਤਵਤ੍ਥੁਮ੍ਹਿ ਵਿਤ੍ਥਾਰਤੋ ਆਗਤਮੇਵ, ਤਸ੍ਮਾ ਤਤ੍ਥ ਵੁਤ੍ਤਨਯੇਨੇਵ ਗਹੇਤਬ੍ਬਂ. ਸਤ੍ਥਾ ਹਿ ਤਦਾ ਥੇਰੇਨ ਅਤ੍ਤਨੋ ਞਾਤਿਪੇਤਾਨਂ ਪਵਤ੍ਤਿਯਾ ਕਥਿਤਾਯ ‘‘ਨ ਕੇਵਲਂ ਤਵ ਞਾਤਕਾਯੇਵ, ਅਥ ਖੋ ਤ੍ਵਮ੍ਪਿ ਇਤੋ ਅਨਨ੍ਤਰਾਤੀਤੇ ਅਤ੍ਤਭਾਵੇ ਪੇਤੋ ਹੁਤ੍ਵਾ ਮਹਾਦੁਕ੍ਖਂ ਅਨੁਭਵੀ’’ਤਿ ਵਤ੍ਵਾ ਤੇਨ ਯਾਚਿਤੋ –

੭੫੩. ‘‘ਪੁਬ੍ਬੇ ਕਤਾਨਂ ਕਮ੍ਮਾਨਂ, ਵਿਪਾਕੋ ਮਥਯੇ ਮਨਂ;

ਰੂਪੇ ਸਦ੍ਦੇ ਰਸੇ ਗਨ੍ਧੇ, ਫੋਟ੍ਠਬ੍ਬੇ ਚ ਮਨੋਰਮੇ.

੭੫੪. ‘‘ਇਚ੍ਚਂ ਗੀਤਂ ਰਤਿਂ ਖਿਡ੍ਡਂ, ਅਨੁਭੁਤ੍ਵਾ ਅਨਪ੍ਪਕਂ;

ਉਯ੍ਯਾਨੇ ਪਰਿਚਰਿਤ੍ਵਾ, ਪਵਿਸਨ੍ਤੋ ਗਿਰਿਬ੍ਬਜਂ.

੭੫੫. ‘‘ਇਸਿਂ ਸੁਨੇਤ੍ਤਮਦ੍ਦਕ੍ਖਿ, ਅਤ੍ਤਦਨ੍ਤਂ ਸਮਾਹਿਤਂ;

ਅਪ੍ਪਿਚ੍ਛਂ ਹਿਰਿਸਮ੍ਪਨ੍ਨਂ, ਉਞ੍ਛੇ ਪਤ੍ਤਗਤੇ ਰਤਂ.

੭੫੬. ‘‘ਹਤ੍ਥਿਕ੍ਖਨ੍ਧਤੋ ਓਰੁਯ੍ਹ, ਲਦ੍ਧਾ ਭਨ੍ਤੇਤਿ ਚਾਬ੍ਰਵਿ;

ਤਸ੍ਸ ਪਤ੍ਤਂ ਗਹੇਤ੍ਵਾਨ, ਉਚ੍ਚਂ ਪਗ੍ਗਯ੍ਹ ਖਤ੍ਤਿਯੋ.

੭੫੭. ‘‘ਥਣ੍ਡਿਲੇ ਪਤ੍ਤਂ ਭਿਨ੍ਦਿਤ੍ਵਾ, ਹਸਮਾਨੋ ਅਪਕ੍ਕਮਿ;

ਰਞ੍ਞੋ ਕਿਤਵਸ੍ਸਾਹਂ ਪੁਤ੍ਤੋ, ਕਿਂ ਮਂ ਭਿਕ੍ਖੁ ਕਰਿਸ੍ਸਸਿ.

੭੫੮. ‘‘ਤਸ੍ਸ ਕਮ੍ਮਸ੍ਸ ਫਰੁਸਸ੍ਸ, ਵਿਪਾਕੋ ਕਟੁਕੋ ਅਹੁ;

ਯਂ ਰਾਜਪੁਤ੍ਤੋ ਵੇਦੇਸਿ, ਨਿਰਯਮ੍ਹਿ ਸਮਪ੍ਪਿਤੋ.

੭੫੯. ‘‘ਛਲ਼ੇਵ ਚਤੁਰਾਸੀਤਿ, ਵਸ੍ਸਾਨਿ ਨਹੁਤਾਨਿ ਚ;

ਭੁਸਂ ਦੁਕ੍ਖਂ ਨਿਗਚ੍ਛਿਤ੍ਥੋ, ਨਿਰਯੇ ਕਤਕਿਬ੍ਬਿਸੋ.

੭੬੦. ‘‘ਉਤ੍ਤਾਨੋਪਿ ਚ ਪਚ੍ਚਿਤ੍ਥ, ਨਿਕੁਜ੍ਜੋ ਵਾਮਦਕ੍ਖਿਣੋ;

ਉਦ੍ਧਂਪਾਦੋ ਠਿਤੋ ਚੇਵ, ਚਿਰਂ ਬਾਲੋ ਅਪਚ੍ਚਥ.

੭੬੧. ‘‘ਬਹੂਨਿ ਵਸ੍ਸਸਹਸ੍ਸਾਨਿ, ਪੂਗਾਨਿ ਨਹੁਤਾਨਿ ਚ;

ਭੁਸਂ ਦੁਕ੍ਖਂ ਨਿਗਚ੍ਛਿਤ੍ਥੋ, ਨਿਰਯੇ ਕਤਕਿਬ੍ਬਿਸੋ.

੭੬੨. ‘‘ਏਤਾਦਿਸਂ ਖੋ ਕਟੁਕਂ, ਅਪ੍ਪਦੁਟ੍ਠਪ੍ਪਦੋਸਿਨਂ;

ਪਚ੍ਚਨ੍ਤਿ ਪਾਪਕਮ੍ਮਨ੍ਤਾ, ਇਸਿਮਾਸਜ੍ਜ ਸੁਬ੍ਬਤਂ.

੭੬੩. ‘‘ਸੋ ਤਤ੍ਥ ਬਹੁਵਸ੍ਸਾਨਿ, ਵੇਦਯਿਤ੍ਵਾ ਬਹੁਂ ਦੁਖਂ;

ਖੁਪ੍ਪਿਪਾਸਹਤੋ ਨਾਮ, ਪੇਤੋ ਆਸਿ ਤਤੋ ਚੁਤੋ.

੭੬੪. ‘‘ਏਤਮਾਦੀਨਵਂ ਞਤ੍ਵਾ, ਇਸ੍ਸਰਮਦਸਮ੍ਭਵਂ;

ਪਹਾਯ ਇਸ੍ਸਰਮਦਂ, ਨਿਵਾਤਮਨੁਵਤ੍ਤਯੇ.

੭੬੫. ‘‘ਦਿਟ੍ਠੇਵ ਧਮ੍ਮੇ ਪਾਸਂਸੋ, ਯੋ ਬੁਦ੍ਧੇਸੁ ਸਗਾਰਵੋ;

ਕਾਯਸ੍ਸ ਭੇਦਾ ਸਪ੍ਪਞ੍ਞੋ, ਸਗ੍ਗਂ ਸੋ ਉਪਪਜ੍ਜਤੀ’’ਤਿ. –

ਇਦਂ ਪੇਤਵਤ੍ਥੁਂ ਕਥੇਸਿ.

੭੫੩. ਤਤ੍ਥ ਪੁਬ੍ਬੇ ਕਤਾਨਂ ਕਮ੍ਮਾਨਂ, ਵਿਪਾਕੋ ਮਥਯੇ ਮਨਨ੍ਤਿ ਪੁਰਿਮਾਸੁ ਜਾਤੀਸੁ ਕਤਾਨਂ ਅਕੁਸਲਕਮ੍ਮਾਨਂ ਫਲਂ ਉਲ਼ਾਰਂ ਹੁਤ੍ਵਾ ਉਪ੍ਪਜ੍ਜਮਾਨਂ ਅਨ੍ਧਬਾਲਾਨਂ ਚਿਤ੍ਤਂ ਮਥਯੇਯ੍ਯ ਅਭਿਭਵੇਯ੍ਯ, ਪਰੇਸਂ ਅਨਤ੍ਥਕਰਣਮੁਖੇਨ ਅਤ੍ਤਨੋ ਅਤ੍ਥਂ ਉਪ੍ਪਾਦੇਯ੍ਯਾਤਿ ਅਧਿਪ੍ਪਾਯੋ.

ਇਦਾਨਿ ਤਂ ਚਿਤ੍ਤਮਥਨਂ ਵਿਸਯੇਨ ਸਦ੍ਧਿਂ ਦਸ੍ਸੇਤੁਂ ‘‘ਰੂਪੇ ਸਦ੍ਦੇ’’ਤਿਆਦਿ ਵੁਤ੍ਤਂ. ਤਤ੍ਥ ਰੂਪੇਤਿ ਰੂਪਹੇਤੁ, ਯਥਿਚ੍ਛਿਤਸ੍ਸ ਮਨਾਪਿਯਸ੍ਸ ਰੂਪਾਰਮ੍ਮਣਸ੍ਸ ਪਟਿਲਾਭਨਿਮਿਤ੍ਤਨ੍ਤਿ ਅਤ੍ਥੋ. ਸਦ੍ਦੇਤਿਆਦੀਸੁਪਿ ਏਸੇਵ ਨਯੋ.

੭੫੪. ਏਵਂ ਸਾਧਾਰਣਤੋ ਵੁਤ੍ਤਮਤ੍ਥਂ ਅਸਾਧਾਰਣਤੋ ਨਿਯਮੇਤ੍ਵਾ ਦਸ੍ਸੇਨ੍ਤੋ ‘‘ਨਚ੍ਚਂ ਗੀਤ’’ਨ੍ਤਿਆਦਿਮਾਹ. ਤਤ੍ਥ ਰਤਿਨ੍ਤਿ ਕਾਮਰਤਿਂ. ਖਿਡ੍ਡਨ੍ਤਿ ਸਹਾਯਕਾਦੀਹਿ ਕੇਲ਼ਿਂ. ਗਿਰਿਬ੍ਬਜਨ੍ਤਿ ਰਾਜਗਹਂ.

੭੫੫. ਇਸਿਨ੍ਤਿ ਅਸੇਕ੍ਖਾਨਂ ਸੀਲਕ੍ਖਨ੍ਧਾਦੀਨਂ ਏਸਨਟ੍ਠੇਨ ਇਸਿਂ. ਸੁਨੇਤ੍ਤਨ੍ਤਿ ਏਵਂਨਾਮਕਂ ਪਚ੍ਚੇਕਬੁਦ੍ਧਂ. ਅਤ੍ਤਦਨ੍ਤਨ੍ਤਿ ਉਤ੍ਤਮੇਨ ਦਮਥੇਨ ਦਮਿਤਚਿਤ੍ਤਂ. ਸਮਾਹਿਤਨ੍ਤਿ ਅਰਹਤ੍ਤਫਲਸਮਾਧਿਨਾ ਸਮਾਹਿਤਂ. ਉਞ੍ਛੇ ਪਤ੍ਤਗਤੇ ਰਤਨ੍ਤਿ ਉਞ੍ਛੇਨ ਭਿਕ੍ਖਾਚਾਰੇਨ ਲਦ੍ਧੇ ਪਤ੍ਤਗਤੇ ਪਤ੍ਤਪਰਿਯਾਪਨ੍ਨੇ ਆਹਾਰੇ ਰਤਂ ਸਨ੍ਤੁਟ੍ਠਂ.

੭੫੬. ਲਦ੍ਧਾ, ਭਨ੍ਤੇਤਿ ਚਾਬ੍ਰਵੀਤਿ ‘‘ਅਪਿ, ਭਨ੍ਤੇ, ਭਿਕ੍ਖਾ ਲਦ੍ਧਾ’’ਤਿ ਵਿਸ੍ਸਾਸਜਨਨਤ੍ਥਂ ਕਥੇਸਿ. ਉਚ੍ਚਂ ਪਗ੍ਗਯ੍ਹਾਤਿ ਉਚ੍ਚਤਰਂ ਕਤ੍ਵਾ ਪਤ੍ਤਂ ਉਕ੍ਖਿਪਿਤ੍ਵਾ.

੭੫੭. ਥਣ੍ਡਿਲੇ ਪਤ੍ਤਂ ਭਿਨ੍ਦਿਤ੍ਵਾਤਿ ਖਰਕਠਿਨੇ ਭੂਮਿਪ੍ਪਦੇਸੇ ਖਿਪਨ੍ਤੋ ਪਤ੍ਤਂ ਭਿਨ੍ਦਿਤ੍ਵਾ. ਅਪਕ੍ਕਮੀਤਿ ਥੋਕਂ ਅਪਸਕ੍ਕਿ. ਅਪਸਕ੍ਕਨ੍ਤੋ ਚ ‘‘ਅਕਾਰਣੇਨੇਵ ਅਨ੍ਧਬਾਲੋ ਮਹਨ੍ਤਂ ਅਨਤ੍ਥਂ ਅਤ੍ਤਨੋ ਅਕਾਸੀ’’ਤਿ ਕਰੁਣਾਯਨਵਸੇਨ ਓਲੋਕੇਨ੍ਤਂ ਪਚ੍ਚੇਕਬੁਦ੍ਧਂ ਰਾਜਪੁਤ੍ਤੋ ਆਹ ‘‘ਰਞ੍ਞੋ ਕਿਤਵਸ੍ਸਾਹਂ ਪੁਤ੍ਤੋ, ਕਿਂ ਮਂ ਭਿਕ੍ਖੁ ਕਰਿਸ੍ਸਸੀ’’ਤਿ.

੭੫੮. ਫਰੁਸਸ੍ਸਾਤਿ ਦਾਰੁਣਸ੍ਸ. ਕਟੁਕੋਤਿ ਅਨਿਟ੍ਠੋ. ਯਨ੍ਤਿ ਯਂ ਵਿਪਾਕਂ. ਸਮਪ੍ਪਿਤੋਤਿ ਅਲ੍ਲੀਨੋ.

੭੫੯. ਛਲ਼ੇਵ ਚਤੁਰਾਸੀਤਿ, ਵਸ੍ਸਾਨਿ ਨਹੁਤਾਨਿ ਚਾਤਿ ਉਤ੍ਤਾਨੋ ਨਿਪਨ੍ਨੋ ਚਤੁਰਾਸੀਤਿਵਸ੍ਸਸਹਸ੍ਸਾਨਿ, ਨਿਕੁਜ੍ਜੋ, ਵਾਮਪਸ੍ਸੇਨ, ਦਕ੍ਖਿਣਪਸ੍ਸੇਨ, ਉਦ੍ਧਂਪਾਦੋ, ਓਲਮ੍ਬਿਕੋ, ਯਥਾਠਿਤੋ ਚਾਤਿ ਏਵਂ ਛ ਚਤੁਰਾਸੀਤਿਸਹਸ੍ਸਾਨਿ ਵਸ੍ਸਾਨਿ ਹੋਨ੍ਤਿ. ਤੇਨਾਹ –

੭੬੦. ‘‘ਉਤ੍ਤਾਨੋਪਿ ਚ ਪਚ੍ਚਿਤ੍ਥ, ਨਿਕੁਜ੍ਜੋ ਵਾਮਦਕ੍ਖਿਣੋ;

ਉਦ੍ਧਂਪਾਦੋ ਠਿਤੋ ਚੇਵ, ਚਿਰਂ ਬਾਲੋ ਅਪਚ੍ਚਥਾ’’ਤਿ.

ਤਾਨਿ ਪਨ ਵਸ੍ਸਾਨਿ ਯਸ੍ਮਾ ਅਨੇਕਾਨਿ ਨਹੁਤਾਨਿ ਹੋਨ੍ਤਿ, ਤਸ੍ਮਾ ਵੁਤ੍ਤਂ ‘‘ਨਹੁਤਾਨੀ’’ਤਿ. ਭੁਸਂ ਦੁਕ੍ਖਂ ਨਿਗਚ੍ਛਿਤ੍ਥੋਤਿ ਅਤਿਵਿਯ ਦੁਕ੍ਖਂ ਪਾਪੁਣਿ.

੭੬੧. ਪੂਗਾਨੀਤਿ ਵਸ੍ਸਸਮੂਹੇ, ਇਧ ਪੁਰਿਮਗਾਥਾਯ ਚ ਅਚ੍ਚਨ੍ਤਸਂਯੋਗੇ ਉਪਯੋਗਵਚਨਂ ਦਟ੍ਠਬ੍ਬਂ.

੭੬੨. ਏਤਾਦਿਸਨ੍ਤਿ ਏਵਰੂਪਂ. ਕਟੁਕਨ੍ਤਿ ਅਤਿਦੁਕ੍ਖਂ, ਭਾਵਨਪਂਸਕਨਿਦ੍ਦੇਸੋਯਂ ‘‘ਏਕਮਨ੍ਤਂ ਨਿਸੀਦੀ’’ਤਿਆਦੀਸੁ ਵਿਯ. ਅਪ੍ਪਦੁਟ੍ਠਪ੍ਪਦੋਸਿਨਂ ਇਸਿਂ ਸੁਬ੍ਬਤਂ ਆਸਜ੍ਜ ਆਸਾਦੇਤ੍ਵਾ ਪਾਪਕਮ੍ਮਨ੍ਤਾ ਪੁਗ੍ਗਲਾ ਏਵਰੂਪਂ ਕਟੁਕਂ ਅਤਿਵਿਯ ਦੁਕ੍ਖਂ ਪਚ੍ਚਨ੍ਤੀਤਿ ਯੋਜਨਾ.

੭੬੩. ਸੋਤਿ ਸੋ ਰਾਜਪੁਤ੍ਤਪੇਤੋ. ਤਤ੍ਥਾਤਿ ਨਿਰਯੇ. ਵੇਦਯਿਤ੍ਵਾਤਿ ਅਨੁਭਵਿਤ੍ਵਾ. ਨਾਮਾਤਿ ਬ੍ਯਤ੍ਤਪਾਕਟਭਾਵੇਨ. ਤਤੋ ਚੁਤੋਤਿ ਨਿਰਯਤੋ ਚੁਤੋ. ਸੇਸਂ ਵੁਤ੍ਤਨਯਮੇਵ.

ਏਵਂ ਭਗਵਾ ਰਾਜਪੁਤ੍ਤਪੇਤਕਥਾਯ ਤਤ੍ਥ ਸਨ੍ਨਿਪਤਿਤਂ ਮਹਾਜਨਂ ਸਂਵੇਜੇਤ੍ਵਾ ਉਪਰਿ ਸਚ੍ਚਾਨਿ ਪਕਾਸੇਸਿ. ਸਚ੍ਚਪਰਿਯੋਸਾਨੇ ਬਹੂ ਸੋਤਾਪਤ੍ਤਿਫਲਾਦੀਨਿ ਸਮ੍ਪਾਪੁਣਿਂਸੂਤਿ.

ਰਾਜਪੁਤ੍ਤਪੇਤਵਤ੍ਥੁਵਣ੍ਣਨਾ ਨਿਟ੍ਠਿਤਾ.