੮. ਗੂਥਖਾਦਕਪੇਤਵਤ੍ਥੁਵਣ੍ਣਨਾ

ਗੂਥਕੂਪਤੋ ਉਗ੍ਗਨ੍ਤ੍ਵਾਤਿ ਇਦਂ ਸਤ੍ਥਰਿ ਜੇਤਵਨੇ ਵਿਹਰਨ੍ਤੇ ਏਕਂ ਗੂਥਖਾਦਕਪੇਤਂ ਆਰਮ੍ਭ ਵੁਤ੍ਤਂ. ਸਾਵਤ੍ਥਿਯਾ ਕਿਰ ਅਵਿਦੂਰੇ ਅਞ੍ਞਤਰਸ੍ਮਿਂ ਗਾਮਕੇ ਏਕੋ ਕੁਟੁਮ੍ਬਿਕੋ ਅਤ੍ਤਨੋ ਕੁਲੂਪਕਂ ਭਿਕ੍ਖੁਂ ਉਦ੍ਦਿਸ੍ਸ ਵਿਹਾਰਂ ਕਾਰੇਸਿ. ਤਤ੍ਥ ਨਾਨਾਜਨਪਦਤੋ ਭਿਕ੍ਖੂ ਆਗਨ੍ਤ੍ਵਾ ਪਟਿਵਸਿਂਸੁ. ਤੇ ਦਿਸ੍ਵਾ ਮਨੁਸ੍ਸਾ ਪਸਨ੍ਨਚਿਤ੍ਤਾ ਪਣੀਤੇਨ ਪਚ੍ਚਯੇਨ ਉਪਟ੍ਠਹਿਂਸੁ. ਕੁਲੂਪਕੋ ਭਿਕ੍ਖੁ ਤਂ ਅਸਹਮਾਨੋ ਇਸ੍ਸਾਪਕਤੋ ਹੁਤ੍ਵਾ ਤੇਸਂ ਭਿਕ੍ਖੂਨਂ ਦੋਸਂ ਵਦਨ੍ਤੋ ਕੁਟੁਮ੍ਬਿਕਂ ਉਜ੍ਝਾਪੇਸਿ. ਕੁਟੁਮ੍ਬਿਕੋ ਤੇ ਭਿਕ੍ਖੂ ਕੁਲੂਪਕਞ੍ਚ ਪਰਿਭਵਨ੍ਤੋ ਪਰਿਭਾਸਿ. ਅਥ ਕੁਲੂਪਕੋ ਕਾਲਂ ਕਤ੍ਵਾ ਤਸ੍ਮਿਂਯੇਵ ਵਿਹਾਰੇ ਵਚ੍ਚਕੁਟਿਯਂ ਪੇਤੋ ਹੁਤ੍ਵਾ ਨਿਬ੍ਬਤ੍ਤਿ, ਕੁਟੁਮ੍ਬਿਕੋ ਪਨ ਕਾਲਂ ਕਤ੍ਵਾ ਤਸ੍ਸੇਵ ਉਪਰਿ ਪੇਤੋ ਹੁਤ੍ਵਾ ਨਿਬ੍ਬਤ੍ਤਿ. ਅਥਾਯਸ੍ਮਾ ਮਹਾਮੋਗ੍ਗਲ੍ਲਾਨੋ ਤਂ ਦਿਸ੍ਵਾ ਪੁਚ੍ਛਨ੍ਤੋ –

੭੬੬. ‘‘ਗੂਥਕੂਪਤੋ ਉਗ੍ਗਨ੍ਤ੍ਵਾ, ਕੋ ਨ ਦੀਨੋ ਪਤਿਟ੍ਠਸਿ;

ਨਿਸ੍ਸਂਸਯਂ ਪਾਪਕਮ੍ਮਨ੍ਤੋ, ਕਿਂ ਨੁ ਸਦ੍ਦਹਸੇ ਤੁਵ’’ਨ੍ਤਿ. –

ਗਾਥਮਾਹ. ਤਂ ਸੁਤ੍ਵਾ ਪੇਤੋ –

੭੬੭. ‘‘ਅਹਂ ਭਦਨ੍ਤੇ ਪੇਤੋਮ੍ਹਿ, ਦੁਗ੍ਗਤੋ ਯਮਲੋਕਿਕੋ;

ਪਾਪਕਮ੍ਮਂ ਕਰਿਤ੍ਵਾਨ, ਪੇਤਲੋਕਂ ਇਤੋ ਗਤੋ’’ਤਿ. –

ਗਾਥਾਯ ਅਤ੍ਤਾਨਂ ਆਚਿਕ੍ਖਿ. ਅਥ ਨਂ ਥੇਰੋ –

੭੬੮. ‘‘ਕਿਂ ਨੁ ਕਾਯੇਨ ਵਾਚਾਯ, ਮਨਸਾ ਦੁਕ੍ਕਟਂ ਕਤਂ;

ਕਿਸ੍ਸਕਮ੍ਮਵਿਪਾਕੇਨ, ਇਦਂ ਦੁਕ੍ਖਂ ਨਿਗਚ੍ਛਸੀ’’ਤਿ. –

ਗਾਥਾਯ ਤੇਨ ਕਤਕਮ੍ਮਂ ਪੁਚ੍ਛਿ. ਸੋ ਪੇਤੋ –

੭੬੯. ‘‘ਅਹੁ ਆਵਾਸਿਕੋ ਮਯ੍ਹਂ, ਇਸ੍ਸੁਕੀ ਕੁਲਮਚ੍ਛਰੀ;

ਅਜ੍ਝਾਸਿਤੋ ਮਯ੍ਹਂ ਘਰੇ, ਕਦਰਿਯੋ ਪਰਿਭਾਸਕੋ.

੭੭੦. ‘‘ਤਸ੍ਸਾਹਂ ਵਚਨਂ ਸੁਤ੍ਵਾ, ਭਿਕ੍ਖਵੋ ਪਰਿਭਾਸਿਸਂ;

ਤਸ੍ਸਕਮ੍ਮਵਿਪਾਕੇਨ, ਪੇਤਲੋਕਂ ਇਤੋ ਗਤੋ’’ਤਿ. –

ਦ੍ਵੀਹਿ ਗਾਥਾਹਿ ਅਤ੍ਤਨਾ ਕਤਕਮ੍ਮਂ ਕਥੇਸਿ.

੭੬੯. ਤਤ੍ਥ ਅਹੁ ਆਵਾਸਿਕੋ ਮਯ੍ਹਨ੍ਤਿ ਮਯ੍ਹਂ ਆਵਾਸੇ ਮਯਾ ਕਤਵਿਹਾਰੇ ਏਕੋ ਭਿਕ੍ਖੁ ਆਵਾਸਿਕੋ ਨਿਬਦ੍ਧਵਸਨਕੋ ਅਹੋਸਿ. ਅਜ੍ਝਾਸਿਤੋ ਮਯ੍ਹਂ ਘਰੇਤਿ ਕੁਲੂਪਕਭਾਵੇਨ ਮਮ ਗੇਹੇ ਤਣ੍ਹਾਭਿਨਿਵੇਸਵਸੇਨ ਅਭਿਨਿਵਿਟ੍ਠੋ.

੭੭੦. ਤਸ੍ਸਾਤਿ ਤਸ੍ਸ ਕੁਲੂਪਕਭਿਕ੍ਖੁਸ੍ਸ. ਭਿਕ੍ਖਵੋਤਿ ਭਿਕ੍ਖੂ. ਪਰਿਭਾਸਿਸਨ੍ਤਿ ਅਕ੍ਕੋਸਿਂ. ਪੇਤਲੋਕਂ ਇਤੋ ਗਤੋਤਿ ਇਮਿਨਾ ਆਕਾਰੇਨ ਪੇਤਯੋਨਿਂ ਉਪਗਤੋ ਪੇਤਭੂਤੋ.

ਤਂ ਸੁਤ੍ਵਾ ਥੇਰੋ ਇਤਰਸ੍ਸ ਗਤਿਂ ਪੁਚ੍ਛਨ੍ਤੋ –

੭੭੧. ‘‘ਅਮਿਤ੍ਤੋ ਮਿਤ੍ਤਵਣ੍ਣੇਨ, ਯੋ ਤੇ ਆਸਿ ਕੁਲੂਪਕੋ;

ਕਾਯਸ੍ਸ ਭੇਦਾ ਦੁਪ੍ਪਞ੍ਞੋ, ਕਿਂ ਨੁ ਪੇਚ੍ਚ ਗਤਿਂ ਗਤੋ’’ਤਿ. –

ਗਾਥਮਾਹ. ਤਤ੍ਥ ਮਿਤ੍ਤਵਣ੍ਣੇਨਾਤਿ ਮਿਤ੍ਤਪਟਿਰੂਪੇਨ ਮਿਤ੍ਤਪਟਿਰੂਪਤਾਯ.

ਪੁਨ ਪੇਤੋ ਥੇਰਸ੍ਸ ਤਮਤ੍ਥਂ ਆਚਿਕ੍ਖਨ੍ਤੋ –

੭੭੨. ‘‘ਤਸ੍ਸੇਵਾਹਂ ਪਾਪਕਮ੍ਮਸ੍ਸ, ਸੀਸੇ ਤਿਟ੍ਠਾਮਿ ਮਤ੍ਥਕੇ;

ਸੋ ਚ ਪਰਵਿਸਯਂ ਪਤ੍ਤੋ, ਮਮੇਵ ਪਰਿਚਾਰਕੋ.

੭੭੩. ‘‘ਯਂ ਭਦਨ੍ਤੇ ਹਦਨ੍ਤਞ੍ਞੇ, ਏਤਂ ਮੇ ਹੋਤਿ ਭੋਜਨਂ;

ਅਹਞ੍ਚ ਖੋ ਯਂ ਹਦਾਮਿ, ਏਤਂ ਸੋ ਉਪਜੀਵਤੀ’’ਤਿ. – ਗਾਥਾਦ੍ਵਯਮਾਹ;

੭੭੨. ਤਤ੍ਥ ਤਸ੍ਸੇਵਾਤਿ ਤਸ੍ਸੇਵ ਮਯ੍ਹਂ ਪੁਬ੍ਬੇ ਕੁਲੂਪਕਭਿਕ੍ਖੁਭੂਤਸ੍ਸ ਪੇਤਸ੍ਸ. ਪਾਪਕਮ੍ਮਸ੍ਸਾਤਿ ਪਾਪਸਮਾਚਾਰਸ੍ਸ. ਸੀਸੇ ਤਿਟ੍ਠਾਮਿ ਮਤ੍ਥਕੇਤਿ ਸੀਸੇ ਤਿਟ੍ਠਾਮਿ, ਤਿਟ੍ਠਨ੍ਤੋ ਚ ਮਤ੍ਥਕੇ ਏਵ ਤਿਟ੍ਠਾਮਿ, ਨ ਸੀਸਪ੍ਪਮਾਣੇ ਆਕਾਸੇਤਿ ਅਤ੍ਥੋ. ਪਰਵਿਸਯਂ ਪਤ੍ਤੋਤਿ ਮਨੁਸ੍ਸਲੋਕਂ ਉਪਾਦਾਯ ਪਰਵਿਸਯਭੂਤਂ ਪੇਤ੍ਤਿਵਿਸਯਂ ਪਤ੍ਤੋ. ਮਮੇਵਾਤਿ ਮਯ੍ਹਂ ਏਵ ਪਰਿਚਾਰਕੋ ਅਹੋਸੀਤਿ ਵਚਨਸੇਸੋ.

੭੭੩. ਯਂ ਭਦਨ੍ਤੇ ਹਦਨ੍ਤਞ੍ਞੇਤਿ ਭਦਨ੍ਤੇ, ਅਯ੍ਯ ਮਹਾਮੋਗ੍ਗਲਾਨ, ਤਸ੍ਸਂ ਵਚ੍ਚਕੁਟਿਯਂ ਯਂ ਅਞ੍ਞੇ ਉਹਦਨ੍ਤਿ ਵਚ੍ਚਂ ਓਸ੍ਸਜਨ੍ਤਿ. ਏਤਂ ਮੇ ਹੋਤਿ ਭੋਜਨਨ੍ਤਿ ਏਤਂ ਵਚ੍ਚਂ ਮਯ੍ਹਂ ਦਿਵਸੇ ਦਿਵਸੇ ਭੋਜਨਂ ਹੋਤਿ. ਯਂ ਹਦਾਮੀਤਿ ਤਂ ਪਨ ਵਚ੍ਚਂ ਖਾਦਿਤ੍ਵਾ ਯਮ੍ਪਹਂ ਵਚ੍ਚਂ ਕਰੋਮਿ. ਏਤਂ ਸੋ ਉਪਜੀਵਤੀਤਿ ਏਤਂ ਮਮ ਵਚ੍ਚਂ ਸੋ ਕੁਲੂਪਕਪੇਤੋ ਦਿਵਸੇ ਦਿਵਸੇ ਖਾਦਨਵਸੇਨ ਉਪਜੀਵਤਿ, ਅਤ੍ਤਭਾਵਂ ਯਾਪੇਤੀਤਿ ਅਤ੍ਥੋ.

ਤੇਸੁ ਕੁਟੁਮ੍ਬਿਕੋ ਪੇਸਲੇ ਭਿਕ੍ਖੂ ‘‘ਏਵਂ ਆਹਾਰਪਰਿਭੋਗਤੋ ਵਰਂ ਤੁਮ੍ਹਾਕਂ ਗੂਥਖਾਦਨ’’ਨ੍ਤਿ ਅਕ੍ਕੋਸਿ. ਕੁਲੂਪਕੋ ਪਨ ਕੁਟੁਮ੍ਬਿਕਮ੍ਪਿ ਤਥਾਵਚਨੇ ਸਮਾਦਪੇਤ੍ਵਾ ਸਯਂ ਤਥਾ ਅਕ੍ਕੋਸਿ, ਤੇਨਸ੍ਸ ਤਤੋਪਿ ਪਟਿਕੁਟ੍ਠਤਰਾ ਜੀਵਿਕਾ ਅਹੋਸਿ. ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਤਂ ਪਵਤ੍ਤਿਂ ਭਗਵਤੋ ਆਰੋਚੇਸਿ. ਭਗਵਾ ਤਮਤ੍ਥਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਉਪਵਾਦੇ ਆਦੀਨਵਂ ਦਸ੍ਸੇਤ੍ਵਾ ਸਮ੍ਪਤ੍ਤਪਰਿਸਾਯ ਧਮ੍ਮਂ ਦੇਸੇਸਿ. ਸਾ ਦੇਸਨਾ ਮਹਾਜਨਸ੍ਸ ਸਾਤ੍ਥਿਕਾ ਅਹੋਸੀਤਿ.

ਗੂਥਖਾਦਕਪੇਤਵਤ੍ਥੁਵਣ੍ਣਨਾ ਨਿਟ੍ਠਿਤਾ.