੬. ਕੁਮਾਰਪੇਤਵਤ੍ਥੁਵਣ੍ਣਨਾ

ਸਾਵਤ੍ਥਿ ਨਾਮ ਨਗਰਨ੍ਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਦ੍ਵੇ ਪੇਤੇ ਆਰਬ੍ਭ ਕਥੇਸਿ. ਸਾਵਤ੍ਥਿਯਂ ਕਿਰ ਕੋਸਲਰਞ੍ਞੋ ਦ੍ਵੇ ਪੁਤ੍ਤਾ ਪਾਸਾਦਿਕਾ ਪਠਮਵਯੇ ਠਿਤਾ ਯੋਬ੍ਬਨਮਦਮਤ੍ਤਾ ਪਰਦਾਰਕਮ੍ਮਂ ਕਤ੍ਵਾ ਕਾਲਂ ਕਤ੍ਵਾ ਪਰਿਖਾਪਿਟ੍ਠੇ ਪੇਤਾ ਹੁਤ੍ਵਾ ਨਿਬ੍ਬਤ੍ਤਿਂਸੁ. ਤੇ ਰਤ੍ਤਿਯਂ ਭੇਰਵੇਨ ਸਦ੍ਦੇਨ ਪਰਿਦੇਵਿਂਸੁ. ਮਨੁਸ੍ਸਾ ਤਂ ਸੁਤ੍ਵਾ ਭੀਤਤਸਿਤਾ ‘‘ਏਵਂ ਕਤੇ ਇਦਂ ਅਵਮਙ੍ਗਲਂ ਵੂਪਸਮ੍ਮਤੀ’’ਤਿ ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਮਹਾਦਾਨਂ ਦਤ੍ਵਾ ਤਂ ਪਵਤ੍ਤਿਂ ਭਗਵਤੋ ਆਰੋਚੇਸੁਂ. ਭਗਵਾ ‘‘ਉਪਾਸਕਾ ਤਸ੍ਸ ਸਦ੍ਦਸ੍ਸ ਸਵਨੇਨ ਤੁਮ੍ਹਾਕਂ ਨ ਕੋਚਿ ਅਨ੍ਤਰਾਯੋ’’ਤਿ ਵਤ੍ਵਾ ਤਸ੍ਸ ਕਾਰਣਂ ਆਚਿਕ੍ਖਿਤ੍ਵਾ ਤੇਸਂ ਧਮ੍ਮਂ ਦੇਸੇਤੁਂ –

੭੪੬. ‘‘ਸਾਵਤ੍ਥਿ ਨਾਮ ਨਗਰਂ, ਹਿਮਵਨ੍ਤਸ੍ਸ ਪਸ੍ਸਤੋ;

ਤਤ੍ਥ ਆਸੁਂ ਦ੍ਵੇ ਕੁਮਾਰਾ, ਰਾਜਪੁਤ੍ਤਾਤਿ ਮੇ ਸੁਤਂ.

੭੪੭. ‘‘ਸਮ੍ਮਤ੍ਤਾ ਰਜਨੀਯੇਸੁ, ਕਾਮਸ੍ਸਾਦਾਭਿਨਨ੍ਦਿਨੋ;

ਪਚ੍ਚੁਪ੍ਪਨ੍ਨਸੁਖੇ ਗਿਦ੍ਧਾ, ਨ ਤੇ ਪਸ੍ਸਿਂਸੁਨਾਗਤਂ.

੭੪੮. ‘‘ਤੇ ਚੁਤਾ ਚ ਮਨੁਸ੍ਸਤ੍ਤਾ, ਪਰਲੋਕਂ ਇਤੋ ਗਤਾ;

ਤੇਧ ਘੋਸੇਨ੍ਤ੍ਯਦਿਸ੍ਸਨ੍ਤਾ, ਪੁਬ੍ਬੇ ਦੁਕ੍ਕਟਮਤ੍ਤਨੋ.

੭੪੯. ‘‘ਬਹੂਸੁ ਵਤ ਸਨ੍ਤੇਸੁ, ਦੇਯ੍ਯਧਮ੍ਮੇ ਉਪਟ੍ਠਿਤੇ;

ਨਾਸਕ੍ਖਿਮ੍ਹਾ ਚ ਅਤ੍ਤਾਨਂ, ਪਰਿਤ੍ਤਂ ਕਾਤੁਂ ਸੁਖਾਵਹਂ.

੭੫੦. ‘‘ਕਿਂ ਤਤੋ ਪਾਪਕਂ ਅਸ੍ਸ, ਯਂ ਨੋ ਰਾਜਕੁਲਾ ਚੁਤਾ;

ਉਪਪਨ੍ਨਾ ਪੇਤ੍ਤਿਵਿਸਯਂ, ਖੁਪ੍ਪਿਪਾਸਸਮਪ੍ਪਿਤਾ.

੭੫੧. ‘‘ਸਾਮਿਨੋ ਇਧ ਹੁਤ੍ਵਾਨ, ਹੋਨ੍ਤਿ ਅਸਾਮਿਨੋ ਤਹਿਂ;

ਭਮਨ੍ਤਿ ਖੁਪ੍ਪਿਪਾਸਾਯ, ਮਨੁਸ੍ਸਾ ਉਨ੍ਨਤੋਨਤਾ.

੭੫੨. ‘‘ਏਤਮਾਦੀਨਵਂ ਞਤ੍ਵਾ, ਇਸ੍ਸਰਮਦਸਮ੍ਭਵਂ;

ਪਹਾਯ ਇਸ੍ਸਰਮਦਂ, ਭਵੇ ਸਗ੍ਗਗਤੋ ਨਰੋ;

ਕਾਯਸ੍ਸ ਭੇਦਾ ਸਪ੍ਪਞ੍ਞੋ, ਸਗ੍ਗਂ ਸੋ ਉਪਪਜ੍ਜਤੀ’’ਤਿ – ਗਾਥਾ ਅਭਾਸਿ;

੭੪੬. ਤਤ੍ਥ ਇਤਿ ਮੇ ਸੁਤਨ੍ਤਿ ਨ ਕੇਵਲਂ ਅਤ੍ਤਨੋ ਞਾਣੇਨ ਦਿਟ੍ਠਮੇਵ, ਅਥ ਖੋ ਲੋਕੇ ਪਾਕਟਭਾਵੇਨ ਏਵਂ ਮਯਾ ਸੁਤਨ੍ਤਿ ਅਤ੍ਥੋ.

੭੪੭. ਕਾਮਸ੍ਸਾਦਾਭਿਨਨ੍ਦਿਨੋਤਿ ਕਾਮਗੁਣੇਸੁ ਅਸ੍ਸਾਦਵਸੇਨ ਅਭਿਨਨ੍ਦਨਸੀਲਾ. ਪਚ੍ਚੁਪ੍ਪਨ੍ਨਸੁਖੇ ਗਿਦ੍ਧਾਤਿ ਵਤ੍ਤਮਾਨਸੁਖਮਤ੍ਤੇ ਗਿਦ੍ਧਾ ਗਥਿਤਾ ਹੁਤ੍ਵਾ. ਨ ਤੇ ਪਸ੍ਸਿਂਸੁਨਾਗਤਨ੍ਤਿ ਦੁਚ੍ਚਰਿਤਂ ਪਹਾਯ ਸੁਚਰਿਤਂ ਚਰਿਤ੍ਵਾ ਅਨਾਗਤਂ ਆਯਤਿਂ ਦੇਵਮਨੁਸ੍ਸੇਸੁ ਲਦ੍ਧਬ੍ਬਂ ਸੁਖਂ ਤੇ ਨ ਚਿਨ੍ਤੇਸੁਂ.

੭੪੮. ਤੇਧ ਘੋਸੇਨ੍ਤ੍ਯਦਿਸ੍ਸਨ੍ਤਾਤਿ ਤੇ ਪੁਬ੍ਬੇ ਰਾਜਪੁਤ੍ਤਭੂਤਾ ਪੇਤਾ ਇਧ ਸਾਵਤ੍ਥਿਯਾ ਸਮੀਪੇ ਅਦਿਸ੍ਸਮਾਨਰੂਪਾ ਘੋਸੇਨ੍ਤਿ ਕਨ੍ਦਨ੍ਤਿ. ਕਿਂ ਕਨ੍ਦਨ੍ਤੀਤਿ ਆਹ ‘‘ਪੁਬ੍ਬੇ ਦੁਕ੍ਕਟਮਤ੍ਤਨੋ’’ਤਿ.

੭੪੯. ਇਦਾਨਿ ਤੇਸਂ ਕਨ੍ਦਨਸ੍ਸ ਕਾਰਣਂ ਹੇਤੁਤੋ ਚ ਫਲਤੋ ਚ ਵਿਭਜਿਤ੍ਵਾ ਦਸ੍ਸੇਤੁਂ ‘‘ਬਹੂਸੁ ਵਤ ਸਨ੍ਤੇਸੂ’’ਤਿਆਦਿ ਵੁਤ੍ਤਂ.

ਤਤ੍ਥ ਬਹੂਸੁ ਵਤ ਸਨ੍ਤੇਸੂਤਿ ਅਨੇਕੇਸੁ ਦਕ੍ਖਿਣੇਯ੍ਯੇਸੁ ਵਿਜ੍ਜਮਾਨੇਸੁ. ਦੇਯ੍ਯਧਮ੍ਮੇ ਉਪਟ੍ਠਿਤੇਤਿ ਅਤ੍ਤਨੋ ਸਨ੍ਤਕੇ ਦਾਤਬ੍ਬਦੇਯ੍ਯਧਮ੍ਮੇਪਿ ਸਮੀਪੇ ਠਿਤੇ, ਲਬ੍ਭਮਾਨੇਤਿ ਅਤ੍ਥੋ. ਪਰਿਤ੍ਤਂ ਸੁਖਾਵਹਨ੍ਤਿ ਅਪ੍ਪਮਤ੍ਤਕਮ੍ਪਿ ਆਯਤਿਂ ਸੁਖਾਵਹਂ ਪੁਞ੍ਞਂ ਕਤ੍ਵਾ ਅਤ੍ਤਾਨਂ ਸੋਤ੍ਥਿਂ ਨਿਰੁਪਦ੍ਦਵਂ ਕਾਤੁਂ ਨਾਸਕ੍ਖਿਮ੍ਹਾ ਵਤਾਤਿ ਯੋਜਨਾ.

੭੫੦. ਕਿਂ ਤਤੋ ਪਾਪਕਂ ਅਸ੍ਸਾਤਿ ਤਤੋ ਪਾਪਕਂ ਲਾਮਕਂ ਨਾਮ ਕਿਂ ਅਞ੍ਞਂ ਅਸ੍ਸ ਸਿਯਾ. ਯਂ ਨੋ ਰਾਜਕੁਲਾ ਚੁਤਾਤਿ ਯੇਨ ਪਾਪਕਮ੍ਮੇਨ ਮਯਂ ਰਾਜਕੁਲਤੋ ਚੁਤਾ ਇਧ ਪੇਤ੍ਤਿਵਿਸਯਂ ਉਪਪਨ੍ਨਾ ਪੇਤੇਸੁ ਨਿਬ੍ਬਤ੍ਤਾ ਖੁਪ੍ਪਿਪਾਸਸਮਪ੍ਪਿਤਾ ਵਿਚਰਾਮਾਤਿ ਅਤ੍ਥੋ.

੭੫੧. ਸਾਮਿਨੋ ਇਧ ਹੁਤ੍ਵਾਨਾਤਿ ਇਧ ਇਮਸ੍ਮਿਂ ਲੋਕੇ ਯਸ੍ਮਿਂਯੇਵ ਠਾਨੇ ਪੁਬ੍ਬੇ ਸਾਮਿਨੋ ਹੁਤ੍ਵਾ ਵਿਚਰਨ੍ਤਿ, ਤਹਿਂ ਤਸ੍ਮਿਂਯੇਵ ਠਾਨੇ ਹੋਨ੍ਤਿ ਅਸ੍ਸਾਮਿਨੋ. ਮਨੁਸ੍ਸਾ ਉਨ੍ਨਤੋਨਤਾਤਿ ਮਨੁਸ੍ਸਕਾਲੇ ਸਾਮਿਨੋ ਹੁਤ੍ਵਾ ਕਾਲਕਤਾ ਕਮ੍ਮਵਸੇਨ ਓਨਤਾ ਭਮਨ੍ਤਿ ਖੁਪ੍ਪਿਪਾਸਾਯ, ਪਸ੍ਸ ਸਂਸਾਰਪਕਤਿਨ੍ਤਿ ਦਸ੍ਸੇਤਿ.

੭੫੨. ਏਤਮਾਦੀਨਵਂ ਞਤ੍ਵਾ, ਇਸ੍ਸਰਮਦਸਮ੍ਭਵਨ੍ਤਿ ਏਤਂ ਇਸ੍ਸਰਿਯਮਦਵਸੇਨ ਸਮ੍ਭੂਤਂ ਅਪਾਯੂਪਪਤ੍ਤਿਸਙ੍ਖਾਤਂ ਆਦੀਨਵਂ ਦੋਸਂ ਞਤ੍ਵਾ ਪਹਾਯ ਇਸ੍ਸਰਿਯਮਦਂ ਪੁਞ੍ਞਪ੍ਪਸੁਤੋ ਹੁਤ੍ਵਾ. ਭਵੇ ਸਗ੍ਗਗਤੋ ਨਰੋਤਿ ਸਗ੍ਗਂ ਦੇਵਲੋਕਂ ਗਤੋਯੇਵ ਭਵੇਯ੍ਯ.

ਇਤਿ ਸਤ੍ਥਾ ਤੇਸਂ ਪੇਤਾਨਂ ਪਵਤ੍ਤਿਂ ਕਥੇਤ੍ਵਾ ਤੇਹਿ ਮਨੁਸ੍ਸੇਹਿ ਕਤਂ ਦਾਨਂ ਤੇਸਂ ਪੇਤਾਨਂ ਉਦ੍ਦਿਸਾਪੇਤ੍ਵਾ ਸਮ੍ਪਤ੍ਤਪਰਿਸਾਯ ਅਜ੍ਝਾਸਯਾਨੁਰੂਪਂ ਧਮ੍ਮਂ ਦੇਸੇਸਿ. ਸਾ ਦੇਸਨਾ ਮਹਾਜਨਸ੍ਸ ਸਾਤ੍ਥਿਕਾ ਅਹੋਸੀਤਿ.

ਕੁਮਾਰਪੇਤਵਤ੍ਥੁਵਣ੍ਣਨਾ ਨਿਟ੍ਠਿਤਾ.