੧੬. ਸਟ੍ਠਿਕੂਟਪੇਤਵਤ੍ਥੁਵਣ੍ਣਨਾ

ਕਿਂ ਨੁ ਉਮ੍ਮਤ੍ਤਰੂਪੋਵਾਤਿ ਇਦਂ ਸਤ੍ਥਰਿ ਵੇਲ਼ੁਵਨੇ ਵਿਹਰਨ੍ਤੇ ਅਞ੍ਞਤਰਂ ਪੇਤਂ ਆਰਬ੍ਭ ਵੁਤ੍ਤਂ. ਅਤੀਤੇ ਕਿਰ ਬਾਰਾਣਸਿਨਗਰੇ ਅਞ੍ਞਤਰੋ ਪੀਠਸਪ੍ਪੀ ਸਾਲਿਤ੍ਤਕਪਯੋਗੇ ਕੁਸਲੋ, ਤਹਿਂ ਸਕ੍ਖਰਖਿਪਨਸਿਪ੍ਪੇ ਨਿਪ੍ਫਤ੍ਤਿਂ ਗਤੋ ਨਗਰਦ੍ਵਾਰੇ ਨਿਗ੍ਰੋਧਰੁਕ੍ਖਮੂਲੇ ਨਿਸੀਦਿਤ੍ਵਾ ਸਕ੍ਖਰਪਹਾਰੇਹਿ ਹਤ੍ਥਿਅਸ੍ਸਮਨੁਸ੍ਸਰਥਕੂਟਾਗਾਰਧਜਪੁਣ੍ਣਘਟਾਦਿਰੂਪਾਨਿ ਨਿਗ੍ਰੋਧਪਤ੍ਤੇਸੁ ਦਸ੍ਸੇਤਿ. ਨਗਰਦਾਰਕਾ ਅਤ੍ਤਨੋ ਕੀਲ਼ਨਤ੍ਥਾਯ ਮਾਯਕਡ੍ਢਮਾਸਕਾਦੀਨਿ ਦਤ੍ਵਾ ਯਥਾਰੁਚਿ ਤਾਨਿ ਸਿਪ੍ਪਾਨਿ ਕਾਰਾਪੇਨ੍ਤਿ.

ਅਥੇਕਦਿਵਸਂ ਬਾਰਾਣਸਿਰਾਜਾ ਨਗਰਤੋ ਨਿਕ੍ਖਮਿਤ੍ਵਾ ਤਂ ਨਿਗ੍ਰੋਧਮੂਲਂ ਉਪਗਤੋ ਨਿਗ੍ਰੋਧਪਤ੍ਤੇਸੁ ਹਤ੍ਥਿਰੂਪਾਦਿਵਸੇਨ ਨਾਨਾਵਿਧਰੂਪਵਿਭਤ੍ਤਿਯੋ ਅਪ੍ਪਿਤਾ ਦਿਸ੍ਵਾ ਮਨੁਸ੍ਸੇ ਪੁਚ੍ਛਿ – ‘‘ਕੇਨ ਨੁ ਖੋ ਇਮੇਸੁ ਨਿਗ੍ਰੋਧਪਤ੍ਤੇਸੁ ਏਵਂ ਨਾਨਾਵਿਧਰੂਪਵਿਭਤ੍ਤਿਯੋ ਕਤਾ’’ਤਿ? ਮਨੁਸ੍ਸਾ ਤਂ ਪੀਠਸਪ੍ਪਿਂ ਦਸ੍ਸੇਸੁਂ ‘‘ਦੇਵ, ਇਮਿਨਾ ਕਤਾ’’ਤਿ. ਰਾਜਾ ਤਂ ਪਕ੍ਕੋਸਾਪੇਤ੍ਵਾ ਏਵਮਾਹ – ‘‘ਸਕ੍ਕਾ ਨੁ ਖੋ, ਭਣੇ, ਮਯਾ ਦਸ੍ਸਿਤਸ੍ਸ ਏਕਸ੍ਸ ਪੁਰਿਸਸ੍ਸ ਕਥੇਨ੍ਤਸ੍ਸ ਅਜਾਨਨ੍ਤਸ੍ਸੇਵ ਕੁਚ੍ਛਿਯਂ ਅਜਲਣ੍ਡਿਕਾਹਿ ਪੂਰੇਤੁ’’ਨ੍ਤਿ? ‘‘ਸਕ੍ਕਾ, ਦੇਵਾ’’ਤਿ. ਰਾਜਾ ਤਂ ਅਤ੍ਤਨੋ ਰਾਜਭਵਨਂ ਨੇਤ੍ਵਾ ਬਹੁਭਾਣਿਕੇ ਪੁਰੋਹਿਤੇ ਨਿਬ੍ਬਿਨ੍ਨਰੂਪੋ ਪੁਰੋਹਿਤਂ ਪਕ੍ਕੋਸਾਪੇਤ੍ਵਾ ਤੇਨ ਸਹ ਵਿਵਿਤ੍ਤੇ ਓਕਾਸੇ ਸਾਣਿਪਾਕਾਰਪਰਿਕ੍ਖਿਤ੍ਤੇ ਨਿਸੀਦਿਤ੍ਵਾ ਮਨ੍ਤਯਮਾਨੋ ਪੀਠਸਪ੍ਪਿਂ ਪਕ੍ਕੋਸਾਪੇਸਿ. ਪੀਠਸਪ੍ਪੀ ਨਾਲ਼ਿਮਤ੍ਤਾ ਅਜਲਣ੍ਡਿਕਾ ਆਦਾਯਾਗਨ੍ਤ੍ਵਾ ਰਞ੍ਞੋ ਆਕਾਰਂ ਞਤ੍ਵਾ ਪੁਰੋਹਿਤਾਭਿਮੁਖੋ ਨਿਸਿਨ੍ਨੋ ਤੇਨ ਮੁਖੇ ਵਿਵਟੇ ਸਾਣਿਪਾਕਾਰਵਿਵਰੇਨ ਏਕੇਕਂ ਅਜਲਣ੍ਡਿਕਂ ਤਸ੍ਸ ਗਲਮੂਲੇ ਪਤਿਟ੍ਠਾਪੇਸਿ. ਸੋ ਲਜ੍ਜਾਯ ਉਗ੍ਗਿਲਿਤੁਂ ਅਸਕ੍ਕੋਨ੍ਤੋ ਸਬ੍ਬਾ ਅਜ੍ਝੋਹਰਿ. ਅਥ ਨਂ ਰਾਜਾ ਅਜਲਣ੍ਡਿਕਾਹਿ ਪੂਰਿਤੋਦਰਂ ਵਿਸ੍ਸਜ੍ਜਿ – ‘‘ਗਚ੍ਛ, ਬ੍ਰਾਹ੍ਮਣ, ਲਦ੍ਧਂ ਤਯਾ ਬਹੁਭਾਣਿਤਾਯ ਫਲਂ, ਮਦ੍ਦਨਫਲਪਿਯਙ੍ਗੁਤਚਾਦੀਹਿ ਅਭਿਸਙ੍ਖਤਂ ਪਾਨਕਂ ਪਿਵਿਤ੍ਵਾ ਉਚ੍ਛਡ੍ਡੇਹਿ, ਏਵਂ ਤੇ ਸੋਤ੍ਥਿ ਭਵਿਸ੍ਸਤੀ’’ਤਿ. ਤਸ੍ਸ ਚ ਪੀਠਸਪ੍ਪਿਸ੍ਸ ਤੇਨ ਕਮ੍ਮੇਨ ਅਤ੍ਤਮਨੋ ਹੁਤ੍ਵਾ ਚੁਦ੍ਦਸ ਗਾਮੇ ਅਦਾਸਿ. ਸੋ ਗਾਮੇ ਲਭਿਤ੍ਵਾ ਅਤ੍ਤਾਨਂ ਸੁਖੇਨ੍ਤੋ ਪੀਣੇਨ੍ਤੋ ਪਰਿਜਨਮ੍ਪਿ ਸੁਖੇਨ੍ਤੋ ਪੀਣੇਨ੍ਤੋ ਸਮਣਬ੍ਰਾਹ੍ਮਣਾਦੀਨਂ ਯਥਾਰਹਂ ਕਿਞ੍ਚਿ ਦੇਨ੍ਤੋ ਦਿਟ੍ਠਧਮ੍ਮਿਕਂ ਸਮ੍ਪਰਾਯਿਕਞ੍ਚ ਅਤ੍ਥਂ ਅਹਾਪੇਨ੍ਤੋ ਸੁਖੇਨੇਵ ਜੀਵਤਿ, ਅਤ੍ਤਨੋ ਸਨ੍ਤਿਕਂ ਉਪਗਤਾਨਂ ਸਿਪ੍ਪਂ ਸਿਕ੍ਖਨ੍ਤਾਨਂ ਭਤ੍ਤਵੇਤਨਂ ਦੇਤਿ.

ਅਥੇਕੋ ਪੁਰਿਸੋ ਤਸ੍ਸ ਸਨ੍ਤਿਕਂ ਉਪਗਨ੍ਤ੍ਵਾ ਏਵਮਾਹ – ‘‘ਸਾਧੁ, ਆਚਰਿਯ, ਮਮ੍ਪਿ ਏਤਂ ਸਿਪ੍ਪਂ ਸਿਕ੍ਖਾਪੇਹਿ, ਮਯ੍ਹਂ ਪਨ ਅਲਂ ਭਤ੍ਤਵੇਤਨੇਨਾ’’ਤਿ. ਸੋ ਤਂ ਪੁਰਿਸਂ ਤਂ ਸਿਪ੍ਪਂ ਸਿਕ੍ਖਾਪੇਸਿ. ਸੋ ਸਿਕ੍ਖਿਤਸਿਪ੍ਪੋ ਸਿਪ੍ਪਂ ਵੀਮਂਸਿਤੁਕਾਮੋ ਗਨ੍ਤ੍ਵਾ ਗਙ੍ਗਾਤੀਰੇ ਨਿਸਿਨ੍ਨਸ੍ਸ ਸੁਨੇਤ੍ਤਸ੍ਸ ਨਾਮ ਪਚ੍ਚੇਕਬੁਦ੍ਧਸ੍ਸ ਸਕ੍ਖਰਾਭਿਘਾਤੇਨ ਸੀਸਂ ਭਿਨ੍ਦਿ. ਪਚ੍ਚੇਕਬੁਦ੍ਧੋ ਤਤ੍ਥੇਵ ਗਙ੍ਗਾਤੀਰੇ ਪਰਿਨਿਬ੍ਬਾਯਿ. ਮਨੁਸ੍ਸਾ ਤਂ ਪਵਤ੍ਤਿਂ ਸੁਤ੍ਵਾ ਤਂ ਪੁਰਿਸਂ ਤਤ੍ਥੇਵ ਲੇਡ੍ਡੁਦਣ੍ਡਾਦੀਹਿ ਪਹਰਿਤ੍ਵਾ ਜੀਵਿਤਾ ਵੋਰੋਪੇਸੁਂ. ਸੋ ਕਾਲਕਤੋ ਅਵੀਚਿਮਹਾਨਿਰਯੇ ਨਿਬ੍ਬਤ੍ਤਿਤ੍ਵਾ ਬਹੂਨਿ ਵਸ੍ਸਸਹਸ੍ਸਾਨਿ ਨਿਰਯੇ ਪਚ੍ਚਿਤ੍ਵਾ ਤਸ੍ਸੇਵ ਕਮ੍ਮਸ੍ਸ ਵਿਪਾਕਾਵਸੇਸੇਨ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਰਾਜਗਹਨਗਰਸ੍ਸ ਅਵਿਦੂਰੇ ਪੇਤੋ ਹੁਤ੍ਵਾ ਨਿਬ੍ਬਤ੍ਤਿ. ਤਸ੍ਸ ਕਮ੍ਮਸ੍ਸ ਸਰਿਕ੍ਖਕੇਨ ਵਿਪਾਕੇਨ ਭਵਿਤਬ੍ਬਨ੍ਤਿ ਕਮ੍ਮਵੇਗੁਕ੍ਖਿਤ੍ਤਾਨਿ ਪੁਬ੍ਬਣ੍ਹਸਮਯਂ ਮਜ੍ਝਨ੍ਹਿਕਸਮਯਂ ਸਾਯਨ੍ਹਸਮਯਞ੍ਚ ਸਟ੍ਠਿ ਅਯੋਕੂਟਸਹਸ੍ਸਾਨਿ ਮਤ੍ਥਕੇ ਨਿਪਤਨ੍ਤਿ. ਸੋ ਛਿਨ੍ਨਭਿਨ੍ਨਸੀਸੋ ਅਧਿਮਤ੍ਤਵੇਦਨਾਪ੍ਪਤ੍ਤੋ ਭੂਮਿਯਂ ਨਿਪਤਤਿ, ਅਯੋਕੂਟੇਸੁ ਪਨ ਅਪਗਤਮਤ੍ਤੇਸੁ ਪਟਿਪਾਕਤਿਕਸਿਰੋ ਤਿਟ੍ਠਤਿ.

ਅਥੇਕਦਿਵਸਂ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਗਿਜ੍ਝਕੂਟਪਬ੍ਬਤਾ ਓਤਰਨ੍ਤੋ ਤਂ ਦਿਸ੍ਵਾ –

੮੦੬. ‘‘ਕਿਂ ਨੁ ਉਮ੍ਮਤ੍ਤਰੂਪੋਵ, ਮਿਗੋ ਭਨ੍ਤੋਵ ਧਾਵਸਿ;

ਨਿਸ੍ਸਂਸਯਂ ਪਾਪਕਮ੍ਮਨ੍ਤੋ, ਕਿਂ ਨੁ ਸਦ੍ਦਾਯਸੇ ਤੁਵ’’ਨ੍ਤਿ. –

ਇਮਾਯ ਗਾਥਾਯ ਪਟਿਪੁਚ੍ਛਿ. ਤਤ੍ਥ ਉਮ੍ਮਤ੍ਤਰੂਪੋਵਾਤਿ ਉਮ੍ਮਤ੍ਤਕਸਭਾਵੋ ਵਿਯ ਉਮ੍ਮਾਦਪ੍ਪਤ੍ਤੋ ਵਿਯ. ਮਿਗੋ ਭਨ੍ਤੋਵ ਧਾਵਸੀਤਿ ਭਨ੍ਤਮਿਗੋ ਵਿਯ ਇਤੋ ਚਿਤੋ ਚ ਧਾਵਸਿ. ਸੋ ਹਿ ਤੇਸੁ ਅਯੋਕੂਟੇਸੁ ਨਿਪਤਨ੍ਤੇਸੁ ਪਰਿਤ੍ਤਾਣਂ ਅਪਸ੍ਸਨ੍ਤੋ ‘‘ਨ ਸਿਯਾ ਨੁ ਖੋ ਏਵਂ ਪਹਾਰੋ’’ਤਿ ਇਤੋਪਿ ਏਤ੍ਤੋਪਿ ਪਲਾਯਤਿ. ਤੇ ਪਨ ਕਮ੍ਮਵੇਗੁਕ੍ਖਿਤ੍ਤਾ ਯਤ੍ਥ ਕਤ੍ਥਚਿ ਠਿਤਸ੍ਸ ਮਤ੍ਥਕੇਯੇਵ ਨਿਪਤਨ੍ਤਿ. ਕਿਂ ਨੁ ਸਦ੍ਦਾਯਸੇ ਤੁਵਨ੍ਤਿ ਕਿਂ ਨੁ ਖੋ ਤੁਵਂ ਸਦ੍ਦਂ ਕਰੋਸਿ, ਅਤਿਵਿਯ ਵਿਸ੍ਸਰਂ ਕਰੋਨ੍ਤੋ ਵਿਚਰਸਿ.

ਤਂ ਸੁਤ੍ਵਾ ਪੇਤੋ –

੮੦੭. ‘‘ਅਹਂ ਭਦਨ੍ਤੇ ਪੇਤੋਮ੍ਹਿ, ਦੁਗ੍ਗਤੋ ਯਮਲੋਕਿਕੋ;

ਪਾਪਕਮ੍ਮਂ ਕਰਿਤ੍ਵਾਨ, ਪੇਤਲੋਕਂ ਇਤੋ ਗਤੋ.

੮੦੮. ‘‘ਸਟ੍ਠਿ ਕੂਟਸਹਸ੍ਸਾਨਿ, ਪਰਿਪੁਣ੍ਣਾਨਿ ਸਬ੍ਬਸੋ;

ਸੀਸੇ ਮਯ੍ਹਂ ਨਿਪਤਨ੍ਤਿ, ਤੇ ਭਿਨ੍ਦਨ੍ਤਿ ਚ ਮਤ੍ਥਕ’’ਨ੍ਤਿ. –

ਦ੍ਵੀਹਿ ਗਾਥਾਹਿ ਪਟਿਵਚਨਂ ਅਦਾਸਿ. ਤਤ੍ਥ ਸਟ੍ਠਿ ਕੂਟਸਹਸ੍ਸਾਨੀਤਿ ਸਟ੍ਠਿਮਤ੍ਤਾਨਿ ਅਯੋਕੂਟਸਹਸ੍ਸਾਨਿ. ਪਰਿਪੁਣ੍ਣਾਨੀਤਿ ਅਨੂਨਾਨਿ. ਸਬ੍ਬਸੋਤਿ ਸਬ੍ਬਭਾਗਤੋ. ਤਸ੍ਸ ਕਿਰ ਸਟ੍ਠਿਯਾ ਅਯੋਕੂਟਸਹਸ੍ਸਾਨਂ ਪਤਨਪ੍ਪਹੋਨਕਂ ਮਹਨ੍ਤਂ ਪਬ੍ਬਤਕੂਟਪ੍ਪਮਾਣਂ ਸੀਸਂ ਨਿਬ੍ਬਤ੍ਤਿ. ਤਂ ਤਸ੍ਸ ਵਾਲਗ੍ਗਕੋਟਿਨਿਤੁਦਨਮਤ੍ਤਮ੍ਪਿ ਠਾਨਂ ਅਸੇਸੇਤ੍ਵਾ ਤਾਨਿ ਕੂਟਾਨਿ ਪਤਨ੍ਤਾਨਿ ਮਤ੍ਥਕਂ ਭਿਨ੍ਦਨ੍ਤਿ, ਤੇਨ ਸੋ ਅਟ੍ਟਸ੍ਸਰਂ ਕਰੋਤਿ. ਤੇਨ ਵੁਤ੍ਤਂ ‘‘ਸਬ੍ਬਸੋ ਸੀਸੇ ਮਯ੍ਹਂ ਨਿਪਤਨ੍ਤਿ, ਤੇ ਭਿਨ੍ਦਨ੍ਤਿ ਚ ਮਤ੍ਥਕ’’ਨ੍ਤਿ.

ਅਥ ਨਂ ਥੇਰੋ ਕਤਕਮ੍ਮਂ ਪੁਚ੍ਛਨ੍ਤੋ –

੮੦੯. ‘‘ਕਿਂ ਨੁ ਕਾਯੇਨ ਵਾਚਾਯ, ਮਨਸਾ ਦੁਕ੍ਕਟਂ ਕਤਂ;

ਕਿਸ੍ਸ ਕਮ੍ਮਵਿਪਾਕੇਨ, ਇਦਂ ਦੁਕ੍ਖਂ ਨਿਗਚ੍ਛਸਿ.

੮੧੦. ‘‘ਸਟ੍ਠਿ ਕੂਟਸਹਸ੍ਸਾਨਿ, ਪਰਿਪੁਣ੍ਣਾਨਿ ਸਬ੍ਬਸੋ;

ਸੀਸੇ ਤੁਯ੍ਹਂ ਨਿਪਤਨ੍ਤਿ, ਤੇ ਭਿਨ੍ਦਨ੍ਤਿ ਚ ਮਤ੍ਥਕ’’ਨ੍ਤਿ. –

ਦ੍ਵੇ ਗਾਥਾ ਅਭਾਸਿ.

ਤਸ੍ਸ ਪੇਤੋ ਅਤ੍ਤਨਾ ਕਤਕਮ੍ਮਂ ਆਚਿਕ੍ਖਨ੍ਤੋ –

੮੧੧. ‘‘ਅਥਦ੍ਦਸਾਸਿਂ ਸਮ੍ਬੁਦ੍ਧਂ, ਸੁਨੇਤ੍ਤਂ ਭਾਵਿਤਿਨ੍ਦ੍ਰਿਯਂ;

ਨਿਸਿਨ੍ਨਂ ਰੁਕ੍ਖਮੂਲਸ੍ਮਿਂ, ਝਾਯਨ੍ਤਂ ਅਕੁਤੋਭਯਂ.

੮੧੨. ‘‘ਸਾਲਿਤ੍ਤਕਪ੍ਪਹਾਰੇਨ, ਭਿਨ੍ਦਿਸ੍ਸਂ ਤਸ੍ਸ ਮਤ੍ਥਕਂ;

ਤਸ੍ਸਕਮ੍ਮਵਿਪਾਕੇਨ, ਇਦਂ ਦੁਕ੍ਖਂ ਨਿਗਚ੍ਛਿਸਂ.

੮੧੩. ‘‘ਸਟ੍ਠਿ ਕੂਟਸਹਸ੍ਸਾਨਿ, ਪਰਿਪੁਣ੍ਣਾਨਿ ਸਬ੍ਬਸੋ;

ਸੀਸੇ ਮਯ੍ਹਂ ਨਿਪਤਨ੍ਤਿ, ਤੇ ਭਿਨ੍ਦਨ੍ਤਿ ਚ ਮਤ੍ਥਕ’’ਨ੍ਤਿ. –

ਤਿਸ੍ਸੋ ਗਾਥਾਯੋ ਅਭਾਸਿ.

੮੧੧. ਤਤ੍ਥ ਸਮ੍ਬੁਦ੍ਧਨ੍ਤਿ ਪਚ੍ਚੇਕਸਮ੍ਬੁਦ੍ਧਂ. ਸੁਨੇਤ੍ਤਨ੍ਤਿ ਏਵਂਨਾਮਕਂ. ਭਾਵਿਤਿਨ੍ਦ੍ਰਿਯਨ੍ਤਿ ਅਰਿਯਮਗ੍ਗਭਾਵਨਾਯ ਭਾਵਿਤਸਦ੍ਧਾਦਿਇਨ੍ਦ੍ਰਿਯਂ.

੮੧੨-੧੩. ਸਾਲਿਤ੍ਤਕਪ੍ਪਹਾਰੇਨਾਤਿ ਸਾਲਿਤ੍ਤਕਂ ਵੁਚ੍ਚਤਿ ਧਨੁਕੇਨ, ਅਙ੍ਗੁਲੀਹਿ ਏਵ ਵਾ ਸਕ੍ਖਰਖਿਪਨਪਯੋਗੋ. ਤਥਾ ਹਿ ਸਕ੍ਖਰਾਯ ਪਹਾਰੇਨਾਤਿ ਵਾ ਪਾਠੋ. ਭਿਨ੍ਦਿਸ੍ਸਨ੍ਤਿ ਭਿਨ੍ਦਿਂ.

ਤਂ ਸੁਤ੍ਵਾ ਥੇਰੋ ‘‘ਅਤ੍ਤਨੋ ਕਤਕਮ੍ਮਾਨੁਰੂਪਮੇਵ ਇਦਾਨਿ ਪੁਰਾਣਕਮ੍ਮਸ੍ਸ ਇਦਂ ਫਲਂ ਪਟਿਲਭਤੀ’’ਤਿ ਦਸ੍ਸੇਨ੍ਤੋ –

੮੧੪. ‘‘ਧਮ੍ਮੇਨ ਤੇ ਕਾਪੁਰਿਸ;

ਸਟ੍ਠਿ ਕੂਟਸਹਸ੍ਸਾਨਿ, ਪਰਿਪੁਣ੍ਣਾਨਿ ਸਬ੍ਬਸੋ;

ਸੀਸੇ ਤੁਯ੍ਹਂ ਨਿਪਤਨ੍ਤਿ, ਤੇ ਭਿਨ੍ਦਨ੍ਤਿ ਚ ਮਤ੍ਥਕ’’ਨ੍ਤਿ. –

ਓਸਾਨਗਾਥਮਾਹ. ਤਤ੍ਥ ਧਮ੍ਮੇਨਾਤਿ ਅਨੁਰੂਪਕਾਰਣੇਨ. ਤੇਤਿ ਤਵ, ਤਸ੍ਮਿਂ ਪਚ੍ਚੇਕਬੁਦ੍ਧੇ ਅਪਰਜ੍ਝਨ੍ਤੇਨ ਤਯਾ ਕਤਸ੍ਸ ਪਾਪਕਮ੍ਮਸ੍ਸ ਅਨੁਚ੍ਛਵਿਕਮੇਵੇਤਂ ਫਲਂ ਤੁਯ੍ਹਂ ਉਪਨੀਤਂ. ਤਸ੍ਮਾ ਕੇਨਚਿ ਦੇਵੇਨ ਵਾ ਮਾਰੇਨ ਵਾ ਬ੍ਰਹ੍ਮੁਨਾ ਵਾ ਅਪਿ ਸਮ੍ਮਾਸਮ੍ਬੁਦ੍ਧੇਨਪਿ ਅਪ੍ਪਟਿਬਾਹਨੀਯਮੇਤਨ੍ਤਿ ਦਸ੍ਸੇਤਿ.

ਏਵਞ੍ਚ ਪਨ ਵਤ੍ਵਾ ਤਤੋ ਨਗਰੇ ਪਿਣ੍ਡਾਯ ਚਰਿਤ੍ਵਾ ਕਤਭਤ੍ਤਕਿਚ੍ਚੋ ਸਾਯਨ੍ਹਸਮਯੇ ਸਤ੍ਥਾਰਂ ਉਪਸਙ੍ਕਮਿਤ੍ਵਾ ਤਂ ਪਵਤ੍ਤਿਂ ਭਗਵਤੋ ਆਰੋਚੇਸਿ. ਭਗਵਾ ਤਮਤ੍ਥਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਸਮ੍ਪਤ੍ਤਪਰਿਸਾਯ ਧਮ੍ਮਂ ਦੇਸੇਨ੍ਤੋ ਪਚ੍ਚੇਕਬੁਦ੍ਧਾਨਂ ਗੁਣਾਨੁਭਾਵਂ ਕਮ੍ਮਾਨਞ੍ਚ ਅਵਞ੍ਝਤਂ ਪਕਾਸੇਸਿ, ਮਹਾਜਨੋ ਸਂਵੇਗਜਾਤੋ ਹੁਤ੍ਵਾ ਪਾਪਂ ਪਹਾਯ ਦਾਨਾਦਿਪੁਞ੍ਞਨਿਰਤੋ ਅਹੋਸੀਤਿ.

ਸਟ੍ਠਿਕੂਟਪੇਤਵਤ੍ਥੁਵਣ੍ਣਨਾ ਨਿਟ੍ਠਿਤਾ.

ਇਤਿ ਖੁਦ੍ਦਕ-ਅਟ੍ਠਕਥਾਯ ਪੇਤਵਤ੍ਥੁਸ੍ਮਿਂ

ਸੋਲ਼ਸਵਤ੍ਥੁਪਟਿਮਣ੍ਡਿਤਸ੍ਸ

ਚਤੁਤ੍ਥਸ੍ਸ ਮਹਾਵਗ੍ਗਸ੍ਸ ਅਤ੍ਥਸਂਵਣ੍ਣਨਾ ਨਿਟ੍ਠਿਤਾ.

ਨਿਗਮਨਕਥਾ

ਏਤ੍ਤਾਵਤਾ ਚ –

ਯੇ ਤੇ ਪੇਤੇਸੁ ਨਿਬ੍ਬਤ੍ਤਾ, ਸਤ੍ਤਾ ਦੁਕ੍ਕਟਕਾਰਿਨੋ;

ਯੇਹਿ ਕਮ੍ਮੇਹਿ ਤੇਸਂ ਤਂ, ਪਾਪਕਂ ਕਟੁਕਪ੍ਫਲਂ.

ਪਚ੍ਚਕ੍ਖਤੋ ਵਿਭਾਵੇਨ੍ਤੀ, ਪੁਚ੍ਛਾਵਿਸ੍ਸਜ੍ਜਨੇਹਿ ਚ;

ਯਾ ਦੇਸਨਾਨਿਯਾਮੇਨ, ਸਤਂ ਸਂਵੇਗਵਡ੍ਢਨੀ.

ਯਂ ਕਥਾਵਤ੍ਥੁਕੁਸਲਾ, ਸੁਪਰਿਞ੍ਞਾਤਵਤ੍ਥੁਕਾ;

ਪੇਤਵਤ੍ਥੂਤਿ ਨਾਮੇਨ, ਸਙ੍ਗਾਯਿਂਸੁ ਮਹੇਸਯੋ.

ਤਸ੍ਸ ਅਤ੍ਥਂ ਪਕਾਸੇਤੁਂ, ਪੋਰਾਣਟ੍ਠਕਥਾਨਯਂ;

ਨਿਸ੍ਸਾਯ ਯਾ ਸਮਾਰਦ੍ਧਾ, ਅਤ੍ਥਸਂਵਣ੍ਣਨਾ ਮਯਾ.

ਯਾ ਤਤ੍ਥ ਪਰਮਤ੍ਥਾਨਂ, ਤਤ੍ਥ ਤਤ੍ਥ ਯਥਾਰਹਂ;

ਪਕਾਸਨਾ ਪਰਮਤ੍ਥ-ਦੀਪਨੀ ਨਾਮ ਨਾਮਤੋ.

ਸਮ੍ਪਤ੍ਤਾ ਪਰਿਨਿਟ੍ਠਾਨਂ, ਅਨਾਕੁਲਵਿਨਿਚ੍ਛਯਾ;

ਸਾ ਪਨ੍ਨਰਸਮਤ੍ਤਾਯ, ਪਾਲ਼ਿਯਾ ਭਾਣਵਾਰਤੋ.

ਇਤਿ ਤਂ ਸਙ੍ਖਰੋਨ੍ਤੇਨ, ਯਂ ਤਂ ਅਧਿਗਤਂ ਮਯਾ;

ਪੁਞ੍ਞਂ ਤਸ੍ਸਾਨੁਭਾਵੇਨ, ਲੋਕਨਾਥਸ੍ਸ ਸਾਸਨਂ.

ਓਗਾਹੇਤ੍ਵਾ ਵਿਸੁਦ੍ਧਾਯ, ਸੀਲਾਦਿਪਟਿਪਤ੍ਤਿਯਾ;

ਸਬ੍ਬੇਪਿ ਦੇਹਿਨੋ ਹੋਨ੍ਤੁ, ਵਿਮੁਤ੍ਤਿਰਸਭਾਗਿਨੋ.

ਚਿਰਂ ਤਿਟ੍ਠਤੁ ਲੋਕਸ੍ਮਿਂ, ਸਮ੍ਮਾਸਮ੍ਬੁਦ੍ਧਸਾਸਨਂ;

ਤਸ੍ਮਿਂ ਸਗਾਰਵਾ ਨਿਚ੍ਚਂ, ਹੋਨ੍ਤੁ ਸਬ੍ਬੇਪਿ ਪਾਣਿਨੋ.

ਸਮ੍ਮਾ ਵਸ੍ਸਤੁ ਕਾਲੇਨ, ਦੇਵੋਪਿ ਜਗਤੀਪਤਿ;

ਸਦ੍ਧਮ੍ਮਨਿਰਤੋ ਲੋਕਂ, ਧਮ੍ਮੇਨੇਵ ਪਸਾਸਤੂਤਿ.

ਇਤਿ ਬਦਰਤਿਤ੍ਥਵਿਹਾਰਵਾਸਿਨਾ ਮੁਨਿਵਰਯਤਿਨਾ

ਭਦਨ੍ਤੇਨ ਆਚਰਿਯਧਮ੍ਮਪਾਲੇਨ ਕਤਾ ਪੇਤਵਤ੍ਥੁਅਤ੍ਥਸਂਵਣ੍ਣਨਾ ਨਿਟ੍ਠਿਤਾ.

ਪੇਤਵਤ੍ਥੁ-ਅਟ੍ਠਕਥਾ ਸਮਤ੍ਤਾ.