੧੫. ਸੇਟ੍ਠਿਪੁਤ੍ਤਪੇਤਵਤ੍ਥੁਵਣ੍ਣਨਾ

ਸਟ੍ਠਿਵਸ੍ਸਸਹਸ੍ਸਾਨੀਤਿ ਇਦਂ ਸੇਟ੍ਠਿਪੁਤ੍ਤਪੇਤਵਤ੍ਥੁ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ. ਤੇਨ ਖੋ ਪਨ ਸਮਯੇਨ ਰਾਜਾ ਪਸੇਨਦਿ ਕੋਸਲੋ ਅਲਙ੍ਕਤਪ੍ਪਟਿਯਤ੍ਤੋ ਹਤ੍ਥਿਕ੍ਖਨ੍ਧਵਰਗਤੋ ਮਹਤਿਯਾ ਰਾਜਿਦ੍ਧਿਯਾ ਮਹਨ੍ਤੇਨ ਰਾਜਾਨੁਭਾਵੇਨ ਨਗਰਂ ਅਨੁਸਞ੍ਚਰਨ੍ਤੋ ਅਞ੍ਞਤਰਸ੍ਮਿਂ ਗੇਹੇ ਉਪਰਿਪਾਸਾਦੇ ਵਾਤਪਾਨਂ ਵਿਵਰਿਤ੍ਵਾ ਤਂ ਰਾਜਵਿਭੂਤਿਂ ਓਲੋਕੇਨ੍ਤਿਂ ਰੂਪਸਮ੍ਪਤ੍ਤਿਯਾ ਦੇਵਚ੍ਛਰਾਪਟਿਭਾਗਂ ਏਕਂ ਇਤ੍ਥਿਂ ਦਿਸ੍ਵਾ ਅਦਿਟ੍ਠਪੁਬ੍ਬੇ ਆਰਮ੍ਮਣੇ ਸਹਸਾ ਸਮੁਪ੍ਪਨ੍ਨੇਨ ਕਿਲੇਸਸਮੁਦਾਚਾਰੇਨ ਪਰਿਯੁਟ੍ਠਿਤਚਿਤ੍ਤੋ ਸਤਿਪਿ ਕੁਲਰੂਪਾਚਾਰਾਦਿਗੁਣਵਿਸੇਸਸਮ੍ਪਨ੍ਨੇ ਅਨ੍ਤੇਪੁਰਜਨੇ ਸਭਾਵਲਹੁਕਸ੍ਸ ਪਨ ਦੁਦ੍ਦਮਸ੍ਸ ਚਿਤ੍ਤਸ੍ਸ ਵਸੇਨ ਤਸ੍ਸਂ ਇਤ੍ਥਿਯਂ ਪਟਿਬਦ੍ਧਮਾਨਸੋ ਹੁਤ੍ਵਾ ਪਚ੍ਛਾਸਨੇ ਨਿਸਿਨ੍ਨਸ੍ਸ ਪੁਰਿਸਸ੍ਸ ‘‘ਇਮਂ ਪਾਸਾਦਂ ਇਮਞ੍ਚ ਇਤ੍ਥਿਂ ਉਪਧਾਰੇਹੀ’’ਤਿ ਸਞ੍ਞਂ ਦਤ੍ਵਾ ਰਾਜਗੇਹਂ ਪਵਿਟ੍ਠੋ. ਅਞ੍ਞਂ ਸਬ੍ਬਂ ਅਮ੍ਬਸਕ੍ਕਰਪੇਤਵਤ੍ਥੁਮ੍ਹਿ ਆਗਤਨਯੇਨੇਵ ਵੇਦਿਤਬ੍ਬਂ.

ਅਯਂ ਪਨ ਵਿਸੇਸੋ – ਇਧ ਪੁਰਿਸੋ ਸੂਰਿਯੇ ਅਨਤ੍ਥਙ੍ਗਤੇਯੇਵ ਆਗਨ੍ਤ੍ਵਾ ਨਗਰਦ੍ਵਾਰੇ ਥਕਿਤੇ ਅਤ੍ਤਨਾ ਆਨੀਤਂ ਅਰੁਣਵਣ੍ਣਮਤ੍ਤਿਕਂ ਉਪ੍ਪਲਾਨਿ ਚ ਨਗਰਦ੍ਵਾਰਕਵਾਟੇ ਲਗ੍ਗੇਤ੍ਵਾ ਨਿਪਜ੍ਜਿਤੁਂ ਜੇਤਵਨਂ ਅਗਮਾਸਿ. ਰਾਜਾ ਪਨ ਸਿਰਿਸਯਨੇ ਵਾਸੂਪਗਤੋ ਮਜ੍ਝਿਮਯਾਮੇ ਸ-ਇਤਿ ਨ-ਇਤਿ ਦੁ-ਇਤਿ ਸੋ-ਇਤਿ ਚ ਇਮਾਨਿ ਚਤ੍ਤਾਰਿ ਅਕ੍ਖਰਾਨਿ ਮਹਤਾ ਕਣ੍ਠੇਨ ਉਚ੍ਚਾਰਿਤਾਨਿ ਵਿਯ ਵਿਸ੍ਸਰਵਸੇਨ ਅਸ੍ਸੋਸਿ. ਤਾਨਿ ਕਿਰ ਅਤੀਤੇ ਕਾਲੇ ਸਾਵਤ੍ਥਿਵਾਸੀਹਿ ਚਤੂਹਿ ਸੇਟ੍ਠਿਪੁਤ੍ਤੇਹਿ ਭੋਗਮਦਮਤ੍ਤੇਹਿ ਯੋਬ੍ਬਨਕਾਲੇ ਪਾਰਦਾਰਿਕਕਮ੍ਮਵਸੇਨ ਬਹੁਂ ਅਪੁਞ੍ਞਂ ਪਸਵੇਤ੍ਵਾ ਅਪਰਭਾਗੇ ਕਾਲਂ ਕਤ੍ਵਾ ਤਸ੍ਸੇਵ ਨਗਰਸ੍ਸ ਸਮੀਪੇ ਲੋਹਕੁਮ੍ਭਿਯਂ ਨਿਬ੍ਬਤ੍ਤਿਤ੍ਵਾ ਪਚ੍ਚਮਾਨੇਹਿ ਲੋਹਕੁਮ੍ਭਿਯਾ ਮੁਖਵਟ੍ਟਿਂ ਪਤ੍ਵਾ ਏਕੇਕਂ ਗਾਥਂ ਵਤ੍ਥੁਕਾਮੇਹਿ ਉਚ੍ਚਾਰਿਤਾਨਂ ਤਾਸਂ ਗਾਥਾਨਂ ਆਦਿਅਕ੍ਖਰਾਨਿ, ਤੇ ਪਠਮਕ੍ਖਰਮੇਵ ਵਤ੍ਵਾ ਵੇਦਨਾਪ੍ਪਤ੍ਤਾ ਹੁਤ੍ਵਾ ਲੋਹਕੁਮ੍ਭਿਂ ਓਤਰਿਂਸੁ.

ਰਾਜਾ ਪਨ ਤਂ ਸਦ੍ਦਂ ਸੁਤ੍ਵਾ ਭੀਤਤਸਿਤੋ ਸਂਵਿਗ੍ਗੋ ਲੋਮਹਟ੍ਠਜਾਤੋ ਤਂ ਰਤ੍ਤਾਵਸੇਸਂ ਦੁਕ੍ਖੇਨ ਵੀਤਿਨਾਮੇਤ੍ਵਾ ਵਿਭਾਤਾਯ ਰਤ੍ਤਿਯਾ ਪੁਰੋਹਿਤਂ ਪਕ੍ਕੋਸਾਪੇਤ੍ਵਾ ਤਂ ਪਵਤ੍ਤਿਂ ਕਥੇਸਿ. ਪੁਰੋਹਿਤੋ ਰਾਜਾਨਂ ਭੀਤਤਸਿਤਂ ਞਤ੍ਵਾ ਲਾਭਗਿਦ੍ਧੋ ‘‘ਉਪ੍ਪਨ੍ਨੋ ਖੋ ਅਯਂ ਮਯ੍ਹਂ ਬ੍ਰਾਹ੍ਮਣਾਨਞ੍ਚ ਲਾਭੁਪ੍ਪਾਦਨੁਪਾਯੋ’’ਤਿ ਚਿਨ੍ਤੇਤ੍ਵਾ ‘‘ਮਹਾਰਾਜ, ਮਹਾ ਵਤਾਯਂ ਉਪਦ੍ਦਵੋ ਉਪ੍ਪਨ੍ਨੋ, ਸਬ੍ਬਚਤੁਕ੍ਕਂ ਯਞ੍ਞਂ ਯਜਾਹੀ’’ਤਿ ਆਹ. ਰਾਜਾ ਤਸ੍ਸ ਵਚਨਂ ਸੁਤ੍ਵਾ ਅਮਚ੍ਚੇ ਆਣਾਪੇਸਿ ‘‘ਸਬ੍ਬਚਤੁਕ੍ਕਯਞ੍ਞਸ੍ਸ ਉਪਕਰਣਾਨਿ ਸਜ੍ਜੇਥਾ’’ਤਿ. ਤਂ ਸੁਤ੍ਵਾ ਮਲ੍ਲਿਕਾ ਦੇਵੀ ਰਾਜਾਨਂ ਏਵਮਾਹ – ‘‘ਕਸ੍ਮਾ, ਮਹਾਰਾਜ, ਬ੍ਰਾਹ੍ਮਣਸ੍ਸ ਵਚਨਂ ਸੁਤ੍ਵਾ ਅਨੇਕਪਾਣਵਧਹਿਂਸਨਕਕਿਚ੍ਚਂ ਕਾਤੁਕਾਮੋਸਿ, ਨਨੁ ਸਬ੍ਬਤ੍ਥ ਅਪ੍ਪਟਿਹਤਞਾਣਚਾਰੋ ਭਗਵਾ ਪੁਚ੍ਛਿਤਬ੍ਬੋ? ਯਥਾ ਚ ਤੇ ਭਗਵਾ ਬ੍ਯਾਕਰਿਸ੍ਸਤਿ, ਤਥਾ ਪਟਿਪਜ੍ਜਿਤਬ੍ਬ’’ਨ੍ਤਿ. ਰਾਜਾ ਤਸ੍ਸਾ ਵਚਨਂ ਸੁਤ੍ਵਾ ਸਤ੍ਥੁ ਸਨ੍ਤਿਕਂ ਗਨ੍ਤ੍ਵਾ ਤਂ ਪਵਤ੍ਤਿਂ ਭਗਵਤੋ ਆਰੋਚੇਸਿ. ਭਗਵਾ ‘‘ਨ, ਮਹਾਰਾਜ, ਤਤੋਨਿਦਾਨਂ ਤੁਯ੍ਹਂ ਕੋਚਿ ਅਨ੍ਤਰਾਯੋ’’ਤਿ ਵਤ੍ਵਾ ਆਦਿਤੋ ਪਟ੍ਠਾਯ ਤੇਸਂ ਲੋਹਕੁਮ੍ਭਿਨਿਰਯੇ ਨਿਬ੍ਬਤ੍ਤਸਤ੍ਤਾਨਂ ਪਵਤ੍ਤਿਂ ਕਥੇਤ੍ਵਾ ਤੇਹਿ ਪਚ੍ਚੇਕਂ ਉਚ੍ਚਾਰੇਤੁਂ ਆਰਦ੍ਧਗਾਥਾਯੋ –

੮੦੨. ‘‘ਸਟ੍ਠਿਵਸ੍ਸਸਹਸ੍ਸਾਨਿ, ਪਰਿਪੁਣ੍ਣਾਨਿ ਸਬ੍ਬਸੋ;

ਨਿਰਯੇ ਪਚ੍ਚਮਾਨਾਨਂ, ਕਦਾ ਅਨ੍ਤੋ ਭਵਿਸ੍ਸਤਿ.

੮੦੩. ‘‘ਨਤ੍ਥਿ ਅਨ੍ਤੋ ਕੁਤੋ ਅਨ੍ਤੋ, ਨ ਅਨ੍ਤੋ ਪਟਿਦਿਸ੍ਸਤਿ;

ਤਥਾ ਹਿ ਪਕਤਂ ਪਾਪਂ, ਤੁਯ੍ਹਂ ਮਯ੍ਹਞ੍ਚ ਮਾਰਿਸਾ.

੮੦੪. ‘‘ਦੁਜ੍ਜੀਵਿਤਮਜੀਵਿਮ੍ਹ, ਯੇ ਸਨ੍ਤੇ ਨ ਦਦਮ੍ਹਸੇ;

ਸਨ੍ਤੇਸੁ ਦੇਯ੍ਯਧਮ੍ਮੇਸੁ, ਦੀਪਂ ਨਾਕਮ੍ਹ ਅਤ੍ਤਨੋ.

੮੦੫. ‘‘ਸੋਹਂ ਨੂਨ ਇਤੋ ਗਨ੍ਤ੍ਵਾ, ਯੋਨਿਂ ਲਦ੍ਧਾਨ ਮਾਨੁਸਿਂ;

ਵਦਞ੍ਞੂ ਸੀਲਸਮ੍ਪਨ੍ਨੋ, ਕਾਹਾਮਿ ਕੁਸਲਂ ਬਹੁ’’ਨ੍ਤਿ. –

ਪਰਿਪੁਣ੍ਣਂ ਕਤ੍ਵਾ ਕਥੇਸਿ.

੮੦੨. ਤਤ੍ਥ ਸਟ੍ਠਿਵਸ੍ਸਸਹਸ੍ਸਾਨੀਤਿ ਵਸ੍ਸਾਨਂ ਸਟ੍ਠਿਸਹਸ੍ਸਾਨਿ. ਤਸ੍ਮਿਂ ਕਿਰ ਲੋਹਕੁਮ੍ਭਿਨਿਰਯੇ ਨਿਬ੍ਬਤ੍ਤਸਤ੍ਤੋ ਅਧੋ ਓਗਚ੍ਛਨ੍ਤੋ ਤਿਂਸਾਯ ਵਸ੍ਸਸਹਸ੍ਸੇਹਿ ਹੇਟ੍ਠਿਮਤਲਂ ਪਾਪੁਣਾਤਿ, ਤਤੋ ਉਦ੍ਧਂ ਉਗ੍ਗਚ੍ਛਨ੍ਤੋਪਿ ਤਿਂਸਾਯ ਏਵ ਵਸ੍ਸਸਹਸ੍ਸੇਹਿ ਮੁਖਵਟ੍ਟਿਪਦੇਸਂ ਪਾਪੁਣਾਤਿ, ਤਾਯ ਸਞ੍ਞਾਯ ਸੋ ‘‘ਸਟ੍ਠਿਵਸ੍ਸਸਹਸ੍ਸਾਨਿ, ਪਰਿਪੁਣ੍ਣਾਨਿ ਸਬ੍ਬਸੋ’’ਤਿ ਗਾਥਂ ਵਤ੍ਤੁਕਾਮੋ ਸ-ਇਤਿ ਵਤ੍ਵਾ ਅਧਿਮਤ੍ਤਵੇਦਨਾਪ੍ਪਤ੍ਤੋ ਹੁਤ੍ਵਾ ਅਧੋਮੁਖੋ ਪਤਿ. ਭਗਵਾ ਪਨ ਤਂ ਰਞ੍ਞੋ ਪਰਿਪੁਣ੍ਣਂ ਕਤ੍ਵਾ ਕਥੇਸਿ. ਏਸ ਨਯੋ ਸੇਸਗਾਥਾਸੁਪਿ. ਤਤ੍ਥ ਕਦਾ ਅਨ੍ਤੋ ਭਵਿਸ੍ਸਤੀਤਿ ਲੋਹਕੁਮ੍ਭਿਨਿਰਯੇ ਪਚ੍ਚਮਾਨਾਨਂ ਅਮ੍ਹਾਕਂ ਕਦਾ ਨੁ ਖੋ ਇਮਸ੍ਸ ਦੁਕ੍ਖਸ੍ਸ ਅਨ੍ਤੋ ਪਰਿਯੋਸਾਨਂ ਭਵਿਸ੍ਸਤਿ.

੮੦੩. ਤਥਾ ਹੀਤਿ ਯਥਾ ਤੁਯ੍ਹਂ ਮਯ੍ਹਞ੍ਚ ਇਮਸ੍ਸ ਦੁਕ੍ਖਸ੍ਸ ਨਤ੍ਥਿ ਅਨ੍ਤੋ, ਨ ਅਨ੍ਤੋ ਪਟਿਦਿਸ੍ਸਤਿ, ਤਥਾ ਤੇਨ ਪਕਾਰੇਨ ਪਾਪਕਂ ਕਮ੍ਮਂ ਪਕਤਂ ਤਯਾ ਮਯਾ ਚਾਤਿ ਵਿਭਤ੍ਤਿਂ ਵਿਪਰਿਣਾਮੇਤ੍ਵਾ ਵਤ੍ਤਬ੍ਬਂ.

੮੦੪. ਦੁਜ੍ਜੀਵਿਤਨ੍ਤਿ ਵਿਞ੍ਞੂਹਿ ਗਰਹਿਤਬ੍ਬਂ ਜੀਵਿਤਂ. ਯੇ ਸਨ੍ਤੇਤਿ ਯੇ ਮਯਂ ਸਨ੍ਤੇ ਵਿਜ੍ਜਮਾਨੇ ਦੇਯ੍ਯਧਮ੍ਮੇ. ਨ ਦਦਮ੍ਹਸੇਤਿ ਨ ਅਦਮ੍ਹ. ਵੁਤ੍ਤਮੇਵਤ੍ਥਂ ਪਾਕਟਤਰਂ ਕਾਤੁਂ ‘‘ਸਨ੍ਤੇਸੁ ਦੇਯ੍ਯਧਮ੍ਮੇਸੁ, ਦੀਪਂ ਨਾਕਮ੍ਹ ਅਤ੍ਤਨੋ’’ਤਿ ਵੁਤ੍ਤਂ.

੮੦੫. ਸੋਹਨ੍ਤਿ ਸੋ ਅਹਂ. ਨੂਨਾਤਿ ਪਰਿਵਿਤਕ੍ਕੇ ਨਿਪਾਤੋ. ਇਤੋਤਿ ਇਮਸ੍ਮਾ ਲੋਹਕੁਮ੍ਭਿਨਿਰਯਾ. ਗਨ੍ਤ੍ਵਾਤਿ ਅਪਗਨ੍ਤ੍ਵਾ. ਯੋਨਿਂ ਲਦ੍ਧਾਨ ਮਾਨੁਸਿਨ੍ਤਿ ਮਨੁਸ੍ਸਯੋਨਿਂ ਮਨੁਸ੍ਸਤ੍ਤਭਾਵਂ ਲਭਿਤ੍ਵਾ. ਵਦਞ੍ਞੂਤਿ ਪਰਿਚ੍ਚਾਗਸੀਲੋ, ਯਾਚਕਾਨਂ ਵਾ ਵਚਨਞ੍ਞੂ. ਸੀਲਸਮ੍ਪਨ੍ਨੋਤਿ ਸੀਲਾਚਾਰਸਮ੍ਪਨ੍ਨੋ. ਕਾਹਾਮਿ ਕੁਸਲਂ ਬਹੁਨ੍ਤਿ ਪੁਬ੍ਬੇ ਵਿਯ ਪਮਾਦਂ ਅਨਾਪਜ੍ਜਿਤ੍ਵਾ ਬਹੁਂ ਪਹੂਤਂ ਕੁਸਲਂ ਪੁਞ੍ਞਕਮ੍ਮਂ ਕਰਿਸ੍ਸਾਮਿ, ਉਪਚਿਨਿਸ੍ਸਾਮੀਤਿ ਅਤ੍ਥੋ.

ਸਤ੍ਥਾ ਇਮਾ ਗਾਥਾਯੋ ਵਤ੍ਵਾ ਵਿਤ੍ਥਾਰੇਨ ਧਮ੍ਮਂ ਦੇਸੇਸਿ, ਦੇਸਨਾਪਰਿਯੋਸਾਨੇ ਮਤ੍ਤਿਕਾਰਤ੍ਤੁਪ੍ਪਲਹਾਰਕੋ ਪੁਰਿਸੋ ਸੋਤਾਪਤ੍ਤਿਫਲੇ ਪਤਿਟ੍ਠਹਿ. ਰਾਜਾ ਸਞ੍ਜਾਤਸਂਵੇਗੋ ਪਰਪਰਿਗ੍ਗਹੇ ਅਭਿਜ੍ਝਂ ਪਹਾਯ ਸਦਾਰਸਨ੍ਤੁਟ੍ਠੋ ਅਹੋਸੀਤਿ.

ਸੇਟ੍ਠਿਪੁਤ੍ਤਪੇਤਵਤ੍ਥੁਵਣ੍ਣਨਾ ਨਿਟ੍ਠਿਤਾ.