੧੪. ਭੋਗਸਂਹਰਣਪੇਤਿਵਤ੍ਥੁਵਣ੍ਣਨਾ

ਮਯਂ ਭੋਗੇ ਸਂਹਰਿਮ੍ਹਾਤਿ ਇਦਂ ਭੋਗਸਂਹਰਣਪੇਤਿਵਤ੍ਥੁ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਤਿ ਵੇਲ਼ੁਵਨੇ ਵਿਹਰਨ੍ਤੇ ਰਾਜਗਹੇ ਕਿਰ ਚਤਸ੍ਸੋ ਇਤ੍ਥਿਯੋ ਮਾਨਕੂਟਾਦਿਵਸੇਨ ਸਪ੍ਪਿਮਧੁਤੇਲਧਞ੍ਞਾਦੀਹਿ ਵੋਹਾਰਂ ਕਤ੍ਵਾ ਅਯੋਨਿਸੋ ਭੋਗੇ ਸਂਹਰਿਤ੍ਵਾ ਜੀਵਨ੍ਤਿ. ਤਾ ਕਾਯਸ੍ਸ ਭੇਦਾ ਪਰਂ ਮਰਣਾ ਬਹਿਨਗਰੇ ਪਰਿਖਾਪਿਟ੍ਠੇ ਪੇਤਿਯੋ ਹੁਤ੍ਵਾ ਨਿਬ੍ਬਤ੍ਤਿਂਸੁ. ਤਾ ਰਤ੍ਤਿਯਂ ਦੁਕ੍ਖਾਭਿਭੂਤਾ –

੮੦੧. ‘‘ਮਯਂ ਭੋਗੇ ਸਂਹਰਿਮ੍ਹਾ, ਸਮੇਨ ਵਿਸਮੇਨ ਚ;

ਤੇ ਅਞ੍ਞੇ ਪਰਿਭੁਞ੍ਜਨ੍ਤਿ, ਮਯਂ ਦੁਕ੍ਖਸ੍ਸ ਭਾਗਿਨੀ’’ਤਿ. –

ਵਿਪ੍ਪਲਪਨ੍ਤਿਯੋ ਭੇਰਵੇਨ ਮਹਾਸਦ੍ਦੇਨ ਵਿਰਵਿਂਸੁ. ਮਨੁਸ੍ਸਾ ਤਂ ਸੁਤ੍ਵਾ ਭੀਤਤਸਿਤਾ ਵਿਭਾਤਾਯ ਰਤ੍ਤਿਯਾ ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਮਹਾਦਾਨਂ ਸਜ੍ਜੇਤ੍ਵਾ ਸਤ੍ਥਾਰਂ ਭਿਕ੍ਖੁਸਙ੍ਘਞ੍ਚ ਨਿਮਨ੍ਤੇਤ੍ਵਾ ਪਣੀਤੇਨ ਖਾਦਨੀਯੇਨ ਭੋਜਨੀਯੇਨ ਪਰਿਵਿਸਿਤ੍ਵਾ ਭਗਵਨ੍ਤਂ ਭੁਤ੍ਤਾਵਿਂ ਓਨੀਤਪਤ੍ਤਪਾਣਿਂ ਉਪਨਿਸੀਦਿਤ੍ਵਾ ਤਂ ਪਵਤ੍ਤਿਂ ਨਿਵੇਦੇਸੁਂ. ਭਗਵਾ ‘‘ਉਪਾਸਕਾ ਤੇਨ ਵੋ ਸਦ੍ਦੇਨ ਕੋਚਿ ਅਨ੍ਤਰਾਯੋ ਨਤ੍ਥਿ, ਚਤਸ੍ਸੋ ਪਨ ਪੇਤਿਯੋ ਦੁਕ੍ਖਾਭਿਭੂਤਾ ਅਤ੍ਤਨਾ ਦੁਕ੍ਕਟਂ ਕਮ੍ਮਂ ਕਥੇਤ੍ਵਾ ਪਰਿਦੇਵਨਵਸੇਨ ਵਿਸ੍ਸਰੇਨ ਵਿਰਵਨ੍ਤਿਯੋ –

‘‘ਮਯਂ ਭੋਗੇ ਸਂਹਰਿਮ੍ਹਾ, ਸਮੇਨ ਵਿਸਮੇਨ ਚ;

ਤੇ ਅਞ੍ਞੇ ਪਰਿਭੁਞ੍ਜਨ੍ਤਿ, ਮਯਂ ਦੁਕ੍ਖਸ੍ਸ ਭਾਗਿਨੀ’’ਤਿ. –

ਇਮਂ ਗਾਥਮਾਹਂਸੂਤਿ ਅਵੋਚ.

ਤਤ੍ਥ ਭੋਗੇਤਿ ਪਰਿਭੁਞ੍ਜਿਤਬ੍ਬਟ੍ਠੇਨ ‘‘ਭੋਗਾ’’ਤਿ ਲਦ੍ਧਨਾਮੇ ਵਤ੍ਥਾਭਰਣਾਦਿਕੇ ਵਿਤ੍ਤੂਪਕਰਣਵਿਸੇਸੇ. ਸਂਹਰਿਮ੍ਹਾਤਿ ਮਚ੍ਛੇਰਮਲੇਨ ਪਰਿਯਾਦਿਨ੍ਨਚਿਤ੍ਤਾ ਕਸ੍ਸਚਿ ਕਿਞ੍ਚਿ ਅਦਤ੍ਵਾ ਸਞ੍ਚਿਨਿਮ੍ਹ. ਸਮੇਨ ਵਿਸਮੇਨ ਚਾਤਿ ਞਾਯੇਨ ਚ ਅਞ੍ਞਾਯੇਨ ਚ, ਞਾਯਪਤਿਰੂਪਕੇਨ ਵਾ ਅਞ੍ਞਾਯੇਨ ਤੇ ਭੋਗੇ ਅਮ੍ਹੇਹਿ ਸਂਹਰਿਤੇ ਇਦਾਨਿ ਅਞ੍ਞੇ ਪਰਿਭੁਞ੍ਜਨ੍ਤਿ. ਮਯਂ ਦੁਕ੍ਖਸ੍ਸ ਭਾਗਿਨੀਤਿ ਮਯਂ ਪਨ ਕਸ੍ਸਚਿਪਿ ਸੁਚਰਿਤਸ੍ਸ ਅਕਤਤ੍ਤਾ ਦੁਚ੍ਚਰਿਤਸ੍ਸ ਚ ਕਤਤ੍ਤਾ ਏਤਰਹਿ ਪੇਤਯੋਨਿਪਰਿਯਾਪਨ੍ਨਸ੍ਸ ਮਹਤੋ ਦੁਕ੍ਖਸ੍ਸ ਭਾਗਿਨਿਯੋ ਭਵਾਮ, ਮਹਾਦੁਕ੍ਖਂ ਅਨੁਭਵਾਮਾਤਿ ਅਤ੍ਥੋ.

ਏਵਂ ਭਗਵਾ ਤਾਹਿ ਪੇਤੀਹਿ ਵੁਤ੍ਤਂ ਗਾਥਂ ਵਤ੍ਵਾ ਤਾਸਂ ਪਵਤ੍ਤਿਂ ਕਥੇਤ੍ਵਾ ਤਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਸਮ੍ਪਤ੍ਤਪਰਿਸਾਯ ਧਮ੍ਮਂ ਦੇਸੇਤ੍ਵਾ ਉਪਰਿ ਸਚ੍ਚਾਨਿ ਪਕਾਸੇਸਿ, ਸਚ੍ਚਪਰਿਯੋਸਾਨੇ ਬਹੂ ਸੋਤਾਪਤ੍ਤਿਫਲਾਦੀਨਿ ਪਾਪੁਣਿਂਸੂਤਿ.

ਭੋਗਸਂਹਰਣਪੇਤਿਵਤ੍ਥੁਵਣ੍ਣਨਾ ਨਿਟ੍ਠਿਤਾ.