੧੩. ਅਕ੍ਖਰੁਕ੍ਖਪੇਤਵਤ੍ਥੁਵਣ੍ਣਨਾ

ਯਂ ਦਦਾਤਿ ਨ ਤਂ ਹੋਤੀਤਿ ਇਦਂ ਅਕ੍ਖਦਾਯਕਪੇਤਵਤ੍ਥੁ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਤਿ ਸਾਵਤ੍ਥਿਯਂ ਵਿਹਰਨ੍ਤੇ ਅਞ੍ਞਤਰੋ ਸਾਵਤ੍ਥਿਵਾਸੀ ਉਪਾਸਕੋ ਸਕਟੇਹਿ ਭਣ੍ਡਸ੍ਸ ਪੂਰੇਤ੍ਵਾ ਵਣਿਜ੍ਜਾਯ ਵਿਦੇਸਂ ਗਨ੍ਤ੍ਵਾ ਤਤ੍ਥ ਅਤ੍ਤਨੋ ਭਣ੍ਡਂ ਵਿਕ੍ਕਿਣਿਤ੍ਵਾ ਪਟਿਭਣ੍ਡਂ ਸਕਟੇਸੁ ਆਰੋਪੇਤ੍ਵਾ ਸਾਵਤ੍ਥਿਂ ਉਦ੍ਦਿਸ੍ਸ ਮਗ੍ਗਂ ਪਟਿਪਜ੍ਜਿ. ਤਸ੍ਸ ਮਗ੍ਗਂ ਗਚ੍ਛਨ੍ਤਸ੍ਸ ਅਟਵਿਯਂ ਏਕਸ੍ਸ ਸਕਟਸ੍ਸ ਅਕ੍ਖੋ ਭਿਜ੍ਜਿ. ਅਥ ਅਞ੍ਞਤਰੋ ਪੁਰਿਸੋ ਰੁਕ੍ਖਗਹਣਤ੍ਥਂ ਕੁਠਾਰਿਫਰਸੁਂ ਗਾਹਾਪੇਤ੍ਵਾ ਅਤ੍ਤਨੋ ਗਾਮਤੋ ਨਿਕ੍ਖਮਿਤ੍ਵਾ ਅਰਞ੍ਞੇ ਵਿਚਰਨ੍ਤੋ ਤਂ ਠਾਨਂ ਪਤ੍ਵਾ ਤਂ ਉਪਾਸਕਂ ਅਕ੍ਖਭਞ੍ਜਨੇਨ ਦੋਮਨਸ੍ਸਪ੍ਪਤ੍ਤਂ ਦਿਸ੍ਵਾ ‘‘ਅਯਂ ਵਾਣਿਜੋ ਅਕ੍ਖਭਞ੍ਜਨੇਨ ਅਟਵਿਯਂ ਕਿਲਮਤੀ’’ਤਿ ਅਨੁਕਮ੍ਪਂ ਉਪਾਦਾਯ ਰੁਕ੍ਖਦਣ੍ਡਂ ਛਿਨ੍ਦਿਤ੍ਵਾ ਦਲ਼੍ਹਂ ਅਕ੍ਖਂ ਕਤ੍ਵਾ ਸਕਟੇ ਯੋਜੇਤ੍ਵਾ ਅਦਾਸਿ.

ਸੋ ਅਪਰੇਨ ਸਮਯੇਨ ਕਾਲਂ ਕਤ੍ਵਾ ਤਸ੍ਮਿਂਯੇਵ ਅਟਵਿਪਦੇਸੇ ਭੁਮ੍ਮਦੇਵਤਾ ਹੁਤ੍ਵਾ ਨਿਬ੍ਬਤ੍ਤੋ. ਅਤ੍ਤਨੋ ਕਮ੍ਮਂ ਪਚ੍ਚਵੇਕ੍ਖਿਤ੍ਵਾ ਰਤ੍ਤਿਯਂ ਤਸ੍ਸ ਉਪਾਸਕਸ੍ਸ ਗੇਹਂ ਗਨ੍ਤ੍ਵਾ ਗੇਹਦ੍ਵਾਰੇ ਠਤ੍ਵਾ –

੮੦੦. ‘‘ਯਂ ਦਦਾਤਿ ਨ ਤਂ ਹੋਤਿ, ਦੇਥੇਵ ਦਾਨਂ ਦਤ੍ਵਾ ਉਭਯਂ ਤਰਤਿ;

ਉਭਯਂ ਤੇਨ ਦਾਨੇਨ ਗਚ੍ਛਤਿ, ਜਾਗਰਥ ਮਾ ਪਮਜ੍ਜਥਾ’’ਤਿ. –

ਗਾਥਮਾਹ. ਤਤ੍ਥ ਯਂ ਦਦਾਤਿ ਨ ਤਂ ਹੋਤੀਤਿ ਯਂ ਦੇਯ੍ਯਧਮ੍ਮਂ ਦਾਯਕੋ ਦੇਤਿ, ਨ ਤਦੇਵ ਪਰਲੋਕੇ ਤਸ੍ਸ ਦਾਨਸ੍ਸ ਫਲਭਾਵੇਨ ਹੋਤਿ, ਅਥ ਖੋ ਅਞ੍ਞਂ ਬਹੁਂ ਇਟ੍ਠਂ ਕਨ੍ਤਂ ਫਲਂ ਹੋਤਿਯੇਵ. ਤਸ੍ਮਾ ਦੇਥੇਵ ਦਾਨਨ੍ਤਿ ਯਥਾ ਤਥਾ ਦਾਨਂ ਦੇਥ ਏਵ. ਤਤ੍ਥ ਕਾਰਣਮਾਹ ‘‘ਦਤ੍ਵਾ ਉਭਯਂ ਤਰਤੀ’’ਤਿ, ਦਾਨਂ ਦਤ੍ਵਾ ਦਿਟ੍ਠਧਮ੍ਮਿਕਮ੍ਪਿ ਸਮ੍ਪਰਾਯਿਕਮ੍ਪਿ ਦੁਕ੍ਖਂ ਅਨਤ੍ਥਞ੍ਚ ਅਤਿਕ੍ਕਮਤਿ. ਉਭਯਂ ਤੇਨ ਦਾਨੇਨ ਗਚ੍ਛਤੀਤਿ ਦਿਟ੍ਠਧਮ੍ਮਿਕਂ ਸਮ੍ਪਰਾਯਿਕਞ੍ਚਾਤਿ ਉਭਯਮ੍ਪਿ ਸੁਖਂ ਤੇਨ ਦਾਨੇਨ ਉਪਗਚ੍ਛਤਿ ਪਾਪੁਣਾਤਿ, ਅਤ੍ਤਨੋ ਪਰੇਸਞ੍ਚ ਹਿਤਸੁਖਵਸੇਨਾਪਿ ਅਯਮਤ੍ਥੋ ਯੋਜੇਤਬ੍ਬੋ. ਜਾਗਰਥ ਮਾ ਪਮਜ੍ਜਥਾਤਿ ਏਵਂ ਉਭਯਾਨਤ੍ਥਨਿਵਾਰਣਂ ਉਭਯਹਿਤਸਾਧਨਂ ਦਾਨਂ ਸਮ੍ਪਾਦੇਤੁਂ ਜਾਗਰਥ, ਦਾਨੂਪਕਰਣਾਨਿ ਸਜ੍ਜੇਤ੍ਵਾ ਤਤ੍ਥ ਚ ਅਪ੍ਪਮਤ੍ਤਾ ਹੋਥਾਤਿ ਅਤ੍ਥੋ. ਆਦਰਦਸ੍ਸਨਤ੍ਥਂ ਚੇਤ੍ਥ ਆਮੇਡਿਤਵਸੇਨ ਵੁਤ੍ਤਂ.

ਵਾਣਿਜੋ ਅਤ੍ਤਨੋ ਕਿਚ੍ਚਂ ਤੀਰੇਤ੍ਵਾ ਪਟਿਨਿਵਤ੍ਤਿਤ੍ਵਾ ਅਨੁਕ੍ਕਮੇਨ ਸਾਵਤ੍ਥਿਂ ਪਤ੍ਵਾ ਦੁਤਿਯਦਿਵਸੇ ਸਤ੍ਥਾਰਂ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸਿਨ੍ਨੋ ਤਂ ਪਵਤ੍ਤਿਂ ਭਗਵਤੋ ਆਰੋਚੇਸਿ. ਸਤ੍ਥਾ ਤਮਤ੍ਥਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਸਮ੍ਪਤ੍ਤਪਰਿਸਾਯ ਧਮ੍ਮਂ ਦੇਸੇਸਿ. ਸਾ ਦੇਸਨਾ ਮਹਾਜਨਸ੍ਸ ਸਾਤ੍ਥਿਕਾ ਅਹੋਸੀਤਿ.

ਅਕ੍ਖਰੁਕ੍ਖਪੇਤਵਤ੍ਥੁਵਣ੍ਣਨਾ ਨਿਟ੍ਠਿਤਾ.